\id 1JN  
\h 1 San Juan 
\toc1 1 San Juan Gyicy loga nu bzeed Waa lo de mbecy ni Crisht 
\toc2 1 San Juan 
\toc3 1 Jn. 
\mt1 1 San Juan 
\mt2 Gyicy loga nu bzeed Waa lo de mbecy ni Crisht 
\c 1  
\s1 Biñ nu la riidz ni Ñgyoozh 
\p  
\v 1 Ca̱a̱ de̱ lo gyicy nu zeed de̱ lo de ru de riidz ni biñ nu bi zu nil nese anzir nu gzub gyiꞌ gyishlombecy. De̱ ya̱ güeñ de̱ riidz nu mniim. Nunu bzaac urlo̱ la̱ de̱m. Gun bgüi̱i̱ de̱ lom, nunu gul ya̱a̱ de̱m. Mi zeꞌ nac mi biñ nu la riidz ni Ñgyoozh, biñ nu rbic gyel mbañ.  
\v 2 Orzeꞌ bruu zac biñ nu rbic gyel mbañ zeꞌ lat de̱ ya̱. Nunu bzac de̱m, nunu ne̱e̱ de̱ lo der cyu nac biñ nu rbic gyel mbañ nu rila walazh. Mi zeꞌ biñ nu nil gulas nac nu Ñgyoozh, Uz den. Tees Ñgyoozh, Uz na, bicy mi nu bruu zac mi lo de̱ ya̱.  
\v 3 Orzeꞌ shaal de̱ lo der de riidz nu güeñ de̱, gal nu de coz nu bzaac de̱, gun orzeꞌ gac nu der de̱ ya̱. Orzeꞌ de ub na gac du den Ñgyoozh Uz na gal nu Iꞌñ mi Jesucrisht.  
\v 4 Orzeꞌ rca̱a̱ de̱ de riidz ii, gun orzeꞌ gyet lagy de̱ gashtal zeꞌ nu wagacaꞌ la. 
\s1 Ñgyoozh nac mi biñ nu rbic yaa 
\p  
\v 5 Nii riidz nu güeñ de̱ nu mnii Jesucrisht lo̱ de̱. Nunu shaal de̱ ñii lo der: Ñgyoozh nam gal nu na zeꞌ yuꞌ yaa, gun dzi yon mi. Par lo Ñgyoozh sac la cyi.  
\v 6 Benu niin nu nac dun mi, zeꞌ laab tiem zeꞌ rded na ricy na cyi, orzeꞌ rguun, nunu wagyicy den gal nu rlagy Ñgyoozh.  
\v 7 Tees benu rded na zeꞌ nu yuꞌ yaa gal nu Ñgyoozh zum zeꞌ nu yuꞌ yaa, orzeꞌ nac du den losaꞌn. Nunu nu nac reñ Iꞌñ mi, Jesucrisht, gyecy dela cyi den. 
\p  
\v 8 Benu niin nu sac cyin, orzeꞌ rguun laab ub na, nunu wacsaan den nu chetib ic coz rishli nañ lardoon.  
\v 9 Zeꞌ benu shuub ruꞌ den de cyi nu ricy na, orzeꞌ mi zeꞌ ricy paam, nunu ricy mi coz nu seꞌñ. Orzeꞌ gyicy sulagy mi dela cyi den, nunu cyib mi dela coz cyi nu ricy den.  
\v 10 Benu nii den nu sac cyin, orzeꞌ ricy na nu Ñgyoozh nac mi tub biñ rguu, nunu wacsaan na nu chetib ic riidz nim nañ lardoon. 
\c 2  
\s1 Crisht nac mi biñ nu neꞌ ic ni den lo Ñgyoozh 
\p  
\v 1 Der yu feñ, ya̱ ca̱a̱ de coz ii lo gyicy nu zeed de̱ lor, gun orzeꞌ cueꞌ gyicy der cyi. Tees benu tub mbecy gyicy yu cyi, orzeꞌ zu tub biñ nu neꞌ ic ni den lo Ñgyoozh, Uz den. Mi zeꞌ Jesucrisht. Nunu mi zeꞌ ricy mi coz nu seꞌñ.  
\v 2 Jesucrisht guc mi tub gun nu gua lo Ñgyoozh, gun orzeꞌ gyicy sulagy mi de cyi den: nunu walab tub lo ziꞌl de cyi de ub na, sinu niꞌ ziꞌl de cyi de mbecy nu yuꞌ dutuub la gyishlombecy. 
\p  
\v 3 Benu gyicy yac den de riidz nu rnii Ñgyoozh, orzeꞌ rad lagy den nu segur la yuꞌ lon mi.  
\v 4 Tees benu tub mbecy rniiy: “Ya̱ yuꞌ lo̱ Ñgyoozh”, rniiy, zeꞌ benu wagyicy yu gal nu rniim, orzeꞌ yu zeꞌ nac yu tub mbecy rguu, nunu wacsaan yu chetib ic coz rishli nañ lardooy.  
\v 5 Zeꞌ mbecy nu ricy yac de riidz nim, yu zeꞌ rca zaꞌ lay mi. Nunu ndeꞌ mod nu gad lagy na nu tub ziꞌl nac naa dun mi.  
\v 6 Mbecy nu rnii nu rcyiiñ nu Ñgyoozh, yu zeꞌ rlagy ñi nu chesay gal nu gusa Jesucrisht. 
\s1 Crisht briic mi tub riidz cub nu gyicy mbecy 
\p  
\v 7 Der bicy na, riidz nu rca̱a̱ lo gyicy nu gyicy der, ndeꞌ nu ca tub ca tub ziꞌl der losaꞌr. Walab nu sa güeñ der ñii, sinu ndeꞌ riidz nu bi gush der nese nu bzub gyiꞌ nu ricy cup der consuel lo Crisht.  
\v 8 Mas ni, tees riidz nu rca̱a̱ ii, nii tub riidz cub nu rnii coz rishli nu nac Crisht nu coz rishli nu nac de ub na. Gun na bi rded tiem nu chuꞌ den zeꞌ nu cow, nunu Jesucrisht bi rlyuum yaa nu rishli lo den. 
\p  
\v 9 Benu tub mbecy rniiy nu rded yu zeꞌ nu yuꞌ yaa nu rbic Crisht, zeꞌ gabee rzi lagy yu lo bicy yu, orzeꞌ yu zeꞌ gabee rded yu zeꞌ nu cow.  
\v 10 Yu nu rca bicy, yu zeꞌ rded yu zeꞌ nu yuꞌ yaa nu rbic Crisht. Ni tub la coz wac gyicy ñi nu gadzay.  
\v 11 Tees yu nu rzi lagy lo bicy, yu zeꞌ rcyiiñ yu nunu rded yu zeꞌ nu cow. Yu zeꞌ wagad lagy yu ni ca par chay, gun zeꞌ nu cow zeꞌ ricy ñi nu wacsac yu. 
\p  
\v 12 Ya̱ zeeda̱ gyicy ii lo de ru yu nguzh, gun Ñgyoozh bi bicy sulagy mi de cyir nu nac Jesucrisht.  
\v 13 Ya̱ zeeda̱ gyicy ii lo de ru yu bel, gun de ru nap yuꞌ lor Ñgyoozh, biñ nu nil zu nese anzir nu gzub gyiꞌ gyishlombecy. Ya̱ zeeda̱ gyicy ii lo de ru yu feñ, gun bi bicy der gan nuras. 
\p  
\v 14 Ya̱ zeeda̱ gyicy ii lo de ru yu nguzh, gun bi yuꞌ lo der Ñgyoozh Uz den. Ya̱ zeeda̱ gyicy ii lo de ru yu bel, gun de ru nap yuꞌ lor Ñgyoozh, biñ nu nil zu nese anzir nu gzub gyiꞌ gyishlombecy. Ya̱ zeeda̱ gyicy ii lo de ru yu feñ, gun fert der nu nac de coz ni Crisht, nunu “O” mnii der nu gutib ic riidz ni Ñgyoozh nañ lardoo der, nunu bi bicy der gan nuras. 
\p  
\v 15 Cueꞌ ca der gyishlombecy ii, ni de coz nu yuꞌ gyishlombecy, gun benu ca na mbecy cay gyishlombecy, orzeꞌ wacay Ñgyoozh Uz na.  
\v 16 Gun de coz nu druu gyishlombecy ii, ndeꞌ coz a̱ꞌ nap. Druu nu rlagy dey shiñ gyicy yu. Druu nu ye rzac dey lo de gyel nap. Druu nu leꞌ dey. Dela coz zeꞌ walab lo Ñgyoozh Uz den druuñ, sinu druuñ gyishlombecy.  
\v 17 Tees ded ni gyishlombecy nunu ded ni de coz a̱ꞌ nap nu rlagy mbecy nu gyicy yu, tees yu nu ricy gal nu rlagy Ñgyoozh, yu zeꞌ cui mbañ yu tub la. 
\s1 De mbecy nu rza contr ni Crisht 
\p  
\v 18 Der yu feñ, na yuꞌ den tiem nu bi rlazh gyishlombecy ii. Nunu bi güeñ der nu bi yad tub mbecy nu zay contr ni Crisht. Tees mas na bi guzañ mbecy bi biid yu nu guay contr ni Crisht. Ndeꞌ nu rad lagy den nu bi yuꞌn tiem nu bi rlazh gyishlombecy ii.  
\v 19 Tees de mbecy nu za contr ni Crisht zeꞌ bruu dey laab lat den. Tees rishli wangac nu dey den. Gun benu ñgyac nu dey den, orzeꞌ waruu dey lat na. Tees nu nac nu bruu dey lat den, orzeꞌ rad lagy den nu ni tub la dey wangac nuy de ub na. 
\p  
\v 20 Crisht briic mi Espiriit Yon ni Ñgyoozh ni der. Orzeꞌ dela der rad lagy der de riidz rishli.  
\v 21 Ya̱ walab nu zeeda̱ gyicy ii lo der par nu wagad lagy der de riidz rishli ni Crisht, sinu par nu bi rad lagy der ñii. Nunu de ru rad lagy der nu rila wacyuu gyel rguu lat de riidz rishli.  
\v 22 Orzeꞌ ¿cyu nu mbecy rguu zeꞌ? Yu zeꞌ yu nu rnii nu Jesucrisht, mi zeꞌ walab Mesías, biñ nu ca lo cuen nu cyid, rniiy. Nunu laab yu zeꞌ yu nu za contr ni Crisht. Yu zeꞌ rdiily loy lo Ñgyoozh, Uz den, nu lo Iꞌñ mi Jesuuz.  
\v 23 Cyu ziꞌl yu nu rdiily lo lo Jesucrisht, Iꞌñ Ñgyoozh, niꞌ ziꞌl rdiily loy lo Ñgyoozh Uz na. Tees cyu ziꞌl mbecy nu “O” rnii ni Crisht, Iꞌñ Ñgyoozh, yu zeꞌ niꞌ ziꞌl yuꞌ loy Ñgyoozh. 
\p  
\v 24 Bicy der nu caa ic ru de riidz nu güeñ der nese nu loga la. Gun benu ni gyicy der, orzeꞌ rcyiiñ der nu Crisht, Iꞌñ Ñgyoozh, nunu rcyiiñ der nu Uz mi.  
\v 25 Nunu coz nu mnii Ñgyoozh nu segur la cuic mi ni den, ndeꞌ nu cui mbañ den tub la. 
\p  
\v 26 Ya̱ ca̱a̱ de riidz ii nu zeeda̱ lo der, de riidz nu rnii nu cyu de mbecy nu rlagy guu de ru.  
\v 27 Tees de ru bi ricy cup der Espiriit Yon nu briic Crisht ni der. Orzeꞌ walagy ñi ni tub la mbecy nu lyuuy ni der. Gun laab mi lyuum ni der dela coz. Nunu de coz nu lyuum zeꞌ, ndeꞌ coz rishli, walab coz rguu. Orzeꞌ rlagy ñi nu cyiiñ nu der Crisht dub gal mod nu lyuu Espiriit Yon ni der. 
\p  
\v 28 Na de ru yu feñ, rlagy ñi nu cyiiñ nu der Crisht, gun orzeꞌ cuic der baloor ornu gruu zac mi tuubaꞌ tir. Gun orzeꞌ cueꞌ nu gat lo den lat nu zu den lom ornu cyid mi.  
\v 29 De ru bi rad lagy der nu Jesucrisht dzi nap mi. Orzeꞌ niꞌ ziꞌl rlagy ñi nu gad lagy der nu dela mbecy nu ricy gal nu rlagy Ñgyoozh, de yu zeꞌ nac yu iꞌñ mi. 
\c 3  
\s1 De mbecy nu nac iꞌñ Ñgyoozh 
\p  
\v 1 Mnii ñuu too der nu tonaꞌ la rca Ñgyoozh Uz na de ub na. Par nu tonaꞌ la rcam de ub na, ndeꞌ nu rniim nu nac naa iꞌñ mi, rniim. Nunu rishli gaal nac naa iꞌñ mi. Ndeꞌ nu de mbecy nu yuꞌ gyishlombecy ii wagad lagy dey cyu nac naa, como niꞌ ziꞌl wangad lagy dey cyu Ñgyoozh.  
\v 2 Orzeꞌ de ru bicy na nu dzi rca̱, bi nac den iꞌñ Ñgyoozh. Mas gaal zi gabee wagad lagy nap den lac mod na den gyac na par lo, tees rad lagy den nu ornu Jesuuz gruu zac mi tuubaꞌ tir, orzeꞌ gzac den gal nu na la ub mi, gun orzeꞌ gyac den gal nu na gaal mi.  
\v 3 Gun dela mbecy nu ni mod rgyish lo lom, ricy dey nu cueꞌ chuꞌ falt niy gal nu Jesucrisht sac falt nim. 
\p  
\v 4 Tees dela mbecy nu ricy cyi, de yu zeꞌ zay contr ni coz nu rlagy Ñgyoozh. Gun cyi, ndeꞌ la ziꞌl coz nu walagy Ñgyoozh.  
\v 5 De ru rad lagy der nu Jesucrisht biid mi gyishlombecy ii par nu cyib mi de cyi nu ricy cup mbecy. Nunu mi zeꞌ rila a̱ꞌ nac mi mbecy cyi.  
\v 6 Orzeꞌ dela mbecy nu rcyiiñ nu Crisht, de yu zeꞌ wagyicy dey cyi. Tees dela de mbecy nu ricy cyi wagad lagy dey la nam. Ni wagad lagy dey cyu nac mi.  
\v 7 De ru, yu feñ ne̱, cueꞌ zaan ru nu guu ni tub la mbecy der, gun de mbecy nu zaab ricy la de coz nu seꞌñ, de yu zeꞌ nac dey mbecy nap gal nu mi zeꞌ nac mi biñ nu dzi nap.  
\v 8 Tees de mbecy nu zaab ricy la cyi, de yu zeꞌ nac yu mbecy ni nuras. Gun nuras ricy yu cyi nese nu bzub la gyiꞌ gyishlombecy. Gun par nu nac ndeꞌ ziꞌl biid Jesuuz, Iꞌñ Ñgyoozh, par nu nit lom dela coz nu ricy nuras. 
\p  
\v 9 Ni tub la mbecy nu nac iꞌñ Ñgyoozh walab nu zaab ricy lay cyi, gun Ñgyoozh rcyiiñ mi nañ lardoo dey. Nunu wagyicy dey cyi, gun nac dey iꞌñ mi.  
\v 10 Bi rabee ca na mbecy nu nac yu iꞌñ Ñgyoozh, nunu bi rabee gaꞌ ca na mbecy nu nac iꞌñ nuras, gun cyu ziꞌl mbecy nu wagyicy coz nap o nu wacay de bicy yu, yu zeꞌ a̱ꞌ nac yu ni Ñgyoozh. 
\s1 Ca den losaꞌn 
\p  
\v 11 Nii de riidz nu bi güeñ der nese nu loga la: Nu rlagy ñi nu ca tub ca tub ziꞌl den losaꞌn.  
\v 12 Cueꞌ gac naa gal nu na Caiing. Yu zeꞌ tub mbecy ni nuras. Biit yu bicy yu. ¿La gyiꞌ biit yu bicy yu? Gyiꞌ nu shiñ ricy ub yu. Zeꞌ bicy yu, Abeel, yu zeꞌ nap bicy yu. 
\p  
\v 13 Der bicy na, cueꞌ cha nu ic der benu de mbecy ni gyishlombecy rzi lagy yu lo der.  
\v 14 De ub na bi bded lon lo lugaar zeꞌ nu yuꞌ de mbecy gut. Nunu bi guud nu cui mbañ den tub la. Rad lagy den nu cui mbañ na nu nac nu rca den losaꞌn. Orzeꞌ mbecy nu waca losaꞌ nay gal nu na mbecy nu bi gut.  
\v 15 Dela mbecy nu rzi lagy lo losaꞌ, de yu zeꞌ gal gaa la nay nu de mbecy nu rut losaꞌ. Nunu de ru rad lagy der nu ni tub la mbecy nu rut losaꞌ a̱ꞌ nac yu mbecy nu cyiiñ nu Ñgyoozh tub la.  
\v 16 Bi rad lagy den lac na mod nu caan losaꞌn, gun Jesucrisht pshet ic mi gut mi nu nac de ub na. Orzeꞌ niꞌ ziꞌl mod, de ub na rlagy ñi nu shet ic na mas gat na nu nac losaꞌn.  
\v 17 Zeꞌ benu tub mbecy yuꞌ la coz niy, zeꞌ zac yu tub losaꞌy nu ricy falt ñi niy, zeꞌ wabic yu niy, orzeꞌ mbecy, yu nu wabic zeꞌ, wacay losaꞌy nañ lardooy gal mod nu rlagy Ñgyoozh.  
\v 18 De ru yu feñ ne̱, cueꞌ nu niin nu caan losaꞌn nu ruꞌ ziꞌl na, sinu gyicy na tub mod par nu gabe nu rishli rcaan losaꞌn. 
\s1 Wadzib la den gyechaꞌn lo Ñgyoozh 
\p  
\v 19 Ni mod rad lagy den nu rishli zan faboor ni Ñgyoozh, nunu wat lo den ornu gyechaꞌn lom.  
\v 20 Tees benu rnii toon nu yuꞌ cyi nañ lardoon, Ñgyoozh zily zir nac mi par lardoon. Mi zeꞌ rad lagy mi dela coz.  
\v 21 Der bicya̱ nu dzi rca̱, benu rad lagy den nu sac cyi nañ lardoon, orzeꞌ wadzib la den nu gyechaꞌn lo Ñgyoozh.  
\v 22 Nunu mi zeꞌ cuic mi dela coz nu diñ na lom, gun ricy yac den ni dela riidz nim. Nunu ricy den coz nu yedzuꞌ lagy mi.  
\v 23 Nunu de riidz nu mniim nu gyicy den zeꞌ, ndeꞌ nu gyicy cup den consuel lo Iꞌñ mi, Jesucrisht, nunu ca tub ca tub ziꞌl den losaꞌn, gal nu mi zeꞌ mniim nu ni gyicy den.  
\v 24 De mbecy nu rzuub gyidag ni de riidz nim, de yu zeꞌ rcyiiñ nu dey mi, nunu mi zeꞌ rcyiiñ num dey. Nunu nu nac de ndeꞌ, rad lagy den nu mi zeꞌ rcyiiñ num de ub na. Rad lagy den par nu nac Espiriit Yon nim, biñ nu briic mi ni den. 
\c 4  
\s1 Yu nu ricy cup Espiriit ni Ñgyoozh, nunu yu nu ricy cup espiriit nu za contr ni Crisht 
\p  
\v 1 De ru bicy na nu dzi rca̱, cueꞌ cheña lagy der ni de mbecy ornu ricy dey nu rniiy por cuen ni Ñgyoozh, sinu bicy der preb dey ben a laab Espiriit Yon ni Ñgyoozh rcyiiñ mi nañ lardoo dey, uti walab. Gun gyishlombecy ii bzu laa mbecy rguu nu ricy nu rnii por cuen ni Ñgyoozh.  
\v 2 Nii tub mod nu gac gad lagy der nu ca na mbecy nu ricy cup Espiriit Yon ni Ñgyoozh nañ lardoo: dela mbecy nu driib cuen nu Jesucrisht biid mi gyishlombecy byac mi mbecy nu rishli, orzeꞌ dela de yu zeꞌ ricy cup yu Espiriit Yon ni Ñgyoozh.  
\v 3 Zeꞌ de mbecy nu wagriib cuen de coz zeꞌ, de yu zeꞌ a̱ꞌ ricy cup dey Espiriit Yon ni Ñgyoozh, sinu de yu zeꞌ ricy cup dey tub espiriit nu za contr ni Crisht. De ru bi reñ der nu bi ca lo cuen nu cyid espiriit a̱ꞌ nap zeꞌ. Nunu mas na la bi rded espiriit zeꞌ gyishlombecy ii. 
\p  
\v 4 De ru yu feñ ne̱, de ru bi nac der ni Ñgyoozh. Nunu de ru bi bicy der gan de mbecy rguu zeꞌ. Gun biñ nu rcyiiñ nañ lardoo der, mi zeꞌ fert zir mi gazeꞌ nuras nu riib ic nañ lardoo de mbecy ni gyishlombecy ii.  
\v 5 De mbecy rguu zeꞌ nac dey ni gyishlombecy ii. Ndeꞌ nu rnii dey de riidz nu druu gyishlombecy ii. Nunu dela de mbecy nu yuꞌ gyishlombecy ii rzuub gyidag dey de riidz zeꞌ.  
\v 6 Zeꞌ de ub na nac naa mbecy ni Ñgyoozh. Orzeꞌ de mbecy nu bi yuꞌ lo Ñgyoozh rzuub gyidag dey de riidz nu rniin. Tees de mbecy nu walab mbecy ni Ñgyoozh, de yu zeꞌ wacsuub gyidag yu ni de riidz nu rniin. Orzeꞌ nu nac de nu ndeꞌ rad lagy den ca na mbecy nu ricy cup Espiriit Yon ni Ñgyoozh, biñ nu rnii de coz rishli, nunu rad lagy den ca na de mbecy nu ricy cup nuras nu rguu. 
\s1 Ñgyoozh, biñ nu rca mbecy 
\p  
\v 7 De ru bicy na nu dzi rca̱, rlagy ñi nu ca tub ca tub ziꞌl den losaꞌn. Gun nu caan losaꞌn, ndeꞌ coz nu bruu lo Ñgyoozh. Dela mbecy nu rca losaꞌ nac yu iꞌñ Ñgyoozh, nunu bi yuꞌ loy mi.  
\v 8 Zeꞌ de mbecy nu waca losaꞌ, de yu zeꞌ a̱ꞌ yuꞌ loy Ñgyoozh, gun Ñgyoozh nac mi biñ nu rca mbecy.  
\v 9 Ñgyoozh briic mi nu gad lagy den nu rcam de ub na nu nac nu bzuu nez mi Iꞌñ mi nu tub zi la zu nim nu biid mi gyishlombecy ii, gun orzeꞌ gad nu cui mbañ den nu nac Iꞌñ mi zeꞌ.  
\v 10 I mod rshaal ñi lac mod rca Ñgyoozh de ub na: walab ti de ub na pcaan mi, sinu mi zeꞌ pcam de ub na. Ndeꞌ nu gashtal bzuu nez mi Iꞌñ mi nu biid mi gyishlombecy par nu gac mi gun, gun orzeꞌ Ñgyoozh gyicy sulagy mi cyi den. 
\p  
\v 11 De ru bicy na nu dzi rca̱, zeꞌ benu ni mod rca Ñgyoozh de ub na, orzeꞌ niꞌ ziꞌl de ub na ca tub ca tub ziꞌl den losaꞌn.  
\v 12 Gun ni tub la mbecy nigul zac yu Ñgyoozh. Tees benu ca tub ca tub ziꞌl den losaꞌn, orzeꞌ Ñgyoozh nac num de ub na, nunu rabee de coz nu ricy mi nañ lardoo den nu nac nu rcam de ub na.  
\v 13 Yuꞌ tub mod par nu gad lagy den nu nac dun Ñgyoozh nunu Ñgyoozh nac num de ub na. Rad lagy der de ndeꞌ nu nac nu briic mi Espiriit Yon nim ni den.  
\v 14 Nunu de̱ ya̱ laa bzaac de̱ nu Ñgyoozh Uz na bzeed mi Iꞌñ mi biid mi par nu co mbañ mi de mbecy nu yuꞌ gyishlombecy ii. De ndeꞌ riidz nu rshaal den.  
\v 15 Orzeꞌ cyu ziꞌl mbecy nu driib cuen yu nu Jesuuz nac mi Iꞌñ Ñgyoozh, orzeꞌ Ñgyoozh nac num yu, nunu yu zeꞌ nac nuy mi. 
\p  
\v 16 Ni mod gud lagy na nu Ñgyoozh rcam de ub na nunu guña lagy na niñ. Ñgyoozh nac mi biñ nu rca mbecy. Ndeꞌ nu de mbecy nu zaab rca la losaꞌ, de yu zeꞌ nac nu dey Ñgyoozh, nunu Ñgyoozh nac num dey.  
\v 17 Orzeꞌ ni mod gyac den mbecy nu ca zaꞌ la Ñgyoozh, gun orzeꞌ ornu shuub dzi nu gri beem ni de mbecy ni gyishlombecy, orzeꞌ de ub na wadzibaꞌn, gun de ub na rded na gyishlombecy ii gal mod nu gusa Jesucrisht.  
\v 18 Gun de mbecy nu rca de ub na, de yu zeꞌ wadzib na loy. Ndeꞌ nu, como Ñgyoozh tonaꞌ rcam de ub na, orzeꞌ sacaꞌ la mod nu dzib den lom. Gun dzib den nu nac cashtig. Ndeꞌ nu benu ca na mbecy rdzib yu, orzeꞌ ndeꞌ gun wacabee riiñ nu bicy Ñgyoozh nañ lardooy nu nac nu rcam yu. 
\p  
\v 19 De ub na rcaan mi, gun mi zeꞌ pcam de ub na nu loga la.  
\v 20 Benu ca na tub mbecy rniiy: “Ya̱ rca̱ Ñgyoozh”, rniiy, zeꞌ laab tiem zeꞌ rzi lagy yu lo losaꞌy, orzeꞌ yu zeꞌ nac yu tub mbecy rguu. Gun benu ca na tub mbecy wacay losaꞌy, tub mbecy nu rzac yu, zeꞌ yegar nu caa gaꞌy Ñgyoozh, biñ nu wagac zac yu.  
\v 21 Jesucrisht mniim lo den nu gyicy na de coz ii: mbecy nu rca Ñgyoozh, yu zeꞌ niꞌ ziꞌl rcay losaꞌy. 
\c 5  
\s1 Gyicy den gan de cyi nu yuꞌ gyishlombecy 
\p  
\v 1 Dela mbecy nu zeña lagy nu Jesuuz nac mi Mesías, biñ nu ca lo cuen nu cyid, de yu zeꞌ nac yu iꞌñ Ñgyoozh. Nunu de yu nu rca Ñgyoozh Uz den, orzeꞌ niꞌ ziꞌl rca gaꞌ dey de yu nu nac iꞌñ mi.  
\v 2 Ornu rca den Ñgyoozh, nunu ricy den de coz nu rniim, orzeꞌ rad lagy den nu niꞌ ziꞌl rcaan de mbecy nu nac iꞌñ mi.  
\v 3 Nu caan Ñgyoozh, ndeꞌ yaruuñ nu ricy den de coz nu rniim. Nunu de coz nu rniim, ndeꞌ walab nu dzi biigy,  
\v 4 gun dela mbecy nu nac iꞌñ Ñgyoozh ricy dey gan de cyi nu yuꞌ gyishlombecy ii. Nunu nu nac nu ricy cup den consuel lo Crisht, ndeꞌ nu ricy den gan de cyi zeꞌ.  
\v 5 De mbecy nu zeña lagy nu Jesuuz nac mi Iꞌñ Ñgyoozh, de yu zeꞌ ricy dey gan de cyi nu yuꞌ gyishlombecy ii. 
\s1 Nu nac Jesuuz gad nu cui mbañ na 
\p  
\v 6 Tiem nu biid Jesucrisht, orzeꞌ wi nis mi nunu pshu reñ mi. Walab tub lo ziꞌl nu wi nis mi, sinu wi nis mi nunu pshu reñ mi. Nunu laab Espiriit Yon ni Ñgyoozh nac mi teshtig ni de ndeꞌ. Nunu mi zeꞌ nac mi biñ nu rnii nu rishli.  
\v 7 Orzeꞌ yuꞌ chon coz nu ricy ñi nu gad lagy den nu Jesuuz laab mi nac mi Mesías:  
\v 8 nu loga la ndeꞌ Espiriit Yon ni Ñgyoozh, nu cyup ndeꞌ ornu wi nis mi, zeꞌ nu chon, ndeꞌ ornu pshu reñ mi. Nunu lo chon de coz zeꞌ tub ziꞌl mod nu rniiñ. 
\p  
\v 9 “O” rnii den ni de riidz ni de coz nu bzaac mbecy. Tees sac zir de riidz ni de coz nu rad lagy Ñgyoozh, gun de riidz zeꞌ, ndeꞌ de coz nu rnii Ñgyoozh nu nac Iꞌñ mi Jesuuz.  
\v 10 Cyu ziꞌl mbecy nu ricy cup consuel lo Jesuuz, Iꞌñ Ñgyoozh, orzeꞌ bi yuꞌ de riidz nu mnii Ñgyoozh zeꞌ nañ lardooy. Zeꞌ cyu ziꞌl mbecy nu wagyicy cup consuel lo Jesuuz, yu zeꞌ ricy yu Ñgyoozh nu nac mi biñ rguu, gun wancheña lagy yu ni de riidz nu mniim nu nac Iꞌñ mi.  
\v 11 Zeꞌ de riidz zeꞌ rniiñ nu Ñgyoozh bicy mi nu gac cui mbañ den tub la. Zeꞌ nu cui mbañ den, ndeꞌ gad ñi nu nac Iꞌñ mi.  
\v 12 Orzeꞌ de mbecy nu nac nu Jesuuz, Iꞌñ Ñgyoozh, de yu zeꞌ bi guud nu cui mbañ yu. Tees de mbecy nu a̱ꞌ nac nu mi zeꞌ, de yu zeꞌ wad nu cui mbañ dey. 
\s1 Laab ndeꞌ la riidz nu mnii Waa 
\p  
\v 13 Ya̱ zeeda̱ gyicy ii lo de ru mbecy nu ricy cup consuel lo Jesuuz, Iꞌñ Ñgyoozh, par nu gad lagy der nu bi guud nu cui mbañ der tub la. 
\p  
\v 14 Ricy cup den consuel lo Ñgyoozh, gun rad lagy den nu ornu rdiñ na la coz lom, orzeꞌ rzuub gyidag mi ni den benu ndeꞌ coz nu rlagy mi.  
\v 15 Nunu como bi rad lagy den nu Ñgyoozh rzuub gyidag mi nin ornu rnii dun mi, orzeꞌ niꞌ ziꞌl rad lagy den nu bi ricy cup den de coz nu bdiñ na lom. 
\p  
\v 16 Orzeꞌ benu ca na tub der zac ru ca na tub losaꞌr nu ricy yu cyi, zeꞌ walab cyi nu gyicy ñi nu gat yu, orzeꞌ rlagy ñi nu cyiñ ru lo Ñgyoozh ni mbecy nu ricy cyi zeꞌ. Orzeꞌ Ñgyoozh gyicy mi nu cui mbañ yu, benu ndeꞌ walab tub cyi nu gyicy ñi nu gat yu. Gun yuꞌ cyi nu gyicy ñi nu gat mbecy. Tees walab nu rne̱e̱ nu cyiñ der lo Ñgyoozh nu nac cyi zeꞌ.  
\v 17 Dela coz a̱ꞌ nap nu ricy mbecy laab ndeꞌ cyi. Tees yuꞌ cyi nu walab nu gyicy ñi nu gat mbecy. 
\p  
\v 18 Rad lagy den nu benu mbecy nac yu iꞌñ Ñgyoozh, orzeꞌ de yu zeꞌ wayicy dey coz cyi. Gun Jesuuz, Iꞌñ Ñgyoozh, rñam dey. Orzeꞌ nuras wac gyicy ras nuy de yu zeꞌ.  
\v 19 Niꞌ ziꞌl rad lagy den nu nac naa mbecy ni Ñgyoozh. Nunu rad lagy den nu nuras riib ic yu dutuub la gyishlombecy ii.  
\v 20 Nunu niꞌ ziꞌl rad lagy den nu Jesuuz, Iꞌñ Ñgyoozh, bi biid mi gyishlombecy ii, nunu briic mi shcab ni den par nu gad lagy na cyu nac Ñgyoozh nu rishli. Nunu bi nac du den Ñgyoozh, biñ nu rishli, gal nu Iꞌñ mi Jesucrisht. Mi zeꞌ nac mi Ñgyoozh nu rishli. Nunu mi zeꞌ biñ nu gyicy nu cui mbañ mbecy tub la.  
\v 21 De ru yu feñ ne̱, cuidad der nu de coz nu ricy mbecy par ñgyoozh, tees walab ñgyoozh rishli.