\id 2PE  
\h 2 Pedro 
\toc1 DIDZAꞌ BURÓP BUZUJËꞌ LU GUICH PEDRO 
\toc2 2 Pedro 
\toc3 2 P. 
\mt1 DIDZAꞌ BURÓP BUZUJËꞌ LU GUICH PEDRO 
\c 1  
\s1 Pedro rugapëꞌ Dios nup taꞌdáꞌ Cristo 
\p  
\v 1 Nedaꞌ, Simón Pedro, nacaꞌ huen dxin queëꞌ Jesucristo, len gbaz nasölëꞌë Lëꞌ. Rugapaꞌ Dios lbiꞌiliꞌ, réjlëꞌliꞌ Jesús. Tuz ca zácaꞌgac yöl‑laꞌ rejlëꞌ queëliꞌ Lëꞌ len yöl‑laꞌ rejlëꞌ queëtuꞌ Lëꞌ. Dios benëꞌ ga réjlëꞌliꞌ Lëꞌ le nacczëꞌ tsahuiꞌ, len le naquëꞌ tsahuiꞌ caꞌ Xanruꞌ Jesucristo, Nu naꞌ ruslá rëꞌu.  
\v 2 Rnabdaꞌ‑nëꞌ Dios gunëꞌ ga gataꞌ gdu queëliꞌ le ruzáꞌ ladxëꞌë queëruꞌ, len gunëꞌ ga soa dxi icj ládxiꞌdauꞌliꞌ le núnbëꞌliꞌ‑nëꞌ Dios lencaꞌ Xanruꞌ Jesús. 
\s1 Le nacgac nup taꞌyejlëꞌ Cristo 
\p  
\v 3 Lu yöl‑laꞌ huac zxön queëꞌ, Dios chbennëꞌ queëruꞌ yúguꞌtë le rquíniruꞌ quië gataꞌ queëruꞌ yöl‑laꞌ naꞌbán gdu, len quië gacruꞌ baꞌa ladxiꞌ, le núnbëꞌruꞌ Nu naꞌ bulídz rëꞌu quië gataꞌ queëruꞌ yöl‑laꞌ yeníꞌ queëꞌ len le nac dxiꞌa queëꞌ.  
\v 4 Le runëꞌ cni, benëꞌ ga gac uziꞌruꞌ xbey yuguꞌ le zxön len le nac dxiꞌa gzxiꞌ lu nëꞌë gunnëꞌ queëruꞌ, atiꞌ le nac cni nularuꞌ lu le cunác dzöꞌ yödzlyú ni le taꞌzë́ ládxiꞌgac le cunác bunách, quië gacruꞌ ca naquëꞌ Lëczëꞌ Dios.  
\v 5 Qui lë ni naꞌ, chquiꞌ réjlëꞌliꞌ Cristo, gul‑güíꞌ ládxiꞌliꞌ gacliꞌ dxiꞌi ladxiꞌ. Chquiꞌ chnacliꞌ dxiꞌi ladxiꞌ, gul‑güíꞌ ládxiꞌliꞌ gataꞌ caꞌ queëliꞌ yöl‑laꞌ rac szxöni.  
\v 6 Chquiꞌ napliꞌ yöl‑laꞌ rac szxöni, gul‑güíꞌ ládxiꞌliꞌ gna beꞌi cuinliꞌ, len chquiꞌ rna beꞌi cuinliꞌ, gul‑cö́z zxön ladxiꞌ, len chquiꞌ rbözliꞌ zxön ladxiꞌ, gul‑zóa baꞌa ladxiꞌ.  
\v 7 Chquiꞌ zoaliꞌ baꞌa ladxiꞌ, gul‑dxíꞌi lzaꞌliꞌ, len chquiꞌ nadxiꞌiliꞌ lzaꞌliꞌ, gul‑dxíꞌi caꞌ yúguꞌtë bunách. 
\p  
\v 8 Chquiꞌ cni runliꞌ, len zeaj racr gdu ca runliꞌ cni, lë ni gun ga cugác daduz yöl‑laꞌ rejlëꞌ queëliꞌ Lëꞌ, atiꞌ tseaj gacr gdu ca núnbëꞌliꞌ‑nëꞌ Xanruꞌ Jesucristo.  
\v 9 Nu bönniꞌ cutu ruiꞌ ladxëꞌë gunëꞌ cni, naquëꞌ ca bönniꞌ nachúl nanitiëꞌ, le chgul ladxëꞌë bunëꞌ lëꞌ dxiꞌa Cristo, bugǘëꞌ yuguꞌ dul‑laꞌ gbaguëꞌë zíꞌatël.  
\v 10 Qui lë ni naꞌ, böchiꞌ lzaꞌadauꞌ, ral‑laꞌ güiꞌtër ládxiꞌliꞌ gáquibeꞌiliꞌ bulidzëꞌ lbiꞌiliꞌ Dios len gröczëꞌ lbiꞌiliꞌ. Chquiꞌ gunliꞌ cni, cutu caꞌ gchixi gníguiliꞌ.  
\v 11 Cni gac, gdu ladxëꞌë Dios gunnzëꞌ lbiꞌiliꞌ latj tsazliꞌ ga rna bë́ꞌteczëꞌ Xanruꞌ Jesucristo, Nu ruslá rëꞌu. 
\p  
\v 12 Qui lë ni naꞌ gúnteczaꞌ ga tsajneyliꞌ yuguꞌ lë ni zal‑laꞌ chnö́ziczliꞌ lei len rugunliꞌ dxin le nac gdutë li naꞌ chgzxiꞌ lu naꞌliꞌ.  
\v 13 Runi nedaꞌ ral‑laꞌ uspanaꞌ ládxiꞌliꞌ ca nacgac lë ni tsal ni zoaꞌ nabanaꞌ.  
\v 14 Ral‑laꞌ gunaꞌ cni le nözdaꞌ ziꞌa gatiaꞌ. Xanruꞌ Jesucristo chgudxczëꞌ nedaꞌ gac cni quiaꞌ.  
\v 15 Qui lë ni naꞌ güiꞌtsca ladxaꞌa gunaꞌ ga tsajnéyteczliꞌ yuguꞌ lë ni töd gatiaꞌ. 
\s1 Nup gulaleꞌi yöl‑laꞌ zxön queëꞌ Cristo 
\p  
\v 16 Cutu bë́ꞌlentuꞌ lbiꞌiliꞌ didzaꞌ rdaz lu yöl‑laꞌ sinaꞌ queëtuꞌ, catiꞌ buzéjniꞌtuꞌ lbiꞌiliꞌ ca ral‑laꞌ gdxin dza huödëꞌ Xanruꞌ Jesucristo, napëꞌ yöl‑laꞌ uná bëꞌ zxön. Netuꞌ bléꞌicztuꞌ yöl‑laꞌ zxön queëꞌ.  
\v 17 Bléꞌituꞌ Lëꞌ catiꞌ benëꞌ Lëꞌ ba laꞌn Xuzruꞌ Dios len gluꞌë Lëꞌ yöl‑laꞌ zxön, atiꞌ byön chiꞌë Dios, bruj latj yeníꞌ queëꞌ, gnëꞌ: “Nu ni nac Zxiꞌnaꞌ. Nadxiꞌidaꞌ Lëꞌ len rdzag ladxaꞌa Lëꞌ.”  
\v 18 Netuꞌ byö́nicztuꞌ chiꞌë naꞌ bruj yehuaꞌ yubá catiꞌ niꞌ gzóalentuꞌ‑nëꞌ Xanruꞌ lu guiꞌa laꞌy. 
\p  
\v 19 Lë naꞌ guc, nac bëꞌtsca nactë didzaꞌ gluꞌë bönniꞌ uláz queëꞌ Dios, atiꞌ ral‑laꞌ güiꞌ ládxiꞌliꞌ didzaꞌ naꞌ, le nac ca tu guiꞌ ruzeníꞌ tu ga nac chul ga gdxintë dza uzeníꞌ lu icj ládxiꞌdauꞌliꞌ Nu naꞌ nac ca bölj usíl queëruꞌ.  
\v 20 Lë ni runtsca bayúdx tséjniꞌliꞌ: “Nutu nu bönniꞌ, racz queëꞌ cutu gac usedxëꞌ didzaꞌ bëꞌë bönniꞌ uláz queëꞌ Dios.”  
\v 21 Yuguꞌ didzaꞌ gluꞌë bönniꞌ uláz queëꞌ Dios cutu caꞌ gluꞌë le glëꞌncznëꞌ, san gluꞌë didzaꞌ uláz queëꞌ Dios le buchiziëꞌ lei icj ládxiꞌdauꞌquëꞌ Dios Böꞌ Laꞌy. 
\c 2  
\s1 Ca nacgac nup tuꞌsëdi le cunácz 
\p  
\v 1 Gulacuáꞌlenëꞌ caꞌ bunách Israel bönniꞌ taꞌzíꞌ yëꞌë, gulanë́ꞌ nacquëꞌ bönniꞌ tuꞌë didzaꞌ uláz queëꞌ Dios. Lëzcaꞌ cni laꞌcuáꞌlenëꞌ lbiꞌiliꞌ bönniꞌ laꞌzíꞌ yëꞌë, lusëdnëꞌ lbiꞌiliꞌ le cunácz. Lu yöl‑laꞌ sinaꞌ quequëꞌ lusëdnëꞌ lbiꞌiliꞌ zxba quégaczëꞌ le gun ga soa banádx queëliꞌ ucaꞌnliꞌ le nac gdutë li. Laꞌdáꞌbaguëꞌë caꞌ Xanruꞌ, Nu buslá rëꞌu. Le lunëꞌ gun ga usnittëꞌ lequëꞌ Dios.  
\v 2 Gunliꞌ lequëꞌ tsazxö́n zianliꞌ ca nac le cunác lunëꞌ, atiꞌ le gunliꞌ laꞌliꞌ cni laꞌnë́ xöhuiꞌ bunách qui didzaꞌ dxiꞌa le nac gdutë li.  
\v 3 Lu yöl‑laꞌ ruhuidiꞌ quequëꞌ lusëdnëꞌ lbiꞌiliꞌ le cunácz, quië gataꞌ quequëꞌ dumí queëliꞌ. Chnarugu quequëꞌ bönniꞌ ni, atiꞌ nac löz laꞌnitiëꞌ tsaz. 
\p  
\v 4 Dios cutu bunít lahuëꞌ yuguꞌ gbaz laꞌy queëꞌ naꞌ glunëꞌ dul‑laꞌ, san gruꞌnëꞌ lequëꞌ latj chul. Nágaꞌquëꞌ du guia ga nac chul naꞌ, taꞌbözëꞌ dza usyudxëꞌ lequëꞌ Dios.  
\v 5 Lëzcaꞌ cni, cutu bunít lahuëꞌ bunách gulacuáꞌ dza niꞌtë catiꞌ bsölëꞌë nis guiöj usnít yödzlyú, len busnitiëꞌ bunách nacgac xöhuiꞌ, san buslë́ꞌ lu nis naꞌ Noé, bönniꞌ niꞌ benëꞌ lban qui le nac tsahuiꞌ. Dios buslë́ꞌ caꞌ lu nis yegádx diꞌa dza queëꞌ Noé naꞌ.  
\v 6 Lëzcaꞌ cni, Dios bchuguëꞌ quegac bunách gulacuáꞌ yödz Sodoma len Gomorra, busnitiëꞌ lequëꞌ lu guiꞌ, atiꞌ guluhuöaquëꞌ dö. Le guc quequëꞌ nac tu le ruluíꞌ le run gadxi nup tuaꞌ döꞌ.  
\v 7 Catiꞌ busnitiëꞌ yuguꞌ yödz naꞌ, Dios buslë́ꞌ lu guiꞌ naꞌ Lot, bönniꞌ tsahuiꞌ. Buíꞌnitsca ladxëꞌë Lot niꞌa qui le xöhuiꞌ glun bunách tuaꞌdöꞌ naꞌ.  
\v 8 Cni guc, le gzóalenëꞌ lequëꞌ bönniꞌ tsahuiꞌ naꞌ, atiꞌ bléꞌinëꞌ len byönnëꞌ le cunác naꞌ tunëꞌ, atiꞌ le guquëꞌ baꞌa ladxiꞌ, yúguꞌtë dza gsë́bitsqui ladxëꞌë ca nac le cunác glunëꞌ.  
\v 9 Cni nac, Xanruꞌ nöznëꞌ uslë́ꞌ lu naꞌ nu run ga tsazgac nöz dul‑laꞌ nup naꞌ tadxi Lëꞌ, san nucözëꞌ zxguiaꞌ gunëꞌ nup cunacgac tsahuiꞌ ga gdxinr dza gchuguëꞌ quequëꞌ. 
\p  
\v 10 Gchúgutërëꞌ quegac nup ni tun yuguꞌ le taꞌzë́ ládxiꞌgac le cunác len taꞌdáꞌbagaꞌ yöl‑laꞌ uná bëꞌ queëꞌ Xanruꞌ. Nacquëꞌ rugu ladxiꞌ len zid ladxiꞌ. Cutu tádxinëꞌ tuꞌlídz ditjëꞌ gbaz laꞌy taꞌdë́ꞌ lu yeníꞌ.  
\v 11 Gbaz laꞌy naꞌ nápgactërëꞌ yöl‑laꞌ uná bëꞌ len yöl‑laꞌ huac ca yuguꞌ bönniꞌ naꞌ, san gbaz laꞌy naꞌ cutu tuꞌhuazxjnëꞌ nu luquíëꞌ lahuëꞌ Xanruꞌ. 
\p  
\v 12 Bönniꞌ ni nacquëꞌ ca böaꞌ guixiꞌ, cutu bi taꞌyéjniꞌbaꞌ, san naljcbaꞌ quië nu sön lecbaꞌ len gdödi lecbaꞌ. Taꞌnë́ xöhuëꞌë qui le cutaꞌyéjniꞌnëꞌ, atiꞌ laꞌnitiëꞌ tsaz ca rac quecbaꞌ böaꞌ guixiꞌ naꞌ.  
\v 13 Dios ubiꞌë quequëꞌ le laꞌzacaꞌ laꞌguiꞌë, le gulusacaꞌ ziꞌë bunách. Táquinëꞌ nac xbaquëꞌ tuꞌziꞌë xbey le rac naꞌa dza. Nacquëꞌ ca tu huëꞌ nudzuꞌ len tu le run ditji catiꞌ niꞌ tahuëꞌ tsazxö́n lbiꞌiliꞌ, atiꞌ tuꞌdzijnëꞌ le taꞌzíꞌ yéꞌinëꞌ lbiꞌiliꞌ. 
\p  
\v 14 Lu yöl‑laꞌ rzë ladxiꞌ quequëꞌ le cunác tuꞌyúëꞌ‑nu yuguꞌ ngul. Cutu nacuꞌë dxiz tunëꞌ dul‑laꞌ. Tunëꞌ ga taꞌchixi taꞌnigui nup cunacgac tsutsu ca taꞌyejlëꞌ Cristo. Taꞌguíljteczëꞌ yuguꞌ le tuꞌhuídiꞌnëꞌ. Dios chnuchuguëꞌ quequëꞌ.  
\v 15 Gulucaꞌnëꞌ le nac gdutë li, atiꞌ nachúl nanitquëꞌ. Tunëꞌ ca benëꞌ Balaam, zxiꞌnëꞌ Beor, bönniꞌ niꞌ bdxiꞌinëꞌ dumí, atiꞌ benëꞌ le cunác le nazxjëꞌ.  
\v 16 Dios buzeynëꞌ ba nadx Balaam naꞌ le benëꞌ le cunác naꞌ. Bë́ꞌlenbaꞌ lëꞌ didzaꞌ tubaꞌ búrrodauꞌ ca naꞌ tuiꞌ didzaꞌ bunách atiꞌ buzágaꞌbaꞌ xnözëꞌ Balaam ga naꞌ zijëꞌ lu yöl‑laꞌ rdáꞌbagaꞌ queëꞌ. 
\p  
\v 17 Nacquëꞌ bönniꞌ ni ca tu bduaꞌ chbuiꞌ nis qui, lencaꞌ ca tu böaj rchëꞌ lei böꞌ bdunuꞌ. Chnabáꞌa xlatjquëꞌ latj chul.  
\v 18 Cni nacquëꞌ le tuꞌë didzaꞌ yuguꞌ le zxön lu yöl‑laꞌ cunözi quequëꞌ, len tuꞌgunëꞌ dxin yuguꞌ le taꞌzë́ ládxiꞌgac bunách le cunác, tunëꞌ ga taꞌchixi taꞌnigui nup ziꞌa gululá ladj nup nacgac chul nit.  
\v 19 Tëꞌ yezicaꞌ bunách laꞌdel‑liꞌ yöl‑laꞌ ruslá, san légacczëꞌ nadzunquëꞌ, tunëꞌ bayúdx le cunác. Nadzunquëꞌ yúguꞌtë bönniꞌ lu naꞌ bi rna beꞌi icj ládxiꞌdauꞌquëꞌ.  
\v 20 Chquiꞌ gululë́ꞌ lu le cunác tsahuiꞌ nacuáꞌ yödzlyú ni le glunbëꞌë Xanruꞌ Jesucristo, Nu ruslá rëꞌu, atiꞌ niꞌr taꞌröli lequëꞌ leyúbl le cunác tsahuiꞌ naꞌ, len taꞌná beꞌi lequëꞌ, le nactë nabágaꞌgactërëꞌ zxguiaꞌ ga rajseytë ca le gulabaguëꞌë ziꞌal.  
\v 21 Dxiꞌar gac quequëꞌ laꞌnaruꞌ gatga lunbëꞌë Nu ruzóa rëꞌu nöz tsahuiꞌ ca le gac quequëꞌ chquiꞌ glunbëꞌë Lëꞌ, atiꞌ niꞌr gulucaꞌnëꞌ zxba laꞌy bëꞌë quequëꞌ Dios.  
\v 22 Chbudxín quequëꞌ didzaꞌ naꞌ rna: 
\q1 Ruhueycjbaꞌ böꞌcuꞌ, ruhuágubaꞌ le ziꞌa gubbaꞌ. 
\q1 Ruyazbaꞌ lu gunaꞌ cuch naꞌ ziꞌa gdibruꞌ‑baꞌ. 
\c 3  
\s1 Nac löz huödëꞌ Xanruꞌ 
\p  
\v 1 Didzaꞌ ni nac le buróp ruzujaꞌ queëliꞌ lu guich, böchiꞌ lzaꞌadauꞌ. Lu groptë guich naꞌ ruiꞌ ladxaꞌa uspanaꞌ ládxiꞌliꞌ ca nacgac lë ni.  
\v 2 Gul‑tsajnéy yuguꞌ didzaꞌ gluꞌë zíꞌatël bönniꞌ queëꞌ Dios, gluꞌë didzaꞌ uláz queëꞌ. Gul‑tsajnéy caꞌ zxba naꞌ gna béꞌinëꞌ rëꞌu Xanruꞌ, Nu ruslá rëꞌu, lë naꞌ gulusëdnëꞌ lbiꞌiliꞌ bönniꞌ gbaz nasölëꞌë Lëꞌ. 
\p  
\v 3 Le nac blau ral‑laꞌ tsajneyliꞌ, dza tsajséytëgac luluíꞌ lauquëꞌ bönniꞌ lunëꞌ yuguꞌ le taꞌzë́z ládxiꞌquëꞌ le cunác.  
\v 4 Lutitjëꞌ, laꞌnë́ꞌ: “¿Gazxcz lë naꞌ gzxiꞌ lu nëꞌë Cristo, gnëꞌ: Huödaꞌ leyúbl? Dza niꞌtë catiꞌ glatiëꞌ xuz xtauꞌruꞌ, yúguꞌtë rac tuz ca guc catiꞌ gzu lau rataꞌ yödzlyú ga rdxintë naꞌa dza.”  
\v 5 Tuꞌzóëꞌ tslaꞌl le guc dza niꞌtë, bëꞌë didzaꞌ Dios, atiꞌ glataꞌ luzxbá len luyú. Bruj lu nis luyú naꞌ atiꞌ zoa gatsj lahuiꞌl nis.  
\v 6 Len nis caꞌ busnitiëꞌ yödzlyú Dios dza niꞌtë catiꞌ niꞌ bsölëꞌë nis guiöj usnít bunách dul‑laꞌ.  
\v 7 Luzxbá len yödzlyú ni nacuáꞌ naꞌa dza, Dios nucuꞌë leygac ga gdxinr dza usnitiëꞌ leygac lu guiꞌ. Cni gac le gnëꞌ cni Dioscz. Uzéguiꞌë leygac dza niꞌ gchuguëꞌ quegac bunách cunacgac tsahuiꞌ. Usnitiëꞌ leygac. 
\p  
\v 8 Cutu gal ládxiꞌliꞌ lë ni, böchiꞌ lzaꞌadauꞌ. Tu dza nac queëꞌ Xanruꞌ ca zian gayuáꞌ iz, atiꞌ zian gayuáꞌ iz nac queëꞌ ca tu dzaz.  
\v 9 Cutu rdzeynëꞌ Xanruꞌ gunëꞌ le gzxiꞌ lu nëꞌë gunëꞌ. Taqui laꞌgac bunách rdzeynëꞌ, san rbözëꞌ zxön ladxiꞌ, ruaꞌ rlenëꞌ rëꞌu le cutu rëꞌnnëꞌ nit nitú bunách, san rëꞌnnëꞌ lubíꞌi ládxiꞌgac yúguꞌtë bunách. 
\p  
\v 10 Tu tsalz gdxin dza huödëꞌ Xanruꞌ ca rdxinëꞌ chdzöꞌl gban. Dza naꞌ huadö́d qui luzxbá len tu bö zxön. Laꞌnít lu guiꞌ zxön yúguꞌtë le nacuáꞌ. Laꞌyegui yödzlyú ni len le nacuáꞌ yödzlyú ni. 
\p  
\v 11 Chquiꞌ cni gac, laꞌnít yúguꞌtë lë ni, ¿bizxa caz ral‑laꞌ gunliꞌ? Ral‑laꞌ gacliꞌ baꞌa ladxiꞌ len udö́d cuinliꞌ lu nëꞌë Dios.  
\v 12 Ral‑laꞌ cözliꞌ dza huödëꞌ Xanruꞌ len güiꞌ ládxiꞌliꞌ gunliꞌ ga gdxinr bayö́n dza niꞌ catiꞌ nit luzxbá, atiꞌ laꞌnít lu guiꞌ le nacuáꞌ.  
\v 13 Cni gac, san rëꞌu rbözruꞌ le gzxiꞌ lu nëꞌë Dios, gunëꞌ tu luzxbá cub len tu luyú cub ga niꞌ soa le nac tsahuiꞌ. 
\p  
\v 14 Qui lë ni naꞌ, böchiꞌ lzaꞌadauꞌ, tsal ni rbözliꞌ yuguꞌ lë ni, gul‑güíꞌ ládxiꞌliꞌ gacliꞌ gdu dxiꞌa lahuëꞌ Dios, nutu nu bi gac gnë queëliꞌ, atiꞌ cözliꞌ dxíꞌadauꞌ catiꞌ gdxinr dza niꞌ.  
\v 15 Ral‑laꞌ gnö́ziliꞌ rbözëꞌ zxön ladxiꞌ Dios quië gataꞌ quegac bunách latj lulá, ca naꞌ gnëꞌ caꞌ bö́chiꞌruꞌ Pablo, buzujëꞌ queëliꞌ lu guich, zoalen lëꞌ yöl‑laꞌ rejniꞌi naꞌ bëꞌë queëꞌ Xanruꞌ.  
\v 16 Yúguꞌtë lu guich ga ruzujëꞌ, ruꞌë didzaꞌ ca nacgac lë ni, zal‑laꞌ nútsaꞌgac caꞌ leygac yuguꞌ didzaꞌ nacgac baníg tséjniꞌruꞌ. Yuguꞌ didzaꞌ cni tuꞌchíxinëꞌ bönniꞌ cunözcnëꞌ len bönniꞌ cunác gdu ládxiꞌquëꞌ. Lëzcaꞌ cni tunëꞌ quegac yelaꞌgac didzaꞌ nayujgac lu guich laꞌy, le gun ga usnitiëꞌ lequëꞌ Dios. 
\p  
\v 17 Chnö́ziczliꞌ lë ni, böchiꞌ lzaꞌadauꞌ. Qui lë ni naꞌ gul‑gún chiꞌi cuinliꞌ, cui laꞌzíꞌ yeꞌi lbiꞌiliꞌ bunách cunacgac tsahuiꞌ, len cui lun ga tseaj böꞌ icj ládxiꞌdauꞌliꞌ ca réjlëꞌliꞌ Cristo.  
\v 18 Gul‑güíꞌ ládxiꞌliꞌ gacr gdu ca núnbëꞌliꞌ‑nëꞌ Xanruꞌ Jesucristo, Nu ruslá rëꞌu, atiꞌ ruziꞌliꞌ xbëꞌ. Yöl‑laꞌ ba Lëꞌ naꞌa len yúguꞌtë dza ziꞌa zaꞌc. Caꞌ gac.