\id 1PE  
\h 1 San Pedro 
\toc1 1 San Pedro Gyicy loga nu bzeed Bed lo de mbecy Israeel nu brushlas 
\toc2 1 San Pedro 
\toc3 1 P. 
\mt1 1 San Pedro 
\mt2 Gyicy loga nu bzeed Bed lo de mbecy Israeel nu brushlas 
\c 1  
\s1 Bed zeed yu ñgyoozh ni de mbecy Israeel 
\p  
\v 1 Ya̱ Bed, tub aposht ni Jesucrisht, zeeda̱ gyicy ii lo de ru mbecy Israeel nu bruu ledz nu za cyiiñ reñaꞌ gyedz. Rcyiiñ der lo de yu ni Ponto, gal nu lo yu ni Galacia, gal nu lo de yu ni Capadocia, gal nu lo de yu ni Asia, gal nu lo de yu ni Bitinia. Dela lugaar zeꞌ yuꞌ der.  
\v 2 De ru nac der mbecy nu pcui Ñgyoozh gulas, gun ndeꞌ coz nu rlagy ub mi. Espiriit Yon nim bzu chum der par nu gzuub gyidag der ni Jesucrisht, nunu bicy mi nu byecy cyi der nu nac reñ Jesucrisht. 
\p Ñgyoozh gyicy mi faboor nu ded ruꞌ gaꞌ la nap gyicy num de ru, nunu gyicy mi nu cheti ri añ ni der. 
\s1 Gad nu grish lo den 
\p  
\v 3 Gyabic den gyel mbecy ni Ñgyoozh Uz Shuaan den Jesucrisht, gun par nu nac nu tonaꞌ la rashni lagy mi de ub na, ndeꞌ nu bicy mi nu byac den mbecy cub nu nac nu byabañ Jesucrisht, nunu ndeꞌ gyicy ñi nu rishli gad nu grish lo den.  
\v 4 Ndeꞌ nu grish lo den nu cuic mi gyel nap nu bduꞌ choow mi gyibaa par de ub na, de coz nu wac nit lo, ni watop ñi, ni waziñ.  
\v 5 Ñgyoozh zaab ic mi der nu nac nu rac ricy mi coz ily nu nac nu ricy cup der consuel lom. Ni gyicy mi, gun orzeꞌ gad nu gruu mbañ der gal nu psaꞌ lagy mi. Nunu laab Ñgyoozh gyicy mi nu yet lag der cuen lac mod co mbañ mi der ornu bi yad nu gyaꞌ lo tiem. 
\p  
\v 6 Par nu nac ndeꞌ, orzeꞌ tonaꞌ la gyet lagy der. Nomaas tub tiem zi galagy ñi nu gyicy shni der nu nac nu gzac der zañ lo coz deet.  
\v 7 Consuel nu ricy cup der lo Crisht, ndeꞌ nañ gal nu na or. Na or zeꞌ chañ lo gyi, mas nit lo lañ, gun orzeꞌ gabe ben a rishli nac ñii or nap. Niꞌ ziꞌl ornu gzac deet der, orzeꞌ gabe ben a rishli ricy cup der consuel lo Crisht. Nunu consuel zeꞌ sac zir ñi gazeꞌ or. Benu gabee ricy cup der consuel lo Crisht ornu ded ni nu gzac deet der, orzeꞌ Ñgyoozh gyabic mi gyel mbecy ni der, nunu gyicy mi nu gyac der mbecy nu lily na, nunu griib zily mi de ru. Ni gyicy der ornu gruu zac Jesucrisht tuubaꞌ tir. 
\p  
\v 8 De ru rca der Jesucrisht mas nigul zac der mi. Nunu ricy cup der consuel lom mas wac zac der mi na. Orzeꞌ gucyit lagy der tub mod nu tonaꞌ la coz ily. Tub mod nu druu gal gyibaa. Ni wagacaꞌ cuic der raso̱o̱ de riidz ni de coz nu rzac ru.  
\v 9 Gun par nu nac nu guud nu bruu mbañ der, orzeꞌ ndeꞌ nu ricy cup der consuel lom. 
\p  
\v 10 Orzeꞌ gulas de yu nu mnii por cuen ni Ñgyoozh nap tonaꞌ la psyaꞌ dey nu byub yu de zeꞌ nu rniiñ ni de riidz nu gruu mbañ de mbecy. Nunu bzat dey de coz nu gyicy Ñgyoozh faboor num de ru nu cuic mi ni der.  
\v 11 Orzeꞌ Espiriit ni Crisht bicy mi nu gud lagy de yu zeꞌ de coz nu gzac zim, gal nu de gyel lily nim nu gruu zac despuees. Ndeꞌ tonaꞌ la gulas gud lagy dey. Nunu bicy pee dey nu ñgyad lagy yu cyu mbecy ndeꞌ. Nunu bicy pee dey nu ñgyad lagy yu la tiem gac de coz nu mnii Espiriit ni Crisht, biñ nu bicy cup dey nañ lardooy tiem zeꞌ.  
\v 12 Tees Ñgyoozh bicy mi nu guud lagy dey riidz nu mniiy. Ndeꞌ walab par de ub yu, sinu ndeꞌ par de ub na. De riidz zeꞌ, ndeꞌ riidz nu güeñ der ornu mnii de yu nu rshaal de riidz nu sac ni Crisht nu nac Espiriit Yon ni Ñgyoozh, biñ nu bruu gal gyibaa. ¡Nunu mas gashtal de anc ngulagy dey nu ñgyet lag yu cuen lac yaruu de riidz zeꞌ! 
\s1 Ñgyoozh bzum de ub na nu chesan tub mod nap 
\p  
\v 13 Ndeꞌ nu bzu der altant, nunu byub ic der ub ru tub mod nu nap. Brish lo nap la der lo de coz nap nu cuic Ñgyoozh ni der ornu gruu zac Jesucrisht tuubaꞌ tir.  
\v 14 Bicy der gal nu rlagy ñi como nac der iꞌñ Ñgyoozh. Nunu bzuub gyidag der nim. Nunu cueꞌ gyicy der de coz a̱ꞌ nap nu druu nañ lardoor, gal nu bicy der anzir nu chuꞌ lo der mi.  
\v 15 Lugaar nu gyicy der de coz a̱ꞌ nap zeꞌ, orzeꞌ bicy der mod nu nap par lo Ñgyoozh. Gun Ñgyoozh, biñ nu bzu de ru nu gac nim, mi zeꞌ nac mi biñ yon.  
\v 16 Ñgyoozh nam lat de riidz nim: “Guc der mbecy nu wagyicy cyi, gun ya̱ wagyicya̱ cyi”, nam. 
\p  
\v 17 Ñgyoozh gri beem ni tub ga la de mbecy dub gal nu na coz nu ricy dey, nunu walab nu reñ ga la mod gyicy mi num tub ga mbecy. Como de ru “Uza̱”, rnii der lo Ñgyoozh, ndeꞌ nu rlagy ñi nu ca lagy der lom dub laa tiem lat nu yuꞌ der gyishlombecy ii.  
\v 18 Ñgyoozh bi bloo nap mi de ru lat de mod wancyiiñ nu pcyiiñ der gulas, de mod nu bzeeñ de gyitoo bel ni der. Na de ru nap rad lagy der la be la yuꞌ lo mod nu bloo mbañ mi der. Walab nu coz nu ded ni briish mi. Ni walab nu briish mi nu or. Ni walab nu briish mi nu plat.  
\v 19 Sinu briish mi nu reñ Crisht nu dzi sac. Mi zeꞌ guc mi gun lo Ñgyoozh. Guc mi gal nu na tub shily nu rila sac falt ni.  
\v 20 Crisht nil bi ca lo cuen nim nu ni zac mi nese anzir nu saꞌ lagy Ñgyoozh gyishlombecy. Tees na nu bi yad lazh tiem bruu zac mi par nu locyuub mi de ru.  
\v 21 Zeꞌ na nu nac Crisht, de ru ricy cup der consuel lo Ñgyoozh, biñ nu bicy nu byabañ mi. Nunu briic mi gyel lily nim ni Iꞌñ mi. Ndeꞌ nu de ru ricy cup der consuel lo Ñgyoozh, nunu rgyish lo der lom. 
\p  
\v 22 Zeꞌ na ornu de ru bzuub gyidag der de riidz nu rishli ni Crisht, orzeꞌ byecy dela cyi der. Gun orzeꞌ rishli gaal ca tub ca tub ziꞌl der losaꞌr nu dutuub la lardoor, gal nu dela fers ni der.  
\v 23 Tees de ru na der gal nu na mbecy nu bi gul tuubaꞌ tir. Na walabaꞌ nu gul der nu nac mbecy nu yuꞌ gyishlombecy ii, de yu nu ca lo cuen nu gat, sinu gul der nu nac de riidz ni Ñgyoozh. Riidz zeꞌ nim gyicy ñi nu cui mbañ mbecy, nunu gzuñ par dub laa tiem.  
\v 24 Gun lat de riidz ni Ñgyoozh rniim: 
\q1 Dela mbecy na dey gal nu na gyish. 
\q1 Zeꞌ gyel lily ni dey, ndeꞌ nañ gal nu na gyee ni gyish. 
\q1 Gyish zeꞌ, ndeꞌ chawach ñi. 
\q1 Zeꞌ gyee, ndeꞌ glag ñi. 
\q1  
\v 25 Tees de riidz ni Shuaan den, ndeꞌ gzuñ par tub la. 
\m Ni rnii de riidz ni Ñgyoozh. De riidz nu rzat ñi zeꞌ, ndeꞌ riidz nu sac ni Crisht nu rshaal de̱ lo de ru. 
\c 2  
\p  
\v 1 Ndeꞌ nu blaa yaa der de lo la coz a̱ꞌ nap nu ricy der. Rila cueꞌ guu der. Nunu cueꞌ gac der mbecy rzuu lo. Nunu cueꞌ gasaap lagy der. Nunu rila cueꞌ gzat zi der losaꞌr.  
\v 2 Guc der gal nu na mdoo nu sa gul. Bicy der nu cuigy ru lech du ub nu cyiiñ par espiriit ni der, gun orzeꞌ nu nac ndeꞌ gal shcab ni der par nu gruu mbañ ru.  
\v 3 Gun rishli gaal de ru bi gud lagy nap la der nu Ñgyoozh Shuaan den dzi nap mi. 
\s1 Crisht nam gal na gyitaꞌ nu rbic gyel mbañ 
\p  
\v 4 Ndeꞌ nu bechaꞌ der lo Shuaan den Jesuuz, gun mi zeꞌ nam gal nu na tub gyitaꞌ nu mbañ. Orzeꞌ de mbecy guzii dey nu wacyiiñ gyitaꞌ zeꞌ. Orzeꞌ mneꞌ dey ñii. Tees par Ñgyoozh, ndeꞌ tub gyitaꞌ nu bducui. Nunu nac ñii gyitaꞌ nu dzi sac.  
\v 5 Orzeꞌ ni mod bicy der nu gac ru gal nu na gyitaꞌ zeꞌ. Orzeꞌ Espiriit Yon nim gash mi de ru par nu shup mi yuꞌ wedz nim. Orzeꞌ nañ yuꞌ wedz zeꞌ gac der uz par nu gyicy der riiñ ni ub ziꞌl mi. Orzeꞌ nu nac Jesucrisht cuic der gun lo Ñgyoozh, de gun nu rnii Espiriit Yon nim nu cuic der. Ndeꞌ gun nu gyedzuꞌ lagy mi.  
\v 6 Ndeꞌ nu niꞌ ziꞌl rniiñ lat de riidz ni Ñgyoozh: 
\q1 Ya̱ grisha̱ tub gyitaꞌ Sión gyedz ni Ñgyoozh. 
\q1 Ndeꞌ nac ñii tub gyitaꞌ nu ricy zir ñi presis. 
\q1 Ndeꞌ tub gyitaꞌ nu ya̱ pcui̱ nu gac ñii gyitaꞌ nu dzi sac. 
\q1 Cyu ziꞌl mbecy nu gyicy cup consuel lo biñ nu nac gyitaꞌ zeꞌ, 
\q1 orzeꞌ de mbecy zeꞌ waruu toꞌ loy, 
\m na Ñgyoozh lat de riidz nim. 
\p  
\v 7 Par de ru mbecy nu ricy cup consuel lo biñ nu nac gyitaꞌ zeꞌ, orzeꞌ mi zeꞌ tonaꞌ la ricy ñi presis par de ru, tees par de mbecy nu wagyicy cup consuel lom, orzeꞌ gyuꞌ niñ gal nu rniiñ lat de riidz nim. Orzeꞌ rniiñ: 
\q1 Gyitaꞌ nu mneꞌ biryu, 
\q1 ndeꞌ byac ñi gyitaꞌ nu ricy zir ñi presis, 
\m rniiñ. 
\p  
\v 8 Zeꞌ tuubaꞌ lugaar rniiñ: 
\q1 Ndeꞌ tub gyitaꞌ nu gyicy ñi nu glagy gyiꞌ mbecy. 
\q1 Nunu gyicy ñi nu gyes saa dey, 
\m rniiñ lat de riidz ni Ñgyoozh. De mbecy zeꞌ glagy gyiꞌ dey nu nac nu wacsuub gyidag yu ni riidz nim. Ndeꞌ tub coz nu bi ca lo cuen nu ni gzac dey. 
\p  
\v 9 Zeꞌ de ru nac der mbecy nu pcui Ñgyoozh nu gac famil nim. Nac der uz nu zu riiñ lo Ñgyoozh, biñ nu nac rey ni den. Nac der tub nac mbecy nu nac ni Ñgyoozh. Nac der de mbecy zeꞌ, gun orzeꞌ gzat der de coz ily nu ricy mi. Mi zeꞌ biñ nu pcui de ru par nu gruu der zeꞌ nu cow, gun orzeꞌ chuꞌ der zeꞌ nu yuꞌ yaa nu tonaꞌ la cyit zu.  
\v 10 De ru a̱ꞌ nac der mbecy ni Ñgyoozh gulas. Zeꞌ na nac der mbecy nim. Gulas wangashni lagy Ñgyoozh de ru. Tees na rashni lagy mi der. 
\s1 Yuꞌn gyishlombecy par nu gyicy na coz nu rlagy Ñgyoozh 
\p  
\v 11 Ya̱ rnishbaa lo der bicy na nu dzi rca̱, bicy der gal nu ricy mbecy nu walab mbecy guledz. Cueꞌ shet ic der nu gyicy ru de coz a̱ꞌ nap nu druu nañ shcab nir, gun de coz zeꞌ zañ contr ni espiriit nir.  
\v 12 Nap bicy der lat de mbecy nu a̱ꞌ yuꞌ lo Ñgyoozh, gun orzeꞌ mas griib dey cyi fals too der nu nii dey nu nac der mbecy shiñ ricy, tees ornu gad lagy dey de coz nap nu ricy der. Orzeꞌ gyabic dey gyel mbecy nim ornu cyid mi tuubaꞌ tir. 
\p  
\v 13 Orzeꞌ par nu nac Shuaan den Jesucrisht “O” mnii der ni dela mbecy nu nac fushtiz gyishlombecy ii. Gazaꞌ yu nu riib ic de nasyoong, “O” mnii der nu zuub gyidag ru niy, gun yu zeꞌ zuy riiñ ily par deꞌ zir dey.  
\v 14 Niꞌ ziꞌl “O” mnii der ni yu nu riib ic por cuen ni gubier, gun yu zeꞌ bdugyiy riiñ par nu cuic yu cashtig ni de mbecy nu shiñ ricy, nunu par nu gyabic yu gyel mbecy ni de mbecy nu nap ricy.  
\v 15 Gun Ñgyoozh rlagy mi nu nap gyicy der, gun orzeꞌ de mbecy nu wagad lagy, gal nu de mbecy ton, wad la ruꞌ dey nu niiy nu chay contr ni der. 
\p  
\v 16 Bicy der gal mod nu ricy mbecy nu riib ic ub. Mas riib ic der ub ru, tees cueꞌ cuic der lugaar ni ub ru nu gyicy ru coz a̱ꞌ nap. Sinu bicy der tub mod nu nap zir par nu nac der mbecy nu ricy coz nu rlagy Ñgyoozh.  
\v 17 Bicy der mod nu rabee nu rca lagy der lo dela mbecy. Pca der de bicy ru nu nac Crisht. Nunu nap pca lagy der lo Ñgyoozh. Nunu pca lagy der lo yu nu riib ic de nasyoong. 
\s1 Rlagy ñi nu gagyen nu gzac zin gal nu gugyee Crisht 
\p  
\v 18 De ru moz nu ricy riiñ ni mbecy, rlagy ñi nu “O” nii der ni patro̱o̱ nir nu rca lagy der loy. Cueꞌ nu tub lo ziꞌl nu nap gyicy der nu de yu nu nap ricy, gal nu nu de yu nu gugy na, sinu niꞌ ziꞌl gyicy der nu de mbecy a̱ꞌ nap.  
\v 19 Gun ndeꞌ tub coz nap ornu tub mbecy ragyeey nu rzac ziy ornu sac falt niy nu nac nu rad lagy yu nu ndeꞌ coz nu rlagy Ñgyoozh.  
\v 20 Tees benu cuic dey cashtig ni der nu nac nu shiñ ricy ru, orzeꞌ se la la cyiiñ ñi mas gagye der nu pase̱z. Zeꞌ benu zac zi der nu nac de coz nap nu ricy ru, nunu benu gagyer looñ nu pase̱z, orzeꞌ ndeꞌ coz nap par lo Ñgyoozh.  
\v 21 Gun Ñgyoozh bzum de ru par nu gagye der lat de tiem nu gzac zir, gun Crisht bzac zim nu nac de ru. Nunu blyuum ni der lac mod gyicy ru, gun orzeꞌ gyicy der gal nu bicy mi.  
\v 22 Crisht wangyicy mi ni tub la cyi. Ni wanguum ni tub la mbecy.  
\v 23 Ornu gugy zi mbecy mi, orzeꞌ rila wanniim ni tub riidz. Ni wantush cyam riidz nu tañ za lo dey ornu pted zi dey mi, sinu bduꞌm ñii yaa Ñgyoozh, biñ nu ri bee mod nu seꞌñ.  
\v 24 Laab ub la Crisht, lat nu pcam lo cruuz nu cuerp la nim, orzeꞌ za num dela cyi den, gun orzeꞌ de ub na nan gal nu na mbecy gut par lo de cyi. Orzeꞌ cyiiñ den gyishlombecy par nu gyicy na de coz nu seꞌñ. Crisht gud güiim, gun orzeꞌ de ru gruu nap der.  
\v 25 Gun de ru gusa der gal nu gusa shily bduneꞌ. Tees na bi bish cya der brir lo Crisht, gun orzeꞌ mi zeꞌ ñam de ru gal nu rña tub mbecy shily niy, nunu ca laa lom lo den. 
\c 3  
\s1 Mod nu rlagy ñi nu gyicy de mbecy nu zu losaꞌ 
\p  
\v 1 Na de ru biñ mñaa, niꞌ ziꞌl rlagy ñi nu “O” nii der ni ñgyeer, gun benu nac yu mbecy nu wagyicy cup consuel lo de riidz nu sac ni Crisht, orzeꞌ ornu gzac yu de mod nap nu ricy der, orzeꞌ dzi ga guugy lardooy. Orzeꞌ gyicy cup yu consuel. Orzeꞌ ni walagy ñi nu niir ni tub la riidz,  
\v 2 gun ornu gzac yu nu nap ricy der, nunu ca lagy der lo Ñgyoozh, orzeꞌ guugy lardooy.  
\v 3 Nunu cueꞌ cyish lo der lo coz nu rabee par ich nu gyacyit nar. Ni walagy ñi nu ti lacaꞌ la gyicy nu der gyich toor. Ni walagy ñi nu zaab der bec or de lugaar ni cuerp nir. Ni walagy ñi nu zu der negy nu dzi ñgyup sac.  
\v 4 Nap zir nu bicy der nu nac ru mbecy cyit na nu nac mod nu na nañ lardoo der. Na benu gugy na der, nunu benu rag ziꞌl zu lagy der nañ lardoor, orzeꞌ ndeꞌ nañ gal nu na bec cyit na nu rila waded ni. Nunu ndeꞌ tub coz nu tonaꞌ la sac par lo Ñgyoozh.  
\v 5 Ni mod bicy de biñ mñaa ni Ñgyoozh nu guꞌ gulas par nu bicy mi nu nap rabeem. De mi zeꞌ bicy cup mi consuel lo Ñgyoozh, nunu bicy paa dem nu ñgyeem.  
\v 6 Ni mod bicy Sara. Bzuub gyidag mi ni ñgyeem, Abraham. Orzeꞌ rniim rab mi yu “Shi Abraham”, rniim. Orzeꞌ na de ru nac der mbecy nu rsyaꞌ lo Sara benu nap ricy der, nunu benu wacchib lagy la der lo ni tub la coz. 
\p  
\v 7 Na de ru yu gyeey, pcyiiñ nu der mñaar tub mod nu raso̱o̱, nunu pca lagy der lom, como ta zir na de biñ mñaa gazeꞌ de ru. Gun niꞌ de mi zeꞌ cuic Ñgyoozh nu cui mbañ mi gal nu cuic mi nu cui mbañ de ru. Ni mod bicy der, gun orzeꞌ gad mod nu nii nu der Ñgyoozh gal nu rlagy ñi. 
\s1 Nu nac coz nap nu ricy mbecy, orzeꞌ rzac ziy 
\p  
\v 8 Laab nii la de riidz nu ne̱e̱ lo der. Rlagy ñi nu nap chuꞌ dela der nu losaꞌr. Nunu rlagy ñi nu gyicy der tub ziꞌl shcab. Nunu pca der de losaꞌr gal nu rlagy ñi nu gyicy de mbecy nu de bicy yu. Nunu guc der mbecy gugy na. Nunu bicy shni der ub ru.  
\v 9 Cueꞌ shiñ gyicy nu der mbecy nu shiñ ricy nu de ru. Ornu rab zi mbecy der cueꞌ gab zir yu. Lugaar nu gyicy gal gar, orzeꞌ nap zir nu nap bicy nuy, gun Ñgyoozh bloo sum de ru par nu nap gyicy num der.  
\v 10 Gun lat de riidz ni Ñgyoozh rniiñ: 
\q1 Benu ca na mbecy yet lagy yu nu cyiiñ yu gyishlombecy ii, 
\q1 nunu benu rlagy yu nu gusht cyiiñ yu, 
\q1 orzeꞌ rlagy ñi nu cueꞌ shiñ niiy, 
\q1 nunu cueꞌ niiy riidz rguu. 
\q1  
\v 11 Bruu chu der lo de coz a̱ꞌ nap. 
\q1 Orzeꞌ bicy der coz nap. 
\q1 Byub der tub mod nu nap nu chuꞌ nur de losaꞌr. 
\q1 Orzeꞌ ndeꞌ zaab bicy la der ñii. 
\q1  
\v 12 Gun Shuaan den rñam de mbecy nu nap ricy. 
\q1 Nunu rzuub gyidag mi ornu rnii nu dey mi. 
\q1 Tees zam contr ni de mbecy nu shiñ ricy. 
\m Ni Rniiñ lat de riidz ni Ñgyoozh. 
\p  
\v 13 ¿A grusu mbecy nu shiñ gyicy nuy de ru, zeꞌ benu de ru dub laa tiem co lo der nu gyicy ru coz nap?  
\v 14 Tees mas rzac zi der nu nac nu ricy ru coz nap, orzeꞌ ¡dzi nu der! Nunu cueꞌ dzib der lo ni tub la mbecy. Nunu cueꞌ sug ic der.  
\v 15 Sinu pca lagy der lo Crisht, gun mi zeꞌ nac mi Shuaan der. Dub laa tiem bzu der altant nu tush cya der riidz nu cugyiꞌ mbecy lo der nu nac consuel nu ricy cup der nañ lardoor.  
\v 16 Tees ornu tush cyar riidz zeꞌ, orzeꞌ cueꞌ nii der riidz nu tañ za lo dey, nunu pca lagy der lo dey. Dub laa tiem bicy der coz nap, gun orzeꞌ cueꞌ gat lo der. Gun orzeꞌ de mbecy nu nii zi ni der nu nac de coz nap nu ricy ru nu nac ru mbecy ni Crisht, orzeꞌ de yu zeꞌ gat lo dey nu nac de riidz a̱ꞌ nap nu rnii dey. 
\p  
\v 17 Gun nap zir nu gzac zi der nu nac de coz nap nu ricy ru benu ndeꞌ coz nu rlagy Ñgyoozh, gazeꞌ nu gzac zi der nu nac de coz a̱ꞌ nap nu ricy der.  
\v 18 Gun Crisht gut mi tub tir ziꞌl par tub la nu nac dela cyi den. Mi zeꞌ sac cyim. Tees gut mi par de ub na, mbecy nu yuꞌ cyi, gun orzeꞌ guud mod nu gya num de ub na lo Ñgyoozh. Mbecy bicy dey nu gut mi, tees Espiriit nim bicy mi nu byabañ mi.  
\v 19 Zeꞌ Espiriit nim blocyuub mi ub mi nu gua shaal mi riidz ni Ñgyoozh lo de espiriit nu yuꞌ pres.  
\v 20 De espiriit zeꞌ guc ñi espiriit ni de mbecy nu guꞌ gulas tiem nu pcyiiñ Noé. Ñgyoozh tonaꞌ la pase̱z mi gugyeem lo dey lat nu bzaa Noé barc. Tees Ñgyoozh bicy mi nu bruu nap la be dey nu nac nis zeꞌ. Orzeꞌ tub shuñ dey bruu nap yu.  
\v 21 Nis zeꞌ, ndeꞌ muesht ni nis nu gzu nis de ru tiem na. Orzeꞌ nu nac nis zeꞌ, orzeꞌ Ñgyoozh co mbañ mi de ru. Ornu gzu nis den, ndeꞌ walab nu yaruuñ nu gyecy bid nu taꞌ cuerp ni den, sinu nu gzu nis na, ndeꞌ yaruuñ nu gdiñ na lo Ñgyoozh nu gyicy caacy mi nañ lardoon, nunu Ñgyoozh co mbañ mi de ub na nu nac nu byabañ Jesucrisht.  
\v 22 Jesucrisht, biñ nu gup gyibaa, nunu zub mi par yaa bee Ñgyoozh, riib ic mi de anc, gal nu deꞌ zir espiriit nu riib ic de espiriit nu dzi rcyiiñ. 
\c 4  
\s1 Bicy der riiñ dub gal na mod nu ricy Ñgyoozh num der 
\p  
\v 1 Orzeꞌ como Crisht bzac zim nu cuerp nim, orzeꞌ niꞌ ziꞌl de ru bzu der tub shcab nu gzac zi der benu galagy ñi, gun cyu ziꞌl mbecy nu rzac zi, yu zeꞌ bi bruu chuy lo cyi.  
\v 2 Zeꞌ par lo na, rlagy ñi nu cyiiñ der mod nu rlagy Ñgyoozh. Cueꞌ gal mod nu rlagy de ub ru.  
\v 3 Gun bi guzañ tiem nu de ru niꞌ ziꞌl bicy der laab de coz nu ricy de mbecy nu a̱ꞌ yuꞌ lo Ñgyoozh. Lat nu gusa der gulas, orzeꞌ bicy der de lo la coz nu druu nañ lardoor. Nunu bgyiiñ lagy der lo de coz a̱ꞌ nap. Nunu bzugy shaad der gal zeꞌ wagacaꞌ la. Nunu bicy der saꞌ a̱ꞌ nap. Nunu goꞌ der gashtal wancuicaꞌ la der raso̱o̱. Nunu briib zily der nab a̱ꞌ nap.  
\v 4 Na ornu de mbecy nu a̱ꞌ yuꞌ lo Ñgyoozh rzac dey nu wachesa nu der dey ornu ricy dey de coz a̱ꞌ nap zeꞌ, orzeꞌ rza nu ic dey nunu rnii ziy ni der.  
\v 5 Tees niꞌ de yu zeꞌ rlagy ñi nu zeed cuen dey de coz nu ricy yu lo Ñgyoozh, biñ nu bi zu lily nu gri bee ni de mbecy nu bi gut, gal nu de mbecy nu gabee mbañ.  
\v 6 Tees Crisht gua shaal mi de riidz nu sac nim lat de mbecy nu bi gut, gun orzeꞌ Espiriit Yon nim gyicy mi nu cui mbañ dey gal nu Ñgyoozh mbañ mi. Nomaas lat nu pcyiiñ dey gyishlombecy nu cuerp niy, orzeꞌ Ñgyoozh briic mi cashtig ni dey gal nu ricy num deꞌ zir de mbecy. 
\p  
\v 7 Bi yad gaab tiem nu gyaꞌ lo dela de coz. Ndeꞌ nu dela de ru bzu der altant, nunu bicy der mandaar ub ru, gun orzeꞌ gac nii nu der Ñgyoozh.  
\v 8 Coz nu ricy zir ñi presis, ndeꞌ nu tonaꞌ la ca der losaꞌr, gun benu rca der losaꞌr, orzeꞌ gyicy sulagy der dela cyi zañ nu ricy yu.  
\v 9 Dela der, ornu ryiid mbecy yuꞌr, orzeꞌ bguꞌ dey nañ yuꞌ, nunu nap bicy nu der yu. Nunu cueꞌ nid ruꞌ der ornu ni gyicy ru.  
\v 10 Orzeꞌ tub ga la der bicy paa nu riiñ nu briic Ñgyoozh nu cyiiñ der nu gyicy ru. Tub ga la der bicy riiñ nu guud lo Ñgyoozh par nu locyuub der deꞌ zir de losaꞌr.  
\v 11 Ornu tub mbecy rniiy lat de mbecy zigy, orzeꞌ rlagy ñi shaal yu riidz ni Ñgyoozh. Benu tub mbecy rlagy yu nu locyuub yu losaꞌy, orzeꞌ rlagy ñi nu gyicy yuñ nu dela fers niy nu rbic Ñgyoozh. Dela coz nu gyicy der bicy der ñii par nu gyed gyel mbecy ni Ñgyoozh nu nac Jesucrisht. Mi zeꞌ tonaꞌ la lily nam, nunu nac mi biñ nu gac gyicy dela coz tub la. ¡Laab ni gac ñii! 
\s1 Mbecy ni Crisht rzac zi dey 
\p  
\v 12 De ru bicy na nu dzi rca̱, cueꞌ cha nu ic der ornu gzac ru lo de preb nu dzi gatow. Nunu cueꞌ nii too der nu ndeꞌ tub gyel zi nu a̱ꞌ zac mbecy.  
\v 13 Lugaar nu cha nu ic der, orzeꞌ bet lagy der, gun gal nu bzac zi Crisht, niꞌ ziꞌl zac zi gaꞌ de ru, gun orzeꞌ tonaꞌ la gyet lagy der ornu gruu zac Crisht tuubaꞌ tir nu gyel lily nim.  
\v 14 Dzi ni der benu tub mbecy gab ziy der par nu nac Crisht. Gun orzeꞌ Espiriit Yon ni Ñgyoozh, biñ nu dzi lily na, zaab rded nu laam de ru.  
\v 15 Orzeꞌ cueꞌ nu gzac zi ni tub la der nu nac der mbecy nu rut losaꞌ, o nu nac der mbecy nu ricy gubaan, o nu nac der mbecy nu ricy cyi, o nu nac der mbecy nu rneꞌ ruꞌ lat asunt ni losaꞌ.  
\v 16 Zeꞌ benu rzac zi der gyiꞌ nu nac der mbecy ni Crisht, orzeꞌ cueꞌ gat lo der, sinu byabic der gyel mbecy ni Ñgyoozh par nu rnii dey nu nac der mbecy ni Crisht. 
\p  
\v 17 Bi yad shuub tiem nu Ñgyoozh gri beem. Orzeꞌ nu loga la gri beem ni de mbecy nim. Orzeꞌ dzi zir fert gri beem ni de mbecy nu wansuub gyidag de riidz nim.  
\v 18 Orzeꞌ benu dzi fers gruu mbañ de mbecy nap, orzeꞌ dzi gaꞌ zir fert gyicy num de mbecy a̱ꞌ nap gal nu de mbecy cyi.  
\v 19 Orzeꞌ niꞌ ziꞌl mod par de mbecy nu rzac zi, gun ndeꞌ coz nu rlagy Ñgyoozh. Orzeꞌ de yu zeꞌ rlagy ñi nu zaab gyicy la dey de coz nap. Nunu guꞌ dey ub yu yaa Ñgyoozh, biñ nu psaꞌ lagy dey. Nunu nac mi biñ nu ricy paa. 
\c 5  
\s1 Consef nu rbic Bed 
\p  
\v 1 Ya̱ Bed naca̱ tub yu nu zu riiñ ni yu bel lat de mbecy ni Crisht, nunu naca̱ tub teshtig ni de coz nu bzac zi Crisht, nunu gazaꞌ de ub na gad gyel lily nin ornu gruu zac mi tuubaꞌ tir. Ndeꞌ nu na ya̱ grica̱ tub consef ni de mbecy nu zu riiñ ni yu bel lat der.  
\v 2 Nap mña der de mbecy nu nac shily ni Ñgyoozh, gun ndeꞌ riiñ nu bduꞌm yaa der. Nunu bicy der ñii nu dutuub la lardoor gal nu rlagy mi. Nunu cueꞌ gyicy der ñii por fers la. Nunu ni cueꞌ gyicy der ñii par nu nac tiñ. Bicy der ñii gal nu ricy tub mbecy ornu dzi yet lagy yu nu shet yaay tub riiñ.  
\v 3 Cueꞌ dzi gyicy der mandaar de mbecy nu rñar zeꞌ, sinu blyuu ni dey nu nac mod nu ricy de ub ru.  
\v 4 Gun ornu gruu zac Jesuuz, biñ nu gya zir zu par deꞌ zir de mbecy nu rña shily zeꞌ, orzeꞌ gyad tub i der nu tonaꞌ la coz ily. I der zeꞌ, ndeꞌ rila wayagash baloor niñ. 
\p  
\v 5 Na de ru yu feñ, rlagy ñi nu “O” nii der ni de yu bel. Orzeꞌ tub ga la der bicy der nu gac ru mbecy shni. Orzeꞌ “O” mnii tub ga la der ni losaꞌr. Gun rniiñ lat de riidz ni Ñgyoozh: 
\q1 Ñgyoozh zam contr ni de mbecy leꞌ, 
\q1 tees ricy mi faboor num de mbecy nu ricy gyel gyidz ni, 
\m rniiñ lat de riidz ni Ñgyoozh.  
\v 6 Orzeꞌ bicy der gyel gyidz nir lo Ñgyoozh, biñ nu tonaꞌ la fert rña de ub na, gun orzeꞌ gyicy mi nu gac der mbecy lily tiem nu galagy ñi.  
\v 7 Orzeꞌ bguꞌ der dela gyel rsug ic nir yaa Ñgyoozh, gun mi zeꞌ zum altant nu nac de ru. 
\p  
\v 8 Ndeꞌ nu bzu der altant nunu zu ga lagy der, gun nuras nac yu losaꞌ yuu der. Orzeꞌ yu zeꞌ ricy yu gal nu ricy biidz ornu rshuu ma nu ryub ma cyu nu gow ma.  
\v 9 Fert bicy cup der consuel lo Crisht. Orzeꞌ gua der contr ni nuras. Nunu bi neñ der nu dutuub la gyishlombecy rzac zi de bicy ru nu nac Crisht laabaꞌ de coz nu rzac de ru.  
\v 10 Na ornu bi bzaꞌ la be tiem nu bzac zi der, orzeꞌ gzu nap Ñgyoozh de ru. Orzeꞌ gyicy mi nu wayagash consuel ni der. Nunu gyicy fert mi nañ shacab ni der. Nunu gyicy mi nu wadza der. Laab Ñgyoozh, nu nac nu tonaꞌ la rcam de ub na, orzeꞌ blosum den nu gad gyel lily nim ni den. Ndeꞌ gyel lily nu rila walazh. Gad ñi ni den par nu nac dun Jesucrisht.  
\v 11 Laab Ñgyoozh nac mi biñ nu gac gyicy coz ily tonaꞌ la tub la. ¡Laab ni gac ñii! 
\s1 Bed rzeed yu ñgyoozh ni de mbecy ni Crisht 
\p  
\v 12 Silvano nac yu tub bicy na nu tonaꞌ la ricy paa. Orzeꞌ yu zeꞌ blocyuub yu ya̱ nu ca̱a̱ la be de riidz miꞌ nu gzeeda̱ lo der par nu grica̱ consef ni der, nunu par nu grica̱ nu gad lagy der nu de coz nap nu ricy nu Ñgyoozh de ru, ndeꞌ gyicy ñi nu gad lagy der nu rcam der. Orzeꞌ zaab bicy paa la der nu nac nu rcam de ru. 
\p  
\v 13 De mbecy ni Crisht nu yuꞌ gyedz Rom, de yu nu pcui Ñgyoozh gal nu pcui gaꞌm de ru, de yu zeꞌ zeed dey ñgyoozh ni der. Nunu niꞌ ziꞌl Marc, yu nu na gal nu na tub iꞌña̱, yu zeꞌ zeed yu ñgyoozh ni der.  
\v 14 Nunu nap mnii nu der losaꞌr gal mod nu rlagy ñi ornu dzeel ru dey. 
\p Orzeꞌ Ñgyoozh gyicy mi nu cheti ri añ ni dela de ru mbecy ni Crisht.