\id 2PE II Peter 1 Zapotec Lachixio USFM output from Final pdf Aug 2010 
\h 2 San Pedro 
\toc1 Carta rrucu nú uquieꞌe San Pedro 
\toc2 2 San Pedro 
\toc3 2 Pe 
\mt1 Carta rrucu nú uquieꞌe San Pedro 
\c 1  
\s1 Uxeꞌla Pedro saludo 
\p  
\v 1 Liꞌá Simón Pedro, neca tucu apóstolꞌ Jesucristo nu sibiꞌa lunu. Rquieꞌa carta quieꞌ luhua liꞌihua enu rluꞌcu nú nzu teneli arquiꞌ lu Jesucristo nú chiquiꞌ ñia neca tucu nú nzu teneli arquiꞌru lunu. Xne utsilaꞌla Diose liaꞌahua equie cuendaꞌ Jesucristo enu neli rriꞌi tucu nú necane.  
\v 2 Diose riꞌi nú chiquiꞌ cha nzeꞌca lu cuendaꞌhua cuna nú lia liquiꞌnu nú chiquiꞌ nzuxe arquiꞌhua, xne nuꞌluhua Diose cuna Jesucristo enu rnibiyaꞌ luaꞌahua. 
\s1 Xa rquiꞌña riꞌi bee beneꞌ Jesucristo 
\p  
\v 3 Diose equie nú rluꞌcunu poder uliquiꞌlanu ye nú seꞌca laꞌchaꞌahua para nú rluꞌcuaꞌahua elunehuañi nú leca xunga laxu, nu para nú huañiaꞌahua nú lecaxi natsa arquiaꞌahua lunu. Xne nuꞌlulaꞌahua enu ucañi liaꞌahua para nú yalaꞌahua elu rnibiyaꞌnu cuna eluxeneꞌnu.  
\v 4 Enzeꞌe chiquiꞌ llene neca lunú ucuaqui uꞌnanu luaꞌahua nu huaxi secae, nu equie cuendaꞌ nú ucuaquiꞌ uꞌnanu scua rcuaꞌnahua nú huañihua tucu nu niarquiꞌ Diose, nu scua utsanaꞌ arquiꞌhua ye beenú lecaxi zibiꞌ cuna beenú necha neca nuꞌ lu iliulabe quieꞌ.  
\v 5 Enzeꞌe rquiꞌña nú cuaꞌnahua nú huañi nzeꞌcahua equie nú rluꞌcuhua lunú nzeli arquiꞌhua Jesucristo, nu equie nú nehuañi nzeꞌcahua scua che riꞌiláhua beyaꞌ xa neca stichiaꞌnu;  
\v 6 nu equie nu nediyaꞌhua xa necanu, che rriꞌihua ana lubee elliebacuꞌhua nú necha neca, nu lunú rriꞌihua ana lubee elliebacuꞌhua nu necha neca, ché acahua luꞌcuhua nú tsuquie arquiꞌhua, nu equie nú rluꞌcuhua nú nzuquie arquiꞌhua nuꞌ modo huañihua nú lecaxi naa arquiꞌhua lu Diose;  
\v 7 nu equie nú nehuañihua nú lecaxi naa arquiꞌhua lu Diose, scua acahua riꞌihua nú neca nzeꞌca lu beelá bee saꞌhua, nu equie nu nzeꞌcahua nuꞌ modo nú zecahua bee saꞌhua. 
\p  
\v 8 Tunu sucuꞌluhua bee nucuaꞌ, nu nzequiehua nu rcuaꞌnahua nu nehuañihua scua, chequie la nehuañitsiahua lunú nehuañihua, nu la nehuañi xleꞌehua, sino que máse nzequiehua nú nuꞌluhua Jesucristo enu rnibiyaꞌ luaꞌahua.  
\v 9 Pero bene enu la cuaꞌna nú huañi scua, liꞌilla necalla xi neca tucu bene enu niquieꞌlu urre xi neca tucu enu la biꞌya istu. Uzañilaꞌlla nú uriꞌila Diose perdona liꞌilla bee dula nú uriꞌilla huaꞌtu.  
\v 10 Enzeꞌe bee saꞌa enu nzeli arquiaꞌahua Jesucristo, tucu nu ubixia Diose liꞌihua nu tucu nú ucañinu liꞌihua, cuaꞌnahua nú tsutaꞌ arquiꞌhua lu Diose, xne tunu nzutaꞌ arquiꞌhua scua, che la zanaꞌhua lu dula.  
\v 11 Nu scua itá luꞌcuhua nú chuꞌuhua elurnibiyaꞌ Jesucristo enu rnibiyaꞌ luaꞌahua, liꞌinu enu uhua liaꞌahua lu dula. 
\p  
\v 12 Enzeꞌe la tsanaa nú relluꞌcuꞌ arquia liꞌihua ye bee nu unia luhua nee, añinzuca nú nediyalaꞌhua bee nucuaꞌ nu añinzuca nu leꞌca neli nzequiehua lunú neli neca nú ubeneꞌlaꞌhua.  
\v 13 Diqui nú nehuañia lu iliulabe quieꞌ, liꞌá nediya nú rquiꞌña nú duaꞌa ana arquiꞌhua cuna bee bedichiaꞌ quieꞌ.  
\v 14 Xne equie cuendaꞌ Jesucristo enu rnibiyaꞌ luaꞌahua uriꞌilá beyaꞌ nú lacaxeaꞌ nehuañia lu iliulabe quieꞌ.  
\v 15 Enzeꞌe chiquiꞌ rcuaꞌna nu nia luhua para nú leca xunga zañiꞌhua bee stichiaꞌa, mase nú ungutia. 
\s1 Bee enu ulañiꞌ lunú rnibiyaꞌ Jesucristo 
\p  
\v 16 Chenu udixiuleꞌeru luhua nu xa neca lunú rnibiyaꞌ Jesucristo, nu xa neca nu nzeꞌta zecanu stucu bese, lá llela arquiꞌru nú rniru luhua xne ulañiꞌ nzeꞌcaꞌru nú chiquiꞌ neca equie ellieꞌnu.  
\v 17 Chenu ubene chi Diose enza liñibe, nu uni chi zeꞌe bedichiaꞌ nzeꞌca lunu: “Benequieꞌ neca lliꞌñia nu chiquiꞌ neca equienu nu ñia nzu arquia lunu.”  
\v 18 Nu liꞌiru necaru enu ubeneꞌ chi Diose hasta liñibe, chenu ulluaꞌaru equie dañi zeꞌe cuna Jesuse elu ulubeꞌlu ellieꞌnu. 
\p  
\v 19 Nu scua másela uyali arquiꞌru nú uni bee profetaꞌ Diose. Enzeꞌe, neca nzeꞌca tunu sucuꞌluhua lunú uni beella, xne stichiaꞌ beella neca xi neca quii nú rduꞌllieꞌe elu necabe nzu hasta nú yeꞌe luyuu. Nee leꞌca scua lleꞌnaa, lleꞌnaa nze riꞌihua beyaꞌ lu cuendaꞌ Diose hasta chenu riña Jesucristo stucu bese liꞌinu enu neca ellieꞌe luaꞌahua, che itá riꞌihua beyaꞌ yeene.  
\v 20 Pero uriꞌihua beyaꞌ nú niꞌ tucu Stichiaꞌ Diose la aca bee bene riꞌilla beyaꞌ tucu nú necatsia elliebacuꞌlla,  
\v 21 xne bee profetaꞌ Diose né ni beella stichiaꞌnu tucu nú necatsia elliebacuꞌ beella, liꞌibeella uni beella nucuaꞌ equie nú uduꞌ Espíritu Santo arquiꞌbeella nu ni beella scua. 
\c 2  
\s1 Bee bene enu la zeteꞌ lunú neli neca 
\p  
\v 1 Nu leꞌca scua tucu nú ucuaꞌa bee profeta enu lixiu uriꞌi leta bee bene Israel huaꞌtu. Leꞌca scua nucuaꞌa bee bene enu lixiu rriꞌi nu seteꞌbeei lunú la neli neca. Liꞌibeei cuaꞌna beei nú xa zeteꞌbeei liꞌihua lunú la neli neca para nú nuꞌ nu zaꞌ arquiꞌhua, scua la zela beei nu nibiyaꞌ Jesucristo enu rnibiyaꞌ luaꞌahua lubeei, liꞌinu enu udixiu stula beei nu la leaꞌ nú nitilu Diose liꞌibeei.  
\v 2 Pero huaxi bee bene chequie lunú necha neca rriꞌi beei nu riꞌi nucuaꞌ nú zeꞌta bee bene Stichiaꞌ Diose.  
\v 3 Nu equie nú máse niarquiꞌ beei dimi, liꞌibeei cuaꞌna beei xa zequienu beei liꞌihua para nu yucu beei dimiꞌhua, pero la laꞌa beei lu castiya nú nzuquie liꞌibeei, xne hasta huaꞌtu nuꞌla castiya nú riala zeca bee bene enu rriꞌi scua. 
\p  
\v 4 Diose né riꞌi perdona bee ángele enu né zucuꞌ stichiaꞌnu, sino que uxeꞌlanu liꞌibeei ebila, nu nchiñicheꞌbeei elu máse natsacabe nzu para bichia chenu riꞌinu elu usticiaꞌnu.  
\v 5 Leꞌca né riꞌi Diose perdona bee bene enu necha uriꞌi enu uhuañi huaꞌtu, sino que ulaꞌxunu liꞌibeei cuna inza, utsilaꞌatsianu Noé enu udixiuleꞌe lubee bene tucu nu neli neca Stichiaꞌ Diose cuna se achi bene.  
\v 6 Leꞌca chenu uriꞌi Diose elu usticiaꞌnu lubee bene eyeche Sodoma cuna Gomorra, liꞌinu utsiquiꞌnu eyeche zeꞌe hasta nú ungae tii, nucuaꞌ neca tucu ejemplu para lubee bene enu entalá, bee bene enu huañi nu necha riꞌi, tucu nu uriꞌi bee bene bee eyeche zeꞌe.  
\v 7 Pero utsilaꞌa Diose bene enu lee Lot, liꞌilla enu uhuañi tucu nú niarquiꞌ Diose nú huañilla, nu chiquiꞌ uyanu arquiꞌlla lunú necha nehuañi bee bene eyeche zeꞌe. 
\p  
\v 8 Nu lunú neca Lot enu uhuañi tucu nú niarquiꞌ Diose leta bee bene zeꞌe, chequie bichia por bichia chiquiꞌ nehuana nzu arquiꞌlla chenu rlañiꞌlla cuna nú rieneꞌlla lunú necha rriꞌi bee bene zeꞌe.  
\v 9 Diose siempre rriꞌi elietsa lubee bene enu sucuꞌ stichiaꞌnu lu xitse prueba nú seca beella, nu leꞌca nediyaꞌnu xa riꞌinunu bee bene enu necha rriꞌi bichia chenu riꞌinu elu usticiaꞌnu. 
\p  
\v 10 Nu nucuaꞌ neca nu nzuquie liꞌi bee bene enu nehuañi tucu nu niarquiꞌtsia beei nu la niarquiꞌbeei nú nibiyaꞌ Diose lubeei. Chiquiꞌ la yuꞌbeei resuna nu la tuꞌbeei sin nu lliqui beei rnibeei bedichiaꞌ nu necha neca, lu cuendaꞌ bee enu rluꞌcu nú rnibiyaꞌ liñibe,  
\v 11 nu niꞌ bee ángeleꞌ Diose añinzuca nú máse nuꞌ juerzaꞌ beenu cuna elurnibiyaꞌ, pero lecaxi uni beenu lu Diose equie cuendaꞌ beei. 
\p  
\v 12 Bee clasiaꞌ bee benequieꞌ liꞌibeei nehuañi beei tucu nú nehuañi bee nañi, la luꞌcu beei nu riꞌi beei beyaꞌ, nu seꞌta beei lunú la riꞌi beei beyaꞌ, nu rriꞌitsia beei lunú niarquiꞌ tsia beei sin nu riꞌi beei elliebacuꞌ, tucu nú neca bee nañi enu nzeꞌtatsia lu iliulabe quieꞌ para nu úti bee bene liꞌibeeí. Leꞌca scua bee benecuaꞌ equie nu rriꞌi beei beenú necha neca, chequie leꞌcatsia liꞌibeei rnitilu beei liꞌibeei,  
\v 13 Nu ixiu beei tucu nu rriꞌinu beei bee bene. Liꞌibeei chiquiꞌ ñia nzu arquiꞌbeei rriꞌi beei beenú necha neca nú terratutsia laxu lu iliulabe quieꞌ, liꞌibeei neca beei xi neca tucu nu necha neca, nú rnitilu lu eliñi nú rriꞌihua chenu racu juntuhua, nu chiquiꞌ ñia nzu arquiꞌbeei sequienubeei liꞌihua. 
\p  
\v 14 Lacala lañiꞌbeei tucu unaꞌa chu rriꞌibeei elliebacuꞌ nu necha neca lunchu; la tsuxe beei nú rriꞌi beei dula. Nu sequienu beei bee bene enu lleꞌnalá nzeli arquiꞌ Stichiaꞌ Diose, para nu riꞌibeella dula, nu chiquiꞌ netsiña beei para nú riꞌibeei ana lunú niarquiꞌbeei. Chequie nzu quietsia nú zeca beei castiyaꞌ Diose.  
\v 15 La chequieaꞌ beei inziuꞌ Diose ucheꞌe xa nehuañibeei. Liꞌibeei nehuañibeei tucu nú uriꞌi profeta Balaam llianaꞌ bene enu lee Beor, chenu niarquiꞌlla nú riꞌilla ana dimi equie nú uriꞌilla nu necha neca.  
\v 16 Pero uquiꞌyaꞌ Balaam equie cuendaꞌ dula nú uriꞌilla, uriꞌi Diose nu uni burroꞌlla xi rni tucu bene nu hora zeꞌe lá riaꞌlla elliebacuꞌ nu necha neca. 
\p  
\v 17 Nee bee bene enu lixiu rriꞌi cuaꞌ enu rnia luhua liꞌibeei neca beei xi neca tsu nú leca inza, cuna xi neca xcabe nu la uyaꞌ quiu, enzeꞌe riala chabeei elu máse natsacabe nzu nu leca bichia nú chiuꞌu beei zeꞌe.  
\v 18 Puro bee bedichiaꞌ nú nelliña rnibeei nú lecaxi sibiꞌ, nu liꞌibeei rnibeei nú lecaxi riꞌi nu riꞌi bee bene nu necha neca, scua sequienu beei bee bene enu apenatsia rlaꞌna nú tsanaꞌ arquiꞌ inziu nu necha neca para nu che riꞌilá beella nu necha neca.  
\v 19 Rnibeei nu lecati nibiyaꞌ lubee bene, nu leꞌca liꞌibeei neca beei xi neca enu neiqui lubee nu necha neca rriꞌibeei, xne ye beenú la tsanaꞌ arquiꞌbee bene nú necha neca rriꞌi beei, nucuaꞌ neca nú rnibiyaꞌ lubee bene.  
\v 20 Lunú necane chenu uyuꞌulula bee bene nu utsilaꞌla Jesucristo enu rnibiyaꞌ luaꞌahua liꞌibeella lu dula nú utsanaꞌ arquiꞌla beella lunú necha neca nuꞌ lu iliulabe quieꞌ, nu stucuaꞌla bese uzela beella nu rnibiyaꞌ nucuaꞌ lubeella, scua masescaꞌlá necha nehuañi beella lunú uhuañi beella huaꞌtu.  
\v 21 Máse neca nzeꞌcae lu cuendaꞌ beei nú né chuluxu beei Stichiaꞌ Diose, nu uyulu beeii nu chu utsanaꞌ arquiꞌbeei bedichiaꞌ nzeꞌcaꞌnu nú ubeneꞌbeei.  
\v 22 Equie cuendaꞌ beei rialu tucu parte lu ichiꞌ Stichiaꞌ Diose elu rni: “Nicu racu zecaí lunú uridiꞌcuí, nu cuchi enu ungutsa inza lu inza nzeꞌca, riuꞌu zecaí lu inzabenu.” 
\c 3  
\s1 Xa aca chenu nzeꞌta Jesucristo stucu bese 
\p  
\v 1 Bee saꞌa enu nzeli arquiaꞌahua Jesucristo chiquiꞌ seꞌca liꞌihua, ninguieꞌ neca carta rrucu nú xeꞌla luhua. Nu lu rucu carta quieꞌ rcuaꞌna para nu nia luhua nú riꞌihua elliebacuꞌ tucu nú rialane.  
\v 2 Ulluꞌcuꞌ arquiꞌhua lunú uni bee profetaꞌ Diose huaꞌtu cuna stichiaꞌ Jesucristo enu rnibiyaꞌ nú uzeteꞌ bee apóstolꞌnu liꞌihua, liꞌinu enu utsilaꞌa liaꞌahua lu dula. 
\p  
\v 3 Uriꞌihua beyaꞌ chenu yamero nzeꞌta nú laxu iliulabe, chuꞌu bee bene enu tsequichiaꞌ liꞌihua, nu huañi beei tucu nu niarquiꞌ tsiabeei,  
\v 4 nu nibeei luhua: “¿Ma nu unii Cristo nú nzeꞌta zecanu stucu bese? Ungutila ye bee beneaꞌahua enu udetela, nu ye beenú nuꞌ lu iliulabe neca tucu necane hasta chenu uquixie iliulabe.”  
\v 5 Liꞌibeei nibeei scua xne la duꞌ equie beei nú hasta huaꞌtu nuꞌla liñibe cuna lu yuu, nu lu cuendaꞌ inza ungacheꞌ yuu cuna poderꞌ Diose.  
\v 6 Leꞌca equie cuendaꞌ inza unitilu Diose bee bene enu uhuañi huaꞌtu.  
\v 7 Pero liñibe cuna lu yuu nú rlañiaꞌahua nee, nzula nú nitilu Diose nucuaꞌ cuna quii equie nú rnibiyaꞌnu, bichia nú deteꞌnu castiya bee bene enu la zucuꞌ stichiaꞌnu. 
\p  
\v 8 Enzeꞌe bee saꞌa enu nzeli arquiaꞌahua Jesucristo, la zañiꞌhua nú para Paꞌahua Diose tucu bichia neca xi neca tucu mili lana, nu tucu mili lana neca xi neca tucu bichia para liꞌinu.  
\v 9 La necane nu rleꞌlaꞌ Diose nu tsaꞌalunu lunú ucuaqui uꞌnanu tucu nú nuꞌ bee bene enu rriꞌi elliebacuꞌ nú rleꞌlaꞌnu nú riꞌinu nucuaꞌ sino que nzuquienu. Xne la niarquiꞌnu nú nitilu niꞌtucu bee bene, lunú niarquiꞌnu nú ye bee bene tsanaꞌ arquiꞌbeei stula beei. 
\p  
\v 10 Nu tucu nu la riaꞌahua beyaꞌ chenu rriña tucu huanaꞌ. Scua aca bichia chenu riña zeca Jesucristo stucu bese, nu lliqui bee bene chenu yeneꞌ bee bene nú llichi nitilu liñibe, nu ye beenú nuꞌ liñibe nitilu Diose nucuaꞌ cuna quii, leꞌca esquie nitilunu iliulabe cuna ye nú nuꞌ lue cuna quii. 
\p  
\v 11 Nee lunú nediyaꞌlaꞌhua nú laxu iliulabe, rquiꞌña nú huañihua nu lecaxi natsa arquiꞌhua sin nu luꞌcuhua dula tucu nu niarquiꞌ Diose.  
\v 12 Chequie chiquiꞌ nuꞌ ana arquiꞌhua nzuquiehua nú riña bichia nu ucañi Diose nú aca bee nucuaꞌ, bichia zeꞌe tsiquiꞌ Diose liñibe cuna ye beenú nuꞌ liñibe. Leꞌca esquie lu yuu cuna ye nú nuꞌlue nitilu Diose bee nucuaꞌ, cuna quii.  
\v 13 Pero liaꞌahua nelluaꞌa quiaꞌahua tucu liñibe cuqui cuna tucu yuu cuqui, tucu nú ucuaqui uꞌna Diose, tucu elusticia nú neli neca liñibe. 
\p  
\v 14 Enzeꞌe bee saꞌa enu nzeli arquiaꞌahua Jesucristo, diquila nú nucuaꞌaquiehua nu aca nucuaꞌ, ucuaꞌnahua nú llunaꞌ Diose liꞌihua nú lecaxi nahua nu la luꞌcuhua dula, cuna nú nehuañihua nu nzuxe arquiꞌhua cuna bee saꞌhua.  
\v 15 Uriꞌihua beyaꞌ nú Paꞌahua Diose nzu quie arquiꞌnu liaꞌahua para nú tsanaꞌ arquiaꞌahua stulaꞌahua. Nu saꞌahua Pablo enu chiquiꞌ seꞌcaꞌahua, leꞌca scua unilla lu cartaꞌlla nú uquieꞌella luhua tucu nú lia udeteꞌ Diose lunú reca elliebacuꞌlla.  
\v 16 Lu ye carta nú uquieꞌe Pablo liꞌilla unilla luhua lunú rnia luhua. Pero nuꞌbee luhuare lu cartaꞌlla elu neriñaꞌ nú riꞌi bee bene beyaꞌ, chequie bee bene enu la riꞌili beyaꞌ Stichiaꞌ Diose cuna bee enu la tsutaꞌ arquiꞌ lu stichiaꞌnu xeꞌe beei lunú rni stichiaꞌ Pablo, leꞌca scua rriꞌi beei lu beelá bee bedichiaꞌ nú nzeꞌta lu ichiꞌ Stichiaꞌ Diose, enzeꞌe leꞌcatsia liꞌibeei rnitilu beei liꞌibeei. 
\p  
\v 17 Bee saꞌa enu nzeli arquiaꞌahua Jesucristo, chiquiꞌ seꞌca liꞌihua, nee lunú nediyaꞌlaꞌhua bee nucuaꞌ ubiꞌyahua liꞌihua para nú la zanaꞌhua letaya bee enu niarquiꞌ nú zequienu liꞌihua para nú tsanaꞌ arquiꞌhua lunú nzutaꞌ arquiꞌhua lu Stichiaꞌ Diose.  
\v 18 Mejora ucuaꞌnahua nú másela chululáhua Jesucristo cuna elusecaꞌnu, liꞌinu enu udixiu stulaꞌahua. ¡Nu chiquiꞌ neca equie nú luꞌcu bee bene ulaꞌna lunu diqui tiembu! Amén.