\id 1TI - Zyphe 
\h 1 TIMOTE 
\toc1 TIMOTE KHATEI PAUL CAKUA UIKHEHNAH 
\toc2 1 TIMOTE 
\toc3 1 Tim 
\mt1 TIMOTE 
\mt2 KHATEI PAUL CAKUA UIKHEHNAH 
\c 1  
\p  
\v 1 A ma Pachahtu Khazing le kaa hnabeisuinah a cangpaw Khri Zisu a biapehnah thong tei Khri Zisu apostol a cangpaw kama Paul tah,  
\v 2 zingnah letei ka sawtei hmuisui a cangpaw Timote khatah ca ka ca kua. 
\p Khazing kaa Paw le Khri Zisu kaa Buipaw taiteipaw ningdonah le zawngenah le thlawlungnah cawh na cung letah ung ky seh. 
\s1 Phungbia cawngpahtu pakheipaw sahlo khatah a raeringnah 
\p  
\v 3 Masidonia raang lang ka naening tei ka ca siapaw hrakhei Efesa khuapui lekhei ung thlang la, maco meh thaikheh sahlo khah cawngpahnah ahmang lypaw khah cawngpah khawh ly rua pawtah le,  
\v 4 phungpaw hlawpaw le a chang thai lypaw thokehnah kong letah cai hly cakhawng ly pawtah naw na pae he a. Ma hapaw tahei zingnah thongtah a chuhpaw Khazing rai navy tah a eichonah tukhah a chuasah.  
\v 5 Ma biapehnah heh lungthing pathaipaw le chiachaw thluidangnah chawpaw le zingnah hmuisui taitei a chuhpaw donah khah aa hnui khy nápawtah ka tingpaw a cang.  
\v 6 Mehthaikheh tah ma cawh pavesai he ka, a silang a hnui lypaw bialy biade khah naw aa thlia hri.  
\v 7 Phungbia cawngpahtu cang khah du he ka, canghrasala zemaw aa rei tahpaw le lungcang ngetei tah a pacysah pawhe khah zemaw a cang tahpaw hnih bei heh. 
\p  
\v 8 Canghrasala phungbia cawh a ningcang teitah a hmangpaw caw taco a chah tahpaw kaa hni.  
\v 9 Phungbia cawh mehding cawtah tuapaw cang lytah phungbia zetah a rei lypaw le mehpiathy sahlo, Khazing tlechainah a hnui lypaw le mehsua sahlo le, a pathai lypaw le behnah zetah a rei lypaw sahlo le, lenongpaw sahlo le, a no le paw a thehpaw sahlo le,  
\v 10 a phei a hmangpaw le, a leihopaw le, sae a zua laipaw le, a hinghepaw le, biacenah letei biadih a rei lypaw sahlo aa cawtah tuapaw a cang.  
\v 11 Taico kama letei khingpaw, a laisuipaw Khazing thawngchawbia rungnawpaw a zuipaw adingpaw congpahnah khatei a rae cakahpaw maikaw aa caw zong tah tuapaw a cang. 
\s1 Paul cung letei Abuipaw ningdonah 
\p  
\v 12 Thawzaang a pa peitu Khri Zisu kaa Buipaw letah alawngnah bia ka rei. Ama tah zingchuipaw pa tah ka, a rai hre ruapaw tah a pa thing.  
\v 13 Khuahlai ning taco Khazing a reipachiatu le cawngsaw a hrehlai tu le mehpiathy ka za cang naná teitah ka hni ly cawtah le ka zing ly cawtah ka za tuapaw a cangnah cawtah ka cung letah a zawngenah a langsahpaw a cang.  
\v 14 Kaa Buipaw ningdonah cawh Khri Zisu letei a ungpaw zingnah le donah khatah ka cung letah a hlupui tah a pa luiso. 
\p  
\v 15 Khri Zisu cawh mehsua sahlo pachah rua pawtah ma khazaw lehei a vong tahpaw heh zingchuipaw le pong tlang ngeteipaw a cang. Mehsua sahlo hrong letah kama heh a sua caipaw ka cang.  
\v 16 Canghrasala, ma rawng tahei mehsua sahlo letah a suacaipaw ka cung letah a zawngenah a langsahpaw cang ka, ma cawh a zing lepaw sahlo tah chaizaw hringnah aa hmuh nápawtah Khri Zisu tah a changthai lypaw a lungsynah khah a langsá a tah khah kama letah a mingpaipaw cawtah a cang.  
\v 17 Chaizaw Siangpahrang, a hming paria thlangpaw, hmuh khy lypaw, Ama suipaw Khazing a cangpaw khatah rungnawnah le upahnah vytei cawh chaizaw tah chaizaw tai ung ky seh. Amen. 
\p  
\v 18 Ka sawcapaw Timote, na konglang reihlang ciapaw hrakhei ma chinghringnah heh ca pei neh ka, ma sahlo cawh zui la, raedynah a chawpaw khah na dy khy a.  
\v 19 Chiachaw thluidangnah achawpaw le zingnah cawh a tle my lo. Meh thaikheh tah ma cawh du be ca he ka, aa zingnah cawh apaleh apahnaw tah aa tua thlu.  
\v 20 Ma sahlo hrong letaco Humenai le Alekzandar a tae hrah he. Khazing reipachia aa hmang khawh ly nápawtah aaning cawh Setan kih letah ka hlai thah he. 
\c 2  
\s1 Behnah kong letah cawngpahnah 
\p  
\v 1 Macawtaco, a hmasaw letah ka ca siapaw cawh ming vytei cawtah haepahnah tua le thlawchangnah hnui le thlawchangpahnah le alawngnah bia hlainah tuapaw heh a cang.  
\v 2 Abui sahlo le naw a hnuitu vytei aa cawtah zong de teitah le arai teitah kaa ung khy nápaw tah le Khazing tlechainah hmotah le a pathai teitah khua kaa sah khy nápawtah a cang.  
\v 3 Ma heh achawpaw cang ka, kaa Khazing le Pachahtu a lawng sahpaw cang ka,  
\v 4 Ama tah ming vytei tah pachahnah hmuh he seh la, biahmuisui hninah lang a va ne thlu he seh tah a du cawtah a cang.  
\v 5 Khazing pakheh sui ung ka, Khazing le mehnung aa kaa letah aly lang a seipaw pakheh a ung, Ama cawh mehnung Khri Zisu heh a cang.  
\v 6 Ming vytei tlang nápawtah Ama teitah a peipaw cang ka, Ama cawh a tlahpaw a cai naning letah palangpaw a cang.  
\v 7 Mataico, ma cawpaw tahei tlang y lai rua pawtah le apostol cang rua pawtah thingpaw cang neh ka, biahmuisui ka rei, hing bei neh. Gental cawngsaw sahlo khah zingnah ahmangpaw a cawngpahtu he ka cang. 
\p  
\v 8 Macawtaco zeletahmai tah capaw sahlo taco aa kih pathaipaw khah pazy he seh la, thingaenah le a eichonah ung lytah thlawchang he seh tahpaw ka du. 
\p  
\v 9 Ma hraco canu sahlo zong duchuipaw teitah le a tlahpaw chaichi a tua he seh la, sang phia le sui le lungnaw le a mai a rupaw chaichi tah a pasang kheh he seh.  
\v 10 Canghrasala Khazing a behpaw canu cawtah a tlahpaw tuasanah achawpaw tukhei a pasang hri he seh. 
\p  
\v 11 Canu taco de teitah le raidawnah khatah cawng ruapaw a cang.  
\v 12 Canu tei capaw cung letah cawngpah le nawhnui cawh sai bei neh, canghrasala de teitah bia aa nge ruapaw a cang.  
\v 13 Zecawtamaw tatah Adam cawh tua hmasawpaw cang ka, mataico Evi cawh tua a cang.  
\v 14 Mataico Adam cawh dungkheipaw cang be ca ka, canu tukhah dungkheipaw cang ka, mehsua tah a cang.  
\v 15 Canghrasala canu cawh zingnah letah a ung paria thlang tah donah le a pathai teitah le duchui teitah a ung longmang thlang caco, sawtei a sahpaw aa cangnah cawtah khei pachah aa cang he a. 
\c 3  
\s1 Hotu le hruitu sahlo 
\p  
\v 1 Ma heh zingchuipaw bia a cang. Ahohmai a lungchung tah hotu raihre dunah a hnui caco, raichaw hre a du tahnah a cang.  
\v 2 Hotu rai a hrepaw cawh reipachianah a ung lypaw, canu pakheh pasae a cangpaw, a lung a sypaw, a hraipaking khypaw, zawchuipaw, hluihlang a thaipaw, cawngpah a thaipaw,  
\v 3 zu rui ahmang lypaw, a thing a paching lypaw le a ningnaipaw, a hrychae ahmang lypaw, tangka cho tlechainah a hnui lypaw a cang a.  
\v 4 Ama a ingchungkho khah achaw teitah mingkai tei, a sawtei leh zong tah a bia aa ngepaw le aa cizawpaw a cang a.  
\v 5 Canghrasala, ama a ingchungkho hmai a mingkai khy lypaw tah zekhatamaw Khazing khrisawbu cawh a mingkai khy a?  
\v 6 Ama cawh zingtu thapaw cang a be, ma tah ly co a palai a patui tah ung ka, Setan biacenah hratah a ing sua a.  
\v 7 Ama cawh alailang teipaw cawngsaw zong tah aa reithaipaw mehnung a cang ruapaw a cang, ma tah ly co reipachianah letah tlah tlamy ka, Setan sahrui letah a awh pang a. 
\p  
\v 8 Khrisaw hruitu sahlo zong, ma thly thly hraco, zawchuipaw mehnung, zing a chuipaw, zu a raang lypaw, ahmang lypaw a mia sangnah a hui lypaw a cang he a.  
\v 9 Canghrasala chiachaw thluidangnah lungthing a pathaipaw khatah zingnah biahmuisui khah a tlepaw a cang a.  
\v 10 A hmetaw letah pase taw cang he seh la, ma khy taico aa cung letah suisenah zehmai a ung ly caco khrisaw hruitu rai cawh hre he seh. 
\p  
\v 11 Ma hraco aa nupui sahlo zong cawh cizaw tlang a tlahpaw, bia a du lypaw, zezongpui letah zingchuipaw le a sungnah a hnui khypaw cang he seh. 
\p  
\v 12 Khrisaw hruitu cawh nupui pakheh sui a hnuipaw cang a ka, a ingchungkho le a sawtei leh zong achaw teitah a uh khypaw a cang a.  
\v 13 Rai achaw teitah a hrepaw sahlo taco ming chahnah hmuh a he ka, Khri Zisu zingnah letah raechahnah khah aa hnui a. 
\p  
\v 14 Nama kha a vong pating pawtah ka hnabei a sui ky thlang naná teitah ma biataipaw heh nama khatah ka va ciapaw cang ka,  
\v 15 ma pawco ka va haa sua pawtei a cang caco, biahmuisui thahrang le asuh tung a cangpaw Khazing hring khrisawbu, Khazing ingchungkho lekhei ming vytei tah zehratamaw khua aa sah a tahpaw khah na hni khy a.  
\v 16 Zekhatahmai ei khy a cang lypaw Khazing kaa behnah letei a lemari biaparuh a cangpaw cawh a rungnaw, 
\q1 Ama cawh pungsaw tah a lang ka, 
\q2 Thlawpaw tah mehding a cang tahpaw a palang. 
\q1 Vaiming sahlo tah aa hmuh, 
\q2 phingting hrong letah a kong rei a cang, 
\q1 khazaw cawngsaw mehnung tah aa zing, 
\q2 rungnaw pawtah avai lang lahchy a cang. 
\c 4  
\s1 Timote letah a raeringnah pehpaw sahlo 
\p  
\v 1 Canghrasala Thlawpaw tei a sepaw teitah a reipaw cawh ningchangnah cai letaco mehthaikheh sahlo tah zingnah heh hningchai he ka, dungkhei a hmangpaw thlawpaw le khachia tei a cawngpahpaw hming sahlo khah aa zui a.  
\v 2 Ma hapaw cawngpahnah sahlo cawh cungmai raipha mehing mehru, aa chiachaw thluidangnah khah thaw a palingpaw tei a kangseh ciapaw cawngsaw taitah a chuhpaw a cang.  
\v 3 Aaning sahlo taco zawpui cawh nupui pasae hnui khah thly he ka, Khazing a tuapaw, Ama a zingtu sahlo le biahmuisui a hnihpaw sahlo tah alawngnah bia a hlainah cung tei epaw batui thaikheh khah e aa thly he.  
\v 4 Macawtaco Khazing tei a tuapaw maikaw cawh chah ka, alawngnah biahlainah cung tah cyhlangpaw a cang caco zehmai du ly ruapaw ung be.  
\v 5 Khazing bia le thlawchangná tah pathaisah ciapaw a cangnah cawtah. 
\p  
\v 6 Ma hming sahlo heh uny sahlo khah na thuisah caco he, nama cawh nama tei na zui teipaw, achawpaw cawngpahnah le zingnah hmuisui letei a changchypaw Khri Zisu raihretu chaw na cang a.  
\v 7 Canghrasala Khazing a hnih lypaw aa phunghlaw le macang no sahlo phungpaw aa reipaw lekhei a pahlawh kheh la, Khazing tlechainah letah changchy rua pawtah na thaw chua hri my lo.  
\v 8 Zecawtamaw tatah pungsaw a zongnah cawh mai a hnui bang thlang hrah, canghrasala Khazing tlechainah cawh zezongpui cawtah mai hnui ka, ato hring chung le a va chuh lepaw cai cawpaw tah a chahnaipaw a cang. 
\p  
\v 9 Ma heh zing tlang a cangpaw le cyhlang hmuisui tlang a tlahpaw, aa rei teipaw cawh a cang.  
\v 10 Ma cawpaw tahei raihre peh katei, ka zongpaw peh cawh cang ka, kaa hnabeisuinah cawh Khazing hring, Ama cawh ming vytei a Pachahtu, a zingpaw sahlo a pachah pa-ei dangpaw he cung lekhei kaa chia. 
\p  
\v 11 Ma sahlo heh cawngpah la, bia pei my lo.  
\v 12 Mehny na cang rawng tah ahohmai a minghnawhsah khe lo, canghrasala, a zingpaw sahlo aa cawtah biareinah kong letah cang seh, hringzia kong letah cang seh, donah kong letah cang seh, zingnah kong letah cang seh, pathainah kong letah cang seh a mingpai rua pawtah cang hri my lo.  
\v 13 Ka vong hlai vytei, zawpui sahlo Capathai reipah le phungrei le cawngpah lekhei a pei my lo.  
\v 14 Khrisaw macang sahlo tei na cung letah aa kih pahnia tei, phyhlangnah bia aa reipaw thong tei na hmuhpaw lahsong khah zerei lytah ung kheh lo. 
\p  
\v 15 Ma hapaw kong lehei a biatah la, na pungpaluh tah a pei my lo, ma pawsui co na changchynah zia khah mingting tah aa hmuh a.  
\v 16 Na hringzia le na cawngpahnah khah achaw teitah a raering la, ma hraco tua paria thlang my lo. Ma hratei na tua caco nama le na bia aa ngetu vytei khah na pachah khy he a. 
\c 5  
\s1 Lahme sahlo, macang sahlo, sae sahlo kong letah rawhnah pehnah 
\p  
\v 1 Capaw macang sahlo khah a tangpui tah raw khe lo, canghrasala na paw hratah rawh he la, pasy hri my lo. Capaw mehny vy sahlo khah uny hratah le  
\v 2 canu macang sahlo khah no sahlo hratah le canu nyheh vypaw sahlo khah satei leh hratah lungthing pathai ngetei hmotah mingkai my lo. 
\p  
\v 3 Phahlah pongchang ngetei tah khua a sahpaw lahme sahlo khah achaw teitah mingkai my lo.  
\v 4 Canghrasala ma lahmeno cawh sawtei leh maw, saming sahlo maw a hnui caco he, ma sahlo taco aa ingchungkho mingkainá khei Khazing aa tlechainah cawh a langsah taw he seh. Ma cawh aaning aa sahtu no le paw le aa mano mapaw sahlo khah donah luibah chang tah cang ka, Khazing dupaw zong a cang.  
\v 5 Bongnah a hia hmuisuipaw lahme taco a hnabeisuinah khah Khazing letah chia ka, a ching a zai tah thlawchang tei ka, Khazing khah bongnah a hae tei.  
\v 6 Canghrasala a nawngse tei khua a sahpaw lahme cawh a hring thlang hmotah a thipaw a cang.  
\v 7 Ahohmai suise tah aa ung ly nápawtah, ma cawngpahnah heh zawpui khah thuisah hrah my lo.  
\v 8 Canghrasala ahohmai a sawny ruachai a bawkhang lypaw le a ingchungkho byhianah khah a biapui cai tah a chia lypaw mehnung cawh zingnah a seisaipaw cang ka, a zing lypaw sahlo navy tahmai a pazua vypaw a cang. 
\p  
\v 9 Kung songruh a tling lypaw lahme cawh lahme cazing letah khung kheh la, a pasae cung letah zingchui teitah a za ungpaw,  
\v 10 hmingchaw tuanah kong letei hnithuipaw a cangpaw, a sawtei leh achaw teitah a mingkaipaw, khuachai a dopaw, a pany tei mehpathai sahlo phe a sipaw, a ruhapaw sahlo he a bawkhangpaw, hmingchaw a cangpaw maikaw tuanah kong letah a peipaw a cang caco lahme cazing letah khung thlang my lo. 
\p  
\v 11 Canghrasala a kung a nypaw lahme cawh lahme cazing lekhei khung khe lo, zecawtamaw tatah Khri letei a pehnah pawhe khah canu capaw cang dunah tah a te tih he tah pasae hnui kaw aa du a.  
\v 12 Ma tih taco aaning le aaning bia a ky he a, zecawtamaw tatah athoning tei bia a kangnah pawhe khah aa rorang cawtah a cang.  
\v 13 Ma hlui co raihre hawng khawh beh ca he ka, ing ting letah a khiakaly lai he. Mataico rai aa hre hawng lypaw long khah cang lytah bia du tah male kongchia reilai hmang he ka, rei ly ruapaw zong aa rei lai.  
\v 14 Macawtaco a kung a nypaw lahme sahlo cawh pasae hnui kaw thlang he seh la, sawtei zong sah he seh. Aa ing zong mingkai he seh. Aa caraepaw tei reipachia khynah caichaw pei kheh he seh.  
\v 15 Zemaw ka tah caco, ato zong heh thaikhehpaw cawh Setan zui rua pawtah khei hninglang a paleh thah he. 
\p  
\v 16 Zingtu a cangpaw canu pakheh tah a ingchungkho letah lahme sahlo a hnui caco he baw he seh la, khrisawbu cawtah phorih cang kheh he seh. Ma pawsui co, lahme hmuisui a cangpaw, baw a hia tahtah pawhe khah khrisawbu tah aa baw khy he a. 
\p  
\v 17 Khrisawbu rai letei achaw teitah tlangtlah a thaipaw khrisaw macang sahlo cawh a lehning tah cizaw tlang cang he ka, a biapui cai tah phungrei le cawngpahnah kong letei aa peipaw khah a cang he.  
\v 18 Macawtaco Capathai tah, “Co tungpaw cawh sacaang a cining taco a hmo tongchai khe o,”\x + \xo 5:18 \xt Biary 25:4\x* tah ka, “Rai a hretu cawh hlo a hmuh tlang a cang,”\x + \xo 5:18 \xt Luk 10:7\x* tatah a tah.  
\v 19 Khrisaw macang reipachianah cawh biahnihtu pahning maw, pathung maw aa ung ly caco biapui tah lah ruapaw cang be.  
\v 20 Hmingsua a tuapaw khrisaw macang sahlo cawh zawpui hme letah chingrei la, ma pawsui co cawngsaw hringpaw zong a raering khy he a. 
\p  
\v 21 Khazing le Khri Zisu le thingpaw vaiming sahlo aa mehmuh letah ma cawngpahnah bia heh patliapatlanah le dukhui dangpaw ung lytah zui pawtah ka ca sia. 
\p  
\v 22 Macang thingnah kong lekhei, zening tahmai na lung carang kheh seh la, cawngsaw hringpaw suanah lekhei a pahlawh hrah kheh. A pathai teitah ung a pachia paria thlang my lo. 
\p  
\v 23 Na saw paria thlangnah cawtah le na pavai a saw leimeinah cawtah khei tui longtei ding lytah misurhang a cawngtei tah ding chi my lo. 
\p  
\v 24 Cawngsaw thaikhehpaw sahlo aa suanah cawh a langhai tah cang ka, aa hme letei biacenah hminghmaw khah aa phah palang. Thaikhehpaw suanah tu cawh aa hninglang tah a zui he.  
\v 25 Ma hraco hmingchaw tuanah cawh a langhai ka, a lang ly tahmai tah ahotahmai no khypaw cang be. 
\c 6  
\p  
\v 1 Sae cangnah suihnang rai letei a ungpaw vytei tah aa bui leh khah zezongpui letah aa cizaw ruapaw he a cang takhah aa rawh a hia, ma pawsui co Khazing ming leh kaa cawngpahnah khah reipachia tah cang be.  
\v 2 Mataico zingtu a cangpaw bui aa hnuipaw sahlo tah uny kaa cang peh tatah cizawnah hnui lytah ungpaw cang be. Ma navy co, cizawnah khatah aa rai cawh achaw vy tah aa hrepaw a cang, zecawtamaw tatah aa raihre a chahnah thong tei chahnainah a hmuhpaw abui cawh zingtu uny cang ka, dopaw a cang. Ma hming sahlo heh cawngpah he ceh ka, na sia he a. 
\s1 Tangka cho tlechainah 
\p  
\v 3 Cawngsaw pakheh tah ahmang lypaw cawngpahnah le kaa Buipaw Zisu Khri cawngpahnah le Khazing tlechainah khatei a tlah lypaw a cawngpah caco,  
\v 4 ama cawh a palai a patuipaw cang ka, zehmai a hnih lypaw a cang. Bia a silang kong letah a eichonah le, a hrychae aa dupaw cang ka, aa chuakhuipaw thuipa cawh iavawnah, a hrynah, reipachianah le achaw lypaw lunghringnah a cang.  
\v 5 Mataico thinglung a pialuipaw cawngsaw kaa letah a eichonah ato leh ato tah a chuasah. Ma hratei a ungpaw cawngsaw sahlo cawh biahmuisui a hnui khawh lypaw, Khazing tlechainah cawh tangka cho hmuhnah cawtah a rawhpaw sahlo a cang he. 
\p  
\v 6 Canghrasala lungui teitah Khazing tlechainah cawh ahlupui tah amia hmuhnah a cang.  
\v 7 Ma khazaw lehei zehmai a naekhui be ca peh ka, zehmai zong seikhui khy hra bei peh.  
\v 8 Canghrasala e rua le a buhsai rua kaa hnui caco, ma leco kaa lung a tlingpaw a cang.  
\v 9 Canghrasala hnuirungnah a dupaw cawngsaw sahlo cawh tuhsonah lang le ahui lang le hruchuipaw le chahlynah a chuakhuipaw dunah lang tlah he ka, ma taco rorangnah le lydenah cawh a chuakhui.  
\v 10 Zecawtamaw tatah tangka dusawnah cawh chahlynah phing maikaw a thahrang a cang. Tangka cho letah a du a sahpaw mehthaikheh sahlo cawh zingnah taitah vezi he ka, lung reithuinah hlupui khah aaning teitah a lah he. 
\s1 Paul tei Timote a siapaw rai 
\p  
\v 11 Canghrasala, nama, Khazing mehnung cawh, ma vytei heh saisai la, dingnah, Khazing tlechainah, zingnah, donah, ing khynah le ningnainah tah ung a zawng my lo.  
\v 12 Achawpaw dynah zingnah cawtah khei dy my lo. Chaizaw hringnah khah cyky tah a tle my lo. Biahnihtu ming hlupui hme letah a chawpaw biaphynah na hnui ning takhei ma hringnah heh hnui pawtah y na cang kho.  
\v 13 Zezong hringnah a peitu Khazing hme letah le Pontia Pilat hme letah biadih a dawkhuitu Khri Zisu hme letah ka ca siapaw cawh,  
\v 14 kaa Buipaw Zisu Khri a za lang hlai vytei suisenah le pialuinah ung lytah ma biapeh heh na zuipaw a cang.  
\v 15 Ma cawh a cai a zaw tihtah vaicung taikhei, Khazing tah va palang tae ka, a laisuipaw Khazing a cangpaw, Ama suipaw uhtu a cangpaw, siangpahrang vytei letah Siangpahrang, abui vytei letah Abui,  
\v 16 Ama suipaw cawh a thi thai lypaw, a ne khy a cang lypaw khainah letei a ungpaw, ahotahmai hmuh bang lypaw le hmuh khy a cang lypaw a cang. Ama letaco rungnawnah le hmingtuakhynah vytei cawh chaizaw tah ung ky seh. Amen. 
\p  
\v 17 Atocai letei mehrung sahlo heh a palai a patuipaw cang ly pawtah le a lyde palangpaw rungnah letah aa hnabeisuinah chia ly pawtah le zezongpui khah a nawng teitah hmang pawtah a hlui pui tah a ma peitu Khazing khatah aa hnabeisuinah khah chia pawtah bia na pae he a.  
\v 18 Hmingchaw tua pawtah le hmingchaw tuanah letah mehrung cang pawtah le mehechah cang pawtah le pehlai a dupaw cang pawtah bia pei my lo.  
\v 19 Ma hrahei a va chuh lepaw cai cawtah vaicung cho cawh pacung he ka, aa cawtah a cypaw thahrang a cang a. Ma pawsui co, hringnah hmuisui a cangpaw hringnah khah a la tah, aa tle khy a. 
\p  
\v 20 Timote, Khazing tah mingkaipaw tei a ca pehpaw khah mingkai my lo. Khazing tlechai lynah bia rei cakhawng le singnah aa tahpaw a pakheipaw singnah kong letah a eichonah sahlo khah cahri my lo.  
\v 21 Mehthaikheh tah ma hnithainah cawh kaa hnui tah he ka, zingnah taikhei a vezi thah he. 
\p Ningdonah cawh nama khatah ung ky seh.