\id 2TH  
\h 2 Tesalonicenses 
\toc1 Guijtz Ni R̲ojp Lo Rebeṉ Tesalónica 
\toc2 2 Tesalonicenses 
\toc3 2 Ts. 
\mt1 Guijtz Ni R̲ojp Lo Rebeṉ Tesalónica 
\c 1  
\s1 Rucuaanu guijtzre lojtu, rexpeṉ Jesucrist ni rbäjz guedx Tesalónica 
\p  
\v 1 Narä Pabl, näjza Silvan näjza Timoteu, cacuaanu guijtzre lojtu, rebejtznu ni yu' guidoo lo guedx Tesalónica, reni yu' lo Dios Xtadnu näjza lo Dad Jesucrist.  
\v 2 Gacnäj Dios Xtadnu näj Dad Jesucrist la'tu, guscuecdxizareni lajztu. 
\s1 Gun Dios yäḻguxhtis loj rebeṉdojḻ che guibi' Jesucrist lo guedxliuj 
\p  
\v 3 Bejtznu, rudeednu xquixtios lo Dios xcuenttu, si'c riäjḻ jiennuni, sa'csi xcäḻrililajztu siädroobru, näjza yäḻrinälajz ni rajp tejgatu näjza sa'tu siädroobruni.  
\v 4 Ni'cni rliä'pnu xpala'ntu neṉ reguidoo xten Dios. Rbaa lajznu sa'csi rsiudzu'tztu sanuutis rililajztu xtidx Dios mase rdejdtu trabajw, rusacsí bejṉtu.  
\v 5 Dee ruluiipac xcäḻguxhtis Dios najc laaca, ni'c rnii Dios riäjḻ jiu'tu lo xcäḻrnibeeni sa'csi cadejdtu trabajw xcuent yäḻrnibeega. 
\p  
\v 6 Sa'csi rujn Dios xhigab riäjḻza quiix reni bateedtu trabajw xtojḻreni, ni'c suteedzani reni'c trabajw.  
\v 7 Niluxh la'tu ni cadejdtu trabajw, sujn Dios gusilaznäjtu nuure che guluiiloj Jesucrist, siriini xhaguibaa siädnäjni rexanglni ni sajc, ni rnibeduxh.  
\v 8 Lo te balduxh siäädni, dxejc guisloj susacsíduxhni reni di gaṉ Dios, dizareni gusoob xtidx Dad Jesucrist nani rudzucaj dojḻ.  
\v 9 Guiraareni sidejdreni trabajw, par tejpas agunijtreni, zijt chureni lo Dios, lo yäḻrdimbicha' xten xcäḻrnibeeni.  
\v 10 Che jiääd Dad guiriini xhaguibaa, dxejga siliä'p rexpejṉni xpala'nni, sidxelojza renani huililajz laani näjza la'tu, sa'csi huililajztu diidx ni basule'nu che guyu'nu lojtu. 
\p  
\v 11 Ni'c rniabtisnu lo Dios por la'tu, rniabnu lo Dios guinaj lajzni nabajṉtu si'c riäjḻ guibajṉ reni guleni. Rniabzanu guniidx Dios lojtu guntu guiraa redzunsa'c ni rchaglajz Dios guntu, gacnäjzani la'tu con xcäḻrnibeeni te guntu redzuun ni rujntu sa'csi rililajztu.  
\v 12 Te chä'p xpala'n laj Dad Jesucrist si'cni nabajṉtu, te laani guiliä'pzani xpala'ntu, xcuent yäḻrinälajz xten Dios näjza Dad Jesucrist. 
\c 2  
\s1 Beṉdoḻduxh 
\p  
\v 1 N̲aj, rniabduxhnu lojtu bejtznu, xcuent dxej ni jiääd Jesucrist, dxej ni guidojpzanu lojni,  
\v 2 na'c chugajtu yarsia'. Na'cza gusaantu guchejbreni la'tu con diidx ni ruluii te bejṉ ni najc profe't, nicla con diidx ni rnii stee bejṉ lojtu, niclaza con diidx ni naareni lojtu caj loj te guijtz ni naareni baxhaḻnu lojtu, cadro caj “dxej ni guibi' Jesucrist abidzujṉ”.  
\v 3 Na'c gusaantu gusguee bejṉ la'tu xcuent rediidxre. Che gajd dxejga guidzujṉ, su' bejṉ ni sibälaz xtidx Dios, dxejc suluiloj beṉlatsiaduxh, xi'n nani sinitloj par tejpas.  
\v 4 Bejṉre siliä'p lagajc xpala'nni, sidxe'chni lo guiraa ni sanä laj Dios, näjza xhitis ni rajṉ bejṉ, te cueni neṉ xquidoo Dios, guluilojni si'c lagajc Gueb Dios. 
\p  
\v 5 ¿La di lajztu guisaj cheni guyusicä lojtu, rniä rediidxre lojtu, ä?  
\v 6 N̲aj la'tu anajntu xhini'c ruscuääzni, te na'c guiricajni ansde guisa' redxej xtenni.  
\v 7 Te yäḻxhiga'tz najc dzunlatsiaj ni alacayajc lo guedxliuj, cayäädxtis guibicaj nani caguscuääzni galäiini.  
\v 8 Dxejc suluiloj beṉlatsiaduxhre. Niluxh Dad Jesucrist, sugu'tnini con bero'ni, che guibi' Jesucrist lo guedxliuj xpianijni sujn nitlojni.  
\v 9 Beṉlatsiaduxhre najc si'cpac najc beṉdxab. Che guidzujṉni, guidzujṉni si'c te bejṉ nani rnibee, sujnni seen, sujnzani milagrw ni rusguee.  
\v 10 Con xcäḻlatsiaj bejṉre susgueeni guiraa renani alagunijt lo Dios sa'csi direni nicäjb ninälajzreni didxlii ni nusḻaareni neṉ dojḻ.  
\v 11 Ni'cni susaan Dios jiääd te yäḻrusgueduxh te chalilajzreni didx-xhii.  
\v 12 Te gabijl jii guiraa renani di nicäjb nililajz didxlii, alga bidxaglajzreni yäḻlatsiaj. 
\s1 Reni gule Dios guirii neṉ dojḻ 
\p  
\v 13 Niluxh nuurnu riäjḻ gudeedtisnu xquixhtios lo Dios por la'tu, bejtznu, ni sanälajz Dad Jesucrist. Rudeednu xquixhtios sa'csi galooli gule Dios la'tu te gusḻaani la'tu lo dojḻ, xcuent Xsprit Dxanni ni rusia lastootu, näjza redidxlii ni huililajztu.  
\v 14 Ni'cni che biejn diajgtu diidx ni basule'nu lojtu, gurejdx Dios la'tu, te xca'zatu xcäḻrdimbicha' Jesucrist. 
\p  
\v 15 N̲aj bejtznu, coḻchanuu, coḻsudzu'tz, na'cza jiäḻlajztu rediidx ni balijdxnu la'tu che guyu'nu ro'c, näjza rediidx ni bacuaanu lo guijtz ni baxhaḻnu lojtu.  
\v 16 Lagajc Dad Jesucrist, näj Dios Xtadnu, ni sanälajz nuurnu, ni ruscäjn lajznu par tejpas, ni baniidx xcäḻrbääznu racnäjni nuunu,  
\v 17 guspaani lajztu, gusudzu'tzni la'tu lo guiraa redidxsa'c ni guiniitu näjza redzuunsa'c ni guntu. 
\c 3  
\s1 Coḻnab lo Dios xcuent nuurnu 
\p  
\v 1 Bejtznu, coḻnab lo Dios xcuent nuurnu te chanuu guire'ch xtidx Dad Jesucrist, te che gusoob bejṉ diidxga chä'p xpala'n diidxga, sigajcni gujcni con la'tu.  
\v 2 Coḻnabza lo Dios xcanäjni nuurnu te di tednu ladzṉaa rebeṉlatsiaj, rebeṉguijdx, sa'csi xhet guiraadi bejṉ rajp yäḻrililajz.  
\v 3 Dios rusoob xtiidxni, susudzu'tzni la'tu, sacnäjzani la'tu te di sactu doḻguijdx.  
\v 4 Abascuedxi Dios lastoonu xcuenttu sa'csi anancheenu cayujntu guira'ti nani gunibeenu guntu, luxh si'cza sinuu gusoobtu xtiidxnu.  
\v 5 Canabä lo Dad Jesucrist guniidxni gacbeerutu xcäḻsanälajz Dios, canabäza coḻcuecdxi lajztu si'cni bejn Crist che gudejdni trabajw. 
\s1 Nanab jiennu dzuun 
\p  
\v 6 Bejtznu, con laj Xtad Jesucristnu, rnibeenu guibicajtu lo chutis te sa'nu ni ricanzajtis, ni di rlajz gunni dzuun. Guibicajzatu loj reni di guibajṉ si'cni baluiinu riäjḻ guibajṉtu.  
\v 7 La'tu anajntu xho riäjḻ guibajṉtu, chanuutu guntu si'cni riennu nuure. Najntu nuurnu dinu nicanzaj che guyu'nu lojtu sa'csi biennu dzuun.  
\v 8 Dizanu nidauxlia' xcu'n chu tejtu; guiraani bidiixnu, biennu dzuun dxej-yääl, te di nutaalnu xtzuun chu tejtu.  
\v 9 Masä nungäjḻ niniabnu niacnäjtu nuurnu, dinu niniabni; alga biennu dzuun te baluiinu xho chanuutu.  
\v 10 Cheni guyu'nu lojtu, gunibeenu scree guntu: Chutis ni di rlajz gun dzuun di riäjḻ xca'ni xhi gauni.  
\v 11 Aguniireni loonu baltitu rcanzajtis, direni gun dzuun, alga rihuiireni xhi cayujn rebejṉ.  
\v 12 Rulijdxnu rebejṉre, rnibeenureni con laj Xtad Jesucristnu: coḻcuedxi, coḻyejn dzuun te gautu. 
\p  
\v 13 Bejtznu, na'c guidxajgtu guntu dzunsa'c.  
\v 14 Palga yu' chu tejtu di gucuadiajg xtiidxnu ni caj lo guijtzre, coḻhuii chuni'cni te na'c guchaagtuni, te guitujyni.  
\v 15 Niluxh na'c ga'ptuni si'c ni rdxe'ch lojtu, coḻguliidxni si'c bejtztu. 
\s1 Rusadiidxnireni 
\p  
\v 16 Gueb Dios xten yäḻrbedxi, guscuecdxi lajztu guixe-guixee, masä xhitis sajctu. Jiannäj Dad Jesucrist guiraatu. 
\p  
\v 17 Narä, Pabl cacuaä xtixtiosre con ṉaäpac si'c runä lo guiraa rexquitzä, scree rucuaä.  
\v 18 Gacnäj Xtad Jesucrist guiragajctu. Sugacni si'c.