\id GAL  
\h Gálatas 
\toc1 Dxihtsi nin bacaꞌh San Pahblu loh raꞌ bwiinn Galacia 
\toc2 Gálatas 
\toc3 Gá. 
\mt1 Dxihtsi nin bacaꞌh San Pahblu loh raꞌ bwiinn Galacia 
\c 1  
\s1 GuelrgahpaDxiohs 
\p  
\v 1 Naꞌh Pahblu, naann pooxtla xteenn Jesucristu. Ayi bwiinn raꞌ dxiꞌh baxeꞌhla naꞌh nin ayi za laꞌh raꞌ dxiꞌh ba bazuh naꞌh sino que laꞌh Jesucristu cun Xtaada Dxiohs Ñiꞌh nin nuu llaaꞌndxibaaꞌ; Dxiohs nin bacwaꞌhn laꞌh Jesucristu loh raꞌ bwiinn guuchi, laꞌh Ñiꞌh gulii naꞌh gacaꞌhn xpooxtla Ñiꞌh.  
\v 2 Naꞌh nee cun garaa raꞌ lasaaꞌ raꞌ nuꞌh nin naa pur xcweenta Jesucristu nin rii raꞌ riiꞌ, racaꞌh nu dxihtsi riiꞌ para laꞌh raꞌ bwiinn guidoꞌ nin nuu raꞌ nez loh guihdxyi xteenn Galacia.  
\v 3 Gulguicaꞌha guelruhnntaaꞌyi xteenn Dxiohs nin naa Xtaada nuꞌh, cun guelriidxyii stoꞌ xteenn Ñiꞌh neezaa xcweenta Daada Jesucristu.  
\v 4 Laꞌhgahca laꞌh Ñiꞌh badiꞌhi Ñiꞌh laꞌh Ñiꞌh gucah Ñiꞌh loh cruhzi tin guhldaꞌh Ñiꞌh laꞌhnuꞌh loh duhlda xteenn guidxyiyuh riiꞌ, ziga gunabwaꞌ Yuꞌbi Xtaada Dxiohs nuꞌh.  
\v 5 Ba lasahca duxa naa lah Dxiohs para tuꞌpazi. Ziꞌchi gaca pwihsi. 
\s1 Ayi stuhbi dxyiꞌdxyi nin gutaꞌh laꞌh bwiinn loh duhlda ziga xchiꞌdxyi Dxiohs 
\p  
\v 6 ¡Hasta radxyigaaꞌ duxa za loon ziga tan lwehgutiiꞌ cabweꞌhe stoꞌ tu laꞌh Dxiohs nin gudihdxyi laꞌhtu cun guelrucaꞌh stoꞌ nin nahpa Crixtu cun laꞌhnuꞌh, tin zeenaꞌhla tu guriincaa dxyiꞌdxyi!  
\v 7 Ayi stuhbi dxyiꞌdxyi nin zahca gutaꞌh laꞌhnuꞌh loh duhlda, sola nuu raꞌ nin xclaaꞌdzi gusiahchi stoꞌ tu cun stuhbi raꞌ dxyiꞌdxyi; xclaaꞌdzi raꞌ ba guchaꞌh raꞌ ba xchiꞌdxyi Jesucristu.  
\v 8 Per sidela chyuulla cagaluuꞌyi laꞌhtu guriincaa stuhbi dxyiꞌdxyi nin rñiꞌ raꞌ ba rutaꞌh laꞌh bwiinn loh duhlda, dxyiꞌdxyi nin ayi naa lasaaꞌ dxyiꞌdxyi nin ba baluuꞌyi nu loh tu; bwiinn chi ya guyuuꞌdii ba, ayi xi ruhnn nicala naꞌhzahn, o tuhbi aanjla nin dxiinloh nez dxibaaꞌ.  
\v 9 Laꞌn guñiꞌ lan desde galohyi, yannah laꞌn cañiꞌ laꞌgaꞌhn stuhbi: Sidela chyuulla ruluuꞌyi laꞌhtu stuhbi dxyiꞌdxyi nin rñiꞌ ba rtaꞌh laꞌh bwiinn loh duhlda, nee ayi naan ziga dxyiꞌdxyi nin ya baluuꞌyi nu laꞌhtu, bwiinn chi ya guyuuꞌdii ba. 
\p  
\v 10 Chin rñiꞌn squiiꞌ, ¿ta rluuꞌyi xclaaꞌdzihn guiñiꞌ zaꞌca bwiinn xcweeꞌntahn?, o ¿ta cadxiꞌhyihn nez gusiaꞌxihn laꞌh bwiinn raꞌ? Pwihsi sidela naꞌh ñiꞌdxiꞌhyihn nez sola ñusiaꞌxihn laꞌh raꞌ bwiinn, pwihsi ayi ñahcaꞌhn tuhbi xmooza Jesucristu. 
\s1 Xcweenta xtsiꞌn Pahblu 
\p  
\v 11 Per gulgahcabwaꞌ deeꞌ bwiitsi raꞌn; dxyiꞌdxyi nin rutaꞌh laꞌh raꞌ bwiinn loh duhlda nin ruluꞌyiꞌhn laꞌh tu, ayi naa raꞌn xigaaba raꞌ bwiinn guidxyiyuh.  
\v 12 Ayi loh raꞌ dxiꞌh bwiinn guidxyiyuh bwiꞌhnnaꞌhn gucaꞌhahn dxyiꞌdxyi raꞌ riiꞌ, nee nin ayi za chyu baluuꞌyin naꞌh, sola laꞌh Jesucristu baniꞌhi xchiꞌdxyi Ñiꞌh riiꞌ naꞌh. 
\p  
\v 13 Laꞌhtu ya naann tu xa zaꞌbi dxyiꞌdxyi xa guhcaꞌhn cadxyih, chin gwazahneꞌhn xlehyi guehtu Moisehs, pwihsi basaꞌcazii duxaꞌhn laꞌh raꞌ bwiinn guidoꞌ raꞌ nin gwachii stoꞌ raꞌ ñiꞌh xchiꞌdxyi Jesucristu, nee guclaaꞌdzihn ñuñiꞌchilooraꞌn ba.  
\v 14 Loh raꞌ nin ruzoꞌbadxiahga xlehyi guehtu Moisehs, naꞌh guhcaꞌhn tuhbi bwiinn nin mahziru gucabwaꞌ ziga naa xlehyi Moisehs loh raꞌ lasaaꞌ raꞌn nin naa xedah raꞌn; guhcabwaꞌruhn loh raꞌ ba, loh raꞌ bwiinn laadxyihn; mahzi ru guzaꞌbi stoꞌn costumbre raꞌ xtaadaguldooꞌ raꞌn.  
\v 15 Per Dxiohs gulii naꞌh nee gulii Ñiꞌh naꞌh desdeyi chin nuuꞌhuhn stoꞌ xmaaꞌn, niꞌchin gudihdxyi Ñiꞌh naꞌh pur tantu nin rucaꞌh stoꞌ Ñiꞌh naꞌh.  
\v 16 Chiꞌchi bwiꞌhnn Dxiohs para biuꞌnbwaꞌn laꞌh Lliiꞌn Ñiꞌh, tin ziꞌchi guluꞌyiꞌhn xcweenta xchiꞌdxyi Ñiꞌh nin gutaꞌh laꞌhraꞌ bwiinn loh duhlda nez loh raꞌ bwiinn raꞌ nin ayi naa raꞌ bwiinn Israel. Chin guhca ziꞌchi, ayi chyu bagatiꞌdxi dziꞌnaꞌhn,  
\v 17 nin ayi za guyaaꞌhahn loh guihdxyi Jerusalehn para ñagaanñin loh raꞌ nin naa raꞌ pooxtla galohyi que naꞌh. Pwihsi mahzi naꞌh guyaaꞌhahn nez loh guihdxyi Arabia, ya chiꞌchi gubiaꞌgariin para nez guihdxyi Damascu. 
\p  
\v 18 Ya chin guhca chohnna yihza, chiꞌchiyi guyaaꞌhahn loh guihdxyi Jerusalehn, ya chiꞌchiyi biuꞌnbwaꞌn laꞌh Pehdru, nee guyuuꞌhuhn tsiꞌñu gubihdxyi riꞌchi,  
\v 19 per ayi bwaꞌhahn loh nin stuhbi chyu stuhbi raꞌ pooxtla riꞌchi, sola laꞌh si Jacobo bwihtsi Jesucristu bwaꞌhahn.  
\v 20 Pwihsi naꞌpahn siguhra nez delaanta loh Dxiohs, ayi naa xchiꞌdxyiꞌhn dxyiꞌdxyi xihn, sino que guchii naa nin cagacaꞌhn.  
\v 21 Chiꞌchi guyaaꞌhahn loh raꞌ guihdxyi xteenn Siria, cun neezaa nez loh guihdxyi Cilicia.  
\v 22 Laꞌh raꞌ bwihtsi raꞌ nuꞌh nin naa xpwiinn guidoꞌ Crixtu nin nuu raꞌ nez loh guihdxyi raꞌ xteenn Judea laꞌn dxyih raꞌ chi, ayi nuꞌnbwaꞌ raꞌ ba naꞌh ziga xa rñiaaꞌhahn,  
\v 23 sola guyaaꞌzi dxiahga raꞌ ba rahbi raꞌ bwiinn: “Niꞌca nin gucaꞌhnaꞌhla laꞌhnuꞌh, nee nnah bwaꞌha laꞌh ba cagaluuꞌyi xchiꞌdxyi Jesucristu, nee dxyiꞌdxyi raꞌ ca nin guclaaꞌdzi ba ñuñihchiloh ba.”  
\v 24 Ya chiꞌchi riiñiꞌ zaꞌca duxa raꞌ ba xcweenta Dxiohs nin nuu dxibaaꞌ laasii gwachii stoꞌ zahn xchiꞌdxyi Ñiꞌh. 
\c 2  
\s1 Bidxaꞌga Pahblu loh raꞌ pooxtla 
\p  
\v 1 Chin guhca tsiꞌdah yihza, chiꞌchi guyaaꞌhahn stuhbi nez loh guihdxyi Jerusalehn cun Bernabeh, neezaa Titu gwaneꞌhehn.  
\v 2 Guyaaꞌhahn laasii Dxiohs baluuꞌyi naꞌh nahpa guyaaꞌhahn tin baluꞌyiꞌhn xa gwachii stoꞌ raꞌ bwiinn raꞌ nin ayi naa raꞌ bwiinn Israel xcweenta xchiꞌdxyi Jesucristu nin rutaꞌh loh duhlda. Baluꞌyiꞌhn dxyiꞌdxyi raꞌ riiꞌ loh raꞌ nin rnabwaꞌ guidoꞌ xteenn Jesucristu riꞌchi; bwiꞌhnnaꞌhn squiiꞌ laasii ayi xclaaꞌdzihn ñahca nin bwiꞌhnnaꞌhn cun nin cayuꞌnnahn dziꞌn lliaaꞌ si,  
\v 3 per nin laꞌh Titu, nin zeꞌldaneꞌhn, nin naa tuhbi bwiinn griehgu nin ayi naa tuhbi bwiinn Israel, ayi guyuuꞌ chyu ñuhnn jwersi ñuuꞌ bi bwaꞌ tihxi bi ziga nin caa loh xlehyi Moisehs nahpa chuu bwaꞌ tihxi bwiinn nin guzoꞌbadixahga lehyi chi.  
\v 4 Pwihsi guchii nuu raꞌ bwiinn raꞌ nin ruhnn raꞌ zi ziga naa raꞌ ba lasaaꞌ raꞌ nuꞌh; bidxaꞌga raꞌ ba loh raꞌ nu tin guhldaꞌtsi raꞌ ba xa raann raꞌ nuꞌh Dxiohs. Rdxyiꞌchi raꞌ ba laasii naa nuꞌh xpwiinn Jesucristu, ya ayi chyu ruhnn ziga bwiꞌhnn raꞌ xtaada guldooꞌ raꞌ nu. Laꞌh raꞌ ba xclaaꞌdzi raꞌ ba gucheꞌh raꞌ ba yihca raꞌ nu, xclaaꞌdzi raꞌ ba gazoꞌbadxiahga raꞌ nuꞌh xchiꞌdxyi raꞌ ba.  
\v 5 Per laꞌhnu ayi chyu bazoꞌbadxiahga xchiꞌdxyi raꞌ ba, laasii xclaaꞌdzi nu cheezah chechii stoꞌ tu xchiꞌdxyi Jesucristu nin rutaꞌh laꞌh bwiinn loh duhlda. 
\p  
\v 6 Pwihsi nin tuhbi dxyiꞌdxyi cuubi ayi guñiꞌ raꞌ nin naa raꞌ bwiinn dziꞌbaloh raꞌ chi loon; nicala naꞌh ayi radxyigaaꞌhahn chyuullaa guhca raꞌ ba galoh laasii Dxiohs ruhnn chiꞌh zi Ñiꞌh tuhbiloh loh garaa raꞌ bwiinn.  
\v 7 Loh nin ñuniꞌhi raꞌ ba tuhbi dxyiꞌdxyi cuubi naꞌh, mahzi bwaꞌha raꞌ ba Dxiohs bacaꞌbi naꞌh para guluꞌyiꞌhn xcweenta xchiꞌdxyi Dxiohs nez loh raꞌ bwiinn raꞌ nin ayi naa raꞌ bwiinn Israel, ziga za bacaꞌbi Ñiꞌh laꞌh Pehdru tin ruluuꞌyi ba xchiꞌdxyi Dxiohs nez loh raꞌ bwiinn raꞌ nin naa raꞌ bwiinn Israel.  
\v 8 Pwihsi laꞌh gahca Dxiohs nin guxeꞌhla laꞌh Pehdru ziga pooxtla nez loh raꞌ bwiinn Israel raꞌ, laꞌh gahca Dxiohs chi guxeꞌhla za naꞌh ziga tuhbi pooxtla nez loh raꞌ bwiinn raꞌ nin ayi naa raꞌ bwiinn Israel. 
\p  
\v 9 Niꞌchin ziga Jacobo, Pehdru, cun Jwahn nin naa raꞌ bwiinn dziꞌbaloh ru loh bwiinn guidoꞌ raꞌ xteenn Jesucristu nez Jerusalehn, guhcabwaꞌ raꞌ ba laꞌh Dxiohs cayuhnn cayahcanee naꞌh, chiꞌchi baniꞌhi naa raꞌ ba tin bagahpaDxiohs raꞌ ba naꞌh cun neezaa Bernabeh, tin sehn riiꞌ ruluuꞌyi naa raꞌ ba tuhsi cun laꞌhnu ziga choodiꞌhnn nu dziꞌn nez loh raꞌ bwiinn ziitu raꞌ nin ayi naa raꞌ bwiinn Israel raꞌ ya laꞌh raꞌ ba dxiaꞌhan raꞌ ba guluuꞌyi raꞌ ba laꞌh raꞌ bwiinn Israel raꞌ.  
\v 10 Cun sola gunaaba raꞌ ba loh nu gachidxiaacanee nu laꞌh raꞌ bwiinn prohbi raꞌ, nee lligaaba paꞌh za riiꞌ nuuꞌhuhn. 
\s1 Pahblu gudxiꞌldxinee dxyiꞌdxyi laꞌh Pehdru loh guihdxyi Antioquía 
\p  
\v 11 Per chin gwah Pehdru nez loh guihdxyi Antioquía, chiꞌchi basiꞌxtuhyihn laꞌh ba, laasii ziga cayuhnn ba ayi naa bwen niꞌchi,  
\v 12 pwihsi galoh tuhbi loh mweella gudahwnee ba laꞌh raꞌ bwiinn ziitu raꞌ nin ayi naa raꞌ bwiinn Israel, per ya chin badzihn paaldaa raꞌ bwiinn raꞌ nin guxeꞌhla Jacobo, chiꞌchi dxyigahsi biriaꞌcaa ba nez loh raꞌ bwiinn ziitu raꞌ chi, ya ayi ru gudahwnee ba laꞌh raꞌ ba, laasii guyuuꞌ guelrzaaꞌ ba laꞌh raꞌ bwiinn Israel raꞌ nin badzihn riꞌchi nin zeꞌnee bwaꞌ nin laa circuncisión.  
\v 13 Ya naꞌzu gahca raꞌ garaa raꞌ bwiinn Israel raꞌ nin naa tuhsi cun Pehdru xmahn Pehdru nee raꞌ ba guhca chiohpa loh xigaaba raꞌ ba hasta nee Bernabeh bwiꞌhnn ziꞌchi.  
\v 14 Per chin bwaꞌhahn ayi zeezahnee raꞌ ba ziga naa xchiꞌdxyi Jesucristu, chiꞌchi raꞌpihn loh Pehdru delaanta nez loh raꞌ garaa raꞌ bwiinn guidoꞌ raꞌ: “Sidela yiꞌh nin naa luꞌh tuhbi bwiinn Israel, nuu nabahan luꞌh ziga zi tuhbi bwiinn nin ayi naa bwiinn Israel ayi ziga dxiꞌh bwiinn Israel, ¿xixnaa chiꞌh xclaaꞌdzi luꞌh guibahan raꞌ bwiinn raꞌ nin ayi naa raꞌ bwiinn Israel ziga zi bwiinn Israel?” 
\s1 Bwiinn Israel raꞌ cun garaa raꞌ za raꞌ bwiinn, nahpa chechiistoꞌ raꞌ xchiꞌdxyi Jesucristu tin chapitii xtuhlda raꞌ ba 
\p  
\v 15 Raꞌpizahn loh ba: “Bwiinn Israel raꞌ nuꞌh desde chin guulaayi raꞌ nuꞌh, ayi bwiinn duhlda dxiꞌh ziga naa raꞌ bwiinn ziitu raꞌ.  
\v 16 Ya naann nuꞌh ayi tuhbi bwiinn nin chaptiiꞌ xtuhlda ñiꞌh chin guunn ba ziga nin caa loh lehyi, sino que sola chechii stoꞌ nuꞌh xchiꞌdxyi Jesucristu. Niꞌchin nin gwachii stoꞌ nuꞌh xchiꞌdxyi Jesucristu tin guziaꞌtii Ñiꞌh xtuhlda nuꞌh laasii nin riachii stoꞌ nuꞌh, ayi pur nin rihnn dxiꞌh nuꞌh nin caa loh lehyi. Pwihsi ayi nuu guziaꞌtiiꞌ lehyi xtuhlda bwiinn ziga sola guzoꞌbadxiahga ba xcwenta si ziga naa xlehyi guehtu Moisehs.” 
\p  
\v 17 Pwihsi loh ziga nin xclaaꞌdzi nuꞌh dxiaa xtuhlda nuꞌh xcweenta guelriachii stoꞌ laꞌh Jesucristu, sidela raluuꞌyi nuꞌh dxuudiꞌhnn ru nuꞌh duhlda, ¿ta zahca gachiñiꞌ nuꞌh: “Jesucristu ruluuꞌyi zahca guidiꞌhnn ru nuꞌh duhlda”? ¡Ayi gaca ziꞌchi!  
\v 18 Pwihsi sidela naꞌh gutsiiyihn xiilla ya lwehgu gahca dxiuꞌnzaꞌcañin, pwihsi naan tuhbi bwiinn duhlda,  
\v 19 laasii cun xcweenta lehyi laꞌn naa ziga zi tuhbi bwiinn guuchi. Pwihsi ayi ru nuu guinabwaꞌ lehyi naꞌh laasii nnah nabahanahn loh xneziuh Jesucristu. Pwihsi laꞌh gahca lehyi bwiꞌhnn naan ziga zi tuhbi bwiinn guuchi chin guhcabwaꞌn ayi nuu guzoꞌbadxiaagahn garaa nin caa loh lehyi.  
\v 20 Pwihsi naan ziga zi nin guhchinee laꞌh Jesucristu loh cruhzi, pwihsi niꞌchin nnah ayi ru naan naꞌh nin nabahanahn sino que Jesucristu naa nin nabahan nez laꞌn lastoꞌn, ya guelnabahanahn nin nabahanahn loh guidxyiyuh riiꞌ nabahanañin pur nin riachii stoꞌn xchiꞌdxyi Lliiꞌn Dxiohs, nin bacaꞌh stoꞌ Ñiꞌh naꞌh ya guhchi Ñiꞌh loh cruhzi xcweeꞌntahn.  
\v 21 Pwihsi naꞌh ayi xclaaꞌdzihn cweꞌhe stoꞌn xquelralahsa stoꞌ Dxiohs, per sidela zahca gusiaa lehyi xtuhlda bwiinn tin gaca ba bwiinn nayaa nez loh Dxiohs, ya chiꞌchi lliaaꞌ zi guhchi Jesucristu. 
\c 3  
\s1 Guelriachii stoꞌ rusiaa duhlda 
\p  
\v 1 ¡Ayy bwiinn Gálatas raꞌ, xipaꞌh bwiinn nahda tu! ¿Chyulla bacheꞌh laꞌhtu, tin ayi ru guzoꞌbadxiahga tu xchiꞌdxyi Jesucristu? ¡Nee nez loh paꞌh tu bwiiꞌyidxyiꞌdxyi nu xa gucah Jesucristu loh cruhzi!  
\v 2 Pwihsi nnah tuhbi si dxyiꞌdxyi xclaaꞌdzihn guiñiꞌ tu loon: ¿Ta guyuuꞌtiiꞌ Spíritu Saantu stoꞌ tu pur cun sola bazoꞌbadxiahga tu nin caa loh lehyi, o pur nin gwachii stoꞌ tu dxyiꞌdxyi nin bihn dxiahga tu?  
\v 3 ¡Xipaꞌh dxiipa naa stoꞌ tu! ¿Xa guzoꞌbaloh chiꞌh tu ziga gucaꞌha tu Spíritu Saantu Dxiohs nee nnah xclaaꞌdzi tu guunn tu nin zieꞌgadziiba chiꞌh zi yihca tu guunn tu?  
\v 4 ¿Ta lliaaꞌ zi batiꞌdxiloh tu guelrzaꞌcazii pur guelriachii stoꞌ xteenn tu? Per ¿xa gaca gariaꞌcaa lliaaꞌ zi batiꞌdxiloh tu guelrzaꞌcazii chi?  
\v 5 Chin runiꞌhi Dxiohs Spíritu Saantu Ñiꞌh loh tu, chin ruhnn Ñiꞌh milahgru nez loh tu, ¿xa ruhnn Ñiꞌhn? Ayi ruhnn Ñiꞌhn laasii ruhnn tu ziga nin caa loh lehyi, sino que laasii riachii stoꞌ tu xcweenta nin bihn dxiahga tu. 
\p  
\v 6 Guehtu xtaada guldooꞌ nuꞌh Abrahn gwachii stoꞌ ba xchiꞌdxyi Dxiohs, niꞌchin nin gucaꞌha Dxiohs laꞌh ba ziga tuhbi bwiinn nin nayaa lastoꞌ ñiꞌh,  
\v 7 niꞌchin gulgahcabwaꞌ deeꞌ: Garaa raꞌ nin riachii stoꞌ raꞌ ñiꞌh xchiꞌdxyi Dxiohs, rñiꞌ Dxiohs naa raꞌ ba lliiꞌn guehtu Abrahn.  
\v 8 Galohyi naann Dxiohs xcweenta guelriachii stoꞌ zusiaa Ñiꞌh lastoꞌ raꞌ bwiinn nin ayi naa raꞌ bwiinn Israel, niꞌchin nin rahbi Ñiꞌh loh guehtu Abrahn: “Garaa raꞌ bwiinn guidxyiyuh zahcataaꞌyi xcweenta luꞌh.” Dxyiꞌdxyi raꞌ riiꞌ gucah loh dxihtsi raꞌ nin guhca galoh, hasta caa xchiꞌdxyi Dxiohs.  
\v 9 Niꞌchin laꞌh raꞌ nin riachii stoꞌ raꞌ ñiꞌh, nnah laꞌh Dxiohs cayahcanee laꞌh raꞌ ba ziga gahca guhcanee Ñiꞌh laꞌh guehtu Abrahn, nin gwachii stoꞌ laꞌh Ñiꞌh. 
\p  
\v 10 Garaa raꞌ nin riiyuhnn raꞌ sola ziga nin caa loh xlehyi guehtu Moisehs, ya naa raꞌ ba bwiinn dii raꞌ laasii squiiꞌ caa loh dxihtsi xteenn lehyi: “Garaa raꞌ bwiinn nin ayi guzaꞌloh guunn raꞌ ziga nin ruluuꞌyi lehyi, ziuuꞌ dii raꞌ bwiinn raꞌ chi.”  
\v 11 Pwihsi ayi chyu naa bwiinn nayaa nez loh Dxiohs sidela razoꞌbadxiahga nuꞌh xcweenta lehyi, laasii squiiꞌ naa xchiꞌdxyi Dxiohs: “Sidela riachii stoꞌ tuhbi bwiinn xchiꞌdxyi Dxiohs, bwiinn chi naa ba tuhbi bwiinn nayaa nez loh Dxiohs, nee nabahannee ba Dxiohs pur xcweenta guelriachii stoꞌ xteenn ba.”  
\v 12 Ya lehyi xteenn Moisehs ayi naan ziga chechii stoꞌ bwiinn xchiꞌdxyi Dxiohs, laasii squiiꞌ rñiꞌ loh lehyi: “Bwiinn nin guzoꞌbadxiahga dxyiꞌdxyi raꞌ riiꞌ, zibahan raꞌ ba pur xcweentan.” 
\p  
\v 13 Jesucristu bataꞌh Ñiꞌh laꞌhnuꞌh loh dii xteenn lehyi laasii laꞌh Ñiꞌh guhchi Ñiꞌh pur xcweenta xtii nuꞌh loh tuhbi yahga cruhzi ziga zi bariaꞌcaa Ñiꞌh ziga zi tuhbi bwiinn dii, laasii loh Xchihtsi Dxiohs caa squiiꞌ: “Bwiinn dii raꞌ, naa raꞌ garaa raꞌ nin rahchi rzaꞌbinaꞌhla loh tuhbi yahga.”  
\v 14 Dee raꞌ guhca raꞌn tin guyaꞌloh xcweenta guelruhnntaaꞌyi nin biaꞌhan dxyiꞌdxyi Dxiohs loh guehtu Abrahn tin pur xcweenta Jesucristu guicaꞌha raꞌ bwiinn nin ayi naa raꞌ bwiinn Israel raꞌ guelruhntaaꞌyi chi; ya tin ziꞌchi za garaa raꞌ nuꞌh pur xcweenta guelriachii stoꞌ rachicaꞌha raꞌ nuꞌh Spíritu Saantu nin biaꞌhan dxyiꞌdxyi guixeꞌhla Dxiohs para laꞌh raꞌ nuꞌh. 
\s1 Lehyi nee dxyiꞌdxyi nin biaꞌhan dxyiꞌdxyi Dxiohs loh guehtu Abrahn 
\p  
\v 15 Bwiitsi raꞌn, laꞌn guiñiꞌ loh tu tuhbi dxyiꞌdxyi xcweenta bwiinn guidxyiyuh. Chin ziga tuhbi bwiinn ruhnn ba tuhbi dxihtsi tin dxiaꞌhan dxyiꞌdxyi ba cun stuhbi bwiinn, nicala bwiinn guidxyiyuh raꞌ ba, per chin ya batiꞌdxi firma garoopa raꞌ ba loh dxihtsi chi ayiru nuu chyu xa guunn para xi guicah ru loh dxihtsi chi nee nin ayiza nuu chyu guziaꞌtiin nin caa loh dxihtsi chi.  
\v 16 Pwihsi naann nuꞌh, Dxiohs badiꞌhi xchiꞌdxyi Ñiꞌh nez loh guehtu Abrahn nee cun neezaa loh llahga ba, ayi guñiꞌ Ñiꞌh llahga raꞌ guehtu Abrahn ziga loh ziahan raꞌ ba, sino que guñiꞌ Ñiꞌh xcweenta tuhsi bwiinn, ya bwiinn chi naa laꞌhsi Jesucristu.  
\v 17 Dxyiꞌdxyi nin xclaaꞌdzihn guiñiꞌn loh tu naa squiiꞌ: Dxyiꞌdxyi nin biaꞌhan dxyiꞌdxyi Dxiohs loh guehtu Abrahn guñiꞌ Ñiꞌh loh ba chin cayaꞌdxi zatahpa gaywaꞌh galdabi tsiꞌh yihza gadzihn lehyi loh Moisehs, tin laꞌh Moisehs batiꞌdxi lehyi riiꞌ nez loh raꞌ bwiinn Israel. Per ayi bwiꞌhnn lehyi gahn ñuchaꞌh dxyiꞌdxyi nin biaꞌhan dxyiꞌdxyi Dxiohs loh guehtu Abrahn, laasii xchiꞌdxyi chiꞌh zi Ñiꞌh lasahca.  
\v 18 Pwihsi sidela herensi nin biaꞌhan dxyiꞌdxyi Dxiohs loh guehtu Abrahn naan pur xcweenta xteenn xlehyi Moisehs, pwihsi ayi xi herensi guhpa Abrahn loh Dxiohs; per ziga nnah laꞌh Dxiohs basiaꞌhannee herensi laꞌh Abrahn laasii desde galohyi biaꞌhan dxyiꞌdxyinee Ñiꞌh laꞌh Abrahn. 
\p  
\v 19 ¿Xi pur badiꞌhi Dxiohs lehyi nez loh guehtu Moisehs? Badiꞌhi Dxiohs lehyi laasii guzaꞌbi duxa raꞌ bwiinn Israel loh duhlda, tin guhcabwaꞌ raꞌ ba xa naa xcweenta xtuhlda raꞌ ba, gaduhbi nin zeꞌ-yalda dxyih nin dxiꞌ nin naa Llahga Abrahn, laasii ziꞌchi biaꞌhan dxyiꞌdxyi Dxiohs cun laꞌh Abrahn. Ya ziga lehyi xaanjla Dxiohs badiꞌhi lehyi laꞌh guehtu Moisehs, tin laꞌh ba guhca ziga tuhbi bwiinn nin rusiaꞌlda dxyiꞌdxyi.  
\v 20 Tuhbi nin rusiaꞌlda dxyiꞌdxyi ayi naa ba par tuhbi si bwiinn, per Dxiohs tuhsi naa Ñiꞌh. 
\s1 Xcweenta lehyi 
\p  
\v 21 ¿Ta guriincaa naa lehyi Moisehs loh dxyiꞌdxyi nin basiaꞌhan Dxiohs loh guehtu Abrahn? ¡Xa gacan ziꞌchi! Sidela ñachicaꞌha nuꞌh tuhbi lehyi nin rahca runiꞌhi guelnabahan, chiꞌchisihn xcweenta lehyi chi ñicaꞌha bwiinn guelnabahan nayaa,  
\v 22 per loh xchihtsi Dxiohs rñiꞌ squiiꞌ: Garaa raꞌ bwiinn nuu ñieꞌw loh duhlda, per tuhbi bwiinn nin chechii stoꞌ ñiꞌh xchiꞌdxyi Dxiohs ziga gwachii stoꞌ guehtu Abrahn, bwiinn chi guicaꞌha guelriachii stoꞌ xteenn dxyiꞌdxyi xcweenta Jesucristu ziga biaꞌhan dxyiꞌdxyi Dxiohs loh guehtu Abrahn. 
\p  
\v 23 Chin nagahdxi gadzihn xcweenta guelriachii stoꞌ xteenn xchiꞌdxyi Jesucristu, chiꞌchi gunaꞌzu ñieꞌw lehyi laꞌhnuꞌh loh duhlda; dxuuleeza chiꞌh zi nuꞌh gariaꞌhcaa guelriachii stoꞌ xcweenta xchiꞌdxyi Jesucristu.  
\v 24 Niꞌchin nin naa lehyi ziga xmwehsu nuꞌh tin guluuꞌyin laꞌhnuꞌh neziuh nez loh Daada Jesucristu tin gusiaa Ñiꞌh xcweenta xtuhlda raꞌ nuꞌh cun guelriachii stoꞌ xteenn xcweenta xchiꞌdxyi Ñiꞌh.  
\v 25 Per nnah ziga ya nahpa nuꞌh guelriachii stoꞌ xteenn xcweenta xchiꞌdxyi Ñiꞌh, ayiru chyu guichiꞌhn tuhbi mwehsu ziga lehyi. 
\p  
\v 26 Laasii pur xcweenta guelriachii stoꞌ garaa tu naa tu lliiꞌn Dxiohs xcweenta ziga naa tu tuhsi cun Jesucristu,  
\v 27 laasii garaa tu ziga gurohbañihsa tu loh xchiꞌdxyi Jesucristu, naa tu xpwiinn Jesucristu.  
\v 28 Ayiru xi guelrzaaꞌ chuu tu nicala naa nuꞌh bwiinn Israel o bwiinn griehgu raꞌ, o bwiinn nin gudooꞌtiiꞌ ziga mooza raꞌ, o bwiinn nin ayi naa mooza raꞌ, ndxiꞌhw o gunnaꞌh; laasii garaa raꞌ nuꞌh naa tuhsi nez loh Jesucristu.  
\v 29 Ya sidela naa tu xpwiinn Jesucristu, pwihsi naa tu llahga guehtu Abrahn ya zicaꞌha tu ziga herensi nin biaꞌhan dxyiꞌdxyi Dxiohs gudiꞌhi Ñiꞌh laꞌh guehtu Abrahn. 
\c 4  
\p  
\v 1 Dxyiꞌdxyi nin xclaaꞌdzihn guiñiꞌn loh tu naa squiiꞌ: Nin rcaꞌha guelnazaꞌca, chin naa bi biñiꞌn, naa bi ziga zi tuhbi mooza nicala xteenn bi gahca garaa nin naa xteenn xtaada bi.  
\v 2 Nuu tuhbi bwiinn nin rahpa laꞌh bi, nee nuu za tuhbi bwiinn nin rnabwaꞌ xcweenta xixteenn bi, para hasta gadzihnyi dxyih nin bacaꞌbwaꞌ xtaada bi guicaꞌha bi nin gudiꞌhi xtaada bi laꞌh bi.  
\v 3 Ya ziꞌca za rzahca raꞌ nuꞌh chin naa nuꞌh biñiꞌn; guyuuꞌ nuꞌh guhca nuꞌh mooza loh lehyi, gunabwaꞌn xi niꞌca ayi nuu guidiꞌhnn nuꞌh loh guidxyiyuh,  
\v 4 per chin bazaaꞌ dxyih nin bazoꞌba Dxiohs, baxeꞌhla Ñiꞌh Lliiꞌn Ñiꞌh, guulaa Lliiꞌn Ñiꞌh pur tuhbi gunnaꞌh ya biꞌ Ñiꞌh ziga tuhbi bwiinn Israel nin nahpa bazoꞌbadxiahga xcweenta lehyi.  
\v 5 Biꞌ Ñiꞌh squiiꞌ tin bataꞌh Ñiꞌh laꞌhnuꞌh ziga naa nuꞌh bwiinn nin nuu lahtsinaa xteenn lehyi, tin ziꞌchi gaca guunnlliiꞌn Dxiohs laꞌhnuꞌh. 
\p  
\v 6 Per laasii ya naa tu lliiꞌn Ñiꞌh, niꞌchin baxeꞌhla Dxiohs Spíritu Saantu xteenn Lliiꞌn Ñiꞌh tin cweezaa Ñiꞌh lastoꞌ tu, ya laꞌh Ñiꞌh rñiꞌ loh Dxiohs xcweenta nuꞌh: “Yuꞌbiluꞌh, Xtaada nu.”  
\v 7 Pwihsi naa raꞌ nuꞌh lliiꞌn Dxiohs, ya ayiru naa raꞌ nuꞌh ziga mooza zi. Ya pur nin naa raꞌ nuꞌh lliiꞌn Dxiohs, pwihsi zuniꞌhi Dxiohs guelnazaꞌca laꞌh nuꞌh xcweenta Daada Jesucristu. 
\s1 Riuuꞌ Pahblu guelrzaaꞌ pur xcweenta bwiinn Galacia 
\p  
\v 8 Pwihsi chin nagahdxi dxiuꞌnbwaꞌ tu Dxiohs, nuu naꞌzu guelrusaguiꞌhi xteenn raꞌ dxaan raꞌ nin nnaastoꞌ tu naa Dxiohs laꞌhtu per ayi Dxiohs raꞌ dxiꞌh niꞌchi raꞌ,  
\v 9 niꞌchin nnah nin nuꞌnbwaꞌ tu Dxiohs o nuꞌnbwaꞌ Dxiohs laꞌhtu, ¿xaalla cheezah chiꞌh tu loh raꞌ guelrusaguiꞌhi nin guyuuꞌ tu galoh chin guunn tu laꞌh raꞌ dxaan raꞌ?  
\v 10 Laꞌhtu zeezahnee gahca tu rahpadaa tu loh dxyih raꞌ, bweꞌhw raꞌ, bweꞌhw raꞌ nin mahzi lasahca cun yihza raꞌ ziga caa loh xlehyi Moisehs.  
\v 11 Nuu guelnadxyiꞌbi lastoꞌn nnagah gariaꞌcaa gaca xtsiꞌnaꞌhn nez loh tu dziꞌn lliaaꞌ zi. 
\p  
\v 12 Bwiitsi lasaaꞌ raꞌn, rnaꞌbaꞌhn loh tu gulgahca ziga paꞌh naꞌh, laasii naꞌh gwachii stoꞌn xchiꞌdxyi Jesucristu ziga za gwachii stoꞌ tu; ayi xi dziꞌn dxaaba bacaꞌchiah tu naꞌh chin guyuuꞌhuhn nez loh tu.  
\v 13 Laꞌhtu ya naann tu chin baluꞌyiꞌhn xchiꞌdxyi Jesucristu loh tu, bwiꞌhnnañin pur xcweenta tuhbi gueldxyihdxyi nin basaꞌcazii naꞌh,  
\v 14 ya gueldxyihdxyi nin guhcaꞌhn, guhcan ziga tuhbi guelrutiꞌdxiloh para naꞌh, per ayi pur niꞌchi dxiꞌh ñibweꞌhe stoꞌ tu naꞌh, sino que bwiꞌhnn tu naꞌh ziga zi tuhbi xaanjla Dxiohs, nee cun ziga zi naꞌh ñahcaꞌhn ziga Jesucristu.  
\v 15 ¿Xa guhca cun guelnasaa xteenn tu nin guhpa tu chiꞌchi? Per rñiꞌn loh tu, sidela ñibweꞌhe hasta bizloh tu ñuniꞌhi tu naꞌh, ziꞌchi ñuhnn tu;  
\v 16 yannah ¿laꞌhlaa rdxyiꞌchi tu laasii cañiꞌn dxyiꞌdxyi nin guchii loh tu? 
\p  
\v 17 Nnah nuu raꞌ bwiinn raꞌ nin ruhnnzi raꞌ ziga nin zeezahnee lehyi nee ruhnnloh raꞌ ba zigazi nin rucaꞌh stoꞌ ñiꞌh laꞌhtu, per nin xclaaꞌdzi raꞌ ba naa gabweꞌhe raꞌ ba laꞌhtu tin ayiru chechii stoꞌ tu xchiꞌdxyiꞌhn, tin chenaꞌhla tu laꞌh raꞌ ba, tin guzoꞌbadxiahga tu xchiꞌdxyi raꞌ ba.  
\v 18 Ayi guunn tu lligaaba riuuꞌllahnaꞌhn pur laꞌh tu. Pwihsi naa bwen guluuꞌyi snuhn raꞌ bwiinn balaaca rucaꞌstoꞌ raꞌ ba laꞌh tu, per nahpa gacan cun gaduhbi stoꞌ raꞌ ba nee nahpa gacan garaa dxyih, ayi chin zuꞌhsidxiꞌhn nez loh tu.  
\v 19 Lliiꞌn raꞌn, xcweenta tu cagatiꞌdxiloon guelrzaꞌcazii ziga zi rutiꞌdxiloh tuhbi gunnaꞌh loh trabahjw xteenn guelnazihdzi chin rahlaa lliiꞌn ba; nahpa zuꞌtiꞌdxiloo ruhn guelrzaꞌcazii hastayi chin guluuꞌyi tu canabwaꞌ paꞌca Jesucristu laꞌn lastoꞌ tu.  
\v 20 Malaayi ñuuꞌ xa ñahca zuꞌhn nezca tin guiñiꞌn loh tu xiilla stuhbi dxyiꞌdxyi, per ziga nnah zihtu nuuꞌhuhn ayi rahcabwaꞌn xa niꞌca guꞌnnahn lligaaba xcweenta tu. 
\s1 Dxyiꞌdxyi xcweenta Agar cun laꞌh Sara 
\p  
\v 21 Gulguiñiꞌ loon, laꞌh tu nin xclaaꞌdzi guunn ziga nin caa loh dxihtsi xteenn lehyi, ¿tayi rahcabwaꞌ tu, tayi rihn dxiahga tu xi caa loh lehyi?  
\v 22 Guldxihn dxyiꞌdxyi squiiꞌ caa loh lehyi. Guyuuꞌ chiohpa lliiꞌn guehtu Abrahn; tuhbi bi naa lliiꞌn gunnaꞌh nin guhca xmooza ba nin biriaꞌhlah Agar, stuhbi bi naa lliiꞌn gunnaꞌh nin naa cheꞌhla paꞌcaa ba nin biriaꞌhlah Sara.  
\v 23 Ya lliiꞌn gunnaꞌh nin naa xmooza ba guulaa lliiꞌn gunnaꞌh chi laasii xigaaba ba guhca ziga guyuuꞌ lliiꞌn xmooza ba, per ya ziga lliiꞌn cheꞌhla paꞌhcaa ba guulaa bi laasii ziꞌchi biaꞌhan dxyiꞌdxyinee Dxiohs laꞌh Abrahn.  
\v 24 Dxyiꞌdxyi xcweenta raꞌ gunnaꞌh raꞌ riiꞌ naa ziga dxyiꞌdxyi nin ruluuꞌyi. Gunnaꞌh raꞌ riiꞌ naa ziga chiohpa dxyiꞌdxyi nin biaꞌhan Dxiohs: Agar naa mooza; mooza ca naa ziga dxyiꞌdxyi nin biaꞌhan dxyiꞌdxyi Dxiohs cun Moisehs loh dahan nin laa Sinaí, nee lliiꞌn mooza ca guyuuꞌ ya xpiñih bi gaca raꞌ mooza xteenn lehyi.  
\v 25 Agar naa ziga dahan Sinaí nez loh raꞌ guihdxyi xteenn Arabia, per guihdxyi Jerusalehn naa ziga dahan Sinaí laasii nnah riꞌchi naa hasta rii raꞌ bwiinn Israel cun lliiꞌn raꞌ ba, zeenee raꞌ ba lehyi.  
\v 26 Per guihdxyi Jerusalehn nin nuu dxibaaꞌ ayi naan ziga tuhbi mooza, ya laꞌhnuꞌh naa nuꞌh lliiꞌnan.  
\v 27 Squiiꞌ caa loh xchiꞌdxyi Dxiohs: 
\q1 Biahxi, gunnaꞌh nin ayi lliiꞌn ñiꞌh; dxigah biahxi yiꞌh nin ayi gaann luꞌh loh guelnazihdzi xteenn raꞌ gunnaꞌh nin riuuꞌ raꞌ lliiꞌn ñiꞌh, 
\q1 laasii ziuuꞌ ru lliiꞌn gunnaꞌh nin guleꞌhe stoꞌ cheꞌhla ñiꞌh que gunnaꞌh nin nuunee cheꞌhla ñiꞌh. 
\p  
\v 28 Bwiitsi raꞌn, laꞌhnuꞌh naa nuꞌh ziga zi guehtu Isaac; naa nuꞌh lliiꞌn guehtu Abrahn pur dxyiꞌdxyi nin biaꞌhan dyxiꞌdxyi Dxiohs loh ba.  
\v 29 Chin guulaa lliiꞌn gunnaꞌh nin naa mooza, guulaa bi laasii lligaaba Abrahn guhca guyuuꞌ bi stoꞌ xmaah bi, per ya bachaꞌga dxiꞌldxi bi laꞌh nin naa lliiꞌn paꞌh cheꞌhla Abrahn nin guulaa xcweenta dxyiꞌdxyi nin biaꞌhan dxyiꞌdxyi Dxiohs cun laꞌh guehtu Abrahn, ziꞌchi za naa nnah.  
\v 30 Per ¿xi rñiꞌ loh Xchihtsi Dxiohs? Squiiꞌ rñiꞌn: “Babweꞌhecaa gunnaꞌh nin naa mooza cun lliiꞌn ba, tin ayi guicaꞌha lliiꞌn gunnaꞌh nin naa mooza xquelnazaꞌca xteenn luꞌh ziga nin rcaꞌha lliiꞌn gunnaꞌh nin naa cheꞌhla paꞌh luꞌh.”  
\v 31 Pwihsi bwiitsi raꞌn, laꞌh raꞌ nuꞌh ayi naa nuꞌh ziga lliiꞌn gunnaꞌh moozazi, sino que naa nuꞌh lliiꞌn nin naa cheꞌhla paꞌh guehtu Abrahn. 
\c 5  
\s1 Gulguiꞌhnn nadxiipa stoꞌ tu loh guelriachii stoꞌ xchiꞌdxyi Dxiohs 
\p  
\v 1 Gulguiꞌhnn nadxiipa stoꞌ tu loh xchiꞌdxyi Dxiohs nin baniꞌhi Jesucristu laꞌhnuꞌh laasii guchii paꞌh babweꞌhe Jesucristu laꞌh raꞌ nuꞌh loh xcweenta lehyi; basiapitii Ñiꞌh xtuhlda raꞌ nuꞌh chin gwachii stoꞌ nuꞌh xcweenta xchiꞌdxyi Ñiꞌh, niꞌchin nin ayiru guibiaꞌgarii tu loh guelrsiꞌnaaꞌha xteenn lehyi. 
\p  
\v 2 Naꞌh Pahblu rñiꞌn loh tu; sidela laꞌhtu chuu tu bwaꞌ tihxi tu ziga nin caa loh lehyi, chiꞌchi ayiru xi galluꞌyi chechii stoꞌ tu xchiꞌdxyi Jesucristu.  
\v 3 Rñiꞌzahn stuhbi bwelta loh tu; garaa raꞌ bwiinn raꞌ nin xclaaꞌdzi chuu bwaꞌ tihxi ñiꞌh, nahpa guzoꞌbadxiahga bwiinn chi guunn ba garaatiiꞌ ziga nin rñiꞌ loh lehyi xteenn Moisehs.  
\v 4 Pwihsi laꞌhtu nin xclaaꞌdzi guunn dziꞌn raꞌ nin caa loh lehyi tin chapitii xtuhlda tu, pwihsi laꞌhtu ya naa tu bwiinn raꞌ nin biriaꞌcaa loh xneziuh Jesucristu, nee cun loh guelrucaꞌh stoꞌ xteenn Dxiohs.  
\v 5 Pwihsi laꞌhnu, pur xcweenta Spíritu Saantu nee cun xcweenta guelriachii stoꞌ, naann paꞌh nu gudxihlli Jesucristu xcweenta xtuhlda raꞌ nu loh cruhzi, nee cayiinloh nu ziꞌ paꞌ za Jesucristu stuhbi tin guniꞌhi Ñiꞌh guelnabahan zaꞌca nin naa para tuꞌpazi laꞌhnu,  
\v 6 laasii laꞌh raꞌ bwiinn nin riachii stoꞌ raꞌ ñiꞌh xchiꞌdxyi Jesucristu ayi zeenaꞌhla raꞌ ba cweenta ziga gu nuu o ayi raꞌ ba bwaꞌ nin laa circuncisión tihxi raꞌ ba; nin lasahcasihn chuu guelriachii stoꞌ xteenn Dxiohs laꞌn lastoꞌ raꞌ ba. Ya guelriachii stoꞌ riiꞌ ruhnn para rbahan raꞌ ba cun guelnadziiꞌhi lasaaꞌ. 
\p  
\v 7 Per ¿aꞌgaa zeezah zaꞌca dxiꞌh tu? ¿Chyu niꞌca basiahchi stoꞌ tu para basaaꞌn tu xcweenta dxyiꞌdxyi nin naa guchii?  
\v 8 Gulgahcabwaꞌ, ayi zeꞌ niꞌca pur lah Dxiohs nin rbwihdxyi laꞌhtu,  
\v 9 nee ayi dxiaꞌlda stoꞌ tu tuhbi bwiinn nin ruluuꞌyi xchiꞌdxyi lehyi loh tu naa ba ziga levadura nin riahchi cohba harihn.  
\v 10 Naꞌh rguꞌbwaꞌpaꞌhn xcweenta tu nez loh Dxiohs, niꞌchin nadxiipa stoꞌn laꞌhtu; laꞌn naann ayi chyu laꞌhtu naa nin chechii stoꞌ ñiꞌh stuhbi dxyiꞌdxyi, per bwiinn nin nusaguiꞌhyi laꞌhtu zusaꞌcazii Dxiohs laꞌh ba, nicala chyu chiꞌh zi naa ba. 
\p  
\v 11 Pwihsi ziga naꞌh bwiitsi raꞌn, sidela naꞌh zeezah gahca nugatiꞌchihn dxyiꞌdxyi xcweenta bwaꞌ nin riuuꞌ tihxi bwiinn, pwihsi ayi ñiuuꞌ llahn stoꞌ raꞌ bwiinn Israel naꞌh, ya ziꞌchi ayi ru chyu laꞌhtu ñachii stoꞌ ñiꞌh xcweenta ziga gudxihlli Jesucristu xtuhlda raꞌ nuꞌh loh cruhzi, per ziꞌchi naa xigaaba raꞌ ba.  
\v 12 Pwihsi, bwiinn raꞌ nin nugasaguiꞌhi laꞌhtu para chuu tu bwaꞌ nin laa circuncisión, ¡malaayi guchyuuꞌgatiiꞌ raꞌ ba hasta naa raꞌ ba ndxiꞌhw! 
\p  
\v 13 Laasii laꞌhtu bwiitsi lasaaꞌ raꞌn gudihdxyi Dxiohs laꞌhtu tin taꞌh tu loh lehyi pur xcweenta Jesucristu, per gulguiaꞌhxgah ayi guicaꞌha si tu dxyiꞌdxyi raꞌ riiꞌ bachiꞌh chiꞌchi soꞌbaloh guunn tu nin chiꞌh zi nin xclaaꞌdzi tihxi tu; mahzi nin guunn tu gulgahca nadziiꞌhi lasaaꞌ ziga tuhbi tu ziga stuhbi tu,  
\v 14 laasii garaa raꞌ dxyiꞌdxyi nin caa loh lehyi tuhsi dxyiꞌdxyi riiꞌ naa nin ruluuꞌyi: “Guhca nadziiꞌhi lasaaꞌ bwiinn ziga zi nadziiꞌhi luꞌh yiꞌh gahca.”  
\v 15 Per sidela laꞌhtu rdxihldxi tu, rahwyaaꞌ tu lasaaꞌ tu, rahw tu lasaaꞌ tu, ¡gulgahcabwaꞌ! Ayi laꞌh gahca tu guñihchi tu lasaaꞌ tu. 
\s1 Xcweenta nin rzaꞌbi stoꞌ raꞌ bwiinn nee guelnabahan nin rudiꞌhi xchiꞌdxyi Dxiohs 
\p  
\v 16 Rñiꞌn loh tu, gulguibahan ziga ruluuꞌyi xchiꞌdxyi Dxiohs cun Spíritu Saantu xteenn Ñiꞌh, tin ziꞌchi ayi guibahan tu cun xcweenta ziga nin xclaaꞌdzi tihxi tu, nee cun ziga chiꞌh zi nin naa xigaaba tu,  
\v 17 laasii nin naa lligaaba xteenn bwiinn naa nin rdxyiꞌchi loh xigaaba xteenn Spíritu Saantu xteenn Dxiohs. Ziꞌchi za xigaaba xteenn Dxiohs ayi naan tuhbiloh cun lligaaba xteenn bwiinn, niꞌchin nin ayi nuu guunn tu dziꞌn nin xclaaꞌdzi tihxi tu guunn tu.  
\v 18 Per sidela cayuhnn tu nin ruluuꞌyi Spíritu Saantu Dxiohs laꞌhtu, chiꞌchi ayi nahpa guunn tu ziga nin caa loh lehyi. 
\p  
\v 19 Guyaa dxiuꞌnbwaꞌ raꞌ bwiinn xa niꞌca naa dziꞌn nin ruhnn raꞌ bwiinn raꞌ nin ayi nuꞌnbwaꞌ laꞌh Dxiohs; ruhnn raꞌ ba guelgubwihlli, rieꞌsuh yihca raꞌ ba cohsa dxaaba, nee cun ziahan ru nin rnaaba tihxi raꞌ ba guunn raꞌ ba,  
\v 20 raann raꞌ ba dxaan raꞌ, cun ruhnn raꞌ ba dziꞌn bidxaꞌha, riuuꞌ llahn stoꞌ raꞌ ba, rwaꞌha dxaaba loh lasaaꞌ raꞌ ba, rchaꞌgadxihldxinee lasaaꞌ raꞌ ba cun naa raꞌ ba bwiinn nii raꞌ, nee ayi guinagahn tiiꞌ rdxyiꞌchi raꞌ ba, nee riaꞌloh lasaaꞌ raꞌ ba cun rlaaꞌha lasaaꞌ raꞌ ba, cun rbahchixchii raꞌ ba partidu raꞌ.  
\v 21 Naa raꞌ ba nin rzaꞌbi stoꞌ xixteenn lasaaꞌ raꞌ ba, bwiinn gwaaꞌ bwiinn nin rcaꞌnzaa zaꞌbi, nee ziahan ru dziꞌn raꞌ ruhnn raꞌ ba; pwihsi ziga laꞌn guñiꞌ la desde galoh, garaa raꞌ bwiinn raꞌ nin naa raꞌ squiiꞌ ayi nuu chuꞌtii raꞌ ba loh guelrnabwaꞌ xteenn Dxiohs.  
\v 22 Per xtsiꞌn Spíritu Saantu xteenn Dxiohs naa guelnadziiꞌhi lasaaꞌ ñiꞌh, guelriahxi stoꞌ, guelrbwihdxyii stoꞌ, guelpaseensi, guelralahsa stoꞌ lasaaꞌ ñiꞌh, guelnazaꞌca cun chyu chiꞌh zi bwiinn, guelnaguuꞌdzi stoꞌ, guelriachii stoꞌ,  
\v 23 guelnadoꞌ laadzi, cun guelrnabwaꞌ loh stoꞌ nuꞌh cun nin xclaaꞌdzi tihxi nuꞌh guunn. Ayi nin tuhbi xcweenta lehyi nin ruxiꞌn guunn raꞌ bwiinn loh lasaaꞌ raꞌ dziꞌn raꞌ riiꞌ,  
\v 24 per laꞌh raꞌ nin ya gwachii stoꞌ raꞌ ñiꞌh xchiꞌdxyi Jesucristu ya laꞌh raꞌ ba bachyuuꞌga raꞌ ba loh garaa raꞌ duhlda nin xclaaꞌdzi tihxi raꞌ ba guunnan.  
\v 25 Pwihsi rbweeza Spíritu Saantu stoꞌ nuꞌh, pwihsi ziꞌchi za chyu guibahan ziga rnabwaꞌ Spíritu Saantu guibahan nuꞌh.  
\v 26 Ayi gaca nuꞌh bwiinn nayaachi, ayi guidxyiꞌchinee lasaaꞌ nuꞌh, nin ayi gaca nuꞌh bwiinn nin rzaꞌbi stoꞌ xixteenn lasaaꞌ ñiꞌh. 
\c 6  
\s1 Gulgahcanee laꞌh raꞌ lasaaꞌ tu ziga tuhbi ziga stuhbi raꞌ ba 
\p  
\v 1 Bwiitsi lasaaꞌ raꞌn, sidela laꞌhtu rdxeela tu tuhbi bwiinn lasaaꞌ tu nin biaaba loh xiilla duhlda, laꞌhtu nin ya rahcabwaꞌ xa naa xcweenta xchiꞌdxyi Dxiohs gulguiñiꞌnee laꞌh bwiinn chi, nee gulgahcanee laꞌh ba tin gariaꞌh ba loh duhlda; gulguiñiꞌ loh ba cun dxyiꞌdxyi naguuꞌdziꞌhngah, nee gulguiaꞌh dziꞌtsi tin ayi nagah nee laꞌhtu dxiaaba tu loh duhlda.  
\v 2 Gulgadiꞌhi nin rchiꞌhn raꞌ lasaaꞌ tu; gulgahcanee laꞌh raꞌ ba tin ziꞌchi guunn tu guzaꞌloh tu garaa raꞌ dxyiꞌdxyi raꞌ nin naa xlehyi Jesucristu. 
\p  
\v 3 Laasii nin ruhnn lligaaba nuu chyu naa ba; bwiinn chi ayi chyu naa tiiꞌ ba, rusaguiꞌhi ba laꞌh gahca ba.  
\v 4 Tuhbigah tu gulcuuꞌbwaꞌ xa naa xtsiꞌn tu tin gwaꞌha tu gu xnehza naan. Ya ziꞌchi ziinnasaa lastoꞌ tu pur xcweenta nin galuuꞌyi xtsiꞌn tu, ya ayi xtsiꞌn dxiꞌh stuhbi bwiinn,  
\v 5 laasii tuhbigah raꞌ bwiinn chebiiga nez loh Dxiohs tin gutiꞌdxi cweenta raꞌ ba xi bwiꞌhnn raꞌ ba. 
\p  
\v 6 Bwiinn nin cagasiꞌdxi xchiꞌdxyi Dxiohs, nahpa gacanee ba bwiinn nin ruluuꞌyi laꞌh ba; gudiꞌhi ba nuhnzi xixteenn ba laꞌh bwiinn nin ruluuꞌyi laꞌh ba. 
\p  
\v 7 Ayi gusaguiꞌhi tu laꞌh gahca tu; ayi nin tuhbi nin guunn gusaguiꞌhi laꞌh Dxiohs. Nin ruhnn biñih tuhbi bwiinn niꞌchi dxiꞌh naa liꞌhn nin rutiaaꞌha ba. 
\p  
\v 8 Per tuhbi bwiinn nin guunn dziꞌn cweenta tihxi ñiꞌh, ya chin gadzihn dxyih nin guicaꞌha ba guelnazaꞌca, ziñihchiloh tihxi ba nee ayi chuu ba loh xquelrnabwaꞌ Dxiohs; per sidela tuhbi bwiinn guunn dziꞌn nin badiꞌhi Spíritu Saantu Dxiohs laꞌh ba, chin guicaꞌha ba guelnazaꞌca, neezaa guelnabahan nin naa para tuꞌpazi guicaꞌha ba.  
\v 9 Niꞌchin nnah ayi chyu gusaaꞌn loh dziꞌn zaꞌca tin chin gadzihn dxyih nin dxiꞌ guelnazaꞌca, neezaa laꞌhnuꞌh gachicaꞌha raꞌ nuꞌh tuhbi guelnazaꞌca rooꞌ.  
\v 10 Niꞌchin cada chin rahldaaguzuh, gachidxiaacanee nuꞌh nee gachidiꞌhnn nuꞌh bwen laꞌh garaa raꞌ bwiinn, nee mahzi ru para laꞌh raꞌ bwihtsi lasaaꞌ raꞌ nuꞌh nin riachii stoꞌ raꞌ ñiꞌh xchiꞌdxyi Jesucristu. 
\s1 Luulchima raꞌ dxyiꞌdxyi xteenn Pahblu nee cun luulchima za guelrgahpaDxiohs xteenn ba 
\p  
\v 11 Gulguiaꞌha naliꞌhi lehtra nin cagacaꞌhn loh tu cun naaꞌhahn.  
\v 12 Garaa raꞌ bwiinn raꞌ nin riuuꞌ stoꞌ ñiꞌh guunn nin xclaaꞌdzi tihxi raꞌ ba gaca, laꞌh raꞌ ba nin xclaaꞌdzi chuu tu tuhbi bwaꞌ; ruhnn raꞌ ba squiiꞌ laasii ayi xclaaꞌdzi raꞌ ba gutiꞌdxiloh raꞌ ba guelrzaꞌcazii xcweenta nin gucah Jesucristu loh cruhzi.  
\v 13 Laꞌh raꞌ bwiinn raꞌ nin nuu bwaꞌ, ayi ruhnn raꞌ ba garaa raꞌ nin caa loh lehyi, per xclaaꞌdzi raꞌ ba chuu tu bwaꞌ chi tin ziꞌchi guunn nayaachi raꞌ ba laꞌh raꞌ ba bwiꞌhnn gahn guyuuꞌtii bwaꞌ chi tihxi tu,  
\v 14 per naꞌh ayi xclaaꞌdzihn chuu guelnayaachi stoꞌn xcweenta ziga cohsa raꞌ chi, sino que ziga naa xcweenta nin guhchi Daada Jesucristu loh tuhbi cruhzi, pwihsi pur laꞌh xcruhzi Jesucristu garaa raꞌ cohsa dxaaba xteenn guidxyiyuh guñihchiloh raꞌn para naꞌh, ya para ziga laꞌh raꞌ zahn naan ziga nin guñihchiloh para laꞌh raꞌn.  
\v 15 Laasii sidela naa nuꞌh tuhsi cun laꞌh Jesucristu, nicala nuu nuꞌh o nicala ayi chuu nuꞌh bwaꞌ xteenn circuncisión, nin naa mahzi bwen gaca nuꞌh tuhbi bwiinn nin badxaꞌh ya biuuꞌ ba ganaalla lligaaba cuubi raꞌ pur xchiꞌdxyi Jesucristu.  
\v 16 Garaa raꞌ bwiinn raꞌ nin nabahan raꞌ ziga ruluuꞌyi xchiꞌdxyi Jesucristu, zibwihdxyii stoꞌ raꞌ ba xcweenta guelralahsa stoꞌ xteenn Dxiohs, nee cun neezaa laꞌh raꞌ bwiinn Israel raꞌ nin gwachii stoꞌ raꞌ ñiꞌh xchiꞌdxyi Jesucristu zahpa raꞌ za ba guelnasaa. 
\p  
\v 17 Ayiru guunn tu llahn naꞌh nnah loh delaanta; laasii sehn raꞌ xteenn bwaꞌ nin nuu tiꞌxihn rluuꞌyi naan tuhbi xmooza Jesucristu. 
\p  
\v 18 Bwiitsi lasaaꞌ raꞌn, laꞌh Daada Jesucristu guunntaaꞌyi yihca tu. Ziꞌchi gaca pwihsi.