\id 1TH  
\h 1 Tesalonicenses 
\toc1 1 Tesalonicenses Gyicy loga nu bzeed Baly lo de mbecy ni Crisht nu yuꞌ Tesalónica 
\toc2 1 Tesalonicenses 
\toc3 1 Ts. 
\mt1 1 Tesalonicenses 
\mt2 Gyicy loga nu bzeed Baly lo de mbecy ni Crisht nu yuꞌ Tesalónica 
\c 1  
\s1 Baly zeed yu ñgyoozh ni de mbecy Tesalónica 
\p  
\v 1 Ya̱ Baly, gal nu Silvano, gal nu Timoteo zeed de̱ gyicy ii lo der bicy na nu nac Crisht nu yuꞌ gyedz Tesalónica, de ru mbecy ni Ñgyoozh, Uz den, gal nu Shuaan den Jesucrisht. 
\p Ñgyoozh gyicy mi faboor nu nap gyicy num de ru, nunu gyicy mi nu cheti ri añ ni der. 
\p  
\v 2 Dub laa tiem dric de̱ gras ni Ñgyoozh nu nac dela der, nunu rzat de̱ de ru lat nu rne̱e̱ du̱ de̱ Ñgyoozh.  
\v 3 Nunu lat nu rne̱e̱ du̱ de̱ Ñgyoozh Uz den, ryezaꞌ lagy de̱ de coz nu ricy der nu nac nu ricy cup der consuel lom, gal nu de riiñ nu ricy der nu nac nu dzi rca der mi, gal nu lac mod ragyee der ornu rzac zir nu nac nu rgyish lo der lo Shuaan den Jesucrisht.  
\v 4 Der bicy na, Ñgyoozh rcam de ru, nunu rad lagy den nu bi pcuim der nu gac nim.  
\v 5 Tees ornu pshaal de̱ de riidz nu sac ni Crisht lat der, walab riidz ziꞌl mne̱e̱ de̱, sinu bicy de̱ nu gad lagy der de coz ily nu ricy Espiriit Yon ni Ñgyoozh, nunu bric de̱ nu gad lagy der nu zeña lagy nap la de̱ nu de riidz zeꞌ, ndeꞌ coz rishli. De ru nap rad lagy der mod nu gusa̱ de̱ lat der. Byub de̱ tub mod nu nap par de ru. 
\p  
\v 6 Zeꞌ de ru bicy der gal mod nu bicy de̱ ya̱ nunu gal mod ni Shuaan den Jesuuz. Nunu Espiriit Yon ni Ñgyoozh bicy mi nu tonaꞌ la bet lagy der ornu pshet ic der ni de riidz zeꞌ mas tonaꞌ la bzac zi der nu nac ñii.  
\v 7 Ndeꞌ nu briic der nu gad lagy dela mbecy nu ricy cup consuel lo Crisht nu yuꞌ lo de yu ni Macedonia, gal nu de yu nu yuꞌ lo yu ni Acaya nu lac mod gyicy dey. Briic der nu gad lagy dey nu lac mod gyicy dey nu nac mod nu bicy de ru.  
\v 8 Walab tub lo ziꞌl nu brush las de riidz ni Shuaan den Jesucrisht lo de yu ni Macedonia nu Acaya, nu nac de ru, sinu niꞌ dela lugaar zaab riidz nu lac mod ricy cup der consuel lo Crisht. Ndeꞌ nu walagyaꞌñ nu gne̱e̱ de̱ ni tub la riidz.  
\v 9 Dela mbecy zeꞌ rnii dey nu dzi nap bicy nu der de̱ ya̱ ornu bri̱ de̱ lat der. Nunu rnii dey nu bi guca der nu driib zily ru nab. Orzeꞌ brugyiꞌ nu ricy der de coz nu rlagy biñ nu rishli nac Ñgyoozh, biñ nu mbañ.  
\v 10 Nunu niꞌ rnii gaꞌ dey nu rbez der Jesuuz, Iꞌñ Ñgyoozh, biñ nu bicy mi nu byabañ. Rbez der mi gal ornu ruum gyibaa cyid mi tuubaꞌ tir. Mi zeꞌ biñ nu co mbañ de ub na lo cashtig ni Ñgyoozh. 
\c 2  
\s1 Baly bicy yu riiñ ni Ñgyoozh Tesalónica 
\p  
\v 1 Der bicy na, de ru rad lagy der nu wangyap leew de̱ lat der.  
\v 2 Rad lagy der nu anzir nu yap de̱ lat der, orzeꞌ bri̱ de̱ Filipos. Orzeꞌ zeꞌ gugy zi dey de̱ ya̱, nunu shiñ bicy nu dey de̱ ya̱. Tees Ñgyoozh blocyuub mi de̱ nu wanchib la de̱ pshaal la̱ de riidz nu sac ni Crisht lo der, mas zigy mbecy guay contr ne̱ de̱.  
\v 3 Gun walab nu rshaal de̱ riidz ni Ñgyoozh nu nac de̱ mbecy nu radza. Ni walab nu rshaal de̱ riidz nim par nu gad mod nu gyicy de̱ gan losa̱ꞌ. Ni walab nu rshaal de̱ riidz nim par nu gad mod nu gu̱u̱ de̱ losa̱ꞌ.  
\v 4 Orzeꞌ lugaar nu ni gyicy de̱, ca nu bicy Ñgyoozh de̱ par mbecy nu cyiiñ. Orzeꞌ bduꞌm riiñ ya̱a̱ de̱ nu shaala̱ riidz nu sac nim. Orzeꞌ ni mod rshaal de̱ de riidz zeꞌ. Walab nu gyicy de̱ mod nu gyet lagy mbecy, sinu gyicy de̱ mod nu gyet lagy Ñgyoozh, biñ nu rad lagy la na lardoo dela den.  
\v 5 Nap rad lagy der nu walab nu mne̱e̱ de̱ riidz nu cyit ziꞌl za lo der. Ni walab nu mne̱e̱ de̱ riidz par nu soow ñi lo gyel ye rzac ne̱ de̱. Ñgyoozh rad lagy mi nu ndeꞌ rishli.  
\v 6 Rila wanyub de̱ mod par nu gyicy zily ni tub la mbecy de̱ ya̱: ni de ru, ni reñaꞌ mbecy.  
\v 7 Mas yad ñi nu ne̱e̱ de̱ lo der nu gyabic der gyel mbecy ne̱ de̱, gun nac de̱ aposht ni Crisht, tees guc de̱ mbecy gugy na du̱ der. Bicy du̱ de ru gal nu ricy tub biñ mñaa nu de yu nguzh miꞌ nim.  
\v 8 Par nu nac nu dzi rca̱ de̱ de ru, bi bzu lily de̱ walab tub lo ziꞌl nu shaal de̱ de riidz nu dzi sac nu bruu lo Ñgyoozh, sinu niꞌ bzu lily de̱ nu gyicya̱ la ziꞌl coz nu rlagy ñi par nu glocyuub de̱ de ru nu nac nu tonaꞌ la rca̱ de̱ der.  
\v 9 Der bicy na, segur la yezaꞌ lagy der nu dzi fert bicy de̱ riiñ par nu gad coz nu da̱w de̱. Dzi rel la bicy de̱ riiñ par nu cueꞌ ñgyicy zeed de̱ ni tub la der lat nu rshaal de̱ de riidz nap nu bruu lo Ñgyoozh lat der. 
\p  
\v 10 De ru, nu Ñgyoozh rad lagy der nu de mod nu bicy du̱ de ru, mbecy nu ricy cup consuel lo Crisht, ndeꞌ tub mod nu nap, tub mod nu laab ñi, tub mod nu sac falt ni.  
\v 11 De ru rad lagy der nu bicy du̱ der gal nu ricy tub mbecy nu iꞌñ yu.  
\v 12 Bric de̱ baloor ni der. Bric de̱ consuel ni der. De̱ ya̱ zaab rne̱e̱ la̱ lo der nu chesar gal nu rlagy Ñgyoozh, biñ nu blo su de ru par nu gzac der lo gyel gubier nim, gal nu gyel lily nim. 
\p  
\v 13 Nu nac de ndeꞌ, zaab dric la̱ de̱ gras ni Ñgyoozh, gun ornu güeñ der de riidz nim nu byap shaal de̱ lat der, orzeꞌ “O” mnii der. Bicy der ñii par riidz ni Ñgyoozh, walab riidz ni mbecy ziꞌl, gun laab rishli riidz ni Ñgyoozh nac ñii. Gun Ñgyoozh ricy mi coz nap nañ lardoo de ru, mbecy nu ricy cup consuel lom. 
\p  
\v 14 Der bicy na, laabaꞌ coz nu bzac de ru laabaꞌ coz zeꞌ nu bzac de mbecy ni Ñgyoozh nu yuꞌ lo de yu ni Judea, de yu nu nac ni Jesucrisht. Pshet zi de mbecy Israeel de yu zeꞌ, laabaꞌ gal nu pshet zi de losaꞌr de ru.  
\v 15 De mbecy Israeel biit dey de yu nu mnii por cuen ni Ñgyoozh gulas, nunu biitaꞌ dey Shuaan den Jesucrisht, nunu pcyuu nu dey de̱ ya̱. De yu zeꞌ, wagyedzuꞌ lagy Ñgyoozh lo dey, nunu za dey contr ni dela mbecy.  
\v 16 Tees ornu rlagy de̱ ne̱e̱ lo de mbecy nu walab mbecy Israeel, par nu niꞌ gruu mbañ dey, bicy pee dey nu ncay ne̱ de̱ nu cueꞌ ni ñgyicy de̱. Orzeꞌ ni mod bicy dey nu psaꞌ la dey suuy nu nac cyi. Orzeꞌ na Ñgyoozh bi bzeed mi cashtig nim too dey. 
\s1 Baly ngu lagy yu ñgya güiiy de mbecy Tesalónica 
\p  
\v 17 Der bicy na, ornu blaꞌ losaꞌ den tub tiem, mas wansac de̱ de ru, tees nañ lardo̱o̱ de̱ rniiñ nu yuꞌ der, nunu tonaꞌ la bloo lo̱ de̱ nu yuba̱ mod nu gzaca̱ de ru lo nu loo la.  
\v 18 De̱ ya̱ ngulagya̱ nyapa̱ lo der. Nunu ub la ya̱, Baly, bicy pe̱e̱ nyapa̱ lo der zañ tir. Tees nuras wansaan yu.  
\v 19 Gun ¿cyu ñuu gyicy nu yet lagy de̱? ¿Cyu ñuu gyicy nu nap zu lagy de̱ benu walab de ru ornu cyid Shuaan den Jesucrisht tuubaꞌ tir?  
\v 20 Gun laab nu nac de ru nap zu lagy de̱, nunu yet lagy de̱. 
\c 3  
\p  
\v 1 Na ornu wangagye̱e̱ de̱ nu ricy la añ ne̱ nu gzaca̱ der, orzeꞌ mnii to̱o̱ de̱ nu gyiyeeñ ga̱ de̱ ub zi̱ gyedz Atenas.  
\v 2 Orzeꞌ bzuu neza̱ biicy na Timoteo nu cyid yu lo der. Yu zeꞌ tub yu nu ricy riiñ ni Ñgyoozh ornu rshaal yu de riidz nap ni Crisht. Bzuu nez de̱ yu zeꞌ nu cyid güiiy der, gun locyuub yu de ru nu fert zir gyicy cup ru consuel lo Crisht, nunu cuic yu baloor ni der nu nac mi.  
\v 3 Gun orzeꞌ cueꞌ checa ni tub la der nu ricy cup ru consuel lo Crisht nu nac nu rzac zi der zeꞌ. Tees laab de ru rad lagy der nu rlagy ñi nu gzac den de coz zeꞌ.  
\v 4 Gun lat nu gabee rcyiiñ de̱ lat der, tiem bi mne̱e̱ de̱ lo der nu gzac zir, nunu de ru gud lagy der nu gal nu mne̱e̱, ni guuc ñi.  
\v 5 Ndeꞌ nu ornu ya̱ wangagye̱e̱ ga̱ꞌ, orzeꞌ bzuu neza̱ Timoteo nu biid yu lo der, gun orzeꞌ cugyiꞌy lo der ben a nap ricy cup der consuel lo Crisht. Gun ya̱ gudziba̱ nis yub nuras mod nu shiñ gyicy nuy de ru. Gun benu ni, orzeꞌ leew la bicy de̱ riiñ ni Ñgyoozh lat der. 
\p  
\v 6 Na Timoteo bi briy nu bruuy lo der. Bri nuy de raso̱o̱ nap nu ricy cup der consuel lo Crisht, nunu rca der losaꞌr. Mniiy nu dub laa tiem nap ca ic der nu nac de̱ ya̱. Nunu mniiy nu gal nu de̱ ya̱ rlagy de̱ nu gzaca̱ de ru, niꞌ ziꞌl de ru rlagy der nu gzac der de̱ ya̱.  
\v 7 Ndeꞌ nu der bicy na, de ru briic der baloor ne̱ de̱ lat nu deet bzac de̱, nunu bzac zi̱ de̱. Briic der baloor ne̱ de̱ nu nac nu dzi fert ricy cup der consuel lo Crisht.  
\v 8 Nunu nu nac nu fert ricy cup der consuel lo Shuaan den Jesuuz, ndeꞌ nu yet lagy de̱ yu̱ꞌ gyishlombecy ii. 
\p  
\v 9 Na tonaꞌ la dric de̱ gras ni Ñgyoozh nu nac de ru, nunu dric de̱ gras nim, gun ricy mi nu tonaꞌ la yet lagy de̱ nu nac der.  
\v 10 Dzi rel la rdiñ de̱ lom nu zaan mi nu yap güi̱i̱ de̱ der lo nu loo la. Orzeꞌ gric de̱ la ziꞌl coz nu gabee ricy falt ni der par nu gyafert zir gyicy cup der consuel lo Crisht. 
\p  
\v 11 Rlagy de̱ nu Ñgyoozh Uz den, gal nu Shuaan den Jesuuz locyuub mi de̱ ya̱ nu gad tub mod nu yap güi̱i̱ der.  
\v 12 Nunu rlagy de̱ nu gyicy Shuaan den Jesuuz nu dzi zir ca der losaꞌr gal nu dela deꞌ zir de mbecy. Rlagy de̱ nu ca der losaꞌr gal nu de̱ ya̱ rca̱ de̱ de ru.  
\v 13 Rlagy de̱ nu gyicy fert mi der nañ lardoor, nunu rlagy de̱ nu gac der mbecy cacy, gal nu mbecy nu sac falt ni par lo Ñgyoozh, Uz den, ornu cyid Shuaan den Jesucrisht tuubaꞌ tir nu dela mbecy nu nac nim. ¡Laab ni gac ñii! 
\c 4  
\s1 Mod nu rlagy Ñgyoozh nu chesa mbecy 
\p  
\v 1 Na der bicy na, como de̱ ya̱ nac de̱ mbecy nu rnii por cuen ni Shuaan den Jesuuz, rnishba̱a̱ de̱ lo der, nunu du̱ꞌ de̱ riiñ yaa der nu zaab chesa lar mod nu blyu̱u̱ de̱ ni der, tub mod nu ganap lagy Ñgyoozh, gal nu bi ricy der na.  
\v 2 De ru bi rad lagy der de coz nu mnii Shuaan den Jesuuz nu blyu̱u̱ de̱ ni der.  
\v 3 Ñgyoozh rlagy mi nu chesa der mod ni mbecy nu sac falt ni. Nunu rlagy mi nu cueꞌ gal ni tub la der mbecy nu wanchelaar.  
\v 4 Tub ga la der rlagy ñi nu gad lagy der lac mod gyicy nur mñaar. Gyicy nur ñii tub mod nu nap par lo Ñgyoozh, gal nu mod nu seꞌñ.  
\v 5 Cueꞌ nu nii toor nu gyicy ru tub mod nu a̱ꞌ yad ñi nu gyicy ru nur ñii, gal nu ricy de mbecy nu a̱ꞌ yuꞌ lo Ñgyoozh.  
\v 6 Orzeꞌ ni tub la mbecy walagy ñi gyicy ras nuy bicy yu nu nac Crisht. Ni walagy ñi nu gyicy yu gan losaꞌy nu nac asunt ni biñ mñaa. De̱ ya̱ bi bdo̱o̱ de̱ rishlo der nu Ñgyoozh cuic mi cashtig ni de mbecy nu ni ricy.  
\v 7 Gun Ñgyoozh wansum de ub na nu gac naa mbecy nu ral losaꞌ nu wanchelaa, sinu bzum de ub na nu gac naa mbecy cacy.  
\v 8 Orzeꞌ cyu ziꞌl mbecy nu washet ic nu gyicy gal nu rdunii ii, yu zeꞌ walab nu wacshet ic yu de coz nu rnii mbecy ziꞌl, sinu washet ic yu nu gyicy yu de coz nu rnii Ñgyoozh, biñ nu rbic Espiriit Yon nim ni den. 
\p  
\v 9 Walagy ñi zeeda̱ gyicy lo der par nu gad lagy der nu car de bicy ru nu nac Crisht, gun laab Ñgyoozh bi blyuum ni der nu ca tub ca tub ziꞌl der losaꞌr.  
\v 10 Tees ni bicy der nu dela de bicy na nu yuꞌ lo de yu ni Macedonia. Ndeꞌ nu der bicy na, de̱ ya̱ rnishba̱a̱ de̱ lo der nu tub dzi ga pca zir der losaꞌr.  
\v 11 Bicy der nu nap chuꞌr nu losaꞌr. Nunu cueꞌ neꞌ ruꞌ der lat asunt ni mbecy. Nunu zaab bicy la der riiñ nu gad nu gow der. De ndeꞌ riiñ nu bduꞌ de̱ yaa der anzir.  
\v 12 Ni mod bicy der, gun orzeꞌ ca lagy de mbecy nu walab mbecy ni Crisht lo der, nunu orzeꞌ wayicy falt ni tub la coz ni der. 
\s1 Cyid Jesucrisht tuubaꞌ tir 
\p  
\v 13 Der bicy na, walagy de̱ nu gac der mbecy nu shtee la nu nac coz nu gzac de mbecy nu bi gut, gun orzeꞌ cueꞌ nu gyicy shni der gal nu ricy de mbecy nu wacyish lo nu gyabañ.  
\v 14 Gun de ub na rzeña lagy den nu Jesuuz gut mi, nunu byabañ mi. Nunu ndeꞌ nu Ñgyoozh gyicy mi nu cyid Jesuuz tuubaꞌ tir. Cyid num de yu nu bi gut nu bicy cup consuel lom. 
\p  
\v 15 Na ne̱e̱ lo der gal nu blyuu Shuaan den Jesuuz ne̱ de̱. De mbecy nu yuꞌ lat den nu gabee mbañ ornu shuub dzi nu cyid Shuaan den Jesuuz tuubaꞌ tir, waya ga dey lo par de yu nu bi gut.  
\v 16 Gun gzab tiꞌ nu rbish ti, nunu gnii anc zub lo, nunu dulaa trompet ni Ñgyoozh. Orzeꞌ laab Shuaan den Jesuuz gruum gal gyibaa gyet gash mi. Orzeꞌ nu loga la de mbecy nu bicy cup consuel lo Crisht gyabañ dey.  
\v 17 Orzeꞌ despuees de yu nu gabee mbañ gyes nañ dey lo bi tublaazh la nu de yu nu byabañ zeꞌ. Gya dey lat za. Gun orzeꞌ dzeel den Shuaan na Jesuuz baa. Orzeꞌ cyiiñ du den mi tub la.  
\v 18 Orzeꞌ briic der baloor ni losaꞌr nu nac de riidz ii. 
\c 5  
\p  
\v 1 Der bicy na, walagy ñi zeeda̱ tub gyicy lo der nu nac nu la dzi o la or gac de coz zeꞌ,  
\v 2 gun de ru nap rad lagy der nu dzi nu cyid Shuaan den Jesuuz tuubaꞌ tir cyid ñi gal nu ryiid tub gubaan rel.  
\v 3 Ornu gnii de mbecy: “Sac la gyel deet. Ri zu”, orzeꞌ sij la ruꞌña gyel zi lo dey. Sij la gzac dey gal nu rzac tub biñ mñaa ornu bi gaal mi mdoo. Wadaꞌ la mod nu ruu chu dey loñ. 
\p  
\v 4 Der bicy na, de ru walab nu na der gal nu na de mbecy nu rded zeꞌ nu cow, nunu dzi nu cyid Shuaan den tuubaꞌ tir, ndeꞌ wac ñi nu largut la der gal ricy tub gubaan.  
\v 5 Dela de ru na der gal nu na mbecy nu rded zeꞌ nu yuꞌ yaa. Na der gal nu na mbecy nu rded orwidoo. Walab nu na der gal nu na mbecy nu rded rel o zeꞌ nu cow.  
\v 6 Ndeꞌ nu walagy ñi nu gac den gal nu na de mbecy nu nas, gal nu ricy deꞌ zir mbecy, sinu rlagy ñi nu zu ga lagy den, nunu gzu den altant.  
\v 7 De mbecy nu raas, raas dey rel. Nunu de mbecy rzugy, rel rzugy dey.  
\v 8 De ub na nac naa mbecy nu rded or widoo. Orzeꞌ rlagy ñi nu gzu den altant. Gun benu gyicy cup der consuel lo Ñgyoozh nu nac nu rca der mi, orzeꞌ ndeꞌ nañ gal nu na tub cyug nu rsoow too der, gun cueꞌ nu gad güii too der.  
\v 9 Gun Ñgyoozh wansum den par nu chan lo cashtig nim, sinu bzum den par nu gruu mbañ naa nu nac Shuaan den Jesucrisht.  
\v 10 Jesucrisht gut mi par nu nac de ub na, gun orzeꞌ mas cui mbañ na, o mas gat na, tees gyan cyiiñ dun mi.  
\v 11 Ndeꞌ nu briic der baloor ni losaꞌr, nunu blocyuub losaꞌ der nu gyafert yu gal nu bi ricy der na. 
\s1 Baly rlocyuub yu de mbecy 
\p  
\v 12 Der bicy na, de̱ ya̱ rnishba̱a̱ de̱ lo der nu ca lagy der lo de yu nu ricy riiñ ni Crisht lat der, de yu nu riib ic, de yu nu rshuu nu de ru.  
\v 13 Rlagy ñi ca lagy der loy, nunu ca der yu nu nac de riiñ nu ricy dey. Nap guꞌ nu der losaꞌr. 
\p  
\v 14 Der bicy na, de̱ ya̱ rnishba̱a̱ de̱ lo der nu niir lo de mbecy sed nu cueꞌ gazed dey. Briic der baloor ni de mbecy dzidz. Nunu blocyuub der de mbecy shni. Bicy cup der pase̱z nu dela mbecy. 
\p  
\v 15 Rila cueꞌ gyicy gal ga der. Sinu dub laa tiem bloo lo der nu nap gyicy nu der losaꞌr, nu dela de mbecy. 
\p  
\v 16 Dub laa tiem bicy der nu zu cyit lagy ru.  
\v 17 Zaab mnii nu la der Ñgyoozh.  
\v 18 Briic der gras ni Ñgyoozh mas la ziꞌl coz nu rzac der, gun ndeꞌ coz nu rlagy mi nu gyicy der gyiꞌ nu nac der mbecy ni Crisht. 
\p  
\v 19 Cueꞌ gyicy der nu checa Espiriit Yon ni Ñgyoozh nu gyicy mi riiñ lat der.  
\v 20 Nunu cueꞌ gyicy zet lagy der lo de riidz ni Ñgyoozh nu rshaal dey lat der.  
\v 21 Gush der shcab nu nac ñii ben a rishli. Orzeꞌ “O” mnii der ni de riidz nap,  
\v 22 tees bzu chu der de lo la de coz a̱ꞌ nap zeꞌ. 
\p  
\v 23 Orzeꞌ Ñgyoozh, biñ nu rbic gyel ri zu nañ lardoon, gyicy mi nu de mod la gac der mbecy cacy, nunu gyicy mi nu dela lugaar ni der sac falt niñ ornu cyid Shuaan den Jesucrisht tuubaꞌ tir: gazaꞌ espiriit ni der, gal nu lardoo der, gal nu cuerp ni der. Delañ sac falt niñ.  
\v 24 Orzeꞌ segur la ni gyicy Ñgyoozh, biñ nu bzu der nu gac nim, gun dub laa tiem mi zeꞌ ricy paam. 
\s1 Baly rnii nuy dey ñgyoozh 
\p  
\v 25 Der bicy na, niꞌ ziꞌl bdiiñ der lo Ñgyoozh nu nac de̱ ya̱. 
\p  
\v 26 Dela der mnii ñgyoozh nu rishnap nu de bicy ru nu nac Crisht. 
\p  
\v 27 Ya̱ rnishba̱a̱ lo der por cuen ni Shuaan den Jesucrisht nu lab der lo gyicy ii lo dela de bicy na. 
\p  
\v 28 Shuaan den Jesucrisht gyicy mi faboor nu nap gyicy num der.