\id 1TI  
\h 1 Timoteo 
\toc1 CART NECHW DANꞋ BZOJ POSTLW SAN PABLO C̱HE TIMOTEO 
\toc2 1 Timoteo 
\toc3 1 Ti. 
\mt1 CART NECHW DANꞋ BZOJ POSTLW SAN PABLO C̱HE TIMOTEO 
\c 1  
\s1 Pablo chzoje' cart c̱he Timoteo 
\p  
\v 1 Neda' Pablo chzoja' cart nga c̱hio' le' Timoteo. Naca' postlw c̱he Jesucriston', ḻe Diosen' len X̱ancho Jesucriston' gosone' mandadw chona' xšinen'. Dios nan' noṉe' chio' yeḻa' mban toḻi tocaṉe na' X̱ancho Jesucriston' chone' cont zoacho lez šjayzoacho len ḻe' toḻi tocaṉe.  
\v 2 Chzoja' le' Timoteo, ḻe naco' ca dogualje xi'iṉa' da' bzejni'ida' le' cont chejnilažo' Criston'. Na' chṉablaža' ṉita' X̱acho Diosen' len X̱ancho Jesucriston' yesyeyaše' yesyeži'ilaže'de' le' na' yesaclene' le', na' yesone' cont soa cuezo' binḻo len xbab da' yo'o ḻo' yic̱hjlažda'oguon'. 
\s1 Nita' beṉe' chosozejni'ide' diža' güenḻaže' 
\p  
\v 3-4 Caten' gwza'a Efeson' gwya'a Macedonian' gwṉeyoeda' le' cont bega'aṉo' Efeson' ṉec̱he nita' baḻ beṉe' chosozejni'ide' beṉe' Efeso ca' diža' güenḻaže'. Con bi cheyož yedo chesonchgüe' xbab c̱he diaža c̱he da' x̱ozxta'ocho ca' na' cheso'e zan cuent c̱he ḻegaque'. Na' da' yoble chṉeyoeda' le' gono' mandadw bich yosozejni'ide' c̱he da' ca'. Dan' chosozejni'ide' chonen ga yesacžejlaže' beṉe', na' bi chaclenen yesone' dan' gwlo'o Diosen' ḻo na'cho gon chio' ba chejḻe'cho xtižen'. 
\p  
\v 5 Na' gono' mandadw yesone' güen, ḻe chaclaža' yesenite' yesaque ḻježe'. Na' cont bibi gwžon yesaque ḻježe', cheyaḻa' yesaque' beṉe' laždao' xilaže', cheyaḻa' yesone' dan' ṉezecho naquen güen yogo' ṉi'a, na' cheyaḻa' yesejḻi'e diža' ḻi c̱he Diosen' do yic̱hj do laže'.  
\v 6 Beṉe' ca' chosozejni'ide' diža' güenḻaže' bi chesone' ca', na' da'nan' cheso'e diža' da' bibi zaca'.  
\v 7 Ḻa'czḻa' chesaclaže' yosozejni'ide' ley dan' bzoj Moisésen', bi chesejni'ide' dižan' cheso'e na' ṉeca chesejni'ide' da' ca' chesene' cheyaḻa' goncho. 
\p  
\v 8 Ṉezecho ley nan' naquen güen con še gwc̱hinchon can' cheyaḻa' gwc̱hinchon.  
\v 9 Na' ḻecze ṉezecho ley nan' gague chosbagan' beṉe' cheson da' güen, san chosbagan' beṉe' cheson da' mal na' beṉe' cheson güedenag len dan' nonen mandadw goncho. Chosbagan' beṉe' bi chosozenag c̱he Diosen', na' beṉe' chesonteze' da' malen', na' beṉe' bi chesape' Diosen' bala'aṉ ṉeca chesonxene'ne', na' beṉe' chesot no x̱axṉa'gaque', na' len nochle beṉe' güet beṉe'.  
\v 10 Ḻecze chosbagan' beṉe' chesata'lene' no'ole bi nac xo'olgaque' o beṉe' byo bi nac beṉe' c̱hegaque', na' no beṉe' byo beṉe' chesata'lenteze' ḻjež beṉe' byoe' gualaz no'ole, na' beṉe' chesec̱he'x̱ox̱je' beṉe' yoble cont chesote' ḻegaque' chesezi'e mechw, na' beṉe' ca' chesonḻaže', na' beṉe' ca' cheso'e diža' güenḻaže' lao justis, na' note'teze beṉe' cheson da' zej clele len diža' güen da' ba bzejni'i Diosen' chio'.  
\v 11 Na' diža' güen da' ba bzejni'i Diosen' chio' zaca'chguan, na' Dios ben' zoa mba juisyw, ḻe'na' ba gwlo'en ḻo na' chyix̱jue'edan' beṉe'. 
\s1 Pablon' cho'e yeḻa' chox̱clen c̱he Diosen' na' c̱he Jesucriston' 
\p  
\v 12 Choa' yeḻa' chox̱clen c̱he X̱ancho Jesucriston' ben' chon cont chac chyix̱jue'eda' xtiže'na'. Chox̱clenen' chacde' gona' xšinen' can' chazlaže' na' da'nan' gwleje'nda' gonan'.  
\v 13 Gwleje' neda' ḻa'czḻa' cana' bia' diža' bya' c̱he' na' bgue'eda'ne' na' bc̱hi bsaca' beṉe' ca' chesonxene' ḻe'. Na' ḻa'czḻa' bena' ca', Diosen' beyaše' beži'ilaže'de' neda', ḻe biṉa' šejnilaža'ne' ca hora' na' biṉa' gacbe'eda' chona' clele.  
\v 14 Nach X̱ancho Jesucriston' nži'ilaže'chgüede' neda' na' goclene'nda' cont gwyejnilaža'ne', na' ṉa'a chacda'ne' na' ḻecze chacda' yezica'chle beṉe'. 
\p  
\v 15 Da' nga naquen to diža' ḻi da' zaca' šejḻe'cho: Jesucriston' bide' yežlio nga cont beque'e xtoḻa' chio' beṉe' güen da' xiṉj. Na' chacda' neda' naca' beṉe' ḻa'zelagüe gwyanch xtoḻa'.  
\v 16 Na' ḻa'czḻa' naca' beṉe' ḻa'zelagüe gwyanch xtoḻa', Jesucriston' beyaše'de' neda' na' bezi'xene' c̱hia' cont blo'e napchgüe' yeḻa' chxenḻaže'. Bene' ca' cont beṉe' za' za'ac yesacbe'ede' nape' yeḻa' chxenḻaže' xen na' yesejnilaže'ne' na' gata' yeḻa' mban c̱hegaque' toḻi tocaṉe.  
\v 17 Cheyaḻa' gonxencho Diosen' ben' nac Rey c̱hechon' toḻi tocaṉe. Gague da' te c̱hen'. Zoacze' ḻa'czḻa' bi chle'echone' na' naque' ḻa'zelagüe beṉe' sina'. Totc ḻe' zaque' gonxencho na' gapchone' bala'aṉ toḻi tocaṉe. Na' can' gonšcaczcho. 
\p  
\v 18 Xi'iṉa' Timoteo, ben xbab c̱he dižan' gosoe' beṉe' ca' bosozende' le' can' gwna Diosen' c̱hio' cana'. Na' can' ba gose'e le' gono' xšin Diosen', ḻecze can' chṉeyoeda' le' gonon' do yic̱hj do lažo', ḻa'czḻa' še gacdo' zdebe gonon'. Soac̱hac̱ho' šejnilažo' Diosen', na' soatezo' gono' cont ṉezdo' ḻo' laždaguo' bibi da' mal chono'.  
\v 19 Baḻ beṉe' chesonteze' da' malen' ḻa'czḻa' zjaṉeztede' ḻo' lažda'ogüe' bi cheyaḻa' yesonen', na' da'nan' ba gosebejyic̱hje' bich chesejnilaže' Diosen'.  
\v 20 Can' goc c̱he Himeneo na' c̱he Alejandro. Da'nan' ba gwṉabda' Diosen' yesaque' ḻo na' Satanás dan' chnabia' da' x̱igüe' ca', na' gonen con ca chaclažen' len ḻegaque' cont yesacbe'ede' bi cheyaḻa' yeseṉeye'e c̱he Diosen'. 
\c 2  
\s1 Dan' cheyaḻa' ṉabecho Diosen' gone' 
\p  
\v 1 Na' dan' nac da' žialao xen gon chio' chonxencho Diosen': cheyaḻa' ṉabecho Diosen' goṉe' bi dan' chyažje chio' lente dan' cheseyažje yogo'ḻoḻ beṉe', na' ṉabechone' gaclene' yogo'ḻoḻ beṉe', na' güe'cho yeḻa' chox̱clen c̱he Diosen' c̱he bi da' güen da' chesac c̱he yogüe'.  
\v 2 Cheyaḻa' ṉabecho Diosen' gaclene' beṉe' gwnabia' ca', no rey, no gobernador na' nochle beṉe' ca' chesenabia', cont soa cuezcho binḻo na' bibi gwžon gonxencho Diosen', ṉeca gata' da' gwžon goncho bichle da' cheyaḻa' goncho.  
\v 3 Naquen güen ṉabecho Diosen' gaclene' yogüe' na' naquen da' chazlaže' Diosen', Dios ben' noṉe' chio' yeḻa' mban toḻi tocaṉe.  
\v 4 Ḻe chaclaže' gwnežjue' yeḻa' mban toḻi tocaṉe c̱he yogo'ḻoḻ beṉe' na' chaclaže' yesejni'ide' diža' ḻi c̱he'.  
\v 5 Toz Diosen' zoa beṉe' zaca' yesonxen yogo'ḻoḻ beṉe', na' ḻecz toz ben' chozoe' chio' binḻo len Diosen', ḻe'na' Jesucriston' ben' golje beṉac̱h.  
\v 6 Jesucristw nan' bnežjw cuine' gote' ṉec̱he da' mal da' goson yogo'ḻoḻ beṉac̱h, na' cate' bžin ža Diosen' bžie' bia', cana' bene' cont goseṉeze beṉac̱hen' c̱he'.  
\v 7 Na' Diosen' gwleje' neda' cont naca' postlw c̱he' na' cont chyix̱jue'eda' xtiže'. Choa' diža' ḻi, bi chonḻaža', ḻe naca' Criston' txen, gwleje'nda' cont chzejni'ida' beṉe' ca' bi zjanac beṉe' Israel diža' ḻi c̱he' cont yesejnilaže'ne'. 
\p  
\v 8 Na' dan' che'nda' gac gate'teze chesedop chesežague' chesonxene' Diosen', chaclaža' beṉe' ca' yosoḻ güiže' Diosen' yesaque' beṉe' laždao' xilaže' cont yeseḻis na'gaquen' laogüen' sin cbi yeseže'e beṉe' o yosošašlene' beṉe'.  
\v 9 Na' ca nac no'ol ca' chesonxen Jesucriston', bi cheyaḻa' yesebec yic̱hjgaque' še nite' xdanchgua, še yosoguaḻe' bga o ret de oro o de perlas dan' naquen da' zaque', še nac yiša' yic̱hjen' xdanchgua, na' še nac xagaque' da' chzaca' la'ay.  
\v 10 San cheyaḻa' yesebec yic̱hjgaque' yesone' da' güen ca chaclaže' Diosen' yeson yogo' beṉe' chesejnilaže'ne'.  
\v 11 Na' no'ol ca' ḻecze cheyaḻa' ṉite' šize yosozenague' c̱he beṉe' ca' chososed chosolo'ede' xtiža' Diosen', na' yesone' con da' yese'ene'.  
\v 12 Neda' bi chona' latje cont no'ol ca' yosozejni'ide' beṉe' byo latje lagüe', na' ṉeca choṉa' latje yesenabi'e beṉe' byo. Cheyaḻa' yesenite' šize,  
\v 13 ḻe cate' Diosen' bene' beṉac̱hen' zgua'tec bene' Adánṉa' na' gwdechle bene' Evan'.  
\v 14 Na' cate' Satanás dan' chnabia' da' x̱igüe' ca' gwx̱oayaguen beṉe' nechw ca', gague gwx̱oayaguen Adánṉa', san gwx̱oayaguen Evan' cont bene' dan' gwna Diosen' bi gone', na' da'nan' beyaque' beṉe' güen da' xiṉj.  
\v 15 Perw na' ḻa'czḻa' no'ol ca' chesežaglagüe' chesezan xi'iṉgaque', žin ža šjasyenite' len Diosen' še zjanite' chesejnilaže'ne' na' še zjanite' chesacde'ne' na' chesacde' yezica'chle beṉe', na' še zjanite' chesone' can' chazlaže' Diosen' len yeḻa' sina' da' ba bnežjue' ḻegaque'. 
\c 3  
\s1 Can' yeson beṉe' ca' yosogüia yeseṉe'e yezica'chle beṉe' chesonxene' Diosen' 
\p  
\v 1 De to diža' da' zaca' šejḻe'cho da' žan: “Beṉe' chesaclaže' yosogüia yeseṉe'e yezica'chle beṉe' chesonxene' Diosen', chesaclaže' yesone' to da' güen, še ca'.”  
\v 2 Na' beṉe' gwḻane' gone' žin dan' nac ca' cheyaḻa' soateze' gone' da' güen yogo' ža sin cbi gone' da' zaca' tiḻchone'. Cheyaḻa' soa toz no'ol c̱he', na' cheyaḻa' gaque' beṉe' yo'o xbab, na' gaque' beṉe' chnabia' cuine' chone' da' güen, na' gaque' beṉe' chon da' zej toḻi cont beṉe' yoble yesape' ḻe' bala'aṉ. Cheyaḻa' yebede' gwlebe' beṉe' liže', na' cheyaḻa' gaque' beṉe' chac chzejni'ide' xtiža' Diosen' binḻo.  
\v 3 Beṉe' chzože bi gac gwḻane' žinṉa'. Bi cheyaḻa' gaque' beṉe' yolao chdiḻe chšaše'. Cheyaḻa' gaque' beṉe' šagüe' beṉe' chon güen len yezica'chle beṉe', na' bi cheyaḻa' gaque' beṉe' chon znia, ṉeca selaže'chgüe' gone' gan mechw.  
\v 4 Na' cheyaḻa' gaque' beṉe' ṉeze can' gone' cont xi'iṉe' ca' na' nochle beṉe' nita' liže' yosozenague' c̱he' na' yesape' ḻe' bala'aṉ.  
\v 5 Ḻe še bi ṉezde' nac gone' cont xi'iṉe' ca' yosozenagbe' c̱he' na' yesapbe' ḻe' bala'aṉ, bi gac gone' cont beṉe' chesedop chesežag chesonxene' Diosen' yosozenague' c̱he'.  
\v 6 Bi cuejle beṉe' za' chzolao chejnilaže' Diosen' cont gwgüia ṉe'e beṉe' ca' chesonxene' Diosen', ḻe beṉe' coben' xož gonxen cuine' na' tena' Diosen' güe'e ḻe' castigw še gone' ca'. Can' goc c̱he Satanásen' cani'te cate' benxen cuinen na' Diosen' bebejen' gan' zoe'na'.  
\v 7 Na' beṉe' cuejle cheyaḻa' soe' gone' cont beṉe' ca' bi zjanac txen yeseṉezde' chone' güen, ḻe še gone' da' malen' yeseṉe' beṉe' c̱he' na' Satanásen' co'oyeḻan' ḻe' gonche' da' malen'. 
\s1 Beṉe' ca' yeson žin bixjw 
\p  
\v 8 Na' ḻecze cate' cuejle beṉe' yeson žin bixjw da' chata' len beṉe' ca' chesonxene' Diosen', ḻe cuej beṉe' cheson güen cont gapcho ḻegaque' bala'aṉ. Ḻecze cheyaḻa' yesaque' beṉe' chesoe' diža' ḻi da' šejḻe'cho, beṉe' bi zjayolagüe' chesezožde', na' beṉe' bi yesezelaže' yeseṉi'e c̱he xšin Diosen' dan' yesone'na'.  
\v 9 Cheyaḻa' yesaque' beṉe' chesejḻe'e cayaṉen' ba bzejni'i Diosen' chio' c̱he Jesucriston' dan' nono gwṉeze cana', na' beṉe' cheson da' güen cont yeseṉezde' ḻo' yic̱hjlažda'ogüe' chesone' can' chazlaže' Diosen'.  
\v 10 Na' cate' za' cuejle beṉe' ca' yeson žin bixjwna', ḻe ṉa'yaṉe' can' chesonen', na' še gata'bia' chesonen' binḻo bibi chesec̱hoe', nachen' cuejle ḻegaque'.  
\v 11 Na' no'ol ca' yeson xšin Diosen' ḻecze cheyaḻa' yesone' cont gapchone' bala'aṉ. Bi cuejle no'ole chṉie' c̱he beṉe' o no'ole yolagüe' sožde', san cuejle no'ol ca' yesenite' yesone' can' chazlaže' Diosen'.  
\v 12 Na' cate' cuejle beṉe' byo yeson žin bixjw da' chata' ladjo beṉe' ca' chesonxene' Diosen', ḻe cuej beṉe' zoa toze no'ol c̱he', na' beṉe' chon cont bi' c̱he' ca' na' nochle beṉe' nita' liže' chosozenague' c̱he'.  
\v 13 Ḻe še beṉe' ca' cheson žin bixjon' yesone' binḻo dan' yo'o ḻo na'gaque' yesone', nach yesejnilaže'chgüe' Jesucriston' sin cbi yesežebe', na' yezica'chle beṉe' yesape' ḻegaque' baḻa'aṉ. 
\s1 Da' chejni'icho c̱he Diosen' dan' nono gwṉeze cana' 
\p  
\v 14 Chzoja' le' da' quinga da' cheyaḻa' gonḻe ḻa'czḻa' zoa' lez yob yida' gan' zon',  
\v 15 cont še šeda' ba ṉezdo' nac cheyaḻa' yeson beṉe' ca' zjanac diaža c̱he Diosen', ḻe chio' chdop chžagcho chonxencho Jesucriston' naccho diaža c̱he Diosen' ben' zoa toḻi tocaṉe. Na' chio' chdop chžagcho chonxenchone' yo'o ḻo na'cho choncho cont chesombia' beṉe' diža' ḻi c̱he Diosen'.  
\v 16 Da' ḻicze da' zaca'chgua dan' ba bzejni'i Diosen' chio'. Cana' nono gwṉeze da' quinga dan' bzejni'ide' chio' c̱he Jesucriston', žan: 
\q1 Diosen' bide' golje' beṉac̱h, 
\q1 na' Spiritw c̱he Diosen' blo'en naque' beṉe' güen juisyw. 
\q1 Na' beṉe' ca' zjanac angl c̱he Diosen' bedeseṉe'e ḻe'. 
\q1 Na' bžin ža Diosen' bene' cont beyepe' yaba gan' yo'ochgua be'ni'. 
\q1 Na' beṉe' ca' cheso'e xtižen' ba goseyix̱jue'eden' len beṉe' že' nación zito', 
\q1 na' zan beṉe' že' ḻo yežlion' ba chesejḻe'e c̱he'. 
\c 4  
\s1 Žin ža baḻ beṉe' yesebejyic̱hje' diža' ḻi c̱he Diosen' 
\p  
\v 1 Na' Spiritw c̱he Diosen' ba ben' diža' ḻi cont šejni'icho žin ža cate' baḻ beṉe' yesebejyic̱hje' diža' ḻi c̱he Diosen' dan' chejḻe'cho na' yesejḻe'e c̱he bi da' yeson da' x̱igüe' ca' cont yesex̱oayaguen ḻegaque'.  
\v 2 Da' x̱igüe' ca' yesonen cont ṉita' beṉe' yosozejni'ide' diža' güenḻaže' da' siyen' beṉe', na' beṉe' ca' yosozejni'ide' diža' güenḻažen' bibi yesacde' ḻo' yic̱hjlažda'ogüe' caten' yeseziye'e beṉe'.  
\v 3 Yosožone' yosošagna' beṉe' na' yosožone' ye'ej gagwcho baḻ yeḻa' guagw, ḻa'czḻa' Diosen' bene' cont zjade yeḻa' guagw ca' cont chio' chonxencho Criston' na' nombia'cho diža' ḻi c̱hen' gagwchon na' güe'cho yeḻa' chox̱clen c̱he'.  
\v 4 Yogo' dan' ben Diosen' naquen güen na' bi naquen da' gue'echo, con še güe'cho yeḻa' chox̱clen c̱he' caten' gagwchon.  
\v 5 Na' ṉezecho guac gagwcho bite'teze yeḻa' guagw, ḻe ba gwna Diosen' naquen güen, na' güe'cho yeḻa' chox̱clen c̱he' cate' gagwchon. 
\s1 Can' gon Timoteo xšin Diosen' 
\p  
\v 6 Ca nac beṉe' ḻjež chio' chonxencho Jesucriston', cheyaḻa' gwzejni'ido' ḻegaque' da' quinga ba gwnia' le' cont gacleno' ḻegaque' can' chazlaže' Jesucriston', ḻe gwleje' le' cont gwzejni'ido' beṉe'. Ḻecz gonen c̱hac̱hlažo' še gwzejni'ido' beṉe' xtiža' Diosen' dan' chejḻe'cho, ḻe naquen to diža' güen, na' ba bzenago' c̱hen do yic̱hj do lažo'.  
\v 7 Bi gwzenago' c̱he diža' güenḻaže' dan' chesaljlaže' beṉe' bi chesonxene' Diosen'. Ben byen soaczo' gono' can' chazlaže' Diosen'.  
\v 8 Ṉezecho cate' chda ṉi'a na'cho chaclenen cuerp c̱hechon' late'. Perw na' cate' choncho can' chazlaže' Diosen', chaclenchen chio' cont zoa chbezcho binḻo ṉa'a na' ḻecz ca' cate' šjayzoacho len ḻe' toḻi tocaṉe.  
\v 9 Can' ža to diža' dan' zaca' šejḻe'cho na' dan' zaca' gwzenagcho c̱hen do yic̱hj do laže'cho.  
\v 10 Na' cont choncho can' chazlaže' Diosen', da'nan' chonchguacho xšinen' na' chyo chc̱hejlaže'cho cate' chzi'diža' beṉe' chio', ḻe ṉezecho Diosen' zoe' toḻi tocaṉe na' zoacho lez gone' güen len chio'. Ḻe' chaclaže' gwnežjue' yeḻa' mban toḻi tocaṉe c̱he yogo' beṉac̱h, na' can' nacczen gone' len beṉe' chesejnilaže' Jesucriston'. 
\p  
\v 11 Da'nan' bzejni'i beṉe' da' ca' ba gwnian' na' ben mandadw yosozenague' c̱he yogo'czen.  
\v 12 Bi go'o latje yosozoa beṉe' le' šḻa'ale lagüe da' naco' beṉe' xcuide'. Len xtižo' na' len da' chono' ben güen cont yogo' beṉe' chesejnilaže' Criston' yesape' le' bala'aṉ. Len xtižo' na' len da' chono' blo'e ḻegaque' ca cheyaḻa' yesacde' Diosen' na' beṉe' ḻježgaque', ca cheyaḻa' yesenita'c̱hac̱he' yesejnilaže'ne' na' ca cheyaḻa' yesaque' beṉe' laždao' xilaže'.  
\v 13 Na' ṉa'a šlac biṉa' yida' da' yoble, gwlec yic̱hjo' gwlabo' Xtiža' Diosen' dan' nyojen len beṉe' ca' chesedop chesežag chesonxene' Jesucriston'. Na' gwṉeyoede' yosozenague' c̱hen na' bzejni'ide' bi zejen.  
\v 14 Bi gatlažo' dan' gwlo'o Diosen' ḻo nao' gono' caten' gosex̱oa na' beṉe' blao ca' yic̱hjon', beṉe' ca' chosogüia cheseṉe'e ḻjež chio' chonxencho Diosen', bosozende' le' gwlej Diosen' gono' xšinen'. 
\p  
\v 15 Cheyaḻa' cuec yic̱hjo' do yic̱hj do lažo' gono' da' ca' gwlej Diosen' le' gono' cont yogo' beṉe' yesele'ede' zejcho' chono' da' güen.  
\v 16 Na' gwsaco' can' soa cuezo' cont soac̱hac̱ho' gono' con can' chazlaže' Diosen' na' soac̱hac̱ho' gwzejni'ido' beṉe' xtiža' Diosen' con can' naquen. Ben ca' cont gaclenen le' na' ḻecze gaclenen beṉe' ca' chosozenag xtižon' cont šjayzoalenḻe Diosen' cate' žin ža. 
\c 5  
\s1 Can' cheyaḻa' gon Timoteo len yezica'chle beṉe' chesejnilaže' Criston' 
\p  
\v 1 Še no beṉe' byo gole chone' bi da' mal, bi tiḻo'ne', san gwṉeyoede' cuejyic̱hjen', con ben xbab naque' x̱ao'. Na' še no beṉe' xcuide' chone' bi da' mal, gwṉeyoede' cuejyic̱hjen', con ben xbab naque' beṉe' bišo'.  
\v 2 Na' še no no'ol gole chone' bi da' mal, gwṉeyoede' cuejyic̱hjen', con ben xbab naque' xṉao'. Na' še no no'ol xcuide' chone' bi da' mal, gwṉeyoede' cuejyic̱hjen', con ben xbab naque' beṉe' zano'. Cheyaḻa' gwsaco' cont gaco' beṉe' laždao' xilaže' len ḻegaque'. 
\p  
\v 3 Chio' chdop chžagcho chonxencho Criston' cheyaḻa' gwnežjwcho da' cheseyažje no'ol ca' ba gosat beṉe' c̱hegaque' še da' ḻi zjanaque' beṉe' chyažj chc̱hine.  
\v 4 Perw še nita' no xi'iṉgaque' no xesoagaque', bzejni'ide' ḻegaque' cheyaḻa' yosonežjue' da' cheseyažje no'ol ca', ḻe no'ol ca' ba bososgole' ḻegaque', na' Diosen' chaclaže' yesone' güen len ḻegaque' cont yosolo'e chesejnilaže'ne'.  
\v 5 No'ol ca' nono zoa beṉe' gwnežjw ḻegaque' da' cheseyažjde' na' zjanaque' dogualje güezebe, yesenite' lez gaclen Diosen' ḻegaque' na' do ža do yel yesenite' yeseṉabde'ne' gaclene' ḻegaque'.  
\v 6 Perw no'ol güezeb ca' chesacde' yesone' con ca žan c̱hegaque', len Diosen' yic̱hjlažda'ogaquen' naquen ca c̱he to beṉe' ba got ḻa'czḻa' ṉe' zjambane'.  
\v 7 Ben mandadw ṉec̱he beṉe' ca' chesedop chesežag chesonxene' Jesucriston' yesone' can' žia' nga na' bibi da' mal yesone' da' zaca' no tiḻe ḻegaque'.  
\v 8 Še no beṉe' bi chaclene' cont gata' da' chyažje beṉe' zjanac diaža c̱he', ba bzoe' šḻa'ale xtiža' Diosen' dan' chejḻe'cho c̱hen, na' malech chone' ca beṉe' bi chesejnilaže' Jesucriston'. Na' ḻeca da' mal chone' še bi chaclene' beṉe' ḻo' yo'o c̱he'. 
\p  
\v 9 Quinga ṉezdo' no no'ol güezeb ca' cheyaḻa' gwc̱helo' ḻe'e yiš cont beṉe' ca' chesedop chesežag chesonxene' Jesucriston' yosogüe'ej yosoguagüe'ne' na' yosonežjue' bichle da' cheseyažjde'. Cuejle no'ol gol ca' beṉe' ba gwde gayon iz, no'ole goc toze beṉe' c̱he'.  
\v 10 Cuejle con no'ol ca' zjaṉeze beṉe' ba gosonchgüe' da' güen, ca no da' quinga: še bosgole' bi' c̱he' binḻo, še blebe' beṉe' liže', še goclene' yezica'chle beṉe' chesonxene' Diosen', še goclene' beṉe' ca' cheseyi chesezaque', o še ba bene' bite'tezechle da' güen. 
\p  
\v 11 Beṉe' ca' chesedop chesežag chesonxene' Jesucriston' bi cheyaḻa' yesego'o ḻo na'gaque' yosogüe'ej yosoguague' no'ol güezeb xcuide' ca'. Ḻe no'ol ca', gwžin ža yesaclaže' yosyošagne'e da' yoble,  
\v 12 na' yesape' doḻa' še yesebejyic̱hje' xšin Criston' dan' gosec̱hebe' yesone'.  
\v 13 Na' ḻecze no'ol güezeb xcuide' ca' bi naquen güen gwco'olaochwne' yeselaže' to to liž beṉe', cont bi yesaque' beṉe' xagüed, na' cont bi yesaque' beṉe' güetob diža'. Bi yeselaže' to to liž beṉe' yesezi'diže' bi chac, ḻe bi cheyaḻa' yesone' dan' nac ca'.  
\v 14 Da'nan' chaclaža' no'ol güezeb xcuide' ca' yosyošagne'e da' yoble na' yesezanche' cont yosyosgole' xi'iṉgaque' na' yosogüia yeseṉa' ližgaquen' binḻo, na' bi yesone' cont beṉe' ca' chesegue'ede' chio' yesene' chesone' da' mal.  
\v 15 Chnia' ca' ḻe nita' baḻ no'ol güezeb xcuide' ca' ba gosebejyic̱hje' Criston' na' chosozenague' c̱he Satanásen'. 
\p  
\v 16 Note'tez beṉe' chejnilaže' Criston', še nita' no'ol güezeb ḻo diaža c̱hegaque', cheyaḻa' yosonežjue'ne' da' yese'ej yesagüe' cont bibi da' zed yesone' len beṉe' ca' chesedop chesežag chesonxene' Criston'. Nach con no'ol ca' nono zoa yesaclen ḻegaque', ḻegacze' cheyaḻa' yesego'o ḻo na' beṉe' ca' chesedop chesežag chesonxene' Criston'. 
\p  
\v 17 Na' ca nac beṉe' blao ba zjanchoj chosogüia cheseṉe'e beṉe' ca' chesedop chesežag chesonxene' Criston' to to yež, še cheseṉe'e beṉe' ca' binḻo, da' xen cheyaḻa' yesacxene', na' cheyaḻa' gwnežjwchone' da' yesacbande'. Na' zaca'che' yesacxene' še cheseyix̱jue'ede' xtiža' Diosen' na' chosozejni'ide' beṉe' bi zejen.  
\v 18 Cheyaḻa' yesacxene' na' gwnežjwchone' da' yesacbande', ḻe nyoj Xtiža' Diosen' žan: “Bitw gwseyjwle cho'a go'ṉ cont ca gagwba' cate' chlej chšošjba' trigon' nec̱he choj xen'.” Na' ḻecz nyojen žan: “Beṉe' güen žin cheyaḻa' si' laxjue'.” 
\p  
\v 19 Bi gono' cuent cate' no beṉe' gagw xya c̱he to beṉe' blao beṉe' nchoj chgüia chṉe'e beṉe' ḻježe' chesonxene' Criston' še bi zoa yeto beṉe' o yec̱hope beṉe' co' da' baḻi.  
\v 20 Na' še da' ḻi ba bene' da' malen', cheyaḻa' tiḻo'ne' lao beṉe' ca' chesedop chesežag chesonxene' Criston' cont yezica'chle beṉe' ca' yesežebe' yesone' da' malen' nac ca'.  
\v 21 Na' toze can' cheyaḻa' gono' len note'teze beṉe', bitw ṉacho baḻ beṉe' gonxenchguachone' na' yebaḻe' gonchone' nacteze. Na' Diosen' len X̱ancho Jesucriston' na' len angl beṉe' ca' zjanchoj chesone' mandadw c̱he' zjaṉezde' chona' mandadw gono' yogo' da' ca' ba gwnia' nga.  
\v 22 Bitw yob cuejo' beṉe' güia ṉe'e ḻježe' cont gague leno' gapo' doḻa' še ben' gwlejon' gone' da' mal. Gwsaco' cont bibi doḻa' gapo'. 
\p  
\v 23 Na' dan' toḻize chac ḻi'o, bi ye'ejo' toze nis, san güe'ej late' güeje vino. 
\p  
\v 24 Baḻ beṉe' nacbia' chesone' da' mal na' yogo'ze beṉe' zjaṉezde' can' chesonen' ḻa'czḻa' biṉa' žin ža yesezi'e castigw c̱hen. Na' baḻ beṉe' chesone' da' malen' dan' ngaše' na' da' bi nacbia', perw žin ža gwlo'elaon.  
\v 25 Na' ḻecz ca' naquen len beṉe' ca' cheson da' güen, nacbia' še da' güenṉa' chesone', na' ḻa'czḻa' gague nḻa' da' güenṉa' chesone', bi ṉacho yega'aṉcze bagaše'ze dan' chesonen'. 
\c 6  
\p  
\v 1 Na' beṉe' ca' chesejnilaže' Criston', beṉe' zjanac esclavos, cheyaḻa' yesacbe'ede' beṉe' ca' zjanaque' x̱an žin c̱hegaquen' zjazaque' cont yosozenague' c̱hegaque'. Cheyaḻa' yesape' ḻegaque' bala'aṉ cont nono ṉe yeḻa' ya' c̱he Diosen', ṉeca no ṉe c̱he dan' chzejni'ichon'.  
\v 2 Beṉe' ca' zjanac esclavos, še x̱angaque' ḻecze chesejnilaže' Criston', bi cheyaḻa' yesone' xbab bi yosozenague' c̱hegaque' ṉec̱he zjanaque' txen chesonxene' Criston', san nachle cheyaḻa' yesone' žinṉa' do laže'che' na' cheyaḻa' yesacde' x̱an žin ca' ca beṉe' biše', lagüe zjanaque' txen chesejnilaže' Criston'. Bzejni'i da' ca' ba gwnia' cheyaḻa' yesone' na' gwṉeyoe beṉe' yosozenague' c̱hen. 
\s1 Cheyaḻa' soacho mbalaz len da' de c̱hecho 
\p  
\v 3 Nita' beṉe' chosozejni'ide' xbab c̱hegacze' na' bi chososed chosolo'ede' diža' ḻi c̱he X̱ancho Jesucriston' dan' ba blo'eda' le', na' chosozejni'ide' clele, chesene' bi chonen byen soacho goncho can' chazlaže' Diosen'.  
\v 4 Beṉe' ca' chosozejni'ide' dan' zej clele chesonxen cuingaque', chesacde' zjaṉezde' da' zan, ḻen bibi chesejni'ide'. Chosošaše' c̱he no diža' o c̱he bichle da' bi naquen da' zaque', chesacxi'e ḻježe', chesacyože' len ḻježe', chesezi'diža' ḻježe', na' chesacde' chesacxi'a beṉe' ḻegaque'.  
\v 5 Con bi cheyož chedo chesediḻ chosošaše', ḻe ba yo'o da' malen' ḻo' yic̱hjlažda'ogüe' na' bi zjanombi'e diža' ḻi c̱he Diosen'. Con chesacde' yososed yosolo'ede' xtiža' Diosen' cont yesaque' beṉe' gwṉi'a. Bi gono' txen len ben' cheson ca'.  
\v 6 Da' ḻi zoachguacho binḻo cate' choncho can' chazlaže' Diosen' na' cate' zoacho mbalaz len bi da' dao' de c̱hecho.  
\v 7 Ga'alcho bla'cho yežlion' na' ga'alcho cate' yeza'cho.  
\v 8 Na' še de da' che'ej chagwcho na' še de xaḻana'cho da' chyažjecho, cheyaḻa' soacho mba len da' ca'.  
\v 9 Beṉe' ca' chesezelaže' yesaque' beṉe' gwṉi'a chosozenague' c̱he da' malen' na' cheselažoe' ḻo na' gwxiyen'. Chesezelaže' da' zan da' gata' c̱hegaque' da' yesede c̱hen, na' da' ca' chesezelaže' chesonen mal len ḻegaque' na' žin ža yesebiaye'e.  
\v 10 Beṉe' chzelaže' mechw nach chzenague' c̱he bite'teze da' mal. Na' nita' beṉe' ba gosebejyic̱hje' diža' ḻi c̱he Diosen' dan' chesezelaže' mechon', na' da' zan dan' chosožaglaochgüe' yeḻa' güen da' mal c̱hegaque'na'. 
\s1 Cheyaḻa' cuec yic̱hj Timoteon' gone' xšin Criston' 
\p  
\v 11 Na' ca nac le' Timoteo, bi gono' can' cheson beṉe' ca', ḻe Diosen' gwleje' le' cont gono' xšinen'. Cuec yic̱hjo' gono' da' zej to ḻicha, ben con can' chazlaže' Diosen', soac̱hac̱ho' šejnilažo'ne', goque beṉe', byo bchejlaže' cate' de da' saca'zi'o, na' goc beṉe' šagüe'.  
\v 12 Gwlec yic̱hjo' ben con ga zelao saquedo' cont gono' yogo' dan' chazlaže' Diosen'. Na' bebe dan' šjayzo' len Diosen' toḻi tocaṉe, ḻe Diosen' gwleje' le' šjayzo' len ḻe', na' ba bi'o diža' lao beṉe' zan žo' chejnilažo'ne'.  
\v 13 Dios ben' chnežjo yeḻa' mban c̱he yogo' beṉac̱hen', c̱he beyix̱e' ca' na' c̱he bica'chle da' zjamban, na' Jesucristw ben' be' diža' ḻi lao Poncio Pilato, gwne' Diosen' gwseḻe'ne', ḻegaque' zjaṉezde' chona' mandadw  
\v 14 gwzenago' c̱he yogo' dan' ba gwnia' le', na' bi go'o latje ten ca'ze, cont bi gono' da' zaca' no tiḻe le'. Bzenag c̱he yogo' dan' bena' mandadw gono' žinte ža yid X̱ancho Jesucriston' da' yoble.  
\v 15 Ḻe cate' žin ža gwžia bia' Diosen', nach yide' da' yoble. Toz Dios nan' chnabi'e doxen na' zoachgüe' mba. Ḻen' naque' Rey ben' chnabi'e yezica'chle rey ca', na' naque' X̱ancho ben' chnabi'e yezica'chle beṉe' gwnabia'.  
\v 16 Totec Dios nan' bi ṉacho žin ža gate'. Na' catec yo'ochgua be'ni' gan' zoen', nono gac bigue' gaḻa'ze gan' zoe'na'. Nono zoa yežlio nga beṉe' ba ble'ede' Diosen' na' nono gac le'e ḻe'. Cheyaḻa' gonxenchone' ḻe chnabi'e toḻi tocaṉe. Na' can' gonšcaczcho. 
\p  
\v 17 Na' ca nac beṉe' ca' chesejnilaže' Criston', beṉe' zjanac beṉe' gwṉi'a ḻo yežlio nga, gože' bi yesaque' beṉe' ya'laže'. Na' yo'o ḻegaque' bi yesone' xbab yesenite' mba lagüe zjanaque' beṉe' gwṉi'a, ḻe yob te c̱he bite'tez da' de c̱hegaque'. Yo'o ḻegaque' yesezoe' lez yesenite' mbalaz len Dios ben' zoe' toḻi tocaṉe. Toga ḻe' choṉe' chio' yogo' da' güen da' chyažjecho na' da' chbecho.  
\v 18 Na' yo'one' yesenite' yesonchgüe' da' güen, yesone' yogo' cuen da' güen can' chazlaže' Diosen', nach ḻecze yo'one' yesezande' da' de c̱hegaque' cont yesaclene' beṉe' na' yesebede' yesone' ca'.  
\v 19 Še yesone' ca', na' gaquen ca to yeḻa' gwṉi'a da' bi te c̱hen, ḻe Diosen' chaclaže' yesaclene' beṉe', na' gone' cont yesenite' mba cate' šjasyenite' len ḻe' toḻi tocaṉe še yesone' ca'. 
\s1 Pablon' chzože' carten' 
\p  
\v 20 Timoteo, gwlecchgua yic̱hjo' c̱he yogo' dan' ba bzejni'i Diosen' le'. Bi gwzenago' c̱he beṉe' chosošaḻj diža' da' bibi zaca', ṉe c̱he dan' cheseṉe beṉe' dan' bi zej lebe len diža' ḻi c̱he Diosen'. Chesonḻaže' chesene' cheso'e diža' sina'.  
\v 21 Beṉe' bosozenague' c̱he dižan' nac ca' ba gosebejyic̱hje' diža' ḻi c̱he Diosen' da' chejḻe'cho na' bich chesejnilaže'ne'. 
\p Chṉabšca' gaclen Diosen' le'. Da' na'zen' chzoja'.