\id COL  
\h Colosenses 
\toc1 Te Guijtz Lo Rebeṉ Colosas 
\toc2 Colosenses 
\toc3 Col. 
\mt1 Te Guijtz Lo Rebeṉ Colosas 
\c 1  
\s1 Bacuaa Pabl loj rebeṉ guidoo ni yu' guedx Colosas 
\p  
\v 1 Narä, Pabl nacä te apost xten Jesucrist. Dios gule narä. Narä näjza bejtznu Timoteu  
\v 2 cagucuaanu reguijtzre loj rebeṉ Colosas nani nabaṉnaya rujnreni si'cpacni rlajz Dios, näjza reni najc bejtznu lo xtidx Jesucrist. Xca'tu yäḻracnäj näjza yäḻrbedxilajz xten Dios xtadnu. 
\s1 Rniab Pabl gudeed Dios yäḻnajn xtenni 
\p  
\v 3 Rdeednu xquixtios lo Dios xtad Dad Jesucrist rniabnu lojni xcuenttu guixe-guixee.  
\v 4 Abiejn diajgnu xho rililajztu xtidx Dad Jesucrist, näjza xho sanälajztu rebejṉ ni ahuililajz xtidx Jesucrist,  
\v 5 sa'csi cabäjztu xca'tu reyäḻnasa'c ni yuchee xhaguibaa par la'tu. Laa xcuent reni'c ni biejn diajgtu cheni bacuadiajgtu xtidxlii Jesucrist xcuent yäḻrusḻaa lo dojḻ.  
\v 6 Laa rediidxga ni abiääd lojtu sigajc ni bire'chni guideb lo guedxliuj, luxh cayac xhidajlru rebejṉ ni cayacbee diidxre, asalilajzreni diidxga, sigajc guzajctu la'tu. Cheni biejn diajgtu xtidx Jesucrist, dxejc biembeezatu guliipac najc xcäḻrulaslajz Dios.  
\v 7 Sigajcza bisieedtuni lo Epafras, ni sanuutis cayacnäjni nuure lo dzuun. Laani najc te beṉsa'c, yu'ni lojtu cayujnpacni xtzuun Jesucrist lacuaa nuure.  
\v 8 Laani abasule'ni diidx loonu xho sanälajz sa'tu sa'csi nabajṉ Sprit Dxan xten Dios neṉ lastootu. 
\p  
\v 9 Laa ni'cni dxejli nani biejn diajgnu diidxre xcuenttu, di cuääz cabedx-canabnu lo Dios, canabnu gacbeduxhtu xho rlajz Dios guntu, guniidxni guiraa yäḻnajn näjza gusanijni xcäriejntu  
\v 10 te guibajṉtu si'cni nungäjḻ guibajṉ bejṉ ni sanajl Dad Jesucrist, te guspaatu lajzni lo guiraa redzuun. Chanuuzatu gunrutu guiraa redzunsa'c näjza jianijru xcäriejntu xcuent yäḻriembee Dios.  
\v 11 Tioobrutu loj xcäḻnadip, xcäḻrnibee Dios te guibaa lajztu gusutiplajztu, cue'cdxilajztu loj xhitis ni sajctu.  
\v 12 Guibalajznu guideednu xquixtios loj xtadnu Dios nani basudzu'tz nuure te xca'nu yäḻnabajṉ par tejpas sigajc guiraa rebejṉ nani ahuililajz xtiidxni yu'reni lo xpianijni.  
\v 13 Laani abasḻaani nuure loj xcäḻrnibee yäḻnacäjy, abateedni nuure lo xcäḻrnibee xi'nni ni sanälajzni.  
\v 14 Laa xi'nni ni basḻaa nuure neṉ dojḻ cheni baxhe'ni xtiejnni, gujtni lo crujz, dxejc gudijxni rextojḻnu. 
\s1 Gubisacnu loj Dios xcuent xcäḻgujt Jesucrist 
\p  
\v 15 Rut rajcdi ruhuii lo Gueb-Dios, niluxh xi'nni najc si'cpac najc Dios; si'cpac rujn lojni. Laani guyu'ni galodoo luxh rnibeeni lo guiralii ni yu' lo guedxliuj.  
\v 16 Por laani benchee Dios guiralii ni yu' xhaguibaa ni yu'za lo guedxliuj, renani ruzeṉ sigajc renani di guzeṉ: reṟeii, näjza reni rnibee loj rexangl Dios, näjza reni rnibee loj rexangl beṉdxab, nägajcza reyäḻrnibee xten reguixhajg, sigajczani loj regubier, lo reguxhtis ni rajp yäḻrnibee, guiraani guc-chee por laani, näjza par laani.  
\v 17 Alanabajṉ Jesucrist galooli, che gajdli guirixtiej guedxliuj. Por laani yu' guira'ti ni yu'.  
\v 18 Laani najc nani rnibee guidoo, nalajznu rebejṉ nani ahuililajz xtiidxni. Laani najc ni guläxtiej guira'ti. Ganiddoo laani huäjs lo rebeṉgut te rnibeeni. Loj guira'ti ni yu' laatisni najc nani sajc guinibee.  
\v 19 Sa'csi bidxaglajz Dad Dios ga'p Jesucrist guiralii yäḻrnibee nani najc xten Dios,  
\v 20 por lagajcza Jesucrist badzu' Dios guira'ti ni yu', guibi'reni lojni, reni yu' lo guedxliuj sigajc reni yu' xhaguibaa, sa'csi abiäjḻ-lajzni, aguredxi lajzni sa'csi bixe' xtiejn Jesucrist lo crujz. 
\p  
\v 21 Luxh la'tu gujctu si'c beṉzijt lo Dios sa'csi galoo rdxe'chtu lo Dios neṉ lastootu xcuent redzunguijdx nani bejntu.  
\v 22 Niluxh ṉaj abiäjḻ-lajz Dios abadzu' Jesucrist la'tu, agucnayatu gubi'tu lo Dios xcuent xtiejn Jesucrist ni baxhe'ni lo crujz cheni gujtni. Ni'c bejnni te che suutu nez lojni, xhetiru xtojḻtu, xhet xhi guiniidi Dios lojtu sa'csi anayapactu.  
\v 23 Niluxh riäjḻ chanuu sudzu'tztu, cuedxitu lo yäḻrililajz. Na'c gusaantu chu gusiejch-lajztu te cuälaztu xtidx Jesucrist nani abiejn diajgtu. Rediidxga abasule'zanu loj guiraa rebejṉ ni ṟe' lo guedxliujre. Luxh lagajc narä, Pabl rusule'ä diidxga sa'csi parpac ni'c gule Dios narä. 
\s1 Dzuun guidoo najc xcuent Pabl 
\p  
\v 24 N̲aj rbalazä cadedä trabajw xcuenttu sa'csi retrabajw ni cadedä lagajc narä cagusa' nani cayäädx lo retrabajw xten Crist xcuent guidoo, nalajznu rebejṉ ni ahuililajz xtiidxni, ni najc si'c tiejxh Jesucrist.  
\v 25 Ni'c nacä te bejṉ ni rusule' diidx neṉ guidooga. Dzuunga baniidx Dios gunä par xcäḻnasa'ctu te gusule'äpac guiragajc xtidx Dios,  
\v 26 te gacbeenu rexhigabxhiga'tz nani najc xhiga'tz galododuxh niluxh ṉaj abaluiini redidx-xhiga'tzre loj rexpejṉni.  
\v 27 Lojreni bejn Dios xhigab guluiini reyäḻnasa'c xten yäḻrdimbicha' xten redidx-xhiga'tz ni cagusule'ni loj rebeṉzijt. Yäḻxhiga'tzre säloj Jesucrist rbäjz neṉ lastootu ni'c runlojtu chaläjztu lo yäḻrdimbicha' xten Dios. 
\p  
\v 28 Rusule'nu diidx xcuent Jesucrist, ruliidxnu guiraa rebejṉ, guideb yäḻnajn ruluiinu te guisa' yäḻnajn xten guiraa rebejṉ xcuent Jesucrist che guidzujṉreni nez loj Jesucrist.  
\v 29 Xcuent dzuunre guideb xtipä runä dzuun con guiraa yäḻrnibee nani runiidx Jesucrist narä. 
\c 2  
\p  
\v 1 Rlazä gacbeetu lacti cadedä trabajw xcuentu, näjza xcuent reni yu' guedx Laodicea, näjza xcuent guiraa reni gajd gumbee narä.  
\v 2 Te tioob lastoo guiraatu sa'csi abidxagsa' lastootu lo yäḻsanälajz, näjza te ga'ptu guiraa reyäḻnasa'c ni rajp bejṉ che racbesa'creni xtidx Dios. Te gumbeezatu guiraa redidx-xhiga'tz xten Dios xtadnu näjza Dad Jesucrist.  
\v 3 Neṉ lastoo Dios näjza lastoo Jesucrist naga'tz guiraa reyäḻnasa'c xten guiraa reyäḻnajn, guiraa yäḻnumbee.  
\v 4 Dee rniä lojtu te di gusguee chu gusgueetu con rediidx-xhii.  
\v 5 Te palga ruti narä ro'c, canaj lazä la'tu, cabaa lazä cahuiä laaca cayujntu, sugatzu'tztu loj yäḻrililajz xten Jesucrist. 
\p  
\v 6 Ni'cni sigajc ni huililajztu xtidx Jesucrist, sigajcza coḻchasanäj Jesucrist.  
\v 7 Coḻsudzu'tz lo Jesucrist si'c rsiobdzu'tz xlobaa te yajg. Coḻsudzu'tz lo yäḻrililajz xten Jesucrist si'c ni abisieedtu. Coḻgudedduxhru xquixtios lo Dios. 
\s1 Yäḻnabaṉcoob ni rudeed Jesucrist 
\p  
\v 8 Coḻhuii, na'c gusaantu guxhiid bejṉ xcäḻrililajztu con xtiidxtisreni näjza rediidx nani xhet sajcdi, si'c najc xtidx rebeṉ galoo, näjza si'c najc diidx xcuent xhigab xten rebeṉ guedxliuj, di rediidxga gac si'cni rlajz Jesucrist. 
\p  
\v 9 Sa'csi guiralii ni najc Dios, lagajc ni'c najc Jesucrist, niluxh yu' tiejxh Jesucrist.  
\v 10 Xhet cayäädxdi lo yäḻnabajṉ xten Dios ni rajptu sa'csi najctu tejsi con Jesucrist. Laani rnibee guiraa reyäḻguxhtis, guiraa reyäḻrnibee ni yu' guira lajt.  
\v 11 Sa'csi huililajztu Jesucrist aguyu'tu bee, niluxh xhet beedi nani rusäḻ bejṉ con ṉaareni, alga xpee Jesucrist, ni najc yäḻrusia xtojḻ bejṉ sa'csi rusaan bejṉ redzunguijdx, rujnreni tejsi xhigab con Jesucrist. Si'c najc xpee Jesucrist.  
\v 12 Cheni gurobnistu najcni si'cni agujttu ni'c biga'tztu con Jesucrist, najczani si'cni gubaṉsactu con laani sa'csi huililajztu rajp Dios yäḻrnibee nani gulässac Jesucrist lo rebeṉgut.  
\v 13 Che najctu si'c beṉgut lo dojḻ, näjza sa'csi di bee niu' tiejxhtu, dxejcli baniidx Dios yäḻnabajṉ par tejpas lojtu con Jesucrist, badzucajni guiraa rextojḻnu.  
\v 14 Dios badzucaj guiraa releii nani basäuu nuure neṉ dojḻ, badzucajnini lojni, sa'csi bacuaanini lo crujz, cadro gudijx Jesucrist guiralii rextojḻnu.  
\v 15 Cheni gujt Jesucrist lo crujz bejnni gaan loj reyäḻguxhtis näjza guiraa reyäḻrnibee xten beṉdxab näjza rexspritni. Basanxtujynireni nez loj guiraa rebejṉ. Laani bejnni gaanreni cheni cuajni lo crujz. 
\s1 Coḻquiil recos ni najc xten xhaguibaa 
\p  
\v 16 Nicla tejtu na'c cubee sa'ni xcuent reyäḻrajw näjza reyäḻrä', niclaza xcuent redxe lanij näjza rexchej rebäicoob, näjza redxej ni rusilajzni.  
\v 17 Guiraa redee najc si'csi te balaa xten nani churu jiääd, te guluiireni ni rujn balaaga, nalajznu ni'c najc Jesucrist.  
\v 18 Na'c gusaantu gudzucaj bejṉ xcäḻnasa'ctu te gunreni gactu nadolajz, te gaṉtu reangl. Sa' bejṉga richu' loj nani gajdreni fii; rchaloreni najcreni beṉro xcuent lagajc xhigabreni.  
\v 19 Laareni direni chanajl Jesucrist nani rnibee, nani rujn ṟoobru tiejxhni, nalajznu rexpejṉni, sa'csi lojni rca'reni ni rquiin lastooreni, te ruchaagni sa' tejgareni si'c nadxaquiid bääl cuä' dzujt lo tiejxh bejṉ, te gacreni tejsi con Dios. 
\p  
\v 20 La'tu agujttu con Jesucrist, abiriitu lo rexhigab xten guedxliujre. N̲aj ¿xhicuent guibajṉtu sigajctis nabajṉ rebejṉ nani di gumbee xtidx Jesucrist, ä? ¿Xhicuent rusoobtu rediidx ni caj lo releii? Loj releii caj sa' diidxre:  
\v 21 “Di chahuaḻlu dee, di gaulu ni'c, di caṉlu dec.”  
\v 22 Luxh guiraa redee rnitloj che runnäjnini dzuun. Luxh guiraa sa' leiiga najc diidxtis nani ruluii bejṉ.  
\v 23 Guluiicani sa' releiiga rieṉ asdoo ruluiireni yäḻnanduxh, luxh che rusoob bejṉ releiiga rchaloreni rajṉreni Dios, rchaloreni rac nadolajzreni, rusacsíreni lagajc tiejxhreni. Niluxh xlai'si rujnreni guiraa redzuunga, sa'csi sanuutis rujnreni si'ctisni rlajz tiejxhreni. 
\c 3  
\p  
\v 1 Palga anabaṉsactu con Jesucrist, coḻquiil reyäḻnasa'c ni yu' xhaguibaa cadro sobga' Jesucrist xladbee Dios.  
\v 2 Coḻyejn xhigab xcuenttis reyäḻnasa'c ni yu' xhaguibaa, na'c guntu xhigabtis xcuent reni yu' lo guedxliuj.  
\v 3 La'tu anajctu si'c beṉgut loj reyäḻnasa'c ni yu' lo guedxliuj, luxh yäḻnabajṉ ni rajptu ṉaj, yäḻnabajṉga naga'tz con Dios xcuent Jesucrist.  
\v 4 Che guluiilosac Jesucrist ni najc xcäḻnabajṉtu, dxejc näjza la'tu suluiilojtu con laani lo xcäḻrdimbicha'ni. 
\s1 Yäḻnabaṉbiejw con yäḻnabaṉcoob 
\p  
\v 5 Coḻcuälaz redzunguijdx xten guedxliuj nani rujntu, yäḻrusguee gunaxteb, yäḻrujn recosdxuudx, recos ni rdxaglajz tiejxhtu, rexhigab-guijdx, yäḻrsiäb-lajz xhi xten bejṉ, guiraa redee rujn runijt bejṉ lo Dios sigajc rujn bejṉ che rajṉ bejṉ rebanäjb.  
\v 6 Guiraa redzuunga rujn riääd xcäḻrdxe'ch Dios yejc renani rujn sa' redzuunga.  
\v 7 Näjza la'tu bejntu sa' redzunguijdxga galoo cheni guyu'tu lo sa' yäḻnabajṉga.  
\v 8 Niluxh ṉaj näjza la'tu coḻgusaan recosre; nalajznu yäḻrdxe'ch, yäḻruche'ch sa'ni, yäḻrujn latzsiaj sa'ni, yäḻrniyaj sa'ni, näjza rediidx-dxuudx ni rniitu.  
\v 9 Na'c gusgueetu resa'tu, sa'csi nanab gusaantu nani bejntu cheni guyu'tu loj redzunguijdx.  
\v 10 Coḻyajc te beṉcoob, ni guixe-guixee cayanijru xcäriejnni, te gumbesa'ctu Dios, te gactu sigajc najc Dios ni benchee beṉguedxliuj.  
\v 11 Lo yäḻnabaṉcoobre rutiru beṉzijt, niclaza xpeṉ Israel, rutiza rebejṉ ni ru' bee, niclaza bejṉ ni di chu bee; rutiza beṉzijt, niclaza bejṉ ni siääd zitduxh; rutiza mos, niclaza bejṉ nani di chu lo bejṉ, sa'csi che rililajz te bejṉ xtidx Jesucrist najcni tebloj con guiraa reni rililajz xtidx Jesucrist; guiraareni najc xpejṉ Jesucrist. 
\p  
\v 12 N̲aj agule Dios la'tu te gactu xpejṉni nani gac naya, nani sanälajzni, coḻguibajṉ con yäḻrulaslajz, na'c guidxe'chtu, coḻyacnadoo con yäḻnadolajz, coḻniiza nadolajz.  
\v 13 Coḻyujn huant, na'c guidxe'chtu loj sa'tu, palga yu' chu sa'tu rdxe'ch loj sa'ni, coḻgusiäjḻ-lajztu sigajcni basiäjḻ-lajz Dad Jesucrist lojnu xcuent rextojḻnu.  
\v 14 Che abejntu guiraa recosre, coḻguiilru yäḻsanälajz nani rusa' loj guiraa recosre.  
\v 15 Xcäḻrbedxilajz Dios guinibee neṉ lastootu, sa'csi parpac ni'c gurejdxni la'tu, te gaczatu tejsi con rexpejṉ Jesucrist. Coḻgudeed xquixtios loj Dios. 
\p  
\v 16 Xtidx Jesucrist chuduxh neṉ lastootu con guiraa yäḻnajn, te guluiitu, te gulijdxtu tejga resa'tu con redij nani gulä'p toDavid xpala'n Dios, näjza redij nani roḻtu, näjza redij nani rliä'p xpala'n Dios. Redijga goḻnu te guideednu xquixtios lo Dios neṉ lastoonu.  
\v 17 Guira'ti nani guntu, sigajc rediidx ni rniitu, sigajcza redzuun ni rujntu, coḻyejn guiraani con laj Dad Jesucrist, coḻdeed xquixtios lo Dios xtadnu con laj Jesucrist. 
\s1 Xho nanab guibajṉ te famiḻ ni najc xpejṉ Jesucrist 
\p  
\v 18 Regunaa nani abachṉaa, coḻgusoob xtidx chäältu sa'csi si'c rlajz Dad Jesucrist.  
\v 19 Reniguii nani abachṉaa, coḻchanälajz chäältu, na'c guidxechnäjtureni.  
\v 20 Reni najc biuux, coḻgusoob xtidx xtadtu loj guira'ti, sa'csi si'c rchaglajz Dad Jesucrist.  
\v 21 Reni najc Dad, na'c guche'chtu rexi'ntu, didi gac-huin lajzreni.  
\v 22 Reni najc mos, coḻgucuadiajg xtidx xlam̲tu lo guedxliujre loj guira'ti xtzuunni. Na'c gunsa'ctu dzuun che cahuiitisreni si'c rujn renani ruspaa lajz bejṉtis. Con yäḻnadolajz coḻyejn dzuun sa'csi sanälajztu Dios.  
\v 23 Guira'ti nani guntu, coḻyejnni guideb lastootu si'c xtzuun Dios, et si'c xtzuundi rebejṉtis.  
\v 24 Anajntu lo Dad Jesucrist sica'tu yäḻnasa'c ni najc yäḻnabajṉ par tejpas, sa'csi loj Dad Jesucrist rujntu dzuun.  
\v 25 Niluxh nani rujn recosguijdx, lagajc xcuent recosguijdxga gudeed Dios lojni, sa'csi tebloj rujn Dios guiraa rebeṉguijdx. 
\c 4  
\p  
\v 1 Renani najc lam̲, coḻdeed loj rexmostu nani riäjḻ xca'reni sa'csi anantu näjza la'tu rajptu xlam̲tu xhaguibaa. 
\p  
\v 2 Coḻchanuu coḻnab lo Dios, coḻsusiṉ che rniabtu lo Dios. Coḻgudeed xquixtios lo Dios.  
\v 3 Coḻnabza lo Dios con nuure te gacnäj Dios narä gusule'ä xtidx Jesucrist, te gusule'ä redidx-xhiga'tz xten Crist. Xcuent ni'cza yu'ä neṉ latzguiib.  
\v 4 Coḻnab lo Dios te guyasi gusule'ä rediidxga si'cni riäjl guiniä. 
\p  
\v 5 Coḻguibaṉsiṉ loj rebejṉ nani di gumbee xtidx Jesucrist, coḻgusule' diidx cheni riäjl guiniitu lojreni.  
\v 6 Rextiidxtu nanab gacni si'c rchaglajz Dios, saruduxhza gac xtiidxtu te gacbeetu xho riäjl gudzu'tu diidx loj tejgareni. 
\s1 Lult xtixtios 
\p  
\v 7 Tíquico, bejtznu ni sanälajznu, ni runsa'c dzuun, ni najc xmos Dad Jesucrist, laani gusule'ni diidx lojtu xcuent guiraa rextzunä.  
\v 8 Ruxhaḻäni lojtu te gacbeepactu xho yu'ä, te guspaani lajztu.  
\v 9 Laani jiädnäzani Onésimo nani najc te betznu ni sanälajznu. Laani najc tej resa'tu. Laareni gusule'zareni guira'ti nani cadeednu ree. 
\p  
\v 10 Aristarco, nani yunäj narä neṉ latzguiib, ruxhaḻni xtixtios lojtu näjza Marcw, betz prim̲ xten Bernabé (abacuaä lojtu xcuentni, xho guntu, palga jiädhuiini la'tu, sacru coḻhuiini).  
\v 11 Näjza Jesús nani laaza Justo, ruxhaḻ xtixtios lojtu. Laatisreni najc rexpejṉ Israel nani cayacnäj loj dzuun xten xcäḻrnibee Dios. Laareni ruspaa lazä.  
\v 12 Epafras, ni najc te sa'tu, ruxhaḻ xtixtios lojtu, luxh rniabduxhni xcuenttu lo Dios te sudzu'tztu guntu guiragajc ni rlajz Dios guntu.  
\v 13 Narä rniliä xho rdzuun Epafras xcuent la'tu, näjza xcuent rebejṉ ni yu' guedx Laodicea, näjza guedx Hierápolis.  
\v 14 Lucas, doctoor ni sanälajznu, näjza Demas ruxhaḻzareni xtixtios lojtu. 
\p  
\v 15 Coḻdeed xtixtios loj rebejtznu nani yu' guedx Laodicea, näjza loj Ninfas, näjza lo rebejṉ nani re' rolijzni.  
\v 16 Cheni agulujx biḻtu guijtzre, coḻguxhaḻni te jieḻni neṉ guidoo xten guedx Laodicea, dxejcti coḻyeḻza guijtz nani baxhaḻä lo rebeṉ guedx Laodicea.  
\v 17 Coḻye'tz loj Arquipo: “Bahuisa'c xtzuun Dad Jesucrist nani cua'lu lojni. Bensa'c dzuunga.” 
\p  
\v 18 Lagajc narä Pabl rucuaä xtixtiosre con lagajc ṉaä, con lagajc xleträ. Coḻgusnaj-lajztu narä yu'ä latzguiib. Gacnäj Dios la'tu. Sugacni si'c.