\id REV  
\h Apocalipsis 
\toc1 JESUCRISTONꞋ BZEJNI'IDEꞋ SAN JUANṈAꞋ C̱HE DAꞋ CAꞋ ZAꞋ GAC 
\toc2 Apocalipsis 
\toc3 Ap. 
\mt1 JESUCRISTONꞋ BZEJNI'IDEꞋ SAN JUANṈAꞋ C̱HE DAꞋ CAꞋ ZAꞋ GAC 
\c 1  
\s1 Diosen' bzejni'ide' Jesucriston' diža' quinga 
\p  
\v 1 Diosen' bzejni'ide' Jesucriston' diža' quinga cont ḻe' gwlo'ede' beṉe' ca' chesejnilaže'ne' can' ba zoa gac. Nach ba gwseḻe' to beṉe' nac angl c̱he' cont bzejni'iden' neda' Juan, neda' naca' ben' chon xšine'.  
\v 2 Na' chzoja' diža' ḻi c̱he yogo' da' ba ble'eda', na' ṉezda' da' ḻi gwna Diosen' gac quinga, ḻe Jesucriston' bzejni'iden' neda'. 
\p  
\v 3 Mbalaz beṉe' ca' yosolab da' nga chzoja' da' bzene Diosen' neda' na' beṉe' ca' yesende' yosolab beṉe' yoble ḻen, še da' ḻi yosozenague' c̱hen, ḻe ba zoa gac can' žanṉa'. 
\s1 Juanṉa' chzoje' beṉe' ca' chesonxen Jesucriston' yež ca' gaže 
\p  
\v 4 Neda' Juan chzoja' le'e nita'le gaž yež c̱he Asia chdop chžagle chonxenḻe Jesucriston'. Diosen' len Spiritw c̱hen' yesenita'šque' yesaclene' le'e na' yesone' soa cuezle binḻo len xbab c̱helen', Dios ben' ba zoacze' cate' biṉa' x̱e yežlion', na' soacze' toḻi tocaṉe. Na' Spiritw c̱he Diosen' naquen ca gaže spiritw na' zoan lao Diosen' gan' chi'e chnabi'e.  
\v 5 Na' Jesucriston' ḻecze soašque' gaclene' le'e na' gone' soa cuezle binḻo. Jesucriston' naque' ben' cho'e diža' ḻi c̱he Diosen'. Naque' beṉe' nechw bebane' ladjo beṉe' guaten' ben' bich ṉabia' yeḻa' goten' ḻe'. Na' ḻe' chnabi'e yogo' nochle beṉe' gwnabia' že' yežlio nga. Dan' chacde' chio' bnežjw cuine' gosote'ne' na' blalj xc̱hene' cont bṉitlagüe' xtoḻa'chon'.  
\v 6 Nach ba gwleje' chio' cont ṉabia'cho txen len ḻe' ca no rey na' cont soacho gonxencho Diosen' ca no bx̱oz, Dios ben' nac X̱e' na' ḻecze naque' ben' chonxene'. Cheyaḻa' gonxenchone' toḻi tocaṉe, ḻe zoacze' chnabi'e toḻi tocaṉe. Can' gonšcaczcho. 
\p  
\v 7 Jesucriston' yide' da' yoble to ḻo' bejw, na' yogo'ḻoḻ beṉe' yesele'ede' ḻe', lente beṉe' ca' gosot ḻe'. Na' beṉe' ca' že' to to latje ḻo yežlion', yesebežyaše' cate' yesele'ede' ḻe'. Can' žia', na' can' gacšca. 
\p  
\v 8 “Neda' naca' Dios ben' ben yežlion' len yogo' bichle da' de, na' naca' ben' gon cont te c̱hen. Da'nan' zaca'lebda' ca letr nechw da' nzi' A na' letr bzebe da' nzi' Z.” Can' ža' X̱ancho Dios ben' nape' yeḻa' guac xen juisyw, ben' ba zoacze' cate' biṉa' x̱e yežlion' na' soacze' toḻi tocaṉe. 
\s1 Juan ble'edaogüede' ḻeca beṉe' zaca' juisyw nac Criston' 
\p  
\v 9 Neda' Juan naca' beṉe' ḻježle dan' naccho txen chzenagcho c̱he Jesúsen' cont Diosen' chnabi'e yic̱hjlažda'ocho, na' toz can' chosoc̱hi chososaca' beṉe' chio' ṉec̱he xtižen', na' txen chaclen Jesucriston' chio' cont chyo chc̱hejcho len yogo' da' chac c̱hecho. Da' ba gwdix̱jue'eda' xtiža' Diosen' na' ba bia' diža' c̱he Jesucriston', da'nan' gosezene' neda' na' goseseḻe' neda' pres gan' že' Patmos dan' nac to yežlio dao' ḻo' nisdaon'.  
\v 10 Na' to ža dmigw Spiritw c̱he Diosen' benen cont ble'edaogüeda', na' benda' Jesucriston' chṉe' cožan' zižjechgua ca ga chbež trompeta.  
\v 11 Na' gože' neda': 
\p ―Neda' naca' ben' ben yežlion' len yogo' bichle da' de, na' naca' ben' gon cont te c̱hen. Da'nan' zaca'lebda' ca letr nechw da' nzi' A na' letr bzebe da' nzi' Z. Bzoj to ḻe'e yiš da' quinga le'edo', na' seḻon' lao beṉe' ca' nita' gaž yež c̱he Asia chesedop chesežague' chesonxene' neda', yež ca' zjanzi' Efeso, na' Esmirna, na' Pérgamo, na' Tiatira, na' Sardis, na' Filadelfia na' Laodicea. 
\p  
\v 12 Na' gwyec̱hja' gwṉa'a non' chṉe na' ble'eda' gaže candeler de oro.  
\v 13 Na' gachoḻ candeler ca' gaže, ble'eda' to beṉe' nac ca to beṉac̱h perw gocbe'eda' bi naque' beṉac̱hze. Nyaze' to lache' toṉ da' bžinte ḻo ṉi'e na' nchej cho'alc̱ho'en ca to bant de oro.  
\v 14 Na' yiša' yic̱hjen' naquen da' šiš ca xa xila' o ca no beye'. Na' yejlagüen' gosactiten ca to yi' da' chaḻa'ṉiṉ.  
\v 15 Ṉi'e ca' ble'edan' ca to de bronce da' nḻachgua cate' naquen ya'alj xoan ḻo yi'. Na' ši'en nenen zižjechgua ca chziž yegw cate' dechgua nis.  
\v 16 Na' nox̱e' gaže beljw len ne'e ḻichan' na' ḻo' cho'en chchojen ca to spada da' nḻa chop ḻa'an. Na' cho'alagüen' goctiten ca gwbiž cate' chṉa'chguan. 
\p  
\v 17 Na' cate' ble'eda'ne' gwbix̱a' xṉi'en gottia' šlat. Nach bḻi ne'e ḻichan' gwx̱oen' yic̱hja' na' gože'nda': 
\p ―Bi žebo'. Neda' naca' ben' ben yežlion' len yogo' bichle da' de, na' naca' ben' gon cont te c̱hen.  
\v 18 Naca' ben' nsa' yeḻa' mban. Cana' gota' perw bebana' ladjo beṉe' guat na' zoacza' toḻi tocaṉe. Na' naquen ḻo na' ṉia' bat yesat to to beṉe' na' nac gac c̱hegaque' cate' bac̱h gosate'.  
\v 19 Na' ṉa'a bzoj diža' c̱he da' ca' ba ble'edo' na' diža' c̱he da' ca' chac ṉa'a na' diža' c̱he da' ca' za' gac.  
\v 20 Na' da' nono ṉa' ṉeze c̱he beljw ca' gaže dan' nox̱a' na' c̱he candeler de oro ca' gaže, zejen quinga: beljw ca' zejen gaže beṉe' ca' cheso'e xtiža' len gaže cuen beṉe' ca' chesedop chesežag chesonxene' neda' gan' nzi' Asia. Na' candeler ca' gaže zejen gaž cuen beṉe' ca' chesonxen neda'. 
\c 2  
\s1 Da' gwna Jesucriston' c̱he beṉe' ca' chesonxen ḻe' ḻo ciuda ca' gaže: Da' gože' beṉe' Efeso ca' 
\p  
\v 1 ’Bzoj ben' choe' xtiža' len beṉe' ca' chesedop chesežag chesonxene' neda' ḻo ciuda Efeson', yo'one' neda' nox̱a' beljw ca' gaže len na' ḻichan' na' chda' gachoḻ candeler de oro ca' gaže, na' yo'one' nedan' chapa'ne' diža' quinga:  
\v 2 “Ṉeze nḻe'eda' ca güenṉa' chonḻe, can' chc̱hejlaže'le zoale chonchguale xšinan'. Ṉezda' bi chleble beṉe' cheson da' xiṉj, ḻe ba ble'ele can' cheson beṉe' güenḻaže' ca' chesene zjanaque' postlw na' chacbe'ele bi zjanaque' dogualje postlw.  
\v 3 Ba byo bc̱hejle len yogo' dan' ba goc c̱hele na' ba benchguale xšinan' na' bi jax̱aque'laže'le.  
\v 4 Perw da' nga bi chazlaža' can' chonḻe, da' bich chaquele neda' can' goquele neda' cana'.  
\v 5 Da'nan' ḻe gon xbab can' gwzoale goquele neda' na' can' gwzoale bzenagle c̱hia' na' yetiṉje xtoḻa'le cont da' yoble gonḻe güen can' benḻe cana'. Na' še bi yetiṉjele xtoḻa'len', yedeyena' cont bich gacle candeler c̱hia'.  
\v 6 Perw ḻa'czḻa' bi chontecle güen, chebeda' chgue'ele da' xiṉj da' cheson beṉe' ca' zjanzi' nicolaítas, beṉe' ca' chesene' guac gontezechle da' xiṉj, ḻe neda' ḻecze chgue'eda' can' chesonen'.  
\v 7 Le'e žia nagle da' chene, ḻe gwzenag c̱he da' nga ža Spiritw c̱he Diosen' chen' le'e chdop chžagle chonxenḻe neda' gate'teze: Note'tezle še soele bi cuejyic̱hjle xtižan', neda' goṉa' da' gagwle da' chbia ḻo yag yeḻa' mban da' zoa latje xdan c̱he Diosen'.” 
\s1 Da' gože' beṉe' Esmirna ca' 
\p  
\v 8 ’Na' ṉa'a bzoj ben' choe' xtiža' len beṉe' ca' chesedop chesežag chesonxen neda' ciuda Esmirna, yo'one' naca' ben' ben yežlion' na' len yogo' bichle da' de na' ben' gon cont te c̱hen, ben' ḻecze gote' na' bebane' ladjo beṉe' guat ca', na' yo'one' nedan' chapa'ne' diža' quinga:  
\v 9 “Ṉeze nḻe'eda' ca güenṉa' chonḻe. Ṉezda' chyi chzaca'le. Ṉezda' nacchguale beṉe' yaše', ḻa'czḻa' de c̱hele da' zaca'ch clel ca yeḻa' gwṉi'an'. Ṉa' ca nac beṉe' Israel beṉe' ca' chesene' ba gwlej Diosen' ḻegaque' cont gone' güen len ḻegaque', ṉezda' baḻe' cheseṉie' yeḻa' ya' c̱hele. Perw bi gwleje' ben' cheson ca', ḻe bi chesejnilaže'ne', san zjanaque' dapa' txen chosozenague' c̱he Satanás dan' chnabia' da' x̱igüe' ca'.  
\v 10 Bi žeble da' ca' za' gac c̱hele, ḻe Satanásen' gonen cont yeseyix̱jue' baḻle ḻižya cont gata'bia' še soen gonen cuejyic̱hjle xtižan'. Na' ḻo to c̱hope ža yosoc̱hi yososaque' le'e. Ḻe soateze ḻe gwzenag c̱hia' ḻa'czḻa' še yesote' le'e, na' gona' cont banḻe len neda' toḻi tocaṉe.  
\v 11 Le'e žia nagle da' chene, ḻe gwzenag c̱he da' nga ža Spiritw c̱he Diosen' chen' le'e chdop chžagle chonxenḻe neda' gate'teze: Note'tezle še soele bi cuejyic̱hjle xtižan', bi gac c̱hele can' yesac c̱he beṉe' yesezaca'zi' toḻi tocaṉe dan' žacho yeḻa' got gwchope.” 
\s1 Da' gože' beṉe' Pérgamo ca' 
\p  
\v 12 ’Na' bzoj ben' choe' xtiža' len beṉe' ca' chesedop chesežag chesonxen neda' ciuda Pérgamo, yo'one' neda' napa' spada toše' dan' nḻa chop ḻa'an, na' nedan' chapa'ne' diža' quinga:  
\v 13 “Ṉeze nḻe'eda' ca güenṉa' chonḻe. Na' ṉezda' zoale ḻo ciuda gan' chnabia'chgua Satanásen', perw zoale chzenagle c̱hia'. Ṉezda' bi chbejyic̱hjle xtižan' dan' chejḻe'le na' ṉeca gwlejyic̱hjlen cate' gosote' Antipas ben' be'e xtižan' ḻo ciuda c̱helen' gan' že' beṉe' zan beṉe' chosozenag c̱he Satanásen'.  
\v 14 Perw de to c̱hope da' chonḻe da' bi chazlaža'. Ḻe nita' baḻle chzejni'i ḻježle guac gontezle da' xiṉj. Ca'cze nac dan' bzejni'i da' Balaam da' rey Balac cani'. Da'nan' gwseḻe' no'ole gosego'oyeḻe' beṉe' Israel ca' cont gosagüe' yeḻa' guagw da' nac c̱he ḻ gua'a ḻsaca' gosejnilaže' beṉe' zito' ca' na' cont gosone' da' yeḻa' zto' len cuerp c̱hegaque'.  
\v 15 Na' ḻecze nita' baḻle chzenagle c̱he dan' chgue'eda' dan' chososed chosolo'e beṉe' ca' zjanzi' nicolaítas.  
\v 16 Da'nan' ḻe yetiṉje c̱he da' xiṉjen' chonḻe. Na' še bi yetiṉjele xtoḻa'len', ḻa' yidtia' yedetiḻlena' nole chonḻe da' xiṉjen' len spada dan' chchoj choan'.  
\v 17 Le'e žia nagle da' chene, ḻe gwzenag c̱he da' nga ža Spiritw c̱he Diosen' chen' le'e chdop chžagle chonxenḻe neda' gate'teze: Note'tezle še soele bi cuejyic̱hjle xtižan', goṉa' le'e to yeḻa' guagw da' zaca' da' nono ṉa' le'e ḻo yežlion', to da' zaca'leben ca maná, na' goṉa' to yej šiš c̱he to tole gan' yoj lale da' naquen to lale da' cobe da' nono nombia', lete le'e gaquen ḻo na'le gombia'len.” 
\s1 Da' gože' beṉe' Tiatira ca' 
\p  
\v 18 ’Na' bzoj ben' choe' xtiža' len beṉe' ca' chesedop chesežag chesonxene' neda' ḻo ciuda Tiatira, na' yo'one' naca' dogualje Xi'iṉ Dios, na' chactit yejlagua' ca to yi' da' chaḻa'ṉiṉ na' ṉi'a ca' chesaquen ca bronce da' cheyac ya'aḻj cate' xoan ḻo yi'. Yo'one' neda' chapa'ne' diža' quinga:  
\v 19 “Ṉeze nḻe'eda' ca güenṉa' chonḻe, ṉezda' zoale chaquele neda', chejnilaže'lenda', chonchguale xšinan' na' chchejele bite'teze chac c̱hele, na' ṉezda' chonchḻe güen ṉa'a clel can' benḻe cana'.  
\v 20 Perw de to da' chonḻe da' bi chazlaža', ḻe choe'le latje zoa to no'ole naque' txen len le'e, no'olen' zaca'lebe ca da' reina Jezabel. Že' chsed chlo'ede' xtiža' Diosen' perw len diža' güenḻaže' c̱hen' chziye'e beṉe' chesejnilaže' neda' cont baḻe' chesone' da' nac da' yeḻa' zto' len cuerp c̱hegaquen' na' ḻecze chesagüe' yeḻa' guagw da' chesena beṉe' naquen c̱he ḻ gua'a ḻsaca' chesejnilaže'.  
\v 21 Ba gwleza' cont yetiṉjde' c̱he yeḻa' zto' dan' chonen', perw bi chaclaže' yetiṉjden', na' biṉa' cuejyic̱hje' yeḻa' zton' chonen'.  
\v 22 Da'nan' gona' cont gacšende' na' gate' ḻo cam, na' gona' cont beṉe' ca' cheson yeḻa' zton' txen len ḻe' ḻecze yesaḻe'chgüede' še bi yesebejyic̱hje' da' ca' chzejni'ide' ḻegaque' yesone'.  
\v 23 Nach bi' c̱he' ca', gona' cont yesatbe'. Nach yogo' cuen beṉe' ca' chesedop chesežag chesonxene' neda' gate'teze yesacbe'ede' nombi'a yogo'te xbab da' yo'o ḻo' yic̱hjlaždao' beṉac̱h, na' gona' cont to toe' soe' mbalaz o saca'zi'e con ca nac da' ba bene'.  
\v 24 Na' le'e zoale Tiatiran' le'e bi chonḻe can' chsed chlo'e no'ole güenḻažen' na' ṉeca nsedle dan' chesene' chesejni'ide' c̱he Satanásen' dan' nono nombia', bi ṉia' bichle da' cheyaḻa' gonḻe.  
\v 25 Con soaczle gonḻe da' güen can' chonḻe tža tža, cont ṉe' chonḻe güen caten' yida' da' yoble.  
\v 26 Note'tezle še soele bi cuejyic̱hjle xtižan', na' še soele ṉe' soatezle gonḻe can' nona' mandadw cate'ch yida' da' yoble, gona' cont ṉabia'le nación ca' txen len neda'.  
\v 27 Ca X̱an' ba bene' cont chnabi'a nación ca', ḻecze can' gona' cont beṉe' bi yesebejyic̱hje' xtiža' yesenabi'e txen len neda'. Na' yesenabi'e nación ca' na' žan ca žan beṉe' nación ca' yosozenague' c̱hegaque', na' beṉe' ca' bi chosozenag, yosožiaye'e ḻegaque' ca to beṉe' chzoxj to no yeso' xguague.  
\v 28 Na' gwnežjua' ḻegaque' beljw xsilen'.  
\v 29 Le'e žia nagle da' chene, ḻe gwzenag c̱he dan' ža Spiritw c̱he Diosen' chen' le'e chdop chžagle chonxenḻe neda' gate'teze.” 
\c 3  
\s1 Dan' gože' beṉe' Sardis ca' 
\p  
\v 1 ’Na' ḻecze bzoj ben' choe' xtiža' len beṉe' ca' chesedop chesežag chesonxen neda' ḻo ciuda Sardis, yo'one' napa' Spiritw c̱he Dios dan' nac ca gaže spiritw, na' nox̱a' beljw ca' gaže, na' neda' chapa'ne' diža' quinga: “Ṉeze nḻe'eda' yogo'ḻoḻ dan' chonḻe. Ṉezda' nacle ca beṉe' guat ḻa'czḻa' chze c̱hele naple yeḻa' mban toḻi tocaṉe.  
\v 2 Ḻe gon xbab can' chonḻe na' ḻe šejnilaže'ch neda' na' ḻe gwzenag c̱hia' šlac biṉa' yeyož cuiayi'le, ḻe dan' chonḻen' bi naquen can' chebe Dios ben' chonxena'.  
\v 3 Ḻe soa ḻe gon xbab c̱he xtižan' dan' bosozejni'i beṉe' le'e na' da' bzenagle c̱hen cana'. Ḻe gwzenag c̱hen ṉa'a da' yoble cont yetiṉjele xtoḻa'len'. Na' še bi gonḻe xbab yetiṉje xtoḻa'len', žin ža yedex̱enyala' le'e na' goṉa' castigw c̱hele ca chzenyal to no beṉe' gwban cate' chbane'. Bi ṉezele bi ža bi hor.  
\v 4 Bia'cze nita' baḻle beṉe' Sardis biṉa' gonḻe da' malen' txen len beṉe' yezica'chle. Na' le'e nac lažda'olen' xilaže' len neda', žin ža goṉa' lache' šiš c̱hazle na' talenḻe neda', ḻe zaca'le cont gonḻe neda' txen.  
\v 5 Note'tezle še soele bi cuejyic̱hjle xtižan', žin ža goṉa' lache' šiš c̱hazle, na' gwbat yoxia' lalen' ḻe'e libr c̱hia' gan' nyoj la yogo' beṉe' zjanape' yeḻa' mban toḻi tocaṉe, na' güe'lena' X̱an' diža' na' len beṉe' zjanac angl c̱he' ca' yapegaca'ne' nacle neda' txen.  
\v 6 Le'e žia nagle da' chene, ḻe gwzenag c̱he dan' ža Spiritw c̱he Diosen' chen' le'e chdop chžagle chonxenḻe neda' gate'teze.” 
\s1 Da' gože' beṉe' Filadelfia ca' 
\p  
\v 7 ’Na' ḻecze bzoj ben' choe' xtiža' len beṉe' ca' chesedop chesežag chesonxen neda' ḻo ciuda Filadelfia, yo'one' naca' beṉe' laždao' xilaže' juisyw, na' zoateza' chona' can' gwnia' gona'. Napa' xinya c̱he da' rey David. Cate' chsaljua' cont yeso'o beṉe' gan' zoa Diosen' chnabi'e, nono gac yoseyjw, na' cate' chseyjua' cont bi yeso'e, nono gac saljw. Yo'one' neda' chapa'ne' diža' quinga:  
\v 8 “Ṉeze nḻe'eda' ca güenṉa' chonḻe. Nach ba gwsaljua' ca to puert c̱he le'e da' nono gac yososeyjw. Na' ḻa'czḻa' bi nac zanḻe, ba chzenagle xtižan' na' bi gwlejyic̱hjlen caten' bosoc̱hi bososaque' le'e.  
\v 9 Baḻ beṉe' Israel že' gan' zoalen' chesene' ba gwlej Diosen' ḻegaque' cont gone' güen len ḻegaque', perw bi gwleje' ḻegaque', ḻe bi chesejnilaže'ne'. Zjanaque' dapa' txen chosozenague' c̱he Satanás dan' chnabia' da' x̱igüe' ca'. Na' ca nac ḻegaque', gona' cont žin ža yesape' le'e bala'aṉ cate' yesacbe'ede' chacda' le'e.  
\v 10 Ba byo bc̱hejle len yogo' dan' gwdi gwxaca'le na' benḻe can' nona' mandadw, na' da'nan' gona' yechojle güen cate' žin ža saca'zi' yogo' beṉac̱h. Cana' gata'bia' c̱he to to beṉac̱h še yosozenague' c̱hia' o še bi yosozenague'.  
\v 11 Ba zoa yida' da' yoble. Ḻe soac̱hac̱h ḻe šejnilaže'nda' na' gwzenagle c̱hia' cont bibi gwžon soale mbalaz toḻi tocaṉe.  
\v 12 Note'tezle še soele bi cuejyic̱hle xtižan', žin ža gona' gacle ca bdope da' zjanita' ḻo' yodao' blao c̱he Dios ben' chonxena', ḻe yežinḻe gan' zoa Diosen' na' yega'aṉlenḻne' toḻi tocaṉe. Na' gwzoja' ḻoxga to tole la Dios ben' chonxena' na' la ciuda c̱he', ciuda Jerusalén da' nac da' cobe da' chi' yaba na' yetjen ḻo yežlion'. Na' gwzoja' ḻoxga to tole la neda' da' nac da' cobe.  
\v 13 Le'e žia nagle da' chene, ḻe gwzenag c̱he dan' ža Spiritw c̱he Diosen' chen' le'e chdop chžagle chonxenḻe neda' gate'teze.” 
\s1 Dan' gože' beṉe' Laodicea ca' 
\p  
\v 14 ’Na' bzoj ben' choe' xtiža' len beṉe' ca' chesedop chesežag chesonxen neda' ḻo ciuda Laodicea, yo'one' chona' cont chac can' chnalaže' Diosen'. Cho'a diža' ḻi da' nac cayaṉen' che' Diosen' neda'. Txen len neda' ben Diosen' beṉac̱h na' yogo'ḻoḻ bichle da' de ḻe'e yaban' na' ḻo yežlion'. Yo'one' neda' chapa'ne' diža' quinga:  
\v 15 “Ṉeze nḻe'eda' ca chonḻe, bi ṉacho chgue'ele neda' na' ṉeca chaquele neda'. Yebechda' šaca' chgue'ele neda' o šaca' chaquele neda'.  
\v 16 Na' da' bi chonḻe cuent gaquele neda', da'nan' ba zoa cuejyic̱hja' le'e bich gona' le'e ca xi'iṉa'.  
\v 17 Le'e žale zoale mbalaz, žale chonḻe da' güenchgua, žale bibi chyažjele ḻe chebechgüe Diosen' le'e. Na' bi chacbe'ele ḻeca beṉe' zban nacle len Diosen'. Bi chacbe'ele nacle ca to beṉe' bi chle'e o ca to beṉe' laže' ga'alyid da' bi chejni'ile xtižan' ṉeca chzenagle c̱hen.  
\v 18 Da'nan' chnia' le'e cheyaḻa' si'le da' goṉa' le'e, ḻe naquen da' zaca'ch ca oro dan' ba bosozeye' cont bega'aṉ da' dogualje. Si'le da' goṉa' le'e cont da' ḻi soale mbalaz. Na' ḻe ṉab yezi'xena' xtoḻa'le cont gac lažda'olen' xilaže' can' chac xaḻana' beṉe' nyaz to lache' šiš xila'. Gonḻe ca' cont bich le'eda' le'e ca to beṉe' laže' ga'alyid, beṉe' cheyaḻa' gaque zto'. Na' ḻe güe' latje yocoba' xbab c̱helen' cont bich gacle ca to beṉe' bi chle'e, beṉe' chyažje rmed c̱he yejlagüe' cont le'ede', san gacbe'ele da' chaclaže' Diosen' gonḻe.  
\v 19 Note'teze beṉe' chacda', chdiḻa'ne' na' chnežjua'ne' castigw cate' chone' da' xiṉj. Da'nan' cheyaḻa' cuec yic̱hjle yetiṉjele xtoḻa'len'.  
\v 20 Chṉia' to tole ca to beṉe' zecha cho'a yo'o c̱helen' chṉie' na' chsiže' ḻe'e puerten'. Note'tezle še gwzenagle c̱hia' na' še saljwle cont šo'a, yedesoa' len le'e na' gona' cont soale mbalaz txen len neda'.  
\v 21 Na' note'tezle še soele bi cuejyic̱hjle xtižan', žin ža gona' cont cue'lenḻe neda' gan' chi'a chnabi'a. Can' bena' neda', gwzoeda' cont bena' can' gwna X̱an' nach chi'lena'ne' chnabia'to' txen.  
\v 22 Le'e žia nagle da' chene, ḻe gwzenag c̱he dan' ža Spiritw c̱he Diosen' chen' le'e chdop chžagle chonxenḻe neda' gate'teze.” 
\c 4  
\s1 Ben' že' yaban' chesonxene' Diosen' 
\p  
\v 1 Beyož bzoja' da' ca' gwne' neda', ble'edaogüeda' nyaljo to puert yaban'. Nach da' yoble benda' gwṉe Jesucristw ben' gwṉe neda' da' nechw zižjechgua cacze zižje chbež to trompeta, gože'nda': 
\p ―Gwyep gan' zoa' nga cont gwlo'eda' le' da' ca' za' gac. 
\p  
\v 2 Nach ḻa' bente Spiritw c̱he Diosen' cont ble'edaogüeda' yaban' gan' chi' Diosen' chnabi'e.  
\v 3 Na' ble'eda' ben' chi' chnabian' chactite' ca chactit yejese, yej da' nzi' jaspe na' da' nzi' cornalina. Na' to da' nac ca to pita' gwyec̱hjen gan' chi'e chnabi'en, na' chactiten ca chactit to yej da' nzi' esmeralda.  
\v 4 Na' cue'ej cuit Diosen' gan' chi'e chnabi'e zjachi' yetapechoa beṉe' gwlej Diosen' zjanaque' blao, beṉe' chesenabi'e txen len ḻe'. Zjanyaze' lache' šiš na' zjazoa corona de oro yic̱hj to togaque'.  
\v 5 Na' gan' chi' Diosen' chnabi'e chep yes na' chac sšag na' chašjw chtin. Na' lagüen' nita' gaže yi' da' chaḻa'ṉiṉ. Yi' ca' gaže zjanaquen Spiritw c̱he Diosen', na' Spiritw c̱he Diosen' naquen ca gaže spiritw.  
\v 6 Na' doxen lagüe' gan' chi'e chnabi'en nžiljw ḻo yon' to da' chactit ca vidrw na' nḻan' ca to nis nyadi da' nḻa'xeje. 
\p Na' nita' yetap beṉe' gan' zoa Diosen'. Tgüeje' nita' cuite' chop ḻa'ate, yetoe' cože' na' yetoe' lagüe', na' zjažia da' zan yejlaogaque', žia da' žia laogaque' na' lente cože'gaque'.  
\v 7 Beṉe' nechw naque' ca to león, na' beṉe' gwchope ca to go'ṉ, na' beṉe' gwyoṉe nac cho'alagüe' ca c̱he beṉac̱h, na' beṉe' gwdape naque' ca to bsia be ze ḻo be'.  
\v 8 Na' dapte beṉe' ca' to toe' žia x̱op güeje x̱ilgaque', na' zjažia zan yejlaogaque' ḻo x̱ilen' lente cože' x̱ilen'. Na' do ža do yel bi chososane' chesene': 
\q1 Ḻeca beṉe' laždao' xilaže' juisyw nac X̱ancho Diosen' ben' nape ḻa'zelagüe yeḻa' guac xen. 
\q1 Ba zoacze' cate' za' x̱e yežlion', na' soacze' toḻi tocaṉe. 
\p  
\v 9 Na' yogo' ṉi'a cate' beṉe' ca' tap cheso'e diža' catec beṉe' zaca' nac Dios ben' chi' chnabia', ben' zoacze toḻi tocaṉe, yogo' ṉi'a cate' chesonxene' ḻe' cheso'e yeḻa' chox̱clen c̱he',  
\v 10 beṉe' tapechoa ca' gwlej Diosen' cont zjanaque' blao chosozoa xibe' lao Dios ben' zoa toḻi tocaṉe chesonxene' ḻe' gan' chi'e chnabi'e na' chosonite' corona c̱hegaquen' xṉi'en, chesene': 
\q1  
\v 11 X̱anto' Dios, zaco' gonxento' le', 
\q1 na' soato' le' bala'aṉ na' güe'to' diža' c̱he yeḻa' guac xen c̱hion', 
\q1 ḻe len' beno' yogo'ḻoḻ da' de, 
\q1 na' beno' yogo'ḻoḻen con ca gwnalažo'. 
\c 5  
\s1 Jesucristw ben' zaca'lebe ca xila' daon' gosot beṉe' Israel ca' ṉec̱he xtoḻa'gaque' 
\p  
\v 1 Na' ble'eda' Dios ben' chi' chnabia', len ne'e ḻicha nox̱e' to yiš da' ndobyoyen na' nyoj chop ḻa'aten na' nyeyjon nyišen' gaže seyw.  
\v 2 Na' ble'eda' to angl gual gwṉe' zižje gwne': 
\p ―¿Non' zaca' gwzoxj seyw ca' cont šaš yišen'? 
\p  
\v 3 Na' nono bžel beṉe' zaca' gwzaše' yišen' ṉeca yaban' na' ṉe yežlion' na' ṉeca gan' že' beṉe' guat ca'. Ṉe to nono bžel beṉe' ḻa'c̱h le'ezden' nac naquen.  
\v 4 Na' gwchežchgua' da' nono zoa beṉe' zaca' gwzaše' yišen' gwlaben' na' ṉeca zaque' ṉa'ze' nac naquen.  
\v 5 Nach to beṉe' gwlej Diosen' cont naque' blao gože'nda': 
\p ―Bitw cuežo'. Gwṉa'šc, na' zoa Jesucristw ben' golje ḻo diaža c̱he da' Judá, naque' rey can' nac da' x̱ozxta'ogüe' David, na' da' nape' yeḻa' chnabia' xen zaca'lebde' ca to bež be nzi' león. Na' ḻe' zaque' gwzoxje' seyw ca' gaže na' gwzaše' yišen', ḻe ba gwzoede' bene' cont gac ṉitlao xtoḻa' beṉac̱hen'. 
\p  
\v 6 Nach ble'eda'ne' zeche' gan' chi' ben' chnabian' na' ladjo beṉe' ca' tap ben' zjažia x̱il, do gachoḻ beṉe' blao ca' tapechoa. Ble'eda'ne' ca to xila' dao' ben' ba gosote', ca xila' be žia gaže ḻozba' na' gaže yejlaoba'. Na' yejlaoban' gaže zejen zoa Spiritw c̱he Diosen' doxen ḻo yežlion' chonen can' ža Diosen'.  
\v 7 Nach ben' ble'eda' ca to xila' dao' jax̱i'e yiš dan' nox̱e' ben' len ne'e ḻicha gan' chi'e chnabi'en.  
\v 8 Na' cate' jax̱i'e yišen' beṉe' ca' tap lente beṉe' blao ca' tapechoa bosozoa xibgaque' lagüen'. Na' to to beṉe' blao ca' zjanox̱e' to arpa na' to barser de oro gan' chey yal, na' yalen' zejen xtiža' beṉe' ca' zjanac ḻo na' Diosen', dižan' chesoe'lene' ḻe' caten' chosoḻ güiže'ne'.  
\v 9 Nach beṉe' ca' gosoḻe' to da' cobe dan' ža: 
\q1 Zaco' jax̱i'o yišen' cont gwzašon' na' gwzoxjo' seyw ca' nyišen', 
\q1 ḻe bnežjw cuino' gosote' le'. 
\q1 Blalj xc̱heno' cont bṉitlaguo' xtoḻa'to', 
\q1 na' gwxi'o neto' cont nacto' ḻo na' Dios, 
\q1 neto' nacto' beṉe' to to nación, to to yež, to to diaža na' chacto' gwde gwdele diža' da' de ḻo yežlion'. 
\q1  
\v 10 Na' gwlejo' neto' cont nacto' ca rey, 
\q1 na' zoato' chonxento' Dios c̱heton' ca bx̱oz, 
\q1 na' žin ža ṉabia'to' ḻo yežlion'. 
\p  
\v 11 Nach gwṉa'a na' ble'eda' beṉe' zan juisyw angl, ṉeca gwzoeda' gwlaba'ne'. Zjazecha angl ca' cue'ej cuit ben' chi' chnabian' na' gan' že' beṉe' ca' tap na' beṉe' blao ca' tapechoa.  
\v 12 Na' benda' cheso'e dižan' zižje chesene': 
\q1 Jesucriston' bnežjw cuine' ṉec̱he xtoḻa' beṉac̱hen', 
\q1 na' da'nan' zaca'lebde' ca xila' daon' gosot beṉe' Israel cont gwṉitlao xtoḻa'gaque'. 
\q1 Na' Jesucriston' zaca'cze' gonxenchone', 
\q1 ḻe chnabi'e doxen, na' yo'o ḻo ne'e yogo'te da' zjade. 
\q1 Naque' beṉe' sina' gual, na' nape' yeḻa' guac xen. 
\q1 Cheyaḻa' güe'chone' yeḻa' bala'aṉ, 
\q1 na' güe'cho diža' naque' beṉe' zaca' juisyw. 
\p  
\v 13 Na' ḻecze benda' yogo' beṉe' že' yaban' na' yežlion' na' beṉe' že' latje c̱he beṉe' guat, na' beṉe' zjanita' ḻo nisdao', cheso'e diža' chesene': 
\q1 Toḻi tocaṉe chonxencho Dios ben' chi' chnabia' 
\q1 na' Jesucriston' ben' zaca'lebde' ca xila' daon' gosot beṉe' Israel cont gwṉitlao xtoḻa'gaque'. 
\q1 Zjanape' yeḻa' bala'aṉ, na' zjanaque' beṉe' zaca' juisyw, 
\q1 na' zjanape' yeḻa' guac xen juisyw toḻi tocaṉe. 
\m Na' benda' ḻecze can' gosena be chaš yežlion' na' be chaš le'e yaban' na' ḻo' nis, na' len yogo' bichle da' zjade. 
\p  
\v 14 Nach beṉe' ca' tap ben' zjažia x̱il gosene': 
\q1 ―Ca'šcacze gac. 
\p Na' beṉe' blao ca' tapechoa bosozoa xibgaque' gosonxene' Dios ben' zoa toḻi tocaṉe. 
\c 6  
\s1 Seyw ca' gaže 
\p  
\v 1 Ca nac seyw ca' gaže, ble'eda' cate' ben' zaca'lebde' ca xila' daon' be gosot beṉe' gualaž c̱heto' ṉec̱he xtoḻa'gaque' bzoxje' seyw nechon'. Nach beṉe' ca' tap zjažia x̱il, toe' gwṉe' zižje, ca zižjen' chašjw chtin yi' gwzio', gwne': 
\p ―Da, na' gwṉa' da' nga. 
\p  
\v 2 Na' cate' gwṉa'a, ble'eda' to cabayw be šiš na' ben' žie' cože'ban' nox̱e' to arcw. Ba bosozoe' to corona yic̱hje' ṉec̱he da' ba bene' gan ḻo gwdiḻe, na' ṉa'a ba zeje' da' yoble cont tiḻlene' nochle beṉe' chesegue'ede' ḻe' na' gone' gan ḻegaque'. 
\p  
\v 3 Na' ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaque', cate' bzoxje' seyw gwchope benda' gwṉe yeto ben' žia x̱il, ben' nac beṉe' gwchope, gwne': 
\p ―Da, na' gwṉa' da' nga. 
\p  
\v 4 Nach bchoj yeto cabayw, na' bena' nacba' be xṉa. Na' ben' žie' cože'ban' gwyo'o ḻo ne'e gone' cont beṉe' že' yežlion' bich yesenite' binḻo len ḻježe' san yesot ḻježe'. Na' bosonežjue'ne' to spada xen. 
\p  
\v 5 Na' cate' ben' zaca'lebde' ca xila' daon' be gosot beṉe' gualaž c̱heto' ṉec̱he xtoḻa'gaque' bzoxje' seyw gwyoṉe, benda' gwṉe beṉe' gwyoṉe ben' žia x̱il, gwne': 
\p ―Da, na' gwṉa' da' nga. 
\p Nach gwṉa'a na' ble'eda' to cabayw gasj na' ben' žie' cože'ban' nox̱e' to xigonz.  
\v 6 Na' benda' gwṉe to beṉe' do gan' že' beṉe' ca' tap ben' zjažia x̱il, gože' ben' žia cože' cabayw gasja', gwne': 
\p ―Gwyej jažiayi' trigw na' cebada cont yesaquen gwbin na' cont c̱hop ya trigw saca' laxjue' da' yesone' gan tža žin na' x̱op ya cebada saca' laxjue' da' yesone' gan tža žin, perw bi gono' cont cuiayi' set na' vino. 
\p  
\v 7 Na' cate' ben' zaca'lebde' ca xila' daon' be gosot beṉe' gualaž c̱heto' ṉec̱he xtoḻa'gaque' bzoxje' seyw gwdape, benda' gwṉe beṉe' gwdape ben' žia x̱il, gwne': 
\p ―Da, na' gwṉa' da' nga. 
\p  
\v 8 Nach gwṉa'a na' ble'eda' to cabayw be gaše, na' ben' žie' cože'ban' lie' Yeḻa' Got. Na' yeto beṉe' zej cože', lie' Latje Gan' Že' Beṉe' Guat. Na' gosac ḻo na'gaque' bosox̱ie' gwdiḻe gan' gosat beṉe' zan, na' gosone' cont gosat yezane' gwbin, na' gosone' cont yezan beṉe' gosate' len yižgüe', na' gosone' cont be znia gosotba' yezane', na' goc ca' lao to tlacw yežlion' dan' gosac ḻo ne'e. 
\p  
\v 9 Nach cate' ben' zaca'lebde' ca xila' daon' be gosot beṉe' gualaž c̱heto' ṉec̱he xtoḻa'gaque' bzoxje' seyw gayo', ble'eda' mes gan' beṉe' ca' že' yaban' chosozeye' bi dan' chosozeye' cate' chesonxene' Diosen', na' xṉi'a mesen' ble'eda' beṉe' ca' ba gosot yezica'chle beṉe' ḻegaque' lagüe dan' bosozenague' xtiža' Diosen' na' lagüe dan' goso'e diža' gosene' chesejnilaže' Jesucriston'.  
\v 10 Na' beṉe' guat ca' goseṉe' zižje gosene': 
\p ―X̱anto' Dios, le' naco' beṉe' laždao' xilaže' juisyw na' zoaczo' chono' con ca žo'. ¿Batcan' gono' yeḻa' justis c̱he beṉe' ca' že' yežlion' ben' gosot neto'? ¿Batcan' gono' cont yesezaca'zi'e da' bosolalje' xc̱henton'? 
\p  
\v 11 Nach Diosen' bnežjue' to to beṉe' guat ca' tgüeje xagaque' da' šiš da' gosaze'. Na' gože' ḻegaque' yesyezi'laže'che' yeto c̱hop ža šlac yeseza' beṉe' cheyaḻa' yesat can' gosate' lagüe da' chesonxene' Criston', beṉe' zjanac ca biše' ḻježe'. 
\p  
\v 12 Nach ben' zaca'lebde' ca xila' daon' be gosot beṉe' gualaž c̱heto' ṉec̱he xtoḻa'gaque', cate' bzoxje' seyw gwxope, gwṉa'a na' ḻeca gwxo'. Na' gwbižen' beyaquen gasj ca lache' gasj da' chesaz beṉe' chesegüine', na' doxen bion' beyaquen xṉa ca chen.  
\v 13 Na' beljw ca' beseyiṉjen besežinten ḻo yežlion' can' chyiṉj no yix̱güigw da' žia ḻo xyaguen cate' chec̱hj to be' gual da' chtan ḻen.  
\v 14 Nach ḻe'e yaban' benittecczen ca to no yiš da' chedobḻoḻen. Na' yogo' ya'a ca' na' no yežlio dao' da' ca' zjachi' ḻo' nisdaon' bosoša' xišnan'.  
\v 15 Nach yogo'ḻoḻ beṉe' že' yežlion', yogo' beṉe' ca' chesenabia' ḻo yežlion', yogo' x̱an soldadw, yogo' beṉe' blao beṉe' gwṉi'a, yogo' beṉe' cheson xšin beṉe' yoble ca beyix̱e', na' len yezica'chle beṉe', yogo'cze' bosocuaše' cuingaque' do xan bloj, do ladjo yej xen da' zjažia ḻo ya'a ca'.  
\v 16 Na' gosene': 
\p ―C̱he'šca bdiṉj na' yej quinga na' ya'a quinga yesebix̱en yeseyenen chio' cont bi le'e Diosen' chio', Dios ben' chi' chnabia', na' yeseyenen chio' cont Jesucriston' ben' zaca'lebde' ca xila' daon' be gosot beṉe' ṉec̱he xtoḻa'gaque' bi gone' saca'zi'cho.  
\v 17 Ḻe ba bžin ža gac juisyw, na' Diosen' len Jesucriston' ḻeca cheseže'e chio' bi chonxencho ḻegaque', na' nono soe da' yesone' saca'zi'cho. 
\c 7  
\s1 Beṉe' Israel ca' beṉe' zjanyiše' seyw c̱he Diosen' 
\p  
\v 1 Gwdena' ble'eda' tap angl zjazeche' tap squin c̱he yežlion' bosozague' ben' cont bi gwyec̱hjen ḻo yežlion', ḻo nisdaon' o gan' ze yag ca'.  
\v 2 Na' ble'eda' yeto angl beṉe' za' gan' chla' gwbiž na' nox̱e' to da' gwc̱hine' gwc̱hiše'de' seyw c̱he Dios ḻoxga beṉe' ca' chesonxen ḻe', Dios beṉe' zoa toḻi tocaṉe. Na' anglen' gwṉe' zižje boḻ güiže' angl ca' tap ben' zjanac ḻo ne'e yesone' gac yeḻa' zi' ḻo yežlion' len ḻo nisdaon'.  
\v 3 Gože' ḻegaque': 
\p ―Bi gwžiayi'le yežlion', ṉe nisdaon', ṉe yag ca' šlac biṉa' gwc̱hiša' seyw c̱he Dios c̱hecho ḻoxga beṉe' ca' chesonxen ḻe'. 
\p  
\v 4 Na' benda' gwne' baḻ beṉe' bc̱hiše' seyon' beṉe' za'ac ḻo yogo' diaža c̱he beṉe' Israel, na' yogüe' gosac to gayoa tapeyon mile'.  
\v 5 Šižiṉw mile' za'aque' ḻo diaža c̱he da' Judá, šižiṉw mile' ḻo diaža c̱he da' Rubén, šižiṉw mile' ḻo diaža c̱he da' Gad,  
\v 6 na' šižiṉw mile' ḻo diaža c̱he da' Aser, šižiṉw mile' ḻo diaža c̱he da' Neftalí, šižiṉw mile' ḻo diaža c̱he da' Manasés,  
\v 7 na' šižiṉw mile' ḻo diaža c̱he da' Simeón, šižiṉw mile' ḻo diaža c̱he da' Leví, šižiṉw mile' ḻo diaža c̱he da' Isacar,  
\v 8 šižiṉw mile' ḻo diaža c̱he da' Zabulón, šižiṉw mile' ḻo diaža c̱he da' José na' šižiṉw mile' ḻo diaža c̱he da' Benjamín. 
\s1 Beṉe' zan zjanyaze' lache' šiš 
\p  
\v 9 Na' gwdena' gwṉa'a da' yoble na' ble'eda' zjaze beṉe' zan lao Diosen' gan' chi'e chnabi'e na' lao ben' zaca'lebde' ca xila' daon' be gosot beṉe' Israel ṉec̱he xtoḻa'gaque'. Na' nono goc yosolab baḻ beṉe' že', ḻe gosaque' beṉe' zan juisyw, beṉe' to to nación, to to yež, to to diaža, na' gosaque' beṉe' chesac gwde gwdele diža' da' de ḻo yezlion'. Na' yogüe' zjanyaze' lache' šiš na' zjanox̱e' zin.  
\v 10 Na' chesyebede' bososye'e gosene': 
\q1 X̱anto' Dios ben' chi' chnabia' na' Jesucristw ben' zaca'lebde' ca xila' daon' be gosot beṉe' Israel ṉec̱he xtoḻa'gaque', 
\q1 ḻegaque' ba gosoṉe' yeḻa' mban c̱hecho toḻi tocaṉe. 
\m  
\v 11 Nach yogo'ḻoḻ angl ca' zjaze' cue'ej cuite' gan' chi'e chnabi'e, na' beṉe' blao ca' tapechoa na' beṉe' ca' tap zjažia x̱il, yogo'ḻoḻe' jasechaze' cosc̱ho'ale ḻo yon' gosonxene' Diosen',  
\v 12 gosene': 
\q1 Chac can' cheyaḻa' gac, Dios c̱heto'. 
\q1 Zaca'czo' gonxento' le' toḻi tocaṉe, 
\q1 ḻe naco' beṉe' zaca' juisyw, 
\q1 naco' ḻa'zelagüe beṉe' sina', 
\q1 zaco' güe'to' yeḻa' chox̱clen c̱hio' na' güe'to' yeḻa' bala'aṉ c̱hio' toḻi tocaṉe, 
\q1 chnabi'o doxen, na' napo' ḻa'zelagüe yeḻa' guac xen. 
\q1 Can' nacczen. 
\p  
\v 13 Nach to beṉe' blao ben' nac txen len beṉe' tapechoa ca' gože'nda': 
\p ―¿Ṉezdo' no zjanac beṉe' quinga zjanyaz lache' šiš na' ga za'aque'? 
\p  
\v 14 Na' boži'an goša'ne': 
\p ―Le' ṉezdo' beṉe' gole, bi ṉezda' neda'. 
\p Nach gože' neda': 
\p ―Beṉe' quinga ba gosaḻe'de' da' ba gosac c̱hegaque' yežlion'. Na' bac̱h gwnitlao xtoḻa'gaque' na' ba zjanyaze' lache' šiš, ḻe chesejnilaže' Jesucristw ben' blalj xc̱hene' ca xila' dao' be gosot beṉe' Israel cont bezi'xen Diosen' xtoḻa'gaque'.  
\v 15 Da'nan' nite' lao Diosen' gan' chi'e chnabi'en chesonxene' ḻe' do ža do yel. Na' Dios ben' chi' chnabi'e zoe' chape' ḻegaque'.  
\v 16 Bich yesebiḻ yesedone', na' gwbižen' bich gwzeyen ḻegaque', ṉeca yesacde' zeye'.  
\v 17 Ḻe Jesucristw ben' zaca'lebde' ca xila' daon' ben' gosot beṉe' Israel ṉec̱he xtoḻa'gaque', ḻen' chgüia chṉe'e ḻegaque'. Ze' lao Diosen' gachoḻ gan' chi'e chnabi'e na' gone' cont ṉita'chgüe' mbalaz. Gone' cont bich yesebeže' ṉeca yesegüine'de'. 
\c 8  
\s1 Seyw gažen' 
\p  
\v 1 Gwde gože' neda' ca', nach Jesucristw ben' zaca'lebde' ca xila' daon' be gosot beṉe' gualaž c̱heton' bzoxje' seyw gaže da' nyiše' yiša', na' cate' bzoxjen' gocži yaban' do gašj hor.  
\v 2 Na' ble'eda' gaže angl ca' zjazeche' lao Diosen', na' bnežjue' ḻegaque' tgüeje trompeta.  
\v 3 Na' yeto angl bedeseche' cho'a mes de oro da' zoa lao Diosen' gan' chi'e chnabi'e, mesen' gan' beṉe' ca' že' yaban' chosozeye' bi da' chosozeye' cate' chesonxene' Diosen'. Na' angla' nox̱e' to barser de oro gan' yo'o da' zc̱ha'o yal na' bžien' ḻo yi' ya'alj da' žia ḻo mesen'. Anglen' bene' ca' cont naquen txen len ši'i beṉe' ca' chesonxene' Diosen' bate'teze chosoḻ güiže'ne'.  
\v 4 Nach gwyas žen c̱he yala' nox̱e' anglen' gwloen lao Diosen' len xtiža' beṉe' ca' chesonxene' ḻe'.  
\v 5 Nach anglen' gwxi'e ya'alj da' žia ḻo mesen' gwlo'en ḻo' barseren' na' bzaḻen' ḻo yežlion' na' gošj gwtinchgua, na' goc bichle sšag, gwyep yes na' gwxo'. 
\s1 Trompeta ca' 
\p  
\v 6 Nach angl ca' gaže ben' zjanox̱e' trompeta ca' bosozoan' cho'agaque' cont yosocuežen'. 
\p  
\v 7 Angl nechon' bcuež trompeta c̱hen', na' gwche'chgua yej ḻo yežlion' na' nc̱hix̱en yi' na' chen. Na' da' zc̱ha'o yežlion' gwžiayi', yelate'ze ca goc gašje yo da' de ḻo yežlion' gwyeyen, lente yag da' ze lagüen goseyen, na' ḻecze yeto ca'ate' yix̱e' ga' da' de ḻo yežlion' goseyen. 
\p  
\v 8 Nach angl gwchope bcuež trompeta c̱hen', na' to da' nac ca to ya'a xen blažon' ḻo' nisdaon' chaḻa'ṉiṉen. Na' yelate'ze ca goc gašje nisdaon' beyaquen chen.  
\v 9 Na' yelate'ze ca goc gašje be ca' že' ḻo' nisdaon' gosatba', na' ḻeze yeto ca'te' barcw ca' chaš ḻo nisen' gosebiayin'. 
\p  
\v 10 Nach angl gwyoṉe bcuež trompeta c̱hen' na' to beljw xen blažon' ḻe'e yaba chaḻa'ṉiṉen ca to yi' yech. Jago'oṉen ḻo da' zan yegw na' da' zan ga chal nis ḻo yežlion', yelate'ze ca goc gašje yegw ca' na' ga chal nis dan' zjade yežlion' gan' jago'oṉenṉa'.  
\v 11 Na' beljon' nzin' Da' Zḻa', na' nisen' gan' jago'oṉenṉa' beyaquen zḻa' na' beṉe' zan gosat dan' gose'eje' nisen'. 
\p  
\v 12 Nach angl gwdape bcuež trompeta c̱hen' na' yelate'ze ca goc gašje gwbižen' gwžiayin', ḻecze yeto ca'te' bion' gwžiayin' na' ḻecze yelate'ze ca goc gašje beljw ca' gosebiayin'. Na' da' ca' gosebiayin' bich bososeṉin'. Da'nan' gwdena' goc c̱hoḻ yelate'ze ca goc gašj ža gašj yel, na goc ca' yogo' ža yogo' yel. 
\p  
\v 13 Nach gwṉa'a na' ble'eda' chda ḻo be' to angl do gachoḻ ḻe'e yaban' na' benda' gwṉe' zižje, gwne': 
\p ―¡Nyaše'chgua yesac c̱he beṉe' ca' že' yežlion' yeyož yosocuež angl ca' yešoṉe trompeta c̱hegaquen'! 
\c 9  
\p  
\v 1 Nach angl beṉe' gayo' bcuež trompeta c̱hen' na' ble'eda' to beljw da' blažon' ḻe'e yaban' jago'oṉen ḻo yežlion'. Na' beljon' goquen ca to beṉe' na' Diosen' bnežjue'ne' xinya cont saljue' yechw zitjwchgua dan' nac ḻo gabiḻ.  
\v 2 Nach gwsaljue' yechon' na' gwyaschgua žen can' chas žen cate' chesebeque' yi' gual to ḻo' horn. Na' goc c̱hoḻ ḻe'e yaban' can' chac cate' chi'chgua žendao', lao gwbižen' len ḻo be' goquen c̱hoḻ catec gwche' ženṉa'.  
\v 3 Gan' gwyas ženṉa' besežaš biše'zo zan gwyašba' ḻo yežlion', be yeseyižba' beṉe' can' cheson bex̱joni' be chaš yežlio.  
\v 4 Diosen' gože'ba' bibi yesoneba' yix̱e' ga', ṉe da' zjanaze' na' ṉeca yag ca' ze yežlion', san yeseyižba' beṉe' ca' bi nyiše' sey c̱he Diosen' ḻoxgagaque'.  
\v 5 Na' bi be'e latje yesotba' ḻegaque', san šašba' gayo' bio' yosoc̱hi yososaca'ba' beṉe' ca'. Na' cate' yeseyižba' beṉe', yesežaglagüe' can' chžaglaocho cate' chyiž bex̱jonin' chio'.  
\v 6 Na' cate' žin ža yesomba' ca', beṉe' že' yežlion' yeseṉablaže' yesate', perw bi yesate'; yesaclaže' bich yesenite', perw bi gac can' yesaclažen'. 
\p  
\v 7 Ca nac biše'zo ca', ble'eda' zjanacba' ca cabayw be šja'ac ḻo gwdiḻe. Yic̱hjgacban' zjazoa da' nac ca corona de oro. Cho'alaoban' naquen ca cho'alao beṉac̱h.  
\v 8 Zjažiaba' yiša' da' nac ca yiša' yic̱hj no'ole. Ḻayban' zjanaquen ca ḻay bež znia be nzi' león.  
\v 9 Na' zjanyazba' to da' nac de ya da' chcue'ejen cuerp c̱hegacban'. Na' sšag da' chesomba' len x̱ilgacban' chṉiṉen ca chṉiṉ cate' chesa'acses cabayw zan zja'acba' ḻo gwdiḻe zjanxobba' carret.  
\v 10 Na' ḻo xban biše'zo ca' zjazoa ḻiba' zjanaquen ca xban bex̱joni' cont yeseyižba' beṉe', na' goc ḻo na'gacba' yosoc̱hi yososaca'ba' beṉe' že' yežlion' gayo' bio', yeseyižba' ḻegaque'.  
\v 11 Angl ben' beyac da' x̱igüe' dan' chnabia' gabiḻen' naquen x̱an biše'zo ca'. Ḻenṉa' nzi' Abadón diža' hebreo na' ḻecze nzin' Apolión diža' griego, na' zejen diža' Da' Chžiayin'. 
\p  
\v 12 Ba gwde yeḻa' zi' nechon' na' za' za'ac yec̱hopen. 
\p  
\v 13 Nach bcuež angl gwxopen' trompeta c̱hen', na' benda' gwṉe to beṉe' do gan' zoa mes de oro dan' ze lao Diosen', mes da' žia ḻozen dapte squin, mesen' gan' beṉe' ca' že' yaban' chosozeye' bi da' chosozeye' cate' chesonxene' Diosen'.  
\v 14 Na' boḻ güiže' angl gwxop ben' nox̱e' trompetan', gože'ne': 
\p ―Besež dap angl ca' ben' besyeyac beṉe' mal ben' zjanchej cho'a yegw da' nzi' Eufrates. 
\p  
\v 15 Nach beseže' angl ca' tap beṉe' ca' bnita' Diosen' cont yesaše' ḻo iz, bio', ža na' horen' nžie' bia' yesote' beṉac̱h, na' caten' gosaše', yelate'ze ca goc gašje beṉe' že' yežlion' gosote'.  
\v 16 Na' gwnita' c̱hop gayoa millón soldadw c̱hegaque' zjažie' cože' cabayon'. 
\p  
\v 17 Quinga ble'edaogüeda' cabayw ca' na' angl ca' beṉe' besyeyac beṉe' mal zjažie' cože'gacba' zjanaque' soldadw. Angl ca' zjanyaze' to de ya da' chcue'ej cho'alc̱ho'gaque' na' yana' chṉan' ca color c̱he yi' na' chṉan' da' azul na' da' gaše. Na' yic̱hj cabayw ca' zjanaquen ca yic̱hj bež znia be nzi' león, na' chchoj yi' cho'agacba' len žen na' len azufre da' chaḻa'ṉiṉ.  
\v 18 Yelate'ze ca goc gašje beṉe' že' yežlion' gosat len yi' na' len žen na' len azufre da' bchoj ḻo cho'agacba'.  
\v 19 Na' bosoc̱hin cho'agacba' na' len xbangacba' cont gosotba' beṉac̱h, na' xbangacban' gosaquen ca beḻ na' zjansa' yic̱hjen cont goseyi'iṉen beṉe'. 
\p  
\v 20 Na' beṉe' ca' besyega'aṉ bi gosat cate' gwyaš cabayw ca' ḻo yežlion', ḻegaque' bi besyetiṉjde' c̱he da' mal ca' chesone', ṉeca bososane' da' chesonxene' da' x̱igüe' ca' na' ḻ gua'a ḻsaca' c̱hegaque' ca' da' zjanac de oro, de plata, de bronce, de yej o de yag, ḻa'czḻa' ḻ gua'a ḻsaca' ca' bi chesele'en, ṉeca chesenen, na' ṉeca chac yesa'aquen.  
\v 21 Na' ṉeca besyetiṉjde' cont yesebejyic̱hje' bichle da' mal da' chesone', ca dan' chesote' beṉe', da' chesone' txen len no beṉe' guaža', da' chesone' da' yeḻa' zto' len cuerp c̱hegaquen', na' da' chesebane' da' de c̱he beṉe'. 
\c 10  
\s1 Angl beṉe' nox̱e' yiš dao' ndobyoyen 
\p  
\v 1 Nach ble'eda' yeto angl gual gwze'e yaban' betje' ḻo yežlion'. To bejw nyec̱hjen ḻe' na' zoa to pita' yic̱hjen'. Cho'alagüen' chṉa'titen ca gwbiž, na' yeṉi'e ca' ble'edan' zjanaquen ca bdope da' chaḻa'ṉiṉ.  
\v 2 Anglen' nox̱e' to yiš dao' da' ba beyašen. Na' bzoa šḻa'a ṉi'e ḻicha ḻo nisdaon' na' yešḻa'an bzoe' ḻo yežlion'.  
\v 3 Na' bosye'e zižje ca zižje chosya'a be nzi' león. Na' cate' bosye'e gwṉe gwzio' gaž ṉi'a na' to to gwzion' zoa da' gosenan.  
\v 4 Beyož goc ca' na' ba zoa gwzoja' diža' da' benda' šlac gwṉe gwzion' cate' to beṉe' zoa yaba gože'nda': 
\p ―Bi gwzojo' dižan' bendo' šlac gwṉe gwzion', san gwdapen ḻo' yic̱hjlažda'oguo'. 
\p  
\v 5 Nach angl ben' zoa šḻa'a ṉi'en ḻo nisdaon' na' yešḻa'an ḻo yežlion' gwḻis ne'e ḻichan' yabale.  
\v 6 Na' gwlo'e da' baḻi gac can' ža Dios ben' zoa toḻi tocaṉe, ben' ben ḻe'e yaba len yogo'te da' chle'echo ḻe'enṉa', bene' yežlion', beṉac̱h, beyix̱e', na' bite'tezechle da' de ḻo yežlion', na' bene' nisdaon' len be ca' na' da' ca' že' ḻo'enṉa'. Gwne': 
\p ―Bich cuez Diosen' gone' can' ba nžie' bia' gone'.  
\v 7 San cate' žin ža gwcuež angl gažen' trompeta c̱hen', cana'ch gac da' nžia Diosen' bia' gac, can' ba gože' beṉe' ca' goso'e xtižen', da' nono gwṉeze cani'. 
\p  
\v 8 Nach da' yoble ben' zoa yaban' ben' ba benczeda' gwṉie' neda', gwne': 
\p ―Gwyej jax̱i' yiš dao' dan' ba beyaš dan' nox̱e' angl ben' zecha zoa šḻa'a ṉi'en ḻo nisdaon' na' yešḻa'an ḻo yežlion'. 
\p  
\v 9 Da'nan' gwya'a gan' zoa anglen' jaṉaba' yišen'. Na' anglen' gože'nda': 
\p ―Bex̱on' gwdagon'. Ḻo' cho'on gacdon' zix̱ ca šina' beser, perw ḻo' ḻi'on yeyaquen zḻa'. 
\p  
\v 10 Nach bex̱oa' yišen' nox̱e' anglen' gwdaguan'. Na' ḻo' cho'an goquen zix̱ ca šina' beser, perw cate' bedaguan' beyaquen zḻa' ḻo' ḻi'an.  
\v 11 Nach anglen' gože' neda': 
\p ―Da' yoble cheyaḻa' go'o xtiža' Diosen' na' ṉao' can' gac c̱he zan yež, c̱he zan nación, c̱he beṉe' chesac gwde gwdele diža' da' de yežlion', na' c̱he zan beṉe' gwnabia'. 
\c 11  
\s1 C̱hope beṉe' goso'e xtiža' Diosen' 
\p  
\v 1 Nach anglen' beṉe' neda' to ya ca nac da' chosoc̱hine' cate' chosochix̱e' yo'o, na' gože'nda': 
\p ―Gwyej jachix̱e yodao' blao na' mes gan' chosozeye' bi da' chosozeye' cate' chesonxene' Diosen', na' gwlabo' baḻ beṉe' že' chesonxene' ḻe'.  
\v 2 Perw bi gwchix̱o' chyo'on, ḻe ba naquen ḻo na' beṉe' bi zjanac beṉe' Israel beṉe' bi chesejnilaže' Diosen' cont yesone' nacteze chesaclaže' ḻo ciuda c̱he Dios lao c̱hopeyon bio'.  
\v 3 Na' seḻa' c̱hope beṉe' yeso'e xtiža', na' yesaze' lache' gasj ca to beṉe' chegüine' na' yeseyix̱jue'ede' xtižan' lao to mil c̱hop gayoa gayon ža. 
\p  
\v 4 Beṉe' ca' c̱hope zjazaca'lebe' ca yag olivos ca' c̱hope na' ca candeler ca' c̱hope da' zjazoa lao Diosen' ben' nac X̱an yežlio.  
\v 5 Na' še no chaclaže' gonxi'e ḻegaque', choj yi' cho'a beṉe' ca' yeso'e xtižan' na' gwzeyen beṉe' chgue'ede' ḻegaque'. Can' gac yesat note'teze beṉe' chende' gonxi'e beṉe' ca' c̱hope.  
\v 6 Na' beṉe' ca' yeseyix̱jue'ede' xtižan', gac ḻo na'gaque' yesone' cont bi gac yejw šlac yeso'e xtižan', na' gac ḻo na'gaque' yesone' cont nisen' yeyaquen chen, na' bate'teze yesaclaže', yesone' gac bite'tezechle da' yesežaglao beṉe' že' yežlion'.  
\v 7 Perw cate' yeyož yeso'e xtižan', nach choj ḻo' gabiḻ gan' nac yechw zitjwchgua to bež x̱igüe' ṉizba' ḻegaque' na' gotteba' ḻegaque'.  
\v 8 Na' beṉe' ca' že'na' yosyocua'aṉe' cuerp c̱hegaquen' gan' chesetoḻen ḻa cay c̱he ciuda blaon' gan' gosote' X̱ancho Jesucriston'. Ciudan' zaca'leben ca ciuda Sodoma na' ca nación Egipto.  
\v 9 Na' šoṉe ža yo gašje beṉe' za'ac zan yež na' zan nación, beṉe' zjanac zan diaža, beṉe' chesac gwde gwdele diža' da' de ḻo yežlion', yeseṉe'e beṉe' guat ca' na' bi yeso'e latje yesegaše'.  
\v 10 Beṉe' ca' že' yežlion' yesyebede' da' gosat beṉe' ca' c̱hope, na' yosonežjo ḻježe' bi da' yosonežjo ḻježe' da' chesyebede' dan' bich nita' beṉe' ca' yeso'e xtiža' Diosen' len ḻegaque', ḻe ḻeca zed chesacden'.  
\v 11 Na' ble'edaogüeda' gwde šoṉe ža yogašje Diosen' bosbane' beṉe' ca' c̱hope na' gosezeche' da' yoble. Na' yogo' beṉe' besele'e ḻegaque' besežebchgüe'.  
\v 12 Nach beṉe' ca' gosoe' xtiža' Diosen' gosende' gož Diosen' ḻegaque' zižje: 
\p ―Ḻe yeda, ḻe yeyep nga. 
\p Nach beṉe' ca' chesegue'e ḻegaque' besele'ede' besyeyepe' yaban' to ḻo' bejw.  
\v 13 Šlac chesyeyepen' ḻeca gwxo' na' gwžiayi' late' ciudan', na' gaže mil beṉe' gosat caten' gwxon'. Na' beṉe' ca' besyega'aṉ besežebchgüe' na' gosonxene' Dios ben' zoa yaba. 
\p  
\v 14 Ba gwde yeḻa' zi' gwchopen' na' za' gac da' gwyoṉe. 
\s1 Can' goc cate' angl gaže bcueže' trompeta c̱hen' 
\p  
\v 15 Nach angl beṉe' gažen' bcuež trompeta c̱hen' na' benda' baḻ beṉe' ca' že' yaban' goseṉe' zižje, gosene': 
\q1 Doxen yeḻa' chnabia' c̱he yežlion' 
\q1 bac̱h naquen ḻo na' X̱ancho Diosen' na' ḻo na' Cristo ben' gwleje' cont chnabi'e. 
\q1 Na' Diosen' zoacze' chnabi'e toḻi tocaṉe. 
\m  
\v 16 Nach beṉe' blao ca' tapechoa ben' zjachi' cue'ej cuit Diosen', jasechaze' cosc̱ho'ale ḻo yon' gosonxene' Diosen',  
\v 17 gosene': 
\q1 Chonto' yeḻa' chox̱clen c̱hio' X̱anto', 
\q1 ḻe naco' Dios ben' nap yeḻa' guac xen. 
\q1 Ba zoaczo' cate' biṉa' x̱e yežlion', 
\q1 na' soaczo' toḻi tocaṉe. 
\q1 Na' ba gwzolao chnabi'o len yeḻa' guac xen c̱hion' cont gac can' chazlažo' doxen. 
\q1  
\v 18 Beṉe' nación ca' že' yežlion' beseže'e le', 
\q1 perw ba bžin ža gono' yesezaca'zi'e. 
\q1 Ba bžin ža c̱hoglaguo' c̱he yogo' beṉe' ca' ba gosat še noe' nap doḻa'. 
\q1 Na' gono' cont beṉe' güen xšino' ca' beṉe' ca' goso'e xtižon' yesenite' mbalaz, 
\q1 len yogo' beṉe' gwlejo' cont zjanaque' ḻo nao', beṉe' gosonxen le'. 
\q1 Con yogo' beṉe' gosonxen le' yesenite' mba, beṉe' gole len beṉe' xcuide'. 
\q1 Ḻecze ba bžin ža yesebiayi' beṉe' ca' bosožiayi' ḻjež beṉac̱he' yežlion'. 
\p  
\v 19 Nach byaljo gan' chesonxene' Diosen' yaban' na' ble'eda' caj gan' že' yej ca' gan' nyoj da' ca' gož Diosen' beṉe' Israel gualaž c̱heto' ca' yesone' cont gaclene' ḻegaque'. Na' šlac gwṉa'a, gwyep yes, gocchgua sšag, gošj gwtin, gwxo' na' gwche'chgua yej. 
\c 12  
\s1 No'olen' na' beḻ be zoa gaž yic̱hj 
\p  
\v 1 Na' ble'edaogüeda' to da' yebanchgüecho ḻe'e yaban', ble'eda' to no'ole na' nyaze' gwbižen' ca xe'. Nḻeje' ḻo bion' na' zoa to corona yic̱hje' da' žian šižiṉw beljw.  
\v 2 No'olen' no'e bdao' na' chosye'e, ḻe chaque' bes c̱he yeḻa' sanṉa'.  
\v 3 Na' ble'eda' yeto da' zaca' yebanecho ḻe'e yaban', ble'eda' Satanás dan' chnabia' da' x̱igüe' ca', ba naquen ca to beḻ be žia gaž yic̱hj, be xen juisyw. Nacba' be xṉa na' žia ši ḻozba' na' zoa tgüeje corona to to yic̱hjban'.  
\v 4 Na' bta xbamban' cont bc̱hiṉjen zan beljw ca' žia ḻe'e yaban' na' beselažon' ḻo yežlion', yelate'ze ca goc gašje beḻjw ca' zjažia ḻe'e yaban' bc̱hiṉj xbamban'. Na' gwlezba' xṉi'a no'olen' ba zoa sanṉa' cont yebba' bdao' c̱hen' cate' sane'be'.  
\v 5 Nach no'olna' gwxane' to bi' byo bi' ṉabia' nación ca' na' žan ca žan yosozenague' c̱hebe'. Nach Diosen' beyo'ebe' gan' chi'e chnabi'e.  
\v 6 Nach no'olen' boxoṉjde' beḻen', na' gwyeje' to latje daš da' benšagüe' Diosen' c̱he', gan' yeso'ene' da' ye'ej gagüe' lao to mil c̱hop gayoa gayon ža. 
\p  
\v 7 Gwde na' goc to gwdiḻe yaban', ḻe angl blao ben' le' Miguel na' soldadw c̱he' ca' gosediḻlene' beḻ ben' žia gaž yic̱hj lencze angl c̱he beḻen' beṉe' ca' besyeyac da' x̱igüe'.  
\v 8 Na' beḻen' len da' x̱igüe' ca' bi gosezoen angl ben' zjanac beṉe' c̱he Dios, na' bich bi latje gota' c̱he beḻen' yaba, ṉeca c̱he da' x̱igüe' ca' zjanac ḻeba' txen.  
\v 9 Angl c̱he Diosen' bosozaḻe'ba' ḻo yežlion'. Na' ḻecze bosozaḻe' da' x̱igüe' ca' ḻo yežlion'. Beḻnan' ben' zoa ža gwlaste nacba' gwxiye' na' leba' Satanás, na' ṉe' zoaczba' ṉa'a chziye'ba' yogo' beṉac̱h. 
\p  
\v 10 Nach benda' to beṉe' zoa yaban' gwṉe' zižje gwne': 
\p ―Bac̱h bžin ža ben Dios c̱hechon' cont beṉe' ca' chesejnilaže'ne' zjanite' len ḻe'. Bac̱h bžin ža nacbia' Dios c̱hechon' nape' yeḻa' guac xen. Ba bžin ža chnabi'e cont gac con da' cheyaḻa'cze gac. Na' ba bžin ža Criston' ben' gwleje' cont ṉabi'e bac̱h chnabia'lene' ḻe'. Gac da' cheyaḻa'cze gac, ḻe Satanás dan' ba gwzoa lao Diosen' do ža do yel bcuišen beṉe' chesejnilaže' Criston', bac̱h besyebejen'.  
\v 11 Na' beṉe' gosejnilaže' Criston' na' ba gosate', gosezoede' bi bosozenague' c̱he Satanásen', ḻe gosejḻe'e Jesucriston' blalj xc̱hene' ṉec̱he xtoḻa'gaque' na' goso'e diža' chesejnilaže'ne'. Beṉe' ca' ba gosat gosacbe'ede' yejṉi'a yesate' clel ca yesebejyic̱hje' Jesucriston'.  
\v 12 Yaban' cheyaḻa' gosya'an yeḻa' chebe c̱hen, na' le'e že'le gan' zoa Diosen' cheyaḻa' yebele, perw nyaše'chgua gac c̱he le'e zoale ḻo yežlion' na' ḻo' nisdaon', ḻe Satanás dan' chnabia' da' x̱igüe' ca' ba betjen gan' zoalen' chaclocchguan, ḻe ṉezen yešložga de latj c̱hen. 
\p  
\v 13 Nach cate' beḻen' gocbe'eba' bosozaḻe'ba' ḻo yežlion', blagsesba' no'olen' gwxan bi' byo daon'.  
\v 14 Perw Diosen' bnežjue' c̱hop x̱ile' da' xen ca x̱il bsiadao' cont gwyeje' latje daš gan' bi goc žin beḻen', latje gan' benšagüe' c̱he' gan' yeso'ene' da' ye'ej gagüe' šoṉ iz yo gašje.  
\v 15 Na' bchoj nis zil cho'a beḻen' goquen to yegw cont bžinen gan' zoa no'olen' na' guan' ḻe'.  
\v 16 Perw Diosen' bene' cont yežlion' goclenen no'olen', byaljon güe'ejen nis dan' bchoj cho'a beḻen'.  
\v 17 Nach beḻen' blocchguaba' no'olen' na' gwyejba' jatiḻlemba' yezica'chle xi'iṉe' da' chosozenague' c̱he Diosen', chesone' con da' že' na' zjanita'c̱hac̱he' chesejnilaže' xtiža' Jesucriston'. 
\c 13  
\s1 C̱hope bež x̱igüe' be ble'e Juan 
\p  
\v 1 Na' gwzia' cho'a nisdaon' na' ble'eda' bchoj to bež x̱igüe' ḻo' nisdaon'. Bežen' nita' gaž yic̱hjba' na' žia ši ḻozba' na' žia tgüeje corona lao to to ḻozban'. Na' to to yic̱hjban' nyoj to laba' da' chlo'en chon cuimba' ca Dios.  
\v 2 Ble'eda' bežen' nacba' ca to tigr, perw ṉi'ana'ban' zjanaquen ca ṉi'a na' oso na' cho'aban' naquen ca cho'a león. Nach beḻ ben' žia gaž yic̱hj bnežjwba' bežen' yeḻa' guac na' yeḻa' chnabia' c̱heban' cont gwnabia'ba' na' cont gosenita' beṉac̱h bosozenague' c̱heba'.  
\v 3 Ble'eda' to yic̱hj bežen' nacchguan güe', ca to da' gatlemba', perw beyacba'. Na' yogo'ḻoḻ beṉac̱h besyebande' dan' beyacban' na' bosozenague' c̱heba'.  
\v 4 Yogo'ze beṉe' gosonxene' beḻen' dan' bemba' cont gwnabia' bež x̱igüen', na' ḻecze gosonxene' bež x̱igüen', gosene': 
\p ―Nono zoa beṉe' nap yeḻa' chnabia' xen ca bež nga, na' nono zoa beṉe' soede' tiḻlene'ba'. 
\p  
\v 5 Ḻecze nono bžon gwna bežen' zaca'chba' ca Dios, na' gwnaba' yeḻa' ya' c̱he Diosen'. Na' goc ḻo na' bežen' gwnabia'ba' c̱hopeyon bio'.  
\v 6 Na' gwṉechguaba' yeḻa' ya' c̱he Diosen' na' c̱he yaba gan' zoe' na' len c̱he yezica'chle beṉe' ca' že' yaban'.  
\v 7 Na' gwyo'o ḻo na' bežen' gwdiḻlemba' beṉe' ca' gosejnilaže' Diosen' na' bi gosezoede'ba'. Bibi goc yesone' cont yesyechoje' ḻo na'ba'. Gwnabia'ba' yogo' nación, yogo' yež, yogo' diaža na' beṉe' chesac gwde gwdele diža' da' de ḻo yežlion'.  
\v 8 Na' yogo' beṉe' že' yežlion' beṉe' bi zjanyoj lagaque' ḻe'e libr c̱he Jesucriston', gosonxene' bežen'. Ḻe cate' gwxete yežlion' Jesucriston' bzoje' ḻe'e libr c̱he' la yogo' beṉe' ṉezde' gata' yeḻa' mban c̱hegaque' toḻi tocaṉe, Jesucristw ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaque'. 
\p  
\v 9 Note'tez le'e žia nagle da' chene, ḻe gwzenag da' nga ṉia' le'e.  
\v 10 Beṉe' yeseyix̱jue' ḻjež beṉac̱he' ḻižya, decze de ḻižya yesata' ḻegaque'. Na' beṉe' yesot ḻjež beṉac̱he' len spada, decze de gac c̱hegaque' ca'. Da'nan' chonen byen soac̱hac̱h chio' ba gwlej Diosen' cont naccho ḻo ne'e, gwyo gwc̱hejcho len bi da' gac c̱hecho na' soac̱hac̱hcho šejnilaže'chone'. 
\p  
\v 11 Gwdena' ble'eda' yeto bež x̱igüen' be bchoj ḻo' yo. Na' žia c̱hop ḻozba' da' nac ca ḻoz xila', perw be'ba' diža' can' choe' beḻ ben' žia gaž yic̱hjen' diža'.  
\v 12 Na' bež nechon' bemba' cont bež gwchopen' gwnabia'ba' par ḻeba' na' bež gwchopen' bemba' cont yogo' beṉe' že' yežlion' gosonxene' bež nechon' ben' beyaque len güe' dan' naquen ze da' got ḻeba'.  
\v 13 Na' bež gwchopen' bemba' zan da' bebanchgüe beṉe' len yeḻa' guac c̱heban', na' bemba' cont besele'ede' yi' ḻe'e yaban' na' beselažon' ḻo yežlion'.  
\v 14 Na' da' bemba' da' ca' gan' zoa bež nechon', gwziye'ba' beṉe' že' yežlion' cont bosozenague' c̱heba'. Nach bemba' mandadw gosone' to ḻ gua'a ḻsaca' da' nac ca bež nechon' da' gosonxene', bež ben' goc yic̱hjban' güe' len spada, güe' da' naquen ze da' got ḻeba' perw beyacba'.  
\v 15 Na' goc ḻo na' bež gwchopen' bemba' cont ḻ gua'a ḻsacan' gwyo'on biš grasyw. Na' goc gwṉen, benen mandadw gosote' yogo' beṉe' bi gosonxenen'.  
\v 16 Na' bež gwchopen' ḻecze bemba' byen gosezoa yogo' beṉe' señw c̱he bežen' ḻe'e na'gaque' ḻicha o ḻoxgagaque', beṉe' gole len bi' bixjw, na' beṉe' gwṉi'a len beṉe' yaše', na' beṉe' cheson xšin beṉe' yoble ca beyix̱e' len yezica'chle beṉe'.  
\v 17 Na' note'teze beṉe' še bi zoe' señw c̱he bežen' o laba' o número da' zejen laba', bi goc bi si'e ṉeca goc bi gote'.  
\v 18 Chyažjecho yeḻa' sina' cont šejni'icho da' nga. Beṉe' chejni'i guac gwlabe' número c̱heban', ḻe naquen número da' chc̱hin beṉac̱h, na' número c̱heban' naquen x̱op gayoa gayon x̱op. 
\c 14  
\s1 Da' gosoḻ beṉe' ca' to gayoa tapeyon mil gosonxene' Diosen' 
\p  
\v 1 Na' gwṉa'a na' ble'eda' Jesucristw ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaquen', zeche' ḻo ya'a Sión len to gayoa tapeyon mil beṉe' yoble. Na' zjanyoj la Jesucriston' len la X̱e' Diosen' ḻoxgagaque'.  
\v 2 Na' benda' chesoḻ beṉe' zan beṉe' že' yaban'. Nenen ca chsiž ga zjadechgua yegw zan na' ca nen cate' chašjw chtin. Na' nenen ca nen cate' beṉe' zan chosogoḻe' arpan' to ši'ize.  
\v 3 Na' gosoḻe' to da' cobe lao Diosen' na' lao beṉe' ca' tap zjažia x̱il na' lao beṉe' blao ca' tapechoa gan' chi' Diosen' chnabi'e. Noch no beṉe' yoble goc goḻ ḻen, con beṉe' ca' to gayoa tapeyon mil na'ze gosac bososede' dan' gosoḻen' cont gosonxene' Diosen', ḻegacze' bebej Criston' ḻo na' Satanásen' šlac ṉe' nite' yežlion'.  
\v 4 Beṉe' ca' gosoḻen' zjanaque' beṉe' bi gosata'lene' no'ol bi nac xo'olgaque', na' gosapchgua cuingaque' cont gosac lažda'ogaquen' xilaže' len Diosen'. Na' zja'acteze' len Jesucriston' gate'teze zeje' chosozenague' c̱he', ḻe bebeje' ḻegaque' ḻo na' Satanásen' cont zjanaque' ḻo ne'e na' ḻo na' Diosen'. Da'nan' zjazaca'lebde' ca to tlacw coseš da' bnežjw beṉe' Israel gualaž c̱heto' ca' ḻo na' Diosen'.  
\v 5 Gwbat goso'e diža' güenḻaže' na' bibi doḻa' zjanape' lao Diosen' ben' chi'e chnabi'e. 
\s1 Da' gosena šoṉe angl 
\p  
\v 6 Nach ble'eda' yeto angl ḻe'e yaban' chde' ḻo be'. Na' gwdix̱jue'ede' diža' güen c̱he Diosen' da' bi te c̱hen len beṉe' že' yežlion', len beṉe' zjanac to to nación, to to yež, to to diaža, na' beṉe' chesac gwde gwdele diža' da' de yežlion'.  
\v 7 Gwṉe' zižje gože' ḻegaque': 
\p ―Ḻe žeb Diosen' na' ḻe gonxene', ḻe ba bžin hor gone' yeḻa' justis c̱he beṉac̱h. Ḻe gonxen Dios ben' ben yaban', yežlion', nisdao' na' ga chal nis. 
\p  
\v 8 Yeto angl za' cožen' gwne': 
\p ―Bac̱h bžin ža cuiayi' ciuda Babilonia da' nac da' blao. Bac̱h bžin ža cuiayi' ciuda c̱he beṉe' ca' bosozoe' Diosen' ca'ale na' gosebede' da' nac yeḻa' zto', ḻe ba gosego'oyeḻe' beṉe' že' yogo' nación cont chesone' güedenag len Diosen'. 
\p  
\v 9 Nach yeto angl zej cože' beṉe' gwchopa' be'e diža' zižje gwne': 
\p ―Note'teze beṉe' chesonxen bež x̱igüen' len ḻ gua'a ḻsaca' c̱heba' na' cheso'e latje chesezoa señw c̱he beža' ḻoxgagaque' o taca'gaque',  
\v 10 Diosen' ba nžie' bia' yesesaca'zi'chgua beṉe' ca'. Yesezaca'zi'e gan' chaḻa' yi' len azufre lao angl c̱he Diosen' na' lao ben' zaca'lebde' ca xila' dao' ben' gosot beṉe' Israel ṉec̱he xtoḻa'gaque'.  
\v 11 Toḻi tocaṉe c̱has žen c̱he yi' gan' yesezaca'zi'en. Na' beṉe' ca' chesonxen bežen' len ḻ gua'a ḻsaca' c̱heban', na' beṉe' zjazoa señw c̱he bežen' ḻoxgagaque' o taca'gaque', bi gac yesyezi'laže' len da' yesezaca'zi'en ṉe chel ṉe lagüe ža.  
\v 12 Da'nan' chonen byen soac̱hac̱h chio' ba gwlej Diosen' cont naccho ḻo ne'en, gwyo gwc̱hejcho len bi da' chac c̱hecho, chio' chzenagcho c̱he da' non Diosen' mandadw goncho na' bi chbejyic̱hjcho dan' chejnilaže'cho Jesúsen'. 
\p  
\v 13 Nach benda' to beṉe' zoa yaban' gwne': 
\p ―Bzoj da' nga: “Mbalaz beṉe' ca' ṉe' chesejnilaže' X̱ancho Jesucriston' žinte ža yesate'. Can' chac ṉa'a na' can' gac bate'teze.” 
\p Na' Spiritw c̱he Diosen' žan: 
\p ―Da' ḻi ṉite' mbalaz, ḻe yesyezi'laže' len xšingaquen', na' gacbia' yogo' da' güen da' ba gosone'. 
\s1 Yotob Diosen' beṉe' bi chosozenague' c̱he' cont yesezaca'zi'e 
\p  
\v 14 Nach gwṉa'a da' yoble na' ble'eda' to bejw šiš ḻe'e yaban' na' cože' bejon' chi' to beṉe' nac ca to beṉac̱h. Na' zoa to corona de oro yic̱hjen' na' nox̱e' to da' nzi' hoz da' nḻachgua.  
\v 15 Na' yeto angl bchoj ḻo' gan' chesonxene' Diosen' yaban' na' gwṉe' zižje gože' ben' chi' cože' bejon': 
\p ―Ba bžin hor yotobo' coseš c̱he uvas dan' de yežlion', ḻe ba golen. 
\p  
\v 16 Nach ben' chi' cože' bejon' nox̱e' hoz botobe' cosešen'. 
\p  
\v 17 Nach bezchoj yeto angl ḻo' gan' chesonxene' Diosen' yaban' na' ḻecze nox̱e' yeto hoz da' nḻachgua.  
\v 18 Na' ḻecze bezchoj yetoe' ben' yo'o ḻo ne'e yi' da' chaḻa' ḻo mes gan' chesonxene' Diosen'. Na' angl nga gwṉe' zižje boḻ güiže' angl gwchopa' ben' ḻecze nox̱e' hoz, gože'ne': 
\p ―Ba güe uvas da' žia ḻo yežlion'. Bec̱hoguen len hoz c̱hion' dan' nḻachgua cont yotobchon. 
\p  
\v 19 Nach anglen' bec̱hogue' uvas da' žia yežlion' len hoz dan' nox̱en' na' botoben' bzaḻen' to ḻo' ša' xen ga yesesien' cont choj x̱isen'. Zeje diža', Diosen' botobe' beṉe' ca' bi bosozenag c̱he' na' gwlo'e ḻegaque' ga yesezaca'zi'e.  
\v 20 Na' gan' gosezaca'zi'en naquen cho'a ciudan', na' ḻo' ša' xen gan' gwlo'e uvasen' belalje chen zil da' nac xc̱hengaque', bežinen ca sibe to xc̱hega' cabayw, na' bžiljon šoṉe gayoa mil metr. 
\c 15  
\s1 Angl ca' zjayo'o ḻo na'gaque' gaže yeḻa' zi' da' zelao yesac 
\p  
\v 1 Na' ble'eda' yeto da' ḻeca zaca' yebanecho ḻe'e yaban'. Ble'eda' gaže angl beṉe' zjanac ḻo na'gaque' yesone' yegaže yeḻa' zi' cont yeyož gwlo'e Diosen' can' chone' da' chloque' beṉe' ca' cheson da' xiṉj. 
\p  
\v 2 Ḻecze ble'eda' to da' nac ca to nisdao' de vidrw da' nc̱hix̱en yi'. Na' cho'a nisdaon' zjazecha beṉe' ca' gosezoede' bi gosonxene' bežen' na' ḻ gua'a ḻsaca' dan' nac ca ḻeba', na' bi goso'e latje yosozoe' ḻegaque' señw c̱heba' o número da' zejen laba'. Na' zjanox̱e' tgüeje arpa da' bnežjw Diosen' ḻegaque'.  
\v 3 Na' ble'eda' ḻegaque' chesonxene' Diosen' chesoḻe' to da' bsede da' Moisésen' beṉe' Israel gualaž c̱heto' ca', Moisés ben' ben xšin Diosen' cani'. Ḻecze chesoḻe' da' naquen to da' bsede Jesucriston' ḻegaque', Jesucristw ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaque'. Quinga žan: 
\q1 X̱anto' Dios, yogo' da' ba beno' len yeḻa' guac xen c̱hio' 
\q1 naquen da' güen juisyw na' da' zaca' yebanecho. 
\q1 Yogo' da' chono' zejen to ḻicha na' naquen da' zaca'. 
\q1 Len' chnabi'o nación ca'. 
\q1  
\v 4 Nono zoa beṉe' bi cheyaḻa' žebe' le' X̱anto', da' choṉo' castigw c̱he da' malen'. 
\q1 Nono zoa beṉe' bi cheyaḻa' gonxene' le'. 
\q1 Tozo' le' naco' beṉe' laždao' xilaže' juisyw. 
\q1 Na' beṉe' že' yogo' nación yeside' laguon' yesonxene' le', 
\q1 ḻe ba besele'ede' da' ba beno' na' zjaṉezde' zejczen to ḻicha. 
\p  
\v 5 Gwde benda' da'na' nach gwṉa'a da' yoble na' ble'eda' byaljo gan' chesonxene' Diosen' yaban', latje gan' ngo'ošagüe' ley c̱he Dios da' nyoj.  
\v 6 Na' ble'eda' gaž angl ca' zjayo'o ḻo na'gaque' yesone' gac gaž yeḻa' zi' ḻo yežlion', besechoje' gan' chesonxene' Diosen' yaban'. Angl ca' zjanyaze' lache' šagüe' da' nac šiš xila' da' chactiten, na' to toe' nchej cho'alc̱ho'e to bant de oro.  
\v 7 Na' ble'eda' beṉe' ca' tap zjažia x̱il ben' nita' lao Diosen', na' toe' bnežjue' angl ca' gažen' tgüeje tas de oro da' zjanža'ten da' zjayožen da' chon cont chac yeḻa' zi' ca' ḻo yežlion', na' zejen Diosen' ben' zoa toḻi tocaṉe chlocchgüe' da' cheson beṉe' bi chosozenag c̱he'.  
\v 8 Na' doxen gan' chesonxene' Diosen' yaban' gwche'chguan ca žen c̱he be'ni' da' nsa' Diosen' na' c̱he yeḻa' guac xen c̱he'. Nono goc šo' gan' chacxen Diosen' šlac biṉa' yeyož yesac yeḻa' zi' ca' gaž da' zjanac ḻo na' gaž angl ca'. 
\c 16  
\s1 Tas ca' gaže na' yeḻa' zi' ca' gosac cate' bososc̱ho'en 
\p  
\v 1 Na' benda' gwṉe Diosen' zižjechgua, zoe' gan' chacxene', gože' angl ca' gaže: 
\p ―Ḻe šja'ac ḻe šjalalj dan' yože ḻo' tas c̱helen' ḻo yežlion', da' zejen ḻeca chloca' da' xiṉj cheson beṉe' ca' bi chosozenag c̱hia', na' gona' ga yesezaca'zi'chgüe'. 
\p  
\v 2 Nach angl nechon' gwyeje' jalalje' da' yože ḻo' tas c̱hen' ḻo yežlion' gan' nac yo biž, na' yogo' beṉe' ca' zjazoa señw c̱he bežen' na' chesonxene' ḻ gua'a ḻsaca' da' nac ca ḻeba', gosebie' güe' xen güe' zban na' goselachgüe'. 
\p  
\v 3 Nach angl gwchopen' jalalje' da' yože ḻo' tas c̱hen' ḻo nisdaon' na' nisdaon' beyaquen chen ca chen c̱he beṉe' guat, na' gosat yogo' be ca' že' ḻo' nisen'. 
\p  
\v 4 Nach angl gwyoṉen' jalalje' dan' yože ḻo' tas c̱hen' ḻo yegw ca' na' gate'ze chal nis na' ḻecze besyeyaquen chen.  
\v 5 Nach benda' gwṉe angl ben' chape' nisen' da' de ḻo yežlion', gože' Diosen': 
\p ―X̱anto' Dios, len' naco' beṉe' laždao' xilaže' juisyw. Ba zoaczo' le' cate' za' x̱e yežlion'. Zejczo' ḻicha can' ba gwc̱hoglaguo' chac da' quinga,  
\v 6 ḻe beṉe' že' yežlion' ba gosote' beṉe' ca' goso'e xtižon' na' gosote' nochle beṉe' gosac ḻo nao'. Da'nan' ba beno' cont yese'eje' chen ṉec̱he da' bosolalje' xc̱hen beṉe' ca'. Na' da' chac c̱hegaque' naquen da' cheyaḻa'cze gac. 
\p  
\v 7 Nach benda' gwṉe to beṉe' do cho'a mes gan' beṉe' ca' že' yaban' chosozeye' bi da' chosozeye' cate' chesonxene' Diosen', gwne': 
\p ―X̱anto' Dios, len' napo' ḻa'zelagüe yeḻa' guac xen, chono' con can' žo' gono', na' chono' da' zej to ḻicha cate' chc̱hogbi'o c̱he beṉe'. 
\p  
\v 8 Nach angl gwdapen' jalalje' dan' yože ḻo' tas c̱hen' ḻo gwbižen', na' gwbižen' bzeyen beṉac̱h.  
\v 9 Yogüe' ḻeca goseye', perw bi besyetiṉjde' xtoḻa'gaque' na' bi gosonxene' Diosen', con goseṉe' yeḻa' ya' c̱he Dios ben' be' latje goc da' ca' chesezaca'zi'e. 
\p  
\v 10 Nach angl gayon' jalalje' dan' yože ḻo' tas c̱hen' gan' chi' bežen' chnabia'ba' na' beyac c̱hoḻ doxen gan' chnabia'ban'. Na' beṉac̱hen' gosagwxejte lože'gaquen' catec gosesezaca'zi'e.  
\v 11 Na' goseṉe' yeḻa' ya' c̱he Dios ben' zoa yaban' ṉec̱he dan' chesezaca'zi'en na' ṉec̱he güe' xen dan' zjažia ḻo cuerp c̱hegaquen', perw ṉe ca' bi besyetiṉjde' c̱he da' mal dan' gosonen'. 
\p  
\v 12 Nach angl gwxopen' jalalje' dan' yože ḻo' tas c̱hen' ḻo yegw xen da' nzi' Eufrates, na' bebiž nis yegon' cont beyaquen to nez ga yesede beṉe' gwnabia' ca' za'ac do gan' chla' gwbiž. 
\p  
\v 13 Nach ble'eda' šoṉe da' x̱igüe' da' zjanac ca bḻož. Ton bchojen cho'a beḻ be zoa gaž yic̱hj, yeton bchojen cho'a bež x̱igüen' na' yeton bchojen cho'a ben' cho'e diža' güenḻaže' cont chesonxene' bežen'.  
\v 14 Na' da' x̱igüe' quinga gosonen yeḻa' guac da' besyebane beṉe', na' jasetoben yogo' beṉe' gwnabia' ca' že' gate'teze ḻo yežlion' cont yesediḻlene' Dios ben' nap ḻa'zelagüe yeḻa' guac xen cate' žin ža gac ca'.  
\v 15 Na' benda' ben' nac Xi'iṉ Dios gwne': 
\p ―Ḻe gwzenag da' nga: ba zoa yida' da' yoble, yedexenyala' beṉe' bi chosozenag c̱hia' can' chzenyal beṉe' gwban ga chjaḻane'. Mbalaz zjazoa note'teze beṉe' nita'teze' chesebeze' neda' cate' yida' na' chesezaquede' bibi da' mal chesone', ḻe yesacde' zto' še biṉa' yesyetiṉjde' xtoḻa'gaquen' caten' yida', na' yogo'ze beṉe' yesacbe'ede' da' malen' ba gosonen' še ca'. 
\p  
\v 16 Nach bezle'eda' da' x̱igüe' ca' šoṉe bosyotoben yogo' beṉe' gwnabia' ca' že' ḻo' yežlion' to latje ga nzi' Armagedón diža' hebreo. 
\p  
\v 17 Na' angl gažen' jalalje' dan' yože ḻo' tas c̱hen' ḻo be', na' benda' gwṉe Diosen' zižje, gan' zoe' chesonxene' ḻe' yaban' gan' ḻecze chi'e chnabi'e, gwne': 
\p ―Bac̱h goc da' cheyaḻa' gac. 
\p  
\v 18 Nach gwyep yes, goc sšag, na' gošj gwtin, na' ḻeca gwxo'. Gwxo'ch ca ba goc bate'tezechle šlac že' beṉac̱hen' ḻo yežlion'.  
\v 19 Na' ciuda da' nac ḻa'zelagüe blao ḻo yežlion' gwžiayin' bchojen šoṉle, na' ḻecze gosebiayi' yezica'chle ciuda da' zjachi' ḻo yežlion'. Diosen' bich gwleze' bene' cont goseyi gosezaca'chgua beṉe' že' ciuda Babilonia c̱he da' mal da' ba gosonteque', ḻe blocchgüe' yeḻa' mal c̱hegaquen'.  
\v 20 Na' catequen' gwxo' besyenittecze yogo' yež da' zjachi' ḻo' nisdaon' na' yogo' ya'a ca'.  
\v 21 Na' gwche'chgua yej ži'a ḻo yežlion', yej zi'i da' cha'a do tapa rob güeje beselažon' cože' beṉe'. Na' beṉe' že' yežlion' goseṉe' yeḻa' ya' c̱he Diosen' ṉec̱he dan' besežaglaochgüe' len yej dan' gwchen'. 
\c 17  
\s1 Diosen' be'e castigw c̱he ciuda blao da' zaca'lebe ca to no'ole zḻe' 
\p  
\v 1 Na' ca nac angl gaž ca' gosox̱e' tas de oron', toe' bedeṉie' neda', gože'nda': 
\p ―Da, gwlo'eda' le' can' gon Diosen' saca'zi' no'ole blaon' chi' ḻo nisdao' ca', no'olen' nac no'ol zḻe'.  
\v 2 Yogo' beṉe' gwnabia' ca' že' yežlion' ba besyebede' bosozenague' c̱he' gualaz c̱he Diosen', na' da'nan' guac ṉacho zjanaque' xtoe'. Na' beṉe' že' yežlion' da' besyebechde' ḻe' clel ca Diosen', guac ṉacho gosezožde' da' ba gose'eje' vino da' bnežjue' ḻegaque'. 
\p  
\v 3 Nach šlac ben Spiritw c̱he Diosen' cont ble'edaogüeda' da' quinga, anglen' gwc̱he'e neda' to latje daš. Na' bžina' na' ble'eda' to no'ole žia cože' bež xṉa be nac gaž yic̱hjba' na' žia ši ḻozba'. Na' doxen cuerp c̱heban' nyoj diža' da' chžiaba' yeḻa' ya' c̱he Dios.  
\v 4 No'olen' nyaze' lache' da' nac moradw na' xṉa, na' non cuine' xdan len oro, len yej zaca' na' len perlas. Na' nox̱e' to tas de oro da' nža'ten yožen vino. Na' vinon' zejen chbede' chone' da' yeḻa' zto' na' bichle da' chgue'e Dios.  
\v 5 Na' ḻoxgue' nyoj diža' da' žan naquen' naque', diža' da' bi gosejni'i beṉac̱h, žan: “Naca' ciuda Babilonia na' nacchgua' blao. Naca' no'ole zḻe', ḻe chona' cont beṉe' že' yežlion' bi chesonxene' Diosen', na' chgo'oyeḻa' ḻegaque' cont chesone' da' zan da' chgue'e Diosen'.”  
\v 6 Na' ble'eda' chzože no'olen', ḻe ba güe'eje' xc̱hen beṉe' ca' zjanac ḻo na' Diosen', beṉe' goso'e diža' chesejnilaže' Jesúsen', na' da' ṉacho güe'eje' xc̱hengaque' zeje diža' betue' zane'. Na' cate' ble'eda' no'olen' ḻeca bebanda'.  
\v 7 Nach gož anglen' neda': 
\p ―Bi yebando'. Gwzejni'ida' le' bi zejen dan' ble'edo' no'olen' žie' cože' bež be gaž yic̱hjen' na' žia ši ḻozba'.  
\v 8 Bežen' ble'edo' gwzoaba' gwnabia'ba' šlož na' bich zoaba' ṉa'a, perw yechojba' ḻo' yechw zitjwchgua dan' nac ḻo gabiḻen' gan' yo'oba' ṉa'a cont soaba' ṉabia'ba' yežlož, na' techle yeyo'oba' na' saca'zi'ba' toḻi tocaṉe. Cate' gwxe yežlion' Diosen' bzoje' la beṉe' ca' zjanape' yeḻa' mban toḻi tocaṉe ḻe'e libr c̱hen'. Na' beṉe' ca' bi zjanyoj lagaque' ḻe'e libr c̱he Diosen' yesyebande' cate' yesele'ede' bežen' gwzoa, ben' bi zoa ṉa'a perw soaba' da' yoble. 
\p  
\v 9 ’Chyažjecho yeḻa' sina' cont šejni'icho da' nga: da' gaž yic̱hj bežen' zjanaquen gaž ya'a gan' chi' no'olen'.  
\v 10 Na' ḻecze zejen gaž beṉe' gwnabia'. Gayoe' ba gosenite' gosenabi'e na' ba gwnit yeḻa' gwnabia' c̱hegaquen'. Toe' chnabi'e ṉa'a na' ben' yeto beṉe' bzeben' za' yedeṉabi'e, na' cate' yide', šložze yedeṉabi'e.  
\v 11 Na' bež ben' gwzoa cana' perw bich zoaba' ṉa'a, zejen yeto beṉe' gwnabia', beṉe' x̱ono'. Naque' to beṉe' ca' gaže gosenabi'e na' ṉabi'e da' yoble, perw Diosen' gone' cont cuiaye'e na' c̱hi saque' toḻi tocaṉe. 
\p  
\v 12 ’Na' ḻozba' ca' ši dan' ble'edo', zejen ši beṉe' gwnabia' beṉe' za' za'ac cont yesenabi'e. Na' gac ḻo na'gaque' yesenabi'e txen len bežen', perw šložze.  
\v 13 Na' yogo'te beṉe' ca' ši, toz ca yesone' yesegüe'e ḻo na' bežen' yeḻa' gwnabia' c̱hegaquen' na' bichle da' chac chesone' cont bežen' gacchba' blao.  
\v 14 Na' yesediḻlene' Jesucristw ben' zaca'lebde' ca xila' dao' ben' gosot beṉe' gualaž c̱heto' ṉec̱he xtoḻa'gaque', na' Jesucriston' gone' gan ḻo gwdiḻen', ḻe ḻen' naque' Rey ben' chnabi'e yezica'chle rey, na' naque' X̱ancho ben' chnabi'e yezica'chle beṉe' gwnabia'. Na' beṉe' ca' yeson txen len Jesucriston' zjanaque' beṉe' ca' ba gwlej Diosen' cont zjanaque' xi'iṉe', beṉe' ca' ṉezde' yesenita'c̱hac̱he' yesejnilaže'ne' bite'teze da' gac. 
\p  
\v 15 Nach anglen' gože' neda', gwne': 
\p ―Nisdao' ca' ble'edo' gan' chi' no'ol zḻen' zejen yeseṉita' beṉe' zan juisyw, beṉe' yež zan na' nación zan, beṉe' chesac gwde gwdele diža' da' de ḻo yežlion'.  
\v 16 Na' bežen' žia no'olen' cože'ban', ben' žia ši ḻoz, gue'eba' no'olen' na' ḻecz ca' yeson ḻozba' ca' ši dan' zejen ši beṉe' gwnabia'. Na' yesaque' txen yeseque'e da' de c̱he no'olen' na' yosyocua'aṉe'ne' ga'alyide'. Tena' yesagüe' xpelen' na' yosozeye' bi da' yega'aṉ da' bi yesagüe'.  
\v 17 Ḻe Diosen' güe'e latje yesaque' txen yesone' yogo' da' ca' ṉa bežen', na' yesone' yeḻa' chnabia' c̱hegaque' ḻo na' bežen' cont yeyož gac yogo' dan' ba gwna Diosen'.  
\v 18 Na' no'olen' bac̱h ble'edo', naque' ciuda blaochgua da' chnabian' beṉe' gwnabia' ca' že' doxen ḻo yežlion'. 
\c 18  
\s1 Can' gac cate' cuiayi' ciuda Babilonian' 
\p  
\v 1 Gwdena' ble'eda' yeto angl beṉe' gwza' yaban' betje' ḻo yežlion'. Goc ḻo ne'e yeḻa' gwnabia' xen cont goc con can' gwne', na' gwyeni' ḻo yežlion' len be'ni' c̱he' da' nse'e.  
\v 2 Na' anglen' gwṉe' zižje, gwne': 
\p ―Ba bžin ža cuiayi' ciuda Babilonian' da' nac ḻeca ciuda blao. Ba bžin ža yeyaquen xišna' da' x̱igüe' ca'. Na' ba bžin ža yeyaquen xišna' yogo'cze be zoa x̱il be chesegue'e beṉac̱h.  
\v 3 Cuiayin', ḻe beṉe' ca' že' ciudan' gosego'oyeḻe' beṉe' že' yogo' nación cont bosozoe' Diosen' ca'aḻe bi gosonxene' ḻe'. Na' beṉe' gwnabia' ca' že' yežlion' ba gosonchgüe' da' mal txen len beṉe' Babilonia ca' catequen' besyebede' gosone' da' yeḻa' zto', na' beṉe' güen delgens ca' že' ḻo yežlion' ba gosaque' beṉe' gwṉi'a, ḻe beṉe' Babilonia ca' gosonditjchgüede' dan' gota' c̱hegaque' gosezi'en. 
\p  
\v 4 Nach benda' gwṉe yeto beṉe' zoa yaban', gwne': 
\p ―Le'e nacle xi'iṉa', ḻe yechoj ciuda Babilonian' cont bi gonḻe da' mal txen len beṉe' ca' na' cont bi saca'zi'le txen len ḻegaque',  
\v 5 ḻe dechgua xtoḻa' beṉe' Babilonia ca', na' bich cuez Diosen' gwnežjue' castigw c̱hegaque'.  
\v 6 Yesezaca'zi'šque' lagüe dan' bosoc̱hi bososaque' beṉe', na' yesežaglaošque' da' xench ca dan' bosoc̱hi bososaque' beṉe' yoble. Gacšca c̱hegaque' castigw gualech ca da' gosone' c̱he beṉe'.  
\v 7 Con can' gota'chgua da' šagüe' da' güen c̱hegaque' na' gosone' con bi da' žan c̱hegaque', chṉablaža' gacchgua c̱hegaque' yeḻa' yaše' yeḻa' zi' cont yesyegüine'chgüede'. Beṉe' Babilonia ca' ba gosone' xbab ḻo' yic̱hjlažda'ogaque' gosene': “Gwbat te yeḻa' chnabia' c̱heton'; gwbat soato' yeḻa' güine', neto' že'to' ciuda blao nga.”  
\v 8 Da'nan' ḻo toze ža gac yogo' da' ca' gosacde' gwbat gac c̱hegaque'. Beṉe' zan yesat, beṉe' zan yesegüine'de', na' yesebiḻ yesedone', na' yeseye' len yi'. Gac ca' c̱he beṉe' že' ciuda Babilonian', ḻe X̱ancho Diosen' nape' yeḻa' guac xen cont gone' yesezaca'zi'e ṉec̱he xtoḻa'gaque'. 
\p  
\v 9 Beṉe' gwnabia' ca' že' ḻo yežlion' beṉe' bosozenag c̱he beṉe' Babilonia ca' cont bosozoe' Diosen' ca'ale na' gosone' bichle da' chgue'e Diosen', ḻegaque' yesebeže' na' yesegüine'de' cate' yesele'ede' žen da' c̱has cate' šey ciudan'.  
\v 10 Na' yesyega'aṉe' zito'le yeseṉe'e can' gac c̱he beṉe' Babilonia ca', ḻe yesežebchgüe'. Na' yesene': 
\p ―¡Nyaše'chgua chac c̱he ciuda Babilonia nga da' nac blaoch ca yogo' ciuda! Ba chbiayi' ciuda da' gwnabia'ch ḻo yezica'chle ciuda da' zjachi' yežlion'. Ba bžin ža cuiayin' to ši'ize. 
\p  
\v 11 Nach beṉe' güen delgens ca' že' yežliona' yesebeže' na' yesegüine'de' cate' cuiayi' ciudan', ḻe noch no si' dan' yesoten'.  
\v 12 Nono žel beṉe' si' da' yesote' da' nac de oro, de plata, de yej zaca', na' de perlas. Nono žel beṉe' si' lache' la'ay da' chesote' de lino, de sed, na' lache' moradw na' lache' xṉa. Nono žel beṉe' si' da' yesote' da' nac de yag da' chḻa' zix̱ o de bichle yag zaque', de marfil, de ya na' de mármol.  
\v 13 Nono žel beṉe' si' canel, no set zix̱, no yal, no mirra, no perfume, no vino, no set yeḻa' guagw, no yezj šiš, no trigw, no burr bžina', no xila', no cabayw, no carret, na' no beṉac̱h beṉe' yesote' ca beyix̱e'.  
\v 14 Na' beṉe' güen delgens ca' yesene' c̱he ciudan': 
\p ―Ba gwde c̱he yogo' da' zix̱ ca' na' yogo' bichle da' ca' gosazlaže' beṉe' Babilonia ca' yesezi'e ḻo yeḻa' gwṉi'a c̱hegaquen'. Gwbatech yesezi'e da' ca'. 
\p  
\v 15 Na' beṉe' güen delgens ca' beṉe' gosote' da' ca' gosezi' beṉe' Babilonian', ben' gosata' yeḻa' gwṉi'a c̱hegaque' ṉec̱he beṉe' Babilonia ca', yeseze' zito'le yesežebchgüe' c̱he dan' chesežaglao beṉe' Babilonian'. Na' yesebeže' na' yesegüine'de',  
\v 16 na' zižje yesene': 
\p ―¡Nyaše'chgua ba goc c̱he ciuda nga da' gocch blao ca yezica'chle ciuda ca' zjachi' yežlion'! Beṉe' gwže' ciudan' gosazchgüe' lache' šagüe' lache' zaque', no lache' moradw na' no lache' xṉa. Gosonchgua cuingaque' xdan len oro, len yej zaca' da' chesactiten, na' len perlas.  
\v 17 Perw ṉa'a zejzenez gwžiayi' yogo' da' šagüe' c̱hegaquen'. 
\p Yogo' x̱an barcw ca', yogo' beṉe' ca' chja'ac ḻo' barcw ca', len beṉe' ca' cheson žin ḻo' barcon' na' nochle beṉe' cheson žin ḻo nisdaon', yogüe' yeseze zito'le yeseṉe'e.  
\v 18 Na' yesele'ede' c̱has žen cate' šey ciudan' na' yesene': 
\p ―Biṉa' gata' yeto ciuda yoble doxen ḻo yežlion' da' žinḻaže' ca ciuda nga len yeḻa' gwṉi'a yeḻa' šagüe' c̱hen. 
\p  
\v 19 Na' yosožia yo bište yic̱hjgaque' da' yesyegüine'de', na' yesebežyaše', yesene': 
\p ―¡Nyaše'chgua ba goc c̱he ciuda nga da' gocch blao ca yezica'chle ciuda ca' zjachi' yežlion'! Ṉec̱he yeḻa' gwṉi'a c̱he beṉe' ca' gwže' ḻo ciudan' yogo' chio' bencho gan xen len žin da' bencho len barcw c̱hecho quinga. Na' ṉa'a zejzenez gwžiayi' ciudan'. 
\p  
\v 20 Perw le'e že'le yaban', ḻe yebe. Le'e gwseḻa' Diosen' gocle postlw c̱he', na' le'e gwseḻe' be'le xtižen', na' yezica'chle le'e zoale ḻo na' Diosen', ḻe yebe. Ḻe Diosen' ba gwc̱hoglagüe' yesebiayi' beṉe' Babilonia ca' ṉec̱he dan' bosoc̱hi bososaque' le'e. 
\p  
\v 21 Nach to angl gual bcose' to yej xen ca dan' chon žin gan' chi' molin xen, na' bzaḻen' ḻo' nisdaon', gwne': 
\p ―Can' gac c̱he ciuda Babilonian', yeniten can' benit yej xen dan' bzaḻa' ḻo' nisdaon', na' gwbatech le'echon da' yoble.  
\v 22 Gwbatech yosogoḻe' arpa ḻo ciudan'; gwbatech yosocuež güecuež ca' no flauta no trompeta. Gwbatech žel beṉe' zjansed cont yesone' no xšinḻaze' da' chosoc̱hine', ṉeca yenecho sšag c̱he beṉe' chesot len molin ḻo ciudan'.  
\v 23 Gwbatech le'echo be'ni' c̱he lámpara, na' gwbatech yenecho beṉe' cheson ḻṉi c̱he yeḻa' güešagna'. Yesebiayi' beṉe' güen delgens c̱he ciudan' beṉe' zjanac beṉe' blao ḻo yežlion', ḻe beṉe' Babilonia ca' ba goseziye'e beṉe' že' yogo' nación len yeḻa' güaža' c̱hegaquen'. 
\p  
\v 24 Beṉe' Babilonia ca' gosote' beṉe' goso'e xtiža' Diosen' na' nochle beṉe' gwlej Diosen' cont gosaque' ḻo ne'e, na' beṉe' ciuda nan' zjanape' doḻa' c̱he yeḻa' got c̱he yezica'chle beṉe' gosot beṉe' doxen ḻo yežlion'. 
\c 19  
\p  
\v 1 Gwdena' benda' beṉe' zan juisyw beṉe' že' yaban' chesonxene' Diosen', na' nen zižje, chesene': 
\q1 Beṉe' güen juisyw nac Dios c̱hechon'. 
\q1 Ba bene' cont chio' chejnilaže'chone' zoacho len ḻe'. 
\q1 Naque' beṉe' zaca' juisyw, na' nape' yeḻa' guac xen. 
\q1  
\v 2 Zejcze' to ḻicha na' chone' can' cheyaḻa'cze gac dan' chc̱hoglagüe' yesezaca'zi' beṉe' bi chosozenag c̱he'. 
\q1 Ba gwc̱hoglagüe' cuiayi' ciuda xen da' zaca'lebe ca to no'ole zḻe', 
\q1 ḻe beṉe' ḻo ciudan' gosego'oyeḻe' beṉe' že' doxen ḻo yežlion' 
\q1 cont bosozoe' Diosen' ca'ale bi gosonxene' ḻe'. 
\q1 Diosen' ba gwc̱hoglagüe' cuiayi' laž beṉe' Babilonia ca', 
\q1 ḻe cheyaḻa'cze yesezaca'zi'e da' gosote' beṉe' ca' gosonxen ḻe'. 
\p  
\v 3 Nach da' yoble gosene': 
\p ―Beṉe' güen juisyw nac Diosen'. Toḻi tocaṉe c̱has žen gan' šey ciudan'. 
\p  
\v 4 Nach beṉe' blao ca' tapechoa na' beṉe' ca' tap beṉe' žia x̱il jasechaze' cosc̱ho'ale ḻo yon' gosonxene' Diosen' gan' chi'e chnabi'e, gosene': 
\p ―Can' cheyaḻa' gac. Beṉe' güen juisyw nac Diosen'. 
\p  
\v 5 Na' benda' gwṉe to beṉe' do gan' chi' Diosen' chnabi'e, gwne': 
\q1 Yogo' chio' naccho beṉe' güen xšin Diosen' cheyaḻa' gonxenchone', 
\q1 chio' chzenagcho c̱he', chio' naccho beṉe' gole na' chio' naccho beṉe' xcuide' na' bi' bixjw. 
\s1 Yeḻa' güešagna' c̱he ben' zaca'lebde' ca xila' daon' gosot beṉe' Israel ṉec̱he xtoḻa'gaque' 
\p  
\v 6 Nach benda' be xṉe c̱he beṉe' zan juisyw chesonxene' Diosen'. Na' xtiža'gaquen' nenen ca chac ga chziž yegon' cate' dechguan na' ca nen cate' ḻeca chašjw chtin, chesene': 
\q1 ¡Beṉe' güen juisyw X̱ancho Diosen'! 
\q1 Ḻen' nape' ḻa'zelagüe yeḻa' guac xen na' ḻen' chnabi'e. 
\q1  
\v 7 Chebechgüecho na' zoachguacho mbalaz chonxenchone'. 
\q1 Ḻe ba bžin ža gac yeḻa' güešagna' c̱he ben' zaca'lebde' ca xila' dao' be gosot beṉe' Israel ṉec̱he xtoḻa'gaque'. 
\q1 Ba zoa no'olen' si'e gac xo'ole'. 
\q1  
\v 8 Ba bnežjue'ne' lache' šagüe' da' nyaze', lache' šiš xila' juisyw. 
\m Na' lache' šagüe' da' šiš xila' nyaze' zejen da' güen da' chon chio' ba gwlej Diosen' cont naccho ḻo ne'e. 
\p  
\v 9 Nach anglen' da' yoble gože'nda': 
\p ―Bzoj da' nga: “Mbalaz beṉe' ca' ba goxe' cont yesenite' cate' gac ḻṉi c̱he yeḻa' güešagna' c̱he ben' zaca'lebde' ca xila' dao' be gosot beṉe' Israel ṉec̱he xtoḻa'gaquen'.” 
\p Nach anglen' gwne': 
\p ―Diosen' gože' neda' dan' ba gwnia', na' naquen da' ḻi. 
\p  
\v 10 Nach bzoa xiba' cont gonxena' anglen', perw anglen' bi beṉe' latje, gwne': 
\p ―Bi gono' ca'. Neda' naca' con to beṉe' güen xšin Diosen' can' naco' le' na' beṉe' ḻježo' ca' beṉe' bi chesebejyic̱hje' xtiža' Jesúsen' da' chesejḻe'e. Benxen Diosen'. 
\p Na' note'teze beṉe' cheso'e diža' ḻi c̱he Jesúsen', zoa Spiritw c̱he Diosen' chzejni'in ḻegaque' cont cheso'e xtižen'. 
\s1 Beṉe' žia cože' cabayw šiš 
\p  
\v 11 Nach ble'eda' yaban' ca to da' nyaljo, na' ble'eda' to cabayw šiš na' žia to beṉe' cože'ba'. Na' ben' žia cože'ban' zjansi'ene' Ben' Chon Con Can' Že' na' Cho'e Diža' Ḻi. Zejcze' to ḻicha can' chc̱hoglagüe' saca'zi' beṉe' bi chosozenag c̱he' na' can' chdiḻlene' da' malen'.  
\v 12 Na' ble'eda' yejlagüe' ca' chesactiten ca to yi' da' chaḻa'ṉiṉ, na' zjazoa zan corona yic̱hje'. Na' ble'eda' nyoj yeto le' ḻoxguen' da' nombia' toze ḻe'.  
\v 13 Ble'eda' nyaze' to lache' da' dope chen, na' le' Xtiža' Dios.  
\v 14 Na' ble'eda' beṉe' zan beṉe' zjanac soldadw c̱he Diosen' zjana'ogüe'ne', zjanyaze' lache' šagüe' da' nac da' šiš na' da' naquen xilaže', na' to to beṉe' ca' zjažie' tgüeje cabayw šiš.  
\v 15 Cho'a ben' le' Xtiža' Dios chchoj to spada da' nḻachgua da' gwc̱hine' c̱hine' nación ca' bi chosozenag c̱he'. Ḻe ṉabi'e nación ca' na' žan ca žan yosozenague' c̱he'. Na' gone' yesezaca'zi'chgua beṉe' ba goson da' malen', ḻe Dios ben' nap ḻa'zelagüe yeḻa' guac xen chlocchgüe' can' ba gosonen'.  
\v 16 Na' ḻe'e xcamise' na' ḻe'e xic̱hje' nyoj diža' quinga žan: “Naca' Rey ben' chnabia' yezica'chle rey na' naca' X̱an yezica'chle beṉe' gwnabia'.” 
\p  
\v 17 Nach ble'eda' to angl beṉe' zecha ḻo gwbižen', na' bosye'e boḻ güiže' yogo' cuen šod ca' chesaš ḻe'e yaban', gože'ba': 
\p ―Ḻe da, ḻe yedobe nga gagwle to xše' xen da' goṉ Diosen' gagwle.  
\v 18 Gata' xpela' beṉe' gwnabia', xpela' x̱an soldadw, xpela' no beṉe' gual. Gata' xpela' cabayw na' xpela' beṉe' gosebie'ba'. Gata' xpela' yogo' cuen beṉe', beṉe' gosac esclavos na' beṉe' bi gosac esclavos, beṉe' gosac beṉe' xcuide' na' beṉe' gosac beṉe' gole. 
\p  
\v 19 Nach ble'eda' bež x̱igüe' nechon' len yogo' beṉe' gwnabia' ca' že' yežlion' na' soldadw c̱hegaque' ca'. Ba besedobe' txen cont yesediḻlene' Jesús ben' žia cože' cabayw šišen' len soldadw c̱he' ca'.  
\v 20 Na' bež nechon' gocba' ḻo na' Jesúsen'. Na' ḻecze ca' goc c̱he bež x̱igüe' gwchope ben' choe' diža' güenḻaže' na' bemba' yeḻa' guac cont beṉac̱hen' bosozenague' c̱he bež nechon', cont gosonxene' ḻ gua'a ḻsaca' c̱heba' na' cont gosezoe' señw c̱heba'. Chopteba' gosacba' ḻo na' Jesúsen', na' ca' zjambamba' bosozaḻe'ba' ḻo' yi' gabiḻ gan' chaḻa'ṉiṉ azufre, yi' xen da' nac ca to nisdao'.  
\v 21 Nach beṉe' ca' yezica'chle, Jesúsen' ben' žia cože' cabayw šišen' betue' ḻegaque' len spada da' chchoj cho'en', na' yogo' šod ca' gosagwx̱atba' xpela'gaquen'. 
\c 20  
\s1 Can' gac ḻo to mil iz 
\p  
\v 1 Na' ble'eda' to angl beṉe' zoa yaban' betje' cont gwsaljue' yechw zitjwchgua dan' nac ḻo gabiḻen', na' nox̱e' to gden xen.  
\v 2 Na' anglen' bex̱oe' beḻ ben' zoa gaž yic̱hj, be bla' da' nechw ža gwlaste. Ḻeba' chnabia'ba' da' x̱igüe' ca' na' leba' Satanás. Anglen' bc̱heje'ba' gdenṉa' to mil iz.  
\v 3 Nach beyož bc̱heje'ba', na' bzaḻe'ba' ḻo' yechw gabiḻen' na' ḻa' bseyjwtie' cho'a yechon' na' bc̱hišen' to seyw. Bene' ca' cont bich siye'ba' beṉac̱h šlac biṉa' te to mil iz. Na' cate' ba gwde to mil izen', cana'ch yeseže'ba' gdenṉa' cont yechojba' yešlož dao'. 
\p  
\v 4 Nach ble'eda' beṉe' ca' gwlo'o Diosen' ḻo na'gaque' gosone' yeḻa' justis c̱he beṉac̱h zjachi'e gan' chesenabi'e. Na' ḻecze ble'eda' beṉe' bi gosonxene' bež x̱igüen' len ḻ gua'a ḻsaca' c̱heba' ṉeca goso'e latje yosozoe' señw c̱heba' ḻoxgagaque' o taca'gaque'. Gosenita'c̱hac̱he' goso'e diža' chesejnilaže' Jesúsen' na' goseyix̱jue'ede' xtiža' Diosen'. Da'nan' beṉe' ca' besegue'ede' Diosen' gosote' ḻegaque' gosec̱hogue' yengaque'. Perw Diosen' bene' cont besyebane' ladjo beṉe' guat ca', na' txen len Criston' gosenabi'e to mil iz.  
\v 5 Cate'ch ba goc to mil iz besyeban beṉe' ca' gosenita'c̱hac̱h gosejnilaže' Criston', ben' gosac beṉe' nechw besyebane' ladjo beṉe' guat ca', cana'ch yosbane' yezica'chle beṉe' guat.  
\v 6 Mbalaz nita' beṉe' ca' beḻis bosbane' ladjo beṉe' guat ca' da' nechw, beṉe' ba gwlej Diosen' cont zjanaque' ḻo ne'e. Bi yesac c̱hegaque' can' gac c̱he beṉe' ca' yesežaglagüe' ṉec̱he xtoḻa'gaque' toḻi tocaṉe, da'nan' žacho yeḻa' got gwchope. San yesenite' yesonxene' Diosen' na' yesonxene' Criston', na' da'nan' guac ṉacho yesaque' bx̱oz. Ḻegaque' yesenabi'e len Criston' to mil iz. 
\p  
\v 7 Na' cate' ba goc to mil izen', Diosen' güe'e latje yechoj Satanás dan' chnabia' da' x̱igüe' ca' ḻo' yechw zitjwchgua dan' nac ḻo gabiḻ gan' bseyjuen'.  
\v 8 Na' yechojen na' da' yoble siyen' beṉe' že' yogo' nación ca' že' ḻo yežlion'. Na' siyen' beṉe' ca' zjanzi' Gog na' Magog, gwtoben ḻegaque' cont yesediḻlene' Criston', na' yesaque' beṉe' zan juisyw ca yox da' chi' cho'a nisdao' da' nono chac gwlab.  
\v 9 Nach ble'edagüe'da' beṉe' zan juisyw ca', gosa'aque' doxen ḻo yežlion', ja'aque' gan' chi' ciuda dan' chaque Diosen' gan' že' beṉe' ca' gwleje' cont zjanaque' ḻo ne'e. Na' cate' gosec̱hje' ciudan', Diosen' bene' cont bchoj yi' ḻe'e yaban' bzeytecczen ḻegaque'.  
\v 10 Na' ca nac Satanás dan' gwziye' beṉe' ca' že' yežlion', angl c̱he Diosen' bosozaḻen' ḻo yi' gabiḻ gan' chaḻa' azufre, yi' xen da' nac ca to nisdao' gan' ba bosozaḻe' bež x̱igüe' nechon' na' bež x̱igüe' gwchopen' ben' be' diža' güenḻaže' cont gosonxen beṉac̱hen' bež nechon'. Na' yesežaglaon do ža do yel toḻi tocaṉe. 
\s1 Goc yeḻa' justis c̱he beṉe' ca' ba gosat 
\p  
\v 11 Nach ble'eda' chi' Diosen' to ḻo siy xen da' nac da' šiš, chi'e chnabi'e. Na' chṉa'tie' yežlion' len da' ca' chle'echo ḻe'e yaban' na' besyeniten, noch no besele'e ḻen, na' gach ga gosac xišne'en ga yoble.  
\v 12 Na' ble'eda' beṉe' ba gosat, beṉe' gole len beṉe' xcuide' len bi' bixjw, zjazeche' lao Diosen'. Nach Diosen' bzaše' libr ca' gan' zjanyoj yogo'ḻoḻ da' goson to toe'. Na' gwdena' bzaše' libr gan' zjanyoj la beṉe' ca' zjanape' yeḻa' mban toḻi tocaṉe. Na' bene' yeḻa' justis c̱hegaque' con ca gosone' šlac gosebane', ḻe yogo' da' gosone' zjanyojen ḻe'e libr ca'.  
\v 13 Yogo' beṉe' gosat ḻo' nisdaon' besyechoje' zjazeche' lao Diosen', na' yogo' beṉe' gosat ga yoble ḻecze besyechoje' zjazeche' lagüe' cont bene' yeḻa' justis c̱he to toe' con ca gosone' šlac gosebane'.  
\v 14-15 Nach Diosen' bcueze' yeḻa' goten' nombia'cho, na' bene' cont noch no gwže' latje c̱he beṉe' guat ca' na' bṉitlagüen'. Na' beṉe' bi bosozenag c̱he Dios, yogo' beṉe' bi nyoj lagaque' ḻe'e libr gan' nyoj la beṉe' zjanap yeḻa' mban toḻi tocaṉe, bosozaḻe' ḻegaque' ḻo yi' gabiḻ da' nac da' xen ca to nisdao'. Na' dan' goc c̱hegaque', ḻenṉa' yeḻa' got gwchope c̱hegaque'. 
\c 21  
\s1 Yežlion' na' ḻe'e yaban' besyeyaquen da' cobe 
\p  
\v 1 Gwdena' ble'eda' ḻe'e yaban' ba beyaquen da' cobe na' ḻecze ca' yežlion', ḻe yaba dan' goc da' nechw na' yežlio nechua' besyeniten. Na' ḻecze bich gota' nisdao'.  
\v 2 Neda' Juan ble'eda' ciuda c̱he Diosen', ciuda Jerusalén cobe da' chi' yaban' gan' zoa Diosen', betjen ḻo yežlion'. Ba nonen' xdan ca to no'ole beṉe' ba bpa'a cuine' cont naque' xdan cate' gwšagne'e.  
\v 3 Na' do gan' chi' Diosen' chnabi'e benda' gwṉe to beṉe' zižje, gwne': 
\p ―Gwṉa'šc, Diosen' ba betje' zoalene' beṉac̱h. Soateze' len ḻegaque', ḻe gwleje' ḻegaque' cont zjanaque' yež c̱he', na' yesonxene'ne'.  
\v 4 Na' Diosen' gone' cont bich gac da' yesyeyaše'laže'de', da' yesyegüine'de' o da' yesebeže' c̱hen. Nono gat, nono šey ḻa, ḻe ba gwde c̱he yogo' da' ca' gota' ḻo yežlio nechon'. 
\p  
\v 5 Nach Dios ben' chi' chnabi'e gwne': 
\p ―Da' ḻi ba chocoba' yogo'ḻoḻ da' de. 
\p Ḻecze gwne': 
\p ―Bzoj diža' quinga ba bendo', ḻe naquen diža' ḻi na' gac can' gwnian'. 
\p  
\v 6 Nach gože' neda': 
\p ―Bac̱h goc da' cheyaḻa' gac. Neda' naca' ben' ben yežlion' len yogo' bichle da' de, na' naca' ben' gon cont te c̱hen. Da'nan' zaca'lebda' ca letr nechw da' nzi' A na' letr bzebe da' nzi' Z. Note'teze beṉe' chaclaže' si'e da' gwnežjua'ne', gwnežjua'ne' yeḻa' mban toḻi tocaṉe da' zaca'lebe ca nis ya'a da' che'ejcho cate' chbiḻecho, na' bi sia' laxjuen.  
\v 7 Na' beṉe' chesejnilaže' neda', še ba gosezoede' bi yesebejyic̱hje' xtižan', gac c̱hegaque' yogo' da' šagüe' da' ba bia' diža' c̱hen, na' yesonxene' neda', na' gwlo'a zjanaque' xi'iṉa'.  
\v 8 Perw ca nac beṉe' ca' chesežeb yosozenague' c̱hia', beṉe' bi chesejnilaže' neda', beṉe' cheson da' ca' chgue'eda', beṉe' chesot ḻjež beṉac̱he', beṉe' cheson da' nac da' yeḻa' zto' len cuerp c̱hegaque', beṉe' cheson txen len bite'teze yeḻa' guaža', beṉe' chesejnilaže' ḻ gua'a ḻsaca', na' yogo' beṉe' cheso'e diža' güenḻaže', yogo' beṉe' ca' yesezaca'zi'e toḻi tocaṉe ḻo yi' xen da' nac ca to nisdao', yi' gabiḻ gan' chaḻa' azufren'. Na' da' gac c̱hegaquen', ḻenṉa' žacho yeḻa' got gwchope. 
\s1 Ciuda Jerusalén da' nac da' cobe 
\p  
\v 9 Na' bezle'eda' to angl gažen' ben' gosox̱e' tas ca' gaže dan' zjanža'te da' zjayožen da' bosolalje' cont gosac yeḻa' zi' ca' ḻa'zelagüe ḻo yežlion'. Gwbigue' gan' zoan' na' gože' neda': 
\p ―Da len neda' cont gwlo'eda' le' beṉe' ca' zjazaca'lebde' ca to no'ole za' gwšagna'. Na' Jesucristw ben' zaca'lebde' ca xila' dao' ben' gosot beṉe' Israel ṉec̱he xtoḻa'gaque', guac ṉacho ḻe' si'e no'olen'. 
\p  
\v 10 Nach Spiritw c̱he Diosen' benen cont gwya'alena' anglen' to ḻo ya'a xen da' nac sibe, na' blo'ede' neda' ciuda Jerusalén da' nac ciuda c̱he Dios. Ble'eda' gwzoan yaba gan' zoa Diosen' na' chetjen ḻo yežlion'.  
\v 11 Na' ciudan' goctitchguan len be'ni' da' nsa' Diosen', na' ble'eda' chactiten ca to yej da' zaca'chgua, ca yej da' nzi' jaspe da' chle'echo ca vidrw.  
\v 12 To ze'e xen da' nac sibe nyec̱hjen ciudan', na' nita' šižiṉw puert c̱hen, na' to to cho'a puerten' zecha tgüeje angl. Na' ḻe'e puert ca' zjanyoj la šižiṉw beṉe' ca' bosox̱ie' šižiṉw cuen diaža c̱he neto' nacto' beṉe' Israel.  
\v 13 Na' ḻe'e ze'e dan' zoa šḻa'a ciudan' gan' chla' gwbiž nita' šoṉe puert, na' šḻa'a gan' chxoa gwbiž yešoṉen, na' šḻa'a zej yic̱hjelen yešoṉen, na' šḻa'a zej xanelen yešoṉen.  
\v 14 Na' ze'e dan' nyec̱hje ciudan', lenenṉa' naquen de šižiṉw yej xen, na' zjanyoj ḻe'e yej ca' la šižiṉw neto' nacto' postlw c̱he Jesucristw ben' zaca'lebde' ca xila' dao' ben' gosot beṉe' gualaž c̱heto' ṉec̱he xtoḻa'gaquen'. 
\p  
\v 15 Na' angl ben' be'len neda' diža' nox̱e' to ya da' nac de oro da' bc̱hine' gwxi'e medidw ciudan', c̱he ze'e c̱hen na' c̱he puert ca'.  
\v 16 Ciudan' naquen da' cuadradw, toze ca naquen zlaga' len toṉ. Anglen' bchix̱e' ciudan' len ya c̱hen' na' goquen c̱hope mil c̱hope gayoa kilómetros to to šḻa'an, ca'te' ndoṉen, ca'te' zlagan' na' ca'te' siben'.  
\v 17 Nach bchix̱e' ze'e dan' nyec̱hj ciudan' na' goquen gayontap metr yeḻa' sib c̱hen, metr da' nombia' beṉac̱h, ḻe ḻenṉa' bc̱hin anglen' gwxi'e medidon'. 
\p  
\v 18 Ze'e da' nyec̱hj ciudan' naquen de yej da' zaca' da' nzi' jaspe, na' doxen ciudan' naquen de oro na' nḻan' ca to vidrw da' nac xilaže'.  
\v 19 Na' ze'e da' nyec̱hj ciudan', zjanone' lenen xdan len yogo' cuen yej da' zaca' da' de da' zjanac beya color na' chesactiten. Da' nechon' naquen de jaspe; da' gwchope de zafiro; da' gwyoṉe de ágata; da' gwdape de esmeralda;  
\v 20 da' gayo' de ónice; da' gwxope de cornalina; da' gaže de crisólito; da' x̱ono' de berilo; da' ga de topacio; da' ši de crisoprasa; da' šnej de jacinto; na' da' šižiṉw de amatista.  
\v 21 Na' puert ca' šižiṉw zjanaquen šižiṉw perlas, to ton zjanonen' de toze perla. Na' nez yo da' de ḻo ciudan' naquen de oro na' zjanḻan' ca vidrw da' nac xilaže'. 
\p  
\v 22 Bibi yodao' ble'eda' ḻo ciudan', ḻe beṉe' ca' že' ciudan' zjanite' lao X̱ancho Dios ben' nap ḻa'zelagüe yeḻa' guac xen na' lao Jesucristw ben' zaca'lebde' ca xila' dao' ben' gosot beṉe' gualaž c̱heto' ṉec̱he xtoḻa'gaque'. Ḻegaque' chesonxen beṉe' ḻo ciudan'.  
\v 23 Beṉe' ca' že' ciudan' bi cheseyažjde' gwbižen' ṉe bion' yososeṉin' ḻo ciudan', ḻe be'ni' da' nyec̱hj Diosen' chseṉin' len ḻegaque' na' ḻecz ca' be'ni' da' nsa' Jesucriston'.  
\v 24 Na' be'ni' c̱he Diosen' gwseṉin' len beṉe' za'ac yogo' nación beṉe' chesejnilaže' Diosen', na' beṉe' gwnabia' ca' že' yežlion' yesonxene' Diosen' yosonežjue'ne' bi da' zaca' da' šagüe' da' de c̱hegaque', len no yeḻa' bala'aṉ da' de c̱hegaque'.  
\v 25 Bitw šeyjw puert ca' zjanita' ciudan' lagüe' ža, na' gwbat gac šeže'le.  
\v 26 Can' ba gwnia', yeḻa' zaca' yeḻa' xdan da' zjade yogo' nación len yeḻa' bala'aṉ da' zjade c̱he beṉe' gwnabia' c̱he nación ca', yosonežjuen' Diosen' ḻo ciudan'.  
\v 27 Ḻo ciudan' gwbat gac šo' beṉe' chon da' zban. Bi gac šo' beṉe' chon bite'tez da' chgue'e Diosen' o beṉe' choe' diža' güenḻaže'. Con beṉe' zjanyoj lagaque' ḻe'e libr c̱he Jesucriston' gan' zjanyoj la beṉe' zjanape' yeḻa' mban toḻi tocaṉe, ḻegacze' gac yeso'e na'. 
\c 22  
\p  
\v 1 Nach anglen' blo'ede' neda' yegw gan' yože nis da' chnežjon beṉac̱hen' yeḻa' mban toḻi tocaṉe. Nisen' nacten ca vidrw ḻe nyadichguan. Yegwna' chchojen do gan' chi' Diosen' chnabi'e txen len Jesucriston' ben' zaca'lebde' ca xila' dao' ben' gosot beṉe' gualaž c̱heto' ṉec̱he xtoḻa'gaquen'.  
\v 2 Na' gachoḻ nez yo xen c̱he ciudan' na' chop ḻa'a cho'a yegon' ze yag da' chnežjon beṉac̱hen' yeḻa' mban toḻi tocaṉe. Na' yogo' bio' chesebian frut, šižiṉw ṉi'a chesebian lao tgüiz, na' beṉe' nación ca' yosoc̱hine' xḻaguenṉa' ca rmed cont yesenite' güen.  
\v 3 Gwbat gata' bi da' chgue'e Diosen' ḻo ciudan', ḻe ciudanan' cui'e ṉabi'e txen len Jesucristw ben' zaca'lebde' ca xila' dao' ben' gosot beṉe' gualaž c̱heto' ṉec̱he xtoḻa'gaque', na' yogo' beṉe' že' ciudan' yesonxene' ḻe'.  
\v 4 Yesenite' yesele'ede' cho'alao Diosen', na' yoj la Diosen' ḻoxgagaque'.  
\v 5 Gwbatech gac šeže'le ḻo ciudan'. Na' beṉe' že' ḻo ciudan' bi yeseyažjde' be'ni' c̱he no lámpara o c̱he gwbiž, ḻe be'ni' da' nyec̱hj X̱ancho Diosen' gwseṉin' len ḻegaque'. Na' yesenabi'e len ḻe' toḻi tocaṉe. 
\s1 Ba zoa yid Jesucriston' da' yoble 
\p  
\v 6 Nach anglen' gože' neda': 
\p ―Yogo' diža' quinga ba bendo' zjanaquen da' ḻi na' gac con can' ba gwnato'. X̱ancho Diosen' chbeje' beṉe' cheso'e xtižen' na' chzejni'ide' ḻegaque' bin' yesene', na' ḻen' ba gwseḻe' neda' chzejni'ida' le' len beṉe' ḻježo' ca' chesonxene' Diosen' cont gacbe'ele da' ca' za' gac. 
\p  
\v 7 Nach gwna Jesúsen': 
\p ―Da' ḻi ba zoa yida' da' yoble. Na' mbalaz beṉe' chosozenag c̱he da' ca' ba bzojo' ḻe'e libr c̱hio' choen' diža' c̱he da' ca' za' gac. 
\p  
\v 8 Neda' Juan benda' na' ble'eda' da' quinga ba bzoja' nga, na' beyož bendan' na' ble'edan' jazoa xiba' xṉi'a angl ben' blo'e neda' da' ca', gocda' gonxena'ne'.  
\v 9 Perw anglen' bi beṉe' latje, gwne': 
\p ―Bi gono' ca', ḻe naca' con to beṉe' güen xšin Diosen' can' naco' le', can' zjanac beṉe' ḻježo' ca' ba gwleje' cheso'e xtižen', na' can' zjanac yogo' beṉe' yosozenag c̱he da' ca' ba bzojo' ḻe'e libr c̱hion'. San benxen Dios. 
\p  
\v 10 Ḻecze gože' neda': 
\p ―Bi gwcuašo' diža' ca' ba bzojo', ḻe ba zoa gac da' ca' bzojon'.  
\v 11 Na' beṉe' cheson da' mal, yesonchcze' da' malen' chesonen'. Na' beṉe' cheson da' yeḻa' zto', yesonchcze' da' yeḻa' zton' chesonen'. Na' beṉe' cheson da' chazlaže' Diosen', yesonchcze' da' güenṉa' dan' chesonen'. Na' beṉe' ba gwlej Diosen' cont zjanaque' ḻo ne'e, ḻo ne'en yesyega'aṉcze'. 
\p  
\v 12 Nach Jesúsen' gozne': 
\p ―Da' ḻi ba zoa yida' da' yoble, na' yedeyena' gac güen c̱he to to beṉac̱h o saca'zi'e con can' ba ben to toe'.  
\v 13 Neda' naca' ben' ben yežlion' len yogo' bichle da' de, na' naca' ben' gon cont te c̱hen. Da'nan' zaca'lebda' ca letr nechw da' nzi' A na' letr bzebe da' nzi' Z. Ba zoa' cate' gwx̱e yežlion' na' soacza' cate' te c̱hen. 
\p  
\v 14 Mbalaz beṉe' ca' ṉita'teze' cheseṉabe' yeca'a xtoḻa'gaque' cont yesaque' txen len beṉe' ca' ba ble'edo' ben' ba besyeyach xaḻana'gaque'. Ḻegaque' gac yesagüe' frut dan' chbia yag yeḻa' mban toḻi tocaṉe, na' gac yeso'e cho'a puert c̱he ciudan'.  
\v 15 Perw ca nac beṉe' ca' cheson da' nac da' zban, beṉe' ca' cheson txen len no yeḻa' guaža', beṉe' cheson da' nac da' yeḻa' zto' len cuerp c̱hegaque', beṉe' chesot ḻjež beṉac̱he', beṉe' chesejnilaže' ḻ gua'a ḻsaca' o bi da' ca' ben Diosen', na' yogo' beṉe' cheso'e diža' güenḻaže' o chesyebede' chosozenague' dan' zjanac ca', yogo' beṉe' ca' bi gac yeso'e ḻo ciuda c̱hian'. 
\p  
\v 16 ―Neda' Jesús ba gwseḻa' angl c̱hian' cont ba bzende' le' yogo' da' ca' ba bzojon'. Na' cheyaḻa' gwnežjon' beṉe' ca' chesedop chesežag chesonxene' neda'. Neda' naca' xi'iṉ diaža c̱he da' rey David na' naca' ben' gwseḻa' Diosen' yežlion' ḻo diaža c̱he'. Na' zaca'leba' ca beljw xsil. 
\p  
\v 17 Spiritw c̱he Diosen' na' ḻecze ca' chio' chonxencho Jesúsen' chṉablaže'cho yob yidšca Jesúsen' da' yoble, chio' zaca'lebcho ca to no'ole si'e. Na' yogo' beṉe' yesene diža' quinga ḻecze yeseṉablaže'šque' yide' da' yoble. 
\p Na' note'teze beṉe' chaclaže' si'e da' gwnežjw Jesúsen' ḻe', cheyaḻa' yedeṉaben', na' gwnežjue'ne' yeḻa' mban toḻi tocaṉe da' zaca'lebe ca nis ya'a da' che'ejcho cate' chbiḻecho, na' bi si'e laxjuen. 
\p  
\v 18 Na' chosnisda' le'e chzenagle can' ža libr nga c̱he da' ca' za' gac, note'tezle še gwzanchle ca dan' ža libr nga, Diosen' gone' gac c̱hele yogo' yeḻa' zi' dan' zjanyoj ḻe'e libr nga.  
\v 19 Na' note'tezle še žale bi gac yogo' da' qui zjanyoj ḻe'e libr nga, Diosen' yoxie' lale ḻe'e libr c̱hen' gan' nyoj la beṉe' ca' zjanape' yeḻa' mban toḻi tocaṉe na' gone' cont bi gac šo'le ḻo ciuda c̱hen', ṉeca gac c̱hele yogo' da' güen da' zjanyoj ḻe'e libr nga. 
\p  
\v 20 Nach Jesús, ben' bzejni'ide' neda' yogo' da' ca' ba bzoja', že': 
\p ―Da' ḻi ba zoa yida' da' yoble. 
\p Na' neda' chapa'ne': 
\p ―Ca' gacšca. Yob yidšco', X̱ana' Jesús. 
\p  
\v 21 X̱ancho Jesucriston' soacze' gaclenšcacze' yogo'le. Da' na'zen' chzoja'.