\id 1JN I John 1 Zapotec Lachixio USFM output from Final pdf Aug 2010 
\h 1 Juan 
\toc1 Carta tucu nú uquieꞌe San Juan 
\toc2 1 Juan 
\toc3 1 Jn 
\mt1 Carta tucu nú uquieꞌe San Juan 
\c 1  
\s1 Bedichiaꞌ nú rliquiꞌ elunehuañi 
\p  
\v 1 Carta quieꞌ neca para nú ixiuleꞌa luhua equie cuendaꞌ tucu bene enu nzula hasta chenu lascaꞌ quixie iliulabe, ubeneꞌlaꞌru lunú rninu nu ulañiꞌlaꞌru liꞌinu, ulañiꞌ nzeꞌcaru liꞌinu nu utiꞌru yaru liꞌinu. Liꞌinu necanu enu rliquiꞌ elunehuañi,  
\v 2 nu ubeꞌtalanu lu iliulabe. Ulañiꞌlaꞌru liꞌinu nu liꞌiru necaru testigo, enzeꞌe rixiuleꞌeru luhua equie cuendaꞌ liꞌinu enu rliquiꞌ elunehuañi nú leca xunga laxu. Liꞌinu necanu enu nzula cuna Diose liñibe nu ubeꞌtanu lu iliulabe.  
\v 3 Enzeꞌe lunú ulañiꞌru, cuna lunú ubeneꞌlaꞌru, rixiuleꞌeru luhua para nú aca tucutsiahua cuna liꞌiru, tucu nú neca tucutsiaru cuna Diose Paꞌahua cuna Lliꞌñinu Jesucristo.  
\v 4 Rixiuleꞌeru bedichiaꞌ cuaꞌ luhua equie cuendaꞌ carta quieꞌ para nú chiquiꞌ ñia tsu arquiꞌhua tucu nú ñia nzu arquiꞌru. 
\s1 Diose neca ellieꞌe 
\p  
\v 5 Ninguieꞌ neca bedichiaꞌ nú uzeteꞌ Jesucristo liꞌiru, nu nee rixiuleꞌeru nucuaꞌ luhua, nú Diose neca ellieꞌe nu la luꞌcunu niꞌ tucu dula.  
\v 6 Tunu rniaꞌahua nú neca tucutsiaꞌahua cuna Diose, nu nzequieꞌscaꞌahua inziu nú necha neca, scua necaꞌahua enu niquichiaꞌ sia lunú rniaꞌahua urre lunú rriaꞌahua.  
\v 7 Pero tunu nzequieꞌahua ellieꞌ Diose, tucu nu necanu enu la luꞌcu dula, che neca tucutsiaꞌahua cuna bee saꞌahua, nu reneꞌ Lliꞌñinu Jesucristo quieenu liaꞌahua lu ye dula nú rluꞌcuaꞌahua. 
\p  
\v 8 Tunu rniaꞌahua nú la luꞌcuaꞌahua dula sequienuaꞌahua leꞌcatsia liaꞌahua, nu la niaꞌahua lunú neli neca.  
\v 9 Pero tunu xucuꞌ dulaꞌahua stulaꞌahua lu Diose, nediyaꞌ nzeꞌcaꞌahua nú rriꞌinu lunú rninu, liꞌinu nzeꞌcanu para nú riꞌinu perdona liaꞌahua lu stulaꞌahua nu quieenu liaꞌahua lu ye beenú necha neca uriaꞌahua.  
\v 10 Tunu rniaꞌahua nú la riaꞌahua dula, nucuaꞌ rni nú rniaꞌahua nu neca Diose enu niquichiaꞌ nu rluꞌcuaꞌahua dula nu la zucuaꞌahua nú rni stichiaꞌnu. 
\c 2  
\s1 Jesucristo neca enu rni lu cuendaꞌhua lu Diose 
\p  
\v 1 Bee lliꞌñia, rquieꞌa bee bedichiaꞌ quieꞌ luhua para nú la riꞌihua dula. Pero tunu nuꞌhua enu rriꞌi dula, rluꞌcuaꞌahua tucu enu rni lu cuendaꞌahua lu Diose, nu liꞌinu necanu Jesucristo enu leca xunga uriꞌi dula.  
\v 2 Equie nú unguti Jesucristo, nuꞌ nú rriꞌi Diose perdona stulaꞌahua. Nu la acane equie cuendaꞌ stulaꞌtsiaꞌahua, leꞌca necane lu cuendaꞌ stula ye bee bene iliulabe. 
\p  
\v 3 Liaꞌahua nediyaꞌ nzeꞌcaꞌahua tunu sucuaꞌahua Stichiaꞌ Diose, che nzu arquiaꞌahua nú itá nuluꞌlaꞌahua liꞌinu.  
\v 4 Pero tunu nuꞌ enu rni: “Liꞌá nuꞌlua Diose”, nu la zucuꞌlla stichiaꞌnu, necalla enu niquichiaꞌ, xne la chequieella lunú neli neca.  
\v 5 Pero enu sucuꞌ Stichiaꞌ Diose diquinuꞌ arquiꞌ neli secalla liꞌinu. Scua nediyaꞌahua nú necaꞌahua beneꞌnu.  
\v 6 Tatse bene enu rni nú neca beneꞌ Diose, rquiꞌña nú huañilla tucu nú uhuañi Jesucristo. 
\s1 Mandamiento nú necuqui neca 
\p  
\v 7 Bee saꞌa enu nzeli arquiaꞌahua Jesucristo, bee bedichiaꞌ nú rnia luhua nee la necuqui necane, leꞌca liꞌi bedichiaꞌ quieꞌ neca stichiaꞌ Jesucristo nú ubeneꞌlaꞌhua hasta huaꞌtu. Leꞌca liꞌi bedichiaꞌ quieꞌ neca nú rnia luhua nee.  
\v 8 Pero rnia bee bedichiaꞌ quieꞌ luhua xi neca tucu nú necuqui neca, xne sianu necane equie cuendaꞌ Jesucristo urre necane equie cuendaꞌ liꞌihua, rlubeꞌ nucuaꞌ nu neli necane xne nze tsanaꞌ arquiꞌlahua inziu nú necha neca nu nzequiehua lunú neca nzeꞌca. 
\p  
\v 9 Tunu nuꞌ enu rni nú nzequieella inziuꞌ Diose nu rana arquiꞌlla bee saꞌlla, liꞌilla nzequieescaꞌlla inziu nú necha neca.  
\v 10 Enu seca bee saꞌ liꞌi silla neli nzequieella inziuꞌ Diose, scua leca modo nú riꞌi dula ana lulla.  
\v 11 Pero bene enu rana arquiꞌ bee saꞌ liꞌilla nehuañilla lunú necha neca, nu nzequiella nú necha neca cuaꞌ, sin nú riꞌilla beyaꞌ cá enza nzalla, xne utsaꞌna nú necha neca cuaꞌ liꞌilla leta rulaꞌ xi neca tucu bene enu la biꞌya. 
\pi1  
\v 12 Rquieꞌa carta quieꞌ luhua bee lliꞌñia, xne unga perdonala stulahua equie nú rluꞌcuhua ulaꞌna lu Jesucristo. 
\b  
\pi1  
\v 13 Rquieꞌa carta quieꞌ luhua liꞌihua bee uzana, xne nuꞌlulahua Jesucristo enu nzula hasta chenu lascaꞌ quixie iliulabe. Leꞌca rquieꞌa carta quieꞌ luhua liꞌihua bee bene enu nereꞌne xne uriꞌihua ana nú la riaꞌhua nú necha neca nzeꞌta lu bezeꞌlu. 
\pi1 Rquieꞌa bedichiaꞌquie luhua liꞌihua bee enduꞌ, xne nuꞌlulahua Paꞌahua Diose. 
\pi1  
\v 14 Rquieꞌa bedichiaꞌ quieꞌ luhua liꞌihua bee uzana, xne nuꞌlulahua Jesucristo enu nzula hasta chenu lascaꞌ quixie iliulabe, nu leꞌca rquieꞌa bedichiaꞌ quieꞌ luhua liꞌihua bee enu nereꞌneꞌ, xne rduꞌhua ana arquiꞌhua nu neli nzequieehua Stichiaꞌ Diose, nu uriꞌihua ana nú la riaꞌhua nú necha neca nzeꞌta lu bezeꞌlu. 
\p  
\v 15 La leꞌhua nú riꞌihua lunú necha neca rriꞌi bee bene lu iliulabe quieꞌ niꞌbee nú nuꞌ lu iliulabe. Tunu nuꞌ enu máse seca lunú nuꞌ lu iliulabe, nu la zeca nzeꞌe Paꞌahua Diose.  
\v 16 Xne niꞌ tucu nú necha neca nuꞌ lu iliulabe quieꞌ la yeꞌta nucuaꞌ lu Diose, nzeꞌta tsia nucuaꞌ leꞌca lubee bene iliulabe. Nu ninguieꞌ neca lunú necha neca rriꞌi bee bene iliulabe. Riꞌilla tucu nú necatsia elliebacuꞌlla, nu rleꞌlla nú luꞌculla ye lunú rlañiꞌlla cuna nú reca nelliñalla lunú rluꞌculla.  
\v 17 Pero iliulabe tucu bichia laxue cuna ye beenú necha neca rriꞌi bee bene. Pero enu nehuañi tucu nú niarquiꞌ Diose, luꞌculla elunehuañi nú leca xunga laxu cuna liꞌinu. 
\s1 Lunú neli neca cuna lunú la neli neca 
\p  
\v 18 Bee lliꞌñia, liꞌá nia luhua nú lacaxeaꞌ nzu nú laxu iliulabe. Xne ubeneꞌlaꞌhua nú rquiꞌña nú riña tucu enu rriꞌi condra Cristo, nu ni nzeꞌe lubee bene nú neca nzeꞌe Cristo, nu nee nucuaꞌala huaxi enu rriꞌi condra Cristo, enzeꞌe nediyaꞌahua nú lacaxeaꞌ nú laxu iliulabe.  
\v 19 Bee enu rriꞌi condra Jesucristo, uchiuꞌu beei leꞌca leta bee saꞌahua enu nzeli arquiaꞌahua Jesucristo, pero laca beei mero bee saꞌahua, xne tunu neca beei bee saꞌahua ayaꞌna beei leta bee saꞌahua enu nzeli arquiaꞌahua Jesucristo. Pero unga nucuaꞌ para nú lañiꞌ bee bene nú laca beei bene letaꞌahua. 
\p  
\v 20 Uliquiꞌla Jesucristo Espíritu Santo luhua, nu equie cuendaꞌ Espíritu Santo yehua nediyaꞌhua lunú neli neca.  
\v 21 Rquieꞌa bee bedichiaꞌ quieꞌ luhua, nu la necane lunú la nediyaꞌhua ta lunú neli neca, sino que lunú nediyaꞌlaꞌhuane, xne liꞌihua nediyaꞌhua nú la yeꞌta niꞌ tucu bee eluquichiaꞌ lunú neli neca. 
\p  
\v 22 Nee, ¿ti neca bene enu niquichiaꞌ? Bene zeꞌe neca enu rni nú la neca Jesuse liꞌi Cristo. Nucuaꞌ rriꞌi condra Cristo xne la chili arquiꞌ nucuaꞌ Paꞌahua Diose, nu niꞌ Lliꞌñinu Jesucristo.  
\v 23 Xne tatse bene enu rni nú la neca Jesucristo Lliꞌñi Diose, liꞌilla la chululla Diose Paꞌahua. Pero enu rni nú neca Jesucristo Lliꞌñi Diose, liꞌisilla nuꞌlulla Paꞌahua Diose. 
\p  
\v 24 Enzeꞌe la tsanaꞌ arquiꞌhua bedichiaꞌ nú ubeneꞌhua desde nú uquixiehua nú uyali arquiꞌhua Jesucristo, nu tunu nzequiehua bedichiaꞌ nú ubeneꞌhua desde chenu uquixie nú uyali arquiꞌhuane, che si nzequiehua nú nehuañihua cuna Paꞌahua Diose cuna Lliꞌñinu Jesucristo.  
\v 25 Nu ninguieꞌ neca nú ucuaqui uꞌna Jesucristo, nú liquiꞌnu luaꞌahua elunehuañi nú leca xunga laxu lu Diose. 
\p  
\v 26 Rquieꞌa bee bedichiaꞌ quieꞌ luhua, equie cuendaꞌ bee bene enu rcuaꞌna nú zequienu liꞌihua.  
\v 27 Pero liꞌihua nehuañihua cuna Espíritu Santo nú uliquiꞌ Jesucristo luhua, nu la quiꞌña nú nuꞌ ti zeteꞌ liꞌihua, xne leꞌca liꞌi Espíritu Santo neca enu zeteꞌ yeene liꞌihua, nu puro nú neli zeteꞌnu nu la zeteꞌnu eluquichiaꞌ. Enzeꞌe uhuañihua tucu nú rnibiyaꞌ Espíritu Santo para nú chequiehua nú neca tucutsiahua cuna Jesucristo. 
\p  
\v 28 Nee bee lliꞌñia, liꞌá nia luhua nú uquia quieehua inziuꞌ Jesucristo, para nú la lliquiaꞌahua chenu riñanu, nu niꞌ nú tuaꞌahua liꞌinu.  
\v 29 Liꞌihua nediyaꞌhua nú rriꞌi Diose tucu nú neli neca, nu rquiꞌña nú riꞌihua beyaꞌ nú ye bee bene enu rriꞌi tucu nú neli neca, liꞌibeella neca beella Lliꞌñi Diose. 
\c 3  
\s1 Lu cuendaꞌ bee bene enu neca Lliꞌñi Diose 
\p  
\v 1 Ubiꞌyacuruhua chiquiꞌ llene neca nú seca Diose Paꞌahua liaꞌahua. Enzeꞌe nuꞌ modo nú chiuꞌuleaꞌahua lliꞌñinu, nu necaꞌahua lliꞌñinu. Pero bee bene enu la chequie inziuꞌ Diose la chulu beei liaꞌahua xi neca Lliꞌñi Diose, xne la chulu beei liꞌinu.  
\v 2 Bee saꞌa enu nzeli arquiaꞌahua Jesucristo enu chiquiꞌ seꞌca, liꞌá nia luhua nú necalaꞌahua Lliꞌñi Diose. Añinzuca nú la riaꞌahua beyaꞌ xa acaꞌahua chenu nzeꞌta Jesucristo stucu bese, pero nzutaꞌ arquiaꞌahua nú acaꞌahua tucu nú necanu xne bichia zeꞌe neli lañiaꞌahua liꞌinu tucu nú rnaanu.  
\v 3 Nu ye bee bene enu nzeli arquiꞌ nú scua acane, sucuꞌlu beella nú huañi beella nú la luꞌcu beella dula, tucu nú necanu enu la luꞌcu dula. 
\p  
\v 4 Pero ye bee bene enu la riꞌi tucu nú rnibiyaꞌ Diose liꞌibeei rriꞌibeei dula, xne dula neca tunu la riꞌi bee bene tucu nú rnibiyaꞌ Diose.  
\v 5 Liꞌihua nediyaꞌhua nú ubeꞌta Jesucristo lu iliulabe para nú huanu dula arquiꞌ bee bene, nu la luꞌcunu niꞌ tucu dula.  
\v 6 Enzeꞌe bee bene enu neca tucutsia cuna Jesucristo, rlaꞌna beella nú la riꞌi beella dula. Pero ye bee bene enu siempre rriꞌi dula, la riꞌibeei beyaꞌ ti necanu nu la chulu beei liꞌinu.  
\v 7 Bee lliꞌñia liꞌá nia luhua nú la zelahua nú titse zequienu liꞌihua, xne enu rriꞌi lunú niarquiꞌ Diose la nzu elliebacuꞌlla nú riꞌilla dula, tucu nú neca Jesucristo enu la luꞌcu dula.  
\v 8 Pero bene enu siempre rriꞌi dula neca nzeꞌe beneꞌ bezeꞌlu, xne tucutsia bezeꞌlu neca enu rriꞌi dula hasta chenu uquixie iliulabe, nu Jesucristo Lliꞌñi Diose ubeꞌta lu iliulabe para nu uriꞌinu ana lunú rriꞌi bezeꞌlu. 
\p  
\v 9 Enzeꞌe niꞌ tucu bene enu nzequie inziuꞌ Diose la zucuꞌlulla nú riꞌilla dula, xne nehuañila Espírituꞌ Diose cuna liꞌilla, nu la yalaꞌ nú riꞌilla dula xne necalalla Lliꞌñi Diose.  
\v 10 Chee rlubeꞌ nú ti neca bee Lliꞌñi Diose nu ti neca bee lliꞌñi bezeꞌlu, xne tatse enu la riꞌi tucu nú niarquiꞌ Diose urre la zecalla bee saꞌlla la aca nzeꞌe Lliꞌñi Diose. 
\s1 Rquiꞌña nú zeca bee bene saꞌlla 
\p  
\v 11 Nu liꞌihua desde chenu uyalí arquiꞌhua Jesucristo, ubeneꞌlaꞌhua nú rquiꞌña nú zecaꞌahua bee saꞌahua.  
\v 12 La yala nú riaꞌahua tucu nú uriꞌi Caín, uzelai nú unibiyaꞌ bezeꞌlu lui nú unguuti bichi. Uriꞌi scua xne uriꞌitsiai puro nú necha neca, nu bichii uriꞌi nú neca nzeꞌca. 
\p  
\v 13 Enzeꞌe bee saꞌa enu nzeli arquiaꞌahua Jesucristo, la chenu arquiꞌhua tunu rana arquiꞌ bee bene iliulabe liꞌihua equie nú nzequieehua inziuꞌ Diose.  
\v 14 Liaꞌahua nediyaꞌahua nú la necaꞌahua xi neca bene enu unguti para Diose xne rluculaꞌahua elunehuañi lunu, equie nú seꞌcaꞌahua bee saꞌahua. Pero bene enu la zeca beesaꞌ liꞌilla necascaꞌlla xi neca bene enu unguti lu Diose.  
\v 15 Ye bee bene enu rana arquiꞌ bee saꞌ neca nzeꞌe xi neca tucu enu ruuti bene, nu liꞌihua nediyaꞌhua nú enu ruuti bene liꞌilla la luꞌculla elunehuañi nú leca xunga laxu lu Diose.  
\v 16 Liaꞌahua nediyaꞌahua nú seca Jesucristo liaꞌahua xne ungutinu equie cuendaꞌahua; nee leꞌca scua equie nú seꞌcaꞌahua bee saꞌahua lecaxi riꞌi mase atiaꞌahua equie cuendaꞌ bee saꞌahua.  
\v 17 Pero tunu nuꞌ tatucuhua enu neca xene lu iliulabe quieꞌ nu lañiꞌlla tucu saꞌlla enu seca elitsi, nu la riꞌilla elietsa lu bene zeꞌe, ¿xa modo nilla nú rluꞌculla elusecaꞌ Diose che?  
\v 18 Enzeꞌe bee lliꞌñia, liꞌá nia luhua nú la niꞌtsiahua nu rniaꞌahua nú seꞌcaꞌahua bee saꞌahua, rquiꞌña nú lubeaꞌahua nú seꞌcaꞌahua bee saꞌahua cuna lunú rriaꞌahua. 
\s1 Rquiꞌña nú nzu arquiaꞌahua lu Diose 
\p  
\v 19 Xne tunu seꞌcaꞌahua bee saꞌahua che riaꞌahua beyaꞌ nú sucuaꞌahua nú rni Stichiaꞌ Diose, nu nzutaꞌ arquiaꞌahua nú rriaꞌahua tucu nú rialane lunu.  
\v 20 Pero tunu rriꞌilaꞌahua tucu nu rialane scua nu siꞌscaꞌahua nu lascaꞌ riaꞌahua tucu nú neli neca, rquiꞌña nú riaꞌahua beyaꞌ nú llenela neca Diose luaꞌahua, nu liꞌinu nediyaꞌnu yeene.  
\v 21 Enzeꞌe tucu nú seꞌca liꞌihua, liꞌá nia luhua tunu siꞌahua nú rriaꞌahua nu neca nzeꞌca, che nzu taꞌ arquiaꞌahua nú rriaꞌahua tucu nú neli neca lu Diose.  
\v 22 Scua liquiꞌnu ye nú rnacuaꞌahua lunu, equie nú sucuaꞌahua nu rriaꞌahua lunú rnibiyaꞌnu cuna nú rriaꞌahua lunú riuꞌ arquiꞌnu.  
\v 23 Nu lunú rnibiyaꞌ Diose nú riaꞌahua necane nú chili arquiaꞌahua Jesucristo Lliꞌñi Diose, nu zecaꞌahua bee saꞌahua tucu nú unibiyaꞌnu nú riaꞌahua.  
\v 24 Bee bene enu sucuꞌ tucu nú rnibiyaꞌ Diose nu rriꞌi beellae, liꞌibeella nehuañi beella cuna Diose nu liꞌinu nehuañinu cuna liꞌibeella. Nu nediyaꞌahua nú nehuañinu cuna liaꞌahua, equie cuendaꞌ Espíritu Santo nú uliquiꞌlanu luaꞌahua. 
\c 4  
\s1 Equie cuendaꞌ Espírituꞌ Diose cuna espíritu enu rriꞌi condra Jesucristo 
\p  
\v 1 Bee saꞌa enu chiquiꞌ seꞌca, liꞌá nia luhua nú la chili arquiꞌhua titse bee bene enu rni nú rni Stichiaꞌ Diose, rluti uriꞌinzeꞌcahua beyaꞌ tunu neli nú rnilla Stichiaꞌ Diose urre lia rnilla, xne lu iliulabe enzee huaxi bee bene enu niquichiaꞌ, nu rnibeei nú rnibeei Stichiaꞌ Diose.  
\v 2 Nee, para nú riꞌihua beyaꞌ ta enu neli rni Stichiaꞌ Diose: neca beella enu neli nzeli arquiꞌ nú ubeꞌta Jesucristo lu iliulabe xi neca tucu bene, enu nzeli arquiꞌ scua nzu Espíritu Santoꞌ Diose cuna liꞌilla.  
\v 3 Pero bee bene enu la chili arquiꞌ nú neca Jesucristo Lliꞌñi Diose enu ubeꞌta lu iliulabe, la nzu Espíritu Santoꞌ Diose cuna liꞌibeei, nu liꞌibeei neca beei enu rlee lu Jesucristo. Liꞌihua ubeneꞌhua nú rquiꞌña nu nzeꞌta tucu enu rlee lu Jesucristo lu iliulabe quieꞌ, nu desde nee nucuaꞌala huaxi enu rana arquiꞌ Jesucristo lu iliulabe quieꞌ. 
\p  
\v 4 Pero liꞌihua bee lliꞌñia, necalahua Lliꞌñi Diose, nu bee enu rana arquiꞌ Jesucristo la riaꞌ bee nzeꞌe ana luhua, xne máse llene neca lunú rnibiyaꞌ liꞌinu enu nzu cuna liꞌihua luquela nú rnibiyaꞌ bee enu nchiñi lu inziu nú necha neca.  
\v 5 Bee enu rlee lu Jesucristo rriꞌitsia beei elliebacuꞌ lunú nuꞌ lu iliulabe, nu puro beenú nuꞌ lu iliulabe rnibeei nu bee enu la chili arquiꞌ Jesucristo rriꞌi caso lunú rnibeei.  
\v 6 Pero liaꞌahua necalaꞌahua bee beneꞌ Diose. Nu bee bene enu nuꞌlu Diose rieneꞌ lunú rniaꞌahua; nu bee bene enu la chulu Diose ni temeꞌ la riꞌibeei caso lunú rniaꞌahua. Scua rriaꞌahua beyaꞌ nú ta enu nehuañi cuna Espíritu Santo nu seteꞌ nú neli neca, cuna enu nehuañi cuna espíritu nú seteꞌ puro lunú la neli neca. 
\s1 Diose seca bee bene 
\p  
\v 7 Bee saꞌa enu chiquiꞌ seꞌca, rquiꞌña nú zecaꞌahua bee saꞌahua, xne eluseca quieꞌ nzeꞌta lu Diose. Ye bee bene enu seca bee saꞌ liꞌibeella neca beella Lliꞌñi Diose nu nuꞌlu beella liꞌinu.  
\v 8 Nu bee bene enu la zeca bee saꞌ la chululla Diose, xne lu Diose nzeꞌta eluseca.  
\v 9 Ulubeꞌ Diose nú secanu liaꞌahua, enzeꞌe añinzuca nú tucutsia Lliꞌñinu Jesucristo pero uxeꞌlanu Lliꞌñinu lu iliulabe para nú luꞌcuaꞌahua elunehuañi lunu equie cuendaꞌ Lliꞌñinu.  
\v 10 Diose seca liaꞌahua: nu la necane nú rlutiaꞌahua seꞌcaꞌahua Diose, liꞌinu rlutinu secanu liaꞌahua enzeꞌe uxeꞌlanu Lliꞌñinu Jesucristo para nú ungutinu equie cuendaꞌ stulaꞌahua, nu scua nuꞌ nú rriꞌi Diose perdona liaꞌahua. 
\p  
\v 11 Bee saꞌa enu chiquiꞌ seꞌca, liꞌá nia luhua tucu nú seca Diose liaꞌahua, leꞌca scua rquiꞌña nú zecaꞌahua bee saꞌahua.  
\v 12 Añinzuca nú lecati lañiꞌ Diose, pero tunu seꞌcaꞌahua bee saꞌahua rlubeꞌ nucuaꞌ nú nehuañiaꞌahua cuna Diose, nu neli seꞌcaꞌahua liꞌinu.  
\v 13 Liaꞌahua nediyaꞌahua nú nehuañiaꞌahua cuna Diose nu liꞌinu nzunu cuna liaꞌahua, xne uliquiꞌlanu Espíritu Santoꞌnu luaꞌahua.  
\v 14 Nu liꞌiru bee apóstol ulañiꞌru Jesucristo Lliꞌñi Diose, nu rixiuleꞌeru luhua nú Diose Paꞌahua uxeꞌlanu Lliꞌñinu para nú tsilaꞌanu ye bee bene.  
\v 15 Tatse bee enu rni nu nzeli arquiꞌ nú Jesucristo neca Lliꞌñi Diose nehuañilla cuna Diose, nu nehuañinu cuna liꞌilla. 
\p  
\v 16 Liaꞌahua rriaꞌahua beyaꞌ nu nzeli arquiaꞌahua nú seca Diose liaꞌahua. Nu equie cuendaꞌ liꞌinu nzeꞌta nú seꞌcaꞌahua bee saꞌahua nu enu nehuañi cuna eluseca cuaꞌ nehuañilla cuna Diose, nu nehuañinu cuna liꞌilla.  
\v 17 Tunu neli nú nediyaꞌahua nú seca Diose liaꞌahua lu iliulabe quieꞌ, la luꞌcuaꞌahua niꞌ tucu nú lliquiaꞌahua para bichia chenu hualunue lu cuendaꞌ bee bene equie nú neca tucutsiaꞌahua cuna Diose, tucu nú neca tucutsia Jesucristo cuna Diose.  
\v 18 Elu nuꞌ elusecaꞌ Diose lecaꞌ nú lliqui bee bene. Xne enu neli nzequiee elusecaꞌ Diose lecaxi lliquilla, pero enu la chequiee eluseca cuaꞌ xiquilla, xne rriꞌitsialla elliebacuꞌ xi castiya riala nú zecalla. Enzeꞌe tunu nuꞌ enu xiqui rlubeꞌ nucuaꞌ nu neli la chequiella elusecaꞌ Diose.  
\v 19 Liaꞌahua seꞌcaꞌahua Diose xne liꞌinu rlutinu secanu liaꞌahua.  
\v 20 Tunu nuꞌ bene enu rni: “Nu secalla Diose”, nu rana arquiꞌlla bee saꞌlla, necatsialla tucu enu niquichiaꞌ. Xne tunu la zecalla bee saꞌlla enu rlañiꞌlla, ¿xa modo zecalla Diose enu la lañiꞌlla?  
\v 21 Leꞌca liꞌi Jesucristo uninu: nú enu seca Diose rquiꞌña nú leꞌca zecalla bee saꞌlla. 
\c 5  
\s1 Equie nú nzu teneli arquiaꞌahua lu Jesucristo sanaꞌ arquiaꞌahua lunú necha neca 
\p  
\v 1 Ye bee bene enu nzeli arquiꞌ nú neca Jesuse Cristo enu uxeꞌla Diose, neca beella lliꞌñi Diose; nu bee bene enu seca Diose Paꞌahua leꞌca seca beella bee lliꞌñinu.  
\v 2 Chenu seꞌcaꞌahua Diose nu rriaꞌahua lunú rnibiyaꞌnu nú riaꞌahua, che rriaꞌahua beyaꞌ nú seꞌcaꞌahua bee lliꞌñinu.  
\v 3 Equie nú seca bene Diose neca nú rriꞌi bene tucu nú rnibiyaꞌnu; nu laca neriñaꞌ nu riꞌi bene tucu nú rnibiyaꞌnu.  
\v 4 Xne ye bee bene enu neca Lliꞌñi Diose nuꞌ modo nú riꞌi beella ana lu beenú necha neca nuꞌ lu iliulabe quieꞌ. Nu equie nú nzeli arquiaꞌahua Jesuse enu neca Cristo scua rriaꞌahua ana nú la riaꞌahua beenú necha neca nuꞌ lu iliulabe quieꞌ.  
\v 5 Xne enu nzelítsia arquiꞌ nú neca Jesuse Lliꞌñi Diose, liꞌilla nuꞌ modo nú rriꞌilla ana lubee nú necha neca nuꞌ lu iliulabe quieꞌ. 
\s1 Lunú uni Diose equie cuendaꞌ Jesucristo 
\p  
\v 6 Nu Jesucristo ubeꞌtanu lu iliulabe nu urinzanu cuna nú uriꞌchia reneꞌnu; lá rinza tsianu leꞌca uriꞌchia reneꞌnu lu cruse. Nu leꞌca liꞌi Espíritu Santo neca testigo lu cuendaꞌ bee nucuaꞌ, nu liꞌinu rninu puro nú neli neca.  
\v 7 Xne nuꞌ chuna enu neca testigo liñibe: Diose Paꞌahua, Jesucristo, nu Espíritu Santo; nu lu yuna beenu neca tucutsia Diose.  
\v 8 Nu leꞌca nuꞌ chuna testigo lu yuu: Espíritu Santo, cuna nú urinza Jesucristo, cuna nú uriꞌchia reneꞌnu lu cruse; nu lu yunanu neca tucu necatse beenu.  
\v 9 Nee tunu nzeli arquiaꞌahua lunú rni bee bene luaꞌahua; máse rquiꞌña nú chili arquiaꞌahua lunú rni Diose equie cuendaꞌ Lliꞌñinu Jesucristo, xne másela seca stichiaꞌnu.  
\v 10 Bene enu nzeli arquiꞌ Jesucristo Lliꞌñi Diose, liꞌisilla nzeli arquiꞌlla lunú uni Diose lu cuendaꞌnu, pero bene enu la chili arquiꞌ Diose, rni stichiaꞌ nzeꞌe nú neca Diose enu niquichiaꞌ xne la chili arquiꞌ nzeꞌe lunú uni Diose lu cuendaꞌ Lliꞌñinu Jesucristo.  
\v 11 Nu lunú uni Diose neca nú uliquiꞌlanu elunehuañi nú leca xunga laxu, nu elunehuañi cuaꞌ nzeꞌta equie cuendaꞌ Lliꞌñinu Jesucristo.  
\v 12 Bene enu neca tucutsia cuna Jesucristo Lliꞌñi Diose, liꞌisilla rluꞌculla elunehuañi nú leca xunga laxu lu Diose; pero bene enu la neca tucutsia cuna liꞌinu, la luꞌcu nzeꞌe elunehuañi cuaꞌ. 
\s1 Último bedichiaꞌ nú rni lu carta quieꞌ 
\p  
\v 13 Rquieꞌa ye bee nucuaꞌ luhua liꞌihua enu nzeli arquiꞌ Jesucristo Lliꞌñi Diose, para nú riꞌihua beyaꞌ nú rluꞌcuhua elunehuañi nú leca xunga laxu lu Diose. 
\p  
\v 14 Nzu arquiaꞌahua nú rieneꞌ Diose tunu nacuaꞌahua lunu tucu nú riuꞌ arquiꞌnu.  
\v 15 Nu lunú nediyaꞌahua nu rriꞌi Diose caso stichiaꞌahua chenu nuꞌ nú rnacuaꞌahua lunu, leꞌca nzutaꞌ arquiaꞌahua nu liꞌinu liquiꞌnu lunú unacuaꞌahua lunu. 
\p  
\v 16 Tunu nuꞌ tátucuaꞌahua enu nediyaꞌ nú rriꞌi tucuaꞌahua dula nu la yala nú atilla, rquiꞌña nú nacuꞌhua lu Diose equie cuendaꞌlla, nu scua deteꞌ Diose elunehuañi nú leca xunga laxu lulla tunu la riꞌilla dula nú riala nú atilla. Xne nuꞌ dula nú riala nú ati bene, nu la nia luhua nú nacuꞌhua lu Diose equie cundaꞌ bene enu rriꞌi dula cuaꞌ.  
\v 17 Ye beenú necha neca, neca dula, pero nuꞌ dula nú la yala nú ati bene. 
\p  
\v 18 Liaꞌahua nediyaꞌahua nu bee bene enu neca Lliꞌñi Diose, la chequiaꞌ beella nú rriꞌi beella dula; xne Jesucristo lliꞌñi Diose neca enu rriucu liꞌibeella, nu la nibiyaꞌ bezeꞌlu lubeella. 
\p  
\v 19 Nediyaꞌahua nú necaꞌahua beneꞌ Diose, pero beelá bee bene iliulabe enu la neca bee beneꞌ Diose bezeꞌlu neca enu rnibiyaꞌ lubeei. 
\p  
\v 20 Nu leꞌca nediyaꞌahua nú Jesucristo neca Lliꞌñi Diose, nu ubeꞌtalanu lu iliulabe nu uxaꞌlanu lunú neca elliebacuaꞌahua para nú chuluaꞌahua enu mero neca Diose. Liaꞌahua nehuañiaꞌahua cuna liꞌinu nu cuna Lliꞌñinu Jesucristo. Nu liꞌinu necanu mero Diose, nu equie cuendaꞌ liꞌinu nuꞌ elunehuañi nú leca xunga laxu.  
\v 21 Bee lliꞌñia ubiꞌyahua liꞌihua lu xitse nú nzeli arquiꞌ bee bene nú rnibeei neca diose. Amén.