\id HEB  
\h Hebreos 
\toc1 CART DANꞋ NYOJ C̱HE BEṈEꞋ HEBREO CAꞋ 
\toc2 Hebreos 
\toc3 He. 
\mt1 CART DANꞋ NYOJ C̱HE BEṈEꞋ HEBREO CAꞋ 
\c 1  
\s1 Diosen' gwseḻe' Xi'iṉe' cont be'lene' beṉac̱hen' diža' 
\p  
\v 1 Cani' Diosen' be'lene' da' x̱ozxta'ocho ca' diža' len beṉe' gwseḻe' goso'e xtižen'. Zan las gosoe' da' beṉe' ca' xtižen' na' nža'te ca goso'en to toe'.  
\v 2 Perw ṉa'a ba zoa žin ža yeyož yežlion' na' Diosen' ba be'lene' chio' diža' dan' gwseḻe' Xi'iṉen' bedezejni'ide' chio'. Na' Xi'iṉ Dios nan' bene' yaba na' yežlio nga len yogo' bichle da' de nga na' gate'teze. Na' bengaquen' con can' gwnalaže' Diosen'. Na' gwžin ža gac ḻo na' Xi'iṉ Diosen' yogo' beṉac̱h, beyix̱e', na' bica'chle da' bene'.  
\v 3 Na' Xi'iṉ Diosen' chlo'e catec beṉe' zaca' nac Diosen', ḻe cayaṉe' nac yic̱hjlaždao' X̱e' Diosen' nac yic̱hjlažda'ogüen'. Na' Xi'iṉ Diosen' chone' cont yaban', yežlion' na' da' ca' chle'echo ḻe'e yaban' na' yežlion' chesonen žin, ḻe nape' yeḻa' guac cont chac con can' že'. Ḻen' bzanḻaže' cuine' gote' cont bexi beyach chio' len xtoḻa'chon'. Na' beyož bene' ca' beyepe' yaban' zjaychi'e cuit X̱e' Diosen' ben' nac beṉe' zaca' juisyw na' chnabi'e txen len ḻe'. 
\s1 Xi'iṉ Diosen' zaca'che' ca angl ca' 
\p  
\v 4 Naque' beṉe' zaca'chgua ca angl ben' cheson žin c̱he Diosen', na' Diosen' bene' cont ḻeca ba chacxenche' ca angl ca'.  
\v 5 Diosen' biṉa' ye'e ṉe to angl ca dan' gože' Xi'iṉen', gože'ne': 
\q1 Len' naco' Xi'iṉa'; 
\q1 ṉa'aža ba blo'a zoaczo'. 
\m Na' biṉa' güe'e diža' c̱he note'teze angl can' bi'e diža' c̱he Xi'iṉen', gwne': 
\q1 Neda' gona' cont gacbia' naca' X̱e', 
\q1 na' gona' cont gacbia' naque' Xi'iṉa'. 
\m  
\v 6 Na' da' nac Xi'iṉ Diosen' ḻa'zelagüe beṉe' zaca', da'nan' cate' Diosen' gwseḻe'ne' yežlio nga gwne': 
\q1 Yogo'ḻoḻ angl c̱hia' cheyaḻa' yesonxene' ḻe'. 
\m  
\v 7 Na' c̱he angl ca' gwne': 
\q1 Chona' cont angl c̱hia' ca' beṉe' chesone' žin c̱hia' chesaque' ca be' dan' chec̱hj na' chesaque' ca yi' beḻ. 
\m  
\v 8 Perw c̱he Xi'iṉen' be'e diža', gwne': 
\q1 Len' naco' Dios na' ṉabi'o toḻi tocaṉe. 
\q1 Na' ḻeca güen chnabi'o, chono' con da' zej to ḻicha. 
\q1  
\v 9 Chebedo' da' zej to ḻicha na' chgue'edo' da' malen'. 
\q1 Da'nan' neda' Dios ben' chonxeno' ba bena' cont zoacho' mbalazech ca note'teze beṉe'. 
\m  
\v 10 Na' da' yoble gozna Diosen' c̱he Xi'iṉen': 
\q1 X̱ana' Dios, beno' yežlion' ža gwlaste, 
\q1 na' yogo' da' chle'echo ḻe'e yaban' ḻecze le' benon'. 
\q1  
\v 11-12 Na' gwžin ža cate' te c̱he yogo' dan' chle'echo ḻe'e yaban' na' ḻo yežlion', 
\q1 perw le' bi te c̱hio'; soaczo' toḻi tocaṉe. 
\q1 Na' gwša'a ḻe'e yaban' na' yežlion' ca to beṉe' chša' xe' cate' ba beyoen na' chaze' yeton. 
\q1 Na' ḻe'e yaban' na' yežlion', gono' len ḻen can' chon to beṉe' cate' chotob xe'. 
\q1 Perw le', tozecze can' gaco' toḻi tocaṉe, gwbat žin ža te c̱hio'. 
\p  
\v 13 Diosen' biṉa' ye'e ṉe to angl ca dan' gože' Xi'iṉen', gože'ne': 
\q1 Gwche'edo' cuita' nga ṉabia'cho txen, 
\q1 na' gona' cont yogo' no chesegue'e le' yosozex̱jw yic̱hje' yosozenague' c̱hio'. 
\m  
\v 14 Na' ca nac angl ca', yogue' zjanaque' beṉe' cheson xšin Diosen', na' chseḻe' ḻegaque' chesaclene' chio' ba gwleje' šjayzoacho len ḻe'. 
\c 2  
\s1 Cheyaḻa' gwzenagcho c̱he Diosen' cont yeque'e xtoḻa'chon' 
\p  
\v 1 Na' da' nac Xi'iṉ Diosen' beṉe' zaca'ch ca angl ca', do yic̱hj do laže'cho cheyaḻa' gwzenagcho xtižen' da' ba benecho. Ḻe še bi gwzenagcho c̱hen do yic̱hj do laže'cho, guanḻaže'chon na' cuejyic̱hjchon.  
\v 2 Diosen' goclaže' yosozenag da' x̱ozxta'ocho ca' c̱he ley c̱he' dan' goseyix̱jue'e angl ca'. Da'nan' Diosen' bnežjue' castigw da' cheyaḻa' si' to toe' bate'tez bi bosozenague' c̱hen, con ca nac da' mal da' gosone'.  
\v 3 Gague da' yelacho bi si'cho castigw še bi gwzenagcho xtiža' X̱ancho Jesúsen' da' gwdix̱jue'ede' že' chaclaže' goṉe' yeḻa' mban c̱hecho toḻi tocaṉe. Da' zaca'chgua da' ben X̱ancho Jesúsen' cont gata' yeḻa' mban c̱hecho toḻi tocaṉe. Cuine' gwdix̱jue'eden' da' nechw, na' beṉe' ca' gosedalen ḻe' bosolo'ede' chio' ḻe naquen da' ḻi.  
\v 4 Diosen' bene' cont gosone' da' zaca' yebanecho, na' bnežjue' ḻegaque' zan yeḻa' guac, na' Spiritw c̱hen' benen cont gosone' da' zan da' güen len yela' guac c̱hen. Na' yogo' da' ca' goc con can' gwnalaže' Diosen'. Na' Diosen' bene' ga gosac da' ca' cont ṉezecho xtiža' X̱ancho Jesuscriston' naquen da' ḻi. 
\s1 Jesucriston' goque' can' nac chio' beṉac̱h 
\p  
\v 5 Na' gague angl can' yesenabia' cate' žin ža gata' yežlio cobe dan' choe'cho diža' c̱hen.  
\v 6 Na' de late' Xtiža' Diosen' gan' nyoj diža' da' be'len to beṉe' Diosen', gwne': 
\q1 ¿Bixc̱hen' nži'ilažo' neto' beṉac̱h? ḻe bitec bi zaca'to'. 
\q1 Na' ¿bixc̱hen' chi' yic̱hjo' chacleno' neto'? 
\q1  
\v 7-8 Beno' cont beṉac̱hen' zjanaque' blao, na' con angl ca'ze zjanaquech blao ca beṉac̱h. 
\q1 Na' beno' cont beṉac̱hen' naque' beṉe' zaca' na' cont chacxene'. 
\q1 Beno' cont yogo'ḻoḻ da' zjade yesaquen ḻo na' beṉac̱h, na' len yogo'ḻoḻ beyix̱e' yesacba' ḻo na'gaque'. 
\m Na' da' ben Diosen' cont yogo'ḻoḻ da' de yesaquen ḻo na' beṉac̱hen' na' yogo' beyix̱e' yesacba' ḻo na'gaquen', bibi bocua'aṉ Diosen' da' bi gwlo'e ḻo na' beṉac̱hen', ḻa'czḻa' ṉa'a biṉa' le'echo yesac yogon' na' yogo'ba' ḻo na' beṉac̱hen'.  
\v 9 Perw yogo'ḻoḻ ba yo'ocze ḻo na' Jesúsen', ḻa'czḻa' šlac gwzoe' yežlio nga angl ca' gosacche' blaoch ca ḻe'. Perw ṉa'a da' bzanḻaže' cuine' gote', da'nan' Diosen' bene' cont chacxenche' ca ḻegaque' na' cont nacbia' naque' beṉe' zaca' juisyw. Ḻe da' nži'ilaže' Diosen' chio' beṉac̱h, da'nan' bžie' bia' got Jesúsen' cont gac yeque'e xtoḻa' to to beṉac̱h. 
\p  
\v 10 Diosen' bene' beṉac̱h, bene' beyix̱e' ca' na' bite'tezechle da' zjade cont chacxene'. Na' Diosen' chaclaže' beṉe' zan yesaque' xi'iṉe' na' šjasyezoe' len ḻe' gan' yo'ochgua be'ni', na' güenṉa' bene' bžie' bia' gwxaca'zi' Jesúsen' cont gac goṉe' yeḻa' mban toḻi tocaṉe c̱he chio' beṉac̱h.  
\v 11 Jesúsen' ba gwlo'e chio' ḻo na' Diosen' na' txen len Jesúsen' naccho xi'iṉ Dios. Da'nan' bi cheto'e Jesúsen' ṉe' naccho biše' ḻježe'.  
\v 12 Quinga gwna Jesúsen' gože' Diosen': 
\q1 Gwzejni'ida' beṉe' biše' ḻježa' ca' can' nac yic̱hjlažda'oguon', 
\q1 na' txen len beṉe' ca' zjandop zjanžag chesonxene' le' goḻa' gonxena' le'. 
\m  
\v 13 Nach Jesúsen' gwne': 
\q1 Neda' soacha' šejnilaža' Diosen'. 
\m Nach da' yoble gozne': 
\q1 Nga zoa' txen len beṉe' ca' gwlo'o Diosen' ḻo na', beṉe' ca' ba gwque'e ca xi'iṉe'. 
\p  
\v 14 Chion' ba gwca'a Diosen' ca xi'iṉe' naccho beṉe' bela' chen, na' da'nan' Jesúsen' ḻecze golje' goque' beṉe' bela' chen cont bnežjo cuine' gosote'ne'. Na' da' got Jesúsen', da'nan' gwzoede' bzoe' šḻa'ale Satanás dan' chnabia' da' x̱igüe' ca' na' dan' choṉen yeḻa' got c̱he beṉac̱hen'.  
\v 15 Jesúsen' bene' cont bich chžebcho gatcho, can' chesežeb yezica'chle beṉac̱h šlac de yeḻa' mban c̱hegaque', chesežebe' yesate'.  
\v 16 Jesúsen' bide' yežlion', gague cont gaclene' angl ca', san cont goclene' chio' naccho xi'iṉ diaža c̱he da' Abrahanṉa'.  
\v 17 Na' da'nan' benen byen goc Jesúsen' doxen can' nac chio' beṉac̱h cont naque' bx̱oz blao c̱hecho lao Diosen'. Na' bnežjw cuine' bṉitlagüe' xtoḻa'chon' na' zoe' cheyaše'de' chio' con can' chazlaže' Diosen'. Na' da' bnežjw cuine' bṉitlagüe' xtoḻa'chon', zaca'lebde' ca bx̱oz blao c̱he nación Israel c̱hechon' ben' gwyej lao Diosen' bex̱ue' chen c̱he beyix̱e' cont gwṉabe' yezi'xen Diosen' xtoḻa'gaquen'.  
\v 18 Na' da' bžaglao Jesúsen' cate' gwlo'oyeḻa' gwxiyen' ḻe' gone' da' mal, perw bibi da' mal bene', da'nan' ṉezde' naclen' gaclene' chio' cate' chgo'oyeḻa' gwxiyen' chio' goncho da' mal. 
\c 3  
\s1 Jesúsen' zaca'che' ca da' Moisésen' 
\p  
\v 1 Beṉe' migw, Diosen' ba gwleje' chio' naccho ḻo ne'e, na' cheyaḻa' goncho xbab c̱he Cristo Jesús ben' gwseḻe'. Naque' bx̱oz blao c̱hecho na' ben' chejnilaže'cho.  
\v 2 Jesúsen' bene' cayaṉen' gwna Dios ben' gwseḻa' ḻe' šlac gwde' yežlion', ca'cze ben da' Moisésen' cate' ḻe' goclene' da' x̱ozxta'ocho ca' cani', beṉe' ca' gosac diaža c̱he Dios.  
\v 3 Perw Jesúsen' zaca'che' ca da' Moisésen', ḻe ḻen' bx̱ie' diaža c̱he Diosen', na' da' Moisésen' naque' con to beṉe' za' ḻo diaža c̱he Diosen'.  
\v 4 Gwnita' beṉac̱h beṉe' bx̱ie' to to diaža yežlio nga, san ca nac Diosen', ḻen' bx̱ie' yogo'te da' zjade.  
\v 5 Da' Moisésen' goque' ca xmos Diosen' cate' bene' con can' gwna Diosen' cont goclene' da' x̱ozxta'ocho beṉe' ca' gosaque' diaža c̱he Diosen'. Na' da' Moisésen' be'e diža' c̱he da' za' gac da' za' c̱hix̱jue'e Diosen' beṉac̱hen' ca tiempa'.  
\v 6 Perw Criston' bi goque' ca to mos dan' gwzoe' bene' can' gwna Diosen', san da' naque' Xi'iṉ Diosen' da'nan' bene' can' gwnen', na' naque' X̱an yogo' chio' naccho diaža c̱he Diosen'. Na' da' ḻi naccho diaža c̱he Diosen' še zoac̱hac̱hcho chejnilaže'chone' na' chebecho ṉezecho gac güen c̱hecho. 
\s1 Guac soacho mbalaz len Diosen' 
\p  
\v 7 Da'nan' cheyaḻa' gwzenagcho can' ža Spiritw c̱he Diosen' len da' nga da' nyojen, žan: 
\q1 Še Diosen' ṉie' le'e ṉa'a, 
\q1  
\v 8 bi gonḻe güedenag can' goson da' x̱ozxta'ole cani' cate' besyedabague' Diosen' latje daš gan' chesaše'. 
\m  
\v 9 Nach Diosen' gwne': 
\q1 Bi gosejḻe'e še leda' dan' goša' ḻegaque' gwnežjua' da' yesezaca'zi'e ṉec̱he xtoḻa'gaquen'. 
\q1 Bi gosejḻe'e c̱hia' cate' gosaše' latje dašen', ḻa'czḻa' c̱hoa iz besele'ede' can' bena' len ḻegaque'. 
\q1  
\v 10 Da'nan' bža'a beṉe' ca' gwnitan' na' gwnia': 
\q1 “Yogo' las chesejḻe'e diža' güenḻaže', 
\q1 na' bi chosozenague' c̱hia' cont yesone' can' chazlažan'.” 
\q1  
\v 11 Nachen' bža'a ḻegaque' na' da' baḻi gwlo'a gwnia': 
\q1 “Gwbat ṉite' mbalaz yesyezi'laže' can' chezi'laža' neda'.” 
\p  
\v 12 Beṉe' migw, bi güe'le latje ṉabia' da' malen' yic̱hjlažda'ole na' gonen cont cuejyic̱hjle bich šejnilaže'le Diosen' ben' zoa toḻi tocaṉe.  
\v 13 Na' šlac ṉa'a ṉe' decze latje gwzenagcho c̱he Diosen', ḻe ṉeyoe ḻježle tža tža cont ṉe tole bi gonḻe xbaben' clele, gaquele bibi nonen gontezle da' xiṉj.  
\v 14 Da' ḻi naccho Criston' txen še ṉe' zoacho chejnilaže'chone' cate' žin ža gatcho, con can' gwzolaocho chejnilaže'chone'. 
\p  
\v 15 Nyoj Xtiža' Diosen' c̱he chio', žan: 
\q1 Še Diosen' ṉie' le'e ṉa'a, 
\q1 bi gonḻe güedenag can' goson da' x̱ozxta'ole cani' cate' besyedabague' Diosen'. 
\m  
\v 16 Na' da' žan ca', choen' diža' c̱he da' x̱ozxta'ocho ca' bebej da' Moisésen' nación gan' nzi' Egipto. Gosende' can' gož Diosen' ḻegaque', perw bi bosozenague', besyedabague' Diosen'.  
\v 17 Da'nan' c̱hoa iz Diosen' bže'e ḻegaque' ṉec̱he gosone' da' xiṉjen', na' gosat ben' besyedabague' Diosen' šlac ṉe' zjalaže' latje dašen'.  
\v 18 Na' ḻegaque', da' bi bosozenague' c̱he Diosen', da' baḻi gwlo'e, gwne' bi güe'e latje yesenite' mbalaz yesyezi'laže' can' chezi'laže' Diosen'.  
\v 19 Na' nacbia' da' bi gosejḻe'e c̱he Diosen', da'nan' bi goc ṉite' mbalaz yesyezi'laže' can' chezi'laže' ḻe'. 
\c 4  
\p  
\v 1 Na' ca' ṉezecho ḻecze ṉec̱he chio' Diosen' gwne' beṉe' yesejḻe' xtiže' yesenite' mbalaz yesyezi'laže' can' chezi'laže' ḻe'. Da'nan' cheyaḻa' gwsaca'cho cont bi goncho güedenag len ḻe'.  
\v 2 Chio' ba benecho diža' güen cont gac soacho mbalaz ca diža' dan' gosene da' x̱ozxta'ocho ca' cani', perw diža' da' gosende' bi goclenen ḻegaque', ḻe bi gosejḻe'en.  
\v 3 Na' chio', še chejḻe'cho da' ža Diosen', ba zoacho mbalaz chezi'laže'cho can' chezi'lažen'. Na' nyoj da' gwne' c̱he da' x̱ozxta'ocho ca', žan: 
\q1 Nachen' bža'a ḻegaque' na' gwlo'a da' baḻi, gwnia': 
\q1 “Gwbat ṉite' mbalaz yesyezi'laže' can' chezi'laža' neda'.” 
\m Na' ṉezecho Diosen' gwzolagüe' chezi'laže' cate' beyož bx̱ie' yaban' na' yežlion' na' bichle da' bene' ža gwlaste.  
\v 4 Na' zoa late' gan' nyoj Xtiža' Diosen' can' bene' ža gažen', žan: 
\q1 X̱op ža ben Diosen' yaban', na' bichle da' bene' cate' bx̱ie' yežlion'. 
\q1 Na' bžin ža gaže, bich bi bene', con gwzoe' mbalaz bezi'laže'. 
\m  
\v 5 Na' ḻecze nyojen can' gwne', žan: 
\q1 Gwbat ṉite' mbalaz yesyezi'laže' can' chezi'laža' neda'. 
\m  
\v 6 Na' ṉe' naquen da' ḻi baḻ beṉe' yesejḻe'e xtiža' Diosen' na' ṉite' mbalaz yesyezi'laže' can' chezi'laže' ḻe', na' beṉe' ca gosende' diža' güen c̱hen' cani' bi gosejḻe'en, na' bi goc yesenite' mbalaz yesyezi'laže' yeḻa' güedenag c̱hegaquen'.  
\v 7 Na' gwdechle gwṉe Diosen' da' yoble gwne': “Ṉa'a guac ṉita'le mbalaz yezi'laže'le.” Na' bene' cont da' rey David bzoje' da' nga, žan: 
\q1 Še Diosen' ṉie' le'e ṉa'a, 
\q1 bi gonḻe güedenag. 
\m  
\v 8 Da' Josué gwc̱hi'e da' x̱ozxtao' chio' beṉe' Israel gan' gosezi'e yežlion' da' bnežjw Diosen' ḻegaque', perw bi bene' cont yesenita' beṉe' ca' mbalaz yesyezi'laže'. Da'nan' Diosen' be'e diža' gwdele, gwne' gwžin ža yesenite' mbalaz yesyezi'laže'.  
\v 9 Na' da'nan' beṉe' ba gwlej Diosen' cont yesaque' ḻo ne'e, ḻegaque' guac yesenite' mbalaz yesyezi'laže' ca mbalazen' gwzoa ḻe' cate' gwzolagüe' chezi'laže'.  
\v 10 Na' beṉe' ca' ba nita' mbalaz chesyezi'laže' can' chezi'laže' Diosen', bich chesone' can' ža xbab c̱hegaquen', san chesone' can' ža Diosen'. Da'nan' žacho zjanite' mbalaz chesyezi'laže' can' zoa Diosen' mbalaz chezi'laže' da' beyož bx̱ie' yogo' da' zjade.  
\v 11 Da'nan' cheyaḻa' güe'laže'cho šejḻe'cho xtiža' Diosen' do yic̱hj do laže'cho cont soacho mbalaz yezi'laže'cho can' chezi'laže' Diosen' na' cont bi cuiayi'cho can' gac c̱hecho še goncho güedenag len xtižen' can' goson da' x̱ozxta'ocho ca'. 
\p  
\v 12 Xtiža' Diosen' chazen ḻo' yic̱hjlaždao' beṉe' chesenden' na' chaclenen beṉe' chosozenag c̱hen. Na' zaca'leben ca to spada da' nḻachgua chop ḻa'a. Perw chonch Xtiža' Diosen' ca to spada, ḻe chlo'en chio' še chzenagcho c̱he Diosen' o še c̱he cuincho, na' chzejni'in chio' c̱he xbab da' yo'o ḻo' yic̱hjlažda'ochon' na' len yogo' da' chzelaže'cho še naquen güen o naquen mal.  
\v 13 Bibi de da' bi ṉeze nḻe'e Diosen', ṉe to beṉac̱h, angl, da' x̱igüe' o bi da' zjade. Diosen' ṉezde' yogo'te da' yo'o ḻo' yic̱hjlažda'ochon'. Na' gwžin ža ṉabyožde' chio' c̱he yogo'te da' ba bencho. 
\s1 Jesúsen' naque' bx̱oz gwnabia' c̱hecho 
\p  
\v 14 Jesús ben' naque' Xi'iṉ Diosen' ba beyepe' yaban' na' zoe' gan' zoa Diosen'. Na' naque' bx̱oz blao c̱hecho beṉe' ḻa'zelagüe zaca'. Da'nan' cheyaḻa' soac̱hac̱hcho šejnilaže'chone' can' ba be'cho diža' goncho.  
\v 15 Jesúsen' ben' nac bx̱oz blao c̱hechon' chacbe'ede' bi da' naquen zdebe len chio', ḻe gwxiyen' goclažen' co'oyeḻan' ḻe' gone' da' mal, na' bžaglagüe' cayaṉen' chžaglao chio', perw bibi da' mal bene'.  
\v 16 Na' dan' zoe' naque' bx̱oz blao c̱hechon' ben' cheyaše'de' chio', da'nan' cheyaḻa' yoḻ güižcho Diosen' gan' chi'e chnabi'e, na' bi žebcho güe'lenchone' diža', ṉabechone' yezi'xene' c̱hecho na' gaclene' chio' bate'teze chacbe'echo chyažjecho gaclene' chio', ḻe nži'ilaže'de' chio'. 
\c 5  
\p  
\v 1 Yogo' beṉe' ca' ba gosaque' bx̱oz blao c̱he nación Israel c̱hechon' gosac ḻo ne'e šjasesane' bi da' šjasesane' lao Diosen' na' gosote' beyix̱e' bosolalje' xc̱hengacba' cont Diosen' bezi'xene' xtoḻa' da' x̱ozxta'ocho ca'.  
\v 2 Na' bx̱oz ca' gosape' yeḻa' chxenḻaže' len beṉe' biṉa' yesejni'i can' cheyaḻa' yesone' na' len beṉe' ba nx̱oayag da' malen' ḻegaque', ḻe ḻecze beṉac̱h beṉe' güen da' xiṉj ḻegaque'.  
\v 3 Da'nan' benen byen bx̱oz ca' gosote' beyix̱e' na' bosolalje' xc̱hemba' cont goseṉabe' yezi'xen Diosen' xtoḻen' lente xtoḻa' yezica'chle beṉe'. 
\p  
\v 4 Na' ṉe to bx̱oz ca' bi benxen cuine' ṉeca gwlej cuine' cont gaque' bx̱oz blao, san Diosen' gwleje' to toe' gosaque' bx̱oz blao can' gwleje' da' Aarón.  
\v 5 Na' ca'cze goc len Criston', bitw beyiljue' nac gone' cont gacxene', ṉeca gwlej cuine' cont naque' bx̱oz blao c̱hecho, san Diosen' gwleje'ne' na' gože'ne': 
\q1 Len' naco' Xi'iṉa', 
\q1 ṉa'aža ba bena' cont nacbia' zoaczo'. 
\m  
\v 6 Na' ga yoble nyoj yeto da' gwne': 
\q1 Naco' bx̱oz toḻi tocaṉe can' nac bx̱oz ben' le' Melquisedec. 
\m  
\v 7 Na' Criston' šlac gwzoe' yežlion' boḻ güiže' X̱e' Diosen' ben' nape' yeḻa' guac cont yosle' ḻe' bi gate', gwṉe' zižje na' gwcheže' gwṉabe' gaclene' ḻe'. Na' da' bzex̱jw yic̱hj Criston' bene' con can' gwna X̱en', na' X̱e' Diosen' bzenague' na' goclene'ne' cont bi bžebe' yeḻa' goten'.  
\v 8 Na' ḻa'czḻa' Criston' naque' Xi'iṉ Dios, bžaglagüe' yogo'ḻoḻ da' ca' goc c̱he' cate' bzenague' c̱he Diosen' cont gwyejni'ide' can' chac c̱he chio' beṉac̱h.  
\v 9 Na' beyož goc c̱he' yogo'ḻoḻ da' goclaže' Diosen', nach ba guaque' gwnežjue' yeḻa' mban toḻi tocaṉe c̱he yogo' beṉe' yosozenague' c̱he'.  
\v 10 Can' naquen, Diosen' gwleje' ḻe' cont naque' bx̱oz blao c̱hecho, na' naque' ca bx̱oz Melquisedec. 
\s1 Gwsaca'cho cont bi cuejyic̱hjcho xtiža' Diosen' 
\p  
\v 11 Na' ṉe' de da' zan da' chaclaža' ṉia' le'e c̱he da' ngan', perw naquen zdebe ṉian' ca šejni'ilen, ḻe bich chebele šejni'ilen.  
\v 12 Ba goḻe' gwzejni'ile beṉe' xtiža' Diosen', perw gualaz da' gonḻe ca', chyažjele no yozejni'i le'e da' yoble da' ca' bsedle da' nechw. Da'nan' zaca'leble ca to bidao' biṉa' gac gagw na' con chaže'be'.  
\v 13 Na' beṉe' zjanac ca to bidao' ṉe' chaže', biṉa' yesejni'ide' xtiža' Diosen' binḻo cont yesone' da' zej to licha len Diosen'.  
\v 14 Na' dan' ža xtiža' Diosen' da' naquech zdebe, zaca'leben ca yeḻa' guagw da' chagw beṉe' gole. Na' beṉe' chesejni'i ḻenṉa' chesacbe'ede' še to da' yesende' o to da' yesone' naquen güen o naquen mal, ḻe ba zjayolagüe' chosozenague' c̱he Diosen'. 
\c 6  
\p  
\v 1-2 Cana' betiṉjecho xtoḻa'chon', gwyejnilaže'cho Criston', na' bsedcho diža' güen c̱he'. Goccho ca to beṉe' guat len yic̱hjlažda'ochon' ṉec̱he da' choncho da' xiṉj, perw ba betiṉjecho xtoḻa'chon' ṉa'a. Bich chyažjen yezolaocho šejnilaže'cho Diosen'. Bich chyažjen gwsedchcho c̱he dan' chesezoa beṉe' nis o c̱he dan' chx̱oa na'cho yic̱hj beṉe' na' chṉabcho gaclen Diosen' ḻegaque'. Bich chyažjen gwsedchcho can' gac cate' yec̱his yosban Diosen' beṉe' guat ca' o caten' c̱hogbi'en yesezaca'zi' beṉe' ca' ba goson da' xiṉj. Ba nsedcho da' ca', na' ṉa'a bac̱h cheyaḻa' gwsedcho xtiža' Diosen' da' nacch zdebe cont gacch yic̱hjlažda'ochon' can' nac yic̱hjlaždao' Criston'.  
\v 3 Ḻenṉa' goncho ṉa'a še Diosen' goṉšque' latje. 
\p  
\v 4 Nita' beṉe' ba gwyo'o be'ni' c̱he Criston' ḻo' yic̱hjlažda'ogaque', na' ba chesacbe'ede' can' nac yeḻa' mban da' choṉ Criston', na' ba zoa Spiritw c̱he Diosen' ḻo' yic̱hjlažda'ogaque'.  
\v 5 Ba zjaṉezde' xtiža' Diosen' naquen güen na' ba zjanombi'e yeḻa' guac c̱he Diosen' da' za' gwlo'echde' beṉac̱hen'.  
\v 6 Na' še žin ža bich yesejnilaže' Criston' na' yesebejyic̱hje' xtižen', bich gac yesyetiṉjde' c̱he dan' ba gosebejyic̱hje'ne', ḻe ḻo' yic̱hjlažda'ogaque' chesone' txen len beṉe' ca' bosode'e Xi'iṉ Diosen' ḻe'e yag cruzen', na' chesone' cont nochle beṉe' yesegue'ede' ḻe'.  
\v 7 Cheyaḻa' gac yic̱hjlažda'ochon' ca to yežlio güen gan' chesaz beṉe'. Cheyož chac yejon' zan ṉi'a, nach chac cosešen'. Na' chata' dan' cheseyažje beṉe' chesazen'. Na' nacbia' Diosen' chebede' yežlion' nac ca'.  
\v 8 Bi gaccho ca to yežlio gan' chla' yag yeše' na' bichle yix̱e' da' nono chagw. Yežlion' nac ca' bibi zacan', na' ba zoa cuejyic̱hj x̱anen ḻen na' yix̱e' da' chla' lagüen žin ža šeyen. 
\s1 Ṉezecho šjayzoacho len Diosen' 
\p  
\v 9 Le'e beṉe' migw, chacda' le'e, na' ḻa'czḻa' ba bia' dižan' ca', ṉezda' biḻja gonḻe can' cheson beṉe' chesebejyic̱hje' xtiža' Diosen'. Chacda' gonḻe güen da' ba gwlej Diosen' le'e cont šjayzoale len ḻe'.  
\v 10 Diosen' zeje' to ḻicha, na' bi ganḻaže' can' ba benḻe xšinen' na' can' ṉe' chonḻen ṉa'a chaclenḻe yezica'chle beṉe' chesejnilaže'ne'. Na' chonḻe ca' da' chaquele Diosen'.  
\v 11 Na' chaclaža' to tole soatezle gonchle ca' do yic̱hj do laže'le šlac biṉa' žin ža gatle, cont ṉezele šjayzoale len Diosen'.  
\v 12 Chaclaža' bi gacle beṉe' xagüed len da' ža Diosen'. Na' chaclaža' gonḻe can' ba goson beṉe' zan beṉe' gosenite' gosejnilaže' Diosen' cani', gosejḻe'e gon Diosen' can' gože' ḻegaque' gone', na' gosape' yeḻa' chxenḻaže' cate'ch bžin ža benen'. 
\p  
\v 13 Cate' Diosen' gože' da' Abraham xi'iṉ diaža c̱he' yesaque' beṉe' zan, bzoa cuine' gwlo'e da' baḻi gac can' gwnen', ḻe nono zoa beṉe' napch yeḻa' gwnabia' ca Diosen'.  
\v 14 Gwne': “Da' ḻi goncza' cont gac güen c̱hio' na' cont yesac xi'iṉ diaža c̱hio' beṉe' zan.”  
\v 15 Na' Abrahanṉa' gwdape' yeḻa' chxenḻaže' šlac gwleze', nach bžin ža gwzolao chac can' gwna Diosen'.  
\v 16 Beṉac̱hen' zjayolagüe' chosozoe' Diosen' cue'e da' baḻi c̱he bi dan' chesene', ḻe Diosen' chnabia'che' ca ḻegaque'. Chesone' ca' cont beṉe' ca' chesacyože' len ḻegaque' yesejḻe'e na' yesyeyacxenḻaže'.  
\v 17 Na' Diosen' bzoa cuine' cue'e da' baḻi cont ṉeze beṉe' ca' zjanac xi'iṉ diaža c̱he da' Abrahanṉa' gague da' te c̱he dan' gwne' gonen'.  
\v 18 Diosen' bene' c̱hope da' qui: gwne' can' gone' na' ḻecze bzoa cuine' cue'e da' baḻi gac can' gwnen', na' gague da' te bi gac can' gwnen'. Chaclaže' chio' ba betiṉje xtoḻa'chon' yebecho ṉezecho šjayzoacho len ḻe'. Na' Diosen' bi chac güe'e diža' güenḻaže'.  
\v 19-20 Na' da' ṉezecho šjayzoacho len Diosen', bi soa xbab c̱hechon' quile ca'le. Jesúsen' ba gwžialagüe' gwyo'e gan' zoa Diosen' gan' nono beṉac̱h goc šo', na' bene' cont chio' gac šo'cho. Ḻe naque' bx̱oz blao c̱hecho toḻi tocaṉe, na' naque' ca bx̱oz Melquisedec. 
\c 7  
\s1 Jesúsen' naque' ca bx̱oz Melquisedec 
\p  
\v 1 Na' Melquisedequen' goque' rey na' gwnabi'e gan' nzi' Salem, na' Dios ben' nac ḻa'zelagüe beṉe' blao gwleje' ḻe' cont goque' bx̱oz. Na' goquen' Abrahanṉa' zeze'e lao gwdiḻe gan' bene' gan gayo' rey, na' Melquisedequen' jašague'ne' na' gwdix̱jue'ede' gac da' güen c̱he da' Abrahanṉa'.  
\v 2 Ca horen' Abrahanṉa' zeze'e zonse'e yogo'ḻoḻ da' jaytobe' da' bene' gan ḻo yeḻa' gwdiḻen', na' gwlequen' ši cuen na' bnežjue' to cuen c̱he bx̱oz Melquisedequen'. Na' Melquisedec zejen diža' “rey beṉe' zej to ḻicha”. Na' goque' rey c̱he beṉe' zjanite' binḻo, ḻe Salem gan' gwnabi'e zejen diža' “zjanite' binḻo”.  
\v 3 Bi nyojen še no goc da' x̱axṉa' Melquisedequen'. Ṉeca nyojen še no goc x̱ozxta'ogüe', na' ṉeca nyojen baten' golje' na' baten' gote'. Da'nan' žacho Melquisedequen' zaca'lebde' ca Xi'iṉ Dios ben' zoa toḻi tocaṉe naque' bx̱oz c̱hecho, ḻe bi golje Melquisedequen' ḻo diaža c̱he nochle bx̱oz, na' ṉeca gwzoa nochle beṉe' ḻo diaža c̱he' beṉe' tie' gwḻane' xḻatje'. 
\p  
\v 4 Ḻe gon xbab catec beṉe' blao goc bx̱oz Melquisedequen'. Da'nan' da' x̱ozxta'ocho Abrahanṉa' gwleje' to cuen ḻo ši cuen da' ca' jaytobe' ḻo na' rey ca' na' bnežjuen' bx̱oz Melquisedequen'.  
\v 5 Na' da' x̱ozxta'ocho beṉe' ca' gosalje ḻo diaža c̱he da' Leví, ben' besyeyaḻe' gosaque' bx̱oz c̱he nación Israel c̱hechon', gosone' con can' nyojen ḻe'e ley da' bzoj Moisés, na' bosoc̱hixjue' to cuen ḻo ši cuen yogo' bi da' gota' c̱he yezica'chle beṉe' gualaž c̱hegaque' ca'. Na' yogo'cze' gosaque' diaža c̱he da' Abrahanṉa', bx̱oz ca' na' beṉe' yezica'chle.  
\v 6 Perw Melquisedequen' ḻa'czḻa' bi golje' ḻo diaža c̱he da' Leví, Abrahanṉa' bnežjue'ne' to cuen ḻo ši cuen da' ca' jaytobe', na' Melquisedequen' gwṉabde' Diosen' gac güen c̱he da' Abrahanṉa' ben' gwna Diosen' yesac xi'iṉ diaža c̱he' beṉe' zan.  
\v 7 Na' ṉezecho beṉe' chac chṉabde' Diosen' gac güen c̱he beṉe' yoble zaca'che' ca ben' gac c̱he' da' güenṉa'.  
\v 8 Na' beṉe' ca' zjanac bx̱oz can' ža ley dan' bzoj Moisésen' chesezi'e to cuen güeje ḻo ši cuen yogo' bi da' de c̱he beṉe' Israel gualaž c̱hechon', na' bx̱oz ca' zjanaque' con ḻjež beṉac̱hcho beṉe' chesat. Na' c̱he bx̱oz Melquisedequen' ben' gwxi' to cuen ḻo ši cuen da' jaytob da' Abrahanṉa', Xtiža' Diosen' choen' diža' c̱he' ca to beṉe' ṉe' zoacze.  
\v 9-10 Na' da' bnežjo Abrahanṉa' ḻe' da' ca', guac ṉacho da' Leví bnežjue' Melquisedequen' to cuen güeje ḻo ši cuen da' ca', ḻe gwdechle Levín' golje' ḻo diaža c̱he da' Abrahanṉa', na' Leví nan' goque' x̱ozxtao' beṉe' ca' gosac ḻo na'gaque' bosotobe' da' ca' bosonežjo beṉe' Israel gualaž c̱hecho ca' c̱he Diosen'. 
\p  
\v 11 Na' Diosen' bnežjue' beṉe' Israel gualaž c̱hecho ca' ley c̱hen' cani' cont benen žin txen len da' goson bx̱oz ca' beṉe' gosalje' ḻo diaža c̱he da' Levín'. Perw bx̱oz ca' bi goc yesone' cont yic̱hjlaždao' beṉac̱hen' yesaquen xilaže' len Diosen'. Da'nan' byažjecho bid Jesúsen' naque' bx̱oz c̱hecho toḻi tocaṉe, na' ḻe' naque' ca bx̱oz Melquisedequen', gague ca da' bx̱oz Aarón.  
\v 12 Na' cont goc zoa Jesúsen' naque' bx̱oz c̱hechon', byažjen bža' ley da' nonen mandadw non' gac bx̱oz.  
\v 13 Ḻe X̱ancho Jesúsen' ben' nac bx̱oz c̱hechon' bi golje' ḻo diaža c̱he da' Leví, na' noch no ṉa' choj ḻo diaža c̱he Jesúsen' beṉe' naque' bx̱oz.  
\v 14 Ṉezczecho X̱ancho Jesúsen' golje' ḻo diaža c̱he da' Judá, na' da' Moisésen' bi bzoje' ḻe'e leyna' ga ṉan beṉe' galje' ḻo diaža c̱he da' Judán' guac yesaque' bx̱oz. 
\p  
\v 15 Na' nacbia' ba bža' leyna', ḻe ba zoa Jesúsen' naque' bx̱oz cobe c̱hechon' na' naque' ca bx̱oz Melquisedequen'.  
\v 16 Bito golje' ḻo diaža c̱he da' Leví can' gosac bx̱oz ca' beṉe' goson žin can' ža ley da' bzoj da' Moisésen', san naque' bx̱oz da' bi gwzoe yeḻa' goten' ḻe' na' zoe' toḻi tocaṉe.  
\v 17 Quinga nyoj da' gwna Diosen' c̱he', žan: 
\q1 Naco' bx̱oz toḻi tocaṉe, can' nac bx̱oz ben' le' Melquisedec. 
\m  
\v 18 Na' bx̱oz ca' gwna Diosen' ṉita' cana', bich nžie' bia' ṉite' ṉa'a, ḻe dan' bžia bia' leyna' yesone' bi goc yeca'an xtoḻa' beṉac̱hen' to ši'i.  
\v 19 Na' leyna' ḻecze bi goc gonen cont yesac yic̱hjlaždao' beṉac̱hen' xilaže' len Diosen'. Perw ṉa'a ba chaquech güen c̱hecho, ḻe ba zoa bx̱oz c̱hecho beṉe' ba beca'a xtoḻa'chon' to ši'i cont zoacho binḻo len Diosen' na' chac chṉelenchone'. 
\p  
\v 20 Na' cont ṉezecho Jesúsen' naque' bx̱oz c̱hecho, Diosen' bzoa cuine' gwlo'e da' baḻi ḻe soacze Jesúsen' gaque' bx̱oz c̱hechon'.  
\v 21 Beṉe' ca' gosaque' bx̱oz can' bzoj da' Moisésen', Diosen' bitw bzoa cuine' cue'e da' baḻi cont šejḻe'cho zjanaque' bx̱oz. Perw nyoj can' gože' Jesúsen', žan: 
\q1 Diosen' bzoa cuine' gwlo'e da' baḻi na' bi gwše'e can' ba gože'ne' gone': 
\q1 “Naco' bx̱oz toḻi tocaṉe can' nac bx̱oz ben' le' Melquisedec.” 
\m  
\v 22 Na' da'nan' zoa Jesúsen' chone' cont ṉezecho Diosen' gaclene' chio' toḻi tocaṉe can' gwne' gone'. Na' can' za' gwne' gaclene' chio' ṉa'a, zaca'chen ca da' gože' da' x̱ozxta'ocho ca' cani'.  
\v 23 Na' beṉe' ca' gosaque' bx̱oz can' ža ley dan' bzoj da' Miosésen', gosaque' beṉe' zan, ḻe cate' gosat tgüeje tgüeje', ḻa' benita'te beṉe' yoble.  
\v 24 Perw Jesúsen' zoe' toḻi tocaṉe, na' da'nan' naque' bx̱oz c̱hecho toḻi tocaṉe.  
\v 25 Da'nan' chac choṉe' yeḻa' mban toḻi tocaṉe c̱he chio' chṉabcho yezi'xen Diosen' c̱hecho, ḻe zoacze' toḻi tocaṉe chṉabe' goclen lao Diosen' c̱he chio' chejnilaže'chone'. 
\p  
\v 26 Na' Jesúsen' nacyaṉe' beṉe' chyažjecho gaque' bx̱oz blao c̱hecho cont gaclene' chio', ḻe naque' beṉe' laždao' xilaže'. Bibi da' xiṉj none' na' ṉeca none' bi xbab mal, con bibi doḻa' nape'. Nža'le naque' len beṉac̱h beṉe' cheson da' xiṉj. Jesúsen' ba beyepe' zoe' gan' zoa Diosen', na' chnabi'e txen len ḻe'.  
\v 27 Nža'le naque' len bx̱oz blao ca' gosenita' cani'. Ḻegaque' tža tža byažjen gosote' beyix̱e' bosolalje' xc̱hemba' cont goseṉabe' bezi'xen Diosen' xtoḻa'gaque', na' gwdechle gosote' beyix̱e' yoble bosolalje' xc̱hemba' cate' goseṉabe' bezi'xen Diosen' xtoḻa' yezica'chle beṉe' Israel gualaž c̱hecho ca'. Perw Jesúsen' šṉi'aze bnežjw cuine' ṉec̱he xtoḻa' beṉac̱hen' cate' gosote'ne' ḻe'e yag cruzen', na' bi byažjde' gote' beyix̱e' can' goson bx̱oz ca' tža tža ṉec̱he xtoḻa'gaque' na' ṉec̱he xtoḻa' beṉe' yezica'chle.  
\v 28 Beṉe' gosac bx̱oz blao can' ža ley da' bzoj da' Moisésen' gosaque' beṉe' güen da' xiṉj can' zjanac yezica'chle beṉe'. Na' cate' ba goc zan iz bzoj Moisésen' leyna', Diosen' bzoa cuine' gwlo'e da' baḻi zoacze Xi'iṉe' Jesúsen' naque' bx̱oz blao c̱hecho. Na' Xi'iṉe' Jesúsen' zoacze' toḻi tocaṉe na' nac yic̱hjlaždagüen' cayaṉen' chazlaže' Diosen'. 
\c 8  
\s1 Jesúsen' bene' cont gwzolao chac da' cobe da' gwna Diosen' gone' cont gaclene' chio' 
\p  
\v 1 Da' nga zejechen lao yogo' da' ba gwnia': zoa bx̱oz blao c̱hechon' ben' nac cayaṉe' chazlaže' Diosen', na' ba chi'e yaban' chnabi'e txen len Diosen' ben' nac ḻa'zelagüe beṉe' zaca'.  
\v 2 Chone' žin gan' zoa X̱ancho Diosen', gague ḻo' yo'o dan' goson beṉac̱h cont yesonxene' ḻe'.  
\v 3 Na' yogo' bx̱oz blao c̱he beṉe' Israel gualaž c̱hechon' nite' chosonežjue' Diosen' bi da' chosonežjue'ne' na' chesote' beyix̱e' chosolalje' xc̱hemba' lao Diosen'. Na' dan' nac Jesúsen' bx̱oz blao c̱hecho, benen byen bnežjw cuine' blalj xc̱hene' ṉec̱he xtoḻa'chon'.  
\v 4 Na' šaca' ṉe' zoe' yežlio nga bi naque' bx̱oz, ḻe nita' bx̱oz c̱he beṉe' Israel gualaž c̱hechon' chjasesane' bi da' chjasesane' lao Diosen' con can' ža ley dan' bzoj da' Moisésen'.  
\v 5 Na' beṉe' ca', chesone' bi da' chesone' ḻo' yodao' da' naquen ca ḻ gua'a ḻsaca' c̱he yaban' gan' zoa Diosen'. Na' ṉezecho naquen ca ḻ gua'a ḻsaca' c̱he yaban' gan' zoa Diosen', ḻe cate' za' gon Moisésen' yodao' dan' chacte chedobe gan' goson bx̱oz ca' žin c̱he Diosen' cani', Diosen' gože'ne': “Yogo' da' ba gwnia' gonḻe, ḻe gonen cayaṉen' blo'eda' le' caten' gwzoacho ḻo ya'an.”  
\v 6 Na' da' chon Jesúsen', da' xen zaca'chen ca da' cheson bx̱oz c̱he beṉe' Israel gualaž c̱hechon', na' can' gwna Diosen' gaclene' chio' lagüe da' bnežjw cuin Jesúsen' ṉec̱he xtoḻa'chon', ḻecze da' xen zaca'chen ca dan' gože' da' x̱ozxta'ocho ca' cani'. 
\p  
\v 7 Ḻe Diosen' gože' da' x̱ozxta'ocho ca' gac güen c̱hegaque' še yesone' can' ža ley c̱hen', perw bi bosozenague', na' da'nan' byažjen gwdix̱jue' to da' cobe.  
\v 8 Na' Diosen' bi bebede' ḻegaque', san gwne': 
\q1 Gwžin ža cate' ṉia' to da' cobe da' gona' gaclena' le'e nacle xi'iṉ diaža c̱he beṉe' ca' gosenite' Israel, 
\q1 na' len le'e nacle xi'iṉ diaža c̱he beṉe' ca' gosenite' Judá. 
\q1 Neda' naca' X̱anḻe Dios žia' ca'. 
\q1  
\v 9 Nža' can' goša' da' x̱ozxta'ole gona' gaclena' ḻegaque' cani', 
\q1 bži'ilaže'da' ḻegaque' na' bena' cont besyechoje' ḻo na' beṉe' nación Egipto. 
\q1 Ḻegaque' bi gosone' can' goša'ne' cont gac güen c̱hegaque'. 
\q1 Na' da'nan' gwleza' bich goclena'ne', neda' X̱anḻe Dios žia' ca'. 
\q1  
\v 10 Na' quinga gona' gaclena' xi'iṉ diaža c̱he le'e nacle beṉe' Israelen' cate' žin ža: 
\q1 Neda' X̱anḻe Dios gona' cont šo' yic̱hjgaque' da' nona' mandadw yesone', 
\q1 na' gona' cont yesyebeden' ḻo' yic̱hjlažda'ogaquen', 
\q1 na' toza' neda' yesejnilaže', 
\q1 na' ḻegaque' yesaque' nación c̱hia'. 
\q1  
\v 11 Na' bi yažjen yosozejni'i ḻježe' cont yesombi'e neda', 
\q1 ṉeca yažjen yosozejni'i no beṉe' biše' ḻježe', 
\q1 ḻe cana' yogo'ḻoḻe' yesombi'e neda', 
\q1 bi' bixjw lente beṉe' nac beṉe' gole. 
\q1  
\v 12 Canan' yezi'xena' xtoḻa'gaquen', na' bich gona' cuent še bi da' malen' ba gosonen'. 
\m  
\v 13 Na' Diosen' be'e diža' c̱he da' cobe da' gwne' gone' gaclene' nación c̱hechon', na' da'nan' ṉezecho ba bzoe' to šḻa'ale da'na' gože' da' x̱ozxta'ocho ca' cani'. Na' da' gole da' ba bzoe' to šḻa'ale ba zoa yeniten. 
\c 9  
\s1 Yodao' da' zoa yežlion' na' dan' zoa yaba gan' zoa Diosen' 
\p  
\v 1 Cani' Diosen' gože' da' x̱ozxta'ocho ca' gaclene' ḻegaque' na' gac güen c̱hegaque' še yesone' can' ža ley c̱hen'. Na' šlac ṉe' chon žin da' nechw da'na' gože' ḻegaque' cani', Diosen' bžie' bia' nacle yesonxene' ḻe' na' nacle yesone' yodao' gan' yesonxene' ḻe' yežlio nga.  
\v 2 Gosone' yodao' da' nsan' c̱hope cuart. Na' ḻo' cuart nechon' bosozoe' to candeler na' to mes gan' bosocue'e yetextil da' naquen c̱he Dios. Na' cuartna' bososi'en Latje c̱he Dios.  
\v 3 Na' bosozie' to lache' ḻo' yo'ona' cont bchojen c̱hope cuart, na' cuart gwchopen' bososi'en Latje ga Zoa Dios.  
\v 4 Na' ḻo' cuart gwchopen' bosozie' yeto mes de oro gan' bosozeye' yal. Na' goseyix̱jue' to caj da' bosoguazje' oro doxenen. Na' ḻo' cajen' gosegüe'e to yeso' de oro gan' gosegüe'e late' yeḻa' guagw da' nzi' maná, na' gosegüe'e carrot c̱he da' Aarón dan' bex̱eje. Ḻecze ḻo' caj nan' gosego'ošagüe' yej ta'a ca' gan' byoj yogo' dan' bžia bia' Diosen' yesone' cont gaclene' ḻegaque'.  
\v 5 Na' cože' cajen' bosonite' c̱hope ḻ gua'a ḻsaca' beṉe' gosone' ca angl beṉe' bososi'e querubines, cont nacbia' zoa Diosen' gan' žia cajen' na' naque' beṉe' zaca' juisyw. Na' cože' cajen' ladjo angl ca' gan' nžiljo x̱ilgaquen', bosoži'e xc̱hen beyix̱e' cate' goseṉabe' yezi'xen Diosen' xtoḻa' beṉe' Israel gualaž c̱hecho ca' to to iz. Perw bi chonen byen güe'cho diža' ṉa'a doxen can' goca'. 
\p  
\v 6 Na' beyož gosone' yodaon' na' bosonite' yogo' da' ca' ḻo'enṉa', nach yogo' ža bx̱oz ca' goso'e ḻo' cuart nechon' na' gosone' can' bžia bia' Diosen' gosone' gosonxene' ḻe'.  
\v 7 Na' cuart gwchopen', toz bx̱oz blao goc gwyo'e ḻo'enṉa' tṉi'a tgüiz. Na' cate' gwyo'ena' benen byen bex̱oe' chen c̱he beyix̱e' bži'en ḻo cajen' cont Diosen' bezi'xene' xtoḻe' na' bezi'xente' xtoḻa' yezica'chle beṉe' Israel gualaž c̱hecho ṉec̱he da' xiṉj da' gosone' sin cbi gosacbe'ede'.  
\v 8 Na' da' bi de ḻsens šo' nochle beṉe' ḻo' cuart gwchopen', Spiritw c̱he Diosen' chzejni'in chio' biṉa' gac šo' beṉac̱hen' gan' nac latje ga zoa Diosen' šlac ṉe' chon žin yodao' nechua' ḻo yežlion'.  
\v 9 Na' yodaon' len yogo' da' cheson bx̱oz ca' ḻo'enṉa' chlo'en chio' zoacho ṉa'a can' chac yaban' gan' zoa Diosen'. Na' ḻa'czḻa' da' zan chesoe' beṉe' Diosen' na' be zan beyix̱e' chesote' chesonxene' ḻe', bibi yeḻa' guac zjansa' da' ca' cont yeseṉezde' bibi doḻa' zjanape' len Diosen'.  
\v 10 Na' da' ca' cheson beṉe' gualaž c̱hechon' ḻo' yodaon' naquen costumbr c̱he no nis yeḻa' guagw, no beyix̱e' chesote', na' nacle cha' chyib cuingaque', na' bichle da' zjazacan' par cuerp c̱hegaque' na'ze. Na' ba gosonen žin šlac Diosen' biṉa' gwše'e costumbr ca' len da' coben'. 
\p  
\v 11 Na' ṉa'a Criston' naque' bx̱oz blao c̱hecho na' ba bžin ža bx̱ie' costumbr güen ca'. Na' zoe' yaban' naque' bx̱oz c̱hecho lao Diosen', na' gan' zoen' zaca'chen ca yodao' da' goson beṉac̱hen' yežlio nga.  
\v 12 Na' bi bex̱oe' chen c̱he no šib no go'ṉ dao' cate' gwyo'e gwṉabe' cont Diosen' bezi'xene' xtoḻa'chon', san da' bnežjw cuine' gosote'ne' na' blalj xc̱hene' ṉec̱he xtoḻa'chon' tṉi'aze ḻe'e yag cruzen', da'nan' goc gwyo'e gan' zoa Diosen' na' ba beque'e xtoḻa'chon' toḻi tocaṉe.  
\v 13 Na' ley da' bzoj da' Moisésen' nyojen žan da' zan da' cheson beṉe' da' chonen cont bi chesaque' xilaže' len Diosen'. Na' cont yesyeyaque' xilaže' len Diosen' da' yoble, chyažjen gwže'e bx̱ozen' ḻegaque' xc̱hen no šib no go'ṉ na' nc̱hix̱en len de da' chega'aṉ cate' chosozeye' to vaca' dao'.  
\v 14 Na' xc̱hen Criston' da' bedelalje' ṉec̱he xtoḻa'chon' zaca'chen ca xc̱hen beyix̱e' ca', ḻe xc̱henen' cheyonen yic̱hjlažda'ochon' xilaže' len da' xiṉj da' ba bencho. Da'nan' bich nchoglaon c̱hecho gatcho ṉec̱he xtoḻa'chon', san soaczcho gonxencho Diosen' ben' zoa toḻi tocaṉe. Spiritw c̱he Diosen' goclenen Criston' bnežjo cuine' beque'e xtoḻa'chon', na' bibi xtoḻa' Criston' gota'. 
\p  
\v 15 Criston' bedelalj xc̱hene' cont gwzolao chac da' coben' dan' gwna Diosen' gone' cont soacho binḻo len ḻe'. Na' ba bx̱ie' da' coben' cont baḻteze beṉe' ba gwlej Diosen' šjasyenite' len ḻe' toḻi tocaṉe. Na' da' got Criston' bedelalj xc̱hene', da'nan gwnitlao xtoḻa' beṉe' ca' gosejnilaže' Diosen' šlac ṉe' chon žin dan' gwdix̱jue' da' nechw dan' gwne' gone' cont chio' beṉe' Israel soacho binḻo len ḻe'.  
\v 16 Cate' to beṉe' ba bene' testament, cate'ch ba gota'bia' ba got bena' ben testamenta', cana'ch gac can' žanṉa'.  
\v 17 Ḻe to testament bi gac can' žan šlac ṉe' mban ben' ben ḻen. Cate'ch ba gote' canan' gac can' žanṉa'.  
\v 18 Na' goc ca' len da' nechon' da' gož Diosen' da' x̱ozxta'ocho ca' gone' gaclene' ḻegaque'. Da'nan' bžie' bia' bosolalje' xc̱hen beyix̱e' cont gwxen.  
\v 19 Cate' da' Moisésen' beyož be'lene' da' x̱ozxta'ocho ca' diža' c̱he yogo' dan' bžia bia' Diosen' yesone' can' ža ley c̱hen', nach Moisésen' bži'e ḻegaque' xc̱hen go'ṉ dao' na' xc̱hen šib dao' na' nis. Bži'e ḻegaque' da' ca' len late' yiša' xa xila' da' mben color xṉa na' len to xis yix̱e' dao' da' nzi' hisopo. Ḻecze bži'en lao libren' gan' nyoj ley c̱hen'.  
\v 20 Na' da' Moisésen' gože' ḻegaque': “Chen ni ben Diosen' mandadw gwžia' le'e cate' gože' chio' nac goncho cont gaclene' chio' gac güen c̱hecho can' gwnen'.”  
\v 21 Na' ḻecz ca' bene' bži'e chenṉa' yodaon' na' yeso' ša' ca' bosoc̱hine' gan' gosonxene' Diosen'.  
\v 22 Ley dan' bzoj Moisésen' nžian bia' gwže'e bx̱ozen' chen ḻo yogo'ze bi da' chosoc̱hine' cont yesyeyaquen xilaže' lao Diosen'. Na' leyna' ḻecze žan še biṉa' lalj chen, Diosen' bi yezi'xene' xtoḻa' beṉac̱hen'. 
\s1 Criston' gote' blalj xc̱hene' cont beque'e xtoḻa' beṉe' chesejnilaže'ne' 
\p  
\v 23 Can' goc benen byen bosoži'e xc̱hen beyix̱e' ḻo' yodaon' na' ḻo da' ca' bosoc̱hine' yodaon' cont gosonen žin lao Diosen', na' yodaon' naquen con to ḻ gua'a ḻsaca' da' chzejni'in can' nac yaban'. Perw da' de yaban' byažjen to chen da' zaca'ch.  
\v 24 Na' gan' gwyo'o Criston' gague naquen to yodao' da' naquen con to ḻ gua'a ḻsaca' cont ṉezecho can' nac yaban'. Ḻe' beyepe' yaban' na' gwyo'e gan' zoa Diosen' cont chṉe' gualaz chio' lagüen'.  
\v 25 Bx̱oz blao c̱he beṉe' Israel gualaž c̱hecho ca' cheso'e yodaon' tṉi'a tgüiz gan' nzi' Latje gan' Zoa Dios na' chosoži'e chen c̱he beyix̱e', perw Criston' bi bnežjw cuine' zan ṉi'a gosote'ne'. Tṉi'aze blalj xc̱hene' ṉec̱he xtoḻa' beṉac̱hen'.  
\v 26 Šaca' byažjen blalj xc̱hene' zan ṉi'a, ba gote' zan ṉi'a gwzolaon cate' gwxete yežlion', perw bi benen byen gac c̱he' ca'. Bedelalj xc̱hene' tṉi'aze cate' gwna Diosen' ba bžin ža c̱he', cont chac cheque'e xtoḻa' beṉac̱h.  
\v 27 Na' can' chac c̱he beṉac̱hen', žin ža gat to toe' na' te yesate' nach ṉa Diosen' c̱he to toe' še yesezaca'zi'e o še yesenite' mbalaz.  
\v 28 Na' can' yesat beṉac̱hen' tṉi'aze, ca'cze bnežjw cuin Criston' tṉi'aze gosote'ne' cont chac cheque'e xtoḻa' beṉac̱hen'. Nach žin ža yide' da' yoble perw gague cont yeque'e xtoḻa' beṉac̱hen', san cont yec̱he'e beṉe' ca' chesebeze' batcan' yide' nach ṉite' mbalaz len ḻe'. 
\c 10  
\p  
\v 1 Ley da' bzoj da' Moisésen' len costumbr da' nžian bia' goncho cate' gonxencho Diosen' bzejni'in chio' late'lasze c̱he da' güen da' ba chac c̱hecho ṉa'a ba bid Criston'. Perw leyna' bi goc yocoben yic̱hjlaždao' beṉe' ca' gosejnilaže' Diosen' ḻa'czḻa' gosote' beyix̱e' yogo' iz.  
\v 2 Šaca' yic̱hjlažda'ogaque' beyaquen güen cate' gosote' beyix̱e' ca' na' cate' bx̱oz ca' bosoži'e ḻegaque' xc̱hemban' ṉec̱he xtoḻa'gaquen', ba gwnitlao xtoḻa'gaquen' to ši'ize šaca', na' bich bi yesacde' ḻo' yic̱hjlažda'ogüen' c̱he da' xiṉjen' chesonen'.  
\v 3 Perw da' chesote' beyix̱e' ca' na' bichle da' chesone' ṉec̱he xtoḻa'gaquen' to to iz, bi chac yesanḻaže' zjanape' doḻa'.  
\v 4 Ḻe xc̱hen no go'ṉ dao' no šib dao' bi gac yeca'an xtoḻa' beṉac̱h. 
\p  
\v 5 Da'nan' cate' Criston' bide' yežlio nga gože' Diosen': 
\q1 Dan' chesote' beyix̱e' na' dan' chjasesane' bichle da' chjasesane' laguo', gague da' can' zelažo'. 
\q1 Zelažo' gwnežjw cuina' gona' can' chazlažo', ḻe da'nan' beno' cont golja beṉac̱h. 
\q1  
\v 6 Da' chesote' beyix̱e' chosozeye'ba' laguo' na' yogo' da' ca' chesone' cont yezi'xeno' xtoḻa'gaquen', gague da' can' chbedo'. 
\q1  
\v 7 Da'nan' gwnia' can' nyoj ḻe'e libr gan' žan: “Dios c̱hia', za'a nga zedeyena' con can' chazlažo'.” 
\m  
\v 8 Zgua'tec Criston' gože' Diosen': “Dan' chesote' beyix̱e' na' dan' chjasesane' bichle da' chjasesane' laguo', na' dan' chosozeye' beyix̱e' cont yezi'xeno' xtoḻa'gaquen', gague da' can' zelažo' na' gague da' can' chbedo'”, ḻa'czḻa' leyna' nžian bia' yogo' da' ca'.  
\v 9 Nach Criston' gože' Diosen': “Za'a nga zedeyena' con can' chazlažo'”. Da'nan' ṉezecho ba bzoe' to šḻa'ale dan' bžie' bia' gotcho beyix̱e' cont yezi'xene' xtoḻa'chon', na' gualaz ḻen, blalj xc̱hen Criston' cont beque'e xtoḻa'chon'.  
\v 10 Na' da' ben Jesucriston' con can' gwyazlaže' Diosen' cate' bnežjw cuine' gosote'ne' tṉi'aze cani', da'nan' ba beyac yic̱hjlažda'ocho xilaže' lao Diosen', chio' chejnilaže'chone'. 
\p  
\v 11 To to bx̱oz c̱he beṉe' Israel gualaž c̱hecho ca' con nita'cze' chesotcze' beyixen' tža tža na' chosoži'e xc̱hemba' can' ža leyna' cheyaḻa' yesone', ḻa'czḻa' xc̱hen beyix̱en' bi gac yeca'an xtoḻa' beṉac̱hen'.  
\v 12 San Criston' tṉi'azen' bnežjw yeḻa' mban c̱he' na' zaca'czen cont yeca'an xtoḻa' beṉac̱hen' toḻi tocaṉe. Na' beyož bnežjw cuine' zjaychi'e gan' chnabi'e txen len Diosen'.  
\v 13 Na' zoe' chbeze' žin ža yosozex̱jw yic̱hj yogo' beṉe' chesegue'e ḻe' na' yosozenague' c̱he'.  
\v 14 Na' da' bnežjw cuin Criston' tṉi'aze cani', bene' cont chio' naccho ḻo na' Diosen' beyac lažda'ochon' xilaže' toḻi tocaṉe.  
\v 15 Na' Spiritw c̱he Diosen' ḻecze benen cont ṉezecho naquen ca', ḻe nyojen, žan: 
\q1  
\v 16 Quinga gona' gaclena' ḻegaque' cate' žin ža, 
\q1 gona' cont šo' yic̱hjgaque' da' nžia' bia' yesone', 
\q1 na' gona' cont yesyebeden' ḻo' yic̱hjlažda'ogaquen', 
\q1 can' ža X̱ancho Diosen'. 
\m  
\v 17 Na' nyoj yeto da' ža Spiritw c̱he Diosen', žan: 
\q1 Na' bich gona' cuent še bi da' malen' ba gosonen' o še bi xtoḻa'gaque' ba gota'. 
\m  
\v 18 Na' cate' ba gwnitlao xtoḻa'chon' bich chyažjen gotcho no beyix̱e' ṉec̱he xtoḻa'chon'. 
\s1 Cheyaḻa' soacho gonxencho Diosen' ṉeca žebcho 
\p  
\v 19 Beṉe' migw, ṉezecho gac šo'cho gan' zoa Diosen' ṉeca žebcho, ḻe Jesucriston' blalj xc̱henen' na' beque'e xtoḻa'chon'.  
\v 20 Guac ṉacho gwsaljue' to nez cobe, to da' choṉen chio' yeḻa' mban toḻi tocaṉe, ḻe da' bnežjw cuine' gote' ṉec̱he chio', guac šo'cho gan' zoa Diosen' na' bich naquen ca part yodaon' da' ngaše' len lache' da' ze gan' nono gac šo'.  
\v 21 Na' zoa bx̱oz blao c̱hechon' naque' beṉe' zaca'chgua, na' naque' X̱an yogo' chio' gwlej Diosen' cont chejnilaže'chone'.  
\v 22 Da'nan' cheyaḻa' soacho gonxencho Diosen' do yic̱hj do laže'cho ṉeca žebcho, na' cheyaḻa' soacho šejḻe'cho xc̱hen Jesucriston' ba beca'an xtoḻa'cho, ḻe ṉezecho ba gwzoacho nis da' chejnilaže'chone'.  
\v 23 Na' can' gwzolaocho be'cho diža' gwnacho šjayzoacho len Diosen', ca'cze cheyaḻa' goncho bate'teze, na' da' ḻi šjayzoaczcho len Diosen', ḻe zoacze' chone' con can' gwnen'.  
\v 24 Ḻecze cheyaḻa' yeyiljwlaže'cho nacle gaclen ḻježcho cont gaquech ḻježcho tocho yetocho na' gonchcho da' güen.  
\v 25 Na' bi cuejyic̱hjcho da' chdop chžagcho txen chonxencho Diosen' ca chesebejyic̱hj baḻ beṉe'. Cheyaḻa' ṉeyoe ḻježcho soaczcho šejnilaže'cho Criston', na' gonchcho ca' ṉa'a ba nacbia' ba zoa te c̱he yežlion'. 
\p  
\v 26 Še ṉe' chontezechcho da' xiṉj ḻa'czḻa' ba nombia'cho diža' ḻi c̱he Criston', bibi de bichle da' gon žin cont ṉitlao xtoḻa'chon'.  
\v 27 Na' cheyaḻa'cze žebcho goṉ Diosen' cont saca'zi'cho še ca', na' yeyejcho ḻo yi' gabiḻen' gan' cuiayi' yogo' beṉe' chesegue'e Diosen'.  
\v 28 Cani' da' x̱ozxta'ocho ca' gosote' note'teze beṉe' bi bzenague' c̱he ley da' bzoj da' Moisésen', bi besyeyaše'de' ḻegaque', con še gwnita' c̱hope o šoṉe beṉe' toz can' goso'e diža' c̱he da' xiṉjen' none'.  
\v 29 Na' da' mal juisyoch gac c̱he chio' še gue'echo Xi'iṉ Diosen' na' gaquecho bibi zaca' xc̱hen Criston' da' blalje' cont beque'e xtoḻa'chon' na' še ṉecho c̱he Spiritw c̱he Dios ben' nži'ilaže'de' chio'. Ḻe da' blalj xc̱hen Criston' gwzolao chac da' cobe da' gwna Diosen' gone' gaclene' beṉe' yesejnilaže'ne'.  
\v 30 Nombia'cho Diosen' na' ṉezecho ḻen' gwne': “Neda' yoži'a c̱he da' mal da' chesone' na' neda' gona' cont yesezaca'zi'e.” Na' ḻecze nyojen žan: “X̱ancho Diosen' c̱hogbi'e nac gac c̱he beṉe' ca' ba gwque'e ca xi'iṉe'.”  
\v 31 Na' ḻeca naquen da' žebcho še cuejyic̱hjcho Diosen' ben' zoa toḻi tocaṉe, ḻe gone' cont saca'zi'cho toḻi tocaṉe. 
\p  
\v 32 Perw ḻe šjayza'laže' can' bchejele da' zan da' gwdi gwxaca'le cate' beyož gwyo'o be'ni' c̱he Criston' ḻo' yic̱hjlažda'olen'.  
\v 33 Tgüeje gosezi'diže' le'e lao yogo' beṉe' yež na' tgüeje cate' gosotlate' le'e na' bichle da' bosoc̱hi bososaque' le'e, na' da' juisyw da' goquele cate' gosonde' beṉe' ḻježle ca'.  
\v 34 Beyaše'le beṉe' ḻježcho ca' beṉe' gosata' ḻižya na' goclenḻe ḻegaque', na' gwzoale mbalaz ḻa'czḻa' beṉe' besegue'e le'e goseque'e bi da' gota' c̱hele, ḻe ṉezele de da' zaca'ch c̱hele yaban' da' bi te c̱hen.  
\v 35 Da'nan' bi cuejyic̱hjle da' chejnilaže'le Diosen', ṉeca žeble, ḻe žin ža cate' soachguale mbalaz.  
\v 36 Cheyaḻa' gwyo gwc̱hejle cont yeyož gonḻe yogo'ḻoḻ da' chnalaže' Diosen', na' tena' gone' cont soale mbalaz toḻi tocaṉe can' gwne'.  
\v 37 Can' nyoj Xtiža' Diosen', žan: 
\q1 Ḻa' žinte ža yid ben' seḻa' gan' zoalen', bich šede'. 
\q1  
\v 38 Na' xi'iṉa' beṉe' zjanac beṉe' güen len neda' yesata' yeḻa' mban c̱he' toḻi tocaṉe da' chesejnilaže' neda'. 
\q1 Na' še bich yesejnilaže' neda', bich yebeda' ḻegaque'. 
\m  
\v 39 Perw chio' bi naccho ca beṉe' ca' bich yesejnilaže'ne', beṉe' yesebiayi'. Chio' zoaczcho chejnilaže'chone' na' šjayzoacho len Diosen' toḻi tocaṉe. 
\c 11  
\s1 Da' chejnilaže'cho Diosen' naquen to da' zejen 
\p  
\v 1 Še chejnilaže'cho Diosen' ṉezecho gac da' güen da' chbezcho gac, na' ṉezecho gon Diosen' gac can' že' da' biṉa' le'echo.  
\v 2 Baḻ beṉe' gwlas ca' bebe Diosen' ḻegaque' da' gosejnilaže'ne'. 
\p  
\v 3 Da' chejnilaže'chone' chejḻe'cho con gwṉie' na' goc yaban' len yežlion'. Na' bibi bc̱hine' da' le'echo cate' bene' yogo' da' ca' chle'echo. 
\p  
\v 4 Cani' da' x̱ozxta'ocho Abel gwyejnilaže' Diosen' na' da'nan' bnežjue' Diosen' to da' gocch da' güen ca da' bnežjw beṉe' biše' Caín. Na' dan' bebe Diosen' dan' bnežjw Abelen' ḻe', da'nan' gwṉeze Abelen' naque' beṉe' güen len Diosen'. Na' ḻa'czḻa' ba got Abelen', da' gwzoe' gwyejnilaže' Diosen', naquen ca to da' chṉeyoen chio' soaczcho šejnilaže'cho Diosen'. 
\p  
\v 5 Na' ḻecze da' x̱ozxta'ocho Enoc gwzoe' gwyejnilaže' Diosen', na' da'nan' Diosen' bezi' beque'ene' šlac ṉe' mbane'. Bi gote', con noch no ble'e ḻe'. Na' nyoj Xtiža' Diosen', žan Diosen' bebede' Enoquen' šlac gwzoe' yežlion'.  
\v 6 Na' Diosen' bi chebede' note'teze beṉe' bi chejnilaže'ne'. Ḻe note'tez beṉe' yoḻ güiže' Diosen' cheyaḻa' šejḻe'e zoacze Diosen' na' šejḻe'e gwnežjue' yeḻa' mban toḻi tocaṉe c̱he note'tez beṉe' ṉabden' ḻe' do yic̱hj do laže'. 
\p  
\v 7 Na' ca nac da' Noé, ḻecze gwyejnilaže' Diosen', na' cate' Diosen' bosṉisde' ḻe' can' za' gac, gwyejḻe' Noén' can' gož Diosen' ḻe', na' do bžebe' bene' to barcw gan' gwyo'e len beṉe' ḻo' yo'o c̱he' ca' cont bi gosate' ḻo nisen'. Na' da' gwyejḻe' Noén' can' gwna Diosen', blo'ede' yezica'chle beṉe' že' na' zjanape' doḻa' da' bi bosozenague' c̱he Diosen'. Na' ḻecze da' gwyejnilaže' Diosen', goc gwna Diosen' naque' beṉe' güen len ḻe'. 
\p  
\v 8 Da' Abrahanṉa' ḻecze gwyejnilaže' Diosen'. Da'nan' bzenague' cate' boḻ güiž Diosen' ḻe' na' gože'ne' šeje' ga de to yežlio zito' da' gaquen c̱he'. Na' gwyeje' ḻa'czḻa' bi nombi'e latjen'.  
\v 9 Na' Abrahanṉa', da' gwyejnilaže' Diosen' jasoe' laž beṉe' zito' da' gwna Diosen' gac c̱he' na' gac c̱he xi'iṉ diaža c̱he'. Gwzoe' ḻo' yo'o de lache'ze na' ḻecz ḻo' yo'o de lache'ze gwnita' xi'iṉe' Isaaquen' na' xi'iṉ xesoe' Jacob beṉe' ḻecze gož Diosen' gac yežlion' c̱hegaque'.  
\v 10 Abrahanṉa' gwzoa gwleze' ca' ḻo yežlion', ḻe gwṉezde' žin ža šjayzoe' gan' zoa Diosen' gan' naquen to ciuda güen da' bi te c̱hen, ciuda da' ben Diosen'. 
\p  
\v 11 Na' Saran' no'ol nac no'ol c̱he Abrahanṉa', ḻa'czḻa' naque' beṉe' güiž na' naque' beṉe' gole par soa xi'iṉe', Diosen' bene' to yeḻa' guac cont gwzoa xi'iṉe', ḻe gwyejḻe'e gon Diosen' con can' gwne' gone'.  
\v 12 Ca' goquen' gwzoa bi' c̱he da' Abrahanṉa' ḻa'czḻa' goque' beṉe' gole par soa xi'iṉe', nachen' xi'iṉ diaža c̱he' gosaque' beṉe' zan can' zjanac beljw ca' na' can' nac yox da' chi' cho'a nisdaon' da' nono chac gwlab. 
\p  
\v 13 Yogo' beṉe' ca' ṉe' chesejnilaže' Diosen' cate' bžin gosate'. Na' ḻa'czḻa' biṉa' gac ḻo na'gaque' dan' gože' ḻegaque' gac c̱hegaquen', bi gosacžejlaže', san gwnite' mbalaz gosejḻe'e gwžin ža gon Diosen' can' gwnen'. Goso'e diža' zjanaque' ca beṉe' zito' len beṉe' že' ḻo yežlion' na' bibi lažgaque' de ḻo yežlion'.  
\v 14 Na' da' goso'e diža' bibi lažgaque' de yežlion', nacbia' gosezelaže' yesyežine' ga yoble gan' gac lažgaque'.  
\v 15 Šaca' gosone' xbab c̱he yežen' gan' gosaljen' naquen lažgaque', gota' latje jaya'aque' šaca', perw bi gosone' xbaben' ca'.  
\v 16 Gosezelaže' yesyežine' yaban', ḻe gosejḻe'e na'len' nac lažgaque', na' goseṉezde' nacchen güench ca yežlion'. Da'nan' Diosen' bi cheto'ede' c̱hegaque' že' naque' Dios ben' chesonxene', na' ba benšagüe' to ciuda gan' zjanite'. 
\p  
\v 17 Na' Abrahanṉa' da' gwyejnilaže' Diosen' da'nan' bzenague' cate' Diosen' bene' ḻe' prueba gože'ne' cheyaḻa' got xi'iṉe' Isaaquen' lao Diosen' cont gonxene'ne'. Ba zoa gote' xi'iṉen' ḻa'czḻa' gwṉezde' Diosen' gože'ne':  
\v 18 “Gona' cont ṉita' xi'iṉ diaža c̱hio' beṉe' yesac xi'iṉ diaža c̱he Isaaquen'.”  
\v 19 Da' Abrahanṉa' bec̱hoglaže' gote'be', ḻe gwṉezde' Diosen' chac chosbane' beṉe' guat. Perw na' Diosen' bi be'e latje gote'be'. Da'nan' guac ṉacho bosbane'be' ladjo beṉe' guaten', ḻa'czḻa' gague gotbe'. 
\p  
\v 20 Gwdechle Isaaquen' gwyejnilaže' Diosen'. Da'nan' gwṉabde' Diosen' gone' güen len xi'iṉe' Jacob na' Esaú.  
\v 21 Ḻecze da' Jacoben' gwyejnilaže' Diosen'. Da'nan' cate' ba zoa gate', gwṉabde' Diosen' gone' güen len xi'iṉ xesoe' ca' bin' gosac xi'iṉ da' José. Na' bc̱heque' yic̱hje' benxene' Diosen' nc̱hiše'teze' carrot c̱he'.  
\v 22 Na' da' Josén' gwyejnilaže' Diosen', na' gwyejḻe'e žin ža yesyechoj beṉe' gualaž c̱he' ca' Egipton' can' gwna Diosen'. Nachen' cate' ba zoa gate' bžie' bia' yesyeyo'e žit beṉat c̱hen' cate' yesyeya'aque'. 
\p  
\v 23 Cate' golje da' Moisésen', da' ḻeca gosejnilaže' x̱axṉe'en Diosen', bi besežebe' yesyedabague' dan' bžia bia' reyen' yesone', gwne' cheyaḻa' yesote' bi' byo c̱hegaque' ca'. Šoṉe bio' bosocuaše'be' ližgaquen', ḻe gosacde' nacchguabe' xdan.  
\v 24 Nach bi' no'ol c̱he rey beque'ebe' bosc̱ha'ogüe'be'. Perw cate' ba gwcha'o da' Moisésen' bžone' yesone' ḻe' ca xi'iṉ bi' no'ol c̱he rey c̱he Egipton', ḻe gwyejnilaže' Diosen'.  
\v 25 Da'nan' gwyazlaže'che' bžaglagüe' txen len beṉe' gualaž c̱he' ca' yogo' dan' bososaca'zi' beṉe' Egipto ca' ḻegaque', clel ca gone' txen len beṉe' Egipto ca', ḻe gocbe'ede' yob te c̱he yeḻa' chebe c̱he da' xiṉj ca' cheson ḻegaque'.  
\v 26 Goclaže' bžaglagüe' can' bžaglao Criston' cont bene' can' gwyazlaže' Diosen', bi gwzelaže' gac c̱he' yogo' yeḻa' gwṉi'a da' de c̱he beṉe' Egipto ca', ḻe gwṉezde' gwžin ža gon Diosen' cont soe' mbalaz.  
\v 27 Na' da' gwyejnilaže' Diosen', bi bžebe' rey cate' bžin ža besyechoje' Egipton' ḻa'czḻa' reyna' bža'achgüe' ḻegaque', con gwzoacze' bzenague' c̱he Diosen'. Gwṉezde' zoacze Diosen' ḻa'czḻa' bi chle'echone'. 
\p  
\v 28 Nach Moisésen' da' gwyejnilaže' Diosen' bžie' bia' da' x̱ozxta'ocho ca', beṉe' že' to to yo'o gosote' to xila' dao' na' bosoži'e xc̱hemban' ližgaquen', cont angl beṉe' nsa' yeḻa' got bibi goc gonde' bi' byo nechw ḻo' to to yo'o.  
\v 29 Na' da' x̱ozxta'ocho ca' gwnita' cani', da' gosejnilaže' Diosen' da'nan' Diosen' bene' cont Nisdao' Xṉan' goquen c̱hople, na' bla' yo biž gachoḻen cont goc goseḻaguen'. Perw beṉe' Egipto ca' cate' gosaclaže' ḻeze yeseḻague' nisdaon', bocuaše' nisa' gan' chesedien', na' gosate' gose'eje' nisen'. 
\p  
\v 30 Ḻecze da' gosejnilaže' da' x̱ozxta'ocho ca' Diosen', da'nan' Diosen' bene' cont bebix̱ ze'e da' gwyec̱hj doxen ciuda Jericó cate' gosec̱hje' ze'en yogo' ža lao gaže ža.  
\v 31 Na' da' no'olen' le' Rahab, no'olen' goque' no'ol zḻe', ḻecze gwyejnilaže' Diosen', na' da'nan' bi gwžiaye'e txen len yezica'chle beṉe' Jericó beṉe' bi bosozenague' c̱he Diosen', ḻe blebe' chop da' x̱ozxta'ocho ca' ližen' cate' jasegüia jaseṉe'e lažen'. 
\p  
\v 32 Ba gwnita'ch beṉe' zan beṉe' gosejnilaže' Diosen', perw bi de tiemp gua' diža' c̱he da' ben' gože' Gedeón, c̱he da' ben' gože' Barac, c̱he da' ben' gože Sansón, c̱he da' ben' gože' Jefté, c̱he da' rey David, c̱he da' Samuel, na' c̱he yezica'chle beṉe' goso'e xtiža' Diosen' cani'.  
\v 33 Da' gosejnilaže' Diosen' besechoje' gosone' gan cate' gosediḻe' len no rey, na' baḻe' gosaque' beṉe' gwnabia' na' gosone' byen goson beṉe' yoble da' güen, yebaḻe' besele'ede' ben Diosen' bi da' güen da' gwne' gone' len ḻegaque', yebaḻe' Diosen' bene' cont bež znia bi gosagwba' ḻegaque' na' bi gosoneba' ḻegaque' zi' cate' gosegüe'e ḻegaque' gan' že'ban'.  
\v 34 Ḻecze da' gosejnilaže' Diosen', baḻe' bi goseye' cate' beṉe' bosozaḻe' ḻegaque' ḻo yi', yebaḻe' besyele' cate' beṉe' gosaclaže' yesote' ḻegaque' len spada, yebaḻe' beyon Diosen' ḻegaque' beṉe' gual cate' bich zjanale', yebaḻe' goclene'ne' gosaque' soldadw gual cont gosone' gan cate' soldadw beṉe' zito' gosediḻlene' ḻegaque'.  
\v 35 Na' gwnita' no'ol ca' da' gosejnilaže' Diosen' da'nan' Diosen' bosbane' no beṉe' ḻo' yo'o c̱hegaque' ladjo beṉe' guat ca'. 
\p Na' gwnita' beṉe' yoble, da' gosejnilaže' Diosen' da'nan' gosate', bi gosaclaže' yesyele' ḻo na' beṉe' mal ca'. Goso'e latje bosoc̱hi bososaque' ḻegaque', ḻe goseṉezde' gwžin cate' Diosen' yec̱his yosbane' ḻegaque' ladjo beṉe' guat ca' cont yesenite' len ḻe'.  
\v 36 Gwnita' yebaḻ beṉe' ḻeca gosezi'diža' beṉe' ḻegaque' na' ḻeca goseyine' ḻegaque', na' bosoc̱heje' ḻegaque' gden na' goseyix̱jue' ḻegaque' ḻižya.  
\v 37 Na' beṉe' ca' besegue'e ḻegaque' gosote' ḻegaque', baḻe' bosoc̱heḻe' ḻegaque' yej, yebaḻe' bosozoxje' cuerp c̱hegaquen' len sier, yebaḻe' gosote' len spada. Na' baḻ beṉe' ca' gosejnilaže' Diosen' benen byen gosaše' yix̱e' zjanyaze' no xa xila' no xa šib. Bibi gota' c̱hegaque', ḻeca nyaše' gosac c̱hegaque' catec bosoc̱hi bososaca' beṉe' ḻegaque'.  
\v 38 Gosaš goselaže' do latje daš, do ya'adao', do ga ze bloj na' ga zoa no liž beyix̱e'. Yogo' da' ca' goc c̱he beṉe' ca' gosejnilaže' Diosen', ḻa'czḻa' zjazaca'chgüe' na' beṉe' že' yežlio nga bi zjazaque' yesenite' txen len ḻegaque'.  
\v 39 Diosen' bebede' yogo' beṉe' ca' da' gosejnilaže' ḻe', perw šlac gosenite' biṉa' gone' yogo' da' güen da' gwne' gone' c̱he xi'iṉ diaža c̱he da' Abrahanṉa'.  
\v 40 Ḻe goclaže' gone' ga gac c̱he chio' zoacho ṉa'a yogo' da' güen da' gwne' gone', cont txen len beṉe' ca' gosejnilaže'ne' cani', yeyož gaccho can' chazlažen'. 
\c 12  
\s1 Cheyaḻa' soacho goncho xbab c̱he Jesúsen' 
\p  
\v 1 Ṉezecho ba gwnita' beṉe' zan gosone' da' güen ṉec̱he da' gosejnilaže' Diosen', na' dan' gosonen' chzejni'in chio' can' cheyaḻa' goncho. Da'nan' cheyaḻa' gwzoacho ca'ale še bi da' chžonen goncho can' chazlaže' Diosen' na' cuejyic̱hjcho bi da' xiṉj da' choncho, ḻe da' xiṉjen' chziye'czen chio'. Na' cheyaḻa' soatezcho goncho can' ža Diosen' sin cbi yeche'echo.  
\v 2 Jesúsen' bene' cont gwzolao chejnilaže'cho Diosen' na' gaclene' chio' cont soaczcho šejnilaže'chone' yežintecho gan' zoe'na'. Na' cheyaḻa' soacho goncho xbab ca Jesúsen' byo bc̱heje' len da' gwdi gwxaque' cate' gosote'ne' ḻe'e yag cruzen'. Bi bžone' yesonde' ḻe' da' zan da' naquen da' zban juisyw, ḻe gwṉezde' za' gon Diosen' cont soe' mbalaz len ḻe'. Na' ṉa'a Jesúsen' ba chi'e chnabi'e txen len Diosen'. 
\p  
\v 3 Cheyaḻa' goncho xbab can' byo bc̱hejlaže' Jesúsen' len yogo' da' ca' gosone beṉe' mal ca' ḻe' na' bene' can' gwna Diosen'. Na' ca'cze cheyaḻa' gwyo gwc̱hejlaže'cho goncho can' chazlaže' Diosen' ḻa'czḻa' še chaquechon zdebe; bi cheyaḻa' yeche'echo.  
\v 4 Da' zan da' ba bžaglaole chdiḻlenḻe da' malen', perw biṉa' lalj xc̱henḻe na' biṉa' yesote' le'e.  
\v 5 ¿Ba gonḻaže'le can' ža Diosen' chṉeyoede' chio' can' chon beṉe' chṉeyoe xi'iṉe'? Nyoj xtiže'na', žan: 
\q1 Xi'iṉdagua', bi gacdo' bibi zejen da' chnežjo X̱ancho Diosen' le' da' saca'zi'o' cate' chono' bi da' xiṉj, 
\q1 na' bi gaco' tole cate' chdiḻe' le'. 
\q1  
\v 6 Ḻe X̱ancho Diosen' chzejni'ide' yogo' beṉe' chacde', 
\q1 na' chnežjue' da' saca'zi' yogo' beṉe' ba gwque'e ca xi'iṉe' cate' chesone' da' xiṉj. 
\m  
\v 7 Cheyaḻa' gwyo gwc̱hejlaže'cho cate' Diosen' choṉe' chio' da' saca'zi'cho, ḻe chonde' chio' ca beṉac̱hen' chonde' xi'iṉgaque'. Ḻe yogo'ze bidao' chnežjo x̱aben' ḻebe' castigw cate' chontezbe' da' xiṉj.  
\v 8 Na' še bi choṉ Diosen' da' saca'zi'cho cate' chontezcho da' xiṉjen', zeje diža' bi naccho xi'iṉe', ḻe yogo' beṉe' ba gwque'e ca xi'iṉe' chnežjue' da' yesezaca'zi'e cate' chesonteze' da' xiṉjen'.  
\v 9 Yogo' x̱axṉa'cho bososgole' chio' yežlio nga na' gosoṉe' castigw c̱hecho cate' bi da' xiṉj bencho, na' ṉezecho ca'cze cheyaḻa' yesone'. Nacchxe cheyaḻa' gwzenagcho c̱he X̱acho Diosen' bite'teze da' chzejni'ide' chio', cont šjayzoacho len ḻe' toḻi tocaṉe.  
\v 10 Na' x̱axṉa'chon' to c̱hop izzen' šlac bososgole' chio' gosoṉe' castigw c̱hecho con ca gosaclaže'. San Diosen' ṉezde' bi da' nac güen par chio', na' chdiḻe' chio' na' choṉe' da' saca'zi'cho cont gaclenen chio' soacho goncho da' güen na' gac lažda'ochon' xilaže' can' nac lažda'ogüen'.  
\v 11 Na' bite'tez da' chyi chzaca'cho, šlac chaquen bi chazlaže'chon, perw cate' ba gwden chaclenen goncho da' zej to ḻicha na' chaclenen soacho binḻoch len xbab da' yo'o ḻo' yic̱hjlažda'ochon'. 
\s1 Diosen' goṉe' da' saca'zi'cho še bi gwzenagcho c̱he' 
\p  
\v 12 Da'nan' ḻe soa ḻe gon can' chazlaže' Diosen' sin cbi yeche'ele.  
\v 13 Ḻe soa ḻe gon da' güen cont gaclenḻe beṉe' ca' ṉe' chesacžejlaže' naquen' yesone' cont ḻegaque' yosozenagche' c̱he Diosen' na' bi yesebejyic̱hje' xtižen'. 
\p  
\v 14 Ḻe yeyiljwlaže' nacle gonḻe soale binḻo len yogo'cze beṉe', na' ḻe gwzenag c̱he Diosen' cont gac lažda'olen' xilaže', ḻe nono yežin gan' zoa Diosen' še bi nac lažda'ogüen' xilaže'.  
\v 15 Ḻe gaclen ḻježle cont ṉe tole bi ganḻaže'le catequen' nži'ilaže' Diosen' chio', ḻe cate' chzolaocho choncho güedenag len Diosen', bedao' chc̱ha'o chxenen na' guacte gonen cont beṉe' zan yesonche' da' xiṉj.  
\v 16 Bi gata'lenḻe beṉe' byo bi nac beṉe' c̱hele o no'ole bi nac no'ol c̱hele. Na' bi gue'ele da' naquen da' zaca' len Diosen' can' ben da' bene' gože' Esaú, ben' bše'ede' to platw yeḻa' guagw da' cheyaḻa' gwnežjo Diosen' ḻe' dan' golje' goque' beṉe' nechw.  
\v 17 Ṉezele gwdechle goclaže' yeyac ḻo ne'e da' bdie' ḻo na' beṉe' biše', perw bich bi goc bi gone' cont yeyaquen ḻo ne'e ḻa'czḻa' gwcheže' catec gwzelažen'. 
\p  
\v 18 Nža'le chac c̱he chio' ṉa'a na' can' goc c̱he da' x̱ozxta'ocho cani' cate' Diosen' bnežjue' ḻegaque' ley c̱hen'. Cate' betje' ḻo ya'a Sinaí gwyec̱hj yi' beḻ ya'ana', gwxoan žen, beyaquen c̱hoḻ, na' gwyec̱hjchgua be'.  
\v 19 Gosende' gwchež to trompeta, na' gosende' be' Diosen' diža' len ḻegaque'. Na' besežebchgüe' na' gosata'yoede' Moisésen' bich güe'len Diosen' ḻegaque' diža'.  
\v 20 Besežebchgüe', ḻe Diosen' ba gožle' ḻegaque' še noe' yesebigue' ḻo ya'an cheyaḻa' yesote'ne' yosoc̱heḻe'ne' yej, na' ḻecz ca' yesone' še len beyix̱e'.  
\v 21 Da' zaca' žebcho goc ḻo ya'an, lente da' Moisésen' gwne': “Ḻeca chaž chžeba' can' chaquen'.” 
\p  
\v 22 Perw chio' chejnilaže'cho Criston' ba naccho txen len Diosen' ben' zoa toḻi tocaṉe na' len yogo' angl c̱he' beṉe' že' yaban' chesonxene'ne', beṉe' zjanaque' beṉe' zan juisyw. Da'nan' guac ṉacho ba gwbiga'cho ḻo ya'a Sión dan' ḻecze nzin' ciuda Jerusalén da' chi' yaba gan' zoa Diosen'.  
\v 23 Na' naccho txen len yogo'ḻoḻte beṉe' chesedop chesežag chesonxene' Jesucriston' gate'teze, beṉe' zjanyoj lagaque' ḻe'e libr c̱he Diosen' da' de yaban'. Na' yogo' chio' chejnilaže'chone' zaca'lebcho ca bi' nechw to ḻo' yo'o, bi' chzi' byen c̱he x̱axṉa'be', ḻe si'cho da' güen da' goṉ Diosen' chio'. Na' naccho txen len Diosen' beṉe' c̱hoglaogüen' c̱he yogo' beṉac̱h še de xtoḻa'gaque'. Ḻecze naccho txen len beṉe' ca' ba gosat, beṉe' gosaque' beṉe' güen lao Diosen' da' gosejnilaže'ne', na' ṉa'a ba beyož zjanacyaṉe' can' chaclaže' Diosen'.  
\v 24 Na' naccho txen len Jesús ben' blalj xc̱hene' cont gwzolao chac da' coben' da' gwna Diosen' gone' gaclene' beṉac̱hen'. Na' blalj xc̱henen' cont ba bṉitlao Diosen' xtoḻa' chio' chejnilaže'chone'. Da'nan' xc̱hen Jesúsen' zaca'chen ca xc̱hen da' Abelen' da' gwlalj caten' betw beṉe' bišen' ḻe'. 
\p  
\v 25 Da' mal juisyw še goncho güedenag len Diosen' cate' chṉe' chio'. Bene' cont gosezaca'zi' da' x̱ozxta'ocho ca' cate' gosone' güedenag len xtižen' da' gwṉelene' ḻegaque' ḻo yežlion' cani', na' goṉche' da' saca'zi' chio' še goncho güedenag len xtižen' da' choe'lene' chio' ḻo' lažda'ochon' zoe' yaba na'ate.  
\v 26 Ḻeca gwxo' cate' Diosen' betje' ḻo ya'a Sinaín' cont be'lene' da' x̱ozxta'ocho ca' diža'. Na' ṉa'a ba gwne': “Gwžin ža cate' gona' x̱o' yežlion' da' yoble, perw gague yežlio na'zen', san lente yogo' da' chle'echo ḻe'e yaba.”  
\v 27 Na' da' gwne' gone' x̱o' da' yoble, zejen te c̱he yogo' da' ca' ben Diosen' da' chle'echo, perw bi te c̱he Diosen' na' c̱he yogo' da' güen da' chone' da' bi chle'echo.  
\v 28 Da'nan' cheyaḻa' güe'cho yeḻa' chox̱clen c̱he Diosen' da' gone' cont šjayzoacho mbalaz txen len ḻe' gan' chnabi'e, na' gague da' te c̱he da' güen da' gac c̱hecho len ḻe'. Nach ḻecz cheyaḻa' gacbe'echo beṉe' zaca'chgua nac Diosen' cont gonxenchone' do yic̱hj do laže'cho can' chazlažen'.  
\v 29 Cheyaḻa' gwzenagcho c̱hen', ḻe Dios c̱hechon' ḻeca chgue'ede' da' malen', na' seḻe' ḻo yi' gabiḻ beṉe' ca' bi yesyetiṉjde' c̱he da' xiṉjen', da'nan' zaca'lebde' ca yi' beḻ. 
\c 13  
\s1 Da' chazlaže' Diosen' goncho 
\p  
\v 1 Bitw gwsanḻe gaque ḻježle, ḻe yogo'cho chejnilaže'cho Jesucriston' naccho ca biše' ḻježcho.  
\v 2 Na' bi ganḻaže'le cheyaḻa' gwleble beṉe' za'ac zito' ližlen' beṉe' chesejnilaže' Jesucriston'. Baḻ x̱ozxta'ocho ca' cate' bosolebe' beṉe' zito' ližgaquen' bosolebe' angl beṉe' gwseḻa' Diosen' ṉeca gosacbe'ede'. 
\p  
\v 3 Cheyaḻa' gonḻe xbab c̱he beṉe' ḻježcho ca' chesata' ḻižya cont gaclenḻe ḻegaque'. Na' cheyaḻa' gonḻe xbab can' gaḻe'le šaca' chac c̱hele can' chac c̱he beṉe' ca'. Na' bi ganḻaže'le beṉe' ḻježcho bi da' chosoc̱hi chososaca' beṉe' ḻegaque', ḻe šlac ṉe' mbancho, cuerp c̱hechon' guac saca'zin' da' quinga. Na' cheyaḻa' gonḻe xbab can' gaḻe'le šaca' chac c̱hele can' chac c̱he beṉe' ca'. 
\p  
\v 4 Na' le'e nšagna'le, yogo'le ḻe soa do laže'le len no'ol c̱hele o beṉe' c̱hele na' bi talenḻe beṉe' yoble, ḻe Diosen' gone' saca'zi' beṉe' chesata'lene' no'ole bi zjanac no'ol c̱hegaque' o beṉe' byo bi zjanac beṉe' c̱hegaque'. 
\p  
\v 5 Bi cheyaḻa' selaže'cho mechon', san cheyaḻa' soacho becho bi da' dao' da' de c̱hecho, ḻe Diosen' ba gwne' c̱he to tocho: “Bi ganḻaža' le' na' bi cuejyic̱hja' le'.”  
\v 6 Da'nan' bibi de da' žebcho, na' to tocho guac ṉacho: 
\q1 X̱ana' Diosen' zoe' chaclene' neda'. 
\q1 Bi žeba' bi da' gone beṉac̱hen' neda'. 
\p  
\v 7 Ḻe šjayze'e beṉe' gwnita' bosozejni'ide' le'e xtiža' Diosen'. Ḻe gon xbab can' gosone' cont yogo'ze beṉe' gosacbe'ede' gosenite' gosejnilaže' Diosen', na' ḻe ṉita' ḻe šejnilaže' Diosen' can' gosonen'. 
\p  
\v 8 Na' can' nac yic̱hjlaždao' Jesucriston' ṉej ṉase, ca'czen' naque' ža ṉa'aža, na' ca'czen' gaque' toḻi tocaṉe.  
\v 9 Bi güe'le latje yeseziye' beṉe' le'e len bi diža' yoble da' chosozejni'ide', ḻe nža' xen can' chososed chosolo'e baḻe'. Da' chon Diosen' ḻo' lažda'ochon' ṉec̱he da' nži'ilaže'chgüede' chio', ḻenṉa' chaclenen chio', gague da' ca' chesena beṉe' cheyaḻa' ye'ej gagwcho. Na' ca nac da' ca' chesene' cheyaḻa' ye'ej gagwcho cont yebe Diosen' chio', biṉa' yesaclenen beṉe' ca' chesene' cheyaḻa' gagwchon, na' ṉeca gaclenen chio'. 
\p  
\v 10 X̱ancho Jesucriston' bnežjw cuine' gosote'ne' ṉec̱he chio', na' da' chejnilaže'chone' ba gwnitlao xtoḻa'chon'; perw beṉe' ca' ṉe' chosolalje' xc̱hen beyix̱e' na' chosozeye'ba' cate' cheseṉabe' yezi'xen Diosen' c̱hegaque', da' got Jesucriston' bi chaclenen ḻegaque'.  
\v 11 Ṉezecho tṉi'a tgüiz beṉe' nac bx̱oz blao c̱he beṉe' Israel gualaž c̱hecho ca' chesote' beyix̱e' na' chjasesane' xc̱hemba' ḻo' yodao' gana' nzi' Latje ga Zoa Dios cont chṉabde'ne' yezi'xene' xtoḻa' yogo'ḻoḻ gaque'. Nach yezica'chle bx̱oz ca' chosozeye' cuerp c̱he beyix̱e' ca' cho'a yežen'.  
\v 12 Na' ca ca'le goc c̱he Jesúsen' dan' gosote'ne' cho'a ciuda Jerusalénṉa' cate' bnezjw cuine' cont beque'e xtoḻa'chon' len xc̱hene' dan' blaljen'.  
\v 13 Da'nan' cheyaḻa' šejnilaže'cho Jesúsen' na' cuejyic̱hjcho costumbr gol ca', ḻa'czḻa' yesegue'e beṉe' chio' da' choncho ca'.  
\v 14 Gate'tez zoacho ḻo yežlio nga da' te c̱hen, perw chbezcho šjayzoalencho Diosen' ḻo ciuda da' bi te c̱hen.  
\v 15 Da' ba beca'a Jesucriston' xtoḻa'chon' cheyaḻa' güe'cho yeḻa' chox̱clen c̱he Diosen' yešlale mbancho, gonxenchone' len xtiža'chon'. Ḻenṉa' da' chaclaže' Diosen' güe'chone'.  
\v 16 Na' cheyaḻa' soacho goncho da' güen na' cheyaḻa' gwnežjwcho con gaca'te da' saque' gwnežjwcho gaclencho beṉe' bi de c̱hegaque', ḻe chazlaže' Diosen' cate' chonxenchone' choncho ca'. 
\p  
\v 17 Ḻe gwzenag c̱he beṉe' chososed cheselo'ede' le'e xtiža' Diosen' na' ḻe güe' latje yesene' naquen' gonḻe, ḻe chosogüia cheseṉe'e le'e cont chesaclene' le'e len yic̱hjlažda'olen', na' ḻegaque' cheyaḻa' yosyodie' cuent lao Diosen' še naquen' ba gosone'. Ḻe gwzenag c̱hegaque' cont yesyebede' na' cont da' chesone' bi gaquen to da' zdebe, ḻe še gonḻe güedenag len ḻegaque', bibi da' güen chga'aṉ c̱hele še ca'. 
\p  
\v 18 Ḻe ṉab cont gaclen Diosen' neto'. Ṉezeto' chonto' can' chazlaže' Diosen' na' chaclaže'to' gonto' con da' naquen güen.  
\v 19 Na' ḻeca chata'yoeda' le'e yoḻ güižle Diosen' ṉable yob gac yidcha' gan' zoalen'. 
\s1 Chṉabe' gaclen Diosen' ḻegaque' 
\p  
\v 20 Na' ṉa'a zoa Diosen' chone' cont zoa chbezcho binḻo len xbab da' yo'o ḻo' yic̱hjlažda'ochon'. Ḻen' bec̱his bosbane' X̱ancho Jesucriston' ladjo beṉe' guat, ḻe da' blalj xc̱henen' ḻe'e yag cruzen' gwzolao chac da' cobe da' gwna Diosen' gone' gaclene' beṉe' yesejnilaže'ne'; na' gague da' te c̱he dan' gwne' gonen'. Na' da' nži'ilaže' X̱ancho Jesucriston' chio', zaca'lebde' ca to beṉe' güeye' xila' beṉe' chon da' güen juisyw len be c̱he' ca'.  
\v 21 Na' chṉabda' Diosen' gaclene' le'e bite'tez da' chyažjele cont soale gonḻe yogo'te da' güen can' chazlažen', na' gone' cont gac yic̱hjlažda'ochon' cayaṉen' chaclaže' lagüe da' nombia'cho Jesucriston'. Ḻe gonxen Jesucriston' toḻi tocaṉe. Na' ca' gonšcaczcho. 
\p  
\v 22 Beṉe' migw, chṉabšca' bi gaquele zed da' ba bzoja' le'e chṉeyoeda' le'e nga, ḻe bitec naquen da' toṉe.  
\v 23 Na' chzenda' le'e beṉe' migw c̱hecho Timoteon' ba bechoje' ḻižyan' na' chbeza'ne' nga. Na' še yob yele'e nach c̱hi'ane' cate' yedeṉa'a le'e. 
\p  
\v 24 Ca nac neda', chguapa' tiox beṉe' blao ca' chosozejni'ide' le'e na' chosogüia cheseṉe'e le'e, na' ḻecze chguapa' tiox yogo' nochle beṉe' chesejnilaže' Diosen'. Beṉe' ḻježcho ca' za'ac Italia ḻecze chosoguape' le'e tiox. 
\p  
\v 25 Diosen' gaclenšque' le'e. Da' na'zen' chzoja'.