\id TIT 
\ide UTF-8
\h Tito
\toc1 DIZRA' DA BZUAJ SAN PABLO CHEE̱ TITO
\toc2 Tito
\toc3 Tit.
\mt1 DIZRA' DA BZUAJ SAN PABLO CHEE̱ TITO
\c 1
\s1 Pablo dxugape̱' Tito diuzre
\p
\v 1 Neda', Pablo, naca' we̱n zrin chee̱ Dios, ne gubáz chee̱ Jesucristo chee̱ guzéajni'ida' benne' ca' ba gucá'a Dios chee̱ xeleajlí lazre̱' Cristo, ne xelúnbe'e̱ da naca li lazre' chee̱ da naca chee̱ Dios, 
\v 2 ne chee̱ xelebeza lazre̱' xel-la nabán chadía chacanna, da guche̱be lazre' Dios gunne̱' chee̱dxu gate za gunte̱' xe̱zr la xu nigá. Dios quebe dxun lazre̱', 
\v 3 na' na'a, ca ba bzrin zra chee̱ na, ba bzéajni'ine̱' dxi'u ca naca xrtizre̱' ne̱ chee̱ da bxrize' Dios neda' cu'a lban chee̱ na. Dios nácaqueze̱' weselá chee̱dxu. 
\v 4 Dxuzúaja' da nigá chiu', Tito. Nacu' ca zrí'inequeza' lawe' da dxeajlí lázredxu Cristo. Dxenaba' lau Xradxu Dios, ne lau Xránadxu Jesucristo, Benne' weselá chee̱dxu, gune̱' chiu' da cháwedau', ne xexache lazre̱' lue', ne gunne̱' lue' xel-la dxebeza zri lazre'.
\s1 Zrin da dxun Tito lu xe̱zr la xu Creta
\p
\v 5 Bcá'ana' lue' lu xe̱zr la xu Creta da naxechaj nisa chee̱ gucá'ana chawu' da quebe begá'ana chawe' ládujla bíchedu ca', ne chee̱ gunnitu' benne' gula chee̱ xudau' tu tu xé̱zredu ca', cáte̱ze bxríseda' lue' gunu'. 
\v 6 Tu benne' gula chee̱ xudau':
\q1 Dxal-la' gaque' benne' quebe bi zua da gagu na chie̱'.
\q1 Dxal-la' súale̱ne̱' tuze nu'ula.
\q1 Zrí'ine̱' dxal-la' xelácabe' bi ba dxéajlí lázrebe' Cristo.
\q1 Quebe bi da zrinnaj dxelún zrí'ine̱' ca',
\q1 ne quebe gaca nu gagu zria chee̱ da dxelunbe'.
\p
\v 7 Lawe' da xu'u lu ne̱'e̱ zrin chee̱ Dios, tu benne' dxuxúe̱' benne' zaj nababe̱' chee̱ Cristo:
\q1 Dxal-la' gaque̱' benne' quebe bi zua da gagu na zria chee̱'.
\q1 Quebe dxal-la' gaque̱' benne' dxucá'ana szren cuine̱'.
\q1 Quebe dxal-la' gaque̱' benne' xichaj zra'a.
\q1 Quebe dxal-la' gaque̱' benne' dxé'aje̱' da dxuzuzre na le̱'.
\q1 Quebe dxal-la' gaque̱' benne' dxedíl-lale̱ne̱' bénneache.
\q1 Quebe dxal-la' gaque̱' benne' dxucúdee̱'.
\q1
\v 8 Dxal-la' súate̱ze̱' si' lu ne̱'e̱ benne' zjaque̱' lizre̱'.
\q1 Dxal-la' gune̱' da naca cháwedau'.
\q1 Dxal-la' gaque̱' benne' nna be'e cuine̱'.
\q1 Dxal-la' gaque̱' benne' xrlátaje.
\q1 Dxal-la' gaque̱' benne' nuzúa cuine̱' chee̱ Dios.
\q1 Dxal-la' gaque̱' benne' dxuzéajni'i cuine̱'.
\q1
\v 9 Dxal-la' gaque̱' benne' nuzúa cuine̱' chee̱ dizra' li.
\m Dizra' li naca na da bse̱de nu benne' le̱' chee̱ séquene̱' gusízrene̱' benne' xubla ne̱ chee̱ da li da dxusé̱dene̱', ne chee̱ séquene̱' guzexruje̱' lazre' benne' ca' dxelenné̱' chee̱ da li na'.
\p
\v 10 Caní dxal-la' gune̱' lawe' da zrále̱'e̱ benne' dxelenné̱' chee̱ dizra' li, benne' dxelezí xe̱'e̱ benne' xubla lu da xala da dxlenné̱'. Zane' benne' Israel dxelune̱' caní. 
\v 11 Dxal-la' guzúa zriu' benne' dxelune̱' da caní lawe' da dxuluxrínnaje̱' xichaj lázxdau xúgute̱ benne' zaj zra' tu tu xu'u naga dxelú'e̱ chee̱ xulusé̱dene̱' da quebe naca xrlátaje. Dxelune̱' caní chee̱ xelezí' lu ne̱'e̱ dumí. Da nigá da dxelune̱' naca na da cale̱la.
\p
\v 12 Tu benne' Creta naga zu', benne' gunné̱' waláz chee̱ xudau' chee̱ benne' ca', gunné̱': “Benne' Creta zaj nácaqueze̱' we̱n lazre', ne zaj naque̱' ca be̱ snia ca', ne zaj naque̱' benne' wagu xrata', ne zrawe̱de.” 
\v 13 Da li gunné̱'. Chee̱ le̱ na' gudíl-laqueze benne' ca' chee̱ xelaque̱' li lazre' ca dxeleajlí lazre̱' Cristo, 
\v 14 ne chee̱ quebe xuluzé̱ nague̱' dizra' da dxuluzaze benne' Israel ca', ne ca naca da nadxixruj bea ca' da dxelún benne' ca' dxuluzúe̱' chalá'ala dizra' li.
\p
\v 15 Xúgute̱ naca na xrlátaje chee̱ benne' ca' zaj naca xrlátaje xichaj lázrdawe̱', san chee̱ benne' ca' dxelune̱' da sban, ne québedxa dxeléajle̱'e̱ chee̱ Cristo, quebe bi de̱ da naca xrlátaje. Zaj nazrinnaj xichaj lázrdawe̱'. 
\v 16 Benne' caní dxelenné̱' zaj núnbe'ene̱' Dios, san da dxelune̱' dxulé'e na quebe naca da li da dxelenné̱'. Zaj naque̱' benne' we̱n da sban, ne benne' we̱n da cale̱la, ne quebe xelezéquene̱' xelune̱' tu da xrlátaje.
\c 2
\p
\v 1 Dxal-la' guchálaju' da ca' dxuse̱de na dxi'u da naca li.
\p
\v 2 Benne' gula chee̱ xudau':
\q1 Dxal-la' xelaque̱' benne' dxelenná bé'e cuine̱'.
\q1 Dxal-la' xelaque̱' benne' du lazre'.
\q1 Dxal-la' xelaque̱' benne' dxuluzéajni'i cuine̱'.
\q1 Dxal-la' xelaque̱' li lazre' ca dxleajlí lazre̱' Cristo,
\q1 ne ca zaj nazrí'ine̱' Le̱',
\q1 ne ca naca xel-la zren lazre' chee̱'.
\p
\v 3 Cá'anqueze nu'ula gula ca' chee̱ xudau':
\q1 Dxal-la' dxelapa ba lá'ana Dios ca naca xúgute̱ da dxelune̱'.
\q1 Quebe dxal-la' xelaque̱' benne' dxulutupe̱' dizra' bizruj.
\q1 Quebe dxal-la' xelaque̱' benne' dxelé'aje̱' da xuzuzre na le̱'.
\q1 Dxal-la' xulusé̱dene̱' da naca xrlataje̱
\q1
\v 4 chee̱ gaca xulusé̱dene̱' nu'ula cuide' ca'
\q1 chee̱ xelezrí'ine̱' benne' chee̱' ca', ne zrí'ine̱' ca',
\q1
\v 5 ne chee̱ xelenná be'e cuine̱',
\q1 ne xelaque' du lazre',
\q1 ne xulupe̱'e̱ lizre̱',
\q1 ne xuluzúe̱' dizra' chee̱ benne' chee̱'.
\m Caní dxal-la' xelune̱' chee̱ quebe nu nne̱' schanní' chee̱ xrtizra' Dios.
\p
\v 6 Cá'anqueze bsizre bi cuide' ca' chee̱ xelenná be'e cuínabe'. 
\v 7 Ca naca da xrlátaje dxunu' lue' dxal-la' gulé'e na benne' ca' ca dxal-la' xelune̱'. Gate dxusé̱denu' benne' ca' dxal-la' gacu' li lazre', ne du lazre'. 
\v 8 Dxal-la' guchálaju' da naca li lazre' chee̱ quebe nu seque' si tizra le̱ na. Che gunu' caní, na' che nu benne' nnie̱' chee̱le, wedué'equezne̱', lawe' da quebe sua tu da cale̱la da dxunle.
\p
\v 9 Bzéajni'i benne' ca' zaj nada'u chee̱ xuluzúe̱' dizra' chee̱ xrane̱' ca naca xúgute̱ da xelé̱ xrane̱' le̱'. Dxal-la' xelune̱' da xelexezaca ba lazre' xrane̱', ne quebe xelexenné̱' lau xrane̱'. 
\v 10 Quebe dxal-la' xelebane̱' da naca chee̱ xrane̱', san dxal-la' xelaque̱' li lazre', chee̱ xelelé'e benne' ca da dxelún benne' caní, na' xelenné̱' chawe' chee̱ xrtizra' Dios, Benne' weselá chee̱dxu.
\p
\v 11 Dios ba blé'ene̱' ca naca da chawe' chee̱' chee̱ xelelá xúgute̱ bénneache. 
\v 12 Da xrlátaje chee̱ Dios dxuse̱de na dxi'u chee̱ québedxa gundxu da cale̱la, ne ca naca xel-la dxezá lazre' da cale̱la, san chee̱ nna be'e cuínadxu, ne gácadxu du lazre', ne gápadxu ba lá'ana Dios lu xe̱zr la xu nigá 
\v 13 dxácate̱ ne dxebézadxu zra xelá' Dios szren, ne weselá chee̱dxu Jesucristo nen xel-la szren chee̱', da na' dxebeza lázredxu. 
\v 14 Le̱' bzua cuine̱' lu na' benne' ca' belútie̱' Le̱' waláz chee̱dxu dxi'u chee̱ bselé̱' dxi'u lu xúgute̱ da zrinnaj, na' bca'ana chawe̱' dxi'u chee̱ gácadxu bi cheé̱queze̱', ne chee̱ gundxu da xrlátaje du lázredxu.
\p
\v 15 Da caní dxal-la' gusé̱denu' benne' ca'. Gudil-la benne' ca', ne bsizre-ne̱' dute̱ xel-la dxenná bea chiu'. Quebe bi da cale̱la gunu' chee̱ quebe nu si tizra lue'.
\c 3
\s1 Da dxal-la' xelún benne' zaj nababe̱' chee̱ Cristo
\p
\v 1 Bsa lazre' benne' bíchedxu ca' chee̱ xelune̱' ca dxuluchixruj benne' ca' dxelenná bé'ene̱', ne benne' xu'u lawe', ne chee̱ xuluzúe̱' dizra' chee̱ benne' ca', ne chee̱ xelezúe̱' xelune̱' xúgute̱ da xrlátaje. 
\v 2 Quebe dxal-la' xelenné̱ chee̱ nu benne', san dxal-la' xelaque̱' zren lazre', ne zri'i lazre', ne dxexruj lazre' lau xúgute̱ bénneache. 
\v 3 Cá'anqueze dxi'u gate nate gúcadxu benne' xala, ne quebe bzúadxu dizra' chee̱ Dios. Gudadxu cale̱la, na' gunná be'e be̱la' dxen chee̱dxu dxi'u, chee̱ be̱ndxu ca naca xúgute̱ da guzá lázredxu, ne da bezaca ba lázredxu. Be̱ndxu da zrinnaj, ne gúcadxu xa lazre'. Belecuide bénneache dxi'u, na' bzrá'adxu ljwézredxu tudxu xetudxu. 
\v 4 Gate Dios, weselá chee̱dxu, blé'ene̱' da naca chawe' chee̱', ne xel-la zri'i lazre' chee̱', 
\v 5 na' bselé̱' dxi'u, quegá lawe' da be̱ndxu dxi'u tu da xrlátaje, san lawe' da bexache lazre̱' dxi'u. Bselé̱' dxi'u ne̱ chee̱ da gudibe na dxi'u gate na' bexálajdxu, na' bucube Be' Lá'azxa chee̱' dxi'u. 
\v 6 Ne̱ chee̱ Jesucristo, weselá chee̱dxu, Dios ba núnnale̱'e̱ dxi'u Be' Lá'azxa chee̱', 
\v 7 chee̱ ne̱ chee̱ da naca chawe' chee̱' gácadxu xrlátaje lau Le̱', ne zrué'edxu xel-la nabán chadía chacanna da dxebeza lázredxu. 
\v 8 Da caní zaj naca na da li. Dxaca lazra' gusízrequeznu' benne' ca' ca naca da caní chee̱ xelebé' gunne xue xelún benne' ca' da chawe', benne' ca' dxeléajle̱'e̱ chee̱ Dios. Da caní zaj naca na da xrlátaje, ne da gaca xuluchine xúgute̱ bénneache. 
\v 9 Quebe gulapa na'u dizra' xala ca', ne dizra' dxuluzaze bénneache ca naca chee̱ zra xrtawe̱', ne dizra' da dxun na bénneache chupa la'a, ne da dxulutil-la bénneache da naca chee̱ da bchixruj be'e Moisés. Da caní quebe culuén zaj napa na. Dácheze naca na.
\p
\v 10 Che nu benne' dxune̱' le'e chupa la'a, bsizre-ne̱' tu chupa lasa, ne che quebe dxenne̱' ca dxu'u le̱', bebéaje̱' ládujla le'e 
\v 11 lawe' da nézenu' nazrinnaj xichaj lázxdau benne' caní, na' dul-la dxelúnqueze̱' ba nuzría xi na le̱'.
\s1 Da dxal-la' gun Tito
\p
\v 12 Gate sel-la' Artemas u Tíquico naga zu', be̱n baxuzre xidu' xedajnna'u neda' lu xe̱zre Nicopolis lawe' da bache nuna' sua' nigá beu' zaga ca'. 
\v 13 Gúcale̱ Zenas, benne' wedé dizra', ne Apolos, ca da séquenu'. Bnezruj benne' ca' ca da zaj nachínene̱' chee̱ chjaque̱' lu neza chee̱', na' quebe bi xelexázrjene̱'. 
\v 14 Cá'anqueze benne' zaj nabábale̱ne̱' dxi'u dxal-la' xulusé̱die̱' xelune̱' da chawe', chee̱ xelácale̱ne̱' benne' dxelexázrjene̱', chee̱ xelaque̱' benne' guchine Cristo.
\s1 Pablo dxuzé̱' Tito dizra'
\p
\v 15 Xúgute̱ benne' zrále̱ne̱' neda' dxulugape̱' lue' diuzre. Bgape diuzre benne' ca' zaj nazrí'ine̱' dxi'u lu da naca chee̱ Cristo. Dxenaba' Dios gun chawe̱'e̱ xúgute̱le le'e. ¡Ca'an gaca na!