\id TIT 
\ide UTF-8
\h TITO
\toc1 DIŽA' DA' BSEḺA' PABLO CHE X̱KWIDE' TITO
\toc2 TITO
\toc3 Tit.
\mt1 DIŽA' DA' BSEḺA' PABLO CHE X̱KWIDE' TITO
\c 1
\s1 Pablo žape' “Padiox̱” x̱kwide' Tito
\p
\v 1 Neda', Pablo, žapa' le' “Padiox̱” ljéža'do' Tito. Nako' ka ẕi'nkza' dan' bénḻeno' neda' tẕen žin che Benne' Criston'. Naka' wen žin che Dios, na' benne' wbás bseḻa' Jesús, Benne' Criston'. Bseḻe'e neda' nich gona' ga chejḻe'gak benách ka' chie' Ḻe', benne' ka' wžekze Dios, nich gónbia'gake' da' naken dot da' li kan žaḻa' gon no benne' nónbi'e Dios. 
\v 2 Ki naka' neda' dan' žx̱en ḻaža'a ba nzi'a yeḻa' nban da' zejlí kanne da' bchebe ḻaže' Dios wneẕjwe' chežo žo'o ža ni'te kate' bi na' gata' yógo'te da' zej nnitan', na' Ḻe' žonkze' da' bchebe ḻaže'e gonen'. 
\v 3 Kate' bžin ža chen, Dios bḻoe'ele' ḻaw x̱tiže'e, da' bdien' ḻo na'a neda' wchaḻjan'. Dios na'kze gože' neda' gona' ki. Nakkze' Ḻe' Benne' Weslá chežo. 
\v 4 Ẕnnabla' X̱ažo Dios ḻen X̱anžo Jesús, Benne' Criston', Bennen' beslé' žo'o, gon chawe'e le', na' yeyache' ḻáže'le' le', na' wká'n žie' yichj ḻaẕdo'o.
\s1 Žin che Jesús da' žon Tito ḻo yežlyó Creta
\p
\v 5 Bka'na' le' ḻo yežlyó Creta, nich wsó'o da' žiážjegekle benách ka' che Benne' Criston', benne' ka' nníta'gake' ga na', nich gákgake' dot ḻi ḻaže', na' nich wnnito'o benne' gole ka' yógo'te yež ka', benne' ka' gape chí'igake' benách ka' che Benne' Criston', benne' ka' nníta'gake' to to yež ka', kan ba goža' le' gono'. 
\v 6 To benne' gole, benne' žape chi'e benách ka' che Benne' Criston':
\q1 Žaḻa' gake' benne' bi žone' da' gak no benne' nnie' chen.
\q1 Žaḻa' soa toze ẕo'le'.
\q1 Žaḻa' chejḻe'gak ẕi'ne' ka' che Benne' Criston'.
\m (Bi žaḻa' góngakbe' da' gak no benne' nnie' chen, bi nne' bi žóngakbe' žin, o ẕží'igakbe' che x̱a x̱ná'gakbe'.)
\q1
\v 7 Bi žaḻa' gone' da' gak no benne' nnie' chie' kan žone' x̱chin Dios.
\q1 Bi žaḻa' gake' benne' zide, o benne' ža'a,
\q1 o benne' že'je', o benne' wediḻe diža',
\q1 o benne' ẕdan ḻaže'e yeḻa' gape.
\q1
\v 8 Žaḻa' wneẕjwe' gan ga'ngak lježžo ka' želžine' liže'.
\q1 Žaḻa' dan ḻaže'e gone' da' naken chawe'.
\q1 Žaḻa' gake' benne' žejni'ile'.
\q1 Žaḻa' gake' benne' chawe'.
\q1 Žaḻa' žebe' Dios, na' nna bia' kwine'.
\m
\v 9 Žaḻa' gape chi'e diža' da' li kan ba nsedle', nich gak wzejni'ile' benách ka' kan naken tḻebe ḻen da' chawe' da' žsedlžo, na' nich gak wzóa žie' benne' ka' ẕží'igake' chen.
\p
\v 10 Ki žaḻa' gak gone' dan' ẕži'igak benne' zan che x̱tíža'žo, benne' ka' ẕcháḻjgake' da' bi zakan', na' žon ḻáže'gekle' benách ka'. Benne' zan, benne' žóngake' ki, zej nake' benne' judío ka', benne' ka' ẕnnágake' žon byenen chog ḻo x̱péḻa'gak benne' byo ka' da' nak bian' zej nzi'e x̱tiža' Dios. 
\v 11 Benne' ki, žon byenen wzóa žio' ḻégake', dan' ẕchíx̱gake' yógo'te benách ka' nníta'gake' bíte'teze yo'o gan želyoé'e, na' žsédgekle' da' bi žaḻa' wsédgekle'. Ki žóngake' nich sí'gakze' mežw.
\p
\v 12 To benne' wbábḻene' benách Creta ka' gan zo', bennen' bchaḻje' ḻo wláz yodo' chégake', wnné':
\q1 Žon ḻáže'tezgak benne' Creta ka'.
\q1 Zej nake' ka beko' yix̱e' snia ka'.
\q1 Zej nake' benne' ẕa'wed, benne' wawḻe'e ka'.
\m
\v 13 Da' ni da' bchaḻje' kan zej nake' naken dot da' li. Che ḻen bdíḻ-gake' nich gak ḻi ḻaže' kan žejḻé'gake' che Benne' Criston', 
\v 14 na' nich bi wzé nággake' diža' ka'ze ka' da' ẕchaḻjgak benne' judío ka', na' bi góngake' kan ẕnna benách ka' žaḻa' góngake', benne' ka' bzóagake' cheḻa'ale da' naken dot da' li.
\p
\v 15 Yógo'te da' non Dios naken chawe' chegak benne' chawe' ka', san chegak benne' ka' bi zej nake' chawe', benne' ka' bi žejḻé'gake' che Dios, bi be zoaḻen ḻégake' da' naken chawe', san dot da' zej nake' naken sban, na' zejte da' ẕbek yíchjgake', na' da' ẕza' ḻáže'gake'. 
\v 16 Ẕnnágake' zej nónbi'e Dios, san da' žóngake' bi naken tḻebe ḻen dan' ẕnnágake', dan' zej nake' benne' bi žaz ḻaže' ka'. Bi žóngake' kan ẕnnágake', na' bi gak góngake' nitó da' naken chawe'.
\c 2
\s1 Žaḻa' wsedlžo da' naken chawe'
\p
\v 1 Na'a, da' ẕchaḻjo' žaḻa' gaken tḻebe ḻen da' chawe' da' žsedlžo.
\m
\v 2 Bsedle benne' byo, benne' gole ka':
\q1 Žaḻa' wcháḻjgake' diža' chawe' ka'.
\q1 Žaḻa' gákgake' benne' chawe' ka'.
\q1 Žaḻa' gákgake' benne' žejní'igekle'.
\q1 Žaḻa' chejḻé'gake' che Benne' Criston' dot ḻáže'gake'.
\q1 Žaḻa' ží'igekle' ljéžgake' ka'.
\q1 Žaḻa' sóegekle' da' gak chégake'.
\m
\v 3 Bsedle no'le gole ka':
\q1 Žaḻa' góngake' da' žaz ḻaže' Dios.
\q1 Bi žaḻa' nnégake' che ljéžgake' ka'.
\q1 Bi žaḻa' yé'jgake'.
\q1 Da' žóngake' žaḻa' wsedlen da' nak chawe'.
\m
\v 4 Bsedle x̱kwide' no'le ka'.
\q1 Žaḻa' ží'igeklbe' benne' byo che chégakbe', na' ẕí'ngakbe' ka'.
\q1
\v 5 Žaḻa' gákgakbe' no'le žejni'ile.
\q1 Žaḻa' gákgakbe' no'le chawe' ka'.
\q1 Žaḻa' gape chí'igakbe' da' de lížgakbe'.
\q1 Žaḻa' gákgakbe' ži'i ḻaže'.
\q1 Žaḻa' gápegakbe' ba la'ne benne' byo che chégakbe'.
\q1 Žaḻa' bi góngakbe' da' gonen ga no benne' nnie' che x̱tiža' Dios.
\m
\v 6 Bsedle x̱kwide' byo ka':
\q1 Žaḻa' gákgakbe' x̱kwide' žejni'ile.
\m
\v 7 Žaḻa' góntezo' da' naken chawe', na' ki wḻoe'elo' ḻégakbe' kan žaḻa' góngakbe'. Kan žsedlo' žaḻa' wḻoe'elen nako' ḻi ḻaže', na' gax̱jw ḻaže'. 
\v 8 Žaḻa' wchaḻjo' diža' chawe' ka' nich bi soa da' gak no benne' nnie' chen, nich yedoe'ele no benne' wži'e chen, na' bi gak nnie' chele ḻe'e.
\m
\v 9 Bsedle lježžo ka', benne' žejḻé'gake' che Benne' Criston', na' zej nake' benne' ndo'w ka':
\q1 Žaḻa' gákgake' gax̱jw ḻaže' ḻen x̱ángake' ka'.
\q1 Žaḻa' góngake' yógo'te da' žaz ḻáže'gak x̱ángake' ka'.
\q1 Bi žaḻa' wží'igake' che x̱ángake' ka'.
\q1
\v 10 Bi žaḻa' wkache' lángake' da' naken che x̱ángake' ka'.
\q1 Žaḻa' wḻoé'el kwíngake' chawe' ḻo yógo'te da' žóngake'.
\q1 Yógo'te da' žóngake' žaḻa' wḻoe'elen nak chawe' x̱tiža' Dios, Bennen' beslé' žo'o.
\p
\v 11 Yeḻa' ži'i ḻaže' che Dios ba bḻa' ḻawn ḻawgak yógo'te benách ka' nich yelágake'. 
\v 12 Ḻen žsedlen žo'o biž žaḻa' gonžo da' bi žaz ḻaže' Dios, na' bi dan ḻáže'žo da' naken che yežlyó nga, san žaḻa' gakžo ẕen ḻaže', na' gakžo chawe' ža ni zoažo na'a, na' gonžo kan žénekzele Dios. 
\v 13 Žaḻa' kwezžo da' žx̱en ḻáže'žo gonen ga gak yeḻa' ba nez ẕen chežo, dan' gaken ža na' katen' ḻa' ḻaw Jesús, Benne' Criston', ḻo baní' ẕen chie'. Nake' Dios ẕen, na' Bennen' žeslé' žo'o. Ḻekze' bchebe ḻaže'e gone' da' ni. 
\v 14 Ḻekze' bde kwine' ḻo wlazžo žo'o, nich beya'we' žo'o ḻo yógo'te da' bi naken chawe', na' žeyone' žo'o chawe' nich gakžo benách chie' ka', na' nich yénelžo gonžo da' naken chawe'.
\p
\v 15 Bsedle da' ki, na' bzejni'ilen benne' ka', na' ḻen yeḻa' wnná bia' bdiḻ-gake'. Bénteze ki, nich bi gak no benne' wka'ne' x̱tižo'o ka'ze.
\c 3
\s1 Da' žaḻa' gongak benách ka' žejḻé'gake' che Jesús
\p
\v 1 Bsa' ḻáže'gak lježžo ka' nich góngake' kan ẕnnagak benne' ka' nzi' ḻo ná'gake' yeḻa' wnná bia', na' benne' yolawe' ka', nich góngake' kan ẕnna x̱tíža'gake'. Žaḻa' sóatezgake' góngake' da' naken chawe'. 
\v 2 Bi žaḻa' nnégake' chegak ljéžgake' ka', na' bi žaḻa' tiḻ díža'gake' len ḻégake', san žaḻa' gákgake' gax̱jw ḻaže', na' dot ḻi ḻaže' ḻawgak yógo'te benách ka'.
\p
\v 3 Ḻezka' žo'o, zga'ale gokžo benne' bi žejni'ile ka', na' bži'ižo che Dios. Wdažo wnitlžo, na' gokžo ka benne' ndo'w ka', dan' benžo da' bdan ḻáže'žo, da' bi naken chawe', na' yezika' da' wyáz ḻáže'žo. Ḻezka' benžo žo'o da' kegle, na' bge'elžo lježžo ka'. Bi bḻé'egekle benách ka' žo'o chawe', na' žo'o bi bḻe'elžo lježžo ka' chawe' tožo yetožo. 
\v 4 Naž bḻa' ḻaw Dios, Bennen' žeslé' žo'o, na' nak bia' nake' dot chawe', na' nži'ile' yógo'te benách ka'. 
\v 5 Beslé' žo'o, kege dan' zoa bi da' naken chawe' da' benžo žo'o, san dan' beyache' ḻáže'le' žo'o. Beyone' žo'o chawe', na' bene' ga nakžo benne' kobe ka'. Napžo yeḻa' nban kobe dan' zoaḻen Dios Be' La'y žo'o. 
\v 6 Dios bseḻe'e Dios Be' La'y chežo dan' nakžo che Jesús, Benne' Criston', Bennen' žeslé' žo'o. 
\v 7 Be' ḻaže'e chežo, na' beyone' žo'o chawe' nich gata' yeḻa' nban da' zejlí kanne chežo, dan' žx̱en ḻáže'žo gonne' chežo.
\p
\v 8 Da' ni da' ẕzoja' chio' le' naken dot da' li. Žénela' wsedlo' benne' ka' žejḻé'gake' che Dios, da' ki, nich we' ḻáže'gake' góntezgake' da' naken chawe'. Da' ni naken chawe', na' záka'ḻe'en nich si' ḻo na'gak yógo'te benách. 
\v 9 Na'a, bi go'o no benne' latje wchaḻje' da' bi zakan', o we' ḻaže'e kan zej nak lagak da' zan kwe' x̱a x̱to'gak benách ka', o wchaḻje' diža' biẕjw ka', o tiḻ diže'e kan nak che da' bchi'le Moisés. Da' ki bi zej zakan', na' bi gákḻengaken nitó benne'.
\p
\v 10 Cha' zoa no benne' ga na', benne' žone' chope ḻa'a benách ka' che Benne' Criston', te wsó'o ḻaže'e to yetó chi'i, cha' bi yenle' chio', na' žaḻa' yebejle-ne' gan ẕdoble. 
\v 11 Nnézkzelo' to benne' žone' ki ba beyake' benne' bi nake' chawe', na' žone' doḻa'. Ba nbage'e ẕia ni'a che dan' žone'.
\s1 Da' bzoj Pablo da' žaḻa' gon Tito
\p
\v 12 Kate' seḻa'a Artemas o Tíkiko gan zo', ben byen yido' ga zoa' ni ḻo yež Nikópolis, dan' ba besyožan' ga'na' nga byo' zag ka'. 
\v 13 Senas, bennen' ẕdie' diža' da' ẕnna benne' yolawe', na' Apolo, žíngake' gan zoale ḻe'e. Begó'o ḻégake' nez ḻen yeḻa' žakḻen, nich bi be yážjegekle'. 
\v 14 Bsedle lježžo ka' góntezgake' da' naken chawe', nich gata' bi da' wnéẕjwgake' chegak benne' ka' zoa bi da' žiážjegekle', nich gak bia' ki zej nake' che Benne' Criston'.
\s1 Pablo ḻen lježe' ka' ẕzélgake' diža' benách ka'
\p
\v 15 Yógo'te benne' ka' nníta'ḻengake' neda' žápegake' le' “Padiox̱.” Wdape “Padiox̱” benne' ka' nníta'gake' ga na', benne' ka' zej nži'ile' žo'o dan' žejḻé'gake' che Dios. Ẕnnabla' Dios gon chawe'e yógo'tele ḻe'e. Ka'kze gaken.