\id 1CO  
\h 1 CORINTIOS 
\toc1 GUITS NE GLO PXEEḺ PABL LO ZHA CORINT 
\toc2 1 CORINTIOS 
\toc3 1 Co. 
\mt1 GUITS NE GLO PXEEḺ PABL LO ZHA 
\mt1 CORINT 
\c 1  
\p ¡Diuzh to grëse to!  
\v 1 Naa nac Pabl, ible Dios bzooblo naa znu quiayuṉ naa xtsiiṉ Jesús. Grop no bets ne Sóstenes rquiaa guits rii rxeeḻ no lo to. 
\p  
\v 2 Laaw ziaad lo to i, grëse to ne nac to zha ne ngable xnëz Dios no to guiedz Corint i, nac to zha ne bredz Dios ngab lo me, psaṉmbe me to zeeṉe laa to bliladz Jesús; zigne psaṉmbeque me grëse miech ne no dib lo guidzliu, zha ne bliladz Jesús, meṉ ne rnabey ne grëse ne. 
\p  
\v 3 Dios meṉ ne nac Pxoz ne, ni Jesús meṉ ne rnabey ne, me gacnieṉ to, me glu lo to gaṉle pa lotaa noxco me to; zeeṉa peet tsienied guic to. 
\p  
\v 4 Gzataa zeeṉe rzodiidznie naa Dios, rded naa xquizh lo me por grëtaa ncuaaṉe zineedz me lo to, niina ne laa to rliladz Jesús.  
\v 5 Sac goṉ porne rliladz to Jesús, blactaa ziyuṉlay me lo xquieḻmban to, noyacnieṉ me to quiayoguicraa to zha nac zhiwseed me, rieṉ to zha gnee tow lo miech.  
\v 6 Rlu zienaḻ to miṉe nac Xtiidz Jesús, zigne binse tow,  
\v 7 gacxe waa bneedz Dios grëtaa guieḻbiini lo to, zeeṉa guieṉ to zha gban to, laga quiambëz to gdziṉ dze ne guiaad Jesús meṉ ne rnabey ne.  
\v 8 Ni Dios nac meṉ ne gacnieṉ to tiblique gac to lo Xtiidz Jesús, zeeṉa ni tib falt rapde to gaḻ dze co.  
\v 9 Sca nac xtiidz me, ni mesi goṉ ctsëëd me miṉe rnee me, ible laa me bredz to gacnie to Xpëëd me Jesús, meṉ ndzon ne rnabey ne. 
\p  
\v 10 Gacxe waa bets, bzian, laa naa rso diidz lo to niowse goḻgac, tsodiḻdraa to. Iṉe tipse goḻgac grë to, teḻ pe nac dziin ne guṉ to, teḻ pe rzac to, tipse goḻnee. Ne nligaa goḻgona, zig nac zeeṉe Jesúszhal noso diidz rii lo to.  
\v 11 Sac goṉ në tib zhalidz Cloé lo naa nodiḻlsa to i;  
\v 12 no to dieṉ cho xnëz ngab to. No to rnee: “Xnëz Pabl no naa”; riasaque zha ne rnee xnëz Apol no zho, rrieequiagaa zha ne rnee xnëz Pedr no zho; haxta no zho rzac zhase nac zha ne nlipaa no xnëz Jesús.  
\v 13 Ne squi rac to, ¿pe rzac to dzigo squi nzian lë nac Jesús? Zha ne rnee xnëz Pabl no zho, ¿pe niacxe naa pquia lo cruz gozh xtoḻ zho?, ¿te brobnis zho ye par ygab zho lo naa? 
\p  
\v 14 ¡Xquizh Dios led naad pchoobnis to grë to, lëëse chop zha ne pchoobnis naa nac Crisp ni Gay!  
\v 15 Zeeṉa tsod pe nacne guiab to xnëz naa ngab to, sac naa pchoobnis to.  
\v 16 Ah, ni naaque goṉ pchoobnis grë meṉlidz Stef. Bod lëëse zha ne pchoobnis naa ga,  
\v 17 sac goṉ pxeeḻdaxe Jesús naa waa cchoobnis naa miech, sinque laa me pxeeḻ naa cseed naa zho gacnaṉ zho zha grieelo laa zho lo doḻ. Haxta bod ligase bzhaac to miṉe biaḻne naa lo to, sac ib zanaḻd naa pe guieḻrac, pe diidz ngaṉ ne gne naa; sac nacda gleynie miech zha rnee naa, sinque gliladz zho cho nac Jesús, pe nacne gut me lo cruz. 
\s1 Diosse nac meṉ ne rieṉ 
\p  
\v 18 Miṉ co nagoṉ noxco naa, maase niicle no grë zha ne rzac ncuaaṉe paat rquiind ga beeṉ Jesús gut me lo cruz, per lëë zha co nole nëz ne nitlo zho; saṉgue ne ne nac ne zha ne psilaale me lo doḻ, ndioṉ ne gaṉle ga blu pa lotaa nac poder ne rap Dios.  
\v 19 Noyaca zigne zhobneeque lo Xtiidz Dios, zeeṉe rëb me: 
\q1 Znitlo naa grë guieḻrac ne rzac zho csilaa zho, 
\q1 niicle rzac zho mazdraa zhooba guic zho, 
\q1 ni lalnu yquiinda. 
\p  
\v 20 Ni nligaaw, grë zha rac, grë zha rieṉ, grë zha ne rzob dieṉ cho nroobraa rac, ib blud grë zhiwseed zho ga lo zho zha csilaa Dios zho, chogaa nac Dios. Ga blu Dios gaṉle lega nacse grë guieḻrac ne no lo guidzliu rii.  
\v 21 ¡Diosse nac meṉ ne rieṉ! Bieṉ me grieelod guṉbey miech me por xquieḻrac zho, nacne bnabey me zha ne dib zdoo gliladz xtiidz me, zha co csilaa me; niicle ne rzhidznie miecha, rzac zho ncuaaṉe paat rquiinda. 
\p  
\v 22 Zig nac grë zha Israel, grë zha Gres ncuaaṉe paat rquiinda rzac zho. Grë zha Israel, racladz zho gaṉlo zho grë milagr nroob par glu ne diidzliw; laa zha Gres na zienaḻgaa gaca zigne nac zhiwseed zho, sac laa zho zienaḻ guieḻrac ne no lo guidzliu rii.  
\v 23 Gacxe waa zeeṉe rnee no lo zho Jesús meṉ ne pquia lo cruz, meṉ cose csilaa miech, rlëë zha Israel ron zhow; laa zha Gres, rzhidznie.  
\v 24 Saṉgue ne, ne nac ne zha ne bredzle Dios bzëëb xnëz me, zigtaa zha Israela, zigtagaa grëraa miecha, ndioṉ ne gaṉle Jesús nac meṉ ne biaadlu pa lotaa nac poder ne rap Dios, me biaadlu pa lotaa nac xquieḻrac Dios.  
\v 25 Miṉe rzac miech paat rquiind ga beeṉ Dios, ni naṉd zho ndziibguicraa nac miṉ co lo grë xquieḻrac zho; zha ne rzacgaa choḻze cho meṉ nsis ga sca gut lo cruz, ni naṉd zho lëë meṉ co mazdraa ndip lo grëse miech guidzliu. 
\p  
\v 26 Bets, bzian, goḻgaṉ gaṉle lo grë to ne nac to zha ne ngab xnëz Dios, led grëde to nac zha rieṉ nëz lo miech, led grëde to nac zha non, zha ne ziaadgaa lo grë dii ne nziuu lo zho.  
\v 27 Per ib laa Dios nobedz grë zha ne rzac miech peet rieṉd, grë zha ne rzac zho nac zha nsis, parne guṉctoladz me grë zha ne rzac zho nac zha rac, zha non.  
\v 28 Laa me nobedz grë zha ne sca rzac miech paat rquiin, zha ne rzac zho peet nond, parne guioog ro grë zha ne rzac zho nac zha non, zha nziuu.  
\v 29 Ga rlu me gaṉle ni tib choot grieelod gacniats lo me.  
\v 30 Goḻwi gaṉle, niapse por me laa ne nacnie Jesús, grë guieḻrac, grë guieḻrieṉ ne rdziaap ne, Jesús bneedza, ni Jesús nac meṉ ne psilaa ne lo grëtaa xtoḻ ne, meṉ ne psaṉmbe ne laa ne bziaab xnëz Dios. Dios bnabey sca goca.  
\v 31 Gacxe waa choot grieelod gacniats, zigne ziaadaque lo Xtiidz me zaatne rnee: “Zha ne racladz gacniats, mazd guṉnon zho Dios por grëtaa ncuaaṉe ruṉ me.” 
\c 2  
\s1 Xtiidz Jesús bnee Pabl 
\p  
\v 1 Gacxe waa teḻ naa, goḻsoladz gaṉle bets, bzian, leṉ dze ne biaḻseed naa to Xtiidz Dios, bned naa dieṉ pe diidz nroob, dieṉ pe diidz ndzielguic lo to.  
\v 2 Beṉd naa dieṉ peraa nseed naa to, sinque miṉe nac zhiwseed Jesús miṉ co biaḻne naa, zeeṉa gacnaṉ to cho nac me ni pe nac ne pquia me lo cruz.  
\v 3 Lega gzhe gzhe rac naa, haxta rzhidz naa, rdzieeb naa no naa lo to.  
\v 4 Zeeṉe laa naa psilo bne Xtiidz Dios lo to i, goṉ to gaṉle ib bned naa zigne rnee grë zha ne nac zha rac lo guidzliu rii; per blu Espíritu Sant gaṉle nacda beeḻze pe wseed, ni blu gaṉle pa lotaa poder ne rap Dios.  
\v 5 Sca bne naa lo to, sac laa naa racladz zha ne gbig sëëb xnëz Dios, me gnalo zho, gnalod zho grë miṉe nac xquieḻrac miech. 
\p  
\v 6 Parga nli no zaatne rnee no grë diidz nroob, diidz ndzielguic, per laa miṉ co rnee no lo grë zha ne rieṉraa zha nac Xtiidz Dios, ni nacdgaaw zigne nac grë xtiidz ndzielguic grëraa miech, grë diidz ne rleynie grë zha rnabey ne no lo guidzliu rii; sac zigtaa zhaw, zigtagaa zhiwseed zhow, ncuaaṉe tibrded naca.  
\v 7 Grë diidz ne rnee no, ndzielguic naca, sac zhiwseed Diosa, lëë xquieḻrac me ga. Ndzielguica, sac ga rlu me zha no guic me csilaa me miech gdziṉ zho lo guieḻndzon ne no me; gocnaṉd miecha padzeela, per nolew zeeṉe bzaa me guidzliu.  
\v 8 Grë miech ne no leṉ dze rii, rioguicd zho zha nac xquieḻrac Dios; sac teḻne nioguic zhow nabeyd zho nquia meṉ ndzon ne nac Jesús ga lo cruz.  
\v 9 Zigne zhobneeque lo Xtiidz Dios, zaatne rnee: 
\q1 Ncuaaṉe wlaltaa gard guieṉ miech, 
\q1 nac grë miṉe quianiele Dios gdeed me lo grë zha ne nlipaa gbig lo me gleynie zho me. 
\q1 Ncuaaṉe choot gard gaṉa, ncuaaṉe choot gard gona. 
\p  
\v 10 Saṉgue no laa no ndioṉlew, sac pxeeḻ me zhiEspíritu me blu lo no zha naca, meṉ co naṉ grëse miṉe no guic me. 
\p  
\v 11 Zig nacse tib miech, grieelod gacnaṉpaa ne dieṉ pe nac miṉe no guic zho, pe nacgaa miṉe rza zdoo zho, loxaque zhiespírituse zho naṉa; scaque Dios, loxaque zhiEspíritu me naṉ grëse miṉe no guic me guṉ me.  
\v 12 Ni teḻ no, Espíritu co nacnie no (nacnied no espíritu ne quianzë lo guidzliu rii), ni ible laa Dios pxeeḻ me lo no zeeṉa gacndioṉ no zha nactaa grë ncuaaṉe nole guic Dios gneedz me lo ne.  
\v 13 Zeeṉe rzeet no grë guieḻnzaac co, laa no rneew zigne rneedz zhiEspíritu me guieḻbiini lo no, rneed now zigne riab guic grë zha rac ne no lo guidzliu rii. Laa no rnee grë miṉ co zigne rlu zhiEspíritu mew, ni ible laaw nac par grë zha ne rioguicle zha racladz Espíritu co. 
\p  
\v 14 Grë zha ne nacnied zhiEspíritu Dios, choḻze miech nac zho, grieelod tsoguic zho zha nac grë miṉe rlu Espíritu co lo no. Rzac zho ncuaaṉe paat rquiind naca, sac grieelod guieṉ zhow ne zhase.  
\v 15 Saṉgue zha ne rioguicle zha racladz Espíritu co, rieṉ zho pe nac miṉe rlu me. 
\p  
\v 16 Ni nligaa zha guieṉ zhow, zigne zhobneeque lo Xtiidz Dios, zaatne rnee: “Choot grieelod gacnaṉ pe nac miṉe no guic Dios guṉ me, choot grieelod glu lo me pe nac miṉe no guṉ me.” Per no, ndioṉ now, sac grë ncuaaṉe naṉ Jesús, bneedz me diidz lo no ye no gocndioṉa. 
\c 3  
\s1 Gnalod zho samiech zho 
\p  
\v 1 Bets, bzian, ne nligaa gard grieelo gne naa lo to zigne rne naa lo grë zha ne rioguicle zha nac miṉe racladz zhiEspíritu Dios, sinque tibaque laa naa rne lo to zigne rne naa lo grëraa miech guidzliu, sac rrieequia bii mëdyeeṉ nac to lo zhiwseed Jesús.  
\v 2 Niapse ncuaaṉe ligase ziseed naa to, laa ne cseed naa to ncuaaṉe ndzielguic. Rrieequia nidzse nonedz naa quiaye to, laa ne gow to grë ncuaaṉe row zha gol. Haxta niinagaa gard tsoguic to zha nac grë miṉe ndzielguic,  
\v 3 sacne laa to bii zienaḻ miṉe ruṉ miech guidzliu, laa ne guṉ to miṉe racladz Dios. Goḻguieṉ gaṉle zha rac to, no to rlozhd glëëlsa to, rlozhd tiḻlsa to. ¡Led squid goṉ no gac zha ne nole xnëz Dios!  
\v 4 Pe i na rriee bla to rnee: “Teḻ no xnëz Pabl no no”, rrieequegaa zla zha ne rnee: “Teḻ no xnëz Apol no no.” Gase rlu gaṉle zienaḻde to miṉe racladz Dios, sinque laa to zienaḻ miṉe no guic to. 
\p  
\v 5 Nana, ¿cho nac Pabl, chogaa nac Apol parne no yquiaaqui tsodiḻ to? Nli no biadseed to Xtiidz Dios, per tib nguṉdziin winse nac no lo me, bdziuuṉ no miṉe rnabey me no.  
\v 6 Nac cuent rii zig nac tib guieḻgon, naa blo bni liu, laa Apol bgaala; per Dios nac meṉ ne bnabey blana ni me pchooba.  
\v 7 Goḻwi sca gaṉle Diosse nac meṉ non, sac me pchoob bni co, teḻ no peet ncuaaṉe nroob bdziuuṉd no, lëë gdib tib bloo bni liu, stib bgaala.  
\v 8 Zigtaa zha ne bloo bni liuw, zigtagaa zha ne bgaala, lal nac zho grop zho; ni Diosse nac meṉ ne gdeed miṉe rieguiaḻ zho tib tib zho por dziin ne beeṉ zho.  
\v 9 Tib nguṉdziin winse nac no lo Dios grop no Apol; laa to nac zig tib lë liu ne quiayan Dios, zig tib yu ne quiazaagaa me. 
\p  
\v 10 Pa lotaa wen Dios, sac bzooblo me naa naa psilo yu co, ni blu me lo naa zhapaa none tsaaw. Nli naa bgaa blee xcimienta, per niina zhaale zha ne nosoquiaw. Tib tib zha ne nosoquia yu co, none guieṉ zho zaacse gzhixcuaa zhow, tsienaḻ zho zigne nacse xcimienta ga,  
\v 11 sac goṉ nod pe nacne csëëb zho stib cimient, tibaque cimient no, lëë cimient co nac Jesús. 
\p  
\v 12 ¡Laa cimient co nole! Nana no zho gzaa yu co niapse guiib or, niapse guiib plat, no zho gzaaw grë quie niazh, no zho gzaaw yag, nogaa zho gzaaw grë pe guizh, pe yag xiidgaa.  
\v 13 Zeeṉe gdziṉ dze ne laa Jesús guṉ guieḻwxtis, ga glu dieṉ zha nac xtsiiṉ zho; sac gaḻ dze co grësew laaw none ted lo gui, ga glu dieṉ pa miṉ lëbraa.  
\v 14 Zha ne pquiin ncuaaṉe rlëb lo gui, ib tedsod zgaa zho miṉe rieguiaḻ zho gdeed Dios lo zho;  
\v 15 laa zha ne pquiingaa grë ncuaaṉe znuse rec, mbe scase nitlo xtsiiṉ zho. Peet ycaaniad zho, haxta zha pense teḻ zha laa zho lo gui co, zigne rzac zha ne rec lidz. 
\p  
\v 16 Goḻgacnaṉ gaṉle xyadoo Dios goṉ nac to, sacne zdoo to rbëz zhiEspíritu me.  
\v 17 Teḻ xyadoo Dios, tib yadoo mbe, tib yadoo nda naca; gacxe waa, zha ne gnitlow ib tedsod znitlo Dios zho.  
\v 18 Goḻguieṉ sca zaacse goḻgac, teḻ no zha ne rzac nroob rac zho wseed lo guidzliu rii, gnalod zho miṉ co; nend leḻ lo co no zho, ygaad zho miṉe nacpaa guieḻrac, guieḻrac ne rneedz Dios.  
\v 19 Sac goṉ grë guieḻrac ne no lo guidzliu rii, ncuaaṉe beeḻze naca nëz lo Dios. Zigne raquietaque lo Xtiidz me zaatne rnee: “Grë zha rac ne no lo guidzliu rii, lëëque lo grë guieḻrac ne zienaḻ zho, ga rlu Dios gaṉle paat rquiinda.”  
\v 20 No stib zaatne rnee: “Naṉle Dios grë zhgab ne nonie guic grë zha rac, ncuaaṉe paat rquiinda.”  
\v 21 Tsode to sca lozhd gacniats to dieṉ cho xnëz miech guidzliu rii no to, goḻguieṉ gaṉle grëtaa ncuaaṉe no, laa Dios psaṉa par yquiina lo to.  
\v 22 Zig nac guidzliu, guieḻmban, guieḻgut, ladznia to now, niicle ncuaaṉe no niinaw, ncuaaṉe naragaa ziaada, cheṉ tow; haxta Pabl, Apol, Pedr, ib laa no zo nu par dziuuṉ no xyudar to.  
\v 23 Grëse to tibaque xnëz meṉ ne no to, lëë meṉ co nac Jesús, meṉ ne pxeeḻ Dios. 
\c 4  
\s1 Zha rzac zha ne rienee xtiidz Dios 
\p  
\v 1 Goḻguieṉ sca tib moz winse nac no lo Jesús, laa me bzoo no noseed no miech xtiidz me miṉe gocnaṉd miech padzeela.  
\v 2 Ni zha ne goṉ znu ruṉ tib dziin, ible none nguzobdiidz gac zho lo meṉ ne rnabey zho.  
\v 3 Gacxe waa teḻ zha rzac to naa, teḻ zha rzacgaa grëraa miech naa, peet zienied guic naa. Haxta ni miṉe rzaac naa nac naa, peet nonda, rieguiaḻd guiep naa znutaa znutaa nac miṉe noyuṉ naa.  
\v 4 Nli peet dzeb nonied guic naa guiep naa nend cho pe glisqui lo naa, per led miṉcod gni naa ni tib doḻ rapdraa naa; loxaque Dios naṉ zha nac naa, me gneedz miṉe gaguiaḻ naa.  
\v 5 Gacxe waa, guṉde to ne glole to guiab dieṉ cho nac zha ne wenraa; sac miṉ co guṉ meṉ ne rnabey ne gaḻ dze ne laa me guiaad. Gaḻ dze co, me cxobneṉ gaṉle zhapaa nac ne tib tib ne, haxta grë miṉe rza guic ne, miṉe no zdoo ne, laaw glu me; grë no ne nodziuuṉ no xtsiiṉ me, dze co laa me gneedz miṉe rioguiaḻpaa no tib tib no. 
\p  
\v 6 Bets, bzian, niina ne nozet naa no lo to nu grop no Apol, quiayuṉnond naa naa, niicle nosaṉwindgaa naa me. Ga sca gaṉle goḻwi, zeeṉa cseed to gban to zigne nac Xtiidz Dios, tsode to lozhd dieṉ cho non, chogaa nond.  
\v 7 Stiba, ¿cho nadieṉ në lo to ne guṉnon to to? Grë ncuaaṉe rap to, grë ncuaaṉe rac to, ¿niacxe led Diosd bneedza lo to? Dios name bneedza lo to, ¿pe nac dzigo no to rlozhd gacniats to zig nac zeeṉe por xquieḻliger to bgaa tow?  
\v 8 Niats rac to, masaque rzac to grële zhiwseed Dios naṉ to, gaxle zo to lo me, haxta rzac to tole nac zha rnabey, paat rquiindraa no. Wenzhe tebaa nligaa zha rnabeyle nac to, zeeṉa haxta ye no zley no. 
\p  
\v 9 No hor rzaac naa, diunavez win psaṉ Dios no ne nac no zha ne nonee xtiidz me, loxaque lo no rwi miech, rwi grë anjl dieṉ zha rac no; zig ruṉ miech rieso zho lo zha ne rnabey zho ret.  
\v 10 Ne znu quiadziuuṉ no xtsiiṉ Jesús, masaque zha yozh nac no lo miech, laa to goṉ xquizh me zha rieṉ nac to lo zho. Zha nsis, zha zozhidzle rzoob zho no, laa to zha ndaan, zha ndip nac to. Masaque zha nziuu nac to lo zho, laa no rzac zho ni gaṉd zho lo no.  
\v 11 Haxta lo nadze blactaa zaatne retgbin no, zaatne retnis no, per ni lidz no, per ni lar ne dziaacw no guieṉd, rdib rdzaag no rdziuuṉ no dziin rdziniaa no ncuaaṉe rquiin no.  
\v 12 Ni rlozh ga rrieeque miech rsacsi zho no. Rrieequia zha ne rdzibdee no, per rdziuuṉd no gdzibdeeque no zho, sinque mazd rnab no lo Dios guṉlay me zho; zha ne rtsidiḻ no, rdziuuṉcasd no zho.  
\v 13 Rrieequia zha ne në rnee lo no, per no, diidz wen rtsire no lo zho. Masaque rzac miech no, zig rzac zho grë ncuaaṉe paat rquiindraa, zig rzac zho grë ncuaaṉe nole lo guizh. 
\p  
\v 14 Laa naa rzet grë miṉ rii lo to, per nacda par guṉctoladz naa to, sinque laa naa rzeta zeeṉa guieṉ to zaacse gac to, goḻguieṉ gaṉle rleynie naa to, rzaac naa to zig tib xpëëd naa.  
\v 15 Niicle niaca miṉe ndal zha ne guiadseed to i, niicxe guiaad nzian mil zho waa, per led grëd zho tsoxcopaa to zig rioxco tib dad xpëëd zho. Zigne rne naa ga, xpëëd naa nac to, rrieequia pxoz to nac naa, sac goṉ naa glo biaḻne xtiidz Dios lo to, laa to bzëëb xnëz Jesús.  
\v 16 Goḻtsoxco sca, goḻban zigne mban naa.  
\v 17 Ni ible miṉcopaa goṉ laa naa rxeḻ Timoté ziaad lo to i, lëë stib xpëëd naa i, ne nligaa rleynie naa me, tib zha nguzobdiidz nac me lo meṉ ne rnabey me. Laa me ziaad i, me gzodiidz lo to gaṉle zigne rseed naa miech grëse zaatne ziyateed naa, scagaa noxco naa mban naaw. 
\p  
\v 18 Rieṉ naa no bla niats ne nac to i, rzac nlidraa guiaḻ naa lo to i stib.  
\v 19 Gacnaṉ zho gaṉle, gneedzse Dios diidz, ible laa naa none guiaḻniob, dzigo bii zdziaṉ ne dieṉ pe nli na nacnie zho xpoder Dios, te loxaque rnee zho ye.  
\v 20 Sac goṉ zha ne ngab xnëz Dios, grë miṉe rnee zho none glu nacnie zho xpoder me, nacda loxaque diidzse.  
\v 21 ¿To nadieṉ zha racladz to? ¿Pe rdziladz to guiaḻ naa guiaḻgactox naa lo to i, te mazd wen ye niapse diidz ndooladz, diidz nex guiaḻne naa lo to? 
\c 5  
\s1 Zha ne ruṉctal xtoḻ 
\p  
\v 1 Zëëb diidz goṉ, lad to i no tib zha bgui ne quiayuṉ tib doḻ nroob; per ni grëraa miech ne gard gliladz Xtiidz Dios ruṉd miṉ co. Bin naa lëëque xniaa pchoob zho quiangob zho.  
\v 2 ¡Yo na ne rzac to grële zhiwseed Dios naṉ to, gaxle zo to lo me! ¡Laa ne ctoladz to, laa ne tso to guieḻnë, cuee to zha qui lad to, leḻ no to rlozhd gacniats to! 
\p  
\v 3 Niicle ne zozhaald naa lo to i, per zeeṉe bin naaw tibaque nonie guic naa zha gaca. Nu laa naa gni lo to gaṉle zha rieguiaḻ gac zha co:  
\v 4 Grë to ne nac to zha ne ngab lo Jesús, rnab naa lo to ycaalsa to zigne rnabey me. Ndioṉle ne gaṉle zeeṉe laa to ycaalsa, ga zo Jesús lo to, scagaa naa, goḻguṉ cuent lo to i zo naa.  
\v 5 Squi ndxie to grë to, goḻzonëz zha co, goḻcueegazh zho lo to i, tsie zho tsietsobe zho ladznia meṉdox, ga tednë xcuerp zho guieṉ zho gaṉle pe noyuṉ zho; naṉd new togo zzhixcuaa zho stib, zeeṉa ycaania Jesús zho gaḻ dze ne laa me gbiire guiaad. 
\p  
\v 6 ¡Xlëse goṉ squitaa racniats to rzac to zha mbe nac to, ni raṉdze to zha ne quiayuṉ doḻdox qui! ¡Pe rieṉde to teḻne glisquide to miṉe quiayuṉ zho, ib tedsod zrieequiaraa zha ne squi guṉctal xtoḻ!  
\v 7 Zha ne squi nac, masaque nac zho zig nac grë guieḻguidzdox ne znuse rded; goḻcueegazh zho sca, zeeṉa iṉe mbe gac to nëz lo Dios, tete to guieḻguidz qui. Goḻguieṉ gaṉle laa Jesús psaṉmbele ne, miṉcopaa gut me, goc me gon nëz lo Dios zig carner yeeṉ ne rgogon zho lo me lni Pascw.  
\v 8 Goḻgotsaa gban ne zigne racladz Dios, grëse teḻ zha wban ne glo, grëse guieḻyozh, grëse guieḻntseeb ne bdziuuṉ ne, none csaan new grësew. Ndzinli sca goḻgac, goḻtsienaḻ miṉe nac diidzli; none mbe gac to nëz lo Dios, zig guietxtil ne notsd ncobi. 
\p  
\v 9 Lo stib guits ne pxeḻ naa lo to ga, laa naa psole diidz lo to gaṉle ctsieelsade to grë miech yozh ne ndzinlid mban.  
\v 10 Zeeṉe sca pso naa diidz lo to, guiabde to togo naca parne ctsieelsadraa to grë zha ne gard gliladz Xtiidz Dios, zha ne rquiangob zha ne led tsieeld, grë zha ne zienaḻ loxaque guṉlo dimi, grë zha ne ruṉ guieḻgbaan, grëgaa zha ne rnalo grë mdio. Led zha coda, sac laga mban ne lo guidzliu rii, ible zaṉlsa ne grë ne zho.  
\v 11 Sinque zha ne bzet naa ga ctsieelsade to, nac zha ne nacle diidz xnëz Dios no zho, ni noque zho quiayuṉctal zho xtoḻ zho, no zho rquiangob zha ne led tsieeld zho, no zho zienaḻ loxaque guṉlo dimi, zhiga zhiga laa ne gleynie zho Dios leḻ zhaa ncuaaṉe rleynieraa zho, no zho rquiadiidzguizh samiech, no zho rzudz, nogaa zho ruṉ guieḻgbaan. Ne nligaa zha ne sca nac, per ni tib guieḻwagw gowniede to zho.  
\v 12 Teḻ grëraa zha ne gard gliladz Xtiidz Diosa, led ned rioguiaḻ glisqui miṉe quiayuṉ zho, Dios nac meṉ ne guṉquizh zhow.  
\v 13 Saṉgue zha ne nacgrë ne, zeeṉe noyuṉ zho tib ncuaaṉe ndzinlid, ib rieguiaḻ glisqui new lo zho. Gacxe nana sca, zha ne squi quiayuṉctal xtoḻ i, goḻcueegazh zho lad to, ni spalal gaṉdzedraa to zho. 
\c 6  
\s1 Zha none gac guieḻwxtis 
\p  
\v 1 Laa to gocnaṉle gaṉle, to rieguiaḻ glisqui teḻ pe nac ncuaaṉe nonguieḻd ruṉ zha ne nacgrë to. Lëda i goṉ ruṉ to, zeeṉe pe tib diḻ rap to, lëëlëd zie to lo wxtis laa ne gbig to lo zha ne nacgrë to, zha csiooglo lo xtiḻ to.  
\v 2 ¿Niacxe naṉde to zha ne ngab xnëz Dios, zha co cobey zha nac xtoḻ grëraa miech zeeṉe gaḻ dze ne laa Dios gnabeya? ¿Pe nac dzigo grieelod tose csiooglo lo teḻ pe diḻ win ne rap to?  
\v 3 Haxta grë anjl name, ne goṉ cobey pe nac grë miṉe quiayuṉ zho. Gacxe waa, grë diḻ ne rac lo guieḻmban rii, ne rioguiaḻ cobey zha guiooglo low.  
\v 4 Sca goṉ guṉ to, led node to, rnadse pew laa to ziele lo wxtis.  
\v 5 ¿Pe ni tib lë guieḻto guieṉd lo to? Lo grë to, ¿niacxe gooṉ guieṉd zha ne grieelo gnee lo to, cuëz lo xtiḻ to?  
\v 6 Nazdpaa rdziladz to diḻ, ¿pe i na lëëque zha ne nacgrë to quiadiḻnie to, ni rlozh ga zieque to zienie to xtiḻ to lo zha ne rliladzd Dios?  
\v 7 Pe rieṉde to tib guieḻtodoxle i squi no to lëëque to quiadiḻlsa. Mazd goḻxecw teḻ cho pe ruṉ to. 
\p  
\v 8 Mazdraa goṉ mbana squi no to rsacsi to miech, ni haxta zha ne nacgrë to rsacsi to.  
\v 9 Naṉle to gaṉle zha ne squi ruṉ guieḻntseeb, grieelod gdziṉ zho zaatne rnabey Dios. Tsieniewguite guic to sca. Goḻsoladz gaṉle grëse zha ne ruṉ guieḻyozh: 
\q1 zig nac zha ne rquiangob zha ne led tsieeld zho, 
\q1 zig nac zha ne rquiangob zha ne nole tsieel, 
\q1 zig nac zha ne nac mrazh, 
\q1 zig nac zha ne rnalo grë mdio laa ne gnalo zho Dios, 
\m ni tib zho grieelod gdziṉ zaatne rnabey Dios.  
\v 10 Scaque: 
\q1 zha ne nac ngbaan, 
\q1 zha ne zienie guic loxaque dieṉ zha guṉlo dimi, 
\q1 zha ne nac ngonziu, 
\q1 zha ne rzhixcuaa diidzguizh, 
\q1 zha ne ruṉgüet miech par cuan zho zho; 
\m ni tib zho ygaad guieḻnzaac co.  
\v 11 Blalaa to bio lo grë doḻ co glo, saṉgue niina miech mbele nac to nëz lo Dios, laa Jesús ni Espíritu Sant psaṉle to zig tib zha ne peet xtoḻd, laa me psaṉwenle to nëz lo Dios. 
\s1 Guṉctald zho xtoḻ zho 
\p  
\v 12 Nli ndal ncuaaṉe zac guṉ ne, guṉctalda xtoḻ ne, niicle choot rcadgaaw, per led grëda rquiin. Teḻ naa, niicle no ncuaaṉe zrieelo guṉ naa, per ruṉd naaw; sac racladzd naa guien naaw, lozh ga lëëw gnabey naa.  
\v 13 Zëëb diidz rnee zho: “Laa guieḻwagw biaaṉ par gow miecha, scagaa zdoo zho laaw biaaṉ par tsodzëw guieḻwagw.” Nli scaw, per guiabd ne togo por miṉ co lega gowcho ne. Pa rquiin ne lega tedso gow ne, sac goṉ zigtaa zdoo new, zigtagaa guieḻwagwa, zdziṉ dze ne gnitlo Diosa. Guieḻwagw ga na, saṉgue grë guieḻyozh neruṉ miech rquiangob zho zha ne led tsieeld zho, biaaṉd ne par dziuuṉ ne miṉ co, sinque laa ne biaaṉ par gban ne zigne rdziladz Dios, sac me rnabey ne.  
\v 14 Teḻ new nitlod ne, sac goṉ zigne bleeban Dios Jesús con poder ne rap me, scaque zbeeban me ne zeeṉe laa dze co gdziṉ. 
\p  
\v 15 Goḻgacnaṉ gaṉle, rrieequia lëë tiblë xcuerp Jesús nu goṉ nac ne tib tib ne. Nana, ¿pe nonguieḻa ga dzigo gdzieel tib lë xcuerp me ga xcuerp tib wnaa ro nëz? ¡Nonguieḻda goṉ!  
\v 16 Sac goṉ zha ne raanie tib wnaa ro nëz, rrieequia tibaque rac zho ga grop zho wnaa co. Rnee lo Xtiidz Dios, par me: “Zeeṉe laa mgui racgrop tib wnaa, tibaque miech rac zho ga grop zho.”  
\v 17 Scagaa zha ne rzëëb xnëz Jesús, tibaque rac zho grop zho me, zhiEspíritu me racnie zho. 
\p  
\v 18 Gacxe waa, guṉde to guieḻyozh yquiangob to zha ne led tsieelde to. Lo grë doḻ ne no, miṉ riise nac miṉe xcuerppaa miech rguitnie zho. Sac goṉ zha ne ruṉ guieḻyozh co, masaque rsaṉbeed zho zho ga.  
\v 19 Goḻguieṉ gaṉle, zha ne nole xnëz Dios, masaque zha nac zig tib yadoo zaatne rbëz Espíritu Sant, Espíritu ne rdeed Dios rbannie zho. Led nedraa rnabey xcuerp ne,  
\v 20 Diosle rnabeya, sac goṉ bzhiile me ne ni nroob gocnon ne lo me. Gacxe waa, zigtaa xcuerp new, zigtaa xpensar new, gotsaa yquiin new par cxobneṉ ne gaṉle pa lotaa meṉ nroob nac me. 
\c 7  
\s1 Rtsire Pabl lo zhiwnabdiidz zho 
\p  
\v 1 Lo guits ne pxeeḻ to lo naa, nzian ncuaaṉe rnabdiidz to, nu gaṉle laa naa ctsire lo wnabdiidz co: nli wena, teḻne niaca miṉe grieelow ctsieelniad ne.  
\v 2 Per parne tsod pe yquiaaqui cho guṉ guieḻyozh, tsonie zho zha ne led tsieeld zho, mazd wena zigtaa mguiw, zigtaa wnaaw ctsieelnia zho, tib tib zho gbanniese zho tsieel zho zigne rieguiaḻa. 
\p  
\v 3 Zha ne ptsieelniale, zig nac mgui none gnee zho lo tsieel zho zeeṉe racladz me, scaquegaa wnaa zeeṉe racladz tsieel zho gnee lo zho none siguieḻ zho.  
\v 4 Sac goṉ wnaa ne rtsieelnia, led zhadraa rnabey xcuerp zho, sinque tsieel-le zho rnabeya; scaquegaa mgui zeeṉe laa zho rtsieelnia, tsieel-le zho rnabey xcuerp zho.  
\v 5 Goḻguieṉ sca, niicle mguiw niicle wnaaw nodne yca zho xcuerp zho lo tsieel zho. Laa teḻne rzacgaa zho none yquiind zho tsieel zho tib blalaa dze, sac rquiabladz zho gzodiidznie zho Dios, wena totsaque guiaaṉ zhow diidz grop zho. Per zigne ted ga, gbiireque gnee zho lo tsieel zho, sac goṉ zha ne grieelod cxecw, nend ccheep meṉdox zho guṉ zho guieḻyozh. 
\p  
\v 6 Ne znu rne naa lo to, guiabde to nagoṉ togo rne naa nopaa ctsieelnia to.  
\v 7 Teḻ naa, rzac naa wena tebaa grëse to znu ctsieelniad, zigne nac naa; per na ncuaaṉe gacd ga, sacne zhaase zhaase nac ne tib tib ne. No zho pso Dios ctsieelnia, nogaa zho pso me ctsieelniad, per rley zho mban zho zigne nac zho.  
\v 8 Zig nac grë zha ne bii tib, grëgaa zha ne gutle tsieel, wena tebaa grieelo scase guiaaṉ zho,  
\v 9 per teḻne rieṉ zho lëbd xcuerp zho, dzigo mazd ctsieelnia zho. Mazd wena ctsieelnia zho, lëdle so zho tib zho ni teḻ rec rdzu zho. 
\p  
\v 10 Saṉgue zha ne ptsieelniale, laa naa rso diidz lo zho csaand zho tsieel zho, ni nacda xtidz naa, sinque ible sca rnabey Dios.  
\v 11 Laa teḻ zha ne guiaabgaa csaan zho tsieel zho, zaca, per lëëraasi grieelodraa gbiire ctsieelnia zho, mazd miṉe naca teḻne zrieelow ycatsieel zho stib, o guiaaṉgaa zho tipse zho. 
\p  
\v 12 Nu na gaṉle laa naa gnegaa chop lan xtidz naa lo zha ne led yed tsieel rliladz Xtiidz Dios; tib diidzse naca gni naaw, nacda miṉe rnabeypaa Dios. Zha bgui ne mbannie tib wnaa ne rliladzd Xtiidz Dios, per teḻne rio guic wnaa gbannie wnaa zho, nodne csaan zho wnaa.  
\v 13 Scaquegaa wnaa ne mbannie tib mgui ne rliladzd Xtiidz Dios, nod csaan zho mgui co teḻne riopaa guic mgui gbannie mgui zho.  
\v 14 Zigtaa mguiw, zigtagaa wnaaw, zha ne sca mbannie tib zha ne rliladzle xtiidz Dios, ye zho ruṉlay Dios ga, nenda haxta zio dze ne ye zho gliladz xtiidz me. Sac teḻne ctso zho, laa ne gbigraa xpëëd zho lo Dios, leḻ znu sozit mëëd.  
\v 15 Nana, teḻne zhalgaa zha ne rliladzd Xtiidz Dios ga, rnab csaanlsa zho, peet nacda maase ctso zho, nod pe nacne gzoobguicpaa tsieel zho lo zho cuëz zho. Sac goṉ zha ne rliladzle Xtiidz Dios, laa me bredz zho parne zaacse gban zho, bredzd me zho par tsodiḻ zho;  
\v 16 stiba, naṉd zho dieṉ pe zdziṉ dze ne gliladz tsieel zho Xtiidz Dios. 
\p  
\v 17 Miṉe naca tib tib to goḻtsoxco guṉ to miṉe rdziladz Dios. Zigtaa zha ne pso me ctsieelnia, zigtagaa zha ne pso me scase guiaaṉ, sca none gac to; scagaa zha ne ncaatsieel-le zeeṉe rliladz zho xtiidz me, none sca guiaaṉ zho niicle teḻne rliladzd tsieel zho xtiidz me. Grëse zha ne ngab lo me, diidz rii rso naa lo zho.  
\v 18 Zig nac grë zha ne nole bey xcuerp zeeṉe laa zho rzëëb xnëz me, sca no zho bey co guṉd zho ne yqueets zhow. Zha ne na nodgaa bey co zeeṉe rzëëb zho xnëz me, scaque nod pe nacne tsopaa zho bey co.  
\v 19 Miṉe mazdraa non lo me, gban zho zigne rdziladz me, guieṉdraa ne dieṉ cho no bey, chogaa noda. 
\p  
\v 20 Zigne rneque naa ga, grëse zha ne rzëëb xnëz Dios, teḻ zha nac zho zeeṉe laa me bredz zho, scase none guiaaṉ zho.  
\v 21 Zig nac zha ne nac nguṉdziin lo beṉ, peet tsienied guic zho guiab zho dieṉ zha griee zho ladznia zha ne rnabey zho; per teḻne gdeeda diidz, zac tsoxco zho dieṉ zha griee zho lo zha co.  
\v 22 Zha ne sca nac nguṉdziin lo beṉ zeeṉe bzëëb zho xnëz Dios, guieṉ zho gaṉle rrieequia zonlaale zho, sac goṉ laa Jesús psilaale zho lo grëtaa doḻ ne bio zho. Zha ne nacdgaa nguṉdziin lo beṉ zeeṉe bzëëb zho xnëz Dios, guieṉ zho gaṉle tib nguṉdziinle nac zho lo Jesús niina, me rnabey zho.  
\v 23 Goḻguieṉ gaṉle, grëse to laa Dios bzhiile to ni nroob gocnon to, gacxe waa mele rnabey to; ni togaa, lo me none guṉ to dziin, gdeete to diidz lega gnabey miech to.  
\v 24 Sca nasca goṉ bets gaca, tib tib to zigne nacse to zeeṉe bzëëb to xnëz Dios scase no gban to, iṉe gleynie to me. 
\p  
\v 25 Stib wnabdiidz ne ruṉ to ga dieṉ zha gac zha ne gard ctsieelnia, gneli naa lo to gaṉle, guieṉd tib xley Dios miṉe gnabeypaa dieṉ zha gac zho. Per goḻquiaadiag miṉe gne naa nu gaṉle zha rzaac naa, naṉle to gaṉle, zha ne znu rquia zdoo Dios rbedz me, miṉe rquiin miṉ co rnee zho.  
\v 26 Grë ne ne nac ne zha ne rliladz Xtiidz Dios leṉ dze rii, nligaa ngaṉ nac lo xquieḻmban ne, gane zoot naa wena zha ne sca gard ctsieelnia, maase guiaaṉtib zho.  
\v 27 Zha bgui ne na ptsieelnialegaa, grieelod gni naa guiaaṉtib zho; sca mbannie zho tsieel zho; per teḻ zha ne gard ctsieelniaw, mazd sobd guic zho ctsieelnia zho.  
\v 28 Zha ne racladzpagaa ctsieelnia, zigtaa mguiw zigtaa wnaaw, led doḻd ga guṉ zho teḻne laa zho ctsieelnia; per gacnaṉ zho gaṉle, zeeṉe laa zho pcatsieel-le, ib tedsod nroob guieḻnë ne gaṉ zho por grë miṉe noyac leṉ dze rii. 
\p  
\v 29 Miṉe none guieṉ to: zhisle nac dze ne so ne lo guidzliu rii, led nroob nac ngbidz ne grieelo dziuuṉ ne xtsiiṉ Dios; gacxe waa, zha ne nole tsieel, mazd sac zho zho zig tib zha ne guieṉd tsieel.  
\v 30 Zha ne quianie dimiw, zha ne no guieḻbleya, zha ne nogaa guieḻnëw, gdeete zho diidz yca grë ncuaaṉ co lo zho par guṉ zho xtsiiṉ me.  
\v 31 Zha ne bienle ruṉfalte grëtaa ncuaaṉe rquiin zho, gdeete zho diidz ctse grë ncuaaṉ co lo zho, sac zigtaa guidzliuw, zigtaa grë ncuaaṉe no low, zdziṉ dze ne nitlow. 
\p  
\v 32 Miṉe racladz naa peet zhgab ctsed lo to. Goḻwi gaṉle, zha bgui ne tib, tiblique zienie guic zho ruṉ zho miṉe rdziladz Dios, miṉe nac xtsiiṉ me.  
\v 33 Laa zha ne no tsieel, grieelodraa sca gac zho, sac laa guic zho zienie zha gbannie zho tsieel zho, zha grieelo guṉ zho miṉe rdziladz me, miṉ co rionieraa guic zho.  
\v 34 Scaque grë meṉ wnaa, zha ne tib, rioxcoraa zho ruṉ zho miṉe rdziladz Dios, dib nacse zho rbeeladz zho zho lo xtsiiṉ me. Laa zha ne ptsieelniale, xco ne dieṉ zha gbannie zho tsieel zho, dieṉ zha grieelo guṉ zho miṉe rdziladz tsieel zho, xco co rioraa zho. 
\p  
\v 35 Laa naa rne miṉ rii lo to, per guiabde to togo rca naa ctsieelnia to, sinque laaw rne naa parne guieṉ to zha guṉ to, zeeṉa grieelo zaacse gac to guṉ to miṉe rnabey Dios.  
\v 36 Zha ne quianie wnaa nguieg, teḻne rzac zho nonguieḻda ga scase ted lo xquieḻnguieg xpëëd zho, sinque none ctsieelnia zho, peet nacda, led doḻd ga ctsieelnia zho.  
\v 37 Laa teḻne rzacgaa zho, wenraaw ctsieelniad xpëdwnaa zho, ible scale pquiabladz zho guiaaṉ mëëd, wenaque ga teḻne sca rzac zho.  
\v 38 Wen ga guṉ zha ne sca gdeed diidz ctsieelnia xpëdwnaa, per mazdraa wen ga guṉ zha ne rzac mazd ctsieelniad xpëëd. 
\p  
\v 39 Nana, wnaa ne retgaa tsieel, nli zeeṉe mban tsieel zho rnabey ley ne tsieelse zho gbannie zho; per zeeṉe laa tsieel zho ret, zac ctsieelnia zho teḻ cho stib mgui ne racladz zho, totsaque zha ne noque xnëz Diosa.  
\v 40 Per teḻ naa, rzac naa mazdraa wen gban zho teḻne tsodraa guic zho ctsieelnia zho stib; sca nagoṉ rzaac naa wena, ni led xtiidzdse naaw sac rieṉ naa led tibd naa, Espíritu Sant nacnie naa. 
\c 8  
\s1 Bëël ne rgogon zho lo mdio 
\p  
\v 1 Stib wnabdiidz ne ruṉ to ga, dieṉ zha nac guieḻwagw ne rgogon zho lo grë mdio, pe zrieelo gdioowa, te grieeloda ye. Zootle na grële to naṉ miṉ co; per no hor zeeṉe squi rzac ne grëlew naṉ ne, leḻ racniats ne, laa ne gacndooladz ne gnee ne lo grë zha ne nacgrë ne dieṉ zha guṉ zho parne tsoguicraa zho Xtiidz Dios.  
\v 2 Zha ne rzac grëlew rac zho, ga rlu zho gaṉle peet rieṉd zho.  
\v 3 Teḻ Dios ruṉbey me tib tib miech, naṉpaa me cho nac zha ne rleynie me. 
\p  
\v 4 Zhapaa dzigo gaca, ¿pe wena dioow ne xpëël grë ma ne rgogon zho lo mdio ga, te wenda ye? Ndioṉle ne gaṉle grë mdio ne riegaṉ miech led Diosd ga, tibaque meṉ ne nac Dios no.  
\v 5 No zho rzac nziandox Dios, nziandox meṉ rnabey no, no me no gbaa, nogaa me no lo guidzliu,  
\v 6 saṉgue ne ndioṉ ne gaṉle tibaque Dios no, lëë meṉ co nac Pxoz ne, me psaṉ grëtaa ncuaaṉe no, me psaṉ ne parne dziuuṉbey ne me. Ni scaquegaa, tibaque meṉ ne rnabey ne, lëë me ga nac Jesús, me bzaa grëtaa ncuaaṉe no, me nac meṉ ne rneedz xquieḻmban ne.  
\v 7 Per no zha ne rliladzle Xtiidz Dios, bii gardaque guieṉ zho ne tibaque Dios no. Tibaque rzac zho mban mdio, gane zeeṉe rquiin zho bëël ne rgogon zho lo mdio racchop guic zho, lëëque zha ruṉctal xtoḻ zho ga sca ruṉ zho.  
\v 8 Goḻguieṉ sca, teḻ Dios rwid me dieṉ cho pe row. Guiabd ne togo por gow ne o gowdgaa ne bëël co laa ne guiaṉnziuu lo me. 
\p  
\v 9 Laa to naṉle nasca, peet nacda yquiin to guieḻwagw co, per scagaa goḻcobey adeḻ miṉ co yquiaaqui guṉctal to xtoḻ tib zha ne squi bii racchop guic.  
\v 10 Sac goṉ, nenda tibliladz to zob to zaatne riegaṉ grë miech mdio noquiin to bëël co, ni gaṉ tib zha ne bii racchop guica. Zeeṉe gaṉ zho to, nend yeque zho gbig gow zhow, per zeeṉe lozh ga tibaque laa guic zho tsienie lëda ga beeṉ zho.  
\v 11 Zha ne sca guṉ, niicle ne nli rieṉ zho peet nacd ncuaaṉe noyuṉ zho ga, per por zha laa zha co guṉctal xtoḻ. Guṉscade to, goḻguieṉ gaṉle ye zho ga psilaa Jesús zeeṉe gut me lo cruz;  
\v 12 gacxe waa, teḻne sca guṉ to por to yquiaaqui guṉ zho tib ncuaaṉe rzac zho nonguieḻd, lole Jesús ga quiayuṉ to falt.  
\v 13 Miṉ co nagoṉ, teḻ naa mazd maase gowd naa bëël co, teḻne por miṉ co yquiaaqui guṉctal naa xtoḻ tib zha ne nole xnëz Dios; sac lëda ga guṉ naa gac naa zig tib quie ne grieḻ ni zho. 
\c 9  
\s1 Miṉe rieguiaḻ zha ne ruṉ xtsiiṉ Dios 
\p  
\v 1 Zigne nagoṉ zac guṉ to grë ncuaaṉe wen ne racladz to, scaquegaa naa, zac gnab naa ncuaaṉe wen ne racladz naa. Teḻ naa goṉlo naa Jesús meṉ ne rnabey ne, Dioszhal bzo naa pxeeḻ me naa none naa Xtiidz me. Ne squi ptsëë Dios lo xquieḻmban to zeeṉe biaḻseed naa to, i rlu gaṉle me nacnie naa. 
\p  
\v 2 No zha ne rzac nlid Dios pxeeḻ naa, saṉgue to naṉwen to gaṉle me pxeeḻ naa, sac goṉlo to miṉe beṉ naa, miṉe blu naa; ni scagaa niina, lo xquieḻmban to i rlu gaṉle ne nli xtsiiṉ me quiayuṉ naa.  
\v 3 Grë zha ne sca rzac nlid Dios pxeeḻ naa, rzac zho peet raguiaḻd naa, gacnaṉ zho gaṉle:  
\v 4 ¡Raguiaḻ naaw goṉ! Ni grëragaa zha ne rdziuuṉgza no xtsiiṉ Dios, rioguiaḻ no gneedz to ncuaaṉe yquiin no, gneedz to zaatne gbiaaz no.  
\v 5 Teḻ naa, haxta raguiaḻ yquianie naa tib meṉ wnaa ne gac tsieel naa, iṉe sënie naa me zigne ruṉ grëraa zha ne rdziuuṉgza no dziin rii, zig nac Pedr, zig nacgaa grë zha bets meṉ ne rnabey ne.  
\v 6 ¿Te loxaque grop no Bernabé naye znu zhaaque no dziuuṉ no stib dziin, par gdziniaa no ncuaaṉe dioow no?  
\v 7 Goḻgaṉ gaṉle, zig nac zha ne rzëëb lo xtsiiṉ meṉguiib, ¿niacxe zhaa lo dziin ne rdziniaa zho ncuaaṉe row zho rio zho lo xtsiiṉ meṉguiib? ¿Zha ne rangaa, niacxe rieguiaḻd zho yquiin zho ncuaaṉe rac zaatne ran zho? ¿Zha ne na raṉgaa ma, niacxe rieguiaḻd zho yquiin zho ma zigne racladz zho? 
\p  
\v 8 Guiabde to togo bod guicse naa riab miṉe rne naa nu, goḻgaṉ gaṉle haxta lo ley ne psaṉ Moisés  
\v 9 no tib zaatne rnee: “Zeeṉe guṉcuṉ to xcon to dziin gzëëni ma mzion zhobxtil gacmbew, code to guiex ro ma, goḻsaan gow ma miṉe ygaa ro ma.” Goḻwi gaṉle zha rnee Dios, nana pe naṉ to ngonse rquia zdoo me.  
\v 10 Lëda goṉ, grëse ne rquia zdoo me ne. Ga rlu me gaṉle, zha ne ruṉ xtsiiṉ me, ible rieguiaḻ zho ycaa zho miṉe non xtsiiṉ zho. Zig nacaque guieḻgon, zigtaa zha ne rana, zigtagaa zha ne ruṉmbe grë guieḻnzaac co, ible rieguiaḻ zho yquiin zhow.  
\v 11 Teḻ no, rrieequia nazho tib gon i bdziuuṉ no biadseed no to Xtiidz Dios, ¿niacxe rioguiaḻd no dzigo gneedz to ncuaaṉe yquiin no? 
\p  
\v 12 Blalaa zha ne nale griiṉ riaadted lo to i, rnabey zho to rdeed to ncuaaṉe rquiin zho, ¿pe leḻ no dzigo rioguiaḻd gnaba lo to? Mazdraa goṉ rioguiaḻ no gnab now, per haxta lo nadze gard dziuuṉ no miṉ co, notaa naṉ zha rdziniaa no ncuaaṉe rdioow no; zeeṉa guiaaṉd zdoo to, lozh ga laa to csaan miṉe nac Xtiidz Dios.  
\v 13 Led naṉle to gaṉle, grë zha ne ruṉ dziin leṉ xyadoo Dios, psaṉ me diidz grë ncuaaṉe nac gon, ga xeṉ zho pe yquiin zho, zig nac zha ne ruṉ dziin zaatne nac lo pcoog, lo ncuaaṉe rielogon miech ga, ga rdioob ncuaaṉe row zho.  
\v 14 Ni scaquegaa psaṉ Jesús diidz, zha ne cseed miech Xtiidz me, ib none lo dziin co gdziniaa zho pe yquiin zho.  
\v 15 Per teḻ naa goṉ, wlaltaa peet gard gnab naa lo miech. 
\p Laa naa rzet miṉ rii lo to, per guiabde to togo ruṉ naaw parne csilo to pe gneedz to lo naa. Ib zanaḻd naa miṉ co, sac rley naa znu quiayazhd naa quiayuṉ naa xtsiiṉ Jesús, mazd maase guetgbin naa, lëdle ctiche zho guieḻbley rii lo naa.  
\v 16 Niicle ne znu quiayazhd naa quiayuṉ naa dziin rii, per ni lalnu racniatsd naa, sacne ible laa Dios bzo naa par gne naa Xtiidz me lo miech; ni, ¡probsaxe naa teḻne gned naaw!  
\v 17 Noyuṉd naaw par dieṉ pe premio ygaa naa, sac zig rne naa ga Dios bzo naa, me rnabey naa quiayuṉ naaw, masaque nacse naa zig tib nguṉdziin.  
\v 18 Par naa, lëële premio nu nac guieḻbley rii ne znu liga quiaseed naa miech Xtiidz Dios, rnabd naa gneedzpaa zho ncuaaṉe yquiin naa niicle ne raguiaḻ naa gnab naaw. 
\s1 Tsoxco zho ygaa zho premio 
\p  
\v 19 Stiba mazdragaa wena, znu choot noneedzd ncuaaṉe yquiin naa, sac sca grieelod cho gnabey naa; per niicle ne nagoṉ choot rnabeyd naa, zhaal naa rac naa zig tib nguṉdziin lo grëse miech, parne gdeeda diidz tso guic zho sëëb zho xnëz Jesús.  
\v 20 Gacxe waa zeeṉe no naa lo grë zha Israel, rac naa zigne rac zho, zeeṉa tso guic zho gliladz zho cho nac Jesús. Zeeṉe nogaa naa lo grë zha ne zienaḻ xley zha Israel, niicle ne rnalodraa naa ley, per ruṉ naa grë ley ne zienaḻ zho, zeeṉa sca grieelo yquiabladz zho sëëb zho xnëz Jesús.  
\v 21 Scaquegaa zeeṉe no naa lo grë zha ne ruṉbeyd ley co, rioxco naa rac naa zig tib zha ne ruṉbeyda; per guiabd ne togo haxta grë ncuaaṉe rleyniedraa Dios ruṉ naa. Laa naa ruṉ miṉ co, zeeṉa ye zho sëëb xnëz Jesús.  
\v 22 Grë zha ne pense quiayacnaṉ zha nac Xtiidz Dios, zeeṉe no naa lo zho, ruṉd naa gne naa grë ncuaaṉe gard guieṉ zho zha nac, ruṉd naa csaṉwin naa zho, sac miṉe rioxco naa lozh gliladz zho cho nac Dios. Tib tib miech, rguib naa rac naa zigne rac zho, parne grieelo gzodiidz naa lo zho cho nac Jesús, zeeṉa gacnaṉ zho zha sëëb zho xnëz Dios.  
\v 23 Laa naa ruṉ miṉ co, parne gdeeda diidz gnee naa Xtiidz Dios grëse lo miech, ni scagaa, gley naa gaṉ naa ye zho ygaa lo guieḻndzon ne zhobnee lo Xtiidz Dios. 
\p  
\v 24 Naṉle to gaṉle zha rzac zha ne rie tib lo corr, nzian zho nac zha ne rie per tibaque zha ne ruṉ gan, zha co rcaa tib premio. Goḻguṉ cuent nasca tib lo corr i no to, grëse to goḻtsoxco xooṉ to zeeṉa grëse to ygaa tib premio.  
\v 25 Grë zha ne sca rio tib lo wguit, par grieelo guṉ zho gan rioxco zho raṉ zho xcuerp zho, ruṉd zho ncuaaṉe csiaab xfuers zho. Nroob cuidad ne rap zho zho par guṉ zho gan tib coron guizh nguia ne znuse rgooḻ. Scase nac premio ne rgaa zho, saṉgue ne goṉ, laa ne noxco ygaa ne tib premio ne gdziṉd dze nitlo.  
\v 26 Gacxe waa, teḻ naa tibaque noxco naa dieṉ zha xooṉraa naa. Naṉpaa naa pa gdziṉ naa, nacd naa zig zha ne rieṉd dieṉ pa gdziṉ, zha ne lega rquiaagaa puñet, rdeete zhow zaatne no ygaaw.  
\v 27 Ni lalnu rdete naa diidz gac miṉe racladztaa xcuerp naa, tibaque rnabey naaw parne guieṉa ncuaaṉe nonguieḻ miṉ co none guṉa, led guṉda ncuaaṉe racladztaaw. Laa naa ruṉ miṉ co zeeṉa guṉ naa gan, sac goṉ, guieḻtodox ga grieequia naa znu no naa none naa lo miech zha guṉ zho, ni teḻ lozh ga naapaze biaaṉ beṉd naa gan. 
\c 10  
\s1 Nodne gleynie miech mdio 
\p  
\v 1 Bets, bzian, goḻsoladz gaṉle zha bzhaac grë pxozgol ne zha ne sca bzënie Moisés ga. Pxeeḻ Dios tib xcow beeṉ ncal zaatne zieetaa zho, ni pteed me zho lo Nisdoo Nizhnie.  
\v 2 Zigtaa lo xcow cow, zigtaa lo nisdoo cow, masaque rrieequia lo co brobnis zho, parne tibaque niac zho niacnie zho Moisés. 
\p  
\v 3 Grëse zho goṉ milagr nroob ne beeṉ Dios, bnabey me bliaaḻ guietxtil zhan gbaa bdeed me dow zho,  
\v 4 beeṉcta me nis tib cho quie bdeed me go zho no zho dan bidz co. Lëële Jesús ga bdeed nis co go zho. Lo zho ga zo me, rrieequia me ga nac quie ne bda nis go zho, sac mese rzhixcuaa lo grëtaa xliaadz miech.  
\v 5 Niicle scataa goṉ Dios zho, per led grëd zho bioxco nion xtiidz me, nacne ndal zho bnitlo bioliuse zho dan co.  
\v 6 Gase na gaṉle gotsaa gwi ne zha bzhaac zho, zeeṉa gzoobladzd ne dziuuṉ ne grë ncuaaṉe ndzinlid ne beeṉ zho.  
\v 7 Goḻguieṉ gleyniede to mdio, zigne beeṉ zho. Rnee lo Xtiidz Dios: “Blozhse dow zho, go zho, laa zho psilo biee lo zhimdio zho.” 
\p  
\v 8 Gotsaa gwi ne gaṉle, pe guieḻnë ne bgaa zho zeeṉe brieequia bla zho lega bionie wnaa, tib dzeque bnabey Dios gut gaḻptsoṉ mil zho. ¡Ni lalnu tsod guic to guṉ to miṉ co!  
\v 9 Ib guṉglëëde to Dios, sac zha, zeeṉe beṉngulëë zho me, bnabey me brieequia grë meeḻ pquiaa maw zho, ndal zho gut.  
\v 10 Niicle glisquidgaa to teḻ pe nac miṉe quiayuṉ me, sac teḻ zha, sca beeṉ palal zho; nacne pxeeḻaque me anjl ne rnitlo, ndal zho bnitlo anjl co.  
\v 11 Sca nagoṉ bzhaac grë pxoz gol ne ga, gotsaa guieṉ ne sca dziuuṉd ne miṉe beeṉ zho, miṉe beeṉ zho ga laaw zhobnee lo Xtiidz Dios parne gacndioṉ new, guieṉ ne zaacse gban ne, ne nac ne miech ne mban leṉ dze rii ne znu ziaadyoble nitlo guidzliu. 
\p  
\v 12 Gacxe waa, zha ne rzac mbanpaa zho zigne racladz Dios, none nsin so zho zeeṉa guṉd zho ncuaaṉe guṉctal xtoḻ zho.  
\v 13 Nli no ncuaaṉe rcheep ne guṉctal ne xtoḻ ne, per nacda ncuaaṉe griiṉ rieṉ. Pe zhidaa miech ne zieded lo miṉ co. Tsod miṉe guiab ne ib lëbd ne griee ne lo. Miṉe naca none gnalo ne Dios, sac teḻ me ib csaand me guiab ne tib lo ncuaaṉe glëbd ne griee ne; sca nac xtiidz me, ni mesi goṉ ctsëëd me miṉe rnee me. Me nac meṉ ne gacnieṉ ne grieelo griee ne low. 
\p  
\v 14 Bets, bzian, goḻguieṉ sca ib none csaan to grë mdio, gnalodraa tow.  
\v 15 Miech nixbiini nac to, grë miṉe rne naa lo to nu, naṉ to gaṉle ncuaaṉe rquiina.  
\v 16 Goḻwi gaṉle, zeeṉe rdioow ne guietxtil, rdio ne vin, rdziuuṉ ne xtsee ne beeṉ Jesús ga, ga rlu tipse nac ne grë ne nacnie ne me.  
\v 17 Niicle ne ndal nac ne, per ne tibaque guietxtil ne rdioow ne, miṉ co gane tibaque cuerp nac ne grë ne, ni lëë xcuerp Jesús ga.  
\v 18 Scaque zha Israel, zeeṉe row zho xpëël ma ne riogon lo Dios, ga rlu zho ne nacnie zho me. 
\p  
\v 19 Zha ne rnalogaa mdio, zeeṉe row zho grë ncuaaṉe riogon lo mdio, scaque tibaque rac zho grë zho mdio. Per guiabde to togo mban mdio, togo mazdragaa nac bëël ne rgogon zho lo mdio.  
\v 20 Miṉe racladz naa guieṉ to, zeeṉe sca ruṉ grë miech pe rgogon zho lo grë mdio, lo meṉdox ga rgogon zhow, led lo Diosda. Goḻguieṉ sca, ib tsiesëëbde to lo grë zha ne quiayownie mdio, zeeṉa gacniede to meṉdox.  
\v 21 Lëdraaw ga goṉ guṉ to, teḻ rlozhse rquiin to xtsee ne psaṉ Jesús diidz ga dziuuṉ ne, ni tsieque to tsieguie to, tsietow to zaatne rownie zho meṉdox.  
\v 22 ¡Guṉscade to, guṉglëëde to Dios! ¡Goḻguieṉ gaṉle, lëbd ne dziaṉ ne xquieḻblëë me! 
\s1 Zha guṉ zha ne rliladzle Jesús 
\p  
\v 23 Zig rne naa ga: “Nli zac guṉ ne ncuaaṉe gacladztaa ne, per led grëda nonguieḻ.” Teḻ naa, zrieelo guṉ naa ncuaaṉe gacladztaa naa, per led grëda yquiin par guṉ naa xyudar grëraa zha bets ne, lozh tsoguic zho Xtiidz Dios;  
\v 24 sac goṉ, ib none dzioxco ne grëraa zha ne nacgrë ne.  
\v 25 Zig nac grë bëël ne rdo lo lgui, zac gow tow, ib guṉde to gnabdiidz to dieṉ zha naca, sac goṉ nend bëël ne biogon lo mdiow, dzigo laa dzeb co tsonie guic to.  
\v 26 Goḻguieṉ gaṉle, Dios psaṉ guidzliu, scagaa grëtaa ncuaaṉe no low cheṉ me naca. 
\p  
\v 27 Zeeṉe teḻ zha tsiegaa to tib wagw lidz tib zha ne gard gliladz Jesús, bëël ne gneedztaa zho goḻgowa, per scaque gnabdiidzde to dieṉ zha naca; zeeṉa peet dzeb tsonied zdoo to.  
\v 28 Per teḻne grieequia tib zha ne gnë bëël ne biogon lo mdiow, gowde tow; zeeṉa csaṉde to zdoo zho.  
\v 29 Niicle ne ndioṉpaa ne led doḻd ga guṉ to gow tow, per zha ne gaṉa ga sadoḻ zdoo zho. 
\p Nana gnë to: “¿Pe nac dzigo por stib zho grieelod guṉ naa miṉe racladz naa?  
\v 30 Teḻ rded naa xquizh lo Dios zeeṉe pe tib guieḻwagw ne rquiin naa, ¿pe nac dzigo por miṉe rzacse stib zho, grieelod gow naaw?”  
\v 31 Goḻguieṉ gaṉle, racda por zha cose; sac grëse ncuaaṉe dziuuṉ ne, haxta ncuaaṉe dioow new, ncuaaṉe dio new, none zeeṉe nodziuuṉ new cxobneṉ ne gaṉle pa lotaa meṉ nroob nac Dios.  
\v 32 Gotsaa guieṉ ne sca gaṉle dziuuṉd ne ncuaaṉe yquiaaqui csaṉ ne zdoo stib miech, zigtaa zha Israela, zha stib guiedza, zha ne nolegaa xnëz Diosa.  
\v 33 Teḻ naa, zanaḻd naa ncuaaṉe gdziladz naa naase, sinque rioxco naa grëtaa ncuaaṉe ruṉ naa, ruṉ naaw par gacnie naa grëse miech, zeeṉa grieelo tso guic zho gnab zho lo Dios csilaa me zho lo xtoḻ zho. 
\c 11  
\p  
\v 1 Goḻwi sca, zigne raṉ to noxco naa mban naa zigne blu Jesús, scaquegaa to goḻtsoxco gban to zigne raṉ to mban naa. 
\p  
\v 2 Bets, bzian, rleynie naa to goṉ sac tibaque rsoladz to naa, ni rioxco to zienaḻ to grë miṉe pseed naa to.  
\v 3 Per goḻsoladz gaṉle: grëse meṉ wnaa, none zha bgui gnabey lo zho, teḻ zha bgui Jesús rnabey lo zho, zigne rnabey Dios lo me.  
\v 4 Gacxe waa, teḻ tib zha bgui yase nozodiidznie zho Dios, quiateedgaa zho xtiidz me, ni zob xombrel zho; xquieḻto Jesús ga rbee zho.  
\v 5 Scagaa meṉ wnaa, teḻ zhoobd bay guic zho ni zo zho nozodiidznie zho Dios, quiateedgaa zho xtiidz me, xquieḻto mgui ga rbee zho; sac ga rlu zho rond zho miṉe rnabey mgui.  
\v 6 Teḻne racladzdgaa zho gdze lad guic zho, mazd gnabey zho chug guitsguic zho. Laa teḻne rtoladz zho chuga, rtoladz zho gacruxa, dzigo mazd cxobguic zho xpay zho. 
\p  
\v 7 Grë zha bgui, nod pe nacne gdze lad guic zho, sac choot samiech guidzliu zho rnabeyd lo zho. Zeeṉe bzaa Dios mgui, bzaa me zho zigne nac me, zeeṉa glu zho gaṉle pa lotaa meṉ non nac me; scagaa wnaa, laa wnaa biaaṉ par glu zho gaṉle non mgui.  
\v 8 Gotsaa gwi ne gaṉle, letxe xcuxtid wnaa waa biaa mgui, sinque xcuxti mgui briee biaa wnaa.  
\v 9 Stiba, zeeṉe psaṉ Dios wnaa, ib laa me psaṉ zho par gacnie zho mgui.  
\v 10 Gacxe nagoṉ waa ib none gdze lad guic wnaa, zeeṉa glu gaṉle nguzobdiidz zho lo zha ne rnabey zho; haxta grë anjl ne no gbaa zley zho gaṉ zho miṉ co. 
\p  
\v 11 Per guiabde to togo peet nond wnaa, goḻsoladz gaṉle psaṉle Dios diidz zigtaa mguiw, zigtaa wnaaw rquiinlsa zho; sac teḻne guieṉd wnaa guieṉd mgui, teḻne guieṉdgaa mgui guieṉd wnaa.  
\v 12 Gotsaa gwi ne gaṉle, zeeṉe biaa wnaa cho mgui briee dzit ne biaa wnaa, per zeeṉe laa wnaa biaaṉ, haxta lo nadze wnaale rzo mgui; zigtaa mguiw, zigtaa wnaaw Dios psaṉ zho grop zho.  
\v 13 ¿To nadieṉ zha rzac to? ¿Pe nli nonguieḻa gdze lad guic wnaa zeeṉe nonab zho lo Dios, te nonguieḻda ye?  
\v 14 Goḻwi gaṉle ib no gdze guic wnaa, biaaṉle zho rroob guits guic zho parne ctsew lad guic zho;  
\v 15 teḻ zha, haxta rleynie zhow zeeṉe scataa noola, saṉgue ne nac ne zha bgui, guieḻtow ga guiool guitsguic ne.  
\v 16 Teḻ nogaa zha ne rzac led scada, maase gnee zho. Per ible znu goṉ noseed no miech, ni grëragaa zha ne rliladzle Xtiidz Dios, rieṉ zho ne nli scaw. 
\s1 Zha none gac xtsee ne psaṉ Jesús 
\p  
\v 17 Bets, bzian, ne nligaa rley naa tibaque rsoladz to naa, per bin naa zeeṉe rcaalsa to row to xtsee ne psaṉ Jesús diidz, laa ne gley to ycaalsa to, leḻ quiayuṉctal to xtoḻ to. Miṉcosi nagoṉ ni lalnu riod zdoo naaw.  
\v 18 Ziyon naa gzobtaa zeeṉe rcaalsa to, pe na tsiegald tiḻdiidz to, laa ne tipse gac to leḻ rlëëlsa to. Ni rgobey naa nli scaw.  
\v 19 Rieṉ naa masaque rzac to ible sca none gac to, parne glupaa cho nac zha ne non xtiidz, zeeṉa guiaṉnziuu zho lo miech. 
\p  
\v 20 Led zhixtseedraa Jesús i goṉ ruṉ to.  
\v 21 Sac ron naa zeeṉe laa to row, masaque lëëlëd rac to row to ncuaaṉe zienie to, ib rwide to no zha ne rdziṉ ga quianied zho nroob ncuaaṉe gow zho. Squi rzob to rowcho to, haxta rzudz to; laa zha mbanse rac zho grieelod gow zho ncuaaṉe row to.  
\v 22 ¿Mod guieṉd lidz to, ga sob to gow to, guie to haxta zaatne guieltaa to, led node to ruṉctoladz to zha ne squi guieṉd pe yquiin? I goṉ rlu to rleyniede to grë zha ne no xnëz Dios. ¡Ni palal goṉ rdziguiend naa ncuaaṉe noyuṉ to i! 
\p  
\v 23 Goḻsoladz gaṉle zha nac ne laa xtsee rii biaaṉ, Jesús psaṉ diidz gaca, sca gocnaṉ naaw ni scagaa biaḻlu naaw lo to. Wdze ne bnaaz zho Jesús ga, zeeṉe blozh dowxtseenie me xpëëdscuel me, bzheṉ me tib guietxtil, bdeed me xquizh lo Dios;  
\v 24 blozhse bdeed me xquizh, nzian lë beeṉ me guietxtil co, bdeed mew lo zho rëb me: “Goḻquiina, rrieequia lëë xcuerp naa nu, sac goṉ znu guṉ zho xcuerp naa parne csilaa naa to grë to. Goḻguṉ xtsee rii, parne glu to gaṉle tibaque rsoladz to naa.” 
\p  
\v 25 Blozh ga, scaque bzheṉ me tib cop no vin, rëb me lo zho: “Lëë stib trat cub nu goṉ riaaṉ Dios grë me miech, rrieequia xchen naa nu nac vin rii, ren ne tso sell trat co par glu nona. Gzataa zeeṉe znu guie to vin, goḻsoladz gaṉle zha naca.” 
\p  
\v 26 Goḻguieṉ sca, zeeṉe guṉtaa to xtsee co zaacse goḻguṉa, sac goṉ, ga quiaxobneṉ to lo miech Jesús nac meṉ ne gut xcuent to, psilaa me to. Tibaque none guṉ to xtsee co, haxta gdziṉ dze ne laa me guiaad stib. 
\p  
\v 27 Gacxe waa, zha ne rieniewguit guic rquiind zho xtsee co zigne no yquiin zhow, doḻ nroob ga ruṉ zho, xcuerp Jesús ga, xchen me ga noguitnie zho.  
\v 28 Zeeṉe guṉ to xtsee co, none wen wen sob to gaṉle zha naca, pe nacne laaw rac, dzigo lozh ga zac yquiin tow.  
\v 29 Sac goṉ zha ne lega gow guietxtil co, lega guie zho vin co, sac zhow zig beeḻze pe xtsee; rrieequia guieḻnë ne ygaa zho ga gow zho, guieḻnë co ga guie zho.  
\v 30 Miṉcocxe waa, blactaa zha ne nacgrë to i quiayaaṉ nsis, nogaa zho rzacnële, haxta nzian zho gutle.  
\v 31 Teḻne niaca miṉe wen wen gwi ne gaṉle zha nac xtsee co, tsod pe nacne pe guieḻnë ne cxeeḻ Dios dziaṉ ne.  
\v 32 Ni zeeṉe scagaa rteed me ne tib caxtigw, laaw ruṉ me parne tsaa ne biini gbiire gbig ne lo me, zeeṉa led yed ne nitlo gaḻ dze ne nitlo grëraa miech ne zienaḻ ncuaaṉe lo guidzliu rii.  
\v 33 Bets, bzian, goḻguieṉ sca zeeṉe ycaalsa to guṉ to xtsee co, goḻcuëz grëraa zha ne nacgrë to dzigo tipse goḻsilo goḻquiina.  
\v 34 Teḻ zha ne rieṉgaa lëbd zho lozh gdziṉ grëraa zha ne nacgrë zho, mazd gowgazh zho lidz zho, zeeṉa yguibd zho ygaa zho guieḻnë co. 
\p No spalal miṉe racladz naa gacnaṉ to, per naa zeeṉe guiaḻ naa nëz qui dzigo gne naaw lo to. 
\c 12  
\s1 Guieḻbiini ne rdeed Espíritu Sant 
\p  
\v 1 Bets, bzian, nugaa na gaṉle laa naa gzet zha nac guieḻbiini ne rneedz Espíritu Sant, sac racladz naa wen wen guieṉ to zha naca.  
\v 2 Rsoladz to gaṉle zeeṉe gard gliladz to Xtiidz Dios, nëzrii nëzrec bio to güeygaṉ to stib stib grë mdio, ncuaaṉe ni tib lan diidz rneed; saṉgue Dios ne rliladz to niina, led scad nac me.  
\v 3 Per nsin goḻso dieṉ cho nac zha ne noteedpaa xtiidz me, sac nzian zha ne rnee xtiidz Espíritu Sant noteed zho lo miech, per teḻ rzo zho rdzibdee zho Jesús, ga rlu rquidie zho. Sac zha ne nli nacnie Espíritu Sant, rdzibdeed zho Jesús, sinque rlu zho ne me rnabey zho, ni haxta dib zdoo zho rnee zhow. 
\p  
\v 4 Tib tib zha ne rliladz Jesús, zhaase zhaase nac guieḻbiini ne rgaa zho, per tibaque meṉ ne rdeeda, lëë meṉ co nac Espíritu Sant.  
\v 5 Nzian mod zrieelo dziuuṉ ne dziin lo Jesús, per grëse ne me rnabey ne.  
\v 6 Tib tib ne zhaase zhaase mod ne rlu Dios nacnie me ne, per grëse ne me nac meṉ ne rlu zha dziuuṉ ne xtsiiṉ me. 
\p  
\v 7 Guieḻbiini ne rneedz Espíritu Sant lo ne tib tib ne, laaw rneedz me parne dziuuṉlsa ne xyudar grë zha ne nacgrë ne gacndioṉraa ne zha racladz Dios. 
\p  
\v 8 No lo zho rdeed me guieḻbiini rieṉ zho zha cso zho diidz lo miech, 
\p no lo zho rdeed me guieḻbiini rseed zho grë ncuaaṉe ngaṉ ni rlu zhow lo miech. 
\p  
\v 9 No lo zho rdeed me guieḻbiini dib zdoo zho rnalo zho Dios, niicle ncuaaṉe mazdraa ngaṉ rnab zho lo me, raca. 
\p No lo zho rdeed me guieḻbiini zeeṉe rnab zho lo Dios, riac grë meṉ rzacnë. 
\p  
\v 10 No lo zho rdeed me guieḻbiini rnab zho lo Dios rac grë milagr, 
\p no lo zho rdeed me guieḻbiini rteed zho xtiidz Dios lo miech, 
\p no lo zho rdeed me guieḻbiini rieṉ zho cho nac zha ne nlipaa nacnie me, cho zhagaa nacnie meṉdox. 
\p No lo zho rdeed me guieḻbiini rnee zho stib diidz ne gard cseed zho, 
\p no lo zho rdeed me guieḻbiini rieṉ zho pe rnee zha ne rnee diidz co, dzigo rnee zhow. 
\p  
\v 11 Grëse guieḻbiini, Espíritu Sant rdeeda, ni me naṉ pa miṉe rneedz me lo ne tib tib ne.  
\v 12 Lo grëse ne ne nac ne zha ne no xnëz Jesús, rrieequia xcuerp me nac ne. Teḻ cuerp, niicle ne nzian part niaaw, per tibaque naca.  
\v 13 Ndal miech ne nac xcuerp me, no zho nac zha Israel, no zho nac zha zit, lo grë zho no zho ngadoo lo beṉ, nogaa zho zonlaa, per grëse ne tibaque Espíritu ne nacnie ne, sac tibaque Espíritu bgaa ne zeeṉe brobnis ne. 
\p  
\v 14 Gotsaa gwi ne gaṉle, no ni ne, no nia ne, no diag ne, nzian lë niaa xcuerp ne, per tibaque naca.  
\v 15 Gacxe waa teḻne niaca miṉe rnee ni ne, grieelod guiaba porne nacda nia ne, nacda xcuerp ne.  
\v 16 Scaque diag ne, grieelod guiaba porne nacda bziaalo ne led yedraaw nac xcuerp ne.  
\v 17 Sac teḻne niaca miṉe gdipse xcuerp ne niaa bziaalo ne, ¿zha nadieṉ gon ne? Teḻne gdipsegaa xcuerp ne niaa diag ne, ¿zha gzoobzhi ne?  
\v 18 Lëëzhe wen led scad psaṉ Dios xcuerp ne, sinque grëse part ne niaaw bzaa mew zigne gocladz me, psaṉse mew zaatne rquiina tib tiba.  
\v 19 Sac teḻne tipse niaa grëse part ne nac xcuerp ne, ¡zhazhe rlu ncuaaṉ co!  
\v 20 Gocda sca, sinque zhaase zhaase nac tib tib part co, per grësew tibaque cuerp naca.  
\v 21 Gacxe waa grieelod guiab bziaalo ne lo nia ne: “Ib rquiind naa luu”; guiaabgaa guic ne lo ni ne: “Ni lalnu rquiind naa to.”  
\v 22 Grëse part ne niaa xcuerp ne nose zaatne rquiina, haxta miṉe mazdraa nda lëë miṉ co rquiinraa. 
\p  
\v 23 Stiba, no part ne niaa xcuerp ne rzac ne zhi nona, no part haxta rtoladznie ne, per gotsaa gwi ne gaṉle part co nac zaatne raṉraa ne, rioxcoraa ne rdze;  
\v 24 saṉgue part ne nziuu lo ne, zienied guic ne dieṉ zha gdzew. Ible sca psaṉ Dios xcuerp ne, zeeṉa sca gacnon part ne rzac ne zhi non.  
\v 25 Sca niaa xcuerp ne, grëse part ne niaaw rquiinlsaw xcompañera; led yeda rtsolsa.  
\v 26 Goḻwi gaṉle, zeeṉe në tib part xcuerp ne, grëse part ne niaaraaw zienie në co; scaquegaa zeeṉe rdiooṉ tib part co grësew zienie guieḻbley co. 
\p  
\v 27 Laa naa rne miṉ rii lo to, sac racladz naa guieṉ to sca none tipse gac to. Goḻguieṉ gaṉle xcuerp Jesús i nac to grë to, tib tib part ne niaa cuerp co i nac to, rquiinlsa to zha ne nacgrë to.  
\v 28 Ni zigne sca tib tib part ne niaa cuerp nose zaatne rquiina, scaquegaa grëse zha ne no xnëz me, bzose Dios zho pe nac dziin ne guṉ zho: 
\q1 no zho rienee xtiidz me lo miech, 
\q1 no zho rteed xtiidz me lo miech, 
\q1 no zho rseed miech xtiidz me, 
\q1 no zho rnab lo me rac grë milagr nroob, 
\q1 no zho rnab lo me riac meṉ rzacnë, 
\q1 no zho rioxco ruṉ xyudar grë miech, 
\q1 no zho rzo rac zho zha rnabey, 
\q1 nogaa zho rnee grë diidz ne gard cseed zho. 
\m  
\v 29 Goḻgaṉ gaṉle, psod me zho grëse zho tsienee xtiidz me lo miech, grëse zho cteed xtiidz me, grëse zho cseed miech xtiidz me, grësegaa zho gnab gac milagr.  
\v 30 Niicle psodgaa me zho grëse zho gnab guiac meṉ rzacnë, grëse zho gnee stib diidz, grësegaa zho gnee zha nac grë diidz co.  
\v 31 Zhaase zhaase nac guieḻbiini ne rgaa tib tib zha ne no xnëz me, per goḻtsoxco ygaa to guieḻbiini ne mazdraa rquiin. 
\p Sca nagoṉ naca, per goḻquiaadiaga gaṉle, nu laa naa gzet lo to stib miṉe mazdraa non lo grë guieḻbiini rii. 
\c 13  
\s1 Guieḻwleynie 
\p  
\v 1 Miṉe mazdraa rquiin goṉ nac ne gleynie ne samiech ne. Teḻ niaca miṉe bgaa naa guieḻbiini rne naa grë lose diidz ne rnee miech, haxta grë diidz ne rnee xanjl Dios rne naa, ni teḻ rleynied naa samiech naa, ¿pa dieṉ rquiin rac naa grëtaa diidz co? Rrieequia nac naa ga zig tib lë guiib ne loxaque rzedz. 
\p  
\v 2 Teḻ niaca miṉe rteed naa xtiidz Dios lo miech, rieṉ naa pe nac miṉe naraa cxobneṉ me, grëse wseed ne no rieṉ naa, ni rleynied naa samiech naa, ¡paat rquiinda! Teḻ dib zdoogaa naa rnalo naa Dios, haxta ncuaaṉe mazdraa ngaṉ rnab naa ruṉ mew, ni rleynied naa samiech naa, ¡peet nonda! 
\p  
\v 3 Teḻ quiizgaa naa grë ncuaaṉe quianie naa lo grë zha ne guieṉd pe yquiin, haxta gded naa naa tsec naa, per teḻ rleynied naa samiech naa, ¡zhlëse ga guṉ naa miṉ co! 
\p  
\v 4 Sac goṉ zha ne nli mban zigne nac guieḻwleynie co: 
\q1 rieednied zho samiech zho, 
\q1 wen rac zho lo samiech zho, 
\q1 racnëd zdoo zho, niicle raṉ zho wenraa noded stib miech lo zho, 
\q1 ruṉd zho ne lëëque zha guṉnon zho, 
\q1 racniatsd zho lo samiech zho, 
\q1  
\v 5 ruṉd zho ncuaaṉe coguieḻnë zho, guṉglëëgaa zho samiech zho, 
\q1 zienaḻd zho ne tebaa lose zho yquiin grë pe cos, 
\q1 nacd zho zha ne lega zolëë, 
\q1 rapguieḻnëd zho samiech zho, 
\q1  
\v 6 ni lalnu riod zdoo zho miṉe ruṉ zha ne rsacsi samiech, 
\q1 miṉe rleynie zho nac diidzli. 
\p  
\v 7 Zha ne nli rleynie samiech, ni lalnu peet grieelod yca gleynie zho zho; rquiaadiag zho miṉe rnee zha co, rzhidznied zho zho; tibaque rquiabladz zho wen grieequia zho, rsaand zho zho, tibaque racnie zho zho. 
\p  
\v 8 Zdziṉ dze yquiindraa cho cteed xtiidz Dios lo miech, yquiindraa gnee zho stib diidz, yquiindraa grë guieḻrac, saṉgue guieḻwleynie gdziṉd dze ne nitlow.  
\v 9 Niicle ne nogaa ne guieḻbiini ne rneedz Espíritu Sant, niicle no zha ne rieṉ zha gnee zho Xtiidz Dios lo miech, per palalse nac ncuaaṉe rieṉ ne niina.  
\v 10 Saṉgue gaḻ dze ne laa Dios lozh gzhixcuaa ne zigne no gac ne, grëse guieḻbiini ne rdziaap ne niina, paat yquiindraaw. 
\p  
\v 11 Masaque nac ne niina zig tib mëëdlas. Teḻ naa, zeeṉe goc naa mëëdlas grëse ncuaaṉe bne naa, grëse ncuaaṉe bieṉ naa, grëse ncuaaṉe pseed naa, grëse ncuaaṉ co beṉ naaw zigne ruṉ grëraa mëëdlas. Per zeeṉe laa naa broob, laa naa biaa biini, grëse ncuaaṉ co laa naa bieṉpaa zha naca; laa guieḻmëëdlas co bded.  
\v 12 Scadaa nagoṉ rziaac ne niina, palalse rieṉ ne zha nac Dios, rrieequia rdziaṉse ne me niina zigne raṉ ne zhimlë ne lo beeḻze pe tib lë vidr; per zdziṉ dze laa ne dziaṉlo me zigne nacpaa me. Palalse ndioṉ ne niina zha nac me, palalse rsilo rdziaṉ ne me, per gaḻ dze co laa ne dziuuṉbeypaa me zigne ruṉbey me ne niina, naṉpaa me zha nac zdoo ne tib tib ne. 
\p  
\v 13 Goḻgacnaṉ sca gaṉle, grë guieḻbiini co zdziṉ dze ne yquiindraaw, saṉgue ne znu: dib zdoo ne rnalo ne Dios, noniepaa guic ne zac miṉe rnee me, ni rleynie ne samiech ne, lozhda. Per lo gza tsoṉa nagoṉ, guieḻwleynie co nac miṉe gdziṉd dze ne gdzëë. 
\c 14  
\s1 Zha ne rnee stib diidz 
\p  
\v 1 Laa to naṉle pa miṉ nac miṉe mazdraa non, ¡goḻleynie samiech to sca! Per scagaa goḻnab ygaa to guieḻbiini ne rneedz Espíritu Sant. Zig nac guieḻbiini ne rgaa zha ne rteed xtiidz Dios lo miech, goḻnab ygaa to miṉ co zeeṉa sca grieelo cseed to miech xtiidz me. 
\p  
\v 2 Sac teḻ zha ne rgaa guieḻbiini rnee zho stib diidz, zeeṉe rnee zho diidz co choot rieṉd dieṉ pew, sac lo Dios ga rnee zho. Teḻ pe nac miṉe rnee zho ga, Espíritu Sant rsiaaba guic zho, per choot racnaṉd dieṉ zha naca.  
\v 3 Saṉgue zha ne rgaa guieḻbiini rteed zho xtiidz Dios lo miech, miṉe rnee zho ga rquiina par tsoguicraa miech zha racladz me, par guieṉ zho pe nonguieḻ guṉ zho, ni rchoobladza zdoo zho. 
\p  
\v 4 Tib zha ne sca rnee stib diidz, lose zho rquiin guieḻbiini co, sac zhase rioguicraa zha racladz Dios; saṉgue zha ne rteed xtiidz me, diidz ne rnee zho rquiina lo grëraa zha ne no xnëz me, grëse zho rioguicraa zha racladz me.  
\v 5 Wena tebaa grëse to ygaa guieḻbiini co gnee to stib diidz, per mazdraa goṉ wena cteed to xtiidz Dios lo miech, cseed to miech xtiidz me; sac miṉ co mazdraa rquiin, lëdle gnee to stib diidz. Zacaquegaa gnee to stib diidz co, totsaque lozhse gnee tow, gneegazhaque to dieṉ zha naca; zeeṉa sca yquiina lo grëraa zha ne no xnëz Dios.  
\v 6 Bets, bzian, to gase nadieṉ, teḻ niaca miṉe glanso naa lo to i csilo naa gne naa stib diidz, ¿pa dieṉ yquiina lo to? Per teḻ glanso naa, iṉe csilo naa clar gne naa lo to pe nac miṉe zinee Dios lo naa, pe nac grë miṉe rieṉ naa, pe nac miṉe ziaadyob gac, zha nac grë miṉe zhobnee lo Xtiidz Dios, led grëse miṉ co zieṉ to zha naca, ni squiina lo to grëse to. 
\p  
\v 7 Haxta grë ncuaaṉe rooḻ miech, zig nac bzie zig nacgaa vihuel, teḻ csilo zha ne noyooḻa teḻ zhataa gooḻ zhow, ¿zha dieṉ guieṉ miech pa di noyooḻ zho?  
\v 8 Zig nacgaa zha ne rcuedz cornet lo meṉguiib, teḻne teḻ zhataa ycuedz zhow, ¿zha dieṉ gacnaṉ meṉguiib pe nac vis ne quiayuṉ zho?  
\v 9 Scadaa nagoṉ ruṉ to zeeṉe rnee to stib diidz lo miech, ¿zha nadieṉ guieṉ zho pe nonee to? Rrieequia lo mese ga rnee to.  
\v 10 Zig nac lo guidzliu ndal lo diidz rnee miech, per tib tiba nose mod ne rnee zhow, nose zha ne rieṉa.  
\v 11 Teḻne guiaad tib zho lo naa csilo zho gnee zho, ni rieṉd naa pe quianee zho, grieelod guieṉ naa pe racladz zho, guieṉgaa zho zha rzaac naa. 
\p  
\v 12 Nana sca, zha ne rquiabladz ygaa guieḻbiini ne rneedz Espíritu Sant, gnab zho ygaa zho miṉe grieelo yquiin lo grëraa zha ne nacgrë zho, zeeṉa grë zho tsoguic zha racladz Dios gban zho.  
\v 13 Gacxe nagoṉ waa, zha ne rneele stib diidz, none gnab zho gdeed Espíritu Sant guieḻbiini lo zho guieṉ zho pe nac grë diidz co, parne gnee zhow lo miech;  
\v 14 sac zha ne sca rnee stib diidz, teḻ so zho gnab zho lo Dios, rieṉd zho pe nonab zho, loxaque zhiespírituse zho quianee ga.  
\v 15 Gacxe waa zeeṉe gnab ne lo Dios, zeeṉe gooḻniegaa ne me, zac gnee ne stib diidz, per scagaa none gnee ne diidz ne rieṉ ne, miṉe rieṉgaa grëraa miech.  
\v 16 Sac goṉ teḻ stib diidz nonee ne noyooḻnie ne Dios, nodeed ne xquizh lo me, ¿zha dieṉ yquiab grëraa zha ne ndxie ni rieṉd zho pe rnee ne?  
\v 17 Niicle ne ndzon sca nodeed ne xquizh lo Dios, per zha ne noquiaadiaga ga, paat yquiinda lo zho. 
\p  
\v 18 Xquizh Dios, teḻ naa ye naa rne stib diidz, ni mazdraa goṉ rne naaw que zha ne rneew lo to i,  
\v 19 per zeeṉe zo naa zaatne ndxie grë zha ne noquiaadiag Xtiidz Dios ruṉd naa ne gnee naa stib diidz, sinque rne naa miṉe guieṉ zho. Rieṉ naa wenraaw gne naa maase gaayaque lan diidz, per miṉe guieṉ zho, lëdle so naa gne naa tsii mil diidz, ncuaaṉe ni tib choot guieṉd. 
\p  
\v 20 Bets, bzian, goḻguieṉ sca goḻsaan guieḻmëëdlas qui. Zacgaa gac to mëëdlas per nëz lo guieḻntseeba, saṉgue xpensar to goḻgac zig zha ne biaa biinile. 
\p  
\v 21 Gotsaa gwi ne gaṉle zha nac stib diidz. Zhobnee lo Xtiidz Dios rëb me, laa me cxeeḻ miech stib dan miech ne rnee stib diidz, par gnee zho lo zha Israel; per niicle tsienee zha co, ib guieṉd zhow.  
\v 22 Gase nagaṉle rlu rquiind stib diidz co par grë zha ne rnalole Dios, sinque laaw rquiin parne grë zha ne nod xnëz me gaṉ zho gaṉle nli no me. Zha ne nole xnëz me, zha co rquiin gon zho pe nac miṉe racladz me gacnaṉ zho, pe nac miṉe zhobnee lo Xtiidz me.  
\v 23 Per niicle scaw, teḻne zob bla zha ne sca gard gliladz Xtiidz me, zobgaa bla zha ne pense rsilo rquiaadiaga, ni csilo to gnee to stib diidz, zeeṉe gaṉ zhow lëëtaa miṉe guiab zho rzhiṉle guic to sca rac to.  
\v 24 Laa teḻne grëse to no noteed to xtiidz me, nonee to miṉe racladz me gacnaṉ miech, zha ne sca gard gliladz Xtiidz me, zha ne sca pense rsilo rquiaadiaga, zeeṉe gon zho grëtaa miṉe nonee to, haxta ziaa zho biini zieṉ zho ne nli tib miech ngoopdoḻ nac zho.  
\v 25 Zigse quianee to laa zdoo zho lozh yguudz, laa zho ted yquiitsgzhib zho gnab zho perdon lo Dios; ga guieṉ zho gaṉle ne nli nacnie me to. 
\p  
\v 26 Bets, bzian, goḻguieṉ sca zeeṉe ycaalsa to cseed to Xtiidz Dios, zigtaa zha ne gooḻa, zha ne cteed xtiidz Diosa, zha ne gnee stib diidza, zha ne gneegaa zha nac diidz co, none tsienie guic zho miṉe guṉ zho ga laaw yquiin parne tsoguicraa los demas zho zha racladz Dios gban zho.  
\v 27 Zeeṉe gnee zho stib diidz, none choptaa zho, tsoṉtagaa zho gneew. None tibga zho gnee, ni rquiin zole zha ne gnee pe nac diidz co.  
\v 28 Laa teḻne guieṉd zha ne grieelo gnee dieṉ pe naca, nodne gnee zhow; mazd leṉ zdoose zho gnee zhow, Diosse gon pe nonee zho. 
\p  
\v 29-30 Scaque zha ne cteed xtiidz Dios, choptaa zho, tsoṉtagaa zho gneew, laa grëraa zha ne ndxie none yquiaadiag zho miṉe nonee zho. Teḻne lëëtaque nonee tib zho, ni csiaab Dios guic stib zho gnee, dzigo none cuëz zha ne quianeele ga zeeṉa grieelo gnee zha co.  
\v 31 Sca none gaca, none tibga tibga zho gnee, zeeṉa grëse zha ne ndxie grieelo gon zho dieṉ pew, parne cseed zho, ni gacnguieeḻraa zho lo Xtiidz Dios. 
\p  
\v 32 Zha ne sca rteed xtiidz Dios, none cseed zho gnabey zho zho, cuëz zho nieeda gdziṉ hor ne gnee zho.  
\v 33 Sac teḻ Dios, rdziladzd me guiots gnaaz pe cos, rdziladzd me ncuaaṉe nzhiitni. Miṉe rdziladz me zaacse gac tib cos, ni scagaa ruṉ grëraa zha ne no xnëz me. 
\p  
\v 34 Ni stiba, zeeṉe sca rcaalsa to, racladz naa guieṉ grë meṉ wnaa dzese sob zho. Nodne so zho ye zho gnee, sac goṉ mgui rnabey zigne zhobneeque lo Xtiidz Dios.  
\v 35 Ncuaaṉe racladz zho gacnaṉ zho, ro yu ga gnabdiidz zhow lo zha bgui, sac goṉ, rdzieelda lëëpaaze wnaa gnee zaatne rcaalsa to rquiaadiag to Xtiidz Dios.  
\v 36 Zaacse sca goḻgac, goḻguieṉ gaṉle grieelod guṉ to miṉe notaa guic to, sac goṉ led loxaque todse nac zha ne ruṉbey Xtiidz Dios, par guiab to zigne racladz to gac tib cos, sca none gaca. 
\p  
\v 37 Miṉe rne naa lo to nu xtiidz Dios naca, zha ne rteed xtiidz me lo to i, zha ne rapgaa pe stib guieḻbiini ne rneedz Espíritu Sant, zha co guṉbey gaṉle nli miṉe rnabey mew.  
\v 38 Zha ne gliladzdgaaw, maase gliladzd zhow. 
\p  
\v 39 Sca nagoṉ naca. Goḻtsoxco sca ygaa to guieḻbiini cteed to xtiidz Dios lo miech, zeeṉa gacnaṉ zho zha racladz Dios gban zho; per scagaa, ib ycade to teḻ cho zha ne rnee stib diidz.  
\v 40 Per zigne rne naa ga, grëse miṉe guṉ to none zaacse guṉ tow, tib tiba gacsew hor ne rieguiaḻa. 
\c 15  
\s1 Brieeban Jesús 
\p  
\v 1 Bets, bzian, nu laa naa gbire gzet lo to gaṉle zha nac Xtiidz Dios. Zigne biaḻseed naa tow, scataque naca; led yeda rdzëë. Lëëw ga pcaania to, ni haxta niinagaa rliladz tow.  
\v 2 Lëëw rlu zha grieelo ycaania Dios to, totsaque nli dib zdoo to bliladz tow, ni bii lëëgaaw rnalo to. 
\p  
\v 3 Zeeṉe biaḻ naa lo to i, pseed naa tow zigne pcaaniase naaw. Gocnaṉ to cho nac Jesús, gocnaṉ to por xtoḻ ne gut me lo cruz, zigne zhobneesew lo Xtiidz Dios.  
\v 4 Gocnaṉ to gaṉle zeeṉe goc tsoṉ ngbidz pqueets zho me laa me brieeban, zigne raquietaquew lo Xtiidz Dios.  
\v 5 Leṉ dze ne brieebanle me ga, goṉlo Pedr me, niicle grëragaa zha ne nacgza Pedr bzënie zho me, goṉlo zho me sac güeyted me lo zho.  
\v 6 Güey me güeyted me zaatne ndxie ndziibsraa gaay gayoo zha ne nole xnëz me, grëse zho goṉ me; ndal zha co bii mban niina.  
\v 7 Bded ga goṉaque Santiagw me, ni biire güey me lo zha ne bzënie me ga stib;  
\v 8 goc palal tiempa, lega naclew haxta lo naa brieequia me. Teḻ naa goṉ, rrieequia nac naa zig tib mëëd ne rzamëëd,  
\v 9 lo grëraa zha ne nac poxtl, ni lalnu peet nond naa, per ni rdzieeld gnee zho naa poxtl; sac goṉ pa lotaa ptsidiḻ naa grë zha ne glopaa bzëëb xnëz Dios.  
\v 10 Per xquizh Dios tibaque noxco me naa, bzooblo me naa gane laa naa nac miṉe nac naa niina. Ni led zhlëdgaa bzooblo me naa, sac goṉ nroobraa xtsiiṉ me noyuṉ naa lo miṉe noyuṉ grëraa poxtl; per rned naa togo naase quiayuṉa, sinque me noyacnie naa rrieelo noyuṉ naaw. 
\p  
\v 11 Laa naa rzet miṉ rii, per nacda par glu dieṉ cho nroobraa noyuṉ xtsiiṉ me, sac miṉe mazdraa non nac ne noseed no miech Xtiidz me; lëëw biadseed no to, ni bliladzdgaa tow. 
\p  
\v 12 Nana sca, racladz naa gnë to dieṉ zha nacne no bla to i rnee nlid grieeban meṉgut; led wen wen name gocnaṉ to brieeban Jesús.  
\v 13 Teḻne rnee to nlid grieelo grieeban meṉgut, rrieequia goṉ rnee to ga nlid brieeban Jesús.  
\v 14 Nana teḻne brieeband me, paat rquiind miṉe dzigo noseed no miech nu, zhlëse znu noteed-xtse ne rnalo ne Dios.  
\v 15-16 Rrieequia noquidiee no miech, sac goṉ tibaque rnee no lo zho bleeban Dios Jesús; ni teḻne nli rrieeband meṉgut, ye Jesús dzigo bii noliu me niina.  
\v 17 Stiba, teḻne nlid brieeban me, zhlëse dzigo rnalo to me ycaania me to; teḻne nlid brieeban me, scase bii zëëb to grë xtoḻ to.  
\v 18 Grë zha ne bliladz me, zha ne nacle meṉgut niina, lëë bnitlole zho ga dzigo.  
\v 19 Nana teḻne loxaque lo guieḻmban riise nona gnalo ne Jesús, ne dzigo nac miech ne mazdraa nxen. 
\p  
\v 20 Per gacnaṉ to sca gaṉle, ¡brieeban Jesús! Me nac meṉ ne glopaa brieeban lo grëraa miech guizhiu ne grieeban.  
\v 21 Grëse ne ne nac ne miech, ible laa ne none guet; sac laa guieḻgut biaaṉ por miṉe beeṉ Adán; per niina ne laa Jesús biaad, por miṉe beeṉ me grëse meṉgut laa zho none grieeban.  
\v 22 Zigne grëse miech ret porne ziaad zho lo xtii Adán, scaquegaa grëse zha ne gbig lo Jesús, zgaa zho tib guieḻmban ndzon.  
\v 23 Ible sca none gaca, ndioṉ ne gaṉle laa Jesús brieebanle, ni zeeṉe laa me guiaad, grë zha ne no xnëz me laa zho grieeban.  
\v 24 Gaḻ dze co laa me lozh gnitlo meṉdox ni grëraa ma ne nacnie ma, dzigo laa me csaṉ grëse miech ne no xnëz me ladznia Dios meṉ ne nac Pxoz me; dze cotaa nagoṉ laa Dios guṉ guieḻwxtis.  
\v 25-26 Sac ible Jesús nonabey haxta gdziṉ dze co, zeeṉe laa me gnitlo grëse meyozh ne rlëë lo me; zig nac guieḻgut, lëëw nac miṉe lultm gnitlo me.  
\v 27 Zigne zhobneeque lo Xtiidz Dios, ladznia me biaaṉ grëtaa ncuaaṉe no; per guiabd ne togo ye Dios no ladznia me, sac goṉ Dios nac meṉ ne bdeeda lo me.  
\v 28 Gacxe waa, zeeṉe gaḻ dze ne laa me sca lozh gnitlo grë zha ne rlëë lo me, Pxoz me nac meṉ ne gnabey lo me; sac goṉ meṉ co gocnie me beeṉ me gan, ni meṉ co nac meṉ ne rnabey. 
\p  
\v 29 Nana, ne rnee to i nlid rrieeban meṉgut, ¿pe nac dzigo no zha ne rrobnis xcuent zha ne gutle?  
\v 30 Teḻne niaca miṉe nlid grieeban meṉgut, ¿pe nac nadieṉ znu gzataa dze quiabeeladz no no lo grë guieḻxtseeb?  
\v 31 Bets, bzian, nligaaw teḻ naa goṉ gzataa dze noxtseeb naa lo guieḻgut; naṉle to gaṉle zeeṉe rne naa rleynie naa to, diidzli rnee naa; scaquegaa niina, miṉe rnee naa nu diidzliw.  
\v 32 Ne nligaa zeeṉe glo biaḻ naa guiedz Efés nu, ntseeb goc miech rii lo naa, pale grë ma ntseeb. Teḻne nlid grieeban meṉgut, zhlëse dzigo nodeed naa grë miṉ co; mazd teḻ zhataa dzigo gban ne, zigne rëbaque diidz ne rëb: “¡Goḻgotsaa dioow ne, goḻgotsaa dio ne, beṉque guieḻgutse quiambiaaz ne!” 
\p  
\v 33 Per lëda ga goṉ. Zha ne zienaḻ miṉ co, ib yquiaadiagde to xtiidz zho, zeeṉa gacde to zigne nac zho; zigne zëëbaque diidz: “Teḻne ndzinlid miech ne ctsieelsa luu, zdziṉ dze ne gac luu zigne nac zho.”  
\v 34 Goḻquix biini sca, guṉctaldraa to xtoḻ to; pe rtoladzde to, goḻwi gaṉle no bla to i gard sëëb xnëz Jesús, haxta ni rieṉd zho zhapaa nac Dios. 
\s1 Zha grieeban meṉgut 
\p  
\v 35 Nana, no to gnë: “¿Per zha grieeban meṉgut? ¿Zhazhe nac cuerp ne grieebannie zho?”  
\v 36 ¡Aque nxen wnabdiidz co! ¿Pe raṉde to zig nac grë midz ne rio liu rac bni, rlozhse rnitlo midz co dzigo laa guizh ne naca ga rlan?  
\v 37 Teḻ rnee to zha nac cuerp ne grieebannie zho, goḻwi gaṉle zig nac zhobxtil, zig nac grëragaa midz, ¿pe niacxe zigne nacsew riow liu, scasaque naca rlana? Led zeeṉe laaw rlan, guizhle naca.  
\v 38 Tib midzse naca riow liu, Diosle nac meṉ ne rdeed zhiblaga zigne racladz me. Tib tib midz, psaṉle me dieṉ zha gluw zeeṉe laaw glan.  
\v 39 Zigne zhaase zhaase nac tib tib midz, tib tib guizh, scaque nzian lo cuerp no. 
\p Zig nac miech, zhaa nac xcuerp zho lo xcuerp ma, niicle magaaw, zhaa nac xcuerp ma ne no lo liu, zhaa nac xcuerp ma ne no lo nis, ni zhaaque nac xcuerp ma ne rsiibe.  
\v 40 Grë anjl ne no gbaa, zhaa nac xcuerp zho lo xcuerp ne nac ne miech guidzliu; zhaa nac xquieḻniow cuerp co lo xquieḻniow cuerp ne no lo guidzliu.  
\v 41 Gotsaa gwi ne gaṉle, zig nac xbiini ngbidz zhaa naca lo xbiini mëë, lo xbiinigaa mel. Niicle melgaaw, zhaase zhaase nac xbiini ma tib tib ma, no ma palalse rlu, nogaa ma roḻ rna.  
\v 42 Scadaa nagoṉ, zhaa rlu cuerp ne rap miech niina, ni zhaagaa glu miṉe ygaa zho zeeṉe laa zho grieeban. Cuerp ne rdziaap ne niina, ncuaaṉe tib rded naca, saṉgue cuerp ne grieebannie ne gaḻ dze co, led yedraa miṉ co nitlo.  
\v 43 Mban nac cuerp rii, sac rzacnëw, reta; saṉgue cuerp ne grieebannie ne, tib cuerp ne gdziṉd dze nitlo gaca. Lega zozhidz cuerp rii, saṉgue cuerp co tib cuerp ndip ndaan gaca.  
\v 44 Cuerp ne rdziaap ne niina, tib cuerp ngoopdoḻ naca, saṉgue cuerp ne grieebannie ne, miṉ co gac tib cuerp ne gban zigne racladzpaa Dios. Sac zigne znu no cuerp ne rquiin lo guieḻmban rii, scaquegaa no miṉe yquiin stib lo guieḻmban ne gneedz Dios. 
\p  
\v 45 Goḻsoladz gaṉle, rnee lo Xtiidz Dios Adán goc miech ne glopaa biaaṉ ni Dios nac meṉ ne bdeed guieḻmban lo Adán; saṉgue Jesús, me rap guieḻmban, ni zrieelo gdeed me guieḻmban co lo miech.  
\v 46 Scaque nagoṉ, glo rgaa ne cuerp ngoopdoḻ ne rdziaap ne niina, dzigoraa ygaa ne cuerp ne gban zigne racladzpaa Dios.  
\v 47 Gotsaa gwi ne gaṉle, zeeṉe biaaṉ Adán yudiese bzaa Dios me; saṉgue Jesús, meṉ gbaa nac me.  
\v 48 Grëse ne nac ne miech, cuerp ne rdziaap ne lo guieḻmban rii, zigne gocdaa xcuerp Adán naca; per zha ne gnalo Jesús, zeeṉe laa zho grieeban laa zho gaple tib cuerp zigne nac xcuerp me.  
\v 49 Masaque nac ne niina zigne goc Adán, ni scaquegaa zdziṉ dze ne glu ne zigne rlu Jesús.  
\v 50 Goḻgacnaṉ sca gaṉle, cuerp ne rdziaap ne lo guidzliu rii, grieelod gdziṉa zaatne rnabey Dios; sac rdziṉ dze ne rnitlow, grieelod gaca tib cuerp ne guete. 
\p  
\v 51 Wen wen goḻzoobdiag miṉe gne naa lo to nu gaṉle, wlaltaa choot gard gacnaṉa: Grëse ne ne nac ne zha ne rnalo Jesús, gaḻ dze co zigtaa zha ne mbana, zha ne gutlegaaw ible stsëë Dios xcuerp ne.  
\v 52 Znuse gac miṉ co zig nacse zeeṉe riab tib belye; lëë miṉ co gac lultm vuelt ne ycuedz xanjl Dios zhitrompet zho. Zeeṉe sedz trompet co, hor co grëse zha gut, laa zho grieebannie tib cuerp ne gdziṉdraa dze nitlo; scagaa grë zha ne bii zomban, hor co laa xcuerp zho gdzëë. ¡Grëse ne dziaap tib cuerp cub!  
\v 53 Ible sca none gaca, ib none gdzëë xcuerp ne gaca tib cuerp ne xiṉd, tib cuerp ne gdziṉdraa dze nitlo.  
\v 54 Zeeṉe gac miṉ co, ga grieequia miṉe raquiet lo Xtiidz Dios zaatne rnee: “Nasi laa guieḻgut bnitlo, guieḻmbanle nac miṉe rnabey.  
\v 55 Ah guieḻguta, ¿yoraa na zeeṉe scataa psacsi luu? ¿Yoraa zeeṉe scataa gocndip xtiidz luu?”  
\v 56 Grieelodraa pe guṉ guieḻgut ne hor co, sac led yedraa hor co tso doḻ, led yedraa hor co gnabey ley; sac por doḻ gane rrieelo rsacsi guieḻgut ne niina, ni por ley rlu pe nac xtoḻ ne.  
\v 57 ¡Xquizh xquieḻnzaac Dios pxeeḻ me Jesús, sac goṉ por Jesús zrieelo griee ne ladznia guieḻgut! 
\p  
\v 58 Bets, bzian, ne nac to zha ne rleynie naa, goḻguieṉ sca tibaque dziits goḻso lo Xtiidz Dios; zig zie dze goḻtsoxcoraa goḻguṉ xtsiiṉ me, beṉque naṉle to gaṉle, grëse xtsiiṉ me miṉe rdziuuṉ ne nacda ncuaaṉe zhlëse. 
\c 16  
\s1 Gon ne guey Jerusalén 
\p  
\v 1 Laa zig nac gon ne noyaclo guey gac xyudar grëraa zha ne no xnëz Jesús Jerusalén, laa naa rso diidz lo to zigne psoque naa diidz lo zha Galás. 
\p  
\v 2 Teḻ palal ruṉ to gan tib leṉ zhmal, lo co goḻcob miṉe ral zdoo to gdeed to gac gon co; gzobse dze goḻtsiesaṉa lo zha ne noyuṉlow. Adeḻ na gaṉle haxta glansoraa naa i, dzigoraa no to dieṉ zha topa.  
\v 3 Ni goḻzoobloga dieṉ bla zha ne tsie tsiesaṉa, na zeeṉe glanso naa i dzigo yquia naa tib guits ne güey zho tsiesaṉ zhow;  
\v 4 ni teḻ rquiinpagaa ye naa ga, dzigo na maase ga naa ganie naa zho. 
\p  
\v 5 Leṉ dze rii no guic naa gateed naa nëz Macedon, dzigo gale grie naa glanso naa lo to i.  
\v 6 Nend zbëz naa lo to i palal dze, togo iquegaa teed naa leṉ mëë naḻ ne ziaad; ni racladz naa zeeṉe gbi naa i, siguieḻ to guṉ to xyudar naa teḻ pa nëz ne no ga naa leṉ dze co.  
\v 7 Teḻne zneedz Dios diidz cuëz naa lo to grë leṉ dze co, zbëz naa, sac racladzd naa tib guiaḻteed naa lo to i.  
\v 8-9 Niina ne no naa Efés nu, leṉ dze riipaa rlu ndal miech ne no liaadz ycaania Xtiidz Dios, gane zbëz naa nu haxta ted lni Pentecostés. Nligaa ndal zha ne no liaadz co, per scagaa ndalaque zha ne rtsidiḻa. 
\p  
\v 10 Nacle diidz laa Timoté guiaad i; teḻ naṉd new naraa guiaad me, goḻsiguieḻ zeeṉe glanso me zaacse goḻcaania me, zaacse goḻcuëzlo me, zeeṉa tsonley zdoo me; goḻgaṉ gaṉle, ye me quiayuṉ xtsiiṉ meṉ ne rnabey ne.  
\v 11 Goḻguieṉ csaṉwinde to me, sinque goḻgap me respet; zeeṉa zeeṉe glanso me lo naa nëz rii iṉe nley gac me csoladz me zha biaadted me lo to i. Laa naa quiambëz glanso me nëz rii, gza me zha ne guiaadnaḻraa zhits me. 
\p  
\v 12 Saṉgue bets ne Apol, blactaa bnab naa lo me niaadgza me zha ne ziaad i niaadgaṉ me to, per rzac me grieeloda niina. Rieṉ naa zeeṉe gdeedtaaw diidz, ible ziaad me ziaadgaṉ me to. 
\p  
\v 13 Bets, bzian, nsin goḻso, tibaque goḻnalo Dios. Ib ctsëëde to xtiidz to, tibaque goḻtsoxco tsienaḻ to miṉe rnabey me.  
\v 14 Ncuaaṉe guṉtaa to, goḻconie guic to guṉ tow porne rleynie to Dios, porne rleyniegaa to samiech to. 
\p  
\v 15-16 Laa naa rso diidz lo to, niowse goṉ goḻgac lo grë zha bets ne, zha ne ruṉ xyudar to i; zig nac Stef grë meṉlidz me, goḻgon xtiidz zho. Led naṉle to gaṉle, Stef nac tib meṉ ne glopaa bliladz Xtiidz Dios nëz Gres i grë meṉlidz me; ni desde dze co laa me pquiabladz tibaque squi quiayuṉ me xyudar grëraa zha ne no xnëz Jesús.  
\v 17 Rley naa goṉ zeeṉe goṉ naa laa me blanso nu gza me Fortunat ni Acaic, haxta stib goc zdoo naa gocnaṉ naa zha no to, masaque guṉ naa cuent grële lo to ga goṉ naa.  
\v 18 Ne nligaa bloonley zho zdoo naa, ni rieṉ naa scaquegaa to nley gac to niina zeeṉe gon to zha no naa. Goḻguieṉ goṉ zha non nac zho, goḻwi gaṉle pa lotaa nac dziin ne quiayuṉ zho. 
\p  
\v 19 Grëse zha ne no xnëz Jesús nëz Asia nu, laa zho rxeeḻ bdiuzh lo to, goḻcaania zhibdiuzh zho. Scaque Aquil grop me Priscil, ni grëraa zha ne rcaalsa lidz zho rieseed Xtiidz Dios, grë zho laa zho rxeeḻ bdiuzh lo to.  
\v 20 Scagaa grë zha ne no nu, ye zho laa zho rquiaabdiuzh to. Zeeṉe ycaalsa to i, iṉe goḻnaaznialsa, goḻqueedzlsa, goḻcaania zhibdiuzh no. 
\p  
\v 21 Nu laa naa cso schop lan xtidz naa lo to, ni goḻwi gaṉle naazhal yquiaw:  
\v 22 Grëse zha ne goṉ nëd gleyniepaa Jesús, miech ndziibdeele ga nac zho. ¡Ni ile goṉ ziaad me!  
\v 23 Mese nac meṉ ne gacnieṉ to, me nac meṉ ne no zhixco to, sac ne nligaa rleynie me to. 
\p  
\v 24 Niicle naaw rleynie naa to, sac goṉ tibaque nac ne ngab ne lo me. ¡Lëëd bii gdzieel ne sca! 
\p Pabl