\id PHP  
\h Filipenses 
\toc1 Dxihtsi nin bacaꞌh San Pahblu loh raꞌ bwiinn Filipos 
\toc2 Filipenses 
\toc3 Fil. 
\mt1 Dxihtsi nin bacaꞌh San Pahblu loh raꞌ bwiinn Filipos 
\c 1  
\s1 GuelrgahpaDxiohs 
\p  
\v 1 Naꞌh Pahblu cun Timoteu, naa nu xmooza Jesucristu, niꞌchin nin racaꞌh nu dxihtsi riiꞌ para laꞌhtu bwiinn guihdxyi Filipos nin naa xpwiinn Dxiohs laasii tuhsi gahcaa naa tu cun Jesucristu nee cun neezaa bwiinn raꞌ nin dziꞌbaloh loh raꞌ bwiinn guidoꞌ cun bwiinn raꞌ nin rahcanee laꞌh raꞌ bwiinn guidoꞌ.  
\v 2 Laꞌh Xtaada Dxiohs nuꞌh cun Xtaada Jesucristu xteenn nuꞌh guniꞌhi guelrahcanee cun guelrbwidxyiistoꞌ laꞌhtu. 
\s1 Gudihdxyi-gunaaba Pahblu loh Dxiohs xcweenta raꞌ xpwiinn Jesucristu 
\p  
\v 3 Guillii-guillii chin riagannastoꞌn laꞌhtu rudiꞌhihn guelzuxchiilli laꞌh Dxiohs nin naa Xtaada Dxiohs nuꞌh;  
\v 4 ya chin rbwiidxyi-rnaꞌbaꞌhn xcweenta tu loh Dxiohs guillii-guillii rnaꞌbaꞌhn guelnasaa para laꞌhtu;  
\v 5 pwihsi riahxiꞌhn pur nin cayahcanee tu naꞌh cagatiꞌchi nuꞌh xchiꞌdxyi Dxiohs desde galohtiiꞌ hasta laꞌn dxyih raꞌ riiꞌ.  
\v 6 Niꞌchin nin nin naꞌpahn siguhra laꞌh Dxiohs zigazii guzoꞌbaloh Ñiꞌh dziꞌn zaꞌca xteenn Ñiꞌh lastoꞌ tu, ziꞌchigahca zuzaꞌloh Ñiꞌh dziꞌn zaꞌca chi para laꞌhtu hastayii chin gabiaꞌgarii Jesucristu stuhbi.  
\v 7 Naa bwen cuꞌchaꞌyiꞌhn nee guꞌnnahn lligaaba squiiꞌ para garaa tu, laasii lastoꞌn riinnan guelnasaa pur xcweenta tu laasii naa tu tuhsi juunta cun naꞌh loh guelruntaaꞌyi xteenn Dxiohs nicala naꞌh nuuꞌhuhn laꞌn latsidxiꞌba o nicala chenee raꞌba naꞌh loh raꞌ guxchiisi tin guluꞌyiꞌhn guchii naa xchiꞌdxyi Dxiohs nin riachiistoꞌ nuꞌh.  
\v 8 Pwihsi Dxiohs naann Ñiꞌh balaaca nin xclaaꞌdzihn gwaꞌhahn loh garaatiiꞌ tu, pur guelnariin xteenn Jesucristu,  
\v 9 nee rdxiꞌhnaꞌhn-rnaꞌbaꞌhn chin rbwiidxihn loh Dxiohs gadzihn gapa tu mahziru guelnadziiꞌhi lasaaꞌ nee cun mahziru dxiuꞌnbwaꞌ tu Dxiohs nee tin mahziru za dxiuꞌnbwaꞌ za tu cuun raꞌ nin mahzi nalluꞌhyi para laꞌhtu cohsazaꞌca,  
\v 10 tin para gacabwaꞌ tu cwii tu cohsa nin mahzi lasahca, tin ziꞌchi guluuꞌyi gubahan nayaa tu nee ayi chuu nin guluuꞌyixcwihin laꞌhtu chin gabiaꞌgarii Daada Jesucristu;  
\v 11 pwihsi laꞌhtu gadzihnee tu tuhbi liꞌhn rooꞌ nin naa xtsiꞌn zaꞌca tu loh Dxiohs nee guunn tu dziꞌn zaꞌca chi cun guelrahcanee xteenn Jesucristu para laꞌhtu nee tin guiñizaꞌcaraꞌ za bwiinn xcweenta Dxiohs loh dxyih jwiisi chi. 
\s1 Naꞌh nabahanahn pur xcweenta Jesucristu 
\p  
\v 12 Bwiitsi lasaaꞌraꞌn, xclaaꞌdzihn gacabwaꞌ tu xcweenta cohsa raꞌ nin guzaꞌcaꞌhn, per laꞌn bariaꞌcaa tin mahziru cheezah guidiꞌchii xchiꞌdxyi Dxiohs, ayi para ñiñihchilohdxiꞌhn, sino que mahziru zeezahan hasta laꞌn dxyih raꞌ riiꞌ.  
\v 13 Garaa bwiinn nin rnabwaꞌ raꞌ palahsiu, nee cun snuhn raꞌ bwiinn, naann raꞌba ñeꞌwꞌhn laꞌn lahtsidxiꞌba pur xcweenta Jesucristu,  
\v 14 ya loh nuuꞌhuhn laꞌn lahtsidxiꞌba, ziahan duxa bwihtsi lasaaꞌ raꞌ nuꞌh guyuuꞌguiꞌw raꞌba bagaluuꞌyi raꞌba xchiꞌdxyi Dxiohs sin nin tuhbi guelnadxyiꞌbi sino que cun mahzi gaduhbistoꞌ raꞌba pur xcweenta Dxiohs.  
\v 15 Guchiin, nuu raꞌ bwiinn nin rñiꞌ xcweenta Jesucristu laasii rdxyiꞌchinee raꞌba naꞌh nee xclaaꞌdzi raꞌ ba gusiaꞌpitii raꞌba bwiinn raꞌ loon peru snuhn raꞌ ba ruhnn raꞌban cun gaduhbistoꞌ raꞌba nee cun gaduhbi xigaaba raꞌba.  
\v 16 Ya bwiinn raꞌ riiꞌ ruhnn raꞌban pur guelnadziiꞌhi nin nahpa raꞌba naꞌh, laasii naann raꞌba Dxiohs bazuh naꞌh tin gulaaloon xchiꞌdxyi Ñiꞌh;  
\v 17 peru snuhn raꞌ ba ruhnn raꞌban pur nin xclaaꞌdzi raꞌba gacalasahca raꞌ ba nezloh raꞌ bwiinn, nee ayi naa raꞌ ba bwiinn nanchiipaꞌh, sino que xclaaꞌdzi raꞌba chuuꞌhuhn loh guelrzahcazii gurooꞌru nnah nin nuu ñieꞌwꞌhn riiꞌ.  
\v 18 Per ayi xi ruhnn pur deeꞌ, ziga caluuꞌyi garoopa cwaꞌh raꞌba xchiꞌdxyi Dxiohs nicala cun lligaaba zaꞌca o nicala za cun lligaaba dxaaba, ya deeꞌ naa nin raguuꞌnasaa stoꞌn, nee cun neezaa mahziru riuuꞌlehgrastoꞌn,  
\v 19 ya niꞌchin naꞌh naꞌpahn siguhra garaaraꞌ deeꞌ guunn para gareꞌhn lahtsidxiꞌba riiꞌ laasii pur nin cabwihdxyi-canaaba tu xcweꞌntahn loh Dxiohs nee cun neezaa guelrahcanee nin nuganiꞌhi Spíritu Saantu Jesucristu naꞌh.  
\v 20 Pwihsi naꞌpahn siguhra pur xcweenta Dxiohs gacanee Ñiꞌh naꞌh ayi gatuhyiloon guꞌnnahn nin xclaaꞌdzi Ñiꞌh gaca nee guunn nadxiipa za Ñiꞌh stoꞌn tin para guiñiꞌn nezloh garaa raꞌ bwiinn raꞌ, nee nnah nee cun neezaa para gaduhbitiiꞌ chieempa, guluuꞌyi raꞌ xcweenta dziꞌn zaꞌca nin guꞌnnahn pur xcweenta Jesucristu taantu ziga nabahanahn o taantu ziga za gachiꞌhn  
\v 21 laasii para naꞌh nabahanahn pur Jesucristu, ya sidela naꞌh gachiꞌhn nahpaa guzaaꞌhahn para dxibaaꞌ,  
\v 22 per sidela naꞌh guibahanahn, nahpaa chezaꞌhn tin guꞌnnahn dziꞌn zaꞌca pur xcweenta Dxiohs, niꞌchin nin ayi gaꞌnnahn cuun nin cwiin.  
\v 23 Pwihsi nagahn duxa garoopa raꞌ cohsa raꞌ riiꞌ para cwiin tuhsin nee naꞌh garoopahn riuꞌstoꞌn; pwihsi neezaa naꞌh xclaaꞌdzizahn gachiꞌhn tin para guzaaꞌhahn dxibaaꞌ chuuꞌhuhn tuhsi juunta cun Jesucristu, laasii niꞌchi naa mahsi mejor para naꞌh;  
\v 24 per para naꞌh, pur laꞌhtu mahziru xchiꞌhn baanabahanahn,  
\v 25 niꞌchin nin naꞌpahn siguhra ziazahru guibahanahn nee neezaa ziaꞌhanneeruhn laꞌhtu para gacaneꞌhruhn laꞌhtu tin para mahziru chechiistoꞌ tu nee cun neezaa gaaldaa tu guelnasaa pur xcweenta xchiꞌdxyi Dxiohs.  
\v 26 Ya ziꞌchi ba nuudxaꞌga gahcahn loh tu, tin mahziru chezah guiñiꞌ zaꞌca tu xcweenta Jesucristu delaantaloh raꞌ bwiinn pur xcweenta nin guunn Ñiꞌh compahñu naꞌh tin dxieꞌldaguiaꞌhan cuun tu stuhbi.  
\v 27 Ya cun sola garaa si raꞌ deeꞌ nahpa gulchiꞌhyii xa guibahan xnehza tu tin ziꞌchi guluuꞌyi guchii riachiistoꞌ tu xchiꞌdxyi cuubi Dxiohs. Ziꞌchigahca za sidela naꞌh dxieꞌldaguiaꞌhn cuun tu o nicala ayi nuu dxieꞌldahn, xclaaꞌdzihn gaꞌpahn rsohn dxiaꞌhan dziꞌtsi tu cun tuhsi lligaaba tin rzuhnee tu pur xcweenta xchiꞌdxyi Dxiohs nin riachiistoꞌ nuꞌh,  
\v 28 sinque ayi guidxyihbiyaaꞌ tu xcweenta xiichiꞌhzi nin guunnee nin rdxyiꞌchinee laꞌhtu, laasii sidela ayi guidxyihbi tu guluuꞌyi tu laꞌh raꞌ ba ñiichiloh raꞌba per taꞌh tu, ya taꞌh tu pur nin gutaꞌh Dxiohs laꞌhtu.  
\v 29 Pwihsi laꞌhtu, ayi bibwiꞌhi tu para chechiisidxiꞌhstoꞌ tu laꞌh Ñiꞌh, sino que neezaa baniꞌhi Ñiꞌh para sacazii tu pur xcweenta nin naa tu xpwiinn Ñiꞌh.  
\v 30 Laꞌhtu cadxihldxyi tu pur xcweenta xchiꞌdxyi Dxiohs ziga bwaꞌhaloh tu xa gudxiꞌldxihn galoh nee neezaa nnah nahpa tu rsohn xa zeezaꞌhn loh xcweenta dxixiꞌhw chi. 
\c 2  
\s1 Nahpaa gusaguꞌdzistoꞌ bwiinn ziga bwiꞌhnn Jesucristu 
\p  
\v 1 Pwihsi sidela ralahsastoꞌ lasaaꞌ tu, ziga ralahsastoꞌ Jesucristu laꞌhtu, nee sidela za nuu tu lligaaba tin gacanadziiꞌhi lasaaꞌ tu, ya sidela dxaꞌga lasaaꞌ tu pur Spíritu Saantu nin nuu lastoꞌ tu, o sidela riacaastoꞌ lasaaꞌ tu pur nin nadziiꞌhi lasaaꞌ tu;  
\v 2 sidela ziꞌchi naa tu pwihsi gulgasiahxistoꞌn para tuꞌpazi pur xcweenta nin guluuꞌyi garaa tu tuhsi mohda ziga ruhnn tu lligaaba, nee neezaa naa tu tuhsi ziga nadziiꞌhi tu Dxiohs, nee laasii tuhsi naa lastoꞌ tu, nee laasii za tuhsi naa lligaaba nin ruhnn tu.  
\v 3 Nee ayi guicaꞌha tu lligaaba nin taaꞌha loh lasaaꞌ tu, ayi za guunn nayaachi tu, sino que gaca tu tuhbi bwiinn nadoꞌlaaꞌdzi, tin guunn tu lligaaba mahzi lasahca bwiinn lasaaꞌ tu que no que laꞌh gahcaa tu.  
\v 4 Ayi nin tuhbi bwiinn chiꞌhyii ba xcweenta xasuuntu si ba, sino que nee nahpaa gacanee ba snuhn raꞌ bwiinn lasaaꞌ ba.  
\v 5 Gulguiꞌhnn lligaaba zigapaꞌh nin bwiꞌhnn Jesucristu.  
\v 6 Nicala naa Ñiꞌh Dxiohs gahcaa, ayi biaa Ñiꞌh xcweenta gahca Ñiꞌh, ziga naa Ñiꞌh Dxiohs,  
\v 7 sino que basaaꞌn si Ñiꞌh xquelrnabwaꞌ Ñiꞌh ya biahca Ñiꞌh tuhbi moozazi loh Xtaada Ñiꞌh, niꞌchin nin guulaa Ñiꞌh zigazi tuhbi ndxiꞌhw, coma ziga laꞌh gahca nuꞌh,  
\v 8 ya chin biahca Ñiꞌh zigazi tuhbi ndxiꞌhw zi basaguꞌdzistoꞌ Ñiꞌh bazaꞌloh Ñiꞌh garaa nin guhca xigaaba Xtaada Dxiohs Ñiꞌh. Ya pur garaa nin bazoꞌbadxiahga Ñiꞌh xchiꞌdxyi Xtaada Ñiꞌh guziꞌguehlda Ñiꞌh guhchi Ñiꞌh, nee nicala xñahxtuhyi ziga guhchi Ñiꞌh loh tuhbi cruhzi.  
\v 9 Niꞌchin nin mahzi bwiꞌhnn lasahca Dxiohs laꞌh Ñiꞌh, nee bazoꞌba za Xtaada Dxiohs Ñiꞌh lah Ñiꞌh nin mahzi lasahca loh garaatiiꞌ lah raꞌ bwiinn nin caꞌha raꞌba,  
\v 10 tin chin guluuꞌyiloh lah Jesucristu, zuzuꞌhnllihbi raꞌ garaa raꞌ nin rii raꞌ dxibaaꞌ, cun loh guihdxyiyuh, nee neezaa nin nuu raꞌ laꞌn loh yuh nez loh Ñiꞌh,  
\v 11 ya garaatiiꞌ raꞌ ba dxiuꞌnbwaꞌ raꞌba Jesucristu nahpa guelrnabwaꞌ tin ziꞌchi garaatiiꞌ raꞌ bwiinn guiñiꞌ zaꞌca xcweenta Xtaada Dxiohs nuꞌh. 
\s1 Bwiinn raꞌ nin riachiistoꞌraꞌñiꞌh laꞌh Dxiohs naa raꞌ ba biaꞌñih loh guihdxyiyuh 
\p  
\v 12 Pur loh taantu, bwiitsi lasaaꞌraꞌn, pwihsi ziga bazoꞌbadxiahga tu xchiꞌdxyiꞌhn chin guyuuꞌhuhn lahda raꞌ tu, ziꞌchigahca za nnah gulgazoꞌbadxiahga xchiꞌdxyiꞌhn mahziru nnah nin nuuꞌhuhn zihtu, nee gulguiꞌhnn-gulguiꞌhnn lligaaba nayaa xa guzaꞌloh tu dziꞌn zaꞌca nin guzoꞌbaloh Dxiohs laꞌn lastoꞌ tu tin taꞌh tu loh duhlda.  
\v 13 Pwihsi Dxiohs naa nin ruhnnbiñih lligaaba zaꞌca stoꞌ tu, tin ziꞌchi saꞌbistoꞌ tu, nee tin gaapaa za tu jweersi guzaꞌloh tu xcweenta dziꞌn zaꞌca chi laasii ziꞌchi naa xigaaba Ñiꞌh gaca, laasii ziꞌchi riuꞌstoꞌ Ñiꞌh.  
\v 14 Ya gaduhbi cayuhnn tun ayi cwachi tu guelchiah nee ayiza guinaabadxyiꞌdxyi tu xi para nahpaa guunn tun,  
\v 15 tin para nin tuhbi bwiinn ayi guidxeela raꞌ ba xiilla tuhbi xtuhlda tu, tin ziꞌchi gaca tu bwiinn nayaa lliiꞌn Dxiohs loh raꞌ bwiinn mahlaraꞌ, bwiinn naxihn raꞌ ya nezloh raꞌ ba gaca tu zigazi tuhbi dxih llaꞌndxibaaꞌ nin ruziaꞌñih loh tuhbi guihdxyiyuh nacahyi.  
\v 16 Gulchenee zaꞌca xchiꞌdxyi Dxiohs nin runiꞌhi guelnabahan laꞌh bwiinn, tin chin gabiaꞌgarii Jesucristu, dxiahxiꞌhn xcweenta tu laasii gacabwaꞌn ayi guhcaꞌnzahziin nee ayiza bwiꞌhnnaꞌhn tuhbi dziꞌn lliaaꞌha.  
\v 17 Ya nicala chiinn raꞌ ba naꞌh gacaꞌhn ziga tuhbi guel rgaaꞌda tin para chiooꞌhohn yihca guel rgaaꞌda nin rugaaꞌda tu laꞌh Dxiohs pur nin riachiistoꞌ tu laꞌh Ñiꞌh, naꞌh riahxiꞌhn ya riahxizahn xcweenta garaatiiꞌ tu.  
\v 18 Gulchuuꞌlehgra za nee tu, nee gulguicaꞌha guelalehgra chi xcweeꞌntahn. 
\s1 Cayuꞌnnahn lligaaba cuꞌneezahn Timoteu 
\p  
\v 19 Ya ziga naan tuhsi cun Daada Jesucristu, cabweꞌzaꞌhn gusaaꞌn Ñiꞌh tin dxiooba cuꞌneezahn Timoteu para laꞌhtu, tin mahziru dxiaxistoꞌhn dxihnaꞌhn xcweenta tu,  
\v 20 laasii ayi naꞌpahn chyuulla stuhbi nin guunn lligaaba ziga naꞌh nee chuu ba lligaaba xcweenta tu clahru ayi ba.  
\v 21 Garaa raꞌ ba rdxiꞌhyii raꞌ ba xcweenta gahcaa xasuntu raꞌba ya ayi xcweenta dxiꞌh Jesucristu.  
\v 22 Per laꞌhtu banaann tu bwengahcaa naa xmohda Timoteu, ziga nuu nabahannee bi naꞌh loh xcweenta xchiꞌdxyi Dxiohs, cayahcanee bi naꞌh zigazi tuhbi lliiꞌnahn.  
\v 23 Pwihsi niꞌchi nin cayuꞌnnahn lligaaba cuꞌneezahn bi talguꞌn si chin gaapasihn rsohn xa zeezah xcweenta xasuuntahn,  
\v 24 neezaa naꞌh cayuꞌnnzahn lligaaba dxieꞌldaguiaꞌhn cuun tu sidela gusaaꞌn Jesucristu. 
\s1 Baguꞌnehza Pahblu laꞌh Epafroditu 
\p  
\v 25 Per nnah bwiꞌhnnaꞌhn lligaaba nahpaa gaguꞌneezahn laꞌh bwiitsi nuꞌh Epafroditu, nin rahcanee naꞌh cun nin rutiꞌdxilohnee nu loh trabahjw xcweenta xchiꞌdxyi Dxiohs, laꞌhbi nin guluꞌnehza tu laꞌhgahca tu tin guhcanee bi naꞌh xcweenta tu pur nin rchiꞌhnaꞌhn.  
\v 26 Ya gaguꞌneezahn laꞌhbi laasii xclaaꞌdzi duxa bi gwaꞌha bi cuun garaatiiꞌ tu, ya nuu bi guelrzaaꞌ xcweenta tu laasii bihn tu guhcalluꞌhu bi.  
\v 27 Nee guchii guhcalluꞌhu bi ya mweer ñahchi bi per balahsastoꞌ Dxiohs laꞌhbi nee ayi laꞌhsidxiꞌh bi sino que neezaa naꞌh, tin para ayi ñuuꞌruhn triixta mahziru cun nin nuuꞌhuhn.  
\v 28 Niꞌchin nin nahpaa gaguꞌneezahn bi carrih, tin dxiuuꞌlehgra tu chin gwaꞌh tu loh bi stuhbi nee tin para ayiza chyu ruhnn xigaaba bi.  
\v 29 Gulgaannloh laꞌhbi cun gaduhbi stoꞌ tu, ziga naa bi bwitsi lasaaꞌ raꞌnuꞌh loh Jesucristu, nee gulguiꞌhnn lasahca laꞌh raꞌ bwiinn nin naa ziga laꞌhbi,  
\v 30 laasii ya mwer ñahchi bi pur bwiꞌhnn bi xtsiꞌn Jesucristu, ya ayi biaa bi xquelnabahan bi pur biꞌ bi xlugahri tu, laasii ayi guhpaa tu chieempa ñiꞌ tu riiꞌ laꞌhtu. 
\c 3  
\s1 Nin guchiipaꞌh lasahca 
\p  
\v 1 Yannah, bwiitsiraꞌn, gulcuuꞌlehgra stoꞌ tu xcweenta ziga naa tu tuhsi cun Jesucristu. Par naꞌh ayi naa nin tuhbi llahn gucaꞌhn stuhbi nin bacaꞌhlahn, laasii laꞌhtu gaapaan xneziuh tu.  
\v 2 Gulgahca nasiin cun xcweenta raꞌ bwiinn nin rusaguiꞌhi nin ruhnn ziga ruhnn bwehcuraꞌ, bwiinn raꞌ chi nin ruhnn raꞌ dziꞌn dxaaba, ya laꞌh gahcaa raꞌba nin ruhnn jweersi riuuꞌ tuhbi bwaꞌ tihxi bwiinn ziga guhca costuumbre nin badiꞌhi Dxiohs guunn raꞌ bwiinn Israel, tin bwaꞌ chi baluuꞌyi naa raꞌba xpwiinn Dxiohs,  
\v 3 per nnah laꞌh nuꞌh naa nuꞌh xpwiinn Dxiohs pur nin rbweeza Spíritu Saantu laꞌn lastoꞌ nuꞌh ziga sehn nanchiipaꞌh, ayi ziga rluuꞌyiraꞌdxiꞌh naa raꞌba xpwiinn Dxiohs tin naa nuꞌh nin raann laꞌh Dxiohs ziga ruluuꞌyi Spíritu Saantu guidiꞌhnn nuꞌh neezaa radiꞌhiguuxta stoꞌ raꞌ nuꞌh pur nin bwiꞌhnn Jesucristu xcweenta raꞌnuꞌh, niꞌchin nin ayi chyu chechiistoꞌ ñiꞌh bwaꞌ o pur xiilla xcweenta dziꞌn zaꞌca nin ñachidiꞌhnn raꞌnuꞌh.  
\v 4 Nicala nee naꞌh nahpahn xiilla nin chechiistoꞌn pur dziꞌn zaꞌca nin bwiꞌhnnaꞌhn ya sidela gahbi stuhbi bwiinn nahpa ba xiilla dziꞌn zaꞌca nin riachiistoꞌ ba par taꞌh ba loh duhlda naꞌh mahzi naꞌpahn para taꞌhn loh duhlda  
\v 5 laasii chin guulahn xuhnna dxyih nuuꞌhuhn chin bacaꞌh raꞌba bwaꞌ riiꞌ naꞌh nin naa xsehn raꞌ bwiinn Israel ziga ruluuꞌyi naa raꞌba xpwiinn Dxiohs, neezaa naan tuhbi bwiinn Israel, tuhbi bwiinn nin naa xpwiinn guehtu Benjamihn nin guhca lliiꞌn Israel, nee cun naazahn tuhbi bwiinn nin rñiꞌ xchiꞌdxyi raꞌ bwiinn hebreu laasii garoopa xcuzahnaꞌhn rñiꞌ dxyiꞌdxyi hebreu chi. Ya pur taantu nin bazoꞌbadxiaagahn xlehyi raꞌ bwiinn Israel, niꞌchin nin guhcaꞌhn xpartihdu raꞌ bwiinn fariseu raꞌ nin mahzi ruzoꞌbadxiahga lehyi chi.  
\v 6 Ya de taantu guzaꞌbistoꞌn xcostuumbre bwiinn Israel raꞌ, gucaꞌhn naꞌhlaꞌhn laꞌh raꞌ bwiinn nin guleꞌhestoꞌ raꞌ ñiꞌh costuumbre lehyi Moisehs laasii xinaa gwachiistoꞌ raꞌba xchiꞌdxyi Daada Jesucristu, ya pur taantu nin bazoꞌbadxiaagahn ziga naa xlehyi Moisehs ayi guyuuꞌ nin tuhbi bwiinn nin ñiñiꞌ xcweenta xtuuldahn.  
\v 7 Per nicala garaa raꞌ deeꞌ nin bwiꞌhnnaꞌhn lligaaba lasahca duxa para naꞌh, per badzihn dxyih nin badiꞌhihn cweenta naaraꞌn cohsa nin bwiꞌhnn mahla naꞌh pur nin biuꞌnbwaꞌn laꞌh Jesucristu ya bataꞌh Ñiꞌh naꞌh loh duhlda.  
\v 8 Ya ademahzi de niꞌchi raꞌ ruꞌnnahn lligaaba ayi xi balluꞌyitiiꞌ cweenta raꞌ chi para naꞌh pur taantu ziahanru nin lasahca biuꞌnbwaꞌn laꞌh Xtaada Jesucristu nuꞌh, ya pur xcweenta Ñiꞌh bañiichihn garaa raꞌ cohsa, ya cohsa raꞌ chi rguꞌbwaꞌn naaraꞌn zigazii dxihlli raꞌ nin guyuuꞌbwih laasii nnah cun sola nuꞌnbwaꞌn Jesucristu lasahca para naꞌh,  
\v 9 laasii xclaaꞌdzihn chuuꞌhuhn tuhsi cun laꞌh Ñiꞌh. Ayi rdxiꞌhyihn nez hasta canehza gacaꞌhn tuhbi bwiinn nin ayi xi xtuhlda ñiꞌh pur xcweenta lehyi, sino que pur nin riachiistoꞌn laꞌh Jesucristu; o sea Dxiohs ruhnn nabahan nayaaꞌhahn, nabahan zaꞌcaꞌhn pur xcweenta nin riachiipaꞌhstoꞌn laꞌh Jesucristu.  
\v 10 Niꞌchin mahzi xclaaꞌdzihn dxiuꞌnbwaꞌn laꞌh Jesucristu, tin guibahanahn loh jweersirooꞌ nin bacwaꞌhn laꞌh Ñiꞌh loh guelguhchi nee tin sacaziineen laꞌh Ñiꞌh loh guelrzacazii nin gudiiꞌdxi Ñiꞌh, nee tin ayi za dxiaan xquelnabahanahn ziga ayi biaa Ñiꞌh xquelnabahan Ñiꞌh chin guhchi Ñiꞌh,  
\v 11 tin ziꞌchi nicala gutiꞌdxiloon trabahjw duxa loh guidxyiyuh riiꞌ zaꞌpahn siguhra gaaldahn loh guelnabahan nacuubi chin gucwaꞌhn Dxiohs laꞌh raꞌ bwiinnguuchi. 
\s1 Xcweenta ziga nahpaa guunn luꞌh tin gadzihn luꞌh loh mehta nin lasahca 
\p  
\v 12 Ayi xclaaꞌdzihn guiñiꞌn loh tu laꞌnbidxeela la guelnabahan nacuubi chi, o ya laꞌn bazaꞌlohtiiꞌ la xtsiꞌn zaꞌca Dxiohs laꞌn lastoꞌn, sino que zezaꞌhn nez delaanta cun nin cabweꞌzaꞌhn tin guidiaꞌhan zaldaa guicaꞌhahn prehmiu nin guniꞌhi Ñiꞌh naꞌh, ya pur prehmiu riiꞌ gulii Ñiꞌh naꞌh galoh tin biahcaꞌhn tuhbi xpwiinn Ñiꞌh.  
\v 13 Bwiitsiraꞌn, ayi cañiꞌn naꞌh gahcaa laꞌn guhldaalaan; per nin naꞌpaa cayuꞌnnahn naa naꞌpaa dxiaꞌldastoꞌn nin biaꞌhancah raꞌ nez diitsihn; mahs chaꞌyi chenaꞌhlaꞌhn nin zee ñiidxiuu nez loon,  
\v 14 tin gadzihnaꞌhn loh mehta nee tin guꞌnnahn gahn prehmiu nin naa guelnabahan nacuubi laasii pur niꞌchi gudihdxyi Dxiohs guibahanee nuꞌh laꞌh Ñiꞌh dxibaaꞌ pur xcweenta tuhsi naa nuꞌh cun Jesucristu.  
\v 15 Ya garaa raꞌ nuꞌh ziga rachigubwaꞌ nuꞌh ya guyuuꞌ biaꞌñih loh xigaaba nuꞌh ziga riachiistoꞌ raꞌ nuꞌh laꞌh Ñiꞌh, nahpaa guidiꞌhnn raꞌ nuꞌh lligaaba squiiꞌ pur cweenta raꞌ riiꞌ. Ya sidelaa xiilla stuhbi cohsa ruhnn tu lligaaba stuhbi foorma, Dxiohs gahcaa za guluuꞌyi cweenta raꞌ chi laꞌhtu.  
\v 16 Per nin nahpaa guidiꞌhnn nuꞌh sihn; guibahan nuꞌh tuhsi diacweerdu cun xcweenta nin ya guhldaa raꞌ nuꞌh.  
\v 17 Bwiitsi lasaaꞌ raꞌ, gulchezahnee xcweenta ziga ruꞌnnahn nee gulguiaꞌhadziꞌtsi laꞌh raꞌ nin nabahan tuhsi diacweerdu cun xcweenta nin zozahnee nuꞌh.  
\v 18 Pwihsi ziahanla bweelta guñiꞌn, per nicala nnah cun ñihsabwii nin riaaba loon cañiꞌn stuhbi, nuu raꞌ ziahan bwiinn nin rii nabahan nnah nabahanee raꞌba xcweentazi raꞌ ba ya ziꞌchi ruluuꞌyi ziga naa raꞌba bwiinn nin rbweꞌhestoꞌ ziga guhchi Jesucristu pur xcweenta raꞌ bwiinn guidxyiyuh.  
\v 19 Per xfihn raꞌ ba naa gabihldxyi, laasii cun sola ruzoꞌbadxiahga raꞌba nin xclaaꞌdzi tihxi raꞌba ya ruhnn nayaachi raꞌba xlawaaꞌha nin gutuhyiloh raꞌ ba pur cohsaxihn nin ruhnn raꞌ ba, laasii cohsa guidxyiyuh rzaꞌbistoꞌ raꞌ ba ya xcweenta Dxiohs rbweꞌcaa raꞌ ba,  
\v 20 per ya ziga laꞌhraꞌnuꞌh lahdxyi raꞌnuꞌh naa nez dxibaaꞌ nee dxyubweeza raꞌnuꞌh nez dxibaaꞌ guitahntee Daada nin gutaꞌh laꞌhnuꞌh nin naa Daada Jesucristu xteenn nuꞌh.  
\v 21 Ya laꞌhÑiꞌh guchaꞌh Ñiꞌh bweꞌltihxi probilaasa raꞌnuꞌh tin gacan zigazi bweꞌltihxi nabahandziꞌtsi Ñiꞌh, ya guunn Ñiꞌh ziꞌchi pur xcweenta guelrnabwaꞌ nin nahpaa Ñiꞌh tin guunnan para guinabwaꞌ Ñiꞌh garaa raꞌ cohsa. 
\c 4  
\s1 Guldxiahxi par tuꞌpazi pur xcweenta Daada Dxiohs 
\p  
\v 1 Pwihsi pur niꞌchin bwiitsi lasaaꞌraꞌn, nin xclaaꞌdzihn gwaꞌhn loh raꞌ ñiꞌh; laꞌhtu nin nadziiꞌhiraꞌn, nin riahxiꞌhn xcweenta raꞌñiꞌh nee cun naa za tu tuhbi prehmiu xteꞌnnahn, gulchezah dziꞌtsi pur xcweenta ziga nin riachiistoꞌ tu xchiꞌdxyi Daada Jesucristu, nee  
\v 2 rdxiꞌhnaꞌhn loh Evodia cun loh Síntique, cwiih raꞌbi tuhsi diacweerdu zigazi bwehldaadziꞌtsi raꞌbi xcweenta lah Daada Jesucristu,  
\v 3 ya yiꞌh xcompañeeruꞌhn nanchiin nin ridiꞌhnnee dziꞌn, rnaꞌbaꞌhn loh luꞌh gacanee luꞌh laꞌh raꞌ bizaaꞌn raꞌnuꞌh laasii laꞌhraꞌbi guhcanee raꞌbi naꞌh bidiꞌchii xchiꞌdxyi Dxiohs tuhsi juunta cun Clemente cun spaalda raꞌ nin guhcanee naꞌh. Lah raꞌbi ya naalaꞌn puunta loh dxihtsi nin naa guelnabahan nacuubi. 
\p  
\v 4 Guldxiahxi tuhpaꞌzi xcweenta tuhsi naa nuꞌh cun Daada Jesucristu; rnaꞌbaꞌhn loh tu ¡guldxiahxi par tuhpaꞌzi!,  
\v 5 tin garaa raꞌ bwiinn dxiuꞌnbwaꞌ raꞌ ba laꞌhtu zigazi nahpaa tu paseensi, laasii laꞌh Daada Jesucristu ya mwehrla guibiaꞌgarii loh guidxyiyuh stuhbi,  
\v 6 nee ayi chuu tu guelrzaaꞌ pur xiilla cohsa, sino que chin rbwihdxi-rnaaba tu loh Dxiohs gulchiꞌhn gulguinaaba loh Ñiꞌh xcweenta cohsa raꞌ chi, nee gulgadiꞌhi za guelzuxchiilli laꞌh Ñiꞌh  
\v 7 ya tin laꞌh Ñiꞌh gusacwahchidxyii Ñiꞌh stoꞌ tu ya cun guelnagaꞌldiuh chi dxiinn tun per ayi gacabwaꞌ tu xcweenta guelnasaaroo nin nahpan ya laꞌh Ñiꞌh gaapa Ñiꞌh lastoꞌ tu cun xigaaba tu pur naa tu tuhsi cun Jesucristu. 
\s1 Gulguiꞌhn lligaaba xcweenta garaatiiꞌ raꞌ nin naa bwen 
\p  
\v 8 Pur luulchima bwiitsi lasaaꞌ raꞌ, gulguiꞌhnn lligaaba xcweenta garaa raꞌ nin naa raꞌ guchii, loh garaa raꞌ nin chaꞌyi, loh garaa raꞌ nin naa xnehza, loh garaa raꞌ nin naa ganaalla nayaa nee gulguiꞌhnn lligaaba loh garaa raꞌ nin naa bwen nee loh garaa raꞌ nin rñiꞌ zaꞌca raꞌ bwiinn xcweenta ñiꞌh cun garaa raꞌ nin ruhn tucahri ziga xmohda bwiinn cun nin mahzi dziꞌbaloh loh garaatiiꞌ.  
\v 9 Gulgasiꞌdxi nin baluuꞌyiꞌhn laꞌhtu nee cun xcweenta nin gucaꞌha tu, cun garaa raꞌ nin bihn tu guñiꞌn cun garaa za raꞌ nin bwaꞌh tu bwiꞌhnnaꞌhn. Gulguiꞌhnnzan ziꞌchi, ya Dxiohs nin rusacwahchidxyii stoꞌ bwiinn chuunee laꞌhtu. 
\s1 Guelrgaaꞌda nin badiꞌhi raꞌ bwiinn filipenses laꞌh Pahblu 
\p  
\v 10 Riahxiduxaꞌhn xcweenta nin naa nuꞌh tuhsi cun Daada Jesucristu pur nin gubiaꞌgarii bagannastoꞌ tu naꞌh bwiꞌhnn tu cumpahñu naꞌh. Naꞌnnahn dez galoh guyuuꞌpaꞌh tu lligaaba ñahcanee tu naꞌh per ayi guhpa tu lugahri.  
\v 11 Ayi cañiꞌn laasii pur cachiꞌhnaꞌhn, pwihsi naꞌh rahca rbahchidxyiistoꞌn cun cuunchiꞌhzi nin naꞌpahn.  
\v 12 Naꞌnnahn xa guibahanahn loh guelprohbi, neezaa xa guibahanahn loh guelnazaꞌca, nee laꞌn naꞌnnzahn xa gutiꞌdxiloon xiichiꞌhzi, nicala loh guelrchiaꞌhn nee nicalaza gadxahstoꞌn, nee nicala tiidxisuuruu ziahan nin gaꞌpahn o nicala ayi xi gaꞌpaatiiꞌzahn.  
\v 13 Loh garaatiiꞌ raꞌ deeꞌ zaꞌca gutiꞌdxilohraꞌñin laasii laꞌh Jesucristu naa guelnadaꞌn xteꞌnnahn.  
\v 14 Pwihsi bwen gahcaa bwiꞌhnn tu naꞌh gudxiꞌzi tu xcweenta ziga cazaꞌcaꞌhn.  
\v 15 Ya laꞌh gahcaa tu naann tu chin babiiꞌhihn loh guihdxyi hasta rii tu caa, chin guzohbaloh baluꞌyiꞌhn xchiꞌdxyi Dxiohs loh tu, laꞌhdxiꞌh tu ziga naa tu bwiinn guidoꞌ xteenn Filipos, laꞌhdxiꞌh tu naa tu nin guluꞌnehza raꞌ tuhbi guelrgaaꞌda para naꞌh pur xcweenta xchiꞌdxyi Dxiohs nin guñiꞌn loh tu.  
\v 16 Pwihsi neezaa chin guyuuꞌhuhn guihdxyi Tesalónica, guluꞌnehza za tu tuhbi-chiohpwiꞌhn guelargaaꞌda para naꞌh nin bichiꞌhnaꞌhn riꞌchi.  
\v 17 Nee naꞌh ayi nuuꞌhuhn lligaaba si nin guicaꞌhahn xixteenn tu; nin xclaaꞌdzihn gaca para laꞌhtu gadzihn guicaꞌharu tu xcweenta nin lasahca xcweenta tu nez delaanta loh Dxiohs.  
\v 18 Pwihsi naꞌh laꞌn gucaꞌha garaatiiꞌ, ya hasta cadiiꞌdxisuu ru para naꞌh cun nin guluꞌnehzanee tu laꞌh Epafroditu, cun niꞌchi laꞌchin para naꞌh. Nin guluꞌnehza tu para naꞌh naan zigazi tuhbi guhn nin xchiaꞌ nahxi nin nalluꞌhyi duxa nezloh Dxiohs.  
\v 19 Pwihsi, Xchiohs gahcaa nuꞌh guluuꞌyi garaa raꞌ nin dxiaꞌdxi para laꞌhtu laasii zirooꞌ duxa nin nahpaachaꞌyi Ñiꞌh xcweenta Jesucristu.  
\v 20 ¡Gloria gadiꞌhi nuꞌh laꞌh Xtaada Dxiohs nuꞌh para tuꞌpazi! Pwihsi ziꞌchi gaca. 
\s1 Luulchima guelrgahpaDxiohs 
\p  
\v 21 GulgahpaDxiohs xcweeꞌntahn laꞌh raꞌ garaatiiꞌ raꞌ nin riachiistoꞌ raꞌ ñiꞌh xchiꞌdxyi Dxiohs, pur xcweenta tuhsi naa nuꞌh loh Jesucristu, ya bwiitsi lasaaꞌ raꞌ nuꞌh nin nuunee naꞌh riiꞌ rguꞌnehza za raꞌba tuhbi guelrgahpaDxiohs para laꞌhtu.  
\v 22 Neezaa nin riachiistoꞌ raꞌ ñiꞌh xchiꞌdxyi Dxiohs rxeꞌhla raꞌba tuhbi guelrgahpaDxiohs para laꞌhtu, nee bwiinn raꞌ nin ruhnn raꞌ dziꞌn loh Emperador Romanu mahzi ru rguꞌnehza za raꞌ ba tuhbi guelrgahpaDxiohs para laꞌh tu.  
\v 23 Dxiohs guntaaꞌyi yihca garaatiiꞌ tu. Ziꞌchi gaca pwihsi.