\id 1TH I Tesalonicenses Lachixio Zapotec USFM output from Final pdf Aug 2010 
\h 1 Tesalonicenses 
\toc1 Carta tucu nú uquieꞌe San Pablo lu bee bene eyeche Tesalónica enu nzeli arquiꞌ Jesucristo 
\toc2 1 Tesalonicenses 
\toc3 1 Ts 
\mt1 Carta tucu nú uquieꞌe San Pablo lu bee bene eyeche Tesalónica enu nzeli arquiꞌ Jesucristo 
\c 1  
\s1 Uxeꞌla Pablo saludo 
\p  
\v 1 Liꞌá Pablo, cuna Silvano nu Timoteo, rquieꞌeru carta quieꞌ luhua, liꞌihua bee enu nzeli arquiꞌ Jesucristo eyeche Tesalónica, liꞌihua bee enu neca bee beneꞌ Diose Pa liñibe cuna Jesucristo enu rnibiyaꞌ. Riꞌi Diose nú cha nzeꞌca lu cuendaꞌhua cuna nú nzuxe arquiꞌhua. 
\s1 Rdeteꞌ Pablo cheꞌtsa lu Diose equie cuendaꞌ bee bene Tesalónica 
\p  
\v 2 Ye bichia rdeteꞌru cheꞌtsa lu Diose lu cuendaꞌ yehua nu la zañiꞌru rnacuꞌru lunu equie cuendaꞌhua ye chenu rnacuꞌru lunu.  
\v 3 Cada chenu rnacuꞌru lu Diose Paꞌahua liꞌiru rluꞌcu cuendaru ye beenú rriꞌihua xne nzeli arquiꞌhua liꞌinu, nu liꞌiru rluꞌcu cuendaru lunú rriꞌihua xne secahua bee saꞌhua nu leꞌca rluꞌcu cuendaru nu liꞌihua neli nucuaꞌaquiehua nú benchilaꞌ zeca Jesucristo enu rnibiyaꞌ.  
\v 4 Bee saꞌa enu nzeli arquiaꞌahua Jesucristo, liꞌiru nediyaꞌru nu seca Diose liꞌihua nu liꞌinu ucañinu liꞌihua.  
\v 5 Xne chenu udixiuleꞌeru bedichiaꞌ nzeꞌcaꞌ Jesucristo luhua, la neca nú uzeteꞌtsiaru liꞌihua cuna bee bedichiaꞌtsia sino que uzeteꞌru liꞌihua cuna poderꞌ Espíritu Santo nu nediyaꞌru nú neli neca lunú rniru luhua. Liꞌihua nediyaꞌhua xneca uriꞌiru chenu ulluaꞌaru cuna liꞌihua, uhuañiru scua para nú lubeꞌru luhua nú xneca riala nú huañihua.  
\v 6 Nu liꞌihua nehuañihua tucu nú uhuañiru nu tucu nú uzeteꞌ Jesucristo liꞌiru, nu equie cuedaꞌ Espíritu Santo ñia utsu arquiꞌhua uyalí arquiꞌhua bee bedichiaꞌ nú udixiuleꞌeru luhua añinzuca nú chiquiꞌ nehuana ulleꞌcahua.  
\v 7 Scua necahua tucu ejemplu lu ye bee bene lu iliu Macedonia cuna lu iliu Acaya ante lu bee enu nzeli arquiꞌ Jesucristo.  
\v 8 Nu equie cuendaꞌ liꞌihua uriꞌchialetse stichiaꞌ Jesucristo nu la neca nucuaꞌ nú unga lu iliu Macedonia cuna lu iliu Acaya tsia, sino que ye bee luhuare rni bee bene xneca nzeli arquiꞌhua Diose hasta nú lecaꞌ xi rquiꞌña nú niláru lubee bene equie cuendaꞌ liꞌihua.  
\v 9 Xne liꞌi eꞌcu beei rnibeei lubee bene lunú xneca uyucuhua liꞌiru bese rlu chenu ubelabiꞌyaru liꞌihua, nu xneca utsana arquiꞌhua bee enu secahua nú neca diose para nú chili arquiꞌhua Diose enu nehuañi nu zibiꞌhua lunu, liꞌinu enu neli neca Diose.  
\v 10 Nu leꞌca rnibeei nú xneca nucuaꞌaquiehua bichia chenu nzeꞌta zeca Jesucristo Lliꞌñi Diose enza liñibe, liꞌinu enu uriꞌi Diose nú uhuañi leta bee benenguti. Jesucristo enu silaꞌa liaꞌahua lu castiya llene nú nzu nú nzeꞌta. 
\c 2  
\s1 Lunú uriꞌi Pablo eyeche Tesalónica 
\p  
\v 1 Bee saꞌa enu tucutse nzeli arquiaꞌahua Jesucristo, liꞌihua nediyaꞌhua nú né yela xleꞌeru chenu ubela biꞌyaru liꞌihua,  
\v 2 añinzuca nú nediyaꞌ nzeꞌcaꞌhua lunú xneca udiquichiꞌquiꞌ bee bene liꞌiru nu xitse uriꞌinubeei liꞌiru eyeche Filipos. Pero uriꞌi Diose elietsa luru nú utsu naaqui arquiꞌru udixiuleꞌeru bedichiaꞌ nzeꞌcaꞌnu luhua añinzuca nú nehuana ulleꞌcaru equie cuendaꞌ nú ulee bee bene luru.  
\v 3 Xne liꞌiru uniru luhua puro nú neli neca nu lá riꞌiru luhua tucu nú niarquiꞌtsiaru urre para nú zequienuru liꞌihua.  
\v 4 Sino que scua tucu nú ucañila Diose liꞌiru para nú dixiuleꞌeru bee bedichiaꞌ nzeꞌcaꞌnu lubee bene nu ulañiꞌnu nú acaru riꞌiru lunú riala nú riꞌiru, nu scua necane tucu nú udixiuleꞌeru lubee bene. La necane para nú yaꞌna nzeꞌcaru lubee bene sino ante lu Diose. Liꞌinu enu nuꞌlu xa nchiñi arquiꞌ bee bene.  
\v 5 Liꞌihua nediyaꞌhua nú leca xunga uzucuꞌ ayaru liꞌihua para nú zecahua liꞌiru, nu leꞌca lá laꞌnaru nú xneca modo riꞌiru ana dimiꞌhua, Diose nediyaꞌ nú neli necane scua.  
\v 6 Leꞌca la laꞌnaru nú zucuꞌ aya bee bene liꞌiru, nu la laꞌnaru nú zucuꞌ ayahua liꞌiru urre nú zucuꞌ aya stucu bee bene liꞌiru, añinzuca nú nuꞌ modo nú nibiyaꞌru luhua nú riꞌihua luru lunú niarquiꞌru, né riꞌiru scua luhua.  
\v 7 Liꞌihua nediyaꞌhua xa uriꞌi nzeꞌcaru luhua chenu ulluaꞌaru cuna liꞌihua, tucu nú rriꞌi tucu naa enu chiquiꞌ rriucu bee lliꞌñi.  
\v 8 Nu lunú chiquiꞌ seꞌcaru liꞌihua laneca nú Stichiaꞌ Diose tsia rixiuleꞌeru luhua sino que lecaxi riꞌi máse nú úti bee bene liꞌiru lunú chiquiꞌ seꞌcaru liꞌihua.  
\v 9 Nu liꞌihua bee saꞌru enu nzeli arquiꞌhua Jesucristo nediyaꞌhua nú chiquiꞌ ulaꞌnaru nú uriꞌiru riñaꞌ. Bichia si rulaꞌ uriꞌiru riñaꞌ para nú la quiꞌñia nú ariꞌihua elietsa luru diqui nú uzeteꞌru liꞌihua bee bedichiaꞌ nzeꞌcaꞌ Diose. 
\p  
\v 10 Nediyaꞌ nzeꞌcaꞌ Diose nú leꞌca liꞌihua nediyaꞌhua nú xneca uhuañiru ante luhua, nu lecali xi dula luꞌcuru, nu sin nú lecaxi taꞌquiyahua liꞌiru, liꞌihua bee enu nzeli arquiꞌ Jesucristo.  
\v 11 Leꞌca nediyaꞌhua xneca uniru bezeteꞌ luhua nu xneca uduꞌuru ana arquiꞌhua tucu nú rriꞌi paꞌ enduꞌ lu enduꞌ.  
\v 12 Nu unilaru luhua nú huañihua tucu nú riala huañi bee beneꞌ Diose, liꞌinu enu rixia liꞌihua para nú huañihua cuna liꞌinu liñibe elu rnibiyaꞌnu.  
\v 13 Enzeꞌe leꞌca liꞌiru la tsuxeru nú rdeteꞌru cheꞌtsa lu Diose nú chenu ubeneꞌhua stichiaꞌnu nú udixiuleꞌeru luhua uriꞌi casohuane lunú neli necane Stichiaꞌ Diose, nu lanecatsiae stichiaꞌ bee bene iliulabe. Nu bee bedichiaꞌ cuaꞌ neca nú rriꞌi riñaꞌ arquiꞌhua, liꞌihua bee enu nzeli arquiꞌ Jesucristo.  
\v 14 Nu liꞌihua bee saꞌru enu nzeli arquiaꞌahua Jesucristo. Tucutse ulleꞌcaꞌlaꞌahua tucu nú ulleꞌca bee beneꞌ Diose enu neca bee bene Judea enu nzeli arquiꞌ Jesucristo. Xne scua tucu nú nehuana uriꞌinu bee saꞌbeella bee bene Israel liꞌibeella leꞌca scua nehuana uriꞌinu bee bene lachihua liꞌihua.  
\v 15 Nu leꞌca bee bene Israel unguuti beei Jesuse enu rnibiyaꞌ luaꞌahua nu leꞌca unguuti beei bee profeta, nu leꞌca utiliacaꞌ beei liꞌiru nu la riꞌibeei tucu nú niarquiꞌ Diose, nu rlebeei lu ye bee bene.  
\v 16 Nu uca beei nú udixiuleꞌeru bedichiaꞌ nzeꞌcaꞌ Diose lubee bene enu la neca bee bene Israel nú xneca tsilaꞌa beella, scua leꞌca liꞌibeei rriꞌibeei nú rdalalá stula beei, nu nee chiquiꞌla nehuana seca beei. 
\s1 Niarquiꞌ Pablo nú chazecalla eyeche Tesalónica 
\p  
\v 17 Bee saꞌru enu nzeli arquiaꞌahua Jesucristo, liꞌiru utsaꞌnaru liꞌihua chiucu chuna bichia, añinzuca nú la lañiꞌru liꞌihua pero nchiucuꞌ arquiꞌru liꞌihua nu chiquiꞌ niarquiꞌru nú lañiꞌ zecaꞌru liꞌihua stucu bese.  
\v 18 Nu chiquiꞌ uniarquiꞌru nú nzelabiꞌyaru liꞌihua, liꞌá Pablo huaxi bese uniarquia nú nzelabiꞌya liꞌihua. Pero uca bezeꞌlu nú acae scua.  
\v 19 Pero niarquiꞌscaꞌru nzelabiꞌyaru liꞌihua xne nzucu luru nú liꞌihua necahua enu rriꞌi nú ñia nzu arquiꞌru, liꞌihua necahua riñaꞌ nú nelliñianuru nú riñayuru lu Jesucristo enu rnibiyaꞌ bichia chenu nzeꞌta zecanu.  
\v 20 Liꞌihua necahua enu rriꞌi nú ñia nzu arquiꞌru nu equie cuendaꞌhua nelliñiaru. 
\c 3  
\p  
\v 1 Enzeꞌe chenu ulluaꞌaru eyeche Atenas chiquiꞌ niarquiꞌru riꞌiru beyaꞌ xa nucuaꞌahua, chequie uriꞌiru elliebacuꞌ nú yaꞌna liꞌitsiaru zeꞌe.  
\v 2 Nu uxeꞌlaru saꞌahua Timoteo enu neca tucu saꞌahua enu rriꞌinuru riñaꞌ Diose nú rixiuleꞌeru bedichiaꞌ nzeꞌcaꞌ Jesucristo lubee bene para nú duꞌlla ana arquiꞌhua nú tsutaꞌ arquiꞌhua lunú nzelila arquiꞌhua Jesucristo.  
\v 3 Para nú niꞌtucuhua la lacaquiehua lunú nehuana secahua, liꞌihua nediyaꞌhua nú scua riala nú zecaꞌahua.  
\v 4 Chenu ulluaꞌanuru liꞌihua udixiuleꞌeru luhua nú nzeꞌta nú chiquiꞌ huaxi nú nehuana zecaꞌahua, nu liꞌihua nediyaꞌhua nú scua ungae.  
\v 5 Nu lunú chiquiꞌ niarquia lañiahua che uxeꞌla Timoteo luhua para nú riꞌá beyaꞌ xa nzenalahua lunú nzeli arquiꞌhua Jesucristo. Xne xiquia nú cá zequienu bezeꞌlu liꞌihua, nu che xleꞌe uriꞌiru lunú uriꞌiru. 
\p  
\v 6 Pero nee nú ubenchilaꞌ Timoteo nú ubeꞌtabiꞌyalla liꞌihua, udixiuleꞌella luru nú nza nzeꞌcahua lunú nzeli arquiꞌhua Jesucristo nu xneca secahua bee saꞌhua. Liꞌilla rnilla nú yeyeꞌe ñia nzu arquiꞌhua relluꞌcuꞌ arquiꞌhua liꞌiru nu chiquiꞌ niarquiꞌhua nú alaꞌ nú ulañiꞌlaꞌhua liꞌiru nú secahua, scua tucu nú leꞌca chiquiꞌ niarquiꞌru lañiꞌru liꞌihua.  
\v 7 Enzeꞌe, bee saꞌa enu nzeli arquiaꞌahua Jesucristo añinzuca nú yelu nú seꞌcaru nu chiquiꞌ nehuana seꞌcaru, pero chiquiꞌ ñia nzu arquiꞌru ubeneꞌru nú nza nzeꞌcahua lunú nzeli arquiꞌhua.  
\v 8 Nu nee másela xilaꞌ arquiꞌru equie nú ungabiyaꞌlaꞌru nú neli nzutaꞌ arquiꞌhua nzenalahua inziuꞌ Jesucristo.  
\v 9 Enzeꞌe hasta niꞌ la llelaꞌ arquiꞌru xa deteꞌru cheꞌtsa lu Diose equie cuendaꞌhua equie nú chiquiꞌ ñia nzu arquiꞌru equie cuendaꞌhua lu Paꞌahua Diose.  
\v 10 Bichia si rulaꞌ rnacuꞌru nu sequieru lu Diose para nú zelanu nú nzelabiꞌyaru liꞌihua, nu laꞌxuru niru luhua lunú rriꞌilá nú riꞌihua beyaꞌ lunú nzeli arquiꞌhua Jesucristo. 
\p  
\v 11 Diose Paꞌahua cuna Jesucristo enu rnibiyaꞌ riꞌinu elietsa luru nú aca nzelabiꞌyaru liꞌihua.  
\v 12 Nu Jesucristo riꞌinu elietsa luhua para nú másescaꞌlá nze zecahua bee saꞌhua nu zecahua ye beelá bee bene tucu nú seꞌcaru liꞌihua.  
\v 13 Jesucristo neca enu riꞌi elietsa luhua nú tsutaꞌ arquiꞌhua riñahua lu Diose sin dula nu lecaxi nahua, bichia chenu nzeꞌta zeca Jesucristo cuna ye bee beneꞌnu. 
\c 4  
\s1 Xa niarquiꞌ Diose nú huañi bee beneꞌnu 
\p  
\v 1 Nee bee saꞌa enu nzeli arquiaꞌahua Jesucristo nacuꞌru nu zequieru luhua equie cuendaꞌ Jesucristo enu rnibiyaꞌ, nu scua tucu nú nehuañihua nee tucu nú uzeteꞌlaru liꞌihua nú huañihua para nú riꞌihua tucu nú niarquiꞌ Diose, másela uyanalahua nú huañihua tucu nú niarquiꞌ Diose nú huañihua. 
\p  
\v 2 Xne liꞌihua nediyaꞌlaꞌhua ye nú unibiyaꞌ Jesucristo luru nú niru luhua nú riꞌihua.  
\v 3 Lunú niarquiꞌ Diose necane nú huañihua sin dula nu la riꞌihua eluhuexe.  
\v 4 Nu cada tucuhua uriꞌihua beyaꞌ xa huañi nzeꞌcahua cuna unaꞌahua urre niyuꞌhua tucu nú rnibiyaꞌ Diose cuna ulaꞌna.  
\v 5 La luꞌcuhua unaꞌhua para nú riꞌihua bee elliebacuꞌ nú nechá neca, nu niꞌ beenú necha neca riuꞌu ana arquiꞌhua rriꞌihua, xi rriꞌi bee bene enu la chulu Diose.  
\v 6 Leꞌca niꞌ tucuhua la yala nú detehua lunú xitse riꞌinuhua bee saꞌhua nu la zequienuhua saꞌhua xne Diose Paꞌahua deteꞌ castiya ye bee bene enu rriꞌi scua tucu nú unilaru nu udixiuleꞌelaru luhua.  
\v 7 Xne né bixia Diose liaꞌahua nu necaꞌahua bee beneꞌnu para nú nechá huañiaꞌahua, sino que para nú huañiaꞌahua nú leca xi naꞌahua lunu.  
\v 8 Enzeꞌe bee enu la riꞌi caso lunú unilaru luhua, la necane nu lu bee bene iliulabe la riꞌi casolla, sino que Diose neca enu la riꞌi casolla. Liꞌinu enu rliquiꞌ Espíritu Santo luaꞌahua. 
\p  
\v 9 Nu nee lunú xa riala zecahua bee saꞌhua la quiꞌñia nú nilá luhua lu cuendaꞌ nucuaꞌ xne leꞌca liꞌihua ungalahua equie cuendaꞌ Diose nú xneca riala nú zecahua beelá bee bene.  
\v 10 Nu nucuaꞌ neca lunú rriꞌihua cuna ye bee saꞌhua enu nzeli arquiꞌ Jesucristo enza Macedonia. Pero nacua nu zequiaa luhua nú másela zecaláhua bee saꞌahua.  
\v 11 Leꞌca ulaꞌnahua nú huañihua nú nzuxe arquiꞌhua, uzuꞌcuꞌluhua riñaꞌhua, tucu nú unilaru luhua nú riꞌihua riñaꞌ,  
\v 12 Para nú huañi nzeꞌcahua lu bee bene enu la chili arquiꞌ Jesucristo nu para nú leca xi zecalaꞌchaꞌhua. 
\s1 Chenu nzeꞌta zeca Jesucristo 
\p  
\v 13 Nee bee saꞌa enu nzeli arquiaꞌahua Jesucristo, la niarquiꞌru nú huañihua sin nú riꞌihua beyaꞌ equie cuendaꞌ bee bene enu unguti para nú la nehuana nzu arquiꞌhua xi rriꞌi bee bene enu la chili arquiꞌ Jesucristo.  
\v 14 Tucu nú nzeli arquiaꞌahua nú unguti Jesucristo nu uhuañi zecanu stucu bese, leꞌca nzeli arquiaꞌahua nu bee enu ungutila nu nzeli arquiꞌ Jesucristo, leꞌca riꞌi Diose nú huañi zeca beella equie cuendaꞌ Jesucristo. 
\p  
\v 15 Enzeꞌe tucu nú nediyaꞌlaꞌahua stichiaꞌ Jesucristo, liꞌiru niru luhua nú ye bee beneꞌ Jesucristo enu nehuañiscaꞌ chenu nzeꞌta zecanu stucu bese, la zuculu beella lu bee beneꞌnu enu ungutila.  
\v 16 Nu bichia zeꞌe yene chi enu rnibiyaꞌ nú xneca aca, nu yene chi ángele enu rnibiyaꞌ lu ye bee ángele, yene chi trompetaꞌ Diose. Nu enta Jesucristo enza liñibe nu rluti bee beneꞌnu enu ungutila huañi zeca beella stucu bese.  
\v 17 Chequie bee saꞌahua enu nehuañiscaꞌ bichia zeꞌe yeteꞌ saꞌahua cuna bee bene enu huañi zeca, nu chu nziaꞌahua enza liñibe leta xcabe elu llaꞌcaꞌahua Jesucristo scua nziaꞌahua huañiliaꞌahua cuna liꞌinu.  
\v 18 Enzeꞌe uduꞌhua ana arquiꞌ bee saꞌhua cuna bee bedichiaꞌ cuaꞌ. 
\c 5  
\p  
\v 1 Nee bee saꞌa enu nzeli arquiaꞌahua Jesucristo la quiꞌñia nú nia luhua equie cuendaꞌ nú xi bichia nu xunga aca bee nucuaꞌ.  
\v 2 Xne liꞌihua nediyaꞌ nzeꞌcaꞌhua nú xi neca chenu tuꞌnatsia rriña tucu huanaꞌ rulaꞌ, scua aca bichia chenu riña zeca Jesucristo stucu bese.  
\v 3 Chenu ni bee bene: “Nú yene nza nzeꞌcae, lecaxi aca”, che tuꞌnatsia riña nú nehuana zeca beella nu la tsilaꞌa beella lu nucuaꞌ, scua tucu nú tuꞌnatsia rriña nú rlachi xlaꞌcu unaꞌa enu ala enduꞌ.  
\v 4 Pero liꞌihua bee saꞌa enu nzeli arquiaꞌahua Jesucristo, la chahua inziu nú necabe nzu para nú la naꞌtse bichia chenu riña zeca Jesucristo liꞌihua, xi neca chenu rriña tucu huanaꞌ.  
\v 5 Xne yehua nzequielahua ellieꞌ Diose, yehua nzenalahua inziuꞌnu. La chenalaꞌahua inziu nú necabe nzu, nu leꞌca la chenalaꞌahua inziu nú nechá neca.  
\v 6 Enzeꞌe la yala nú huañiaꞌahua xi neca tucu bene enu raꞌtse, tucu nú rriꞌi beelá bee bene, sino que rquiꞌña nú huaꞌahua calaꞌ luaꞌahua nu riaꞌahua lunú sibiꞌ.  
\v 7 Bee bene enu nzenala inziu nú nechá neca, neca beella xi neca tucu bene enu raꞌtse, xi neca tucu bene enu xuchiꞌ, scua nzenala beella inziu nu necha neca.  
\v 8 Pero liaꞌahua enu nzenalalaꞌahua ellieꞌ Diose, ye bichia rquiꞌña nú huañiaꞌahua nu riaꞌahua lunú sibiꞌ. Biꞌyaꞌahua liaꞌahua lunú nzu teneli arquiaꞌahua lu elu secaꞌ Diose, nu tsutaꞌ arquiaꞌahua lunú nzuculuaꞌahua nú utsilaꞌala Diose liaꞌahua.  
\v 9 Xne né bixia Diose liaꞌahua para nú liquiꞌnu castiya luaꞌahua, sino que ubixianu liaꞌahua para nú tsilaꞌahua equie cuendaꞌ Jesucristo enu rnibiyaꞌ luaꞌahua.  
\v 10 Liꞌinu enu unguti equie cuendaꞌahua para nú mase nú nehuañiaꞌahua urre mase nú ungutilaꞌahua chenu nzeꞌta zecanu stucu bese, pero nziaꞌahua huañiaꞌahua cuna liꞌinu.  
\v 11 Enzeꞌe uduꞌhua ana arquiꞌ saꞌhua nu uriꞌihua elietsa lu saꞌhua para nú másela nzeriꞌiláhua beyaꞌ lunú rriꞌilahua. 
\s1 Uni Pablo lunú riꞌi bee bene enu nzeli arquiꞌ Jesucristo 
\p  
\v 12 Bee saꞌa enu nzeli arquiaꞌahua Jesucristo, nacuꞌru nu ziquieru luhua, nú luꞌcuhua ulaꞌna lu bee bene enu seteꞌ liꞌihua Stichiaꞌ Diose. Liꞌibeella enu seteꞌ liꞌihua nu rni bezeteꞌ luhua nú xneca chenalahua Jesucristo.  
\v 13 Uriꞌi nzeꞌcahua lubeella nu chiquiꞌ uzecahua liꞌibeella equie cuendaꞌ riñaꞌ nú rriꞌi beella. Nu uhuañi nzeꞌcahua cuna saꞌhua. 
\p  
\v 14 Leꞌca nacuꞌru luhua bee saꞌa enu nzeli arquiaꞌahua Jesucristo nú quiꞌyaꞌhua bee bene enu nebichiu nu uduꞌhua ana arquiꞌ bee bene enu rlacaquié lu Stichiaꞌ Diose nu uriꞌihua elietsa lu bee bene enu lascaꞌ tsutaꞌ arquiꞌ lu Stichiaꞌ Diose, nu utsuquie arquiꞌhua ye beella. 
\p  
\v 15 Ubiꞌyahua nú la riꞌihua nú nechá neca lu bee bene enu rriꞌi nú nechá neca luhua, mejora aca nzeꞌcahua lu bee saꞌhua cuna lu ye bee bene. 
\p  
\v 16 Ñia tsu arquiꞌhua diqui nú nehuañihua.  
\v 17 Nu yee yeꞌe naꞌcuhua lu Diose. \fig 1 Tesalonicenses 5:17|src="LB00271B.TIF" size="COL" ref="1 Tesalonicenses 5:17" \fig* 
\v 18 Deꞌtehua cheꞌtsa lu Diose equie cuendaꞌ yeene, xne scua riuꞌ arquiꞌ Diose nú riꞌihua, liꞌihua enu neca bee beneꞌ Jesucristo. 
\p  
\v 19 Uzelahua nú nibiyaꞌ Espíritu Santo luhua.  
\v 20 La huachuhua nu rni bee bene enu rdeteꞌ Stichiaꞌ Diose lubee bene.  
\v 21 Rluti uriꞌi nzeꞌcaxuhua beyaꞌ tunu neli ye lunú rni beella, nu riꞌihua lunú neca nzeꞌca.  
\v 22 Uchiuꞌu chuhua lu ye beenú nechá neca. 
\p  
\v 23 Nu Paꞌahua Diose enu rriꞌi nú nzuxe arquiaꞌahua riꞌinu elietsa luhua para nú lecali xi na arquiꞌhua ante lunu. Nu liꞌinu acanuꞌnu liꞌihua, cuna espírituꞌhua, cuna diqui lunú necahua para nú lecali xi nahua bichia chenu riña zeca Jesucristo enu rnibiyaꞌ luaꞌahua.  
\v 24 Nu Diose riꞌi scua, xne liꞌinu enu rixia liaꞌahua para nú necaꞌahua beneꞌnu, neli saꞌalunu stichiaꞌnu. 
\s1 Último bee bedichiaꞌ nú nequie lu carta quieꞌ 
\p  
\v 25 Bee saꞌa enu nzeli arquiaꞌahua Jesucristo, unaꞌcuꞌhua lu Diose equie cuendaꞌru.  
\v 26 Uriꞌihua saludar ye bee saꞌahua enu nzeli arquiꞌ Jesucristo nu uchiꞌchihua liꞌibeella.  
\v 27 Nu equie cuendaꞌ Jesucristo nibiyaꞌa luhua nu nia luhua, nú ulahua carta quieꞌ lu ye bee saꞌahua enu nzeli arquiꞌ Jesucristo.  
\v 28 Nu Jesucristo enu rnibiyaꞌ luaꞌahua riꞌinu nú cha nzeꞌca lu cuendaꞌhua.