\id 1TI  
\h 1 Timoteo 
\toc1 Mwer dxihtsi nin bacaꞌh Pahblu loh Timoteu 
\toc2 1 Timoteo 
\toc3 1 Ti. 
\mt1 Mwer dxihtsi nin bacaꞌh Pahblu loh Timoteu 
\c 1  
\s1 GuelrgahpaDxiohs 
\p  
\v 1 Naꞌh Pahblu, naan tuhbi pooxtla xteenn Jesucristu laasii ziꞌchi gunabwaꞌ Dxiohs nin rutaꞌh laꞌh nuꞌh loh duhlda gahca nee neezaa laasii nahpa nuꞌh siguhra loh Ñiꞌh zachicaꞌha raꞌ nuꞌh tuhbi hereensi.  
\v 2 Rucaꞌhn dxihtsi riiꞌ loh luꞌh Timoteu nin naa paꞌca lliiꞌnahn loh ziga riachiistoꞌ nuꞌh xchiꞌdxyi Dxiohs; laꞌh Xtaada Dxiohs nuꞌh nee Daada Jesucristu gacanee yiꞌh cun galahsastoꞌ Ñiꞌh yiꞌh cun gusacwahchidxyii Ñiꞌh lastoꞌ luꞌh. 
\s1 Pahblu ruuꞌyidxiꞌdxyi xcweenta bwiinn raꞌ nin ruluuꞌyi dxyiꞌdxyi xihn raꞌ 
\p  
\v 3 Ziga gunabwaꞌn loh luꞌh chin guyaaꞌhahn loh guihdxyi raꞌ nin nuu loh guihdxyi Macedonia, ñaahn dxiaꞌhan luꞌh loh guihdxyi Efesu tin guuyidxyiꞌdxyinee luꞌh paaldaa raꞌ bwiinn nin ruluuꞌyi guriinca dxyiꞌdxyi  
\v 4 tin ayi saꞌbi raꞌ ba loh xica cweenta xteenn bwiinn chieempa loh xigaaba raꞌ ba nee tin ayi za chuu duxa raꞌ ba lligaaba chyu guhca xpwiinn guldooꞌ raꞌ ba, laasii garaa raꞌ dxyiꞌdxyi riiꞌ nin rdxindxinee dxyiꞌdxyi laꞌh raꞌ bwiinn, ayi rahcanee raꞌn ziga mahzi chechiistoꞌ raꞌ nuꞌh xchiꞌdxyi Dxiohs, niꞌchin rñiꞌn loh luꞌh guuyidxyiꞌdxyinee luꞌh laꞌh raꞌ bwiinn chi. 
\p  
\v 5 Naꞌh cañiꞌn loh luꞌh guuyidxyiꞌdxyinee raꞌ luꞌh ba tin gacanee luꞌh dxiaa lastoꞌ raꞌ ba, nee ayi guunn raꞌ ba nin guunn dxiaaba xquelrihn raꞌ ba loh duhlda, nee chechiistoꞌ paꞌca za raꞌ ba xchiꞌdxyi Dxiohs tin gaca gantsiiꞌhi lasaaꞌ raꞌ ba,  
\v 6 ya nuu raꞌ ba laꞌh raꞌ ba guruuꞌn raꞌ dxyiꞌdxyi riiꞌ ya mahzi zeezahnee raꞌ ba dxyiꞌdxyi nin ayi xi lasahca loh xquelrnabwaꞌ Dxiohs.  
\v 7 Xclaaꞌdzi raꞌ ba gaca raꞌ ba bwiinn nin luꞌh naann xlehyi Moisehs, per nin laꞌh raꞌ ba ayi rahcabwaꞌ raꞌ ba nin rñiꞌ raꞌ ba cun nin ruluuꞌyi raꞌ ba cun pasensitiiꞌ. 
\p  
\v 8 Laꞌnuꞌh naann nuꞌh lehyi xteenn Dxiohs lasahca duxan sidela guidiꞌhnn nuꞌh ziga nin rñiꞌpaꞌhn.  
\v 9 Nahpa gacabwaꞌ nuꞌh garaa deeꞌ; lehyi ayi biinlohon para bwiinn zaꞌca raꞌ, sino que para bwiinn raꞌ nin rusahcaloh xlehyi Dxiohs neezaa raꞌ bwiinn raꞌ nin ayi guzoꞌbadxiahga xchiꞌdxyi bwiinn nin rnabwaꞌ raꞌ, bwiinn raꞌ nin ayi ruhnn cweenta laꞌh Dxiohs, bwiinn raꞌ nin ruchiꞌhyi raꞌ, bwiinn raꞌ nin ayi ximportatiiꞌ cohsa raꞌ xteenn Dxiohs cun dxibaaꞌ sino que nin nuu loh guidxyiyuh niꞌchisihn riuuꞌ raꞌ ba, laꞌh bwiinn raꞌ nin rdxiinn xtaada raꞌ ñiꞌh, nin rdxiinn xnaan raꞌ ñiꞌh; neezaa garaa raꞌ nin rdxiin laꞌh raꞌ bwiinn.  
\v 10 Neezaa nin rcahnee tuhbi gunnaꞌh nin ayi naa cheꞌhla ba, neezaa raꞌ bwiinn nin rcahnee laꞌhgahca lasaaꞌ ndxiꞌhw o gunnaꞌh raꞌ ñiꞌh, bwiinn gubaaꞌn, bwiinn raꞌ nin rusaguiꞌhi, bwiinn nadxipadxyiꞌdxyi raꞌ loh dxyiꞌdxyi nin ayi naa guchii; cun neezaa bwiinn raꞌ nin ruhnn xichiꞌhzi dziꞌn nin ayi naa dziꞌn zaꞌca loh Dxiohs.  
\v 11 Ya guelruluuꞌyi zaꞌca riiꞌ nin rdxeela loh dxyiꞌdxyi zaꞌca nin gutaꞌh laꞌh nuꞌh loh duhlda, dxyiꞌdxyi raꞌ riiꞌ nin bacaꞌbi Dxiohs nin nabahan dziꞌtsi dxibaaꞌ naꞌh. 
\s1 Rudiꞌhi Pahblu guel zuxchiilli laꞌh Dxiohs pur nin rahcanee Ñiꞌh laꞌh ba 
\p  
\v 12 Rudiꞌhihn guelzuxchiilli laꞌh Daada Jesucristu xteenn nuꞌh nin runiꞌhi guelrnabwaꞌ naꞌh laasii naann Ñiꞌh guꞌnnahn nin naa xigaaba Ñiꞌh, niꞌchin nin gulii Ñiꞌh naꞌh guꞌnnahn xtsiꞌn Ñiꞌh,  
\v 13 nicala galoh guñiꞌyaan xchiꞌdxyi Jesucristu, nee gucaꞌhnnaꞌhlazahn xpwiinn Ñiꞌh basaꞌcaziiraꞌn ba, per balahsastoꞌ Dxiohs naꞌh laasii ayi rahcabwaꞌn xiñin bwiꞌhnnaꞌhn nee pur nagahdxi chechiistoꞌn xchiꞌdxyi Jesucristu.  
\v 14 Per balaacachiꞌh nin nadziiꞌhi Daada Dxiohs naꞌh bwiꞌhnn Ñiꞌh cumpahñu naꞌh tin gwachiistoꞌn xchiꞌdxyi Ñiꞌh nee tin gantsiiꞌhihn laꞌh Ñiꞌh, nee ziꞌchiza ruhnn Ñiꞌh nnah tin ba nuu nuꞌh tuhsi cun Jesucristu. 
\p  
\v 15 Dxyiꞌdxyi riiꞌ guchii duxan, nahpa chechiistoꞌ tun: Jesucristu biꞌ loh guidxyiyuh tin guhldaꞌh Ñiꞌh laꞌh bwiinn loh duhlda, ya naꞌh mahzi ru naan tuhbi bwiinn duhlda duxa loh raꞌ bwiinn duhlda raꞌ chi,  
\v 16 per ya ziga nin balahsastoꞌ Dxiohs naꞌh ziga guhcaꞌhn bwiinn nin mahzi guyuuꞌ xtuhlda ñiꞌh niꞌchin baluuꞌyiloh xa nazaꞌca duxa naa Jesucristu tin gwaꞌha raꞌ bwiinn nin nagahdxi chechiistoꞌ raꞌ ñiꞌh xchiꞌdxyi Ñiꞌh xa gulii Ñiꞌh naꞌh tin neezaa raꞌ ba gapa raꞌ ba guelnabahan nin ayi ñichilohtiiꞌ sidela guzoꞌbadxiahga raꞌ ba xchiꞌdxyi Ñiꞌh.  
\v 17 Niꞌchin nin nahpa guidiꞌhnn lasahca nuꞌh laꞌh Ñiꞌh cun gaann nuꞌh Ñiꞌh gaduhbi loh nin guibahan nuꞌh nee par tuꞌpazi laꞌh Rehyi nin rnabwaꞌ llaaꞌndxibaaꞌ, Rehyi nin nuu par tuꞌpazi nin nuu nabahan dziꞌtsi dxibaaꞌ, Rehyi nin ayi rwaꞌha loh bwiinn, sino que naa Ñiꞌh tuhbi dxiꞌh Yuꞌbi Dxiohs. Ziꞌchi gaca pwihsi. 
\p  
\v 18 Timoteu, lliiꞌnahn loh ziga riachiistoꞌ nuꞌh xchiꞌdxyi JesuCristu, cagasiaꞌhanneen yiꞌh dziꞌn riiꞌ, nee banaann nuꞌh xi guñiꞌ raꞌ bwihtsi lasaaꞌ nuꞌh loh Jesucristu chiꞌchi, ziga dxyih nin bazeꞌta raꞌ ba nin guhdzi Dxiohs loh raꞌ ba pur yiꞌh. Bazaꞌstoꞌ luꞌh nin guñiꞌ raꞌ ba tin gaca luꞌh ziga tuhbi suldahdu zaꞌca xteenn Jesucristu.  
\v 19 Ayi cweꞌhestoꞌ luꞌh xchiꞌdxyi Dxiohs nahpa chechiiduxatiiꞌ stoꞌ luꞌh xchiꞌdxyi Dxiohs, nee ayi za guunn luꞌh nin naann nuꞌh ayi naa xnehza tin nuu raꞌ bwiinn nin laꞌguleꞌhe stoꞌ ñiꞌh xchiꞌdxyi Dxiohs; niꞌchin nin ayi ru riachiistoꞌ raꞌ ba xchiꞌdxyi Ñiꞌh.  
\v 20 Bwiinn raꞌ chi naa Himeneu cun Alejandru, per laꞌh raꞌ ba batiꞌdxiꞌhn lahtsi naa bwiinndxaaba tin gusiꞌdxi raꞌ ba ayi guiñiꞌyah raꞌ ba xchiꞌdxyi Dxiohs. 
\c 2  
\s1 Pahblu ruluuꞌyi xa cwidxyi-guinaaba bwiinn Dxiohs tin gacanee Ñiꞌh laꞌh raꞌ ba 
\p  
\v 1 Ya nin naa mwergaloh, rñiꞌn nahpa chyu cwidxi-guinaaba loh Dxiohs pur garaa xilla xcweenta raꞌ bwiinn, tin guinaaba raꞌ ba laꞌh Ñiꞌh guuntaaꞌyi Ñiꞌh laꞌh raꞌ ba cun gacanee Ñiꞌh laꞌh raꞌ ba, nee neezaa tin gudiꞌhi raꞌ ba guelzuxchilli nezloh Ñiꞌh pur xcweenta garaa raꞌ bwiinn,  
\v 2 ya nahpa cwidxi-guinaaba za nuꞌh loh Ñiꞌh pur prizdeenta cun guxchisi raꞌ nin rnabwaꞌ raꞌ, tin ziꞌchi guibahan nuꞌh tuhbi guelnabahan nasaa ru, tin guidiꞌhnn nuꞌh nin xclaaꞌdzi Ñiꞌh gaca cun nin naa xnehza para laꞌh raꞌ bwiinn,  
\v 3-4 laasii ziꞌchi riahxi Dxiohs cwidxi-guinaaba tu laꞌh Ñiꞌh nee xnehza zan. Laꞌh Ñiꞌh bataꞌh laꞌh nuꞌh loh duhlda nee xclaaꞌdzi za Ñiꞌh gutaꞌh Ñiꞌh laꞌh garaa raꞌ bwiinn loh duhlda nee tin gacabwaꞌpaꞌca za raꞌ ba xchiꞌdxyi nanchii Ñiꞌh,  
\v 5 laasii nuu tuhsi Dxiohs, nee tuhsi za nin rusiaꞌlda dxyiꞌdxyi nez loh Dxiohs pur laꞌh raꞌ nuꞌh, laꞌh bwiinn chi naa Jesucristu Lliiꞌn Dxiohs nin naa ndxiꞌhw.  
\v 6 Jesucristu biuꞌn Ñiꞌh ntriehgu laꞌhgahca Ñiꞌh loh guelguhchi tin gudxihlli Ñiꞌh xtuhlda garaatiiꞌ nuꞌh ziga dxuu nuꞌh loh guidxyiyuh. Deeꞌ guhca chin guꞌlda dxyih nin gulii Dxiohs tin pur xquelguhchi Jesucristu baluuꞌyi Ñiꞌh gutaꞌh Ñiꞌh garaa raꞌ nuꞌh loh duhlda.  
\v 7 Ya pur deeꞌ gulii Dxiohs naꞌh ziga nin ruluuꞌyi xchiꞌdxyi Ñiꞌh nezloh raꞌ bwiinn, ruluꞌyiꞌhn dxyiꞌdxyi nin guchii xcweenta Ñiꞌh nee naan mwehsu loh raꞌ bwiinn raꞌ nin ayi naa raꞌ bwiinn Israel tin chechiistoꞌ raꞌ ba xchiꞌdxyi Ñiꞌh. Guchiin nin cañiꞌn loh luꞌh, ayi cañiꞌn dxyiꞌdxyi dxixiꞌhw laasii ya naan tuhbi xpwiinn Jesucristu. 
\p  
\v 8 Pwihsi xclaaꞌdzihn garaa lahta loh guidxyiyuh hasta rii raꞌ xpwiinn Dxiohs guiteesa naa raꞌ ba cwidxi-guinaaba raꞌ ba loh Dxiohs, per nahpa gwaꞌhaxgah raꞌ ba gaca nayaa paꞌh lastoꞌ raꞌ ba nee gusaaꞌn raꞌ ba guelnadxyiꞌchi cun guelrdxihndxinee dxyiꞌdxyi cun lasaaꞌ raꞌ,  
\v 9 ya gunnaꞌh raꞌ ayi gacu raꞌ ba lahdxi nin ayi naa xnehza gacu raꞌ xpwiinn Jesucristu tin ayi chiꞌhyi raꞌ ba nez dxiuuꞌstoꞌ raꞌ bwiinn laꞌh raꞌ ba pursi foorma nin gacachaꞌyi yihca raꞌ ba o zuuchaꞌyi duxa raꞌ ba cun cohsa zaꞌca raꞌ ziga ohro, perla raꞌ, o lahdxi zaꞌca.  
\v 10 Mas chaꞌyi chiꞌhyi raꞌ ba nez dxiuuꞌstoꞌ raꞌ bwiinn ziga xcweenta nin rgaꞌha guunn raꞌ ba ziga nin guluuꞌyi naa raꞌ ba xpwiinn Dxiohs,  
\v 11 nee dxyiisi nahpa cwih raꞌ gunnaꞌh loh cultu tin cun guelnadoꞌlaadzi gucaꞌdxiahga raꞌ ba xchiꞌdxyi Dxiohs nin ruluuꞌyi raꞌ ndxiꞌhw.  
\v 12 Ayi za ziꞌguehldahn guluuꞌyi tuhbi gunnaꞌh dxyiꞌdxyi loh garaa raꞌ bwiinn, ayi za nuu ziga guinabwaꞌ raꞌ ba laꞌh raꞌ ndxiꞌhw; mas chaꞌyi dxyiitiiꞌ zoobaa raꞌ ba gucaꞌdxiahga si raꞌ ba,  
\v 13 laasii galoh Adahn bwiꞌhnnchaꞌyi Dxiohs, ya chiꞌchiyi bwiꞌhnn Ñiꞌh laꞌh Eva,  
\v 14 laasii ayi laꞌhdxiꞌh Adahn naa nin bisaguiꞌhi sino que laꞌh Eva bisaguiꞌhi, ya loh nin bisaguiꞌhi ba biaaba ba loh duhlda,  
\v 15 per zilaꞌh raꞌ za gunnaꞌh sidela chuu raꞌ ba loh xtsiꞌn raꞌ ba ziga tuhbi naan, sidela chechiistoꞌ raꞌ ba xchiꞌdxyi Dxiohs nee gantsiiꞌhi lasaaꞌ raꞌ ba, nee sidela chuu si raꞌ ba loh Dxiohs nee gaca za ba tuhbi gunnaꞌh zaꞌca nin rahca rucweꞌza laꞌh gahca ba. 
\c 3  
\s1 Deeꞌ nahpa guunn raꞌ nin rnabwaꞌ 
\p  
\v 1 Deeꞌ naa dxyiꞌdxyi nin guchii: sidela chyuulla tuhbi ndxiꞌhw xclaaꞌdzi gaapa ba dziꞌn xteenn Dxiohs tin gaca ba tuhbi bwiinn dziꞌbaloh loh raꞌ xpwiinn Jesucristu, dziꞌn zaꞌca niꞌchi xclaaꞌdzi ba guunn ba.  
\v 2 Niꞌchin rñiꞌn bwiinn nin xclaaꞌdzi gaca ziga bwiinn dziꞌbaloh nahpa guibahan xnehza ba tin ayi chuu dxyiꞌdxyi nin guiñiꞌyah raꞌ bwiinn laꞌh ba, nee tuhbi si gunnaꞌh gaca cheꞌhla ba. Nahpa gaca za ba tuhbi bwiinn nin rahca rucweꞌza loh xigaaba ñiꞌh, nee suunasiin ba, nee gaca ba tuhbi bwiinn zaꞌca; nee nahpa gaca za ba tuhbi bwiinn nin gudiꞌhi rwaaꞌ yihdzi ñiꞌh dxiaꞌhan tuhbi bwiinn nin zeꞌ zihtu, nee cun nin gahw za bwiinn chi gudiꞌhi za ba, cun gaca za ba tuhbi bwiinn nin naann zaꞌca tin ziꞌchi za zahca guluuꞌyi ba.  
\v 3 Nee ayi gaca za ba tuhbi bwiinn gwaaꞌ, ayi za gaca ba tuhbi bwiinn dxixiꞌhw nin rchaꞌgadxihldxi laꞌh raꞌ bwiinn, ayi za gaca ba tuhbi nin rzaꞌbistoꞌ ñiꞌh guunn gahn mweeyi rooꞌ sino que nahpa gaca ba tuhbi bwiinn nadoꞌlaaꞌdzi,  
\v 4 nee nahpa gahpa ba guelguxchisi zaꞌca yihdzi ba tin ziꞌchi guzoꞌbadxiahga raꞌ lliiꞌn ba xchiꞌdxyi ba nee ayi za gusiaꞌgarii raꞌ bi dxyiꞌdxyi loh ba,  
\v 5 laasii sidela tuhbi bwiinn ayi gaann ba xa guinabwaꞌ ba rwaaꞌ yihdzi ba, ¿xa gaca chiꞌh suuh ba nezloh raꞌ xpwiinn Dxiohs?  
\v 6 Nee ayi za nuu guinabwaꞌ tuhbi bwiinn nin gueꞌdu cagasiꞌdxi ziga naa loh xneziuh Dxiohs, tin ayi nagah guunn ba lligaaba dziꞌbalohtiiꞌ ba loh raꞌ snuhn xpwiinn Dxiohs nee saꞌbi ba loh duhlda gahca nin biaaba bwiinndxaaba,  
\v 7 neezaa nahpa gaca ba tuhbi bwiinn nin ya zaꞌbi dxyiꞌdxyi zaꞌca pur xcweenta gahca ba nezloh raꞌ nin ayi riachiistoꞌ ñiꞌh xchiꞌdxyi Dxiohs tin ayi dxiaꞌhanxtuhyi ba nee tin ayi za dxiaaba ba laꞌn naa bwiinndxaaba. 
\s1 Deeꞌ nahpa guunn raꞌ diaconu raꞌ 
\p  
\v 8 Ziꞌchi za laꞌh raꞌ diaconu raꞌ nahpa gaca raꞌ ba bwiinn nin ya biaꞌñih yihca ñiꞌh nee nahpa guzaꞌloh guunn raꞌ ba dxyiꞌdxyi nin guiñiꞌ raꞌ ba, nee ayi gaca za raꞌ ba bwiinn gwaaꞌ nee ayi za gaca raꞌ ba bwiinn nin saꞌbistoꞌ ñiꞌh gapa mweyi rooꞌ.  
\v 9 Nee nahpa gaca nayaastoꞌ raꞌ ba nee nahpa za gapadziꞌtsi ba dxyiꞌdxyi raꞌ nin baluuꞌyi Dxiohs laꞌh nuꞌh nin naa dxyiꞌdxyi nin riachiistoꞌ nuꞌh.  
\v 10 Nahpa gwaꞌhxgah tu xa nabahan raꞌ bwiinn raꞌ riiꞌ, ya sidela nabahan xnehza raꞌ ba nee ayi chyu cwachi xquelchiah raꞌ ba, zahca gaca raꞌ ba diacono.  
\v 11 Ziꞌchigahca za laꞌh raꞌ gunnaꞌh raꞌ nin xclaaꞌdzi gaca diacona raꞌ nahpa gaca za raꞌ ba bwiinn nin ya guyuuꞌ biaꞌñih yihca ñiꞌh, nee ayi gaca raꞌ ba bwiinn nin ruluuꞌyi laꞌhla dxyiꞌdxyi nin ayi galluꞌyi para laꞌh raꞌ bwiinn sino que gaca raꞌ ba tuhbi bwiinn nin rahca rucweꞌza loh xigaaba ñiꞌh loh nin ayi galluꞌyi nee nahpa gaca za raꞌ ba bwiinn nin ruzaꞌloh xchiꞌdxyi ñiꞌh loh garaatiiꞌ dziꞌn.  
\v 12 Tuhbi bwiinn nin xclaaꞌdzi gaca diaconu tuhsi gunnaꞌh gaca cheꞌhla ba, nee nahpa gahpa za ba guelguxchisi loh raꞌ lliiꞌn ba nee garaa nin nuu rwaaꞌ yihdzi ba,  
\v 13 laasii diaconu raꞌ nin ruhnn zaꞌca xtsiꞌn ñiꞌh zuhnn lasahca cun zantsiiꞌhi za raꞌ snuhn raꞌ bwiinn laꞌh raꞌ ba, ya ziꞌchi mahzi ayi guidxyihbi raꞌ ba guluuꞌyi raꞌ ba ziga riachiistoꞌ raꞌ ba xchiꞌdxyi Jesucristu. 
\s1 Zirooꞌ naa xquelrnabwaꞌ Dxiohs 
\p  
\v 14 Cagacaꞌhn dxyiꞌdxyi riiꞌ loh luꞌh, ya xclaaꞌdzihn dxieꞌlda guiaꞌhahn cuun tu,  
\v 15 per sidela naꞌh gacataꞌhruhn, ya naann luꞌh xa nahpa guibahan nuꞌh lahda raꞌ xpwiinn Dxiohs nin naa xquidoꞌ Dxiohs nin nuu nabahandziꞌtsi llaaꞌndxibaaꞌ. Laꞌh xpwiinn Dxiohs naa nin zeezahnee xchiꞌdxyi Ñiꞌh loh guidxyiyuh riiꞌ, nee rucweꞌza za raꞌ ba loh xigaaba bwiinn raꞌ nin rusaꞌcaloh loh Ñiꞌh.  
\v 16 Ya garaatiiꞌ bwiinn radxyigaaꞌ duxa pur dxyiꞌdxyi nin riachiistoꞌ nuꞌh, nicala nagahn gacabwaꞌ raꞌ ba nin zeeꞌ lohon: 
\q1 Dxiohs biꞌ loh guidxyiyuh ziga tuhbi bwiinn, ya guñiꞌ Spíritu Saantu Dxiohs ayi xi xtuhlda Jesucristu guyuuꞌ loh Dxiohs, 
\q1 nee bwaꞌha za xaanjla Dxiohs loh Ñiꞌh, nee bidiꞌchi xchiꞌdxyi Ñiꞌh loh guidxyiyuh, 
\q1 nee garaa za lahta guidxyiyuh gwachiistoꞌ raꞌ bwiinn xchiꞌdxyi Ñiꞌh 
\q1 ya gubiaꞌgarii Ñiꞌh loh guelñaꞌñih xteenn Dxiohs nez llaaꞌndxibaaꞌ. 
\c 4  
\s1 Bwiinn raꞌ nin rreꞌcaa loh xneziuh zaꞌca Dxiohs 
\p  
\v 1 LaꞌSpíritu Saantu guñiꞌ chin gueꞌdu gadzihn dxyih nin guibiaꞌgarii Jesucristu, chuu raꞌ bwiinn nin cweꞌhecaa xchiꞌdxyi Dxiohs, ya chenaꞌhla raꞌ ba xchiꞌdxyi spíritu raꞌ nin rusaguiꞌhi cun neezaa chenaꞌhla raꞌ ba garaa dxyiꞌdxyi nin ruluuꞌyi bwiinndxaaba.  
\v 2 Pwihsi ziuuꞌ raꞌ bwiinn raꞌ nin guiñiꞌ dxyiꞌdxyi xihn nin rusaguiꞌhi laasii ayi ru galluꞌyi xigaaba raꞌ ba, laasii zahca loh xquelrihn raꞌ ba zigazi hasta rcaꞌdxih dxiꞌba ldaꞌh nin rucaꞌh dxiehrru, ya ayi ru xi gacabwaꞌ raꞌ ba.  
\v 3 Bwiinn raꞌ squiiꞌ ziñiꞌ za raꞌ ba ayi nuu guchinaa bwiinn, nee zuluuꞌyi za raꞌ ba ayi nuu gahw raꞌ bwiinn garaaloh, nicala Dxiohs gulahchi garaa raꞌ guelwahw riiꞌ para gahw raꞌ bwiinn nin naa xpwiinn Ñiꞌhn tin sola gudiꞌhi raꞌ ba guelzuxchilli loh Ñiꞌh,  
\v 4 laasii garaa nin bwiꞌnnchaꞌyi Dxiohs naa raꞌn cohsa zaꞌca para laꞌh nuꞌh nee ayi rgaꞌha cweꞌhestoꞌ nuꞌh nin rachidaꞌw nuꞌh chin radiꞌhi nuꞌh guelzuxchiilli laꞌh Xtaada Dxiohs nuꞌh,  
\v 5 laasii xchiꞌdxyi Dxiohs runntaaꞌyi garaatiiꞌ nin ridaꞌw nuꞌh chin radiꞌhi nuꞌh guelzuxchiilli loh Ñiꞌh pur guelwahw chi. 
\s1 Tuhbi bwiinn nin guunn zaꞌca xtsiꞌn Jesucristu 
\p  
\v 6 Sidela yiꞌh gusazaꞌ luꞌh stoꞌ bwihtsi raꞌ nuꞌh garaa raꞌ dxyiꞌdxyi raꞌ riiꞌ, zahca luꞌh tuhbi mooza zaꞌca xteenn Jesucristu, tin ziꞌchi ziuuꞌnabahan lastoꞌ luꞌh cun garaa xchiꞌdxyi zaꞌca xteenn Jesucristu nee cun guelrluuꞌyi zaꞌca xteenn Ñiꞌh nin zenaꞌhla luꞌh.  
\v 7 Per ayi guzoꞌbadxiahga luꞌh xchiꞌdxyi raꞌ bwiinn ñuꞌxa raꞌ cun ziga cweenta nin rdxiꞌnlaadzi raꞌ ba; mas chaꞌyi gusiꞌdxi luꞌh xa guzuhdziꞌtsi lastoꞌ luꞌh loh xchiꞌdxyi Dxiohs.  
\v 8 Laasii ziga nin ruñiꞌbi tihxi bwiinn tin gaca naguihdzin, gulliaaꞌyiꞌhn naa niꞌchi, per zirooꞌ ru lasahca cuꞌchaꞌyi ba xchiꞌdxyi Dxiohs laꞌn lastoꞌ ba laasii dee nalluꞌyi loh xquelnabahan nuꞌh nnah nee loh guelnabahan nin gueꞌdu gadzihn.  
\v 9 Deeꞌ naa dxyiꞌdxyi nin guchii rgaꞌha chechiistoꞌ garaatiiꞌ tu.  
\v 10 Pur xchiꞌdxyi Dxiohs ridiꞌhnn nuꞌh dziꞌn nee neezaa cagatiꞌdxiloh nuꞌh loh guelrzaꞌcazii laasii cabweeza nuꞌh Yuꞌbi Dxiohs nin nuu nabahan dziꞌtsi llaaꞌndxibaaꞌ nin xclaaꞌdzi guhldaꞌh laꞌh garaatiiꞌ raꞌ bwiinn per sola zuldaꞌh Ñiꞌh laꞌh raꞌ bwiinn raꞌ nin riachiistoꞌ ñiꞌh xchiꞌdxyi Ñiꞌh. 
\p  
\v 11 Garaa dxyiꞌdxyi raꞌ rii nahpa guinabwaꞌ luꞌh guzoꞌbadxiahga raꞌ ban, neezaa guluuꞌyi luꞌh dxyiꞌdxyi raꞌ riiꞌ.  
\v 12 Nahpa chiꞌhyi luꞌh xa guiñiꞌ luꞌh nee xa guunn xnehza luꞌh, nee gantsiiꞌhi luꞌh chyuchiꞌhzi bwiinn, cun chechiistoꞌ luꞌh xchiꞌdxyi Dxiohs gaduhbi stoꞌ luꞌh nee guibahan nayaa luꞌh tin guluuꞌyi luꞌh laꞌh raꞌ bwiinn nin riachiistoꞌ ñiꞌh xchiꞌdxyi Dxiohs xa guunn raꞌ ba tin ayi cweꞌhestoꞌ raꞌ ba yiꞌh pur nin naa luꞌh biiꞌhin.  
\v 13 Ya gaduhbi nin gadzihnaꞌhn, biꞌlda xchiꞌdxyi Dxiohs loh raꞌ bwihtsi lasaaꞌ raꞌ nuꞌh cun guiñiꞌnee luꞌh laꞌh raꞌ ba cun neezaa baluuꞌyi xchiꞌdxyi Dxiohs laꞌh raꞌ ba.  
\v 14 Ayi gusaaꞌn luꞌh guelrahcabwaꞌ raꞌ nin baniꞌhi Dxiohs yiꞌh chin badziiꞌba naa raꞌ bwiinn guhla xteenn xquidoꞌ Jesucristu yihca luꞌh. 
\p  
\v 15 Nee guillii-guillii basazaꞌstoꞌ luꞌh garaa xchiꞌdxyi Dxiohs gaduhbi stoꞌ luꞌh tin gwaꞌhaloh raꞌ bwihtsi raꞌ nuꞌh xa zeezahnee luꞌh garaa xchiꞌdxyi Dxiohs.  
\v 16 Nee gohpa dziꞌtsi za yiꞌh gahca nee neezaa dxyiꞌdxyi nin ruluuꞌyi luꞌh; laasii sidela sudziꞌtsi luꞌh loh garaa raꞌ dxyiꞌdxyi riiꞌ zilaꞌh luꞌh loh duhlda nee zilaꞌh za raꞌ bwiinn nin gucaꞌdxiahga dxyiꞌdxyi raꞌ nin guluuꞌyi luꞌh. 
\c 5  
\s1 Xa nahpa guibahannee nuꞌh laꞌh raꞌ nin naa raꞌ xpwiinn Jesucristu 
\p  
\v 1 Ayi cwidxaaꞌ luꞌh loh tuhbi bwiinn guhla; mas chaꞌyi guiñiꞌnee luꞌh ba cun dxyiꞌdxyi naguꞌdziꞌn ziga zi tuhbi xtaada luꞌh, ya nin naa raꞌ biiꞌhin, bwiꞌhnn laꞌh raꞌ bi ziga zi tuhbi bwihtsi luꞌh,  
\v 2 ya bwiinn guhla gunnaꞌh bwiꞌhnn laꞌh raꞌ ba ziga zi tuhbi xnaan luꞌh ya ziꞌchi za dxaꞌpa raꞌ bwiꞌhnn za laꞌh raꞌ bi ziga zi tuhbi bizaaꞌn luꞌh pur lligaaba zaꞌca bwiinn cun gaduhbi stoꞌ luꞌ. 
\p  
\v 3 Nee badiꞌhi za nin xchiꞌhn raꞌ gunnaꞌh biuhda nin guchii naa biuhda,  
\v 4 per sidela laꞌh tuhbi biuhda nuu lliiꞌn ba o llahga ba, mahzi gusiꞌdxixgah raꞌ lliiꞌn ba xa gacanee raꞌ bi laꞌh ba laasii bachiooꞌ ba laꞌh raꞌ bi nee squiiꞌ riuuꞌstoꞌ Dxiohs guunn bwiinn raꞌ laasii naan xnehzazan.  
\v 5 Ya gunnaꞌh nin guchii biaꞌhan biuhda nin ba biaꞌhan tuhsi ñiꞌh bwiinn chi sola radxiꞌsi ba laꞌh Dxiohs tin gudiꞌhi Ñiꞌh xi gahw ba nee dxyih-nagueꞌla rbwihdxi-rnaaba ba loh Ñiꞌh,  
\v 6 per gunnaꞌh biuhda raꞌ nin nabahannee lligaaba dxaaba ayi guunn luꞌh cweenta niꞌchi laasii naa ba ziga nin ya bigaꞌtsitiiꞌ loh duhlda.  
\v 7 Guhdzi garaa dxyiꞌdxyi raꞌ riiꞌ loh raꞌ ba tin ayi chyu cwachi xquelchiah raꞌ ba.  
\v 8 Sidela nuu chyuulla tuhbi nin ayi gacanee laꞌh bwiinn lasaaꞌ gahca ba, bwiinn raꞌ nin nuu rwaaꞌ yihdzi raꞌ ba, pwihsi bwiinn chi naa ba tuhbi bwiinn nin zirooꞌ ru duhlda nahpa loh tuhbi bwiinn nin ayi riachiistoꞌ ñiꞌh xchiꞌdxyi Dxiohs. 
\p  
\v 9 Nee cun sola gucaꞌh luꞌh lah raꞌ biuhda nin nuu sesenta yihza par delanta loh dxihtsi nee sidela guhpa raꞌ za ba tuhsi ndxiꞌhw ya ziꞌchi zahca gacanee tu laꞌh ba.  
\v 10 Nahpa gwaꞌha luꞌh sidela riuuꞌnbwaꞌ bwiinn laꞌh ba pur dziꞌn zaꞌca nin ruhnn ba nee sidela guhca za ba tuhbi guzahn nin baluuꞌyi zaꞌca laꞌh raꞌ lliiꞌn ñiꞌh xa guibahan zaꞌca raꞌ bi, nee sidela za guhca ba tuhbi bwiinn zaꞌca duxa cun garaa raꞌ bwiinn nin gwaguiaꞌha cuun ba, cun sidela cayahcanee ba laꞌh garaa bwiinn ziga ruluuꞌyi xchiꞌdxyi Dxiohs guidiꞌhnn nuꞌh cun bwihtsi lasaaꞌ raꞌ nuꞌh nee cun sidela za batiꞌdxilohnee za ba trabahjw laꞌh raꞌ nin cagatiꞌdxiloh guelrzaꞌcazii neezaa sidela riuuꞌ ba ruhnn ba garaatiiꞌ dziꞌn zaꞌca. 
\p  
\v 11 Ya biuhda nin naa biiꞌhin, ayi gucaꞌh luꞌh lah ba loh dxihtsi laasii chin guiclaaꞌdzi raꞌ ba guicaꞌha raꞌ ba ndxiꞌhw zibweꞌhestoꞌ raꞌ ba dxyiꞌdxyi nin biaꞌhan raꞌ ba nez loh Jesucristu laasii guiclaaꞌdzi raꞌ ba guchinaa raꞌ ba stuhbi,  
\v 12 ya ziꞌchi ziuuꞌ xtuhlda raꞌ ba laasii rbweꞌhestoꞌ raꞌ ba dxyiꞌdxyi raꞌ nin biaꞌhandxyiꞌdxyi raꞌ ba loh Dxiohs chin bwiꞌhnn raꞌ ba lligaaba ñiuuꞌ raꞌ ba loh xtsiꞌn Dxiohs.  
\v 13 Nee ayi dee si dxiꞌh, sino que neezaa riiꞌ-riꞌchi yihdzi bwiinn caꞌnzaa ba nee ayi cayaaꞌlla si dxiꞌh ba sino que nee caꞌnyuuꞌyi ba dxixiꞌhw cun cañiꞌ za ba dxyiꞌdxyi nin ayi galluꞌyi loh xquelrnabwaꞌ Dxiohs.  
\v 14 Niꞌchin rñiꞌn mas chaꞌyi guchinaa raꞌ gunnaꞌh biuhda biiꞌhin raꞌ stuhbi tin chuu lliiꞌn raꞌ ba nee cwih raꞌ ba rwaaꞌ yihdzi raꞌ ba tin ziꞌchi ayi xa gapa bwiinn xiilla dxyiꞌdxyi nin cwachi raꞌ ba xquelchiah xpwiinn Jesucristu,  
\v 15 laasii nuu gunnaꞌh biuhda nin laꞌ biriaꞌcaa loh xneziuh Dxiohs ya zenaꞌhla raꞌ ba bwiinndxaaba. 
\p  
\v 16 Sidela nuu tuhbi gunnaꞌh nin naa lasaaꞌ nuꞌh loh xneziuh Jesucristu ya nahpa gaꞌh ba tuhbi lasaaꞌ ba nin naa gunnaꞌh biuhda, nahpa ba pur gacanee ba laꞌh biuhda chi tin ziꞌchi ayi gaca ziahan xtsiꞌn bwiinn guidoꞌ nee tin ziꞌchi zahca gacanee bwiinn guidoꞌ laꞌh nin guchii naa gunnaꞌh biuhda. 
\p  
\v 17 Bwiinn guhla raꞌ nin rahpa dziꞌtsi xquidoꞌ Jesucristu nahpa gudiꞌhi tu nin guichiꞌhn raꞌ ba nee squiiꞌ gahca za gacanee tu laꞌh raꞌ nin ruuꞌyidxyiꞌdxyi zaꞌca cun laꞌh raꞌ za nin rusiꞌdxi zaꞌca xchiꞌdxyi Dxiohs laꞌh raꞌ bwiinn,  
\v 18 laasii caa loh xchiꞌdxyi Dxiohs squiiꞌ: “Ayi cuu luꞌh dxihxi lliiꞌ guun chin rdxyihchi ma trihgu”, neezaa: “Bwiinn nin ruhnn dziꞌn rgaꞌha gahlla ba.” 
\p  
\v 19 Ayi gucaꞌdxiahga luꞌh xchiꞌdxyi tuhbi bwiinn nin rcaꞌhchiah xcweenta xtuhlda tuhbi bwiinn guhla sidela ayi chiohpa o chohnna bwihtsi lasaaꞌ raꞌ nuꞌh nin bwaꞌha gu guchii guyuuꞌ xtuhlda bwiinn guhla chi,  
\v 20 ya bwiinn raꞌ nin zeezah cayahca bwiinn duhlda, rahlda guiñiꞌnee luꞌh ba loh raꞌ bwiinn xquidoꞌ Crixtu tin ziꞌchi neezaa laꞌh raꞌ ba guidxyihbi raꞌ ba tin ayi nee raꞌ ba guunn raꞌ ba cohsa duhlda.  
\v 21 Loh Dxiohs cun loh Daada Jesucristu, cun neezaa loh garaa raꞌ aanjla nin gulii Dxiohs, rucaꞌbiꞌhn yiꞌh chezahnee luꞌh garaa raꞌ dxyiꞌdxyi raꞌ riiꞌ tin ayi guunn luꞌh guriin-guriin cun cada tuhbi bwiinn sola guunn luꞌh nin naa tuhbiloh loh garaa raꞌ bwiinn.  
\v 22 Ayi gusiooba lastoꞌ luꞌh gudziiꞌbanaa luꞌh yihca nin tuhbi bwiinn tin guunn ba xtsiꞌn Dxiohs sidela gueꞌdu cagasiꞌdxi ba xa guibahan xnehza ba loh xneziuh Dxiohs tin ayi nagah guicaꞌha luꞌh xtuhlda stuhbi bwiinn, sino que gudxiꞌhyi nez ayi chuu luꞌh loh duhlda. 
\p  
\v 23 Nee ayi ru guee luꞌh ganaalla ñihsa, sino que gwaaꞌ za tuhbi biꞌtuꞌhn vihnnu laasii pur nin riin luꞌh stoꞌ luꞌh nee pur nin ziahan rahcalluꞌhu luꞌh. 
\p  
\v 24 Nuu raꞌ bwiinn nin nayaatiiꞌ rluuꞌyi xtuhlda raꞌ ba galoh nin guunn Dxiohs guelguxchisi pur xtuhlda raꞌ ba, ya snuhn raꞌ ba ayi rluuꞌyi raꞌpaꞌh ba xtuhlda raꞌ ba per nahpaa zuluuꞌyiloh raꞌn.  
\v 25 Ziꞌchi gahca za dziꞌn zaꞌca nin ruhnn bwiinn, nuu raꞌn nin ñaꞌñih rluuꞌyiloh, per dziꞌn zaꞌca nin ayi ñaꞌñih rluuꞌyilohon ayi nuu chuulaꞌnan par tuꞌpazi sino que zadzihn dxyih nin zuluuꞌyiloh raꞌn. 
\c 6  
\p  
\v 1 Garaa raꞌ xpwiinn Dxiohs nin ruhnn xtsiꞌn bwiinn nahpa gucaꞌdxiahga raꞌ ba xchiꞌdxyi xballwaꞌn raꞌ ba tin ayi chyu guiñiꞌyah laꞌh Dxiohs nin raluuꞌyi nuꞌh xchiꞌdxyi Ñiꞌh.  
\v 2 Sidela nuu raꞌ mooza nin naa xballwaꞌn ñiꞌh tuhbi nin riachiistoꞌ ñiꞌh xchiꞌdxyi Dxiohs, ayi cweꞌhestoꞌ raꞌ ba xchiꞌdxyi ba laasii naa ba bwihtsi ba loh xneziuh Jesucristu. Niꞌchin mas chaꞌyi guunnzaꞌca ru raꞌ ba xtsiꞌn bwiinn chi laasii naa ba tuhbi lasaaꞌ raꞌ ba loh xneziuh Daada Jesucristu, nee nadziiꞌhi Ñiꞌh laꞌh ballwaꞌn chi nin cayuhnn mooza chi xtsiꞌn ñiꞌh. Dxyiꞌdxyi raꞌ riiꞌ nahpa guluuꞌyi luꞌhn nee nahpa squiiꞌ za guiñiꞌnee luꞌh bwiinn. 
\s1 Guelnabahan nayaa xteenn Dxiohs cun guelñaꞌñih nin runiꞌhi Ñiꞌh laꞌn lastoꞌ raꞌ nuꞌh 
\p  
\v 3 Sidela nuu chyu bwiinn nin ruluuꞌyi guriinca dxyiꞌdxyi nin ayi naa dxyiꞌdxyi zaꞌca ziga naa xchiꞌdxyi Jesucristu neezaa nin ayi naa ziga dxyiꞌdxyi nin guchii nin ruluuꞌyi xa nahpa guibahan nuꞌh,  
\v 4 bwiinn chi rdxiꞌhyi ba xa gaca lasahca ba laꞌhgahca ba nee naa ba tuhbi nin ayi gaanntiiꞌ. Ziga tuhbi gueldxyihdxyi naa guelrnaabadxyiꞌdxyi cun guelrdxihndxi dxyiꞌdxyi nin nuu yihca ba, ya loh chi riinloh envidia, dxixiꞌhw, dxyiꞌdxyinah, nee cun ziga rwaꞌha dxaaba za bwiinn loh lasaaꞌ raꞌ ba,  
\v 5 ya lligaaba raꞌ riiꞌ rusaꞌbin laꞌh raꞌ bwiinn loh dxixiꞌhw nin ayi chaꞌlohtiiꞌ laasii ayiru riaꞌñih loh xigaaba raꞌ ba, niꞌchin bwiinn raꞌ chi ayiru rdxaꞌgastoꞌ raꞌ ba dxyiꞌdxyi zaꞌca, laasii bwiinn raꞌ chi sola rdxiꞌhyi raꞌ ba canehza guunn raꞌ ba gahn mweeyi rooꞌ yihca xchiꞌdxyi Dxiohs. Niꞌchin mas chaꞌyi biriaꞌcaa loh raꞌ bwiinn squiiꞌ laasii ayi nazaꞌca xquelrihn raꞌ ba.  
\v 6 Cun sola guibahan nayaa nuꞌh cun cwidxyiistoꞌ nuꞌh pur nin nahpa si nuꞌh, deeꞌ raꞌ sihn lasahca duxa,  
\v 7 laasii ayi chyu xi bioꞌpanee loh guidxyiyuh riiꞌ chin guulaa nuꞌh, ya ziꞌchiza ayi gaca xi chonee nuꞌh chin gachi nuꞌh,  
\v 8 per sidela nidxiaapaa nuꞌh xi guidaꞌw nuꞌh, cun nuu za xahba nuꞌh nin guidxiaacu nuꞌh; cun deeꞌ raꞌ dxiahxi nuꞌh,  
\v 9 per ya nin xclaaꞌdzi raꞌ gapa ziahan mweyi, riaaba raꞌ ba loh naa bwiinndxaaba nee rzaꞌbistoꞌ raꞌ ba nin ayi galluꞌyi, cun nin rusaꞌcazii si laꞌh bwiinn,  
\v 10 laasii guelrucaꞌhstoꞌ ñiꞌh mweeyi naa xtulbaaꞌ garaaloh guelnadxaaba, nee nuu za bwiinn nin xclaaꞌdzi duxa gapa mweeyi ya xchiꞌdxyi Dxiohs rusaaꞌn si raꞌ ban ya ziꞌchi nugasiꞌnaaꞌha ru guelzii laꞌh bwiinn chi loh xquelnabahan ba. 
\s1 Dziꞌn zaꞌca xteenn ziga riachiistoꞌ raꞌ bwiinn xchiꞌdxyi Dxiohs 
\p  
\v 11 Per yiꞌh ziga naa luꞌh tuhbi xpwiinn Dxiohs, biriaꞌcaa loh garaa raꞌ deeꞌ tin guibahan nayaa luꞌh nee tin sah luꞌh gahxu loh Dxiohs. Ayi cweꞌhestoꞌ luꞌh xchiꞌdxyi Ñiꞌh, nee nahpa za gucaꞌhstoꞌ luꞌh laꞌh Ñiꞌh gaduhbistoꞌ luꞌh. Ayi guiriaꞌhgahn luꞌh, nee gaca nadoꞌlaadzi luꞌh.  
\v 12 Nee bwiꞌhnn duxa za dziꞌn pur xcweenta ziga riachiistoꞌ luꞌh laꞌh Jesucristu, nee gunaꞌzu dziꞌtsi guelnabahan nin naa par tuꞌpazi. Niꞌchin gudihdxyi Dxiohs yiꞌh, pwihsi laꞌluꞌh guñiꞌla riachiistoꞌ luꞌh xchꞌdxyi Dxiohs nezloh ziahan raꞌ bwiinn tin niꞌchin ya naannchaꞌyi raꞌ ba.  
\v 13 Yannah rucaꞌbiꞌhn yiꞌh loh Dxiohs nin rudiꞌhi guelnabahan laꞌh garaa nin nuu loh guidxyiyuh riiꞌ, neezaa Daada Jesucristu xteenn nuꞌh nin ayi bidxyihbi guñiꞌ dxyiꞌdxyi niin naa guchii loh Ponciu Pilahtu;  
\v 14 pwihsi nez delanta loh Ñiꞌh cañiꞌn guzoꞌbadxiahga luꞌh garaa dxyiꞌdxyi nin cañiꞌn loh luꞌh, ayi guchaꞌhluꞌhn tin ayi chyu bwiinn guiñiꞌyah pur yiꞌh; ziꞌchi gwahzah bwiꞌhnn hastayi chin guigaꞌha gadzihn dxyih nin guibiaꞌgarii Daada Jesucristu xteenn nuꞌh.  
\v 15 Zadzihn dxyih chi nin ya guñiꞌ Dxiohs dxieꞌnee Ñiꞌh guelguxchisi loh guidxyiyuh laasii laꞌhdxiꞌh Ñiꞌh naa Ñiꞌh Dxiohs, naa Ñiꞌh Rehyi loh garaa raꞌ rrehyi, nee laꞌhsi za Ñiꞌh naa Ñiꞌh nin rnabwaꞌ loh raꞌ nin rnabwaꞌ.  
\v 16 Tuhbidxiꞌh laꞌh Ñiꞌh naa Dxiohs nin ayi rahchitiiꞌ, nee tuhbidxiꞌh za laꞌh Ñiꞌh nuu Ñiꞌh loh tuhbi biaꞌñih nin ayi chyu nuutiiꞌ chebiiga. Nin tuhbi ndxiꞌhw ayi rwaꞌha laꞌh Ñiꞌh nee nin ayiza gwaꞌha raꞌ ba laꞌh Ñiꞌh. Laꞌhsi Ñiꞌh gachidiꞌhnn lasahca nuꞌh nee laꞌhsi Ñiꞌh nahpa guelrnabwaꞌ par tuꞌpazi. Ziꞌchi gaca pwihsi. 
\p  
\v 17 Ya garaa raꞌ bwiinn nin naa rricu loh guidxyiyuh riiꞌ guñiꞌ loh raꞌ ba ayi guunn nayachi raꞌ ba, nee ayiza gucaꞌhstoꞌ raꞌ ba guelrricu chi laasii ayi dxiaꞌhan dziꞌtsi niꞌchi. Mas chaꞌyi chechiistoꞌ raꞌ ba xchiꞌdxyi Dxiohs laasii laꞌh Ñiꞌh nuu nabahan dziꞌtsi Ñiꞌh ya laꞌh Ñiꞌh ruluuꞌyi Ñiꞌh garaatii xixteenn nuꞌh nee nin rchiꞌhn nuꞌh tin dxiahxi lastoꞌ nuꞌh.  
\v 18 Guñiꞌnee laꞌh raꞌ ba tin gaca raꞌ ba tuhbi rricu loh dziꞌn zaꞌca pur xchiꞌdxyi Dxiohs, nee ayi dxiaa za raꞌ ba xixteenn raꞌ ba tin chiꞌzi raꞌ ban,  
\v 19 tin ziꞌchi gapa raꞌ ba guelnazaꞌca nin guzuh dziꞌtsi laꞌh raꞌ ba chin dxiꞌ Jesucristu, tin guinaꞌzu dziꞌtsi raꞌ ba guelnabahan par tuꞌpazi. 
\s1 Lulchima dxyiꞌdxyi para Timoteu 
\p  
\v 20 Timoteu, guluꞌchaꞌyi dziꞌtsi garaa nin bigaꞌbi luꞌh guunn luꞌh, ayi guzoꞌbadxiahga luꞌh dxyiꞌdxyi raꞌ nin ruuꞌyidxyiꞌdxyi raꞌ bwiinn guidxyiyuh, nee cun dxyiꞌdxyi raꞌ nin ayi xi galluꞌyi, nee neezaa dxyiꞌdxyi rusaguiꞌhi raꞌ nin rñiꞌ raꞌ ba naa guelnaannpaꞌh.  
\v 21 Ya bwiinn raꞌ nin zeezahnee dxyiꞌdxyi guelnaann raꞌ rii, bwiinn raꞌ chi rbweꞌhestoꞌ raꞌ ñiꞌh xchiꞌdxyi Jesucristu. 
\p Dxiohs gacanee yiꞌh.