\id COL  
\h Colosenses 
\toc1 Colosenses Gyicy nu bzeed Baly lo de mbecy ni Crisht nu yuꞌ Colosas 
\toc2 Colosenses 
\toc3 Col. 
\mt1 Colosenses 
\mt2 Gyicy nu bzeed Baly lo de mbecy ni Crisht nu yuꞌ Colosas 
\c 1  
\p  
\v 1 Ya̱ Baly naca̱ aposht ni Jesucrisht, gun ndeꞌ coz nu rlagy Ñgyoozh. Ya̱ nu biicy na Timoteo tublaazh la zeed de̱ gyicy ii lo der,  
\v 2 lo de ru mbecy ni Ñgyoozh nu yuꞌ Colosas, lo de ru bicy na nu ricy paa nu de coz ni Crisht. 
\p Ñgyoozh Uz den gyicy mi faboor nu nap gyicy num der, nunu gyicy mi nu cheti ri añ ni der. 
\s1 Baly rnii nuy Ñgyoozh nu nac de mbecy Colosas 
\p  
\v 3 Dub laa tiem ornu rne̱e̱ du̱ de̱ Ñgyoozh, Uz Shuaan den Jesucrisht, nu nac de ru, orzeꞌ dric de̱ gras nim.  
\v 4 Gun bi gud lagy de̱ nu fert ricy cup der consuel lo Jesucrisht, nunu dzi rca der dela losaꞌr nu nac mbecy ni Ñgyoozh.  
\v 5 Nu nac nu rgyish lo der lo de coz nu bi yuꞌ choow nir gyibaa, ndeꞌ nu dzi rca der losaꞌr. De ru bi bzuub gyidag der de riidz ni de coz nu rgyish lo der lo zeꞌ lat nu güeñ der de riidz nu rishli, de riidz nap nu rnii lac mod gruu mbañ de mbecy.  
\v 6 Orzeꞌ de riidz nu bdunii lo der zeꞌ, zaab za lañ dela lugaar ni gyishlombecy, nunu ricy ñi mod nu nap nu de mbecy, laab niꞌ ziꞌl gal nu guc lat de ru nese ornu güeñ der nu rnii de mbecy nu nap ricy Ñgyoozh num den nunu gud lagy der nu rishli gal nu mnii dey.  
\v 7 De ndeꞌ coz nu blyuu Epafras ni der, yu nu dzi razañ lagya̱ zeꞌ. Yu zeꞌ yu nu ricy riiñ lat de ru lugaar ne̱ ya̱. Nac yu tub yu nu ricy riiñ ni Jesucrisht lat der, nunu tonaꞌ la ricy paay.  
\v 8 Nunu laab yu zeꞌ mniiy lo̱ de̱ nu Espiriit Yon ni Ñgyoozh bicy mi nu tonaꞌ la rca der losaꞌr, nay. 
\p  
\v 9 Ndeꞌ nu nese dzi nu güeñ de̱ de nu ndeꞌ, orzeꞌ zaab rne̱e̱ du̱ la̱ de̱ Ñgyoozh nu nac der, nunu rdiñ de̱ lom nu nap gyet lag der cuen ni de coz nu rlagy mi, nunu rdiñ de̱ lom nu cuic mi de lo la shcab nap nu druu lo Espiriit Yon nim ni der.  
\v 10 Gun benu ni, orzeꞌ gac cyiiñ der gal mod nu rlagy Shuaan den Jesuuz, nunu dub laa tiem gyicy der de coz nu gyet lagy mi. Nunu zañ coz nap gyicy der nu nac mod nu rcyiiñ der. Nunu cugyiꞌ nu nap zir cuꞌ lo der Ñgyoozh.  
\v 11 Nunu rdiñ de̱ lom nu gyicy fert mi der nu nac nu dzi lily nam ornu ricy mi de coz ily. Orzeꞌ de ru nu pase̱z fert la ragyee der mas deet rac.  
\v 12 Bet lagy der, nunu briic der gras ni Ñgyoozh, Uz den, gun mi zeꞌ bi bzu lily mi de ru nu gyash yaa der ca na coz nu ca lo cuen nu gad ni de mbecy nu nac num lugaar zeꞌ nu yuꞌ yaa nim.  
\v 13 Gun Ñgyoozh bi bloo nap mi de ub na lugaar zeꞌ nu cow, zeꞌ nu riib ic nuras. Orzeꞌ ya num de ub na par lugaar zeꞌ nu riib ic Iꞌñ mi nu dzi rcam.  
\v 14 Nu nac Iꞌñ mi zeꞌ bloo mbañ mi de ub na, nunu bicy sulagy mi dela cyi den. 
\s1 Nap yuꞌ du den Ñgyoozh nu nac nu gut Jesucrisht 
\p  
\v 15 Ñgyoozh wac zac nam, tees gal nu na Ñgyoozh niꞌ ziꞌl na Crisht, biñ nu gac zac na. Orzeꞌ mi zeꞌ Iꞌñ logam, biñ nu gya zir zu par dela coz nu psaꞌ lagy Ñgyoozh.  
\v 16 Par nu nac Iꞌñ mi zeꞌ psaꞌ lagy mi dela coz nu yuꞌ gyibaa, gal nu dela coz nu yuꞌ gyishlombecy ii. Laab nu nac Iꞌñ mi psaꞌ lagy mi de coz nu gac zac na, gal nu de coz nu wac zac na. Gazaꞌ de anc nu riib ic, gal nu de anc fert, par nu nac mi zeꞌ Ñgyoozh psaꞌ lagy mi dela de yu zeꞌ. Orzeꞌ Ñgyoozh psaꞌ lagy mi dela coz nu nac Iꞌñ mi, nunu psaꞌ lagy mi dela coz par Iꞌñ mi.  
\v 17 Crisht nil zum nese anzir nu gruu zac dela coz, nunu par nu nac mi zeꞌ, dela coz yuꞌñ gal mod nu rlagy ñi.  
\v 18 Dela mbecy ni Crisht na dey gal nu na tub cuerp. Zeꞌ Crisht nac mi too cuerp zeꞌ. Laab mi zeꞌ zum nese nu loga la. Nunu laab mi byabañ mi nu loga la ornu gut mi, gun orzeꞌ gya zir zum par dela coz.  
\v 19 Gal nu na Ñgyoozh niꞌ ziꞌl na Jesucrisht, gun ndeꞌ coz nu rlagy mi.  
\v 20 Gun par nu nac Crisht, Ñgyoozh rlagy mi zu nap mi dela coz nu psaꞌ lagy mi, de coz nu yuꞌ gyishlombecy ii, gal nu de coz nu yuꞌ gyibaa. Gun orzeꞌ nap yuꞌ num dela coz par nu nac nu pshu reñ Jesuuz ornu pcam lo cruuz. 
\p  
\v 21 Gulas de ru walab mbecy ni Ñgyoozh nac der, sinu guc der losaꞌ yuum nañ lardoor par nu nac de coz a̱ꞌ nap nu bicy der.  
\v 22 Tees na laab Ñgyoozh bicy mi nu nap yuꞌ nu der mi nu nac mod nu bzac Crisht ornu gut cuerp nim. Ni bicy mi, gun orzeꞌ gad mod nu gyechaꞌ der lom. Byac der mbecy nu bi zu chu par nu gac nim. Byac der mbecy cacy, mbecy nu sac falt ni.  
\v 23 Tees par nu ni ricy Ñgyoozh num de ru, orzeꞌ rlagy ñi nu gzu fert der nu nac de coz nu bi ricy cup der consuel lo. Orzeꞌ cueꞌ glaa yaa der de coz nu rgyish lo der lo, de coz nu guud ni der ornu güeñ ru de riidz nu sac ni Jesucrisht. De ndeꞌ riidz nu rdunii lo de mbecy dutuub la gyishlombecy. Nunu gaza̱ꞌ ya̱ Baly rlocyuuba̱ nu rshaala̱ de riidz zeꞌ. 
\s1 Baly bdugyiy riiñ nu locyuub yu de mbecy ni Crisht 
\p  
\v 24 Na ya̱ yet lagya̱ nu rzac zi̱ nu nac de ru, gun nil bi ca lo cuen nu tonaꞌ la gzac zi de mbecy. Na ya̱ rzac zi̱ nu cuerp la ne̱ gal nu bzac zi Crisht, gun orzeꞌ gaza̱ꞌ locyuuba̱ nu shuub laz ni de nu rzac zi de mbecy ni Crisht. Ya̱ rzac zi̱ nu nac de mbecy ni Crisht, de yu nu bi nac cuerp nim.  
\v 25 Orzeꞌ Ñgyoozh bicy mi nu gyicya̱ riiñ ni dela mbecy nim. Bduꞌm riiñ zeꞌ ya̱a̱ nu locyuuba̱ de ru. Zeꞌ riiñ zeꞌ, ndeꞌ nu rshaala̱ dela riidz nim.  
\v 26 Ya̱ rshaal nap la̱ de riidz nu rila wangad lagy de mbecy gulas. Tees na Ñgyoozh rbic mi nu gad lagy dela mbecy nim ni de riidz zeꞌ.  
\v 27 Orzeꞌ Ñgyoozh rlagy mi cuic mi nu gad lagy de mbecy tub coz ngach nim nu tonaꞌ la coz nap, nunu tonaꞌ la cyit. Coz ngach zeꞌ, ndeꞌ par dela mbecy mas yu nu walab mbecy Israeel. Coz ngach zeꞌ, ndeꞌ Crisht, biñ nu rcyiiñ nañ lardoo de ru. Orzeꞌ nu nac mi zeꞌ segur la gzac der lo de coz cyit na nu gad ni der par lo. 
\p  
\v 28 De̱ ya̱ rzat de̱ Crisht, nunu rshu̱u̱ du̱ de̱ dela mbecy, nunu rlyu̱u̱ ni dey nu de shcab lily nu ricy cup de̱. Orzeꞌ gu̱ꞌ de̱ de mbecy ni Crisht nu bi gul shcab ni yaa Ñgyoozh.  
\v 29 Ndeꞌ nu ricya̱ riiñ, nunu tonaꞌ la rloo lo̱ nu dela fers ne̱. Rac ricya̱ ñii gun Crisht rbic mi fers ne̱. 
\c 2  
\p  
\v 1 Rlagya̱ nu gad lagy der nu tonaꞌ la rloo lo̱ nu ricya̱ riiñ ni de ru, gal nu ni de mbecy Laodicea, nunu niꞌ ziꞌl ni de mbecy nu nigul zaca̱ lo nu loo la.  
\v 2 Tonaꞌ la rloo lo̱ par nu grica̱ baloor ni dela der nañ lardoor, gun orzeꞌ dub laa tiem zaab ca zir der losaꞌr, gun orzeꞌ nap gad lagy der de coz rishli. Gun orzeꞌ cyiiñ ñi ni der par nu nap gad lagy der de coz rishli. Orzeꞌ gad lagy der de coz nu wansaan Ñgyoozh nu ñgyad lagy de mbecy gulas. Coz zeꞌ, ndeꞌ Crisht.  
\v 3 Crisht nam gal nu na tub gyiñ nu yuꞌ choow gyel nap ni Ñgyoozh, gun nu nac mi zeꞌ gad lagy den dela shcab lily ni Ñgyoozh.  
\v 4 De nu nii drica̱ nu gad lagy der, gun orzeꞌ cueꞌ nu guu ni tub la mbecy de ru nu de riidz nu dzi leꞌ za.  
\v 5 Mas ya̱ saca̱ lat der, tees ca ica̱ de ru. Ya̱ yet lagya̱ ornu gud lagya̱ nu yuꞌ der gal mod nu rlagy ñi, nunu yet lagya̱ nu nac nu fert ricy cup der consuel lo Crisht. 
\s1 Cyiiñ na tub mod cub nu nac Crisht 
\p  
\v 6 Orzeꞌ como de ru “O” mnii der ni Shuaan den Jesucrisht, ndeꞌ nu rlagy ñi nu cyiiñ der gal mod nu rcyiiñ de mbecy nim.  
\v 7 Jesucrisht nam gal nu na tub nac yu. Orzeꞌ pshet lyu der lo yu zeꞌ, nunu zuub der yuꞌr laab lo yu zeꞌ, gun orzeꞌ gyafert zir gyicy cup der consuel lom, gun ndeꞌ coz nu bdulyuu ni der. Nunu dub laa tiem cuic der gras ni Ñgyoozh. 
\p  
\v 8 Bzu der cuidad. Cueꞌ zaan der nu guu de mbecy ru nu nac de riidz fals nu rboo ic mbecy ziꞌl. De riidz ni de mbecy zeꞌ walab lo Crisht bruuñ, sinu de nu ndeꞌ coz nu bzeeñ de gyitoo bel ni dey, nunu laab nu ndeꞌ riidz ni nuras, yu nu riib ic gyishlombecy ii. 
\p  
\v 9 Gal mod nu na Ñgyoozh, niꞌ ziꞌl na Jesucrisht lat nu gusam gyishlombecy ii.  
\v 10 Orzeꞌ de ru ricy cup zaꞌ la der Ñgyoozh, par nu nac nu nac nu der Crisht. Mi zeꞌ riib ic mi dela mbecy nu riib ic, gal nu de espiriit.  
\v 11 Nunu niꞌ ziꞌl par nu nac nu nac nu der Crisht, orzeꞌ ndeꞌ nañ gal nu na nu pca beey sircunsision cuerp ni der. Ndeꞌ walab mbecy pcaay beey zeꞌ cuerp ni der, sinu ub la Crisht pcaam beey zeꞌ cuerp ni der. Beey nu pcaa mi zeꞌ, ndeꞌ yaruuñ nu bi bla der ni de coz cyi nañ lardoor.  
\v 12 Gun ornu rzu nis der, orzeꞌ nañ gal nu na nu tublaazh la bgach der nu Crisht. Nunu niꞌ ziꞌl laab ornu bzu nis der zeꞌ, orzeꞌ nañ gal nu na nu tublaazh la byabañ nu der mi nu nac nu bicy cup der consuel lo Ñgyoozh, biñ nu bicy nu byabañ Crisht. Mi zeꞌ rac ricy mi coz ily tonaꞌ la.  
\v 13 Gulas de ru na der gal nu na mbecy gut par Ñgyoozh nu nac de cyi nu bicy der, nunu nu nac nu sac beey sircunsision cuerp ni der. Tees na Ñgyoozh bicy mi nu tublaazh la byabañ der nu Crisht. Ni bicy mi ornu bicy sulagy mi dela cyi nu bicy der.  
\v 14 Ñgyoozh mnit lom dela diꞌñ na nu ca lo cuen ni den nu za contr nin, nunu mnit lom dela coz nu ca lo cuen nu rish na nu nac diꞌñ zeꞌ. Ornu bzaꞌ lom de diꞌñ zeꞌ, orzeꞌ nañ gal nu na nu pcaam ñii lo cruuz.  
\v 15 Par nu nac Crisht, Ñgyoozh bicy mi gan de nuras nu riib ic. Ndeꞌ nañ gal nu na nu bloom gyel mbecy ni dey ornu gua num dey pres nez lo rgüii dela de mbecy. 
\s1 Briish lo der lo de coz nu yuꞌ gyibaa 
\p  
\v 16 Ndeꞌ nu cueꞌ shet ic der nu nii zi de mbecy ni der nu nac de coz nu row der, gal nu de coz nu roꞌr. Ni cueꞌ shet ic der nu nii zi mbecy nir nu nac cushtom ni de saꞌ miꞌ ni dey, gal nu saꞌ nu rzuꞌ dey ornu sa rca beey miꞌ, gal nu ni de dzi nu rzu lagy mbecy.  
\v 17 Dela de coz ii nañ gal nu na sheñ ziꞌl de coz nu yad par lo. Zeꞌ Jesucrisht, mi zeꞌ laab tub ziꞌl mi.  
\v 18 Yuꞌ mbecy nu rniiy nu rlagy ñi nu riib zily dey de anc. Nunu rnii dey nu Ñgyoozh bicy mi nu bdeꞌ loy. Ricy yu nu nac yu mbecy shni. Zeꞌ rishli nac dey mbecy leꞌ nu nac nu ricy cup dey shcab ni mbecy ziꞌl. Nunu waca bee la la gyiꞌ ricy leꞌ dey. Cueꞌ shet ic der nu nii de mbecy zeꞌ nu yuꞌ falt ni der nu nac de coz zeꞌ.  
\v 19 De yu zeꞌ a̱ꞌ nac nu dey Crisht, biñ nu nac too tub cuerp. Nunu mi zeꞌ ricy mi nu raly dutuub la cuerp zeꞌ nu nac nu rgoow mi ñii, nunu rzuub mi tub ga lañ nu lugaar niñ. Orzeꞌ raly ñi dub gal mod nu rlagy Ñgyoozh. 
\p  
\v 20 De ru gut der ornu gut Crisht. Ndeꞌ nu na walabaꞌ nuras, yu nu riib ic gyishlombecy ii, riib ic yu de ru. Benu ni, orzeꞌ ¿lagu gabee rcyiiñ der gal nu rcyiiñ de mbecy ni gyishlombecy ii? ¿Lagu gabee “O” rnii der ni de leey miꞌ zeꞌ?  
\v 21 Gal nu na de nu nii: Cueꞌ gan ru de coz zeꞌ. Zeꞌ tuubaꞌñ: Cueꞌ gow ru de nu ndeꞌ. Zeꞌ tuubaꞌñ: Cueꞌ gal ru de nu ndeꞌ. Ni rnii de leey zeꞌ.  
\v 22 Tees de coz nu rzat de leey zeꞌ nac ñii coz nu ded ni, ornu bi bicy nu mbecy ñii riiñ. Nunu de leey zeꞌ guud ñi nu nac shcab ni mbecy ziꞌl.  
\v 23 Rishli de mbecy nu bloo ic de leey miꞌ zeꞌ, rlyu nu siñ too dey, tees walab rishli. De leey zeꞌ ricy ñi tub mod nu dzi ta par nu gyicy de mbecy par lo Ñgyoozh. Rniiñ nu gyicy gyidz mbecy ub yu. Rniiñ nu dzi ta gyicy nuy cuerp niy. Mas ni rnii de leey miꞌ zeꞌ, tees rila wacyiiñ ñi nu soow ñi lo de cyi nu yuꞌ nañ lardoo den. 
\c 3  
\p  
\v 1 De ru na der gal nu na mbecy nu bi byabañ tublaazh la nu Crisht. Ndeꞌ nu bicy der nu cuigy lagy ru lo de coz nu yuꞌ gyibaa, zeꞌ nu rcyiiñ Crisht, par yaa bee Ñgyoozh.  
\v 2 Bzu der shcab nu nac de coz nu yuꞌ gyibaa. Cueꞌ caa ic der nu nac de coz nu yuꞌ gyishlombecy ii.  
\v 3 Gun de ru na der gal nu na mbecy nu bi gut, tees na rcyiiñ der tub mod ngach nu Crisht, tub mod nu rila wagad lagy mbecy. Ndeꞌ coz nu rlagy Ñgyoozh.  
\v 4 Mod nu rishli nu rcyiiñ der gyishlombecy ii, ndeꞌ nu gyicy der de coz nu rlagy Crisht. Ornu mi zeꞌ gruu zac mi tuubaꞌ tir, orzeꞌ niꞌ ziꞌl de ru gruu zacaꞌ der nur mi. Orzeꞌ dugyi der gyel lily nim. 
\s1 Mod gush gal nu mod cub 
\p  
\v 5 Na mnit lo der dela shcab a̱ꞌ nap nu druu gyishlombecy ii, de coz nu yuꞌ nañ lardoo der. Ni tub la der cueꞌ gal ru biñ mñaa nu walab mñaar. Cueꞌ gyicy der de coz shiñ na zeꞌ. Ni cueꞌ shiñ nii too der lo biñ mñaa. Ni cueꞌ galagy der lo de coz nu a̱ꞌ yad ñi nu gad nir. Ni cueꞌ ye gzac der lo de coz. Gun nu ye rzac mbecy lo de coz, de ndeꞌ gal gaa la nañ nu nu driib zily mbecy nab.  
\v 6 Gun Ñgyoozh cuic mi tub cashtig ily ni de mbecy nu wacsuub gyidag nim nu nac nu ricy dey de coz zeꞌ.  
\v 7 Ni mod bicy de ru anzir nu gad lagy der gulas.  
\v 8 Tees na bzaan der dela de coz zeꞌ. Orzeꞌ cueꞌ chaꞌ ic der nu losaꞌr. Nunu cueꞌ gazi lagy der. Cueꞌ nii too der nu shiñ gyicy nur losaꞌr. Nunu cueꞌ gab zi der losaꞌr. Nunu cueꞌ go der riidz bag.  
\v 9 Cueꞌ nu guu tub, guu tub ziꞌl der losaꞌr, gun mod nu na der gulas walabaꞌ ni na der na. Nunu wagyicyaꞌ der de coz nu bicy ru gulas.  
\v 10 Zeꞌ par mod nu na der na, nu bi byac der tub mbecy cub. Ñgyoozh, biñ nu psaꞌ lagy de ru, zaab ricy nap lam der par nu gyac ru gal nu naꞌ ub mi, gun orzeꞌ nap chuꞌ lor mi.  
\v 11 Rila wagyicy ñi presis nu nac naa mbecy griego o nu nac naa mbecy Israeel. Nunu wagyicy ñi presis nu ca beey sircunsision cuerp ni den o wacaañ, o nu nac naa mbecy yad, o nu nac naa mbecy nu waca bee ca bruu, o nu nac naa moz por fers la, o nu gac na mbecy nu a̱ꞌ nac moz por fers la. Coz nu ricy zir ñi presis, ndeꞌ nu Crisht rcyiiñ mi nañ lardoo der. 
\p  
\v 12 Ñgyoozh rcam de ru. Nunu pcuim der par nu gac der mbecy nim. Pcyiiñ der tub mod nu gabe nu rashni lagy der losaꞌr. Nap bicy nu der losaꞌr. Cueꞌ gac der mbecy leꞌ. Guc der mbecy gugy na. Guc der mbecy pase̱z.  
\v 13 Bicy cup tub bicy cup tub ziꞌl der pase̱z ni losaꞌr. Benu ca na tub der ricy cup ru gyel chaꞌ ic nu losaꞌr, orzeꞌ bicy sulagy der niy. Bicy sulagy der ni losaꞌr, gal nu Shuaan den Jesuuz bicy sulagy mi ni de ru.  
\v 14 Rlagy ñi se tub coz nu gyicy der. Ndeꞌ nu ca der losaꞌr. Benu ni gyicy der, orzeꞌ tub ziꞌl nac der nu losaꞌr gal nu rlagy ñi.  
\v 15 Crisht gyicy mi nu cheti ri añ ni der nu nac nu ndeꞌ. Orzeꞌ gad lagy der ca na de coz nu laab ñi. Ñgyoozh pcuim de ru par nu gac der se tub ziꞌl cuerp, gun orzeꞌ gad nu cheti ri añ ni der. Nunu guc der mbecy nu ricy graseer. 
\p  
\v 16 Orzeꞌ dub laa tiem ca gaa la ic der de riidz ni Crisht, nunu blyuu der ni losaꞌr. Nunu pshuu nu tub pshuu nu tub ziꞌl der losaꞌr. Nunu guc der mbecy nu siñ too ornu gyicy der de coz zeꞌ. Nunu dub gal rii la lagy der briic gras ni Ñgyoozh. Nunu biil der de riidz nim, gal nu de cant, gal nu de riidz nu druu lo Espiriit Yon nim.  
\v 17 Dela coz nu gyicy der, gal nu de coz nu nii der, bicy der ñii gal nu ricy mbecy ni Shuaan den Jesuuz. Orzeꞌ briic der gras ni Ñgyoozh Uz den par nu nac Shuaan den Jesuuz. 
\s1 Mod nu gyicy de mbecy ni Crisht nu losaꞌy 
\p  
\v 18 De biñ mñaa, rlagy ñi nu “O” niim ni ñgyeem, gun ndeꞌ mod nu rlagy ñi nu gyicy de biñ nu ricy cup consuel lo Shuaan den Jesuuz.  
\v 19 Zeꞌ de yu gyeey rlagy ñi nu ca dey mñaay. Cueꞌ gur gyicy la der nu mñaar. 
\p  
\v 20 De ru mbecy feñ, bzuub gyidag der de coz nu rnii de uz ru, gun de coz zeꞌ gyet lagy Shuaan den Jesuuz.  
\v 21 Zeꞌ de ru yu bel, cueꞌ gyicy der nu chaꞌ ic de yu feñ nir, gun orzeꞌ cueꞌ nu shiꞌñ dey baloor. 
\p  
\v 22 De ru mbecy nu nac moz por fers la, bzuub gyidag der ni mbecy nu nac patro̱o̱ nir gyishlombecy ii. Cueꞌ gyicy der nu dzi nap ricy ru ornu zu ziꞌl yu rgüiiy lo der, par nu gyet lagy yu coz nu ricy ru or zeꞌ ziꞌl, sinu bicy der ñii nu dutuub la lardoor nu nac nu rca lagy der lo Shuaan den Jesuuz.  
\v 23 La ziꞌl coz nu gyicy der, bicy der ñii nu dutuub la lardoor. Orzeꞌ ndeꞌ nañ gal nu na nu rir lo riiñ ni Shuaan den Jesuuz. Cueꞌ gyicy der ñii par riiñ ni mbecy.  
\v 24 Na bi neñ der nu Shuaan den Jesuuz gyabic mi i der, de coz nu bzu lily mi par de mbecy nim. Gun de ru ricy ru riiñ ni Crisht, gun mi zeꞌ gaal nu rishli nac mi Shuaan den.  
\v 25 Tees de mbecy nu shiñ ricy, gyad i dey nu nac de coz a̱ꞌ nap nu ricy yu, gun Ñgyoozh walab nu reñ ga la mod gyicy mi nu tub ga de mbecy. 
\c 4  
\p  
\v 1 Na de ru patro̱o̱, bicy der mod nu seꞌñ nu de mbecy nu nac moz por fers la ni der. Bicy der nu gyezaꞌ lagy ru nu niꞌ de ru zu tub patro̱o̱ nir gyibaa. 
\p  
\v 2 Nunu zaab mnii nu laa der Ñgyoozh. Zaab zu laa der altant nu cuic ru gras nim lat nu rnii nu der mi.  
\v 3 Nunu niꞌ ziꞌl bdiiñ der lom par nu nac de̱ ya̱, gun orzeꞌ cuic mi mod nu shaal de̱ de riidz ni Crisht, de riidz nu wangad lagy de mbecy gulas. Gun par nu nac de riidz zeꞌ ri̱ pres.  
\v 4 Orzeꞌ bdiiñ der lom, gun cuic mi mod nu naal la ne̱e̱ lo de mbecy gal mod nu rlagy ñi nu gyicya̱. 
\p  
\v 5 Bicy der tub mod nu raso̱o̱ nu de mbecy nu wagyicy cup consuel lo Crisht. Cueꞌ zaan der nu nit lo tiem ornu gad mod nu gyicy der riiñ ni Crisht.  
\v 6 Dub laa tiem, ornu go der riidz nu de mbecy, orzeꞌ mnii der riidz nap, gal nu riidz nu gyet lagy dey. Nunu rlagy ñi nu gad lagy der lac mod tush cyar riidz lo tub ga mbecy. 
\s1 Baly rnii nuy dey ñgyoozh 
\p  
\v 7 Bicy den Tíquico, yu nu dzi rcaan, guc yu tub yu nu bicy paa ornu blocyuub yu de ub na, nunu ricy yu riiñ ni Shuaan den Jesuuz nu ya̱. Yu zeꞌ cyid nuy raso̱o̱ ne̱ lo der.  
\v 8 Ndeꞌ nu ya̱ zuu neza̱ yu cyid yu lo der. Orzeꞌ niiy lo der lac yu̱ꞌ de̱ par ii. Orzeꞌ cuic yu baloor ni der.  
\v 9 Laab nu Tíquico cyid bicy na Onésimo, yu nu dzi ricy paa. Yu zeꞌ laab losaꞌ de ru. De yu zeꞌ gyooy rishlo der dela coz nu rac par ii. 
\p  
\v 10 Aristarco, losa̱ꞌ nu ri̱ nañ yuꞌ gyiib, zeed yu ñgyoozh ni der. Niꞌ ziꞌl Marc zeedaꞌy ñgyoozh ni der. Yu zeꞌ bicy cueñ Bernabee. De ru bi bri tub gyicy lo der nu rzat ñi Marc. Benu cyid güiiy de ru, orzeꞌ nap bicy nu der yu.  
\v 11 Niꞌ ziꞌl Jesuuz, yu nu rnii dey Jusht, zeed yu ñgyoozh ni der. Nomaas de yu ii ziꞌl yu nu yuꞌ lat de mbecy Israeel nu ricy cup consuel lo Crisht nu yuꞌ du̱ ii. De yu ii ziꞌl ricy du̱ riiñ ni gyel gubier ni Ñgyoozh. De yu ii nac dey tub consuel ily ne̱.  
\v 12 Epafras niꞌ ziꞌl zeed yu ñgyoozh ni der, nunu nac yu tub yu nu ricy riiñ ni Jesucrisht. Yu zeꞌ laab losaꞌ de ru. Dub laa tiem rnishbaay lo Ñgyoozh par nu nac de ru ornu rnii nuy mi, gun orzeꞌ gyafert der, nunu gac nap la der, gal nu na mbecy nu gul shcab ni. Gac der mbecy nu wagyicy cyup ic, nunu gyicy der gal nu rlagy mi.  
\v 13 Ya̱ Baly naca̱ teshtig ni dela coz nu ricy Epafras. Tonaꞌ la rzu bich yu nu nac de ru gal nu de mbecy nu yuꞌ Laodicea, gal nu de mbecy nu yuꞌ Hierápolis.  
\v 14 Luc, yu nu nac doctoor, yu nu dzi rca den, zeed yu ñgyoozh ni der. Niꞌ ziꞌl Demas. 
\p  
\v 15 Gab der de bicy na nu yuꞌ Laodicea shnu dey. Gab der Ninfa shnuñ gal nu de mbecy ni Crisht nu ryatublaazh yuꞌñ.  
\v 16 Na ornu lazh lab der lo gyicy ii, orzeꞌ gzeed der ñii chañ lat de mbecy ni Crisht nu yuꞌ gyedz Laodicea. Gun orzeꞌ niꞌ ziꞌl de yu zeꞌ lab dey loñ. Zeꞌ na niꞌ ziꞌl de ru labaꞌ der lo gyicy nu gruu gyedz zeꞌ.  
\v 17 Nii der lo Arquipo ni raso̱o̱ nu zeeda̱ ii: nu ca ic yu nu gyicy yu de riiñ nu bduꞌ Shuaan den Jesuuz yaay. 
\p  
\v 18 Ya̱ Baly ca̱a̱ de riidz ii nu ya̱a̱ nu letr ne̱ nu zeeda̱ ñgyoozh ni der: Ca ic der nu ya̱ ri̱ nañ yuꞌ gyiib. Ñgyoozh gyicy mi faboor nu nap gyicy num der.