\id ACT  
\h Hechos 
\toc1 DAꞋ GOSON POSTLW CAꞋ 
\toc2 Hechos 
\toc3 Hch. 
\mt1 DAꞋ GOSON POSTLW CAꞋ 
\c 1  
\s1 Jesúsen' gwne' seḻe' Spiritw c̱he Diosen' 
\p  
\v 1 Teófilo, ca nac dan' bzoja' da' nechw, bzoja' yogo'ḻoḻ da' ben Jesúsen', na' ḻecze bzoja' yogo' dan' bsed blo'ede' cate' gwzolaote' bsed blo'ede'  
\v 2 žinten cate' beyepe' yaba. Šlac bsed blo'ede' gwleje' postlw c̱he' ca', na' Spiritw c̱he Diosen' bzejni'in Criston', na' Criston' gože' ḻegaque' nac yesone'.  
\v 3 Nach gwde gosot beṉe' mal ca' Jesúsen' na' gwde bebane' ladjo bene' guaten' nach jalo'elagüe' postlw c̱he' ca'. Na' da' zan da' bene' cont goseṉezde' mbanczen'. Na' gwdalene' ḻegaque' c̱hoa ža na' bzejni'ide' ḻegaque' can' chnabia' Diosen'. 
\p  
\v 4 Na' šlac ṉe' zoa Jesúsen' len postlw c̱he' ca' gože' ḻegaque' cbi yesyežaše' ciuda Jerusalénṉa'. Gwne': 
\p ―Ḻe yega'aṉ ḻe cueze gac can' gwna X̱a' Diosen' gac, ca dan' bzejni'ida' le'e.  
\v 5 Da' zaque' ben Juan da' bzoe' beṉe' nis, perw yeto c̱hope ža da' zaca'ch gac c̱hele dan' yedesoa Spiritw c̱he Diosen' ḻo' yic̱hjlažda'olen' ṉabi'an le'e. 
\s1 Jesúsen' beyepe' yaban' 
\p  
\v 6 Na' ža na'teze šlac ṉe' zjandop zjanžague' len Jesúsen' gose'ene': 
\p ―X̱anto' ¿ba bžin ža gono' cont yechoj nación Israel c̱hechon' ḻo na' beṉe' zito' ca'? 
\p  
\v 7 Jesúsen' gože' ḻegaque': 
\p ―Bitw naquen ṉezele bi ža bi hor gon X̱acho Diosen' da' ca' toze' ba bžie' bia' gone'.  
\v 8 Perw na' cate' yedesoa Spiritw c̱he'na' len le'e, gaclenen le'e len yeḻa' guac c̱henṉa' cont güe'le xtižan' ciuda Jerusalén ni, na' doxen ga mbane distritw Judean', na' distritw Samarian', na' doxen yežlion'. 
\p  
\v 9 Beyož gwna Jesúsen' ca', cheseṉa'te beṉe' ca' chesejnilaže' ḻe', beyepe' yaba to ḻo' bejw na' bich besele'ede' ḻe'.  
\v 10 Na' ṉe' cheseṉa'te beṉe' ca' ḻe'e yaban' gan' besele'ede' beyepe', cate'cze gosacbe'ede' ba zjazecha c̱hope angl len ḻegaque' beṉe' zjanyaz lache' šiš.  
\v 11 Na' beṉe' ca' c̱hope gose'e ḻegaque': 
\p ―Beṉe' Galilea, ¿bixc̱hen' chṉa'le ḻe'e yaban'? Can' ble'ele beyep Jesúsen' yaban' caten' bechoje' ladjwlen', can' le'eczele yide' da' yoble. 
\s1 Gosebeje' Matías cont goque' postlw laz Judasen' 
\p  
\v 12 Na' nite' ya'a dan' nzi' Ya'a Olivos na' jaya'aque' Jerusalénṉa'. Jerusalénṉa' naquen gaḻa'ze con ca'te' de ḻsens yesa'aque' ža c̱he Dios can' ža ley c̱he beṉe' Israel ca'.  
\v 13 Na' cate' besyežine' Jerusalénṉa' postlw ca' šnej na' beṉe' ca' zjanžague' gosegüe' gan' nite'na' ḻo' cuart zoa yic̱hjen'. Postlw ca' šnej beṉe' quinga: Pedro, Jacobo, Juan, Andrés, Felipe, Tomás, Bartolomé, Mateo, Jacobo xi'iṉ Alfeo, na' Simón ben' chon txen partid dan' nzi' cananista, na' Judas ben' nac beṉe' biše' Jacobon'.  
\v 14 Na' gosenita'teze postlw ca' šnej chosoḻ güiže' Diosen' txen len beṉe' ca' zjanaque' biše' Jesúsen' na' len María xṉa' Jesúsen' na' len yezica'chle no'ol ca' zjanžag. 
\p  
\v 15 Na' ca hora' Pedroa' zeche' ladjo to gayoa gaḻje beṉe' chesejnilaže' Jesucriston' cont be'lene' ḻegaque' dižan', na' gože' ḻegaque': 
\p  
\v 16 ―Beṉe' migw, Spiritw c̱he Diosen' benen cont rey David bzoje' na' be'e diža' c̱he Judasen' ben' gwc̱he' beṉe' ca' gosezen Jesúsen' gan' jasešague' ḻe'. Na' benen byen goc can' nyoj Xtiža' Diosen'.  
\v 17 Judasen' goque' txen len neto' na' bene' txen len neto' yogo'ḻoḻ dan' gwyo'o ḻo na'to' bento'.  
\v 18 Na' gosezi'e late' yežlio len mechw dan' gwxi' Judasen' bene' da' malen' bdie' Jesúsen' ḻo na' beṉe' ca'. Perw na' blažoe' cosyic̱hj gan' goḻadite' na' gošj ḻi'ena', doxen xjaloen' bchoj.  
\v 19 Yogo' beṉe' že' Jerusalénṉa' goseṉezde' can' goc c̱hen' na' da'nan' bososi'e yežlion' Acéldama na' xtiža'gaque'na' zejen Yežlio Chen.  
\v 20 Goc can' nyoj to salmo žan: 
\q1 Liže'na' gaquen to yo'o daš, nono soa na'. 
\m Na' ḻecze nyojen žan: 
\q1 Na' te beṉe' yoble yoḻane' žin dan' bene'. 
\p  
\v 21 ’Na' nga nita' beṉe' ba gosone' txen len chio' šlac gwdalen X̱ancho Jesúsen' chio'.  
\v 22 Ba gosone' txen gwzolaoten cate' da' Juan bzoe' ḻe' nis bžinten caten' beyepe' yaban', na' cheyaḻa' cuejcho toe' gone' txen len neto' postlw güe'to' diža' can' beban X̱ancho Jesúsen' ladjo beṉe' guat ca'. 
\p  
\v 23 Na' gosebeje' c̱hope beṉe', toe' José ben' le Barsabás, na' ḻecz le' Justo, na' ben' yeto Matías.  
\v 24-25 Nach bosoḻ güiže' Diosen' gose'ene': 
\p ―X̱anto', le' nombi'o yic̱hjlaždao' yogo'ḻoḻ beṉe'. Lao beṉe' ca' c̱hope blo'ešca neto' noe' ba gwlejo' cont gaque' postlw na' gone' xšinon' txen len neto'. Ḻe ca nac Judasen', gwlejyic̱hje' dan' ngo'o ḻo ne'e gone' na' ba zjayde' gan' naquen yeyeje' yeḻa' güen da' mal c̱he'na'. 
\p  
\v 26 Nach gosone' rifa cont goseṉezde' non' ba gwlej Diosen' na' Matíasen' bchoje' na' gosone' ḻe' cuent len postlw ca' yešnej. 
\c 2  
\s1 Can' goc cate' bla' Spiritw c̱he Diosen' 
\p  
\v 1 Na' bžin ža ḻṉi dan' že' Pentecostés, na' postlw ca' na' yogo'ḻoḻ beṉe' ca' ba gosejnilaže' Jesúcriston' zjandop zjanžague' toze latje.  
\v 2 Na' zejzenez goc to sšag ḻe'e yaban' ca sšag c̱he to be' bdono' gual na' nenxeje ḻo' yo'o gan' zjachi'ena'.  
\v 3 Na' besele'ede' gaḻa'ze yic̱hj to toe' gosezoa tgüeje yi' beḻ da' chaḻa'ṉiṉ.  
\v 4 Ca' goc jašo'o Spiritw c̱he Diosen' ḻo' yic̱hjlaždao' to toe', na' Spiriton' benen cont gosezolagüe' goso'e gwde gwdele diža' da' gosejni'i beṉe' zito' ca'. 
\p  
\v 5 Na' ca tiempen' beṉe' zan beṉe' Israel že' Jerusalénṉa' beṉe' chesonxene' Diosen', za'aque' doxen yežlion'.  
\v 6 Na' cate' gosende' chac sšaguen' gan' že' postlw ca', zan beṉe' Israel ca' besežague', na' ḻeca besyebande', ḻe to to postlw ca' bosozejni'ide' ḻegaque' len diža' da' chesejni'i to toe'.  
\v 7 Bi gosejni'ide' bin' chac na' besyebande' gosene': 
\p ―¿Gague beṉe' distritw Galilea beṉe' quinga?  
\v 8 ¿Nacxec̱hen' to tocho chenecho cheso'e diža' can' chesoe' beṉe' gualaž c̱hecho diža'?  
\v 9 Baḻcho naccho beṉe' nación Partia, na' baḻcho beṉe' nación Media, na' baḻcho beṉe' nación Elam, na' baḻcho beṉe' distritw Mesopotamia. Na' yebaḻcho beṉe' distritw Judea, na' yebaḻcho beṉe' distritw Capadocia, yebaḻcho beṉe' distritw Ponto, na' yebaḻcho beṉe' distritw Asia,  
\v 10 yebaḻcho beṉe' distritw Frigia na' beṉe' distritw Panfilia, na' yebaḻcho za'cho nación Egipto, na' yebaḻcho za'cho yež ca' zjachi' Africa do te ciuda Cirene. Na' chio' naccho cuent len beṉe' nación Roma, baḻcho goljcho naccho beṉe' Israel na' yebaḻcho ben cuincho txen len beṉe' Israel.  
\v 11 Na' baḻcho naccho beṉe' yež ca' zjachi' Creta na' beṉe' distritw Arabia. Na' gate'tez beṉe' naccho, yogo'cho chenecho chesoe' beṉe' distritw Galilea quinga xtiža'chon' da' chaccho, cheso'e diža' c̱he da' zan da' ba ben Diosen' da' zaca' yebanecho. 
\p  
\v 12 Na' yogo' beṉe' ca' besedobe' chosozenague' besyebande' na' gosacžejlaže' bin' chac, na' zane' gosene': 
\p ―¿Bi zejen dan' chaquen'? 
\p  
\v 13 Na' yebaḻe' goseṉeye'e gosene': 
\p ―¡Beṉe' quinga chesezožde'! 
\s1 Diža' dan' be' Pedroa' len beṉe' Israel ca' besežag 
\p  
\v 14 Na' Pedroa' gwzeche' lao ben' zjandop zjanžague' txen len postlw ca' yešnej na' be'e diža' zižje gwne': 
\p ―Le'e beṉe' Judea na' note'tezechle zoale ciuda Jerusalén ni, che'nda' gwzenagle c̱hia' na' gonḻe xbab c̱he da' za' ṉi'a le'e.  
\v 15 Beṉe' ḻježa' quinga bitw chesezožde' can' chaquele, ḻe ṉe' nac tempran.  
\v 16 Ba chac can' bzoj da' Joel ben' be' xtiža' Diosen' cani' bzoje' dan' gwna Diosen', žan: 
\q1  
\v 17 Cate' ba zoa žin ža cont yeyož yežlion', 
\q1 neda' Dios gona' cont Spiritw c̱hian' yedesoan len beṉe' že' doxen yežlion'. 
\q1 Na' gona' cont xi'iṉle ca' yeso'e xtiža'na', 
\q1 na' beṉe' byo xcuide' ca' yesele'edagüede' bi da' gona', 
\q1 na' güe'lena' beṉe' byo gol ca' diža' ḻo bišgal c̱hegaquen'. 
\q1  
\v 18 Na' yogo' beṉe' ca' chesejnilaže' neda', beṉe' byo na' no'ole, 
\q1 yedesoa Spiritw c̱hian' len ḻegaque' cont yeso'e xtižan'. 
\q1  
\v 19 Gona' cont yesele'e beṉac̱hen' da' zaca' yesyebande' ḻe'e yaban' na' lagüe yežlion', 
\q1 na' gona' yeḻa' guac c̱hia'na' len chen, len yi' na' len žen da' nac ca bejw. 
\q1  
\v 20 Bich gwseṉi' gwbižen', na' bio'na' yeyaquen xṉa ca chen 
\q1 cate' za' žin ža yida' da' yoble gwnežjua' castigw c̱he yogo' beṉe' cbi chesejnilaže'nda', neda' naca' X̱anḻe. 
\q1 Žana' gaquen to ža žialao xen. 
\q1  
\v 21 Nach note'tez beṉe' yeseṉabe' gaclena' ḻegaque', 
\q1 neda' naca' X̱anḻe yebeja' ḻegaque' ḻo da' malen'. 
\m Can' gwna Diosen'. 
\p  
\v 22 ’Na' le'e beṉe' Israel gualaž c̱hia', ḻe gwzenag c̱hia'. Jesúsen' ben' nac beṉe' yež Nazaret, Diosen' blo'ede' naque' beṉe' zaque'. Diosen' bene' cont Jesúsen' bene' yeḻa' guac na' bichle da' zaca' yebanecho can' ṉezeczelen'.  
\v 23 Ḻo yeḻa' ṉeze c̱he Diosen' bin' za' gac, bi'e latje gwzenḻe Jesúsen' na' bdelene' ḻo na' beṉe' mal ca' gosote'ne' bosode'ene' ḻe'e yag cruzen'.  
\v 24 Perw na' Diosen' bec̱his bosbane'ne' ladjo beṉe' guat ca', ḻe bi gwzoe yeḻa' goten' ṉabian' ḻe'.  
\v 25 Quinga bzoj da' rey David xtiža' Jesúsen' cani'te, žan: 
\q1 Ṉezda' X̱ana' Diosen' zoe' len neda' do ža do yel, 
\q1 na' zoe' chaclene' neda' cont bi chžeba'. 
\q1  
\v 26 Da'na'na' zoa' mbalaz na' choa' diža' ḻeca chebeda'. 
\q1 Na' ḻecze chebeda' ṉezda' yec̱his yosbane' neda' ladjo beṉe' guat ca' cate' ba gota'. 
\q1  
\v 27 Dios c̱hia', ṉezda' bi yocua'aṉo' neda' gan' že' beṉe' guat ca', 
\q1 ṉeca go'o latje gožo' cuerp c̱hia'na', neda' naca' xi'iṉo' na' nac lažda'oguan' xilaže'. 
\q1  
\v 28 Ba blo'edo' neda' can' soa cueza' mbalaz. 
\q1 na' mbalaz soa' dan' soaleno' neda'. 
\m Beyož gwna Pedroa' ca' nach gože' ḻegaque': 
\p  
\v 29 ―Beṉe' Israel, ṉezecho da' x̱ozxta'ocho rey David gote' na' bosocuaše' ḻe'. Na' nombia'cho ba gan' bosocuaše' ḻe'.  
\v 30 Na' da' rey Davin' be'e diža' can' bzejni'i Diosen' ḻe' na' gwṉezde' gwlo'o Diosen' da' baḻi gague da' te bi gac can' gwne'. Gwṉezde' gon Diosen' cont Criston' galje' ḻo diaža c̱he' na' ṉabi'e nación Israelen' can' gwnabia' ḻe'na'.  
\v 31 Diosen' bene' cont da' rey Davin' gwṉezde' can' gaquen' na' da'nan' be'e diža' c̱he Criston' ben' ba gwseḻa' Diosen' cont ṉabi'e. Gwne' Criston' yebane' na' bi yega'aṉe' gan' že' beṉe' guat ca' na' ṉeca gožo' cuerp c̱he'na'.  
\v 32 Na' Diosen' bec̱his bosbane' Jesúsen' ladjo beṉe' guat ca', na' yogo' neto' choe'to' diža' ṉezeto' beyas bebane'.  
\v 33 Na' Diosen' len yeḻa' guac c̱he'na' bene' cont beyep Jesúsen' gan' zoe'na' na' chnabi'e txen len ḻe'. Na' Diosen' bnežjue'ne' Spiritw c̱he'na' can' gwne'. Na' Jesúsen' ba bene' yeḻa' guac nga da' ba benele na' da' ba ble'ele.  
\v 34 Gague da' rey Davin' beyep yaban', san da' David bzoje' c̱he Jesúsen' gwne': 
\q1 X̱ancho Diosen' gože' X̱anan': 
\q1 “Gwche'edo' cuita' nga ṉabia'cho txen, 
\q1  
\v 35 na' gona' cont yogo' no chesegue'e le' yosozex̱jw yic̱hje' yosozenague' c̱hio'.” 
\p  
\v 36 ’Da'nan' yogo' chio' beṉe' Israel cheyaḻa' ṉezecho Jesúsen' ben' betwle bda'lne' ḻe'e yag cruz, Diosen' gwleje'ne' cont naque' X̱anchon' na' naque' Cristo, zeje diža' naque' ben' gwseḻa' Diosen' ṉabi'e nación c̱hechon'. 
\p  
\v 37 Na' cate' beṉe' ca' zjanžaguen' gosende' xtiža' Pedroa', da' juisyw da' gosacde' ḻo' lažda'ogaquen', nach gose'e Pedroa' na' len yezica'chle postlw ca': 
\p ―Beṉe' gualaž, ¿bin' cheyaḻa' gonto'? 
\p  
\v 38 Nach Pedroa' gože' ḻegaque': 
\p ―To tole cheyaḻa' yetiṉjele xtoḻa'le ca' na' soale nis dan' ba chejnilaže'le Jesucriston', na' Diosen' yezi'xene' c̱hele na' goṉe' le'e Spiritw c̱he'na' soan ḻo' yic̱hjlažda'olen'.  
\v 39 X̱ancho Diosen' goṉe' note'tezle Spiritw c̱he'na' can' ba gwne', le'e na' xi'iṉle ca' na' note'tez beṉe' zito', ḻe chnežjuen' yogo' beṉe' chbeje' cont yesaque' ḻo ne'e. 
\p  
\v 40 Nach Pedroa' be'lene' ḻegaque' diža' zan, na' gwṉeyoede' ḻegaque' gwne': 
\p ―Ḻe yechoj ladjo beṉe' mal quinga beṉe' cbi zjanombia' Dios. 
\p  
\v 41 Ca' goquen' beṉe' ca' gosejḻe'e diža' dan' be' Pedroa' gosezoe' nis. Na' ḻo žana' šoṉ mil beṉe' gosejnilaže' Jesúsen' na' gosaque' txen len yezica'chle beṉe' chesejnilaže' ḻe'.  
\v 42 Yogüe' gosenita'teze' bosozenague' dan' bososed bosolo'e postlw ca' ḻegaque'. Na' gosaque' toze len yezica'chle beṉe' gosejnilaže' Jesúsen' na' gose'ej gosagüe' txen na' gosenite' bosoḻ güiže' Diosen' txen. 
\s1 Can' goson beṉe' ca' gosejnilaže' Criston' da' nechw 
\p  
\v 43 Na' yogo'ze beṉe' besyebande' can' goson postlw ca' da' zan da' güen da' zaca' yebanecho len yeḻa' guac c̱he Diosen'.  
\v 44 Na' beṉe' ba chesejnilaže' Jesúsen' gosaque' toze na' gosone' toze yogo'ḻoḻ da' zjade c̱hegaque'.  
\v 45 Na' gosote' yežlio na' bichle da' zjadede' na' mechw dan' besele'ede' c̱hen goseyisen' lao yogo'ḻoḻe' con da' beseyažje to toe'.  
\v 46 Na' tža tža besedop besežague' yodao' blaona' na' ḻecze do laže' gose'ej gosagüe' txen liž to togaque' na' gosenite' mbalaz.  
\v 47 Gosenita'teze' gosonxene' Diosen'. Na' gosazlaže' beṉe' yezica'chle can' gosone'na'. Na' tža tža X̱ancho Diosen' bene' cont gosanch beṉe' ca' gosejnilaže' Jesucriston'. 
\c 3  
\s1 Beyac to beṉe' nxiṉj ṉi'e 
\p  
\v 1 Na' to ža Pedroa' na' Juan ja'aque' yodao' blaona' do cheda šoṉe, hor cate' beṉe' Israel ca' chosoḻ güiže' Diosen' yogo' ža.  
\v 2 Na' gwzoa to beṉe' nxiṉj ṉi'e ca goljte' na' yogo' ža gosebec beṉe' ḻe' cho'a puert c̱he yodao'na', puert dan' nzi' Puert Xdan, cont gwṉabe' mechw lao beṉe' ca' chja'ac yodao'na'.  
\v 3 Nach cate' bžin Pedroa' len Juan yodao'na' na' ben' nxiṉj ṉi'ena' boḻ güiže' ḻegaque' yosonežjue'ne' mechw.  
\v 4 Nach Pedroa' len Juanṉa' gosebeze' na' goseṉa'chgüe' ḻe' na' Pedroa' gože'ne': 
\p ―Gwṉa' neto'. 
\p  
\v 5 Na' bena' bene' xbab yosonežjue'ne' mechw.  
\v 6 Perw Pedroa' gože'ne': 
\p ―Bibi mechw c̱hia' de da' goṉa' le', perw zoa to da' gona' gaclena' le': len yeḻa' guac c̱he Jesucriston' beṉe' naque' beṉe' yež Nazaret, chona' mandadw gwzoža' na' gwda. 
\p  
\v 7 Na' Pedroa' bex̱oe' ne'e ḻicha na' bsože'ene', na' gocte gwzeche' na' ṉi'ena' ḻa' besyeyacten da' gual na' ḻecz ca' bec̱hj ṉi'e ca'.  
\v 8 Na' cate' gocbe'ede' ba besyeyac ṉi'en', bxite' yeḻa' chbe c̱he'. Na' gwyo'e chašil c̱he yodao'na' len ḻegaque' chxite' na' cho'e yeḻa' chox̱clen c̱he Diosen'.  
\v 9 Na' beṉe' ca' že' chašilen' besele'ede' can' chde' chxite' cho'e yeḻa' chox̱clen c̱he Diosen'.  
\v 10 Na' besyeyombi'e ḻe' naque' ben' chbe' chṉab mechw yogo' ža cho'a puert c̱he yodao'na', puert dan' nzi' Puert Xdan, na' ḻeca besyebande' da' ba beyac ṉi'ena'. 
\s1 Pedroa' be'e xtiža' Diosen' chašil yodaon' 
\p  
\v 11 Na' gosenite' chašil da' nzi' Chašil c̱he da' Salomón dan' ze gan' zoa' yodao'na'. Na' ben' beyac ṉi'ena' bi bsane' Pedroa' len Juanṉa'. Nach yogo' beṉe' že' yodaon' besežagsese' chašila' cont jaseṉe'e ben' beyaquen', ḻe besyebanchgüede'.  
\v 12 Na' cate' Pedroa' ble'ede' ba zjanžag beṉe' zan gan' nite'na' nach be'lene' ḻegaque' diža', gože' ḻegaque': 
\p ―Le'e beṉe' gualaž c̱hia' beṉe' Israel, ¿bixc̱hen' chebanele? ¿Chaquele len yeḻa' guac c̱heton' bento' cont beyac benga? ¿Še chaquele beyaque' dan' chonchguato' can' chazlaže' Diosen'? Bi naquen ca'.  
\v 13 Dios ben' gosonxen da' x̱ozxta'ocho Abraham, Isaac na' Jacob, blo'e nac Xi'iṉe' Jesúsen' beṉe' zaca' juisyw. Perw le'e bdele Jesúsen' ḻo na' justis ca' cont gosote'ne' na' bžonḻe cate' Pilaton' goclaže' gwsane'ne'.  
\v 14 Can' benḻe len Jesúsen' ḻa'czla' naque' beṉe' laždao' xilaže' juisyw na' naque' ḻa'zelagüe beṉe' chon da' güen. Nach gwṉable bosan Pilaton' to beṉe' güetw beṉe' na' bi gwṉable yosane' Jesúsen'.  
\v 15 Na' ca nac Jesúsen' ben' bx̱e yeḻa' mban toḻi tocaṉe, ḻe'na' betwle, perw na' Diosen' bec̱his bosbane' ḻe' ladjo beṉe' guat ca'. Neto' ble'eto'ne' na' choe'to' diža' ba bebane' ladjo beṉe' guat ca'.  
\v 16 Na' chle'ele benga cbi goc se'e na' nombia'lne', na' ṉa'a ba beyac ṉi'ena' len yeḻa' guac c̱he Jesúsen' ben' chejnilaže'to'. Ḻe da' chejnilaže'to' Jesúsen', da'nan' besyeyacšagüe' ṉi'a benga na' ba chle'ele can' beyaquen'. 
\p  
\v 17 ’Beṉe' migw, ṉezda' le'e na' beṉe' gole blao c̱hele ca' betwle Jesúsen' lagüe bi gwyejni'ile Diosen' gwseḻe'ne'.  
\v 18 Na' da' benḻe ca', goc can' gwna Diosen' gac, da' bene' mandadw bosozoj da' beṉe' ca' goso'e xtižen' cani', bosozoje' c̱he Criston' ben' gwlej Diosen' cont ṉabi'e. Bosozoje' c̱he' gosene' yosoc̱hi yososaca' beṉe' ḻe'.  
\v 19 Da'nan' ḻe yeyonšca xbab c̱hele na' ḻe yetiṉje xtoḻa'len' cont X̱ancho Diosen' gwṉitlagüen' na' gone' ga soale mbalaz.  
\v 20 Nach X̱ancho Diosen' seḻe' Jesúsen' yežlio nga yetṉi'a, ben' gwleje' cani'te cont naque' Cristo c̱hecho.  
\v 21 Perw chonen byen yega'aṉ Jesucriston' yaban' ṉa'a, na' cate' žin ža gon Diosen' cont yežlio nga yeyaquen da' cobe, cana' yide' yeto. Ca' gosena beṉe' gwleje' cani' cont goso'e xtižen'.  
\v 22 Da' Moisésen' be'lene' da' x̱ozxta'ocho diža', gože' ḻegaque': “X̱ancho Diosen' seḻe' yeto beṉe' gualaž c̱hechon' cont güe'lene' le'e xtiže'na' can' gwseḻe' neda'. C̱he bena' gwzenagle bite'tez ṉe'.  
\v 23 Na' Diosen' gone' yesebiayi' yogo' beṉe' ca' cbi yosozenague' c̱he bena' seḻen', na' bich yesenite' txen len beṉe' ca' chesonxene' ḻe'.” Can' gož Moisésen' da' x̱ozxta'ocho ca'. 
\p  
\v 24 ’Ḻecz ca' yogo'ḻoḻ beṉe' goso'e xtiža' Diosen' cani', gwzolaozen len da' Samuel na' yogo' beṉe' ca' gosedech, goso'e diža' c̱he da' ca' ba chac tiemp ṉa'a.  
\v 25 Le'e nacle xi'iṉ diaža c̱he da' beṉe' ca', na' dan' gož Diosen' ḻegaque' gone', na' dan' gože' yezica'chle x̱ozxta'ole ca', ḻecz naquen c̱he le'e. Gože' da' Abrahanṉa': “To beṉe' galje ḻo diaža c̱hio' gone' cont beṉe' že' doxen yežlion' ṉite' mbalaz.”  
\v 26 Da'nan' cate' Diosen' bosbane' Xi'iṉe' Criston' ladjo beṉe' guat ca', zgua'tec gwseḻe'ne' lao chio' beṉe' Israel da' goclaže' gaclene' chio' cont to tocho yetiṉjecho xtoḻa'chon'. 
\c 4  
\s1 Pedroa' na' Juanṉa' nite' lao beṉe' gwnabia' ca' 
\p  
\v 1 Ṉe' chesoe'lente Pedroa' na' Juanṉa' beṉe' ca' diža' cate' besežin baḻ bx̱oz c̱he beṉe' Israel ca', na' beṉe' gwnabia' c̱he ben' chesape' yodao' blao c̱hegaque'na' na' beṉe' saduceo ca' beṉe' cbi chesejḻe'e še yesyeban beṉe' guat ca'.  
\v 2 Beṉe' ca' cheseže'e c̱he dan' chososed chosolo'e Pedroa' len Juanṉa', ḻe chesene' ṉezecho gwžin ža cate' yesyeban beṉe' guat ca' da' beban Jesúsen'.  
\v 3 Na' beṉe' blao ca' gosezene' Pedroa' len Juanṉa' na' goseyix̱jue' ḻegaque' ḻižya do yel, ḻe ba chx̱in na' bi goḻa' yesone' yeḻa' justis c̱hegaquen' ca cheyaḻa' že'na', san bosocuezen' beteyoch.  
\v 4 Na' ca nac beṉe' ca' gosende' chesoe' Pedroa' na' Juanṉa' xtiža' Diosen', zane' gosejnilaže' Criston', na' txen len beṉe' ca' ba gosejnilaže'ne' cana', gosac do gayo' mil beṉe' byo cbi cuent no'ole. 
\p  
\v 5 Na' beteyo beṉe' gwnabia' c̱he beṉe' Israel ca', beṉe' gole blao ca' na' beṉe' bososed bosolo'e ley dan' bzoj da' Moisés, besedop besežague' ciuda Jerusalénṉa'  
\v 6 len Anás ben' naquech bx̱oz blao, na' len Caifás, na' Juan, na' Alejandro na' nochle beṉe' zjanaque' biše' ḻjež ben' naquech bx̱oz blaon'.  
\v 7 Na' gosone' mandadw jasexi'e Pedroa' na' Juanṉa' na' cate' ba zjazie' laogaquen' goseṉabde' ḻegaque': 
\p ―¿No beṉ ḻsens c̱hele cont beyonḻe beṉe' nxiṉjen'? o ¿no yeḻa' guac c̱he bc̱hinḻe beyonḻene'? 
\p  
\v 8 Na' Spiritw che Diosen' dan' yo'o ḻo' yic̱hjlaždao' Pedroa' benen cont gože' beṉe' ca': 
\p ―Le'e beṉe' gwnabia' na' beṉe' gole beṉe' blao c̱he nación Israel c̱hechon',  
\v 9 chṉable nac bento' da' güen beyonto' bena' nxiṉj ṉi'ena'.  
\v 10 Le'e na' yogo' beṉe' gualaž cheyaḻa' ṉezele Jesucriston' ben' naque' beṉe' Nazaret bene' yeḻa' guac c̱he' cont beyacšagüe' benga. Le'e betwle Jesucriston' bda'lne' to ḻe'e yag cruz, perw Diosen' bec̱his bosbane'ne' ladjo beṉe' guat ca'.  
\v 11 Bi gwyejḻe'le c̱he Jesucriston', da'nan' zaca'leble ca beṉe' cheson yo'o beṉe' bi chesazlaže' yej güen da' ba naquen yej squin c̱he yo'ona'.  
\v 12 Toze Jesucriston' guac goṉe' chio' yeḻa' mban toḻi tocaṉe, na' noch no zoa doxen ḻo yežlion' beṉe' gac goṉe' yeḻa' mban toḻi tocaṉe c̱he chio' beṉac̱h. 
\p  
\v 13 Besyebane beṉe' gwnabian' can' boži'i Pedroa' na' Juanṉa' xtiža'gaquen' sin cbi besežebe', ḻe nacbia' zjanaque' beṉe' yix̱e' na' bi zjansedteque'. Nach gosacbe'ede' ḻegaquen' ba gosedalene' Jesúsen'.  
\v 14 Na' dan' zecha ben' beyaque ṉi'ena' txen len Pedroa' na' Juanṉa', bi besyežele beṉe' gwnabian' bi yeseṉe' c̱hegaque'.  
\v 15 Nach beṉe' gwnabian' besyebeje' postlw ca' chyo'ole šlac bosoxi'e ḻegacze' nacle yesone'.  
\v 16 Na' beṉe' gwnabian' gose' ḻježgaque': 
\p ―¿Bi goncho len beṉe' quinga? Yogo' beṉe' že' ciuda Jerusalén ni zjaṉezde' gosone' to yeḻa' guac xen na' bi gac ye'cho beṉe' bi gosone' yeḻa' guaquen'.  
\v 17 Ḻetechoze goncho cont cbi gaslas diža' dan' cheso'ena'. Da'nan' cheyaḻa' ye'cho ḻegaque' gata' castigw c̱hegaque' še yesoe'che' xtiža' Jesúsen'. 
\p  
\v 18 Nach gosaxe' Pedroa' na' Juanṉa' da' yoble na' gose'e ḻegaque' bich yeso'e diža' c̱he Jesúsen' na' noch no yososed yosolo'ede'.  
\v 19 Nach Pedroa' na' Juanṉa' bosyoži'e xtižen' gose'e ḻegaque': 
\p ―Ḻe gon xbab c̱he da' nga, ¿chaquele chaclaže' Diosen' gwzenagto' c̱hele o še chaclaže' gwzenagto' c̱he ḻe'?  
\v 20 Bi gac cuezto' bich güe'to' diža' c̱he da' ba ble'eto' na' ba beneto'. 
\p  
\v 21-22 Na' da' zan da' gose' beṉe' gwnabia' ca' ḻegaque' cont yosošebe'ne'. Perw na' bi beseželde' nacle yesone' ḻegaque' castigw, ḻe beṉe' zan chesonxene' Diosen' dan' beyac bena' len yeḻa' guac c̱he Diosen'. Ba gwdie' c̱hoa iz na' ca goljte' bi goc se'e. Nach bososane' Pedroa' na' Juanṉa'. 
\s1 Goseṉabde' Diosen' gaclene' yeso'e xtiže'na' sin cbi yesežebe' 
\p  
\v 23 Na' Pedroa' len Juanṉa' cate' bososan beṉe' gwnabian' ḻegaque' jaya'aque' gan' nita' yezica'chle beṉe' chesejnilaže' Criston' na' gosoe'lene' ḻegaque' diža' yogo'ḻoḻ can' gose' bx̱oz gwnabia' ca' na' beṉe' gole blao ca' ḻegaque'.  
\v 24 Na' cate' gosende' dan' gose' Pedroa' len Juanṉa' ḻegaque', toze can' gosone' xbab na' bosoḻ güiže' Diosen', gosene': 
\p ―X̱anto' Dios, len' beno' yaban' na' yežlion' na' nisdaon'. Len' beno' beṉac̱h na' be ca' chesaš na' bica'chle da' zjade, na' len' chnabi'o doxen.  
\v 25 Na' le' beno' cont da' rey David bzoje' diža' quinga dan' gož Spiritw c̱hion' ḻe', žan: 
\q1 Beṉe' ca' cbi zjanaque' beṉe' Israel chesase' contr le', X̱anto' Dios, 
\q1 perw bicze gac can' chesone' xbaben'. 
\q1  
\v 26 Beṉe' gwnabia' c̱he nación ca' na' c̱he yež ca' 
\q1 txen zjanaque' chesone' contr le' X̱anto' Dios, 
\q1 na' contr Xi'iṉo' Criston' ben' gwseḻo' cont ṉabi'e. 
\p  
\v 27 ’Na' X̱anto' Dios, naquen da' ḻi rey Herodes na' Poncio Pilato na' beṉe' cbi zjanaque' beṉe' Israel gosaque' txen len beṉe' Israel ca' ḻo ciuda nga. Na' yogüe' gosone' txen cont gosote' Xi'iṉo' Jesúsen' ben' nac beṉe' laždao' xilaže' juisyw, ben' gwlejo' cont ṉabi'e.  
\v 28 Gosone' can' gwc̱hogbi'o gac dan' bžio' bia' cani'te.  
\v 29 Na' ṉa'a X̱anto', gwṉa can' cheson beṉe' gwnabia' ca', ḻe chesaclaže' yosošebe' neto' beṉe' güen žin c̱hio'. Na' goclen neto' cont bi žebto' güe'to' xtižo'na'.  
\v 30 Na' cate' güe'to' xtižo'na' blo'ešca yeḻa' guac c̱he Xi'iṉo' Jesúsen' beṉe' laždao' xilaže' juisyon' cont gac yeḻa' guac, na' yesyeyac no beṉe' chesacšene na' gac bichle da' yesyebane beṉe'. 
\p  
\v 31 Na' cate' beyož bosoḻ güiže' Diosen', Diosen' bene' gwxo' gan' zjandop zjanžague'na' na' Spiritw c̱he'na' gwzoachguan len ḻegaque', nach goso'e xtiža' Diosen' sin cbi besežebe'. 
\s1 Gosone' dan' zjade c̱hegaque' toze 
\p  
\v 32 Na' yogo' beṉe' ca' gosejnilaže' Criston' toz ca gosac yic̱hjlažda'ogaque'. Na' yogo' bi da' zjade c̱hegaque' gosonen' toze, na' nono gwna: “C̱hia' da' nga”, o “C̱hia' da' na'”, ḻe naquen c̱he yogo'ḻoḻ gaque'.  
\v 33 Na' postlw ca' len yeḻa' guac xen c̱he Diosen' bosozejni'ide' beṉe' Jesúsen' bebane' ladjo beṉe' guat ca'. Na' Diosen' goclenchgüe' ḻegaque' len bi dan' gosone'.  
\v 34 Na' bibi goc falt bi da' beseyažje beṉe' gosejnilaže' Criston', ḻe beṉe' zjanape' no yežlio o no yo'o gosoten'. Na' mechw dan' besele'ede' c̱he to ton  
\v 35 bosonežjuen' postlw ca', na' postlw ca' goseyisen' len beṉe' beseyažjden'.  
\v 36 Can' ben to beṉe' Chipre beṉe' le José. Naque' xi'iṉ diaža c̱he da' Levin' na' postlw ca' bososi'ene' Bernabé, zeje diža' ben' cheyonxenḻaže' beṉe'.  
\v 37 Joséna' bete' to yežlio c̱he' na' mechw dan' ble'ede' c̱hen bnežjuen' postlw ca'. 
\c 5  
\s1 Da' mal dan' goson Ananías na' Safira 
\p  
\v 1 Na' zoa to beṉe' le Ananías na' no'ol c̱he'na' Safira, na' gosote' to yežlio c̱hegaquen'.  
\v 2 Perw na' ḻegacze' bosoxi'e yosonežjue' late'ze mechw dan' besele'ede' c̱hen na' yese'e postlw ca' doxenenṉa'. Nach gwyej Ananíasen' na' bnežjue' postlw ca' mechon'.  
\v 3 Nach Pedroa' gože'ne': 
\p ―Ananías, ¿bixc̱hen' bzenago' c̱he Satanás dan' chnabia' da' x̱igüe' ca' na' chacdo' x̱oayago' Spiritw c̱he Diosen'? Chi'o neto' choṉo' doxen mechon' dan' ble'edo' c̱he yežlion', ḻen ba gwlo'ošagüe'le laten' par cuinḻe.  
\v 4 C̱hio' yežlion' cate' biṉa' goton', na' c̱hio' mechon' dan' ble'edo' cate' beton' na' zaco' cont beno' da' chaclažo' len ḻen. ¿Bixc̱hen' benḻe da' malen' nac ca'? Gague contr neton' ba benḻe benḻaže'le, san contr Diosen'. 
\p  
\v 5 Nach Ananíasen' cate' bende' xtiža' Pedroa' to gwbix̱ze' na' gote'. Na' yogo' beṉe' ca' gosende' diža' can' goquen' besežebchgüe'.  
\v 6 Na' besežin to c̱hope beṉe' xcuide' gan' gwbix̱ da' Ananíasen' na' bosyoc̱heḻe' cuerp c̱hen' to lache' na' besyeyo'ene' ga bosocuaše'ne'. 
\p  
\v 7 Na' gwde do šoṉ hor gote' cate' bžin no'ol c̱he'na' na' gwyo'e ḻo' yo'on sin cbi ṉezde' bin' ba goc c̱he beṉe' c̱hen'.  
\v 8 Na' Pedroa' gože'ne': 
\p ―¿To ca'te' ble'ele c̱he yežlion'? 
\p Na' Safiran' gože'ne': 
\p ―To ca'te'ten'. 
\p  
\v 9 Nach Pedroa' gože' no'olen': 
\p ―¿Bixc̱hen' goco' toze len beṉe' c̱hion' chaquele gonḻe Diosen' prueba še lede' can' že' bi cheyaḻa' x̱oayagcho? Cho'a puert nga zjazecha beṉe' ba bosocuaše' beṉe' c̱hio'na' na' ṉa'a yeso'e le'. 
\p  
\v 10 Na' ḻa' gwbix̱te Safiran' lao Pedroa' na' gote'. Na' cate' goso'o beṉe' xcuide' ca' ḻo' yo'ona' besele'ede' ba gote' nach goso'ene' jasecuaše'ne' cuit da' beṉe' c̱he'na'.  
\v 11 Na' yogo' beṉe' chesejnilaže' Criston' besežebe' can' goquen' na' ḻecze besežeb yezica'chle beṉe' gosende' diža' can' goquen'. 
\s1 Gosone' da' zan yeḻa' guac 
\p  
\v 12 Na' postlw ca' gosone' da' zan yeḻa' guac na' bichle da' besele'e beṉe' da' zaca' yesyebande'. Na' beṉe' ca' chesejnilaže' X̱ancho Jesucriston' chesedop chesežague' txen chašil c̱he yodao' blaona' gan' nzi' Chašil c̱he da' Salomón.  
\v 13 Na' yezica'chle beṉe' ca' že' Jerusalénṉa' gosapchgüe' ḻegaque' bala'aṉ, ḻa'czḻa' besežebe' yesaque' txen len ḻegaque'.  
\v 14 Perw na' zane' gosejnilaže' X̱anchon' na' gosaque' txen, zan beṉe' byo na' no'ole.  
\v 15 Na' cate' no beṉe' gosacšende' goseyix̱jue' ḻegaque' tnez do ḻo cam do ḻo yagla', gosebeze' te Pedroa' cont yesecheḻe' bx̱in c̱he' na' yesyeyacde' še bi yižgüen' chese'ede'.  
\v 16 Na' beṉe' ca' že' yež da' zjachi' gaḻa'ze ciuda Jerusalénṉa' ja'aque' zjanc̱he'e beṉe' chesacšene na' beṉe' zjayo'o zjanyaz da' x̱igüe'. Na' yogo'ḻoḻe' besyeyacde'. 
\s1 Beṉe' saduceo ca' goseyix̱jue' Pedroa' len Juanṉa' ḻižya 
\p  
\v 17 Nach ben' nacch bx̱oz blao na' yezica'chle beṉe' saduceo beṉe' cbi chesejḻe' yesyeban beṉe' guat, besegue'ede' postlw ca'.  
\v 18 Na' gosezene'ne' na' goseyix̱jue' ḻegaque' ḻižya.  
\v 19 Na' to angl beṉe' za' gan' zoa X̱ancho Diosen' bžine' ḻižyan' šeže'le na' gwsaljue' puert ca' na' bebeje' ḻegaque'. Na' gože' ḻegaque': 
\p  
\v 20 ―Ḻe šja'ac yodao' blaona' na' ḻe güe' diža' len ben' chesežagna' naquen' yesone' cont gata' yeḻa' mban c̱hegaque' toḻi tocaṉe. 
\p  
\v 21 Nach dan' gosende' can' gož anglen' ḻegaque', ja'aque' yodao' blaona' cate' gwyeni' na' bososed bosolo'ede' ben' zjanžag na'. 
\p Na' ben' nac bx̱oz blao len beṉe' gole blao ca' chesenabia' nación Israelen' besedobe' cont bosoxi'e, nach gosone' mandadw šjasexi'e postlw ca' gan' zjade' ḻižyan'.  
\v 22 Na' cate' ben' chesap yodaon' besežine' ḻižyan' gague no postlw ca' zjanḻa' na' jaya'aque' lao beṉe' gwnabia' ca' jasyedix̱jue'ede'.  
\v 23 Gose'e beṉe' ca': 
\p ―Nyeyjwc̱hac̱h ḻižyan' na' ḻecze na' nita' soldadw ca' cho'a puerta' chesapen' perw cate' gwsaljwto' puerten' gague no postlw ca' že' ḻo' ḻižyan'. 
\p  
\v 24 Na' ben' nacch bx̱oz blao na' beṉe' gwnabia' c̱he ben' chesap yodaon' na' bx̱oz gole blao ca' cate' gosende' rsonṉa' besyebande', gosene': 
\q1 ―¿Nac gac da' nga ṉa'a? 
\p  
\v 25 Na' šlac chesacžejlaže', bžin to beṉe' gože' ḻegaque': 
\p ―Beṉe' ca' gwdix̱jwle ḻižyan' zjaze' chašil c̱he yodao' blaona' chososed chosolo'ede' beṉe'. 
\p  
\v 26 Nach beṉe' gwnabia' c̱he ben' chesap yodaon' len beṉe' gop ca' jasa'aque' jasexi'e postlw ca' diža' šagüe'. Bi gosone' znia len ḻegaque' da' besežebe' beṉe' chosozenag xtiža' postlw ca' še yosožie' ḻegaque' yej.  
\v 27 Na' cate' besežin postlw ca' lao beṉe' gwnabia' ben' nita' chosoxi'a, nach ben' nacch bx̱oz blao gože' ḻegaque': 
\p  
\v 28 ―Ba bento' mandadw bi güe'le diža' c̱he Jesúsen' na' bich gwsed gwlo'ele beṉe' xtižen', na' ba gwdisle xtiže'na' doxen ciuda Jerusalénṉa'. Na' ba chosbague'le neto' žale betwto'ne'. 
\p  
\v 29 Nach Pedroa' na' postlw ca' gose'e ḻegaque': 
\p ―Nacchen da' žialao xen gwzenagto' c̱he Diosen' clel ca c̱he beṉac̱h.  
\v 30 Le'e betwle Jesúsen' bda'lne' to ḻe'e yag cruz, perw Dios ben' chonxencho na' ben' gosonxen da' x̱ozxta'ocho ca' bec̱his bosbane'ne' ladjo beṉe' guat ca'.  
\v 31 Na' ṉa'a Diosen' ba bnežjue'ne' yeḻa' bala'aṉ xen na' yeḻa' gwnabia' xen cont chnabi'e na' chnežjue' yeḻa' mban toḻi tocaṉe c̱he beṉe' chesejnilaže'ne'. Na' ḻe'na' chazlaže' gaclene' yogo' chio' beṉe' Israel yetiṉjecho xtoḻa'chon' nach yezi'xene' c̱hechon'.  
\v 32 Neto' ṉezeto' can' ben Diosen' len Jesúsen' na' choe'to' diža' c̱hen, na' ḻecze Spiritw c̱he Diosen' choen' diža' c̱he Jesúsen' ḻo' yic̱hjlažda'oton', ḻe Diosen' ba gwseḻe' Spiritw c̱hen' zoan ḻo' yic̱hjlaždao' beṉe' chosozenag c̱he'. 
\p  
\v 33 Na' beseža'achgua beṉe' gwnabia' ca' cate' gosende' can' gož Pedroa' ḻegaque' na' gosaclaže' yesote' postlw ca'.  
\v 34 Perw gwzoa to beṉe' fariseo len ḻegaque' beṉe' le Gamaliel. Chsed chlo'ede' beṉe' ley dan' bzoj da' Moisésen' na' gosapchgua beṉe' ḻe' bala'aṉ. Na' Gamalielen' gwzeche' na' bene' mandadw yesechoj postlw ca' chyo'ole šlac güe'lene' beṉe' ca' že'na' diža'.  
\v 35 Na' gože' beṉe' ca' že'na': 
\p ―Beṉe' gualaž, cheyaḻa' goncho xbab nac goncho len beṉe' quinga cont goncho da' nac güen.  
\v 36 Ḻe yosa'laže' can' goc cate' bchoj ben' le Teudas gwne' naque' beṉe' zaque'. Na' do tap gayoa beṉe' bosozenag c̱he' na' gosaque' ḻe' txen. Perw na' bžin ža gosot beṉe' ḻe' na' besyeyasḻas ben' gosaque' ḻe' txen, gague bi gocch yesone'.  
\v 37 Na' gwdechle ca tiempen' bosoc̱heḻe' baḻ beṉe' že' to to yež, bchoj to beṉe' distritw Galilea ben' le Judas na' beṉe' zan gosaque'ne' txen. Na' ḻecze bžin ža gosote'ne' na' beṉe' ca' gosaque' ḻe' txen ḻecze besyeyasḻase'.  
\v 38 Na' da'nan' žia' le'e can' chacda' cheyaḻa' goncho, jaseye beṉe' quinga, bibi gonecho ḻegaque'. Ḻe še chososed chosolo'ede' xbab c̱hegacze', yeniten.  
\v 39 Na' še dan' chososed chosolo'ede' naquen c̱he Dios, bibi gac goncho cont cbi gaslasen. Cheyaḻa' gwsaca'cho cont bi tiḻlencho Diosen'. 
\p  
\v 40 Na' gosazlaže' beṉe' gwnabia' ca' can' gož Gamalielen' ḻegaque'. Nach gosaxe' postlw ca' na' goseyine' ḻegaque' na' gosone' mandadw bich yososed yosolo'ede' c̱he Jesúsen' bate'tezechle. Nach bososane' ḻegaque'.  
\v 41 Na' ca nac postlw ca', cate' besyechoje' gan' gota' yeḻa' güexian', chesyebede', ḻe Diosen' be'e latje bosoc̱hi bososaca' beṉe' ḻegaque' ṉec̱he dan' chososed chosolo'ede' c̱he Jesúsen'.  
\v 42 Na' yogo' ža bososed bosolo'ech postlw ca' c̱he Jesucriston' do liž beṉe' na' cate' chja'aque' yodao' blaona'. 
\c 6  
\s1 Beṉe' ca' chesejnilaže' Criston' gosebeje' gaže beṉe' goson žin bixjw 
\p  
\v 1 Na' ca tiempen' zej chanch beṉe' ca' chesejnilaže' Jesucriston' na' beṉe' ca' cheso'e diža' griego gwzolao chesežeše', chesene' no'ol güezeb ca' nc̱hix̱e ḻegaque' bi chesezi'e lebe len no'ole güezeb ca' cheso'e diža' hebreo cate' cheseyise' dan' chese'ej chesagw to togaque'.  
\v 2 Nach postlw ca' šižiṉw bosyotobe' yezica'chle beṉe' ca' chesejnilaže' Jesucriston' na' gose'e ḻegaque': 
\p ―Bi naquen güen neto' gwsanto' bich gwsed gwlo'eto' beṉe' xtiža' Diosen' cont c̱histo' dan' yese'ej yesagw beṉe'.  
\v 3 Da'nan' beṉe' migw, ḻe cuej gaže beṉe' ḻježle, beṉe' zoachgua Spiritw c̱he Diosen' len ḻegaque', beṉe' zjanac beṉe' sina' na' beṉe' cheson da' güen, na' ḻe gon ḻo na'gaque' yeseyise' dan' yese'ej yesagw beṉe' ca'.  
\v 4 Na' neto' soateze soato' yoḻ güižto' Diosen' na' gwsed gwlo'eto' beṉe' xtižen'. 
\p  
\v 5 Na' gosazlaže' yogo' beṉe' ca' na' gosone' can' gose' postlw ca' ḻegaque', na' gosebeje' to beṉe' le Esteban beṉe' chejnilaže'chgua Diosen' na' zoachgua Spiritw c̱he Diosen' len ḻe'. Na' ḻecze gosebeje' Felipe, na' Prócoro, na' Nicanor, na' Timón, na' Parmenas, na' Nicolás beṉe' ciuda Antioquía ben' bene' txen len beṉe' Israel.  
\v 6 Na' bosozoe' ḻegaque' lao postlw ca' na' postlw ca' bosoḻ güiže' Diosen' c̱hegaque' na' gosex̱oa na'gaquen' yic̱hj beṉe' ca' cont gosezi' ḻo ne'e žin dan' yesonen'. 
\p  
\v 7 Na' beṉe' zanch gosende' xtiža' X̱ancho Jesucriston', na' zan beṉe' Jerusalénṉa' gosejnilaže'ne' na' ḻecze zan bx̱oz ca' bosozenague' na' gosejḻe'e xtiže'na'. 
\s1 Gosezene' Esteban 
\p  
\v 8 Na' Estebanṉa' gwzoachgua yeḻa' guac c̱he Diosen' len ḻe' na' Diosen' goclenchgüe' ḻe'. Da'nan' bene' yeḻa' guac na' bichle da' zaca' yesyebane beṉe' lao beṉe' ca' že' na'.  
\v 9 Na' zoa to yodao' dan' chesene' Yodao' c̱he Beṉe' ca' Bich Zjanaque' Esclavos. Beṉe' ca' chesedop chesežag yodao'na' za'aque' ciuda Cirene na' ciuda Alejandría na' distritw Cilicia na' distritw Asia. Na' baḻ beṉe' ca' gwzolao gosacyože' len Estebanṉa',  
\v 10 perw na' bi besyeželde' nac yosyoži'e xtižen', ḻe Spiritw c̱he Diosen' bnežjon ḻe' yeḻa' sina' na' bzejni'in ḻe' bin' gwne'.  
\v 11 Nach gosego'oyeḻe' to c̱hop beṉe' cont goso'e diža' güenḻaže' c̱he', gosene' Estebanṉa' gwṉeye'e c̱he da' Moisésen' ben' bzoj ley c̱he beṉe' Israel ca'. Na' ḻecze gosene' Estebanṉa' gwṉe' diža' ya' c̱he Diosen'.  
\v 12 Na' beṉe' ca' gosacyože' c̱he Estebanṉa' bosota bosoṉe' beṉe' ḻo ciuda na' beṉe' gole blao c̱he beṉe' Israel ca' na' beṉe' ca' chososed chosolo'ede' ley dan' bzoj da' Moisésen' cont gosaque' toze. Na' ja'acsese' gan' zoa Estebanṉa' na' gosezene'ne' na' gosec̱he'ene' gan' že' beṉe' ca' chesenabia' nación Israelen'.  
\v 13 Na' goseyiljue' beṉe' goso'e diža' güenḻaže' beṉe' gosene' c̱he': 
\p ―Benga bicze šize zoe' chṉe' diža' bya' c̱he yodao' blao c̱he Diosen' nga na' ley dan' bzoj da' Moisés.  
\v 14 Ba beneto' že' Jesús ben' naque' beṉe' yež Nazaret yoc̱hiṉje' yodao' blaona' na' yoše'e costumbr c̱hecho dan' ben da' Moisés mandadw na'ocho. 
\p  
\v 15 Na' yogo' beṉe' ca' zjachi' gan' chesone' yeḻa' justisen' goseṉe'e cho'alao Estebanṉa' na' besele'ede' chactiten ca cho'alao angl. 
\c 7  
\s1 Choe' Estebanṉa' diža' 
\p  
\v 1 Nach ben' nacch bx̱oz blaona' gože' Estebanṉa': 
\p ―¿Naquen can' chesena beṉe' quinga? 
\p  
\v 2 Na' Estebanṉa' gože' ḻegaque': 
\p ―Le'e beṉe' gole na' note'teze beṉe' gualaž, ḻe gwzenag c̱hia' len to c̱hop da' ṉia' le'e. Diosen' ben' nac ḻa'zelagüe beṉe' zaca' blo'elagüe' da' x̱ozxta'ocho Abraham cate' gwzoe' distritw Mesopotamia cate' za' šjasoe' ciuda Harán.  
\v 3 Na' Diosen' gože'ne': “Bchoj lažo' na' gwlejyic̱hj beṉe' biše' ḻježo' na' gwyej jasoa latje gan' gwlo'eda' le'.”  
\v 4 Beyož gož Diosen' Abrahanṉa' ca', nach Abrahanṉa' bchoje' gan' že' beṉe' Caldea ca' na' jasoe' Harán. Na' bžin ža got da' x̱e'na' na' gwdechle Diosen' gwc̱he'e da' Abrahanṉa' gan' zoacho nga.  
\v 5 Diosen' bi bnežjue' da' Abrahanṉa' yežlio gaquen c̱he', ṉe late' da'ozen', san gwne' gaquen c̱he xi'iṉ diaža c̱he' cate' ba gote', ḻa'czḻa' nono xi'iṉe' ṉa' soa cate' gož Diosen' ḻe' ca'.  
\v 6 Nach Diosen' gwne' šjasenite' laž beṉe' zito' tap gayoa iz ga yesaque' esclavos na' yesežaglaochgüe'.  
\v 7 Nach Diosen' ḻecze gože'ne': “Neda' gwnežjua' castigw c̱he nación gan' yesone' xi'iṉ diaža c̱hio' ca' esclavos na' gona' cont yesyechoje' naciónṉa' na' yeside' yesonxene' neda' nga.”  
\v 8 Nach Diosen' gože' Abrahanṉa' gone' güen len xi'iṉ diaža c̱he'na'. Na' bene' mandadw soa Abrahanṉa' to señw dan' že' circuncisión, ḻe' na' len beṉe' byo ca' zjanaque' diaža c̱he', cont gacbia' ḻe chesejḻe'e c̱he dan' gwna Diosen'. Da'na'na' cate' goḻje xi'iṉe' Isaaquen' bzoe'be' señw to xmanzebe', na' ḻecze can' ben da' Isaaquen' cate' gol je xi'iṉe' Jacob. Na' ca'cze ben da' Jacoben' len da' xi'iṉe' ca' šižiṉw, beṉe' ca' gosac šižiṉw diaža c̱he beṉe' Israel. 
\p  
\v 9 ’Na' xi'iṉ da' Jacoben' ben' le José, beṉe' biše' ca' gosacxi'ede' ḻe' na' gosote'ne' gosezi' beṉe' nación Egipto ḻe'. Perw Diosen' gwzoe' len Josén'.  
\v 10 Na' goclene'ne' len yogo'ḻoḻ da' bžaglagüe'. Na' Diosen' bene' cont da' faraón ben' chnabia' Egipton' bebede' Josén' na' gocbe'ede' naque' beṉe' sina'. Na' da'nan' faraónṉa' gwleje' ḻe' cont goque' gobernador c̱he nación Egipton' na' bene' ḻo ne'e ližen' na' yežlio c̱he'na'. 
\p  
\v 11 ’Na' goc gwbin doxen Egipton' na' ḻecze can' goc gan' nzi' distritw Canaán na' da' x̱ozxta'ocho ca' bi beseželde' da' yesagüe' na' besežaglaochgüe'.  
\v 12 Perw na' bžin ža da' Jacoben' bende' diža' de trigw Egipton' na' gwseḻe' da' x̱ozxta'ocho ca' jasexi'en da' nechw.  
\v 13 Na' bechop ṉi'a ja'aque' cate' ben Josén' ga besyeyombia' beṉe' biše' ca' ḻe', nach gwṉeze faraónṉa' can' nac diaža c̱he Josén'.  
\v 14 Na' Josén' bene' mandadw šjasexi'e x̱agaque' Jacoben' na' yogo'ḻoḻ biše' ḻježe' ca', zjanaque' ca do gayonšino' beṉe'.  
\v 15 Can' goc gwyej Jacoben' jasoe' Egipton' na' Egiptona' gote', na' ḻecz na' gosat xi'iṉe' ca' beṉe' ca' gosac x̱ozxta'ocho.  
\v 16 Na' gwdechle besyeyo'e žit benat c̱hegaquen' na' jasecuaše'ne' to ḻo' bloj ba da' gosone' yež gan' nzi' Siquem. Da' Abrahanṉa' gwxi'e ban' cani'te c̱he xi'iṉ da' Hamor gwdixjuen' mechw. 
\p  
\v 17 ’Na' cate' ba zoa žin tiemp gwnežjo Diosen' ḻegaque' yežlio can' gože' Abrahanṉa', ba zej chan beṉe' Israel ca' že' laž beṉe' Egipto ca'.  
\v 18 Na' ca' chac beža' rey c̱he Egipton' na' rey coben' bi gwṉezde' can' goclen Josén' nación c̱hen'.  
\v 19 Na' rey nga gwdiljwlaže' bi da' mal bene' len da' x̱ozxta'ocho beṉe' Israel ca' na' bene' mandadw šjasecho'oṉ xi'iṉgaque'na' cont yesatbe'.  
\v 20 Na' ca tiempen' golje da' Moisésen' na' bebe Diosen' ḻebe', na' x̱axṉa'be' bososc̱ha'ogüe'be' šoṉe bio'.  
\v 21 Perw na' bžin ža jasecho'oṉšaze'be' na' xi'iṉ faraónṉa' to no'ole beželde'be' na' beyo'ebe' liže' bosc̱ha'ogüe'be' ca xi'iṉe'.  
\v 22 Ca' goquen' bsed da' Moisésen' tcho'a yeḻa' sina' c̱he beṉe' Egipto ca' na' bene' da' zaca' na' be'e diža' da' zaca'. 
\p  
\v 23 ’Na' c̱hoa ize da' Moisésen' cate' gwnan šjaṉe'e beṉe' Israel gualaž c̱he' ca'.  
\v 24 Na' jale'ede' to beṉe' Egipto chc̱hi chsaque' to beṉe' Israelen'. Nach da' Moisésen' betue' beṉe' Egipton', boži'e da' malen' bende' beṉe' gualaž c̱he'na'.  
\v 25 Bene' xbab gocde' yesacbe'e beṉe' gualaž c̱he' chaclen Diosen' ḻe' cont yosle' ḻegaque' ḻo na' beṉe' Egipto ca', perw bi gosacbe'ede'.  
\v 26 Na' beteyo gosediḻ c̱hopze beṉe' Israel. Na' bžin da' Moisésen' gocde' gone' cont yesenite' binḻo, na' gože' ḻegaque': “¿Bixc̱hen' chdiḻlen ḻježle le'e nacle beṉe' gualažze?”  
\v 27 Nach ben' nap doḻa'na' bžigue' da' Moisésen' ca'ale gože'ne': “¿No gwna le' gaco' beṉe' gwnabia' cont gono' yeḻa' justis c̱heto'na'?  
\v 28 ¿Ḻez chaclažo' goto' neda' can' beto' beṉe' Egipton' ṉeje?”  
\v 29 Na' cate' bene da' Moisésen' can' gož bena' ḻe' nach bxoṉje' jasoe' nación gan' nzi' Madián ḻa'czḻa' naque' beṉe' zito' len beṉe' ca'. Na' bšagne'e na' gwnita' c̱hope xi'iṉe'. 
\p  
\v 30 ’Na' goc c̱hoa iz zoe' na', cate' to angl beṉe' gwseḻa' Dios blo'elagüe' ḻe' latje dašen' gaḻa'ze Ya'a Sinaí, yo'o anglen' to ḻo' yi' beḻ chdoḻjen to ḻo' yag xis yeše'.  
\v 31 Na' cate' ble'e da' Moisésen' can' chaquen' bebande' nach gwbigue' yelate' cont ble'ešagüe'de' na' bende' choḻ güiž X̱ancho Diosen' ḻe', che'ene':  
\v 32 “Neda' naca' Dios ben' chonxen Abraham, ben' chonxen Isaac, na' ben' chonxen Jacob.” Nach da' Moisésen' gwxize' catec bžebe', gague cheyaxjde' ṉe'e.  
\v 33 Na' gož X̱anchon' ḻe': “Gwḻec̱hj xelo'na' cont gapo' neda' bala'aṉ, ḻe latje gan' zechao'na' naquen c̱hia'.  
\v 34 Neda' ba ble'eda' yeḻa' yaše' yeḻa' zi' da' chde nación c̱hia' Israelen' beṉe' že' Egipton' na' ba benda' ca chesonyaše'. Da'na'na' gaclena' ḻegaque'. Beda ṉa'a cont seḻa' le' Egipton'.” 
\p  
\v 35 ’Diosen' gože'ne' ca' ḻa'czḻa' beṉe' Israel ca' cbi gosezi'e c̱he', gose'e Moisésen': “¿No gwna le' gaco' beṉe' gwnabia' cont gono' yeḻa' justis c̱heto'?” Diosen' gwseḻe' da' Moisésen' cont gwnabi'e da' x̱ozxta'ocho ca' na' cont bebeje' ḻegaque' ḻo na' beṉe' Egipto ca', na' angl c̱he Diosen' ben' ble'e da' Moisésen' ḻo' yi' beḻ gwzoe' goclene'ne'.  
\v 36 Na' da' Moisésen' bebeje' ḻegaque' Egipton' gan' bene' zan yeḻa' guac na' bichle da' zaca' yebane beṉe', na' ḻecz ca' bene' cate' besežine' Nisdao' Xṉan' na' šlac gosenite' latje dašen' c̱hoa iz.  
\v 37 Na' da' Moisésnan' gože' da' x̱ozxta'ocho ca': “X̱ancho Diosen' seḻe' yeto beṉe' gualaž c̱hechon' cont güe'lene' le'e xtiže'na' can' gwseḻe' neda'. C̱he benan' gwzenagle.”  
\v 38 Da' Moisésen' gwzoe' len da' x̱ozxta'ocho ca' latje dašen', na' ḻo Ya'a Sinaín' to angl beṉe' gwseḻa' Diosen' gože' ḻe' diža' da' zjansa' yeḻa' mban, na' bzoje' dižan' par chio'. 
\p  
\v 39 ’Perw na' da' x̱ozxta'ocho ca' zan las bi bosozenague' c̱he da' Moisésen', bosozoe'ne' to šḻa'ale. Gosaclaže' šjaya'aque' Egipton'.  
\v 40 Na' šlac zej da' Moisésen' ḻo Ya'a Sinaí, gose'e beṉe' biše' Aarónṉa': “Ben da' le'echo da' šejnilaže'cho na' da' cuialao laocho tnez. Ḻe ca nac Moisésen' ben' bebej chio' Egipton', nono ṉeze bin' ba goc c̱he'.”  
\v 41 Nach gosone' to me' go'ṉ dao' de oro na' gosote' no beyix̱e' gosonxene' me' daon', na' gosone' ḻṉi c̱he bena' gosone' len ṉi'a na'gaque'.  
\v 42 Da'nan' Diosen' gwlejyic̱hje' nación Israelen' na' be'e latje gosejnilaže' gwbiž, bio', na' beḻjw. Na' da' nga nyojen len dan' bosozoj da' beṉe' ca' goso'e xtiža' Diosen' cani', žan: 
\q1 Le'e beṉe' Israel, gague nedan' benxenḻe caten' betwle beyix̱e' latje dašen' lao c̱hoa iz. 
\q1  
\v 43 Benḻe no da' benxenḻe, na' bia'le yodao' da' chacte chedobe gan' benxenḻe dan' nzi' Moloc, 
\q1 na' bia'le beljon' benxenḻe dan' nzi' Renfán. 
\q1 Na' dan' ba gwlejyic̱hjle neda', da'nan' cueja' le'e gan' zoalen' na' seḻa' le'e nación zito' do gan' nzi' Babilonia. 
\p  
\v 44 ’Na' šlac chesaše' latje dašen', da' x̱ozxta'ocho ca' gosone' to yodao' da' chacte chedobe gan' že' yej ta'a gan' nyoj ley c̱hegaque'na'. Na' gosonen' con can' gož Diosen' da' Moisésen' na' con can' blo'ede' ḻe'.  
\v 45 Nach cate' da' Josué gwc̱he'e ḻegaque' gan' ben Diosen' cont goseque'e yežlio c̱he beṉe' zito' ca', ḻecze goso'e yodao' da' chacte chedobe. Na' ṉe' bosoc̱hine' yodaon' bžinten tiemp c̱he da' rey David.  
\v 46 Na' Diosen' bebede' da' rey Davin', na' da' Davin' goclaže' gone' to yodao' c̱he Diosen', Dios ben' ḻecze benxen da' Jacoben' cani'te.  
\v 47 Perw na' da' xi'iṉe' Salomón benen'.  
\v 48 Na' Diosen' ben' chnabia' doxen, bi ṉacho zoe' ḻo' yo'o da' chon beṉac̱hen', san chac can' gwna Diosen' dan' bzoj to beṉe' be' xtiže'na' cani', žan: 
\q1  
\v 49 Neda' zoa' yaba chnabia', 
\q1 na' guac gona' con bi chazlaža' ḻo yežlion'. 
\q1 Na' ¿chaquele gonḻe to liža'na'? 
\q1 Neda' bi chyažjda' yo'o ga yezi'laža'. 
\q1  
\v 50 Neda' bena' yogo'te da' zjade. 
\p  
\v 51 ’Dan' bi chzenagle, dan' bi chejḻe'le ḻo' lažda'olen' nacchguale beṉe' güedenag can' gosac da' x̱ozxta'ocho ca'. Bicze chzenagle c̱he Spiritw c̱he Diosen'.  
\v 52 Da' x̱ozxta'ocho ca' ḻecze bosoc̱hi bososaque' beṉe' ca' goso'e xtiža' Diosen' cani', na' gosote' ḻegaque' caten' goso'e diža' can' seḻa' Diosen' Xi'iṉe' ben' nac beṉe' güen juisyw. Na' cate' bide', le'e bdelne' ḻo na' beṉe' ca' gosote'ne' na' le'e naple doḻa' dan' gosote'nen'.  
\v 53 Ḻa'czḻa' nombia'le ley dan' bosonežjw angl ca' da' Moisésen', bi chzenagle c̱hen. 
\s1 Gosote' Estebanṉa' 
\p  
\v 54 Na' cate' Esteban' gože' ḻegaque' ca', beselocchgüe' gosagwxejte ḻaye'.  
\v 55 Perw na' Esteban' gwzoachgua Spiritw c̱he Diosen' len ḻe', bcos lagüen' gwṉe'e yabale na' ble'ede' chac to be'ni' gual gan' zoa Diosen' na' ble'ede' zecha Jesúsen' cuit Diosen' chnabi'e txen len ḻe'.  
\v 56 Nach Estebanṉa' gwne': 
\p ―Ḻe ṉa'šc nḻa'xeje yaban' na' nḻa' Jesúsen' ben' golje' beṉac̱h zeche' cuit Diosen' chnabi'e txen len ḻe'. 
\p  
\v 57 Nach beṉe' ca' zjanžaguen' ḻeca beseloque' na' bososya'adie' na' bososeyjw naggaque'na' na' to ši'ize ja'acsese' gan' ze Estebanṉa'.  
\v 58 Nach gosebeje' Estebanṉa' cho'a yež na' bosožie'ne' yej. Na' beṉe' ca' bosožie' ḻe' yejen' bosonežjue' xagaque' da' zjandobe' to beṉe' xcuide' beṉe' le Saulo cont gapen'.  
\v 59 Na' šlac chosožie' Estebanṉa' yej, Esteban' boḻ güiže' Diosen', gwne': 
\p ―X̱ana' Jesús, bezi' neda' yaban'. 
\p  
\v 60 Nach bzoa xibe' ḻo yon' na' gwṉe' zižje, gwne': 
\p ―X̱ana' bi gono' cuent xtoḻa' beṉe' quinga dan' chesote' neda'. 
\p Na' beyož gwne' ca', gote'. 
\c 8  
\s1 Saulo bc̱hi bsaque' beṉe' chesonxen Jesucriston' 
\p  
\v 1-2 Na' ca nac Saulon', gwyazlaže' dan' gosote' da' Estebanṉa'. 
\p Na' beṉe' ca' chesejnilaže' Jesucriston' ciuda Jerusalénṉa' jasecuaše' da' Estebanṉa', na' gosebežchgüe' c̱he'. Na' gwde gosote' da' Estebanṉa' gosezolagüe' bosoc̱hi bososaque' beṉe' ca' chesedop chesežag chesonxene' Jesucriston' Jerusalénṉa', na' yogo' beṉe' ca' chesonxen Jesucriston' besyeyasḻase', ja'aque' yež ca' zjachi' do distritw Judean', do distritw Samaria, perw gague len postlw ca'.  
\v 3 Na' Saulon' gwzolagüe' cheje' liž to to beṉe' ca' chesonxen Jesucriston' chjax̱obe' no beṉe' byo na' no no'ole cont chc̱he'e ḻegaque' ḻižya. 
\s1 Beṉe' ciuda Samaria gosende' diža' güen c̱he Jesucriston' 
\p  
\v 4 Na' beṉe' ca' chesonxen Jesucriston' ben' besyeyasḻase' ja'aque' doxen, jasedix̱jue'ede' xtiža' Jesucriston'.  
\v 5 Na' ben' le Felipe bžine' ciuda Samarian' na' be'e diža' c̱he Jesucriston'.  
\v 6 Na' cate' gosende' xtižen' na' besele'ede' yeḻa' guac dan' bene' len ḻegaque', beṉe' zan besedobe' bosozenague' c̱he'.  
\v 7 Bebeje' da' x̱igüe' ca' zjayo'o zjanyaz yic̱hjlaždao' beṉe' zan, na' cate' besyechojen chososya'adian. Na' zan beṉe' natzi' late' güeje cuerp c̱hegaque'na' beyone' ḻegaque', ḻecze beyone' no beṉe' nxiṉj ṉi'e.  
\v 8 Na' besyebechgüe beṉe' ca' že' ciudan'. 
\p  
\v 9 Na' ḻo ciudan' zoa to beṉe' guaža' beṉe' le Simón. Da' zan da' bene' da' besyebane beṉe' Samarian' gwziye'e ḻegaque' gože'ne' naque' beṉe' zaque'.  
\v 10 Na' šlac bene' da' ca', yogo' beṉe' ḻo ciudan' bosozenague' c̱he' tcho'a, no beṉe' gole ca' lente no bi' xcuide' ca', gosene' c̱he': 
\p ―Ḻe bengan' nse'e yeḻa' guac xen c̱he Diosen'. 
\p  
\v 11 Zan iz bosozenague' c̱he', ḻe gwziye'e ḻegaque' len yeḻa' guaža' c̱he'na'.  
\v 12 Perw cate' Felipen' gwdix̱jue'ede' diža' güen c̱he Jesucriston' len ḻegaque' na' bzejni'ide' ḻegaque' c̱he yeḻa' chnabia' c̱he Diosen', zane' gosejḻe'e c̱he' na' gosezoe' nis, beṉe' byo na' no'ole.  
\v 13 Na' lencze Simón gwyejḻe'e c̱he' na' gwzoe' nis na' gwzolaogüe' gwdalene' Felipen', na' bebande' ca nac yeḻa' guac ca' dan' chon Felipen' na' yezica'chle da' zaca' yebanecho. 
\p  
\v 14 Na' postlw ca' nite' ciuda Jerusalénṉa' gosende' beṉe' ca' že' ciuda Samaria ba chosozenague' xtiža' Diosen', nach goseseḻe' Pedroa' len Juanṉa' Samarian'.  
\v 15-16 Na' cate' besežine'na' bosoḻ güiže' Diosen' goseṉabde'ne' soa Spiritw c̱hen' ḻo' yic̱hjlaždao' beṉe' Samaria ca', ḻe ca hora' biṉa' soan ḻo' lažda'ogaque' ḻa'czḻa' ba gosezoe' nisen' dan' chesejnilaže' X̱ancho Jesúsen'.  
\v 17 Nach gosex̱oa na' postlw ca' yic̱hjgaque' cont gwzoa Spiriton' ḻo' yic̱hjlažda'ogaquen'. 
\p  
\v 18 Na' ble'e Simón can' cheson postlw ca' chesex̱oa ne'e yic̱hj beṉe' cont chzoa Spiriton' len ḻegaque', na' bšabde' ḻegaque' mechw.  
\v 19 Gože' ḻegaque': 
\p ―Ḻe gon cont neda' gac x̱oa na'a yic̱hj note'teze beṉe' na' soa Spiriton' len ḻegaque' can' chon le'e. 
\p  
\v 20 Nach Pedroa' gože'ne': 
\p ―Cuiayo'o len xmechon' dan' chono' xbab guac si'o len mechw da' choṉ Diosen'.  
\v 21 Bi zaco' gono' da' nga chonto', ḻe yic̱hjlažda'oguo' naquen mal lao Diosen'.  
\v 22 Da' cheyaḻa' gono', betiṉje da' malen' chono' na' gwṉab goclen lao Diosen' cont yezi'xene' c̱hio' ca nac xbaben' yo'o ḻo' yic̱hjlažda'oguon'.  
\v 23 Nacbia' da' mal dan' yo'o ḻo' yic̱hjlažda'oguon' chnabi'an le' na' ngo'on le' nez malen'. 
\p  
\v 24 Nach Simónṉa' boži'e xtižen' gože' ḻe': 
\p ―Ḻe ṉab goclen lao X̱anchon' cont ṉe to da' mal dan' bac̱h gwnao' nga bi gac c̱hia'. 
\p  
\v 25 Na' Pedroa' len Juanṉa' cate' beyož goseyix̱jue'ede' xtiža' Diosen' ḻo ciuda Samarian' na' beyož goso'e diža' can' ba goclen X̱ancho Jesucriston' ḻegaque', nach jaya'aque' Jerusalénṉa'. Na' šlac zjaya'aque'na' goseyix̱jue'ede' xtiža' X̱ancho Jesucriston' len beṉe' ca' že' yezica'chle yež ca' gan' mbane distritw Samaria. 
\s1 Felipe na' beṉe' Etiopía 
\p  
\v 26 Nach X̱ancho Diosen' gwseḻe' to angl beṉe' gože' Felipe: 
\p ―Gwyej gan' xoa nez dan' chetj Jerusalénṉa' na' chden latje dašen' chžinen yež dan' nzi' Gaza. 
\p  
\v 27 Nach Felipe gwlo'e nezen', na' šlac zeje' ble'ede' to beṉe' nación Etiopía zeyo'e to ḻo' carret zeze'e gwyeje' Jerusalénṉa' jenxene' Diosen'. Ḻe' naque' to beṉe' blao na' ba none' ḻe' capar cont gone' xšin no'ole gwnabia' c̱he beṉe' Etiopía ca', šo'o ḻo ne'e mechw c̱he'. Na' no'ole gwnabian' le' Candace.  
\v 28 Na' ben' yo'o ḻo' carreten' chlabe' libr dan' bzoj da' Isaíasen' ben' be' xtiža' Diosen' cani'.  
\v 29 Nach Spiritw c̱he Diosen' gožen Felipen': 
\p ―Jayxen carreten' na' gwyejlene' txen. 
\p  
\v 30 Nach gwza'ses Felipen' cont jayxene' carreten' na' cate' bžine' gaḻa'ze bende' chlab ben' libr dan' bzoj da' Isaíasen'. Nach gože'ne': 
\p ―¿Chejni'ido' dan' chlabo'na'? 
\p  
\v 31 Na' beṉe' Etiopían' boži'e xtižen' gože' Felipen': 
\p ―¿Nacxe gac šejni'ida' da' ngan', ḻe gague no nḻa' no gwzejni'ide' nedan'? 
\p Nach gota'yoede' Felipen' cont gwyo'e ḻo' carreten' gwche'lene'ne'. 
\p  
\v 32 Na' gan' chlabe'na' nyojen žan: 
\q1 Ca to xila' be nxob beṉe' cont gote'ba', 
\q1 na' ca to xila' dao' be bi chosya'a cate' chšibe'ba', 
\q1 can' bene', bibi gwṉe' caten' gosezi' gosebague'ne'. 
\q1  
\v 33 Na' gosone' ḻe' ca to beṉe' bibi zaca'. 
\q1 Na' bi gosone' yeḻa' justis c̱he' ca cheyaḻa' gaquen. 
\q1 Na' nono diaža c̱he' nita', ḻe goseque'e yeḻa' mban c̱he' ḻo yežlio nga. 
\p  
\v 34 Nach beṉe' Etiopían' gože' Felipen': 
\p ―Benšca goclen gwna neda' no c̱hen' ža ben' bzoj Xtiža' Diosen' ca', ¿c̱he cuinen' že' ca' o še c̱he beṉe' yoble? 
\p  
\v 35 Nach Felipen' gwzolagüe' bzejni'ide' bi zejen dan' chlab beṉe' Etiopían', gože' ḻe' diža' güen c̱he Jesúsen'.  
\v 36 Na' ca' chac, besežine' ga žia nis, nach bena' gože' Felipen': 
\p ―Nga žia nis, ¿cbi gac soa' nisen' ṉa'a? 
\p  
\v 37 Nach Felipen' gože'ne': 
\p ―Še chejnilažo' Jesucriston' do yic̱hj do lažo', guac so' nisen'. 
\p Nach gwne': 
\p ―Chejḻi'a Jesucriston' naque' xi'iṉ Diosen'. 
\p  
\v 38 Nach bene' mandadw bcueze' carreten' na' betj Felipen' len beṉe' Etiopían' jasežo'e ḻo' nisen' cont Felipen' bzoe'ne' nis.  
\v 39 Na' cate' besyechoje' ḻo' nisen', Spiritw c̱he Diosen' ḻa' bec̱he'eten Felipen' ga yoble, na' bich ble'e beṉe' Etiopían' ḻe'. Na' mbalaz beza' ben' beyo'e ḻo' carreten'.  
\v 40 Nach Felipen' bžine' yež dan' nzi' Azoto na' gwzolagüe' gwdix̱jue'ede' diža' güen c̱he Jesucriston' to to yež da' zjachi' gaḻa'ze ga gwdie' bžinte' Cesarean'. 
\c 9  
\s1 Diosen' bocobe' yic̱hjlaždao' Saulon' 
\r (Hch. 22:6-16; 26:12-18) 
\p  
\v 1 Na' Saulon' con chdacze' cho'e diža' can' chaclaže' gote' beṉe' chesejnilaže' X̱ancho Jesucriston' na' chdacze' cheyiljwlaže' nacle gone' gote' ḻegaque'. Na' da'nan' Saulon' gwyeje' lao bx̱oz blao c̱he beṉe' Israelen',  
\v 2 na' gwṉabde'ne' gwzoje' to yiš da' gox̱e' yosolab beṉe' že' to to yodao' nita' ciuda Damasco cont yeseṉezde' nape' yeḻa' gwnabia' sene' beṉe' ca' ba chesejnilaže' Jesucriston' na' gwc̱heje' ḻegaque' cont c̱he'e ḻegaque' ciuda Jerusalénṉa' ḻa'czḻa' beṉe' byo o ḻa' no'ole.  
\v 3 Cate' beyož bnežjue'ne' yišen' gwlo'e nez, na' ba zoa žine' ciuda Damascon' cate' zejzenez to be'ni' da' za' yaban' gwyec̱hjen ḻe'.  
\v 4 Na' gwbix̱e' ḻo yon'. Na' bende' che' to beṉe' ḻe': 
\p ―Saulo, ¿bixc̱hen' chc̱hi chsaco' neda'? 
\p  
\v 5 Na' Saulon' boži'e xtižen' gože' ḻe': 
\p ―¿No le' beṉe'? 
\p Nach bena' gože'ne': 
\p ―Nedan' Jesús ben' chc̱hi chsaco'. Na' dan' chgue'edo' neda', chone zi' cuino' can' chac c̱he to go'ṉ be chlibe ḻo ya dan' zoa ḻo carroš c̱heba'. 
\p  
\v 6 Na' do chaž chžebze' gože' ḻe': 
\p ―X̱ana' Jesús, ¿bin' chaclažo' gona'? 
\p Nach X̱anchon' gože'ne': 
\p ―Beyas na' gwyej ciuda Damascon' na' zoa to beṉe' ye'e le' da' cheyaḻa' gono'. 
\p  
\v 7 Na' beṉe' ca' zja'aclen Saulon' benit bec̱hoḻ gosac ḻo' yic̱hjlažda'ogaque'na' catec besežebe' dan' goquen', ḻe gosende' ši'i beṉe' perw nono besele'ede'.  
\v 8 Nach beyas Saulon', perw cate' bex̱a' lagüen' con bich ble'ede'. Nach beṉe' ca' nžague'na' gosox̱e' ne'e gosec̱he'ene' Damascon'.  
\v 9 Na' šoṉe ža gwzoe' sin cbi ble'ede' na' bi güe'ej gwdagüe'. 
\p  
\v 10 Na' zoa to beṉe' chejnilaže' X̱ancho Jesucriston' Damascon' beṉe' le Ananías, na' Ananíasen' ble'edagüede' X̱anchon'. Na' X̱anchon' gože'ne': 
\p ―Ananías. 
\p Na' boži'e xtižen' gwne': 
\p ―Nga zoa', X̱ana'. 
\p  
\v 11 Nach X̱anchon' gože'ne': 
\p ―Gwzoža' na' gwyej liž Judas dan' zoa cay dan' chesene' Nez Ḻicha, na' ṉabo' to beṉe' le Saulo, to beṉe' ciuda Tarso. Ba choḻ güiže' neda'.  
\v 12 Na' ba bena' cont ble'edagüede' le' gwyo'o gan' zoe'na' na' gwx̱oa nao' yejlagüe'na' cont yele'ede'. 
\p  
\v 13 Nach Anaíasen' boži'e xtižen' gože' ḻe': 
\p ―X̱ana', ba benda' beṉe' zan cheso'e xtiža' bena', ca nac da' mal juisyw ba bene' Jerusalén len beṉe' ca' ba gwlejo' cont zjanaque' ḻo nao'.  
\v 14 Na' chesene' ze'e nga nox̱e' yiš c̱he bx̱oz gwnabia' ca' cont sene' yogo'ḻoḻ neto' chejnilaže'to' le'. 
\p  
\v 15 Nach X̱ancho Jesucriston' gože' Ananíasen': 
\p ―Gwyej, ḻe ba gwleja' Saulon' cont šjazejni'ide' xtiža' len beṉe' cbi zjanac beṉe' Israel na' len rey c̱hegaque' ca', na' lente le'e nacle beṉe' Israel.  
\v 16 Na' gwlo'eda'ne' ca nac da' yaše' da' zi' da' gac c̱he' dan' gwzenague' c̱hia'. 
\p  
\v 17 Nach Ananíasen' gwyeje' gan' zoa Saulon' na' gwyo'e ḻo' yo'ona' na' gwx̱oa ne'e yejlao Saulon', gože'ne': 
\p ―Beṉe' migw Saulo, X̱ancho Jesúsen' ben' blo'elagüe' le' tnez gan' za'ona' ba gwseḻe' neda' zedeṉa'a le' cont yele'edo' na' soa Spiritw c̱he Diosen' len le'. 
\p  
\v 18 Nach ḻa' besyeyiṉjte da' ca' že' ḻo yejlagüen', zjanaquen ca yid bdi'ej, na' ḻa' bele'etede'. Nach gwzože'e cont gwyeje' gan' gwzoe' nisen'.  
\v 19 Ca beyoža' gwdagüe' na' beyaclaže'. Na' bega'aṉe' Damascon' yeto c̱hop ža len beṉe' ca' chesejnilaže' X̱anchon'. 
\s1 Saulon' be'e xtiža' Diosen' Damascon' 
\p  
\v 20 Na' ḻa' gwzolaote gwyeje' to to yodao' be'e diža' c̱he Jesúsen', gwne' ḻen' naque' Xi'iṉ Diosen'.  
\v 21 Na' yogo' beṉe' ca' chesende' xtiže' dan' cho'ena' besyebande' na' chese' ḻježe': 
\p ―¿Gague bengan' chda choṉit choḻane' beṉe' ca' chesejnilaže' Jesúsen' ciuda Jerusalénṉa'? na' ¿gague da' na'czen' bide' nga ṉa'a cont gwc̱heje' beṉe' ca' na' šjasane' ḻegaque' lao bx̱oz gwnabia' ca'? 
\p  
\v 22 Na' Saulon' tža tža Diosen' goclene'ne' cont be'e diža' c̱he Jesúsen' tcho'a, gwne' Jesúsen' naque' ben' gwseḻa' Diosen' cont ṉabi'e. Na' beṉe' Israel ca' že' Damascon' bi beseželde' bin' yeseṉe', ḻe gosacbe'ede' dan' che'e ḻegaque' naquen da' ḻi. 
\s1 Saulon' bi goque' ḻo na' beṉe' ca' chesegue'ede' ḻe' 
\p  
\v 23 Na' cate' ba goc sša choe'len Saulon' beṉe' Damasco ca' xtiža' Jesucriston' nach bosoxi'a beṉe' Israel ca' yesote'ne'.  
\v 24 Na' gosenite' chesape' to to cho'a puert c̱he ze'ena' dan' nyec̱hj ciudan' cont yesezene' Saulon' yesote'ne' bate'teze choje', perw na' Saulon' gocbe'ede' ba zjachi'na'ogüe'ne'.  
\v 25 Na' beṉe' ca' chesejnilaže' Jesucriston' besyeletje'ne' ḻe'e ze'e dan' nyec̱hj ciudan' šeže'le besyegüe'ene' to ḻo' žome cont goc bechoje' ḻo ciudan'. 
\s1 Gwyej Saulon' Jerusalénṉa' 
\p  
\v 26 Nach beze'e beyeje' Jerusalén. Na' cate' bežin Saulon' ciuda Jerusalénṉa' goclaže' gone' txen beṉe' ca' chesejnilaže' Jesucriston', perw yogo'ḻoḻe' besežebe' ḻe', bi gosejḻe'e še da' ḻi ba chejnilaže' Jesucriston'.  
\v 27 Nach Bernabé gwc̱he'e Saulon' ja'aque' gan' že' postlw ca' na' be'lene' ḻegaque' diža' can' goc ble'e Saulon' X̱ancho Jesúsen' šlac ngüe'e nez zeje' Damascon' na' can' goc X̱anchon' be'lene' Saulon' diža'. Na' ḻecze gož Bernabén' ḻegaque' Saulon' ba be'e xtiža' Jesúsen' Damascon' sin cbi bžebe'.  
\v 28 Nach postlw ca' gosejḻe'e can' goc c̱he Saulon', na' gwzolao gwdalen Saulon' beṉe' ca' chesejnilaže' Jesucriston' Jerusalénṉa'.  
\v 29 Na' sin cbi bi chaž chžebe' gwzolagüe' chzejni'ide' beṉe' Israel ca' diža' c̱he X̱ancho Jesúsen', con beṉe' chesac diža' griego. Bene' byen bzejni'ide' ḻegaque' xtiža' Diosen', perw na' ḻegaque' gosaclaže' yesote'ne'.  
\v 30 Na' cate' beṉe' ca' chesejnilaže' Jesucriston' Jerusalénṉa' gosacbe'ede' ba zjachi'na'ogüe' yesote'ne', nach gosec̱he'ene' ja'aque' ciuda Cesarea na' besyeseḻe'ne' ciuda Tarso. 
\p  
\v 31 Na' beṉe' ca' chesedop chesežague' chesonxene' Jesucriston' doxen distritw Judean', distritw Galilean' na' distritw Samarian' gosenite' binḻo, noch no bosoc̱hi bososaca' ḻegaque', na' gosenita'c̱hac̱he' gosejnilaže' X̱ancho Jesúsen' na' bosozenague' c̱he' do yic̱hj do laže'gaque'. Na' Spiritw c̱he Diosen' benen cont gosacc̱hac̱h laže'gaque' na' benen cont gwyane'. 
\s1 Beyac ben' le Eneas 
\p  
\v 32 Ca nac Pedroa' cheje' to to yež gan' že' beṉe' ca' ba gwlej Diosen' cont zjanaque' ḻo ne'e chjaṉe'e ḻegaque'. Na' to ža gwyeje' jaṉe'e beṉe' ca' že' yež dan' nzi' Lida.  
\v 33 Na' yež Lidan' jati'e to beṉe' le' Eneas. Ba chac x̱ono' iz de' che'ede', natzi' late' cuerp c̱he'na'.  
\v 34 Nach gož Pedroa' ḻe': 
\p ―Eneas, Jesucriston' cheyone' le'. Gwyas na' btob xcamo'na'. 
\p Nach ḻa' gwyaste bena'.  
\v 35 Na' yogo'ḻoḻ beṉe' že' Lidan' na' beṉe' že' yež dan' nzi' Sarón besele'ede' bena' ba beyacde' na' gosebejyic̱hje' costumbr c̱hegaque' cont gosejnilaže' X̱ancho Jesucriston'. 
\s1 Dorcas bebane' ladjo beṉe' guat ca' 
\p  
\v 36 Na' ca tiemp na', to ciuda dan' nzi' Jope zoa to no'ole le' Tabita, na' diža' griego le' Dorcas. Na' chejnilaže' Jesucriston' na' zoe' chone' da' güen na' chaclene' no beṉe' yaše' beṉe' chyažj chc̱hine'.  
\v 37 Perw na' gocšene Dorcasen' na' gottechgüe', na' bosoguazje'ne' na' gosex̱oe'ne' to ḻo' cuart da' zoa yic̱hj yo'o cha'te.  
\v 38 Na' gaḻa'ze chega'aṉ yež Lidan' len Jopen', na' beṉe' ca' chesonxen Jesucriston' Jopen' goseṉezde' Pedroa' zoe' Lidan'. Nach goseseḻe' c̱hope beṉe' jasata'yoede' Pedroa' gose'ene': 
\p ―Benšca goclen yo'o len neto' ṉetec ṉa'a. 
\p  
\v 39 Na' Pedroa' ḻa' gwza'te' gwyeje' len beṉe' ca'. Na' cate' besežine' Jopen', gosec̱he'ene' ḻo' yo'o gan' xoa beṉe' guaten', na' ḻa' gosebiga'te yogo' no'ol güezebe lagüe'na' chesebeže' chosolo'ede' ḻe' lache' dan' ben da' Dorcasen' šlac gwbane', no vestidw na' no camis.  
\v 40 Nach Pedroa' bešaše' yogo'ḻoḻ beṉe' ca' chyo'ole na' bzoa xibe' boḻ güiže' Diosen'. Na' beyec̱hje' chṉe'e cuerp c̱he no'olen', na' gože'ne': 
\p ―Tabita, gwyas. 
\p Nach ḻa' bex̱a'te yejlao da' Dorcasen' gwṉe'e Pedroa' na' ḻa' bebe'te'.  
\v 41 Nach Pedroa' bex̱ue' ne'ena' bsože'e ḻe', nach goxe' no'ole güezeb ca' na' yezica'chle beṉe' ca' zjanaque' ḻo na' Diosen' na' blo'ede' ḻegaque' ba beban Dorcasen'.  
\v 42 Na' yogo'ḻoḻ beṉe' Jopen' gosende' can' goquen', na' beṉe' zanch gosejnilaže' X̱ancho Jesucriston'.  
\v 43 Na' Pedroa' bega'aṉe' Jopen' zan ža, gwzoe' liž to beṉe' le Simón, beṉe' chonšagüe' yid. 
\c 10  
\s1 Pedroa' na' Cornelio 
\p  
\v 1 Na' ciuda Cesareana' zoa to beṉe' le Cornelio, naque' x̱an to gayoa soldadw, na' bosozoa la soldadw c̱he' ca' Beṉe' Italia.  
\v 2 Ḻa'czḻa' Cornelion' cbi naque' beṉe' Israel, benxene' Diosen', na' ḻecze ca' goson beṉe' ḻo' yo'o c̱he', chesezoe' chesape' Diosen' bala'aṉ. Na' Cornelion' chaclenteze' beṉe' Israel beṉe' chyažj chc̱hine', na' zoateze' choḻ güiže' Diosen'.  
\v 3 Na' goc c̱he', to ža do cheda šoṉe ble'edagüede' to angl beṉe' gwseḻa' Diosen' gwyo'e gan' zoe'na', na' anglen' gože'ne': 
\p ―Cornelio. 
\p  
\v 4 Nach Cornelion' chṉa'chgüe' lao anglen' na' do chžebe' gože'ne': 
\p ―¿Bixen' X̱ana'? 
\p Nach gož anglen' ḻe': 
\p ―Diosen' ṉezde' can' zo' choḻ güižo'ne' na' chnežjo' dan' cheseyažje beṉe' yaše', na' Diosen' chaclaže' gaclene' le'.  
\v 5 Da' nga gono' ṉa'a, gwseḻa' beṉe' šjasexi'e to beṉe' zoa ciuda Jopen' beṉe' le Simón na' ḻecze le' Pedro.  
\v 6 Zoe' liž to beṉe' chonšagüe' yid. Bena' ḻecze le' Simón, na' liž ben' zoan cho'a nisdao'. Na' Simón Pedroa' ye'e le' bin' cheyaḻa' gono'. 
\p  
\v 7 Cate' beza' anglen' Cornelion' goxe' c̱hope mos c̱he' na' to soldadw beṉe' chaclen ḻe', na' soldadoa' ḻecze chonxene' Diosen'.  
\v 8 Na' Cornelion' bzejni'ide' ḻegaque' yogo'ḻoḻte can' goquen' nach gwseḻe' ḻegaque' Jopen'. Na' gosegüe'e nez zja'aque'. 
\p  
\v 9 Na' beteyo gaḻa'ze ba zja'aque' za' yesežine' ciuda Jopen' cate' Pedroa' gwloe' yic̱hjo'o c̱he yo'o gan' zoe'na' ca do guagwbiž cont jeḻ güiže' Diosen'.  
\v 10-11 Na' šlac choe'lene' Diosen' diža' gwdonchgüe', con goclaže' gagüe' cate. Na' šlac chac dan' gagüe'na', ble'edagüede' ḻe'e yaban' chetj to lache' xen na' nchej tap squinen na' chetjen gan' zoe'na'.  
\v 12 Na' ḻo'enṉa' zjaže' yogo' cuen beyix̱e' že' yežlion', be žia tap ṉi'a na', na' be chososa' ḻe'eban' ḻo yo, na' len be žia x̱il be chaš ḻe'e yaba.  
\v 13 Nach bende' gož Diosen' ḻe': 
\p ―Gwyas Pedro na' betw be ca' gwdagw. 
\p  
\v 14 Nach Pedroa' gože'ne': 
\p ―Bi gagua' ḻegacba' X̱ana'. Ṉe tṉi'a biṉa' gagua' be zban zjanac ca', ḻe cbi de ḻsens len ley c̱heto'na' gagwto' ben' zjanac ca'. 
\p  
\v 15 Nach Diosen' gože' ḻe' da' gwchope: 
\p ―Ben' bac̱h gwnia' gago' bi ṉao' be zban zjanacba'. 
\p  
\v 16 Da' gwyoṉ ṉi'a gož Diosen' ḻe' ca' nach ḻa' begüete lachen' ḻe'e yaban'.  
\v 17 Šlac chacžejlaže' Pedroa' bi zejen dan' ble'edagüeden', besežin beṉe' ca' gwseḻa' Cornelion' cho'a puert liž Simón ben' chonšagüe' yiden', ḻe ba goseṉabe' gan' zoa liže'na'.  
\v 18 Nach zižje goseṉabe' še ḻe na' zoa to beṉe' ḻecze le Simón Pedro.  
\v 19 Na' Pedroa' ṉe' chone' xbab c̱he dan' ble'edagüede', cate' gož Spiritw c̱he Diosen' ḻe': 
\p ―Simón, šoṉe beṉe' chesyeyiljue' le'.  
\v 20 Gwzoža' na' beyetj cont šejleno' ḻegaque', na' bi gacžejlažo' ḻa'czḻa' bi zjanaque' beṉe' Israel, ḻe neda' gwseḻa' ḻegaque'. 
\p  
\v 21 Nach Pedroa' beyetje' jašague' beṉe' ca' gwseḻa' Cornelion', nach gože' ḻegaque': 
\p ―Nga zoa', nedan' Simón Pedro. ¿Bic̱hen' cheyiljwle neda'? 
\p  
\v 22 Nach gose' beṉe' ca' ḻe': 
\p ―To x̱an soldadw beṉe' le Cornelio gwseḻe' neto'. Ḻe' zejcze' chone' da' güen na' chonxene' Diosen' na' yogo'ḻoḻ beṉe' Israel ca' cheso'e xtiže' ca beṉe' šagüe' naque'. To angl c̱he Diosen' gože' ḻe' yedeṉabe' šejo' liže'na' cont gwzenague' c̱hio' še bin' yo'one'. 
\p  
\v 23 Nach gwlo'o Pedroa' ḻegaque' yo'o na' besyega'aṉlene' ḻe' tže'. Nach beteyo Pedroa' gwyase' gwyejlene' ḻegaque' na' gwc̱he'e to c̱hope beṉe' Jopen' beṉe' chesejnilaže' Jesucriston'. 
\p  
\v 24 Na' beteyo cate' besežine' ciuda Cesarean', Cornelion' bac̱h ntobe' biše' ḻježe' len xmigüe' ba zjažie' liže'na' chesebeze' ḻe'.  
\v 25 Na' cate' bžin Pedroa' liž Cornelion' ḻa' bchojte Cornelion' bšague'ne' na' bzoa xibe' lagüe'na' benxene'ne'.  
\v 26 Na' Pedroa' bsože'e ḻe', gože'ne': 
\p ―Bezoža'. Ḻecze beṉac̱h neda'. 
\p  
\v 27 Na' ṉe' choe'lente' ḻe' dižan' ca' cate' gwyo'o Pedroa' ḻo' yo'on na' ble'ede' beṉe' zan ba že' ḻo yo'ona'.  
\v 28 Nach gože' ḻegaque': 
\p ―Ṉezeczele ley c̱he neto' beṉe' Israel žan bi cheyaḻa' šo'to' liž beṉe' bi zjanaque' beṉe' Israel, na' žan bi cheyaḻa' gonto' txen len le'e bi nacle beṉe' Israel. Perw bac̱h bzejni'i Diosen' neda' ṉe to beṉe' cbi cheyaḻa' gona' xbab c̱he' naque' beṉe' zban par šo'a liže'na'.  
\v 29 Da'nan' cate' beṉe' quinga bedesexi'e neda', bi gocžejlaža' še nacle gona', san ba bida' do yic̱hj do laža', na' ṉa'a chaclaža' ṉezda' ¿bixc̱hen' gwṉio' neda'? 
\p  
\v 30 Nach Cornelion' gože'ne': 
\p ―Ṉa'a chac tap ža do cheda šoṉe zoa' sin cbibi nagua', na' choḻ güiža' Diosen' liža' nga, cate'cze ble'eda' to beṉe' byo lagua'na' nyaze' to lache' da' chgo'oten be'ni'.  
\v 31 Nach gože' neda': “Cornelio, ca nac da' gwṉabdo' Diosen', bac̱h bzenague' c̱hen, na' ṉezde' chnežjo' da' chyažj da' chc̱hine' beṉe' yaše'.  
\v 32 Na' ṉa'a gwseḻa' to c̱hope beṉe' šjasexi'e to beṉe' zoa ciuda Jopen' beṉe' le Simón Pedro. Zoe' liž to beṉe' ḻecze le Simón, to beṉe' chonšagüe' yid. Liž ben' chonšagüe' yiden' zoan gaḻa'ze cho'a nisdao'. Na' cate' la' Pedroa' ližo' nga nach güe'lene' le' diža'.”  
\v 33 Nach ḻa' gwseḻa'tia' beṉe' ca' bedesexi'e le', na' chox̱clenteco' bac̱h bido'. Na' ṉezcze Diosen' yogo'to' nita'to' nga gwzenagto' yogo'ḻoḻte dan' ba ben Diosen' mandadw ṉao'. 
\s1 Pedroa' be'e diža' liž Cornelion' 
\p  
\v 34 Nach Pedroa' gwzolagüe' be'e dižan' gwne': 
\p ―Da' ḻi bac̱h ṉezda' nono nḻa' beṉe' ṉacho nzoa Diosen' ḻe' to šḻa'aze.  
\v 35 Gate'teze beṉe' nación con beṉe' chesonxen Diosen' do yic̱hj do laže' na' chesone' da' güen, Diosen' chbede' ḻegaque'.  
\v 36 Diosen' gwdix̱jue'ede' neto' beṉe' Israel guac soato' binḻo len ḻe' še šejnilaže'to' Xi'iṉe' Jesucriston' beṉe' naque' X̱an yogo'ḻoḻ beṉe'.  
\v 37 Ṉezele dan' ba goc doxen distritw Judean' dan' gwzolao distritw Galilean' gwde gwdix̱jue'e da' Juanṉa' xtiža' Diosen' na' bzoe' beṉe' nis.  
\v 38 Ṉezele Diosen' gwleje' Jesúsen' ben' naque' beṉe' yež Nazaret cont chaclene' chio' beṉac̱h, na' be'ene' Spiritw c̱he'na' na' yeḻa' chnabia'. Na' gwda Jesúsen' bene' da' güen na' beyone' yogo'ḻoḻ beṉe' ca' chsaca'zi' Satanás dan' chnabia' da' x̱igüe' ca', ḻe Diosen' zoe' len ḻe'.  
\v 39 Neto' ṉezeto' na' choe'to' diža' c̱he yogo' da' güen da' ben Jesúsen' na' dan' bsed blo'ede' distritw Judean' na' ciuda Jerusalénṉa'. Na' choe'to' diža' can' gosote'ne' bosode'ene' to ḻe'e yag cruz.  
\v 40 Perw na' Diosen' bec̱his bosbane'ne' ladjo beṉe' guat ca' beyoṉ ža na' ben Diosen' cont Jesúsen' blo'elagüe' neto'.  
\v 41 Gague yogo'ḻoḻ beṉe' besele'ede' Jesúsen' caten' bebane' ladjo beṉe' guat ca', perw Diosen' gwleje' neto' cont choe'to' xtiže'na' na' bene' cont ble'eto'ne'. Na' neto' güe'ej gwdagwlento'ne' txen gwde bebane' ladjo beṉe' guat ca'.  
\v 42 Jesúsen' bene' mandadw c̱hix̱jue'eto' beṉac̱hen' Diosen' bzoe' ḻe' gone' yeḻa' justisen' len yogo' beṉe' zjamban na' len yogo' beṉe' ba gosat.  
\v 43 Na' da' ca' bosozoj yogo' beṉe' goso'e xtiža' Diosen' cani'te zjanyojen chesenan note'tez beṉe' yesejnilaže' Jesucriston', Diosen' yezi'xene' xtoḻa'gaque'na'. 
\s1 Spiritw c̱he Diosen' gwyo'on ḻo' yic̱hjlaždao' baḻ beṉe' bi zjanaque' beṉe' Israel 
\p  
\v 44 Ṉe' cho'ete Pedroa' diža'na' cate' Spiritw c̱he Diosen' gwyo'on ḻo' yic̱hjlaždao' yogo' beṉe' ca' chosozenag diža' dan' cho'ena'.  
\v 45 Na' beṉe' Israel ben' chesejnilaže' Jesucriston', beṉe' ca' zja'ac len Pedroa' liž Cornelion', besyebande' dan' gwyo'o Spiritw c̱he Diosen' ḻo' yic̱hjlaždao' beṉe' ca' cbi zjanaque' beṉe' Israel.  
\v 46 Gosacbe'ede' gwyo'o Spiritw c̱he Diosen' ḻo' yic̱hjlaždao' beṉe' ca' že' liž Cornelion', ḻe gosende' gosonxen beṉe' ca' Diosen' goso'e diža' da' bi gosejni'ide' na' ḻecze gosonxene' Diosen' len xtiža'gaque'na'.  
\v 47 Nach Pedroa' gože' beṉe' Israel ca' nžaguen': 
\p ―Bibi de da' gwžon yesezoa beṉe' quinga nisen', ḻe nacbia' ba zoa Spiritw c̱he Diosen' len ḻegaque' can' zoan len chio'. 
\p  
\v 48 Nach Pedroa' bene' mandadw gosezoe' nis da' chesejnilaže' Jesucriston'. Na' gosata'yoede' ḻe' cont bega'aṉe' yeto c̱hop ža. 
\c 11  
\s1 Pedroa' gože' beṉe' Jerusalén ca' can' goquen' 
\p  
\v 1 Na' postlw ca' na' yezica'chle beṉe' ca' že' distritw Judean' ben' chesejnilaže' Jesucriston' gosende' xtiža' beṉe' ca' bi zjanaque' beṉe' Israel ḻecze ba chosozenague' xtiža' Diosen'.  
\v 2 Nach Pedroa' beze'e gwyejche' ciuda Jerusalénṉa' gan' nita' beṉe' Israel ben' chesejnilaže' Jesucriston' na' ḻegaque' goseṉelagüe' c̱he',  
\v 3 gose'ene': 
\p ―¿Bixc̱hen' ba gwyejo' gan' že' beṉe' cbi zjanaque' beṉe' Israel na' jatagwleno' ḻegaque'? Malen' ba beno'. 
\p  
\v 4 Nach Pedroa' gwzolagüe' be'lene' ḻegaque' diža' tcho'a yogo' dan' goc c̱he', gože' ḻegaque': 
\p  
\v 5 ―Šlac zoa' ciuda Jopen' choḻ güiža' Diosen', ble'edagüeda' ca to lache' xen nchej dapte squin ca' chetjen ḻe'e yaban' zan' gan' zoa'na'.  
\v 6 Na' gwṉa'yaṉa' na' ble'eda' ḻo'enṉa' že' beyix̱e' ca' chaš yežlion' be žia tap ṉi'a na', na' ble'eda' be chososa' ḻe'eban' ḻo yo, na' be žia x̱il be chaš ḻe'e yaba, na' baḻ be ca' zjanacba' be znia.  
\v 7 Na' benda' gož Diosen' neda': “Gwyas Pedro, na' betw be ca' gwdagw.”  
\v 8 Nach boži'an gwnia': “X̱ana', bi gagua' ḻegacba'. Ṉe tṉi'aze biṉa' gagua' be zban zjanac ca', ḻe bi de ḻsens len ley c̱heto'na' gagwto' ben' zjanac ca'.”  
\v 9 Na' da' gwchop ṉi'a Diosen' gwne': “Be bac̱h gwnia' gago' bi ṉao' zjanacba' be zban.”  
\v 10 Šoṉ ṉi'a gože' neda' ca' nach begüe lachen' ḻe'e yaban'.  
\v 11 Za' beyož ble'edagüeda' da'na' cate' besela'ac šoṉe beṉe' byo gan' zoa'na' beṉe' za'ac ciuda Cesarean' chesyeyiljue'nda'.  
\v 12 Na' Spiritw c̱he Diosen' bzejni'in neda' cheyaḻa' ša'alena' ḻegaque' sin cbi gacžejlaža', na' gwc̱hi'a beṉe' ḻježcho quinga x̱op, gwyejto' Cesarean' bžinto' liž ben' le Cornelio na' gwyo'oto' ližen'.  
\v 13 Nach Cornelion' be'lene' neto' diža' can' blo'elao to angl ḻe' liže'na' na' anglen' gože'ne': “Gwseḻa' beṉe' šja'ac ciuda Jopen' šjasexi'e to beṉe' le Simón Pedro.  
\v 14 Bena' ye'e le' len beṉe' ḻo' yo'o c̱hio' nac gonḻe cont gata' yeḻa' mban c̱hele toḻi tocaṉe.”  
\v 15 Nach cate' gwzolagua' bia' dižan' len beṉe' ca' že' liž Cornelion', Spiritw c̱he Diosen' gwyo'on ḻo' yic̱hjlažda'ogaque'na' can' gwyo'on ḻo' lažda'ochon' cana'.  
\v 16 Nach jaysa'laža' xtiža' X̱ancho Jesucriston' can' gwne': “Da' zaque' ben Juan da' bzoe' beṉe' nis, perw da' zaca'che' gac c̱hele cate' yedesoa Spiritw c̱he Diosen' ḻo' yic̱hjlažda'olen' ṉabi'an le'e.”  
\v 17 Na' ba ben Diosen' cont zoa Spiritw c̱he'na' ḻo' yic̱hjlažda'ogaquen' dan' gosejnilaže' X̱ancho Jesucriston' can' ba bene' len chio' chejnilaže'chone', na' ¿nox naca' neda' gwžona' gon Diosen' dan' chaclaže' gone'? 
\p  
\v 18 Na' ca beyož bosozenague' xtiža' Pedroa' bich bi goseṉe' c̱he Pedroa' dan' gwyeje' liž Cornelion', san goso'e yeḻa' chox̱clen c̱he Diosen', gosene': 
\p ―Ṉa'a ba ṉezecho ḻecze len beṉe' ca' bi zjanaque' beṉe' Israel chazlaže' Diosen' yesyetiṉjde' xtoḻa'gaque'na' cont gwnežjue' yeḻa' mban c̱hegaque' toḻi tocaṉ. 
\s1 Beṉe' ca' chesonxen Jesucriston' ciuda Antioquía gan' mbane Siria 
\p  
\v 19 Na' gwde gosot beṉe' Israel ca' Estebanṉa', gosezolagüe' bosoc̱hi bososaca'chgüe' yezica'chle beṉe' ca' chesejnilaže' Jesucriston', nach beṉe' ca' chesejnilaže'ne' gosasḻase'. Baḻe' ja'aque' do distritw Fenicia, na' yež ca' zjachi' to ḻo yežlio da' žia ḻo' nisdaon' gan' nzi' Chipre na' do ciuda Antioquía ga mbane distritw Siria. Na' gan' zja'aquen' bososed bosolo'ede' con beṉe' zjanac beṉe' Israel xtiža' Jesúsen', bi bososed bosolo'eden' beṉe' cbi zjanaque' beṉe' Israel.  
\v 20 Perw na' to c̱hope beṉe' Chipre na' beṉe' ciuda Cirene ḻecze bosoxoṉje' ja'aque' ciuda Antioquían', na' gosezolagüe' goseyix̱jue'ede' diža' güen c̱he X̱ancho Jesucriston' len beṉe' ca' cbi zjanaque' beṉe' Israel.  
\v 21 Na' X̱anchon' goclene' ḻegaque' len yeḻa' guac c̱he'na' na' beṉe' zan gosebejyic̱hje' da' ca' chesejnilaže' na' gosejnilaže' X̱anchon'. 
\p  
\v 22 Na' cate' beṉe' ca' chesejnilaže' Jesucriston' ciuda Jerusalénṉa' gosende' can' ba chac ciuda Antioquían', nach bosose'e Bernabén' cont gwyeje' Antioquían'.  
\v 23 Na' cate' bžin Bernabén' Antioquían', ble'ede' da' ḻi ba goclenchgua Diosen' beṉe' ca', na' bebechgüede'. Nach gwṉeyoede' ḻegaque' ṉita'c̱hac̱he' yosozenague' c̱he X̱anchon' do yic̱hj do laže'.  
\v 24 Bernabén' naque' to beṉe' güen, na' chejnilaže'chgüe' Jesucriston' na' Spiritw c̱he Diosen' zoachguan len ḻe'. Na' zanch beṉe' Antioquían' gosejnilaže' Jesucriston'. 
\p  
\v 25 Gwde na' Bernabén' gwze'e zeje' ciuda Tarson' jaydiljue' Saulon', nach cate' beželde' ḻe', gwc̱he'ene' Antioquían'.  
\v 26 Na' gosenite' Antioquían' tgüiz gosone' txen len beṉe' Antioquía ca' chesedop chesežag chesonxene' Jesucriston' na' bososed bosolo'ede' beṉe' zan. Na' Antioquía na'tequen' gwzolao bososi'e beṉe' ca' chesejnilaže' Jesucriston' beṉe' cristian da' chosozenague' c̱he Criston'. 
\p  
\v 27 Šlac nita' Bernabén' na' Saulon' ḻo ciuda Antioquían', besežin baḻ beṉe' Jerusalén ben' chosozende' beṉe' bi dan' ba gož Diosen' ḻegaque'.  
\v 28 Na' cate' beṉe' ca' besežinṉa', toe' beṉe' le Agabo gwzeche' lao beṉe' ca' zjandop zjanžag chesonxen Jesucriston' be'e diža' can' ba bzejni'i Spiritw c̱he Diosen' ḻe', gwne' doxen yežlion' gata' to gwbin juisyw. Na' cate' bžin ža gwnabia' ben' le Claudio doxen gan' mbane nación Roman', cana' goc gwbinṉa' can' gwna Agabon'.  
\v 29 Nach beṉe' ca' chesedop chesežag chesonxene' Jesucriston' Antioquían' bosoxi'e yosotobe' mechw cont yeseseḻen' yesaclene' beṉe' ḻježgaquen' chesonxen Jesucriston' gan' mbane distritw Judean'. Na' bosoxi'e to toe' yosonežjue' gaca'te' da' gac yosonežjue'.  
\v 30 Na' gosone' can' bosoxi'ena' nach goseseḻe' Saulon' len Bernabén' distritw Judean' jasenežjue' mechon' beṉe' ca' chosogüia cheseṉe'e beṉe' chesejnilaže' Jesucriston' ciuda Jerusalénṉa'. 
\c 12  
\s1 Gosote' Jacobon' na' goseyix̱jue' Pedroa' ḻižya 
\p  
\v 1 Na' ca tiempa' rey Herodes bc̱hi bsaque' baḻ beṉe' ca' chesonxene' Jesucriston'.  
\v 2 Nach bene' mandadw gosote' Jacobo beṉe' biše' Juanṉa' len spada.  
\v 3 Na' gocbe'e rey Herodesen' chesyebe beṉe' Israel ca' dan' bene' mandadw gosote' Jacobon', nach bene' mandadw gosezene' Pedroa' cate' goḻa' ḻṉi cate' chesagüe' yetextil dan' bibi levadura nc̱hix̱en.  
\v 4 Nach Herodesen' gwdix̱jue'ene' ḻižya na' gwseḻe' šino'to soldadw beṉe' gosape' ḻižyan', tap güeje' do ža do yel. Herodesen' bene' xbab cueje'ne' ḻižyan' te ḻṉin' cont gone' yeḻa' justis c̱he' lao beṉe' že' ḻo ciudan'.  
\v 5 Soldadw ca' gosapchgüe' Pedroa' šlac de' ḻižyan', perw na' ca nac beṉe' ca' chesejnilaže' Jesucriston', goseṉabchgüede' Diosen' gaclene' Pedroa'. 
\s1 Diosen' bebeje' Pedroa' ḻižyan' 
\p  
\v 6 Na' to že' ca gwx̱eze ngüia Herodesen' cueje' Pedroa' ḻižyan' cont gone' yeḻa' justis c̱he', Pedroa' de' chtase' ladjo c̱hope soldadw na' ncheje' c̱hope gden, na' ḻecze nita'te soldadw beṉe' chesape' cho'a puert ḻižyan'.  
\v 7 Cate'cze zejzenez to angl beṉe' gwseḻa' X̱ancho Diosen' bžine' ḻo' ḻižyan' gan' de Pedroa' na' gwyeni'chgua ḻo' ḻižyan'. Anglen' bte' cuit ḻe'e Pedroa' bosbane'ne', gože'ne': 
\p ―Ṉetec ṉa'a gwyas. 
\p Na' ḻa' besyeyežte gdenṉa' zjanchej na' Pedroa'.  
\v 8 Nach gož anglen' ḻe': 
\p ―Bego'o xpanto' na' bolej xelon'. 
\p Nach ben Pedroa' ca'. Nach gož anglen' ḻe': 
\p ―Becheḻe xadoṉ c̱hio' na' beyo'o len neda'. 
\p  
\v 9 Nach bechoj Pedroa' zena'ogüe'ne' perw bi gocbe'ede' še da' ḻi anglen' chon ca' len ḻe', con gocde' še chle'edagüede'.  
\v 10 Beyož besyedie' c̱hop cuen gan' nita' soldadw ca' chesape' ḻižyan', besyežine' gan' zoa puert zaguanṉa' dan' nac de ya gan' chesechoje' cont chja'aque' la cay, con to gualazze puerten' byaljon cont besyechoje', na' cate' ba gosa'aque' late' nach anglen' bocua'aṉe' Pedroa' toze'.  
\v 11 Cana'ch gocbe'e Pedroa' da' ḻi ba bechoje' ḻižyan', nach gwne': 
\p ―Ba cheyacbe'eda' da' ḻicze X̱ana' Diosen' ba gwseḻe' angl c̱he'na' na' bosle' neda' ḻo na' Herodesen' na' bosle' neda' ḻo yogo' da' ca' chesaque beṉe' Israel gualaž c̱hia' ca' yesonde' neda'. 
\p  
\v 12 Na' ṉe' chonte Pedroa' xbaben' ca', gwze'e gwyeje' liž María xṉa' Juan ben' ḻecze le Marcos. Na' liž Marían' zjandop zjanžag beṉe' zan chosoḻ güiže' Diosen'.  
\v 13 Nach bsiže' cho'a puert zaguanṉa' na' ḻa' bchojte to bi' no'ole le Rode jaṉa'be' non'.  
\v 14 Na' cate' bžimbe' cho'a puerten' beyombia'be' ši'i Pedroa', na' tantw bebebe' bi gwsaljwbe' puerten' san beyejsesbe' gan' že' beṉe' ca' jayežbe' ḻegaque' ba bla' Pedroa'.  
\v 15 Nach gose'ebe': 
\p ―¿Gague chactonto'na'? 
\p Perw ḻebe' ṉezczebe' ḻe'na'. Nach ḻegaque' gose'ebe' naquen bx̱in c̱he'. 
\p  
\v 16 Perw Pedroa' ṉe' chsižcze' cho'a puerten'. Nach ja'aque' gosesaljue'. Cate'cze besele'ede' ḻe'na' besyebande'.  
\v 17 Nach Pedroa' bene' señw len ne'e cont gosenite' šize bosozenague' be'e diža' can' goc bebej X̱ancho Diosen' ḻe' ḻižyan'. Nach ḻecze gože' ḻegaque' cheyaḻa' yosozende' Jacobon' na' yezica'chle beṉe' ḻježgaque' can' ba goquen'. Nach beze'e zjayde' ga yoble. 
\p  
\v 18 Nach cate' gwyeni', yeḻa' güeban juisyw gwnita' soldadw ca' na' goso'e diža', gosene': 
\p ―¿Bixen' goc len Pedroa'? 
\p  
\v 19 Nach rey Herodesen' bene' mandadw jasyediljue' Pedroa' na' gwṉabde' soldadw gop ca' nac goquen' bele'. Perw soldadw ca' bibi rson bosonežjue'. Nach bene' mandadw gosote' soldadw ca'. Nach gwza' Herodesen' distritw Judean' jazoe' ciuda Cesarea. 
\s1 Got rey Herodesen' 
\p  
\v 20 Ca horan' Herodesen' chža'achgüe' beṉe' ciuda Tiro na' beṉe' ciuda Sidón ca'. Perw na' beṉe' ca' beseyažjde' yesezi'e da' yese'ej yesagüe' gan' chnabia' rey Herodesen'. Da'na'na' bosocode' ḻjež beṉe' Tiro na' beṉe' Sidón ca' cont jasenežjue' mechw c̱he ben' nac ḻo ne'e gan' mbane Herodes, ben' le' Blasto. Gosone' ca' cont Blaston' gwṉe' c̱hegaque' lao reyen', ḻe gosaclaže' gwzenag reyen' c̱hegaque' cate' šja'aque' lagüe'na' šjaseṉabe' yesenite' binḻo len ḻe'.  
\v 21 Nach rey Herodesen' bžie' bia' to ža gwtobe' ḻegaque' cont güe'e diža' laogaque'na'. Na' cate' bžin žan', reyen' gwyaz xaḻane' dan' nac xdan dan' chaze' cate' chone' yeḻa' justis, nach gwchi'e xišne'e gan' chnabi'e na' be'e diža' lao beṉe' ca' že' žana'.  
\v 22 Nach beṉe' ca' bososye'e, gosene': 
\p ―Diosen' choe' diža', gague beṉac̱hen'. 
\p  
\v 23 Na' ḻo hora' gwseḻa' X̱ancho Diosen' to angl ben' ben cont gocšene reyen' gwže'e bzoga' ḻo' ḻe'e na' gote'. Goc c̱he' ca' dan' be'e latje gosonxen beṉe' ḻe' gualaz da' yesonxene' Diosen'. 
\p  
\v 24 Perw ca nac xtiža' X̱ancho Jesucriston' gos gwlaḻjchguan. 
\p  
\v 25 Na' Bernabén' len Saulon' beyož gosone' yogo' da' cheyaḻa' yesone' ciuda Jerusalénṉa', nach besyeya'aque' jaya'aque' ciuda Antioquían'. Na' gosec̱he'e to beṉe' le Juan na' ḻecze lie' Marcos. 
\c 13  
\s1 Bernabén' na' Saulon' ja'aque' jasedix̱jue'ede' xtiža' Jesucriston' yež zito' 
\p  
\v 1 Na' len beṉe' ca' chesedop chesežag chesonxene' Jesucriston' ciuda Antioquían' zjanc̱hix̱e beṉe' cheseyix̱jue'ede' beṉe' yoble bi da' che' Diosen' ḻegaque', na' zjalen beṉe' chososed chosolo'ede' xtiža' Diosen'. Na' ḻegaque' zjalie' Bernabé, na' Simón ben' zjansi'e beṉe' gasj, na' Lucio beṉe' ciuda Cirene, na' Saulo, na' Manaén. Na' Manaénṉa' bgole' txen len rey Herodes ben' gwnabia' distritw Galilea.  
\v 2 Na' to ža beṉe' ca' chesejnilaže' Jesucriston' gosone' gwbas zjandop zjanžague' chesonxene'ne' cate'cze gož Spiritw c̱he Diosen' ḻegaque': 
\p ―Ḻe cuej Bernabén' len Saulon' cont yesone' xšina' con gate'teze seḻa' ḻegaque'.  
\v 3 Nach beṉe' ca' bosoḻ güižche' Diosen' sin cbi zjane'ej zjanagüe', nach gosex̱oa na'gaque' yic̱hj Saulon' len yic̱hj Bernabén', gosone' ca' cont gosegüe'e xšin Diosen' ḻo na'gaque'. Gwdena' bosose'e ḻegaque'. 
\s1 Postlw ca' goso'e xtiža' Jesucriston' Chipre 
\p  
\v 4 Nach Spiritw c̱he Diosen' gwseḻan' Bernabén' len Saulon' yež gan' nzi' Seleucia. Na' Seleuciana' goso'e ḻo' barcon' cont besežine' Chipre. Na' Chipren' naquen to yežlio dao' dan' chi' ḻo' nisdaon'.  
\v 5 Besežine' yež dan' nzi' Salamina gan' mbane Chipren' na' gosezolagüe' goseyix̱jue'ede' xtiža' Diosen' ḻo' yodao' c̱he beṉe' Israel ca'. Na' zjanc̱he'e Juan ben' ḻecze le Marcos cont chaclene' ḻegaque'.  
\v 6 Na' ca' gosaše' gosedie' doxen Chipren' besežine' yež gan' nzi' Pafos. Na' Pafosna' besežague' to beṉe' guaža' le Barjesús. Naque' beṉe' Israel na' chx̱oayague' že' chzende' bi dan' che' Diosen' ḻe'.  
\v 7 Barjesúsen' naque' xmigw gobernador ben' le Sergio Paulo. Sergio Paulon' naque' to beṉe' chejni'ichgüe'. Na' ḻe' goxe' Bernabén' na' Saulon', ḻe goclaže' yosozende' ḻe' xtiža' Diosen'.  
\v 8 Na' Barjesúsen' ḻecze bososi'ene' Elimas, diža' griego zejen beṉe' guaža'. Ḻe' goclaže' bi šejḻe' Sergio Paulo xtiža' Diosen' dan' choe' Bernabén' na' Saulon'.  
\v 9 Na' Spiritw c̱he Diosen' zoachguan len Saulon' ben' ḻecze le Pablo, nach bcos lagüen' gwṉa'chgüe' Elimasen'.  
\v 10 Nach gože'ne': 
\p ―Naco' xi'iṉ Satanás dan' chnabia' da' x̱igüe' ca', yeḻa' güex̱oayag c̱hio' na' yeḻa' beṉe' mal c̱hio'. Bi chazlažo' bite'teze da' güen. ¿Bic̱hen' cbi chbezo' chžono' yosozenag beṉe' diža' ḻi c̱he X̱anto' Diosen'?  
\v 11 Da'nan' X̱anto' Diosen' goṉe' castigw c̱hio' na' c̱hoḻo' to tiemp, bi gac le'edo' gwbiža'. 
\p Nach ḻa' gwc̱hoḻtie', gwde ca to bejw ḻo yejlagüe'na', nach gwzolagüe' chgan chtobe' cheyiljue' no gox̱e' ne'e cont cue' nez.  
\v 12 Gobernadoren' ble'ede' can' goquen' na' gwyejḻe'e xtiža' X̱ancho Jesucriston', na' bebanchgüede' can' ža dižan'. 
\s1 Pablon' na' Bernabén' ja'aque' Antioquian' gan' mbane distritw Pisidia 
\p  
\v 13 Nach Pablon' len beṉe' ca' nžague'na' gosa'aque' yež Pafosen', goso'e ḻo' barcon' cont besežine' yež gan' nzi' Perge gan' mbane distritw Panfilia. Na' Juan ben' ḻecze chese'e Marcos gwlejyic̱hje' ḻegaque' beyeje' Jerusalénṉa'.  
\v 14 Na' Pablon' len Bernabén' gosa'aque' yež Perge na' besežine' ciuda Antioquían' gan' mbane distritw Pisidia. Na' cate' bžin ža c̱he Dios nach ja'aque' yodao' c̱he beṉe' Israel ca' dan' zoa na' na' jasechi'e.  
\v 15 Na' ca beyož blab to beṉe' libr gan' nyoj ley c̱he Diosen' len dan' bosozoj beṉe' ca' goso'e xtiža' Diosen' cani', beṉe' ca' chesenabia' ḻo yodao'na' goseseḻe' to beṉe' gan' chi' Pablon' len Bernabén' na' gože' ḻegaque': 
\p ―Beṉe' migw, še de bi diža' da' chaclaže'le güe'le ṉeyoele beṉe' quinga, guac ṉalen ṉa'a. 
\p  
\v 16 Nach Pablon' gwzechede' bene' señw len ne'ena' cont yosozenag beṉe' ca' zjachi'na', na' gože' ḻegaque': 
\p ―Ḻe gwzenag le'e beṉe' Israel na' nochle chonxenḻe Diosen'.  
\v 17 Dios ben' chonxen chio' beṉe' Israel gwleje' da' x̱ozxta'ocho ca' na' goclene' ḻegaque' cont yesaque' to yež xen šlac gosenite' nación Egipto gan' gosaque' beṉe' zito'. Nach Diosen' bebeje' ḻegaque' Egipton' len yeḻa' guac c̱hen'.  
\v 18 Na' Diosen' gwdape' yeḻa' chxenḻaže' c̱hoa iz len da' x̱ozxta'ocho ca' šlac gosaše' latje dašen'.  
\v 19 Diosen' boṉite' gaž yež da' zjachi' gan' nzi' Canaán cont bnežjue' da' x̱ozxta'ocho ca' yežlio c̱hegaquen'.  
\v 20 Nach gwde na' Diosen' gwleje' tgüeje tgüeje juez cont gosenabi'e nación Israelen' lao tap gayoa yogašje iz bžinte tiemp c̱he da' Samuel ben' be'e xtiža' Diosen' cani'.  
\v 21 Nach tiemp c̱he da' Samuelen' da' x̱ozxta'ocho ca' goseṉabde' Diosen' goṉe' to rey beṉe' ṉabi'e ḻegaque'. Na' Diosen' bnežjue' ḻegaque' rey Saúl na' gwnabi'e ḻegaque' c̱hoa iz. Saúl nan' goque' xi'iṉ ben' le' Cis, na' goque' diaža c̱he da' ben' le Benjamín ben' gwzoa cani'te.  
\v 22 Nach bžin ža Diosen' beque'e yeḻa' gwnabia' c̱he Saúlen' na' bzoe' ben' le David cont gwnabi'e. Na' gwne' c̱he rey Davin': “Chbeda' David xi'iṉ Isaí nga, ḻe chaclaže' chone' can' chazlažan' na' chzenague' bite'tez da' chapa'ne'.”  
\v 23 Nach ṉa'a Diosen' ba gwseḻe' yeto beṉe' golje' ḻo diaža c̱he da' rey Davin', ben' le Jesús. Ba gwseḻe' ḻe' cont goṉe' chio' beṉe' Israel yeḻa' mban toḻi tocaṉe can' gwne' cani'.  
\v 24 Na' cate' biṉa' solao Jesúsen' gwsed gwlo'ede' beṉe', da' Juanṉa' gwdix̱jue'ede' len yogo' beṉe' Israel gualaž c̱hechon' cheyaḻa' yesyetiṉjde' xtoḻa'gaque' na' yesezoe' nis.  
\v 25 Na' cate' beyož ben Juanṉa' dan' yo'o ḻo ne'e gone', nach gože' beṉe' ca' chosozenag c̱he': “¿Chonḻe xbab naca' neda' ben' chbezle seḻa' Diosen'? Bi naca' bena'. Za' yid bena', na' da' nacchgüe' beṉe' zaca', bi zaca' gona' mandadw c̱he' ḻec̱hja' no xele'.” 
\p  
\v 26 ’Beṉe' migw, chio' naccho xi'iṉ diaža c̱he da' x̱ozxta'ocho Abraham, na' nochle le'e chonxenḻe Diosen' txen len neto' beṉe' Israel, xtiža' Diosen' dan' žan goṉe' chio' yeḻa' mban toḻi tocaṉe naquen par chio'.  
\v 27 Beṉe' ciuda Jerusalén ca' len beṉe' gwnabia' c̱hegaque' ca' bi gosejḻi'e gwseḻa' Diosen' Jesúsen', na' bi gosejni'ide' da' ca' zjanyoj c̱he' ḻe'e libr dan' bosozoj beṉe' ca' goso'e xtiža' Diosen' cani' ḻa'czḻa' chosolaben' ḻo' yodaon' yogo' ža c̱he Dios. Na' dan' bi gosejni'ide', da'nan' gosec̱hoglagüen' yesote' Jesúsen', nach goc can' nyoj c̱he'.  
\v 28 Na' ḻa'czḻa' goseṉezde' bibi da' mal non Jesúsen' cont yesote' ḻe', goseṉabde' Pilaton' gone' mandadw yesot soldadw c̱he' ca' ḻe'.  
\v 29 Na' goc c̱he Jesúsen' yogo' dan' nyoj c̱he' ḻe'e Xtiža' Dios dan' bosozoj beṉe' ca' gosenita' cani'. Na' beyož gote'na' nach besežin beṉe' besyeḻetje' cuerp c̱he'na' ḻe'e yag cruzen' na' bosocuaše'ne'.  
\v 30 Na' gwdena' Diosen' bec̱his bosbane' ḻe' ladjo beṉe' guata'.  
\v 31 Na' beṉe' ca' zjanaque' Jesúsen' txen cate' gwze'e distritw Galilea cont gwyeje' ciuda Jerusalén, ḻegaque' besele'ede' Jesúsen' yezan ža gwde bebane' ladjo beṉe' guata', na' ḻegaque' cheso'e diža' c̱hen' len yezica'chle beṉe' Israel. 
\p  
\v 32 ’Na' lencze neto' chyix̱jue'eto' le'e diža' güen cont ṉezele ba chac da' güen dan' gož Diosen' da' x̱ozxta'ocho ca' cani'.  
\v 33 Ba benen' len chio' naccho xi'iṉ diaža c̱he da' beṉe' ca', dan' bosbane' Jesúsen' ladjo beṉe' guaten'. Na' goc can' nyojen c̱he' ḻe'e libr dan' nzi' Salmos, na' salmo gwchopen' žan: “Le' naco' xi'iṉa'; ṉa'aža ba blo'a zoaczo'.”  
\v 34 Na' Diosen' ḻecze bene' cont nyojen ga yoble c̱he' dan' bosbane' ḻe' ladjo beṉe' guaten' na' gwbat gožo' cuerp chen', žan: “Gona' güen len le' doḻoḻ can' goša' rey Davin'.”  
\v 35 Na' nyoj yeto salmo žan: “Bi go'o latje gožo' cuerp c̱hian' neda' naca' ben' chacchgüedo' na' ben' chon xšinon'.”  
\v 36 Ṉezecho da' rey Davin' gwnabi'e beṉe' Israel ca' gwnita' ca tiemp c̱hen' can' gwnalaže' Diosen' na' beyožen' gote' na' bgaše' len yezica'chle da' x̱ozxta'ocho ca' na' ḻecze gožo' cuerp c̱hen'.  
\v 37 Perw na' Diosen' bosbane' Jesúsen' ben' nyoj Xtižen' žan ca', na' bi gožo' cuerp c̱hen'.  
\v 38 Na' cheyaḻa' ṉezele beṉe' migw, Jesúsen' ben' choa' diža' c̱he', chezi'xene' xtoḻa' note'tez beṉe' chejnilaže'ne'.  
\v 39 Bi beyaccho beṉe' güen len Diosen' da' bi benyaṉe'cho can' ža ley dan' bzoj da' Moisésen', perw note'tezcho chejnilaže'cho Jesúsen', ḻen' ba cheyone' chio' beṉe' güen.  
\v 40 Ḻe gwsaca' cont bi gac c̱hele can' bosozoj beṉe' ca' goso'e xtiža' Diosen' cani', žan: 
\q1  
\v 41 Cheyaḻa' gonḻe xbab, le'e chṉelaole c̱hia', na' cheyaḻa' yebanele, ḻe gwžin ža cuiayi'le. 
\q1 Neda' Dios gona' to da' yebanele šlac mbanḻe, 
\q1 to da' bi šejḻe'le ḻa'czḻa' še no c̱hix̱jue'e le'e can' gaca'. 
\p  
\v 42 Beyož bzejni'i Pablon' beṉe' ca' že'na' nach besyechoje' ḻo' yodaon'. Nach beṉe' ca' ba goson cuine' beṉe' Israel gosata'yoede' Pablon' len Bernabén' yeside' ža c̱he Dios xmanṉa' yeto cont yosozejni'ide' ḻegaque' yelate' c̱he da' ca' ba bosozejni'ide'.  
\v 43 Nach beṉe' zan beṉe' Israel len zan beṉe' ca' ba goson cuingaque' beṉe' Israel zja'aclene' Pablon' len Bernabén'. Nach Pablon' na' Bernabén' goseṉeyoede' ḻegaque' cont ṉita'che' yesejnilaže'che' Diosen' ben' chaclen ḻegaque'. 
\p  
\v 44 Na' cate' bežag xmanṉa' ža c̱he Dios yogo'ḻoḻcze beṉe' ḻo ciudan' besežag cont bosozenague' xtiža' Diosen'.  
\v 45 Na' gwnita' beṉe' Israel beṉe' bi gosejḻe' c̱he Jesúsen', na' cate' besele'ede' ba nac beṉe' zan chosozenague' c̱he Pablon' na' gosacxi'ede' ḻe' na' goseṉelagüe' c̱he' na' gosezi'diže' ḻe'.  
\v 46 Perw na' Pablon' len Bernabén' bi besežebe' san gose'e beṉe' ca' že'na': 
\p ―Ba bento' can' gwnalaže' Diosen' na' zgua'tec bzejni'ito' le'e nacle beṉe' Israel gualaž c̱heto'. Na' ṉa'a dan' bi chaclaže'le gwzenagle, chonḻe cont bi goṉ Diosen' le'e yeḻa' mban toḻi tocaṉe. Da'nan' ṉa'a gwzejni'ito' beṉe' ca' bi zjanac beṉe' Israel.  
\v 47 Gonto' ca' ṉec̱he X̱anto' Diosen' bac̱h bene' mandadw gonton', ḻe nyojen žan: 
\q1 Bac̱h nzoa' le'e cont co'ole be'ni' c̱hian' ḻo' yic̱hjlaždao' beṉe' ca' bi zjanac beṉe' Israel, 
\q1 cont beṉe' ca' že' doxen yežlion' yesacbe'ede' guac ṉitlao xtoḻa'gaque'. 
\p  
\v 48 Na' beṉe' ca' bi zjanac beṉe' Israel chesebede' beyož gosende' can' gwna Pablon', na' gosene' güenchgua nac xtiža' Diosen'. Na' yogo' beṉe' ca' ba gwlej Diosen' cont gata' yeḻa' mban c̱hegaque' toḻi tocaṉe, ḻegaque' gosejḻe'e xtiža' Diosen' dan' be' Pablon' len Bernabén'.  
\v 49 Can' goc beṉe' ca' že' doxen distritwna' gosende' xtiža' X̱ancho Jesucriston'.  
\v 50 Perw baḻ beṉe' Israelen' goso'e diža' len no'ol blao ca' gosonxen Diosen' na' len beṉe' gwnabia' blao ca' ḻo ciudan', na' bosoše'e xbab c̱hegaquen' cont gwzolao gosone' contr Pablon' len Bernabén' na' bich goso'e latje yesenite' doxen distriton'.  
\v 51 Nach Pablon' len Bernabén' cate' besyeya'aque' ciuda Antioquían' gosebibe ṉi'agaque' cont bežib yo bište dan' žianṉa'. Gosone' ca' cont bosolo'ede' beṉe' ca' chesyebej ḻegaque' malen' chesone' chosolague' ḻegaque'. Nach jaya'aque' yež Iconio.  
\v 52 Na' mbalazchgua gwnita' beṉe' ca' chesonxen Jesucriston' ciuda Antioquían', na' Spiritw c̱he Diosen' gwzoachguan len ḻegaque'. 
\c 14  
\s1 Pablon' len Bernabén' besežine' yež Iconio 
\p  
\v 1 Na' goquen' Pablon' len Bernabén' besežine' yež Iconion' na' ja'aque' yodao' c̱he beṉe' Israel. Na' cate' goso'e xtiža' Jesucriston', beṉe' zan beṉe' Israel ca' na' len zan beṉe' cbi zjanac beṉe' Israel gosejḻe'e c̱he'.  
\v 2 Perw na' gwnita' beṉe' Israel ca' beṉe' bi gosejḻe'e c̱he Jesucriston', na' ḻegaque' goseṉelagüe' c̱he beṉe' ca' chesejnilaže' Jesucriston' na' gosone' cont beṉe' ca' bi zjanac beṉe' Israel gosezolagüe' besegue'ede' Pablon' len Bernabén'.  
\v 3 Perw na' Pablon' len Bernabén' besyega'aṉe' sša Iconion' cheso'e xtiža' X̱ancho Jesucriston' sin cbi besežebe'. Na' X̱anchon' blo'e ḻe diža' ḻin' cheso'e chesene' Diosen' chacde' beṉac̱hen', ḻe be'e ḻegaque' yeḻa' guac cont gosone' da' zaca' yebanecho cont gosaclene' beṉe'.  
\v 4 Na' beṉe' ca' že' ḻo yežen' gosaque' c̱hople, baḻe' gosede'e beṉe' Israel ca' ben' bi gosejnilaže' Jesucriston' na' yebaḻe' gosede'e Pablon' len Bernabén'.  
\v 5 Nach beṉe' Israel ca' gosone' yeḻa' güexi'a len beṉe' ca' cbi zjanac beṉe' Israel na' len justis c̱hegaque' cont yesone' contr Pablon' len Bernabén' na' yosoc̱hele' ḻegaque' yej.  
\v 6 Perw cate' gwṉeze Pablon' len Bernabén' dan' chesaclaže' yesone' len ḻegaque', bosyoxoṉje' jaya'aque' yež Listra na' yež Derbe na' yezica'chle yež ca' zjachi' distritw dan' nzi' Licaonia.  
\v 7 Na' ḻecz goseyix̱jue'ede' xtiža' X̱ancho Jesucriston' len beṉe' ca' že' na'. 
\s1 Bosožie' Pablon' yej šlac zoe' Listran' 
\p  
\v 8 Na' yež Listran' besežague' to beṉe' golje' nxiṉj ṉi'e ca', cate' gocte' bidao' bi goc se'e.  
\v 9 Con chi'teze' chzenague' choe' Pablon' dižan'. Nach Pablon' gwṉe'e ḻe' na' gocbe'ede' bena' chejḻe'e Diosen' nape' yeḻa' guac cont yeyone' ṉi'en'.  
\v 10 Nach Pablon' boḻ güiže'ne' gože' ḻe' zižje: 
\p ―Gwzoža'. 
\p Na' ḻa' gwzoža'te' na' gwzolao chde'.  
\v 11 Na' že' beṉe' zan cheseṉe'e can' goquen' na' ḻegaque' bososye'e goseṉe' diža' Licaonia: 
\p ―X̱ancho beṉe' ca' chejnilaže'cho ba gosetje' nga chesone' yeḻa' guac, na' chle'etecho ḻegaque' ca beṉac̱h. 
\p  
\v 12 Gosene' Bernabén' naque' x̱angaque' ben' zjansi'e Júpiter, na' Pablon' naque' x̱angaque' ben' zjansi'e Mercurio. Gosene' ca' ḻe Pablon' choe'che' dižan'.  
\v 13 Na' yodao' gan' chesonxene' x̱angaque' Júpiteren' zoan cho'a yež. Na' bx̱oz c̱he Júpiteren' jax̱i'e go'ṉ be ba zjanone' xdan zjanžie' ḻegacba' corona yej. Nach bx̱oza' gwc̱he'e beṉe' zan cho'a yežen' gan' zoa puert c̱he ze'e dan' nyec̱hj yežen' na' goclaže' yesote' go'ṉen' yesonxene' postlw ca'.  
\v 14 Na' Pablon' len Bernabén' cate' gosacbe'ede' can' yeson beṉe' ca', gosec̱heza' xagaque' dan' bi gosaclaže' yesonxen beṉe' ca' ḻegaque'. Nach gosedie' gachoḻ beṉe' ca' gose'e ḻegaque' zižje: 
\p  
\v 15 ―Beṉe', ¿bixchen' chonḻe ca'? Ḻecz beṉac̱h neto'. Za'to' cont chyix̱jue'eto' le'e cheyaḻa' gwša' yic̱hjlažda'olen' na' cuejyic̱hjle costumbr quinga dan' bibi zaca' na' gonxenḻe Dios ben' zoa toḻi tocaṉe. Ḻe' bene' yaban', yežlion', nisdaon', beṉac̱h, be ca' chesaš na' bite'tezechle da' chle'echo ḻe'e yaban', ḻo yežlion' na' ḻo' nis.  
\v 16 Cani' Diosen' bi bžone' gon beṉac̱hen' bite'tez da' mal da' žan yesone'.  
\v 17 Perw zoacze' chone' da' güen len yogo' beṉac̱h cont yeseṉezde' zoe' naque' Dios. Chone' cont chac yejw cont chac dan' chazcho na' chata' da' che'ej chagwcho cont zoacho mbalaz. 
\p  
\v 18 Na' ḻa'czḻa' Pablon' len Bernabén' gosene' yogo' da' ca', caṉe gosezoede' bosožone' yesot beṉe' Listra ca' go'ṉna' yesonxene' ḻegaque'. 
\p  
\v 19 Nach besežin baḻ beṉe' Israel beṉe' nita' yež Iconio na' ciuda Antioquía dan' chi' distritw Pisidian', na' beṉe' ca' gosego'oyeḻe' beṉe' Listra ca' cont gosaque'ne' txen bosoc̱hele' Pablon' yej. Na' cate' gosone' xbab bac̱h gote' nach gosexobe' ḻe' cho'a yeža' na' bosyocua'aṉe' ḻe' na'.  
\v 20 Perw na' beṉe' ca' chesonxene' Jesucriston' besedobe' gan' de Pablon', nach Pablon' beyase' beyeje' ḻo ciudan' da' yoble. Nach beteyo beza' Pablon' len Bernabén' jaya'aque' yež Derben'. 
\p  
\v 21 Nach cate' besežine' Derben' bosozende' beṉe' ca' že' na' diža' güen c̱he Jesucriston', na' beṉe' zan gosone' txen len ḻegaque' gosejḻe'e c̱he Jesucriston'. Na' gwdena' gosa'aque' ja'aque' da' yoble Listran' na' Iconion' na' Antioquían'.  
\v 22 Na' to to yež gan' ja'aque' gosone' c̱hac̱h laže' beṉe' ca' chesonxene' Jesucriston' na' gose'e ḻegaque' yesenite' yesonxene' ḻe' do yic̱hj do laže', na' gose'e ḻegaque' da' zan da' gac da' saca'zi'cho šlac chbezcho yeyejcho yaban' gan' zoa Diosen' chnabi'e.  
\v 23 Na' to to yež ga besyedie' gosebeje' beṉe' yosogüia yeseṉe'e yezica'chle beṉe' ca' chesonxene' Jesucriston'. Na' Pablon' len Bernabén', cate' za' yesa'aque' to to yež, gosone' gwbas na' bosoḻ güiže' Diosen' goseṉabe' gaclen X̱ancho Jesucriston' beṉe' ca' ba chesejnilaže' ḻe'. 
\s1 Pablon' len Bernabén' jaya'aque' Antioquía gan' mbane distritw Siria 
\p  
\v 24 Cate' gosa'aque'na' Pablon' len Bernabén' besyedie' distritw Pisidia na' besežine' distritw Panfilian'.  
\v 25 Na' goseyix̱jue'ede' xtiža' Jesucriston' yež Perge na' beyožen' jaya'aque' yež Atalia.  
\v 26 Nach Atalian' besyeyo'e ḻo' barcw jaya'aque' ciuda Antioquían' gan' mbane distritw Sirian'. Ḻe beṉe' Antioquíanan' goseseḻe' Pablon' na' Bernabén' cana'te na' goseṉabde' Diosen' šejlene' ḻegaque' na' gaclene' ḻegaque' cont yosozejni'ide' beṉe' xtiže'na'. Na' ṉa'a besyežine' ba beyož gosone' dan' gosego'o beṉe' ca' ḻo na'gaque' yesone'.  
\v 27 Na' bosyotobe' beṉe' ca' chesonxene' Jesucriston' na' gose'ene' yogo'ḻoḻ can' ben Diosen' len ḻegaque' šlac zja'aque', can' goclene' ḻegaque' cont zan beṉe' bi zjanac beṉe' Israel ba gwzolao chesejnilaže' Jesucriston'.  
\v 28 Na' besyega'aṉe' Antioquían' sša len beṉe' ca' chesonxene' Jesucriston'. 
\c 15  
\s1 Gosone' yeḻa' güexi'a len beṉe' ca' že' ciuda Jerusalénṉa' 
\p  
\v 1 Na' šlac Pablon' len Bernabén' ṉe' nite' ciuda Antioquían' besežin to c̱hope beṉe' za'ac distritw Judean' na' gosezolagüe' bosozejni'ide' beṉe' ca' chesonxen Jesucriston' na'. Gose'ene' yogo'ḻoḻ beṉe' byo cheyaḻa' yesezoe' señw dan' že' circuncisión can' ža ley dan' bzoj da' Moisésen' cont gata' yeḻa' mban c̱hegaque' toḻi tocaṉe.  
\v 2 Na' Pablon' len Bernabén' gosacyože' len beṉe' ca' za'ac distritw Judea dan' chosozejni'ide' ca'. Nach beṉe' ca' chesonxene' Jesucriston' Antioquían' gosec̱hoglagüen' šja'ac to c̱hope' Jerusalén len Pablon' na' Bernabén'. Šja'aque' šjaseṉe'e postlw ca' že'na' na' len beṉe' ca' chosogüia cheseṉe'e ḻježgaquen' cont yesone' yeḻa' güexi'a len ḻegaque' c̱he dan' chosozejni'i beṉe' ca' za'ac distritw Judean'. 
\p  
\v 3 Nach beṉe' ca' chesedop chesežag chesonxene' Jesucriston' Antioquían' goseseḻe' ḻegaque' Jerusalénṉa'. Na' beṉe' ca' zja'aquen' gosedie' distritw Fenicia na' distritw Samaria. Na' yež ca' gan' že' beṉe' chesonxene' Jesucriston', beṉe' ca' zja'aquen' gose'e ḻegaque' zan beṉe' bi zjanac beṉe' Israel ba gosebejyic̱hje' da' ca' gosejnilaže' do cana' cont chesejnilaže' Diosen'. Nach beṉe' ca' že' distritw Fenicia na' distritw Samaria besyebechgüede' gosende' dižan'. 
\p  
\v 4 Na' cate' Pablon' len Bernabén' besežine' Jerusalénṉa', beṉe' ca' chesedop chesežag chesonxene' Jesucriston', na' postlw ca' na' len beṉe' ca' chosogüia cheseṉa' ḻježgaquen' besežague' bosoguape' ḻegaque' tiox. Nach Pablon' len Bernabén' gose'e ḻegaque' yogo'ḻoḻ can' ba goclen Diosen' ḻegaque'.  
\v 5 Nach nita' to c̱hope beṉe' Fariseo beṉe' ba chesonxene' X̱ancho Jesucriston', na' tgüeje tgüeje' gosezie' gosene': 
\p ―Note'tez beṉe' byo gonxene' Jesucriston' cheyaḻa' soe' señw dan' nzi' circuncisión na' cheyaḻa' gone' can' ža ley dan' bzoj da' Moisésen'. 
\p  
\v 6 Nach besedobe postlw ca' len beṉe' ca' chosogüia cheseṉa' ḻježgaque', na' bosoxi'e še naquen can' chesena beṉe' ca'.  
\v 7 Ba chac sša cheso'e dižan' cate' gwzoža' Pedron' gože' ḻegaque': 
\p ―Beṉe' migw, ṉezele ba goc zan iz Diosen' gwleje' neda' jatix̱jue'eda' diža' güen c̱he Jesucriston' len beṉe' ca' bi zjanac beṉe' Israel cont gosejḻe'e c̱he'.  
\v 8 Na' Diosen' nombi'e yic̱hjlaždao' yogo'ḻoḻ beṉe', na' cont ṉezecho chacde' beṉe' ca' bi zjanac beṉe' Israel can' chacde' chio' naccho beṉe' Israel, nacha' gwseḻe' Spiritw c̱hen' gwyo'on ḻo' yic̱hjlaždao' beṉe' ca' can' ba gwyo'on ḻo' yic̱hjlažda'ochon'.  
\v 9 Toz ca chon Diosen' len chio' na' len ḻegaque', note'tezcho ba beya' beyibe' lažda'ochon' dan' chejḻe'cho c̱he Jesúcriston'.  
\v 10 Ba chonḻe contr Diosen' dan' chaquele gwc̱hile beṉe' ca' bi zjanac beṉe' Israel cont yesa'ogüe' costumbr c̱he chio' beṉe' Israel. Ṉezele catec zdebe zjanaquen, ṉe chio' ṉe x̱ozxta'ocho ca' bi goc yesone' yogo' can' ža diža' gol c̱heto' ca'.  
\v 11 Bi cheyaḻa' goncho ca', ḻe ṉezecho note'tez naccho, X̱ancho Jesúsen' choṉe' yeḻa' mban c̱hecho toḻi tocaṉe dan' chacde' chio', gague ṉec̱he dan' choncho can' ža ley c̱he Moisés. 
\p  
\v 12 Beyož gwna Pedroa' ca' nach bich bi gosena beṉe' ca', san yogüe' gosenite' šize bosozenague' xtiža' Pablon' len Bernabén'. Goso'e diža' can' bnežjo Diosen' ḻegaque' yeḻa' guac cont gosone' da' zaca' yebanecho gan' že' beṉe' ca' bi zjanac beṉe' Israel.  
\v 13 Na' beyož goso'e dižan' nach postlw Jacobo be'e dižan', gwne': 
\p ―Beṉe' migw, ḻe gwzenag diža' nga gua'a.  
\v 14 Simón Pedro nga ba bzejni'ide' chio' can' ben Diosen' da' nechw len beṉe' bi zjanac beṉe' Israel cont blo'e chacde' ḻegaque', ba gwleje' baḻe' cont zjanaque' ḻo ne'e.  
\v 15 Na' dan' goc ca' chotiḻen da' ca' bosozoj beṉe' goso'e xtiža' Diosen' cani', ḻe nyojen žan: 
\q1  
\v 16 Tena' yida' da' yoble na' gona' cont ṉabia' xi'iṉ diaža c̱he da' rey David, 
\q1 ḻa'czḻa' ṉa'a nono xi'iṉ diaža c̱he' chnabia', 
\q1 na' gona' cont soa toe' da' yoble ṉabi'e. 
\q1  
\v 17 Gona' ca' cont yogo' beṉe' bi zjanac beṉe' Israel guac yeseyiljue' nac yesone' yesenite' binḻo len neda'. 
\q1 Note'tez beṉe' nación guac yosoḻ güiže' neda'. 
\q1  
\v 18 Can' gwna X̱ancho Diosen' cani'te, 
\q1 bene' cont goseṉeze beṉe' can' gaquen'. 
\p  
\v 19 ’Na' lagüe nyoj Xtižen' žan ca', chacda' neda' bi cheyaḻa' gonecho zed beṉe' ca' bi zjanac beṉe' Israel beṉe' ba chesebejyic̱hje' costumbr gole c̱hegaque' na' chesonxene' Diosen'.  
\v 20 Con gwzojcho ye'gacchone' bi yesone' txen len bi dan' cheson beṉe' dan' chesene' naquen c̱he ḻ gua'a ḻsaca' dan' chesonxene', ṉeca yesata'lene' no no'ol cbi nac no'ol c̱hegaque' o beṉe' byo cbi nac beṉe' c̱hegaque', ṉeca yesagüe' be chesote' chosošoque' do ḻba'ba', ṉeca yesagüe' chen c̱he beyix̱e'.  
\v 21 Ṉabcho bi yesone' da' ca', ḻe cani'te nita' beṉe' to to yež chosozejni'ide' ley c̱hechon' dan' bzoj da' Moisésen' dan' žan bi goncho da' ca', na' chosolabe' leyna' yogo' ža c̱he Dios. 
\p  
\v 22 Nach postlw ca' len beṉe' chosogüia cheseṉe'e yezica'chle beṉe' chesonxene' Jesucriston', na' len beṉe' chesedop chesežag, gosazlaže' can' gwna Jacobon', na' bosoxi'e choj c̱hope beṉe' ḻježe' šja'aque' ciuda Antioquían' txen len Pablon' na' Bernabén'. Na' gosebeje' Judas ben' ḻecze gože'ne' Barsabás, na' Silas, ben' zjanac beṉe' blao len ḻegaque'.  
\v 23 Na' bosozoje' to cart da' gosox̱e' beṉe' ca' žan: 
\p “Neto' postlw, len beṉe' chosogüia cheseṉe'e yezica'chle beṉe' chesonxene' Jesucriston', na' len yogo' beṉe' chesedop chesežag len neto', chguapto' le'e tiox le'e zoale Antioquían' na' distritw Siria na' distritw Cilicia. Bi nacle beṉe' Israel perw ba nac ḻježcho chonxencho Jesucriston'.  
\v 24 Ba ṉezeto' to c̱hope beṉe' besechoj nga ja'aque' gan' zoalen' gosone' šejlaže'le len dan' bosozejni'ide', na' chacle tole dan' chesene' cheyaḻa' soale señw dan' že' circuncisión na' cheyaḻa' gonḻe yogo' bichle dan' ža ley dan' bzoj da' Moisésen'. Bi ṉezeto' gosa'aque' na' gague mandadw c̱he neto' gose'e le'e ca'.  
\v 25 Da'nan' gwzoato' txen bento' yeḻa' güexi'a gwlejto' c̱hope beṉe' quinga chseḻa'to' gan' zoalen', txen len postlw Pablon' na' len Bernabén', beṉe' ca' chaquechgüeto'.  
\v 26 Ṉezeto' Pablon' len Bernabén' zan las ba ša' yesate' dan' cheso'e xtiža' X̱ancho Jesucriston'.  
\v 27 Na' chseḻa'to' Judasen' len Silasen' cont yosozejni'ide' le'e diža' cho'a yogo' dan' bzojto' ḻe'e cart nga.  
\v 28 Chazlaže'to' can' bzejni'i Spiritw c̱he Diosen' neto', na' da'nan' bi gonto' mandadw bichle da' zdebe gonḻe san da' quinga chaqueto' chonen byen cbi gonḻen.  
\v 29 Bi gagwle yeḻa' guagw dan' ba bosožie' ḻo ḻ gua'a ḻsacan' chesonxenen', na' bi gagwle be ca' chesote' chosošoque' do ḻba'ba', bi gagwle chen c̱he beyix̱e', na' bi gata'lenḻe no'ol cbi nac no'ol c̱hele o beṉe' byo ben' cbi nac beṉe' c̱hele. Na' še gwzenagle c̱he da' quinga ba gwnato' bi gonḻe, güenṉa' chonḻe še ca'. Da' na'ze chzojto' ḻe'e cart nga. Diosen' gaclenšque' le'e.” 
\p  
\v 30 Can' goquen' beṉe' ca' chesonxene' Jesucriston' Jerusalénṉa' goseseḻe' beṉe' ca' c̱hope len Pablon' na' len Bernabén' gosa'aque' zja'aque' ciuda Antioquían'. Na' cate' besežine' Antioquían' bosotobe' beṉe' ca' chesonxene' Jesucriston' na' bosonežjue' ḻegaque' carten' goseseḻa' beṉe' Jerusalén ca'.  
\v 31 Na' cate' beṉe' Antioquía ca' bosolaben' besyebede' ca consejon' nyoj ḻe'e carta'.  
\v 32 Na' Judasen' len Silasen' ḻecze gosaque' bosozende' beṉe' bin' ba gwna Diosen'. Nach gosoe'lene' beṉe' Antioquía ca' diža' zan gosone' c̱hac̱h laže'gaque' na' gosaclene' ḻegaque' cont gosonxenche' Jesucriston'.  
\v 33 Gosenite' Antioquían' zan ža, nach cate' bžin ža šjaya'aque', beṉe' Antioquía ca' gose'e ḻegaque': “Nayežagcho”, na' ḻecze gose'e ḻegaque' yesyežine' Jerusalénṉa' to šagüe' to güen.  
\v 34 Na' Silasen' bec̱hoglaže' yega'aṉe' Antioquían'.  
\v 35 Na' Pablon' len Bernabén' gosenita'cze' Antioquían' na' txen len yezan beṉe' bosozejni'ide' beṉe' xtiža' X̱ancho Jesucriston'. 
\s1 Pablon' gwyeje' da' yoble gan' ba jatix̱jue'ede' xtiža' Diosen' 
\p  
\v 36 Nach cate' ba goc sša nite' Antioquían', Pablon' gože' Bernabén': 
\p ―Šejcho da' yoble yogo' yež ca' gan' ba jatix̱jue'echo xtiža' X̱ancho Jesucriston' šjaṉa'cho nac cheson beṉe' ca'. 
\p  
\v 37 Nach Bernabén' goclaže' šja'aque' na' yesec̱he'e Juan ben' ḻecz le Marcos.  
\v 38 Perw Pablon' gwne' bi gonen güen yesec̱he'ene' dan' gwlejyic̱hj Marcosen' ḻegaque' cate' besežine' distritw Panfilian' na' bi benḻene' ḻegaque' xšin Diosen'.  
\v 39 Cate' gota'bia' ṉe toe' bi goclaže' gac can' ža ben' yeto, nach besyele'e. Bernabén' gwze'e gwc̱he'e Marcosen' na' goso'e ḻo' barcw ja'aque' Chipren'.  
\v 40 Na' Pablon' gwleje' Silasen' cont c̱he'e ḻe'. Na' beṉe' ca' chesonxene' Jesucriston' Antioquían' bosoḻ güiže' X̱ancho Diosen' goseṉabe' gaclene' ḻegaque' gate'tez šja'aque'. Nach Pablon' len Silasen' gosa'aque'.  
\v 41 Na' ja'aque' to to yež ca' zjachi' distritw Sirian' na' len distritw Cilician' gosone' c̱hac̱h laže' beṉe' ca' chesedop chesežag chesonxene' Jesucriston'. 
\c 16  
\s1 Timoteon' gwzolagüe' chonḻene' Pablon' na' Silasen' txen 
\p  
\v 1 Na' Pablon' len Silasen' besyežine' yež Derben' nach gwdena' besyežine' yež Listran'. Na' Listran' zoa to beṉe' chonxene' Jesucriston' le' Timoteo. Xṉa' Timoteon' naque' beṉe' Israel na' chonxene' Jesucriston', na' x̱en' naque' beṉe' griego.  
\v 2 Na' beṉe' ca' chesonxene' Jesucriston' yež Listran' len yež Iconion' cheso'e diža' c̱he Timoteon' chesene' zoacze' chone' da' güen.  
\v 3 Da'nan' Pablon' gwṉabe' šejlen Timoteon' ḻegaque', nach gwc̱hi'ene' gan' bosozoe' ḻe' señw dan' že' circuncisión. Bene' ca' ḻe yogo' beṉe' že' na' goseṉezde' x̱a Timoteon' bi naque' beṉe' Israel na' Timoteon' biṉa' soe' señon', na' ḻecze Pablon' goclaže' yega'aṉe' güen len beṉe' Israel ca'. Cate' beyož bzoe'ne' señua' na' gosa'aque'.  
\v 4 Na' to to yež ga besežine' bosozende' beṉe' ca' chesonxene' Jesucriston' can' nac yeḻa' güexi'a c̱he postlw ca' len beṉe' chosogüia cheseṉe'e ḻježgaque' Jerusalénṉa' c̱he da' ca' cheyaḻa' yesone'.  
\v 5 Na' beṉe' ca' chesedop chesežag chesonxene' Jesucriston' gosenita'c̱hac̱he' gosejnilaže'ne' na' gwyanche' tža tža. 
\s1 Pablon' ble'edagüede' to beṉe' distritw Macedonia chata'yoede' ḻe' šeje' laže' 
\p  
\v 6 Nach Spiritw c̱he Diosen' bi ben' latje šjasedix̱jue'e Pablon' len Silasen' len Timoteon' xtiža' Diosen' yež ca' zjachi' distritw gan' nzi' Asia. Da'nan' gosedie' yež ca' zjachi' distritw ca' gan' nzi' Frigia na' Galacia.  
\v 7 Besežinte' gaḻa'ze distritw gana' nzi' Misia na' gosone' xbab yeso'e distritw da' nzi' Bitinia, perw ḻez na' bi be' Spiritw c̱he Jesúsen' latje šja'aque'.  
\v 8 Nach gosedie' gaḻa'ze distritw Misian' na' besežine' ciuda dan' nzi' Troas dan' chi' cho'a nisdaon'.  
\v 9 Nach že'na' Pablon' ble'edagüede' zecha to beṉe' distritw Macedonia lagüe', che'e ḻe': “Yo'o Macedonia cont gacleno' neto'.”  
\v 10 Neda' Lucas gwzoa' len ḻegaque' na' da' ble'edagüe Pablon' beṉe' Macedonian', nach gwṉezeto' chaclaže' Diosen' šjazeneto' beṉe' Macedonia ca' diža' güen c̱he X̱ancho Jesucriston'. Nach bsiṉi'a c̱heto' cont gwza'to' gwyejto' distritw Macedonian'. 
\s1 Pablon' len Silasen' ja'aque' Filipos 
\p  
\v 11 Na' cate' gwza'to' ciuda da' nzi' Troas dan' chi' cho'a nisdao' gwyo'oto' to ḻo' barcw zejto' ḻicha gan' chi' to yežlio ḻo' nisen' dan' nzi' Samotracia, nach beteyo bžinto' yežen' dan' nzi' Neápolis.  
\v 12 Nach gwza'to' Neápolis bžinto' ciudan' nzi' Filipos gan' mbane distritw Macedonia na' bega'aṉto' to c̱hop ža. Filipos naquen ciuda blaoch c̱he distriton' gan' že' beṉe' Roma.  
\v 13 Na' cate' bžin ža c̱he Dios bchojto' ciudan' na' gwyejto' cho'a yegw gan' chaqueto' chjaseḻ güiže' Diosen', nach gwche'to' na' be'lento' no'ol ca' ba zjandoben' diža' güen c̱he Jesucriston'.  
\v 14 Toe' le Lidia naque' beṉe' Tiatira na' chote' lache' güen da' nac color moradw, na' chonxene' Diosen' do yic̱hj do laže'. X̱ancho Diosen' bene' cont bzenague' c̱he dan' bzejni'i Pablon' ḻe'.  
\v 15 Nach ḻe' len beṉe' ḻo' yo'o c̱he' gosezoe' nis. Gwdena' gota'yoede' neto' gwne': 
\p ―Še chejḻe'le da' ḻi ba chonxena' X̱ancho Jesucriston', ḻe šo'o soale ližan'. 
\p Nach gwyejto' jasoato' ližen', ḻe bene' byen. 
\p  
\v 16 Na' to ža zejto' gan' chosoḻ güiže' Diosen' cate' bežagto' to no'ol güego' no'ole esclava. Yo'o nyaz da' x̱igüen' yic̱hjlažda'oben' chonen cont chac chṉeya'abe', na' gan xen chombe' par x̱ambe' ca' chṉeya'abe'.  
\v 17 Na' ḻebe' na'obe' neto' len Pablon' gate'tez zejto', na' chosya'abe' žabe': 
\p ―Beṉe' quinga chesone' xšin Diosen' ben' chnabi'e doxen, na' cheseyix̱jue'ede' le'e can' gata' yeḻa' mban c̱hele toḻi tocaṉe. 
\p  
\v 18 Ba chac zan ža chombe' ca' cate' goque Pablon' zed, na' gwyec̱hje' gože' da' x̱igüen' yo'o ḻo' yic̱hjlažda'oben': 
\p ―Len yeḻa' chnabia' c̱he Jesucriston' chnia' le' bechoj ḻo' yic̱hjlaždao' bi'nga. 
\p Na' ḻa' bechojte da' x̱igüen' ḻo' yic̱hjlažda'oben'. 
\p  
\v 19 Na' gwdena' cate' gosacbe'e x̱ambe' ca' ba bechoj da' x̱igüen' ḻo' yic̱hjlažda'oben' na' bich bi gan yesone' len ḻebe', nach gosezene' Pablon' len Silasen' na' jasesane' ḻegaque' lagüe ya'a gan' že' beṉe' ca' chesenabia' ciudan'.  
\v 20 Na' cate' besežine' gan' že' justis ca', gose'e ḻegaque': 
\p ―Beṉe' Israel quinga chesaše' chesebeque' da' zed ḻo' ciuda nga.  
\v 21 Na' chosolo'ede' costumbr da' bi de ḻsens gao' chio' naccho beṉe' Roma. 
\p  
\v 22 Nach beṉe' ca' ḻo ciudan' gosase' contr Pablon' len Silasen', na' beṉe' gwnabia' ca' gosone' mandadw goseḻec̱hje' xagaque' cont goseyine' ḻegaque' xis.  
\v 23 Beyož goseyinchgüe' ḻegaque' nach bosoži'e ḻegaque' ḻižya, chese'e ben' chape' ḻižyan' gwṉa'yaṉe' ḻegaque' cont bi yesyechoje'.  
\v 24 Beyož gose'e ḻe' ca', nach bži'e ḻegaque' ḻo' cuart ḻižyan' dan' zoa ḻa'zelaoze gan' nac biže'te na' bc̱hide' ṉi'agaquen' len yag dan' nzi' cepo. 
\p  
\v 25 Ca' gosenita' Pablon' len Silasen' ca do chel, chosoḻ güiže' Diosen' na' chesoḻe' no himno chesonxene' Diosen', na' yezica'chle beṉe' ca' zjade ḻižyan' chosozenague'.  
\v 26 Nach zejzenez ḻeca gwxo' na' bsesechguan len yo'o ḻižyana'. Na' to ši'ize yogo' puert c̱he ḻižyana' beseyaljon na' besyeyež yogo' gden ca' dan' zjanchej ṉi'a na' beṉe' ca' že' ḻo' ḻižyan'.  
\v 27 Bosbanen ben' chape' ḻižyan' na' cate' ble'ede' ba zjanyaljo puert ca', ḻa' goḻjte spada c̱hen' cont yeyot cuine', ḻe bene' xbab ba bosyoxoṉj yogo' beṉe' ca' zjade ḻižyan'.  
\v 28 Nach Pablon' gože'ne' zižje: 
\p ―Bibi gone cuino'. Nga zoacze yogo'to'. 
\p  
\v 29 Nach ben' chap ḻižyan' gwṉabe' to yi', na' gwyo'osese' zjaṉe'e gan' de Pablon' len Silasen'. Do chxizze' bzoa xibe' lao beṉe' ca', ḻe chžebchgüe'.  
\v 30 Na' ḻa' bebejte' ḻegaque' ḻo cuart gan' zjayo'en', che'e ḻegaque': 
\p ―¿Bi cheyaḻa' gona' cont gata' yeḻa' mban c̱hia' toḻi tocaṉe? 
\p  
\v 31 Nach gose'e ḻe': 
\p ―Gwyejnilaže' X̱ancho Jesucriston', le' na' beṉe' ḻo' yo'o c̱hio', na' gata' yeḻa' mban c̱hele toḻi tocaṉe. 
\p  
\v 32 Nach ben' chape' ḻižyan' gwc̱he'e ḻegaque' ližen' na' gosoe'lene' ḻe' len beṉe' ḻo' yo'o c̱hen' xtiža' X̱ancho Jesucriston'.  
\v 33 Nach ca hora' ben' chap ḻižyan' gwdibe' ḻo güe' c̱he Pablon' na' c̱he Silasen', na' gwdena' jasoe' nis len beṉe' ḻo' yo'o c̱he' ca'.  
\v 34 Nach ben' chape' ḻižyan' bec̱he'e Pablon' len Silasen' liže' bgüe'ej bguagüe' ḻegaque'. Mbalaz zoe' ba chejnilaže' Diosen' txen len beṉe' ḻo' yo'o c̱he'. 
\p  
\v 35 Cate' ba gwyeni' beṉe' gwnabia' ca' goseseḻe' x̱a'ag jaseže' ben' chap ḻižyan' yosane' beṉe' ca' šjaya'aque'.  
\v 36 Nach ḻe' gože' Pablon': 
\p ―Beṉe' gwnabia' ca' bac̱h goseseḻe' rson yosana' le'e. Guac yeyejle to šagüe' to güen. 
\p  
\v 37 Nach Pablon' gože' x̱a'ag ca': 
\p ―Ba goseyine' neto' latje lagüe ya'a sin cbi gosone' yeḻa' justis c̱heto' še bi nonto' na' gosegüe'e neto' ḻižya, ḻen nacto' beṉe' nación Roma. ¿Na' chesone' xbab yososane' neto' šižize? Bi gac, san yesid cuine' yesyebeje' neto'. 
\p  
\v 38 Nach x̱a'ag ca' jasyeyeže' beṉe' gwnabia' ca' can' gož Pablon' ḻegaque'. Na' beṉe' ca' besežebe' cate' goseṉezde' Pablon' len Silasen' zjanaque' beṉe' nación Roma.  
\v 39 Nach beṉe' gwnabia' ca' ja'aque' gan' zjade Pablon' len Silasen' na' gosata'yoede' ḻegaque' yesyezi'xene' can' ba goquen', na' diža' šagüe' gose'e ḻegaque' yesyechoje' yesyeya'aque' ḻo ciudan'.  
\v 40 Nach bechoj Pablon' len Silasen' ḻižyan' na' ja'aque' liž Lidian' da' yoble, na' da' yoble gosone' c̱hac̱h laže' beṉe' ca' chesonxene' Jesucriston' na' beyožen' besyeya'aque'. 
\c 17  
\s1 Beṉe' Tesalónica ca' gosone' contr Pablon' 
\p  
\v 1 Cate' Pablon' na' Silasen' gosa'aque' ciuda Filipos nach ja'aque' yež da' nzi' Anfípolis na' len yež da' nzi' Apolonia na' besyežine' to ciuda da' nzi' Tesalónica gan' zoa to yodao' c̱he beṉe' Israel.  
\v 2 Na' Pablon' ca costumbr c̱he' gwyeje' yodao' ža c̱he Dios. Na' ca' goc, šoṉe ža c̱he Dios be'lene' ḻegaque' diža'.  
\v 3 Bzejni'ide' ḻegaque' gože'ne' beṉe' ca' goso'e xtiža' Diosen' cani' bosozoje' xtiža' Criston'. Gosene' ben' seḻa' Dios yedeṉabi'e, cheyaḻa' yosoc̱hi yososaca' beṉe' ḻe' na' yesote'ne' na' techle yeyas yebane' ladjo beṉe' guat ca'. Gože' beṉe' Tesalónican': 
\p ―Jesúsen' ben' choa' diža' c̱he', ḻe'na' Criston' ben' gwseḻa' Dios cont ṉabi'e. 
\p  
\v 4 Nach baḻ beṉe' Israel gosejḻe'e xtiža' Pablon' len Silasen' na' gosaque' txen len ḻegaque', na' ḻecze zan beṉe' griego beṉe' chesonxen Diosen' na' zan no'ole blao ḻecze gosejḻe'e.  
\v 5 Perw gwnita'ch beṉe' Israel beṉe' bi chesejḻe'e xtiža' Diosen'. Ḻegaque' gosacxi'ede' Pablon' len Silasen' na' bosyotobe' x̱oṉj beṉe' mal beṉe' chesaš lagüe ya'a na' gosaque' txen gosone' cont gwche' žaš doxen ciudan'. Nach beṉe' že' ḻo ciudan' ja'aque' liž ben' le' Jasón chesacde' yesyebeje' Pablon' len Silasen' liže'na'.  
\v 6 Cate' besežine' liž Jasónṉa', noch no beṉe' ca' nita'. Nach cate' bi besyeželde' Pablon' len Silasen', na' gosox̱e' Jasónṉa' len yebaḻ beṉe' chesonxene' Jesuscriston' na' gosec̱he'e ḻegaque' lao beṉe' ca' chesenabia' ciudan', na' bososye'e gosene': 
\p ―Beṉe' ca' nita' liž benga chesaše' chesebeque' da' zed doxen, na' ṉa'a ba besele'e gan' zoacho nga.  
\v 7 Jasón ni ba blebe' ḻegaque' ližen', na' bi chesone' can' ža ley c̱he César ben' nac ḻa'zelagüe beṉe' gwnabia' c̱hechon' chi' ciuda Roman', na' chesene' zoa yeto rey beṉe' le Jesús beṉe' ṉabi'e chio'. 
\p  
\v 8 Na' cate' gosende' diža'na', beṉe' ḻo ciuda ca' len beṉe' gwnabia' c̱hegaque' ca' gosebecche' žaš.  
\v 9 Nach Jasónṉa' len beṉe' ḻježe' ca' bosožie' mechw cont beṉe' gwnabia' ca' bososane' ḻegaque', con še bich yesyežin Pablon' na' Silasen' ḻo ciudan', chesene'. 
\s1 Pablon' len Silasen' ja'aque' yež Berea 
\p  
\v 10 Nach že'na' beṉe' ca' chesonxene' Jesucriston' lagüe ciuda Tesalónican' bosyose'e Pablon' na' Silasen' cont ja'aque' yež gan' že' Berea. Na' cate' besyežine' nach ja'aque' ḻo' yodao' c̱he beṉe' Israel ca'.  
\v 11 Na' beṉe' Israel ca' že' Berean' zjanacche' beṉe' šagüe' clel ca beṉe' Israel ca' že' Tesalónican' na' besyebede' bosozenague' xtiža' Jesucriston' dan' bosozejni'i Pablon' len Silasen' ḻegaque'. Na' tža tža besyeyiljue' gan' nyoj da' ca' bosozejni'i beṉe' ca', cont yeseṉezde' še ḻe can' žan.  
\v 12 Na' zane' gosejḻe'e xtiža' X̱ancho Jesucriston' na' ḻecze zan beṉe' griego ca' na' zan no'ole blao.  
\v 13 Nach beṉe' Israel ca' že' Tesalónican' beṉe' ca' cbi chesejḻe' c̱he Jesucriston', gosende' diža' ba zoa Pablon' len Silasen' Berean' chosozejni'ide' xtiža' Diosen'. Nach gosa'aque' ja'aque' Berean' na' gosone' cont beṉe' Berea ca' ḻecz gosone' contr Pablon'.  
\v 14 Perw na' beṉe' Berea ca' chesejnilaže' Jesucriston' ḻa' bososa'te' Pablon' gwyeje' cho'a nisdao'. Na' ca nac Silasen' len Timoteon', ḻegaque' besyega'aṉe' Berean'.  
\v 15 Na' to c̱hop beṉe' Berean' ja'aque' jasesane' Pablon' ciuda dan' nzi' Atenas. Na' cate' besyeya'aque' jaya'aque' Berean' Pablon' gwseḻe' rson len ḻegaque' cont Silasen' len Timoteon' ḻecz šja'aque' cate gan' zoe'na'. 
\s1 Pablon' bsed blo'ede' beṉe' Atenas ca' 
\p  
\v 16 Na' Pablon' šlac zoe' ciuda Atenasen' chbeze' žin Silasen' len Timoteon', gocchgüe' tole ḻo' yic̱hjlažda'ogüe' da' ble'ede' da' zan ḻ gua'a ḻsaca' da' chesejnilaže' beṉe' ca'.  
\v 17 Da'nan' bzejni'ide' beṉe' Israel ca' ḻo' yodao' c̱hegaque'na' len yezica'chle beṉe' ca' chesonxene' Diosen'. Na' yogo' ža gwyeje' ga chac ya'a je'e xtiža' Diosen' len beṉe' ca' že'na'.  
\v 18 Nach beṉe' ca' že'na' gwzolao chesoe'lene' ḻe' diža'. Baḻe' chesejḻe'e dan' bzejni'i to beṉe' le' Epicuro, na' yebaḻe' chesejḻe'e dan' bosozoj beṉe' ca' chesene' estoico. Na' baḻe' gosene': 
\p ―¿Bin' chon ža benga? 
\p Na' yebaḻe' gosene': 
\p ―Chacḻjede' gwzejni'ide' chio' c̱he no beṉe' cobe beṉe' šejnilaže'cho. 
\p Gosene' ca' ḻe Pablon' ba bzejni'ide' ḻegaque' xtiža' Jesúsen' na' ba be'e diža' Jesúsen' bebane' ladjo beṉe' guat.  
\v 19 Nach gosec̱he'e Pablon' to latje dan' nzi' Areópago gan' chesedobe beṉe' blao c̱hegaque' cate' chosoxi'e bi da' chesone'. Nach gose'e Pablon': 
\p ―Che'neto' gwzejni'ido' neto' bi da' coben' dan' chsed chlo'edo'.  
\v 20 Biṉa' yeneto' diža' can' nac dan' cho'o nga na' chaclaže'to' ṉezeto' bi zejen yogo' da' ca'. 
\p  
\v 21 Ca nac beṉe' Atenas ca', de costumbr c̱hegaque' yogo' ža con chesaše' cheso'e diža' o chosozenague' c̱he bi da' cobe da' de, na' ḻecz ca' cheson no beṉe' zito' že' Atenas. 
\p  
\v 22 Nach Pablon' gwzeche' gachoḻ ḻegaque' gan' chesone' yeḻa' güexi'a na' gože' ḻegaque': 
\p ―Le'e beṉe' Atenas, chacbe'eda' ḻeca chejnilaže'le zan ḻ gua'a ḻsaca'.  
\v 23 Cate' gwdia' tnez ble'eda' gan' chonxenḻe zan ḻ gua'a ḻsaca', na' ble'eda' to latje gan' nyojen žan: “C̱he X̱ancho ben' nono nombia'.” Na' ca nac ben' chonxenḻe sin cbi nombia'lne', c̱he benan' chyix̱jue'eda' le'e. 
\p  
\v 24 ’Dios ben' ben yežlion' na' yogo' da' de lagüe yežlion', ḻen' chnabi'e yaban' len yežlion'. Bi chyažjde' yo'o da' chon beṉac̱hen' cont soe' len chio'.  
\v 25 Bibi chyažje Diosen' gwnežjo beṉac̱hen' ḻe', na' bibi gac yesone' yesaclene' ḻe'. Diosen' cho'e yeḻa' mban c̱he yogo'ḻoḻ beṉe', cho'e ḻegaque' biš grasyw na' cho'e ḻegaque' yogo' bi da' zjanape'. 
\p  
\v 26 ’Diosen' bene' beṉe' nechon', na' toz ca nac yogo' beṉac̱h xi'iṉ diaža c̱he'. Na' bsi'e xṉeze bat ṉita' to toe' na' ga yesenite'.  
\v 27 Diosen' bnite' yogo' beṉac̱hen' ḻo yežlion' cont yeseyiljue' nacle yesone' yesombi'ene' na' yesonxene'ne'. Na' da' ḻi Diosen' bi zoe' zito' len to to chio'.  
\v 28 Ḻe' chone' cont zoacho mbancho na' chdacho. Nac da' ḻi can' gosena to c̱hope beṉe' poeta c̱hele ben' goso'e diža' xdan, gosene': “Naccho diaža c̱he Diosen'.”  
\v 29 Na' dan' naccho diaža c̱he Diosen' bi cheyaḻa' goncho xbab nac Diosen' ca no ḻ gua'a ḻsaca' de oro, de plata o de yej. Chesaḻjlaže' beṉac̱hen' chesone' da' ca'.  
\v 30 Cani' Diosen' be'e latje goson beṉac̱hen' con ca gwna xbab c̱hegaque' yeḻa' cbi chejni'i c̱hegaque', perw ṉa'a Diosen' chone' mandadw yogo'ḻoḻ beṉe' že' doxen yežlion' yesebejyic̱hje' da' malen' chesonen'.  
\v 31 Diosen' chaclaže' cuejyic̱hjcho da' malen', ḻe ba mbeje' Jesucriston' gone' yeḻa' justis c̱he yogo' beṉac̱h na' gwnežjue' castigw c̱he yogo' beṉe' cbi chesejnilaže' ḻe', na' Diosen' zejcze' to ḻicha dan' gone' ca'. Na' Diosen' ba nžie' bia' bat gone' yeḻa' justis c̱he beṉac̱h. Na' dan' bosban Diosen' Jesucriston' ladjo beṉe' guaten', ṉezecho Jesucristwnan' gone' yeḻa' justis c̱he beṉac̱hen'. 
\p  
\v 32 Cate' beṉe' Atenas ca' beyož gosende' gwna Pablon' yesyeban beṉe' guat ca', baḻe' gosezi'diže' ḻe' na' yebaḻe' gose'ene': 
\p ―Na' gwzenagto' xtižon' yeto ža yoble. 
\p  
\v 33 Can' goc beza' Pablon' latje gan' že' beṉe' ca'.  
\v 34 Perw baḻ beṉe' Atenas ca' gosaque' Pablon' txen na' gosonxene' Jesucriston'. Na' beṉe' ca' gosaque' Pablon' txen len to beṉe' byo le Dionisio na' yeto no'ole le Dámaris. Na' Dionision' naque' txen len beṉe' gwnabia' ca' ben' cheson yeḻa' güexi'a gan' nzi' Areópago. 
\c 18  
\s1 Ca goc šlac zoa Pablon' Corinto 
\p  
\v 1 Gwde goc da' ca', Pablon' beze'e ciuda Atenasen' na' gwyeje' ciuda gan' nzi' Corinto.  
\v 2 Cate' bžine' Corinton' bežague' to beṉe' Israel le' Aquila beṉe' naque' beṉe' distritw Ponto, na' len no'ol c̱he' ben' le Priscila. Za' besyežingale' Corinton' zeya'aque' nación Italia, ḻe rey Claudio, ben' chnabia' ca hora' doxen gan' mbane naciónṉa', bene' mandadw besyežaš yogo' beṉe' Israel ca' že' ciuda Roma. Nach Pablon' gwyeje' jaṉe'e Aquilan' len Priscilan'.  
\v 3 Xšingaque' naquen chesone' yo'o de lache', na' toze ca nac xšin Pablon'. Nach bega'aṉe' gosenite' txen na' gosone' žinṉa' txen.  
\v 4 Na' yogo' ža c̱he Dios Pablon' gwyeje' yodao' c̱he beṉe' Israel ca' jazejni'ide' ḻegaque' c̱he Jesucriston', cont baḻ beṉe' Israel len baḻ beṉe' bi zjanac beṉe' Israel yesejnilaže'ne'. 
\p  
\v 5 Nach Silasen' len Timoteon' gwde gosa'aque' distritw Macedonian' besežine' gan' zoa Pablon', na' cana'ch Pablon' bsane' xšinen' cont gota'ch latje gwdix̱jue'ede' xtiža' Jesúsen' na' bzejni'ide' beṉe' Israel ca' Jesucristwnan' naque' beṉe' chesebeze' seḻa' Diosen' yedeṉabi'e.  
\v 6 Perw beṉe' Israel ca' beseže'e Pablon' na' bosožie' yeḻa' ya' c̱he'. Nach Pablon' gwšibe' xe'na' cont blo'e chbejyic̱hje' ḻegaque', gwne': 
\p ―Bibi doḻa' napa' dan' cuiayi'le toḻi tocaṉe. Le'e naple doḻa'. Na' ṉa'a šjased šjalo'eda' beṉe' ca' bi zjanac beṉe' Israel. 
\p  
\v 7 Nach bechoje' ḻo' yodao'na' na' beze'e bežine' liž to beṉe' le Justo. Justo na'na' zoe' chonxene' Diosen' na' liže' zoan cuit yodao'na'.  
\v 8 Na' to beṉe' le' Crispo naque' beṉe' gwnabia' c̱he yodaon'. Na' Crispon' len yogo' beṉe' ḻo' yo'o c̱he' gosaque' txen chesejḻe'e c̱he X̱ancho Jesucriston'. Na' yezan beṉe' Corinto gosejḻe'e cate' gosende' xtiža' Jesucriston' da' choe' Pablon' na' gosezoe' nis.  
\v 9 Na' goc to že' Pablon' ble'edagüede' X̱ancho Jesucriston', che'ene': 
\p ―Bi žebo' Pablo. Gwzoateze be' xtižan' na' bi so' šize.  
\v 10 Neda' zoa' len le' na' bi goṉa' latje no gone le' da' mal, ḻe beṉe' zan že' ḻo ciuda nga beṉe' chesonxene' neda'. 
\p  
\v 11 Ca' goquen' bega'aṉ Pablon' Corinton' tgüiz yogašje bsed blo'ede' ḻegaque' xtiža' Diosen'. 
\p  
\v 12 Na' ca tiempen' ben' le Galión naque' gobernador distritw gan' nzi' Acaya. Nach beṉe' Israel ca' nita' ciuda Corinto beṉe' cbi chesonxen Jesucriston' gosaque' toze gosone' contr Pablon'. Na' gosec̱he'ene' jasesane'ne' gan' chon gobernadoren' yeḻa' justisen'.  
\v 13 Na' cate' besežine'na' gose'e gobernadoren': 
\p ―Benga chde' chgo'oyeḻe' beṉe' ḻo' yežen' yesone' bi da' cobe cont yesonxene' Diosen' na' da' chzejni'ide' goncho, bi zejen to ḻi len ley c̱hechon'. 
\p  
\v 14 Bac̱h zoa ṉe Pablon' cate' gobernador Galiónṉa' gože' beṉe' Israel ca': 
\p ―Ca nac xya dan' chagwle nga, šaca' naquen to da' xiṉj o to da' malchgua, gonan' yeḻa' justis.  
\v 15 Perw naquen c̱he diža', na' c̱he beṉe', na' c̱he ley c̱helen'. Da'nan' ḻe gwye' nacle gonḻe. Bi co'o ḻo na' gona' yeḻa' justis c̱he dan' nac ca'. 
\p  
\v 16 Nach bešaše' ḻegaque' gan' chone' yeḻa' justisen'.  
\v 17 Nach beṉe' ca' bi zjanac beṉe' Israel goseṉize' Sóstenes ben' ba nac beṉe' gwnabia' c̱he yodaon', gosot goseyine' ḻe' lao gobernador Galiónṉa', perw bena' bibi cuent bene' ḻegaque'. 
\s1 Pablon' beyeje' Antioquían' da' yoble 
\p  
\v 18 Na' bega'aṉch Pablon' ciuda Corinton' yezan ža beyož goc da' ca', na' cate' beze'ena' gože' beṉe' ca' chesonxen Jesucriston': “Nayežagcho”, nach beze'e txen len Priscilan' na' Aquilan'. Ja'aque' to yež da' nzi' Cencrea gan' bšib yic̱hj Pablon' da' bac̱h beyož bene' to da' gwlo'o cho'e lao Diosen' gone'. Na' beyožen' Pablon', Aquilan' na' Priscilan' besyeyo'e ḻo' barcw da' zej nación Siria.  
\v 19 Na' cate' besyežine' ciuda Efeson' besyechoje' ḻo' barcon', na' Priscilan' len Aquilan' besyega'aṉe' Efeson'. Na' Pablon' gwyeje' yodao' c̱he beṉe' Israel ca' je'lene' beṉe' ca' ba zjandob na' xtiža' Dios.  
\v 20 Na' beṉe' ca' že' ḻo' yodaon' gosata'yoede' ḻe' yega'aṉche' len ḻegaque', perw bi goclaže'.  
\v 21 Nach gože' ḻegaque': 
\p ―Nayežagcho, ḻe chonen byen soa' ḻṉi dan' šo' ciuda Jerusalénṉa', perw güidchcza' deṉa'a le'e yeto še Diosen' goṉe' latje. 
\p Nach beze'e ciuda Efeson' na' beyo'e ḻo' barcon' zeyeje'.  
\v 22 Cate' bežine' ciuda Cesarean' bechoje' ḻo barcon' na' gwyeje' Jerusalénṉa' na' bguape' tiox beṉe' ca' chesedop chesežag chesonxene' Jesucriston'. Nach beze'e beyeje' ciuda Antioquían'.  
\v 23 Gwde to tiemp zoe' Antioquían', nach gwze'e da' yoble gwyeje' to to yež dan' nita' distritw Galacia na' Frigia, bene' c̱hac̱h laže' beṉe' ca' chesonxene' Jesucriston'. 
\s1 Apolos gwdix̱jue'ede' xtiža' Diosen' ciuda Efeson' 
\p  
\v 24 Na' ca tiemp na' bžin to beṉe' Israel ciuda Efeson' beṉe' le Apolos. Naque' beṉe' ciuda Alejandría. Ḻe' chac cho'e diža' güen lao yogo' beṉe', na' ba nsede' binḻo doxen Xtiža' Diosen' dan' nyoj.  
\v 25 Apolosen' chejḻe'e dan' bzejni'i Juanṉa' c̱he X̱ancho Jesúsen' na' ṉezde' can' bzoe' beṉe' nis caten' besyetiṉjde' xtoḻa'gaquen'. Na' Apolosen' be'e diža' do yic̱hj do laže' bzejni'ide' binḻo c̱he Jesúsen', ḻa'czḻa' con dan' bsed blo'e da' Juan na'zen' ṉezde'.  
\v 26 Nach Apolosen' gwzolao be'e diža' c̱he X̱ancho Jesucriston' ḻo' yodao' c̱he beṉe' Israel ca' sin cbi chaž chžebe'. Na' cate' Priscilan' na' Aquilan' gosende' can' chzejni'i Apolosen', ḻegaque' gosebejiže' ḻe' na' bosozejni'ichde' ḻe' c̱he Jesucriston' da' ca' biṉa' ṉezde'.  
\v 27 Gwdena' cate' Apolosen' bene' xbab šeje' distritw gan' nzi' Acaya, beṉe' Efeso ca' chesonxen Jesucriston' gose'e ḻe' chone' güen dan' šeje' na' bosozoje' to cart da' bex̱ue' c̱he beṉe' ca' chesonxen Jesucriston' distritw Acaya cont beṉe' ca' bosolebe' ḻe'. Na' Diosen' nži'ilaže' beṉe' Acaya ca' na' ba goclene' zane' cont chesejnilaže' X̱ancho Jesucriston'. Na' cate' bžin Apolosen' Acayan' be'lene' ḻegaque' diža' da' goclenchguan ḻegaque'.  
\v 28 Bzejni'ide' yogo'ḻoḻ bene' gože'ne' clelen' cheson beṉe' Israel gualaž c̱hen' bi chesejḻe'e c̱he Jesúsen'. Bzejni'ide' ḻegaque' can' nyoj Xtiža' Diosen' žan Jesúsen' naque' Cristo ben' chesebeze' yedeṉabi'e. 
\c 19  
\s1 Šlac gwzoa Pablon' ciuda Efeson' 
\p  
\v 1 Na' šlac zoa Apolosen' ciuda Corinto, Pablon' beze'e bedie' yež ca' zjachi' do ya'adao' na' bežinte' ciuda Efeson'. Efeson' bežague' baḻ beṉe' chesonxene' Jesucriston'.  
\v 2 Na' gože' ḻegaque': 
\p ―¿Zedesoa Spiritw c̱he Diosen' ḻo' yic̱hjlažda'olen' caten' gwzolao chejnilaže'le Jesucriston'? 
\p Nach gose'e ḻe': 
\p ―Bi ṉezeto' še zoa Spiritw c̱he Diosen'. 
\p  
\v 3 Nach Pablon' goze'e ḻegaque': 
\p ―¿Bi dižan' chejḻe'le da' gwzoale nisen' še ca'? 
\p Nach gose'e ḻe': 
\p ―Gwzoato' nis can' bzejni'i da' Juanṉa'. 
\p  
\v 4 Nach gož Pablon' ḻegaque': 
\p ―Da' Juanṉa' bzoe' beṉe' nis cate' besyetiṉje xtoḻa'gaque' na' ḻecze gože' ḻegaque' cheyaḻa' yesonxene' bena' za' seḻa' Diosen'. Na' da' gwne' ca' be'e diža' c̱he Jesucriston'. 
\p  
\v 5 Beyož bosozenague' can' gwna Pablon' nach gosezoe' nisa' da' yoble cont bosolo'e da' ḻi chesejnilaže' X̱ancho Jesúsen'.  
\v 6 Nach Pablon' gwx̱oa ne'ena' yic̱hj to toe' na' Spiritw c̱he Diosen' gwzoan ḻo' yic̱hjlaždao' to toe', nach goseṉe' diža' da' cbi chesejni'ide' na' goseyix̱jue'ede' bi dan' gož Diosen' ḻegaque'.  
\v 7 Na' yogo' beṉe' ca' zjanac ca do šižiṉue'. 
\p  
\v 8 Na' do šoṉe bio' Pablon' bsed blo'ede' beṉe' ca' chesedop chesežag ḻo' yodao' c̱he beṉe' Israel ca' dan' zoa Efeson'. Bi bžebe', na' bzejni'ide' ḻegaque' na' gwṉeyoede' ḻegaque' yeson cuingaque' ḻo na' Diosen' cont ṉabi'e ḻegaque' len xbab c̱hegaquen'.  
\v 9 Na' bchoj baḻ beṉe' güedenag beṉe' cbi chesejḻe'cze', na' lao beṉe' ca' že' yodao'na' goseṉe' diža' ya' c̱he xtiža' Jesucriston' dan' chzejni'i Pablon'. Da'nan' Pablon' bechoje' gan' že' beṉe' ca' na' bebeje' ben' ba chesonxene' Jesúcriston' na' gwc̱he'e ḻegaque' gan' zoa to yo'o xen c̱he to beṉe' le' Tiranno na' bzejni'ide' ḻegaque' yogo' ža.  
\v 10 Na' gwzoa Pablon' c̱hop iz bzejni'ide' beṉe' ca', na' can' goc, yogo' beṉe' že' distritw Asia gosende' xtiža' X̱ancho Jesúsen', beṉe' zjanac beṉe' Israel lente beṉe' bi zjanac beṉe' Israel.  
\v 11 Na' Diosen' bc̱hine' Pablon' cont bene' yeḻa' guac da' besyebanchgüe beṉe'.  
\v 12 Na' jasesane' no bay no lache' da' ba bcheḻen Pablon' gan' zjade beṉe' güe' na' ḻa' chesyeyactede' bi yižgüe' chese'ede', na' beṉe' ca' yo'o nyaz da' x̱igüe' yic̱hjlažda'ogaque'na' ḻecze besyechojen. 
\p  
\v 13 Ḻecze chesaš baḻ beṉe' Israel chesyebeje' da' x̱igüe' da' zjayo'o ḻo' yic̱hjlaždao' beṉe' na' gosaclaže' yosoc̱hine' la X̱ancho Jesúsen' cont yesyebeje' da' x̱igüe' ca', nach gose'e da' x̱igüen': 
\p ―Len yeḻa' chnabia' c̱he Jesúsen' ben' choe' Pablon' xtiže'na' chonto' mandadw yechojle. 
\p  
\v 14 Na' zoa to bx̱oz gwnabia' c̱he beṉe' Israel le' Esceva, na' nita' gaže xi'iṉe'. Na' beṉe' quingan' bosoc̱hine' la Jesúsen' gosaclaže' yesyebeje' da' x̱igüen'.  
\v 15 Nach goc to šlas chesone' ca' cate' to da' x̱igüen' boži'in xtižen', gožen ḻegaque': 
\p ―Nombi'a Jesúsen' na' ba benda' diža' c̱he Pablon', perw bi nombi'a le'e cont šejḻi'a xtiža'len'. 
\p  
\v 16 Nach bena' yo'o nyaz da' x̱igüen' bxite' gwṉize' beṉe' ca' betlate' ḻegaque' na' gwc̱heze' xaḻana'gaque'. Nach bosyoxoṉje' liž bena' ga'aḻyide' na' bedo chen zjanaque' dan' bene' ḻegaque' zi'.  
\v 17 Na' goslas diža' can' goquen' goseṉezete yogo' beṉe' že' Efeson', beṉe' Israel lente beṉe' cbi zjanac beṉe' Israel. Nach yogüe' besežebe' na' gosacbe'ede' X̱ancho Jesúsen' naque' beṉe' zaque'. 
\p  
\v 18 Nach beṉe' zan ba chesejḻe'e xtiža' X̱ancho Jesúsen', na' zane' gosex̱oadoḻe' lao beṉe' ca' chesedop chesežag chesonxene' Jesucriston' cheso'e diža' c̱he da' malen' ba gosone'.  
\v 19 Na' beṉe' ca' gosac beṉe' guaža' na' beṉe' güeṉe ya'a bosyotob libr c̱hegaquen' na' gosox̱en' bosozeyen' lao beṉe' ḻježe' beṉe' chesonxene' Jesucriston'. Na' besyebeje' cuent ca do gaca'te' zaca' libr ca' na' bžinen šiyon mil mechw plata, na' to to mechw plata ca' zacan' do tža žin.  
\v 20 Can' goc, beṉe' zan gosende' xtiža' X̱ancho Jesucriston', na' gwyanch beṉe' bosozenague' c̱he'. 
\p  
\v 21 Nach gwde goc da' ca' Pablon' bene' xbab yeyeje' Jerusalénṉa', na' goclaže' yedie' šjayṉe'e beṉe' ca' že' yež gan' mbane distritw Macedonia len Acaya. Nach bene' xbab yeyož yeyeje' Jerusalénṉa' ḻecze cheyaḻa' šeje' ciuda Roma.  
\v 22 Na' gwleje' c̱hope beṉe' chesonḻene' ḻe' xšin Diosen' na' gwseḻe' ḻegaque' distritw Macedonian', zjale' Timoteo na' Erasto, perw na' ḻe' bega'aṉche' distritw Asian' yeto c̱hope ža. 
\s1 Beṉe' ca' besegue'ede' Pablon' gosebecchgüe' da' zed ciuda Efeson' 
\p  
\v 23 Na' gwche' to da' zed gual ciuda Efeson', ḻe nita' beṉe' beseže'e xtiža' Jesúsen' dan' bsed blo'e Pablon'.  
\v 24 Quinga goc: gwzoa to beṉe' le' Demetrio beṉe' chon yodao' dao' de plata da' naquen ca nac yodao' gan' zoa xonax Diana ben' chesonxene'. Na' beṉe' ca' gosonḻene' žinṉa' gosonchgüe' gan, ḻe gwda'ochguan.  
\v 25 Nach btobe' beṉe' ca' goson žin txen len ḻe' na' nochle beṉe' goson žin dan' nac ca', na' gože' ḻegaque': 
\p ―Ṉezele ca nac žin dan' nḻancho choncho nga, chonḻenchon gan xen.  
\v 26 Na' ba beneczele na' ba ble'eczele can' chon to beṉe' le Pablo chsed chlo'ede' beṉe' ḻo ciuda Efeso c̱hecho nga na' ḻecze chsed chlo'ede' zan beṉe' že' doxen distritw Asia nga, che'e ḻegaque' bibi zaca' ḻ gua'a ḻsaca' da' cheson beṉac̱hen' cont chesejnilažen'. Na' beṉe' zan ba chosozenague' c̱he' na' chesebejyic̱hje' dan' chejnilaže'cho.  
\v 27 Ḻe gonšc xbab nacle goncho, ḻe xož yeseṉe' c̱he žin dan' choncho nga, na' gague ḻezen, san ḻecz xož yesone' cont yodao' c̱he xonax Diana c̱hechon' yega'aṉen ca to da' bibi zaca' na' len yeḻa' chze na' yeḻa' zaca' c̱he xonaxen'. Na' ṉezele ca nac xonax Diana c̱hechon', yogo'cze beṉe' distritw Asia nga na' beṉe' gate'tezechle chesonxene' ḻe'. 
\p  
\v 28 Beyož gosende' xtiža' Demetrion' beselocchgüe' na' bososye'e gosene': 
\p ―Ḻeca beṉe' zaca' xonax Diana c̱he chio' beṉe' Efeso. 
\p  
\v 29 Nach gwche' da' zed doxen ḻo ciudan', na' gosaque' toze' jaseṉize' c̱hope beṉe' distritw Macedonia beṉe' gosaque' txen len Pablon', toe' le Gayo na' yetoe' Aristarco. Na' gosexobe' ḻegaque' besežine' gan' chesedobe yogo' beṉe' ḻo ciudan'.  
\v 30 Na' Pablon' goclaže' šo'e gan' zjandobe beṉe' ca' cont güe'lene' ḻegaque' diža', perw beṉe' ca' chesonxene' Jesucriston' ḻo ciudan' bi goso'e latje šo'e.  
\v 31 Baḻ beṉe' zjanaque' beṉe' gwnabia' distritwna' zjanac xmigw Pablon' na' ḻecze goseseḻe' rson gose'e Pablon' bi šeje' gan' zjandobe beṉe' ca'.  
\v 32 Na' beṉe' ca' zjandoben' gosone' sšag juisyw. Gwde gwdele bososya'a to toe'. Na' beṉe' zan bi zjaṉezde' bic̱hen' zjandobe'na'.  
\v 33 Beṉe' Israel ca' bosožigue' to beṉe' le Alejandro lao beṉe' ca' že'na' cont be'lene' ḻegaque' diža', na' bosozejni'ide' ḻe' bin' cheyaḻa' ṉe'. Na' Alejandron' gwḻis ne'e cont gwṉabe' nite' šize yosozenague' diža' dan' güe'e laogaquen' gwzoe' rson c̱he beṉe' ca' chesejnilaže' Jesucriston'.  
\v 34 Perw cate' besele'ede' ḻe' gosacbe'ede' ḻecze naque' beṉe' Israel, na' besyezolagüe' da' yoble bososye'e, gosene': 
\p ―Beṉe' zaca' juisyw xonax Diana c̱he chio' beṉe' Efeso. 
\p Ca do c̱hop hor bososye'e ca' da' bi chesonxen beṉe' Israelen' xonax c̱hegaquen'. 
\p  
\v 35 Na' beṉe' güezoj c̱hegaquen' caṉe goc bebecžie' ḻegaque'. Na' gože'ne': 
\p ―Le'e beṉe' gualaž, yogo' beṉe' že' doxen yežlion' zjaṉezde' naquen c̱hecho gapši'icho yodao' c̱he xonax Dianan'. Naque' beṉe' zaque', ḻe ḻ gua'a ḻsaca' c̱hen' blažon' ḻe'e yaba.  
\v 36 Na' nono gac ṉa da' yoble. Da'nan' ḻe soa šize na' bich gonḻe da' bi zejen.  
\v 37 Na' ca nac beṉe' quinga nc̱he'ele nga, bibi ṉa' yesebane' ḻo' yodao' c̱hecho ca' na' ṉeca ṉacho chosožie' yeḻa' ya' c̱he xonax Diana c̱hechon'.  
\v 38 Na' Demetrio nga len yezica'chle beṉe' ḻježe', še chac bi chac c̱hegaque' len beṉe' yoble, nita' beṉe' gwnabia' c̱hechon' cont yesone' yeḻa' justis c̱hegaquen', con šja'aque' yeso'e ḻegaque' part še ca'.  
\v 39 Na' še bichle da' chṉable gac, cheyaḻa' goncho to yeḻa' güexi'a cont c̱hoglaon.  
\v 40 Perw ca nac žaš da' nga chac ṉa'a, xož baga'cho choncho contr gobiern can' že'cho nga, na' bibi de ye'gacchone' še yeseṉabe' bixc̱hen' goc žaš da' nga chac ṉa'a. 
\p  
\v 41 Beyož gože' ḻegaque' ca' bene' mandadw besyežaše'. 
\c 20  
\s1 Pablon' gwyejche' distritw Macedonia na' nación Grecia 
\p  
\v 1 Nach cate' beyož gwche'ži da' zeden', Pablon' goxe' beṉe' Efeso ca' chesonxen Jesucriston' cont ja'aque' gan' zoe'na' na' bene' c̱hac̱h laže'gaque' cont yesenite' yesejnilaže' Jesucriston'. Nach gože' ḻegaque': “Nayežagcho”, na' goseyeḻa' ḻježe' na' beze'e beyeje' da' yoble distritw Macedonia.  
\v 2 Na' gwdie' to to yež da' zjachi' gaḻa'ze Macedonian' bene' c̱hac̱h laže' beṉe' ca' chesonxene' Jesucriston', na' beyožen' gwyejche' nación da' nzi' Grecia.  
\v 3 Na' gwzoe' Grecian' šoṉ bio'. Na' cate' bžin ža yeze'e, ba zoa yeyo'e ḻo' barcon' yeyeje' distritw Siria gan' nac laže' cate' gwṉezde' zjachi'nao' beṉe' Israel ca' ḻe'. Da'nan' bene' xbab yeza' ṉi'e yedie' gan' mbane distritw Macedonia na'le.  
\v 4-5 Na' x̱oṉj beṉe' ja'aque' ciuda da' nzi' Troas gan' gosebeze' Pablon' len neda' Lucas, na' gosa'aclene' neto' distritw Asia. Quinga zjale beṉe' ca': Sópater, beṉe' yež Berea, na' Aristarco len Segundo ben' zjanac beṉe' ciuda Tesalónica, na' Gayo beṉe' yež Derbe, na' Timoteon' na' c̱hope beṉe' za'ac distritw Asia, Tíquico len Trófimo.  
\v 6 Na' gwde ḻṉin' cate' chesagüe' yetextil da' bibi levadura nc̱hix̱en, neda' len Pablon' gwza'to' Filiposen' na' goc gayo' ža cate' bžinto' ciuda Troas gan' ba nita' beṉe' ca' chesebeze' neto', nach gwzoato' na'ze gaže ža. 
\s1 Can' goc šlac zoa Pablon' Troas 
\p  
\v 7 Na' cate' bžin ža dmigw besedobe beṉe' ca' chesonxene' Jesucriston' ḻo ciuda Troasen' na' gwyejto' güe'ej gwdagwto' txen len ḻegaque', na' Pablon' bzejni'ide' ḻegaque' xtiža' Diosen'. Na' dan' ba zoa yeza' Pablon' ca gwx̱eze nach be'e diža' bžinte do chel.  
\v 8 Na' yogo'to' ndop nžagto' to ḻo' yo'o de šoṉ cuia, yo'oto' ḻo' cuarten' dan' zoa yic̱hjen cha'te, na' zjaze da' zan yi' lámpara.  
\v 9 Na' to bi' güego' lebe' Eutico žiabe' cho'a ventan. Na' Pablon' toṉ zej diža' dan' cho'ena' na' gwtas bi'na' gan' žiabe' cho'a ventanṉa'. Na' šlac chtasbe' blažo'be' ḻo yo che'ele. Nach cate' besyecose'be' bi' guat besyecose'.  
\v 10 Nach Pablon' betje' bžine' gan' jasyedix̱jue'eben' na' bcheque' lao bi' guata' gwdeḻe'be'. Nach gože' beṉe' ca': 
\p ―Bi žeble, mbanczbe'. 
\p  
\v 11 Nach Pablon' begüe' da' yoble na' gosagüe' na' bezolagüe' cheyo'e diža' len ḻegaque'. Ṉe' choe'te' dižan' ca' cate' gwyeni'. Nach beze'e.  
\v 12 Nach bi'na' blažo' cho'a ventanṉa', beṉe' ca' že'na' besyec̱he'ebe' besyebechgüede' dan' mbanczbe'. 
\s1 Gosa'aque' ciuda Troasen' na' ja'aque' ciuda Mileto 
\p  
\v 13-14 Nach bxi'ato' len Pablon' neto' bebialaoto' beyejto' ḻo' barcw bežinteto' ciuda gan' nzi' Asón na' Pablon' gwyazlaže'che' begüe'e nez bela'te' Asónṉa' cont gwyo'e ḻo' barcon' txen len neto'. Nach gwyejto' ciuda gan' nzi' Mitilene.  
\v 15 Bezsa'to' Mitilenen' na' beteyo bežinto' gaḻa'ze to yežlio da' chi' ḻo' nisdaon' gan' nzi' Quío. Na' gwde yeto ža bežinto' gan' chi' yeto yežlio ḻo' nisdaon' da' nzi' Samos. Na' bechojto' ḻo' barcon' gwyejto' yež dan' nzi' Trogilio gan' bega'aṉto' tže' bezi'laže'to'. Nach beteyo bezyo'oto' ḻo' barcon' na' bežinto' ciuda Mileto.  
\v 16 Ca' bento' bi gwdeto' ciuda Efeson', ḻe Pablon' bi goclaže' šede' yež ca' zjachi' do distritw Asian'. Chacbyende' yob žine' Jerusalénṉa' še gaḻa' soe' na' ža lṉi dan' nzi' Pentecostés. 
\s1 Pablon' bšaḻjlene' beṉe' chosogüia cheseṉe'e beṉe' ca' chesonxen Jesucriston' Efeson' 
\p  
\v 17 Na' šlac zoato' ciuda da' nzi' Mileto Pablon' goxe' beṉe' Efeson' beṉe' chosogüia cheseṉe'e yezica'chle beṉe' ca' chesonxene' Jesucriston'.  
\v 18 Na' cate' besela'aque' Pablon' gože' ḻegaque': 
\p ―Ṉezele can' bena' caten' gwzoa' distritw Asia gan' zoa lažlen', bena' da' güen šlac gwzoa' len le'e gwzolaotia' ža nechw žan' bžina' na'.  
\v 19 Gwzoa' bena' xšin Diosen' na' bi benxen cuina'. Zan ṉi'a gwchežchgua' c̱hele. Na' da' zan da' bosoc̱hi bososaca' beṉe' Israel ca' neda'.  
\v 20 Bzejni'ida' le'e yogo' dan' byažje šejni'ile, ṉeca bezi'laža', bzejni'ida' le'e do gan' chdop chžagle na' len liž to tole.  
\v 21 Bzejni'ida' beṉe' zjanac beṉe' Israel gualaž c̱hia' lente beṉe' cbi zjanac beṉe' Israel can' chaclaže' Diosen' yesyetiṉje xtoḻa'gaquen' na' yesejnilaže' X̱ancho Jesucriston'.  
\v 22 Na' ṉa'a yeya'a Jerusalén, ḻe Spiritw c̱he Diosen' chonen byen yeya'a, na' bi ṉezda' bin' gac c̱hia' yežina' na'.  
\v 23 Con ṉezda' to to yež gan' ba bedia' Spiritw c̱he Diosen' ba bzejni'in neda' doḻa' gata' ḻižya na' gac bichle da' saca'zi'a.  
\v 24 Perw bi chi' yic̱hja' c̱he da' ca' saca'zi'a. Ḻa'czḻa' še yesote' neda', chzanda' yeḻa' mban c̱hia'. Toze da' chi' yic̱hja' ša'lao gona' yogo' dan' gwlo' X̱ancho Jesucriston' ḻo na' gona', na' soa' mbalaz ḻo' yic̱hjlažda'oguan' šlac chonan', ḻe X̱anchona' gwleje' neda' cont chyix̱jue'eda' diža' catequen' nži'ilaže' Diosen' beṉac̱hen'. 
\p  
\v 25 ’Ca nac le'e, ba bzejni'ida' le'e c̱he yeḻa' chnabia' c̱he Diosen', perw ṉa'a ṉe tole bich le'ele neda'.  
\v 26 Da'nan' chnia' le'e bibi doḻa' napa' še nole cuiayi'.  
\v 27 Bac̱h bzejni'ida' le'e yogo' dan' chaclaže' Diosen' ṉezele, bibi bcuaša'.  
\v 28 Da'nan' cheyaḻa' cuec yic̱hjle c̱he yogo'ḻoḻ dan' ba bzejni'ida' le'e na' ḻecze ca' ḻe gwsed ḻe gwlo'e yezica'chle beṉe' chesedop chesežag chesonxene' X̱ancho Jesucriston' cont yosozenague' c̱he dan' ba bzejṉi'ida'. Ḻe gon ca' ḻe Spiritw c̱he Diosen' ba gwlejen le'e cont gwzejni'ile yezica'chle beṉe' chesonxene'ne'. Jesucriston' bnežjw cuine' bedelaḻj xc̱hene' beque'e xtoḻa'chon' cont bozoe' chio' binḻo len Diosen' da' yoble.  
\v 29 Ṉezda' cate' bich zoa' len le'e yesela'ac beṉe' yese'nde' yesex̱oayague' le'e cont cuejyic̱hjle bich gwzenagle c̱he Jesucriston'.  
\v 30 Ladjw le'e yesechoj beṉe' yososed yosolo'ede' diža' güenḻaže' gualaz da' yososed yosolo'ede' diža' ḻi. Yesone' ca' cont ga'ole dan' yososed yosolo'e ḻegaque'.  
\v 31 Da'nan' ḻe gwsaca' cont nono yesex̱oayag le'e. Na' ḻe gon xbab, ḻe šoṉ izen' ba gwzoa' bzejni'ida' le'e na' gwṉeyoeda' le'e do ža do yel gwchežtia' c̱hele. 
\p  
\v 32 ’Na' ṉa'a beṉe' migw, Diosen' gaclene' le'e na' xtiže'na' gwzejni'ichen can' chacde' le'e. Na' xtiže'na' gaclenen le'e cont šjayzoalenḻe Diosen' txen len yezica'chle beṉe' ba gwlej Diosen' zjanaque' ḻo ne'e.  
\v 33 Bi chzelaža' bi da' de c̱he beṉe', ṉeca chzelaža' xmechwgaque' na' ṉeca xagaque'.  
\v 34 Ṉezczele can' bena' žin cont bžel da' byažjda' len da' beseyažje beṉe' ca' gosenite' len neda'.  
\v 35 Na' bena' žinṉa' ca' cont blo'eda' le'e cheyaḻa' gaclencho beṉe' še bi cheseyažjde'. Na' šjasa'laže'le can' gwna X̱ancho Jesúsen': “Mbalazech zoacho caten' chnežjwcho bi dan' chnežjwcho beṉe' clel ca caten' chesoṉe' chio' bi dan' chesoṉe' chio'.” 
\p  
\v 36 Na' beyož be' Pablon' dižan' nach bzoa xiben' txen len yogo' beṉe' ca' na' bosoḻ güiže' Diosen'.  
\v 37 Na' yogo'ḻoḻe' gosebeže' c̱he Pablon' na' goseyeḻe' ḻe' na' bosonope' ne'ena'.  
\v 38 Nach gosa'aque' len neto' bžinteto' gan' beyo'oto' ḻo' barcon'. Da' juisyw gosacde' dan' gože' ḻegaque' bich yesele'ede' ḻe'. 
\c 21  
\s1 Pablon' beyeje' Jerusalén 
\p  
\v 1 Beyož bze diža' ḻježto' len beṉe' ca' nach beyo'oto' ḻo' barcon' na' zjaydato' ḻicha bžinteto' gan' chi' to yežlio ḻo' nisdaon' da' nzi' Cos, na' beteyon' bežinto' gan' chi' yeto yežlio ḻo' nisdaon' da' nzi' Rodas, nach bezsa'to' bezžinto' ciuda Pátara.  
\v 2 Na' cate' bežinto' Pátaran' bželeto' yeto barcw dan' chzan' šejen distritw Fenicia, na' beyo'oto' ḻo'enṉa'.  
\v 3 Na' ba zjaydato' ḻo' barcon' cate' ble'eto' yežlio dan' chi' ḻo' nisdao' dan' nzi' Chipre, chin' šḻa'a rovesle. Nach bedeto' zjaydato' gan' mbane distritw Siria. Nach cate' bezžinto' ciuda gan' nzi' Tiro besyeḻetje' yoa' da' zonsa' barcon' na' neto' bechojto' ḻo' barcon'.  
\v 4 Na' jaydiljwto' beṉe' ca' chesonxene' Jesucriston' Tiron' na' bega'aṉlento' ḻegaque' to xman. Na' Spiritw c̱he Diosen' bzenen ḻegaque' cont gosata'yoede' Pablon' bi šeje' ciuda Jerusalénṉa'.  
\v 5 Perw na' cate' ba gwde to xman beza'to', na' yogüe' len xi'iṉgaque' len xo'olgaque' gosa'aque' len neto' cho'a yežen' na' bzoa xibto' len ḻegaque' boḻ güižto' Diosen' cho'a nisdaon'.  
\v 6 Beyožen' bze diža' ḻježto' na' gwdeḻa' ḻježto', nach beyo'oto' ḻo' barcon' na' ḻegaque' besyeya'aque' zjaya'ac ližgaque'. 
\p  
\v 7 Na' beza'to' ciuda Tiron' bežinto' gan' že' ciuda Tolemaida. Nach beyetjto' ḻo' barcon' jayṉa'to' beṉe' ca' chesonxene' Jesucriston' ḻo ciuda Tolemaidan' na' bega'aṉlento' ḻegaque' tža.  
\v 8 Na' beteyo beza'lento' Pablon' na' bežinto' Cesarean' na' jayga'aṉto' liž Felipe ben' naque' txen len beṉe' ca' yex̱op ben' chesaclene' postlw ca' len žin bixjw da' gota'. Na' Felipen' zoateze' cho'e diža' c̱he Jesucriston'.  
\v 9 Felipen' nita' tap xi'iṉe' no'ol güego' na' chosozende' beṉe' bi dan' ba gož Diosen' ḻegaque'.  
\v 10 Zan ža ba gwzoato' liž Felipen' cate' bla' to beṉe' distritw Judean' beṉe' le Agabo, ḻecze chaque' chzende' beṉe' bi dan' ba gož Diosen' ḻe'.  
\v 11 Nach Agabon' gwṉabe' xpant Pablon' na' bc̱hejen' ṉi'a ne'e, na' gože' neto': 
\p ―Spiritw c̱he Diosen' ba bzenen neda' beṉe' Israel ca' že' Jerusalénṉa' yosoc̱heje' ṉi'a na' ben' nac c̱he' bant nga na' yesone' ḻe' ḻo na' beṉe' ca' bi zjanac beṉe' Israel. 
\p  
\v 12 Cate' beyož beneto' can' gwna Agabon', neto' len beṉe' Cesarea ca' gota'yoeto' Pablon' bi šeje' Jerusalénṉa'.  
\v 13 Nach Pablon' gwne': 
\p ―Bi cuežle c̱hia' o gonḻe ga soayaša'. Chzane cuina' yosoc̱heje' neda' na' yesote' neda' Jerusalénṉa' dan' chyix̱jue'eda' xtiža' X̱ancho Jesúsen'. 
\p  
\v 14 Na' cate' gocbe'eto' bibi gac gonto' cont cbi šeje' ciuda Jerusalénṉa', nach bich bi gožto'ne', con gwnato': 
\p ―Gac con can' ža X̱anchon'. 
\p  
\v 15 Nach bsiṉi'ato' beza'to' zjaydato' Jerusalén.  
\v 16 Na' to c̱hope beṉe' Cesarean' beṉe' chesonxen Jesucriston' gosa'aque' txen len neto', na' gosec̱he'e neto' liž to beṉe' le Mnasón. Bena' ba goc sša chonxene' Jesucriston'. Naque' beṉe' Chipre, perw ba zoa liže' Jerusalénṉa'. Na' ba bosoxi'e soato' liže'na'. 
\s1 Pablon' bežine' Jerusalénṉa' jaṉe'e Jacobon' 
\p  
\v 17 Na' cate' bežinto' ciuda Jerusalénṉa' beṉe' ḻježto' ca' že'na' besyebede' bosoguape' neto' tiox.  
\v 18 Na' beteyo gwyejlento' Pablon' jaṉa'to' Jacobon', na' bžinto'na' ba zjandop zjanžag yogo' beṉe' blao ben' chosogüia cheseṉe'e yezica'chle beṉe' ca' chesonxene' Jesucriston' na'.  
\v 19 Nach Pablon' bguape' ḻegaque' tiox na' beyožen' be'lene' ḻegaque' diža' doxen can' ba ben Diosen', ḻe zan beṉe' bi zjanac beṉe' Israel ba chesonxene' Jesucriston' gan' ba gwyeje' je'lene' ḻegaque' xtiža' Diosen'.  
\v 20 Na' cate' bosozenague' dan' gož Pablon' ḻegaque', nach goso'e yeḻa' chox̱clen c̱he Diosen' na' gose'e Pablon': 
\p ―Beṉe' migw, ṉezdo' zan mil beṉe' Israel gualaž c̱hecho ca' ba chesonxene' Jesucriston' na' yogüe' chesacde' chonen byen goncho yogo' da' ca' zjanyoj ḻe'e ley c̱hechon' dan' bzoj Moisés.  
\v 21 Na' zane' ba zjanende' chsed chlo'edo' beṉe' Israel gualaž c̱hechon' nita' laž beṉe' zito' bich cheyaḻa' yesone' can' ža ḻe'e ley c̱hechon' na' bi yesezoa' xi'iṉgaque' ca' señw dan' že' circuncisión.  
\v 22 ¿Nacxe ye'to' ḻegaque'? ḻe zane' yesežag nga cate' yesende' bac̱h zo' nga da' yoble.  
\v 23 Güen goncho quinga: nita' tap beṉe' nga beṉe' zoa to da' zjango'o cho'en lao Diosen' na' chesaclaže' yesone' can' gosenen'.  
\v 24 Na' cheyaḻa' c̱hi'o ḻegaque' yodao' blaon' na' gono'ne' txen c̱hixjo' beyix̱e' ca' gwnežjwle bx̱ozen' gote' cont yexi' yeyachle can' ža leyna'. Na' yeyožen' gac yosošib yic̱hjgaque' can' zjango'o cho'en. Gono' ca' len ḻegaque' cont yogo' beṉe' yesacbe'ede' bi chzo' ley c̱hechon' to šḻa'ale can' chesenen', san chono' can' žanṉa'.  
\v 25 Na' ca nac beṉe' ca' bi zjanac beṉe' Israel beṉe' ca' chesonxene' Jesucriston' yež yoble, ba bzojto' ḻegaque' can' nac yeḻa' güexi'a c̱hechon', gožto'ne' bi yesagüe' yeḻa' guagw dan' chesene' naquen c̱he ḻ gua'a ḻsacan' chesejnilaže' beṉe', na' bi yesagüe' chen, na' bi yesagüe' be chat chosošoque' ḻba'ba', ḻecze bi yesata'lene' no'ole bi nac xo'olgaque' o beṉe' byo bi nac beṉe' c̱hegaque'. 
\s1 Gosezene' Pablon' yodao' blaona' 
\p  
\v 26 Beteyo gwza' Pablon' gwc̱he'e beṉe' ca' tap cont yesyexi yesyeyache' yodao' blaona' can' ža' ley c̱hegaque'na'. Nach Pablon' gwyo'e gana' zoa bx̱ozen' gwdix̱jue'ede' ḻe' bi ža yaṉen' yeyož yesaque' xi'laže' cont yosonežjue' beyix̱e' ca' gote' c̱he to to ḻegaque'. 
\p  
\v 27 Bac̱h zoa gac gaže ža chesone' can' ža leyna' cont chesyexi chesyeyache', nach gozej Pablon' ḻo' yodao' blaona'. Na' baḻ beṉe' Israel ca' za'ac distritw Asian' besele'ede' ḻe' ḻo' yodaon' na' gosego'oyeḻe' beṉe' že' do na' cont yesezene' Pablon'.  
\v 28 Bososya'adie', gosene': 
\p ―Le'e beṉe' gualaž, ḻe gon txen sencho benga. Chde' doxen chsed chlo'ede' contr yež Israel c̱hechon', na' contr ley c̱hechon' dan' bzoj da' Moisésen', na' contr yodao' c̱hecho nga. Na' ṉa'a ba none' yeto da' mal juisyw contr yodao' dan' nac c̱he Dios c̱hechon', ba gwlo'e beṉe' bi zjanac beṉe' Israel ḻo'enṉa'. 
\p  
\v 29 Gosene' ca' ṉec̱he da' besele'ede' Pablon' ḻo ciudan' chdalene' to beṉe' ciuda Efeso le' Trófimo, na' gosacde' še Pablonan' gwc̱he'e ḻe' ḻo' yodao'na', ḻa'czḻa' bi bene' ca'. 
\p  
\v 30 Na' gosonchgüe' to žašyey. Ḻa' besedobte beṉe' zan cho'a yodaon' na' goso'e ḻo' yodaon' goseṉize' Pablon', besyebeje' ḻe' na' ḻa' bosyoseyjwte' puert ca'.  
\v 31 Na' ba zoa yesote' ḻe' cate' gwṉeze ben' yo'o ḻo ne'e soldadw c̱he nación Roma ben' že' ḻo ciudan'. Cate' gwṉezde' ba chac to žašyey juisyw doxen ciudan',  
\v 32 nach btobe' soldadw ca' len beṉe' gwnabia' c̱hegaque' ca', na' gosa'aque' zja'acsese' gan' chi' da' zeda'. Na' cate' beṉe' ca' chesote' Pablon' besele'ede' ba besežin soldadw ca' len beṉe' gwnabia' c̱hegaque' ca', ḻa' gosebezte' bich goseyine' Pablon'.  
\v 33 Cate' ben' yo'o ḻo' ne'e yogo' soldadon' bžine' gan' že' beṉe' ca', na' bene' mandadw gosox̱e' soldadw c̱he' ca' Pablon' na' bosoc̱heje' ḻe' c̱hope gden. Nach gwṉabde' beṉe' ca' že'na' no nac Pablon' na' bi bene'.  
\v 34 Na' beṉe' ca' že'na' bososya'adie', gwde gwdele chesena to toe'. Na' gwde cbi gwyejni'i ben' yo'o ḻo' ne'e soldadw ca' bin' chac catec sšag chesone', nach bene' mandadw gosec̱he'e Pablon' cuartel.  
\v 35-36 Nach yogo' beṉe' ca' zjana'ogüe' ḻegaque' chesosye'e zjambeque' to žaš juisyw. Na' cate' besežine' cho'a nepe' c̱he cuartelen' goseḻen soldadw ca' Pablon' ṉec̱he dan' chesaclaže' beṉe' ca' yeseṉize' ḻe', na' yogo' beṉe' ca' chesosye'e, chesene': 
\p ―Ḻe gote'. 
\s1 Pablon' be'lene' beṉe' zan ca' diža' 
\p  
\v 37 Bac̱h cheso'e ḻo' cuartelen' cate' Pablon' gože' ben' yo'o ḻo' ne'e soldadw ca': 
\p ―¿Goṉo' latje gua' to c̱hope diža'? 
\p Nach bena' gože'ne': 
\p ―¿Chaco' diža' griego?  
\v 38 ¿Bi naco' beṉe' nación Egipto ben' gwda btob tap mil beṉe' güet beṉe' bat ngaze na' gwc̱he'e ḻegaque' latje dašen' gan' chesone' contr gobiernen'? 
\p  
\v 39 Nach Pablon' gože'ne': 
\p ―Gague benan' neda'. Neda' naca' to beṉe' Israel na' ciuda blao gan' mbane distritw Cilician' dan' nzi' Tarso nac laža'. Ben goclen beṉ latje güe'lena' beṉe' quinga diža'. 
\p  
\v 40 Nach bena' bnežjue' latje. Nach Pablon' gwzeche' ḻo nepen' bene' señw len ne'e cont beṉe' ca' že'na' gosenite' šize bosozenague' c̱he'. Nach gwzolagüe' be'e diža' len ḻegaque' diža' hebreo. 
\c 22  
\p  
\v 1 Gože' ḻegaque': 
\p ―Beṉe' gole len beṉe' xcuide', ḻe gwzenag diža' dan' gua' laole nga. 
\p  
\v 2 Na' cate' gosacbe'ede' chṉe' ḻegaque' diža' hebreo gosenite' šize. Nach Pablon' gože' ḻegaque': 
\p  
\v 3 ―Neda' naca' beṉe' Israel. Golja' ciuda Tarso gan' mbane distritw Cilicia, perw gwcha'ogua' ciuda Jerusalén ni. Na' bseda' len maestrw blao ben' le Gamaliel. Bzejni'ide' neda' doxen can' ža ley c̱he da' x̱ozxta'ocho ca'. Na' gocda' chonchgua' can' chazlaže' Diosen', cayaṉen' chaque le'e za'acle nga ṉa'a.  
\v 4 Na' bc̱hi bsaca' zan beṉe' ca' chesejnilaže' Jesucriston', goclaža' gotto' ḻegaque'. Na' gwxena' no beṉe' byo na' no no'ole chesonxene' ḻe' na' gwc̱he'egaca'ne' ḻižya.  
\v 5 Bx̱oz ben' naquech beṉe' blao na' nochle beṉe' gole blao ca' chesenabia' nación Israel c̱hechon' zjaṉezde' can' bena'. Ḻegaque' gosone' yiš dan' bex̱ua' gwya'a ciuda Damascon' gan' gocda' sena' baḻtez beṉe' chesonxen Jesucriston' cont c̱he'egaca'ne' Jerusalén ni par gonto'ne' castigw. 
\s1 Pablon' cho'e diža' can' goc c̱he' cate' Diosen' bocobe' yic̱hjlažda'ogüe' 
\r (Hch. 9:1-19; 26:12-18) 
\p  
\v 6 ’Na' šlac zya'a ciuda Damascon' ca do guagwbiž cate' to be'ni' gual da' za' yaba gwyec̱hjen neda'.  
\v 7 Na' gwbix̱a' ḻo yon' benda' to beṉe' gože' neda': “Saulo, Saulo ¿bixc̱hen' chc̱hi chsaco' neda'?”  
\v 8 Nach boži'a xtižen', goša'ne': “¿No le' beṉe'?” Nach gwne': “Nedan' Jesús beṉe' Nazaret na' neda' chc̱hi chsaco'.”  
\v 9 Beṉe' ca' zya'alena'na' besežebchgüe' besele'ede' be'nin', perw bi gosejni'ide' dan' gož Jesúsen' neda'.  
\v 10 Nach goša'ne': “¿Bin' cheyaḻa' gona' X̱ana'?” Nach X̱ana' Jesúsen' gwne': “Beyas na' gwyejteze ciuda Damascon', na' cate' žino'na' to beṉe' ye'e le' dan' cheyaḻa' gono'.”  
\v 11 Na' gwc̱hoḻa' catec gwṉa'chgua' be'nin', nach beṉe' ca' zya'alena' txen gosox̱e'de' taca' cont bžinto' Damascon'. 
\p  
\v 12 ’Na' to beṉe' le Ananías zoe' ciuda Damascon' ben' chonxene' Diosen' do yic̱hj do laže' na' chzenague' c̱he yogo' ley dan' bzoj Moisésen'. Na' yogo'ḻoḻ beṉe' gualaž c̱hecho ca' že'na' cheso'e xtiža' Ananíasen' naque' beṉe' chon da' güen.  
\v 13 Ananíasna' bide' gan' zoan' na' cate' ble'e nach gože' neda': “Saulo, bele'e.” Na' beyož gwne' ca' ḻa' bele'eteda' na' ble'eda' ḻe'.  
\v 14 Nach gože' neda': “Dios ben' chonxencho na' ben' benxen da' x̱ozxta'ocho ca', ḻen' ba gwleje' le' cana'te cont ṉezdo' can' chaclaže' gono', na' ba ble'edo' Xi'iṉe' ben' nac ḻa'zelagüe beṉe' chon da' güen, na' ba bendo' xtiže'.  
\v 15 Nachen' go'o xtižen' len beṉe' zan beṉe' že' ḻo yežlion' gwzejni'igacdo'ne' da' ca' ba bendo' na' ba ble'edo'.”  
\v 16 Na' ḻecz gož Ananíasen' neda': “¿Bic̱hen' cuezo'? Yo'o so' nis. Na' ṉabdo' X̱ancho Jesucriston' cont yeya' yeyibe' yic̱hjlažda'oguon' len da' malen'.” Can' gože' neda'. 
\s1 Diosen' gwleje' Pablon' cont be'e xtižen' len beṉe' ca' bi zjanaque' beṉe' Israel 
\p  
\v 17 ’Na' gwdena' beyeda' ciuda Jerusalén ni na' gwya'a ḻo' yodao' blaon' jeḻ güiža' Diosen', na' šlac choḻ güiža'ne' ble'edagüeda' X̱ancho Jesucriston'.  
\v 18 Na' X̱anchon' gože' neda': “Bi šedo' chojo' ciuda Jerusalén ni, ḻe bi yosozenag beṉe' quinga xtižo' dan' go'o c̱hian'.”  
\v 19 Nach goša'ne': “X̱ana', ḻegaque' zjaṉezde' neda' gwya'a to to yodao' jet jatina' beṉe' ca' chesonxene' le' na' bseyjwgaca'ne' ḻižya.  
\v 20 Na' ḻecz naca' beṉe' ca' txen cate' gosote' Esteban ben' be' xtižon', na' neda' gwṉa'a xadoṉ c̱he beṉe' ca' gosot ḻe'.”  
\v 21 Nach X̱ancho Jesucriston' gože' neda': “Bchoj na' seḻa' le' zito' go'o xtižan' len beṉe' ca' bi zjanac beṉe' Israel.” 
\s1 Pablon' len ben' yo'o ḻo ne'e soldadw ca' 
\p  
\v 22 Beṉe' ca' zjandoben', nga zelao bosozenague' xtiža' Pablon', beseže'e da' be'e diža' c̱he beṉe' zito' beṉe' bi zjanac beṉe' Israel, nach gosezolagüe' chososye'e, chesene': 
\p ―Ḻe got bena'. Bich cheyaḻa' bane'. 
\p  
\v 23 Bososya'adie' na' beselocchgüe' bosozaḻa' xagaque' ca'ale na' gosaše' bište yon' bosozaḻen' ḻo be'.  
\v 24 Cate' ble'e ben' yo'o ḻo ne'e soldadw ca' can' chesonen' nach bene' mandadw gosego'o soldadw ca' Pablon' ḻo' cuartelen' na' yeseyine'ne' cont güe'e diža' bi da' malen' ba bene'. Goclaže' ṉezde' bic̱hen' beṉe' ḻo ciudan' chososya'adie' c̱he'.  
\v 25 Na' ba zjanc̱heje' Pablon' cont yeseyine' ḻe' cate' gože' to soldadw ben' zena' beṉe' chnabi'e ḻao to gayoa soldadw: 
\p ―Can' ža ley, bi de ḻsens c̱hinḻe neda' sin cbi ṉezele še bin' nona', ḻe neda' naca' beṉe' nación Roma. 
\p  
\v 26 Beyož gože' beṉe' gwnabia' c̱he soldadon' ca' ḻa' gwyejte ben' lao ben' yo'o ḻo ne'e yogo' soldadw ca', ježe'ne': 
\p ―Gwsaco' bin' gondo' ben' ba bdoḻan', ḻe naque' beṉe' nación Roma. 
\p  
\v 27 Nach ben' yo'o ḻo ne'e soldadw ca' gwyeje' lao Pablon' gože'ne': 
\p ―Gwna neda' ¿ḻe beṉe' nación Roma le'? 
\p Nach Pablon' gože'ne': 
\p ―Beṉe' nación Roma neda'. 
\p  
\v 28 Nach ben' yo'o ḻo ne'e yogo' soldadw ca' gože' Pablon': 
\p ―Mechw xen gwxaqueda' cont naca' cuent len beṉe' nación Roman'. 
\p Nach Pablon' gože'ne': 
\p ―Neda' golja' naca' beṉe' nación Roma. 
\p  
\v 29 Nach beṉe' ca' ba nita' cont yeseyine' Pablon' ḻa' besyecuaste' cuiten', na' ben' yo'o ḻo ne'e yogo' soldadw ca' ḻecze bžebe' dan' ba bc̱heje' Pablon' cont yeseyine'ne'. 
\s1 Goseseḻe' Pablon' gan' chosoxi'a beṉe' ca' chesenabia' Israelen' 
\p  
\v 30 Nach beteyo ben' yo'o ḻo ne'e soldadw ca' gwseže' gdenṉa' nchej Pablon'. Na' bene' mandadw besedobe bx̱oz gwnabia' ca' len yogo' beṉe' gole blao ca' chesenabia' nación Israelen' cont ṉezde' bi dan' chosocuiše' Pablon'. Na' cate' ba besedobe beṉe' ca' nach gwleje' Pablon' na' gwseḻe' ḻe' gwzeche' laogaquen'. 
\c 23  
\p  
\v 1 Nach Pablon' gwṉe'e beṉe' gole blao ca' chesenabia' nación Israelen' na' gože' ḻegaque': 
\p ―Beṉe' migw, ža ṉa'aža ṉezda' ḻo' lažda'ogua' ba bena' can' chazlaže' Diosen'. 
\p  
\v 2 Nach Ananías ben' nacch bx̱oz blao bene' mandadw len beṉe' ca' zjaze cuit Pablon' yesebaže' cho'ena'.  
\v 3 Na' Pablon' gože'ne': 
\p ―¡Diosen' gone' le' castigw, beṉe' güex̱oayag! Chi'o nga cont gono' yeḻa' justis c̱hia' can' ža ley c̱hechon' na' chono' contr ley beno' mandadw yesebaže' choa'. 
\p  
\v 4 Beṉe' ca' že' gaḻa'ze gose'e Pablon': 
\p ―Bi cheyaḻa' yoži'o xtižen' ca', ḻe naque' bx̱oz blao c̱he Dios. 
\p  
\v 5 Nach Pablon' boži'en gwne': 
\p ―Beṉe' migw, bi gwṉezda' še benga bx̱oz blaon'. Ṉezda' Xtiža' Diosen' dan' nyojen žan: “Bi yoži'ile diža' zi' len beṉe' gwnabia' c̱helen'.” 
\p  
\v 6 Pablon' gocbe'ede' beṉe' ca' chesenabia' nación Israelen' zjanaque' c̱hople. Baḻe' chesejḻe'e can' chsed chlo'e beṉe' ca' zjansi'e saduceo na' yebaḻe' can' chsed chlo'e beṉe' ca' zjansi'e fariseo. Nach Pablon' gože' beṉe' ca' že'na': 
\p ―Beṉe' migw, naca' beṉe' fariseo, na' naca' xi'iṉ beṉe' fariseo. Na' zoa' nga chonḻe yeḻa' justis c̱hia' ṉec̱he chejḻi'a yesyeban beṉe' guat ca'. 
\p  
\v 7 Beyož gwne' ca' beṉe' fariseo ca' len beṉe' saduceo ca' ben' zjandop zjanžag na' gosezolagüe' chosošaše', na' besechoje' c̱hople.  
\v 8 Ḻe beṉe' saduceo ca' chesene' bi yesyeban beṉe' guat ca' na' bi chesejḻe'e nita' angl o nochle spiritw yoble. Na' beṉe' fariseo ca' chesejḻe'e yesyeban beṉe' guat ca' na' chesejḻe'e nita' angl na' nita' nochle spiritw.  
\v 9 Yogo' ben' že'na' chesosye'e chosošaše'. Nach to c̱hope beṉe' zjansed ley dan' bzoj Moisésen', ben' zjanac beṉe' fariseo, gosezože'e gosone' Pablon' txen, gosene': 
\p ―Bibi da' mal non benga. Še no spiritw o no angl ba gwṉelen ḻe', bi cheyaḻa' goncho contr ḻe', ḻe contr Diosen' goncho še ca'. 
\p  
\v 10 Ḻeca gwche' to žaš xen na' ben' yo'o ḻo ne'e yogo' soldadw ca' bžebe' še yosozoxj yosotine' Pablon'. Nach bene' mandadw besežin soldadw c̱he' ca' cont jasyeleje' Pablon' ladjo beṉe' ca' na' besyec̱he'ene' cuartelen' da' yoble. 
\p  
\v 11 Nach že' beteyon' X̱ancho Jesucriston' bžine' gan' de Pablon' na' gože'ne': 
\p ―Bi žebo' Pablo. Can' ba bi'o xtižan' Jerusalén ni, ḻecz ca' cheyaḻa' go'o xtižan' ciuda Roma. 
\s1 Bosoxi'e yesote' Pablon' 
\p  
\v 12 Na' beteyo baḻ beṉe' Israel besedobe' na' bosoxi'e yesote' Pablon'. Na' gosec̱hogbi'en, gosene': 
\p ―Diosen' goṉe' chio' castigw še ye'ej gagwcho sin cbiṉa' gotcho Pablon'. 
\p  
\v 13 Nde c̱hoa beṉe' bosoxi'e yesote' Pablon'.  
\v 14 Nach ja'aque' gan' že' bx̱oz gwnabia' ca' len beṉe' gole beṉe' blao ca' chesenabia' nación Israelen' na' gose'e ḻegaque': 
\p ―Bac̱h gwc̱hogbia'to' goṉ Diosen' neto' castigw še ye'ej gagwto' sin cbiṉa' gotto' Pablon'.  
\v 15 Na' ḻe yotobe ḻježle ḻe gon yeḻa' güexi'a gwx̱e cont ṉabele ben' yo'o ḻo ne'e yogo' soldadw ca' cueje' Pablon' yide' laolen', gwde'ele za' yeyiḻjwyožechle bi da' xiṉj ba none'na'. Na' neto' cue'na'oto'ne' tnez gotto'ne' cate' za' le'e gan' nita'len'. 
\p  
\v 16 Na' zoa to bi' byo bi' nac xi'iṉ beṉe' zan Pablon' na' ḻebe' benebe' da'na' chesacde' yesonde' ḻe'. Na' gwyejbe' cuartelen' jazenebe' Pablon'.  
\v 17 Nach Pablon' goxe' to beṉe' chnabi'e to gayoa soldadw na' gože'ne': 
\p ―Ben goclen gwc̱he' bi' nga lao beṉe' gwnabia' c̱helen'. De to da' ye'be' ḻe'. 
\p  
\v 18 Beṉe' gwnabia' c̱he soldadon' gwc̱he'e bi'na' lao ben' yo'o ḻo ne'e yogo' soldadw ca' na' gože' ḻe': 
\p ―Pablo ben' de ḻižya goxe' neda' na' gwṉabe' goclen lagua' cont zedesana' bi' nga laguon', že' de to da' ye'be' le'. 
\p  
\v 19 Nach ben' yo'o ḻo ne'e yogo' soldadw ca' bex̱ue' na'be' gwc̱he'ebe' to šḻa'ale gwṉabde'be': 
\p ―¿Bi che'ndo' ṉao' neda'? 
\p  
\v 20 Nach bi'na' gožbe' ḻe': 
\p ―Beṉe' blao c̱he beṉe' Israel gualaž c̱heto' ca' ba bosoxi'e yeseṉabe' cuejo' Pablon' gwx̱e na' yosode'ede' seḻo'ne' gana' chesežag beṉe' gwnabia' c̱hegaquen' cont yeseyiljwyože' bi da' xiṉj non Pablon'.  
\v 21 Perw bi šejḻi'o c̱hegaque'. Nde c̱hoa beṉe' ca' yesebe'na'ogüe' Pablon' tnez cont yesote' ḻe' na' ba gosec̱hogbi'en bibi yese'ej yesagüe' šlac biṉa' yesote'ne'. Na' ba chesebeze' gwzenago' c̱hegaque' cont cuejo' Pablon'. 
\p  
\v 22 Nach ben' yo'o ḻo ne'e soldadon' bose'e bi'na' na' gože'be': 
\p ―Gwsaco' bi go'o diža' c̱he rsonṉa' ba bedesano' lagua' nga. 
\s1 Goseseḻe' Pablon' lao gobernador ben' le Félix 
\p  
\v 23 Nach ben' yo'o ḻo ne'e yogo' soldadw ca' goxe' c̱hope beṉe' gwnabia' ben' chesenabia' to gayoa güeje soldadw na' bene' mandadw yososiṉi'a c̱hegaque' cont šja'aque' ciuda Cesarea do cheda ga šeže'le na' yesec̱he'e c̱hop gayoa soldadw beṉe' yesa'ac ṉi'aze na' gayonši beṉe' yesebia cabayw na' yec̱hop gayoa soldadw beṉe' yesox̱e' lanza.  
\v 24 Ḻecze gože' ḻegaque' chyažje cabayw be cuia Pablon', ḻe ḻe'na' yesec̱he'e gana' zoa gobernadoren' ben' le Félix, na' yesape' Pablon' cont bibi gac c̱he' tnez.  
\v 25 Nach bzoje' to cart c̱he gobernadoren' da' bgox̱e' ḻegaque', žan: 
\p  
\v 26 “Señor Gobernador: Neda' Claudio Lisias chzoja' ḻe' gobernador Félix, nacteco' beṉe' blao, chguapa' le' tiox.  
\v 27 Beṉe' Israel ca' ba gosezene' benga na' ba bosoxi'e yesote'ne', perw cate' gwṉezda' naque' beṉe' nación Roma, gwya'a len soldadw c̱hia' ca' jasla'ne' ḻo na'gaquen'.  
\v 28 Na' cont ṉezda' bic̱hen' chosocuiše' ḻe', gwc̱hi'ane' gan' chosoxi'a beṉe' gwnabia' c̱he nación Israelen'.  
\v 29 Nach gwṉezda' chosocuiše' ḻe' c̱he bize da' chesac c̱he' len ley c̱hegaque'na', na' bi ṉacho bi da' mal ba none' cont yesote' ḻe' o cont gate' ḻižya.  
\v 30 Perw na' ba gwṉezda' ba bosoxi'a beṉe' Israel ca' yesote' ḻe', da'nan' ḻa' chseḻa'tia'ne' laguo' le' na' ḻecze bena' mandadw len beṉe' ca' chosocuiš ḻe' šja'aque' laguo' na' yesene' bin' chesac c̱hegaque' len ḻe'. Si'xenšco' yogo' da' quinga chṉeyoeda' le'. Claudio Lisias.” 
\p  
\v 31 Nach soldadw ca' gosone' can' ben beṉe' gwnabia' c̱hegaquen' mandadw, besyebeje' Pablon' na' šeže'le gosegüe'e nez len ḻe' besežine' yež da' nzi' Antípatris.  
\v 32 Na' cate' gwyeni' besyebi'i soldadw ca' ja'ac ṉi'aze' jaya'aque' cuartelen' na' beṉe' ca' gosebia cabayon' ja'aclene' Pablon'.  
\v 33 Na' cate' besežine' ciuda Cesarean' bosonežjue' gobernadoren' carten' zjanox̱e'na' na' ḻecz gosone' Pablon' ḻo ne'e.  
\v 34 Na' gobernadoren' cate' beyož blabe' carten' gwṉabde' Pablon' ga beṉe' naque'. Na' cate' gwṉezde' naque' beṉe' distritw Cilicia,  
\v 35 nach gože'ne': 
\p ―Gwzenaga' bin' ṉao' cate' yesela'ac beṉe' ca' chosocuiš le'. 
\p Nach bene' mandadw bososeyjue' Pablon' ḻo' yo'o gan' chbe' rey Herodesen' cate' chone' yeḻa' justis. 
\c 24  
\s1 Pablon' be'e diža' lao gobernador Félix 
\p  
\v 1 Cate' bac̱h goc gayo' ža zoa Pablon' ciuda Cesarean', nach bžin Ananías ben' nac bx̱oz blaoch c̱he beṉe' Israelen' na' nc̱he'e to c̱hope beṉe' gole blao c̱hegaque' na' len to beṉe' le Tértulo ben' chac chṉe' lao beṉe' gwnabia'. Na' ja'aque' lao gobernadoren' gosagüe' xya c̱he Pablon'.  
\v 2 Na' cate' jasexi'e Pablon', Tértulon' gwdagüe' xya c̱he', gože' gobernador Félixen': 
\p ―Si'xeno', señor gobernador, za'to' laguo' nga. Binḻo juisyw zoa nación c̱hechon' na' da' zan da' šagüe' ba chac da' chnabi'o neto'.  
\v 3 Gate'tez zoato' žato' chox̱cleno' can' chono'na', señor gobernador, catec chbeto' can' chnabi'ona'.  
\v 4 Na' cont bi goneto' le' bichle zed, chata'yoeda' le' gwzenago' šlož dao' dan' zedeṉato' ṉa'a.  
\v 5 Ben' ba goxo' laguo' nga, ṉezeto' naque' to beṉe' chbecchgua da' zed. Chde' doxen yežlion' chone' cont neto' beṉe' Israel chacto' c̱hople. Na' naque' beṉe' blao len beṉe' ca' chesene' beṉe' nazareno lagüe chesejnilaže' Jesús ben' nac beṉe' yež Nazaret.  
\v 6 Na' goclaže' gone' da' mal juisyw ḻo' yodao' c̱heton' na' da'nan' gwzento'ne' cont c̱hogbia'to' c̱he' con can' ža ley c̱heton'.  
\v 7 Perw na' gwyaz Lisiasen' ben' nac beṉe' gwnabia' c̱he soldadw ca' na' beque'ene' ḻo na'ton'.  
\v 8 Na' gože' neto' cheyaḻa' yidto' laguo' nga cont gwcuišto'ne'. Guac ṉabdo' Pablon' cuino' cont ṉezdo' nac da' ḻi can' chcuišto'ne' nga. 
\p  
\v 9 Nach beṉe' Israel ca' za'aclene' Tértulon' gosaque' toze len ḻe' gosene' ḻe can' naquen.  
\v 10 Nach gobernadoren' bene' señw len Pablon' cont ṉe', na' Pablon' gwzolagüe' gwne': 
\p ―Ṉezda' ba goc zan iz chono' yeḻa' justis c̱he nación ni, na' da'nan' chbeda' gwzoa' rson c̱hian' laguon'.  
\v 11 Ṉa'a chac šižiṉw ža gwya'a Jerusalénṉa' jenxena' Diosen'. Na' guac ṉabdo' beṉe' ca' besele'e neda' še ḻeca' naquen.  
\v 12 Bi ṉacho besele'ede' chacyoža' len no beṉe' ḻo' yodao' blaon' ṉe ḻo' yodao' yoble o gate'teze ḻo ciudan'.  
\v 13 Na' bibi gac yeson beṉe' quinga cont yosolo'e napa' doḻa' ca dan' chosocuiše' neda'.  
\v 14 Bi gwcuaša' diža', da' ḻi chonxena' Diosen' ben' gosonxen da' x̱ozxta'oto' ca', ḻa'czḻa' chonxena'ne' can' cheson beṉe' ca' zjanao' da' cobe dan' bi chesazlaže' beṉe' quinga, na' chejḻi'a c̱he yogo'ḻoḻ Xtiža' Diosen' dan' nyoj ḻe'e ley c̱heton' na' da' ca' bosozoj beṉe' ca' goso'e xtiža' Diosen' cani'.  
\v 15 Na' zoa' lez yosban Diosen' beṉe' ca' ba gosat, beṉe' güen lente beṉe' mal. Lencze beṉe' gualaž c̱hia' can' nite' lez gon Diosen' ca'.  
\v 16 Da'nan' zoa' chi' yic̱hja' chona' can' chaclaže' Diosen' ṉec̱he ṉezda' ḻo' yic̱hjlažda'ogua' bibi doḻa' napa' lao Diosen' ṉe lao beṉac̱hen'. 
\p  
\v 17 ’Ba goc zan iz zoa' zito' na' za' bela'a Jerusalénṉa' ṉa'a cont bnežjua' mechw da' btoba' da' gaclenen beṉe' yaše' ca', na' ḻecz ca' jasana' yelaten' ḻo' yodao' blaon'.  
\v 18 Ca' goquen' zoa' ḻo' yodao' blaon' ba bexi beyacha' can' cheyaḻa' gacto' cont chnežjwto' bi dan' chnežjwto' lao Diosen', cate' to c̱hope beṉe' Israel za'ac Asia besele'e gan' zoa'na'. Na' bi ṉacho mbeca' žaš, ṉeca ndop nžaga' beṉe' zan.  
\v 19 Na' beṉe' ca' za'ac distritw Asian' cheyaḻa' yesid cuine' yosocuiše' neda' laguo' nga še bi da' mal chesacde' chona'.  
\v 20 Na' beṉe' quinga nita' nga guac yesene' še bi da' mal nona' caten' bosodie' neda' lao beṉe' ca' chesenabia' nación Israelen'.  
\v 21 Še toz dan' bi chesazlaže' dan' goše'gaca'ne' caten' zjandob beṉe' ca' chesenabia', gwnia': “Ca nac yeḻa' justis c̱hia' dan' chonḻe ṉa'aža, chonḻen dan' chejḻi'a gwžin ža yesyeban beṉe' ca' ba gosat.” 
\p  
\v 22 Gobernador Félixen' ba ṉezde' can' chosozejni'i beṉe' ca' ba chesejḻe' c̱he Jesucriston', na' cate' bende' can' gwna Pablon', bich goclaže' gone' yeḻa' justis c̱he' ca hora', gwne': 
\p ―Cate' yid Lisiasen' ben' nac beṉe' gwnabia' c̱he soldadw ca', cana' yeyož gwzenaga' can' nac dan' chagwle xya nga. 
\p  
\v 23 Nach bene' mandadw bec̱he' x̱an soldadon' Pablon' gan' die' ḻižyan' na' be'e latje gon Pablon' con bi chaclaže' gone', na' be'e latje jaseṉa' beṉe' migw c̱hen' ḻe' jasesane' bi dan' byažjde'. 
\p  
\v 24 Nach beza' gobernador Félixen' ciuda Cesarean', perw cate' gwde to c̱hope ža bežine' da' yoble nc̱he'e no'ol c̱he' ben' le Drusila. Na' Drusilan' naque' no'ole Israel. Nach gobernadoren' bene' mandadw gosaxe' Pablon' da' yoble na' bzenague' be' Pablon' diža' gwne' yogo'ḻoḻ beṉe' cheyaḻa' yesejnilaže' Jesucriston'.  
\v 25 Nach Pablon' be'lenche' ḻe' diža' can' cheyaḻa' gaccho beṉe' güen lao Diosen', na' can' gwsaca'cho cont bi goncho da' mal, na' ḻecze be'lene' ḻe' diža' can' gon Diosen' cate' žin ža gone' justis c̱he yogo' beṉac̱h na' gwnežjue' castigw c̱he yogo' beṉe' bi chesejnilaže' ḻe'. Na' gobernador Félixen' bžebe' na' gože' Pablon': 
\p ―Da' na'ze gwzenaga' ṉa'a, guac yeyejo'. Na' cate' nḻatja' guaxcza' le' yeto. 
\p  
\v 26 Gobernadoren' gocde' še gwnežjo Pablon' ḻe' mechw cont yosane' ḻe'. Da'nan' goxe' Pablon' güeltze be'lene' ḻe' diža'.  
\v 27 Ca' chac gwde c̱hop iz nach yeto beṉe' yoble beṉe' le Porcio Festo gwdie' bḻane' xḻatje'. Na' Félixen' goclaže' yega'aṉe' binḻo len beṉe' Israelen' cate' ba bechoje' gobernador, da'nan' bene' mandadw bega'aṉ Pablon' ḻižyan'. 
\c 25  
\s1 Pablon' bzoa rson c̱he' lao gobernador Feston' 
\p  
\v 1 Na' cate' bžin Feston' ciuda Cesarean' gan' ṉabi'e, gwzoe' šoṉe ža na' gwze'e gwyeje' Jerusalénṉa'.  
\v 2 Nach bx̱oz gwnabia' ca' len nochle beṉe' blao c̱he beṉe' Israel ca' ja'aque' jaseṉe'e ḻe' cont bosocuiše' Pablon'.  
\v 3 Na' gosata'yoede' Feston' gone' mandadw šjasesane' Pablon' Jerusalén. Gosata'yoede' ḻe' gone' ca' ḻe gosaclaže' yesebe'na'ogüe' Pablon' cont yesote'ne' tnez.  
\v 4 Na' gobernador Feston' boži'e xtiža'gaque', gwne': 
\p ―Yega'aṉche' Cesarean' gan' die' ḻižyan' ḻe neda' bich chžeda' ša'a na'.  
\v 5 Na' ḻe cuej no beṉe' gwnabia' c̱hele seḻa'le ḻegaque' len neda' cont yosocuiše' ḻe' lagua' gan' gona' yeḻa' justis še bi da' xiṉj ba none'. 
\p  
\v 6 Nach gwzoa gobernadoren' len ḻegaque' Jerusalénṉa' do x̱ono' o do ši ža na' gwdena' beze'e beyeje' Cesarean'. Na' beteyo gwchi'e gan' chone' yeḻa' justisen' na' bene' mandadw gwyej Pablon' lagüen'.  
\v 7 Nach cate' bžin Pablon' lagüen' ba nita' beṉe' Israel ca' za'ac Jerusalénṉa' na' ḻa' gosec̱hjte' ḻe' na' gosezolagüe' bosocuiše' ḻe' chesene' da' zan da' mal juisyw ba bene', perw bi blo'elaon še diža' ḻi cheso'e.  
\v 8 Nach Pablon' bzoa rson c̱he', gwne': 
\p ―Bibi doḻa' napa' len ley c̱he neto' beṉe' Israel ṉe len yodao' blao c̱heton' na' ṉe len rey César ben' chnabia' doxen nación Roman'. 
\p  
\v 9 Na' Feston' goclaže' yega'aṉe' binḻo len beṉe' Israel ca', da'nan' gože' Pablon': 
\p ―¿Bi che'ndo' sao' Jerusalén gona' yeḻa' justis c̱hion' na'le c̱he yogo' da' ca' chosocuiš beṉe' quinga le'? 
\p  
\v 10 Nach Pablon' gwne': 
\p ―Rey Césaren' ba nzoe' le' cont gono' yeḻa' justis, na' cheyaḻa' gac yeḻa' justis c̱hia' laguo' nga. Ca nac beṉe' Israel quinga, le' ṉezczedo' bibi da' xiṉj ṉa' gona' ḻen ḻegaque'.  
\v 11 Šaca' ba gwdapa' doḻa' o bichle da' ba bena' da' cheyaḻa' gata', bi žia' bi gata'. Perw bibi nona' ca nac dan' chosocuiše' neda' nga, na' nono zaca' gwde neda' laogaque'na'. Da'nan' chṉaba' tia' lao rey Césaren' cont gone' yeḻa' justis c̱hian'. 
\p  
\v 12 Nach Feston' bene' yeḻa' güexi'a len beṉe' gwnabia' c̱he' ca' bi yesone' len Pablon' nach gože'ne': 
\p ―Ba gwṉabo' tio' lao rey César na' lagüe' nan' šejo'. 
\s1 Gobernador Feston' bdie' Pablon' lao rey Agripan' 
\p  
\v 13 Na' cate' ba gwde yeto c̱hope ža, rey Agripa len no'ol c̱he' ben' le Berenice besežine' Cesarean' bedeseguape' Feston' tiox.  
\v 14 Na' cate' gwṉeze gobernador Feston' ṉite' yezan ža, nach be'lene' rey Agripan' diža' c̱he Pablon', gože'ne': 
\p ―Zoa to beṉe' nyix̱jw Félixen' ḻižya nga cate' bechoje'.  
\v 15 Na' cate' gwya'a Jerusalénṉa' bx̱oz gwnabia' ca' na' nochle beṉe' blao c̱he beṉe' Israel ca' goseṉabe' c̱hoglaguan' cont gaque' castigw.  
\v 16 Perw na' goše'gaca'ne' bi de costumbr c̱he chio' beṉe' nación Roma gwdecho beṉe' yesaque' castigw še bi yesyediḻlagüen' len beṉe' ca' chosocuiš ḻe' cont yosozoa rson c̱hegaque'.  
\v 17 Nach cate' besela'aque' nga beteyo ḻa' gwche'tia' gan' chona' yeḻa' justis na' bena' mandadw gosebeje' Pablon'.  
\v 18 Na' cate' bosocuiš beṉe' ca' ḻe', ṉe toz da' mal dan' chacda' yososbague'de' ḻe' bibi gosene'.  
\v 19 Dan' chac c̱hegaque', bi chejnilaže' Pablon' can' chesejnilaže' ḻegaque', na' cheso'e diža' c̱he to beṉe' ba got, beṉe' le Jesús, na' Pablon' že' mbancze'.  
\v 20 Cate' bich bi bežellaža' gona' ca dan' chesac c̱hegaquen' na' goša' Pablon' še chaclaže' yodia'ne' Jerusalén cont gac yeḻa' justis c̱hen' c̱he da' ca' chososbague'de' ḻe'.  
\v 21 Nach Pablon' gwṉabe' šeje' gone' yeḻa' justis c̱he' lao rey César Augusto, na' bena' mandadw beyeyjue' šlac gac gwdia'ne' lao rey Césaren'. 
\p  
\v 22 Nach rey Agripan' gože' Feston': 
\p ―Chaclaža' gwzenaga' can' choe' ben' dižan'. 
\p Nach Feston' gože' ḻe': 
\p ―Gwx̱e gwzenago' c̱he' šeca'. 
\p  
\v 23 Nach beteyo gosacxenchgua rey Agripan' len Berenice cate' goso'e gana' chi' gobernadoren', na' ḻecz zjachi' beṉe' ca' chesenabia' soldadw ca' na' yogo' no beṉe' blao c̱he ciudan'. Na' gwdena' Feston' bene' mandadw jasexi'e Pablon'.  
\v 24 Na' Feston' gwne': 
\p ―Rey Agripa, na' len yogo' le'e že'le nga len neto', ca nac benga ze laole nga, yogo' beṉe' Israel beṉe' že' Jerusalén len beṉe' že' Cesarea nga ba gose'e neda' benga naque' beṉe' mal na' yogo'cze' chesene' bi cheyaḻa' bane'.  
\v 25 Na' ba gwṉabyoža' na' gota'bia' bibi none' da' zaca' c̱hoglaguan' c̱he' gate'. Na' ba gwṉabe' tie' lao rey César gone' yeḻa' justis c̱he', na' ba gwc̱heba' gwdia'ne' ciuda Roma na'ale gan' zoa rey Césaren'.  
\v 26 Na' chacžejlaža', ḻe bibi chežellaža' gwzoja' reyen' yapa'ne' bin' none'. Da'nan' bac̱h gwleja'ne' laole nga, na' chbechgüeda' chbeja'ne' laguo' le' rey Agripa, cont yeyož gwzenagcho c̱he' na' gata' bi da' gwzoja'.  
\v 27 Chacda' bi naquen to ḻicha seḻa'ne' Roman' sin cbi gwzoja' še bin' none'. 
\c 26  
\s1 Pablon' bzoe' rson c̱he' lao rey Agripan' 
\p  
\v 1 Nach rey Agripan' gože' Pablon': ―Guac ṉao' bi da' gaclenen le'. 
\p Nach Pablon' gwḻis ne'en lao beṉe' ca' gwzolagüe' bzoa rson c̱hen', gwne': 
\p  
\v 2 ―Chbechgüeda' rey Agripa, ba gosoṉe' latje gua' diža' laguo' nga ṉa'a ca nac dan' chosocuiš beṉe' Israel gualaž c̱hecho ca' neda'.  
\v 3 Le' nombi'o costumbr c̱he chio' beṉe' Israel na' ṉezdo' can' chesacyož beṉe' gualaž c̱hecho ca' ḻegacze'. Da'nan' chata'yoeda' le' gapšco' yeḻa' chxenḻaže' gwzenago' c̱hia' nga. 
\s1 Quinga ben Pablon' cate' biṉa' šejnilaže' Criston' 
\p  
\v 4 ’Yogo' beṉe' Israel gualaž c̱hechon' zjaṉezde' can' ba gwzoa' chonxena' Diosen' cate' ṉe' nactia' bidao', caten' gwzoa' laža' lente caten' gwzoa' ciuda Jerusalén.  
\v 5 Na' še chese'nde' yeso'e diža', ḻecze zjaṉezde' goca' txen len beṉe' ca' zjansi'e fariseo cate' nactia' bi' xcuide' na' beṉe' fariseo ca' chesonche' yogoḻoḻ costumbr gole can' nyoj ley c̱hechon' clel can' cheson yezica'ch beṉe' Israel gualaž c̱hecho ca'.  
\v 6 Na' ḻegaque' chesagüe' xya c̱hia' ṉec̱he chejḻi'a gwžin ža cate' Diosen' yosbane' beṉe' guat ca' can' gože' da' x̱ozxta'ocho ca'. Ṉec̱he da'nan' zoa' nga ṉa'aža cont gac yeḻa' justis c̱hian'.  
\v 7 Beṉe' zan ḻo šižiṉw cue' chio' beṉe' Israel nite' chesebeze' batcan' yosban Diosen' beṉe' ca' ba gosat, can' že' gone'. Da'nan' chesonxene' ḻe' do ža do yel. Ḻecz neda' zoa' lez gac ca', na' da'nan' baḻ beṉe' Israel gualaž c̱hechon' chosocuiše' neda' nga rey Agripa.  
\v 8 Na' le'e chi'le chzenagle c̱hia', ¿bixc̱hen' chaquele nono šejḻe' dan' yosban Diosen' beṉe' ca' ba gosat? 
\s1 Cana' Pablon' bgue'ede' beṉe' chesejnilaže' Criston' 
\p  
\v 9 ’Cana' neda' gocda' cheyaḻa' gue'eda' beṉe' ca' chesonxen Jesús ben' nac beṉe' Nazaret, na' da' zan benchgua' contr ḻegaque'.  
\v 10 Beṉe' zan beṉe' chesejḻe' c̱he Jesúsen' Jerusalénṉa' gwdix̱jua' ḻižya, gwdapa' yiš dan' bosozoj bx̱oz gwnabia' ca' cho'en diža' napa' yeḻa' gwnabia' cont gona' ca'. Na' cate' gosec̱hoglagüe' yesote' no beṉe' ca', goca' toze can' bosoxi'e yesone'.  
\v 11 Na' zan las gwya'a to to yodao' jasaca' ḻegaque' cont yesebejyic̱hje' bich yesonxene' Jesúsen'. Na' catec bgue'eda' ḻegaque' gwya'a yež zito' jalagšiba' ḻegaque'. 
\s1 Da' yoble Pablon' cho'e diža' can' goc c̱he' cate' Diosen' bocobe' yic̱hjlažda'ogüe' 
\r (Hch. 9:1-19; 22:6-16) 
\p  
\v 12 ’Can' goc to ža cate' zya'a ciuda Damascon', nox̱a' yiš c̱he bx̱oz gwnabia' ca' dan' žan gwc̱hi gwsaca' beṉe' ca' chesonxene' Jesúsen'.  
\v 13 Ca do guagwbiž zya'a ngua'a nezen' señor rey, cate'cze ble'eda' to be'ni' juisyw da' za' ḻe'e yaba, chseṉi'chen ca gwbižen', na' gwyec̱hjen neda' len beṉe' ca' zya'alena' txen.  
\v 14 Na' yogo'to' gwbix̱to' ḻo yon', na' neda' benda' to beṉe' chṉe' diža' hebreo gwne': “Saulo, Saulo ¿bixc̱hen' chc̱hi chsaco' neda'? Dan' chondo' neda', chone zi' cuino' ca chon to go'ṉ be chlibe ḻo ya dan' zoa lao carroš c̱heban'.”  
\v 15 Nach boḻ güiža'ne', goža'ne': “¿No le' beṉe'?” Nach X̱ana' Jesúsen' boži'en, gwne': “Neda' Jesús na' neda' chc̱hi chsaco'.  
\v 16 Beyas, ḻe bac̱h blo'elagua' le' na' ba gwleja' le' gono' xšina' na' go'o diža' c̱he da' nga ba ble'edo' na' c̱he bichle dan' za' le'edo' da' za' gwlo'eda' le'.  
\v 17 Na' ṉa'a seḻa' le' gan' že' beṉe' ca' bi zjanac beṉe' Israel. Na' bi goṉa' latje no got le', ṉe beṉe' Israel gualaž c̱hio' ca' na' ṉe beṉe' bi zjanac beṉe' Israel.  
\v 18 Chseḻa' le' gan' že' beṉe' bi zjanac beṉe' Israel na' gwzejni'ido'ne' cont yesebejyic̱hje' da' malen' zjanone' na' yesone' da' güen. Chaclaža' yesyechoje' ḻo na' Satanás dan' chnabia' da' x̱igüe' ca' na' yosozenague' c̱he Diosen' cont ṉitlao xtoḻa'gaque', na' ḻecze chaclaža' yesaque' txen len nochle beṉe' chesejnilaže' neda' beṉe' ba zjanac ḻo na' Diosen'.” 
\s1 Pablon' bsed blo'ede' beṉe' xtiža' Criston' 
\p  
\v 19 ’Ca' goc c̱hia' rey Agripa, bzenaga' ca dan' gož Jesúsen' neda' zoe' yaban' caten' ble'edagüeda'ne' tnez.  
\v 20 Zgua'tec jazejni'ida' beṉe' ca' že' ciuda Damasco xtiže'na' na' gwdechle jazejni'ida' beṉe' ca' že' Jerusalénṉa' len beṉe' že' doxen distritw Judean', goše'gaca'ne' cheyaḻa' yesebejyic̱hje' xtoḻa'gaque' na' yosozenague' c̱he Diosen' na' yesone' da' güen cont gacbia' ba gosebejyic̱hje' da' malen'. Can' bzejni'ida' beṉe' Israel gualaž c̱hecho ca' lente beṉe' ca' bi zjanac beṉe' Israel.  
\v 21 Na' ṉec̱he dan' chona' ca', beṉe' gualaž c̱hecho beṉe' chesegue'ede' neda' gosezene' neda' yodao' blaon' na' gosaclaže' yesote' neda'.  
\v 22 Perw na' Diosen' zoe' chaclene' neda', na' da'nan' zoacza' cho'a xtižen' ža ṉa'aža len yogo'ḻoḻle že'le nga, le'e nacle beṉe' blao lente le'e bi nacle beṉe' blao. Bi ṉacho bichle chzejni'ida' beṉe' da' bi bzoj da' Moisésen' len yezica'chle ben' goso'e xtiža' Diosen' cani'.  
\v 23 Gosene' Criston' ben' za' seḻa' Diosen' saca'zi'e na' gate' na' gaque' beṉe' nechw yebane' ladjo beṉe' guat ca'. Na' ḻecz gosene' ḻe'na' gwzende' beṉe' Israel len beṉe' bi zjanac beṉe' Israel can' cheyaḻa' yesone' cont šo' be'ni' c̱he' ḻo' yic̱hjlažda'ogaque'. 
\s1 Pablon' goclaže' šejnilaže' rey Agripan' Jesucriston' 
\p  
\v 24 Ca' cho'e dižan' cate'cze gobernador Feston' gwṉe' zižje gože'ne': 
\p ―¡Chactonton' Pablo! Dan' ba bsedteco' nan' bac̱h chactonto'. 
\p  
\v 25 Nach Pablon' gože' gobernadoren': 
\p ―Bi chactonta' señor gobernador, san diža' ḻin' cho'a, diža' da' zaca' gwzenago'.  
\v 26 Na' rey Agripa nga nombi'e da' quinga choa' diža' c̱hen, da'nan' bi chžeba' choa' diža' lagüe' nga. Ṉezda' chacbe'ede' choa' diža' ḻi, ḻe dan' goc c̱he Jesúsen' bi ṉacho goquen bagaše'ze.  
\v 27 Le' rey Agripa, ¿chejḻi'o da' ca' bosozoj beṉe' ca' goso'e xtiža' Diosen' cani'? Ṉezda' chejḻi'on. 
\p  
\v 28 Nach rey Agripan' gože' Pablon': 
\p ―¿Chacdo' bedao' co'oyeḻo' neda' cont šejnilaža' Jesucriston'? 
\p  
\v 29 Nach Pablon' gože'ne': 
\p ―Chṉaba' lao Diosen' žin ža cate' le' len yezica'chle beṉe' že' nga šejnilaže'le Jesucriston' can' chejnilaža'ne', še yob o še ṉe' chžach, perw cbi gata'le ḻižya can' dia' neda'. 
\p  
\v 30 Beyož gwna Pablon' ca' bezoža' rey Agripan' len no'ol c̱hen' Berenice, na' len gobernador Feston' na' len beṉe' ca' gosebe' len ḻegaque'.  
\v 31 Nach cate' ba besyeyo'e ga yoble, rey Agripan' na' gobernador Feston' gose' ḻježe': 
\p ―Bi ṉacho ba non benga da' zaca' gate' o da' zaca' c̱hix̱jwchone' ḻižya. 
\p  
\v 32 Nach rey Agripan' gože' Feston': 
\p ―Šaca' bi gwṉabe' tie' lao rey Césaren' cont gac yeḻa' justis c̱he'na' guac yosanchone'. 
\c 27  
\s1 Goseseḻe' Pablon' ciuda Roman' 
\p  
\v 1 Na' cate' bosoxi'e yeseseḻe' Pablon' distritw Italia gan' chi' ciuda Roman', nach gwlo'e Pablon' len yezica'chle pres ca' ḻo na' to x̱an soldadw beṉe' le Julio. Na' Julion' naque' txen len soldadw ca' ben' zjansi'e Batallón c̱he Augusto. Na' neda' Lucas gwzoa' len Pablon'.  
\v 2 Nach gwyo'oto' to ḻo' barcw da' za' ciuda da' nzi' Adramitio cont žinen distritw Asia, beza'to' ciuda Cesarean'. Na' za'len Aristarcon' neto'. Naque' beṉe' ciuda Tesalónica dan' chi' distritw Macedonia.  
\v 3 Nach ža beteyo bžinto' ciuda da' nzi' Sidón. Na' x̱an soldadw ben' le' Julio bencze' güen len Pablon', be'e latje gwyeje' gan' že' beṉe' migw c̱he' ca' cont bosonežjue' ḻe' bi dan' byažjde'.  
\v 4 Na' cate' bechojto' ciuda Sidónṉa' beza'to' bedeto' gaḻa'ze gan' nḻa' yežlio dan' chi' ḻo' nisdao' dan' nzi' Chipre. Chec̱hjchgua be' clele ca horen', na' yežliona' bcue'ejen neto' len be'na'.  
\v 5 Na' beyož gwdeto' ḻo nisdao' dan' de gaḻa'ze gan' zjambane distritw Cilicia na' distritw Panfilia, nach bžinto' ciuda dan' nzi' Mira dan' chi' gan' mbane distritw Licia. 
\p  
\v 6 Na' ciuda Miran' x̱an soldadon' bželde' yeto barcw da' za' ciuda Alejandría da' za' šej distritw Italia, na' bene' mandadw gwyo'oto' ḻo'en txen len Pablon'.  
\v 7 Nach gwza'to' zejto' ḻo nisen' da' yoble. Zan ža zejto' šolaže', caṉe bžinto' gwdeto' ciuda gan' nzi' Gnido. Na' dan' ṉe' chec̱hj ben' clele gan' zejton', da'nan' bi goc šejto' ḻicha, nach gwca'ato' zejto' chcue'ej cuinto' len yelate' yežlio dan' nga'aṉ ḻo' nisdaon' dan' nzi' Creta, gan' bitec gwyec̱hj be', na' gwdeto' gaḻa'ze gan' zoa to ya'a da' nzi' Salmón.  
\v 8 Na' zejto' gaḻa'ze ga zoa yo biž chcue'ej cuinto', caṉe bžinto' gan' nzi' Buenos Puertos gaḻa'ze yež dan' nzi' Lasea. 
\p  
\v 9 Goc zan ža zejto' ca' na' bac̱h chžebto' šjažiayi' cuinto' ḻo' nisdaon', ḻe ba bžin tiemp zag cate' chec̱hjchgua be'. Nach Pablon' gwṉeyoede' beṉe' ca' yesebeze' na'ze.  
\v 10 Gože' ḻegaque': 
\p ―Le'e beṉe' le'e chsa'le barcon', ba chacbe'eda' can' zejcho nga caṉe chac chzan', xož cuiayi' barcon' len yoa' c̱helen', na' lente chio' yo'ocho ḻo' barcon' xož cuiayi'cho. 
\p  
\v 11 Nach x̱an soldadw ca' bzenagche' c̱he x̱an barcon' na' c̱he ben' chsa' ḻen clel ca c̱he Pablon'.  
\v 12 Ḻe bi nac latje güen cho'a nisdao' gan' zoaton' ga'aṉto' tiemp zaguen', na' gwyan beṉe' ca' gosacde' cheyaḻa' sa'to' šejto' še goṉen žinto' Fenice gana' soato' šlac te da' zaguen'. Fenice naquen to yež ga chac cho'o barcw gan' mbane Creta na' bi chactec zag, ḻe šḻa'ale nḻa' ga chla' gwbiž na' šḻa'ale ga chxoa gwbiž. 
\s1 To be' gual gwyec̱hjen ḻo nisdaon' 
\p  
\v 13 Cate' gwzolao chec̱hj to be' goḻ dan' za' che'eḻle na' beṉe' ca' chososa' barcon' gosacde' guac šja'acche' gan' gosaclaže', nach gozsa'to' zejto' ḻo nisen' da' yoble to ḻcue'ej c̱he Cretan'.  
\v 14 Gague goc sša cate' ba chac to be' gual da' nzi' Noreste chec̱hjchguan clele gan' zej barcon'.  
\v 15 Na' chžiga'chguan barcon'. Bibi goc yesone' cont šejchto'. Na' btoblaže'to' gwžiga' ben' barcon' len neto' con can' chec̱hjenṉa'.  
\v 16 Nach bžinto' to ḻcue'ej yežlio da' nga'aṉ ḻo' nisen' dan' nzi' Clauda, gan' bitec chec̱hj be'. Na' barcw cha'o gan' yo'oton' nxoben to barcw dao' da' chon žin choslan beṉe' cate' chac bi da' chac c̱he barcw xenṉa'. Na' caṉe goc bocueto' barcw daon' ḻo' da' cha'ona'.  
\v 17 Beyoža' bc̱hejto' barcw cha'ona' do gual cont gwlo'oto' fuers c̱hen. Na' besežebe' gaga' barcon' to latje gan' nac yox da'na' nzi'in Sirte, nach bosoḻetje' lache' xen dan' chonen cont chžiga' ben' barcon'. Nach con zejto' ḻo nisen' con gan' gwyej barcon'.  
\v 18 Beteyo ba chož nisen' ḻo' barcon' da' chec̱hjchgua ben', nach gosešaše' yoa' dan' nsa' barcon' gwzolao bosozaḻa'šazen' ḻo' nisen'.  
\v 19 Na' ža gwyoṉe goclento' ḻegaque' bzaḻa'to' xšinḻaz barcon' ḻo' nisen'.  
\v 20 Zan ža bi blo'elao gwbižen' na' šeže'le bibi beljw ble'eto', do ža do yel goc yejw na' gwyec̱hj be', na' bich gwzoato' lez yelato'. 
\p  
\v 21 Bac̱h goc sša bi chagwto', nach Pablon' gože' beṉe' ca': 
\p ―Le'e beṉe', chac quinga dan' bi bzenagle c̱hia' caten' gwnia' le'e bi sa'cho Cretan', na' dan' bi bzenagle c̱hia', ba gwžiayi' yoa' c̱he barcon' len xšinḻazen.  
\v 22 Perw ṉa'a bi soayaše'le, ṉe tole cbi cuiayi' yeḻa' mban c̱hele, san barcw ngazen' cuiayi'.  
\v 23 Neda' chonxena' Diosen' na' ba ben cuina' ḻo ne'e, na' ḻe' ba gwseḻe' to angl beṉe' blo'elagüe' neda' nže'e.  
\v 24 Nach angla' gože' neda' diža' nga: “Bi žebo' Pablo. Cheyaḻa' žino' lao rey César ben' chi' ciuda Roma, na' da'nan' yelao', bibi gac c̱hio', na' ḻez yosla Diosen' yogo' beṉe' ca' že' ḻo' barcon'.”  
\v 25 Na' dan' gwna anglen' ca', beṉe', ḻe yebe. Ṉezda' Diosen' gone' gac doḻoḻ can' gož anglen' neda'.  
\v 26 Da' gac c̱hecho yecho'oṉen chio' yo biž da' nga'aṉ late' ḻo' nisen'. 
\p  
\v 27 Na' cate' ba goc žta'gwbiž zejto' ḻo nisen' nžiga' ben' neto' nile nale ḻo nisdaon' dan' nzi' Adria, nach ca do chel beṉe' ca' zjansa' barcon' gosacbe'ede' ba zejto' gaḻa'ze yo biž.  
\v 28 Nach beseḻetje' to plom ḻo' nisen' cont boso'ochix̱e' ca do gaca'te' sitjw nac nisen'. Beyož bosochix̱en'ṉa' goseṉezde' goquen šino'tochoa metr. Nach gosezdie' yelate' na' bosozchix̱en' da' yoble na' ca horen' goquen gažechoa metr.  
\v 29 Na' besežebe' šjati'i barcon' yej ḻo' nisen', nach beseḻetje' tap ya xen dan' že' ancla, bosoc̱hejen' xan barcon' cont gosox̱en' ḻen, na' do chesežebze' chesebeze' batcan' šeni'.  
\v 30 Nach beṉe' ca' zjansa' barcon' gosaclaže' yosyoxoṉje'. Besyeḻetje' barcw dao' dan' ncua' xina' barcon', con bosode'ede' yeseḻetje' ancla ca' dan' ncua' lagüen'.  
\v 31 Nach Pablon' boḻ güiže' x̱an soldadw ca', gože'ne': 
\p ―Še beṉe' quinga bi yesyega'aṉe' ḻo' barcw nga, bi yelacho. 
\p  
\v 32 Nach soldadw ca' gosec̱hogue' don' zjanca' barcw daon' bososanen' ḻo' nisa'. 
\p  
\v 33 Do šbal Pablon' gwzolao gwṉeyoede' yesagw beṉe' ca' že' ḻo' barcon', gože' ḻegaque': 
\p ―Ba chac žta'gwbiž zoale bi chtasle na' bi che'ej chagwle.  
\v 34 Chata'yoeda' le'e ḻe gagw cont soale binḻo, ḻe ṉe tole ca cuiayi'. 
\p  
\v 35 Beyož gwne' ca' bex̱ue' to yetextil, be'e yeḻa' chox̱clen c̱he Diosen' lao yogo' neto' že'to' ḻo barcon' na' gwxi'e to pedasen' gwdagüen'.  
\v 36 Nach yogo'to' bebeto' na' ḻecz gwzolaoto' gwdagwto'.  
\v 37 C̱hop gayoa gayonšino'to' nacto' že'to' ḻo' barcon'.  
\v 38 Na' beyož gwdagwto' ca beḻjeto', nach trigon' da' ṉe' nga'aṉch ḻo' barcon', gosebejen' bosozaḻen' ḻo' nisdaon' cont barcon' bich goctequen zi'i. 
\s1 Goxj barcon' 
\p  
\v 39 Cate' gwyeni' bi zjanombi'e yežlion' gan' besežinen', perw besele'ede' de to latje ga žia nisen' šize na' cho'enṉa' nac laše' ḻo yox. Nach gosaque' toze gosaclaže' yesone' cont žin barcon' šjac̱hen' laše' ḻo yoxen'.  
\v 40 Na' gosec̱hogue' do c̱he ancla ca', gosebejyic̱hjen' ḻo' nisen'. Ḻecze goseseže' do dan' bosoc̱heje' yag dan' chsa' barcon' ḻicha na' goseḻise' lache' dan' zoa yic̱hj barcon' cont bžiga' ben' ḻen, nach zja'aque' cho'a yo bižen'.  
\v 41 Na' gosedie' ga chediḻ nisdaon' len yeto da' yoble, na' jac̱haz lagüe barcon' ḻo' yoxen', bich goc tan. Na' nisen' gwzolao bzoxjen barcon' catec fuers nsan'.  
\v 42 Nach soldadw ca' gosaclaže' yesote' pres ca' cont bi yeseyeḻe' nisen' na' yosyoxoṉje'.  
\v 43 Perw x̱an soldadw ca' goclaže' yosle' Pablon', da'nan' bžone' yeson soldadw ca' can' chesaclaže' yesonen'. Bene' mandadw len pres ca' še noe' chac chyeḻa' nisen' zgua'tec ḻegaque' yesexite' ḻo nisen' cont yesyechoje' yo biž.  
\v 44 Na' bene' mandadw beṉe' ca' bi chac yeseyeḻa' nis yosoc̱hine' no yagla' o bichle xšinḻaz barcon' cont yesyežine' ḻo yo. Na' can' gosone' na' yogüe' besyežine' ḻo yo bižen'. 
\c 28  
\s1 Dan' goc c̱he Pablon' šlac zoe' Malta 
\p  
\v 1 Cate' bechojto' ḻo' nisdaon' bžinto' yo bižen', beṉe' ca' že'na' gose'e neto' ba bžinto' gan' nzi' Malta, naquen to yež dan' chi' to ḻo yežlio da' nga'aṉen ḻo' nisdaon'.  
\v 2 Na' beṉe' ca' že'na' gosaque' beṉe' šagüe' len neto', bosoxene' to yi' xen na' goxe' yogo'to' gan' nite'na', ḻe ba chac yejw na' chacchgua zag.  
\v 3 Nach Pablon' btobe' x̱oṉj xis bcue'en ḻo yin', cate' bchoj to beḻ be nac venen ḻo xis ca' gwdi'iṉba' ne'e goḻa'ditban'.  
\v 4 Na' besele'e beṉe' Malta ca' naḻa'dit beḻen' na' Pablon', na' gose' ḻježe': 
\p ―Benga nacḻje' beṉe' güet beṉe'. Da'nan' ḻa'czḻa' bele' ḻo' nisen', Diosen' bi güe'e latje banche'. 
\p  
\v 5 Nach Pablon' con gwžib ne'ena' ḻo yin' na' bexope beḻen', na' bibi gocde'.  
\v 6 Yogo' beṉe' ca' chesebeze' batcan' solao gata' ne'en yi o batca' gate'. Gosebeze' sša na' besele'ede' bibi gocde'. Nach gosone' xbab yoble, gosene' naque' to beṉe' šejnilaže'cho. 
\p  
\v 7 Na' beṉe' gwnabia' c̱he doxen Malta le' Publio na' yežlio c̱he' zjaden gaḻa'ze latje gan' bžinton', na' blebe' neto', gwzoato' ližen' šoṉe ža.  
\v 8 Na' x̱a Publion' chacšenchgüede' yo'e da' ḻa na' che'ede' yiž chen. Nach Pablon' gwyo'e gan' de'na' boḻ güiže' Diosen', nach gwx̱oa ne'en yic̱hj beṉe' güen' na' beyaque'.  
\v 9 Beyožen' jasexi'e yezica'chle beṉe' lagüe yeža' beṉe' chese'ede' yižgüe' na' gwnabde' Diosen' yeyone' ḻegaque', na' ḻecze besyeyaque'.  
\v 10 Na' da' zan da' güen goson beṉe' ca' len neto'. Na' cate' bžin ža beza'to' bosyoži'e ḻo' barcon' yogo' da' ca' chyažjeto'. 
\s1 Pablon' bžine' ciuda Roman' 
\p  
\v 11 Bega'aṉto' Malta šoṉ bio', nach gwza'to' zejto' ḻo nisen' yo'oto' to ḻo' barcw da' za' ciuda Alejandría da' gwlezen latjen' šlac gwde da' zaguen'. Na' mben ḻe'e barcon' ḻ gua'a ḻsaca' c̱he beṉe' ca' le' Cástor na' Pólux.  
\v 12 Na' bžinto' ciuda dan' nzi' Siracusa gan' bega'aṉto' šoṉe ža.  
\v 13 Nga gozza'to' cont bžinto' yež da' nzi' Regio. Na' bega'aṉto' tža. Nach gwzolao chec̱hj be' dan' za' che'eḻle, na' beza'to' da' yoble beteyo bezžinto' ciuda da' nzi' Puteoli na' bechojto' ḻo' barcon'.  
\v 14 Nga bežagto' beṉe' ḻježto' chesonxene' Jesucriston' Puteoli na' goseṉabe' gwzoato' len ḻegaque' to xman. Na' gwdena' gwza' ṉi'ato' zejto' Roman'.  
\v 15 Na' cate' za' žinto' ciuda Roman' goseṉeze beṉe' ḻježto' že' Roman' ba zoa žinto', na' baḻe' bedeseleze' neto' latje gan' nzi' Šoṉe Tiend na' yebaḻe' lagüe ya'a dan' nzi' C̱he Apio. Cate' ble'e Pablon' ḻegaque' be'e yeḻa' chox̱clen c̱he Diosen' na' gwbede' ḻo' yic̱hjlažda'ogüe'.  
\v 16 Na' cate' bžinto' Roman', x̱an soldadw ca' bene' yezica'chle pres ca' ḻo na' beṉe' gwnabia' c̱he soldadw ca' nita' na', perw be'e latje gwzoa Pablon' toze' ga yoble na' con gwzoa to soldadw gwdape' ḻe'. 
\s1 Pablon' be'e xtiža' Jesucriston' Roman' 
\p  
\v 17 Beyoṉ ža bžinto', Pablon' goxe' beṉe' blao c̱he beṉe' Israel ca' že' ciuda Roman'. Na' cate' beyož besedobe'na' gože' ḻegaque': 
\p ―Beṉe' migw, beṉe' gualaž c̱hecho ca' že' ciuda Jerusalén gosezene' neda' gosone' neda' ḻo na' beṉe' gwnabia' c̱he nación Roman', ḻa'czḻa' bibi bena' contr beṉe' gualaž ca' na' ṉe contr costumbr c̱he da' x̱ozxta'ochon'.  
\v 18 Nach beṉe' gwnabia' c̱he nación Roman' goseṉabyože' na' gosaclaže' yososane' neda' cate' gosacbe'ede' bibi nona' da' zaca' yesote'nda'.  
\v 19 Nach beṉe' gualaž ca' že' Jerusalénṉa' bosožoncze' yososane' neda'. Da'nan' gwṉaba' tia' lao rey Césaren' cont gac yeḻa' justis c̱hia'. Perw bi ṉacho gagua' xya c̱he beṉe' gualaž c̱hecho da' gosonde' neda' ca'.  
\v 20 Da'nan' zoa' nga bac̱h goxa' le'e cont le'eda' le'e na' güe'lena' le'e diža'. Na' ncheja' gden ni ṉec̱he dan' zoa' lez yosban Diosen' beṉe' ca' ba gosat, cacze zan chio' beṉe' Israel zoacho lez. 
\p  
\v 21 Nach beṉe' ca' gose'ene': 
\p ―Bibi cart ṉa' la' laoto' nga dan' za' distritw Judean' da' bosozoj beṉe' Jerusalén ca' güen' diža' še bin' chac len le', na' nono beṉe' gualaž ṉa' la' beṉe' ṉe mal c̱hio'.  
\v 22 Perw chaclaže'to' yeneto' go'o diža' c̱he dan' chejḻi'o c̱he Jesúsen', ḻe ṉezeto' doxen cheseṉe' c̱he le'e chejḻe'le c̱he'. 
\p  
\v 23 Na' bosožie' bia' to ža cont šjaseṉe'e ḻe' da' yoble, na' cate' bžin žan' beṉe' zan ja'aque' gan' zoen'. Nach Pablon' be'lene' ḻegaque' diža' do ža. Be'e diža' c̱he dan' cheyaḻa' gwzenagcho c̱he Diosen' ben' chnabia' doxen, na' bzejni'ide' ḻegaque' da' ca' zjanyoj ḻe'e ley dan' bzoj Moisésen' na' len dan' bosozoj yezica'chle beṉe' goso'e xtiža' Diosen' cani' c̱he Jesucriston', cont yesejḻe'e c̱he'.  
\v 24 Na' baḻ beṉe' ca' gosejḻe'e xtižen' da' be'e na' yebaḻe' bi gosejḻe'en'.  
\v 25 Dan' bi gosone' toz ca yesone' xbab, gwzolao besyeya'aque'. Nach Pablon' gože' ḻegaque': 
\p ―Dan' gož Spiritw c̱he Diosen' da' Isaíasen' dan' bzoje' c̱he da' x̱ozxta'ocho ca' naquen da' ḻi, žan: 
\q1  
\v 26 Gwyej gož beṉe' gualaž c̱hio' ca' xtižan': 
\q1 Da' ḻi yenele, perw na' bitw šejni'ile bi zeje dan' yenelen'. 
\q1 Na' da' ḻi le'ele, perw bi gacbe'ele bi zejen dan' le'elen'. 
\q1  
\v 27 Nacle beṉe' güedenag na' bac̱h natcze yic̱hjlažda'olen'. 
\q1 Bi chazlaže'le gwzenagle dan' chenele na' dan' chle'ele; 
\q1 con nacle beṉe' güedenag. 
\q1 Šaca' bi nacle beṉe' güedenag, šejni'ile bi zejen dan' chenele na' dan' chle'ele. 
\q1 Nach yetiṉjele xtoḻa'le cont yeca'an na' yocoba' yic̱hjlažda'olen'. 
\m  
\v 28 Che'nda' ṉezele ba gwzolaon ṉa'a Diosen' chseḻe' beṉe' cheseyix̱jue'ede' xtižen' len beṉe' bi zjanac beṉe' Israel cont yosozenague' c̱he' na' gata' yeḻa' mban c̱hegaque' toḻi tocaṉe. 
\p  
\v 29 Beyož gwna Pablon' ca', beṉe' Israel ca' besyežaše' chesacyožchgüe' c̱he dan' gwnen'. 
\p  
\v 30 Na' c̱hop iz nya' gwzoa Pablon' ciuda Roman' to yo'o ga chyixjue', na' blebe' yogo'ḻoḻ beṉe' jaseṉe'e ḻe'.  
\v 31 Na' bzejni'ide' ḻegaque' Diosen' chnabi'e doxen, na' ḻecz bzejni'ide' c̱he X̱ancho Jesucriston'. Nono bžon gwzejni'ide' beṉe', na' be'e xtiža' Diosen' con can' goclaže'.