\id 1JN  
\h 1 JUAN 
\toc1 GUITS NE GLO PQUIAA JUAN 
\toc2 1 JUAN 
\toc3 1 Jn. 
\mt1 GUITS NE GLO PQUIAA 
\mt1 JUAN 
\c 1  
\p ¡Diuzh to! 
\p Laa naa gzodiidznie to gaṉle cho nac Jesús. 
\p  
\v 1 Jesús nac Diidz Ndzon ne rdeed guieḻmban. Notaque me, nole me zeeṉe bre guidzliu. Bdziṉ dze biaad me lo guidzliu; grop diag no bdzion no grë miṉe bnee me, grop lo no bdzioṉ no grë miṉe beeṉ me; sac bdzioṉpaa no zha rac me, zha rnee me, haxta bzhieeṉ no nia me.  
\v 2 Ni niina laa no quianee lo miech gaṉle cho nac me; goḻgacnaṉ gaṉle, me rneedz tib guieḻmban ne gdziṉd dze lozh. Zaatne no Dios meṉ ne nac Pxoz ne, ga no me; zeeṉe biaad me lo guidzliu dzigo bdziuuṉbey no me.  
\v 3 Gacxe waa, miṉe rnee no lo to led lega rneed now; nozhal bdzioṉa, nozhal bdziona. Laaw rnee no lo to, zeeṉa tipse gac ne grë ne, gacnie to no zigne nacnie Dios no (meṉ ne nac Pxoz ne), zigne nacnie Jesús no, meṉ ne nac Xpëëd me.  
\v 4 Laa naa rnee grë miṉ rii lo to lo guits ne rxeḻ naa nu, zeeṉa zigne nonley zdoo no scaquegaa to tsonley zdoo to. 
\p  
\v 5 Znu nac miṉe bdzioṉ no pseed Jesús miech, rëb me: Nac Dios zig nac tib biini, ni tib lë guieḻcow guieṉd zaatne no me; laa grë doḻ, masaque naca zig nac guieḻcow. Ni miṉcoque goṉ rnee no lo to.  
\v 6 Gacxe waa, teḻne rnee ne nacniele ne me, ni rlozh ga tibaque lo guieḻcow co no ne, rquidie ne ga dzigo.  
\v 7 Teḻne nlipaa mban ne lo xbiini me, zigne mban Jesús lo biini co, dzigosi haxta tipse nac ne grë ne; ni scagaa, xchen Jesús nac miṉe csaṉmbe ne lo grëtaa xtoḻ ne. 
\p  
\v 8 Nana teḻ guiab ne: Teḻ naa ib peet doḻ rapd naa. Lëëque ne noquidie ne ga, rneelid ne ga zha nac ne.  
\v 9 Saṉgue teḻne cxobdoḻ ne grëse xtoḻ ne lo Dios, ible tedsod silaa me ne lo grëtaa doḻ co, saṉmbe me ne lo grëtaa guieḻntseeb ne zidziuuṉ ne; sac ible laa Jesús gut par csaṉmbe me ne.  
\v 10 Teḻne sca guiab ne rapd ne doḻ, rrieequia dzigo rzoob ne Dios zig tib meṉ ne rquidie; sac teḻ me, naṉpaa me grëse ne miech ngoopdoḻ nac ne. 
\c 2  
\p  
\v 1 Xin yeeṉa, laa naa rso diidz lo to: Guṉctaldraa to xtoḻ to; teḻne naṉdgaa new cho tib to zha beeṉ pe tib doḻ, goḻsoladz gaṉle no tib meṉ ne quianab lo Dios meṉ ne nac Pxoz ne yquia zdoo me ne, lëë meṉ co nac Jesús, lo me goḻbig (teḻ me ni tib doḻ rapd me).  
\v 2 Sac me bded grëtaa guieḻnë ne rioguiaḻ ne ndieed ne por grëtaa xtoḻ ne, psaṉwen me ne lo Dios; me goc zig tib gon ne pcaania Dios gozh grëse xtoḻ ne, ni xtoḻ grëraa miech ne ndxie dibdoose lo guidzliu. 
\s1 Goḻleynie samiech to 
\p  
\v 3 Goḻgona gaṉle: Teḻne ruṉ ne grëse miṉe rnabey Dios, gase rieṉ ne ne nli xnëz me no ne.  
\v 4 Laa teḻ zha ne rnee: “Xnëz me no naa”, ni rlozh ga ruṉd zho grë miṉe rnabey me, rquidie zho ga.  
\v 5 Sac zha ne nli rleynie Dios, rioxco zho rban zho zigne nac xtiidz me; ni teḻ ne, ndioṉ ne gaṉle nli xnëz me no ne.  
\v 6 Gacxe nagoṉ waa, zha ne rnee xnëz me no zho, ib none zaacse gban zho, zigne wban Jesús zeeṉe biaad me lo guidzliu. 
\p  
\v 7 Bets, bzian, goḻgacnaṉ gaṉle, none gleynie to samiech to. Guiabde to togo ncub miṉe rne naa lo to nu guṉ to, laa naa rzet miṉe binle to glo zeeṉe psilo pquiaadiag to Xtiidz Dios. Niicle ne padzeelale zhobneew, niicle ne pquiaadiagle tow,  
\v 8 per rrieequia ncuba niina; sac goṉ zeeṉe biaad Jesús, me blu gaṉle zha none gleynie ne samiech ne. Ni scagaa niina ne laa to zienaḻa, laa to noriee lo guieḻcow ne no to glo, laa to nozëëb nëz lo xbiini Dios. 
\p  
\v 9 Ga nagoṉ, teḻ zha ne rnee lo biini co mban zho ni rlëënie zho samiech zho, rquidie zho ga; bii lo guieḻcow ga mban zho.  
\v 10 Zha ne rleynie samiech, zha cosi nli lo biini co mban zho, noxtseebd lega tsobe zho, sac raṉpaa zho pa lo zie zho;  
\v 11 saṉgue zha ne rlëënie samiech, lo guieḻcow ga no zho. Masaque nac zho zig zha ne roḻd lo, niicle zha rieṉd dieṉ pa nëz tsie zho, sac guieḻcow co quiantse lo zho. 
\p  
\v 12 Xin yeeṉa, laa naa rne grë miṉ rii lo to, sac goṉ, teḻ to laa Jesús bdiizhle teḻ pe nactaa grë xtoḻ to.  
\v 13 To ne nac to dad, laa naa rxeḻ diidz rii lo to, porne nac to zha ne rliladzle Jesús, naṉle to gaṉle notaque me, nole me zeeṉe bre guidzliu. Togaa ne nac to zha nguieg, laaw rxeḻ naa lo to, sacne nligaa dziits zo to, rrieelodraa meṉdox yquiil ma to. To ne nac to mëëdlas, xin yeeṉa laa naa rxeḻ diidz rii lo to, porne nac to zha ne nole xnëz Dios meṉ ne nac Pxoz ne. 
\p  
\v 14 Nana sca, zigtaa tow ne nac to dad ne ruṉbeyle Dios; zigtagaa tow ne nac to zha nguieg, ne nataa ndip ndaan to laa to pcaaniale Xtiidz Dios dib zdoo to, ne nac to zha ne lëbdraa meṉdox yquiil,  
\v 15 goḻguieṉ, gleyniede to grë ncuaaṉe rap to, gleyniede to grë ncuaaṉ ndzinlid ne rac lo guidzliu rii. Zha ne rleynie grë ncuaaṉ co, nlid rleynie zho Dios meṉ ne nac Pxoz ne;  
\v 16 sac grëse ncuaaṉe rac lo guidzliu rii (zig nac zha ne zienaḻ ncuaaṉe gdeedguxt xcuerp, zha ne rzoobladz yquianie ncuaaṉe rdziladztaa, zha ne racniats lo samiech), grëse ncuaaṉ co led Diosd rnabeya, sinque lëë miṉe rzonaḻ grëraa miech lo guidzliu ga.  
\v 17 Ni na teḻ zig nac guidzliu, zig zie dze laaw quialozh grëw grë ncuaaṉe rleynie miech low; saṉgue zha ne mban zigne rnabey Dios, laa zho bgaale tib guieḻmban ne gdziṉd dze lozh. 
\s1 Zha ne rlëënie Jesús 
\p  
\v 18 Xin yeeṉa, zhile gdziṉ dze ne laa guidzliu nitlo. Led binle to gaṉle ib zrieequia tib zha ne glëënie zhiwseed Jesús, ni nligaa niina leṉ dze rii ndal-le zaatne norieequia grë zha ne rsilo quiatsidiḻ Xtiidz me; gane ndioṉ no ne laa dze co ziaadgaxle.  
\v 19 Nli ladaque zha ne nacgrë ne briee grë zha co, per nlid nacniepaa zho ne; sac teḻ niaca miṉe nlipaa nacnie zho ne, nrieextsod zho. Ga nagoṉ blu zho ne nlid nacgrë zho ne. 
\p  
\v 20 Saṉgue to, nacde to zig nac grë zha co, sac nacnie Espíritu Sant to, bneedz me guieḻbiini lo to ruṉbey to miṉe nac diidzli.  
\v 21 Guits ne rxeḻ naa lo to nu, nacda par cseed naa to miṉe nac diidzli, sac ruṉbeyle tow ni haxta rieṉ to pa miṉ nac guieḻwquidie; sinque laaw ziaad lo to par gacnaṉ to gaṉle zha nac zha ne noquidie i. 
\p  
\v 22 Grë zha ne rnee i nlid lëë Meṉ ne zëëble diidz cxeeḻ Dios lo guidzliu ga nac Jesús, noquidie zho miech ga. Ni zha ne sca ruṉ, rlëënie zho me ga; ni ne sca rliladzd zho cho nac me, yele Pxoz me ga rliladzd zho.  
\v 23 Sac zha ne rlëënie meṉ ne nac Xpëëd Dios, ga rlu ne nlid rliladz zho cho nac Dios; saṉgue zha ne rxobneṉ cho nac Xpëëd me, zha cosi nli rliladz zho cho nac me.  
\v 24 Laa naa rso diidz lo to sca: Goḻtsienaḻ grë miṉe pseed to zeeṉe glopaa psilo bliladz to Xtiidz Dios, zeeṉa zigtaa Dios, zigtagaa Xpëëd mew, tibaque gbannie to me.  
\v 25 Goḻsoladz gaṉle, laa Jesús psaṉle diidz ne ib zgaa ne tib guieḻmban ne gdziṉd dze lozh; lëë guieḻmban co ygaa grëse zha ne nacnie me. 
\p  
\v 26 Laa naa rzet miṉ rii lo to, sac ne squi no grë zha ne ziaad racladz yquidie to.  
\v 27 Saṉgue to laa Jesús pxeeḻle Espíritu Sant nacnie to, rquiind ne gooṉ choraa cseed to; sac Espíritu Santzhal rneedz guieḻbiini lo to rieṉ to zha nac grëraa ncuaaṉe no gacnaṉ to, ni mesi goṉ miṉe nac diidzli miṉ co rseed me to, led yed me rquidie. Goḻguieṉ sca, Jesús goḻbannie, goḻbannie me zigne noseed Espíritu Sant to. 
\s1 Zha ne nac xpëëd Dios 
\p  
\v 28 Xin yeeṉa, naṉle to sca sozite to lo Jesús, sinque tibaque goḻgacnie me; zeeṉa iṉe tibliladz gac to gaḻ dze ne laa me guiaad. Sac zha ne sozit lo me gban zho zigne gacladztaa zho, zeeṉe laa me guiaad mban gac zho; sac guieḻto ne guiaaṉ zho lo me.  
\v 29 Naṉle to gaṉle, mesi zigne rieguiaḻ gac guieḻwxtis sca ruṉ mew; gacxe waa, grëse zha ne nac xpëëd me ible zdeed me miṉe rieguiaḻ zho. 
\c 3  
\p  
\v 1 Goḻwi gaṉle pa lotaa rleynie Dios ne, laa me rneedz diidz laa ne gac mëëd lo me. ¡Ni nligaa teḻ ne, xpëëdle me nac ne! Grëraa miech rliladzd zhow, sacne ruṉbeyd zho cho nac me. 
\p  
\v 2 Bets, bzian, ne nligaa xpëëdle Dios nac ne. Nli ndioṉd ne niina dieṉ zha glu ne gaḻ dze ne laa Jesús guiaad, per miṉe ndioṉpaa ne, zeeṉe gaḻ dze co laa ne gac zigne nacpaa me; ni dzigosi laa ne dziaṉ me grop lo ne.  
\v 3 Ni grëse zha ne zienie guic ygaa guieḻnzaac co, tibaque rioxco zho zig zie dze nosaan zho ncuaaṉe ruṉctal xtoḻ zho, sac teḻ Jesús raṉdzed me doḻ. 
\p  
\v 4 Grë zha ne ruṉctal xtoḻ, xley Dios ga rguiits zho, sac grëse doḻ ne ruṉtaa miech ga rlu gaṉle ne rond zho miṉe rnabey me.  
\v 5 Per naṉle to gaṉle, laa Jesús biaad lo guidzliu, biaadsilaa me miech lo grëtaa xtoḻ zho; ni mesi ni tib doḻ rapd me.  
\v 6 Gacxe waa, zha ne nlipaa nacnie me, zienaḻdraa zho ncuaaṉe guṉctal xtoḻ zho; laa grë zha ne tibaque noyuṉctal xtoḻ, gase rlu ne gard guieṉ zho cho nac me, gard guṉbey zho me. 
\p  
\v 7 Xin yeeṉa, ib gliladzde to miṉe rnee zha ne racladz guiaadquidie to. Goḻgaṉ gaṉle, zha ne mban zigne rdziladz Dios, lëë zha co nli mbe zdoo, zigne meṉ mbe nac Dios;  
\v 8 saṉgue grë zha ne tibaque quiayuṉctal xtoḻ, xnëz meṉdox ga ngab zho; sac teḻ meṉdox, desde padzeela tibaque guieḻntseeb quiayuṉ ma. Ni miṉ co nagoṉ nacne biaadpaa Xpëëd Dios lo guidzliu, biaadnitlo me grëtaa ncuaaṉe ruṉ ma.  
\v 9 Zha ne nac xpëëd Dios, rdeetraa zho diidz guṉctal zho xtoḻ zho, sacne laa guic zho zienie gban zho zigne racladz Espíritu Sant, meṉ ne nacnie zho; rieṉle zho nodne guṉctal zho xtoḻ zho, sac laa zho nacle xpëëd Dios. 
\p  
\v 10 Nieeṉpaa cho nac xpëëd Dios, chogaa nac xpëëd meṉdox, sac grëse zha ne ruṉ guieḻntseeb, grëse zha ne rleynied samiech, led xpëëte Dios nac zho;  
\v 11 sac goṉ, desde dze ne psilo bliladz to Xtiidz Dios, bingazh to ib none gleynie ne samiech ne.  
\v 12 Zig nac Caín, xnëz meṉdox ngab Caín, gane beet me bets me loxaque ne ndzinli mban bets me, laa me niapse guieḻntseeb ruṉ me. Ib guṉde to miṉe beeṉ Caín.  
\v 13 Gacxe waa, bets, bzian, zeeṉe gaṉ to laa grëraa miech rlëënie to, ib tsode to zhgab guiab to pe nacne sca ruṉ zho.  
\v 14 Saṉgue ne rleynie ne samiech ne, gane ndioṉ ne noxtseebdraa ne guioo ne gabiḻ, laa ne bgaale tib guieḻmban ndzon ne gdziṉdraa dze lozh; sac zha ne rleynied samiech, nëz ne nitlo zho ga zie zho.  
\v 15 Grë zha ne sca rlëënie samiech, rrieequia rut zho ga, ni naṉle to gaṉle zha ne rut samiech, gard ygaa zho guieḻmban ndzon ne gdziṉd dze lozh ga.  
\v 16 Ndioṉ ne zha gleynie ne samiech ne, sac Jesúszhal blu zhaw zeeṉe sca bleeladz me me gut me bdiizh me xtoḻ ne. Gacxe waa, zha ne nlipaa rleynie samiech, none cueeladz zho zho, cueeladz zho ncuaaṉe rap zho, gacnie zho samiech zho.  
\v 17 Gzoob ne, tib zha ne rnee xnëz Dios no zho, nroob rapcheṉ zho, raṉlo zho rcaalsad pe yquiin tib zha ne nacgrë zho, per ib rdeete zho palal pe yquiin zha co. ¿Niacxe na nli rleynie zha co samiech zho ga?  
\v 18 Xin yeeṉa, goḻgacnaṉ sca gaṉle, led loxaque diidzdse, led loxaque laglaadse gnee ne rleynie ne samiech ne; sinque none glu ne nli rleynie ne zho. 
\p  
\v 19 Sca nagoṉ none dziuuṉ ne, dzigo niicle new ndioṉpaa ne nli xnëz Dios no ne, ni scagaa tsod pe nacne pe dzeb tsonie zdoo ne zeeṉe laa ne gbig lo me.  
\v 20 Teḻ zha ne rdzieb zdoo, sac rieṉ zho noyuṉd zho miṉe rnabey Dios, ib tedsod zlisqui Diosa lo zho; sac teḻ me grësew naṉ me.  
\v 21 Xin yeeṉa, laa zha ne desde zdoo zho naṉ zho noguiitsd zho miṉe rnabey me, scagaa tibliladzse gbig zho lo me;  
\v 22 hor cosi ncuaaṉe gnabtaa zho lo me squiaadiag mew, sacne mban zho zigne rnabey me, ni noxco zho noyuṉ zho ncuaaṉe rdziladz me.  
\v 23 Ni lëë miṉ rii rnabey me: Grëse miech, none dib zdoo zho gliladz zho Jesús meṉ ne nac Xpëëd me, ni gleynie zho samiech zho zigne psaṉle me diidz ga.  
\v 24 Grë zha ne ron diidz ruṉ miṉ co, ga rlu ne nlipaa mbannie zho me, ni scagaa me mbannie me zho. Ni ndioṉ ne gaṉle, ib nli mbannie me ne, sac pxeeḻ me Espíritu Sant nacnie ne. 
\c 4  
\p  
\v 1 Bets, bzian, zha ne gnë zhiEspíritu Dios nacnie zho, gooṉ ye zho quianee Xtiidz me lo miech; ib guṉde to ne lëëlëd gliladz to xtiidz zho, sinque goḻwigazh dieṉ pe nli zhiEspíritu Dios nacnie zho. Sac ndal grë zha ne quianzë lo guidzliu, rquidie zho rnee zho Xtiidz Dios noteed zho.  
\v 2 Parne guieṉ to dieṉ pe nli zhiEspíritu Dios nacnie zho, goḻwi dieṉ zha rzac zho Jesús: Teḻ zha ne rliladz ne nli zig tib miech goc me biaad me lo guidzliu, ga rlu ne nli zhiEspíritu Dios nacnie zho.  
\v 3 Laa teḻ rliladzd zho ne nli sca biaad me, nlid dzigo zhiEspíritu Dios nacnie zho; sinque lëële espíritu ne rtsidiḻ Jesús ga nacnie zho. Laa to binle gaṉle ib laa espíritu co guiaad; ni lëële espíritu ntseeb co nacnie grë zha ne squi quianzë lo guidzliu niina. 
\p  
\v 4 Xin yeeṉa, saṉgue to xnëzle Dios ngab to, yquidiedraa zha co to, sac goṉ mazdraa nroob poder rap meṉ ne nacnie to, lëdle espíritu ne nacnie grë zha ne sca zienaḻ grë wseed yozh ne no lo guidzliu.  
\v 5 Grë zha co, ncuaaṉe rac lo guidzliu rii nonie guic zho; gacxe waa, niapse lëëw rnee zho, ni gagaa grëque zha ne rleynie grë ncuaaṉ co, zha co rliladz zhiwseed zho.  
\v 6 Saṉgue ne xnëz Dios no ne. Ni scagaa zha ne ruṉbey Dios, zha co rquiaadiag miṉe rnee ne; laa grë zha ne ruṉbeyd me, rquiaadiagd zhow. Gase na gaṉle rlu cho zha nacnie zhiEspíritu Dios, ni cho zhagaa nacnie espíritu ne ziaadquidie miech. 
\s1 Rleynie Dios miech 
\p  
\v 7 Bets, bzian, goḻgotsaa gleynie ne samiech ne, sac goṉ, teḻ Dios grëse ne rleynie me ne. Gacxe waa, zha ne rlu nli rleynie zho samiech zho, gase rlu ne nli xpëëd Dios nac zho, nli ruṉbey zho me.  
\v 8 Laa grë zha ne rleynied samiech, ruṉbeyd zho Dios ga gane sca ruṉ zho; sac goṉ ib Dios rneedz guieḻbiini lo ne gleynie ne samiech ne.  
\v 9 Gotsaa gwi ne gaṉle, pa lotaa rleynie me ne: Tibpaa Xpëëd me, ni pxeeḻ me me biaadtizh me xtoḻ ne, zeeṉa ygaa ne tib guieḻmban ndzon ne gdziṉd dze lozh.  
\v 10 Led guiabd ne togo glo miech bleynie Dios gane rleynie me zho niina; led scada, sinque ible zdoo me gola rleynie me ne. Ne nligaa gotsaa gwi ne gaṉle zha pxeeḻ me Xpëëd me, goc me zig tib gon ne gozh grëse xtoḻ ne. Ga nagoṉ rlu pa lotaa rleynie Dios ne. 
\p  
\v 11 Bets, bzian, zigne scataa rleynie Dios ne, scaquegaa ne nagoṉ none gleynie ne samiech ne.  
\v 12 Gard tso tib zha ne gaṉ Dios, per zha ne rleynie samiech, me ga nacnie zho; ni zigse zie dze dib zdooraa zho rleynie zho samiech zho. 
\p  
\v 13 Me nac meṉ ne pxeeḻ zhiEspíritu me nacnie no, parne glu nacnie me no, ni scagaa no nacnie no me.  
\v 14 Ni stiba, grop lo no bdzioṉ no biaad Xpëëd me biaadsilaa me miech lo doḻ; ni miṉ co nonee no lo miech niina.  
\v 15 Grëse zha ne rliladz Xpëëd Dios nac Jesús, ni rnee zhow lo miech, ga rlu ne nacnie Dios zho, ni scagaa zha nacnie zho me. 
\p  
\v 16 Ndioṉ ne gaṉle nli rleyniedox Dios ne, sac rieṉpaa ne rleynie me ne, ni rliladz ne zeeṉe rnee me pa lotaa rleynie me ne. Ible niaa me par gleynie me, me rdeed guieḻbiini lo miech gleynie zho samiech zho, zigne rleynie me zho; gacxe waa, zha ne rleynie samiech, ga rlu nacnie zho Dios, ni scagaa me nacnie me zho.  
\v 17 Zig nac ne, niina ne laa ne nacniele Jesús, zig zie dze laa ne lozh cseed gleynie ne me, ni gleynie ne samiech ne zigne racladz me; ni scagaa tsod pe nacne ctoladz ne, pe nacne gdzieb ne gdziṉ dze ne laa me guṉ xquieḻwxtis me; sinque haxta gley ne dziaṉ ne me gaḻ dze co.  
\v 18 Nod pe nacne gdzieb ne me, sac goṉ ndioṉ ne pa lotaa rleynie me ne. Led yedraa niina pe dzeb ne dzio ne, sac grëse dzeb rbiche zeeṉe rieṉ ne rleynie me ne. Zha ne rdzieb, zienie guic zho pe nac grë guieḻnë ne gaṉ zho, ga rlu zho gard guieṉ zho ne rleynie me zho, ni gardgaa guieṉ zho gleynie zho me. 
\p  
\v 19 Gotsaa guieṉ sca gaṉle, nli laa ne rleynie Dios, laa ne rleynie samiech ne, per glo me blu gaṉle pa lotaa rleynie me ne.  
\v 20 Teḻ zha ne rnee, rleynie zho Dios, ni rlozh ga rlëënie zho samiech zho, rquidie zho ga. Sac goṉ, teḻ naṉd zho gleynie zho samiech zho, zha ne raṉlopaa zho, ¿pe leḻ Dios dzigo gliladz ne nli rleynie zho, ni nac me meṉ ne raṉd zho?  
\v 21 Sac goṉ, znu nac xtiidz Jesús: Zha ne rleynie Dios, zigne rleynie zho me, scaque none gleynie zho samiech zho. Ni miṉ rii rnabey me dziuuṉ ne. 
\c 5  
\s1 Zac csaan ne ncuaaṉe ruṉctal xtoḻ ne 
\p  
\v 1-2 Grëse zha ne dib zdoo rliladz ne ible lëë Meṉ ne zëëble diidz cxeeḻ Dios lo guidzliu ga nac Jesús, grëse zha co xpëëd Dios nac zho. 
\p Grëse zha co, par guieṉ ne dieṉ pe nli rleynie ne zho, none guieṉ ne dieṉ pe nli rleynie ne Dios, dieṉ pe nli ruṉ ne miṉe rnabey me. Nac cuent rii, zig nac tib yu miech, zha ne rleynie pxoz mëëd, scaquegaa rleynie zho mëëd.  
\v 3 Sac zeeṉe rleynie ne Dios, zuṉ ne grëse miṉe rnabey me. Ni grë miṉe rnabey Dios, nacda ncuaaṉe guiab ne grieelod guṉ ne;  
\v 4 sac grëse zha ne nacle xpëëd Dios, totsaque rnalo zho ne Jesús guṉ xyudar zho, gac-wetraade zho lo grë ncuaaṉe guṉctal xtoḻ zho.  
\v 5 Goḻgacnaṉ sca: zha ne dib zdoo rliladz Xpëëd Dios nac Jesús, zrieelo zho csaan zho grëtaa ncuaaṉe ruṉctal xtoḻ zho. 
\p  
\v 6 Teḻ ne, ndioṉ ne ni rliladz ne gaṉle nli Xpëëd Dios nac Jesús, sac zeeṉe biaad me horne norobnis me, horne nolozh me, ga blu gaṉle cho nac me. Ni ye Espíritu Sant nolu gaṉle ne scaw, ni miṉe rnee me diidzliw. 
\p  
\v 7-8 Gotsaa gwi sca gaṉle, tsoṉ mod rlu cho nac Jesús: Tiba por miṉe nolu Espíritu Sant, stiba por miṉe blu zeeṉe norobnis me, ni stiba por miṉe blu zeeṉe nolozh me. Zigtaa miṉe nolu Espíritu Santa, zigtaa zeeṉe brobnis mew, zigtagaa zeeṉe nolozh mew, blu gaṉle Xpëëd Dios nac me.  
\v 9 Miṉe rnee Dios, none gliladz new. Xtiidz samiech ne name rliladz ne, ¿pe leḻ miṉe rnee Dios dzigo gliladzd ne?  
\v 10 Zha ne gliladzd miṉe rnee Dios, rrieequia rzoob zho me ga zig tib zha ne rquidie; saṉgue zha ne gliladz miṉe rnee me, zieṉ zho gaṉle nli Xpëëd me nac Jesús.  
\v 11 Laa me bneele gaṉle: zha ne gnalo Xpëëd me, zgaa zho tib guieḻmban ndzon ne gdziṉd dze lozh; sac Xpëëdse me rdeed guieḻmban co.  
\v 12 Gacxe waa, zha ne rnalo Xpëëd me, laa zho bgaale guieḻmban ndzon co; saṉgue zha ne rnalod Xpëëd me, gard ygaa zhow. 
\s1 Bgaale to guieḻmban ne gdziṉd dze lozh 
\p  
\v 13 To ne nac to zha ne rnalole Xpëëd Dios, laa naa rzet miṉ rii lo to zeeṉa gacnaṉ to gaṉle laa to bgaale guieḻmban ne gdziṉdraa dze lozh ga.  
\v 14 Ni scagaa, ndioṉpaa ne rquiaadiag Dios xtiidz ne, zeeṉe ncuaaṉe rio zdoo me rnab ne lo me;  
\v 15 ni zigne ndioṉ ne rquiaadiag me xtiidz ne, scaquegaa none gliladz ne ib zneedz me ncuaaṉe rnab ne. 
\p  
\v 16 Zig nac zeeṉe gaṉ to cho tib zha ne nacgrë to beeṉ pe tib doḻ, ni rlu nacda doḻ ne gnitlo zho, zac gnab to lo Dios guṉ me zho perdon; ni gacnaṉ to gaṉle, ible zuṉ me zho perdon. Sac goṉ no doḻ ne rnitlo, ni zha ne guṉ doḻ co, nodne gnab to lo Dios guṉ me zho perdon.  
\v 17 Nli grëse guieḻntseeb doḻ naca, per no miṉe rnitlod miech.  
\v 18 Ni ndioṉ ne gaṉle, zha ne nacle xpëëd Dios ruṉdraa zho ne lega guṉctal zho xtoḻ zho; sac Jesús meṉ ne nac Xpëëd Dios, meṉ co quianap zho, grieelodraa lega pe guṉ meṉdox zho. 
\p  
\v 19 Zig nac ne, ndioṉpaa ne xnëz Dios no ne. Nli ndalraa zha ne zienaḻ ncuaaṉe rnabey meṉdox,  
\v 20 saṉgue ne, laa Xpëëd Dios biaad bdixbiini me xquieḻrien ne bdziuuṉbey ne meṉ ne nacpaa Dios. Niinasi laa ne ngable lo meṉ ne nacpaa Dios ga, ni lëë me ga nac Jesús. Me nac Dios nguiamban, ni me nac meṉ ne rdeed guieḻmban ndzon ne gdziṉd dze lozh. 
\p  
\v 21 Xin yeeṉa, goḻguieṉ Diosse nac meṉ ne gleynie to; guṉde to ne leḻ grë ncuaaṉe no lo guidzliu rii gleynie to, laa ne gleynie to Dios. 
\p Juan