\id 1TI  
\h 1 Timoteo 
\toc1 DIDZAꞌ ZIꞌAL BSÖLËꞌË PABLO QUEËBIꞌ BIꞌI TIMOTEO 
\toc2 1 Timoteo 
\toc3 1 Ti. 
\mt1 DIDZAꞌ ZIꞌAL BSÖLËꞌË PABLO QUEËBIꞌ BIꞌI TIMOTEO 
\c 1  
\s1 Pablo rugapëꞌ Dios biꞌi Timoteo 
\p  
\v 1 Nedaꞌ, Pablo, nacaꞌ gbaz nasölëꞌë Jesucristo. Cni nacaꞌ le gna bëꞌë cni Dios, Nu ruslá rëꞌu, lencaꞌ le gna bëꞌë cni Xanruꞌ Jesucristo, Nu naꞌ runruꞌ löz.  
\v 2 Rugapaꞌ Dios liꞌ, bö́chaꞌadauꞌ Timoteo, nacuꞌ ca zxiꞌnczaꞌ le réjlëꞌruꞌ Dios. Rnabaꞌ lahuëꞌ Xuzruꞌ Dios len lahuëꞌ Xanruꞌ Jesucristo uzáꞌ ladxëꞌë quiuꞌ, len huechiꞌ ladxëꞌë liꞌ, len gunëꞌ ga soa dxi icj ládxiꞌdaꞌu. 
\s1 Pablo rusë́ꞌë ládxiꞌbiꞌ Timoteo ca nac zxba cunác gdu 
\p  
\v 3 Rátaꞌyuaꞌ lauꞌ naꞌa gunuꞌ ca naꞌ gútaꞌyuaꞌ lauꞌ catiꞌ niꞌ gyijaꞌ luyú Macedonia, quië ugaꞌnuꞌ lu yödz Éfeso len gna béꞌinuꞌ laꞌquëꞌ bönniꞌ niꞌ cui lusëdnëꞌ zxba yubl  
\v 4 len cui lunëꞌ zxön yuguꞌ didzaꞌ rdaz, len lagac ziantër cöꞌ xuz xtauꞌgac bunách, yuguꞌ le tun ga tuiꞌ ládxiꞌgac bunách le nacgac daduz. Yuguꞌ le cni cutu tun tsutsu bunách queëꞌ Dios ca nac le taꞌyejlëꞌ Lëꞌ. 
\p  
\v 5 Le rëꞌni gun lë ni rëpaꞌ liꞌ, nac quië laꞌdxíꞌi lzaꞌgac bunách, nac gdu ládxiꞌdauꞌgac, len gac dxiꞌa le taꞌzáꞌ ládxiꞌgac, len gac gdu le taꞌyejlëꞌ Dios.  
\v 6 Ca nacgac lë ni, cutu gulurujëꞌ dxiꞌa laꞌquëꞌ bönniꞌ, san gulaguel‑lëꞌë nöz yubl, len tunëꞌ ba laꞌn yuguꞌ le cunácz.  
\v 7 Tëꞌnnëꞌ lusëdnëꞌ bunách ca nac le rna bëꞌ zxba queëꞌ Dios, zal‑laꞌ cutu taꞌyéjniꞌnëꞌ lë naꞌ taꞌnë́ꞌ, len cutu taꞌyéjniꞌnëꞌ le tun tsutsu xtídzaꞌquëꞌ. 
\p  
\v 8 Rëꞌu nö́ziruꞌ nac dxiꞌa zxba gna bëꞌë Dios, chquiꞌ nu rugún lei dxin ca ral‑laꞌ gun.  
\v 9 Lë ni nö́ziruꞌ: Dios gdixjëꞌ zxba queëꞌ, clëg quië gna beꞌi bunách tsahuiꞌ, san quië gna beꞌi bunách cni: 
\q1 nup taꞌdáꞌbagaꞌ le rna bëꞌ zxba naꞌ, 
\q1 nup cutún ca rna bëꞌ zxba naꞌ, 
\q1 nup tuꞌcáꞌn caꞌz Dios, 
\q1 nup tun le nac xöhuiꞌ, 
\q1 nup cutún Dios zxön, 
\q1 nup tuꞌcáꞌn caꞌz le naqui queëꞌ Dios, 
\q1 nup tuꞌdödi xuz xnaꞌgac, 
\q1 nup tuꞌdödi bunách, 
\q1  
\v 10 nup tun le cunác, 
\q1 bönniꞌ nacuáꞌlenëꞌ laꞌ racz lzaꞌ bö́nniꞌquëꞌ, 
\q1 nup taꞌbán biꞌidauꞌ, 
\q1 nup taꞌzíꞌ yëꞌ, 
\q1 nup tun tsutsu xtídzaꞌgac, taꞌná le cunácz, 
\q1 nup taꞌdáꞌbagaꞌ zxba tsahuiꞌ. 
\p  
\v 11 Nö́ziruꞌ nac cni le bdxin queëruꞌ didzaꞌ dxiꞌa buzáꞌ ladxëꞌë queëruꞌ Dios Nu nac laꞌy, le budödëꞌ lu naꞌa gunaꞌ lban qui. 
\s1 Pablo rëꞌ Cristo: “Xclenuꞌ”, le buechiꞌ ladxëꞌë lëꞌ 
\p  
\v 12 Xclenuꞌ, rëpaꞌ‑nëꞌ Xanruꞌ Jesucristo, Nu rutíp ladxaꞌa, le buzxöni ladxëꞌë nedaꞌ, len buzóëꞌ nedaꞌ gunaꞌ xchinëꞌ.  
\v 13 Cni benëꞌ zal‑laꞌ ziꞌal nedaꞌ gnë ziꞌa queëꞌ, len gdxia ladxaꞌa bunách queëꞌ, len zian le biꞌa döꞌ quequëꞌ, san Cristo buechiꞌ ladxëꞌë nedaꞌ, le benaꞌ cni lu yöl‑laꞌ curejniꞌi quiaꞌ catiꞌ niꞌ cutu réjlëꞌdaꞌ Lëꞌ.  
\v 14 Naꞌa, zxöntër nac le buzáꞌ ladxëꞌë quiaꞌ Xanruꞌ, lë naꞌ run ga réjlëꞌruꞌ Lëꞌ len run caꞌ ga nadxiꞌiruꞌ‑nëꞌ Jesucristo. 
\p  
\v 15 Didzaꞌ gdutë li lë ni len le nac lsacaꞌ laꞌzíꞌ lu naꞌgac yúguꞌtë bunách, le rna: “Lëczëꞌ Jesucristo bidëꞌ yödzlyú ni quië buslë́ꞌ bunách dul‑laꞌ”, atiꞌ buslë́ꞌ nedaꞌ zal‑laꞌ nacraꞌ bönniꞌ dul‑laꞌ ca yúguꞌtë bunách.  
\v 16 Qui lë ni naꞌ buechiꞌ ladxëꞌë nedaꞌ, buluꞌë lahui Jesucristo niꞌa quiaꞌ nedaꞌ bönniꞌ dul‑laꞌ, ca nac yöl‑laꞌ zxön ladxiꞌ gdu queëꞌ, quië gacaꞌ tu le ruluíꞌ laugac nup ral‑laꞌ laꞌyejlëꞌ Lëꞌ, gataꞌ quequëꞌ yöl‑laꞌ naꞌbán gdu.  
\v 17 Naꞌa rniaꞌ: Yöl‑laꞌ ba Dios, Nu rna bëꞌtecz, Nu gatga udx qui, len Nu curléꞌiruꞌ, laꞌz dui Dios Nu nözicz yúguꞌtë. Queëꞌ Lëꞌ gactecz yöl‑laꞌ run ba laꞌn len yöl‑laꞌ ba, naꞌa dza len yúguꞌtë dza ziꞌa zaꞌc. Caꞌ gac. 
\p  
\v 18 Zxíꞌnaꞌdauꞌ Timoteo, rudödaꞌ lu naꞌu zxba ni quië gunuꞌ xchinëꞌ Dios ca bönniꞌ gdu ladxëꞌë rijëꞌ gdil‑l, len quië uziꞌu xbey yuguꞌ le gulaguixjöꞌ quiuꞌ ziꞌal nup niꞌ gluiꞌ didzaꞌ uláz queëꞌ Dios.  
\v 19 Len yöl‑laꞌ rejlëꞌ quiuꞌ Cristo ral‑laꞌ gunuꞌ cni, nac gdu dxiꞌa icj ládxiꞌdaꞌu, le chgulachixi gulanigui laꞌgac bunách, nup guluzóa tslaꞌl le réjlëꞌruꞌ Cristo.  
\v 20 Cni glunëꞌ Himeneo len Alejandro, nup naꞌ busanaꞌ lu naꞌ Satanás tuꞌ xöhuiꞌ quië laꞌzëdëꞌ ca ral‑laꞌ lunëꞌ, cui laꞌnë́ ziꞌë qui le naqui queëꞌ Dios. 
\c 2  
\s1 Le rusëdi rëꞌu ulidzruꞌ‑nëꞌ Dios 
\p  
\v 1 Qui lë ni naꞌ le nac blau ruchiziaꞌ icj naggac bunách nac ca ral‑laꞌ ulidzruꞌ‑nëꞌ Dios len ca ral‑laꞌ gátaꞌyuruꞌ lahuëꞌ, len ca ral‑laꞌ gnabruꞌ lahuëꞌ bi rquíniruꞌ, len ca ral‑laꞌ guiëruꞌ‑nëꞌ: Xclenuꞌ. Yuguꞌ lë ni ral‑laꞌ gunruꞌ uláz quegac yúguꞌtë bunách.  
\v 2 Lëzcaꞌ cni ral‑laꞌ gunruꞌ uláz quegac nup taꞌná bëꞌ, len quegac yúguꞌtë nup nacgac blau. Cni ral‑laꞌ gunruꞌ quië gac dxiꞌa queëruꞌ len gac queëruꞌ yöl‑laꞌ rböz dxíꞌadauꞌ. Ral‑laꞌ gunruꞌ cni lu yöl‑laꞌ rejlëꞌ queëruꞌ Dios len lu yöl‑laꞌ baꞌa ladxiꞌ queëruꞌ.  
\v 3 Lë ni nac dxiꞌa len le rdzag ladxëꞌë Dios, Nu ruslá rëꞌu.  
\v 4 Dioscz rëꞌnnëꞌ lulá yúguꞌtë bunách len rëꞌnnëꞌ lunbëꞌ le nac gdutë li.  
\v 5 Tuzëꞌ naquëꞌ Dios, len tuzëꞌ bönniꞌ ruúnëꞌ dzag Dios len bunách. Nu ni nac Jesucristo, Nu böac bunách.  
\v 6 Lëczëꞌ budö́d cuinëꞌ lu yöl‑laꞌ gut, le gdizxjnëꞌ qui dul‑laꞌ nabágaꞌgac yúguꞌtë bunách. Dios benëꞌ lnaꞌ lau queëꞌ catiꞌ bdxin dza queëꞌ gutiëꞌ.  
\v 7 Ca nac lë ni, Dios buzóëꞌ nedaꞌ quië gunaꞌ lban qui, len gacaꞌ gbaz nasölëꞌë Cristo, quië usë́dgacdaꞌ bunách gzaꞌa ca nac le réjlëꞌruꞌ Cristo len ca nac le nac gdutë li. Blítedaꞌ len cutu caꞌ rziꞌ yëꞌa. 
\p  
\v 8 Naꞌa, rëꞌndaꞌ lulidzëꞌ Dios bönniꞌ, látaꞌyuëꞌ lahuëꞌ gátiꞌtëz, nacquëꞌ gdu dxiꞌa, len culaꞌleynëꞌ lzaꞌquëꞌ, len culaꞌdíl‑l dídzaꞌquëꞌ.  
\v 9 Lëzcaꞌ cni, rëꞌndaꞌ lácunu ngul le nac baꞌa. Le nac lach le ral‑laꞌ luluiꞌnu lahui nac yöl‑laꞌ nöxj ladxiꞌ len le nac gdu ladxiꞌ, len clëg le tuꞌpaꞌznu icj laucnu len oro, len yuguꞌ bga, len lariꞌ záquiꞌtsqui.  
\v 10 Yuguꞌ le dxiꞌa tunnu luluíꞌ lahui le naccnu ca naꞌ run le tácunu le nac baꞌa. Cni ral‑laꞌ lunnu ngul núnbëꞌcnu Dios.  
\v 11 Ral‑laꞌ laꞌcuaꞌnu dxiz ngul catiꞌ nu rusëdi lecnu len laꞌcuaꞌnu nöxj.  
\v 12 Cutu runnaꞌ latj ngul lusë́dinu len culaꞌná béꞌinu bönniꞌ. Ral‑laꞌ laꞌcuaꞌnu dxiz ga nudubgac bunách queëꞌ Cristo.  
\v 13 Cni ral‑laꞌ gac, le buzóëꞌ Dios ziꞌal Adán, atiꞌ gdöd naꞌ buzóëꞌ‑nu Eva.  
\v 14 Adán naꞌ, cutu gzxiꞌ yeꞌi lëꞌ tuꞌ xöhuiꞌ, san ngul queëꞌ, gzxiꞌ yeꞌi lënu. Cni guc, gditsjnu zxba queëꞌ Dios,  
\v 15 san ulanu ngul ruzoanu‑biꞌ biꞌidauꞌ chquiꞌ gúntecznu ca rajlö́z le réjlëꞌruꞌ Dios len yöl‑laꞌ nadxíꞌi, len chquiꞌ gacnu gdu dxiꞌa len gdu ladxiꞌ. 
\c 3  
\s1 Ca ral‑laꞌ lacquëꞌ bönniꞌ tun chiꞌë bunách queëꞌ Cristo 
\p  
\v 1 Didzaꞌ gdu lë ni rna: “Chquiꞌ ruiꞌ ladxëꞌë bönniꞌ gaquëꞌ nu gun chiꞌi bunách queëꞌ Cristo, dxin dxiꞌa rzë ladxëꞌë.”  
\v 2 Run bayúdx nu run chiꞌi bunách queëꞌ Cristo gac bönniꞌ nutu nu gac bi gnë queëꞌ, len soa tuznu ngul queëꞌ. Ral‑laꞌ gaquëꞌ ban ladxiꞌ, len gdu ladxiꞌ, len nöxj ladxiꞌ. Ral‑laꞌ guꞌë ga laꞌcuꞌë bö́chiꞌruꞌ taꞌdxinëꞌ lidxëꞌ, len gaquëꞌ caꞌ bönniꞌ nazáquiꞌtsquinëꞌ usëdnëꞌ bunách.  
\v 3 Cutu gaquëꞌ bönniꞌ riꞌjëꞌ, len clëg bönniꞌ sniaꞌ, len clëg bönniꞌ rzë ládxiꞌzëꞌ siꞌë dumí, san ral‑laꞌ gaquëꞌ bönniꞌ dxiꞌi ladxiꞌ, len zxön ladxiꞌ. Cutu gaquëꞌ bönniꞌ ruhuídiꞌnëꞌ.  
\v 4 Ral‑laꞌ gaquëꞌ caꞌ bönniꞌ rna béꞌinëꞌ dxiꞌa bunách nacuáꞌ lidxëꞌ, nacuaꞌbiꞌ zxiꞌnëꞌ tunbiꞌ ca rna xtidzëꞌë lu yöl‑laꞌ run ba laꞌn xuzcbiꞌ.  
\v 5 ¿Naruꞌ huactsa gun chiꞌë bunách queëꞌ Dios tu bönniꞌ chquiꞌ cutu rac gna béꞌinëꞌ dxiꞌa bunách nacuáꞌ lidxëꞌ?  
\v 6 Cutu ral‑laꞌ gaquëꞌ bönniꞌ ziꞌa gzu lahuëꞌ tëꞌë Cristo, cui töd bëꞌi gun ba zxön cuinëꞌ len cugác queëꞌ ca naꞌ guc qui tuꞌ xöhuiꞌ, ben ba zxön cuini, atiꞌ Dios bchuguëꞌ qui.  
\v 7 Lëzcaꞌ ral‑laꞌ gaquëꞌ bönniꞌ taꞌná dxiꞌa queëꞌ nup cunababgac bunách queëꞌ Cristo, cui soa nu uzóa lëꞌ tslaꞌl, cui gdzunëꞌ lu yal‑lj qui tuꞌ xöhuiꞌ. 
\s1 Ca ral‑laꞌ lacquëꞌ bönniꞌ nadö́d lu naꞌquëꞌ láclenëꞌ bunách queëꞌ Cristo 
\p  
\v 8 Lëzcaꞌ cni ral‑laꞌ lacquëꞌ bönniꞌ nadö́d lu naꞌquëꞌ láclenëꞌ bunách queëꞌ Cristo. Ral‑laꞌ lacquëꞌ bönniꞌ gdu ladxiꞌ, tunëꞌ ca taꞌnë́ꞌ. Cutu lacquëꞌ bönniꞌ tiꞌjëꞌ, len culacquëꞌ bönniꞌ taꞌzë́ ládxiꞌzëꞌ laꞌziꞌë dumí.  
\v 9 Ral‑laꞌ lacquëꞌ bönniꞌ tun chiꞌë ca nac gdutë le réjlëꞌruꞌ Cristo, nac gdu dxiꞌa icj ládxiꞌdauꞌquëꞌ.  
\v 10 Yuguꞌ bönniꞌ ni ral‑laꞌ siꞌ bëꞌliꞌ lequëꞌ ziꞌal, atiꞌ niꞌr gataꞌ lu naꞌquëꞌ lacquëꞌ bönniꞌ nadö́d lu naꞌquëꞌ láclenëꞌ bunách queëꞌ Cristo, chquiꞌ cuzóa nu gac bi gnë quequëꞌ.  
\v 11 Lëzcaꞌ cni, ngul qui queëquëꞌ ral‑laꞌ laꞌcuaꞌnu gdu ládxiꞌcnu, len culacnu unë́ qui lzëꞌi. Ral‑laꞌ lacnu zxön ladxiꞌ, len lacnu gdu ca nac yúguꞌtë le tunnu.  
\v 12 Yuguꞌ bönniꞌ nadö́d lu naꞌquëꞌ láclenëꞌ bunách queëꞌ Cristo ral‑laꞌ lacquëꞌ bönniꞌ zoa tuznu ngul qui queëquëꞌ. Lëzcaꞌ ral‑laꞌ laꞌná béꞌinëꞌ dxiꞌa zxiꞌnquëꞌ len bunách ulídx qui queëquëꞌ.  
\v 13 Run bayúdx gac cni, le taꞌdél‑liꞌnëꞌ latj ga lun ba laꞌn xtídzaꞌquëꞌ bunách, chquiꞌ tunëꞌ dxiꞌa dxin tunëꞌ táclenëꞌ bunách queëꞌ Cristo, atiꞌ lacrëꞌ rugu ladxiꞌ luꞌë didzaꞌ ca nac le réjlëꞌruꞌ Jesucristo. 
\s1 Le bgachiꞌ qui le rej ládxiꞌruꞌ‑nëꞌ Dios 
\p  
\v 14 Yuguꞌ didzaꞌ ni ruzujaꞌ quiuꞌ lu guich, zal‑laꞌ runaꞌ löz duyuteaꞌ liꞌ.  
\v 15 Chquiꞌ huadzeydaꞌ, ruzujaꞌ quiuꞌ didzaꞌ ni quië gnöznuꞌ nac ral‑laꞌ gunuꞌ laugac bunách nacuáꞌ lidxëꞌ Dios, nup nacgac bunách queëꞌ Dios ban, len nacquëꞌ tsutsu, taꞌguíxjöꞌë le nac gdutë li. Nacquëꞌ ca yuguꞌ yzxön len le nunídaꞌgac zöꞌö, nacgac tsutsu, len taꞌzö́n yuꞌu.  
\v 16 Le nactë, zxöntër nac le bgachiꞌ qui le rej ládxiꞌruꞌ‑nëꞌ Dios, ca naꞌ nayúj lu guich, rna: 
\q1 Dios buluíꞌ lahuëꞌ, guquëꞌ bunách. 
\q1 Guc bëꞌ naquëꞌ tsahuiꞌ le gzóalenëꞌ Lëꞌ Dios Böꞌ Laꞌy. 
\q1 Gulaléꞌinëꞌ Lëꞌ gbaz laꞌy queëꞌ Dios. 
\q1 Guc lban queëꞌ laugac bunách gzaꞌa. 
\q1 Gulayejlëꞌ Lëꞌ bunách yödzlyú. 
\q1 Dios buchisëꞌ Lëꞌ xtsaꞌ ga náctërëꞌ blau. 
\c 4  
\s1 Nup luhuö́a ládxiꞌgac ca nac le réjlëꞌruꞌ Cristo 
\p  
\v 1 Yalj lulu rguíxjöꞌë Dios Böꞌ Laꞌy, rnëꞌ: “Dza tsajséytëgac, laꞌdáꞌbagaꞌ Cristo laꞌgac bunách.” Luhuö́a ládxiꞌquëꞌ ca nac le réjlëꞌruꞌ Cristo. Luzë́ nagquëꞌ xtídzaꞌgac bunách nacuaꞌlen lequëꞌ böꞌ rziꞌ yëꞌ, atiꞌ luzë́ nagquëꞌ yuguꞌ zxba quegac böꞌ xöhuiꞌ.  
\v 2 Luzë́ nagquëꞌ xtídzaꞌgac bunách tuꞌluíꞌz tsahuiꞌ cuingac len tuiꞌ didzaꞌ le cunácz, chnazíd ládxiꞌdauꞌgac, cui uxö́s lequëꞌ.  
\v 3 Cni nac, tuꞌzaguëꞌë xnözgac nup tëꞌni lutság naꞌgac, len taꞌná béꞌinëꞌ bunách cui lagu le naguꞌë Dios quië uziꞌruꞌ xbey, lë naꞌ huac lagu nup taꞌyejlëꞌ Dios, nup naꞌ chnúnbëꞌgac le nac gdutë li, len tëꞌ Dios: “Xclenuꞌ”, catiꞌ tahuëꞌ lei.  
\v 4 Dxiꞌa nac yúguꞌtë le benëꞌ Dios, len cutu bi ral‑laꞌ uzoaruꞌ tslaꞌl chquiꞌ ráguruꞌ lei, rëruꞌ‑nëꞌ Dios: Xclenuꞌ.  
\v 5 Rusëdi rëꞌu xtidzëꞌë Dios, Lëꞌ unëꞌ dxiꞌa yúguꞌtë le ral‑laꞌ gáguruꞌ chquiꞌ ulidzruꞌ‑nëꞌ Dios gnábiruꞌ‑nëꞌ gun laꞌyëꞌ lë naꞌ gáguruꞌ. 
\s1 Ca rurujëꞌ dxiꞌa huen dxin queëꞌ Jesucristo 
\p  
\v 6 Chquiꞌ usëdcnuꞌ böchiꞌ lzaꞌruꞌ yuguꞌ didzaꞌ ni, urujuꞌ dxiꞌa, gacuꞌ huen dxin queëꞌ Jesucristo, len gac bëꞌ nazëduꞌ dxiꞌa ca nac didzaꞌ qui le réjlëꞌruꞌ Cristo len ca nac zxba dxiꞌa run chiꞌu.  
\v 7 Gruꞌn yuguꞌ didzaꞌ rdaz qui yödzlyú ca nac didzaꞌ tuiꞌnu ndauꞌ gul. Bentecz le run ga gacuꞌ tsutsu quië gunuꞌ ca rëꞌnnëꞌ Dios.  
\v 8 Latiꞌz uziꞌu xbey gunuꞌ le gun ga gacr nal niꞌa naꞌu, san gdu uziꞌu xbey gunuꞌ ca rëꞌnnëꞌ Dios. Catiꞌ runruꞌ cni, lë ni run ga runruꞌ löz soaruꞌ gbanruꞌ yödzlyú ni, lencaꞌ soaruꞌ gbanruꞌ dza ziꞌa zaꞌc, töd uzaꞌruꞌ yödzlyú ni.  
\v 9 Didzaꞌ gdutë li lë ni, len le nac lsacaꞌ laꞌzíꞌ lu naꞌgac yúguꞌtë bunách.  
\v 10 Qui lë ni naꞌ, szxöni rusacaꞌ ziꞌ cuinruꞌ runruꞌ dxin, le runruꞌ löz Dios ban. Cristo gutiëꞌ quië uslë́ꞌ yúguꞌtë bunách. Ruslë́ꞌ nup naꞌ taꞌyejlëꞌ Lëꞌ. 
\p  
\v 11 Gna beꞌi len bsëdi bunách lun yuguꞌ lë ni.  
\v 12 Nutu nu ral‑laꞌ uzóa liꞌ tslaꞌl le nacuꞌ biꞌi raꞌbán, san ral‑laꞌ gunuꞌ le uluíꞌi nup taꞌyejlëꞌ Dios ral‑laꞌ lun ca runuꞌ liꞌ. Cni uluiꞌinuꞌ lequëꞌ: 
\q1 len didzaꞌ ruꞌu, 
\q1 len le runuꞌ, 
\q1 ca nadxiꞌinuꞌ lzaꞌu, 
\q1 ca ruꞌu latj zóalenëꞌ liꞌ Dios Böꞌ Laꞌy, 
\q1 ca runuꞌ ca rnauꞌ, 
\q1 ca nacuꞌ gdu dxiꞌa. 
\m  
\v 13 Tsal zaꞌa gdxinaꞌ quiuꞌ, bëꞌtecz ladxuꞌu ulabuꞌ guich laꞌy laugac bunách nacuáꞌ ga niꞌ zuꞌ. Bchiz icj nagquëꞌ lë ni, len bsëdi lequëꞌ.  
\v 14 Cutu udöduꞌ caꞌz le buzáꞌ ladxëꞌë quiuꞌ Dios, lë naꞌ bennëꞌ quiuꞌ ca naꞌ gulaná quiuꞌ nup niꞌ gluiꞌ didzaꞌ uláz queëꞌ Dios, catiꞌ niꞌ gulaxóa naꞌquëꞌ liꞌ len gululidzëꞌ Dios bönniꞌ gul tun chiꞌë bunách queëꞌ Cristo. 
\p  
\v 15 Bentecz yuguꞌ lë ni. Bëꞌtecz ladxuꞌu gunuꞌ cni, quië laꞌleꞌi yúguꞌtë bunách ca naꞌ zeaj rdél‑liꞌnuꞌ le naqui queëꞌ Cristo.  
\v 16 Ben chiꞌi cuinuꞌ len ben chiꞌi zxba rusë́diruꞌ. Bentecz yuguꞌ lë ni, atiꞌ chquiꞌ runuꞌ cni, uláuꞌ liꞌ len lulá caꞌ nup laꞌyöni liꞌ. 
\c 5  
\s1 Ca ral‑laꞌ gunbiꞌ Timoteo quegac bunách queëꞌ Cristo 
\p  
\v 1 Cutu uzeycnuꞌ‑nëꞌ ba nadx bönniꞌ gul, san bchiz icj nagquëꞌ didzaꞌ, tsca nacquëꞌ xuzczuꞌ. Bchiz icj nagcbiꞌ biꞌi bönniꞌ raꞌbán didzaꞌ, tsca naccbiꞌ biꞌi bö́chiꞌczuꞌ.  
\v 2 Bchiz icj nagcnu ndauꞌ gul didzaꞌ, tsca naccnu xnaꞌczuꞌ. Bchiz icj nagcbiꞌ biꞌi ngul raꞌbán didzaꞌ, tsca naccbiꞌ biꞌi zanczuꞌ, ca naꞌ rajlö́z le nac gdu dxiꞌa. 
\p  
\v 3 Ben ba laꞌn yuguꞌ ngul uzë́b, naccnu gdu uzë́b.  
\v 4 Chquiꞌ zoanu ngul uzë́b nacuaꞌbiꞌ biꞌi queënu o zxiꞌn xsoanu, ral‑laꞌ laꞌzëdbiꞌ lunbiꞌ ca rëꞌnnëꞌ Dios, láclenbiꞌ ziꞌal bunách nacuáꞌ lidxcbiꞌ, len lubiꞌibiꞌ quequëꞌ xuz xnaꞌcbiꞌ. Lë ni nac dxiꞌa len le rdzag ladxëꞌë Dios.  
\v 5 Naꞌa, ngul naꞌ nacnu gdu uzë́b, len nagaꞌnnu tuznu, runnu löz Dios atiꞌ rël len të dza rnábtecznu lahuëꞌ Dios len rulidznu Lëꞌ niꞌa quegac bunách queëꞌ,  
\v 6 san ngul uzë́b naꞌ runnu ca nac le rzë ládxiꞌnu nacnu ca ngul chnatnu catiꞌ ni zoanu nabannu.  
\v 7 Lëzcaꞌ cni, gna beꞌi bunách nacuáꞌ ga niꞌ zuꞌ, quië lun ca rajlö́z yuguꞌ lë ni, quië lac bunách nutu nu gac bi gnë quegac.  
\v 8 Chquiꞌ zoa nu bönniꞌ curugahuëꞌ yuguꞌ diꞌa dza queëꞌ, len le nacr blau, chquiꞌ curugahuëꞌ bunách nacuáꞌ lidxëꞌ, chgdáꞌbaguëꞌë le réjlëꞌruꞌ Cristo bönniꞌ naꞌ len nacrëꞌ xöhuiꞌ ca nu curejlëꞌ Dios. 
\p  
\v 9 Huac gbabnu nup gáclenliꞌ tuznu ngul uzë́b naꞌ chyuꞌurnu ca tsonnlalj iz, len chquiꞌ cutu bucaꞌnnu‑nëꞌ bönniꞌ queënu quië sóalennu‑nëꞌ yetúëꞌ bönniꞌ.  
\v 10 Run bayúdx soa nu gun lnaꞌ lau queënu ca nacgac le dxiꞌa runnu. Gáclenliꞌ‑nu chquiꞌ buscul‑lnu‑biꞌ yuguꞌ biꞌidauꞌ, len chquiꞌ ruiꞌnu ga laꞌcuáꞌ bö́chiꞌruꞌ zaꞌquëꞌ yödz yubl taꞌdxinëꞌ lidxnu, len chquiꞌ ruiꞌnu le liꞌj lagu bunách queëꞌ Dios, len chquiꞌ ráclennu nup taꞌzacaꞌ taꞌguíꞌi, len chquiꞌ rúntecznu yúguꞌtë le nac dxiꞌa. 
\p  
\v 11 Yuguꞌ ngul uzë́b cutu yuiꞌicnu tsonnlalj iz, cutu gbabcnu nup gáclenliꞌ, le lunnu ca taꞌzë́z ládxiꞌcnu, laꞌdáꞌbagaꞌnu Cristo, len lë́ꞌninu lutság naꞌcnu leyúbl.  
\v 12 Cni gac, laꞌbágaꞌnu dul‑laꞌ le tuꞌzoanu tslaꞌl le gulayéjlëꞌnu Cristo ziꞌal.  
\v 13 Lëzcaꞌ lacnu ngul zxhuëd len ngul taꞌdáz caꞌ, len clëgz lacnu zxhuëd, san lëzcaꞌ lacnu ngul unë́ qui lzëꞌi len tsjítsaꞌcnu ga yubl, len laꞌnanu le cunácz.  
\v 14 Qui lë ni naꞌ, rëꞌndaꞌ lutság naꞌcnu leyúbl ngul uzë́b ni yuꞌucnu iz cuidiꞌ, len luscul‑lnu‑biꞌ yuguꞌ biꞌidauꞌ, len laꞌná béꞌinu biꞌi nacuaꞌbiꞌ yuꞌu qui queëcnu, cui luiꞌnu latj bi gnë queëruꞌ nu rdáꞌbagaꞌ rëꞌu, rëꞌu naꞌ réjlëꞌruꞌ Cristo.  
\v 15 Cni ral‑laꞌ gac, le chgulubígaꞌnu laꞌcnu, atiꞌ tunnu ca rëꞌni Satanás tuꞌ xöhuiꞌ. 
\p  
\v 16 Chquiꞌ nútiꞌtëz bönniꞌ o ngul nu rejlëꞌ Cristo, nacuaꞌnu ngul uzë́b lidxgac nup naꞌ, ral‑laꞌ laclen lecnu, cui lusacaꞌ ziꞌ bunách queëꞌ Cristo. Cni gac, bunách queëꞌ Cristo naꞌ gac laclen ngul naccnu gdu uzë́b. 
\p  
\v 17 Benr ba laꞌn bönniꞌ gul tun chiꞌë bunách queëꞌ Cristo, bönniꞌ naꞌ taꞌná bëꞌë dxiꞌa, len bentër caꞌ ba laꞌn bönniꞌ gul naꞌ tunëꞌ dxin, tunëꞌ lban len tuꞌsëdnëꞌ bunách.  
\v 18 Nayúj lu guich laꞌy le rna: “Cutu cuꞌu du rúꞌabaꞌ bëdx naꞌ rulibbaꞌ zxoaꞌ xtil.” Rna caꞌ: “Naquëꞌ lsacaꞌ siꞌë lazxjëꞌ bönniꞌ huen dxin.” 
\p  
\v 19 Cutu siꞌ lu naꞌu didzaꞌ ruiꞌ nu ruquí bönniꞌ gul run chiꞌë bunách queëꞌ Cristo, chquiꞌ cutu nacuáꞌ chop tsonn nup tun lnaꞌ lau qui le benëꞌ.  
\v 20 Nup tuntecz dul‑laꞌ, bsidx lequëꞌ laugac yúguꞌtë bunách queëꞌ Cristo quië ladxi Dios yezicaꞌ bunách niꞌ.  
\v 21 Niꞌa queëꞌ Xanruꞌ Dios len niꞌa queëꞌ Xanruꞌ Jesucristo, len niꞌa quequëꞌ gbaz laꞌy rö queëꞌ, rna béꞌidaꞌ liꞌ gunuꞌ ca taꞌná didzaꞌ ni. Tuz ca ral‑laꞌ cuequi xbeynuꞌ yúguꞌtë bunách, cugunuꞌ ba laꞌn tuzëꞌ bönniꞌ.  
\v 22 Nutu nu bönniꞌ gxoatë naꞌu, cugunuꞌ ga gaquëꞌ huen dxin queëꞌ Cristo, cui gbaguꞌu le runëꞌ chquiꞌ gunëꞌ dul‑laꞌ bönniꞌ naꞌ. 
\p  
\v 23 Cutur guiꞌjuꞌ nisz. Le réꞌitecznuꞌ ral‑laꞌ guiꞌjuꞌ látiꞌdauꞌ xisi uva quië soa dxiꞌa lëꞌu. 
\p  
\v 24 Yuguꞌ dul‑laꞌ quegac laꞌgac bunách laꞌláꞌ lahui ziꞌal catiꞌ ziꞌa laꞌdxinëꞌ ga cuequi xbeynëꞌ lequëꞌ Dios, atiꞌ töd niꞌ laꞌláꞌ lahui dul‑laꞌ quegac yezicaꞌ bunách.  
\v 25 Lëzcaꞌ cni, laꞌláꞌ lahui dxin dxiꞌa nungac bunách, atiꞌ chquiꞌ cunalaꞌgac lahui, nutu nu gac ucachiꞌ tsaz dxin naꞌ nunquëꞌ. 
\c 6  
\p  
\v 1 Ral‑laꞌ luntsquëꞌ ba laꞌn xanquëꞌ yúguꞌtë bönniꞌ nadáꞌugac, cui gac nu gnë ziꞌ qui lëꞌ Dios len qui zxba queëꞌ.  
\v 2 Nup niꞌ nacuꞌë xangac taꞌyejlëꞌë Cristo, cutu ral‑laꞌ lucáꞌn caꞌz lequëꞌ le nacquëꞌ bö́chiꞌquëꞌ. Ral‑laꞌ lunrëꞌ dxiꞌa xchinquëꞌ le taꞌyejlëꞌë Cristo bönniꞌ niꞌ tuꞌziꞌë xbey dxin dxiꞌa naꞌ, le nadxiꞌinëꞌ lequëꞌ Lëczëꞌ. Ca nac lë ni, bsëdi bunách nacuáꞌ niꞌ, len bchiz icj nagquëꞌ. 
\s1 Le rej ládxiꞌruꞌ‑nëꞌ Dios le ruziꞌruꞌ xbey 
\p  
\v 3 Chquiꞌ zoa nu bönniꞌ rusëdnëꞌ zxba yubl, len cutu rusëdnëꞌ yuguꞌ didzaꞌ dxiꞌa queëꞌ Xanruꞌ Jesucristo, ca nac zxba naꞌ rusëdi rëꞌu ca ral‑laꞌ gunruꞌ ca rëꞌnnëꞌ Dios,  
\v 4 bönniꞌ ni run ba zxön cuinëꞌ len cutu bi nöznëꞌ. Didzaꞌ cunác dxiꞌa rzë ladxëꞌë ca nacgac didzaꞌ baníg len didzaꞌ bizxj, le tun ga tuꞌzxeꞌi lzaꞌgac len taꞌdil‑len lzaꞌgac didzaꞌ bunách. Lëzcaꞌ tun didzaꞌ cni ga taꞌnë́ ziꞌ qui lzaꞌgac bunách, len taꞌzáꞌ ládxiꞌgac qui lzaꞌgac le cunác.  
\v 5 Lëzcaꞌ cni tun ga taꞌdil‑ltecz didzaꞌ bunách cutaꞌyejniꞌi, nup cutaꞌzíꞌ lu naꞌgac le nac gdutë li. Táquinëꞌ huac laꞌziꞌë dumí zian chquiꞌ lunëꞌ tsazxö́n nup taꞌyíj ládxiꞌgac Dios. Bcuit ga nacuáꞌ bunách cni.  
\v 6 Zxön nac le ruziꞌruꞌ xbey catiꞌ len yöl‑laꞌ rböz zxön ladxiꞌ rej ládxiꞌruꞌ‑nëꞌ Dios.  
\v 7 Cutu bi nuaꞌruꞌ catiꞌ bdxinruꞌ yödzlyú, len lëzcaꞌ cni, cutu bi uaꞌruꞌ catiꞌ uzaꞌruꞌ yödzlyú ni.  
\v 8 Qui lë ni naꞌ, chquiꞌ dë queëruꞌ le gáguruꞌ len le gácuruꞌ, ral‑laꞌ udzíjiruꞌ.  
\v 9 Bönniꞌ tëꞌnnëꞌ gataꞌ quequëꞌ yöl‑laꞌ tsahuiꞌ, gac quequëꞌ le siꞌ bëꞌ lequëꞌ le xöhuiꞌ, atiꞌ laꞌyuꞌë lu yal‑lj qui tuꞌ xöhuiꞌ, atiꞌ lu yöl‑laꞌ cunözi quequëꞌ zian le laꞌzë́ ládxiꞌquëꞌ, le lun ditj lequëꞌ. Yuguꞌ lë ni lusnít lequëꞌ len lun ga laꞌnitiëꞌ tsaz.  
\v 10 Le taꞌzë́ ládxiꞌgac dumí bunách, run ga tun yúguꞌtë le cunác. Laꞌquëꞌ bönniꞌ, le taꞌzë́ ládxiꞌquëꞌ lei, gulucaꞌnëꞌ le gulayejlëꞌë Cristo, len chrac quequëꞌ zian le tuꞌsacaꞌ ziꞌ lequëꞌ. 
\s1 Nu run dxin queëꞌ Cristo nac ca bönniꞌ rijëꞌ gdil‑l 
\p  
\v 11 Naꞌa, bönniꞌ queëꞌ Dios, bcuit ga rac le cni. Bëꞌtecz ladxuꞌu gunuꞌ le nac tsahuiꞌ len le rëꞌnnëꞌ Dios. Gyéjlëꞌteczëꞌ Cristo, len bdxiꞌi yuguꞌ lzaꞌu. Bëꞌ ladxuꞌu gacuꞌ zxön ladxiꞌ len nöxj ladxiꞌ.  
\v 12 Ca runëꞌ bönniꞌ gdu ladxëꞌë rijëꞌ gdil‑l, ben dxin qui le réjlëꞌruꞌ Cristo, len beni quiuꞌ yöl‑laꞌ naꞌbán gdu. Quië gac cni bulidzëꞌ liꞌ Dios. Dxiꞌa guc le gnauꞌ yalj lulu ca réjlëꞌu Cristo, lë naꞌ gnauꞌ laugac zian nup tun lnaꞌ lau qui didzaꞌ bëꞌu.  
\v 13-14 Niꞌa queëꞌ Xanruꞌ Dios, Nu naꞌ nabánigac yúguꞌtë le nacuáꞌ, lencaꞌ niꞌa queëꞌ Jesucristo, Nu ben lnaꞌ lau qui le nac dxiꞌa le gnëꞌ yalj lulu lahuëꞌ Poncio Pilato, rna béꞌidaꞌ liꞌ gun chiꞌu yuguꞌ lë naꞌ gna béꞌinëꞌ rëꞌu Cristo. Ral‑laꞌ gacuꞌ gdu dxiꞌa len cutu bi gunuꞌ le güiꞌ latj nu bi gnë quiuꞌ, ga gdxintë dza niꞌ uluíꞌ lahuëꞌ Xanruꞌ Jesucristo.  
\v 15 Catiꞌ gdxin dza naꞌ huödëꞌ Jesús, Dios uluꞌë lahui Lëꞌ. Dios naquëꞌ laꞌy. Tuzëꞌ Lëꞌ dë lu nëꞌë yöl‑laꞌ uná bëꞌ, len rna béꞌinëꞌ yúguꞌtë nup taꞌná bëꞌ, len naquëꞌ caꞌ Xangac yúguꞌtë nup nacgac xan.  
\v 16 Tuzëꞌ Lëꞌ zóateczëꞌ, atiꞌ zoëꞌ lu yeníꞌ ga cutu gac nu gdxin racz qui. Gatga nu bleꞌi Lëꞌ len cutu gac nu gleꞌi Lëꞌ. Queëꞌ Lëꞌ gactecz le run Lëꞌ ba laꞌn len yöl‑laꞌ uná bëꞌ. Caꞌ gac. 
\p  
\v 17 Gna beꞌi bönniꞌ dë quequëꞌ yöl‑laꞌ tsahuiꞌ dza ni zoaruꞌ naꞌa, cui lun ba zxön cuinquëꞌ, len cui luzxöni ládxiꞌquëꞌ yöl‑laꞌ tsahuiꞌ naꞌ cunác löz. Ral‑laꞌ lunëꞌ löz Dios ban, Nu runntsca queëruꞌ yúguꞌtë le ruziꞌruꞌ xbey.  
\v 18 Gna beꞌi lequëꞌ lunëꞌ le nac dxiꞌa, quië laꞌyantsca dxin dxiꞌa tunëꞌ, lë naꞌ nac tu yöl‑laꞌ tsahuiꞌ gdu. Ral‑laꞌ bi lunödzjëꞌ quegac bunách yechiꞌ, len luiꞌ ládxiꞌquëꞌ leygac.  
\v 19 Chquiꞌ lunëꞌ cni, lutubëꞌ yöl‑laꞌ tsahuiꞌ naꞌ nac gdu, le luziꞌë xbey dza ziꞌa zaꞌ, len laꞌdél‑liꞌnëꞌ yöl‑laꞌ naꞌbán gdu. 
\s1 Le gluꞌë Pablo lu naꞌbiꞌ biꞌi Timoteo 
\p  
\v 20 Bö́chaꞌadauꞌ Timoteo, ben chiꞌi le nadö́d lu naꞌu, len bcuit ga nacuáꞌ nup tuiꞌ didzaꞌ caꞌz len yuguꞌ didzaꞌ cuzacaꞌ, len yuguꞌ didzaꞌ bizxj, yuguꞌ didzaꞌ naꞌ tuiꞌ nup taꞌnáz tac szxöni, atiꞌ nazíꞌ yéꞌigac ca nac lë naꞌ tun.  
\v 21 Laꞌgac bunách gulazíꞌ lu naꞌgac yuguꞌ didzaꞌ cni, atiꞌ gulachixi gulanigui ca nac le réjlëꞌruꞌ Cristo. 
\p Rnabaꞌ lahuëꞌ Dios uzáꞌ ladxëꞌë quiuꞌ le nacgac dxiꞌa queëꞌ. Caꞌ gac.