\id 2TI  
\h 2 Timoteo 
\toc1 CART GWCHOPE DANꞋ BZOJ POSTLW SAN PABLO C̱HE TIMOTEO 
\toc2 2 Timoteo 
\toc3 2 Ti. 
\mt1 CART GWCHOPE DANꞋ BZOJ POSTLW SAN PABLO C̱HE TIMOTEO 
\c 1  
\s1 Pablon' chzoje' Timoteon' 
\p  
\v 1 Neda' Pablo naca' postlw c̱he Jesucriston', ḻe Diosen' gwnalaže' gwseḻe' neda' chyix̱jue'eda' can' gwne' gone' cont note'teze beṉe' yesejnilaže' Jesucriston' gata' yeḻa' mban c̱hegaque' toḻi tocaṉe.  
\v 2 Na' chzoja' le' Timoteo, ba nona' le' ca xi'iṉa'. Chṉaba' lao X̱acho Diosen' na' lao X̱ancho Jesucriston' yesaclenšque' le' na' yesyeyaše'laže'de' le', na' yesonšque' ca so' binḻo len xbab da' yo'o ḻo' yic̱hjlažda'oguon'. 
\s1 Cheyaḻa' güe'cho diža' c̱he Jesucriston' 
\p  
\v 3 Chonxena' Diosen' do yic̱hj do laža' can' goson da' x̱ozxta'ogua', na' ṉezda' ḻo' yic̱hjlažda'ogua' chona' can' chazlaže' Diosen'. Na' yogo' ṉi'a cate' choḻ güiža' Diosen', lagüe ža na' šeže'le, choa' yeḻa' chox̱clen c̱he dan' chonon'.  
\v 4 Chjaza'laža' gwchežo' cate' beza' gan' zon', na' zelaža' le'e ḻježcho da' yoble, ḻe yebechgüeda' še ca'.  
\v 5 Na' chona' xbab can' chejnilažo' Diosen' do yic̱hj do lažo' can' zgua'tec goson taguo' Loida na' xṉa'o Eunice, na' ṉezda' ḻecz ca' chono' le' ṉa'a. 
\p  
\v 6 Da'nan' chṉeyoeda' le' da' yoble, güe'lažo' gono' da' gwlo'o Diosen' ḻo nao' gono' caten' gwx̱oa na'ton' yic̱hjon'.  
\v 7 Diosen' beṉe' chio' Spiritw c̱hen' zoan ḻo' lažda'ochon', na' Spiriton' chaclenen chio' cont bi žebcho, na' choṉen chio' yeḻa' guac cont goncho can' chazlaže' Diosen'. Ḻecze chaclenen chio' cont chaque ḻježcho na' cont choncho da' zejen na' güe'cho diža' da' zaca'.  
\v 8 Da'nan' chṉeyoeda' le', bi yeto'edo' c̱hix̱jue'edo' xtiža' X̱ancho Jesucriston', na' ṉeca yeto'edo' c̱hia' ḻa'czḻa' dia' ḻižya nga da' chzenaga' c̱he Jesucriston' na' chyix̱jue'eda' xtižen'. Cheyaḻa' gono' can' chonan' na' gwyo gwc̱hejlažo' bi da' gac c̱hio' cate' c̱hix̱jue'edo' diža' güen c̱hen', ḻe zoa Diosen' chaclene' chio' len yeḻa' guac c̱hen'.  
\v 9 Diosen' ba noṉe' chio' yeḻa' mban toḻi tocaṉe na' gwleje' chio' cont naccho ḻo ne'en. Na' bene' ca' da' nži'ilaže'de' chio', gague ṉec̱he bi da' güen bencho. Cate' biṉa' x̱e yežlion' bsi'e xṉeze seḻe' Jesucriston' cont gaclene' chio'.  
\v 10 Na' ṉa'a Diosen' ba blo'e nži'ilaže'de' chio', ḻe ba gwseḻe' Jesucriston' ben' choṉ yeḻa' mban c̱hechon' toḻi tocaṉe. Na' žin ža gwcuez Jesucriston' yeḻa' goten' na' gone' cont chio' chejḻe'cho diža' güen c̱hen' šjayzoacho len ḻe' toḻi tocaṉe. 
\p  
\v 11 Na' Diosen' gwleje' neda' naca' postlw c̱he' na' gwseḻe'nda' cont chyix̱jue'eda' diža' güen c̱he Jesucriston' na' chsed chlo'eda' beṉe' bi zjanac beṉe' Israel.  
\v 12 Na' dan' chona' ca', chžaglagua' da' quinga chac c̱hia', perw bi cheto'eda' c̱hen, ḻe nombi'a Diosen' ben' chejnilaža'. Ba ben cuina' ḻo ne'e, na' ṉezda' nape' yeḻa' guac gone' cont ṉe' soac̱hac̱ha' šejnilaža'ne' caten' žin ža yid Jesucriston' da' yoble. 
\p  
\v 13 Soac̱hac̱ho' gwzejni'ido' beṉe' diža' zaca' can' ba bendo' chzejni'idan', na' soatezo' šejnilažo' Jesucriston' na' gacdo'ne' do yic̱hj do lažo'.  
\v 14 Be' latje gaclen Spiritw c̱he Diosen' le' cont soatezo' gwzejni'ido' beṉe' diža' ḻi da' bsed blo'eda' le'e, ḻe zoa Spiriton' ḻo' lažda'ochon'. 
\p  
\v 15 Ṉezdo' Figelo na' Hermógenes len yezica'chle beṉe' migw c̱hia' ca' že' distritw c̱he Asia ba gosebejyic̱hje'nda'.  
\v 16 Na' chṉaba' gaclenšca X̱ancho Diosen' Onesíforo len beṉe' ḻo' yo'o c̱he', ḻe bi beto'ede' c̱hia' da' dia' ḻižya nga, san zan ṉi'a bedetipe' laža' nga.  
\v 17 Cate' bide' Roma nga, bene' byen beyiljue' neda' con cate'ch beželde'nda'.  
\v 18 Ṉezdo' ḻecze da' zan bene' goclene' neda' cate' gwzoa' Efeso. Chṉaba' lao X̱ancho Diosen' gacšca güen c̱he' cate' žin ža yid X̱ancho Jesucriston' da' yoble. 
\c 2  
\s1 Cheyaḻa' gwyo gwc̱hejcho len da' saca'zi'cho 
\p  
\v 1 Xi'iṉdagua', chṉaba' soac̱hac̱ho' šejnilažo' Jesucriston' lagüe' da' nži'ilaže'de' le'.  
\v 2 Na' yogo' da' ba bendo' gwdix̱jue'eda' lao beṉe' zan, da' ca' bsed blo'en beṉe' yosozenag c̱hen do yic̱hj do laže'gaque', beṉe' ca' guac yosozejni'iden' beṉe' yoble. 
\p  
\v 3 Na' byo bc̱hej len da' saca'zi'o šlac chono' xšin Jesucriston'. Goc ca to soldadw beṉe' bi chžeb bi gac c̱he'.  
\v 4 Ṉezecho beṉe' zej yeḻa' soldadon' bi chac gon xšine' šlac zeje' lao gwdiḻa', san chbejyic̱hjen' cont gone' bin' ža ben' nac x̱an soldadw ca'.  
\v 5 Na' ṉezecho beṉe' chja'ac ḻo güitj cheyaḻa' yesone' cayaṉen' ba bosoxi'e yesone' cate' yeseyitje', cont gac yesezi'e da' yesone' gan.  
\v 6 Na' ḻeze ṉezecho beṉe' chelaḻe chone' žin yix̱e' chzi'e da' nechw da' chbia lao coseš c̱hen'.  
\v 7 Ben xbab c̱he da' quinga ba gwnia' le', na' X̱ancho Jesucriston' gaclene' le' šejni'ido' yogon'. 
\p  
\v 8 Ben xbab c̱he Jesucristw ben' beyas bebane' ladjo beṉe' guaten', ben' nac xi'iṉ diaža c̱he da' rey Davin'. C̱he ḻen' chzejni'ida' cate' chyix̱jue'eda' diža' güen c̱he'.  
\v 9 Na' da' chyix̱jue'eda' diža' güen c̱hen' chosoc̱hi chososaque'nda' na' dia' ḻižya nga ca to no beṉe' mal juisyw. Perw ṉezda' bibi gac yesone' cont bi gas ḻalje xtiža' Diosen' ḻo yežlion'.  
\v 10 Da'nan' chzanḻaže' cuina' gac bi da' gac c̱hia' lagüe da' chyix̱jue'eda' xtiža' Diosen', ḻe chaclaža' yezica'chle beṉe' ba gwleje' cont gata' yeḻa' mban c̱hegaque' toḻi tocaṉe yesejnilaže' Jesucriston', na' žin ža šjasyezoe' len ḻe' toḻi tocaṉe gan' chac da' güen juisyw.  
\v 11 Diža' quinga zjanaquen da' ḻi: 
\q1 Še chejnilaže'cho Criston' ben' got ṉec̱he xtoḻa'chon', 
\q1 chio' ḻecze naccho ca to beṉe' guat len da' xiṉjen' cont bich gonchon. 
\q1 Na' con can' bosban Diosen' Criston' ladjo beṉe' guaten', 
\q1 ḻecze ca' bocobe' yic̱hjlaždao' chio' cont šjayzoacho txen len ḻe'. 
\q1  
\v 12 Na' še soac̱hac̱hcho šejnilaže'chone' bite'teze chac c̱hecho, ḻecze gone' cont ṉabia'cho txen len ḻe'. 
\q1 San še cuejyic̱hjcho Criston', ḻecze ḻe' cuejyic̱hje' chio'. 
\q1  
\v 13 Na' ḻa'czḻa' še chio' bi goncho can' gwnacho goncho, 
\q1 Diosen' zoe' chone' con da' ba gwne' gone', 
\q1 ḻe Diosen' bi gac gwše'e da' ba nžie' bia' gone'. 
\s1 Ben' chon xšin Diosen' binḻo 
\p  
\v 14 Bi go'o latje yesanḻaže' beṉe' ca' chesejnilaže' Jesucriston' da' ca' ba bzejni'ida'. Na' yosnisdo' ḻegaque' naquen mal len X̱ancho Diosen' yesediḻ yosošašlen ḻježe' c̱he bize diža'. Bibi zejen yesone' ca', ḻe cate' beṉe' chesende' chesediḻ chosošaše', chonen cont bi yesejḻe'e c̱he xtiža' Diosen'.  
\v 15 Ben con ga zelao saque'do' cont yebe Diosen' can' chonon' na' cont bi gacdo' zto' lagüen' can' chono' xšinen'. Gwsed gwlo'edo' xtižen' to ḻicha.  
\v 16 Bi gono' txen len beṉe' chesoe'chgüe' bite'teze diža' da' bibi zaca', diža' da' bibi zejen len Diosen', ḻe dižan' zjanac ca' chziyen' beṉe' yesonche' da' mal.  
\v 17 Dižan' nac ca' chžiayin' beṉe' ca to yižgüe' mal. Can' ba goc c̱he Himeneo na' Fileto,  
\v 18 gosebejyic̱hje' diža' ḻi da' chzejni'in c̱he Criston'. Chososed chosolo'ede' chesene' bi soacho lez žin ža yebancho ladjo beṉe' guaten', ḻe chesene' ba gwde c̱he da' ca'. Na' baḻ beṉe' ba chesejnilaže' Criston' chesacžejlaže' ṉa'a ṉec̱he xtiža' beṉe' ca'.  
\v 19 San chio' zoac̱hac̱hcho chzenagcho diža' ḻi c̱he Criston' na' Diosen' chone' cont bi chbejyic̱hjchon. Da'nan' zaca'lebcho ca to lene yo'o da' nac da' gual. Na' nyojcze Xtiža' Diosen' žan: “Diosen' ṉezde' no beṉe' zjayo'o ḻo ne'e.” Na' ḻecze nyojen žan: “Note'tez beṉe' že' chejnilaže' X̱ancho Diosen', cheyaḻa' cuejyic̱hje' bich gone' da' mal.” 
\p  
\v 20 Ṉezecho to liž beṉe' gwṉi'a de no tas platw na' no yeso' xguag de oro de plata da' zjazaca'chgua. Ḻecze de yeso' xguag de gona', na' de no batia na' bichle de yag da' chesonen žin da' bitec zjazaca'.  
\v 21 Can' naquen len chio', note'tezcho še cuejyic̱hjcho da' malen', nach X̱ancho Diosen' gwc̱hine' chio' ṉec̱he goncho da' zan da' güen da' chaclaže' goncho. Na' še goncho ca', saca'lebcho ca to tas o to xguag de oro da' zaca'chgua. 
\p  
\v 22 Na' ca nac le', cheyaḻa' cuejyic̱hjo' bite'teze da' mal da' chzelaže' lažda'oguon' gono', da' ca' chesezelaže' note'teze beṉe' güego' yesone'. Beyiljwlaže' nac gono' cont gaco' beṉe' güen len Diosen' na' cont soac̱hac̱ho' šejnilažo'ne', cont gacdo' Diosen', na' cont soa cuezo' binḻo len beṉe' ḻježo' ca'. Ben ca' txen len yogo' beṉe' cheseṉab goclen lao X̱ancho Diosen', beṉe' zjanac beṉe' laždao' xilaže'.  
\v 23 Bi gono' txen len beṉe' bi chesejni'ide', beṉe' chosošaše' cheso'e diža' da' bibi zejen, ḻe xtiža'gaquen' chonen ga chesacyož beṉe'.  
\v 24 Chio' choncho xšin Diosen' bi cheyaḻa' tiḻe gwšašlencho beṉe'. Cheyaḻa' gaccho beṉe' šagüe' len yogo'ze beṉe', cheyaḻa' ṉezecho naquen' gwzejni'icho ḻegaque' c̱he Diosen', na' cheyaḻa' gapcho yeḻa' chxenḻaže' len ḻegaque'.  
\v 25 Na' cate' güe'cho consejw c̱he beṉe' bi chesaclaže' yosozenague' diža' ḻi c̱he Criston', cheyaḻa' güe'lencho ḻegaque' diža' šagüe', na' cuezcho gaclen Diosen' ḻegaque' yosoša' xbab c̱hegaquen' cont yosozenague' c̱he diža' ḻi c̱hen'.  
\v 26 Can' goncho cont Diosen' gwnežjue' ḻegaque' to xbab šagüe' na' yesyechoje' ḻo na' Satanás dan' chnabia' da' x̱igüe' ca', ḻe chonen cont nite' chesone' con can' chazlažen'. 
\c 3  
\s1 Naquen' yeson beṉe' cate' ba zoa yid X̱ancho Jesucriston' da' yoble 
\p  
\v 1 Na' che'nda' šejni'ido' da' nga, cate' žin ža ba zoa yid X̱ancho Jesucriston' da' yoble, da' zan da' mal gac.  
\v 2 Beṉe' zan yesonxen cuingaque', na' zane' yesebec yic̱hje' gata' da' zc̱ha'o xmechwgaque'. Zane' yeso'e diža' ca güenṉa' chesone' na' yesaque' beṉe' ya'laže'. Yeseṉeye'e c̱he Diosen'. Bi yosozenague' c̱he x̱axṉa'gaque'. Bi yeso'e yeḻa' chox̱clen c̱he Diosen' na' bi yesape' ḻe' bala'aṉ.  
\v 3 Bi yesacde' beṉe', bi yesyezi'xen c̱he ḻježe', yeseṉe' mal c̱he beṉe' yoble, con yesonteze' bite'teze da' mal da' žan c̱hegaque', yesacchgüe' beṉe' znia, na' yesegue'ede' bite'tez da' nac da' güen.  
\v 4 Yosode ḻježgaque' ḻo na' beṉe' chesegue'ede' ḻegaque', bi yesežebe' yesone' bite'ze da' mal, yesone' xbab zjazaca'chgüe', na' yesaclaže' yesone' con da' chpe ḻegacze' na' bi yesaclaže' yesone' xbab c̱he Diosen'.  
\v 5 Ḻecze da' zan da' yesone' cont yesaque beṉe' chesonxenchgüe' Diosen', perw bi soa yeḻa' guac c̱he Diosen' len ḻegaque'. 
\p Bi gono' txen len beṉe' ca' cheson da' ca' ba gwnian'.  
\v 6 Beṉe' ca' cheson ca' chja'aque' liž no'ole beṉe' chesejḻe'daze', na' chesonḻede' ḻegaque' len diža' da' cheso'e. No'ol ca' zjadechgua xtoḻa'gaque', ḻe chesonteze' da' mal can' ža ḻo' lažda'ogaquen'.  
\v 7 No'ol ca' chosozenague' c̱he note'teze' že' gwzejni'ide' ḻegaque', perw na' bi chžin ža yesejni'ide' diža' ḻi c̱he Diosen'.  
\v 8 Cani'te da' Janes na' da' Jambres besegue'ede' Moisésen' na' bi gosaclaže' yosozenague' diža' ḻi da' be'len da' Moisésen' ḻegaque', na' ca'czen' nita' beṉe' gwxiye' ṉa'a chesegue'ede' diža' ḻi c̱he Diosen'. Nc̱hoḻ yic̱hjlažda'ogaque' yeḻa' güen da' mal c̱hegaquen', na' gague da' ḻi chesejnilaže' Diosen'.  
\v 9 Bi gac yesonḻede' beṉe' sša, ḻe yob gac c̱hegaque' can' goc c̱he da' Janes na' da' Jambres, žin ža cate' yezica'chle beṉe' yesacbe'ede' chosozejni'ide' clele yeḻa' bi chejni'i c̱hegaque'. 
\s1 Consejw da' zelagüe' da' bnežjw Pablon' Timoteon' 
\p  
\v 10-11 Na' le' Timoteo, ṉezeczedo' can' ba bzejni'ida' le' na' can' zoa' chona' da' güen. Ṉezdo' chi' yic̱hja' gona' yogo'ḻoḻ da' ža Diosen'. Ṉezdo' zoac̱hac̱ha' chejnilaža' Diosen' bite'tez da' chac c̱hia'. Na' ṉezdo' napa' yeḻa' chxenḻaže' len ḻjež beṉac̱ha' na' zoacza' chacda' ḻegaque'. Ṉezdo' bi chbejyic̱hja' xšin Diosen' da' chona', ḻa'czḻa' da' zan da' ba bosoc̱hi bososaca' beṉe' neda'. Na' ṉezdo' da' ca' gosonde' neda' cate' gwzoa' ciuda Antioquía na' cate' gwya'a yež Iconio len yež Listra, na' can' gwdi gwxaca'. Na' ṉezdo' X̱ancho Jesucriston' bosle' neda' ḻo yogo' da' ca' da' goc c̱hia'.  
\v 12 Da' ḻi yesenita' beṉe' yosoc̱hi yososaque' note'tez chio' chejnilaže'cho Cristo Jesúsen', chio' chi' yic̱hjcho chzenagcho c̱he'.  
\v 13 Beṉe' mal beṉe' güex̱oayag ca' šja'acze' yesonche' da' xiṉjen', yeseziye'e beṉe' na' ḻecze yesejḻe'e c̱he diža' güenḻaže' da' yesoe' beṉe' yoble. 
\p  
\v 14 Na' le' Timoteo, cheyaḻa' soac̱hac̱ho' gwzenago' c̱he da' ca' chejni'ido' c̱he Criston'. Ṉezdo' naquen diža' ḻi, ḻe bzejni'iton' le'.  
\v 15 Cate' nactio' bidao' ba nombi'o Xtiža' Diosen' da' nyojen. Na' Xtiže' nan' chzejni'in chio' cheyaḻa' šejnilaže'cho Cristo Jesúsen' cont gata' yeḻa' mban c̱hecho toḻi tocaṉe.  
\v 16 Cuin Diosen' bzejni'ide' beṉe' ca' bosozoj Xtižen' cont bosozoje' xbab c̱hen'. Da'nan' doxen Xtiža' Diosen' dan' nyojen zaca'chguan da' chzejni'in chio' c̱he Diosen', chdiḻen chio' cate' choncho da' xiṉj, na' chzejni'in chio' nac goncho cont ṉa Diosen' choncho da' güen.  
\v 17 Na' chio' chejnilaže'cho Diosen', Xtižen' chzejni'in chio' yogo'ḻoḻ da' cheyaḻa' ṉezecho cont soacho goncho yogo' da' güen. 
\c 4  
\p  
\v 1 Yid X̱ancho Jesucriston' da' yoble cont gone' yeḻa' justis c̱he yogo' beṉac̱h, beṉe' ṉe' zjamban lente beṉe' ba gosat, na' caten' yide' da' yoble nach solao ṉabi'e yežlio nga. Na' Timoteo, Diosen' len X̱ancho Jesucriston' zjaṉezde' chona' mandadw gono' da' quinga:  
\v 2 C̱hix̱jue'edo' xtiža' Diosen' cate' nḻatjo' na' cate' chacdo' bi nḻatjo'. Be'len beṉe' diža' cont yeseṉezde' chesone' da' xiṉj, gwdiḻ ḻegaque' c̱he da' malen' chesone' cont yesyetiṉjden', na' gwdap yeḻa' chxenḻaže' bzejni'ide' da' cheyaḻa' yesone'.  
\v 3 Gwžin ža cate' bi yesaclaže' beṉe' yosozenague' xtiža' Diosen' da' chzejni'icho da' naquen da' ḻi, na' yosotobe' beṉe' yosozejni'ide' ḻegaque' diža' yoble da' yesazlaže' ḻegacze'.  
\v 4 Yesebejyic̱hje' bich yosozenague' c̱he diža' ḻin' na' yosozenagche' c̱he diža' da' chesaljlaže' beṉe'.  
\v 5 Perw ca naco' le', cheyaḻa' gaco' beṉe' yo'o xbab, na' gwdap yeḻa' chxenlaže' len yogo'te da' sacazi'o, na' soatezo' go'o diža' güen c̱he Jesucriston' do yic̱hj do lažo'. Ben yogo' da' gwlo'o Diosen' ḻo nao' gono'. 
\p  
\v 6 Na' ca nac neda', ba zoa yesote' neda', da' ḻi ba chžin ža šjayzoa' len Diosen'.  
\v 7 Na' chebeda' guac ṉia' do yic̱hj do laža' ba gwdiḻlena' da' chgue'e Diosen'. Ba bena' yogo'ḻoḻ da' gwlo'o Diosen' ḻo na' gona' na' ba gwzoac̱hac̱ha' chejnilaža' Jesucriston' na' ṉe' zoac̱hac̱hcza'.  
\v 8 Na' cate' šjayzoa' len Diosen', gone' cont soa' mba da' bena' güen šlac mbana'. X̱ancho Jesucriston' zeje' to ḻicha, na' cate' žin ža c̱hoglagüe' nac gac c̱he yogo'ḻoḻ beṉe', gague neda'zen' gone' soa' mba, san yogo' nochle beṉe' chesyebede' chesebeze' baten' yide' da' yoble, ḻecze gone' cont ḻegaque' yesenite' mba. 
\s1 Da' chaclaže' Pablon' gon Timoteon' 
\p  
\v 9 Ben byen con ga zelao saque'do' yob yido' nga.  
\v 10 Ben ca', ḻe Demas ba gwlejyic̱hje'nda' na' ba zjayde' yež Tesalónica da' chi'chgua yic̱hje' bin' gata' c̱he' ḻo yežlio nga. Na' Crescente ba zeje' Galacia na' Titon' ba zeje' Dalmacia.  
\v 11 Yetoga Lucas nga'aṉlen neda' nga. Na' c̱he'šco' Marcos cate' yido', cont gaclene' neda' len xšin Dios da' chona'.  
\v 12 Ca nac Tíquicon', ba gwseḻa'ne' ciuda Efeso.  
\v 13 Na' chaclaža' gox̱o' xadoṉ c̱hia' da' bocua'aṉa' yež Troas liž Carpo cate' yido', na' ḻecze gox̱o' libr ca', na' da' žialaoch gox̱o' yid ca' da' ba zjanyoj. 
\p  
\v 14 Alejandro beṉe' güec̱hac̱h yan' ba benchgüe' mal len neda'. X̱ancho Diosen' gwnežjue' ḻe' castigw c̱he da' malen' bene'.  
\v 15 Na' gwsaco' len ḻe', ḻe chonchgüe' clele len xtiža' Diosen' da' chyix̱jue'echo. 
\p  
\v 16 Cate' bosodie' neda' ḻo na' justis ca' da' nechw, nono gwzoa no gaclen neda', yogo' beṉe' ca' gocda' yesaclen neda' gosebejyic̱hje'nda'. Diosen' yezi'xene' c̱hegaque' da' bi gosaclene'nda'.  
\v 17 Bia'cze X̱ancho Jesucriston' gwzoalene' neda' na' goclenchgüe' neda' cont bia' xtižen' len yogo' beṉe' ca' že' na', beṉe' bi zjanac beṉe' Israel. Na' bosle' neda' ḻo na' yeḻa' goten'.  
\v 18 Na' ṉezda' yoslacze X̱ancho Jesucriston' neda' ḻo yogo' da' mal da' gac c̱hia', na' guaclencze' neda' šlac žin ža šjayzoalena'ne' gan' zoe' chnabi'e. Cheyaḻa' gonxenchwne' toḻi tocaṉe. Can' gonšcaczcho. 
\s1 Pablo chguape' tiox yeto c̱hope' na' chṉablaže' gaclen Diosen' ḻegaque' 
\p  
\v 19 Gwguapšco' tiox Prisca na' Aquila na' ḻecz ca' beṉe' ḻo' yo'o c̱he Onesíforo.  
\v 20 Erasto bega'aṉe' ciuda Corinto, na' bocua'aṉa' Trófimo yež Mileto, ḻe gocšende'.  
\v 21 Ben con ga zelao saque'do' cont yido' cate' za' žin tiemp zag. Eubulo, Pudente, Lino, Claudia na' len yezica'chle beṉe' chesejnilaže' Jesucriston' nga chosoguape' le' tiox. 
\p  
\v 22 Chṉaba' soašca X̱ancho Jesucriston' len le' na' gaclenšca Diosen' yogo'le. Da' na'zen' chzoja'.