\id EPH Eph Zapotec Lachixio USFM output from Final pdf Aug 2010 
\h Efesios 
\toc1 Carta nú uquieꞌe San Pablo lubee bene eyeche Efeso enu nzeli arquiꞌ Jesucristo 
\toc2 Efesios 
\toc3 Ef 
\mt1 Carta nú uquieꞌe San Pablo lubee bene eyeche Efeso enu nzeli arquiꞌ Jesucristo 
\c 1  
\s1 Uxeꞌla Pablo saludo 
\p  
\v 1 Liꞌá Pablo, necaa tucu apóstol Jesucristo equie nú rnibiyaꞌ Diose. Rquieꞌa carta quieꞌ luhua liꞌihua enu neli nzeli arquiꞌ stichiaꞌ Jesucristo, liꞌihua enu necala bee beneꞌ Diose eyeche Efeso.  
\v 2 Diose Paꞌahua cuna Jesucristo enu rnibiyaꞌ luaꞌahua riꞌinu nú cha nzeꞌcahua cuna nú nzuxe arquiꞌhua. 
\s1 Rriꞌi Diose nú nza nzeꞌca lu cuendaꞌ bee bene enu nzeli arquiꞌ Jesucristo 
\p  
\v 3 Cheꞌtsa Diose paꞌ Jesucristo enu rnibiyaꞌ luaꞌahua nú chiquiꞌ ñia necanu, xne nee equie nú neca tucunecatseꞌahua cuna Jesucristo, uriꞌileꞌyalanu liaꞌahua desde liñibe nu chiquiꞌ rriꞌinu elietsa luaꞌahua para nú chequieꞌahua stichiaꞌnu.  
\v 4 Liꞌinu ucañinu liaꞌahua equie cuendaꞌ Jesucristo hasta chenu lascaꞌ acacheꞌ iliulabe para nú huañiaꞌahua nu lecaxi naꞌahua lunu sin dula,  
\v 5 xne equie nú seca Diose liaꞌahua, uriꞌinu nú riala nú acaꞌahua bee lliꞌñinu equie cuendaꞌ Jesucristo, tucu nú uriꞌinu elliebacuꞌ nú acane.  
\v 6 Enzeꞌe, la tsanaꞌahua nú sucuꞌ ayaꞌahua Diose equie nú chiquiꞌ ñia necanu, xne uriꞌi leꞌyalanu liaꞌahua equie cuendaꞌ Lliꞌñinu Jesucristo enu secanu.  
\v 7 Xne udixiulanu equie cuendaꞌ stulaꞌahua chenu uriꞌchia reneꞌnu lu cruse nu scua uriꞌila Diose perdona stulaꞌahua enzeꞌe rlubeꞌ nú chiquiꞌ secanu liaꞌahua.  
\v 8 Enzeꞌe chiquiꞌ lia uliquiꞌnu lunú reca elliebacuꞌahua cuna nú rriaꞌahua beyaꞌ,  
\v 9 nu ulubeꞌlanu luaꞌahua xa neca elliebacuꞌnu hasta huaꞌtu tucu nú uriꞌinu elliebacuꞌ nú acane.  
\v 10 Nu elliebacuꞌcuaꞌ tsalunu chenu riña bichia zeꞌe, Diose tsaꞌna ye nú nuꞌ liñibe cuna beenú nuꞌ lu iliulabe ya Jesucristo. 
\p  
\v 11 Leꞌca equie nú neca tucu necaꞌtseꞌahua cuna Jesucristo, ucañila Diose liaꞌahua para nú acaꞌahua bee beneꞌnu tucu nú uduꞌ arquiꞌnu nú riꞌinu hasta chenu lasca acacheꞌ iliulabe, xne liꞌinu rrinu yeene tucu nú niarquiꞌnu nú acane.  
\v 12 Nu liꞌinu uriꞌilanu scua para nú liaꞌahua enu rluti uyalí arquiꞌ Jesucristo, acaꞌahua enu zucuꞌ ayaa Diose equie nú rnibiyaꞌnu.  
\v 13 Leꞌca liꞌihua chenu ubeneꞌhua stichiaꞌnu nú neli neca nú xa tsilaꞌahua, che uyalí arquiꞌhua Jesucristo nu unga tucu necatsehua cuna liꞌinu. Nu tucu nú uni Diose nú liquiꞌnu Espíritu Santo luhua, nu nee nú nzula Espíritu Santo cuna liꞌihua, liꞌinu necanu xi neca tucu sello nú rlubeꞌ nú necalahua para Diose.  
\v 14 Equie nú nzula Espíritu Santo cuna liaꞌahua enzeꞌe yucuaꞌahua erencia nú uni Diose nú liquiꞌnu luaꞌahua, chenu ye bee beneꞌnu nucuaꞌala liñibe para nú la tsuxeꞌahua nú sucuꞌ ayaꞌahua Diose equie nú rnibiyaꞌnu. 
\s1 Rnacuꞌ Pablo lu Diose nú deteꞌnu lunú aca elliebacuꞌ bee beneꞌnu 
\p  
\v 15 Nu lunú nediyala nú nzeli arquiꞌhua Jesucristo enu rnibiyaꞌ, nu leꞌca secahua beelá bee beneꞌ Diose,  
\v 16 la tsuxea nú rdetea cheꞌtsa lu Diose equie cuendaꞌhua cada chenu rnacua lunu.  
\v 17 Nu liꞌinu enu neca Diose enu rnibiyaꞌ desde liñibe, nu liꞌinu necanu paꞌ Jesucristo enu rnibiyaꞌ luaꞌahua. Leꞌca nacua lunu nú riꞌinu nú aca elliebacuꞌhua para nú riꞌihua beyaꞌ lunú lubeꞌnu luhua para nú nze chululáhua liꞌinu.  
\v 18 Leꞌca nacua lu Diose nú xaꞌlanu elliebacuꞌhua para nú riꞌihua beyaꞌ xa neca equie nú nzuculuhua hasta chenu ucañinu liꞌihua nu riꞌihua beyaꞌ nú leꞌca chiquiꞌ llene nu ñia neca erencia nú nuꞌcheꞌ Diose para bee beneꞌnu.  
\v 19 Leꞌca rnacua lunu nú riꞌihua beyaꞌ nú chiquiꞌ llene neca poder, nú rriꞌi elietsa luaꞌahua nú nzeli arquiaꞌahua liꞌinu. Leꞌca liꞌi poder llenecuaꞌ nú chiquiꞌ ulubeꞌ Diose luaꞌahua,  
\v 20 chenu uriꞌinu nú uhuañi zeca Jesucristo, nu uzucuꞌ Diose liꞌinu cueꞌtse Diose chubee liñibe,  
\v 21 elu udeteꞌnu nú rnibiyaꞌnu lunu nú máse seca lu ye elu rnibiyaꞌ, cuna ye elu usticia cuna ye bee gobierno. Leꞌca másela seca elu rnibiyaꞌcuaꞌ lu ye bee elurnibiyaꞌ nú nuꞌ cuna nú nze chuꞌulá lu iliulabe quieꞌ.  
\v 22 Chequie utsaꞌna Diose ye bee elurnibiyaꞌ cuaꞌ ya Jesucristo enu ucañinu para nú nibiyaꞌnu lu ye bee bene enu nzeli arquiꞌ liꞌinu.  
\v 23 Nu bee bene enu nzeli arquiꞌ Jesucristo, liꞌinu neli nehuañinu cuna liꞌibeella nu catse nzunu xne liꞌinu necanu enu rnibiyaꞌli. 
\c 2  
\s1 Utsilaꞌa Diose liaꞌahua equie nú secanu liaꞌahua 
\p  
\v 1 Liꞌihua ungahua xi neca bene enu unguti lu Diose equie cuendaꞌ bee dula cuna beenú necha neca  
\v 2 uriꞌihua, uyanalahua inziu nú necha neca nu uriꞌihua tucu nú niarquiꞌ bezeꞌlu nú riꞌihua, nu espíritu nú necha neca cuaꞌ neca enu nehuañi cuna bee bene enu la zucuꞌ Stichiaꞌ Diose.  
\v 3 Yeꞌahua leꞌca scua uhuañiaꞌahua tucu nú niarquiꞌtsiaꞌahua, nu tucu nú necatsia elliebacuaꞌahua. Nu leꞌca scua tucu nú riala bee bene enu la zucuꞌ Stichiaꞌ Diose castiya, leꞌca scua ayalaꞌahua castiyaꞌnu.  
\v 4 Pero lunú chiquiꞌ ñia ruaꞌa arquiꞌ Diose liaꞌahua, nu lunú chiquiꞌ secanu liaꞌahua,  
\v 5 añinzuca nú ungaꞌahua xi neca bene enu unguti lu Diose, equie cuendaꞌ stulaꞌahua, pero nee rluꞌculaꞌahua elunehuañi cuna Jesucristo lu Diose. Equie nú chiquiꞌ ñia necanu utsilaꞌahua.  
\v 6 Chenu uriꞌinu nú uhuañi zeca Jesucristo lu eluti neca xi neca nú leꞌca nuaꞌahua uhuañi zecaꞌahua, nu leꞌca neca xi neca nú nellunuꞌlaꞌahuanu liñibe.  
\v 7 Uriꞌi Diose scua para nú lubeꞌnu luaꞌahua bee bichia nú nzeꞌtalá nu chiquiꞌ secanu liaꞌahua nu ñia nzeꞌcanu luaꞌahua equie cuendaꞌ Jesucristo.  
\v 8 Lunú nzeꞌca Diose enzeꞌe utsilaꞌanu liaꞌahua, la necane nu necaꞌahua bene nzeꞌca lunu, sino que lunú nzeli arquiaꞌahua Jesucristo enzeꞌe utsilaꞌahua.  
\v 9 Leꞌca la necane equie nu uriaꞌahua nú neca nzeꞌca utsilaꞌanu liaꞌahua para nú lecati aca nelliña.  
\v 10 Xne Diose urecheꞌ liaꞌahua, nu equie cuendaꞌ Jesucristo ucheꞌenu arquiaꞌahua lunú necha uhuañiaꞌahua huaꞌtu para nú riaꞌahua nú neca nzeꞌca, tucu nú uriꞌinu elliebacuꞌ nú riaꞌahua. 
\s1 Equie cuendaꞌ Jesucristo neca tucunecatseꞌahua 
\p  
\v 11 Enzeꞌe liꞌihua enu la neca bee bene Israel ulluꞌcu arquiꞌhua xa ulleꞌcahua hasta huaꞌtu. Bee bene Israel uhualee liꞌihua bee bene enu la uyaꞌ seña, xne liꞌibeella nuyaꞌbeella seña tucu nú rnibiyaꞌ ley,  
\v 12 leꞌca tiembu zeꞌe la chuluhua Jesucristo, nu la nebacuꞌhua leta bee bene Israel, nu leꞌca la nebacuꞌhua lunú ucuaqui uꞌna Diose. Uhuañihua lu iliulabe quieꞌ nu lecaxi nzuquie arquiꞌhua nu sin nú chuluhua Diose.  
\v 13 Pero nee nú nzelila arquiaꞌahua Jesucristo, liꞌihua enu istu utsu arquiꞌ lu Diose, nu nee ubeꞌta bicalahua lunu equie cuendaꞌ reneꞌ Jesucristo nú uriꞌchia lu cruse.  
\v 14 Xne Jesucristo neca enu rriꞌi nú nzuxe arquiaꞌahua. Liꞌinu unitilunu elu rlee lunú rriꞌi nú la zela nú aca tucunecatse bee bene Israel cuna bee bene enu la neca bee bene Israel.  
\v 15 Nu equie nú unguti Jesucristo ulaxu yebee custumbre nú rnibiyaꞌ ley lubee bene Israel nú rriꞌi beella, liꞌinu uriꞌinu nú unga tucunecatse bee bene Israel cuna bee bene enu la neca bee bene Israel xi neca tucu eyeche cuqui, xne neca tucunecatseꞌahua cuna liꞌinu. Scua uriꞌinu nú uyuꞌu nú nzuxe arquiꞌ bee bene.  
\v 16 Xne equie nú unguti Jesucristo lu cruse, ulaxu nú rlee bee bene Israel lubee bene enu la neca bee bene Israel, nu scua iguale uyala arquiꞌ Diose luaꞌahua lunú neca tucu necatseꞌahua cuna Jesucristo. 
\p  
\v 17 Nu liꞌinu ubeꞌta tixiuleꞌenu lubee bene Israel cuna lubee bene enu la neca bee bene Israel nú xa chuꞌu nú nzuxe arquiaꞌahua lu Diose.  
\v 18 Nu equie cuendaꞌ Jesucristo sia bee bene Israel nu sia bee bene enu la neca bee bene Israel, rluꞌculaꞌahua tucu inziu nú riñaꞌahua lu Diose xne nzula Espíritu Santoꞌnu cuna liaꞌahua.  
\v 19 Enzeꞌe la necaꞌhua xi neca bene istu nu la necaꞌhua bene rene lu Diose sino que nebacuꞌlahua leta bee beneꞌnu, neca tucunecatselaꞌahua cuna bee beneꞌnu.  
\v 20 Liꞌihua necahua xi neca tucu niꞌi nú recacheꞌe, nu bee apóstol cuna bee profeta neca beella xi neca cimienduꞌ niꞌi quieꞌ, nu Jesucristo neca xi neca quiee nú neca equie uzibiꞌ nú recacheꞌ niꞌi quieꞌ.  
\v 21 Nu zeꞌe uquixie riatsa niꞌi quie nú rniru nú neca liꞌihua, nu scua nze liqui nzeꞌcae para nú aca tucu necatseꞌahua induꞌ Diose cuna Jesucristo.  
\v 22 Nu nee nú neca tucu necatselahua cuna Jesucristo, leꞌca neca tucu necatselahua cuna beela bee saꞌahua enu nzeli arquiꞌ liꞌinu para nú acaꞌahua tucu indu elu nehuañi Diose equie cuendaꞌ Espíritu Santo. 
\c 3  
\s1 Ucañi Diose Pablo para nú ixiuleꞌella stichiaꞌ Jesucristo lubee bene enu laca bee bene Israel 
\p  
\v 1 Enzeꞌe liꞌá Pablo, nchiñia niꞌcuꞌ equie nú sibiꞌa lu Jesucristo para nú rriꞌá elietsa luhua enu laca bee bene Israel.  
\v 2 Liꞌihua nediyaꞌhua nú la yala riꞌá riñaꞌ nú rriꞌá, pero lunú nzeꞌca Diose uliquiꞌnu riñaꞌ quieꞌ rriꞌá para nú riꞌá elietsa luhua nú riꞌihua beyaꞌ stichiaꞌnu.  
\v 3 Nu liꞌinu ulubeꞌlanu lua xa neca elliebacuꞌnu hasta huaꞌtu, tucu nú unilá luhua lu tucu carta.  
\v 4 Chenu ulahua carta cuaꞌ che riꞌihua beyaꞌ nú nediyala xa neca equie cuendaꞌ Jesucristo nú la riꞌi bee bene beyaꞌ hasta huaꞌtu.  
\v 5 Bee tiembu nú udetela lecali ti uriꞌi beyaꞌ xa neca equie cuendaꞌ Jesucristo, xne ungae xi neca tucu nú aꞌchiꞌ neca lubee bene, pero nee equie cuendaꞌ Espíritu Santo ulubeꞌla Diose nucuaꞌ lubee apóstol cuna lubee profeta.  
\v 6 Nu lunú unga xi neca nú aꞌchiꞌ neca lubee bene, necane equie cuendaꞌ bedichiaꞌ nzeꞌcaꞌ Jesucristo, nú leꞌca bee bene enu laca bee bene Israel riala beella erencia nú riala bee bene Israel lunú neca tucunecatsela beella, nu nebacuꞌla beella lunú ucuaqui uꞌna Diose equie cuendaꞌ Jesucristo. 
\p  
\v 7 Liꞌá rixiuleꞌa bedichiaꞌ nzeꞌcaꞌ Jesucristo lubee bene, la necane equie cuendaꞌ nú riala nú riꞌá scua sino que necane nú ñia nzeꞌca Diose enzeꞌe lia uliquiꞌnu elurnibiyaꞌcuaꞌ lua para nú zibiꞌa lunu.  
\v 8 Liꞌá neca enu máse leca tineca lu ye bee beneꞌ Diose, pero lunú ñia nzeꞌca Diose lia uliquiꞌnu lua nú ixiuleꞌa lubee bene enu la neca bee bene Israel equie cuendaꞌ eluxeneꞌ Jesucristo nú llene neca.  
\v 9 Nu para nú ixiuleꞌe nzeꞌcaa lu yebeella xa neca elliebacuꞌ Diose enu urecheꞌ ye nú nuꞌ, elliebacuꞌ nú né chu alubeꞌnu lubee bene.  
\v 10 Para nú equie cuendaꞌ bee bene enu nzeli arquiꞌ Jesucristo riꞌi ye bee enu rluꞌcu nú rnibiyaꞌ liñibe beyaꞌ nú Diose rluꞌcu ye poder.  
\v 11 Nu hasta chenu lascaꞌ quixie iliulabe uriꞌila Diose elliebacuꞌ nú acane scua nu nee uyalulane equie cuendaꞌ Jesucristo enu rnibiyaꞌ luaꞌahua.  
\v 12 Nu equie nú nzelila arquiaꞌahua Jesucristo nuꞌla modo xa riñaꞌahua lu Diose sin nú lliquiaꞌahua chebicaꞌahua lunu.  
\v 13 Enzeꞌe nia luhua nú la tsunehuana arquiꞌhua lunú nehuana seꞌcaa equie cuendaꞌhua, xne neca nzeꞌca nucuaꞌ para liꞌihua. 
\s1 Chiquiꞌ seca Jesucristo liaꞌahua 
\p  
\v 14 Enzeꞌe súlliquia lu Diose paꞌ Jesucristo enu rnibiyaꞌ luaꞌahua,  
\v 15 liꞌinu enu rnibiyaꞌ lu ye nú nuꞌ liñibe cuna lu iliulabe.  
\v 16 Rnacua lunu, nú lunú chiquiꞌ rluꞌcunu poder nú liquiꞌnu juerzaꞌahua cuna elurnibiyaꞌ luhua equie cuendaꞌ Espíritu Santo para nú tsutaꞌ arquiꞌhua lunu,  
\v 17 nu huañihua cuna Jesucristo equie nú nzeli arquiꞌhua liꞌinu para nú scua tucu nú neli nzenalahua elusecaꞌnu.  
\v 18 Scua acahua riꞌihua beyaꞌ cuna beelá bee saꞌhua enu nzeli arquiaꞌahua liꞌinu nú eluseca Diose chiquiꞌ llene neca, nu niꞌ la riaꞌahua beyaꞌ xa niaꞌahua lunú chiquiꞌ llene necane.  
\v 19 Enzeꞌe rnacua lu Diose nú chuluhua eluseca cuaꞌ nú chiquiꞌ llene neca, nu másela llene necane luquelá nú rriꞌi bee bene elliebacuꞌ, nu scua nezaꞌli nú huañihua cuna Diose. 
\p  
\v 20 Nu liꞌinu enu rluꞌcu nú rnibiyaꞌ para nú riꞌinu másela lunú rriꞌi bee bene elliebacuꞌ, urre másela lunú rnacuꞌ bee bene lunu equie cuendaꞌ Espíritu Santoꞌnu nú nzu cuna liaꞌahua.  
\v 21 Nu riala nú zucuꞌ uyaꞌahua Diose ye bichia nu ye tiembu equie cuendaꞌ Jesucristo, liaꞌahua enu nzeli arquiaꞌahua Jesucristo. Amén. 
\c 4  
\s1 Equie cuendaꞌ Espíritu Santo neca tucu necatseꞌahua 
\p  
\v 1 Liꞌá enu nchiñia niꞌcuꞌ lunú sibiꞌa lu Jesucristo, zequiea luhua nú scua tucu nú necalahua bee beneꞌ Diose, uhuañihua tucu nú riala nú huañi bee bene enu necala bee beneꞌnu.  
\v 2 Aca lleꞌna arquiꞌhua nu aca nzeꞌcahua, nu tsuquie arquiꞌhua, nu uriquiꞌhua bee saꞌhua lunú xi rriꞌinu beella liꞌihua, equie nú secahua beella.  
\v 3 Uzuꞌcuꞌ luhua nú chenalaláhua nú neca tucu necatsehua cuna elietsaꞌ Espíritu Santo, enu rliquiꞌ nú nzuxe arquiꞌhua, nu rriꞌi nú neca tucu necatsehua.  
\v 4 Liaꞌahua necaꞌahua xi neca tucutsia bene, nu yeꞌahua nzu Espíritu Santo cuna liaꞌahua, nu scua tucu nú necalaꞌahua bee beneꞌ Diose leꞌca scua tucutse nelluaꞌaquieꞌahua nú liquiꞌnu luaꞌahua.  
\v 5 Tucutsia enu rnibiyaꞌ, tucutsia nú nzutenelí arquiaꞌahua, nu tucutsia elu rrinza nuꞌ,  
\v 6 xne nuꞌ tucutsia Diose enu neca Paꞌahua nu liꞌinu rnibiyaꞌnu lu yeꞌahua. Nu liꞌinu rnibiyaꞌnu lu ye beenú nuꞌ, nu nzunu cuna yeꞌahua nu rriaꞌahua lunú niarquiꞌnu. 
\p  
\v 7 Pero cada tucuaꞌahua utsula Jesucristo nú riaꞌahua tucu nú uniarquiꞌnu nú riaꞌahua.  
\v 8 Tucu nú rni lu ichiꞌ Stichiaꞌ Diose: 
\q1 Chenu uquienu liñibe, 
\q1 uriꞌinu ana lu ye bee elurnibiyaꞌ, 
\q1 nu udeteꞌnu lubee bene lunú riala riꞌi beella. 
\p  
\v 9 Nu, ¿xi rni elu rni nú “uquienu liñibe”? Rni nucuaꞌ nú ubeꞌtanu lu iliulabe.  
\v 10 Nu Jesucristo enu ubeꞌta lu iliulabe, leꞌca liꞌinu uquienu liñibe nu rnibiyaꞌnu diquineca iliulabe.  
\v 11 Nu udeteꞌlanu lubee bene lunú riala riꞌibeella, nuꞌbeella enu uyala nú aca bee apóstol, leꞌca nuꞌbeella enu uyala aca bee profeta, nu nuꞌ beella enu uyala nú ixiuleꞌe stichiaꞌnu lubee bene, nu leꞌca nuꞌ beella enu uyala nú ni bezeteꞌ nu zeteꞌ bee bene enu nzeli arquiꞌ liꞌinu.  
\v 12 Scua ucañi Jesucristo bee beneꞌnu para nú zeteꞌ beella beelá bee bene enu nzeli arquiꞌ liꞌinu para nú scua aca beella zibiꞌ beella lunu, nu nzechululá beella liꞌinu,  
\v 13 hasta nú nezaꞌli nú nzeli arquiaꞌahua nú chuluaꞌahua lliꞌñi Diose para nú riꞌiliaꞌahua beyaꞌ xa riala chenalaꞌahua Jesucristo tucu nú rialane.  
\v 14 Chequie la aca neriñaꞌ nú zequienu bee bene liaꞌahua xi sequienu bee bene bee enduꞌ, la acaꞌahua xi neca tucu nú ruyaꞌ bii enzichiuꞌ enzerquie equie yelu beenú rdichiaꞌ bee enu rlaꞌna nú xa modo zequienu bee bene.  
\v 15 Sino que rquiꞌña nú niaꞌahua nú nelíneca nu chenalaꞌahuane cuna eluseca nú rluꞌcuaꞌahua, nu lunú neca tucunecatseꞌahua cuna Jesucristo enu rnibiyaꞌ luaꞌahua chenalaꞌahua tucu nú niarquiꞌnu nú riaꞌahua.  
\v 16 Xne equie cuendaꞌ Jesucristo iguale necaꞌahua nu necaꞌahua xi neca tucutsia bene, yeꞌahua enu nzeli arquiꞌ Jesucristo, xne equie cuendaꞌnu neca tucu necatseꞌahua, nu cada tucuaꞌahua riaꞌahua lunú riala riaꞌahua para nú riaꞌahua elietsa lubee saꞌahua, nu zecaꞌlaꞌahua bee saꞌahua. 
\s1 Elunehuañi nú necuqui rliquiꞌ Jesucristo 
\p  
\v 17 Nu nee equie cuendaꞌ Jesucristo nialuhua: La huañihua xi nehuañi bee bene enu la chulu Diose, xne liꞌibeei nehuañitsiabeei lunú necatsia elliebacuꞌbeei  
\v 18 nu necabe neca elliebacuꞌbeei. Nu la zucuꞌlubeei nú huañibeei tucu nú niarquiꞌ Diose nú huañibeei, equie nú la riꞌibeei beyaꞌ nu nziti arquiꞌbeei.  
\v 19 Lecaꞌ xi zeca beei nu utsanaꞌ arquiꞌlabeei leꞌcatsia liꞌibeei nu rriꞌibeei seidu nú nzeriꞌibeei yelu clasiaꞌ beenú necha neca.  
\v 20 Pero liꞌihua lá chuluhua Jesucristo para nú huañihua scua,  
\v 21 tunu neli nú ubeneꞌlaꞌhua lu cuendaꞌnu, nu neli nú ungalahua beenú neli neca nzeꞌta lunu.  
\v 22 Utsana arquiꞌhua lunú uhuañihua chenu lascaꞌ chuluhua liꞌinu nucuaꞌ rnitilutsia liꞌihua, xne bee elliebacuꞌ nú necha neca uzequienu liꞌihua nu uriꞌitsiahua tucu nú uniarquiꞌtsiahua.  
\v 23 Ucheꞌelihua xa necahua,  
\v 24 para nú acahua xi neca tucu bene cuqui enu urecheꞌ Diose tucu nú niarquiꞌnu cuna tucu elunehuañi nú leca nú lixiu neca tucu nú rialane, equie cuendaꞌ stichiaꞌnu nú neli neca. 
\p  
\v 25 Enzeꞌe la niaꞌhua eluquichiaꞌ, uniꞌtsiahua nú neli neca lubee saꞌhua xne neca tucu necatsela yeꞌahua. 
\p  
\v 26 Tunu rlehua, la riꞌihua dula. La ducheꞌhua elu rlecuaꞌ arquiꞌhua debichia.  
\v 27 Para nú la deteꞌhua luhuare nu riꞌi bezeꞌlu ana luhua. 
\p  
\v 28 Bene enu rcachiꞌ rquiꞌña nú tsanaꞌlla nú rcachiꞌlla, nu riꞌilla riñaꞌ para nú equie riñaꞌ nzeꞌca nú rriꞌilla nuꞌ modo riꞌilla elietsa lubee bene enu nuꞌ xi secalaꞌchaꞌ. 
\p  
\v 29 Leꞌca la nihua bee bedichiaꞌ nú necha neca, uniꞌtsiahua puro bedichiaꞌ nzeꞌca nú riꞌi elietsa nu zibiꞌ lu beelá bee bene enu yeneꞌe.  
\v 30 La riꞌihua nú tsúnehuana arquiꞌ Espíritu Santoꞌ Diose nú nzula cuna liꞌihua xi neca tucu seña nú rlubeꞌ nú necalahua bee beneꞌnu para bichia nú riñahua lunu. 
\p  
\v 31 Utsaꞌnahua tucu chu ye nú rlee nzu arquiꞌhua, nu elu rlee, nu elu rana arquiꞌ, cuna nú rixialihua lu saꞌhua, cuna bee bedichiaꞌ chiꞌquiꞌ, cuna ye beenú necha neca.  
\v 32 Aca nzeꞌcahua, nu uhuaꞌa arquiꞌhua bee saꞌhua nu uriꞌihua perdona bee saꞌhua tucu nú uriꞌi Diose perdona liꞌihua equie cuendaꞌ Jesucristo. 
\c 5  
\s1 Xa riala huañi bee beneꞌ Diose 
\p  
\v 1 Scua tucu nú necalahua lliꞌñi Diose enu secanu, ulaꞌnahua nú riꞌihua tucu nú rriꞌinu.  
\v 2 Huañi nzeꞌcahua, uzecahua bee saꞌhua tucu nú seca Jesucristo liaꞌahua nú udeteꞌ cuendanu liꞌinu nú ungutinu equie cuendaꞌahua, nu unganu xi neca tucu uꞌna nú ñia rlia para Diose. 
\p  
\v 3 Liꞌihua enu necala bee beneꞌ Diose, la tsu neyiꞌhua nu niꞌ la yala nihua bee bedichiaꞌ nú necha see, cuna yelu beenú lecaxi zibiꞌ.  
\v 4 La nihua bee bedichiaꞌ nú necha see, niꞌ bee bedichiaꞌ nú lecaxi zibiꞌ nu bee bedichiaꞌ nú la yala nihua, xne la neca nzeꞌca bee nucuaꞌ. Mejora udeꞌtehua cheꞌtsa lu Diose.  
\v 5 Xne nediyaꞌlaꞌhua nú bee bene enu nehuañi lu eluhuexe, nu bee enu rriꞌi nú necha neca, nu bee enu neyiꞌ rcuaꞌa nu niarquiꞌ luꞌcu huaxi beenú luꞌcu, máse seca beei bee nucuaꞌ luquelá Diose, leca modo chuꞌu bee nzeꞌe elurnibiyaꞌ Jesucristo nu Diose.  
\v 6 La zelahua nú ti zequienu liꞌihua cuna bee bedichiaꞌ nú lecaxi zibiꞌ, xne equie beenú lecaxi zibiꞌ cuaꞌ nzeꞌta castiyaꞌ Diose lubee bene enu la zucuꞌ stichiaꞌnu.  
\v 7 Enzeꞌe la riꞌihua tucu nú rriꞌibeei. 
\p  
\v 8 Ante uhuañihua xi neca bene enu necabe elliebacuꞌ, pero nee lunú neca tucu necatselahua cuna Jesucristo enu neca ellieꞌe luhua. Enzeꞌe uhuañihua xi nehuañi bee bene enu nzenala ellieꞌe cuaꞌ,  
\v 9 xne lunú nzenala bee bene ellieꞌe cuaꞌ, che rriꞌilla nú neca nzeꞌca, tucu nú rialane nu tucu nú neli neca.  
\v 10 Ucuaꞌnahua nú riꞌihua tucu nú riuꞌ arquiꞌ Diose.  
\v 11 La riꞌihua beenú la zibiꞌ nú rriꞌi bee bene enu necabe nzu elliebacuꞌ, sino que uniꞌhua lubeei para nú riꞌibeei beyaꞌ lunú rriꞌibeei.  
\v 12 Xne hasta rtuꞌbene ni lunú rriꞌi aꞌchiꞌbeei.  
\v 13 Pero equie cuendaꞌ stichiaꞌ Jesucristo chu riꞌibeei beyaꞌ lunú rriꞌibeei.  
\v 14 Xne equie cuendaꞌ stichiaꞌnu rriꞌi bee bene beyaꞌ yeene. Enzeꞌe rni lu ichiꞌ Stichiaꞌ Diose: 
\q1 Udeꞌteꞌ ellieꞌe liꞌilu enu nza inziu nú necha neca, 
\q1 utsanaꞌ arquiꞌ stulalu che xaꞌla Jesucristo elliebacuꞌlu. 
\p  
\v 15 Enzeꞌe ubiꞌyahua xa nehuañihua, xne la neca nú lia nehuañihua sino que ubiꞌyahua xa nehuañihua.  
\v 16 Diquila nú nehuañihua la zelahua nú lia xleꞌe dete bee bichiaꞌhua, uhuañihua tucu nú riala huañihua, xne tiembu quieꞌ necha nehuañi bee bene.  
\v 17 Enzeꞌe la huañihua lunú necatsia elliebacuꞌhua, sino que ucuaꞌnahua nú riꞌihua beyaꞌ xa niarquiꞌ Diose nú huañihua.  
\v 18 La lluchiꞌhua, xne elu xuchiꞌ cuaꞌ rnitilu bene, mejora uzelahua nú nibiyaꞌli Espíritu Santo luhua.  
\v 19 Uniꞌhua lubee saꞌhua bee Salmo, cuna bee himno, cuna bee canto nú neca para Diose, nu diquinuꞌ arquiꞌhua ulaꞌhua nu uzuꞌcuꞌ ayahua Diose.  
\v 20 Nu equie cuendaꞌ Jesucristo udeꞌtehua cheꞌtsa lu Paꞌahua Diose ye bichia equie ye beenú rriꞌinu luaꞌahua. 
\s1 Xa riala nú huañi bee bene enu nzeli arquiꞌ Jesucristo 
\p  
\v 21 Uzuꞌcuꞌhua nú rni bee saꞌhua equie nú rluꞌcuhua ulaꞌna lu Jesucristo. 
\p  
\v 22 Nu liꞌihua bee unaꞌa enu nechia uzuꞌcuꞌhua nú rni bee niyuꞌhua, tucu nú sucuꞌhua nú rni Jesucristo.  
\v 23 Xne niyu rnibiyaꞌ lu unaꞌi, tucu nú rnibiyaꞌ Jesucristo lubee bene enu nzeli arquiꞌ liꞌinu, liꞌinu enu utsilaꞌa liꞌibeei.  
\v 24 Nu leꞌca scua tucu nú sucuꞌ bee bene enu nzeli arquiꞌ Jesucristo stichiaꞌnu, leꞌca scua bee unaꞌa enu nechia rquiꞌña nú zucuꞌhua nú rni bee niyuꞌhua tucu nú rialane. 
\p  
\v 25 Leꞌca liꞌihua bee niyu enu nechia uzecahua bee unaꞌhua, tucu nú seca Jesucristo bee bene enu nzeli arquiꞌ liꞌinu, nu hasta ungutinu equie cuendaꞌbeella.  
\v 26 Para nú uquieenu liꞌibeella lu cuendaꞌ stula beella. Uquieenu liꞌibeella equie cuendaꞌ stichiaꞌnu nu cuna equie cuendaꞌ elu rrinza,  
\v 27 para nú ñia naa beella riña beella lunu nu lecaxi na beella, sin niꞌ tucu equiya nu niꞌ xitse stucu bee dula, sino que lecalí xi naa beella sin dula.  
\v 28 Leꞌca scua bee niyu enu nechia rquiꞌña nú zeca beella unaꞌa beella, tucu nú seca beella liꞌibeella. Nu enu seca unaꞌa seca leꞌca liꞌi.  
\v 29 Xne niꞌ tucu bene la chana arquiꞌ leꞌcatsia liꞌi, sino que rebaculla liꞌilla nu riꞌyalla liꞌilla, tucu nú rriꞌi Jesucristo cuna liaꞌahua enu nzeli arquiꞌ liꞌinu,  
\v 30 equie nú neca tucu necatseꞌahua cuna liꞌinu.  
\v 31 Enzeꞌe tucu nú rni lu ichiꞌ Stichiaꞌ Diose: “Tsaꞌna niyu paꞌlla cuna naꞌlla para nú aca tucutsialla cuna unaꞌlla, nu rucu beella aca beella xi neca tucutsia bene.”  
\v 32 Chiquiꞌ neriñaꞌ nú riꞌi nzeꞌca bee bene beyaꞌ bee bedichiaꞌ quieꞌ, pero rniine xne leꞌca scua neca Jesucristo cuna bee beneꞌnu.  
\v 33 Nee bee niyu uzecahua bee unaꞌhua tucu nú secahua liꞌihua, nu liꞌihua bee unaꞌa uluꞌcuhua ulaꞌna lubee niyuꞌhua. 
\c 6  
\p  
\v 1 Leꞌca esquie liꞌihua bee enduꞌ, uzuꞌcuꞌhua nú rni bee uzanaꞌhua xne scua rialane, equie nú nzeli arquiꞌhua Jesucristo.  
\v 2 Nu mandamiento rluti nú rni nú yucu cuendaꞌahua lunú ucuaqui uꞌna Diose luaꞌahua tunu zucuaꞌahua mandamiento nú rni: “Uluꞌcu ulaꞌna lu paꞌlu cuna lu naꞌlu,  
\v 3 para nú huañi nzeꞌcalu nu huañixeelu lu iliulabe quieꞌ.” 
\p  
\v 4 Nu leꞌca esquie liꞌihua bee paa cuna bee naa, la detehua lunú rriꞌinuhua bee enduꞌhua para nú la leebeei equie cuendaꞌ nucuaꞌ, mejora ubiꞌya nzeꞌcahua liꞌibeei, uniꞌhua bezeteꞌ lubeei nu uzeꞌtehua liꞌibeei tucu nú niarquiꞌ Diose. 
\p  
\v 5 Nu liꞌihua bee enu rriꞌi riñaꞌ bee bene, uzuꞌcuꞌhua nú rni bene enu rriꞌihua riñaꞌlu lu iliulabe quieꞌ, nu diquinuꞌ arquiꞌhua uluꞌcuhua ulaꞌna lubeella, nu uzuꞌcuꞌhua nú rni beella, uriꞌihua xineca nú rriꞌihua riñaꞌ Jesucristo. 
\p  
\v 6 Uriꞌihua riñaꞌ beella, nu la riꞌihuane chenu riꞌyatsia beella luhua para nú yaꞌna nzeꞌcahua lubeella, sino que uriꞌihua riñaꞌ beella xi neca nú sibiꞌhua lu Jesucristo, equie nú neli rriꞌihua tucu nú niarquiꞌ Diose nú riꞌihua.  
\v 7 Uriꞌihua riñaꞌ beella diquinuꞌ arquiꞌhua, uriꞌihuane xi neca nú rriꞌihua riñaꞌ Jesucristo xne la necatsiae riñaꞌ bee bene.  
\v 8 Nu liꞌihua nediyaꞌlaꞌhua nú cada bee bene, mase nú necalla mosoꞌ urre lacalla mosoꞌ, pero deteꞌ Jesucristo lulla nú riala nú atiꞌlla equie nú neca nzeꞌca uriꞌilla. 
\p  
\v 9 Leꞌca esquie liꞌihua bee patrón, aca nzeꞌcahua lubee mosoꞌhua, la riꞌihua nú nehuana zeca beella. Xne liꞌihua nediyaꞌhua nu liꞌinu enu rnibiyaꞌ lubeella nu luhua nzucunu liñibe nu ante lunu iguale neca ye bee bene. 
\s1 Utsutaꞌ arquiꞌhua lunú nzeli arquiꞌhua Jesucristo 
\p  
\v 10 Leꞌca nia luhua bee saꞌa enu nzeli arquiaꞌahua Jesucristo nú utsutaꞌ arquiꞌhua lunú neca tucu necatselaꞌahua cuna liꞌinu, lunú chiquiꞌ rnibiyaꞌnu. \fig Efesios 6:10|src="LB00196B.TIF" size="COL" ref="Efesios 6:10" \fig* 
\v 11 Ubiꞌyahua liꞌihua cuna elietsaꞌ Diose para nú tsutaꞌ arquiꞌhua, nu para nú la riꞌi bezeꞌlu ana luhua nú zequienui liꞌihua.  
\v 12 Xne la liunuaꞌahua bee bene lu iliulabe quieꞌ, sino que rliunuaꞌahua cuna yelu clasiaꞌ bee benechiquiꞌ, sia bee enu rluꞌcu nú rnibiyaꞌ, cuna enu rluꞌcu elu usticia, cuna ye beelá bee espírituꞌ bezeꞌlu nú nuꞌ, nu rnibiyaꞌ lu iliulabe quieꞌ.  
\v 13 Enzeꞌe ubiꞌyahua liꞌihua cuna poder nú rliquiꞌ Diose luhua para nú riquiꞌhua lu xitse beenú nehuana nzeꞌta zecahua, nu utsutaꞌ arquiꞌhua mase secahua lunú secahua.  
\v 14 Utsutaꞌ arquiꞌhua lunú neli neca nú nediyaꞌlaꞌhua, nu uyanalahua tucu nú riala nú huañihua.  
\v 15 Ucuaꞌa tsiñahua para nú ixiuleꞌehua lubee bene bee bedichiaꞌ nzeꞌcaꞌ Jesucristo nú rriꞌi nú nzuxe arquiꞌ bee bene lu Diose.  
\v 16 Nu lu yeene la zañiꞌhua lunú nzu tenelí arquiꞌhua, nú neca nú rriꞌi elietsa luhua luye beenú necha neca nú nzeꞌta lu bezeꞌlu.  
\v 17 Nu lunú utsilaꞌa Diose liꞌihua nucuaꞌ neca nú recanuꞌ liꞌihua, nu stichiaꞌnu neca xi neca tucu espada nú rliquiꞌ Espíritu Santo luhua.  
\v 18 La tsanaꞌhua nú rnacuꞌhua lu Diose. Uzequiehua lunu nu unaꞌcuhua lunu yebichia cuna elietsaꞌ Espíritu Santo. Utsutsiñahua unaꞌcuhua lunu nu la llacaꞌhua, nu unaꞌcuhua lunu equie cuendaꞌ ye bee beneꞌnu.  
\v 19 Leꞌca unaꞌcuhua lu Diose lu cuendaa para nú liquiꞌnu bee bedichiaꞌ nú riala nia para nú aca ixiuleꞌene lubee bene sin nú lliquia, nu nia bee bedichiaꞌ nzeꞌcaꞌ Jesucristo nú rni nú xneca tsilaꞌa bee bene.  
\v 20 Uxeꞌla Diose liꞌá para nú ixiuleꞌa bee bedichiaꞌ nzeꞌca quieꞌ, enzeꞌe nchiñia niꞌcuꞌ nee. Pero unaꞌcuhua lu Diose para nú la lliquia nia equie cuendaꞌnu tucu nú riala nú nia. 
\s1 Último bedichiaꞌ nú nequie lu ichiꞌ quieꞌ 
\p  
\v 21 Tíquico, enu neca tucu bee saꞌahua enu chiquiꞌ seꞌcaꞌahua enu neli rriꞌi elietsa luaꞌahua lunú sibiaꞌahua lu Jesucristo, liꞌilla ixiuleꞌella luhua lu ye nú xa nzucuaꞌa caꞌa nu xi rriꞌá.  
\v 22 Xne para enzeꞌe xeꞌlalla luhua para nú ixiuleꞌella luhua nú xa nelluaꞌaru caꞌa, nu scua duꞌlla ana arquiꞌhua. 
\p  
\v 23 Nacua lu Diose nú ye bee saꞌahua enu nzeli arquiaꞌahua Jesucristo liquiꞌnu nú nzuxe arquiꞌhua, cuna eluseca, cuna nú chililá arquiꞌhua Paꞌahua Diose nu Jesucristo enu rnibiyaꞌ.  
\v 24 Diose riꞌi nú cha nzeꞌca lu cuendaꞌ ye bee bene enu neli seca Jesucristo enu rnibiyaꞌ. Amén.