\id 2TH  
\h 2 Tesalonicenses 
\toc1 Nin raroopa dxihtsi nin bacaꞌh San Pahblu loh raꞌ bwiinn Tesalónica 
\toc2 2 Tesalonicenses 
\toc3 2 Ts. 
\mt1 Nin raroopa dxihtsi nin bacaꞌh San Pahblu loh raꞌ bwiinn Tesalónica 
\c 1  
\s1 GuelrgahpaDxiohs 
\p  
\v 1 Naꞌh Pahblu, cun Silvanu cun neezaa Timoteu; racaꞌh nu dxihtsi riiꞌ loh tu bwihtsi lasaaꞌ raꞌ nu nin naa raꞌ xpwiinn Dxiohs loh guihdxyi Tesalónica, bwiinn raꞌ nin naa tuhsi loh Dxiohs Xtaada nuꞌh cun neezaa loh Daada Jesucristu.  
\v 2 Dxiohs Xtaada nuꞌh cun Daada Jesucristu gacanee laꞌh tu cun gusacwachidxyii za Ñiꞌh lastoꞌ tu. 
\s1 Dxiohs guunn guelguxchisi laꞌh raꞌ bwiinn duhlda chin dxiꞌ Jesucristu stuhbi 
\p  
\v 3 Bwitsi raꞌ, guillii-guillii radiꞌhi nu guelzuxchilli loh Dxiohs pur laꞌh tu nee ziꞌchi rgaꞌha gaca laasii dihtsi-dihtsi lasaaꞌ cayuuꞌtii guelriachiistoꞌ xteenn xchiꞌdxyi Dxiohs laꞌn lastoꞌ tu, nee cun ziga zeezah za ziga nadziiꞌhi lasaaꞌ tu.  
\v 4 Niꞌchin laꞌgahca nu rachiñiꞌ nu xcweenta tu loh raꞌ xpwiinn Dxiohs, cun ziga guelpaseensi xteenn tu nee ziga ruluuꞌyi xcweenta guelriachii stoꞌ xteenn tu nin nahpa tu laꞌh Dxiohs nee ruluuꞌyi tun loh garaatiiꞌ guelrzahcazii cun guelnalasa nin rutiꞌdxiloh tu.  
\v 5 Dee sihn ruluuꞌyi xquelguxchisi Dxiohs naa guchii paꞌh, niꞌchin nin rñiꞌ Dxiohs zalda loh xquelrnabwaꞌ Ñiꞌh para laꞌh tu niꞌchin cagatiꞌdxiloh tu guelrzaꞌcazii. 
\p  
\v 6 Laasii nuu Dxiohs lligaaba zalda chiilli raꞌ bwiinn raꞌ nin basaꞌcazii laꞌh tu xtuhlda raꞌ ba, niꞌchin nin zusagwaꞌha Dxiohs laꞌh raꞌ ba guelrzaꞌcazii,  
\v 7 ya zuniꞌhi Ñiꞌh guelrziꞌlaaꞌdzi laꞌh tu nin cazahcazii, cun laꞌh za nu, loh dxyih nin dxiꞌ Daada Jesucristu, chin dxiꞌ Ñiꞌh nez loh xcahyi loh tuhbi bachaꞌh rooꞌ cun anjla raꞌ nin nahpa guelrnabwaꞌ duxa.  
\v 8 Ziꞌ Ñiꞌh tin gusaꞌcazii Ñiꞌh laꞌh raꞌ bwiinn nin ayi nuꞌnbwaꞌ raꞌ laꞌh Dxiohs nin nuu dxibaaꞌ, nee nin ayiza ruzoꞌbadxiahga dxyiꞌdxyi xteenn Jesucristu.  
\v 9 Garaa raꞌ bwiinn duhlda raꞌ zwaꞌha raꞌ ba guelrzaꞌcazii duxa nin banaa par tuꞌpazi, nee zihtu dxiaꞌhan raꞌ ba loh xquelñaꞌñih guelrnabwaꞌ xteenn Dxiohs.  
\v 10 Chin dxiꞌ Daada Jesucristu stuhbi, chiꞌchi zuhnn lasahca raꞌ xpwiinn Ñiꞌh laꞌh Ñiꞌh, ya garaa raꞌ xpwiinn Ñiꞌh zadxyigaaꞌ loh raꞌ ba chin gwaꞌha raꞌ ba loh Jesucristu dxyih chi, neezaa laꞌh tu gadxaꞌga tu loh raꞌ xpwiinn Ñiꞌh laasii gwachiistoꞌ tu xchiꞌdxyi Ñiꞌh nin baluuꞌyi nu laꞌh tu chin bidxuunee nu laꞌh tu.  
\v 11 Niꞌchin nin guillii-guillii cagazeꞌta nu laꞌh tu loh Dxiohs chin rnaaba nu loh Ñiꞌh tin gaca guluuꞌyi tu ayi lliaaꞌha zi dxiꞌh gulii Ñiꞌh laꞌh tu, nee dxudxiꞌhn za nu guniꞌhi Ñiꞌh lligaaba laꞌh tu guunn tu garaa raꞌ dziꞌn zaꞌca nin xclaaꞌdzi Ñiꞌh guunn tu cun gacanee za Ñiꞌh laꞌh tu cun xquelrnabwaꞌ Ñiꞌh tin guunn tu dziꞌn raꞌ nin ruhnn tu pur nin riachiistoꞌ tu,  
\v 12 tin guzeꞌta zaꞌca raꞌ bwiinn lah Daada Jesucristu pur ziga nabahan xnehza tu, nee laꞌh za Ñiꞌh guzeꞌta zaꞌca Ñiꞌh laꞌh tu ya dee gaca laasii bwenduxa naa Dxiohs Xtaada nuꞌh cun Daada Jesucristu loh garaa nin rahcanee Ñiꞌh laꞌh nuꞌh. 
\c 2  
\s1 Bwiinn duhlda duxa 
\p  
\v 1 Yannah, rnaba duxa nu loh tu bwihtsi raꞌ nu, pur dxyih nin dxiꞌ Jesucristu, dxyih nin gadiaaꞌha nuꞌh loh Ñiꞌh,  
\v 2 ayi chuu gah tu guelrzaaꞌ, nee ayiza gusaaꞌn tu guchihbi raꞌ ba laꞌh tu cun dxyiꞌdxyi nin guluuꞌyi tuhbi bwiinn nin naa profeta nicala za cun dxyiꞌdxyi nin nnaa raꞌ ba loh tu caa loh tuhbi dxihtsi nin nnaa raꞌ ba guluꞌnehza nu loh tu ziga cañiꞌn: “Laꞌh dxyih nin dxiꞌ Jesucristu stuhbi laꞌnbadzihn gahxu.”  
\v 3 Ayi gusaaꞌn tu gusaguiꞌhi bwiinn laꞌh tu pur dxyiꞌdxyi raꞌ, laasii chin nagahdxi gadzihn dxyih ca, ziuuꞌ ziahan roo raꞌ bwiinn nin cweꞌhestoꞌ raꞌ ñiꞌh xchiꞌdxyi Dxiohs tin gucaꞌnee raꞌ ba laꞌh Ñiꞌh, chiꞌchi zuluuꞌyiloh bwiinn duhlda duxa, bwiinn nin ziñichiloh par tuꞌpazi.  
\v 4 Deeꞌ nin zuhnn lasahca laꞌhgahca ba nee zidxyiꞌchinee ba garaa raꞌ nin zenee lah Dxiohs, ya hasta laꞌn xquidoꞌ Dxiohs soobaa ba tin guunn ba zigazi Yuꞌbi Dxiohs tin chechiistoꞌ bwiinn raꞌ laꞌh ba.  
\v 5 ¿Tayi riagannastoꞌ tu gaduhbi nin guyuuꞌhuhn loh tu guñiꞌraꞌn dxyiꞌdxyi raꞌ riiꞌ loh tu?  
\v 6 Yannah laꞌh tu naann xi niꞌca nuugacweꞌza laꞌh ba tin ayi guluuꞌyilohgah ba galoh nin gazaaꞌ raꞌ dxyih xteenn ba.  
\v 7 Pwihsi laꞌh guelnagaꞌtsi xteenn guelduhlda duxa chi zeezah la nnah loh guidxyiyuh, cayaꞌdxi si chesuu nin zuu galaayi, nin cagacweꞌza laꞌh niꞌchi nnah,  
\v 8 ya chiꞌchiyi zuluuꞌyiloh bwiinn duhlda duxa chi ya Daada Jesucristuyi guzaꞌloh gadxiinn laꞌh niꞌchi cun bwih rooꞌ xteenn rwaaꞌ Ñiꞌh, ya zuñichiloh Ñiꞌh niꞌchi cun xquelrnabwaꞌ xteenn Ñiꞌh nin dxieꞌnee Ñiꞌh chin gabiaꞌgarii Ñiꞌh stuhbi.  
\v 9 Bwiinn duhlda duxa gadzihn ba cun xquelrnabwaꞌ bwiinndxaaba, ya chin gadzihn ba, gadzihn ba ziga zi tuhbi bwiinn nin nahpa guelrnabwaꞌ rooꞌ; zuhnn ba sehn rooꞌ raꞌ loh guidxyiyuh cun dziꞌn roo raꞌ cun nin gusaguiꞌhi ba laꞌh raꞌ bwiinn,  
\v 10 ya zuhnn xtsiꞌn ba garaaloh cohsa dxaaba, guelduhlda raꞌ tin gusaguiꞌhi ba laꞌh raꞌ bwiinn nin nacweenta ziga bwiinn nin guñichiloh loh Dxiohs laasii ayi guzaꞌbistoꞌ raꞌ ba xchiꞌdxyi nanchii Dxiohs nin ñutaꞌh laꞌh raꞌ ba loh duhlda,  
\v 11 niꞌchin nin zusaaꞌn Dxiohs dxiꞌ tuhbi guelrusaguiꞌhi duxa loh raꞌ ba tin niꞌchi guunn chechiistoꞌ raꞌ bwiinn dxyiꞌdxyi xihn,  
\v 12 tin ziꞌchi loh gabihldxyi guzee garaa raꞌ bwiinn raꞌ nin ayi guclaaꞌdzi ñachiistoꞌ raꞌ ñiꞌh nin naa dxyiꞌdxyi guchii mas guzaꞌbistoꞌ raꞌ ba nin naa duhlda duxa raꞌ. 
\s1 Nin bibwiꞌhi raꞌ tin taꞌh raꞌ ba loh duhlda 
\p  
\v 13 Per laꞌh nu nahpa gadiꞌhi nu guelzuxchiilli loh Dxiohs pur laꞌh tu, bwihtsi lasaaꞌ nu nin nadziiꞌhi laꞌh Daada Jesucristu, laasii Dxiohs gulii laꞌh tu galohyi tin taꞌh tu loh duhlda pur Spíritu Saantu Dxiohs nin rusiaa lastoꞌ tu cun neezaa dxyiꞌdxyi guchii nin gwachiistoꞌ tu.  
\v 14 Niꞌchin chin bihndxiahga tu xchiꞌdxyi Dxiohs nin baluuꞌyi nu laꞌh tu, gudihdxyi Dxiohs laꞌh tu tin ziꞌchi za nee tu guicaꞌha tu loh xquelñaꞌñih xteenn Jesucristu.  
\v 15 Pwihsi, bwiitsi raꞌ; gulchezah dziꞌtsi nee ayi dxiaꞌldastoꞌ tu xchiꞌdxyi Dxiohs nin baluuꞌyi nu laꞌh tu chin bidxuu nu riꞌca, nee cun neezaa raꞌ dxyiꞌdxyi nin bacaꞌh nu loh dxihtsi nin bachiguꞌnehza nu loh tu.  
\v 16 Laꞌh gahca Daada Jesucristu xteenn nuꞌh, nee cun laꞌh Dxiohs nin naa Xtaada nuꞌh, cuꞌguiꞌw laꞌn lastoꞌ tu pur guelrucaꞌstoꞌ nin nahpa Ñiꞌh para laꞌh nuꞌh pur paseensi xteenn Ñiꞌh nin ba naa par tuꞌpazi para laꞌh nuꞌh, nee pur nin naannloh nuꞌh zachicaꞌha raꞌ nuꞌh guelnazaꞌca loh Ñiꞌh cun pur nin rahcanee Ñiꞌh laꞌh nuꞌh.  
\v 17 Ziꞌchi guunn Ñiꞌh nee neezaa guzuhdziꞌtsi Ñiꞌh laꞌh tu loh garaa raꞌ dxyiꞌdxyi zaꞌca nin guiñiꞌ tu nee cun loh dziꞌn zaꞌca za raꞌ nin guunn tu. 
\c 3  
\s1 Gulguinaaba loh Dxiohs pur laꞌh nu 
\p  
\v 1 Bwiitsi raꞌ, gulguinaaba loh Dxiohs pur laꞌh nu tin ziꞌchi nayoobagah guidiꞌchi dxyiꞌdxyi xteenn Dxiohs tin guzoꞌbadxiahga snuhn raꞌ bwiinn dxyiꞌdxyi ca tin gaca lasahca lah Dxiohs ziga guhca chin bazoꞌbadxiahga tun.  
\v 2 Gulguinaaba loh Dxiohs gacanee Ñiꞌh laꞌh nu tin ayi dxiaaba nu laꞌn naa raꞌ bwiinn yaꞌdxi raꞌ, cun bwiinn nin ayi ruhnn xnehza raꞌ, laasii ayi garaa raꞌ dxiꞌh bwiinn riachiistoꞌ raꞌ ba xchiꞌdxyi Dxiohs.  
\v 3 Dxiohs nahpa rzohba xchiꞌdxyi Ñiꞌh, pwihsi laꞌh Ñiꞌh guzuhdziꞌtsi laꞌh tu cun zahpa za Ñiꞌh laꞌh tu tin ayi dxiaaba tu laꞌn naa nin nadxaaba.  
\v 4 Laꞌh Dxiohs gulahchidxyii lastoꞌ nu pur laꞌh tu laasii ba naann nu cayuhnn tu garaatiiꞌ raꞌ nin bañiꞌ nu nahpa guunn tu, nee ziaazah guunn tun.  
\v 5 Canaꞌbaꞌhn loh Daada Jesucristu guniꞌhi ru Ñiꞌh para gacabwaꞌ tu xa naa guelrucaꞌstoꞌ xteenn Dxiohs, nee canaꞌbazahn cwachidxyii Ñiꞌh stoꞌ tu zigaza bwiꞌhnn Crixtu chin batiꞌdxiloh Ñiꞌh guelrzaꞌcazii. 
\s1 Nahpa guidiꞌhnn nuꞌh dziꞌn 
\p  
\v 6 Bwihtsi raꞌ, rnaꞌbaꞌhn pur lah Daada Jesucristu, gulguiriaꞌcaa loh raꞌ chyuchiꞌhzi raꞌ lasaaꞌ raꞌ nuꞌh loh Jesucristu nin ayi nnaa raꞌ guunn dziꞌn, nee gulguiriaꞌcaa za loh raꞌ nin ayi nnaa guibahan loh ziga baluuꞌyi nu guibahan tu,  
\v 7 laasii laꞌh tu naann la xa nahpa guibahan raꞌ nuꞌh, tin chezah-chezahnee tu ziga baluuꞌyi nu guibahan tu; naann tu chin guyuuꞌ nu loh tu ayi chyu gucaꞌnzaa zi; pur dziꞌn bidiꞌhnn nu.  
\v 8 Nee ayi za chyu gudahw lliaaꞌha zi za xquehta tu; bidiꞌhnn nu dziꞌn dxyih nagueꞌla tin ayi chyu batiiꞌdxi dziꞌn laꞌh tu.  
\v 9 Nicala ziga ñahca chyu ñinaaba ñahcanee tu laꞌh nu, per bidiꞌhnn nu dziꞌn tin baluuꞌyi nu xa rgaꞌha guunn tu,  
\v 10 laasii chin bidxuu nu loh tu, baluuꞌyi nu xa nahpa guunn tu: chyuchiꞌhzi nin ayi nnaa guunn dziꞌn ayi guehta gahw bwiinn chi.  
\v 11 Pwihsi rihn nu nuu tu ayi xi dziꞌn ruhnn tu nee nin rucaꞌstoꞌ tu naa caꞌnzaa zi tu.  
\v 12 Pwihsi pur bwiinn raꞌ rii rachinaaba nu cun lah Daada Jesucristu, guibahan xnehza raꞌ ba nee guunn raꞌ ba dziꞌn tin guunn raꞌ ba gahn nin gahw raꞌ ba.  
\v 13 Ya laꞌh tu bwiitsi raꞌ, ayi gadxahga tu guunn tu nin naa xnehza.  
\v 14 Sidela chyuulla tuhbi tu ayi ruzoꞌbadxiahga xchiꞌdxyi nu nin caa loh dxihtsi riiꞌ, gulguiaꞌha chyuuñin tin ayi guchaꞌga tu laꞌh niꞌchi tin gatuhyi loh niꞌchi,  
\v 15 per ayi guidxyiꞌchinee tu laꞌh ba sino que gulguiñiꞌnee ba zigazi bwihtsi lasaaꞌ tu. 
\s1 Guelruhntaaꞌyi luulchima 
\p  
\v 16 Dxiohs nin ruhnn rbwihdxyii stoꞌ bwiinn, gusacwahchidxyii lastoꞌ tu guillii-guillii, nicala xichiꞌhzi saca tu, pwihsi Daada Jesucristu dxiaꞌhannee laꞌh garaa tu. 
\p  
\v 17 Naꞌh, Pahblu, cagacaꞌhn guelrgahpaDxiohs riiꞌ cun naa paꞌcahn ruꞌnnahn garaa raꞌ xchiꞌtsi raꞌn; squiiꞌ rutiꞌdxi fiirmaꞌhn tuhbigah dxihtsi nin rucaꞌhn.  
\v 18 Daada Jesucristu gapa laꞌh garaa tu.