\id 1TI  
\h 1 Timoteo 
\toc1 1 Timoteo Gyicy loga nu bzeed Baly lo Timoteo 
\toc2 1 Timoteo 
\toc3 1 Ti. 
\mt1 1 Timoteo 
\mt2 Gyicy loga nu bzeed Baly lo Timoteo 
\c 1  
\s1 Gyicy loga nu bzeed Baly lo Timoteo 
\p  
\v 1 Ya̱ Baly naca̱ tub aposht, tub yu nu rded riiñ ni Jesucrisht. Ya̱ byaca̱ aposht, gun ni bicy Ñgyoozh, biñ nu co mbañ de ub na. Nunu niꞌ ziꞌl Jesucrisht, biñ nu drish lo den lo, mi zeꞌ bicy mi nu byaca̱ aposht.  
\v 2 Orzeꞌ Timoteo, ya̱ ca̱a̱ gyicy ii nu zeeda̱ ñii lor. Ru nar gal nu na yu feñ ne̱ nu nac nu ya̱ bicya̱ nu fert zir ricy cup ru consuel lo Crisht. 
\p Orzeꞌ Ñgyoozh Uz den nu Shuaan den Jesucrisht gyicy mi faboor nu nap gyicy num ru, nunu gashni lagy mi ru, nunu gyicy mi nu cheti ri añ nir. 
\s1 Bicy cuidad der nu de mbecy nu rlyuu coz fals 
\p  
\v 3 Lat nu pcyiiñ na Éfeso, ornu bi zu̱ la̱ nu cha̱ par Macedonia, orzeꞌ mne̱e̱ lor nu ricy ñi presis nu gyiyeeñ ru Éfeso, gun orzeꞌ gac niir lo ca na de mbecy nu cueꞌ lyuu dey de coz fals.  
\v 4 Mnii lo dey nu laa yaay de riidz nu bloo ic mbecy ziꞌl zeꞌ, gal nu de lisht nu taꞌ nu la de gyitoo bel ni dey. Gun de nu ndeꞌ, tub lo ziꞌl nu ricy ñi nu ro zi mbecy riidz nu losaꞌy. De coz zeꞌ walocyuub ñi nu “O” nii mbecy ni de coz nu rlagy Ñgyoozh nu nac nu gyicy cup dey consuel lo Crisht. 
\p  
\v 5 Rlagy ñi nu gyicy dey gal nu rne̱e̱, gun orzeꞌ ca tub ca tub ziꞌl dey losaꞌy. Rlagy ñi ca dey losaꞌy gal nu ricy mbecy nu caacy lardoo, gal nu ricy mbecy nu sac nu gat lo nu nac coz nu ricy yu, gal nu ricy mbecy nu ricy cup consuel lo Jesuuz nu dutuub la lardoo.  
\v 6 Ndeꞌ nu la be mbecy gudza dey nez nu rlagy ñi nu chay. Orzeꞌ ndeꞌ nu nac nu riidz ton ziꞌl ro dey.  
\v 7 Rlagy dey gac yu mbecy nu rlyuu leey nu bzeeñ Moisees, tees ni ub dey wagyet lag yu cuen de coz nu rniiy. Nunu de riidz nu fert la zu dey nu rshaal yu, niꞌ wagyet lag yu cuen. 
\p  
\v 8 Rad lagy den nu leey ni Moisees, ndeꞌ coz nap benu gyicy duñ ñi gal mod nu rlagy ñi.  
\v 9 Rlagy ñi gad lagy den nu Ñgyoozh briic mi leey walab par nu chañ contr ni mbecy nu sac falt ni, sinu par nu chañ contr ni mbecy nu yuꞌ falt ni, par de mbecy nu wagyicy yac coz nu rnii leey, par de mbecy nu wacsuub gyidag ni Ñgyoozh, par de mbecy nu shiñ ricy, par de mbecy cyi, par de mbecy nu waca lagy lo Ñgyoozh, par de mbecy nu waca Ñgyoozh, par de mbecy nu rut uz, par de mbecy nu rut ñaa, par de mbecy nu rut losaꞌ,  
\v 10 par de mbecy nu ral losaꞌ nu wanchelaa, par de mbecy nu ricy losaꞌ gyeey par biñ mñaa, par de biñ mñaa nu ricy losaꞌ mñaa par yu gyeey, par de yu nu rut losaꞌ nu tiñ, par de mbecy rguu, par de mbecy nu rnii cyoozh, orzeꞌ despuees rguuy. Par dela de mbecy nu ni ricy zeꞌ, za leey zeꞌ contr ni dey. Nunu de riidz ni Ñgyoozh rniiñ nu yuꞌ coz nu wac gyicy na. Benu mbecy gyicy yu de coz zeꞌ, orzeꞌ za gaꞌ leey contr niy.  
\v 11 Dela de coz ni leey nu rne̱e̱ ii bruuñ lo de riidz nap ni Jesucrisht. Nunu dela riidz nap zeꞌ, Ñgyoozh Yon bicy mi nu rad lagy na. Nunu riiñ nu briic mi nu gyicya̱, ndeꞌ nu tush lasa̱ de riidz nap zeꞌ. 
\s1 Baly briic yu gras ni Ñgyoozh nu nac nu gushni lagy mi yu 
\p  
\v 12 Ya̱ tonaꞌ la drica̱ gras ni Shuaan den Jesucrisht, gun bicy mi ya̱ par mbecy nu ricy paa, nunu ndeꞌ nu bduꞌm riiñ nim ya̱a̱. Nunu laab ub mi locyuub mi ya̱ nu gyicya̱ riiñ zeꞌ.  
\v 13 Ni bicy num ya̱ mas shiñ bicya̱ gulas. Mne̱e̱ riidz nu gua contr nim. Psheed zi̱ de mbecy nim. Nunu mne̱e̱ zi nim. Tees gushni lagy mi ya̱, gun gyel ton ziꞌl bicya̱ ndeꞌ, nunu tiem zeꞌ nigul gyicy cupa̱ consuel lom.  
\v 14 Orzeꞌ Shuaan den Jesucrisht bicy mi tub faboor ily num ya̱ nu dzi nap bicy num ya̱. Orzeꞌ ndeꞌ nu na bi ricy cupa̱ consuel lo Jesucrisht, nunu rca̱m. Ni ricya̱ nu nac nu nac du̱ Jesucrisht. 
\p  
\v 15 De riidz nu rne̱e̱ na, nii coz nu segur la, nunu dela mbecy rlagy ñi cheña lagy dey niñ. Riidz zeꞌ, ndeꞌ nu Jesucrisht biid mi gyishlombecy ii, gun orzeꞌ co mbañ mi de mbecy cyi. Orzeꞌ lo dela de mbecy cyi, ya̱ naca̱ mbecy cyi gaꞌ zir.  
\v 16 Ndeꞌ nu Ñgyoozh gushni lagy mi ya̱, gun orzeꞌ gac lyuu Jesucrisht ni de mbecy nu tonaꞌ la ricy cup mi pase̱z num dey. Gun mas ya̱ naca̱ tub mbecy cyi zub lo zir, tees nu nac ya̱, orzeꞌ syaꞌ deꞌ zir de mbecy nu bi ca lo cuen nu gyicy cup consuel lom. Orzeꞌ cui mbañ dey tub la.  
\v 17 Orzeꞌ rlagy ñi nu ca lagy den lo biñ nu riib ic, nunu rlagy ñi nu gyabic den gyel mbecy nim tub la. Mi zeꞌ biñ nu mbañ tub la. Mi zeꞌ biñ nu wacsac na. Tub zi lam nac mi Ñgyoozh nu rishli. ¡Laab ni gac ñii! 
\p  
\v 18 Timoteo, ru nar gal nu na tub yu feñ ne̱. Orzeꞌ ya̱ rdu̱ꞌ riiñ ii yaar laabaꞌ gal nu mnii de yu nu mnii por cuen ni Ñgyoozh nu nac ru. Gun orzeꞌ fert la char contr ni de mbecy nu rlyuu coz fals.  
\v 19 Orzeꞌ lat nu gyicy ru de coz zeꞌ, niꞌ ziꞌl bicy cup consuel lo Jesuuz. Nunu tub lo ziꞌl de coz nu rad lagy ru nu seꞌñ, de ndeꞌ bicy, gun yuꞌ la be mbecy nu bicy lay coz a̱ꞌ nap nu mnii too dey. Orzeꞌ nu mnu dey consuel nu bicy cup yu.  
\v 20 Lat de yu zeꞌ bruu Himeneo nu Alejandro. De yu zeꞌ bi bgu̱ꞌ dey yaa nuras nu gyicy ras nuy dey, gun orzeꞌ syaꞌ dey nu cueꞌ nii dey riidz nu za contr ni Ñgyoozh. 
\c 2  
\s1 Lac mod nii nu mbecy Ñgyoozh 
\p  
\v 1 Nu loga la rne̱e̱ lo de mbecy ni Crisht nu ricy ñi presis nu zaab cyiñ la dey dela coz nu cyiiñ ni mbecy lo Ñgyoozh. Nunu ricy ñi presis nu nii nu dey mi. Ricy ñi presis nu cyiñ dey lom par dela mbecy. Nunu ricy ñi presis nu cuic dey gras nim.  
\v 2 Cyiñ dey lom nu nac de mbecy nu riib ic. Nunu cyiñ dey lom nu nac dela de fushtiz. Cyiñ dey lom tub mod nu locyuub ñi dela mbecy. Gun orzeꞌ gusht cyiiñ den, nunu chuꞌn nu gyel ri zu lat nu gyicy na coz nu rlagy Ñgyoozh, gal nu coz nu seꞌñ.  
\v 3 Rlagy ñi nu cyiñ ru lom nu nac dela mbecy, gun ndeꞌ coz nap nu gyicy ru, nunu ndeꞌ coz nu gyicy ñi nu gyet lagy Ñgyoozh, biñ nu co mbañ de ub na.  
\v 4 Gun mi zeꞌ rlagy mi nu ruu mbañ dela mbecy, nunu rlagyaꞌm nu dela mbecy gad lagy dey riidz nu rishli nim.  
\v 5 Gun zu tub zi Ñgyoozh par dela mbecy. Nunu zu tub zi biñ nu mneꞌ ic ni de mbecy lo Ñgyoozh. Biñ nu mneꞌ ic zeꞌ, mi zeꞌ Jesucrisht. Nunu laab ub mi nac mi mbecy.  
\v 6 Gun Jesucrisht pshet ic mi nu gut mi par nu briish mi cyi dela mbecy. Ornu pshuub tiem nu gut mi, orzeꞌ ndeꞌ blyuuñ lo de mbecy nu Ñgyoozh rlagy mi nu gruu mbañ dela mbecy.  
\v 7 Ndeꞌ nu ya̱ bdugyi̱ nu naca̱ tub aposht, nunu naca̱ tub yu nu rshaal laab de riidz zeꞌ. Nunu bduꞌm riiñ ya̱a̱ nu lyu̱u̱ lat dela mbecy nu walab mbecy Israeel de riidz rishli ni Ñgyoozh. Nunu ya̱ rishli rne̱e̱, walab nu rgu̱u̱. 
\p  
\v 8 Ndeꞌ nu ya̱ rlagya̱ nu de yu gyeey nu yuꞌ dela lugaar shes nañ dey yaay ornu nii nu dey Ñgyoozh. Nunu yaay nu shes nañ yu zeꞌ, ndeꞌ rlagy ñi nu yaa mbecy nu wayicy cyi. Rlagy ñi nu gac yu mbecy nu wagazi lagy. Rlagy ñi gac yu mbecy nu wagnii deet. 
\p  
\v 9 Zeꞌ de biñ mñaa rlagy ñi nu mod nap gzu dem shab mi. Rlagy ñi gzu dem negy nu a̱ꞌ leꞌ byaa, nunu rlagy ñi nu raso̱o̱ gzu dem shab mi. Ornu gzu cyudz dem, orzeꞌ rlagy ñi nu cueꞌ leꞌ gyicy nap dem gyich toom. Rlagy ñi nu cueꞌ nu dzi dii dem ub mi nu or, nu urndub nu dzi sac, o nu negy nu dzi ñgyup sac.  
\v 10 Walab ndeꞌ mod nu gyicy dem nu cyit nam, sinu coz nap nu gyicy dem, ndeꞌ gyicy ñi nu cyit nam. Ndeꞌ mod nu rlagy ñi par biñ mñaa nu nac ni Ñgyoozh.  
\v 11 Orzeꞌ de biñ mñaa rlagy ñi nu gzuub gyidag dem de riidz nu rdulyuu lat de mbecy ni Crisht. Rlagy ñi nu “O” nii dem nañ lardoom, tees cueꞌ la grib riidz ruꞌm.  
\v 12 Ya̱ warica̱ rishbeey nu lyuu biñ mñaa lat mbecy zigy. Nunu warica̱ rishbeey nu gyub ic dem lat de yu gyeey. Sinu rlagya̱ nu ri gzub dem. Cueꞌ gniim.  
\v 13 Gun Adaang, yu zeꞌ psaꞌ lagy Ñgyoozh yu loga la. Gazeꞌ nu despuees psaꞌ lagy mi Eva.  
\v 14 Nunu walab Adaang bguu nuras yu, sinu Eva. Na ornu bi bguu nuras mi na, orzeꞌ bet lag mi lo cyi.  
\v 15 Tees na de biñ mñaa gruu nap mi, ornu gaal mi mdoo, benu zaab gyicy cup lam consuel lo Ñgyoozh, nunu zaab caa lam de mbecy, nunu zaab gyicy lam coz nu gyedzuꞌ lagy Ñgyoozh, nunu gac dem mbecy raso̱o̱. 
\c 3  
\s1 De yu nu nac yu bel lat de mbecy ni Crisht 
\p  
\v 1 Mbish tub riidz nu rlagy ñi nu cheña lagy mbecy. Riidz zeꞌ, ndeꞌ “Benu ca na tub mbecy rlagy yu gac yu yu bel lat de mbecy ni Crisht, orzeꞌ tonaꞌ la riiñ nap rlagy yu gac yu.” Ndeꞌ riidz nu rlagy ñi nu cheña lagy mbecy.  
\v 2 Ndeꞌ nu na, par nu cyiiñ yu nu gac yu yu bel, orzeꞌ rlagy ñi nu cyiiñ yu tub mod nu cueꞌ la griib mbecy gyidza tooy. Rlagy ñi gac yu mbecy nu ricy paa nu tub ziꞌl biñ nu nac mñaay. Rlagy ñi gac yu mbecy nu zu cuidad nu nac ub. Rlagy ñi nu gac yu mbecy nu nap rash shcab. Rlagy ñi nu gac yu mbecy raso̱o̱. Rlagy ñi nu nap nii nuy mbecy nu rza yuꞌy. Rlagy ñi nu gac yu mbecy nu nap na shcab ni par nu lyuuy ni losaꞌy.  
\v 3 Cueꞌ gac yu mbecy rzugy. Cueꞌ gac yu mbecy dzech na. Sinu rlagy ñi nu gac yu mbecy nu nap ri lardoo. Rlagy ñi nu gac yu mbecy gugy na. Cueꞌ gac yu mbecy nu ye rzac lo tiñ.  
\v 4 Nunu rlagy ñi gac yu mbecy nu nap riib ic lat de famil ni. Rlagy ñi nu de iꞌñ yu gac yu mbecy nu rca lagy lo de mbecy nunu gac dey mbecy nu rzuub gyidag.  
\v 5 Gun benu tub mbecy wagac gyub ic yu lat de famil niy, orzeꞌ niꞌ ziꞌl wac ña nap yu de mbecy ni Crisht.  
\v 6 Yu nu gac yu bel wac mbecy nu sa brugyiꞌ ricy cup consuel lo Jesuuz, gun nis gyaleꞌy. Gun benu ni gyicy yu, orzeꞌ gnii Ñgyoozh nu cyi nu gyicy yu zañ contr nim gal nu bicyaꞌ ziꞌl nuras.  
\v 7 Tuubaꞌ coz rlagy ñi nu cueꞌ gzab riidz nu nac yu mbecy a̱ꞌ nap lat de mbecy nu walab mbecy ni Crisht, gun orzeꞌ cueꞌ nu gruu gyel mbecy niy. Orzeꞌ cueꞌ gyicy nuras gan yu. 
\s1 De yu nu zu ayudant lat de mbecy ni Crisht 
\p  
\v 8 Niꞌ ziꞌl de yu nu gzu ayudant lat de mbecy ni Crisht rlagy ñi nu gac dey mbecy nu rca lagy losaꞌ lo. Rlagy ñi gac yu mbecy nu rnii nu dutuub la lardoo. Cueꞌ gac yu mbecy rzugy. Cueꞌ gac yu mbecy nu ye rzac lo tiñ.  
\v 9 Rlagy ñi nu dutuub la lardoo dey gyicy cup yu consuel lo de riidz nu gal na briic Ñgyoozh nu gad lagy den. Nunu rlagy ñi nu cyiiñ yu tub mod nu cueꞌ gat loy nu nac de coz nu ricy yu.  
\v 10 Rlagy ñi gac preb dey. Orzeꞌ despuees, benu wayuꞌ falt ni dey, orzeꞌ gazeꞌ nu cyiiñ dey nu gac yu ayudant. 
\p  
\v 11 Niꞌ ziꞌl mñaa dey rlagy ñi nu gac dem mbecy nu rca lagy losaꞌ lo. Nunu cueꞌ gac dem mbecy nu rnii rishcuen. Rlagy ñi nu gac dem mbecy nu zu cuidad nu nac ub. Nunu rlagy ñi gyicy paa dem nu dela coz nu gyicy mi.  
\v 12 De ayudant rlagy ñi nu gyicy paay nu tub ziꞌl biñ nu nac mñaay. Nunu rlagy ñi nu nap gyub ic yu de iꞌñ yu, nu deꞌ zir mbecy nu yuꞌ yuꞌy.  
\v 13 Benu de ayudant nap gyub ic dey riiñ nu bdugyiy, orzeꞌ ca lagy mbecy lo dey. Orzeꞌ wadzib lagy la dey nu shaal yu de riidz nu ricy cup yu consuel lo, de riidz nu rnii coz ni Jesucrisht. 
\s1 De riidz ni Ñgyoozh nu gal na rad lagy mbecy 
\p  
\v 14 Na ya̱ drish lo̱ nu gac yap güi̱i̱ gyiilya̱ ru, tees na ca̱a̱ gyicy ii zeeda̱ lor,  
\v 15 gun zeꞌ benu wac yap gyiilya̱, bi neñ ru lac mod gyicy de mbecy ni Ñgyoozh nu de losaꞌy, gun de mbecy zeꞌ nac dey mbecy ni Ñgyoozh mbañ. De yu zeꞌ yu nu ricy cup consuel lo Crisht, nunu de yu zeꞌ gzu fert dey nu de riidz rishli nim.  
\v 16 Rishli gaal dzi coz ily de riidz nim nu gal na briic mi nu gad lagy den. Riidz zeꞌ, ndeꞌ nu: 
\q1 Crisht gush mi cuerp ni mbecy, 
\q1 nunu bruu zac mi gyishlombecy ii. 
\q1 Orzeꞌ Espiriit Yon ni Ñgyoozh bicy mi nu byuꞌ bee 
\q1 nu nac mi biñ nu sac ni tub la falt ni. 
\q1 De anc bzaac dey mi. 
\q1 Orzeꞌ brush las riidz nu rnii de coz nu bicy mi 
\q1 lat zañ nac mbecy. 
\q1 Orzeꞌ bicy cup mbecy consuel lom 
\q1 zañ lugaar ni gyishlombecy. 
\q1 Nunu despuees ni de nu ndeꞌ, 
\q1 pshupaꞌ Ñgyoozh mi gyibaa. 
\m De ndeꞌ de riidz nu gal tiem na briic Ñgyoozh nu gad lagy den. 
\c 4  
\s1 De yu nu laa yaa de coz ni Crisht 
\p  
\v 1 Tees Espiriit Yon ni Ñgyoozh naal la rniim nu ornu bi yad shuub dzi ni gyishlombecy, yuꞌ mbecy nu wayicy cupaꞌ dey consuel lo riidz nu ricy cup de ub na consuel lo na, sinu gzuub gyidag dey ni de riidz nu gruu lo de nuras nu rguu mbecy, nunu gzuub gyidagaꞌ dey ni de riidz fals nu rlyuu de nuras.  
\v 2 Ni gyicy dey ornu gzuub gyidag yu coz nu gnii de mbecy rzuu lo, gal nu de mbecy rguu. De mbecy a̱ꞌ nap zeꞌ mnu shcab ni dey nu nac coz nu ricy yu. Orzeꞌ na wagat lo gaꞌ dey mas shiñ ricy yu.  
\v 3 De mbecy zeꞌ zañ coz a̱ꞌ nap lyuu dey. Ca dey ni de mbecy nu cueꞌ gad mñaa dey. Nunu yuꞌ coz nu wazaan dey nu gow mbecy. De ndeꞌ coz fals. De coz nu don zeꞌ, ndeꞌ nac ñii coz nu psaꞌ lagy Ñgyoozh par nu gow de mbecy nu ricy cup consuel lo Crisht, de mbecy nu rad lagy de riidz rishli. Nunu de yu zeꞌ rbic dey gras nim ornu row dey ñi.  
\v 4 Gun dela coz nu psaꞌ lagy Ñgyoozh nu dow na, caacy ñi. Walagy ñi zu chu mbecy ni tub la de coz zeꞌ benu gric ziꞌl den gras ni Ñgyoozh ornu grush nañ.  
\v 5 Dela coz nu dow na caacy ñi, gun Ñgyoozh rniim nu caacy ñi. Nunu caacy ñi gun rnii nu den mi nu nac ñii. 
\s1 Moz nu ricy paa ni Jesucrisht 
\p  
\v 6 Timoteo, zeꞌ benu ru lyuur de coz ii ni de bicy na, nunu benu gyafert ru nu nac de riidz nu zeña lagy dela den, de riidz rishli nu ricy yac ru ni, orzeꞌ benu ni gyicy ru, orzeꞌ ru nac ru tub moz ni Jesucrisht nu ricy paa.  
\v 7 Orzeꞌ cueꞌ gyicy cuen ru de riidz ton nu walab lo Ñgyoozh bruu. Psyaꞌ de coz nu gyicy zir ñi nu gyicy ru de coz nu bi ca lo cuen nu ricy mbecy ni Ñgyoozh.  
\v 8 Mbecy ñumiiñ zi gyicy yu gan benu gyicy yu riiñ par nu gyafert cuerp niy. Tees benu gyicy yu de coz nu ca lo cuen nu ricy de mbecy par lo Ñgyoozh, orzeꞌ coz ily gyicy yu gan, gun benu ni gyicy yu, orzeꞌ gruu nap yu gyishlombecy ii, nunu gruu nap yu zeꞌ nu cyiiñ yu par lo.  
\v 9 Dela ndeꞌ coz rishli, nunu dela mbecy rlagy ñi nu cheña lagy dey niñ.  
\v 10 Ndeꞌ nu nu nac ndeꞌ fert ricy den riiñ ni Ñgyoozh. Nunu rzaan la den mas shiñ ricy nu mbecy de ub na, gun drish lo den lo Ñgyoozh mbañ. Gun Ñgyoozh nac ni biñ nu rboo mbañ dela mbecy. Co mbañ mi de mbecy nu ricy cup consuel lo Crisht. 
\p  
\v 11 Orzeꞌ de coz ii caar de mbecy nu gyicy yuñ, nunu lyuur ni dey nu ni gyicy yu.  
\v 12 Cueꞌ zaan ru nu gyicy gyidz mbecy ru nu gabee nac ru mbecy feñ, sinu nap zir benu rlyuur ni de mbecy ni Crisht nu lac mod gyicy dey nu nac mod nu ricy ub ru. Mnii riidz nap. Bzu tub mod nu nap. Pca de losaꞌr. Bicy cup consuel lo Crisht. Nunu ru guc mbecy nu sac falt ni. Benu ni gyicy ru, orzeꞌ lyuur ni dey lac mod gyicy yu.  
\v 13 Orzeꞌ blab de riidz ni Ñgyoozh nu dutuub la lardoor zeꞌ nu yuꞌ tublaazh de mbecy ni Crisht gal yap la̱. Pshaal lo dey lac yaruu de riidz zeꞌ, nunu blyuu ni dey.  
\v 14 Cueꞌ gac ru mbecy nu wagyicy cuen riiñ nu bduꞌ Ñgyoozh yaar. Ni bicy mi ornu mnii mbecy por cuen nim nu nac ru, nunu ornu de yu bel nu zu riiñ lat de mbecy ni Crisht briib yaa dey toor. 
\p  
\v 15 Bicy de coz zeꞌ nu dutuub la lardoor. Gun orzeꞌ gzac dela mbecy nu zaab ricy lar gan nu nap ricy ru riiñ ni Ñgyoozh. 
\p  
\v 16 Bzu cuidad nu de coz nu ricy ru, nunu bzu cuidad nu de coz nu rlyuur. Fert la bzu nu delañ. Benu ni gyicy ru, orzeꞌ gruu mbañ ru, nunu niꞌ ziꞌl gyicy ru nu gruu mbañaꞌ de mbecy nu zuub gyidag de coz nu niir. 
\c 5  
\s1 Lac mod chuꞌ de mbecy ni Crisht 
\p  
\v 1 Cueꞌ gab zir de mbecy gush, sinu benu gyicy dey coz nu walab seꞌñ, orzeꞌ pshuu nu dey gal nu rshuu nur uz ru. Zeꞌ de yu feñ, benu gyicy dey coz nu walab seꞌñ, orzeꞌ pshuu nu dey gal nu rshuu nur tub bicy ru.  
\v 2 Zeꞌ de biñ mñaa gush, benu gyicy dem coz nu walab seꞌñ, orzeꞌ pshuu nu dem gal nu rshuu nur ñaar. Zeꞌ de fiñ feñ, benu gyicy deñ coz nu walab seꞌñ, orzeꞌ pshuu nu deñ gal nu rshuu nur zan ru. Nunu cueꞌ shiñ nii toor. 
\p  
\v 3 De mbecy ni Crisht rlagy ñi nu locyuub yu de byud benu nu rishli sac cyu nu locyuub dem.  
\v 4 Benu tub byud zu iꞌñ mi, o zu yag mi, orzeꞌ yu zeꞌ rlagy ñi nu gad lagy yu nu locyuub yum loga la. Como mi zeꞌ nac mi famil niy. Orzeꞌ ni mod gyabic yu coz nu zaab yu ni de mbel niy nu nac nu bguul dey yu. Gun ndeꞌ coz nu yet lagy Ñgyoozh.  
\v 5 Biñ mñaa nu rishli gaal nac byud, de biñ mñaa nu rishli byeeñ ub zi, mi zeꞌ cueꞌ checam nu cyish lom lo Ñgyoozh, nunu dzi rel la cyiñ mi lo Ñgyoozh. Nunu dzi rel la cueꞌ checam nu nii num Ñgyoozh.  
\v 6 Zeꞌ byud nu zu par nu gyicy ziꞌl mi coz nu gusht nim, mas zum gyishlombecy ii, se la la cyiiñ mi ni Ñgyoozh. Nam gal nu na tub mbecy gut.  
\v 7 Pcaa de mbecy ni Crisht nu ni mod gyicy nu dey de byud, gun orzeꞌ warusu mbecy nu griib gyidza too de mbecy ni Crisht.  
\v 8 Benu tub mbecy wabic yu de coz cyiiñ ni de famil niy, benu wabic yu coz cyiiñ ni de mbecy nu yuꞌ nañ yuꞌy, orzeꞌ wagyicy yac yu ni de riidz nu rzeña lagy yu. Orzeꞌ yu zeꞌ a̱ꞌ nap zir yu gazeꞌ de mbecy nu wagyicy cup consuel lo Crisht. 
\p  
\v 9 Zaan ru nu caa dey nu la de byud lo lisht ni de biñ mñaa nu ricy riiñ nu de mbecy ni Crisht benu bi pshuub mi gayon ñaꞌn, nunu benu bicy yac mi nu tub zi ñgyeem nu bzu.  
\v 10 Nunu rlagy ñi nu nap neñ mbecy de coz nap nu ricy mi: nu nap rguul mi de iꞌñ mi, nu nap rnii num de mbecy nu rza yuꞌm, nu a̱ꞌ leꞌm, sinu rzu bich mi nu nac de mbecy ni Crisht, nu rlocyuub mi de mbecy nu rzac zi. Orzeꞌ benu fert bicy mi de lo la riiñ nap, orzeꞌ zaan ru nu caa dey nu lam lo lisht zeꞌ. 
\p  
\v 11 Tees de byud nu nigul shuub gayon ñaꞌn, cueꞌ zaan ru nu caa dey nu lam lo lisht zeꞌ, gun ornu nii too dem nu gad tuubaꞌ ñgyeem, orzeꞌ galagy mi nu chelaam tuubaꞌ tir. Orzeꞌ gla yaam riiñ ni Crisht.  
\v 12 Orzeꞌ yuꞌ falt nim, gun wangyicy yac mi nu de riidz nu mniim lo Crisht nu gyicy mi.  
\v 13 Nunu tuubaꞌ coz, yuꞌ nu gyac dem mbecy nu sac riiñ gyicy. Orzeꞌ chesam gazaꞌ yuꞌ mbecy la. Nunu walab tub lo ziꞌl nu sac riiñ gyicy dem, sinu cugyiꞌ nii dem rishcuen. Cugyiꞌ nu neꞌ ruꞌ dem lat asunt ni reñaꞌ mbecy. Orzeꞌ nii dem coz nu walab seꞌñ.  
\v 14 Ndeꞌ nu ya̱ rlagya̱ nu chelaa de byud feñ. Orzeꞌ cyich mi famil, nunu nap gyub ic mi de riiñ nañ yuꞌ. Orzeꞌ rila cueꞌ cuic dem lugaar nu nii zi de mbecy nu rzi lagy lo den nu nac naa mbecy ni Crisht.  
\v 15 Ni rne̱e̱ lor, gun yuꞌ la be byud nu bi bruu chu dem lo de coz ni Crisht par nu ricy dem coz nu rlagy nuras. 
\p  
\v 16 Benu zu tub byud lat de famil ni tub biñ mñaa nu ricy cup consuel lo Crisht, orzeꞌ biñ mñaa zeꞌ rlagy ñi gyash mi byud zeꞌ goow mim lugaar nu goow deꞌ zir de mbecy ni Crisht mi, gun orzeꞌ de mbecy ni Crisht gac gyash yu de byud nu rishli ub zi, rishli sac famil ni. 
\p  
\v 17 Rlagy ñi nu ca zir lagy de mbecy lo yu bel nu nap riib ic lat de mbecy ni Crisht gazeꞌ deꞌ zir mbecy. Nunu ricy zir ñi presis benu yu zeꞌ yu nu rshaal riidz ni Ñgyoozh nunu rlyuuy ni de mbecy.  
\v 18 Gun riidz ni Ñgyoozh rniiñ: “Cueꞌ car coz nu gow tor lat nu ricy ma riiñ”, rniiñ. Nunu rniiñ: “Yu nu ricy riiñ yad ñi nu gyad iy”, rniiñ. 
\p  
\v 19 Cueꞌ gyicy cuen ru de cyi nu driib mbecy ic de yu bel benu wanrusu cyup o chon teshtig nu bzaac yu nu shiñ bicy yu.  
\v 20 Ornu gyubee nu tub yu bel yuꞌ falt niy, orzeꞌ shuu nur yu lo rgüii la dela de mbecy ni Crisht ornu yuꞌ tublaazh dey, gun orzeꞌ deꞌ zir mbecy dzib dey nu gyicy yu cyi.  
\v 21 Ñgyoozh Uz na, nu Jesucrisht, nu de anc zub lo rzac dem ornu ya̱ ricya̱ mandaar lor nu gyicy yac ru nu de coz nu mne̱e̱. Ni gyicy ru mas cyu ziꞌl mbecy nac yu. Cueꞌ nu reñ ga mod gyicy nur tub ga mbecy. 
\p  
\v 22 Cueꞌ glal ru nu griib yaar too mbecy nu gyicy ru nu gac yu yu bel. Gun benu ni gyicy ru, ndeꞌ cuen ni ru benu gyicy yu cyi. Cueꞌ gyac ru mbecy nu yuꞌ falt zeꞌ ni. 
\p  
\v 23 Timoteo, ru cyaꞌ rac nañ ru, nunu cyaꞌ rat ru. Orzeꞌ cueꞌ goꞌr nis ziꞌl, sinu rlagy ñi nu goꞌr ñuu miꞌ ñup ni urbyay, gun orzeꞌ gyicy ñi guñaa nuñ ru.  
\v 24 Rlagy ñi nu gyicy cuidad ru anzir nu riib ru riiñ ic yu bel, gun waric na raso̱o̱ la mbecy nay. Yuꞌ mbecy lo nu loo la ricy yu cyi. Orzeꞌ rabee lac ricy yu anzir nu gyicy der preb yu. Zeꞌ yuꞌ gaꞌ mbecy ngach ricy dey coz cyi. Orzeꞌ waca bee de cyi nu bicy yu, sinu gal despuees gazeꞌ nu gruu zac ñi.  
\v 25 Orzeꞌ niꞌ ziꞌl mod yuꞌ mbecy nu lo nu loo la ricy yu coz nap. Orzeꞌ rabee lac ricy dey. Nunu yuꞌ gaꞌ mbecy ngach ricy yu coz nap. Tees niꞌ de coz nap nu ricy yu wagyeñ ñi ngach. 
\c 6  
\p  
\v 1 Dela moz nu byac ni mbecy por fers la rlagy ñi nu gyicy dey patro̱o̱ niy par mbecy nu yad ñi ni nu ca lagy yu lo nu dutuub la lardooy, gun orzeꞌ cueꞌ nii zi mbecy ni Ñgyoozh nunu cueꞌ nii dey nu coz a̱ꞌ nap de coz nu rlyuu den.  
\v 2 Zeꞌ benu patro̱o̱ ni moz zeꞌ nac yu mbecy nu ricy cup consuel lo Jesuuz, orzeꞌ cueꞌ checa moz zeꞌ nu ca lagy yu loy, gun patro̱o̱ zeꞌ nac yu bicy yu nu nac Crisht. Lugaar nu checay nu ca lagy yu loy, rlagy ñi nu gyicy paa zir yu nu patro̱o̱ niy. Gun ricy cup patro̱o̱ zeꞌ consuel lo Jesucrisht, nunu Ñgyoozh rcam yu. 
\s1 Coz nu rishli sac 
\p Orzeꞌ blyuu de coz zeꞌ ni de mbecy, nunu niir lo dey nu ricy ñi presis nu ni gyicy yu.  
\v 3 Benu ca na mbecy lyuuy coz nu walab coz nu rlyuu de̱, o benu riidz nu lyuuy wasaap ñi riidz ni Shuaan den Jesucrisht, de riidz nu rlyuu de̱, o benu riidz nu lyuuy wasaap ñi riidz nu rnii lac mod gyicy den de coz nu rlagy Ñgyoozh,  
\v 4 orzeꞌ yu zeꞌ nac yu tub mbecy leꞌ. Yu zeꞌ rila wagyet lag yu cuen. Yu zeꞌ rlagy yu nu go ziꞌl yu riidz nu rila wagyicy ñi presis. Nunu rlagy yu tub suy losaꞌy nu riidz. Orzeꞌ tub lo ziꞌl coz a̱ꞌ nap ricy reñaꞌ mbecy nu nac de ndeꞌ. Rasaap lagy dey nu nac losaꞌy. Rnii deet dey nu losaꞌy. Rnii dey rishcuen. Driib dey gyidza too losaꞌy. Ricy dey malis lo losaꞌy.  
\v 5 Zaab rnii deet la dey, gun wagash nap dey shcab, nunu wagad lagy nap dey de coz nu rishli. Ndeꞌ nu rzii dey nu de coz ni Ñgyoozh nu ricy yu, ndeꞌ par nu gyicy ziꞌl yu gan gyel nap rziiy.  
\v 6 Ornu mbecy gyicy yu coz ni Ñgyoozh, nunu zu laay conform ca na la nu gad, orzeꞌ rishli yu zeꞌ yu nu tonaꞌ la coz sheñ gyicy gan.  
\v 7 Ornu briin gyishlombecy ii, se la la coz bri dun. Nunu ornu ruun gyishlombecy, niꞌ ziꞌl ni tub la coz wac gya dun.  
\v 8 Tees benu yuꞌ coz nu don, nunu benu ricy cup den shab na, orzeꞌ de nu ndeꞌ gyicy lan ñi nu coz nu beñ.  
\v 9 Tees yuꞌ mbecy rlagy yu gyaguaniꞌñ yu. Ndeꞌ nu rziñ lañ nañ lardooy nu rlagy yu gyicy yu coz a̱ꞌ nap par nu gyicy yu gan tiñ. Orzeꞌ yet lag yu nañ caa ni de coz a̱ꞌ nap zeꞌ. Ye rzac dey lo zañ coz nu gyicy da̱y nu de ub yu. Orzeꞌ ndeꞌ gyicy ñi nu gnu mbecy zeꞌ, nunu duneꞌy.  
\v 10 Gun benu tub mbecy ye rzac yu lo tiñ, orzeꞌ bi gush yu nez nu gyicy yu cyi. Ndeꞌ nu la be mbecy bi bruu chu dey lo de riidz nu ricy cup den consuel lo. Orzeꞌ ndeꞌ nu laab ub la dey ricy yu nu tonaꞌ la rzac ziy. 
\s1 Nu co lo Timoteo gun gyicy yu gan 
\p  
\v 11 Zeꞌ ru Timoteo, ru nac ru mbecy nu ricy coz nu rlagy Ñgyoozh. Orzeꞌ cueꞌ gyicy ru de coz zeꞌ. Bicy nu coz nu ricy ru, ndeꞌ coz nu seꞌñ. Nunu bicy nu cyiiñ ru gal mod nu rlagy Ñgyoozh. Nunu bicy nu gyicy cup ru consuel lo Jesuuz. Nunu bicy nu car cyu ziꞌl mbecy. Nunu bicy nu gagyer ornu deet rac. Nunu bicy nu gac ru mbecy gugy na.  
\v 12 Ornu shet yaar riiñ ni Ñgyoozh, orzeꞌ fert la bloo lo, gun orzeꞌ gyicy ru gan nu cui mbañ ru tub la. Ni gyicy ru gun nac ru mbecy nu ricy cup consuel lo Jesuuz, gun Ñgyoozh pcuim ru nu cui mbañ ru, nunu par nu gad nu cui mbañ ru, mnii lat zigy mbecy nu ru ricy cup ru consuel lo Jesuuz.  
\v 13 Lo rgüii la Ñgyoozh, biñ nu rbic gyel mbañ ni dela coz nu yuꞌ gyishlombecy, nunu lo rgüii la Jesucrisht, biñ nu mnii cyu nac lo Poncio Pilato, ndeꞌ nu ya̱ rne̱e̱ lor  
\v 14 nu gyicy yac ru dela coz zeꞌ. Gun cueꞌ nu gad lugaar nu griib mbecy gyidza ic ru. Ni bicy gal shuub la dzi nu cyid Shuaan den Jesucrisht.  
\v 15 Orzeꞌ Ñgyoozh gyicy mi nu cyid mi ornu shuub tiem. Mi zeꞌ nac mi Biñ yon. Mi zeꞌ nil ricy cup mi rishbeey nu gyicy mi la ziꞌl coz nu rlagy mi. Mi zeꞌ riib ic mi dela mbecy nu riib ic. Nunu nac mi Shuaan dela yu nu nac shuaan.  
\v 16 Tub zi la mi zeꞌ nil zum tub la. Nunu tub zi la mi zeꞌ gac gyicy mi nu cyiiñ mbecy tub la. Rcyiiñ mi zeꞌ nu yuꞌ yaa ni gyel lily nim, zeꞌ nu rila wac gyechaꞌ mbecy. Sac ni tub la mbecy nu bi bzaac yum, nunu ni tub la mbecy wac zac yum. ¡Rlagy ñi ca lagy mbecy lom, nunu rlagy ñi nu gyub ic mi dela mbecy tub la! ¡Laab ni gac ñii! 
\p  
\v 17 Tees de mbecy nu ricy cup gyel nap gyishlombecy ii, mnii lo dey nu cueꞌ gyicy ñgyay. Nunu mnii lo dey nu cueꞌ cyish loy lo gyel nap niy. Gun wagad lagy yu lac gaal tuñ tiem gyicy cup yu gyel nap zeꞌ. Sinu mnii lo dey nu cyish loy lo Ñgyoozh. Gun Ñgyoozh cuic zaꞌ lam dela coz ni den, gun orzeꞌ gyicy den gusht dun ñi.  
\v 18 Mnii lo dey nu gyicy yu zañ coz nap. Gun benu ni gyicy dey, orzeꞌ na dey gal nu na mbecy guaniꞌñ nu nac coz nu ricy yu. Orzeꞌ mnii lo dey nu cyaañ yu de coz nap nu gyicy yu. Mnii lo dey nu gzu dey altant par nu locyuub yu losaꞌy, nunu mnii lo dey nu cueꞌ ziy cuic yu coz ni losaꞌy.  
\v 19 Benu ni gyicy dey, orzeꞌ Ñgyoozh gyabic mi ñii ni dey par lo. Nunu benu ni gyicy dey, orzeꞌ tub la cyiiñ nu dey Ñgyoozh gal mod nu rlagy ñi. 
\s1 Laab ndeꞌ la riiñ nu bduꞌ Baly yaa Timoteo 
\p  
\v 20 Timoteo, bicy cuidad nu riiñ nu gutib ic ru. Nunu cueꞌ zuub gyidag ru de riidz wacyiiñ nu za contr ni Ñgyoozh, de riidz nu ricy zily dza la mbecy.  
\v 21 Yuꞌ mbecy nu rzeña lagy dey de riidz wacyiiñ zeꞌ. Orzeꞌ nu nac ndeꞌ gudza dey nu de coz ni Crisht. 
\p Ñgyoozh gyicy mi faboor nu nap gyicy num der.