\id HEB  
\h Hebreos 
\toc1 Tuhbi dxihtsi nin biaꞌhan loh raꞌ bwiinn Hebreu raꞌ 
\toc2 Hebreos 
\toc3 He. 
\mt1 Tuhbi dxihtsi nin biaꞌhan loh raꞌ bwiinn Hebreu raꞌ 
\c 1  
\s1 Dxiohs guñiꞌ pur Lliiꞌn Ñiꞌh 
\p  
\v 1 Laꞌn dxyih galohtiiꞌyi raꞌ ziahan guhca dxyiꞌdxyi nin guñiꞌ Dxiohs loh raꞌ xtitalliudoꞌ raꞌ nuꞌh, nee ziahan za guñiꞌ Ñiꞌh pur guehtu daada raꞌ nin bacaꞌh xchiꞌdxyi Ñiꞌh,  
\v 2 per nnah laꞌn dxyih raꞌ riiꞌ guñiꞌ Dxiohs loh nuꞌh pur Lliiꞌn Ñiꞌh nee basiaꞌhannee Ñiꞌh garaatiiꞌ nin nuu guidxyiyuh laꞌh Lliiꞌn Ñiꞌh laasii pur Lliiꞌn Ñiꞌh bwiꞌhnnchaꞌyi Ñiꞌh garaatiiꞌ.  
\v 3 Niꞌchin Lliiꞌn Dxiohs naa laꞌgahca llaꞌñih nin naa Dxiohs nee naa paꞌhcaa Ñiꞌh ziga gahca naa Xtaada Dxiohs Ñiꞌh, nee cun xquelrnabwaꞌ Ñiꞌh naa dziꞌtsi garaa niꞌchi si gurihxchih, ya chin guyaꞌloh basiaa Ñiꞌh laꞌh nuꞌh loh duhlda, guzohba Ñiꞌh xlahdu derehchu Xtaada Ñiꞌh. 
\s1 Lasahca ru Lliiꞌn Dxiohs loh raꞌ xaanjla Ñiꞌh 
\p  
\v 4 Bwiꞌhnn lasahca ru Dxiohs laꞌh Lliiꞌn Ñiꞌh loh raꞌ aanjla raꞌ, laasii Lliiꞌn gahca Ñiꞌh dziꞌbaloh loh raꞌ aanjla pur zirooꞌ ru guelrnabwaꞌ nin nahpa Ñiꞌh nnah cun neezaa dziꞌn nin nahpa Ñiꞌh,  
\v 5 laasii laꞌh Dxiohs nin tuhbi dxyih ayi guñiꞌ Ñiꞌh loh nin tuhbi xaanjla Ñiꞌh ñahbi Ñiꞌh: 
\q1 Yiꞌh naa luꞌh Lliiꞌnahn; nnadxyih guliin yiꞌh tin guinabwaꞌ luꞌh. 
\p Nin ayi za guñiꞌ Ñiꞌh loh tuhbi xaanjla Ñiꞌh: 
\q1 Naꞌh gacaꞌhn Xtaada luꞌh, nee yiꞌh gaca luꞌh Lliiꞌnahn. 
\p  
\v 6 Per dxyih nin guxeꞌhla Ñiꞌh Lliiꞌn galoh Ñiꞌh loh guidxyiyuh rahbi Ñiꞌh: 
\q1 Garaa raꞌ xaanjlaꞌhn gulgazuꞌnllihbi nez loh Lliiꞌnahn. 
\p  
\v 7 Ya chin bazeꞌta Dxiohs xaanjla raꞌ Ñiꞌh rahbi Ñiꞌh: 
\q1 Ruhnn Ñiꞌh xaanjla Ñiꞌh ziga bwih, ya xmooza Ñiꞌh ruhnn Ñiꞌh ziga bwehla. 
\p  
\v 8 Per chin bazeꞌta Ñiꞌh Lliiꞌn Ñiꞌh rahbi Ñiꞌh: 
\q1 Yiꞌh naa luꞌh Dxiohs, nee ayi chuu dxyih chaꞌloh xquelrnabwaꞌ luꞌh, 
\q1 nee zinabwaꞌ xnehza za luꞌh. 
\q1  
\v 9 Rucaꞌh stoꞌ luꞌh guunn luꞌh dziꞌn zaꞌca ya rdxyiꞌchi luꞌh gallee nin naa dxaaba raꞌ, 
\q1 niꞌchin laꞌh Dxiohs, Xchiohs luꞌh, basiahxi ru Ñiꞌh laꞌn lastoꞌ luꞌh mahzi ru que laꞌh raꞌ lasaaꞌ raꞌ luꞌh. 
\p  
\v 10 Rñiꞌ za Ñiꞌh squiiꞌ: 
\q1 Yiꞌh Daada, chin guzoꞌbalohyi bwiꞌhnnchaꞌyi luꞌh garaatiiꞌ raꞌ, bwiꞌhnnchaꞌyi luꞌh guidxyiyuh, 
\q1 yiꞌh gahca za bwiꞌhnnchaꞌyi luꞌh dxibaaꞌ. 
\q1  
\v 11 Laꞌh raꞌn ziñichiloh raꞌn per yiꞌh ba nuu nabahan luꞌh para tuꞌpazi, 
\q1 ya garaa raꞌ nin nuu guidxyiyuh ziuhlla raꞌn ziga riuhlla lahdxi; 
\q1  
\v 12 zutuꞌbi raꞌ luꞌhn ziga rduꞌbi tuhbi lahdxi per yiꞌh ayi guidxaꞌh ziga naa luꞌh ya xihza raꞌ luꞌh ayi chuutiiꞌ dxyih nin gazaaꞌ raꞌn. 
\p  
\v 13 Nee ¿cuucalla rahbi Dxiohs loh tuhbi xaanjla Ñiꞌh squiiꞌ?: 
\q1 Guzohba xlahdu derehchuꞌhn tin guinabwaꞌ luꞌh hasta guigaꞌha loh dxyihyi nin gutsiiga raꞌn bwiinn raꞌ nin rdxyiꞌchinee yiꞌh loh luꞌh, 
\p  
\v 14 laasii laꞌh raꞌ aanjla raꞌ, spíritu si naa raꞌ ba loh xtsiꞌn Dxiohs tin ziꞌchi gacanee raꞌ ba laꞌh raꞌ bwiinn nin guicaꞌha guel nabahan nin ayi ñichilohtiiꞌ. 
\c 2  
\s1 Ayi chyu gusaaꞌn dxyiꞌdxyi nin gutaꞌh laꞌh nuꞌh loh duhlda 
\p  
\v 1 Niꞌchin nnah chuu nuꞌh chaꞌzi nuꞌh xchiꞌdxyi Dxiohs nin ba bihn dxiahga nuꞌh, tin ayi nnagah gachiriaꞌcaa nuꞌh loh xneziuh Dxiohs,  
\v 2 laasii laꞌh tu ba naann tu nahpa guzohba dxyiꞌdxyi nin guñiꞌ raꞌ xaanjla Dxiohs laꞌn dxyih galoh raꞌ, ya bwiinn raꞌ nin guyuuꞌ xtuhlda ñiꞌh pur ayi bazoꞌbadxiahga raꞌ ba dxyiꞌdxyi chi batiꞌdxi Dxiohs laꞌh raꞌ ba loh guelrzaꞌcazii duxa.  
\v 3 Yannah, ¿xa gaca taꞌh nuꞌh loh xquel rzaꞌcazii Dxiohs sidela laꞌh nuꞌh gasaaꞌn nuꞌh dxyiꞌdxyi nin lasahca ru nin gutaꞌh laꞌh nuꞌh loh duhlda? Laasii laꞌh gahca Daada Jesucristu basiaꞌhannee dxyiꞌdxyi chi laꞌh raꞌ xpwiinn Ñiꞌh, chiꞌchiyi baluuꞌyi raꞌ ba dxyiꞌdxyi chi laꞌh nuꞌh,  
\v 4 pwihsi Dxiohs baluuꞌyi laꞌh nuꞌh guchii paꞌca dxyiꞌdxyi raꞌ chi laasii bwiꞌhnn Ñiꞌh sehn raꞌ neezaa ziahan dziꞌn roo raꞌ nin badxyigaaꞌ duxa loh raꞌ bwiinn raꞌ, neezaa ziahan raꞌ dziꞌn zaꞌca bwiꞌhnn Ñiꞌh, ya badiꞌhi za Ñiꞌh Spíritu Saantu xteenn Ñiꞌh laꞌh raꞌ nin gwachiistoꞌ xchiꞌdxyi Ñiꞌh tin guunn raꞌ tuhbigah raꞌ nuꞌh guriin-guriin dziꞌn nin xclaaꞌdzi Dxiohs guidiꞌhnn nuꞌh. 
\s1 Jesucristu naa nin gutaꞌh laꞌh nuꞌh loh duhlda 
\p  
\v 5 Dxiohs ayi badiꞌhi Ñiꞌh guelrnabwaꞌ laꞌh raꞌ xaanjla Ñiꞌh ziga ñinabwaꞌ raꞌ ba loh guidxyiyuh cuubi nin dxuugazeꞌta nuꞌh nnah.  
\v 6 Guyuuꞌ tuhbi bwiinn nin bacaꞌh xchiꞌdxyi Dxiohs loh dxihtsi hasta rñiꞌ squiiꞌ: 
\q1 ¿Chyu naa tuhbi ndxiꞌhw, tin dxiagannastoꞌ luꞌh laꞌh ba? 
\q1 O ¿chyu naa bwiinn guidxyiyuh tin guzaꞌstoꞌ luꞌh laꞌh raꞌ ba? 
\q1  
\v 7 Nagaaba dxyih si gulliaaꞌyiꞌhn bwiꞌhnn lasahca raꞌ luꞌh ba loh aanjla raꞌ, 
\q1 chiꞌchi babiaꞌgarii badiꞌhi luꞌh guel rnabwaꞌ cun guel lasahca laꞌh raꞌ ba tin guinabwaꞌ raꞌ ba loh garaatiiꞌ raꞌ nin bwiꞌhnnchaꞌyi luꞌh. 
\q1  
\v 8 Badiꞌhi luꞌh guelrnabwaꞌ laꞌh raꞌ ba tin guinabwaꞌ raꞌ ba garaatiiꞌ nin nuu loh guidxyiyuh. 
\p Nee guchii basiaꞌhannee Dxiohs garaatiiꞌ nin nuu loh guidxyiyuh laꞌh raꞌ bwiinn tin guinabwaꞌ raꞌ ban, per rachidiaꞌha nuꞌh gueꞌdu guinabwaꞌ raꞌ bwiinn garaatiiꞌ nicala ba badziiꞌba Dxiohsan loh naa raꞌ ba,  
\v 9 per rachidiaꞌha nuꞌh loh Jesucristu, nin bwiꞌhnn Dxiohs gulliaaꞌ ru guhca lasahca Ñiꞌh loh raꞌ xaanjla Dxiohs chin guyuuꞌ Ñiꞌh loh guidxyiyuh paaldaa si dxyih. Chin batuhlla Jesucristu xtsiꞌn Ñiꞌh loh guidxyiyuh, badiꞌhi za Dxiohs llaꞌñih laꞌh Ñiꞌh cun bwiꞌhnn lasahca Dxiohs lah Ñiꞌh, ya pur rucaꞌhstoꞌ Dxiohs laꞌh nuꞌh niꞌchin basaaꞌn Ñiꞌh batiꞌdxiloh Lliiꞌn Ñiꞌh guelrzaꞌcazii duxa nee guhchi Ñiꞌh pur laꞌh nuꞌh.  
\v 10 Dxiohs bwiꞌhnnchaꞌyi garaatiiꞌ raꞌ nin nuu loh guidxyiyuh cun rnabwaꞌ za Ñiꞌh garaatiiꞌ, ya laꞌh Dxiohs xclaaꞌdzi Ñiꞌh chenee Ñiꞌh ziahan lliiꞌn Ñiꞌh llaaꞌndxibaaꞌ, niꞌchin guxeꞌhla Ñiꞌh Lliiꞌn paꞌcaa Ñiꞌh tin billiꞌhi llarihn Ñiꞌh nin gutaꞌh laꞌh raꞌ bwiinn loh duhlda chin batiꞌdxiloh Ñiꞌh guelrzaꞌcazii loh cruhzi,  
\v 11 laasii Jesucristu nin ruhnn rbahan bwiinn loh guelnabahan nayaa, neezaa bwiinn raꞌ chi tuhsi Dxiohs naa Xtaada raꞌ ba; niꞌchin nin ayi ratuhyi loh Lliiꞌn Dxiohs rñiꞌ Ñiꞌh loh raꞌ ba ziga bwihtsi Ñiꞌh laꞌh raꞌ ba.  
\v 12 Ziga caa loh Xchihtsi Dxiohs squiiꞌ guñiꞌ Dxiohs: 
\q1 Zuluꞌyiꞌhn laꞌh bwihtsi raꞌn xa naa luꞌh, 
\q1 nee zuhnn lasahca zahn lah luꞌh loh raꞌ ba nee zuꞌldazahn himnu raꞌ nez hasta gadiaaꞌha raꞌ ba. 
\p  
\v 13 Rahbi za Ñiꞌh: 
\q1 Zibweꞌzaꞌhn gacanee Dxiohs naꞌh. 
\p Nee stuhbi lahta rahbi Ñiꞌh squiiꞌ: 
\q1 Laꞌn zuꞌh riiꞌ cun garaa raꞌ lliiꞌnahn nin baniꞌhi Dxiohs naꞌh. 
\p  
\v 14 Tuhbi famihyi naa raꞌ ba tuhsi bweꞌhla, nee nuu za raꞌ ba tuhsi rihn; niꞌchin chin badzihn Jesucristu loh guidxyiyuh gucah Ñiꞌh bweꞌhla nee guyuuꞌ za Ñiꞌh rihn per ya loh nin guhchi Ñiꞌh baziaꞌtii Ñiꞌh xquelrnabwaꞌ bwiinndxaaba nin guxaala xneziuh guelguhchi loh guidxyiyuh,  
\v 15 ya ziꞌchi bwiꞌhnn Ñiꞌh tin ayi ru guidxyihbi nuꞌh guelguhchi, laasii nuu raꞌ bwiinn nin rdxyihbi duxa gachi, rluuꞌyi ba gunaꞌzu guelguhchi laꞌh raꞌ ba gaduhbi loh xquelnabahan raꞌ ba,  
\v 16 pwihsi ayi biꞌ Ñiꞌh para ñahcanee Ñiꞌh laꞌh raꞌ aanjla raꞌ sino que biꞌ Ñiꞌh tin gacanee Ñiꞌh laꞌh raꞌ llahga guehtu Abrahn,  
\v 17 niꞌchi nin naa Ñiꞌh tuhbi bixohza xteenn Dxiohs nin ralahsa stoꞌ Ñiꞌh, tuhbi bixohza zaꞌca nin xclaaꞌdzi Dxiohs gaca Ñiꞌh tin gutaꞌh Ñiꞌh laꞌh raꞌ bwiinn loh duhlda,  
\v 18 laasii laꞌh gahca Ñiꞌh batiꞌdxiloh Ñiꞌh guelrzaꞌcazii nee gudxiꞌhyi za bwiinndxaaba xa ñuuꞌ xtuhlda Ñiꞌh, niꞌchin nnah zahca gacanee Ñiꞌh laꞌh raꞌ bwiinn nin zeꞌzaꞌbi loh duhlda. 
\c 3  
\s1 Lasahca ru Jesuhs loh guehtu Moisehs 
\p  
\v 1 Pwihsi bwihtsi raꞌn laasii naa tu bwiinn raꞌ nin gudihdxyi Dxiohs tin gaca tu lliiꞌn Ñiꞌh; gulgazaꞌstoꞌ tu laꞌh Jesucristu nin guxeꞌhla Dxiohs loh raꞌ nuꞌh nee nin naa za bixohza nin lasahca ru nee nin riachiistoꞌ raꞌ nuꞌh xchiꞌdxyi Ñiꞌh.  
\v 2 Xnehza bazaꞌloh Ñiꞌh bwiꞌhnn Ñiꞌh garaa nin guxeꞌhla Dxiohs laꞌh Ñiꞌh guunn Ñiꞌh loh guidxyiyuh ziga gahca bwiꞌhnn guehtu Moisehs chiꞌchi laasii xnehza za bwiꞌhnn ba nee gohpa zaꞌca ba laꞌh raꞌ xpwiinn Dxiohs.  
\v 3 Pwihsi lasahca ru Jesucristu loh guehtu Moisehs ziga naa Ñiꞌh ziga tuhbi bwiinn nin ruzaꞌ tuhbi yuuꞌ, lasahca ru ba loh yuuꞌ nin bwiꞌhnnchaꞌyi ba,  
\v 4 pwihsi cuunchiꞌhzi yuuꞌ nuu xballwaaꞌnan per Dxiohs gulahchixchih garaatiiꞌ cohsa nin nuu loh guidxyiyuh,  
\v 5 pwihsi bazoꞌbadxiahga guehtu Moisehs xchiꞌdxyi Dxiohs ziga tuhbi bwiinn nin bigaꞌbi nin cayahpa laꞌh raꞌ snuhn xpwiinn Dxiohs nin naa raꞌ ziga yihdzi Ñiꞌh nee guñiꞌxgah ba cuun raꞌ dziꞌn nin gueꞌdu guunn Dxiohs, nee nnah laꞌÑiꞌh bwiꞌhnn bazaꞌloh Ñiꞌh dziꞌn raꞌ chi,  
\v 6 per laꞌh Jesucristu bazoꞌbadxiahga Ñiꞌh dxyiꞌdxyi laasii Lliiꞌn paꞌcaa Dxiohs naa Ñiꞌh, niꞌchin naa Ñiꞌh bixohza zaꞌca loh raꞌ bwiinn nin naa ziga yihdzi Dxiohs, nee laꞌh nuꞌh naa nuꞌh xpwiinn Bixohza riiꞌ sidela chozahnee dziꞌtsi nuꞌh ziga ruluuꞌyi xchiꞌdxyi Ñiꞌh nee sidela za dxiahxi nuꞌh loh siguhra nin nahpa nuꞌh dxieꞌgalliꞌh Ñiꞌh laꞌh raꞌ nuꞌh dxyih nin guibiaꞌgarii Ñiꞌh. 
\s1 Guelrziꞌlaaꞌdzi xteenn raꞌ xpwiinn Dxiohs 
\p  
\v 7 Niꞌchin zigapaꞌ rñiꞌ Spíritu Saantu xteenn Dxiohs squiiꞌ: 
\q1 Sidela laꞌh tu rucaꞌdxiahga tu dxyiꞌdxyi nin rñiꞌ Dxiohs loh tu nnah, 
\q1  
\v 8 ayi guunn nahda stoꞌ tu ziga bwiꞌhnn raꞌ paaldaa raꞌ xtaada guldooꞌ tu chin gucaꞌnzaa raꞌ ba nez loh dahan desiertu raꞌ nee guluuꞌllahn raꞌ ba stoꞌn, 
\q1  
\v 9 hasta bidxyiꞌchinee raꞌ xtaada guldooꞌ raꞌ tu Naꞌh laasii nnastoꞌ raꞌ ba ayi Naꞌh dxiꞌh zeeneꞌhraꞌn ba nicala bwaꞌha raꞌ za ba cuun dziꞌn roo raꞌ nin bwiꞌhnnaꞌhn loh raꞌ ba loh chwaꞌha yihza. 
\q1  
\v 10 Pwihsi niꞌchin nin bidxyiꞌchineen laꞌh raꞌ bwiinn raꞌ chi, 
\q1 nee bwiꞌhnnaꞌhn lligaaba laꞌn lastoꞌn: Zuu biaꞌhannee raꞌ ba lligaaba dxaaba nin nuu laꞌn lastoꞌ raꞌ ba, 
\q1 nee ayi nnaa raꞌ ba dxiuꞌnbwaꞌ raꞌ ba xnezyuun. 
\p  
\v 11 Pwihsi niꞌchin nin guñiꞌ chihpa Dxiohs loh nin rdxyiꞌchinee Ñiꞌh laꞌh raꞌ ba rahbi Ñiꞌh: 
\q1 Ayi chuu dxyih chuꞌtii raꞌ ba loh xquelrziꞌlaaꞌdzihn. 
\p  
\v 12 Bwiitsi raꞌn, gulgahca nasiin tin nin tuhbi tu ayi chuu lligaaba dxaaba stoꞌ tu tin ayi guiriaꞌcaa tu loh Dxiohs nin nuu nabahan dziꞌtsi pur nin ayi chechiistoꞌ tu laꞌh Ñiꞌh,  
\v 13 niꞌchin nnah gulcuꞌguiꞌw stoꞌ lasaaꞌ tu guillii-guillii ziga tuhbi ziga stuhbi tu gaduhbi nin gaca guunn tun, tin ziꞌchi nin tuhbi tu ayi gaca nahda stoꞌ tu pur guelrusaguiꞌhi xteenn duhlda,  
\v 14 laasii sidela laꞌh nuꞌh chozah dziꞌtsi nuꞌh loh xchiꞌdxyi Dxiohs nin gwachiistoꞌ nuꞌh chin bachidxiuꞌnbwaꞌ nuꞌhn, chiꞌchi ziuuꞌ nin guidxiaapa nuꞌh loh Jesucristu.  
\v 15 Ziga caa loh Xchihtsi Dxiohsa: 
\q1 Nnadxyih, sidela laꞌh tu rihn tu nin rñiꞌ Dxiohs, 
\q1 ayi gaca tu bwiinn stoꞌ radxipa raꞌ ziga guhca raꞌ bwiinn raꞌ nin bidxyiꞌchinee laꞌh Ñiꞌh. 
\p  
\v 16 ¿Chyu niꞌca guhca raꞌ bwiinn raꞌ nin bidxyiꞌchinee Dxiohs chin bihn dxiahga raꞌ ba xchiꞌdxyi Ñiꞌh? Pwihsi casi garaa raꞌ bwiinn raꞌ nin babweꞌhe Moisehs loh guihdxyi Egiptu,  
\v 17 nee ¿chyu bwiinn raꞌ bidxyiꞌchinee Dxiohs loh chywaꞌha yihza? Pwihsi laꞌh raꞌ bwiinn raꞌ nin biaaba loh duhlda nee guhchi za raꞌ ba loh dahan desiertu.  
\v 18 Nee ¿chyuloo raꞌ rahbi Ñiꞌh loh dxyiꞌdxyi riiꞌ?: 
\q1 Ayi chuu raꞌ paꞌcaa ba loh xquelruziꞌlaaꞌdzihn. 
\p Pwihsi loh raꞌ bwiinn raꞌ nin ayi bazoꞌbadxiahga xchiꞌdxyi Ñiꞌh,  
\v 19 yannah rachidiaꞌha nuꞌh ayi guhca ñuꞌtii raꞌ ba laasii ayi gwachiistoꞌ raꞌ ba xchiꞌdxyi Ñiꞌh. 
\c 4  
\p  
\v 1 Niꞌchin sidela biaꞌhan dxyiꞌdxyi Ñiꞌh ziuuꞌpaꞌcaa nuꞌh loh guelruziꞌlaaꞌdzi xteenn Ñiꞌh, nahpa guidxiaapa nuꞌh laꞌgahca nuꞌh tin ayi chyu tuhbi nuꞌh ayi guunn gahn chuꞌtii loh guelruziꞌlaaꞌdzi chi,  
\v 2 laasii neezaa raꞌ nuꞌh laꞌh nuꞌh bihn dxyiꞌdxyi nin rusiaa laꞌh bwiinn loh duhlda, ziga bihn raꞌ za bwiinn raꞌ chin; per para laꞌh raꞌ bwiinn chi ayi xi balluꞌyitiiꞌ dxyiꞌdxyi raꞌ chi nicala bihn raꞌ ban.  
\v 3 Per laꞌh raꞌ nuꞌh ziga gwachiistoꞌ nuꞌh, naa nuꞌh bwiinn raꞌ nin chuꞌtiiꞌ loh guelruziꞌlaaꞌdzi chi nin bazeꞌta Dxiohs chin guñiꞌ Ñiꞌh squiiꞌ: 
\q1 Loh xquelnadxyiꞌchihn guñiꞌ chihpaꞌhn ayi chuꞌtii raꞌ ba loh xquelruziꞌlaaꞌdzihn. 
\p Nicala laꞌÑiꞌh batuhlla la xtsiꞌn Ñiꞌh chin gurihxchih guidxyiyuh.  
\v 4 Pwihsi loh stuhbi lahta loh Xchihtsi Dxiohs rñiꞌ squiiꞌ pur dxyih nin ruziꞌlaaꞌdzi bwiinn: 
\q1 Xoꞌpa dxyih bwiꞌhnn Dxiohs xtsiꞌn Ñiꞌh ya gubihdxyi gaadzii baziꞌlaaꞌdzi Ñiꞌh. 
\p  
\v 5 Ya stuhbi lahta caa loh Xchihtsi Dxiohs nin guñiꞌ Ñiꞌh squiiꞌ: 
\q1 Ayi chuꞌtii raꞌ ba loh guelruziꞌlaaꞌdzi xteꞌnnahn. 
\p  
\v 6 Per riaꞌdxyi ru chuꞌtii ru ziahan ru bwiinn raꞌ loh guelruziꞌlaaꞌdzi chi ya bwiinn raꞌ nin mweer bihn raꞌ dxyiꞌdxyi raꞌ nin rusiaa laꞌh bwiinn loh duhlda, ayi chuꞌtii raꞌ ba laasii ayi bazoꞌbadxiahga raꞌ ba dxyiꞌdxyi raꞌ chi,  
\v 7 pwihsi niꞌchin nin bacaꞌhbwaꞌ Dxiohs tuhbi dxyih nin gaca “Nadxyih”, laasii chin gudiiꞌdxi ziahan yihza guñiꞌ laꞌgaꞌh Ñiꞌh pur laꞌh guehtu Davihd chin basañiꞌ Ñiꞌh laꞌh guehtu Davihd dxyiꞌdxyi riiꞌ: 
\q1 Nnah sidela laꞌh tu rihn tu nin rñiꞌ Dxiohs loh tu, 
\q1 ayi gaca tu bwiinn stoꞌ radxiipa. 
\p  
\v 8 Sidela laꞌh guehtu Josueh ñudiꞌhi guelruziꞌlaaꞌdzi chi laꞌh raꞌ bwiinn Israel raꞌ, Dxiohs ayi ru ñiñiꞌ Ñiꞌh pur stuhbi dxyihyi.  
\v 9 Pwihsi nnah riaꞌhan ru tuhbi guelruziꞌlaaꞌdzi para laꞌh raꞌ xpwiinn Dxiohs,  
\v 10 laasii bwiinn raꞌ nin riuꞌtii loh xquelruziꞌlaaꞌdzi Dxiohs, ruziꞌlaaꞌdzi ba loh xtsiꞌn ba ziga za baziꞌlaaꞌdzi Dxiohs loh xtsiꞌn Ñiꞌh,  
\v 11 pwihsi niꞌchin nin nahpa chozah nuꞌh gazoꞌbadxiahga nuꞌh dxyiꞌdxyi tin gachidxuꞌtii nuꞌh loh guelruziꞌlaaꞌdzi chi, tin ayi chuu tuhbi nuꞌh nin gaca dxiipa stoꞌ nuꞌh, ziga guhca dxiipa stoꞌ raꞌ bwiinn raꞌ nin ayi gwachiistoꞌ raꞌ ñiꞌh,  
\v 12 laasii xchiꞌdxyi Dxiohs nuu nabahan nee nahpan guelrnabwaꞌ. Naan ziga tuhbi spahda nin caa duxa garoopa dihtsi ñiꞌh, nee riaꞌzin hasta nuu xalma bwiinn cun spíritu ba, nee ruluuꞌyin cuun lligaaba nin nuu lastoꞌ bwiinn cun neezaa dziꞌn nin xclaaꞌdzi ba guunn ba.  
\v 13 Ayi nin tuhbi xiilla nin bwiꞌhnnchaꞌyi Dxiohs chuulaꞌnan loh Ñiꞌh; garaa raꞌn rluuꞌyiloh raꞌn loh nayaa loh Dxiohs, nin nahpa gachidxixtee nuꞌh loh Ñiꞌh. 
\s1 Jesucristu naa bixohza nin lasahca duxa 
\p  
\v 14 Jesucristu Lliiꞌn Dxiohs naa xpixohza nuꞌh nin lasahca duxa, laasii laꞌh Ñiꞌh naa Ñiꞌh nin ba biuuꞌ llaaꞌndxibaaꞌ, niꞌchin nin nahpa chozah dziꞌtsi nuꞌh loh xchiꞌdxyi Ñiꞌh,  
\v 15 laasii laꞌh xpixohza lasahca duxa nuꞌh chi zalahsastoꞌ Ñiꞌh laꞌh nuꞌh pur nin rachidiꞌhnn nalaasa loh nuꞌh tin ayi dxiaaba nuꞌh loh duhlda, laasii laꞌh Ñiꞌh ziꞌchi gahca za batiꞌdxiloh Ñiꞌh guelrzaꞌcazii per ayi guyuuꞌ xtuhlda Ñiꞌh.  
\v 16 Niꞌchin ayi chyu guidxyihbi gachibwihdxyi-gachinaaba nuꞌh loh Xchiohs nuꞌh nin nadziiꞌhi laꞌh nuꞌh tin galahsastoꞌ Ñiꞌh laꞌh nuꞌh nee gacanee Ñiꞌh laꞌh nuꞌh chin guichiꞌhn nuꞌh Ñiꞌh. 
\c 5  
\p  
\v 1 Galohyi garaa raꞌ bixohza nin lasahca ru loh raꞌ bixohza rbwiꞌhi raꞌ ba loh raꞌ ndxiꞌhw. Bixohza lasahca raꞌ chi rnaaba loh Dxiohs pur bwiinn, nee laꞌh za ba rñiꞌ ba pur guhn cun guidxaꞌh nin rbahchi guhn bwiinn loh Dxiohs tin ziꞌchi rieꞌw loh xtuhlda raꞌ ba loh Dxiohs,  
\v 2 ya pur nin naa bixohza bwiinn guidxyiyuh nee zahca chuu xtuhlda ba, niꞌchi zahca galahsa stoꞌ ba laꞌh raꞌ bwiinn nin ayi rihn dxyiꞌdxyi raꞌ cun bwiinn raꞌ nin nuuzaꞌbi loh duhlda,  
\v 3 ya pur nin riuuꞌ xtuhlda ba pur laꞌh gahca ba, niꞌchin nahpa gudiꞌhi ba guidxaꞌh loh Dxiohs tin ziꞌchi dxieꞌw loh xtuhlda ba ziga rieꞌw za loh xtuhlda raꞌ bwiinn guihdxyi.  
\v 4 Nin tuhbi bwiinn ayi nuu guunn lasahca ba laꞌh gahca ba gaca ba bixohza laasii Dxiohs naa nin rbwihdxyi laꞌh nin rahca bixohza tin rudiꞌhi Ñiꞌh rahca ba bixohza ziga badiꞌhi Ñiꞌh guhca guehtu Arohn bixohza,  
\v 5 ya ziꞌchi za laꞌh Jesucristu, ayi laꞌh dxiꞌh Ñiꞌh gulii Ñiꞌh laꞌh gahca Ñiꞌh naa Ñiꞌh bixohza nin lasahca ru, laasii Dxiohs guleꞌhelah laꞌh Ñiꞌh gaca Ñiꞌh bixohza nin lasahca ru, ziga rahbi Dxiohs: 
\q1 Yiꞌh naa luꞌh Lliiꞌnahn, nnadxyih guliin yiꞌh tin guinabwaꞌ luꞌh. 
\p  
\v 6 Squiiꞌ caa stuhbi lahta loh Xchihtsi Dxiohs: 
\q1 Yiꞌh naa luꞌh tuhbi bixohza para tuꞌpazi ziga guhca guehtu Melquisedec. 
\p  
\v 7 Chin gubahan Jesucristu loh guidxyiyuh riiꞌ gudihdxyi-gunaaba Ñiꞌh loh Dxiohs, cun guñiꞌ Ñiꞌh jwersi rooꞌ cun dxigah bieꞌw ñihsabwii loh Ñiꞌh nezloh Dxiohs, nin nahpa guelrnabwaꞌ rooꞌ ñutaꞌh laꞌh Jesucristu loh guelguhchi; nee bwiꞌhnn cweenta Dxiohs xchiꞌdxyi Jesucristu laasii bazoꞌbadxiahga Ñiꞌh xchiꞌdxyi Dxiohs.  
\v 8 Niꞌchin Jesucristu nicala naa Ñiꞌh Lliiꞌn Dxiohs basiꞌdxi Ñiꞌh bazoꞌbadxiahga Ñiꞌh dxyiꞌdxyi ziga nahpa batiꞌdxiloh Ñiꞌh guelrzaꞌcazii,  
\v 9 ya chin badzihn dxyih batuuꞌlla Ñiꞌh garaa raꞌ dziꞌn nin rclaaꞌdzi Dxiohs guunn Ñiꞌh, bigaꞌha Ñiꞌh naa Ñiꞌh nin gusiaa laꞌh bwiinn loh duhlda ziga garaa raꞌ bwiinn nin guzoꞌbadxiahga xchiꞌdxyi Ñiꞌh,  
\v 10 laasii Dxiohs bazoꞌba lah Ñiꞌh bixohza nin lasahca ru, naa Ñiꞌh bixohza ziga guhca Melquisedec bixohza. 
\s1 Nagahn duxa guibiaꞌgarii chechiistoꞌ bwiinn raꞌ nin rusaaꞌn xchiꞌdxyi Dxiohs 
\p  
\v 11 Rclaaꞌdzi nu gachiñiꞌ nu ziahan ru dxyiꞌdxyi pur Jesucristu, nin luꞌh nagahn duxa para baluuꞌyi nu laꞌh tu, laasii nihin riaꞌzi dxyiꞌdxyi yihca tu, niꞌchin nin ayi gacabwaꞌ tun.  
\v 12 Laꞌh tu cadxyih rooꞌ gwachiistoꞌ tu xchiꞌdxyi Jesucristu ñahca tu nin ñuluuꞌyi dxyiꞌdxyi chi laꞌh stuhbi bwiinn, per laꞌlaꞌhgaꞌh rchiꞌhn chyu guluuꞌyi laꞌh tu stuhbi dxyiꞌdxyi raꞌ nin mahzi ayi guinagahntiiꞌ raꞌ xteenn Dxiohs, nee nnah biahca tu ziga bweezu raꞌ nin reeꞌ duuda ayi naa tu ziga tuhbi nin rahw guehta nin ba biaa loh xquelrihn ñiꞌh,  
\v 13 ya nin reeꞌ raꞌ duuda chi naa raꞌ ziga zi tuhbi biñiꞌn bweezuꞌhn nin reeꞌ duuda niꞌchi raꞌ ayi riuꞌnbwaꞌ zaꞌca xchiꞌdxyi Dxiohs.  
\v 14 Ya nin rahw guehta naa raꞌ ziga bwiinn raꞌ nin baniin ca zuu, nin ba naann cuun nin naa dziꞌn zaꞌca nee cuun za nin naa dziꞌn dxaaba, laasii ba biaa loh xigaaba raꞌ ba. 
\c 6  
\p  
\v 1 Yannah chozah gazeꞌta ru nuꞌh xchiꞌdxyi Dxiohs tin chuu ru xquelrihn nuꞌh, niꞌchin nnah chozahru nuꞌh loh garaa dxyiꞌdxyi nin basiꞌdxi nu laꞌh tu chin gueꞌdu gwachiistoꞌ tu laꞌh Jesucristu dez dxyih nin bachizaꞌloh nuꞌh; ba basiꞌdxi nuꞌh nahpa chechiistoꞌ nuꞌh xchiꞌdxyi Dxiohs,  
\v 2 ba basiꞌdxi za nuꞌh guelrohbañihsa, cun ba basiꞌdxi za nuꞌh xa rudziiꞌba naa raꞌ bwiinn guhla raꞌ yihca raꞌ bwiinn tin guunntaaꞌyi raꞌ ba laꞌh raꞌ ba, nee ba naann nuꞌh ziuuꞌ dxyih gabahan raꞌ bwiinn guuchi, cun ba naann za nuꞌh guunn Dxiohs guelguxchisi nin naa par tuꞌpazi.  
\v 3 Pwihsi chozah nuꞌh gasiꞌdxi ru nuꞌh sidela laꞌh Dxiohs nnaa Ñiꞌh,  
\v 4 pwihsi guyuuꞌ bwiinn raꞌ nin biaꞌñih loh xquelrihn ñiꞌh, nin gucaꞌha guelnazaꞌca nin rudiꞌhi Dxiohs, nin guleezaa Spíritu Saantu xteenn Dxiohs laꞌn lastoꞌ raꞌ ñiꞌh.  
\v 5 Pwihsi bidxaꞌgastoꞌ raꞌ ba xchiꞌdxyi Dxiohs cun nee guelrnabwaꞌ xteenn Dxiohs cun xteenn guelnabahan nacuubi nin gueꞌdu dxiꞌ.  
\v 6 Sidela laꞌh raꞌ ba gabiaꞌgarii raꞌ ba loh guelnabahan nin gohpa raꞌ ba galoh ayi ru gaca dxiaca nayaa raꞌ ba loh duhlda nee ayi ru nuu dxiaca zaꞌca loh xigaaba raꞌ ba laasii laꞌh gahca raꞌ ba riigacaꞌh raꞌ ba laꞌh Lliiꞌn Dxiohs loh cruhzi stuhbi nee zusiꞌxtuhyi raꞌ ba laꞌh Ñiꞌh loh raꞌ bwiinn ziahan.  
\v 7 Naa raꞌ ba ziga yuh nin reeꞌ ñihsadxiah chin riaaban loh guidxyiyuh: sidela laꞌh loh yuh chi gudiꞌhi guelnazaꞌca laꞌh bwiinn nin ruhnnee loh yuh chi dziꞌn, nahpan guelruhntaaꞌyi xteenn Dxiohs,  
\v 8 per sidela ganaalla yaguihchi raꞌ cun cwaꞌndxaaba raꞌ guitahn lohon, ayi xi galluꞌyitiiꞌhin; ziaaban loh xquelguxchisi Dxiohs, nahpa zicaꞌdxihin. 
\s1 Dxyiꞌdxyi nin ruzuhchihpa stoꞌ nuꞌh 
\p  
\v 9 Per nicala rachiñiꞌ nu loh tu bwihtsi raꞌ nin nadziiꞌhi nu, naann nu ba guhca ntaaꞌyi tu cun naann za nu ba gulaꞌh tu loh duhlda,  
\v 10 laasii Dxiohs naa nin ruhnn guelguxchisi zaꞌca, nee ayi xclaaꞌdzi Ñiꞌh dxiaꞌlda nin ruhnn tu nee guelrucaꞌhstoꞌ nin nahpa tu laꞌh Ñiꞌh chin rahcanee tu laꞌh bwihtsi raꞌ nuꞌh loh guelriachiistoꞌ xteenn Dxiohs, cun gallee raꞌ dziꞌn zaꞌca nin zeezah cayuhnn tu,  
\v 11 yannah xclaaꞌdzi nu tuhbigah tu chezah dziꞌtsi tu loh siguhra dziꞌtsi nin nahpa tu loh xchiꞌdxyi Dxiohs tin guicaꞌha tu garaa nin xclaaꞌdzi Dxiohs guniꞌhi Ñiꞌh laꞌh tu.  
\v 12 Ayi xclaaꞌdzi nu gaca tu bwiinn raaꞌlla, niꞌchin gulguiꞌhnn ziga bwiꞌhnn raꞌ bwiinn galoh; gohpa dziꞌtsi raꞌ ba dxyiꞌdxyi raꞌ nin gwachii duxa stoꞌ raꞌ ba, guleeza raꞌ ba tin gucaꞌha raꞌ ba guelnazaꞌca nin biaꞌhan dxyiꞌdxyi gudiꞌhi Dxiohs laꞌh raꞌ ba. 
\p  
\v 13 Pwihsi chin biaꞌhannee dxyiꞌdxyi Dxiohs laꞌh guehtu Abrahn, guñiꞌ chihpa Ñiꞌh pur laꞌh gahca Ñiꞌh, laasii ayi nin stuhbi nin lasahca loh Ñiꞌh,  
\v 14 ya rahbi Ñiꞌh: 
\q1 Guchiin zuhnntaaꞌyiꞌhn yihca luꞌh ziahan nee zuniꞌhizahn ziahan raꞌ llahga luꞌh. 
\p  
\v 15 Ya Abrahn guleeza ba cun paseensi ya ziꞌchi gucaꞌha ba nin biaꞌhannee dxyiꞌdxyi Dxiohs laꞌh ba,  
\v 16 laasii chin rñiꞌ chihpa tuhbi ndxiꞌhw, rñiꞌ chihpa ban pur stuhbi bwiinn nin lasahca ru loh ba; ya chin ruzeꞌta raꞌ ba laꞌh bwiinn chi pwihsi ayi ru xa guunn ba guchaꞌh ba xchiꞌdxyi ba.  
\v 17 Ziꞌchi gahca za rclaaꞌdzi Dxiohs gacabwaꞌ raꞌ llahga guehtu Abrahn zizohba paꞌhcaa dxyiꞌdxyi nin guñiꞌ Ñiꞌh loh Abrahn galohtiiꞌyi. Zizohba paꞌcaa xchiꞌdxyi Ñiꞌh laasii guñiꞌ chihpa Ñiꞌh dxyiꞌdxyi pur lah gahca Ñiꞌh chin biaꞌhan dxyiꞌdxyi Ñiꞌh cun guehtu Abrahn.  
\v 18 Niꞌchin nnah, nuu chiohpa dxyiꞌdxyi nin ayi nuu guidxaꞌh, laasii ayi nuu guiñiꞌ Dxiohs dxyiꞌdxyi xihn, nahpa ruzaꞌloh Ñiꞌh xchiꞌdxyi Ñiꞌh, nee baniꞌhi za Ñiꞌh guelriachiistoꞌ laꞌh raꞌ nin gwabiiga-galluꞌn loh Ñiꞌh, loh raꞌ nin zeezahnee loh siguhra dziꞌtsi xteenn ñiꞌh nin baniꞌhi Ñiꞌh laꞌh nuꞌh pur lah Ñiꞌh,  
\v 19 ya nin naannloh nuꞌh chi naa nin ruzuhdziꞌtsi lastoꞌ nuꞌh ziga tuhbi duꞌh dxiꞌba nin zohba llaaꞌn gaandxuu nin rnaꞌzu chihpa laꞌh baarcu. Niꞌchi ruzuhdziꞌtsi laꞌn lastoꞌ nuꞌh tin gadzihn nuꞌh dihtsi lahdxi rooꞌ xteenn guidoꞌ nin nuu llaaꞌndxibaaꞌ,  
\v 20 hasta guyuuꞌtii Jesuhs pur laꞌh raꞌ nuꞌh, tin galohyi baxaala Ñiꞌh neziuh nin radzihn loh Dxiohs tin naa Ñiꞌh bixohza nin lasahca par tuꞌpazi ziga guhca za bixohza nin laa Melquisedec. 
\c 7  
\s1 Jesucristu naa bixohza lasahca ziga naa Melquisedec 
\p  
\v 1 Galoh chin guhca Melquisedec rrehyi xteenn guihdxyi Salem, guhca za ba bixohza rooꞌ xteenn Yuꞌbi Dxiohs, ya chin gubiaꞌgarii guehtu Abrahn loh guehrru nin gudxiinn ba garaa raꞌ rrehyi raꞌ nin gudxindxinee ba, Melquisedec biriaꞌh ba bagachiꞌloh ba laꞌh Abrahn tin gunaaba ba loh Dxiohs gacanee ru Ñiꞌh laꞌh Abrahn,  
\v 2 ya badiꞌhi Abrahn laꞌh Melquisedec tuhbi cwaꞌh loh tsiꞌh nin bwiꞌhnn ba gahn loh guehrru. Ya zee loh dxyiꞌdxyi Melquisedec “Mweer rrehyi nin ruhnn zaꞌca guelguxchisi”, nee neezaa naa ba rrehyi loh guihdxyi Salem ziga zeezah loh dxyiꞌdxyi lah ba naa rrehyi xteenn guelrbwihdxyiistoꞌ.  
\v 3 Dxyiigah si biinloh ba loh raꞌ bwiinn; nin ayi chyu gaann chyu naa xtaada ba, chyu naa xnaan ba, cun chyu naa lasaaꞌ ba, nee ayi za chyu gaann cuuca guulaa ba, nin ayi chyu gaann za cuuca guhchi ba. Guhca ba ziga naa Lliiꞌn Dxiohs, tuhbi bixohza nin ba nuu nabahan para tuꞌpazi. 
\p  
\v 4 Pwihsi gulguiaꞌha balaaca chiꞌh guhca Melquisedec tuhbi bwiinn zaꞌca tuhbi bwiinn rooꞌ: laꞌh ba badiꞌhi guehtu xtatita rooꞌ nuꞌh Abrahn tuhbigah cwaꞌh nin lasahca duxa loh tuhbigah tsiꞌh nin bwiꞌhnn ba gahn chin guluhlla gudxihdxinee ba laꞌh rrehyi raꞌ,  
\v 5 ya lehyi xteenn Moisehs, rnabwaꞌ rcaꞌha raꞌ bixohza nin naa raꞌ lasaaꞌ raꞌ guehtu Levih tuhbi cwaꞌh mweeyi loh raꞌ lasaaꞌ raꞌ ba ziga nin badiꞌhi guehtu Abrahn laꞌh Melquisedec, nicala naa raꞌ ba llahga guehtu Abrahn,  
\v 6 per laꞌh Melquisedec nicala ayi naa ba bwiinn lasaaꞌ guehtu Levih, badiꞌhi Abrahn tuhbi cwaꞌh xixteenn ba laꞌh Melquisedec, ya chiꞌchi bwiꞌhnntaaꞌyi Melquisedec yihca Abrahn, nicala laꞌh Abrahn naa nin biaꞌhannee Dxiohs dxyiꞌdxyi,  
\v 7 nee ayi nin tuhbi bwiinn nin gaca guiñiꞌ guriincaa, laasii bwiinn nin lasahca ru naa nin ruhnntaaꞌyi yihca nin gulliaaꞌ ru lasahca.  
\v 8 Ya lahda nuꞌh nnah, nuu raꞌ bixohza nin rcaꞌha raꞌ tuhbi diezimu naa raꞌ ba ndxiꞌhw raꞌ nin rahchi; per ziga laꞌh Melquisedec, loh Xchihtsi Dxiohs ruzeꞌta laꞌh ba ziga zi tuhbi bwiinn nin nuu nabahan gahca.  
\v 9 Niꞌchin zahca gazeꞌta nuꞌh guehtu Levih nin rcaꞌha tuhbi cwaꞌha loh lasaaꞌ ba, per laꞌh gahca ba gudxihlli ba tuhbi cwaꞌha chin badiꞌhi guehtu Abrahn tuhbigah yihca tsiꞌhgah cwaꞌh laꞌh Melquisedec,  
\v 10 laasii nicala nagahdxi chyu lliiꞌn guehtu Abrahn chuu chin bagachiꞌloh Melquisedec laꞌh ba, per bazuhchihpa stoꞌ ba laasii ba biaꞌhan dxyiꞌdxyinee Dxiohs laꞌh ba zudiꞌhi Ñiꞌh llahga ba, niꞌchin chin laꞌh ba gudxihlli tuhbi cwaꞌh naa ba ziga nin zeenee gahca raꞌ llahga ñiꞌh. 
\p  
\v 11 Laꞌh raꞌ bwiinn Israel raꞌ gucaꞌha raꞌ ba xlehyi Moisehs chin biinloh bixohza nin guhca raꞌ xpwiinn guehtu Levih nin naa raꞌ lliiꞌn guehtu Arohn, per sidela ñahca ñuhnn raꞌ bixohza chi ñibahan nayaa raꞌ bwiinn nin gwazahnee lehyi chi, pwihsi ayi ru ñichiꞌhn ñuuꞌ stuhbi bixohza nin naa ziga guehtu Arohn, sino que tuhbi bixohza nin naa ziga Melquisedec,  
\v 12 laasii chin rdxaꞌh tuhbi bixohza nee lehyi nahpa guidxaꞌh,  
\v 13 ya ziga rñiꞌ xchiꞌdxyi Dxiohs, Daada Jesucristu naa bwiinn guriincaa famihyi, ya famihyi raꞌ riiꞌ nagahdxi gaca nin tuhbi raꞌ ba bixohza,  
\v 14 laasii nayaa-nayaa naann nuꞌh naa Daada Jesucristu tuhbi bwiinn lasaaꞌ guehtu Judah, ya Moisehs ayi bazeꞌta ba xpwiinn Judah chin bazeꞌta ba bixohza raꞌ. 
\p  
\v 15 Ya nayaa naa nin rñiꞌ nu nnah, laasii laꞌstuhbi bixohza cuubi biinloh nin naa ziga gahca guhca Melquisedec,  
\v 16 ya laꞌh ba ayi guhca ba bixohza pur tuhbi lehyi nin ñiñiꞌ xa ñiinloh ba, sino que laꞌh ba guhca ba bixohza pur guelrnabwaꞌ nin ba nuu nabahan ba par tuꞌpazi.  
\v 17 Squiiꞌ bazeꞌta Dxiohs laꞌh Ñiꞌh: 
\q1 Yiꞌh naa luꞌh tuhbi bixohza par tuꞌpazi, ziga guhca tuhbi bwiinn nin biriaꞌhlah Melquisedec. 
\p  
\v 18 Pwihsi ziꞌchi zi babihxi lehyi galohyi chi, laasii ayi guhca ñuhnn bwiinn ziga baluuꞌyi lehyi chi.  
\v 19 Pwihsi ayi xlehyi dxiꞌh Moisehs ñuhnn gahn ñibahan zaꞌca bwiinn, per xlawaaꞌha lehyi chi nahpa nuꞌh tuhbi guelriachii stoꞌ zaꞌca nuꞌh, nin ruhnn tin riobiiga nuꞌh loh Dxiohs. 
\p  
\v 20 Per Dxiohs bazuh laꞌh Jesucristu bixohza cun dxyiꞌdxyi nin guñiꞌchihpa Ñiꞌh cun lah gahca Ñiꞌh,  
\v 21 ya spaaldaa raꞌ bixohza raꞌ guhca raꞌ ba bixohza ayi cun dxyiꞌdxyi nin rñiꞌ chihpa per bixohza riiꞌ guhca Ñiꞌh bixohza cun dxyiꞌdxyi nin rñiꞌ chihpa, laasii loh Xchihtsi Dxiohs caa ziga guñiꞌ Ñiꞌh: 
\q1 Laꞌh Dxiohs guñiꞌ chihpa, nee ayi guchaꞌh Ñiꞌh xchiꞌdxyi Ñiꞌh, rahbi Ñiꞌh: 
\q1 “Yiꞌh naa luꞌh tuhbi bixohza rooꞌ par tuꞌpazi, 
\q1 ziga gahca guhca Melquisedec.” 
\p  
\v 22 Niꞌchin laꞌh Jesucristu naa nin ruhnn zohba dziꞌtsi dxyiꞌdxyi nin lasahca ru raꞌ riiꞌ,  
\v 23 ya snuhn raꞌ bixohza raꞌ guhca ziahan raꞌ ba, per ziga nahpa rahchi raꞌ ba niꞌchin ayi nuu para ñazah ru raꞌ ñibahan raꞌ ba,  
\v 24 per ziga laꞌh Jesucristu ayi chuu gachi Ñiꞌh stuhbi, niꞌchin nin ayi chuu chapitii xquel bixohza Ñiꞌh.  
\v 25 Pwihsi niꞌchi zan rahca rutaꞌh Ñiꞌh laꞌh raꞌ bwiinn loh duhlda par tuꞌpazi, rutaꞌh Ñiꞌh garaa raꞌ nin riabiiga loh Dxiohs pur laꞌh Ñiꞌh laasii ba nabahan Ñiꞌh par tuꞌpazi tin canaaba Ñiꞌh loh Dxiohs pur xpwiinn Ñiꞌh. 
\p  
\v 26 Pwihsi Jesuhs naa bixohza rooꞌ nin rchiꞌhn nuꞌh; laꞌh Ñiꞌh naa Ñiꞌh saantu nin ayi guhpa nin tuhbi duhlda, biriaꞌcaa Ñiꞌh loh raꞌ bwiinn duhlda ya guyahsa Ñiꞌh guiyaꞌ ru nee llaaꞌndxibaaꞌ.  
\v 27 Ayi naa Ñiꞌh ziga snuhn raꞌ bixohza raꞌ, nin rdxiinn raꞌ maan raꞌ nee nahpa rutiꞌdxi guhn raꞌ ba ma guillii-guillii, mwer galoh pur xtuhlda raꞌ ba chiꞌchi pur xtuhlda raꞌ bwiinn. Per laꞌh Jesuhs tuhbi si batiꞌdxiloh Ñiꞌh guelrzaꞌcazii; chin gucah Ñiꞌh loh cruhzi, baxiꞌhi Ñiꞌh llarihn Ñiꞌh pur xtuhlda nuꞌh tin ziꞌchi gudxihlli Ñiꞌh xtuhlda raꞌ nuꞌh par tuꞌpazi.  
\v 28 Xlehyi Moisehs rusaaꞌn gaca tuhbi ndxiꞌhw bixohza nin rahchi, per dxyiꞌdxyi nin guñiꞌ chihpa Dxiohs gulii Ñiꞌh laꞌhgahca Lliiꞌn Ñiꞌh nin naa bixohza rooꞌ nin nayaa nin banabahan zaꞌca par tuꞌpazi. 
\c 8  
\s1 Jesucristu naa nin rñiꞌ loh Dxiohs pur laꞌh nuꞌh 
\p  
\v 1 Dxyiꞌdxyi nin lasahca ru loh raꞌ dxyiꞌdxyi nin cañiꞌ nuꞌh naa squiiꞌ: bixohza nin naa xpixohza rooꞌ nuꞌh laꞌh Ñiꞌh guzohba xlahdu derehchu Dxiohs llaaꞌndxibaaꞌ,  
\v 2 nee naa Ñiꞌh bixohza laꞌn yuuꞌ nin naa saantu nadaa, hasta bwiꞌhnnchaꞌyi Dxiohs; ayi laꞌn guidoꞌ dxiꞌh nin ruhnn chaꞌyi raꞌ bwiinn loh guidxyiyuh.  
\v 3 Pwihsi ziga garaa raꞌ bixohza nin lasahca ru bibwiꞌhi raꞌ ba tin batiꞌdxi guhn ba guidxaꞌh cun snuhnru guhn raꞌ loh Dxiohs nin nuu dxibaaꞌ. Pwihsi niꞌchin neezaa laꞌh Jesucristu guhpaa Ñiꞌh ziga batiꞌdxiguhn Ñiꞌh laꞌhgahca Ñiꞌh nez loh Dxiohs.  
\v 4 Sidela laꞌh Ñiꞌh nuu gahca Ñiꞌh loh guidxyiyuh riiꞌ, nin ayi ñahca Ñiꞌh bixohza, laasii loh guidxyiyuh riiꞌ guyuuꞌ gahca raꞌ bixohza raꞌ nin badiꞌhi guhn ziga gunabwaꞌ xlehyi Moisehs,  
\v 5 per dziꞌn raꞌ nin bwiꞌhnn raꞌ bixohza riiꞌ guhca ziga tuhbi bacaala xteenn garaatiiꞌ nin nuu llaaꞌndxibaaꞌ, nee naann nuꞌh naa raꞌn bacaala laasii baluuꞌyi Dxiohs laꞌh guehtu Moisehs chin baguuldaa guunn ba xquidoꞌ Dxiohs, rahbi Dxiohs loh ba: 
\q1 Bwaꞌha zaꞌca tin guunn luꞌh garaatiiꞌ zigapaꞌhcaa nin baluꞌyiꞌhn yiꞌh loh dahan Sinaí. 
\p  
\v 6 Per laꞌh Xpixohza nuꞌh ruhnn Ñiꞌh dziꞌn nin lasahca ru, laasii laꞌh Ñiꞌh naa Ñiꞌh nin zuu galaayi loh xneziuh Dxiohs loh raꞌ bwiinn guidxyiyuh, baluuꞌyi Ñiꞌh dxyiꞌdxyi nin guñiꞌ Dxiohs chin bwiꞌhnn Ñiꞌh dxyiꞌdxyi cuubi loh raꞌ bwiinn guidxyiyuh. Per dxyiꞌdxyi cuubi raꞌ lasahca duxa run.  
\v 7 Per sidela ñahca ñusaguuꞌdzi stoꞌ raꞌ bwiinn lehyi nin badiꞌhi Dxiohs galohyi laꞌh Moisehs ayi ñichiꞌhn ñuhnn Dxiohs stuhbi lligaaba cuubi,  
\v 8 per laꞌh Dxiohs bwaꞌha Ñiꞌh ayi bazoꞌbadxiahga raꞌ bwiinn guidxyiyuh xchiꞌdxyi Ñiꞌh, chiꞌchi rahbi Ñiꞌh loh Xchihtsi Ñiꞌh: 
\q1 Naꞌh rñiꞌn zadzihn raꞌ dxyih chin guꞌnnahn stuhbi lligaaba, 
\q1 dxiaꞌhan dxyiꞌdxyineen stuhbi dxyiꞌdxyi laꞌh raꞌ bwiinn Israel neezaa laꞌh raꞌ bwiinn Judah tin guicaꞌha raꞌ ba dxyiꞌdxyi cuubi, 
\q1  
\v 9 ayi ziga dxiꞌh lligaaba nin bwiꞌhnnaꞌhn chin biaꞌhan dxyiꞌdxyineen laꞌh xtaada guldooꞌ raꞌ tu laꞌn dxyih raꞌ nin gunaꞌzuꞌhn naa raꞌ ba chin babweꞌhehn laꞌh raꞌ ba lahdxyi raꞌ bwiinn Egiptu. 
\q1 Pwihsi ayi bazoꞌbadxiahga raꞌ ba xchiꞌdxyiꞌhn nin basiaꞌhanee raꞌn ba, niꞌchin guleꞌhe stoꞌn laꞌh raꞌ ba, 
\q1  
\v 10 pwihsi dxyiꞌdxyi raꞌ nin ruꞌnnahn lligaaba xclaaꞌdzihn dxiaꞌhan dxyiꞌdxyi loh bwiinn Israel chiꞌchiyi loh dxyih raꞌ chi naa squiiꞌ, 
\q1 zuꞌnnahn para chuꞌtii xlehyiꞌhn loh xquelrihn raꞌ ba, nee zucaꞌh zahn xchiꞌdxyiꞌhn laꞌn lastoꞌ raꞌ ba, 
\q1 chiꞌchi naꞌh gacaꞌhn Xchiohs raꞌ ba, ya laꞌh raꞌ ba gaca raꞌ xpwiinn raꞌn. 
\q1  
\v 11 Ya nin tuhbi bwiinn ayi guluuꞌyi ba lasaaꞌ baa, nin bwihtsi ba, gahbi ba: 
\q1 “Guldxiuꞌnbwaꞌ laꞌh Daada Dxiohs”, 
\q1 laasii garaa raꞌ bwiinn ziuꞌnbwaꞌ raꞌ ba naꞌh desde nin biꞌtuꞌhn hasta nin guyuꞌxa, 
\q1  
\v 12 nee zalahsastoꞌn laꞌh raꞌ ba nee zusiaꞌpitiin xtsiꞌn dxaaba raꞌ ba, 
\q1 nee ayi ru chuu dxyih gusazaꞌstoꞌn xtuhlda raꞌ ba. 
\p  
\v 13 Chin luꞌh biaꞌhan dxyiꞌdxyi Dxiohs dxyiꞌdxyi cuubi, pwihsi dxyiꞌdxyi nin biaꞌhan dxyiꞌdxyi Ñiꞌh galoh naan dxyiꞌdxyi yuꞌxa, ya ayi ru xi guilasahcan. 
\c 9  
\s1 Guidoꞌ loh guidxyiyuh riiꞌ cun guidoꞌ nin nuu llaaꞌndxibaaꞌ 
\p  
\v 1 Pwihsi, dxyiꞌdxyi nin biaꞌhan galoh badiꞌhi lehyi chi xa guunn raꞌ ba chin raann raꞌ ba Dxiohs, neezaa xa gaca guidoꞌ loh guidxyiyuh tin guhcan chiohpa laꞌn yuuꞌ,  
\v 2 ya nin naa mwer laꞌn hasta laa yuuꞌ nadaa; laꞌn chi zuu gandayehru cun mweella cun pahn raꞌ nin guhcataaꞌyi pur lah Dxiohs. Nin raroopa laꞌn yuuꞌ chi nuu dihtsi lahdxi rooꞌ chi  
\v 3 ya nin raroopa dihtsi vehlu (nin zaꞌbi laꞌn tabernaculu chi) laa yuuꞌ nadaa duxa xteenn Dxiohs.  
\v 4 Riꞌchi zuu tuhbi bacuꞌga dxiꞌba nin rahca guxaꞌhla laꞌn ñiꞌh, dxiꞌba chi naan ganaalla ohro. Riꞌchi za guyuuꞌ tuhbi dxihn nin nahcu ganaalla ohro gaduhbitiiꞌ tihxin nin nahpa raꞌ ba ziga tuhbi sehn nin ruluuꞌyi ba badiꞌhi Dxiohs xchiꞌdxyi Ñiꞌh laꞌh raꞌ ba naa raꞌ ba xpwiinn Ñiꞌh, ya laꞌn dxihn ohro chi guyuuꞌ tuhbi ploori dxiꞌba ohro nin guyuuꞌ tuhbi clahsa pahn nin biriaꞌhlah manah; laꞌn gahca za dxihn chi guyuuꞌ xpahra guehtu Arohn nin guleꞌhe nacuubi bwiiꞌn cun tahblu dxiah raꞌ nin bacaꞌh Dxiohs gadziꞌh dxyiꞌdxyi nin badiꞌhi Ñiꞌh laꞌh guehtu Moisehs,  
\v 5 ya yihca dxihn chi zuu chiohpa figuhra xteenn xaanjla Dxiohs; laꞌh raꞌ aanjla chi naa ziga sehn riꞌchi zuu Dxiohs, pwihsi riꞌchi nuchaꞌga yihca xihyi raꞌ aanjla raꞌ chi riꞌchi za ruzaꞌhla bixohza llarihn guidxaꞌh xcweenta xtuhlda raꞌ bwiinn. Pwihsi ziahan ru dxyiꞌdxyi zahca gazeꞌta nu loh deeꞌ per nnah hasta riꞌchi gasiaꞌhan raꞌ nun. 
\p  
\v 6 Ya chin guluhlla bazuhchaꞌyi raꞌ ba garaa deeꞌ, chiꞌchi riuuꞌtii raꞌ bixohza ziꞌchi zi laꞌn yuuꞌ nadaa tin raann ba Dxiohs,  
\v 7 per laꞌn stuhbi nin raroopa lahta xteenn laꞌn yuuꞌ chi riuuꞌtii laꞌh dxiꞌh bixohza nin rnabwaꞌ per tuhbi dxiꞌh dxyih loh tuhbi yihza; ya loh nin riuuꞌtii bixohza nin rnabwaꞌ chi laꞌn chi nahpa rianee ba rihn xteenn guidxaꞌh tin rutiꞌdxi guhn ban riꞌchi tin dxiaa xtuhlda ba nee dxiaa za xtuhlda bwiinn guihdxyi raꞌ,  
\v 8 per cun deeꞌ raꞌ ruluuꞌyi Spíritu Saantu Dxiohs laꞌh nuꞌh. Loh nin mwergaloh garoolda laꞌn yuuꞌ tabernaculu chi hasta raann raꞌ ba laꞌh Dxiohs rahca raann raꞌ ba Dxiohs loh gaduhbi nin nagahdxi guillaalagaꞌh hasta naa yuuꞌ nadaa duxa xteenn Dxiohs.  
\v 9 Garaa raꞌ nin guhca galoh naa ziga tuhbi bacaala nin baluuꞌyi xa gacan nnah, laasii guelguhn raꞌ cun neezaa maan raꞌ nin badiꞌhi raꞌ ba loh Dxiohs ayi rusiaa zaꞌcan xquelrihn raꞌ bwiinn nin rudiꞌhi guhn maan raꞌ loh Dxiohs, laasii llarihn maan raꞌ basieꞌwzin loh xtuhlda raꞌ bwiinn.  
\v 10 Deeꞌ naa ganaalla zi nin rahw bwiinn, nin reeꞌ ba, cun guelrohbañihsa o xilla stuhbi dziꞌn nin ruhnn bwiinn tin riaa ganaalla tihxi zi ba hasta laꞌn dxyihyi nin guchaꞌh Dxiohs garaatiiꞌ. 
\p  
\v 11 Per laꞌJesucristu biꞌ, yannah laꞌh Ñiꞌh naa Ñiꞌh bixohza rooꞌ xteenn raꞌ dxyiꞌdxyi cuubi nin lasahca ru nnah, Nacuubi naa laꞌn guidoꞌ hasta ruhnn Ñiꞌh dziꞌn xteenn bixohza, ya nazaꞌca ru cun nayaa ru guidoꞌ cuubi chi nee ayi guhcachaꞌyin cun naa raꞌ bwiinn guidxyiyuh, nee ayi za naan guidoꞌ loh guidxyiyuh riiꞌ.  
\v 12 Laꞌh Jesucristu guyuuꞌtiiꞌ laꞌn hasta naa paꞌcaa yuuꞌ nadaa duxa xteenn Dxiohs, tin ayi gutiꞌdxi guhn dxiꞌh Ñiꞌh llarihn raꞌ chihva cun guun sino que llarihn nabahan Ñiꞌh; ya laꞌn yuuꞌ chi guyuuꞌtii Ñiꞌh tuhbi si par tuꞌpazi, tin ziꞌchi bataꞌh Ñiꞌh laꞌh raꞌ nuꞌh loh duhlda par tuꞌpazi.  
\v 13 Garaa ziga guñiꞌ raꞌ bwiinn biaa xtuhlda raꞌ ba naa squiiꞌ cadxyih rooꞌ: llarihn raꞌ guun, cun llarihn raꞌ chihva, cun cobadeh xteenn guidxaꞌh nin bacaꞌdxih raꞌ ba laꞌn guidoꞌ nadaa chi nin baroꞌba raꞌ ba yihca raꞌ bwiinn raꞌ nin nahpa duhlda.  
\v 14 Per sidela basiaa dee raꞌ xtuhlda bwiinn nez tihxi zi raꞌ ba, ¡balaaca chiꞌh lla llarih Jesucristu ayi dxiaꞌhan gusiaa xtuhlda bwiinn!, laasii nahpa Ñiꞌh guelnabahan par tuꞌpazi, laꞌh gahca Ñiꞌh badiꞌhi Ñiꞌh llarihn Ñiꞌh loh Dxiohs ziga tuhbi guhn nin ayi nin tuhbi duhlda, ya llarihn Ñiꞌh rusiaa loh xquelrihn nuꞌh pur dziꞌn raꞌ nin ayi xi lasahca tin chuu nuꞌh loh Dxiohs nin nabahan par tuꞌpazi.  
\v 15 Pwihsi niꞌchin Jesucristu naa nin rusiaꞌlda dxyiꞌdxyi naa Ñiꞌh nin zuu galaayi loh Dxiohs llaaꞌndxibaaꞌ neezaa loh raꞌ bwiinn guidxyiyuh pur xcweenta dxyiꞌdxyi cuubi, ya loh nin guhchi Jesucristu tin chapitii xtuhlda raꞌ bwiinn cun bwiinn za raꞌ nin bwiꞌhnn ziga caa loh lehyi Moisehs tin guicaꞌha garaa nin ba gudihdxyi Dxiohs guelnabahan para tuꞌpazi, ziga biaꞌhan dxyiꞌdxyi Ñiꞌh dez galohtiiꞌ.  
\v 16 Dxyiꞌdxyi cuubi riiꞌ naa ziga chin xclaaꞌdzi tuhbi bwiinn guinabwaꞌ ba xa guigaꞌzi xixteenn ba chin galda gachi ba, nahpa gucaꞌh bwiinn chi loh tuhbi dxihtsi xa guigaꞌzin chiꞌchi gucaꞌh lah ba, per chin nnahyi gachi bwiinn chi ayi xi guilasahca dxihtsi chi.  
\v 17 Pwihsi ayi xi guilasahca dxihtsi chi sidela laꞌh bwiinn nin bwiꞌhnnan nabahan ba; sola lasahcan chin ba laꞌhba guhchi.  
\v 18 Pwihsi niꞌchin chin biaꞌhan dxyiꞌdxyi Dxiohs cun laꞌh raꞌ bwiinn Israel galoh, nahpa guhchi tuhbi guidxaꞌh tin billiꞌhi rihn.  
\v 19 Chin guluhlla guñiꞌ Moisehs xcweenta dxyiꞌdxyi raꞌ ziga nin caa loh dxihtsi lehyi loh raꞌ bwiinn Israel, chiꞌchi gucaꞌha ba llarihn raꞌ bicerru raꞌ cun llarihn chihva, cun ñihsa, cun dxyihchi xñaa cun tuhbi lliiꞌdzi yahga nin laa hisopo; chiꞌchi cun lliiꞌdzi yahga chi baroꞌba ba rihn chi loh dxihtsi chi cun yihca garaa raꞌ bwiinn raꞌ chi,  
\v 20 chiꞌchi rahbi ba: 
\q1 Rihn riiꞌ naa sehn xteenn dxyiꞌdxyi nin biaꞌhan dxyiꞌdxyi Ñiꞌh loh tu zizoꞌbapaꞌhcaa guunn tu. 
\p  
\v 21 Ziꞌchi gahca za baroꞌba Moisehs rihn chi laꞌn guidoꞌ cun yihca garaa raꞌ nin xchiꞌhn raꞌ bixohza chin raann raꞌ ba Dxiohs laꞌn guidoꞌ chi.  
\v 22 Lehyi xteenn Moisehs rnabwaꞌ nahpa cun rihn riaa xtuhlda raꞌ bwiinn, ya ayi rahca nayaa raꞌ ba loh duhlda sidela laꞌh rihn ayi rlliꞌhi. 
\s1 Llarihn Jesucristu ruziaꞌtii xtuhlda bwiinn raꞌ 
\p  
\v 23 Niꞌchin bichiꞌhn guhchi guidxaꞌh raꞌ riiꞌ nee billiꞌhi llarihn raꞌ ma tin basiaaꞌhan laꞌh raꞌ nin naa ziga xpacaala raꞌ nin nuu llaaꞌndxibaaꞌ, per nin nuu llaaꞌndxibaaꞌ xchiꞌhn guilliꞌhi llarihn tuhbi nin lasahca ru,  
\v 24 laasii laꞌh Jesucristu ayi guyuuꞌtii Ñiꞌh laꞌn yuuꞌ saantu nin ruhnn chaꞌyi raꞌ bwiinn guidxiyuh, nin naa ziga xpacaala guidoꞌ paꞌcaa xteenn Dxiohs sino que guyuuꞌtii Ñiꞌh llaaꞌndxibaaꞌ tin cañiꞌ Ñiꞌh pur xcweenta raꞌ nuꞌh loh Dxiohs,  
\v 25 nee ayi za bichiꞌhn ñilliꞌhi llarihn Ñiꞌh ziahan ziga nahpa ruhn raꞌ xpixohza rooꞌ raꞌ bwiinn Israel chin riuuꞌtiinee raꞌ ba llarihn guidxaꞌh laꞌn yuuꞌ nadaa duxa xteenn Dxiohs yihza cun yihza.  
\v 26 Sidela nahpa ñuhnn Ñiꞌh ziga ruhnn raꞌ bixohza, nahpa ñahchi Ñiꞌh ziahan dez chin gurihxchih guidxyiyuh, per nnah chin badzihn dxyih, baluuꞌyiloh Jesucristu tuhbi dxiꞌh tin laꞌh gahca za Ñiꞌh badiꞌhi Ñiꞌh llarihn Ñiꞌh loh Dxiohs chin guhchi Ñiꞌh loh cruhzi, tin ziꞌchi basiaꞌpitii Ñiꞌh xtuhlda raꞌ nuꞌh par tuꞌpazi,  
\v 27 laasii garaa raꞌ bwiinn nahpa gachi raꞌ ba tuhbi dxiꞌh, ya chiꞌchiyi tiidxi raꞌ ba loh xquelguxchisi Dxiohs.  
\v 28 Pwihsi ziꞌchi za laꞌh Jesucristu tuhbi chiꞌh zi baxiꞌhi Ñiꞌh llarihn Ñiꞌh loh cruhzi tin basiaꞌpitii Ñiꞌh xtuhlda raꞌ ziahan duxa raꞌ bwiinn. Per nahpa guibiaꞌgarii Ñiꞌh stuhbi ayi tin gusiaꞌpitii ru dxiꞌh Ñiꞌh duhlda sino que tin gutaꞌh Ñiꞌh laꞌh gallee bwiinn nin cabweeza laꞌh Ñiꞌh. 
\c 10  
\p  
\v 1 Laasii xlehyi Moisehs naa ziga zi tuhbi bacaala xteenn raꞌ nin zeꞌ nnah, per ayi gacan ziga paꞌcaa dxyiꞌdxyi cuubi raꞌ chi; niꞌchin lehyi cun llarihn guidxaꞌh raꞌ nin rlliꞌhi gazohba yihza ayi gaca guunn zaꞌcan laꞌh raꞌ bwiinn nin riabiiga loh Dxiohs, laasii ayi nuu gusiaꞌpitii llarihn guidxaꞌh xtuhlda bwiinn.  
\v 2 Pwihsi sidela laꞌh lehyi ñahca ñuhnn nayaa laꞌh raꞌ bwiinn loh duhlda, pwihsi ayi ru ñudiꞌhi raꞌ ba llarihn raꞌ guidxaꞌh laasii chin guyaꞌpitii xtuhlda raꞌ ba nee loh xquelrihn raꞌ ba ayi ñuꞌnbwaꞌ ru laꞌh duhlda,  
\v 3 per xquelguhchi raꞌ guidxaꞌh cun guelrudiꞌhi raꞌ ba llarihn raꞌ ma gazohba yihza sola ralluꞌyin para rusazaꞌn stoꞌ raꞌ ba xcweenta xtuhlda raꞌ ba,  
\v 4 laasii llarihn raꞌ guidxaꞌh ayi nuu gusiaꞌpitii xtuhlda bwiinn,  
\v 5 niꞌchin laꞌh Jesucristu chin biꞌ Ñiꞌh loh guidxyiyuh rahbi Ñiꞌh loh Dxiohs: 
\q1 Ayi xclaaꞌdzi luꞌh llarihn raꞌ guidxaꞌh nin rahchi raꞌ tin gusiaa raꞌ xtuhlda raꞌ bwiinn. 
\q1  
\v 6 Ayiza biuuꞌ stoꞌ luꞌh guhn raꞌ nin gucaꞌdxih raꞌ guidxaꞌh nin rahca raꞌ tin gusiaa raꞌ xtuhlda raꞌ bwiinn. 
\q1  
\v 7 Ya chiꞌchi raꞌpihn: 
\q1 “Riiꞌ zeꞌldahn tin guꞌnnahn ziga xclaaꞌdzi luꞌh gaca, Daada Dxiohs”, (ziga nin caa loh dxihtsi raꞌ pur nin sacaꞌhn). 
\p  
\v 8 Chin guyaꞌloh guñiꞌ Jesucristu dxyiꞌdxyi raꞌ riiꞌ: “Ayi xclaaꞌdzi luꞌh cun ayi za riuuꞌstoꞌ luꞌh xquelguhchi guidxaꞌh neezaa guhn nicala za xquelrcaꞌdxih cun llarihn guidxaꞌh nin runiꞌhi raꞌ bwiinn pur xtuhlda raꞌ ba ziga caa loh dxihtsi lehyi guunn raꞌ bwiinn”,  
\v 9 ya chiꞌchi rahbi Ñiꞌh: “Naꞌh zeꞌldahn tin guꞌnnahn ziga paꞌcaa nin xclaaꞌdzi Yuꞌbiluꞌh guꞌnnahn, Daada Dxiohs”, chiꞌchi basiaꞌpitii Ñiꞌh nin guhca galoh tin pur llarihn Ñiꞌh gulahchixchih Ñiꞌh dxyiꞌdxyi cuubi nin basiaꞌhannee Ñiꞌh laꞌh nuꞌh nnah.  
\v 10 Laꞌh Dxiohs basiaa laꞌh nuꞌh laasii bwiꞌhnn Jesucristu ziga guhca xigaaba Dxiohs guxiꞌhi Ñiꞌh llarihn Ñiꞌh chin gucah Ñiꞌh loh cruhzi tuhbi chiꞌzi par tuꞌpazi.  
\v 11 Garaa raꞌ bixohza raꞌ nin naa bwiinn Israel, ruhn raꞌ ba dziꞌn guillii-guillii tin zeezah rudiꞌhi raꞌ ba guidxaꞌh chiꞌh zi cun llarihn raꞌ ma, ziga caa loh lehyi, nicala laꞌh guhn raꞌ chi ayi nuu gusiaꞌpitii duhlda,  
\v 12 per laꞌh Jesucristu tuhbi chiꞌh zi baxiꞌhi Ñiꞌh llarihn Ñiꞌh loh cruhzi tin basiaꞌpitii Ñiꞌh xtuhlda raꞌ bwiinn guidxiyuh par tuꞌpazi, chiꞌchi guzohba Ñiꞌh xlahdu derehchu Dxiohs llaaꞌndxibaaꞌ,  
\v 13 ya riꞌchi cabweeza Ñiꞌh chin gadzihn dxyih gutsiiga Dxiohs gallee nin rdxyiꞌchinee laꞌh Ñiꞌh nez ñaaꞌ Ñiꞌh.  
\v 14 Niꞌchin tuhbi chiꞌh zi gucah Ñiꞌh loh cruhzi tin basiaa Ñiꞌh par tuꞌpazi laꞌh raꞌ bwiinn nin riachiistoꞌ raꞌ ñiꞌh xchiꞌdxyi Ñiꞌh.  
\v 15 Ziꞌchi gahca za rñiꞌ Spíritu Saantu Dxiohs loh nuꞌh; nnah Ñiꞌh: 
\q1  
\v 16 Dxyiꞌdxyi nin dxiaꞌhannee raꞌn ba laꞌn dxyih raꞌ chi gaca squiiꞌ, ―rahbi Dxiohs―, ziguꞌtiin xchiꞌdxyiꞌhn laꞌn lastoꞌ raꞌ ba, 
\q1 nee zusiaꞌhan zahn xchiꞌdxyiꞌhn loh xquelrihn raꞌ ba. 
\p  
\v 17 Ya chiꞌchi rahbi Ñiꞌh: 
\q1 Nin stuhbi ayi gusazaꞌstoꞌn xtuhlda raꞌ ba nee cun xquelnadxaaba raꞌ ba. 
\p  
\v 18 Niꞌchin chin laꞌh xtuhlda bwiinn ba guyahpitii, ayi ru rchiꞌhn gudiꞌhi raꞌ ba guidxaꞌh tin chapitii xtuhlda raꞌ ba. 
\s1 Yannah nahpa chobiiga nuꞌh loh Dxiohs 
\p  
\v 19 Niꞌchin nnah bwiitsi raꞌ, ayi guidxyihbi tu laasii zahca gachidxuꞌtii raꞌ nuꞌh laꞌn yuuꞌ nadaa duxa xteenn Dxiohs pur llarihn Jesucristu.  
\v 20 Chozah nuꞌh loh neziuh nacuubi, neziuh xteenn guelnabahan nacuubi, nin baxaala Ñiꞌh para laꞌh nuꞌh pur llarihn gahca Ñiꞌh nin badiꞌhi Ñiꞌh loh Dxiohs tin chuꞌtii nuꞌh hasta rbweeza Xtaada Dxiohs Ñiꞌh.  
\v 21 Jesucristu naa bixohza rooꞌ nin dziꞌbaloh loh raꞌ xpwiinn Dxiohs,  
\v 22 pwihsi niꞌchin nahpa chobiiga nuꞌh loh Dxiohs cun gaduhbi guelnayaa stoꞌ xteenn nuꞌh, ayi guidxyihbi nuꞌh nee ayi za gatuhyi loh nuꞌh. Cun guelriachii zaꞌca stoꞌ nuꞌh biaa laꞌn lastoꞌ nuꞌh loh xigaaba dxaaba nuꞌh, ya tihxi raꞌ nuꞌh bidxiꞌbin loh ñihsa nayaa,  
\v 23 pwihsi chozah dziꞌtsi nuꞌh loh dxyiꞌdxyi nin gwachiistoꞌ nuꞌh, ayi chyu guchaꞌh xigaaba nuꞌh laasii zuzaꞌloh Dxiohs xchiꞌdxyi Ñiꞌh nin basiaꞌhannee Ñiꞌh laꞌh nuꞌh,  
\v 24 nee gachidxiꞌhyi za nuꞌh xa guidxiacanee nuꞌh laꞌh raꞌ lasaaꞌ nuꞌh ziga tuhbi ziga stuhbi raꞌ ba tin ziꞌchi gantsiiꞌhi lasaaꞌ nuꞌh cun guidiꞌhnn nuꞌh ganaalla dziꞌn zaꞌca.  
\v 25 Nin ayi za chyu guunn ziga ruhnn raꞌ bwiinn raꞌ nin ayi ru riꞌ chin radxaꞌgalasaaꞌ nuꞌh, sino que nahpa gachiguꞌguiꞌw lastoꞌ lasaaꞌ nuꞌh laasii laꞌh dxyih nin guibiaꞌgarii Daada Jesucristu zeegadzihn gahxu. 
\p  
\v 26 Laasii sidela laꞌh nuꞌh cheezah chuu xtuhlda nuꞌh nicala ba bihn dxiahga nuꞌh xchiꞌdxyi Jesucristu, ayi ru gaca chapitii xtuhlda nuꞌh,  
\v 27 chiꞌchi sihn gachidxunee nuꞌh guelnadxyiꞌbi xteenn xquelguxchisi Dxiohs, nee bwehla roo duxa nin guñihchiloh laꞌh raꞌ bwiinn raꞌ nin bidxyiꞌchinee laꞌh Dxiohs.  
\v 28 Chin guyuuꞌ chyuulla tuhbi bwiinn nin ayi bazoꞌbadxiahga ziga guhca xlehyi guehtu Moisehs, nee nicala nuu chiohpa o chohnna bwiinn nin naann dziꞌtsi guiñiꞌ raꞌ ba ayi ruzoꞌbadxiahga ba lehyi chi pwihsi nahpa rahchi ba, ayi chyu ralahsastoꞌ ñiꞌh laꞌh ba.  
\v 29 Pwihsi ¿balaaca xchiꞌh ru guelrusaꞌcazii duxa nin saca raꞌ nin rusiaꞌha xtuhyi laꞌh Lliiꞌn Dxiohs, nee cun ziga rbweꞌhestoꞌ raꞌ ba llarihn Ñiꞌh nee rihn chi naa nin biaꞌhan dxyiꞌdxyi basiaa laꞌh raꞌ ba loh duhlda, nee rñiꞌyah raꞌ ba laꞌh Spíritu Saantu xteenn Dxiohs, nee laꞌh Ñiꞌh naa Ñiꞌh nin nadziiꞌhi laꞌh raꞌ ba?  
\v 30 Laasii ba naann nuꞌh guñiꞌ Dxiohs squiiꞌ: “Naꞌh si guꞌnnahn xquel guxchiꞌsihn; naꞌh zusadxiillihn laꞌh raꞌ ba.” Nee neezaa guñiꞌ Ñiꞌh squiiꞌ: “Laꞌh nin naa Daada zuhnn guelguxchisi laꞌh raꞌ xpwiinn Ñiꞌh.”  
\v 31 ¡Nadxaaba duxa saca bwiinn nin dxiaaba laꞌn naa Dxiohs nin nabahan dziꞌtsi! 
\p  
\v 32 Pwihsi gulgazaꞌstoꞌ tu xa guhca tu galohyi; chin gueꞌdu gucaꞌha tu xchiꞌdxyi Dxiohs xa bazuhchihpa stoꞌ tu, batiꞌdxiloh tu guelrzaꞌcazii duxa laasii gucaꞌha tu xchiꞌdxyi Dxiohs.  
\v 33 Guyuuꞌ raꞌ lasaaꞌ tu nin basiꞌxtuhyi raꞌ ba, nee guyuuꞌ za raꞌ nin basaꞌcazii laꞌh tu nez delanta loh raꞌ bwiinn ziahan. Guyuuꞌ za nin badxaꞌgaloh tu loh guelrzaꞌcazii niꞌchi za batiꞌdxiloh tu guelrzaꞌcazii.  
\v 34 Laꞌh tu balahsa stoꞌ tu laꞌh raꞌ bwiinn raꞌ nin guyuuꞌ lahtsidxiꞌba ya hasta riahxi tu basaaꞌn tu guleꞌhelluꞌhu raꞌ ba xixteenn tu laasii guhcabwaꞌ tu llaaꞌndxibaaꞌ nuu guelnazaꞌca par laꞌh tu nin lasahca ru, nee naan nin ayi ñichilohtiiꞌ.  
\v 35 Niꞌchin nnah ayi guñihchi tu xquelriachiistoꞌ tu xchiꞌdxyi Jesucristu tin niꞌchi guunn guicaꞌha tu guelnabahan nin ayi ñichilohtiiꞌ.  
\v 36 Pwihsi laꞌh tu nahpa cweeza dziꞌtsi tu tin chin laꞌh tu ba bwiꞌhnn nin xclaaꞌdzi Dxiohs, ya chiꞌchi zicaꞌha tu nin biaꞌhan dxyiꞌdxyi Ñiꞌh guicaꞌha tu,  
\v 37 laasii xchiꞌdxyi Dxiohs nin biaꞌhan rñiꞌ squiiꞌ: 
\q1 Za lliaaꞌyiꞌhn riaꞌdxyi para dxiꞌ nin nahpa dxiꞌ, ayi gacataꞌh Ñiꞌh. 
\q1  
\v 38 Bwiinn nin nabahan nayaa pur ziga riachiistoꞌ ba xchiꞌdxyiꞌhn zibahan ba; 
\q1 per sidela laꞌh ga gusaaꞌn ba chechiistoꞌ ba xchiꞌdxyiꞌhn, 
\q1 ayi chuu nasaa stoꞌn gwaꞌhahn loh ba. 
\p  
\v 39 Ya laꞌh nuꞌh ayi naa nuꞌh nin rusaaꞌn guelriachiistoꞌ para ñichiloh nuꞌh loh xtuhlda nuꞌh sino que naa nuꞌh nin zenaꞌhla tin taꞌh nuꞌh loh xtuhlda nuꞌh laasii riachiistoꞌ nuꞌh. 
\c 11  
\s1 Guelriachiistoꞌ xchiꞌdxyi Dxiohs 
\p  
\v 1 Pwihsi ziga gaapa luꞌh guelriachii stoꞌ naa siguhra zicaꞌha luꞌh nin cabweeza luꞌh, cun naannloh za luꞌh chuu tuhbi cohsa nin nagahdxi dxiinloh.  
\v 2 Biahxinee Dxiohs laꞌh xtaada guldooꞌ raꞌ nuꞌh laasii gwachiistoꞌ raꞌ ba xchiꞌdxyi Ñiꞌh. 
\p  
\v 3 Laasii nin riachiistoꞌ nuꞌh, naann nuꞌh bwiꞌhnnchaꞌyi Dxiohs dxibaaꞌ cun guidxyiyuh pur xchiꞌdxyi Ñiꞌh, laasii nin rachidiaꞌha raꞌ nuꞌh nnah guhcan loh nin ayi biinloh galohyi.  
\v 4 Pur ziga gwachiistoꞌ guehtu Abel xchiꞌdxyi Dxiohs badiꞌhi guhn ba tuhbi guhn nez loh Ñiꞌh nin nazaꞌca ru loh guhn nin badiꞌhi bwihtsi ba nin biriaꞌhlah Caín, ya pur niꞌchin guñiꞌ Dxiohs naa guehtu Abel bwiinn zaꞌca ru. Nnah nicala laꞌh guehtu Abel guhchi ba, zeezahtiiꞌ zaꞌbi xchiꞌdxyi ba ziga gwachiistoꞌ ba xchiꞌdxyi Dxiohs. 
\p  
\v 5 Ziꞌchi gahca za laꞌh Enoc pur ziga gwachiistoꞌ ba laꞌh Dxiohs, niꞌchin nin zeenee Dxiohs laꞌh ba llaaꞌndxibaaꞌ, nabahan ba ayi guhchi ba, pwihsi ayi ru badxeela raꞌ ba laꞌh Enoc laasii Dxiohs zeenee laꞌh ba llaaꞌndxibaaꞌ, nee loh Xchihtsi Dxiohs rñiꞌ galoh nin nagahdxi guzee ba llaaꞌndxibaaꞌ, guluuꞌnasaa ba stoꞌ Dxiohs.  
\v 6 Pwihsi ayi nuu cuꞌnasaa luꞌh stoꞌ Dxiohs sidela ayi riachiistoꞌ luꞌh xchiꞌdxyi Ñiꞌh, laasii ziga chebiiga luꞌh loh Dxiohs nahpa chechiistoꞌ luꞌh nuu Dxiohs nee zudiꞌhi Ñiꞌh cohsa zaꞌca laꞌh raꞌ bwiinn raꞌ nin gadxiꞌhyi laꞌh Ñiꞌh. 
\p  
\v 7 Nee pur gwachiistoꞌ guehtu Noeh dxyiꞌdxyi nin guñiꞌ Dxiohs loh ba, chin rahbi Ñiꞌh ziaaba ñihsadxiah nin gueꞌdu gwaꞌha raꞌ bwiinn, chiꞌchi bwiꞌhnn ba nin rahbi Dxiohs loh ba nee bidxyihbi za ba laasii naann ba ruzaꞌloh Dxiohs dxyiꞌdxyi nin rñiꞌ Ñiꞌh, niꞌchin bwiꞌhnnchaꞌyi ba tuhbi barcu rooꞌ tin ayi ñahchi raꞌ bwiinn lasaaꞌ ba. Laasii gwachiistoꞌ ba xchiꞌdxyi Dxiohs, niꞌchi baluuꞌyi ba balaaca nin ayi riachiistoꞌ raꞌ bwiinn guidxyiyuh dxyiꞌdxyi nin baluuꞌyi ba, niꞌchi gucaꞌha Noeh guelnabahan zaꞌca nin gwachiistoꞌ ba xchiꞌdxyi Dxiohs. 
\p  
\v 8 Pur guelriachiistoꞌ xteenn xchiꞌdxyi Dxiohs nin guyuuꞌ stoꞌ guehtu Abrahn, chin gudihdxyi Dxiohs laꞌh ba, bazoꞌbadxiahga ba xchiꞌdxyi Ñiꞌh biriaꞌh ba lahdxyi ba gwah ba nez hasta biaꞌhandxyiꞌdxyi Dxiohs gudiꞌhi Ñiꞌh guicaꞌha ba. Pwihsi biriaꞌh ba lahdxyi ba gunaꞌzu nehza ba zee ba nin ayi gaann ba caa chiꞌh gadzihn ba.  
\v 9 Pwihsi laasii guyuuꞌ guelriachii xteenn xchiꞌdxyi Dxiohs stoꞌ guehtu Abrahn, niꞌchin guyuuꞌ ba ziga tuhbi bwiinnziitu loh yuh raꞌ nin guxeꞌhla Dxiohs laꞌh ba, guyuuꞌ raꞌ ba laꞌn yuuꞌ dxihdxi raꞌ, ziga gahca za bwiꞌhnn guehtu Isaac cun guehtu Jacobo, laasii nee loh raꞌ ba biaꞌhandxyiꞌdxyi Dxiohs gucaꞌha raꞌ ba yuh raꞌ chi,  
\v 10 laasii laꞌh guehtu Abrahn guleeza ba tuhbi guihdxyi nin zohba dziꞌtsi, tuhbi guihdxyi nin guunnchaꞌyi Dxiohs nee nin cwachixchih Ñiꞌh. 
\p  
\v 11 Ziꞌchi za gohpa guehtu Sara guelriachiistoꞌ xchiꞌdxyi Dxiohs tin nicala guyuꞌxa ba nee gudiiꞌdxi ñuuꞌ lliiꞌn ba, per gucaꞌha ba guelrnabwaꞌ tin guyuuꞌ lliiꞌn ba laasii gwachiistoꞌ ba laꞌh Dxiohs nahpa bazaꞌloh Ñiꞌh xchiꞌdxyi Ñiꞌh nin biaꞌhannee Ñiꞌh laꞌh ba.  
\v 12 Pwihsi laꞌh guehtu Abrahn nicala zeꞌgadzihn dxyih nin gachi ba, nahpa guyuuꞌ ziahan duxa raꞌ llahga ba ziga zi dxih raꞌ nin nuu llaaꞌndxibaaꞌ nee cun ziga za yuhlli nin rii rwaaꞌ ñihsadoꞌ, nin ayi gaca gulaaba bwiinn. 
\p  
\v 13 Garaa raꞌ bwiinn raꞌ chi guhchi raꞌ ba, nee ayi gucaꞌha raꞌ ba xiilla nin biaꞌhan Dxiohs dxyiꞌdxyi ñudiꞌhi Ñiꞌh laꞌh raꞌ ba, ya nin gwachiistoꞌ raꞌ ba xchiꞌdxyi Dxiohs bwaꞌha raꞌ ban desde zihtu rooꞌ, niꞌchin nin gwachiistoꞌ raꞌ ba laasii naann raꞌ ba naa raꞌ ba ziga zi bwiinnziitu, caꞌnzaa zi raꞌ ba loh guidxyiyuh.  
\v 14 Pwihsi nin rñiꞌ raꞌ squiiꞌ, cañiꞌ raꞌ ba nayaa-nayaa cadxiꞌhyi raꞌ ba canehza gaca lahdxyi raꞌ ba.  
\v 15 Sidela laꞌh raꞌ ba ñuhnn raꞌ ba lligaaba xteenn lahdxyi raꞌ ba nin biriaꞌh raꞌ ba, ñahca ñibiaꞌgarii raꞌ ba riꞌchi,  
\v 16 per xclaaꞌdzi raꞌ ba tuhbi guihdxyi zaꞌca nez nuu Dxiohs llaaꞌndxibaaꞌ, pwihsi niꞌchin laꞌh Dxiohs ayi ratuhyi loh Ñiꞌh guiriaꞌhlah Ñiꞌh Xchiohs raꞌ ba, laasii nahpa chaꞌyi Ñiꞌh tuhbi guihdxyi zaꞌca nin chuu raꞌ ba llaaꞌndxibaaꞌ. 
\p  
\v 17 Pwihsi pur guelriachiistoꞌ xteenn Dxiohs nin guyuuꞌ stoꞌ guehtu Abrahn, niꞌchin chin badiꞌhi Ñiꞌh tuhbi dziꞌn nagahn laꞌh ba tin gwaꞌha Ñiꞌh xa guunn ba, gwanee ba laꞌh Isaac tuhbi lahta tin ñudiꞌhi ba laꞌh Isaac ziga tuhbi guhn loh Dxiohs. Pwihsi ayi biaa ba ñudiꞌhi ba laꞌh tuhbi dxiꞌh lliiꞌn ba chi guhn loh Dxiohs, nicala biaꞌhannee Dxiohs dxyiꞌdxyi laꞌh ba  
\v 18 rahbi Ñiꞌh: 
\q1 Pur Isaac ziahan llahga luꞌh chuuꞌ. 
\p  
\v 19 Laasii laꞌh guehtu Abrahn naann dziꞌtsi ba nahpa Dxiohs guelrnabwaꞌ tin gucwaꞌhn Ñiꞌh bwiinn loh guelguhchi, pwihsi ziꞌchi zahca guiñiꞌ nuꞌh ñahca ziga zi guhchi Isaac nee gubiaꞌgarii babahn bi tin bacaꞌha xtaada bi laꞌh bi stuhbi. 
\p  
\v 20 Pwihsi ziꞌchi za laꞌh guehtu Isaac guyuuꞌ guelriachiistoꞌ xteenn xchiꞌdxyi Dxiohs stoꞌ ba niꞌchin bwiꞌhnntaaꞌyi ba yihca guehtu Jacobo cun guehtu Esaú, ya guñiꞌxgah ba xi niꞌca guunn tuhbigah raꞌ bi.  
\v 21 Ziꞌchi za laꞌh guehtu Jacobo guyuuꞌ za guelriachiistoꞌ xteenn xchiꞌdxyi Dxiohs stoꞌ ba chin laꞌh ba naa gachi bwiꞌhnntaaꞌyi ba yihca tuhbigah raꞌ lliiꞌn guehtu Joseh, chiꞌchi gunaꞌzu ba tuhbi yahga gaandxu tin guzuh chihpa ba guunn ba laꞌh Dxiohs.  
\v 22 Ziꞌchi za laꞌh guehtu Joseh guyuuꞌ za guelriachiistoꞌ xteenn Dxiohs stoꞌ ba chin ba naa gachi ba guñiꞌxgah ba zariaꞌh raꞌ bwiinn Israel loh guihdxyi Egiptu, guñiꞌ za ba xa nahpa gucaꞌtsi raꞌ ba laꞌh ba. 
\p  
\v 23 Neezaa xcuzahn raꞌ guehtu Moisehs guhpa guelriachiistoꞌ xteenn xchiꞌdxyi Dxiohs, niꞌchin chin guulaa guehtu Moisehs, loh chiohpa bweꞌhw guluꞌlaꞌn raꞌ ba laꞌh Moisehs laasii bwaꞌha raꞌ ba chuhla badoꞌyiꞌhn guhca bi nee ayi bazoꞌbadxiahga raꞌ ba dxyiꞌdxyi nin guñiꞌ rrehyi nahpa gachi raꞌ biñiꞌn ndxiꞌhw,  
\v 24 ya gohpa za guehtu Moisehs guelriachiistoꞌ xteenn xchiꞌdxyi Dxiohs stoꞌ ba niꞌchin chin guhca ndxiꞌhw ba ayi gunnah ba ñiriaꞌlah ba lliiꞌn lliiꞌndxaꞌpa rrehyi Egiptu,  
\v 25 sino que bwiꞌhnn ba lligaaba batiꞌdxilohnee ba laꞌh raꞌ xpwiinn Dxiohs guelrzaꞌcazii xlawaaꞌha ñahxinee ba guelnasaa raꞌ xteenn duhlda paaldaa si dxyih.  
\v 26 Par laꞌh ba lasahca ru batiꞌdxiloh ba guelrzaꞌcazii ziga nin batiꞌdxiloh Jesucristu xlawaaꞌha ñicaꞌha ba guelnazaꞌca xteenn Egiptu laasii cabweeza si ba guelnazaꞌca nin gudiꞌhi Dxiohs laꞌh ba.  
\v 27 Pwihsi pur guelriachiistoꞌ xteenn xchiꞌdxyi Dxiohs nin guyuuꞌ stoꞌ guehtu Moisehs, biriaꞌh ba loh guihdxyi Egiptu nee ayi bidxyihbi ba xquelnadxyiꞌchi rrehyi, gwazahnee dziꞌtsi ba ziga naa xigaaba ba ziga nin bwaꞌhaloh ba laꞌh Dxiohs nin ayi chyu gwaꞌha. 
\p  
\v 28 Ya pur guelriachiistoꞌ xteenn xchiꞌdxyi Dxiohs nin guyuuꞌ stoꞌ Moisehs bwiꞌhnn ba lañih xteenn paascu, gunabwaꞌ ba baroꞌba raꞌ ba llarihn raꞌ lliꞌhyi tuhbigah rwaaꞌ yuuꞌ nin guyuuꞌ raꞌ bwiinn Israel raꞌ tin chin gudiiꞌdxi aanjla xteenn guelguhchi riꞌchi nin tuhbi lliiꞌngaꞌn galoh bwiinn Israel ayi xi gunnee ba.  
\v 29 Ya pur guelriachiistoꞌ xteenn xchiꞌdxyi Dxiohs gudiiꞌdxi bwiinn Israel galaayi ñihsadoꞌ nin laa ñisadoꞌ xñiaa ziga zi loh yuh bihdzi; ya chin guclaaꞌdzi raꞌ bwiinn Egiptu raꞌ ñuhnn ziꞌchi za, laꞌlagaꞌh gubiꞌhyi ñihsadoꞌ chi yihca raꞌ ba ya gwaaꞌñihsa raꞌ ba. 
\p  
\v 30 Ya pur guelriachiistoꞌ xteenn xchiꞌdxyi Dxiohs gurih barda dxiah xteenn guihdxyi Jericoh laasii galoh biahyi raꞌ ba gadiidxi leeꞌ dxiah chi loh gahdzi dxyih,  
\v 31 ya pur guelriachiistoꞌ guehtu Rahab, tuhbi gunnaꞌh dxaaba, ayi guhchi ba chin guhchi raꞌ bwiinn nin ayi bazoꞌbadxiahga dxyiꞌdxyi laasii laꞌh ba bagachiꞌloh ba nee guluuꞌchaꞌyi ba laꞌh raꞌ bwiinn Israel nin zeegaldaꞌtsi xa naa guihdxyi chi. 
\p  
\v 32 ¿Xi niꞌca ru guiñiꞌn? Ayi gaca xi guzeꞌta ruhn nee riaꞌdxi guzeꞌtaꞌhn guehtu Gedeohn, guehtu Barac, guehtu Sansohn, guehtu Jefteh, guehtu Davihd, guehtu Samuel, neezaa guehtu daada raꞌ nin guñiꞌ xchiꞌdxyi Dxiohs.  
\v 33 Gallee raꞌ ba guyuuꞌ guelriachiistoꞌ xteenn xchiꞌdxyi Dxiohs laꞌn lastoꞌ raꞌ ba, niꞌchin bwiꞌhnn zaꞌca raꞌ ba guelguxchisi, gucaꞌha raꞌ ba xquelrahcanee Dxiohs nin biaꞌhan dxyiꞌdxyi gucaꞌha raꞌ ba, nee basieꞌw za raꞌ ba rwaaꞌ raꞌ bweꞌdzi,  
\v 34 basiuꞌyi raꞌ ba bwehla duxa raꞌ, gulaꞌh raꞌ ba loh guelguhchi tin ayi ñahchi raꞌ ba cun spahda. Bwiinn raꞌ nin badxahga bazuhchihpa raꞌ ba laꞌh raꞌ ba guhca nadxipa duxa raꞌ ba, guhca raꞌ ba bwiinn duxa raꞌ loh guehrru raꞌ, nee bwiꞌhnn raꞌ ba gahn laꞌh raꞌ xsuldahdu raꞌ bwiinn raꞌ nin bidxyiꞌchinee laꞌh raꞌ ba.  
\v 35 Guyuuꞌ raꞌ gunnaꞌh raꞌ nin gubiaꞌgarii babahn xquehtaguhla raꞌ ñiꞌh loh guelguhchi, ya snuhn raꞌ ba guhchi loh guelrzaꞌcazi xlawaaꞌha ñilaꞌh raꞌ ba loh guelguhchi tin ziꞌchi gucaꞌha raꞌ ba stuhbi guelnabahan nin nazaꞌca ru loh guelnabahan riiꞌ. 
\p  
\v 36 Snuhn raꞌ ba batiꞌdxiloh guelrzaꞌcazii nee guñiꞌyah bwiinn laꞌh raꞌ ba, nezaa cun cadehn biyiꞌbi raꞌ ba cun bieꞌw raꞌ ba laꞌn lahtsidxiꞌba.  
\v 37 Ya snuhn raꞌ ba guhchi cun dxiah o chin guhca raꞌ ba chiohpa taaꞌha cun sierru. Nuu za raꞌ ba guhchi raꞌ ba cun spahda, snuhn raꞌ ba gurihzaa nezii-neziꞌchi nee nin guhca lahdxi nin guhta raꞌ ba guhca dxihdxi lliꞌhyi o dxihdxi chihva, nee batiꞌdxiloh raꞌ ba loh guelrzaꞌcazii duxa.  
\v 38 Laꞌh bwiinn riiꞌ nin ayi bichiꞌhn raꞌ ñiꞌh loh guidxyiyuh nee gurihzaa raꞌ ba nezii-neziꞌchi nez loh yuh bihdzi raꞌ nee nez laꞌn dahan raꞌ, laꞌn cwehva raꞌ nee cun caacazi nez laꞌn bataaꞌha raꞌ gubahan raꞌ ba.  
\v 39 Garaa raꞌ ba nicala biahxinee Dxiohs laꞌh raꞌ ba pur guelriachiistoꞌ raꞌ ba xchiꞌdxyi Ñiꞌh ayi gucaꞌha raꞌ ba nin biaꞌhan dxyiꞌdxyi Ñiꞌh loh raꞌ ba,  
\v 40 laasii bwiꞌhnn Dxiohs lligaaba guunn Ñiꞌh tuhbi dziꞌn zaꞌca loh raꞌ ba. Bwiꞌhnn Dxiohs lligaaba guniꞌhi Ñiꞌh guelnazaꞌca chi laꞌh nuꞌh nee tuhsi gachicaꞌha raꞌ nuꞌhn cun laꞌh raꞌ bwiinn raꞌ chi nin biaꞌhan dxyiꞌdxyi guniꞌhi Dxiohsan. 
\c 12  
\s1 Nahpa gazaꞌstoꞌ nuꞌh xa gubahan Jesucristu 
\p  
\v 1 Niꞌchin nin naa nuꞌh ziga nin zuu galaayi raꞌ garaa raꞌ bwiinn raꞌ nin baluuꞌyi guelriachiistoꞌ xteenn Dxiohs nin guyuuꞌ laꞌn lastoꞌ raꞌ ba. Niꞌchin nahpa gasaaꞌn nuꞌh laꞌh garaa raꞌ nin ruhnn llahn loh xneziuh nuꞌh, neezaa raꞌ duhlda nin ruchiꞌbi laꞌh raꞌ nuꞌh loh xquelnabahan raꞌ nuꞌh, tin ayi saca nagahn nuꞌh chozah nuꞌh loh neziuh nin zoozahnee nuꞌh nez hasta choo nuꞌh.  
\v 2 Niꞌchin nnah nahpa guidiꞌhnn nuꞌh lligaaba zaꞌca xa bwiꞌhnn Jesucristu nin badiꞌhi guelriachiistoꞌ laꞌh raꞌ ba nee nin nahpa bazaꞌloh nin gwachiistoꞌ raꞌ ba, ya laꞌh Jesucristu batiꞌdxiloh Ñiꞌh guelrzaꞌcazii loh cruhzi, nee ayi za batuhyi loh Ñiꞌh pur guelguhchi nin guhchi Ñiꞌh, laasii naann Ñiꞌh chin ba batiꞌdxiloh Ñiꞌh gallee guelrzaꞌcazii chi zicaꞌha Ñiꞌh guelnabahan nasaa, nee guzohba Ñiꞌh xlahdu derehchu Dxiohs nin nuu llaaꞌndxibaaꞌ hasta canabwaꞌ Ñiꞌh. 
\p  
\v 3 Gulguiꞌhnn lligaaba zaꞌca laꞌh tu xa batiꞌdxiloh Jesucristu guelrzaꞌcazii loh raꞌ bwiinn duhlda, pwihsi niꞌchin ayi cweꞌhestoꞌ tu nee ayi za guiriaꞌh gahn tu,  
\v 4 laasii laꞌh tu nnahyi ayi xi llarihn tu guilliꞌhi loh guelrucaꞌhnee xteenn duhlda.  
\v 5 ¿Ta biaꞌldastoꞌ tu dxyiꞌdxyi nin bwiiꞌyidxyiꞌdxyinee Dxiohs laꞌh tu ziga lliiꞌn Ñiꞌh? Laasii squiiꞌ rñiꞌ loh Xchihtsi Dxiohs, rahbi Ñiꞌh: 
\q1 Lliiꞌnahn, ayi cweꞌhestoꞌ luꞌh xquelnah Daada Dxiohs, 
\q1 nin ayi za guiriaꞌh gahn luꞌh chin cheenee luꞌh tuhbi dxyiꞌdxah xteenn Ñiꞌh, 
\q1  
\v 6 laasii ziꞌchi ruhnnee Daada laꞌh garaa nin nadziiꞌhi ba nee rudiꞌhi ba tuhbi guelnah laꞌh raꞌ bwiinn nin raaca lliiꞌn Ñiꞌh. 
\p  
\v 7 Sidela laꞌh tu guzuhchihpa lastoꞌ tu loh guelrzaꞌcazii, pwihsi zacaꞌha Dxiohs laꞌh tu ziga zi tuhbi lliiꞌn Ñiꞌh, laasii ¿chyu guzahn ayi rudiꞌhi tuhbi guelnah laꞌh lliiꞌn ba?  
\v 8 Per sidela laꞌh Dxiohs ayi ruhnnah Ñiꞌh laꞌh tu ziga ruhnn Ñiꞌh laꞌh raꞌ gallee lliiꞌn Ñiꞌh, ayi naa tu lliiꞌn paꞌh Ñiꞌh; sola naa tu lliiꞌn duhlda.  
\v 9 Ba naann tu chin guhca nuꞌh biñiꞌn loh guidxyiyuh riiꞌ, baniꞌhi xtaada raꞌ nuꞌh tuhbi guelnah laꞌh nuꞌh tin bazoꞌbadxiahga raꞌ nuꞌh xchiꞌdxyi ba, tin rachidiꞌhnn nuꞌh ziga nin xclaaꞌdzi ba gaca. Pwihsi ¿xinaa chiꞌh ayi chyu guzoꞌbadxiahga xchiꞌdxyi Xtaada nuꞌh nin nuu dxibaaꞌ tin ziꞌchi gapa nuꞌh guelnabahan?  
\v 10 Xtaada raꞌ nuꞌh loh guidxyiyuh riiꞌ baniꞌhi raꞌ ba tuhbi guelnah laꞌh nuꞌh gaduhbi nin guhca nuꞌh biñiꞌn tin bazoꞌbadxiahga raꞌ nuꞌh xchiꞌdxyi raꞌ ba, per laꞌh Dxiohs runiꞌhi Ñiꞌh dxyiꞌdxah laꞌh nuꞌh tin gachidxiaapaa nuꞌh tuhbi guelnabahan nayaa, tin gaca nayaa za nuꞌh ziga naa Ñiꞌh nayaa.  
\v 11 Guchii nin tuhbi guelnah ayi chyu riuuꞌstoꞌ nuꞌhn chin dxuugatiꞌdxiloh raꞌ nuꞌhn rahca nayaanan, per garaa raꞌ nin rutiꞌdxiloh guelnah raꞌ rcaꞌha raꞌ ba tuhbi guelnabahan nazaꞌca. 
\s1 Zizahcazii nuꞌh sidela gasaaꞌn nuꞌh xchiꞌdxyi Dxiohs 
\p  
\v 12 Niꞌchin pwihsi gulgazuhchihpa naa tu nin badxahga, nee gulgazuhchihpa za yihca llihbi tu nin badxahga,  
\v 13 nee gulgadxiꞌhyi neziuh xteenn xchiꞌdxyi Jesucristu tin zuu dziꞌtsi ñaaꞌ tu. 
\p  
\v 14 Gulchiꞌhyi xa guibahannee zaꞌca tu laꞌh gallee raꞌ bwiinn, nee gulchezahnee tuhbi guelnabahan nayaa, laasii garaa raꞌ nin ayi guibahan nayaa ayi nuu gwaꞌha raꞌ ba loh Daada Jesucristu.  
\v 15 Gulguiaꞌha zaꞌca tin ayi chyu tuhbi tu guñihchi loh xquelrahcanee Dxiohs, nee tin ayi gaca chyu tuhbi tu ziga xtulbaaꞌ cwaꞌn naltaaꞌ raꞌ nin ruxiꞌn laꞌh bwiinn.  
\v 16 Pwihsi nin tuhbi tu ayi nuu gahpa stuhbi gunnaꞌh loh nehza galoh cheꞌhla tu, nee nin ayi za gaca tu nin ayi riuuꞌ-riaꞌzi xchiꞌdxyi Dxiohs ziga guhca guehtu Esaú nin batooꞌ pur tuhbi si guelwahw xquelnazaꞌca ba pur naa ba lliiꞌngaꞌn galoh xtaada ba,  
\v 17 nee laꞌh tu ba naann tu, chin guclaaꞌdzi guehtu Esaú ñuhnntaaꞌyi xpaah ba yihca ba, sola gudxihldxi dxyiꞌdxyi xpaah ba laꞌh ba nicala biꞌn duxa ba per ayi ru bidxeela ba xa ñuhnn ba ñuchaꞌh ba nin bwiꞌhnn ba. 
\p  
\v 18 Laasii laꞌh tu ayi gwabiiga tu ziga laꞌh raꞌ bwiinn Israel raꞌ tihxi dahan nin ayi ñahca ñidxiꞌ nin cacadxih cun bwehla duxa, hasta nacahyi guzihn, hasta cayahca biduhn duxa.  
\v 19 Nin ayi za bihn dxiahga tu rsiaaꞌha trompeta, nee cun rsiaaꞌha xchiꞌdxyi Dxiohs. Bwiinn raꞌ nin bihndxiahga raꞌ rsiaaꞌha xchiꞌdxyi Dxiohs ayi gudxihpastoꞌ raꞌ ban niꞌchin nin gudxiꞌn chihpa raꞌ ba ayi ru guiñiꞌ Ñiꞌh,  
\v 20 laasii ayi gudxihpa stoꞌ raꞌ ba dxyiꞌdxyi nin guñiꞌ Ñiꞌh chin rahbi Ñiꞌh: “Chyuchiꞌh zi tuhbi maan nin guicah tihxi dahan riiꞌ, gulchiin ma cun dxiah o cun tuhbi yahga tuꞌchii.”  
\v 21 Guelnadxyiꞌbi duxa naa nin bwaꞌha raꞌ ba riꞌchi, niꞌchin laꞌhgahca guehtu Moisehs rahbi: “Neezahn cachihchihn cayuhnn guelnadxyiꞌbi.”  
\v 22 Laasii laꞌh tu gwabiiga loh dahan nin laa Siohn, hasta naa lahdxyi Dxiohs nin nuu nabahan dziꞌtsi, nee guihdxyi Jerusalehn nin nuu llaaꞌndxibaaꞌ hasta nuu ziahan duxa raꞌ xaanjla Dxiohs nin badiaaꞌha raann laꞌh Dxiohs.  
\v 23 Riꞌchi riiꞌ raꞌ nin naa raꞌ lliiꞌn Dxiohs, garaa raꞌ nin caalah raꞌ ñiꞌh llaaꞌndxibaaꞌ. Laꞌh tu gwabiiga loh Dxiohs nin naa Jwehsi xteenn garaa raꞌ nuꞌh, neezaa loh raꞌ spíritu raꞌ bwiinn zaꞌca nin ba bwiꞌhnn nayaa Dxiohs.  
\v 24 Laꞌh za nuꞌh bioobiiga loh Daada Jesucristu nin rusiaꞌlda dxyiꞌdxyi nee nin zuu galaayi loh Dxiohs nee loh za bwiinn guidxyiyuh pur dxyiꞌdxyi cuubi nin biaꞌhan dxyiꞌdxyi Dxiohs, neezaa pur llarihn Jesucristu nin badiꞌhi Ñiꞌh loh Dxiohs pur laꞌh raꞌ nuꞌh. Llarihn Jesucristu rnaaba dxiaa xtuhlda raꞌ bwiinn guidxyiyuh, niꞌchin lasahca run loh llarihn guehtu Abel nin rnaaba gaca guelguxchisi xcweenta bwiinn nin gudxiinn laꞌh ba. 
\p  
\v 25 Pwihsi niꞌchin nnah gulgahca nasiin tin ayi cweꞌhecaa tu nin cañiꞌ loh tu xchiꞌdxyi Ñiꞌh, pwihsi bwiinn raꞌ nin ayi bazoꞌbadxiahga xchiꞌdxyi Dxiohs nin baluuꞌyi raꞌ bwiinn nin biꞌ loh guidxyiyuh ayi bilaꞌh raꞌ ba, ziꞌchi za laꞌh nuꞌh ¿xa guidiꞌhn raꞌ nuꞌh taꞌh raꞌ nuꞌh sidela ayi chyu guzoꞌbadxiahga xchiꞌdxyi Daada nin zeꞌ llaaꞌndxibaaꞌ?  
\v 26 Rsiaaꞌha xchiꞌdxyi Dxiohs bañiꞌbi guidxyiyuh galoh, per nnah rñiꞌ Ñiꞌh stuhbi: 
\q1 Ayi guidxyiyuh si dxiꞌh guñiꞌbiꞌhn pwihsi nnah neezaa dxibaaꞌ. 
\p  
\v 27 Ya chin bazeꞌta Ñiꞌh stuhbi guñiꞌbi Ñiꞌh guidxyiyuh zahcabwaꞌ nuꞌh zadzihn dxyih guiñiꞌbi gallee nin bwiꞌhnnchaꞌyi Ñiꞌh nee ziñihchiloh raꞌn tin dxiaꞌhan si ganaalla nin ayi nuu guiñiꞌbi,  
\v 28 per lahdxyi nuꞌh nin runiꞌhi Dxiohs laꞌh raꞌ nuꞌh ayi nuu guiñiꞌbin, niꞌchin gadiꞌhi nuꞌh guelzuxchiilli loh Dxiohs pur deeꞌ raꞌ tin ziꞌchi gaann nuꞌh laꞌh Dxiohs gaduhbi stoꞌ nuꞌh, nee cun xquelnadxyiꞌbi nuꞌh tin dxiahxinee Ñiꞌh laꞌh nuꞌh,  
\v 29 laasii laꞌh Xchiohs nuꞌh naa ziga tuhbi bwehla duxa nin ruñihchilohtiiꞌ. 
\c 13  
\s1 ¿Xa guidiꞌhn nuꞌh tin dxiahxinee Dxiohs laꞌh nuꞌh? 
\p  
\v 1 Ayi gucweꞌza tu gaantsiiꞌhi lasaaꞌ tu ziga tuhbi ziga stuhbi tu; gulcwih ziga zi bwihtsi lasaaꞌ tu.  
\v 2 Ayi dxiaꞌldastoꞌ tu gaca tu bwiinn zaꞌca cun bwiinn raꞌ nin gadzihn yihdzi tu, laasii pur niꞌchi nuu raꞌ ba nin ayi gaann raꞌ ba badiꞌhi raꞌ ba yihdzi raꞌ ba guleezaa xaanjla Dxiohs. 
\p  
\v 3 Gulgazaꞌstoꞌ tu bwiinn raꞌ nin nuu lahtsidxiꞌba ziga zi nee laꞌh tu ñieꞌwnee tu laꞌh raꞌ ba; gulguiꞌhnn lligaaba pur bwiinn raꞌ nin guzaꞌcazii pwihsi nee laꞌh tu ayi nuudxyiꞌdxyi saca tu ziꞌchi za. 
\p  
\v 4 Nee gallee nuꞌh gachidiꞌhnn lasahca nuꞌh xquelruchinaa nuꞌh tin guibahan nayaa nuꞌh cun cheꞌhla nuꞌh laasii zuhnn Dxiohs guelguxchisi laꞌh raꞌ nin ruhnn guelgubwihlli nee nin rzaꞌbistoꞌ ñiꞌh stuhbi gunnaꞌh.  
\v 5 Ayi gucaꞌhstoꞌ tu mweeyi, guldxiahxi cun nin nahpa si tu laasii squiiꞌ guñiꞌ Dxiohs: “Ayi gusaꞌnaꞌhn yiꞌh nee ayi za cweꞌhestoꞌn yiꞌh.”  
\v 6 Niꞌchin ayi chyu guidxyihbi guiñiꞌ: 
\q1 Daada nin nuu dxibaaꞌ naa nin rahcanee naꞌh, 
\q1 ayi guidxyihbihn xi chiꞌh zi nin guunnee bwiinn naꞌh. 
\p  
\v 7 Gulgazaꞌstoꞌ tu laꞌh garaa raꞌ nin baluuꞌyi xa guibahan zaꞌca tu, nin baluuꞌyi xchiꞌdxyi Dxiohs laꞌh tu; gulguiꞌhnn lligaaba xa guyaꞌloh xquelnabahan raꞌ ba, nee gulchezahnee ziga guelriachiistoꞌ xchiꞌdxyi Dxiohs nin guyuuꞌ stoꞌ raꞌ ba.  
\v 8 Ayi chuu dxyih guidxaꞌh Jesucristu, ziga guhca Ñiꞌh nnaꞌyi ziꞌchigahca naa Ñiꞌh nnadxyih nee ziꞌchigahca za gaca Ñiꞌh par tuꞌpazi.  
\v 9 Ayi za gusaaꞌn tu gusiahchi stuhbi bwiinn lastoꞌ tu cun guriincaa dxyiꞌdxyi nin ruluuꞌyi ba, nee nin ayi naa ziga xchiꞌdxyi Jesucristu. Mas chaꞌyi chozahnee nuꞌh loh guelrahcanee nin ruluuꞌyi xchiꞌdxyi Dxiohs xlawaaꞌha chozahnee nuꞌh xigaaba guelrahw si. Pwihsi ayi xi lasahcatiiꞌ niꞌchi laasii bwiinn nin gwazahnee lligaaba chi ayi bariaꞌcaa zaꞌca raꞌ ba. 
\p  
\v 10 Naaꞌhan ziga ñachidxiaapa nuꞌh tuhbi bacuꞌga llaaꞌndxibaaꞌ, nee zahca gachidaꞌw nuꞌh nin dziꞌba lohon, per nin tuhbi bixohza nin zezahnee xlehyi Moisehs ayi gaca gahw raꞌ ba nin dziꞌba loh bacuꞌga chi,  
\v 11 laasii xpixohza rooꞌ raꞌ bwiinn Israel batiꞌdxi guhn raꞌ ba llarihn raꞌ guidxaꞌh laꞌn yuuꞌ nin nadaa duxa xteenn Dxiohs tin dxieꞌwloh raꞌ xtuhlda raꞌ bwiinn raꞌ chi, per ya tihxi raꞌ maan raꞌ chi rcaꞌdxih raꞌ ban rwaaꞌ guihdxyi chi.  
\v 12 Ziꞌchi za laꞌh Jesucristu batiꞌdxiloh Ñiꞌh guelrzaꞌcazii loh guelguhchi rwaaꞌ guihdxyi tin basiaa Ñiꞌh laꞌh raꞌ bwiinn loh duhlda cun llarihn Ñiꞌh.  
\v 13 Niꞌchin nnah gulchooꞌho choo nuꞌh loh Jesucristu rwaaꞌ guihdxyi tin gatiꞌdxiloh nuꞌh laꞌh gahca guelrzaꞌcazii cun guelxtuhyi laasii guchii naa nuꞌh xpwiinn Ñiꞌh,  
\v 14 pwihsi loh guidxyiyuh riiꞌ ayi chyu nahpa tuhbi guihdxyi nin ba naa par tuꞌpazi, niꞌchin dxuudxiꞌhyi nuꞌh tuhbi guihdxyi nin gueꞌdu dxiꞌ.  
\v 15 Pwihsi niꞌchin nahpa gadiꞌhi nuꞌh guelzuxchiilli loh Dxiohs pur Jesucristu pwihsi guelzuxchiilli riiꞌ naa ziga tuhbi guhn nin gadiꞌhi nuꞌh loh Dxiohs, pwihsi ¡gadiꞌhi nuꞌh guelzuxchiilli loh Ñiꞌh cun rwaaꞌ nuꞌh!  
\v 16 Neezaa ayi dxiaꞌldastoꞌ tu guunn tu bwen gacanee tu lasaaꞌ tu ziga tuhbi guelnazaꞌca nin cwachi tu guhn loh Ñiꞌh tin dxiahxinee Ñiꞌh laꞌh tu. 
\p  
\v 17 Gulgazoꞌbadxiahga xchiꞌdxyi raꞌ bwiinn nin rnabwaꞌ laꞌh tu, laasii nahpa gutiꞌdxi cweenta raꞌ ba loh Dxiohs pur xtsiꞌn tu, nee gulguiꞌhn dxiahxi raꞌ ba loh xtsiꞌn raꞌ ba tin sidela gaca nalaasa stoꞌ raꞌ ba ayi naan tuhbi xiilla guelnazaꞌca para laꞌh tu. 
\p  
\v 18 Gulguinaaba loh Dxiohs pur laꞌh nu, laasii naann dziꞌtsi nu nayaa naa loh xquelrihn nu nee laꞌh nu xclaaꞌdzi gazoꞌbadxiahga nu gachidiꞌhnn nu dziꞌn zaꞌca loh garaatiiꞌ raꞌ.  
\v 19 Rnaꞌbazahn loh tu, cwidxyi chihpa tu loh Dxiohs pur naꞌh tin gacanee Dxiohs naꞌh guibiaꞌgariin dxieꞌlda guiaꞌhan cuun tu. 
\s1 Tuhbi guelruhnntaaꞌyi cun tuhbi guelrgahpaDsiohsa nin riaꞌloh 
\p  
\v 20 Laꞌh Dxiohs nin naa guelrbwihdxyii stoꞌ, nin bacwaꞌhn laꞌh Jesucristu loh guelguhchi, Jesucristu naa xpallwaaꞌn raꞌ lliꞌhyi pur llarihn Ñiꞌh nin bwiꞌhnn guzohba dxyiꞌdxyi cuubi nin ba naa par tuꞌpazi.  
\v 21 Dxiohs guunn gaca tu bwiinn zaꞌca, bwiinn saantu loh xichiꞌhzi nin guiclaaꞌdzi Ñiꞌh guunn tu, nee guunnee Ñiꞌh laꞌh nuꞌh ziga chiꞌh zi xclaaꞌdzi Ñiꞌh pur Jesucristu. ¡Gulguiꞌhnn lasahca lah Jesucristu par tuꞌpazi! Ziꞌchi gaca, pwihsi. 
\p  
\v 22 Bwiitsi raꞌn, rnaꞌbaꞌhn loh tu ayi guidxyiꞌchinee tu naꞌh pur chiohpa-choon dxyiꞌdxyi nah nin bacaꞌhn loh dxihtsi riiꞌ par laꞌh tu.  
\v 23 Pwihsi gulgacabwaꞌ nnah, laꞌlasaaꞌ nuꞌh Timoteu bareꞌh lahtsi dxiꞌba; sidela laꞌh Timoteu gadzihngah ba riiꞌ, pwihsi dxieꞌldaneꞌhn ba chin dxieꞌldaguiaꞌhan cuun tu.  
\v 24 GulgahpaDxiohs laꞌh raꞌ gallee raꞌ nin ruluuꞌyi laꞌh tu nee gallee raꞌ za bwiinn nin naa xpwiinn Dxiohs. Ruxeꞌhla raꞌ bwiinn Italia tuhbi guelrgahpaDxiohs para laꞌh tu.  
\v 25 Dxiohs gacanee laꞌh tu nee guunntaaꞌyi Ñiꞌh yihca tu. Pwihsi ziꞌchi nahpa gaca.