\id 1JN  
\h 1 Juan 
\toc1 DÍDZAꞌDAUꞌ ZIꞌAL BUZUJËꞌ LU GUICH SAN JUAN 
\toc2 1 Juan 
\toc3 1 Jn. 
\mt1 DÍDZAꞌDAUꞌ ZIꞌAL BUZUJËꞌ LU GUICH SAN JUAN 
\c 1  
\s1 Didzaꞌ nabániruꞌ 
\p  
\v 1 Rguíxjöiꞌtuꞌ lbiꞌiliꞌ ca nac queëꞌ Bönniꞌ naꞌ zoaczëꞌ dza niꞌtë, le byö́nituꞌ bëꞌë didzaꞌ, len le bléꞌituꞌ ca nac queëꞌ, len le buyutuꞌ benëꞌ Bönniꞌ naꞌ. Gdantuꞌ Lëꞌ. Bönniꞌ ni naquëꞌ Jesús, lëꞌ caꞌ Didzaꞌ Nabánigac Bunách.  
\v 2 Bönniꞌ naꞌ nabánigac bunách buluíꞌ lahuëꞌ, atiꞌ bléꞌituꞌ Lëꞌ. Runtuꞌ lnaꞌ lau queëꞌ, len rguíxjöiꞌtuꞌ lbiꞌiliꞌ ca nac queëꞌ Bönniꞌ naꞌ nabániruꞌ. Bönniꞌ ni gzóalenëꞌ Dios Xuz, len chduluíꞌ lahuëꞌ ga zoaruꞌ.  
\v 3 Le bléꞌituꞌ len le byö́nituꞌ rguíxjöiꞌtuꞌ lbiꞌiliꞌ quië gacliꞌ caꞌ lbiꞌiliꞌ tuz len netuꞌ. Le nactë yöl‑laꞌ tuz queëruꞌ len Dios Xuz lencaꞌ len Jesucristo Zxiꞌnëꞌ Dios nac.  
\v 4 Ruzujtuꞌ queëliꞌ lu guich lë ni quië gac udzíjiruꞌ gdu ládxiꞌruꞌ. 
\s1 Dios naquëꞌ yeníꞌ 
\p  
\v 5 Lë ni nac didzaꞌ byö́nituꞌ bë́ꞌlenëꞌ netuꞌ didzaꞌ Jesús, atiꞌ le rguíxjöiꞌtuꞌ lbiꞌiliꞌ. Cni rna: “Dios naquëꞌ yeníꞌ, atiꞌ nitú le nac chul xöhuiꞌ cutu runëꞌ Lëꞌ.”  
\v 6 Chquiꞌ gnaruꞌ: “Nacruꞌ tuz len Dios”, san chquiꞌ runruꞌ le nac chul xöhuiꞌ, lë ni nac bëꞌ rziꞌ yëꞌruꞌ len cutu runruꞌ le nac gdutë li.  
\v 7 Naꞌa, chquiꞌ runruꞌ dxiꞌa, rdaruꞌ lu yeníꞌ ca naꞌ Lëꞌ naquëꞌ dxiꞌa, zoëꞌ lu yeníꞌ, nacruꞌ tuz turuꞌ len yeturuꞌ, atiꞌ xchönëꞌ Jesucristo, Zxiꞌnëꞌ Dios ruún rëꞌu dxiꞌa, rugúa yúguꞌtë dul‑laꞌ nabágaꞌruꞌ. 
\p  
\v 8 Chquiꞌ rnaruꞌ: “Cutu bi dul‑laꞌ runruꞌ”, rziꞌ yéꞌiruꞌ laꞌ cuinzruꞌ, len cunazíꞌ lu naꞌruꞌ le nac gdutë li.  
\v 9 Chquiꞌ gxualëpruꞌ lahuëꞌ dul‑laꞌ nabágaꞌruꞌ, Dios runëꞌ ca rnëꞌ, len naquëꞌ tsahuiꞌ. Unít lahuëꞌ dul‑laꞌ nabágaꞌruꞌ len unëꞌ rëꞌu dxiꞌa, ugǘëꞌ yúguꞌtë le cunác dzag rëꞌu.  
\v 10 Chquiꞌ gnaruꞌ: “Cutu bi dul‑laꞌ nabágaꞌruꞌ”, nac ca gnaruꞌ: “Dios rziꞌ yëꞌë”, atiꞌ didzaꞌ queëꞌ cutu runruꞌ ca rna. 
\c 2  
\s1 Cristo naquëꞌ Nu rudö́d xtídzaꞌruꞌ lahuëꞌ Dios 
\p  
\v 1 Lbiꞌiliꞌ, zxíꞌnaꞌdauꞌ, ruzujaꞌ queëliꞌ lu guich lë ni, cui gunliꞌ dul‑laꞌ. Naꞌa, chquiꞌ nútiꞌtëz nu gun dul‑laꞌ, zoa nu rudö́d xtídzaꞌruꞌ lahuëꞌ Dios Xuz, Lëꞌ Jesucristo, Nu nac tsahuiꞌ.  
\v 2 Nacczëꞌ Nu budö́d cuini, gutiëꞌ quië bugǘëꞌ dul‑laꞌ nabágaꞌruꞌ lahuëꞌ Dios. Clëgz gutiëꞌ quië bugǘëꞌ dul‑laꞌ nabágaꞌruꞌ rëꞌu, san gutiëꞌ caꞌ quië bugǘëꞌ dul‑laꞌ nabágaꞌgac bunách gdutë yödzlyú. 
\p  
\v 3 Chquiꞌ runruꞌ ca nac le gna béꞌinëꞌ rëꞌu, nö́ziruꞌ chnúnbëꞌruꞌ Lëꞌ.  
\v 4 Nu rna: “Nedaꞌ núnbëꞌa‑nëꞌ Dios”, san cutu run ca rna bëꞌ zxba queëꞌ, nu ni rziꞌ yëꞌ, len cutu run le nac gdutë li.  
\v 5 Nu run ca rna xtidzëꞌë Dios, le nactë nadxíꞌi Dios nu ni ca ral‑laꞌ gun. Chquiꞌ runruꞌ cni, nö́ziruꞌ náquiruꞌ queëꞌ Dios.  
\v 6 Lëzcaꞌ cni, nu rna: “Nedaꞌ náquidaꞌ queëꞌ Cristo”, ral‑laꞌ gac nu naꞌ ca naꞌ guquëꞌ Cristo catiꞌ gdëꞌ yödzlyú ni. 
\s1 Tu zxba cub 
\p  
\v 7 Böchiꞌ lzaꞌadauꞌ, ruzujaꞌ queëliꞌ lu guich zxba ni. Cutu nac tu zxba cub, san zxba gul naꞌ, le zoalen lbiꞌiliꞌ dza niꞌtë. Zxba gul naꞌ nac didzaꞌ byö́niliꞌ dza niꞌtë.  
\v 8 Lëzcaꞌ nac ca ruzujaꞌ queëliꞌ lu guich tu zxba cub, lë naꞌ le nactë benëꞌ Jesús ca rna, atiꞌ runliꞌ caꞌ lbiꞌiliꞌ ca rna, le chrdöd qui le nac chul xöhuiꞌ, atiꞌ yeníꞌ gdu chrzeníꞌ. 
\p  
\v 9 Nu rna: “Zoaꞌ lu yeníꞌ”, san curleꞌi dxiꞌa böchiꞌ lzëꞌi, nu ni ni run le nac chul xöhuiꞌ.  
\v 10 Zoa lu yeníꞌ nu nadxíꞌi böchiꞌ lzëꞌi, len cutu zoalen lei le run ga nu gchixi gnigui.  
\v 11 Run le nac chul xöhuiꞌ nu curleꞌi dxiꞌa böchiꞌ lzëꞌi, len rda ga chul. Cutu nözi ga zeaj, le run ga nachúl nanít nu naꞌ le nac chul naꞌ. 
\p  
\v 12 Ruzujaꞌ queëliꞌ lu guich, zxíꞌnaꞌdauꞌ, le chbunít lahuëꞌ Dios dul‑laꞌ nabágaꞌliꞌ, le runëꞌ le gzxiꞌ lu nëꞌë gunëꞌ.  
\v 13 Ruzujaꞌ queëliꞌ lu guich, lbiꞌiliꞌ nacliꞌ xuz, le núnbëꞌliꞌ Nu naꞌ zoacz dza niꞌtë. Ruzujaꞌ queëliꞌ lu guich, biꞌi raꞌbán, le chbuxicjliꞌ tuꞌ xöhuiꞌ. 
\p  
\v 14 Chbuzujaꞌ queëliꞌ lu guich, zxíꞌnaꞌdauꞌ, le núnbëꞌliꞌ‑nëꞌ Dios Xuz. Chbuzujaꞌ queëliꞌ lu guich, lbiꞌiliꞌ nacliꞌ xuz, le núnbëꞌliꞌ Nu naꞌ zoacz dza niꞌtë. Chbuzujaꞌ queëliꞌ lu guich, biꞌi raꞌbán, le nacliꞌ biꞌi nal, atiꞌ xtidzëꞌë Dios nazíꞌ lu naꞌliꞌ, len chbuxicjliꞌ tuꞌ xöhuiꞌ. 
\p  
\v 15 Cutu gdxiꞌizliꞌ yödzlyú ni, len clëg le dë yödzlyú ni. Chquiꞌ zoa nu nadxíꞌi yödzlyú, cutu nadxíꞌi Dios Xuz.  
\v 16 Cni nac, le cutu nac le rëꞌnnëꞌ Dios Xuz le tun bunách yödzlyú ni, san nac le tëꞌni bunách yödzlyú ni. Tunëꞌ le rdzag ladxiꞌ yöl‑laꞌ bunáchz quequëꞌ. Tunëꞌ le rdani yöj lauquëꞌ le cunác. Tun ba zxön cuinquëꞌ niꞌa qui le dë quequëꞌ. Cni nacgac le cunác tunëꞌ.  
\v 17 Huadö́d qui yödzlyú ni lencaꞌ qui le taꞌzë́ ládxiꞌgac bunách, san nu run ca rëꞌnnëꞌ Dios soa tsalzú. 
\s1 Nu ruiꞌ didzaꞌ gdutë li len nu rziꞌ yëꞌ 
\p  
\v 18 Zxíꞌnaꞌdauꞌ, chzoaruꞌ dza udx, len ca naꞌ chbyö́niliꞌ huidëꞌ bönniꞌ rdáꞌbaguëꞌë Cristo, lëzcaꞌ naꞌa chgzu lau nacuꞌë zian bönniꞌ taꞌdáꞌbaguëꞌë Cristo. Qui lë ni naꞌ nö́ziruꞌ chzoaruꞌ dza udx.  
\v 19 Gularujëꞌ ladjruꞌ bönniꞌ cni, san cutu glaquëꞌ tuz len rëꞌu. Laꞌnaruꞌ glaquëꞌ tuz len rëꞌu, laꞌcuáꞌlenteczëꞌ rëꞌu. Naꞌa, gularujëꞌ quië gac bëꞌ cutu nacquëꞌ tuz len rëꞌu yúguꞌtëꞌ. 
\p  
\v 20 Naꞌa, chzoalen lbiꞌiliꞌ Böꞌ Laꞌy naguꞌë rëꞌu Nu nac laꞌy, atiꞌ nö́ziczliꞌ yúguꞌtë.  
\v 21 Buzujaꞌ queëliꞌ lu guich, le chnö́ziliꞌ le nac gdutë li, len clëg le cunö́ziliꞌ lei. Nö́ziliꞌ caꞌ cutu caꞌ rziꞌ yëꞌ nu nözi le nac gdutë li. 
\p  
\v 22 ¿Nuzxa caz naꞌ nu rziꞌ yëꞌ? ¿Naruꞌ cu nac nu naꞌ rdáꞌbagaꞌ naquëꞌ Jesús Nu bsölëꞌë Dios? Nac nu ni bönniꞌ rdáꞌbaguëꞌë Cristo, le rdáꞌbaguëꞌë naquëꞌ Dios Xuzëꞌ Jesús, len rdáꞌbaguëꞌë caꞌ naquëꞌ Jesús Zxiꞌnëꞌ Dios.  
\v 23 Nútiꞌtëz nu rdáꞌbagaꞌ Dios Zxiꞌn, cutu caꞌ zóalenëꞌ nu naꞌ Dios Xuz. Nútiꞌtëz nu rnë yalj lulu naquëꞌ Zxiꞌnëꞌ Dios Jesús, lëzcaꞌ zóalenëꞌ nu naꞌ Dios Xuz. 
\p  
\v 24 Naꞌa, gul‑güíꞌ latj ugáꞌnlentecz lbiꞌiliꞌ le byö́niliꞌ dza niꞌtë. Chquiꞌ ugáꞌnlentecz lbiꞌiliꞌ le byö́niliꞌ dza niꞌtë, lëzcaꞌ lbiꞌiliꞌ ugáꞌnlenteczliꞌ‑nëꞌ Dios Zxiꞌn lencaꞌ len Dios Xuz.  
\v 25 Nac lë ni le gzxiꞌ lu nëꞌë Dios, gunnëꞌ queëruꞌ yöl‑laꞌ naꞌbán gdu. 
\p  
\v 26 Chbuzujaꞌ queëliꞌ lu guich lë ni ca nac quegac nup taꞌzíꞌ yeꞌi lbiꞌiliꞌ.  
\v 27 Naꞌa, zóalenëꞌ lbiꞌiliꞌ Dios Böꞌ Laꞌy. Bsölëꞌë Lëꞌ queëliꞌ Cristo, atiꞌ Lëczëꞌ zóalenteczëꞌ lbiꞌiliꞌ. Qui lë ni naꞌ cutu rquíniliꞌ nu usëdi lbiꞌiliꞌ, le chzoalen lbiꞌiliꞌ Nu naꞌ rusëdi lbiꞌiliꞌ, atiꞌ didzaꞌ gdutë li ruꞌë Lëꞌ len cutu rziꞌ yëꞌë. Ca naꞌ chnazëdliꞌ, gul‑zóalenteczëꞌ Cristo. 
\p  
\v 28 Naꞌa, zxíꞌnaꞌdauꞌ, gul‑zóalenteczëꞌ Cristo quië catiꞌ uluíꞌ lahuëꞌ Lëꞌ, gacruꞌ rugu ladxiꞌ, len cutu utuiꞌruꞌ soaruꞌ lahuëꞌ Lëꞌ catiꞌ huödëꞌ.  
\v 29 Chquiꞌ nö́ziliꞌ naquëꞌ tsahuiꞌ Dios, ral‑laꞌ gnö́ziliꞌ caꞌ nacgac zxiꞌnëꞌ Dios yúguꞌtë nup tun le nac tsahuiꞌ. 
\c 3  
\s1 Nup nacgac zxiꞌnëꞌ Dios 
\p  
\v 1 Gul‑yú ca nadxíꞌitsquinëꞌ rëꞌu Dios Xuz, benëꞌ ga nazíꞌ laruꞌ zxiꞌnëꞌ Dioscz. Qui lë ni naꞌ cutu caꞌ núnbëꞌgac le nacruꞌ bunách yödzlyú ni, le cutu glunbëꞌë Jesús.  
\v 2 Böchiꞌ lzaꞌadauꞌ, naꞌa chnacruꞌ zxiꞌnëꞌ Dios, len cutu nac béꞌini le ral‑laꞌ gacruꞌ. Nö́ziruꞌ catiꞌ uluíꞌ lahuëꞌ Jesús, gacruꞌ ca naquëꞌ Lëꞌ, le gléꞌiruꞌ‑nëꞌ catëz naquëꞌ Lëꞌ.  
\v 3 Nútiꞌtëz nu run löz gac ca naquëꞌ Jesús, ruiꞌ ladxiꞌ gac dxiꞌa nu naꞌ ca naꞌ naquëꞌ dxiꞌa Jesús. 
\p  
\v 4 Nútiꞌtëz nu run dul‑laꞌ rguitsj zxba queëꞌ Dios, le nac le rguitsj zxba le nac dul‑laꞌ.  
\v 5 Nö́ziliꞌ buluíꞌ lahuëꞌ Jesús quië bugǘëꞌ dul‑laꞌ nabágaꞌruꞌ, len cutu bi dul‑laꞌ runëꞌ Lëꞌ.  
\v 6 Nútiꞌtëz nu dzag Lëꞌ cutu run dul‑laꞌ. Nútiꞌtëz nu run dul‑laꞌ gatga bleꞌi Lëꞌ len cutu nunbëꞌ Lëꞌ Jesús.  
\v 7 Zxíꞌnaꞌdauꞌ, qui nadxi nu siꞌ yeꞌi lbiꞌiliꞌ. Nu run le nac tsahuiꞌ, nac tsahuiꞌ nu naꞌ ca naꞌ naquëꞌ tsahuiꞌ Jesús.  
\v 8 Nu runtecz dul‑laꞌ naqui qui tuꞌ xöhuiꞌ, le run dul‑laꞌ tuꞌ xöhuiꞌ dza niꞌtë. Qui lë ni naꞌ duluíꞌ lahuëꞌ Zxiꞌnëꞌ Dios, quië usnitiëꞌ yuguꞌ le nun tuꞌ xöhuiꞌ. 
\p  
\v 9 Nútiꞌtëz nu nac zxiꞌnëꞌ Dios cutu runtecz dul‑laꞌ, le zóalentecz nu naꞌ le nazíꞌ nu naꞌ lu nëꞌë Dios Xuz.  
\v 10 Cni nac bëꞌ nup nacgac zxiꞌnëꞌ Dios len nup nacgac zxiꞌn tuꞌ xöhuiꞌ. Nútiꞌtëz nu curún le nac tsahuiꞌ len cunadxíꞌi böchiꞌ lzëꞌi cutu naqui queëꞌ Dios. 
\s1 Ral‑laꞌ gdxiꞌicruꞌ‑nëꞌ bö́chiꞌruꞌ taꞌyejlëꞌë Cristo 
\p  
\v 11 Lë ni nac didzaꞌ chbyö́niliꞌ dza niꞌtë, le rna: “Ral‑laꞌ gdxiꞌiruꞌ lzaꞌruꞌ turuꞌ yeturuꞌ.”  
\v 12 Cutu ral‑laꞌ gunruꞌ ca naꞌ benëꞌ Caín. Guquëꞌ Caín qui tuꞌ xöhuiꞌ atiꞌ budöddëꞌ‑biꞌ biꞌi böchëꞌë. ¿Bizx quië budöddëꞌ‑biꞌ biꞌi böchëꞌë? Budöddëꞌ‑biꞌ le glac le cunác le benëꞌ Caín naꞌ, san le benbiꞌ biꞌi böchëꞌë, tsahuiꞌ glac. 
\p  
\v 13 Bö́chaꞌadauꞌ, cutu ubániliꞌ chquiꞌ cutaꞌleꞌi lbiꞌiliꞌ dxiꞌa bunách yödzlyú ni.  
\v 14 Nö́ziruꞌ chgdödruꞌ lu yöl‑laꞌ gut len chdë queëruꞌ yöl‑laꞌ naꞌbán gdu le nadxíꞌigacruꞌ‑nëꞌ bö́chiꞌruꞌ. Nu cutu nadxíꞌi böchiꞌ lzëꞌi, chnatcz nu naꞌ.  
\v 15 Nútiꞌtëz nu curleꞌi dxiꞌa böchiꞌ lzëꞌi, nac gdödi bunách nu naꞌ, atiꞌ nö́ziliꞌ cutu dë yöl‑laꞌ naꞌbán gdu qui nitú nu rudödi bunách.  
\v 16 Cni núnbëꞌruꞌ yöl‑laꞌ nadxíꞌi le nac gdu, le budödëꞌ yöl‑laꞌ naꞌbán queëꞌ Jesús, gutiëꞌ uláz queëruꞌ. Lëzcaꞌ cni rëꞌu ral‑laꞌ udödruꞌ yöl‑laꞌ naꞌbán queëruꞌ, gáclencruꞌ‑nëꞌ bö́chiꞌruꞌ.  
\v 17 Naꞌa, nútiꞌtëz nu dë yöl‑laꞌ tsahuiꞌ qui, lë naꞌ dë yödzlyú ni, atiꞌ rleꞌi böchiꞌ lzëꞌi, bi ryadzj queëꞌ, len cutu ruhuechiꞌ ladxiꞌ lëꞌ, bi unö́dzj queëꞌ, ¿naruꞌ nadxiꞌitsa Dios nu naꞌ?  
\v 18 Zxíꞌnaꞌdauꞌ, ral‑laꞌ gdxiꞌiruꞌ lzaꞌruꞌ, clëg len didzaꞌz o lu yöl‑laꞌ rnëz queëruꞌ, san gdu ládxiꞌruꞌ lencaꞌ len gdutë yöl‑laꞌ run queëruꞌ ral‑laꞌ gdxiꞌiruꞌ lzaꞌruꞌ. 
\s1 Le runruꞌ löz lahuëꞌ Dios 
\p  
\v 19-20 Chquiꞌ cni nadxiꞌicruꞌ‑nëꞌ böchiꞌ lzaꞌaruꞌ, nö́ziruꞌ náquiruꞌ qui Nu naꞌ nac gdutë li, atiꞌ lahuëꞌ Dios huac cöꞌ dxi icj ládxiꞌdauꞌruꞌ chquiꞌ ruxö́s rëꞌu ládxiꞌdauꞌruꞌ, le ráctscarëꞌ Dios ca ládxiꞌdauꞌruꞌ, atiꞌ Lëꞌ nözcznëꞌ yúguꞌtë.  
\v 21 Böchiꞌ lzaꞌadauꞌ, chquiꞌ cutu ruxö́s rëꞌu ládxiꞌdauꞌruꞌ, dë le runruꞌ löz lahuëꞌ Dios  
\v 22 le nö́ziruꞌ gunnëꞌ queëruꞌ bítiꞌtëz bi gnabruꞌ lahuëꞌ. Cni nac, le runruꞌ ca rna bëꞌ zxba queëꞌ len le rdzag ladxëꞌë Lëꞌ.  
\v 23 Lë ni nac zxba queëꞌ, quië tséjlëꞌruꞌ‑nëꞌ Jesucristo, Zxiꞌnëꞌ Dios, len gdxiꞌiruꞌ lzaꞌruꞌ ca naꞌ chgna béꞌinëꞌ rëꞌu.  
\v 24 Zoalen Dios nu run ca rna bëꞌ zxba queëꞌ, atiꞌ Dioscz zóalenëꞌ nu naꞌ. Cni nö́ziruꞌ dzágteczëꞌ rëꞌu Lëꞌ, le chbsölëꞌë queëruꞌ Dios Böꞌ Laꞌy. 
\c 4  
\s1 Le nac bëꞌ zóalenëꞌ rëꞌu Dios Böꞌ Laꞌy 
\p  
\v 1 Böchiꞌ lzaꞌadauꞌ, cutu tséjlëꞌliꞌ nútiꞌtëz nu rna zóalenëꞌ lei Dios Böꞌ Laꞌy, san gul‑síꞌ bëꞌ nu naꞌ, chquiꞌ zóalenëꞌ lei Dios Böꞌ Laꞌy, le taꞌdë́ꞌ yödzlyú ni zian bönniꞌ taꞌzíꞌ yëꞌë, taꞌnë́ꞌ tuꞌë didzaꞌ uláz queëꞌ Dios.  
\v 2 Cni gúnbëꞌliꞌ‑nëꞌ bönniꞌ zóalenëꞌ lëꞌ Dios Böꞌ Laꞌy. Naqui queëꞌ Dios bönniꞌ rnëꞌ yalj lulu ca bidëꞌ Jesucristo, Nu bsölëꞌë Dios, rnëꞌ guquëꞌ gdu bunách.  
\v 3 Lëzcaꞌ cni, cutu naqui queëꞌ Dios bönniꞌ cutu rnëꞌ yalj lulu ca bidëꞌ Jesucristo, rnëꞌ cutu guquëꞌ gdu bunách. Bönniꞌ ni náquinëꞌ qui nu naꞌ rdáꞌbagaꞌ Cristo, nu naꞌ chbyö́niliꞌ ral‑laꞌ guid, atiꞌ naꞌa chzoa rda yödzlyú ni. 
\p  
\v 4 Zxíꞌnaꞌdauꞌ, náquiliꞌ queëꞌ Dios, len chbuxicjliꞌ nup naꞌ taꞌzíꞌ yëꞌ, le napr yöl‑laꞌ huac uná bëꞌ Nu naꞌ zoalen lbiꞌiliꞌ ca nu naꞌ rda yödzlyú ni.  
\v 5 Lequëꞌ nacquëꞌ bunách yödzlyú. Qui lë ni naꞌ tuꞌë didzaꞌ qui le nac qui yödzlyú, atiꞌ bunách yödzlyú ni tuꞌzë́ naggac lequëꞌ.  
\v 6 Náquiruꞌ rëꞌu queëꞌ Dios. Nu nunbëꞌ Dios ruzë́ nag rëꞌu. Nu cunaqui queëꞌ Dios cutu ruzë́ nag rëꞌu. Cni núnbëꞌruꞌ nu naꞌ yuꞌu lei Böꞌ ruiꞌ didzaꞌ le nac gdutë li lencaꞌ nu naꞌ yuꞌu lei böꞌ rziꞌ yëꞌ. 
\s1 Naljlen Dios yöl‑laꞌ nadxíꞌi 
\p  
\v 7 Böchiꞌ lzaꞌadauꞌ, ral‑laꞌ gdxiꞌiruꞌ lzaꞌruꞌ, le naljlen Dios yöl‑laꞌ nadxíꞌi, atiꞌ nútiꞌtëz nu nadxíꞌi lzëꞌi naljlen caꞌ Dios, len nunbëꞌ Dios.  
\v 8 Nu cunadxíꞌi lzëꞌi, cutu nunbëꞌ Dios, le naljlen Dios yöl‑laꞌ nadxíꞌi.  
\v 9 Cni buluꞌë lahui ca nadxiꞌinëꞌ rëꞌu Dios, bsölëꞌë yödzlyú ni laꞌz dui Zxiꞌnczëꞌ, quië gataꞌ queëruꞌ yöl‑laꞌ naꞌbán gdu niꞌa queëꞌ Lëꞌ.  
\v 10 Cni nac bëꞌ yöl‑laꞌ nadxíꞌi gdu, clëg ca nadxiꞌiruꞌ‑nëꞌ Dios, san ca naꞌ Lëꞌ bdxiꞌinëꞌ rëꞌu, len bsölëꞌë Zxiꞌnczëꞌ quië gutiëꞌ, bugǘëꞌ dul‑laꞌ nabágaꞌruꞌ. 
\p  
\v 11 Böchiꞌ lzaꞌadauꞌ, chquiꞌ cni bdxíꞌitsquinëꞌ rëꞌu Dios, lëzcaꞌ rëꞌu ral‑laꞌ gdxiꞌiruꞌ lzaꞌruꞌ.  
\v 12 Gatga nu bleꞌi Dios, san chquiꞌ nadxiꞌiruꞌ lzaꞌruꞌ, Dios zóalenëꞌ rëꞌu atiꞌ nac bëꞌ nadxiꞌiruꞌ‑nëꞌ Dios gdu ládxiꞌruꞌ.  
\v 13 Nö́ziruꞌ zóalenruꞌ‑nëꞌ Dios, atiꞌ Lëꞌ zóalenëꞌ rëꞌu, le bsölëꞌë queëruꞌ Dios Böꞌ Laꞌy.  
\v 14 Netuꞌ bléꞌituꞌ le benëꞌ Dios Xuz, len runtuꞌ lnaꞌ lau qui. Lëꞌ bsölëꞌë Zxiꞌnczëꞌ Nu ruslá bunách yödzlyú.  
\v 15 Nu rnë yalj lulu naquëꞌ Jesús Zxiꞌnëꞌ Dios, Dios zóalenczëꞌ nu naꞌ, atiꞌ lei zoalen Dios. 
\p  
\v 16 Rëꞌu ni nö́ziruꞌ len réjlëꞌruꞌ nadxiꞌinëꞌ rëꞌu Dios. Naljlen Dios yöl‑laꞌ nadxiꞌi, atiꞌ nu nadxíꞌi lzëꞌi, zoalen Dios nu naꞌ, atiꞌ Dios zóalenëꞌ lei.  
\v 17 Cni run dxin lu icj ládxiꞌdauꞌruꞌ yöl‑laꞌ nadxíꞌi, run ga cutur rádxiruꞌ dza gchuguëꞌ Dios quegac bunách. Ca naquëꞌ Jesús, nacruꞌ caꞌ rëꞌu yödzlyú ni.  
\v 18 Chquiꞌ gdxiꞌiruꞌ‑nëꞌ Dios, cutu bi gádxiruꞌ. Catiꞌ nadxiꞌiruꞌ‑nëꞌ Dios gdu ládxiꞌruꞌ, runëꞌ ga cutu rádxiruꞌ. Nu radxi, rzacaꞌ rguiꞌi. Nu naꞌ radxi, cutu nadxíꞌi Dios gdu ladxiꞌ. 
\p  
\v 19 Rëꞌu ni nadxiꞌiruꞌ‑nëꞌ Dios, le bdxiꞌicznëꞌ rëꞌu ziꞌal Lëꞌ.  
\v 20 Chquiꞌ nu gna: “Nedaꞌ nadxiꞌidaꞌ‑nëꞌ Dios”, san cutu rleꞌi dxiꞌa böchiꞌ lzëꞌi, nu ni rziꞌ yëꞌ. Nu cutu nadxíꞌi böchiꞌ lzëꞌi nu rléꞌitë, ¿nacxcz gac gdxiꞌi Dios len gatga bleꞌi Lëꞌ?  
\v 21 Cni gna béꞌinëꞌ rëꞌu Jesús, gnëꞌ: “Nu nadxíꞌi Dios, ral‑laꞌ gdxiꞌi caꞌ böchiꞌ lzëꞌi.” 
\c 5  
\s1 Ca gac uxicjruꞌ lu le rac queëruꞌ yödzlyú ni 
\p  
\v 1 Nútiꞌtëz nu rejlëꞌ Jesús naquëꞌ Cristo, nac zxiꞌnëꞌ Dios nu naꞌ, atiꞌ nútiꞌtëz nu nadxíꞌi Dios Nu buzóa lei, ral‑laꞌ gdxiꞌi caꞌ lzëꞌi nu nac zxiꞌnëꞌ Dios.  
\v 2 Cni ráquibeꞌiruꞌ nadxíꞌigacruꞌ‑biꞌ zxiꞌnëꞌ Dios. Nac cni chquiꞌ nadxiꞌiruꞌ‑nëꞌ Dios len runruꞌ ca rna béꞌinëꞌ rëꞌu.  
\v 3 Cni nac bëꞌ nadxiꞌiruꞌ‑nëꞌ Dios. Nac cni chquiꞌ runruꞌ ca rna béꞌinëꞌ rëꞌu, len cutu nac baníg lë naꞌ rna béꞌinëꞌ rëꞌu.  
\v 4 Nútiꞌtëz nu nac zxiꞌnëꞌ Dios ruxícj lu le rac yödzlyú ni. Chbuxicjruꞌ lu le rac yödzlyú le réjlëꞌruꞌ‑nëꞌ Dios.  
\v 5 ¿Nuzxa naꞌ ruxícj lu le rac yödzlyú? Run cni nu rejlëꞌ naquëꞌ Jesús Zxiꞌnëꞌ Dios. 
\s1 Dios Böꞌ Laꞌy runëꞌ lnaꞌ lau queëꞌ Cristo 
\p  
\v 6 Cni blëꞌë Jesucristo, bidëꞌ bdilëꞌ nis, len bulaljëꞌ xchönëꞌ, len clëgz bdilëꞌ nis, san lëzcaꞌ bulaljëꞌ xchönëꞌ. Dios Böꞌ Laꞌy naquëꞌ Nu run lnaꞌ lau queëꞌ, le nac gdutë li didzaꞌ ruꞌë Dios Böꞌ Laꞌy.  
\v 7 Tsonn nup tun lnaꞌ lau queëꞌ Jesús niꞌ yehuaꞌ yubá, Dios Xuz, len Dios Zxiꞌn, lëꞌ caꞌ Didzaꞌ, len Dios Böꞌ Laꞌy. Yonnëꞌ ni, tuz nacquëꞌ.  
\v 8 Lëzcaꞌ cni, tsonn le tun lnaꞌ lau queëꞌ luyú ni, Dios Böꞌ Laꞌy, len le bdilëꞌ nis Jesús, len rön niꞌ bulaljëꞌ lëꞌi yag cruz, atiꞌ yonn ni, tuz ca taꞌná.  
\v 9 Chquiꞌ siꞌ lu naꞌruꞌ le tun lnaꞌ lau bunách, le runëꞌ lnaꞌ lau Dios nactër lsacaꞌ. Lë naꞌ benëꞌ lnaꞌ lau Dios nac le benëꞌ lnaꞌ lau queëꞌ Jesús, gnëꞌ naquëꞌ Zxiꞌnczëꞌ.  
\v 10 Nu rejlëꞌ Zxiꞌnëꞌ Dios, nazíꞌ lu nëꞌi le nunëꞌ lnaꞌ lau Dios. Nu curejlëꞌ Dios, nac ca rna nu naꞌ: “Dios rziꞌ yëꞌë.” Cni nac, le cutu gyejlëꞌ le benëꞌ lnaꞌ lau Dios queëꞌ Zxiꞌnëꞌ.  
\v 11 Lë ni nac le benëꞌ lnaꞌ lau Dios. Gnëꞌ chbennëꞌ queëruꞌ yöl‑laꞌ naꞌbán gdu, atiꞌ Zxiꞌnëꞌ naꞌ naquëꞌ Nu nabániruꞌ cni.  
\v 12 Nu zóalenëꞌ lei Zxiꞌnëꞌ Dios, dë yöl‑laꞌ naꞌbán gdu qui. Nu cuzóalenëꞌ lei Zxiꞌnëꞌ Dios, cutu dë yöl‑laꞌ naꞌbán gdu qui. 
\s1 Ca gnö́ziruꞌ dë queëruꞌ yöl‑laꞌ naꞌbán gdu 
\p  
\v 13 Lbiꞌiliꞌ naꞌ réjlëꞌliꞌ‑nëꞌ Zxiꞌnëꞌ Dios, ruzujaꞌ queëliꞌ lu guich lë ni quië gnö́ziliꞌ chdë yöl‑laꞌ naꞌbán gdu queëliꞌ, len quië gac gdu ca réjlëꞌliꞌ‑nëꞌ Zxiꞌnëꞌ Dios. 
\p  
\v 14 Lë ni nac le ruzxöni ládxiꞌruꞌ Lëꞌ. Chquiꞌ bi gnabruꞌ lahuëꞌ ca rëꞌnnëꞌ Lëꞌ, Lëꞌ ryönnëꞌ rëꞌu.  
\v 15 Chquiꞌ nö́ziruꞌ ryönnëꞌ rëꞌu ca nac bi rnábiruꞌ Lëꞌ, nö́ziruꞌ caꞌ gdél‑liꞌczruꞌ lë naꞌ rnabruꞌ lahuëꞌ. 
\p  
\v 16 Chquiꞌ nu gleꞌi böchiꞌ lzëꞌi run dul‑laꞌ cunachë́ꞌ yöl‑laꞌ gut, ral‑laꞌ gnab qui nu naꞌ lahuëꞌ Dios, atiꞌ Lëꞌ gunnëꞌ yöl‑laꞌ naꞌbán qui. Cni rniaꞌ: Ral‑laꞌ gnabliꞌ quegac nup tun dul‑laꞌ cunachë́ꞌ yöl‑laꞌ gut. Dë dul‑laꞌ nachë́ꞌ yöl‑laꞌ gut. Cutu rniaꞌ gnabliꞌ qui nu run dul‑laꞌ cni.  
\v 17 Yúguꞌtë le cunác tsahuiꞌ nac dul‑laꞌ, san dë dul‑laꞌ cunachë́ꞌ yöl‑laꞌ gut.  
\v 18 Nö́ziruꞌ cutu runtecz dul‑laꞌ nu nac zxiꞌnëꞌ Dios, le run chiꞌë nu naꞌ Zxiꞌnczëꞌ Dios, atiꞌ tuꞌ xöhuiꞌ cutu saquiꞌ bi gun qui. 
\p  
\v 19 Nö́ziruꞌ yuꞌuruꞌ lu nëꞌë Dios, atiꞌ yuꞌugac lu naꞌ tuꞌ xöhuiꞌ yúguꞌtë bunách tuiꞌ ládxiꞌgac le dë yödzlyú ni. 
\p  
\v 20 Naꞌa, nö́ziruꞌ chbidëꞌ ni Zxiꞌnëꞌ Dios, len bennëꞌ queëruꞌ yöl‑laꞌ rejniꞌi, quië gúnbëꞌruꞌ Nu naꞌ nac gdutë li. Zóalenruꞌ Nu naꞌ nac gdutë li le zóalenruꞌ‑nëꞌ Jesucristo, Zxiꞌnëꞌ Dios. Nu ni nac Dios gdu, len Nu runn queëruꞌ yöl‑laꞌ naꞌbán gdu.  
\v 21 Zxíꞌnaꞌdauꞌ, gul‑gún chiꞌi cuinliꞌ cui tsej ládxiꞌcliꞌ bdauꞌ guiöj bdauꞌ yag. Caꞌ gac.