\id 1TH  
\h 1 TESALONICENSES 
\toc1 GUITS NE GLO PXEEḺ PABL LO ZHA TESALÓNICA 
\toc2 1 TESALONICENSES 
\toc3 1 Ts. 
\mt1 GUITS NE GLO PXEEḺ PABL LO ZHA 
\mt1 TESALÓNICA 
\c 1  
\p ¡Diuzh to grëse to! 
\p  
\v 1 Naa nac Pabl, gza no Silas ni Timoté, laa no rxeeḻ guits rii Tesalónica i; laaw ziaad lo to grëse to ne nac to zha ne ngable lo Jesús, meṉ ndzon ne rnabey, ni lo Dios meṉ ne nac Pxoz ne. 
\p Dios ni Jesús, me glu gaṉle pa lotaa noxco me to, zeeṉa peet zhgab ctsebde to. 
\p  
\v 2 Tibaque rdeed no xquizh lo Dios meṉ ne nac Pxoz ne, squitaa rneedz me guieḻbiini lo to; gzobtaa zeeṉe rzodiidznie no me rzeet no to lo me.  
\v 3 Ni zeeṉe rzeet no to lo me, rsoladz no grëtaa dziin ne ruṉ to niina ne dib zdoo to rleynie to me, ni zha quialëb to lo grëtaa guieḻnë ne noyaṉ to, tibaque nonie guic to ne ible zdziṉ dze ne laa Jesús guiaad stib. 
\p  
\v 4 Bets, bzian, rleyniedox Dios to, ni ndioṉ ne gaṉle me bzooblo to ygab to lo me.  
\v 5 Zeeṉe biaad no biadseed no to Xtiidz Ndzon Jesús, znuse ptsëëw lo xquieḻmban to, sac gocnie Espíritu Sant to bieṉ to gaṉle niapse diidzli nac grë diidz ne nonee no lo to; scagaa no, goṉ to gaṉle zha mban no, ga blu ne nli diidzli nac grë miṉe noseed no miech. Ni goḻsoladz gaṉle zha biaadbannie no to i, bdzioxco no bdziuuṉ no xyudar to, sac ne nligaa rleynie no to. 
\p  
\v 6 Scagaa to, pseed to wban to zigne mban no, ni zigne wban meṉ ndzon ne rnabey ne. Laa to pcaania xtiidz me, blozh ga, niicle nroob guieḻnë ne bded to, per bneedz Espíritu Sant guieḻbley lo to, ib peet güeynied guic to.  
\v 7 Grëse zha ne rliladz Jesús nëz Macedon, nëz Acay, zeeṉe bin zho zha mban to, yeque zho laa zho pseed mban zho zigne mban to.  
\v 8 Ni ne squi ndzinli mban to, nzianraa zaatne rzeet miech Xtiidz Ndzon Jesús, led loxaque gropdse lugar rii. Zaatne ziotaa no, zhoob diidz ne squitaa dib zdoo to rliladz to Dios, rquiindraa ne no gzodiidza lo zho.  
\v 9 Zhale rzodiidz grëse zha biaad no lo to i, zha scataa niow blëzlo to no leṉ dze co, ni zha psaan to grë zhiwseed xmeṉgol to, grë ncuaaṉe nac mdio lo to, laa to bliladz meṉ ne nacpaa Dios ne nguiamban, ni laa to zienaḻ miṉe rnabey me.  
\v 10 Ni rzodiidz zho zha zienie guic to ne ible zdziṉ dze guiet Jesús gbaa guiaad me stib, ni quiambëz to gdziṉ dze co. Xpëëd Dios nac Jesús, Dios bleeban me lo guieḻgut, ni me psilaa ne lo guieḻnëdox ne ziaadyob guiaad. 
\c 2  
\s1 Zha güeyseed Pabl zho 
\p  
\v 1 Bets, bzian, naṉle to gaṉle zeeṉe biaad no lo to i biaad-zhlëd no, brieelo pseed no to.  
\v 2 Niicle ne wriiṉ psacsi zho no guiedz Filip hor co, per laa no bii biaad ladz to i, ni niicle igaaw bioxtseebaque no, per ib bdziebd no laa no pseed to Xtiidz Ndzon Jesús; sac ndioṉ no Dios nacnie no.  
\v 3 Ni diidzli nac miṉe pseed no to, choot biaate par nquidiee no to, niicle biaategaa no par dieṉ pe niaadla no lo to.  
\v 4 Xtiidz Dios bnee no, me bzo no gnee no lo miech zha laa zho lo doḻ, ni miṉ co nac dziin ne quiadziuuṉ no. Nli nzian zha ne rlëëniew, per laa no bii rdziuuṉ dziin co; sac zionaḻd no gac miṉe rdziladz miech, sinque laa no zionaḻ gac miṉe rdziladz Dios, meṉ ne naṉ gaṉle pe rza zdoo ne. 
\p  
\v 5 Goṉ to gaṉle, bneed no pe diidz niow lo to par nquidiee no to, niicle bguibdgaa no dieṉ zha ndeeda diidz needz to dimi lo no. Dios zobwi rdziuuṉd no miṉ co.  
\v 6 Wlaltaa ib bguibd no dieṉ zha niacnon no lo miech, niicle lo tow, niicle lo stibgaa miecha.  
\v 7 Laa ne nlu no gaṉle zha rnabey nac no, sac goṉ Jesús pxeeḻ no, leḻ ndooladz goc no lo to. Masaque zigne rleynie meṉ wnaa xpëdyeeṉ me, nda nda raṉ me win; scadaa bleynie no to,  
\v 8 bio no bdzioxco no pseed no to Xtiidz Dios. Ne nlipaa bleynie no to, teḻne niaca miṉe niedziṉa haxta mbeeladz no no niet no por to. 
\p  
\v 9 Bets, bzian, rsoladzaxe to gaṉle ni lalnu ib psodziind no to; blactaa, dze guieel bdziuuṉ no dziin, nozhal bdziniaa ncuaaṉe pquiin no leṉ dze ne biadseed no to.  
\v 10 Dios zobwi raṉ me gaṉle zha nac lo xquieḻmban no, ni niicle togaaw (ne nac to zha ne ngab lo me) goṉ to gaṉle ndzinli wban no zeeṉe biaad no i, bdziuuṉd no ncuaaṉe mbee no diidz ro miech, sinque laa no bdziuuṉ miṉe rdziladz Dios.  
\v 11 Masaque rziaac no to zig rzac tib dad xpëëd zho, blactaa pchoobladz no zdoo to, bloonley no zdoo to tib tib to;  
\v 12 pso no diidz lo to zaacse gac to, gban to zigne no gban zha ne no xnëz Dios, meṉ ne bredz to gdziṉ to lo xquieḻndzon me, zaatne rnabey me. 
\p  
\v 13 Ne nligaa rdeed no xquizh lo Dios, sac zigne biadnee no Xtiidz me lo to, laa to pcaaniaw, bieṉ to Xtiidz me naca, nacda ncuaaṉe bleebey miech. Ni nligaa Xtiidz Diosa, gacxe waa zha ne rliladza zigne rzac tow niina, rzhixcuaa lo xquieḻmban zho.  
\v 14 Per zeeṉe laa to bliladza, laa meṉladz to psacsi to; bded to zigne bdedaque grë zha Israel ne rliladz Jesús, sac teḻ zhaw psacsi meṉladz zho zho.  
\v 15 Ni lëëque zha ne psacsi zho ga, zha co bnab psacsi zho Jesús meṉ ndzon ne rnabey, zigne beetaque zho grë zha ne pxeeḻ Dios biadteed Xtiidz me; ni lëëque zho beṉcxooṉ no. Ncuaaṉe rbiṉladz Dios ruṉ zho, rlëënie zho grëse miech,  
\v 16 rtsidiḻ zho pe nacne nonee no lo grë zhazit zha laa zho lo doḻ. Loxaque quiayuṉctalraa zho xtoḻ zho, per, ¡probsaxe zho, sac guieḻnëdox ne ziaadyob cxeeḻ Dios ygaa zho! 
\s1 Racladz Pabl tsiegaṉ Pabl zho stib 
\p  
\v 17 Bets, bzian, nli gard dziaṉlolsa ne wlal ne wbii no i, per tibaque rsoladz no to; blactaa rnee no teḻpaa zha guiaaddziaṉ no to.  
\v 18 Teḻ naa blactaa gocladz naa niaḻ naa, niaḻgaṉ naa to. Laa no niaadle, per ptse meṉdox lo no goṉ, pca ma xnëz no pasëë no niaad.  
\v 19 Guiabde to togo quiayaaṉladz no to, sac goṉ to rnalo no conley zdoo no gaḻ dze ne laa Jesús guiaad stib. To glu nli bdziuuṉ no xtsiiṉ me, to glu ne nli rioguiaḻ no ygaa no premio ne gneedz me.  
\v 20 Ne nligaa rley no rdziaṉ no zha mban to, haxta riats no zeeṉe raquiet to; sac to rlu gaṉle ne nli xtsiiṉ Dios nodziuuṉ no. 
\c 3  
\p  
\v 1-2 Ni ne scataa tibaque nonie to guic no, dzigo mazd pxeeḻaque no bets ne Timoté biaad lo to i, laa no biaaṉ guiedz Aten. (Naṉaxe to gaṉle ye Timoté nacgza no quiadziuuṉ no xtsiiṉ Dios, quiaseed no miech Xtiidz Ndzon Jesús.) Laa no pxeeḻ me biaadgaṉ me to, biadchoobladz me zdoo to, biadnee me lo to lozh sodziits to lo Xtiidz Dios;  
\v 3 zeeṉa niicle teḻ pe guieḻnë ne noyaṉtaa to, ib guiaaṉd zdoo to. Naṉle to gaṉle grëse ne ne rliladz ne Jesús, ib laa ne no dziaṉ guieḻnë.  
\v 4 Led rsoladz to zeeṉe biaad no i, bneegazh no ne ib laa ne no dziaṉ guieḻnë; ni goṉ to gaṉle scase goca. 
\p  
\v 5 Ne nligaa tibaque bionie to guic naa, nacne mazd pxeeḻaque no Timoté, biaadso me dieṉ pe bii zienaḻ to miṉe nac Xtiidz Dios; sac ni naa nend pquiil meṉdox to biire zienaḻ to ncuaaṉe rnabey ma, dzigo zhlëse biadseed no to. 
\p  
\v 6 Laa niina ne laa Timoté blanso nu stib, blansonie me diidz, në me niowse mban to, rleynie to grë zha ne nacgrë to, dib zdoo to rliladz to Dios. Ni në me rleynie to no, ye to racladz tebaa zha gaṉ to lo no, zigne rziaacaque no. 
\p  
\v 7 Miṉ co nagoṉ, bets, bzian, niicle ne nroob zhgab, nroob guieḻnë ne nodieed no nu, haxta biaaṉladz no grë ncuaaṉ co zeeṉe gocndioṉ no dziits zo to lo Xtiidz Dios, miṉe rliladz ne.  
\v 8 Haxta stib goc zdoo no bdzion no squi tiblique laa to rleynie meṉ ndzon ne rnabey ne;  
\v 9 ni rdzieldraa no diidz ne gnee no gdeed no xquizh lo Dios por to. Ni ne znutaa bloonley to zdoo no, haxta Dios raṉ gaṉle pa lotaa rley no.  
\v 10 Dze, guieel, quianab no lo me gneedz me diidzbey gbiire dziaṉ no lo to stib; zeeṉa lozh cseed no to grëraa miṉe no gacnaṉ to lo Xtiidz me. 
\p  
\v 11 Dios meṉ ne nac Pxoz ne, ni Jesús meṉ ndzon ne rnabey ne, me gacnieṉ no grieelo guiaaddziaṉ no to.  
\v 12 Jesús gacnieṉ to tsaaraa to biini, zeeṉa gleynieraa to grë zha ne nacgrë to ni grëraa samiech to, zigne rleynie no to.  
\v 13 Ni rnab no lo me, gacnieṉ me to tiblique gac to lo Xtiidz me, zeeṉa iṉe mbe zdoo to, ni tib doḻ rapde to zeeṉe laa me gzo to lo Dios meṉ ne nac Pxoz ne, gaḻ dze ne laa me guiaad stib con grë zha ne nacnie me. 
\c 4  
\s1 Guieḻmban ne rdziladz Dios 
\p  
\v 1 Zig zobwi Jesús meṉ ndzon ne rnabey, laa no rso diidz lo to: zigse zie dze goḻtsoxcoraa gban to zigne rdziladz Dios,  
\v 2 beṉque naṉle to zhaw, sac lëë miṉ co bnabey Jesús no biadseed no to guṉ to.  
\v 3 Sac goṉ, laa Dios racladz mbe guiaaṉ to lo me, guṉde to guieḻyozh yquiangob to zha ne led tsieelde to. 
\p  
\v 4 Grë zha bgui, zeeṉe laa zho gnee lo tsieel zho, none niowse ndzinli gac zho;  
\v 5 guṉd zho zigne ruṉ grëraa miech ne naṉd zha nac Xtiidz Dios; sac teḻ zha co, rzac zho loxaque par gdeedse guxt xcuerp zho, miṉcose rquiin wnaa.  
\v 6 Niicle yquiangobde to tsieel sabgui to; sac zha ne sca ruṉ, sabgui zho ga rguitnie zho; ni doḻ co ible tedsod zuṉquizh Dios zhow. Goḻsoladz gaṉle psole no diidz rii lo to glo, ni na laa no rneequew stib.  
\v 7 Goḻguieṉ gaṉle, bredzdaxe Dios ne waa parne dziuuṉ ne grë guieḻyozh, sinque laa me bredz ne gban ne zigne racladz me.  
\v 8 Gacxe waa, zha ne zienaḻd wseed rii, gacnaṉ zho gaṉle xtiidz Dios ga (meṉ ne rdeed Espíritu Sant lo zha ne ngab lo me) noguiits zho, led xtiidzd choḻze samiech zhow. 
\p  
\v 9 Laa zig nac guieḻwleynie, naṉle to zha no gleynie to grë zha ne nacgrë to. Rquiind cso no diidz lo to dieṉ zha guṉ to, sac Dioszhal pseed to zha gleynie to zigtaa zha ne nacgrë tow, zigtagaa grë samiech tow.  
\v 10 Zig nac grë zha bets ne, zha bzian ne, zha ne no xtan zha Macedon, zëëb diidz rleynie to grë zha co. Goḻtsoxco sca, goḻleynieraa samiech to. 
\p  
\v 11 Ni stib miṉe rso no diidz lo to: niowse goḻbannie samiech to. Miṉe nac xtsiiṉ to tib tib to, miṉ co goḻtsoxco, tozhal goḻdziniaa ncuaaṉe yquiin to;  
\v 12 zeeṉa peet guṉfalte lo to, ni scagaa grë zha ne gard gliladz Xtiidz Dios, haxta gzee zdoo zho gaṉ zho zha mban to. Goḻsoladz gaṉle psole no diidz rii lo to glo. 
\s1 Ib ziaad Jesús stib 
\p  
\v 13 Bets, bzian, nu na gaṉle laa naa gzodiidz lo to zha gac grë zha ne ret, zha ne ngable lo Dios; zeeṉa tsode to guieḻnë zig rzac grë miech ne gard guieṉ gnalo Jesús. 
\p  
\v 14 Ne, ne dib zdoo ne rliladz ne nli gut Jesús ni bleeban Dios me; scaquegaa none gliladz ne ible zbeeban Dios grëse zha ne dib zdoo rliladz Jesús, zeeṉe laa Dios cxeeḻ me guiaad me stib.  
\v 15 Goḻgacnaṉ sca gaṉle, znu goṉ nac xtiidz me: Grëse zha ne ngab lo me, zha ne bii zomban gaḻ dze co (gaḻ dze ne guiaad Jesús) tednerd zho lo grë zha ne gutle.  
\v 16 Zeeṉe laa me guiet gbaa, redz ro ne yquia, zlu zëëb tsi tib zha ne quianabey, tsi tib anjl ne nonraa, ni tsi zhitrompet Dios; hor co laa me guiet gbaa, laa grë zha ne ngab lo me, zha ne gutle, laa zho grieeban.  
\v 17 Dzigo tipse gac zho grë zho zha ne bii zomban ga, laa zho soquia laglaa lo xcow tsiedzieelo zho me; dzigosi gdziṉdraa dze ne gbiche zho lo me. 
\p  
\v 18 Nana sca miṉe rne naa nu, goḻsodiidza lo grëse zha ne nacgrë to; zeeṉa conley to zdoo zho. 
\c 5  
\p  
\v 1 Bets, bzian, nana par gni naa lo to dieṉ pe guidze te guieel guiaad me, choot ndioṉda.  
\v 2 Goḻgacnaṉ gaṉle, lega nacle zeeṉe gaṉ miech laa me ziaadle, zig nac zeeṉe rzëëb ngbaan yu guieel, ¿cho dieṉ naṉpaa pa hor sëëb ngbaan?  
\v 3 Zeeṉe laa grë miech guiab: “Nasi wen ndxie ne, peet guieḻxtseeb nodraa”, tibaque zeeṉe guieṉ zho laa dze ne nitlo zho bdziṉle, ni gasi grieelodraa cho csilaa zho. Sac zig znuse rnaaz yoob meṉ wnaa ne bdziṉle dze gap xpëëd; scadaa gdziṉ dze co. 
\p  
\v 4 Saṉgue to, bets, bzian, nacdraa to zha ne nonziaab lo ncow, teḻ pa hortaa guiaad me nsinle zo to; sacdraa to dze co zig rzac miech ngbaan, lega nacle zeeṉe raṉ zho laa ngbaan rdziṉ.  
\v 5 Miech ne nole lo xbiini Dios nac to, niini zo to; nacdraa to zha ne no glowtaa guieel, zha ne no lo ncow;  
\v 6 gacxe nagoṉ waa, niini goḻso, tsienaḻde to miṉe ruṉ zha ne zienaḻ guieḻntseeb; sac nac grë zha co zig nac zha ne nixguies, tibaque guieel no zho.  
\v 7 Sac teḻ guieela, guieel raaguies miech, niicle zha ne rzuudzgaaw guieel rzudz zho.  
\v 8 Saṉgue ne ne nac ne zha ne niini zo, none guieṉ ne pe nac ncuaaṉe noyac. Tibaque dib zdoo ne gliladz ne Dios, gleynie ne samiech ne, zeeṉa csaaca ne zig rsaac ncuaaṉe racw meṉguiib lo grë ncuaaṉe gnitlo zho; ni csoladz ne gaṉle laa Dios psilaale ne lo guieḻgut, gotsaa ziaac new zig rzac meṉguiib pchog ne rzob guic zho rsilaaw zho lo guieḻgut.  
\v 9 Sac goṉ bredzdaxe Dios ne waa ygaa ne guieḻnëdox ne no guiaad, sinque laa me bredz ne csilaa me ne lo guieḻnë co. Ni lëë miṉ co rac zeeṉe laa ne rliladz Jesús.  
\v 10 Zeeṉe gut Jesús, ga bdiizh me xtoḻ ne; zeeṉa yase mban ne o gutlegaa ne gaḻ dze ne guiaad me, per me gbannie ne. 
\p  
\v 11 Nana sca, tib tib to goḻdeed xfuers zha ne nacgrë to, niapse diidz ne guṉ xyudar zho choobraa zho lo Xtiidz Dios, miṉ co goḻnee lo zho; zigne quiayuṉaque to niina. 
\s1 Rso Pabl diidz 
\p  
\v 12 Bets, bzian, laa no rso diidz lo to: Niowse goḻgac, niowse goḻnee lo grë zha ne pso Dios noyuṉ xtsiiṉ me lo to, zig nac zha ne zo lo to, zha ne rnee lo to zha no gban to.  
\v 13 Goḻguieṉ gaṉle cho nac zho, goḻleynie zho, sac goṉ led lega nacd dziin ne quiayuṉ zho lo to. Goḻsoladz sca: ¡Zaacse goḻban, tiḻniede to samiech to! 
\p  
\v 14 Teḻ cho zha ne nacgrë to i, rsilo quiayacgbech, goḻgactox lo zho, zeeṉa guieṉ zho guṉ zho dziin. Grë zha ne quiasaan Xtiidz Dios, goḻnee lo zho zeeṉa gleynie zhow stib; grëgaa zha ne gard tsoguicpaa zha naca, goḻguṉ xyudar zho tsoguic zhow; niicle grëragaa zha ne nacgrë tow, ib guieedniede to zho.  
\v 15 Goḻguieṉ teḻ pe guieḻntseeb ne ruṉ miech lo to, guiabde to ne scaque guṉ to zho; sinque mazd goḻtsoxco tibaque niowse goḻgac lo grëse miech, niicle lo zha ne nacgrë tow, niicle lo grëragaa miecha. 
\p  
\v 16 Tibaque nley goḻco zdoo to. 
\p  
\v 17 Tibaque goḻzodiidznie Dios. 
\p  
\v 18 Goḻdeed xquizh lo Dios, niicle zeeṉe noyaṉ to guieḻnëw, zeeṉa nogaa to guieḻbleya, sac sca racladz me guṉ grëse zha ne no xnëz Jesús. 
\p  
\v 19 Goḻquiaadiag miṉe rnee Espíritu Sant lo to, ni goḻguṉa. 
\p  
\v 20 Goḻquiaadiag miṉe rnee grë zha ne rnee grë diidz ne rsiaab Dios guic zho;  
\v 21 wen wen goḻwi dieṉ pe nac miṉe rnee zho, dzigo miṉe rzac to rquiinraa lo to, miṉ co goḻseed. 
\p  
\v 22 Goḻbiche lo grëse guieḻntseeb ne no. 
\p  
\v 23 Dios, meṉ ne rtiche grëse dzeb, grëse zhgab, mezhal csaṉmbe to lo grëtaa guieḻntseeb; dib nacse to (zhiespíritu tow, xalm tow, xcuerp tow) zeeṉa ni tib doḻ rapde to gaḻ dze ne laa Jesús meṉ ndzon ne rnabey ne gbiire guiaad stib.  
\v 24 Me bredz to, ni mesi ruṉ me miṉe rnee me, gane ndioṉ no ne ib zuṉ me miṉ rii. 
\p  
\v 25 Grëse to bets, grëse to bzian, laa naa rnab lo to goḻsiguieḻ goḻnab lo Dios gacnieṉ me no. 
\p  
\v 26 Goḻcaania zhibdiuzh no i, iṉe goḻxeṉ nia grë zha ne nacgrë to, goḻlu ne nli rleynie to zho. 
\p  
\v 27 Meṉ ndzon ne rnabey, me rnabey naa laa naa rso diidz lo to, glab to guits rii lo grëse zha ne nacgrë to i. 
\p  
\v 28 Jesús, meṉ ndzon ne rnabey ne, me glu lo to gaṉle pa lotaa noxco me to. 
\p Pabl