\id 2TH  
\h 2 Tesalonicenses 
\toc1 DIDZAꞌ BURÓP BSÖLËꞌË PABLO YÖDZ TESALÓNICA 
\toc2 2 Tesalonicenses 
\toc3 2 Ts. 
\mt1 DIDZAꞌ BURÓP BSÖLËꞌË PABLO YÖDZ TESALÓNICA 
\c 1  
\s1 Pablo rugapëꞌ Dios bunách queëꞌ Cristo nacuꞌë Tesalónica 
\p  
\v 1 Nedaꞌ, Pablo, dzagquëꞌ nedaꞌ Silvano len biꞌi Timoteo, rugapaꞌ Dios lbiꞌiliꞌ, nacliꞌ queëꞌ Xuzruꞌ Dios len queëꞌ Xanruꞌ Jesucristo, zoaliꞌ Tesalónica.  
\v 2 Rnabtuꞌ lahuëꞌ Xuzruꞌ Dios len lahuëꞌ Xanruꞌ Jesucristo, uzáꞌ ladxëꞌë queëliꞌ len gunëꞌ ga soa dxi icj ládxiꞌdauꞌliꞌ. 
\s1 Dios gchuguëꞌ quegac bunách dul‑laꞌ catiꞌ huödëꞌ Cristo 
\p  
\v 3 Ral‑laꞌ guië́tecztuꞌ‑nëꞌ Dios: Xclenuꞌ, ca nac queëliꞌ, böchiꞌ lzaꞌtuꞌ, atiꞌ nac dxiꞌa guntuꞌ cni, le zeaj ractër gdu ca réjlëꞌliꞌ Dios. Lëzcaꞌ cni, ca nadxiꞌiliꞌ lzaꞌliꞌ tuliꞌ yetuliꞌ zeaj racr gdu.  
\v 4 Qui lë ni naꞌ, len yöl‑laꞌ rudziji rguíxjöꞌtuꞌ ca nac queëliꞌ laugac bunách queëꞌ Dios ni, le rbözliꞌ zxön ladxiꞌ, len réjlëꞌliꞌ Dios zal‑laꞌ szxöni taꞌbía ládxiꞌgac lbiꞌiliꞌ bunách len szxöni rzacaꞌ rguiꞌliꞌ, san ruaꞌ rlenliꞌ.  
\v 5 Yuguꞌ lë ni tac bëꞌ nac tsahuiꞌ ca rbequi xbeynëꞌ bunách Dios. Ruꞌë latj rzacaꞌ rguiꞌliꞌ naꞌa, quië gacliꞌ lsacaꞌ tsazliꞌ ga niꞌ rna bëꞌë Lëꞌ. 
\p  
\v 6 Nac tsahuiꞌ ca gunëꞌ Dios, ubiꞌë quegac nup tuꞌsacaꞌ ziꞌ lbiꞌiliꞌ, gunëꞌ ga laꞌzacaꞌ laꞌguíꞌi nup naꞌ.  
\v 7 Yetú caꞌ, lbiꞌiliꞌ rzacaꞌ rguiꞌliꞌ naꞌa, atiꞌ ubiꞌë queëliꞌ Dios, gunëꞌ ga uzíꞌ ládxiꞌliꞌ tsazxö́n len netuꞌ, dza niꞌ glaꞌ lahuëꞌ Xanruꞌ Jesucristo, grujëꞌ yehuaꞌ yubá. Lunëꞌ Lëꞌ tsazxö́n gbaz laꞌy niꞌa nëꞌë, len luluꞌë lahui yöl‑laꞌ huac zxön queëꞌ.  
\v 8 Glaꞌ lahuëꞌ Cristo dza niꞌ ca tu guiꞌ zxön catiꞌ niꞌ uzíꞌ lëꞌ nup cunúnbëꞌgac Dios len cutún ca rna didzaꞌ dxiꞌa queëꞌ Xanruꞌ Jesucristo.  
\v 9 Bunách cni, uzíꞌ lëꞌ lequëꞌ, atiꞌ tsaz tsajtsuꞌuquëꞌ lu guiꞌ gabíl. Tsaz laꞌcuitëꞌ lahuëꞌ Xanruꞌ len ga nalaꞌgac yöl‑laꞌ yeníꞌ queëꞌ len yöl‑laꞌ huac zxön queëꞌ.  
\v 10 Cni gac dza niꞌ catiꞌ huödëꞌ quië gac queëꞌ yöl‑laꞌ ba niꞌa qui le nacgac bunách laꞌy queëꞌ, atiꞌ lubani queëꞌ ca nacgac yúguꞌtë nup taꞌyejlëꞌ Lëꞌ. Cni gac caꞌ queëliꞌ le gyéjlëꞌliꞌ le bentuꞌ lnaꞌ lau qui lauliꞌ ca nac queëꞌ Jesús. 
\p  
\v 11 Qui lë ni naꞌ caꞌ, rulídztecztuꞌ‑nëꞌ Dios queëruꞌ, rnábituꞌ‑nëꞌ gáclenëꞌ lbiꞌiliꞌ, len gunëꞌ ga gacliꞌ lsacaꞌ gdél‑liꞌliꞌ lë naꞌ bulidzëꞌ lbiꞌiliꞌ quië uziꞌliꞌ xbey. Lëzcaꞌ rnabtuꞌ lahuëꞌ gunëꞌ ga gac gdu yúguꞌtë le ruiꞌ ládxiꞌliꞌ gunliꞌ le nac dxiꞌa len yúguꞌtë dxin runliꞌ lu yöl‑laꞌ rejlëꞌ queëliꞌ Lëꞌ. Len yöl‑laꞌ huac queëꞌ Dios gunliꞌ lë ni.  
\v 12 Cni gac, gac yöl‑laꞌ ba qui lëꞌ Xanruꞌ Jesucristo niꞌa qui le runliꞌ, atiꞌ gacliꞌ lbiꞌiliꞌ bicaꞌ ba niꞌa qui le gunëꞌ Lëꞌ, gac ca nac le buzáꞌ ladxëꞌë queëliꞌ Dios queëruꞌ lencaꞌ Xanruꞌ Jesucristo. 
\c 2  
\s1 Uluíꞌ lahuëꞌ Bönniꞌ Xöhuiꞌ 
\p  
\v 1 Naꞌa, ca nac qui dza huödëꞌ Xanruꞌ Jesucristo, len ca gac, dutubëꞌ rëꞌu queëꞌ Lëꞌ, rátaꞌyutuꞌ lauliꞌ, böchiꞌ lzaꞌtuꞌ,  
\v 2 cui güiꞌliꞌ latj nu gun chixi lbiꞌiliꞌ ca nacgac le gzxiꞌ lu naꞌliꞌ. Cutu cuequi baguíꞌi icj ládxiꞌdauꞌliꞌ niꞌa qui bi taꞌguíxjöꞌë bönniꞌ taꞌzíꞌ yëꞌë, taꞌnë́ꞌ zóalenëꞌ lequëꞌ Dios Böꞌ Laꞌy, o niꞌa qui bi didzaꞌ tuiꞌ bunách, o niꞌa qui bi nayúj tu lu guich taꞌnë́ꞌ netuꞌ bsö́laꞌtuꞌ, le taꞌná: “Chgdöd dza huödëꞌ Xanruꞌ.”  
\v 3 Cutu caꞌ güiꞌliꞌ latj nu siꞌ yeꞌi lbiꞌiliꞌ, le cutu gdxin dza niꞌ huödëꞌ Jesús chquiꞌ cutu laꞌláꞌ lahui ziꞌal zian nup laꞌdáꞌbagaꞌ Dios, atiꞌ glaꞌ lahuëꞌ Bönniꞌ Xöhuiꞌ, bönniꞌ naꞌ ral‑laꞌ tsaziëꞌ lu guiꞌ gabíl.  
\v 4 Bönniꞌ ni gzaguëꞌë, len lu yöl‑laꞌ run ba zxön cuinëꞌ táꞌbaguëꞌë yúguꞌtë le naqui queëꞌ Dios o le tun zxön bunách lu yöl‑laꞌ run Dios ba laꞌn quequëꞌ. Gunëꞌ cni bönniꞌ naꞌ ga gdxintë cöꞌë ca Dioscz lu gdauꞌ ga nac xlatjëꞌ Dios, len gun cuinëꞌ ca Dios. 
\p  
\v 5 ¿Naruꞌ cu rajneyliꞌ gdíxjöiꞌdaꞌ lbiꞌiliꞌ yuguꞌ lë ni catiꞌ niꞌ zóalenaꞌ lbiꞌiliꞌ?  
\v 6 Naꞌa, núnbëꞌliꞌ Nu ruzagaꞌ xnözëꞌ Bönniꞌ Xöhuiꞌ naꞌ, cui glaꞌ lahuëꞌ ziꞌal ga gdxinr dza queëꞌ.  
\v 7 Chrun dxin le nagachiꞌ qui le nac xöhuiꞌ, san naꞌatë zoa Nu ruzagaꞌ xnözëꞌ Bönniꞌ Xöhuiꞌ naꞌ ga gdxinr dza ucuít cuini Nu naꞌ ruzagaꞌ xnözëꞌ.  
\v 8 Niꞌr glaꞌ lahuëꞌ Bönniꞌ Xöhuiꞌ naꞌ, atiꞌ Xanruꞌ Jesucristo uxicjëꞌ lëꞌ len böꞌ gruj ruꞌë, len usnitiëꞌ lëꞌ len le tsëp yös yeníꞌ qui dza huödëꞌ.  
\v 9 Catiꞌ gdxinëꞌ Bönniꞌ Xöhuiꞌ naꞌ, len yöl‑laꞌ huac qui Satanás tuꞌ xöhuiꞌ glaꞌ lahuëꞌ. Len yöl‑laꞌ huac qui le cunácz, gunëꞌ yúguꞌtë yöl‑laꞌ huac zxön, len yúguꞌtë le lac bëꞌ, len yúguꞌtë le lun ga lubani bunách.  
\v 10 Len yöl‑laꞌ huac qui le cunácz, gunëꞌ cni laugac nup laꞌnít le cugulazíꞌ lu naꞌquëꞌ gdu ládxiꞌquëꞌ le nac gdutë li, quië lulë́ꞌ.  
\v 11 Qui lë ni naꞌ Dios guꞌë latj gdxin quequëꞌ tu le run yöl‑laꞌ huac le siꞌ yeꞌi lequëꞌ quië laꞌyejlëꞌë le cunácz.  
\v 12 Cni gac quië laꞌbagaꞌ zxguiaꞌ yúguꞌtë nup cutu gulayejlëꞌ le nac gdutë li, san guladzág ládxiꞌgac le cunác tsahuiꞌ. 
\s1 Nup gröczëꞌ Dios quië lulá 
\p  
\v 13 Böchiꞌ lzaꞌtuꞌ, lbiꞌiliꞌ naꞌ nadxiꞌinëꞌ lbiꞌiliꞌ Xanruꞌ, ral‑laꞌ guië́tecztuꞌ‑nëꞌ Dios: “Xclenuꞌ”, niꞌa qui le nac queëliꞌ, le chgröczëꞌ lbiꞌiliꞌ Dios dza niꞌtë quië ulaliꞌ niꞌa qui le runëꞌ Dios Böꞌ Laꞌy, quië gacliꞌ gdu dxiꞌa le réjlëꞌliꞌ le nac gdutë li.  
\v 14 Quië gac cni queëliꞌ, Dioscz bulidzëꞌ lbiꞌiliꞌ, quië gdél‑liꞌliꞌ gunliꞌ tsazxö́n Xanruꞌ Jesucristo lu yeníꞌ queëꞌ. Cni gac niꞌa qui didzaꞌ dxiꞌa runtuꞌ lban qui. 
\p  
\v 15 Qui lë ni naꞌ, böchiꞌ lzaꞌtuꞌ, gul‑zóa tsutsu len gul‑gún chiꞌi didzaꞌ naꞌ nazëdliꞌ, le bë́ꞌlentuꞌ lbiꞌiliꞌ len buzujtuꞌ queëliꞌ lu guich.  
\v 16-17 Rnabtuꞌ lahuëꞌ Xanruꞌ Jesucristo len lahuëꞌ Xuzruꞌ Dios, utipëꞌ ládxiꞌliꞌ len gunëꞌ ga gacliꞌ tsutsu ca nac yúguꞌtë le nac dxiꞌa runliꞌ len yúguꞌtë didzaꞌ dxiꞌa ruiꞌliꞌ. Lëczëꞌ nadxiꞌinëꞌ rëꞌu len bennëꞌ queëruꞌ le ruhuíꞌ zxöntecz rëꞌu len le nac dxiꞌa runruꞌ löz, yuguꞌ lë naꞌ buzáꞌ ladxëꞌë queëruꞌ Dios. 
\c 3  
\s1 Le ral‑laꞌ gnábiruꞌ‑nëꞌ Dios 
\p  
\v 1 Yetú caꞌ, böchiꞌ lzaꞌtuꞌ, gul‑lidzëꞌ Dios gnábiliꞌ‑nëꞌ gáclenëꞌ netuꞌ, runtuꞌ lban ni, quië së xtidzëꞌë Xanruꞌ atiꞌ lun lei ba laꞌn bunách, gac ni ca naꞌ guc ga niꞌ zoaliꞌ.  
\v 2 Gnabliꞌ caꞌ quië ulatuꞌ lu naꞌquëꞌ bönniꞌ xöhuiꞌ tuaꞌdöꞌ, le cutu taꞌyejlëꞌ Dios yúguꞌtë bunách.  
\v 3 Naꞌa, le runëꞌ ca rnëꞌ Xanruꞌ, gunëꞌ ga gacliꞌ tsutsu len gun chiꞌë lbiꞌiliꞌ, cui gdzunliꞌ lu naꞌ tuꞌ xöhuiꞌ.  
\v 4 Ruzxöni ládxiꞌtuꞌ‑nëꞌ Xanruꞌ ca nac queëliꞌ, gunliꞌ yuguꞌ lë ni ziꞌa gnabtuꞌ lauliꞌ, ca naꞌ chrunliꞌ.  
\v 5 Rnabtuꞌ lahuëꞌ Xanruꞌ usë́ꞌë ládxiꞌliꞌ quië gdxiꞌiliꞌ‑nëꞌ Dios, len cözliꞌ zxön ladxiꞌ ca naꞌ benëꞌ Cristo. 
\s1 Ca run bayúdx gunruꞌ dxin 
\p  
\v 6 Niꞌa qui lëꞌ Xanruꞌ Jesucristo rna béꞌituꞌ lbiꞌiliꞌ, böchiꞌ lzaꞌtuꞌ, gcuitliꞌ ga nacuꞌë böchiꞌ lzaꞌruꞌ taꞌdazëꞌ caꞌ len cutu tunëꞌ ca nac zxba busë́dituꞌ lbiꞌiliꞌ.  
\v 7 Nö́ziczliꞌ ral‑laꞌ gunliꞌ ca runtuꞌ netuꞌ, le cutu caꞌ gdaztuꞌ caꞌ netuꞌ ga niꞌ zoaliꞌ.  
\v 8 Cutu gdagu dáduztuꞌ le bennliꞌ queëtuꞌ, san lu yöl‑laꞌ ruúbi ruguíꞌi len lu yöl‑laꞌ rcuidiꞌ bentuꞌ dxin rël len të dza cui usacaꞌ ziꞌtuꞌ nituliꞌ lbiꞌiliꞌ.  
\v 9 Cni bentuꞌ quië gactuꞌ lauliꞌ ca tu le ruluíꞌi lbiꞌiliꞌ ca ral‑laꞌ gunliꞌ, zal‑laꞌ dë lu naꞌtuꞌ gnabtuꞌ bi gunliꞌ queëtuꞌ.  
\v 10 Lëzcaꞌ catiꞌ niꞌ gzóalentuꞌ lbiꞌiliꞌ, gna béꞌituꞌ lbiꞌiliꞌ cni, le rna: “Chquiꞌ cutu rëꞌnnëꞌ gunëꞌ dxin nu bönniꞌ, cutu güiꞌliꞌ le gahuëꞌ bönniꞌ naꞌ.”  
\v 11 Cniz rnatuꞌ le ryö́nituꞌ nútsaꞌquëꞌ ladjliꞌ bönniꞌ taꞌdazëꞌ caꞌ, cutu bi dxin tunëꞌ, san taꞌdazëꞌ caꞌ bi tun bi taꞌnë́ꞌ.  
\v 12 Niꞌa queëꞌ Xanruꞌ Jesucristo rna béꞌituꞌ bönniꞌ tunëꞌ cni, len ruchiztuꞌ icj nagquëꞌ lunëꞌ dxin lu yöl‑laꞌ rböz dxíꞌadauꞌ, quië gac lahuëꞌ le naqui quégaczëꞌ. 
\p  
\v 13 Naꞌa, böchiꞌ lzaꞌtuꞌ, cutu soa dxiliꞌ, gúnteczliꞌ le nac dxiꞌa.  
\v 14 Chquiꞌ nútiꞌtëz bönniꞌ cutu gunëꞌ ca rna xtídzaꞌtuꞌ ruzujtuꞌ lu guich ni, gul‑gún ga gac bëꞌë bönniꞌ naꞌ, len cutu gunliꞌ tsazxö́n lëꞌ quië utuiꞌnëꞌ.  
\v 15 Cutu ral‑laꞌ gléꞌiliꞌ‑nëꞌ ca bönniꞌ curléꞌinëꞌ lbiꞌiliꞌ dxiꞌa, san gul‑sáꞌ ladxëꞌë ca bö́chiꞌczliꞌ. 
\s1 Pablo rguꞌë lu nëꞌë Dios bö́chiꞌruꞌ nacuꞌë Tesalónica 
\p  
\v 16 Rnabtuꞌ lahuëꞌ Xanruꞌ gúnteczëꞌ ga soa dxi icj ládxiꞌdauꞌliꞌ ca nac yúguꞌtë le runliꞌ len sóalenëꞌ yúguꞌtëliꞌ. Lëczëꞌ runëꞌ ga zoa dxi icj ládxiꞌdauꞌruꞌ. 
\p  
\v 17 Nedaꞌ, Pablo, len naꞌczaꞌ ruzujaꞌ lu guich ni le rugapaꞌ Dios lbiꞌiliꞌ, atiꞌ nac tu le nac bëꞌ yúguꞌtë guich rsölaꞌa. Cniz ruzujaꞌ lu guich.  
\v 18 Le ruzáꞌ ladxëꞌë queëruꞌ Xanruꞌ Jesucristo gac queëliꞌ yúguꞌtëliꞌ. Caꞌ gac.