\id PHP  
\h Filipenses 
\toc1 DIDZAꞌ BSÖLËꞌË PABLO YÖDZ FILIPOS 
\toc2 Filipenses 
\toc3 Fil. 
\mt1 DIDZAꞌ BSÖLËꞌË PABLO YÖDZ FILIPOS 
\c 1  
\s1 Pablo rugapëꞌ Dios bunách queëꞌ Cristo nacuꞌë Filipos 
\p  
\v 1 Nedaꞌ, Pablo, lencaꞌ biꞌi Timoteo, nactuꞌ huen dxin queëꞌ Jesucristo. Rugapaꞌ Dios lbiꞌiliꞌ, réjlëꞌliꞌ Cristo, len lbiꞌiliꞌ, dë lu naꞌliꞌ xchinëꞌ Cristo, len lbiꞌiliꞌ, run chiꞌliꞌ bunách queëꞌ Cristo, zoaliꞌ Filipos, náquiliꞌ queëꞌ Dios len nacliꞌ tuz len Jesucristo.  
\v 2 Rnabdaꞌ‑nëꞌ Xuzruꞌ Dios lencaꞌ Xanruꞌ Jesucristo gunnëꞌ queëliꞌ le ruzáꞌ ladxëꞌë queëruꞌ len gunëꞌ ga soa dxi icj ládxiꞌdauꞌliꞌ. 
\s1 Pablo rnabnëꞌ Dios bi gunëꞌ quegac bunách taꞌyejlëꞌ Cristo 
\p  
\v 3 Rëpaꞌ‑nëꞌ Dios: Xclenuꞌ, catiꞌ rzaꞌ ladxaꞌa queëliꞌ.  
\v 4 Catiꞌ rulidzaꞌ‑nëꞌ Dios len rnabdaꞌ‑nëꞌ gáclenëꞌ lbiꞌiliꞌ, rudziji ladxaꞌa  
\v 5 le rajneydaꞌ ca bénlenliꞌ nedaꞌ tsazxö́n dxin qui didzaꞌ dxiꞌa, gzu lauliꞌ runliꞌ dxin naꞌ dza niꞌ ziꞌa byö́niliꞌ, len runliꞌ lei ga rdxintë naꞌa dza.  
\v 6 Dios gzu lahuëꞌ runëꞌ tu le nac dxiꞌa lu icj ládxiꞌdauꞌliꞌ. Ruzxöni ladxaꞌa Lëꞌ gúnteczëꞌ cni ga gdxintë dza huödëꞌ Jesucristo.  
\v 7 Ca naꞌ rzaꞌ ladxaꞌa queëliꞌ nac ca ral‑laꞌ gunaꞌ le nadxíꞌitsquidaꞌ lbiꞌiliꞌ. Yúguꞌtëliꞌ ruziꞌliꞌ xbey tsazxö́n len nedaꞌ le ruzáꞌ ladxëꞌë queëruꞌ Dios, tsal ni yuꞌa lidx guia, len lëzcaꞌ cni benliꞌ catiꞌ niꞌ bëꞌa didzaꞌ, benaꞌ lban qui didzaꞌ dxiꞌa len benaꞌ ga bdxin queëliꞌ tsaz.  
\v 8 Nözcznëꞌ Dios ca nadxíꞌitsquidaꞌ lbiꞌiliꞌ, nac ca naꞌ nadxíꞌitsquinëꞌ rëꞌu Lëczëꞌ Jesucristo.  
\v 9 Rnabdaꞌ‑nëꞌ Dios gunëꞌ ga gdxiꞌirliꞌ lzaꞌliꞌ, len gátaꞌtsca queëliꞌ yöl‑laꞌ rac szxöni len yöl‑laꞌ rejniꞌi gdu  
\v 10 quië gac cöliꞌ le nactër dxiꞌa. Chquiꞌ gac cni queëliꞌ, gacliꞌ gdu dxiꞌa atiꞌ nutu nu gac bi gnë queëliꞌ dza niꞌ huödëꞌ Cristo.  
\v 11 Le nacliꞌ nac bëꞌ le nac dxiꞌa runëꞌ Cristo lu icj ládxiꞌdauꞌliꞌ quië glaꞌ lahui yöl‑laꞌ yeníꞌ queëꞌ Dios len gac queëꞌ yöl‑laꞌ ba. 
\s1 Zoaruꞌ nabanruꞌ quië gacruꞌ ca naquëꞌ Cristo 
\p  
\v 12 Böchiꞌ lzaꞌadauꞌ, rëꞌndaꞌ gnö́ziliꞌ lë ni: Yúguꞌtë le guc quiaꞌ guclen nedaꞌ quië gzxáquiꞌrdaꞌ benaꞌ lban qui didzaꞌ dxiꞌa.  
\v 13 Cni guc, yúguꞌtë niꞌa naꞌquëꞌ bönniꞌ yúlahuiꞌ len yezícaꞌrëꞌ bönniꞌ ni nözcnëꞌ yuꞌa lidx guia ni le runaꞌ xchinëꞌ Cristo.  
\v 14 Le yuꞌa nedaꞌ lidx guia ni ben ga nácgacrëꞌ rugu ladxiꞌ yelatiꞌz cunuhuö́agactëꞌ bö́chiꞌruꞌ, tuꞌzxöni ládxiꞌquëꞌ Xanruꞌ len cutur tádxinëꞌ tunëꞌ lban qui xtidzëꞌë Dios. 
\p  
\v 15 Le nactë tunëꞌ lban queëꞌ Cristo laꞌquëꞌ le tuꞌzxéꞌinëꞌ nedaꞌ len taꞌdil‑lëꞌ, san yelaꞌquëꞌ tunëꞌ lban queëꞌ gdu ládxiꞌquëꞌ.  
\v 16 Bönniꞌ tuꞌzxéꞌinëꞌ naꞌ tunëꞌ lban queëꞌ Cristo lu yöl‑laꞌ run ba zxön cuinquëꞌ len clëg gdu ládxiꞌquëꞌ. Tëꞌnnëꞌ lusacaꞌ ziꞌë nedaꞌ tsal ni yuꞌa lidx guia.  
\v 17 Bönniꞌ gdu ládxiꞌquëꞌ naꞌ, lu yöl‑laꞌ nadxíꞌi quequëꞌ tunëꞌ lban queëꞌ, le nözcnëꞌ Dioscz budödëꞌ lu naꞌa dxin runaꞌ, runaꞌ lban qui didzaꞌ dxiꞌa.  
\v 18 Cutu run ga röꞌa baguíꞌi lë naꞌ. Rudzijdaꞌ le rac lban queëꞌ Cristo náctiꞌtëz, zal‑laꞌ tunëꞌ lban gdu ládxiꞌquëꞌ o cutunëꞌ lei cni. 
\p Naꞌa, rudzijrdaꞌ  
\v 19 le nözdaꞌ uláꞌ lu le rac quiaꞌ, yuꞌa lidx guia ni, le rulidzliꞌ‑nëꞌ Dios len le ráclenëꞌ nedaꞌ Dios Böꞌ Laꞌy, Nu rsölëꞌë queëruꞌ Jesucristo.  
\v 20 Cni rëꞌndaꞌ, len ruzxöni ladxaꞌa‑nëꞌ Dios, gunëꞌ ga cutu utuiꞌdaꞌ, len gunëꞌ ga gac guꞌa didzaꞌ lu yöl‑laꞌ rugu ladxiꞌ, atiꞌ lu naꞌa nedaꞌ gactecz yöl‑laꞌ ba queëꞌ Cristo naꞌa dza len yuguꞌ dza ziꞌa zaꞌc, zal‑laꞌ gun bayúdx gatteaꞌ o soaꞌ gbanaꞌ.  
\v 21 Ca runi nedaꞌ, chquiꞌ zoaꞌ nabanaꞌ, nac quië gacaꞌ ca naquëꞌ Cristo, len chquiꞌ gatiaꞌ, nac tu le uziꞌraꞌ xbey.  
\v 22 Chquiꞌ huac gunaꞌ dxin le gaclen didzaꞌ dxiꞌa queëꞌ Cristo chquiꞌ soazaꞌ gbanaꞌ, cutu nözdaꞌ bizxal ral‑laꞌ cöaꞌ.  
\v 23 Nac baníg cöaꞌ. Rëꞌndaꞌ gatteaꞌ quië tsajsóalenteaꞌ‑nëꞌ Cristo, le gactër dxiꞌa quiaꞌ lë naꞌ,  
\v 24 san runr bayúdx soazaꞌ gbanaꞌ quië sáquiꞌdaꞌ gáclenaꞌ lbiꞌiliꞌ.  
\v 25 Le nözdaꞌ nac cni, nözdaꞌ caꞌ ugáꞌnlenaꞌ lbiꞌiliꞌ quië gáclenaꞌ lbiꞌiliꞌ quië gacr gdu ca réjlëꞌliꞌ Cristo, atiꞌ udzíjirliꞌ le réjlëꞌliꞌ Lëꞌ.  
\v 26 Cni nac, dusóalenaꞌ lbiꞌiliꞌ leyúbl, le gun ga gdzag ládxiꞌliꞌ‑nëꞌ Jesucristo niꞌa qui le gunëꞌ, gáclenëꞌ nedaꞌ. 
\p  
\v 27 Gul‑güíꞌ ládxiꞌzliꞌ gacliꞌ ca rajlö́z didzaꞌ dxiꞌa queëꞌ Cristo. Cni gac, chquiꞌ duyúaꞌ lbiꞌiliꞌ o chquiꞌ soaꞌ ziꞌtuꞌ, huayöndaꞌ nacliꞌ tsutsu len nacliꞌ tuz, runliꞌ tsazxö́n dxin qui le réjlëꞌruꞌ le zaꞌ queëruꞌ niꞌa qui didzaꞌ dxiꞌa.  
\v 28 Cutu güiꞌliꞌ latj lun gadxi lbiꞌiliꞌ nup cutaꞌleꞌi lbiꞌiliꞌ dxiꞌa. Lë ni uluíꞌi lequëꞌ laꞌnitiëꞌ, san ulaliꞌ lbiꞌiliꞌ, le gac bëꞌ ráclenëꞌ lbiꞌiliꞌ Dioscz.  
\v 29 Dios ruꞌë lbiꞌiliꞌ latj gunliꞌ xchinëꞌ Cristo, clëgz ca réjlëꞌliꞌ Lëꞌ, san lëzcaꞌ ca rzacaꞌ rguiꞌliꞌ runliꞌ xchinëꞌ.  
\v 30 Naꞌa, gac gunliꞌ nedaꞌ tsazxö́n güiꞌ ládxiꞌruꞌ gunruꞌ lban qui didzaꞌ dxiꞌa. Bléꞌiczliꞌ ca gzxacaꞌ gdiꞌa catiꞌ benaꞌ cni ziꞌal, atiꞌ ryö́niliꞌ ca rzacaꞌ rguiꞌa caꞌ naꞌa. 
\c 2  
\s1 Guquëꞌ nöxj ladxiꞌ Cristo, atiꞌ bdél‑liꞌnëꞌ yöl‑laꞌ zxön 
\p  
\v 1 Chquiꞌ rutipëꞌ ládxiꞌliꞌ Cristo, len chquiꞌ lu yöl‑laꞌ nadxíꞌi queëꞌ ruhuechiꞌ ladxëꞌë lbiꞌiliꞌ, len chquiꞌ nacliꞌ tuz len Dios Böꞌ Laꞌy, len chquiꞌ nadxiꞌiliꞌ lzaꞌliꞌ len ruhuechiꞌ ládxiꞌliꞌ lzaꞌliꞌ tuliꞌ yetuliꞌ,  
\v 2 gul‑gún ga udziji ladxaꞌa. Quië gunliꞌ cni, ral‑laꞌ gacliꞌ tuz len lzaꞌliꞌ len gac tuz ca nadxiꞌiliꞌ lzaꞌliꞌ tuliꞌ yetuliꞌ. Lëzcaꞌ cni ral‑laꞌ gacliꞌ tuz lu böꞌ nacczliꞌ len ca rzaꞌ ládxiꞌliꞌ.  
\v 3 Ca nac le runliꞌ, cutu bi ral‑laꞌ gunliꞌ lu yöl‑laꞌ rudul‑liꞌ queëliꞌ o quië gun ba zxön cuinliꞌ, san dxíꞌadauꞌ ral‑laꞌ gunliꞌ yúguꞌtë, cutu gáquiliꞌ nadél‑liꞌrliꞌ lbiꞌiliꞌ ca lzaꞌliꞌ.  
\v 4 Gul‑güíꞌ ládxiꞌliꞌ gac dxiꞌa caꞌ qui lzaꞌliꞌ len clëg queëzliꞌ. 
\p  
\v 5 Ral‑laꞌ gacliꞌ nöxj ladxiꞌ ca naꞌ guquëꞌ nöxj ladxiꞌ Jesucristo.  
\v 6 Lëꞌ nacczëꞌ tuz ca naquëꞌ Dioscz, san cutu gúquinëꞌ ral‑laꞌ gunëꞌ bayúdx ugaꞌnëꞌ tuz ca naꞌ naquëꞌ Dios.  
\v 7 Bucaꞌnczëꞌ yúguꞌtë le napëꞌ, len ben cuinëꞌ ca tu bönniꞌ nadaꞌu. Guljëꞌ ca talj bunách len guquëꞌ gdu bunách.  
\v 8 Catiꞌ niꞌ naquëꞌ bönniꞌ, guquëꞌ nöxj ladxiꞌ len benëꞌ ca rna xtidzëꞌë Dios, gutiëꞌ. Gdëꞌë lëꞌi yag cruz ca naꞌ rac queëꞌ bönniꞌ gdödi bunách.  
\v 9 Qui lë ni naꞌ Dios buchisëꞌ Lëꞌ, benëꞌ ga naquëꞌ blau niꞌ yehuaꞌ yubá, len benëꞌ ga lëꞌ le nactër blau ca yúguꞌtë lagac bunách.  
\v 10 Cni benëꞌ Dios quië catiꞌ laꞌyöni ca naꞌ lëꞌ Jesús, luzechu zxibgac yúguꞌtë nup nacuáꞌ yehuaꞌ yubá, len yödzlyú, len lu latj chul.  
\v 11 Yúguꞌtëꞌ laꞌguixjöꞌë yalj lulu naquëꞌ Xanruꞌ Jesucristo quië gac yöl‑laꞌ ba queëꞌ Xuzruꞌ Dios. 
\s1 Ral‑laꞌ gacruꞌ ca le taꞌgúꞌu yeníꞌ yödzlyú ni 
\p  
\v 12 Qui lë ni naꞌ, böchiꞌ lzaꞌadauꞌ, ca naꞌ benliꞌ ca rna xtidzaꞌa catiꞌ niꞌ zóalenaꞌ lbiꞌiliꞌ, runr bayúdx gunliꞌ ca rna xtidzaꞌa naꞌa, tsal ni zoaꞌ ziꞌtuꞌ ga zoaliꞌ. Gul‑gún xchinëꞌ Xanruꞌ ga gdxintë dza udx uslë́ꞌ lbiꞌiliꞌ. Gul‑gún cni lu yöl‑laꞌ radxi queëliꞌ Lëꞌ len lu yöl‑laꞌ rzxiz.  
\v 13 Lëczëꞌ Dios runëꞌ dxin lu icj ládxiꞌdauꞌliꞌ, runëꞌ ga rë́ꞌniliꞌ gunliꞌ le rdzag ladxëꞌë Lëꞌ len runëꞌ caꞌ ga sáquiꞌliꞌ gunliꞌ lë naꞌ. 
\p  
\v 14 Gul‑gún yúguꞌtë le ral‑laꞌ gunliꞌ, cutu bi gnëliꞌ qui, len cutu til‑l dídzaꞌliꞌ.  
\v 15 Cni ral‑laꞌ gunliꞌ, cui gac nu bi gnë queëliꞌ, san quië gacliꞌ zxiꞌnëꞌ Dios, nacliꞌ gdu dxiꞌa yödzlyú ga ni zoaliꞌ ladj bunách cunacgac tsahuiꞌ len nucaꞌngac Dios. Lbiꞌiliꞌ rguꞌliꞌ yeníꞌ ladjquëꞌ ca naꞌ taꞌgúꞌu yeníꞌ bölj luzxbá catiꞌ ni nac chul,  
\v 16 ruiꞌliꞌ lauquëꞌ didzaꞌ gbánicnëꞌ. Chquiꞌ cni gunliꞌ, huac udzíjitsquidaꞌ dza huödëꞌ Cristo niꞌa qui le nacczliꞌ, le gnözdaꞌ cutu guc daduz gzoaꞌ banádx gatiaꞌ len clëg daduz benaꞌ dxin.  
\v 17 Yöl‑laꞌ rejlëꞌ queëliꞌ Cristo nac tu le rdzag ladxëꞌë Dios. Zal‑laꞌ gun bayúdx gatiaꞌ quië gac gdu yöl‑laꞌ rejlëꞌ queëliꞌ Lëꞌ, udzijdaꞌ len uzíꞌlenaꞌ xbey tsazxö́n yúguꞌtëliꞌ.  
\v 18 Lëzcaꞌ cni ral‑laꞌ udzíjiliꞌ lbiꞌiliꞌ len uzíꞌlenliꞌ tsazxö́n nedaꞌ xbey. 
\s1 Ca tunbiꞌ biꞌi Timoteo len biꞌi Epafrodito 
\p  
\v 19 Chquiꞌ cni rëꞌnnëꞌ Xanruꞌ Jesús, runaꞌ löz gsö́laꞌteaꞌ‑biꞌ queëliꞌ biꞌi Timoteo, atiꞌ niꞌr udzijdaꞌ catiꞌ huödbiꞌ dudíxjöiꞌbiꞌ nedaꞌ catëz rac queëliꞌ.  
\v 20 Tuzbiꞌ lëbiꞌ rzaꞌ ládxiꞌbiꞌ ca naꞌ rzaꞌ ladxaꞌa nedaꞌ, len szxöni ruiꞌ ládxiꞌbiꞌ lbiꞌiliꞌ.  
\v 21 Yúguꞌtë bönniꞌ yezicaꞌ, le nac quégaczëꞌ tuiꞌ ládxiꞌquëꞌ. Cutu tuiꞌ ládxiꞌquëꞌ xchinëꞌ Cristo.  
\v 22 Nö́ziczliꞌ ca benbiꞌ biꞌi Timoteo, burujbiꞌ dxiꞌa. Tsazxö́n bénlenbiꞌ nedaꞌ dxin qui didzaꞌ dxiꞌa, nacbiꞌ quiaꞌ ca tubiꞌ biꞌi bönniꞌ, tsazxö́n rúnlenbiꞌ‑nëꞌ xuzbiꞌ dxin.  
\v 23 Gsölaꞌa‑biꞌ ga zoaliꞌ biꞌi Timoteo catiꞌ gnözdaꞌ nacx gac quiaꞌ ni  
\v 24 zal‑laꞌ ruzxöni ladxaꞌa‑nëꞌ Xanruꞌ gunëꞌ ga duyuteaꞌ lbiꞌiliꞌ. 
\p  
\v 25 Lëzcaꞌ ráquidaꞌ run bayúdx gsölaꞌa‑biꞌ ga zoaliꞌ bíꞌi bö́chiꞌruꞌ Epafrodito. Biꞌi ni bénlenbiꞌ nedaꞌ tsazxö́n dxin queëꞌ Cristo, gdíl‑lentuꞌ tuꞌ xöhuiꞌ. Lbiꞌiczliꞌ bsö́laꞌliꞌ‑biꞌ ga zoaꞌ quië gáclenbiꞌ nedaꞌ.  
\v 26 Lëczbiꞌ rë́ꞌnibiꞌ duyubiꞌ lbiꞌiliꞌ len szxöni ruiꞌ ládxiꞌbiꞌ lbiꞌiliꞌ le nö́ziliꞌ ben bayáꞌ queëbiꞌ.  
\v 27 Le nactë güiꞌbiꞌ, guqui gatbiꞌ, san buechiꞌ ladxëꞌë‑biꞌ Dios, len clëgz lëbiꞌ, san buechiꞌ ladxëꞌë caꞌ nedaꞌ, cui gsëbir ladxaꞌa ca naꞌ rsëbi ladxaꞌa naꞌa.  
\v 28 Qui lë ni naꞌ, guꞌnrdaꞌ gsölaꞌa‑biꞌ queëliꞌ quië gac udzíjiliꞌ leyúbl catiꞌ uléꞌiliꞌ‑biꞌ, len cutur gsëbi ladxaꞌa nedaꞌ.  
\v 29 Gul‑síꞌ lu naꞌliꞌ‑biꞌ lu yöl‑laꞌ rudziji queëliꞌ, nacbiꞌ biꞌi bö́chiꞌruꞌ réjlëꞌbiꞌ Cristo. Gul‑gún ba laꞌn yúguꞌtë bunách nacgac ca nacbiꞌ lëbiꞌ,  
\v 30 le gzoa banádx queëbiꞌ gatbiꞌ le benbiꞌ xchinëꞌ Cristo len le gúclenbiꞌ nedaꞌ uláz queëliꞌ. 
\c 3  
\s1 Le nac gdu tsahuiꞌ 
\p  
\v 1 Naꞌa, böchiꞌ lzaꞌadauꞌ, gul‑dziji le nacliꞌ tuz len Xanruꞌ. Cutu rupízxj nedaꞌ uzujaꞌ queëliꞌ leyúbl lë naꞌ buzujaꞌ queëliꞌ ziꞌal, le gaclen lbiꞌiliꞌ lë ni.  
\v 2 Gul‑gún chiꞌi cuinliꞌ laugac nup niꞌ tun le cunác, nacgac ca böꞌcuꞌ sniaꞌ, nup naꞌ tun bayúdx ga grugu lu xpë́laꞌquëꞌ bönniꞌ le nac bëꞌ nacquëꞌ queëꞌ Dios.  
\v 3 Rëꞌu nadél‑liꞌruꞌ lë naꞌ nac gdutë li, le nac bëꞌ náquiruꞌ queëꞌ Dios. Le réjlëꞌruꞌ Dios, zóalenëꞌ rëꞌu Dios Böꞌ Laꞌy, atiꞌ rudzíjiruꞌ le nacruꞌ tuz len Jesucristo. Cutu caꞌ ruzxöni ládxiꞌruꞌ tu le runruꞌ racz queëruꞌ.  
\v 4 Laꞌnaruꞌ ruzxöni ládxiꞌruꞌ lë ni, lëzcaꞌ nedaꞌ chnadél‑liꞌdaꞌ bi uzxöni ladxaꞌa. Chquiꞌ zoëꞌ bönniꞌ ráquinëꞌ ulë́ꞌ le nacuáꞌ le nunëꞌ, nedaꞌ nadél‑liꞌrdaꞌ ca bönniꞌ naꞌ: 
\q1  
\v 5 Grugu lu xpëlaꞌa lë naꞌ nac bëꞌ catiꞌ niꞌ gúquidaꞌ xunuꞌ dza. 
\q1 Guljaꞌ ladj diꞌa dza guegac bunách Israel. 
\q1 Nacaꞌ zxiꞌn xsoëꞌ Benjamín. 
\q1 Xuz xnaꞌa nacquëꞌ gdu bunách hebreo. 
\q1 Gucaꞌ bönniꞌ gdauꞌ fariseo ca naꞌ benaꞌ ca rna bëꞌ zxba queëꞌ Dios. 
\q1  
\v 6 Szxöni bëꞌ ladxaꞌa zxba naꞌ ga bdxintë gdxia ládxiꞌgacaꞌ bunách queëꞌ Cristo. 
\q1 Tsca gac gaquëꞌ tsahuiꞌ bönniꞌ le runëꞌ ca rna bëꞌ zxba naꞌ, nutu nu bi guc gnë quiaꞌ. 
\m  
\v 7 Naꞌa, yúguꞌtë lë naꞌ benaꞌ zxön ziꞌal, nuzóaꞌ tslaꞌl le náquidaꞌ queëꞌ Cristo.  
\v 8 Clëgz yuguꞌ lë naꞌ, san nuzóaꞌ caꞌ tslaꞌl yúguꞌtë le dë, quië gac gúnbëꞌa‑nëꞌ Xanruꞌ Jesucristo, le nactër lsacaꞌ ca yúguꞌtë lë naꞌ. Quië gúnbëꞌa Lëꞌ gruꞌnaꞌ niꞌl yúguꞌtë, ráquidaꞌ nac ca bëb, quië uziꞌa xbëꞌ Cristo,  
\v 9 len quië gacaꞌ tuz len Lëꞌ. Nuhuöacaꞌ tsahuiꞌ, clëg le runaꞌ ca rna bëꞌ zxba naꞌ, san bunëꞌ nedaꞌ tsahuiꞌ Dioscz le réjlëꞌa Cristo, ca naꞌ ruúnëꞌ tsahuiꞌ yúguꞌtë nup taꞌyejlëꞌ Lëꞌ.  
\v 10 Rëꞌnzdaꞌ gúnbëꞌa‑nëꞌ Cristo len soalen nedaꞌ yöl‑laꞌ huac queëꞌ Dios le buspán Cristo lu yöl‑laꞌ gut, len quië gunaꞌ Lëꞌ tsazxö́n, sacaꞌ quiꞌa ca naꞌ gzxacaꞌ gdiꞌë Lëꞌ, len quië soaꞌ sinaꞌ gatiaꞌ ca gutiëꞌ Lëꞌ,  
\v 11 le runaꞌ löz Dios, uspanëꞌ caꞌ nedaꞌ lu yöl‑laꞌ gut. 
\s1 Le runruꞌ quië gdxinruꞌ xlatjruꞌ 
\p  
\v 12 Cutu rniaꞌ chnadél‑liꞌdaꞌ yúguꞌtë lë ni gunnëꞌ quiaꞌ Dios, len cutu ráquidaꞌ chnacaꞌ gdu tsahuiꞌ. Naꞌa, runaꞌ bayúdx gdél‑liꞌdaꞌ yúguꞌtë lë naꞌ, le chbdél‑liꞌnëꞌ nedaꞌ Jesucristo.  
\v 13 Böchiꞌ lzaꞌadauꞌ, cutu caꞌ nadél‑liꞌdaꞌ yuguꞌ lë ni, san tuz le runaꞌ bayúdx. Ruzál ladxaꞌa le chbdél‑liꞌdaꞌ, atiꞌ runaꞌ bayúdx gdél‑liꞌdaꞌ le ziꞌa zaꞌ.  
\v 14 Runaꞌ ca runëꞌ bönniꞌ jaréluꞌë rxítiꞌë quië gdxinëꞌ xlatjëꞌ gdél‑liꞌnëꞌ tu le uziꞌë xbey. Cni runaꞌ quië gdél‑liꞌdaꞌ lë naꞌ bulidzëꞌ rëꞌu Dios quië gataꞌ queëruꞌ niꞌ yehuaꞌ yubá le nacruꞌ tuz len Jesucristo. 
\p  
\v 15 Cni ral‑laꞌ gunruꞌ yúguꞌtëruꞌ rëꞌu, nac gdu ca réjlëꞌruꞌ Cristo. Chquiꞌ ráquiliꞌ laꞌliꞌ ral‑laꞌ gunliꞌ tu le yubl, Dios uzéjniꞌnëꞌ lbiꞌiliꞌ.  
\v 16 Naꞌa, ca nac lë naꞌ bdél‑liꞌruꞌ, ral‑laꞌ gúnteczruꞌ cni. 
\p  
\v 17 Böchiꞌ lzaꞌadauꞌ, gul‑gún ca naꞌ runaꞌ nedaꞌ. Chbuluiꞌituꞌ lbiꞌiliꞌ ca ral‑laꞌ gunliꞌ. Gul‑yú ca tun nup naꞌ tun ca naꞌ bentuꞌ netuꞌ.  
\v 18 Chgudxczaꞌ lbiꞌiliꞌ zian lzu, atiꞌ rëpaꞌ lbiꞌiliꞌ leyúbl len yöl‑laꞌ rbödx quiaꞌ, rniaꞌ: Le tunëꞌ zian bönniꞌ run ga nacquëꞌ ca nup cutaꞌleꞌi Cristo dxiꞌa, le tuꞌzóëꞌ tslaꞌl le benczëꞌ Lëꞌ lëꞌi yag cruz.  
\v 19 Bönniꞌ tunëꞌ cni, lu guiꞌ gabíl tsjaquëꞌ, le nac dios quequëꞌ le taꞌzë́z ládxiꞌquëꞌ, atiꞌ tun ba zxön cuinquëꞌ niꞌa qui le tunëꞌ le ral‑laꞌ gun ga lutuiꞌinëꞌ. Tuiꞌ ládxiꞌzëꞌ le dë yödzlyú ni,  
\v 20 san rëꞌu ni ruiꞌ ládxiꞌruꞌ le dë yehuaꞌ yubá ga nababruꞌ, len rbözruꞌ dza huödëꞌ Xanruꞌ Jesucristo, Nu ruslá rëꞌu, urujëꞌ yehuaꞌ yubá naꞌ.  
\v 21 Lëꞌ utsë́ꞌë gdu ca nayáꞌ nabinruꞌ, le rnitcz, gunëꞌ ga huöac ca nac gdu ca nayáꞌ nabanëꞌ Lëꞌ, le soa tsalzú. Cni gunëꞌ len yöl‑laꞌ huac zxön queëꞌ le ugunëꞌ dxin quië gna béꞌinëꞌ yúguꞌtë. 
\c 4  
\s1 Ral‑laꞌ udzíjilenteczruꞌ‑nëꞌ Xanruꞌ 
\p  
\v 1 Qui lë ni naꞌ, böchiꞌ lzaꞌadauꞌ, gul‑gác tsutsu ca réjlëꞌliꞌ Xanruꞌ. Nadxíꞌitsquidaꞌ lbiꞌiliꞌ len rëꞌndaꞌ duyúaꞌ lbiꞌiliꞌ. Runliꞌ ga rudzijdaꞌ len nacliꞌ ca tu le ruziꞌa xbey. 
\p  
\v 2 Lbiꞌiliꞌ, Evodia len Síntique, rátaꞌyuaꞌ lauliꞌ gacliꞌ tuz ca ral‑laꞌ lac nup náquigac queëꞌ Xanruꞌ.  
\v 3 Naꞌa, böchaꞌa gdu, rëꞌndaꞌ gáclenuꞌ gropnu ni, le glúnlennu nedaꞌ dxin, bentuꞌ lban qui didzaꞌ dxiꞌa, atiꞌ guladzaguëꞌ caꞌ netuꞌ Clemente len yezícaꞌrëꞌ lzaꞌa naꞌ. Chnayujgac laquëꞌ yehuaꞌ yubá ga naꞌ nayujgac lagac nup chnadél‑liꞌgac yöl‑laꞌ naꞌbán gdu. 
\p  
\v 4 Gul‑dzíjilentecz‑nëꞌ Xanruꞌ. Leyúbl, rniaꞌ: Gul‑dziji.  
\v 5 Gul‑gác dxiꞌi ladxiꞌ len yúguꞌtë bunách. Chzoa huödëꞌ Xanruꞌ. 
\p  
\v 6 Cutu ubi uguiꞌiliꞌ, san gul‑náb lahuëꞌ Dios le rquíniliꞌ len gul‑guië́ꞌ: “Xclenuꞌ”, ca nac yúguꞌtë lë naꞌ rnabliꞌ.  
\v 7 Dios gunëꞌ ga gac queëliꞌ le cuequi dxi icj ládxiꞌdauꞌliꞌ, lë naꞌ nadö́dr bëꞌi ca le gac laꞌyejniꞌi bunách. Lë naꞌ rbequi dxi icj ládxiꞌdauꞌruꞌ gun chiꞌi icj ládxiꞌdauꞌliꞌ len le rzaꞌ ládxiꞌliꞌ le nacliꞌ tuz len Jesucristo. 
\s1 Ral‑laꞌ saꞌ ládxiꞌruꞌ le nacgac dxiꞌa 
\p  
\v 8 Ga ruúdxtë, böchiꞌ lzaꞌadauꞌ, gul‑sáꞌ ládxiꞌliꞌ: 
\q1 yúguꞌtë le nac dxiꞌa, 
\q1 len le nac bicaꞌ ba, 
\q1 len le nac gdutë li, 
\q1 len le nac gdu, 
\q1 len le nac tsahuiꞌ, 
\q1 len le nac baꞌa, 
\q1 len le nac lach, 
\q1 len le ral‑laꞌ gunruꞌ ba laꞌn. 
\p  
\v 9 Gul‑gún ca naꞌ busëddaꞌ lbiꞌiliꞌ, lë naꞌ gzxiꞌ lu naꞌliꞌ tsca naꞌ bë́ꞌlenaꞌ lbiꞌiliꞌ didzaꞌ len tsca naꞌ benaꞌ ga niꞌ zoaliꞌ. Dios, Nu runn queëruꞌ le rbequi dxi icj ládxiꞌdauꞌruꞌ sóalenëꞌ lbiꞌiliꞌ. 
\s1 Le dxiꞌa glunëꞌ queëꞌ Pablo bönniꞌ Filipos 
\p  
\v 10 Rudzíjlendaꞌ‑nëꞌ Xanruꞌ le ruiꞌ ládxiꞌliꞌ nedaꞌ leyúbl. Cutu rniaꞌ gul ládxiꞌliꞌ nedaꞌ, san cutu gutaꞌ queëliꞌ latj gáclenliꞌ nedaꞌ ziꞌal.  
\v 11 Lëzcaꞌ cni, cutu rniaꞌ cni le zoa bi ryadzj quiaꞌ, le nazëdaꞌ gdzag ladxaꞌa le dëz quiaꞌ.  
\v 12 Chgdödaꞌ lu yöl‑laꞌ yechiꞌ len lu yöl‑laꞌ tsahuiꞌ. Nazëdaꞌ soaꞌ náctiꞌtëz, zal‑laꞌ nöljdaꞌ o nabí l rdunaꞌ, len zal‑laꞌ dë quiaꞌ szxöni o zoa bi ryadzj quiaꞌ.  
\v 13 Yúguꞌtë huazáquiꞌdaꞌ le rutipëꞌ ladxaꞌa Cristo.  
\v 14 Benliꞌ dxiꞌa catiꞌ niꞌ gúclenliꞌ nedaꞌ, butipliꞌ ladxaꞌa catiꞌ gzxacaꞌ gdiꞌa. 
\p  
\v 15 Lbiꞌiliꞌ, bönniꞌ Filipos, nö́ziczliꞌ ca guc quiaꞌ dza niꞌ catiꞌ buzáꞌa luyú Macedonia, yjenaꞌ lban qui didzaꞌ dxiꞌa. Tsca nacuáꞌ bunách queëꞌ Cristo, nutur nu guclen nedaꞌ, san lbiꞌizliꞌ gúclenliꞌ nedaꞌ. Bsö́laꞌliꞌ quiaꞌ bi bunödzjliꞌ, le gzxiꞌ lu naꞌliꞌ lban benaꞌ nedaꞌ.  
\v 16 Tsal niꞌ gzoaꞌ Tesalónica, tu chop lzu bsö́laꞌliꞌ quiaꞌ le bunödzjliꞌ catiꞌ niꞌ byadzj quiaꞌ.  
\v 17 Cutu ruiꞌ ladxaꞌa bi siꞌa, san rëꞌndaꞌ gataꞌr queëliꞌ le uziꞌliꞌ xbey yehuaꞌ yubá.  
\v 18 Rëpaꞌ lbiꞌiliꞌ: Chgzxiꞌa yúguꞌtë lë naꞌ bsö́laꞌliꞌ quiaꞌ, atiꞌ gdödti bëꞌi tsca le byadzjdaꞌ. Ben ga nac cni lë naꞌ bsö́laꞌliꞌ lu naꞌbiꞌ biꞌi Epafrodito. Lë naꞌ bunödzjliꞌ nac ca tu le rlaꞌ zxix rdxintë lahuëꞌ Dios, len ca tu le rguꞌruꞌ lahuëꞌ Dios le rdzag ladxëꞌë.  
\v 19 Dios gunnëꞌ queëliꞌ yúguꞌtë le ryadzj queëliꞌ, tsca nac yöl‑laꞌ tsahuiꞌ röꞌ yehuaꞌ yubá, le nacliꞌ tuz len Jesucristo.  
\v 20 Gactecz queëꞌ Xuzruꞌ Dios yöl‑laꞌ ba. Caꞌ gac. 
\s1 Tuꞌgáp Dios lzaꞌgac bunách queëꞌ Cristo 
\p  
\v 21 Uláz quiaꞌ nedaꞌ, gul‑gáp Dios nup niꞌ náquigac queëꞌ Dios le nacgac tuz len Jesucristo. Tuꞌgapëꞌ lbiꞌiliꞌ Dios böchiꞌ lzaꞌruꞌ ni nunquëꞌ nedaꞌ tsazxö́n.  
\v 22 Lëzcaꞌ tuꞌgáp lbiꞌiliꞌ Dios yúguꞌtë nup ni náquigac queëꞌ Dios, len lëzcaꞌ cni, tuꞌgapëꞌ lbiꞌiliꞌ Dios yuguꞌ huen dxin nacuꞌë lidxëꞌ bönniꞌ rna bëꞌë gdu luyú Roma. 
\p  
\v 23 Rnabdaꞌ‑nëꞌ Xanruꞌ Jesucristo uzáꞌ ladxëꞌë queëliꞌ yúguꞌtëliꞌ. Caꞌ gac.