\id COL  
\h Colosenses 
\toc1 DIDZAꞌ BSÖLËꞌË PABLO YÖDZ COLOSAS 
\toc2 Colosenses 
\toc3 Col. 
\mt1 DIDZAꞌ BSÖLËꞌË PABLO YÖDZ COLOSAS 
\c 1  
\s1 Pablo rugapëꞌ Dios bunách queëꞌ Cristo nacuꞌë Colosas 
\p  
\v 1 Nedaꞌ, Pablo, nacaꞌ gbaz queëꞌ Jesucristo le rëꞌnnëꞌ cni Dios, dzagbiꞌ nedaꞌ biꞌi bö́chiꞌruꞌ Timoteo.  
\v 2 Rugapaꞌ Dios lbiꞌiliꞌ, nacliꞌ quizi queëꞌ Dios, len nacliꞌ bö́chiꞌtuꞌ réjlëꞌliꞌ Cristo zoaliꞌ Colosas. Rnabdaꞌ‑nëꞌ Xuzruꞌ Dios uzáꞌ ladxëꞌë queëliꞌ, len gunëꞌ ga soa dxi icj ládxiꞌdauꞌliꞌ. 
\s1 Pablo rulidzëꞌ Dios, rëꞌ Lëꞌ: “Xclenuꞌ” 
\p  
\v 3 Rë́tecztuꞌ‑nëꞌ Dios, Xuzëꞌ Xanruꞌ Jesucristo: Xclenuꞌ, catiꞌ rulidztuꞌ‑nëꞌ Dios, rnábituꞌ‑nëꞌ bi gunëꞌ queëliꞌ  
\v 4 le byö́nituꞌ didzaꞌ ca réjlëꞌliꞌ Jesucristo, len ca nadxiꞌiliꞌ yúguꞌtë nup náquigac quizi queëꞌ Dios.  
\v 5 Cni runliꞌ le runliꞌ löz le nuzóëꞌ queëliꞌ Xanruꞌ niꞌ yehuaꞌ yubá, lë naꞌ byö́niliꞌ qui catiꞌ bë́ꞌlentuꞌ lbiꞌiliꞌ didzaꞌ le nac gdutë li qui didzaꞌ dxiꞌa.  
\v 6 Didzaꞌ dxiꞌa naꞌ bdxin queëliꞌ ca rdxin caꞌ gdutë yödzlyú. Run dxin len rac lban qui, gdutë yödzlyú, laꞌ tuz ca rac ga zoaliꞌ, dza niꞌtë ga rdxintë naꞌa dza, catiꞌ niꞌ byö́niliꞌ len le nactë bénbëꞌliꞌ le ruzáꞌ ladxëꞌë queëruꞌ Dios.  
\v 7 Busëdnëꞌ lbiꞌiliꞌ lë ni Epafras, bönniꞌ nadxiꞌiruꞌ‑nëꞌ, rúnlenëꞌ netuꞌ tsazxö́n dxin len naquëꞌ caꞌ huen dxin gdu queëꞌ Cristo, ráclenëꞌ lbiꞌiliꞌ.  
\v 8 Bönniꞌ ni gdíxjöiꞌnëꞌ netuꞌ ca nadxiꞌiliꞌ lzaꞌliꞌ, le runëꞌ Dios Böꞌ Laꞌy ga gac gunliꞌ cni. 
\p  
\v 9 Qui lë ni naꞌ netuꞌ caꞌ, dza niꞌtë ga rdxintë naꞌa dza catiꞌ gúquibeꞌituꞌ lë ni, cutu caꞌ rzoa dxituꞌ rulidztuꞌ‑nëꞌ Dios, rnábituꞌ‑nëꞌ gáclenëꞌ lbiꞌiliꞌ, len rnabtuꞌ lahuëꞌ gunëꞌ ga gúnbëꞌliꞌ gdu le rëꞌncznëꞌ Lëꞌ, len gunnëꞌ queëliꞌ yúguꞌtë yöl‑laꞌ rac szxöni len yöl‑laꞌ rejniꞌi le rguꞌë rëꞌu Dios Böꞌ Laꞌy.  
\v 10 Cni rnábituꞌ‑nëꞌ quië gac gunliꞌ ca ral‑laꞌ lun nup náquigac queëꞌ Xanruꞌ, gunliꞌ yúguꞌtë le rdzag ladxëꞌë Lëꞌ, len sáquiꞌliꞌ gunliꞌ yúguꞌtë le nac dxiꞌa, len gacr gdu ca núnbëꞌliꞌ‑nëꞌ Dios.  
\v 11 Rnábituꞌ‑nëꞌ utipëꞌ ládxiꞌliꞌ, gunnëꞌ queëliꞌ yöl‑laꞌ huac gdu queëꞌ, quië gac guaꞌ glenliꞌ yúguꞌtë, len cözliꞌ zxön ladxiꞌ len udziji ládxiꞌliꞌ.  
\v 12 Lu yöl‑laꞌ rudziji queëliꞌ gul‑guië́ꞌ Dios Xuz: “Xclenuꞌ”, le budödëꞌ lu naꞌruꞌ gataꞌ queëruꞌ latj lu yeníꞌ queëꞌ, gunruꞌ tsazxö́n nup náquigac quizi queëꞌ.  
\v 13 Dios Xuz naꞌ buslë́ꞌ rëꞌu lu naꞌ nu rna bëꞌ latj chul, len budödëꞌ rëꞌu ga naꞌ rna bëꞌë Zxiꞌnczëꞌ, Nu nadxiꞌinëꞌ.  
\v 14 Zxiꞌnëꞌ naꞌ böaꞌuëꞌ rëꞌu, gutiëꞌ uláz queëruꞌ, len bunít lahuëꞌ rëꞌu ca nac dul‑laꞌ gbágaꞌruꞌ. 
\s1 Nuhuöacruꞌ tuz len Dios le gutiëꞌ uláz queëruꞌ Cristo 
\p  
\v 15 Cristo naquëꞌ tuz ca naquëꞌ Dioscz, Nu curléꞌiruꞌ. Zoaczëꞌ Lëꞌ zíꞌatël ca yúguꞌtë le benëꞌ Dios.  
\v 16 Lu nëꞌë Cristo benëꞌ Dios yúguꞌtë le dë, le nacuáꞌ luzxbá, len le nacuáꞌ luyú, yuguꞌ le rléꞌiruꞌ len yuguꞌ le curléꞌiruꞌ, lë naꞌ nacgac latj blau, len yuguꞌ yöl‑laꞌ uná bëꞌ, len le nadél‑liꞌgac yöl‑laꞌ zxön, len yuguꞌ yöl‑laꞌ huac qui yehuaꞌ yubá len qui luyú ni. Yúguꞌtë benëꞌ Dios lu nëꞌë Cristo quië uziꞌë xbey Lëꞌ.  
\v 17 Cristo zoaczëꞌ ziꞌal ca yúguꞌtë le dë, atiꞌ yúguꞌtë nacuaꞌtecz niꞌa queëꞌ Lëꞌ.  
\v 18 Cristo naquëꞌ Xangac bunách queëꞌ, len runödzjëꞌ quequëꞌ yöl‑laꞌ naꞌbán. Naquëꞌ caꞌ Nu gzu lau bubán tsaz lu yöl‑laꞌ gut. Ziꞌal Lëꞌ bubanëꞌ tsaz lu yöl‑laꞌ gut quië gáctërëꞌ blau ca yúguꞌtë le dë.  
\v 19 Cni guc, le bdzag ladxëꞌë Dios Xuz soalen Cristo gdu le nacczëꞌ Lëꞌ.  
\v 20 Niꞌa qui le benëꞌ Cristo, Dios benëꞌ ga gac luhuöác tuz len Lëꞌ yúguꞌtë le dë, le nacuáꞌ luyú, len le nacuáꞌ luzxbá. Bunëꞌ leygac tuz len Lëꞌ le bulaljëꞌ xchönëꞌ Cristo, gutiëꞌ lëꞌi yag cruz. 
\p  
\v 21 Lbiꞌiliꞌ, zíꞌatël nuláꞌalenliꞌ‑nëꞌ Dios len gucliꞌ ca bönniꞌ cutaꞌleꞌi Dios dxiꞌa lu icj ládxiꞌdauꞌliꞌ niꞌa qui döꞌ biaꞌliꞌ, san naꞌa chbunëꞌ lbiꞌiliꞌ tuz len Lëꞌ.  
\v 22 Cni guc, le budö́d cuinëꞌ Cristo, gutiëꞌ uláz queëliꞌ quië gac uschinëꞌ lbiꞌiliꞌ lahuëꞌ Dios, nacliꞌ quizi queëꞌ len gacliꞌ gdu dxiꞌa, nutu nu bi gac gnë queëliꞌ.  
\v 23 Cni gac chquiꞌ ugaꞌnliꞌ tsutsu ca réjlëꞌliꞌ Cristo, gacliꞌ ca tu yuꞌu zxoa ga rëꞌ xlibi zöꞌö qui, len cutu tseaj böꞌ ládxiꞌdauꞌliꞌ ca runliꞌ löz didzaꞌ dxiꞌa byö́niliꞌ, lë naꞌ rac lban qui gdutë yödzlyú le benëꞌ Dios zxan luzxbá. Dios buzóëꞌ nedaꞌ, Pablo, quië gacaꞌ huen dxin qui didzaꞌ dxiꞌa naꞌ. 
\s1 Dxin budödëꞌ Dios lu nëꞌë Pablo 
\p  
\v 24 Rudzijdaꞌ naꞌa ca nac le rzacaꞌ rguiꞌa quië gáclenaꞌ lbiꞌiliꞌ, len ruúdx rzaꞌa lu gdu ca nayáꞌ nabanaꞌ le rzacaꞌ rguíꞌlenaꞌ tsazxö́n Cristo uláz qui gdu ca nayáꞌ nabanëꞌ Lëꞌ le nac bunách queëꞌ.  
\v 25 Dios benëꞌ ga nacaꞌ huen dxin quegac bunách queëꞌ Cristo, runaꞌ xchinëꞌ Dios, le budödëꞌ lu naꞌa gunaꞌ quië gáclenaꞌ lbiꞌiliꞌ, quíxjöꞌa gdu ca nac xtidzëꞌë Dios.  
\v 26 Ruzéjniꞌdaꞌ bunách le nagachiꞌ, lë naꞌ bgachiꞌ dza niꞌtë, nutu nu benbëꞌ lei, san naꞌa Dios chbuluiꞌinëꞌ bunách náquigac quizi queëꞌ ca nac qui.  
\v 27 Dios guꞌncznëꞌ gunëꞌ ga lunbëꞌ yuguꞌ yöl‑laꞌ tsahuiꞌ gdu qui le nagachiꞌ ni, lë naꞌ taꞌyöni bunách gzaꞌa. Cni rna lë naꞌ bgachiꞌ: “Cristo naquëꞌ tuz len lbiꞌiliꞌ, len naquëꞌ le nac löz gdél‑liꞌliꞌ tsazliꞌ lu yeníꞌ queëꞌ.” 
\p  
\v 28 Runtuꞌ lban queëꞌ Cristo, rusaꞌtuꞌ ládxiꞌgac yúguꞌtë bunách, len gazxj ga rëꞌ rusë́dituꞌ lequëꞌ yöl‑laꞌ rejniꞌi, quië gac uschintuꞌ lahuëꞌ Dios yúguꞌtë bunách, nacquëꞌ gdu ladxiꞌ le nacquëꞌ tuz len Jesucristo.  
\v 29 Quië gac cni runaꞌ dxin, len ruiꞌ ladxaꞌa udx gunaꞌ lë ni, rugunaꞌ dxin yöl‑laꞌ huac gdu naꞌ runnëꞌ quiaꞌ Cristo. 
\c 2  
\p  
\v 1 Rëꞌndaꞌ gnö́ziliꞌ ruiꞌtsca ladxaꞌa runaꞌ le gaclen lbiꞌiliꞌ lencaꞌ le gaclen bunách yödz Laodicea, len le gaclen caꞌ yúguꞌtë nup gatga gulaleꞌi nedaꞌ.  
\v 2 Runaꞌ cni quië laꞌdíp ládxiꞌquëꞌ, len lacquëꞌ tuz lu yöl‑laꞌ nadxíꞌi, len luziꞌë xbey yúguꞌtë yöl‑laꞌ tsahuiꞌ qui yöl‑laꞌ run löz gdu le runn queëruꞌ yöl‑laꞌ rejniꞌi. Cni rac quië lunbëꞌë le bgachiꞌ queëꞌ Dios Xuz, lë naꞌ nacczëꞌ Cristo.  
\v 3 Lu nëꞌë Cristo ruziꞌruꞌ xbey yúguꞌtë yöl‑laꞌ tsahuiꞌ qui yöl‑laꞌ rac szxöni len yöl‑laꞌ rejniꞌi.  
\v 4 Lë ni rëpaꞌ lbiꞌiliꞌ, cui gac nu siꞌ yeꞌi lbiꞌiliꞌ, nu güiꞌ didzaꞌ tséjlëꞌruꞌ le cunácz.  
\v 5 Zal‑laꞌ zoaꞌ ziꞌtuꞌ ga zoaliꞌ lu gdu ca nayáꞌ nabanaꞌ, lu böꞌ nacczaꞌ zóalenaꞌ lbiꞌiliꞌ len rudzijdaꞌ le rléꞌidaꞌ röꞌ zxba queëliꞌ len nac tsutsu ca réjlëꞌliꞌ Cristo. 
\p  
\v 6 Qui lë ni naꞌ, ca naꞌ gzxiꞌ lu naꞌliꞌ Xanruꞌ Jesucristo, lëzcaꞌ cni ral‑laꞌ gunliꞌ yúguꞌtë le gunliꞌ, dzaguëꞌ lbiꞌiliꞌ Lëꞌ.  
\v 7 Ca naꞌ nun luí yag ga rëꞌ, lencaꞌ ca naꞌ nayás zöꞌö lu xlibi zöꞌö, gul‑zoalen Cristo. Gul‑zóa tsutsu ca réjlëꞌliꞌ Lëꞌ, ca naꞌ chnazëdliꞌ. Gul‑guië́teczëꞌ Dios: “Xclenuꞌ.” 
\s1 Le cub nacruꞌ le dzagruꞌ‑nëꞌ Cristo 
\p  
\v 8 Gul‑gún chiꞌi cuinliꞌ cuigüiꞌliꞌ latj nu siꞌ yeꞌi lbiꞌiliꞌ, nu ugún dxin yöl‑laꞌ rejniꞌi quegac bunách len yuguꞌ didzaꞌ taꞌnazëꞌ nac gdutë li, ca nac le taꞌlëbi bunách tun, len ca nac le tuꞌsëdi bunách le nac qui yödzlyú ni len clëg le nac xtidzëꞌë Cristo. 
\p  
\v 9 Zoalen Cristo gdutë le nacczëꞌ Dios zal‑laꞌ böaquëꞌ bunách,  
\v 10 atiꞌ lbiꞌiliꞌ napliꞌ gdutë le naquëꞌ Dios le dzagliꞌ‑nëꞌ Cristo, Nu rna beꞌi yúguꞌtë nup taꞌná bëꞌ len bönniꞌ bi dë lu naꞌquëꞌ.  
\v 11 Narugu lu xpë́laꞌquëꞌ bönniꞌ judío le ruluíꞌ náquicnëꞌ queëꞌ Dios, san lbiꞌiliꞌ, le dzagliꞌ Cristo, zoalen lbiꞌiliꞌ le ruluíꞌ náquiliꞌ queëꞌ Dios, le cunáquini lu niꞌa lu naꞌgac bunách. Tuꞌgǘëꞌ tu guiddauꞌ bönniꞌ judío, san lbiꞌiliꞌ, nadúa gdutë yöl‑laꞌ bunách queëliꞌ bénlenliꞌ dul‑laꞌ. Cni nac queëliꞌ le benliꞌ tsazxö́n Cristo catiꞌ gutiëꞌ lëꞌi yag cruz.  
\v 12 Catiꞌ bdil‑liꞌ nis bgáchiꞌlenliꞌ‑nëꞌ Cristo tsazxö́n yeru ba len bubánlenliꞌ‑nëꞌ tsazxö́n le gyéjlëꞌliꞌ Dios, len yöl‑laꞌ huac queëꞌ buspanëꞌ Cristo lu yöl‑laꞌ gut.  
\v 13 Zíꞌatël gucliꞌ ca nup chnatgac niꞌa qui dul‑laꞌ gbágaꞌliꞌ len cutu gzoalen lbiꞌiliꞌ le ruluíꞌ náquiliꞌ queëꞌ Dios, san naꞌa Dios nunëꞌ ga nabánlenliꞌ‑nëꞌ tsazxö́n Cristo, len bunít lahuëꞌ lbiꞌiliꞌ ca nac yúguꞌtë dul‑laꞌ gbágaꞌliꞌ.  
\v 14 Dios busulëꞌ yuguꞌ le nabágaꞌruꞌ le nayujgac lu zxba queëꞌ, lë naꞌ tuꞌquí rëꞌu. Bugǘëꞌ lë naꞌ nabágaꞌruꞌ len bdëꞌë lei lëꞌi yag cruz ca tu le nabaguëꞌë Cristo.  
\v 15 Catiꞌ gutiëꞌ Cristo lëꞌi yag cruz, bugǘëꞌ yöl‑laꞌ huac uná bëꞌ quegac böꞌ xöhuiꞌ uná bëꞌ len quegac nup dë lu naꞌgac yöl‑laꞌ huac xöhuiꞌ, le buluꞌë lahui le nacgac böꞌ xöhuiꞌ len bugǘëꞌ yöl‑laꞌ huac uná bëꞌ quegac, le gutiëꞌ lëꞌi yag cruz naꞌ. 
\s1 Ral‑laꞌ güiꞌ ládxiꞌruꞌ le nac qui yehuaꞌ yubá 
\p  
\v 16 Qui lë ni naꞌ, cutu güiꞌliꞌ latj nu uquí lbiꞌiliꞌ ca nac le riꞌj ráguliꞌ o le curunliꞌ zxön yuguꞌ dza lni, o le curunliꞌ zxön beoꞌ ziꞌa ruzë́, o le curunliꞌ zxön yuguꞌ dza laꞌy quegac bunách.  
\v 17 Yúguꞌtë lë ni nac ca tu bxin qui le ral‑laꞌ gac, atiꞌ le ruluíꞌ yúguꞌtë lë ni naquëꞌ Cristocz.  
\v 18 Cutu güiꞌliꞌ latj nu gun ga unitliꞌ le ral‑laꞌ siꞌliꞌ, nu runtsca bayúdx ga lac nöxj ládxiꞌgac bunách len lun zxön yuguꞌ gbaz laꞌy. Tuꞌgutsaꞌ cuinquëꞌ le cutu gulaléꞌinëꞌ, len tun ba zxön cuinquëꞌ ca nac le dzöꞌz icjquëꞌ lu yöl‑laꞌ bunáchz quequëꞌ.  
\v 19 Nu run cni cutu daꞌ Cristo, Nu nac Xanruꞌ len ruzóëꞌ tsutsu gdu ca nayáꞌ nabanëꞌ, le nacruꞌ rëꞌu. Rugahuëꞌ lei, len runëꞌ ga nac tuz niꞌa qui le zeaj lu dxit lu bin, atiꞌ rzxön gdu ca nayáꞌ nabanëꞌ ca rëꞌnnëꞌ Dios uxönëꞌ lei. 
\p  
\v 20 Lbiꞌiliꞌ chnátlenliꞌ‑nëꞌ Cristo quië cutur laꞌná beꞌi lbiꞌiliꞌ zxba qui yödzlyú. ¿Bizx quië runliꞌ tsca ni nacliꞌ qui yödzlyú, len runliꞌ ca taꞌná bëꞌ zxba qui?  
\v 21 Cni taꞌná yuguꞌ zxba qui yödzlyú ni: 
\q1 Cutu quitjnuꞌ lë ni; 
\q1 Cutu gaguꞌ lë naꞌ; 
\q1 Cutu canuꞌ yetú le dë. 
\m  
\v 22 Yúguꞌtë lë ni laꞌnít catiꞌ chbugunruꞌ leygac dxin. Cni nacgac le taꞌná bëꞌ bunách len yuguꞌ zxba nazíꞌ lu naꞌquëꞌ.  
\v 23 Le nactë, yuguꞌ zxba ni, ráquiruꞌ napgac yöl‑laꞌ rejniꞌi. Tun ga ruluíꞌ cuinruꞌ ca bunách gdauꞌ, len ga ruluíꞌ cuinruꞌ nöxj ladxiꞌ, len ga rusacaꞌ ziꞌruꞌ gdu ca nayáꞌ nabinruꞌ, san zxba ni cutu caꞌ taclen rëꞌu quië gac gna béꞌiruꞌ yuguꞌ le rzë ládxiꞌruꞌ lu yöl‑laꞌ bunáchz queëruꞌ. 
\c 3  
\p  
\v 1 Naꞌa, chquiꞌ nubánlenliꞌ‑nëꞌ Cristo, gul‑güíꞌ ládxiꞌliꞌ le nacgac qui yehuaꞌ yubá ga niꞌ röꞌë Cristo cuit lëꞌë yubél Dios, ga naquëꞌ blau.  
\v 2 Gul‑sáꞌ ládxiꞌliꞌ le tac xtsaꞌ, len clëg le tac luyú ni.  
\v 3 Nac queëliꞌ tsca chnatliꞌ, atiꞌ yöl‑laꞌ naꞌbán queëliꞌ run chiꞌë Cristo ga niꞌ zoaczëꞌ Dios.  
\v 4 Cristo nabániliꞌ lbiꞌiliꞌ. Catiꞌ uluíꞌ lahuëꞌ Lëꞌ, niꞌr uluíꞌ lauliꞌ caꞌ lbiꞌiliꞌ tsazxö́n len Lëꞌ lu yeníꞌ queëꞌ. 
\s1 Yöl‑laꞌ naꞌbán gul len yöl‑laꞌ naꞌbán cub 
\p  
\v 5 Qui lë ni naꞌ, gul‑gún ga laꞌnít le nacuaꞌlen lbiꞌiliꞌ qui yödzlyú ni: 
\q1 yuguꞌ le cunác, 
\q1 len le nacgac xöhuiꞌ, 
\q1 len yuguꞌ le rzë ládxiꞌliꞌ le cunác, 
\q1 len yuguꞌ le rzë ládxiꞌliꞌ le nac xöhuiꞌ, 
\q1 len yöl‑laꞌ ruhuidiꞌ, 
\m le nac tuz ca nu rij ladxiꞌ bdauꞌ guiöj bdauꞌ yag, le cutu rij ladxiꞌ Dios nu ruhuidiꞌ.  
\v 6 Le tun yuguꞌ le cni, Dios gunëꞌ zxguiaꞌ yúguꞌtë nup cutún ca rna xtidzëꞌë.  
\v 7 Yuguꞌ dul‑laꞌ cni benliꞌ caꞌ lbiꞌiliꞌ catiꞌ niꞌ nadödliꞌ lu naꞌgac.  
\v 8 Naꞌa, cutur gunliꞌ yuguꞌ lë ni: 
\q1 cutur gdzaꞌaliꞌ; 
\q1 cutur leyliꞌ; 
\q1 cutur nu gunliꞌ ziꞌ; 
\q1 cutur gnë xö́huiꞌliꞌ; 
\q1 cutur gnaliꞌ le cunác. 
\m  
\v 9 Cutu siꞌ yéꞌiliꞌ lzaꞌliꞌ tuliꞌ yetuliꞌ le chnucaꞌnliꞌ le gucliꞌ ziꞌal, len yuguꞌ le benliꞌ ziꞌal.  
\v 10 Chnacliꞌ bunách cub, len tu tu dza rcubliꞌ, ruhuöacrliꞌ ca nac Nu naꞌ bun lbiꞌiliꞌ, quië gúnbëꞌliꞌ Lëꞌ gdu ca naquëꞌ Lëꞌ.  
\v 11 Le chdzagruꞌ‑nëꞌ Cristo: 
\q1 cutur nacruꞌ bönniꞌ gzaꞌa len bönniꞌ judío; 
\q1 cutur nacruꞌ bönniꞌ narugu lu xpë́laꞌquëꞌ le nac bëꞌ nu naqui queëꞌ Dios len bönniꞌ cunarugu lu xpë́laꞌquëꞌ lë naꞌ nac bëꞌ; 
\q1 cutur nacruꞌ bönniꞌ taꞌyejniꞌi len bönniꞌ cutaꞌyejniꞌi; 
\q1 cutur nacruꞌ bönniꞌ nadáꞌugac len bönniꞌ cunadáꞌugac. 
\m Naꞌa, Cristo naquëꞌ yúguꞌtë le nac lsacaꞌ len dzaguëꞌ yúguꞌtëruꞌ. 
\p  
\v 12 Dios nadxiꞌinëꞌ lbiꞌiliꞌ len gröëꞌ lbiꞌiliꞌ quië gáquiliꞌ quizi queëꞌ. Qui lë ni naꞌ, ral‑laꞌ: 
\q1 güiꞌ ládxiꞌliꞌ lzaꞌliꞌ, 
\q1 len gacliꞌ dxiꞌi ladxiꞌ, 
\q1 len nöxj ladxiꞌ, 
\q1 len cuidiꞌ ladxiꞌ, 
\q1 len cözliꞌ zxön ladxiꞌ. 
\p  
\v 13 Chquiꞌ rac didzaꞌ bizxj tuliꞌ len yetuliꞌ, gul‑guáꞌ glen lzaꞌliꞌ tuliꞌ yetuliꞌ, len gul‑nít lau lzaꞌliꞌ tuliꞌ yetuliꞌ ca naꞌ benëꞌ Cristo, bunít lahuëꞌ lbiꞌiliꞌ.  
\v 14 Le nactër blau ca yúguꞌtë lë ni, ral‑laꞌ gdxiꞌiliꞌ yúguꞌtë bunách, le nac yöl‑laꞌ nadxíꞌi le run ga nacruꞌ tuz len ga nacruꞌ gdu.  
\v 15 Gul‑güíꞌ latj gna beꞌi icj ládxiꞌdauꞌliꞌ le rbequi dxi icj ládxiꞌdauꞌruꞌ, le runnëꞌ queëruꞌ Dios. Qui lë ni naꞌ bulidzëꞌ lbiꞌiliꞌ, quië gacliꞌ tuz lu gdu ca nayáꞌ nabanëꞌ Cristo. Gul‑guië́ꞌ Dios: “Xclenuꞌ.” 
\p  
\v 16 Gul‑síꞌ lu naꞌliꞌ xtidzëꞌë Cristo le gac queëliꞌ ca tu yöl‑laꞌ tsahuiꞌ zxön. Le zoalen lbiꞌiliꞌ yöl‑laꞌ rejniꞌi queëꞌ Dios, gul‑sëdi len gul‑zejniꞌi lzaꞌliꞌ tuliꞌ yetuliꞌ. Gdu ládxiꞌliꞌ gul‑gúl‑l queëꞌ Dios yuguꞌ salmo, len yuguꞌ le rul‑l yöl‑laꞌ ba len yuguꞌ le rul‑l laꞌy, guiëliꞌ‑nëꞌ Dios: “Xclenuꞌ.”  
\v 17 Yúguꞌtë le runliꞌ, le nac didzaꞌ ruiꞌliꞌ o le nac dxin runliꞌ, gul‑gún yúguꞌtë lu lëꞌ Xanruꞌ Jesús, len guiëliꞌ‑nëꞌ Dios Xuz: “Xclenuꞌ”, dzaguëꞌ lbiꞌiliꞌ Cristo. 
\s1 Le ral‑laꞌ gunruꞌ qui lzaꞌruꞌ le náquiruꞌ queëꞌ Cristo 
\p  
\v 18 Lbiꞌiliꞌ, ngul nutság náꞌlenliꞌ bönniꞌ, gul‑gún ca rna xtídzaꞌquëꞌ bönniꞌ qui queëliꞌ ca ral‑laꞌ gunliꞌ, le náquiliꞌ queëꞌ Xanruꞌ. 
\p  
\v 19 Lbiꞌiliꞌ, bönniꞌ nutság náꞌlenliꞌ ngul, gul‑dxíꞌi ngul qui queëliꞌ, len cutu uzeyliꞌ ba nadx lecnu. 
\p  
\v 20 Lbiꞌiliꞌ, biꞌi raꞌbán, gul‑gún ca rna yúguꞌtë xtídzaꞌquëꞌ xuz xnaꞌliꞌ. Lë ni rdzag ladxëꞌë Xanruꞌ. 
\p  
\v 21 Lbiꞌiliꞌ, nul‑liꞌ nacliꞌ xuzgac biꞌidauꞌ, cutu töd bëꞌi gut quinliꞌ zxiꞌnliꞌ, cui huöa ládxiꞌcbiꞌ. 
\p  
\v 22 Lbiꞌiliꞌ, nul‑liꞌ nacliꞌ bönniꞌ nadáꞌugac, gul‑gún ca rna yúguꞌtë xtídzaꞌquëꞌ xanliꞌ luyú ni. Clëgz gunliꞌ cni catiꞌ tuꞌyúëꞌ lbiꞌiliꞌ ca naꞌ tun nup tëꞌni lun ga laꞌdzág ládxiꞌgac bunách, san gdu ládxiꞌliꞌ gul‑gún xchinquëꞌ ca ral‑laꞌ lun nup tadxi Dios.  
\v 23 Ca nac yúguꞌtë le runliꞌ, gul‑gún gdu ládxiꞌliꞌ, gac ca runliꞌ xchinëꞌ Xanruꞌ len clëgz ca runliꞌ xchingac bunách.  
\v 24 Chnö́ziczliꞌ ubiꞌë queëliꞌ Xanruꞌ, gunnëꞌ queëliꞌ le chnupë́ꞌë Dios quegac nup nacgac zxiꞌnczëꞌ. Cni gac, le runliꞌ xchinëꞌ Xanruꞌ Jesucristo.  
\v 25 Nu ruaꞌ döꞌ, ubiꞌë qui nu naꞌ Xanruꞌ ca nac döꞌ ruaꞌ nu naꞌ, le cutu utsë́ꞌë Dios ca ral‑laꞌ ubiꞌë qui queëgac bunách. 
\c 4  
\p  
\v 1 Lbiꞌiliꞌ, nul‑liꞌ nacliꞌ xangac bunách, gul‑gún le nac tsahuiꞌ len le nac dxiꞌa ca rugunliꞌ dxin yuguꞌ huen dxin queëliꞌ. Gul‑tsajnéy zoa caꞌ queëliꞌ Xanliꞌ niꞌ yehuaꞌ yubá. 
\p  
\v 2 Lbiꞌiliꞌ, yúguꞌtëliꞌ, gul‑lídzteczëꞌ Dios. Gul‑spán ládxiꞌliꞌ ulidzliꞌ‑nëꞌ Dios, len gul‑guië́ꞌ: “Xclenuꞌ.”  
\v 3 Laꞌ naꞌz catiꞌ rulidzliꞌ‑nëꞌ Dios, gul‑náb‑nëꞌ caꞌ gáclenëꞌ netuꞌ, gunnëꞌ netuꞌ latj quíxjöꞌtuꞌ xtidzëꞌë Xanruꞌ, quië gac uzéjniꞌtuꞌ bunách le bgachiꞌ ca nac queëꞌ Cristo. Le runaꞌ cni nadzunaꞌ lidx guia ni.  
\v 4 Gul‑náb‑nëꞌ caꞌ Dios, gunnëꞌ nedaꞌ latj usálj laꞌanaꞌ le bgachiꞌ naꞌ ca ral‑laꞌ gunaꞌ. 
\p  
\v 5 Lu yöl‑laꞌ rejniꞌi queëliꞌ, gul‑gún le runliꞌ laugac nup cutaꞌyejlëꞌ Cristo. Gul‑guntsca dxin yuguꞌ dza uzáꞌ ladxëꞌë queëliꞌ Dios, gunliꞌ xchinëꞌ.  
\v 6 Ral‑laꞌ güiꞌliꞌ didzaꞌ ca rdzag ladxëꞌë Dios len ca ral‑laꞌ gun nup náquigac queëꞌ. Ral‑laꞌ gnö́ziliꞌ caꞌ nac ral‑laꞌ ubiꞌiliꞌ didzaꞌ, bi guiëliꞌ tu tu bunách. 
\s1 Tuꞌgáp Dios lzaꞌgac bunách queëꞌ Cristo 
\p  
\v 7 Le rac quiaꞌ ni quíxjöiꞌnëꞌ lbiꞌiliꞌ Tíquico, naquëꞌ bö́chiꞌruꞌ nadxiꞌiruꞌ‑nëꞌ. Naquëꞌ caꞌ huen dxin gdu queëꞌ Xanruꞌ, rúnlenëꞌ nedaꞌ tsazxö́n dxin queëꞌ Xanruꞌ.  
\v 8 Qui lë ni naꞌ rsölaꞌa‑nëꞌ ga zoaliꞌ, quië uzéjniꞌnëꞌ lbiꞌiliꞌ le rac quiaꞌ, len utipëꞌ ládxiꞌliꞌ.  
\v 9 Zéajlenëꞌ lëꞌ tsazxö́n Onésimo, bö́chiꞌruꞌ naꞌ nabáblenëꞌ lbiꞌiliꞌ. Naquëꞌ caꞌ bö́chiꞌruꞌ nadxiꞌiruꞌ‑nëꞌ, len rejlëꞌë Xanruꞌ. Chopëꞌ ni laꞌguíxjöiꞌnëꞌ lbiꞌiliꞌ yúguꞌtë le rac ni. 
\p  
\v 10 Rugapëꞌ Dios lbiꞌiliꞌ Aristarco, yúꞌulenëꞌ nedaꞌ tsazxö́n lidx guia. Rugapbiꞌ Dios caꞌ lbiꞌiliꞌ biꞌi Marcos, biꞌi bönniꞌ queënu ngul zanëꞌ Bernabé. Chgudxaꞌ lbiꞌiliꞌ bi gunliꞌ queëbiꞌ biꞌi Marcos naꞌ. Chquiꞌ huidbiꞌ ga zoaliꞌ, gul‑gún‑biꞌ ba laꞌn.  
\v 11 Rugapëꞌ Dios caꞌ lbiꞌiliꞌ bönniꞌ ni lëꞌ Jesús, zoa yetú lëꞌ Justo. Nacuáꞌ zian bunách judío taꞌyejlëꞌ Cristo, san tsonnzëꞌ ni ladj bunách judío tunëꞌ tsazxö́n len nedaꞌ dxin qui le rna bëꞌë Dios, len szxöni tuꞌhuíꞌ zxönëꞌ nedaꞌ.  
\v 12 Rugapëꞌ Dios lbiꞌiliꞌ Epafras, bönniꞌ naꞌ nababëꞌ caꞌ lbiꞌiliꞌ, naquëꞌ huen dxin queëꞌ Cristo. Gdu ladxëꞌë rulidzëꞌ Dios, rátaꞌyuteczëꞌ lahuëꞌ gáclenëꞌ lbiꞌiliꞌ quië soaliꞌ gdu ladxiꞌ, len soaliꞌ caꞌ sinaꞌ gunliꞌ yúguꞌtë le rëꞌncznëꞌ Dios.  
\v 13 Runaꞌ lnaꞌ lau queëꞌ Epafras naꞌ, ruiꞌtsca ladxëꞌë lbiꞌiliꞌ lencaꞌ nup nacuáꞌ Laodicea, len nup nacuáꞌ Hierápolis.  
\v 14 Rugapëꞌ Dios lbiꞌiliꞌ Demas, lencaꞌ Lucas, bönniꞌ naꞌ ruún bunách, atiꞌ nadxiꞌiruꞌ‑nëꞌ. 
\p  
\v 15 Gul‑gáp Dios bö́chiꞌruꞌ nacuꞌë Laodicea, lencaꞌ Ninfas len bunách queëꞌ Cristo nacuáꞌ lidxnu Ninfas naꞌ.  
\v 16 Catiꞌ udx ulabliꞌ guich ni ga niꞌ zoaliꞌ, gul‑gún ga luláb lei bunách queëꞌ Cristo nacuáꞌ Laodicea. Gul‑láb caꞌ lbiꞌiliꞌ guich naꞌ laꞌsölaꞌ queëliꞌ bunách Laodicea naꞌ.  
\v 17 Gul‑guië́ꞌë Arquipo: “Bëꞌ ladxuꞌu gunuꞌ dxin naꞌ budödëꞌ lu naꞌu Xanruꞌ.” 
\p  
\v 18 Nedaꞌ, Pablo, ruzujczaꞌ lu guich dídzaꞌdauꞌ ni, rniaꞌ: Rugapaꞌ Dios lbiꞌiliꞌ. Gul‑tsajnéy ca rac quiaꞌ ni nadzunaꞌ lidx guia. Rnabdaꞌ‑nëꞌ Dios uzáꞌ ladxëꞌë queëliꞌ le nac dxiꞌa. Caꞌ gac.