\id TIT  
\h Tito 
\toc1 CART DANꞋ BZOJ POSTLW SAN PABLO C̱HE TITO 
\toc2 Tito 
\toc3 Tit. 
\mt1 CART DANꞋ BZOJ POSTLW SAN PABLO C̱HE TITO 
\c 1  
\s1 Pablon' bzoje' cart nga 
\p  
\v 1 Neda' Pablo chona' xšin Diosen' na' naca' postlw c̱he Jesucriston' cont gaclena' beṉe' ca' gwlej Diosen' yesejnilaže'ne', cont yeseṉezde' can' ža diža' ḻi c̱he Diosen'. Na' diža' ḻi c̱hen' chzejni'in can' goncho da' chazlaže',  
\v 2 na' chzejni'in zoacho lez šjayzoacho len Diosen' toḻi tocaṉe. Za' x̱e yežlion' Diosen' gwne' beṉe' yesejnilaže' ḻe' šjasyenite' len ḻe' toḻi tocaṉe, na' Diosen' bi chonḻaže' bite'teze da' že'.  
\v 3 Na' ṉa'a ba chac da' bžie' bia' gac da' ba chzejni'ida' beṉe' xtižen', ḻe Dios ben' noṉe' yeḻa' mban c̱hecho toḻi tocaṉe gwlo'e ḻo na' chyix̱jue'eda' beṉe' xtižen'.  
\v 4 Chzoja' le' Tito, naco' ca dogualje xi'iṉa' da' bzejni'ida' le', na' naccho txen chejnilaže'cho Jesucriston'. X̱acho Diosen' na' X̱ancho Jesucriston' ben' noṉe' yeḻa' mban c̱hecho toḻi tocaṉe yesaclenšque' le'e na' yesyeyaše'de' le'e na' yesone' cont soa cuezle binḻo len xbab c̱helen'. 
\s1 Da' chon Titon' gan' nzi' Creta 
\p  
\v 5 Cate' bocua'aṉa' le' gan' zoa yežlio da' nzi' Creta dan' chi' ḻo nisdaon', gwnia' gwzožo' gono' dan' chona' cate' gwzoa' na', to to yež cuejo' beṉe' blao beṉe' yosozejni'i na' yosogüia yeseṉe'e yezica'chle beṉe' chesejnilaže' Jesucriston'.  
\v 6 Na' še zoa beṉe' zoacze' chone' da' güen cont bibi de da' yosode'e beṉe' yesene' da' xiṉjen' chone', še naque' beṉe' zoa toz no'ol c̱he', še xi'iṉe' ca' chesejnilaže' Criston', na' še bi zjanaque' beṉe' chesyedabaga', san chosozenague' cont bi zjalaže' chesone' da' xiṉj, ca beṉe' nac ca' cheyaḻa' cuejo' güia ṉa' ḻježe'.  
\v 7 Cate' cuejo' beṉe' co' Diosen' ḻo ne'e güia ṉe'e yezica'chle beṉe' chesejnilaže' Jesucriston', cuejo' beṉe' zoacze' chone' güen. Bi cuejo' beṉe' ya'laže', beṉe' naque' beṉe' loc, na' beṉe' borrašw. Bi cuejo' beṉe' chebede' cueque' žaš, na' ṉeca cuejo' beṉe' zelaže' gone' da' xiṉj cont gone' gan mechw.  
\v 8 Beṉe' cuejo' cheyaḻa' gaque' beṉe' chbede' chlebe' beṉe' zito' ližen'. Cheyaḻa' gaque' beṉe' zoateze' chone' da' güen na' beṉe' chon xbab, beṉe' chon da' zej to ḻicha, beṉe' chon da' chazlaže' Diosen' na' beṉe' chon con ga zelao chzaque'de' cont chone' bi da' ža Diosen'.  
\v 9 Cheyaḻa' gaque' beṉe' zoac̱hac̱he' do laže' chzenague' diža' ḻi c̱he Diosen' da' bzejni'ida' cont gac gwzejni'ide' beṉe' yoble diža' güenṉa', na' gone' c̱hac̱hlaže' cont yesenite' yesejḻe'e da' naquen da' ḻi, na' gac gwlo'ede' beṉe' ca' cheseṉe' contr diža' ḻi c̱he Diosen' cont yeseṉezde' clelen' chesone'. 
\p  
\v 10 Chnia' gono' ca', ḻe nita' beṉe' zan beṉe' Israel gualaž c̱hia' na' yebaḻ beṉe' yoble chesene' zjanaque' chio' txen, perw bi chosozenague' c̱he Diosen'. Bibi zaca' xtiža'gaque' da' chosozejni'ide', con chesonḻede' beṉe'.  
\v 11 Na' da' zjachi' yic̱hjgaque' yesone' gan mechw, da'nan' chosozejni'ide' da' zej clele. Cheyaḻa' gonḻe cont yesenite' šize bich yosozejni'ide' diža' güenḻažen', ḻe clelen' chesone'. Na' beṉe' zan len beṉe' ḻo' yo'o c̱hegaque' chesacžejlaže' c̱he xtiža' Diosen' ṉec̱he xtiža'gaquen'. 
\p  
\v 12 Cana' gwzoa to beṉe' gwṉeya'a, goque' beṉe' Creta, na' gwne' c̱he beṉe' gualaž c̱he' ca': “Beṉe' Creta bate'teze zjanaque' beṉe' güenḻaže' na' zjanaque' ca bež znia' yeḻa' güen da' xiṉj c̱hegaquen'. Ḻecze zjanaque' beṉe' lia na' beṉe' xagüed.”  
\v 13 Na' da' ḻi can' gwnen'. Da'nan' tiḻo' ḻegaque' c̱he da' xiṉjen' chesonen' cont ṉita'c̱hac̱he' yesejḻe'e xtiža' Criston'.  
\v 14 Gono' ca' cont bich yosozenague' c̱he diža' güenḻažen' chesaljlaže' beṉe' Israel gualaž c̱hia' ca', na' ṉeca yosozenague' c̱he nochle beṉe' ba gosebejyic̱hje' diža' ḻi c̱he Diosen'. 
\p  
\v 15 Diosen' ba none' yic̱hjlažda'ochon' xilaže', na' ṉe da' chagwcho ṉe da' chox̱e'cho bi chžonen gac yic̱hjlažda'ochon' xilaže'. San ca nac beṉe' yic̱hjlaždao' mal ca', beṉe' bi chesejnilaže' Criston', bibi de da' naquen da' xilaže' len ḻegaque'. Chesone' xbab mal, na' bibi de cheseza'laže' cate' chesone' da' xiṉjen'.  
\v 16 Chesene' zjanombi'e Diosen', perw nacbia' bi zjanombi'ene', ḻe chesonteze' da' xiṉjen'. Chesone' da' chgue'e Diosen'; zjanaque' beṉe' güedenag len xtižen' na' bi chesac yesone' da' güen. 
\c 2  
\s1 Xtiža' Diosen' da' chsed chlo'echo beṉe' naquen güen 
\p  
\v 1 Na' le', cheyaḻa' gwzejni'ido' beṉe' yesone' can' ža diža' ḻi c̱he Diosen'.  
\v 2 Bzejni'i beṉe' byo gol ca' bi yesezožde', san yesenite' cont beṉe' yezica'chle yesape' ḻegaque' bala'aṉ. Bzejni'i ḻegaque' to toe' cheyaḻa' yesenabia' cuine' cont yesenite' yesone' da' güen, na' bzejni'i ḻegaque' cheyaḻa' yesenita'c̱hac̱he' yesejnilaže' Diosen'. Cheyaḻa' yesacde' beṉe' na' yesape' yeḻa' chxenḻaže' bite'teze da' chac.  
\v 3 Ḻecze ca' bzejni'i no'ol gole ca' cont yesenite' yesonxene' Diosen', na' bi yeseṉe' c̱he beṉe', ṉeca yesezožde'. Cheyaḻa' yesenite' yesone' da' güen cont yeseṉeze beṉe' yezica'chle can' cheyaḻa' yesone'.  
\v 4 Na' no'ol gol ca' cheyaḻa' yosozejni'ide' no'ol xcuide' ca' yesenite' binḻo len beṉe' c̱he to toe' na' yesacde' ḻegaque' len bi' c̱hegaque' ca'.  
\v 5 Na' yosozejni'ide' ḻegaque' cont to toe' yesenabia' cuine' na' yesone' da' zaca' yesone' cont yesaque' beṉe' laždao' xilaže' len yogo' da' chesone', na' yosogüia yeseṉa' ližgaque' binḻo, yesaque' beṉe' šagüe' na' yosozenag to toe' c̱he beṉe' c̱hegaque'. No'ole xcuide' ca' cheyaḻa' yesone' güen can' ba gwnian' cont nono ṉe mal c̱he xtiža' Diosen'. 
\p  
\v 6 Na' ḻecze cheyaḻa' ṉeyoedo' beṉe' byo xcuide' ca' cont to toe' yesenabia' cuine' na' yesone' da' cheyaḻa' yesone'.  
\v 7 Na' le', bite'teze da' gono', ben con da' nac güen cont yesacbe'e beṉe' yoble naquen' cheyaḻa' yesone'. Cate' chsed chlo'edo' beṉe', bzejni'i ḻegaque' do lažo', benen cont nacbia' chapo' Diosen' bala'aṉ.  
\v 8 Bsed blo'e diža' ḻi cont nono ṉa xtižon' naquen mal. Na' še soatezo' gwsed gwlo'edo' diža' ḻi, nachen' beṉe' ca' chesexi'a chio' yesyeto'ede' da' bi chesyeželde' bi da' mal yeseṉe' c̱hecho. 
\p  
\v 9 Gož beṉe' güen žin ca' yosozenague' c̱he x̱angaquen' na' yesone' bite'teze da' yese'ene' sin cbi yosyoži'e xtiža'gaquen'.  
\v 10 Bi yesebane' bi da' de c̱he x̱angaquen', san yesenite' do laže' cont yezica'chle beṉe' yesele'ede' chesone' güen na' yesacbe'ede' güenṉa' nac xtiža' Diosen', Dios ben' noṉe' yeḻa' mban c̱hecho toḻi tocaṉe. 
\p  
\v 11 Diosen' nži'ilaže'de' chio' beṉac̱h na' ba blo'e chaclaže' goṉe' yeḻa' mban toḻi tocaṉe c̱he yogo'cho.  
\v 12 Na' da' none' ca' chzejni'in chio' cheyaḻa' cuejyic̱hjcho yogo' da' choncho da' bi chazlaže' na' yogo' da' chzelaže'cho gata' c̱hecho o da' chzelaže'cho goncho da' bi naquen güen lagüen'. To tocho cheyaḻa' soa cuezcho ṉabia' cuincho cont goncho da' nac da' zaca'. Na' cheyaḻa' goncho da' zej to ḻicha; na' cheyaḻa' soacho gonxencho Diosen' yežlio nga.  
\v 13 Ḻe šlac zoacho yežlio nga zoacho mbalaz ṉezecho žin ža yid Jesucriston' da' yoble nse'e be'ni' juisyw. Naque' Dios c̱hecho ben' chonxencho na' ben' noṉe' yeḻa' mban c̱hecho toḻi tocaṉe, na' zaca'chgüe'.  
\v 14 Ḻen' bnežjw cuine' ṉec̱he chio' cate' gosote'ne' cont bṉitlagüe' xtoḻa'chon', na' beya' beyibe' yic̱hjlažda'ochon' len da' malen' cont none' chio' ca xi'iṉe'. Na' bene' ca' cont yebecho goncho da' güen. 
\p  
\v 15 Can' cheyaḻa' gwzejni'ido' beṉe'. Na' cheyaḻa' goṉo' c̱hac̱h laže' yesone' da' güen na' tiḻo' beṉe' cheson da' xiṉj, ḻe Diosen' ba gwseḻe' le' na' ba beṉe' le' yeḻa' chnabia' cont gwzejni'ido' ḻegaque'. Bi go'o latje yosozoe' le' to šḻa'ale. 
\c 3  
\s1 Can' cheyaḻa' gon chio' chejnilaže'cho Jesucriston' 
\p  
\v 1 Da' yoble yozzendo' beṉe' chesejnilaže' Jesucriston' cheyaḻa' yosozex̱jwyic̱hje' yosozenague' c̱he justis ca' na' c̱he beṉe' gwnabia' c̱hegaque' ca' na' bate'teze cheyaḻa' yesone' da' güen.  
\v 2 Yozzendo' ḻegaque' bi cheyaḻa' yeseṉe' mal c̱he note'teze beṉe'. Bi cheyaḻa' yesediḻ yosošaše', san cheyaḻa' yesaque' beṉe' šagüe' na' yesape' yeḻa' chxenḻaže' len yogo'ḻoḻ beṉe'. 
\p  
\v 3 Chio' ḻecze bi gwyejni'icho cana' na' bencho güedenag len Diosen'. Gwyejḻe'cho diža' güenḻažen' na' bentezcho bi da' xiṉj da' gwzelaže' lažda'ochon'. Gwdacho bencho con da' bebecho. Gwzoacho bxi'a ḻježcho. Besegue'e beṉe' chio' na' bgue'e ḻježcho.  
\v 4 Perw bžin ža Dios ben' noṉe' yeḻa' mban c̱hecho toḻi tocaṉe blo'ede' chio' catec beṉe' šagüe' naque' na' catec chacde' chio' beṉac̱h.  
\v 5 Noṉe' chio' yeḻa' mban toḻi tocaṉe gague ṉec̱he bi da' güen benchon', san da' beyaše'de' chio'. Nachen' beya' beyibe' yic̱hjlažda'ochon' len da' malen' cate' gwzolao chejnilaže'chone', na' Spiritw c̱hen' bocoben yic̱hjlažda'ochon'.  
\v 6 Diosen' gwseḻe' Spiritw c̱hen' zoan ḻo' yic̱hjlažda'ochon' chaclenchguan chio', ḻe Jesucristw ben' noṉe' yeḻa' mban c̱hecho toḻi tocaṉe gwṉabde'ne' seḻen'.  
\v 7 Na' ca' ba beyaše' beži'ilaže'de' chio' cont beyone' chio' beṉe' güen lagüen' na' cont soa cuezcho ṉezecho žin ža šjayzoacho len ḻe' toḻi tocaṉe. 
\p  
\v 8 Da' ca' ba gwnia' nga zjanaquen da' ḻi, na' gono' byen yosozenag beṉe' ca' gwzejni'ido' c̱hen. Ḻe beṉe' ca' ba chesejnilaže' Diosen' cheyaḻa' yesebec yic̱hjgaque' yesone' da' güen. Na' da' quinga ba gwnia' zjazaca'chguan na' yesaclenen note'teze beṉe'.  
\v 9 Perw bi gono' txen len beṉe' chesediḻ chosošaše' c̱he bize diža' da' bi zejen. Na' bi cuec yic̱hjo' c̱he diaža c̱he da' x̱ozxta'ocho ca'. Bi gono' txen len beṉe' chesediḻ chosošaše' c̱he bi zejen dan' nyoj ḻe'e ḻey da' bzoj da' Moisésen', ḻe da' chesone' ca' bi chaclenen beṉe' na' bi naquen da' zaca'. 
\p  
\v 10 Na' beṉe' ca' cheson cont beṉe' ca' chesedop chesežague' chesonxene' Jesucriston' chesechoje' c̱hople, ṉeyoedo' ḻegaque' bich yesone' ca'. Na' še ba gwṉeyoedo' ḻegaque' to c̱hope ṉi'a na' bi chosozenague', yebejo' ḻegaque' ca'ale.  
\v 11 Ḻe da' bi chosozenague' nachen' ṉezecho zjambiaye'e na' zjanape' doḻa' c̱he da' xiṉjen' chesone'. 
\s1 Can' cheyaḻa' gon Titon' 
\p  
\v 12 Cate' seḻa' Artemas o Tíquico gan' zon', ben con ga zelao saque'do' cont yido' yežagcho ḻo' ciuda Nicópolis, ḻe ba bec̱hoglaža' yega'aṉa' na' tiemp zag.  
\v 13 Na' ben yogo' da' gac gono' par gacleno' Zenas ben' nsed ley, na' Apolos, cate' yesa'aque' gan' zon' cont bibi yeseyažjde' chanez.  
\v 14 Beṉe' ḻježcho ca' chesejnilaže' Criston' cheyaḻa' yesoe'laže' yesone' da' nac güen na' yesaclene' beṉe' chyažj chc̱hine. Ḻe cheyaḻa' gaccho beṉe' chon da' zaca'. 
\s1 Beṉe' ḻjež Pablon' chosoguape' Titon' tiox 
\p  
\v 15 Yogo' beṉe' cheson xšin Diosen' txen len neda' nga chosoguape' le' tiox. Na' chṉaba' gwguapšco' tiox beṉe' ca' zoaleno' na', beṉe' ca' chesacde' chio' da' naccho txen chejnilaže'cho Criston'. Diosen' gaclenšque' yogo'le. Da' na'zen' chzoja'.