\id JHN 
\ide UTF-8
\h San Juan
\toc1 DIZRA' CHAWE' CA NACA CHEE̱ JESUCRISTO DA BZUAJ SAN JUAN
\toc2 San Juan
\toc3 Jn.
\mt1 DIZRA' CHAWE' CA NACA CHEE̱ JESUCRISTO DA BZUAJ SAN JUAN
\c 1
\s1 Bénnea' le̱' Xrtizra' Dios dxaque̱' bénneache
\p
\v 1 Gate guzú lau zua xúgute̱ da de̱, ba zúaqueze Bénnea' le̱' Xrtizra' Dios, da zéaje̱ na Benne' naque̱' dute̱ da nácaqueze Dios, na' Bénnea' le̱' Xrtizra' Dios zúale̱ne̱' Dios, ne nácaqueze̱' Dios. 
\v 2 Nédxudaute̱ Benne' nigá zúale̱ne̱' Dios. 
\v 3 Lu na' Benne' nigá be̱n Dios xúgute̱ da de̱. Quebe bi de̱ da quebe nun Le̱'. 
\v 4 Nácaqueze Le̱' xel-la' nabán, na' xel-la' nabán nigá naca na da dxusení na lu xichaj lázrdau bénneache chee̱ xelaca bane̱'. 
\v 5 Xel-la' naxaní' nigá dxusení na lu da chul-la chee̱ dul-la da zaj nabaga bénneache, na' da chul-la nigá quebe dxezeque na xusula na xel-la' naxaní' nigá.
\p
\v 6 Guzúa tu benne' le̱' Juan, gusel-la Dios bennea'. 
\v 7 Benne' nigá ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá, chee̱ xeléajle̱ xúgute̱ bénneache chee̱ Bénnea' ne̱ chee̱ da dxenné̱'. 
\v 8 Juan nigá quebe naque̱' xel-la' naxaní' na'. Ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá. 
\v 9 Xel-la' naxaní' li, da dxusení na lu xichaj lázrdau xúgute̱ bénneache ba za' la' na lu xe̱zr la xu nigá.
\p
\v 10 Bénnea' naque̱' Xrtizra' Dios zue̱' lu xe̱zr la xu nigá, na' lácala be̱n Dios xe̱zr la xu lu na' Bénnea', bénneache zaj zre̱'e̱ lu xe̱zr la xu quebe belexexúnbe'e̱ Le̱'. 
\v 11 Ble̱'e̱ naga zua da naca chee̱', na' benne' lazrie̱' ca' quebe gulezí' lu ne̱'e̱ Le̱'. 
\v 12 Benne' ca' gulezí' lu ne̱'e̱ Le̱', ne guléajle̱'e̱ chee̱', be̱'e benne' caní lataj xelaque̱' bi ca' chee̱ Dios. 
\v 13 Benne' caní québedxa zaj naque̱' ca zri'ine bénneacheze, bi ca' dxelálajbe' ne̱ chee̱ bénneache, u ne̱ chee̱ da dxezá lazre' tu benne'. Benne' caní zaj naque̱' bi ca' chee̱ Dios ná'queze.
\p
\v 14 Bénnea' naque̱' Xrtizra' Dios gúlaje̱' ca tu bénneache, na' guzúe̱' ládujla dxi'u, zaj zúale̱ xel-la' zri'i lazre', ne da li Le̱'. Blé'entu' ca naca xel-la' szren chee̱', tu xel-la' szren da nunezruj Xradxu Dios chee̱ Zrí'ine̱' tu licha'. 
\v 15 Juan bchálaje̱' ca naca chee̱ Bénnea', gunné̱':
\p ―Benne' nigá naque̱' Bénnea' bchálaja' neda' chee̱' gate gunnéa' Bénnea' ze̱'e̱ te chia' neda' naque̱' szrendxa ca neda' lawe' da zúaqueze̱' nédxute̱ ca neda'.
\p
\v 16 Xúgute̱dxu ba guzidxu xel-la' zri'i lazre' chee̱' da dxúnnaqueze Le̱'. 
\v 17 Bla' da nadxixruj bea Dios ládujla dxi'u lu na' Moisés, na' xel-la' zri'i lazre', ne da li belelá' na lu na' Jesucristo. 
\v 18 Netú benne' quebe ne lé'ene̱' Dios. Zrí'ine̱' tu licha', bi nazrí'ite̱ lazre̱', benne' nigá guque̱' tuz ca nácaqueze Xre̱'.
\s1 Juan, benne' bchue̱' bénneache nisa, dxexeche̱be̱' chee̱ Jesús
\r (Mt. 3.11-12; Mr. 1.7-8; Lc. 3.15-17)
\p
\v 19 Benne' xíchaje̱ ca' chee̱ judío ca', benne' zaj zre̱'e̱ Jerusalén, gulesel-le̱' bxruze ca', ne xrtia Leví, benne' ca' dxelune̱' zrin chee̱ xudau', na' belezrine̱' lau Juan chee̱ xuluche̱be xánnie̱' le̱' nu naque̱'. 
\v 20 Beche̱be Juan du lazre̱', gunné̱':
\p ―Quebe naca' neda' Cristo. (Dizra' nigá zéaje̱ na Benne' guche̱be lazre' Dios sel-le̱'.)
\p
\v 21 Nadxa buluche̱be̱' le̱':
\p ―¿Nuzra nacu'? ¿Nacu' Elías, bénnea' bchálaje̱' waláz chee̱ Dios?
\p Beche̱be Juan:
\p ―Cabí.
\p Na' buluché̱bequeze̱' le̱':
\p ―¿Nacu' bénnea' dxal-la' le̱'e̱, ne guchalaje̱' waláz chee̱ Dios, ca da gunná Moisés dxal-la' gaca na?
\p Le̱' beche̱be̱':
\p ―Cabí.
\p
\v 22 Nadxa buluché̱bedxaqueze̱' le̱':
\p ―¿Nuzra nacu'? Dxun na ba xen gata' bi xeché̱bentu' chee̱ benne' gulesel-le̱' netu'. ¿Bi dxennáquezu' nu nacu'?
\p
\v 23 Juan beche̱be̱':
\p ―Neda' naca' bénnea' naxúaj na ca naca chee̱' lu xiche chee̱ Dios, da dxenná: Wen chi'i tu benne' dxebezre xe̱'e̱ le̱'e̱ xixre' lawe' lataj, dxenné̱': “Le salaj tu neza li naga te Xránadxu.” Naquen cáte̱ze gunná Isaías, bénnea' bchalaje̱' waláz chee̱ Dios.
\p
\v 24 Benne' xudau' fariseo ca' gulesel-le̱' benne' caní chee̱ cheajlechálajle̱ne̱' Juan. 
\v 25 Le̱' buluche̱be̱' le̱':
\p ―Che lue' quebe nacu' Cristo, ne Elías, ne bénnea' dxal-la' xedajchalaje̱' waláz chee̱ Dios, ¿bi xel-la' dxenná bea napu' dxuchú' bénneache nisa?
\p
\v 26 Juan guzre̱' benne' ca':
\p ―Neda' dxuchúa' bénneache nisa lu nísaze. Zua tu benne' ládujla le'e quebe nézele ca szren naque̱'. 
\v 27 Benne' nigá ze̱'e̱ ca te chia' neda', na' zúaqueze̱' nédxudxa ca neda'. Quebe zaca' neda' cuéaja' zrele̱' da xu'u ni'e̱.
\p
\v 28 Xúgute̱ da caní guca na lu xe̱zr la xu chee̱ xe̱zre Betábara, da zua na chalá'a xe̱gu Jordán naga dxalaj gubizra, naga zua Juan dxuchúe̱' bénneache nisa.
\s1 Jesús naque̱' Zríla'dau' chee̱ Dios, be̱ dxelutie̱' lau Dios ne̱ chee̱ xtul-le'
\p
\v 29 Zra xula ble'e Juan dxezrín Jesús naga zue̱', na' gunné̱':
\p ―¡Le nna'xque! Benne' nigá naque̱' Zríla'dau' chee̱ Dios, cue̱' dul-la zaj nabaga bénneache. 
\v 30 Neda' bchálaja' ca naca chee̱' gate gunnéa': Te chia' neda' za tu benne' naque̱' szrendxa ca neda' lawe' da zúaqueze̱' nédxudaute̱ ca neda'. 
\v 31 Néda'queza' quebe gunezda' nu naque̱'. Bla'a dxuchúa' bénneache nisa chee̱ xeleneze xe̱zre Israel nu Benne' naca Le̱'.
\p
\v 32 Cá'anqueze gunná Juan:
\p ―Neda' ble'eda' Be' Lá'azxa bétaje̱' xabáa ca tu bgugu chíchedau', ne begá'anale̱ne̱' Benne' nigá. 
\v 33 Neda' quebe ne nezda' nu naque̱'. Dios na' nasel-le̱' neda' chee̱ guchúa' bénneache nisa, Le̱' guzre̱' neda': “Gate le'enu' Be' Lá'azxa xétaje̱' xegá'anale̱ne̱' tu benne', Benne' nigá gune̱' da zéaje̱ xel-la' dxedxúa nisa, guzúe̱' Be' Lá'azxa lu xichaj lázrdaule.” 
\v 34 Na'a ba ble'eda' guca da nigá, ne dxexeche̱ba' nácaqueze Benne' nigá Zri'ine Dios.
\s1 Benne' nedxu ca' dxuse̱de Jesús
\p
\v 35 Zra xula zúaqueze na' Juan nen chupa benne' ca' dxusé̱dene̱'. 
\v 36 Gate blé'ene̱' dxedé na' Jesús, na' gunná Juan:
\p ―¡Le nna'xque! ¡Benne' nigá naque̱' Zríla'dau' chee̱ Dios, bia gáteba' ne̱ chee̱ dul-la nabágadxu!
\p
\v 37 Dxúpate̱ benne' ca' dxuse̱de Juan belenne̱' ca da gunné̱', na' xjácale̱ne̱' Jesús. 
\v 38 Nadxa bexechaj Jesús, gunné̱'e̱ cúzrule̱', ne blé'ene̱' benne' ca' zá'aque̱' cúzrule̱', na' guzre̱' le̱':
\p ―¿Bi dxexílajle?
\p Benne' caní gulé̱'e̱ Jesús:
\p ―Benne' Wese̱de, ¿gazra zu'?
\p
\v 39 Jesús beche̱be̱':
\p ―Le da nna'le.
\p Nadxa xjácale̱ne̱' Jesús, ne belelé'ene̱' naga zue̱', na' belexegá'anale̱ne̱' Le̱' zra na' lawe' da bache zeaj du dxedá' tapa.
\p
\v 40 Tu benne' chupa ca', benne' belenne̱' ca da gunná Juan, ne xjácale̱ne̱' Jesús, naque̱' Andrés, benne' biche Simón Pedro. 
\v 41 Andrés nigá la guxíajte̱' xeajdílaje̱' bi biche̱' Simón, na' guzre̱' le̱':
\p ―Ba bezrélentu' Mesías. (Dizra' nigá zéaje̱ na Cristo, Bénnea' guche̱be lazre' Dios sel-le̱'.)
\p
\v 42 Nadxa Andrés guché̱'e̱ Simón naga zua Jesús, na' gate ble'e Jesús Simón na', na' guzre̱' le̱':
\p ―Lue' nacu' Simón, zri'ine Jonás. Si' lau' Cefas. (Dizra' hebreo nigá zéaje̱ na: Pedro, da zeaje̱ na: Xiaj.)
\s1 Jesús dxenné̱' Felipe ne Natanael
\p
\v 43 Zra xula guca lazre' Jesús chéaje̱' naga nababa Galilea, na' bezrague̱' Felipe, ne guzre̱' le̱':
\p ―Be̱n neda' tuze.
\p
\v 44 Felipe nigá naque̱' benne' xe̱zre Betsaida, da naca na lazre Andrés, ne Pedro. 
\v 45 Felipe guxíaje̱' xeajdílaje̱' Natanael, na' guzre̱' le̱':
\p ―Ba bezrélentu' Bénnea' bzuaj Moisés chee̱' lu xiche naga zaj naxúaj da nadxixruj bea na, ne cá'anqueze chee̱ Benne' nigá buluzúaj benne' ca' buluchálaje̱' waláz chee̱ Dios. Benne' nigá naque̱' Jesús, zri'ine José, tu benne' xe̱zre Nazaret.
\p
\v 46 Na' gunná Natanael:
\p ―¿Waca dxuaj tu da chawe' Nazaret?
\p Felipe beche̱be̱':
\p ―Gudá le'enu'.
\p
\v 47 Gate ble'e Jesús za Natanael naga zue̱', gunné̱':
\p ―Nigá za' tu benne' naca xánnie̱' benne' Israel, benne' dxenné̱queze̱' da dxéquene̱'.
\p
\v 48 Nadxa Natanael bche̱be̱' Jesús:
\p ―¿Ájazra naca núnbe'u neda'?
\p Jesús guzre̱' le̱':
\p ―Ble'eda' lue' nédxudxa gate za nne̱ Felipe lue', gate ze'u zran xaga higo.
\p
\v 49 Nadxa Natanael guzre̱' Jesús:
\p ―Benne' Wese̱de, Lue' nacu' Zri'ine Dios. Lue' nacu' Wenná Bea chee̱ntu', benne' Israel.
\p
\v 50 Beche̱be Jesús:
\p ―¿Dxéajle̱'u chia' lawe' da gucha' lue' ble'eda' lue' zran xaga higo? Walé'enu' da zaj naca na da szrendxa ca da nigá. 
\v 51 Da li dxapa' le'e, walé'equezle le'e naxalaj xabáa, na' gubáz chee̱ xabáa ca' chee̱ Dios dxelétaje̱', ne dxelexegüene̱' naga zua neda', Benne' Gulje̱' Bénneache.
\c 2
\s1 Dxaca laní chee̱ wechaga na' lu xe̱zre Caná
\p
\v 1 Zra guxunne zra, na' guca laní chee̱ wechaga na' lu xe̱zre Caná da nababa Galilea. Xrna Jesús zue̱' na', 
\v 2 na' zua nu gunné̱ Jesús, ne benne' ca' dxusé̱dene̱' lu laní na'. 
\v 3 Bebizre xrise uva wal-la, na' xrna Jesús guzre̱' Le̱':
\p ―Québedxa bi de̱ xrise uva wal-la xelé'aje̱'.
\p
\v 4 Jesús beche̱be̱':
\p ―Nú'uladau', ¿bizr chee̱ na' dxu'u neda' caní? Quebe ne zrin zra gulé'e lau da naca'.
\p
\v 5 Xrne̱'e̱ guzre̱' benne' we̱n zrin ca':
\p ―Le gun ca naca da xe̱'e̱ le'e.
\p
\v 6 Zaj nnita xrupa xesu' xiaj na', da dxuluchine judío ca' gate dxelibe ni'a ne̱'e̱ ca naca da zjácale̱ne̱'. Tu tu xesu' xiaj ca' dxeluzru na chupa u chunna dxe'e nisa. 
\v 7 Jesús guzre̱' benne' we̱n zrin ca':
\p ―Le gusezrá nisa xesu' xiaj caní.
\p Gulegué̱'e̱ nisa na, ne bulusuzrate̱' tu tu xesu' xiaj ca'. 
\v 8 Nadxa Jesús guzre̱' benne' ca':
\p ―Le ca'a na, na'a, ne le gua na lau benne' ze̱' dxu'a ga dxelawe̱'.
\p Ca'an belune̱'. 
\v 9 Bénnea' zue̱' dxu'a ga dxelawe̱' bxue̱' nisa na' da bexaca na xrise uva wal-la, ne quebe nézene̱' ga za na. Benne' we̱n zrin ca' zaj nézene̱' ga za na lawe' da gulegué̱'e̱ nisa na'. Nadxa bénnea' zue̱' dxu'a ga dxelawe̱' gunné̱' benne' wechaga na', 
\v 10 na' guzre̱' le̱':
\p ―Xúgute̱ benne' dxelebéaje̱' nedxu xrise uva wal-la nácadxa chawe', na' gate ba gulé'ajle̱'e̱ benne' ca' zaj zre̱'e̱ laní, nadxa dxelebéaje̱' xrise uva wal-la quebe zúateca chawe'. Lue' bcuézaquezu' xrise uva wal-la chawe' na', ne guléaju' na na'a.
\p
\v 11 Da nigá da be̱n Jesús lu xe̱zre Caná da nababa Galilea naca na tu xel-la' waca zrente̱ da be̱ne̱' nedxu, da ble'e na xel-la' szren chee̱', na' benne' ca' dxusé̱dene̱' guléajle̱'e̱ chee̱'.
\p
\v 12 Gudé na' Jesús bezé̱'e̱ zexíaje̱' xe̱zre Capernaum, zéajle̱ xrne̱'e̱ Le̱' nen benne' biche̱' ca', ne benne' ca' dxusé̱dene̱'. Na' gulezúe̱' na' zane' zra.
\s1 Jesús dxucá'ana chawe̱' chale'aj xudau'
\r (Mt. 21.12-13; Mr. 11.15-18; Lc. 19.45-46)
\p
\v 13 Na' Jesús guxíaje̱' xe̱zre Jerusalén lawe' da ba za Laní Pascua gate benne' judío ca' dxulusá lazre̱' ca be̱n Dios, bebéaje̱' xra xrtawe̱' ca' lu xe̱zr la xu Egipto. 
\v 14 Lu xe̱zre Jerusalén blé'ene̱' lu chale'aj xudau' na' zaj zra' benne' dxelexutie̱' be̱zre ca', ne zrila' ca', ne bgúgudu ca', béadu ca' dxelutie̱' lau Dios. Cá'anqueze blé'ene̱' na' benne' dxuluxuché̱'e̱ dumí chee̱ xe̱zr zitu' ca'. 
\v 15 Gate ble'e Jesús da caní, na' bgu'e̱ du ca' da güe̱'e̱ benne' ca', na' bebéaje̱' ca naca benne' ca' tu zrente̱ nen be̱zre chee̱' ca', ne zrila' chee̱' ca'. Na' gudxú'une̱' lu xula dumí chee̱ benne' ca' dxuluxuché̱'e̱ dumí, ne bdxixre̱' blaga' ca' chee̱ benne' ca'. 
\v 16 Na' guzre̱' benne' ca' dxelexutie̱' bgúgudu ca':
\p ―¡Le xebéaj da caní! Quebe gunle lizre Xra' ca tu lawe' xi'a.
\p
\v 17 Nadxa benne' ca' dxuse̱de Jesús xeajlesá lazre̱' da naxúaj na lu xiche chee̱ Dios, da dxenná na: Dxácate̱ zi' lázrdawa' lawe' da dxé'le̱'a gunne xue chee̱ lizru'.
\p
\v 18 Nadxa judío blau ca' buluche̱be̱' Jesús:
\p ―¿Bi xel-la' waca da za xabáa gulé'enu' netu' da gulé'e na napu' xel-la' dxenná bea dxunu' da caní?
\p
\v 19 Beche̱be Jesús:
\p ―Le guzría xi' xudau' nigá, na' neda', te chunna zra xechisa' na.
\p
\v 20 Nadxa judío ca' gulé̱'e̱ Le̱':
\p ―Xrupe xun iza ba zeaj dxelune̱' xudau' nigá, na' Lue', ¿xechisu' na chunna zraze?
\p
\v 21 Bchalaj Jesús chee̱ xudau' na' da naca na be̱l-la' dxen chee̱'. 
\v 22 Chee̱ le̱ na', gate bebán Jesús ládujla benne' gate, na' benne' ca' bsé̱dene̱' xeajlesá lazre̱' ca da gunné̱', na' guléajle̱'e̱ chee̱ da naxúaj na lu xiche chee̱ Dios ca naca chee̱ Jesús, ne chee̱ da guzre Jesús le̱'.
\s1 Jesús núnbe'e̱ xúgute̱ bénneache
\p
\v 23 Gate zua Jesús xe̱zre Jerusalén lu Laní Pascua chee̱ judío ca', na' benne' zan guléajle̱'e̱ chee̱' gate belelé'ene̱' ca naca xel-la' waca zren ca' da dxune̱'. 
\v 24 Jesús quebe bde cuine̱' lu na' benne' ca' lawe' da nézquezne̱' quegá xúgute̱ benne' ca' dxeléajle̱'e̱ chee̱'. 
\v 25 Quebe guchínene̱' nu benne' xe̱'e̱ Le̱' ca zaj naca bénneache lawe' da nézquezne̱' ca da zaj xu'u xichaj lázxdau bénneache.
\c 3
\s1 Jesús dxuchálajle̱ne̱' Nicodemo
\p
\v 1 Zua tu benne' xudau' fariseo le̱' Nicodemo. Naque̱' benne' blau láwela benne' judío ca'. 
\v 2 Benne' nigá guxíaje̱' xeajnné̱'e̱ Jesús chizrela, na' guzre̱' Le̱':
\p ―Benne' Wese̱de, nézentu' Dios nasel-le̱' Lue' chee̱ gusé̱denu' netu' lawe' da quebe nu benne' gaca gune̱' ca zaj naca xel-la' waca zrente̱ da dxunu' Lue' che quebe zúale̱ Dios le̱'.
\p
\v 3 Nadxa Jesús guzre̱' le̱':
\p ―Da li dxapa' lue', nu benne' quebe gálaje̱' xecha lasa quebe gaca gaque̱' tuze benne' ca' dxenná be'e Dios.
\p
\v 4 Nicodemo bche̱be̱' Jesús:
\p ―¿Ájazra gaca xexalaj tu benne' ba naque̱' gula? ¿Waca xexu'e̱ le̱'e xrne̱'e̱ chee̱ gálaje̱' xetú?
\p
\v 5 Jesús beche̱be̱':
\p ―Da li dxapa' lue', nu benne' quebe gálaje̱' ne̱ chee̱ nisa chee̱ xrtizra' Dios, ne ne̱ chee̱ Be' Lá'azxa, quebe gaca chu'e̱ naga dxenná bea Dios. 
\v 6 Benne' nálaje̱' lu ni'a lu na' bénneache, naque̱' bénneacheze. Nu benne' nálaje̱' ne̱ chee̱ Be' Lá'azxa, naca ban bénnea' ne̱ chee̱ Be' Lá'azxa. 
\v 7 Quebe xebánenu' lawe' da dxapa' lue', dxun na ba xen gálaju' xecha lasa. 
\v 8 Gátete̱ze dxaca be'. Dxennu' ca schaga da dxun na, na' quebe nézenu' gala za na, ne gala zeaj na. Cá'anqueze naca chee̱ benne' zaj nálaje̱' ne̱ chee̱ Be' Lá'azxa. Gaca le'enu' da ba nun Be' na' lu xichaj lázxdau bénnea', na' quebe dxelé'enu' ájala dxun Be' na'.
\p
\v 9 Nadxa Nicodemo bche̱be̱' Jesús:
\p ―¿Ájazra gaca da caní?
\p
\v 10 Beche̱be Jesús:
\p ―Lue' nacu' tu benne' wesé̱de blau ládujla benne' Israel ca', na' ¿quebe nézenu' da caní? 
\v 11 Da li dxapa' lue', netu' dxuchálajntu' ca naca da nézentu', ne dxexeché̱bentu' ca da blé'entu', na' le'e quebe dxéajle̱le da dxe̱ntu' le'e. 
\v 12 Che quebe dxéajle̱le chia' gate dxuchálajle̱na' le'e ca naca chee̱ da dxaca lu xe̱zr la xu nigá, ¿ájazra gaca chéajle̱le chia' che guchálajle̱na' le'e chee̱ da dxaca xabáa?
\p
\v 13 ’Quebe ne cuen tu benne' xabáa chee̱ lé'ene̱' ca dxaca na'. Tuze Bénnea' bétaje̱' xabáa, Bénnea' naca' neda', Benne' Gulje̱' Bénneache, naca' Bénnea' zúaqueze̱' xabáa. 
\v 14 Ca be̱n Moisés, bde̱'e̱ tu be̱la' xia le̱'e̱ xaga naga zua le̱'e̱ xixre' lawe' lataj, cá'anqueze neda', Benne' Gulje̱' Bénneache, wuludá'queze̱' neda' tu le̱'e̱ xaga, 
\v 15 chee̱ quebe xelebía xi' nu benne' xeléajle̱'e̱ chia'. Zrué'e bénnea' xel-la' nabán da zeajlí canna.
\s1 Dios dxezrí'i lazre̱' bénneache
\p
\v 16 Dios dxezrí'i lázrele̱'e̱ne̱' bénneache, na' chee̱ le̱ na' bdee̱' Zrí'ine̱' tu licha' chee̱ quebe xelebía xi' nu benne' dxeléajle̱'e̱ chee̱'. Zrué'e bénnea' xel-la' nabán da zeajlí canna. 
\v 17 Dios gusél-le̱' Zrí'ine̱' lu xe̱zr la xu nigá, quegá chee̱ guzría xi'e̱ bénneache, san chee̱ guselé̱' bénneache.
\p
\v 18 Bénnea' dxéajle̱'e̱ chee̱ Zri'ine Dios quebe naca chee̱' cuía xi'e̱, san nu benne' quebe dxéajle̱'e̱ chee̱' ba naca chee̱' cuía xi'e̱ lawe' da quebe dxéajle̱'e̱ chee̱ Zri'ine Dios, bi tu licha' chee̱'. 
\v 19 Benne' ca' quebe dxeléajle̱'e̱ chee̱' ba zaj naca chee̱' cuía xi'e̱ lawe' da gate bla' xel-la' naxaní' lu xe̱zr la xu nigá, beledánedxene̱' da chul-la ca xel-la' naxaní', lawe' da dxelune̱' da cale̱la. 
\v 20 Xúgute̱ benne' dxelune̱' da cale̱la dxelecuídene̱' xel-la' naxaní', ne quebe dxelebigue̱' lu xel-la' naxaní', chee̱ quebe gaca bea da cale̱la da dxelune̱'. 
\v 21 Benne' ca' dxelune̱' ca naca da li dxelebigue̱' lu xel-la' naxaní' chee̱ gaca bea naca na chee̱ Dios da dxelune̱'.
\s1 Da gunná Juan, bénnea' bchue̱' bénneache nisa
\p
\v 22 Gudé na' guxíaj Jesús naga nababa Judea nen benne' ca' dxusé̱dene̱', na' guzúe̱' na' zane' zra nen benne' ca', dxuluchúe̱' bénneache nisa. 
\v 23 Cá'anqueze zua Juan lu xe̱zr la xu chee̱ xe̱zre Enón da zua gáguze naga dxe' xe̱zre Salím, dxuchúe̱' bénneache nisa lataj na' lawe' da dé̱le̱'e̱ na' nisa zila, na' belezrín benne' zan naga zua Juan, na' beledxúe̱' nisa. 
\v 24 Da nigá guca na nédxudxa gate quebe ne xelegú'e̱ Juan lizre xia.
\p
\v 25 Nadxa bal-la benne' zaj de̱'e̱ Juan gulezú lawe̱' dxulutil-le̱' judío ca' dizra' ca naca chee̱ da dxucá'ana chawe na bénneache lau Dios. 
\v 26 Nadxa xeajlegue̱zre̱' Juan:
\p ―Benne' wese̱de, bénnea' ble̱'e̱ naga zu' chalá'a xe̱gu Jordán naga dxalaj gubizra, bénnea' bchálajle̱nu' netu' chee̱', na'a dxuchúe̱' bénneache nisa, na' xúgute̱ bénneache zjácale̱ne̱' Le̱'.
\p
\v 27 Nadxa Juan guzre̱' benne' ca':
\p ―Quegá nu benne' gaca bi gape̱' che quebe gunezruj Dios na chee̱'. 
\v 28 Le'e bénquezle gunnía' neda' quebe nácaqueza' neda' Cristo, Bénnea' guche̱be lazre' Dios sel-le̱'. Naca' tu benne' nasel-la Dios chee̱ quia lawa' lau Le̱'. 
\v 29 Lu laní chee̱ wechaga na', bénnea' si'e̱ nu'ula wechaga na' naque̱' benne' wechaga na', na' benne' ljwezre benne' wechaga na', bénnea' zue̱' na', ne dxenne̱' chee̱', dxebéle̱'e̱ne̱' gate dxenne̱' da dxuchalaj benne' wechaga na'. Cá'anqueze neda' dxebéle̱'e̱da' lawe' da caní naca' ljwezre Cristo. 
\v 30 Le̱' dxal-la' gácadxe̱' szren, na' neda' dxal-la' gácadxa' cá'aze.
\s1 Ca naca chee̱ Bénnea' za' xabáa
\p
\v 31 Na' gunná Juan:
\p ―Bénnea' za' xabáa nácadxe̱' blau ca xúgute̱ bénneache. Benne' naque̱' chee̱ xe̱zr la xu nigá naque̱' bénneacheze, ne dxuchálaje̱' ca naca chee̱ da dxaca lu xe̱zr la xu nigáze. Bénnea' ze̱'e̱ xabáa nácadxe̱' szren ca xúgute̱ bénneache. 
\v 32 Le̱' dxuchálaje̱' ca naca chee̱ da ba blé'ene̱', ne da ba benne̱' xabaala, na' quebe dxéajle̱' nu benne' chee̱ da dxenné̱'. 
\v 33 Che nu benne' dxéajle̱'e̱ chee̱', benne' nigá dxulé'ene̱' naca li ca da dxenná Dios. 
\v 34 Bénnea' nasel-la Dios dxuchálaje̱' xrtizra' Dios lawe' da dxunna Dios Le̱' Be' Lá'azxa chee̱' dute̱ ca naque̱'. 
\v 35 Xradxu Dios nazrí'ine̱' Zrí'inequeze̱', ne ba bdee̱' lu ne̱'e̱ xúgute̱ da de̱. 
\v 36 Nu benne' dxéajle̱'e̱ chee̱ Zri'ine Dios nape̱' xel-la' nabán da zeajlí canna, na' benne' quebe dxuzúe̱' dizra' chee̱ Zri'ine Dios quebe gape̱' xel-la' nabán caní. Wadée̱' lu da ba xa' da gun Dios.
\c 4
\s1 Dxuchálajle̱ Jesús tu nu'ula chee̱ tu xe̱zre nababa na Samaria
\p
\v 1 Benne' fariseo ca' belenne̱' zjácale̱ benne' zandxa Jesús ca benne' zjácale̱ne̱' Juan, na' dxuchúa Jesús benne' zandxa nisa ca benne' dxuchúa Juan nisa. 
\v 2 Quebe dxuchúaqueze Jesús bénneache nisa. Benne' ca' dxusé̱dene̱' dxuluchúe̱' bénneache nisa. 
\v 3 Gate guque be'e Jesús da nigá, na' bezé̱'e̱ naga nababa Judea, xexíaje̱' naga nababa Galilea.
\p
\v 4 Ca xu'u Jesús neza, be̱n na ba xen tée̱' naga nababa Samaria. 
\v 5 Ca'an guca, bzrine̱' tu xe̱zre naga nababa Samaria nazí le na Sicar, da dxe' gáguze naga zua xe̱zr la xu na' bnezruj Jacob chee̱ zrí'ine̱', bi le̱be' José. 
\v 6 Lu xe̱zr la xu na' gudé̱n Jacob, zre sua Abraham, tu beaj situj. Ba dxeajxreque Jesús xu'e̱ neza, na' gudxé'e̱ dxu'a beaj na'. Naca na zran wagubizra. 
\v 7-8 Benne' ca' dxuse̱de Jesús xjaque̱' lu xe̱zre Sicar, xeajlegá'awe̱' da xelawe̱'. Dxácate̱ na' bzrin tu nu'ula Samaria dxu'a beaj na' zeajxri'e̱ nisa, na' Jesús guzre̱' le̱':
\p ―Be̱nna nisa xí'aja'.
\p
\v 9 Nadxa nu'ula na' beche̱be̱':
\p ―¿Ájazra naca, lue', benne' judío, dxenabu' neda' nisa, naca' nu'ula Samaria?
\p Caní gunné̱' lawe' da quebe zaj zra' chawe' benne' judío ca' nen benne' Samaria ca'. 
\v 10 Nadxa beche̱be Jesús:
\p ―Chela nézenu' da dxunna Dios, ne nua' dxenabe̱' lue' nisa xí'aje̱', lue' nábenu' neda', na' neda' gunna' lue' nisa da gunna na lue' xel-la' nabán.
\p
\v 11 Na' nu'ula na' guzre̱' Le̱':
\p ―Benne', quebe bi nuxru' cuéaju' nisa, na' beaj nigá nácale̱'e̱ na situj. ¿Ájazra na' gunu' gunnu' neda' nisa chee̱ xel-la' nabán? 
\v 12 Xra xrtáuntu', Jacob, be̱nne̱' netu' beaj nigá, naga güé'equeze le̱' nisa, ne naga gulé'ajqueze zrí'ine̱', ne be̱ xixre' chee̱'. ¿Nácadxu' szrendxa ca le̱'?
\p
\v 13 Jesús beche̱be̱':
\p ―Xúgute̱ benne' dxelé'aje̱' nisa chee̱ beaj nigá welexebílequezne̱' nisa. 
\v 14 Nu benne' xí'aje̱' nisa da gunézruja' neda', québedxa bílene̱' na, lawe' da nisa na' dxunézruja' neda' galaj na lu xichaj lázrdawe̱' ca tu beaj nisa da gunna na le̱' xel-la' nabán da zeajlí canna.
\p
\v 15 Nadxa nu'ula na' guzre̱' Le̱':
\p ―Benne', be̱nna neda' nisa na', chee̱ québedxa gun na ba xen xida' nigá xedajxrí'a nisa.
\p
\v 16 Na' Jesús guzre̱' nu'ula na':
\p ―Guxíaj xeajnné̱ benne' chiu', na' xídale nigá.
\p
\v 17 Na' beche̱be nu'ula na':
\p ―Quebe nu chilá' benne' chia'.
\p Nadxa Jesús guzre̱' le̱':
\p ―Da li dxennáu' quebe nu chilá' benne' chiu', 
\v 18 lawe' da ba guzúale̱nu' gazxu' benne', na' bénnea' zúale̱nu' na'a quebe naque̱' benne' chiu'. Ca naca da nigá gunnáu' da li.
\p
\v 19 Gate nu'ula' benne̱' da nigá, na' gunné̱':
\p ―Xran, dxéqueda' nacu' lue' benne' dxuchalaje̱' waláz chee̱ Dios. 
\v 20 Xra xrtáuntu' ca' bulucá'ana szrene̱' Dios lu xi'a nigá, na' le'e, benne' judío, dxennale dxun na ba xen gucá'ana szrendxu Dios xe̱zre Jerusalén.
\p
\v 21 Na' beche̱be Jesús:
\p ―Guxéajle̱ chia', nu'ula. Ba za zra gate le'e gucá'ana szrenle Xradxu Dios, ne quebe gun na ba xen xídale lu xi'a nigá, ne quebe gun na ba xen chéajle Jerusalén. 
\v 22 Le'e, benne' Samaria, quebe núnbeale nua' dxucá'ana szrenle. Netu' núnbeantu' Nua' dxucá'ana szrentu', lawe' da za' benne' weselá ládujla benne' judío ca'. 
\v 23 Wazrín zra, ne ba dxezrín zra na', gate benne' ca' da li dxulucá'ana szrene̱' Xradxu Dios, xelune̱' na ne̱ chee̱ Be' Lá'azxa, ne ne̱ chee̱ da li, lawe' da dxaca lazre' Xradxu Dios xulucá'ana szren bénneache Le̱' caní. 
\v 24 Dios naque̱' Be', na' benne' dxulucá'ana szrene̱' Le̱', dxun na ba xen xulucá'ana szrene̱' Le̱' ne̱ chee̱ Be' Lá'azxa, ne ne̱ chee̱ da li.
\p
\v 25 Na' nu'ula na' guzre̱' Le̱':
\p ―Neda' nezda' walá' benne' Mesías (da zéaje̱ na Cristo), na' gate la' Le̱', na' guzéajni'ine̱' dxi'u ca naca xúgute̱.
\p
\v 26 Jesús guzre̱' le̱':
\p ―Neda' naca' Bénnea', dxuchálajle̱na' lue'.
\p
\v 27 Ca gunné̱' ca', na' belexezrín benne' ca' dxuse̱dene̱', na' belexebánene̱' lawe' da dxuchálajle̱ Jesús tu nu'ula Netúe̱' quebe bexázrjene̱' guche̱be̱' Le̱' bi da dxaca lazre̱', u bizra chee̱n dxuchálajle̱ne̱' nu'ula na'. 
\v 28 Nadxa nu'ula na' bca'ane̱' dxe'e chee̱' dxu'a beaj na', na' bezé̱'e̱ zexíaje̱' xe̱zre na' naga xeaje̱zre̱' benne' ca':
\p
\v 29 ―Le da lé'ele tu benne' guzre̱' neda' xúgute̱ da ba be̱na'. ¿Quegá benne' nigá Cristo, Bénnea' sel-la Dios?
\p
\v 30 Nadxa beledxúaj benne' ca' xe̱zre na', zjaque̱' naga zua Jesús. 
\v 31 Dxácate̱ na', benne' ca' dxuse̱de Jesús gulata' xuene̱' Le̱', gulenné̱':
\p ―Benne' Wese̱de, gudagu late'.
\p
\v 32 Jesús guzre̱' benne' ca':
\p ―De̱ da dxawa', da quebe núnbeale le'e.
\p
\v 33 Nadxa benne' ca' dxuse̱de Jesús gulezú lawe̱' dxuluche̱be ljwezre̱', dxelenné̱':
\p ―¿Núteca bedajgú'e̱ da gudawe̱'?
\p
\v 34 Jesús guzre̱' le̱':
\p ―Xela wagu chia' naca na chee̱ guna' da dxaca lazre' Xra', Bénnea' nasel-le̱' neda', ne chee̱ gusexuzra' guna' zrin chee̱'. 
\v 35 Le'e dxennale: “Xetapa beu' xelápadxu.” Neda' dxapa' le'e, le nna' bénneache zaj naque̱' ca tu lina, da bache naca na xelápadxu. 
\v 36 Benne' dxelape̱' dxezi'e̱ lazruj chee̱', na' da dxelape̱' naca na chee̱ xelapa bénneache xel-la' nabán da zeajlí canna, chee̱ sua xel-la' dxebé benne' dxaza tu zren nen benne' ca' dxelelape̱'. 
\v 37 Da li naca ca da dxelenná bénneache: Tu benne' dxaze̱', na' xetúe̱' dxelape̱'. 
\v 38 Neda' gusel-la' le'e xelápale naga quebe gúzale. Ca' naca na, benne' xula belune̱' zrin gulaze̱', na' le'e dxezile ba neza zrin da belún benne' ca'.
\p
\v 39 Benne' zan, benne' xe̱zre na' naga nababa Samaria, guléajle̱'e̱ chee̱ Jesús ne̱ chee̱ xrtizra' nu'ula na', gunné̱': “Guzre̱' neda' xúgute̱ da ba be̱na'.” 
\v 40 Gate belelá' benne' Samaria ca' naga zua Jesús, na' gulata' xuene̱' Le̱' xegá'ane̱' nen le̱', na' begá'ane̱' na' chupa zra. 
\v 41 Benne' zandxa guléajle̱'e̱ chee̱ Jesús gate belenne̱' ca da dxenná Le̱'. 
\v 42 Nadxa gulé̱'e̱ nu'ula na':
\p ―Na'a dxéajle̱ntu' chee̱' quegá tuze ne̱ chee̱ da guzru' lue' netu', na' cá'anqueze lawe' da bénquezentu' netu' chee̱', na' nézentu' da li naque̱' Cristo, Bénnea' guselé̱' ca naca bénneache.
\s1 Jesús dxexune̱' zri'ine tu benne' we̱n zrin blau chee̱ xu'u lawe'
\p
\v 43 Gudé chupa zra bezá' Jesús xe̱zre ca' zaj nababa Samaria, na' guzé̱'e̱ zéaje̱' naga nababa Galilea. 
\v 44 Guxíaje̱' na' lawe' da gunnáqueze Jesús, gunné̱': “Tu benne' dxuchalaje̱' waláz chee̱ Dios, quebe dxelapa benne' lazrie̱' le̱' ba lá'ana.” 
\v 45 Gate bezrine̱' naga nababa Galilea, benne' zaj zre̱'e̱ na' belezí' lu ne̱'e̱ Le̱' du lazre̱', lawe' da xjácaqueze le̱' Laní Pascua da guca na Jerusalén, na' belelé'ene̱' xúgute̱ da be̱n Jesús lu laní na'.
\p
\v 46 Nadxa bezrín Jesús xe̱zre Caná naga nababa Galilea naga be̱ne̱' bexaca nisa xrise uva wal-la. Zua lu xe̱zre Capernaum tu benne' we̱n zrin blau chee̱ xu'u lawe', zua tu zrí'ine̱' bi biu quebe chawe' zúabe'. 
\v 47 Gate ben benne' we̱n zrin blau nigá ba bezá' Jesús naga nababa Judea, ne ba bezrine̱' naga nababa Galilea, na' guxíaje̱' xeajnné̱'e̱ Jesús, na' gutá' xuene̱' Le̱' chéaje̱' lizre̱' xexune̱' bi biu chee̱', bi na' ba zua gátebe'. 
\v 48 Nadxa Jesús guzre̱' le̱':
\p ―Le'e quebe chéajle̱le chia' che quebe lé'ele xel-la' waca chee̱ xabáa da dxulé'eda'.
\p
\v 49 Benne' we̱n zrin blau na' gunné̱':
\p ―Xran, gudázega na'a quebe ne gate zri'ina'.
\p
\v 50 Nadxa guzre Jesús le̱':
\p ―Bexíaj lizru'. Naca ban bi chiu'.
\p Benne' we̱n zrin blau na' guxéajle̱'e̱ chee̱ da guzre Jesús lé̱', na' bezé̱'e̱ zexíaje̱'. 
\v 51 Gate ba zua xezrine̱' lizre̱', na' benne' we̱n zrin chee̱' xeajlexezrígale̱' le̱', na' gulé̱'e̱ le̱':
\p ―Naca ban zri'inu'.
\p
\v 52 Nadxa bche̱be̱' benne' ca' bátala guzú lau bexácabe', na' gulé̱'e̱ le̱':
\p ―Ná'aqueze dxedé wagubizra bedxúaj da la da xu'ube'.
\p
\v 53 Nadxa benne' we̱n zrin blau na' bexúnene̱' guca na la' ná'queze gate guzre Jesús le̱': “Naca ban zri'inu'.” Ca'an guca, le̱', ne xúgute̱ benne' zaj zra' lizre̱' guléajle̱'e̱ chee̱ Jesús.
\p
\v 54 Da nigá naca na xel-la' waca zren da gudxupe' da be̱n Jesús gate bezrine̱' naga nababa Galilea.
\c 5
\s1 Jesús dxexune̱' tu benne' biu naga nazí le na Betesda
\p
\v 1 Ca gudé na' guxú'u tu laní chee̱ judío ca', na' bezrín Jesús xe̱zre Jerusalén. 
\v 2 Lu xe̱zre na', gáguze naga zua dxa xu'u chee̱ xe̱zre da nazí le na Dxa Xu'u Chee̱ Zrila' Ca', dxe' tu cue'la nisa nazí le na Betesda lu dizra' hebreo, na' dxu'a nisa na' zaj nnita gazxu' lachila. 
\v 3 Lachila ca' zaj de̱ benne' zan zaj xu'e̱ we̱', benne' la chul-la ca', ne benne' zaj zua zri ni'a ne̱'e̱, ne benne' zrinnaj ca'. Dxelebeze̱' ca bixre nisa na'. 
\v 4 Ca'an naca lawe' da dxetaj tu gubáz chee̱ xabáa bata gala, ne dxunibe̱' nisa na', na' benne' nedxu dxeajchu'e̱ lu nisa na' ca dxedé dxunibe̱' na, dxexaque̱' chee̱ bítete̱ze xel-la' we̱' xu'e̱. 
\v 5 Zua tu benne' na' ba guca chinu chunne dxua iza xu'e̱ we̱'. 
\v 6 Gate ble'e Jesús benne' nigá, ne dxeque bé'ene̱' ba guca zane' iza xu'e̱ we̱' na', na' bche̱be̱' le̱':
\p ―¿Dxaca lazru' xexacu'?
\p
\v 7 Benne' we̱' na' beche̱be̱':
\p ―Benne', quebe nu chilá' benne' cu'e̱ neda' lu nisa na' ca dxedé dxebixre na. Tu tu lasa gate dxaca lazra' chu'a, benne' xula dxu'e̱ nédxudxa.
\p
\v 8 Jesús guzre̱' le̱':
\p ―¡Guxasa! Becá'a da'a chiu', ne bexíaj.
\p
\v 9 La' ná'queze bexaca benne' we̱' na', na' bequé̱'e̱ da'a chee̱', ne guzú lawe̱' dxedé̱'. Zra na' naca zra dxulupá'ana judío ca', 
\v 10 na' benne' judío ca' gulé̱'e̱ bénnea' bexaque̱':
\p ―Na'a naca na zra dxupá'anadxu. Quebe naca na gu'u da'a chiu'.
\p
\v 11 Na' benne' na' beche̱be̱':
\p ―Bénnea' bexune̱' neda' guzre̱' neda': “Becá'a da'a chiu', ne bexíaj.”
\p
\v 12 Nadxa buluche̱be̱' le̱':
\p ―¿Nuzra na' guzre̱' lue': Becá'a da'a chiu', ne bexiaj?
\p
\v 13 Benne' na' quebe nézene̱' nu bénnea' bexune̱' le̱' lawe' da ba zexíaj Jesús láwela benne' zan ca' zaj zre̱'e̱ na'. 
\v 14 Ca gudé na' Jesús bezrague̱' bénnea', dxedé̱' chale'aj xudau', na' guzre̱' le̱':
\p ―¡Gunná'xque! Ba bexacu' na'a. Québedxa gunu' dul-la, chee̱ quebe bi sacu' xetú da wál-ladxa.
\p
\v 15 Nadxa benne' na' bezé̱'e̱ zexíaje̱', na' bzenne̱' judío ca' bexún Jesús le̱'. 
\v 16 Chee̱ le̱ na' benne' judío ca' guláu zi' xuzre̱' Jesús, ne gulaca lazre̱' xelútie̱' Le̱' lawe' da dxune̱' da caní lu zra dxulupá'ane̱'. 
\v 17 Jesús guzre̱' benne' ca':
\p ―Dios, Xra', tu dxúnzqueze̱' zrin, na' neda' dxuna' zrin.
\p
\v 18 Chee̱ le̱ na' benne' judío ca' gulaca lázredxe̱' xelútie̱' Jesús lawe' da quegá tuze dxuzúe̱' chalá'ala da nadxixruj bea na chee̱ zra dxulupá'ane̱', na' cá'anqueze dxun cuine̱' ca Dios gate gunné̱' Dios nácaqueze̱' Xre̱'.
\s1 Xel-la' dxenná bea da napa Zri'ine Dios
\p
\v 19 Nadxa Jesús guzre̱' benne' judío ca':
\p ―Da li dxapa' le'e, neda', Zri'ine Dios, quebe gaca bi guna' cheé̱zqueza'. Tuze dxuna' da dxelé'eda' dxun Xra'. Xúgute̱ da dxun Xra', cá'anqueze dxuna' neda', Zrí'ine̱'. 
\v 20 Dios, Xra', nazrí'ine̱' neda', Zrí'ine̱', ne dxulé'ene̱' neda' xúgute̱ da dxúnqueze̱' Le̱', na' gulé'ene̱' neda' da zaj nácadxa szren ca da ca' dxuna', na' xebánequezle le'e ca xelaca na. 
\v 21 Ca dxun Xradxu Dios, dxusebane̱' benne' gate, ne dxuxunézruje̱' xel-la' nabán chee̱', cá'anqueze neda', Zrí'ine̱', dxuxunézruja' xel-la' nabán chee̱ benne' ca' dxaca lazra' xunézruja' na. 
\v 22 Xradxu Dios quebe dxuchi'e̱ nu benne', san ba be̱nne̱' neda', Zrí'ine̱', xel-la' dxenná bea guchi'a da dxelún tu tu bénneache, 
\v 23 chee̱ xelapa xúgute̱ benne' neda', Zrí'ine̱', ba lá'ana, cáte̱ze na' dxelape̱' ba lá'ana Dios, Xra'. Nu benne' quebe dxape̱' ba lá'ana neda', Zrí'ine̱', cá'anqueze quebe dxape̱' ba lá'ana Xradxu Dios nasel-le̱' neda'.
\p
\v 24 ’Da li dxapa' le'e, benne' dxenne̱' da dxennéa' neda', ne dxéajle̱'e̱ chee̱ Dios nasel-le̱' neda', benne' nigá nape̱' xel-la' nabán da zeajlí canna, na' quebe cuía xi'e̱ lawe' da ba bedxúaje̱' lu na' xel-la' gute, ne ba zue̱' lu xel-la' nabán. 
\v 25 Da li dxapa' le'e, wazrín zra, ne ba dxezrín zra na' gate benne' gate ca' xelenne̱' chi'a neda', Zri'ine Dios, na' benne' xuluzúa xrtizra' welaca bánqueze̱'. 
\v 26 Xráqueza' nape̱' xel-la' dxenná bea xunézruje̱' xel-la' nabán da naca na li lazre' chee̱ bénneache, ne cá'anqueze ba be̱nne̱' neda', Zrí'ine̱', xel-la' dxenná bea xunézruja' bénneache xel-la' nabán caní, 
\v 27 ne ba be̱nne̱' neda' xel-la' dxenná bea guchi'a chee̱ bénneache lawe' da naca' Benne' Gulje̱' Bénneache. 
\v 28 Quebe xebánele chee̱ da nigá lawe' da zrin zra gate xúgute̱ benne' gate xelenne̱' chi'a 
\v 29 xelexedxúaje̱' lu xe̱dxu ba. Benne' ca' belune̱' da xrlátaje xelexebane̱' chee̱ xelape̱' xel-la' nabán da zeajlí canna. Benne' ca' belune̱' da cale̱la xelexebane̱' chee̱ xelebía xi'e̱.
\s1 Da dxelunna bea na napa Jesús xel-la' dxenná bea
\p
\v 30 Na' gunná Jesús:
\p ―Neda' quebe bi gaca guna' cheé̱zqueza'. Neda' dxuchi'a chee̱ bénneache ca gunná bea Dios, Xra', neda', na' ca dxuchi'a naca na xrlátaje lawe' da quebe dxuna' ca da dxaca lázrequeza' neda'. Dxuna' ca da dxaca lazre' Xra', nasel-le̱' neda'. 
\v 31 Che neda' dxexeche̱ba' da nácaze cheé̱queza', da dxennéa' quebe naca na da dxunna bea na. 
\v 32 Zua tu benne' xula dxexeche̱be̱' da nácaqueze chia', na' da dxenné̱' naca na da dxunna bea na. 
\v 33 Le'e gusél-lale benne' xeajleche̱be̱' Juan, na' ca da beche̱be̱' naca na da li. 
\v 34 Da dxunna bea na da dxuxrén lazra' neda' quebe naca na chee̱ bénneacheze. Dxapa' le'e da nigá chee̱ lale le'e. 
\v 35 Juan na' guque̱' ca tu xi' da gula na, ne bsení na, na' le'e bezaca ba lázrele lu xi' na' tu chí'idau'. 
\v 36 Zua tu da dxunna bea na chia' neda', da nácadxa szren ca da bchalaj Juan. Da ca' dxuna' neda', da bsebaga Xra' neda' dxuna'. Da caní dxelunna bea na da li Dios, Xra', gusél-le̱' neda'. 
\v 37 Cá'anqueze Xra' nasel-le̱' neda' dxexeche̱be̱' chia'. Lácala ba bchalaj Le̱', le'e quebe ne xénele chi'e̱, ne quebe ne lé'ele Le̱', 
\v 38 ne quebe nuzúale dizra' chee̱' xichaj lázrdaule lawe' da quebe dxéajle̱le chia' neda', nasel-la Xra' neda'. 
\v 39 Le'e dxusé̱dele du lázrele da naxúaj na lu xiche chee̱ Dios lawe' da dxéquele xezrélele xel-la' nabán da zeajlí canna lu xiche na', na' da naxúaj na lu xiche chee̱ Dios dxuchalaj na ca naca chia' neda'. 
\v 40 Le'e quebe dxaca lázrele xídale naga zua' neda' chee̱ gápale xel-la' nabán na'.
\p
\v 41 ’Neda' quebe dxezi'a xel-la' ba lá'ana ca da dxelunna bénneache, da quebe naca na li lazre'. 
\v 42 Neda' núnbe'a le'e, ne nezda' quebe nazrí'ile Dios. 
\v 43 Bla'a neda' waláz chee̱ Dios, Xra', na' le'e quebe dxezí' lu na'le neda'. Che za' tu benne' lu da naca cheé̱zqueze̱', benne' na' wazí' lu na'le. 
\v 44 ¿Ájazra gaca chéajle̱le le'e chia' che dxunle zrin chee̱ xelapa ljwézrele le'e ba lá'ana, ne quebe dxue lázrele sile xel-la' ba lá'ana da dxunna Dios tu licha'? 
\v 45 Quebe guéquele néda'queza' gusebaga' le'e zria lau Dios, Xra'. Da gusebaga le'e zria naca na da ba gunná Moisésqueze, da na' dxuxrén lázrele guselá na le'e. 
\v 46 Che da li guxéajle̱le le'e chee̱ da gunná Moisés, cá'anqueze chéajle̱le chia' neda' lawe' da bzuaj Moisés ca naca chia' neda'. 
\v 47 Na'a, che quebe dxéajle̱le chee̱ da bzuaj le̱', ¿ájazra gaca chéajle̱le chee̱ da dxapa' le'e?
\c 6
\s1 Jesús dxugawe̱' chi xun gaxúa benne' biu
\r (Mt. 14.13-21; Mr. 6.30-44; Lc. 9.10-17)
\p
\v 1 Ca gudé na' guxíaj Jesús xecha la'a dxu'a nísadau' chee̱ Galilea, da nazíqueze le na nísadau' chee̱ Tiberias. 
\v 2 Benne' zante̱ zjácale̱ne̱' Jesús lawe' da ba belelé'ene̱' xel-la' waca zren ca' da dxun Le̱', dxexune̱' benne' we̱' ca'. 
\v 3 Nadxa Jesús guluéne̱' tu lu xi'a, na' gudxé'e̱ na' nen benne' ca' dxusé̱dene̱'. 
\v 4 Ba zua gagu Laní Pascua chee̱ judío ca'. 
\v 5 Gate ble'e Jesús benne' zan ca' zá'aque̱' zeaj nawe̱' Le̱', na' guzre̱' Felipe:
\p ―¿Gazra cheajxridxu da xelagu benne' zan caní?
\p
\v 6 Gunná caní Jesús chee̱ la' bi nna Felipe, lawe' da ba neze Jesús ca da gune̱'. 
\v 7 Nadxa beche̱be Felipe:
\p ―Che sidxu xeta xtila lazruj da sidxu chee̱ chupa gaxúa zra, quebe gueque na xelezí' benne' caní late' weaj.
\p
\v 8 Nadxa Andrés, xetú benne' ca' dxuse̱de Jesús, ne naque̱' bi biche Simón Pedro, guzre̱' Jesús:
\p
\v 9 ―Ze̱ tu bi cuide' nigá nápabe' gazxu' xeta xtila zrua' cebada, ne chupa bela. ¿Ájazra gun da nigá gueque na chee̱ xúgute̱ benne' caní?
\p
\v 10 Nadxa gunná Jesús:
\p ―Le xe̱ xúgute̱' xelebé'e̱.
\p Naca lu daca lataj na', na' gulebé' ca du chi xun gaxúa benne' biu. 
\v 11 Nadxa gucá'a Jesús xeta xtila ca', na' ca gudé guzre̱' Dios “Xcalenu'”, bnézruje̱' na benne' ca' dxusé̱dene̱', na' benne' caní gulísie̱' na láwele benne' zan ca' zaj dxe'e̱ na'. Cá'anqueze be̱n Jesús chee̱ bela ca', na' bnézruje̱' ca da gulaca lazre' benne' ca'. 
\v 12 Gate gulélaje benne' ca', na' Jesús guzre̱' benne' ca' dxusé̱dene̱':
\p ―Le xutupa da bízrujdu ca' da dxelexegá'ana na, chee̱ quebe bi gaca dítaje.
\p
\v 13 Belexequé̱'e̱ na, na' buluzré̱'e̱ chazrinnu xcuite da bizruj ca' zaj nagá'ana na chee̱ da gazxu' xeta xtila zrua' cebada ca'. 
\v 14 Nadxa benne' zan ca', gate belelé'ene̱' xel-la' waca zren nigá da be̱n Jesús, gulenné̱':
\p ―Da li benne' nigá naque̱' bénnea' guchálaje̱' waláz chee̱ Dios, bénnea' dxal-la' le̱'e̱.
\p
\v 15 Guque bé'ene̱' Jesús dxelaca lazre̱' xeleché̱'e̱ Le̱' xadía chee̱ xuluzúe̱' Le̱' ca benne' wenná bea, na' bezé̱'e̱ na', ne begüéne̱' lu xi'a sibe na' chee̱ sue̱' le̱ze̱'.
\s1 Jesús dxedé̱' lawe' nísadau'
\r (Mt. 14.22-27; Mr. 6.45-52)
\p
\v 16 Gate ba za xrinne, benne' ca' dxuse̱de Jesús belétaje̱' dxu'a nísadau', 
\v 17 na' gulu'e̱ lu da dxedá lawe' nísadau', ne gulezú lawe̱' zjaque̱' xeledée̱' xechalá'a nísadau' chee̱ xelezrine̱' xe̱zre Capernaum. Ca guxrinne, quebe ne xezrín Jesús na'. 
\v 18 Nadxa guzú lau dxaca tu be' bdunu' lawe' nísadau' na', na' xeajxruza chee̱ nísadau' na' guxásale̱'e̱ na. 
\v 19 Gate ba guledée̱' lu nísadau' na' catite sadxu tu chi'i zren, na' belelé'ene̱' Jesús ba dxezrine̱' naga ziaj da dxedá lawe' nísadau', dxezé̱'e̱ lawe' nísadau', na' belezrebe̱'. 
\v 20 Nadxa Jesús guzre̱' benne' ca':
\p ―Neda' na'. Quebe zrébele.
\p
\v 21 Nadxa lu dute̱ xel-la' dxelebé gulezí' lu ne̱'e̱ Le̱' lu da dxedá lawe' nísadau' na', na' chadite̱ belezrine̱' lu xe̱zr la xu naga zjaque̱'.
\s1 Benne' zan ca' dxelexílaje̱' Jesús
\p
\v 22 Zra xula benne' zan ca', benne' belexegá'ana xecha la'a nísadau', guleque bé'ene̱' ba zeajxaca benne' ca' dxuse̱de Jesús lu da dxedá lawe' nísadau' tu licha' da dxe' chalá'a na', na' Jesús quebe guxíajle̱ne̱' benne' ca'. 
\v 23 Dxácate̱ na' xezícala da dxeledá lawe' nísadau', da ca' beledxúaj na xe̱zre Tiberias, belezrín na tu lataj da zua gáguze naga gulawe̱' xeta xtila na' ca gudé guzre Xránadxu Dios: “Xcalenu'.” 
\v 24 Chee̱ le̱ na' gate benne' zan ca' guleque bé'ene̱' québedxa zua Jesús na', ne cá'anqueze benne' ca' dxusé̱dene̱', na' gulu'e̱ lu da dxeledá lawe' nísadau', ne xjaque̱' xe̱zre Capernaum zeajlexedílaje̱' Jesús.
\s1 Jesús naque̱' xeta xtila da dxunna na xel-la' nabán li lazre'
\p
\v 25 Gate benne' zan ca' belezrine̱' xecha la'a dxu'a nísadau', na' belexezrague̱' Jesús, ne buluche̱be̱' Le̱':
\p ―Benne' Wese̱de, ¿bata bla'u nigá?
\p
\v 26 Jesús guzre̱' benne' ca':
\p ―Da li dxapa' le'e, dxexílajle le'e neda' lawe' da gudágule, ne béljele, ne quegá lawe' da ble'ele xel-la' waca ca' da ble'eda' le'e. 
\v 27 Quebe cue'le gunne xue sile da gágule da te chee̱ na. Le cue' gunne xue sile da gágule da zeajlí canna, da na' gunna na le'e xel-la' nabán da zeajlí canna. Da nigá naca na xel-la' wagu da gunna' neda', Benne' Gulje̱' Bénneache, le'e, lawe' da bzua Xra' Dios nen neda' da dxunna bea na naca' Zrí'ine̱'.
\p
\v 28 Nadxa buluche̱be̱' Le̱':
\p ―¿Bi dxal-la' guntu' chee̱ gaca ca da dxaca lazre' Dios guntu'?
\p
\v 29 Jesús beche̱be̱':
\p ―Da dxaca lazre' Dios gunle naca na chéajle̱le chia' neda', naca' Bénnea' gusel-la Dios.
\p
\v 30 Nadxa buluche̱be̱' Le̱':
\p ―¿Bizra xel-la' waca gunu' chee̱ le'entu' na, na' chéajle̱ntu chiu'? ¿Bizra dxunu'? 
\v 31 Xra xrtauntu' ca' gulawe̱' xeta maná le̱'e̱ xixre' lawe' lataj, ca naxúaj na lu xiche chee̱ Dios, dxenná na: Dios bgawe̱' benne' ca' xeta xtila da za xabáa.
\p
\v 32 Beche̱be Jesús:
\p ―Da li dxapa' le'e, quegá Moisés na' bnézruje̱' benne' ca' xeta xtila da za xabáa. Dios, Xra', dxunne̱' le'e xeta xtila da za xabáa da naca na li lazre'. 
\v 33 Xeta xtila na' da dxunna Dios le'e naca na Bénnea' bétaje̱' xabáa, ne dxunézruje̱' chee̱ bénneache xel-la' nabán li lazre'.
\p
\v 34 Nadxa benne' ca' gulé̱'e̱ Le̱':
\p ―Xran, tu bé̱nnazqueze chee̱ntu' xeta xtila caní.
\p
\v 35 Jesús guzre̱' benne' ca':
\p ―Neda' naca' xeta xtila da dxunna na xel-la' nabán li lazre'. Benne' xide̱' naga zua' neda' cabátadxa tune̱', na' benne' chéajle̱'e̱ chia' cabátadxa bílene̱'. 
\v 36 Naca na ca ba gucha' le'e. Le'e na' quebe dxéajle̱le chia', lácala ba ble'ele neda'. 
\v 37 Xúgute̱ benne' ca' dxunna Xra' neda', xelelé̱'e̱ lawa', na' benne' ca' xelelé̱'e̱ naga zua', quebe guzúa' benne' ca' chalá'ala. 
\v 38 Neda' guzá'a xabáa, quegá chee̱ guna' ca dxaca lázrequeza' neda'. Bla'a chee̱ guna' ca da dxaca lazre' Xra', gusel-le̱' neda'. 
\v 39 Da dxaca lazre' Xra', nasel-le̱' neda', naca na chee̱ quebe gunitia' netú benne' ca' ba be̱nne̱' chia'. Nacan chee̱ gusebana' benne' ca' lu zra bze̱be. 
\v 40 Da dxaca lazre' Xra', nasel-le̱' neda', naca na chee̱ xelapa bénneache xel-la' nabán da zeajlí canna, xúgute̱ benne' ca' xelenné̱'e̱ neda', Zri'ine Dios, ne xeléajle̱'e̱ chia' neda', na' chee̱ gusebana' neda' benne' ca' lu zra bze̱be na'.
\p
\v 41 Gate belenne̱' da nigá, na' judío ca' gulezú lawe̱' dxelezí tizre̱' Jesús lawe' da gunné̱': “Neda' naca' xeta xtila da betaj xabáa.” 
\v 42 Nadxa gulenné̱':
\p ―¿Quegá benne' nigá zri'ine José? Dxi'u núnbeadxu xra xrne̱'e̱. ¿Bizr chee̱ na' dxenné̱' bétaje̱' xabáa?
\p
\v 43 Nadxa Jesús guzre̱' benne' ca':
\p ―Québedxa si tízrale. 
\v 44 Quebe nu benne' gaca xide̱' naga zua' neda', che quebe xedajgúa Xra' nasel-le̱' neda' bénnea', na' neda' gusebana' bénnea' lu zra bze̱be na'. 
\v 45 Lu xiche ca' naga naxúaj da gulenná benne' ca' buluchalaje̱' waláz chee̱ Dios, dxenná na: Dios gusé̱dene̱' xúgute̱ bénneache. Ca' gaca na, xúgute̱ benne' ca' dxuluzé̱ nague̱' ca da dxuse̱de Xra', dxelelé̱'e̱ naga zua'.
\p
\v 46 ’Quebe ne le'e nu benne' Xra'. Benne' tu licha', bénnea' blé'ene̱' Le̱', naca bénnea' guzé̱'e̱ naga zua Dios. 
\v 47 Da li dxapa' le'e, nu benne' dxéajle̱'e̱ chia' neda' nape̱' xel-la' nabán da zeajlí canna. 
\v 48 Neda' naca' xeta xtila da dxunna na xel-la' nabán li lazre'. 
\v 49 Xra xrtáule ca' gulawe̱' xeta maná le̱'e̱ xixre' lawe' lataj, na' gudé na' xúgute̱ benne' ca' gulatie̱'. 
\v 50 Xeta xtila nigá naca na da za xabáa, na' che nu benne' gawe̱' na, quebe gatie̱' tu chi'ize. 
\v 51 Néda'queza' naca' xeta xtila da dxunna na xel-la' nabán da za xabáa. Benne' gawe̱' xeta xtila nigá waca bánqueze̱' chadía chacanna. Xeta xtila na' da dxunna' neda' naca na be̱la' dxen cheé̱zqueza', da gunna' chee̱ xelaca bánqueze bénneache.
\p
\v 52 Nadxa benne' judío ca' gulezú lawe̱' dxuluche̱be ljwezre̱', dxelenné̱':
\p ―¿Ájazra gun benne' nigá, gunne̱' dxi'u be̱la' dxen cheé̱zqueze̱' chee̱ gágudxu na?
\p
\v 53 Jesús guzre̱' benne' ca':
\p ―Da li dxapa' le'e, che le'e quebe gágule be̱la' dxen chia' neda', Benne' Gulje̱' Bénneache, ne che quebe xí'ajle dxen chia', quebe gápale xel-la' nabán li lazre'. 
\v 54 Benne' dxawe̱' be̱la' dxen chia', ne dxí'aje̱' dxen chia' nape̱' xel-la' nabán da zeajlí canna, na' neda' gusebana' bénnea' lu zra bze̱be na'. 
\v 55 Be̱la' dxen chia' naca na xel-la' wagu li lazre' chee̱ bénne'du xu'ule, na' dxen chia' naca na da xele'aj bénneache da naca na li lazre'. 
\v 56 Benne' dxawe̱' be̱la' dxen chia', ne dxí'aje̱' dxen chia', naque̱' neda' tuze, na' néda'queza' naca' bénnea' tuze. 
\v 57 Xra' nasel-le̱' neda' xu'u lu ne̱'e̱ xel-la' nabán li lazre', na' neda' naca bana' ne̱ chee̱ Le̱'. Cá'anqueze bénnea' dxawe̱' da naca chia' neda' gaca bánqueze̱' ne̱ chia' neda'. 
\v 58 Da nigá naca na xeta xtila da za xabáa. Xeta xtila nigá quebe naca na ca xeta maná da gulagu xra xrtáule ca', na' gudé na' gulate xúgute̱'. Benne' dxawe̱' xeta xtila nigá waca bánqueze̱' chadía chacanna.
\p
\v 59 Bse̱de Jesús ca naca da caní naga zaj zra' benne' zan ca' lu xu'u naga dxelezraga bénneache chee̱ xe̱zre Capernaum.
\s1 Ca naca dizra' na' da dxunna na xel-la' nabán da zeajlí canna
\p
\v 60 Gate belén benne' zan ca' da nigá dxuse̱de Jesús, na' benne' ca' zjácale̱ Jesús gulenné̱':
\p ―Dizra' caní dxenná Jesús zaj nácale̱'e̱ na ste̱be sidxu. ¿Nuzra gaca gun caní?
\p
\v 61 Guque bé'ene̱' Jesús dxelenné̱' chee̱ xrtizre̱', na' bche̱be̱' benne' ca':
\p ―¿Dxuzúa dizra' nigá le'e ste̱be? 
\v 62 ¿Ájazra gunle checa' lé'ele neda', Benne' Gulje̱' Bénneache, xegüéna' xabáa naga zua' nédxute̱? 
\v 63 Be' naca na da dxunna xel-la' nabán li lazre'. Da naca na be̱la' dxen quebe bi zaca na. Dizra' ca' da ba gucha' le'e zaj naca na chee̱ Be', ne zaj naca na da dxelunna na xel-la' nabán li lazre'. 
\v 64 Bál-lale le'e quebe dxéajle̱le chia'.
\p Caní gunná Jesús lawe' da nézene̱' nédxudaute̱ nu benne' ca' quebe dxeléajle̱'e̱ chee̱', ne nua' gudé Le̱' lu na' benne' guledábague̱' Le̱'. 
\v 65 Nadxa gunná Jesús:
\p ―Chee̱ le̱ na' gucha' le'e, quebe nu benne' gaca xide̱' naga zua' neda' che quebe xedajgúa Xra' bénnea'.
\p
\v 66 Lu zra ná'queze benne' zan ca', benne' xjácale̱ne̱' Jesús, québedxa xjácale̱ne̱' Le̱'. 
\v 67 Nadxa Jesús bche̱be̱' benne' chazrinnu ca' dxusé̱dene̱', gunné̱':
\p ―¿Cá'anqueze le'e dxaca lázrele xexíajle?
\p
\v 68 Beche̱be Simón Pedro:
\p ―Xran, ¿nuzra chéajle̱ntu'? Dizra' chiu' naca na da dxunna na xel-la' nabán da zeajlí canna. 
\v 69 Netu' dxéajle̱ntu' chiu', ne nézentu' nacu' Cristo, Zri'ine Dios ban.
\p
\v 70 Jesús beche̱be̱':
\p ―Neda' gucá'a le'e, benne' chazrinnu, na' tu benne' ládujla le'e xu'e̱ da xriwe̱'.
\p
\v 71 Da nigá gunná Jesús, bchálaje̱' ca naca chee̱ Judas Iscariote, zri'ine tu benne' le̱' Simón, lawe' da gudé Judas nigá Jesús lu na' benne' guledábague̱' Le̱'. Naque̱' tu benne' chazrinnu ca' dxuse̱de Jesús.
\c 7
\s1 Benne' biche Jesús quebe dxeléajle̱'e̱ chee̱'
\p
\v 1 Gudé na' gudé Jesús naga nababa Galilea. Quebe guca lazre̱' tee̱' naga nababa Judea lawe' da dxelaca lazre' judío blau zaj zre̱'e̱ na' xelútie̱' Le̱'. 
\v 2 Ba za laní gate judío ca' dxelezúe̱' lu xu'u laga' ca'. 
\v 3 Chee̱ le̱ na' bi biche Jesús gulé̱'e̱ Le̱':
\p ―Quebe xegá'anu' nigáze. Bexíaj Judea, chee̱ cá'anqueze benne' ca' dxeléajle̱ chiu' zaj zre̱'e̱ na' gaca xelelé'ene̱' ca da dxunu'. 
\v 4 Che nu benne' dxaca lazre̱' xelúnbe'e bénneache le̱', quebe dxune̱' da ca' bagácheze. Lawe' da dxunu' Lue' da caní, be̱n na lau xúgute̱ bénneache.
\p
\v 5 Caní gulenné̱' lawe' da quebe dxeléajle̱ benne' biche̱' ca' chee̱ Jesús. 
\v 6 Nadxa Jesús guzre̱' benne' ca':
\p ―Quebe ne zrin zra cha'a na'. Chee̱le le'e bítete̱ze zra waca chéajle. 
\v 7 Benne' ca' zaj naca chee̱ xe̱zr la xu nigá quebe gaca xelecuídene̱' le'e. Dxelecuídene̱' neda' lawe' da dxulé'eda' neda' naca da cale̱la da dxelún benne' ca'. 
\v 8 Le chjaca le'e laní na'. Quebe sa'a neda' na'a lawe' da quebe ne zrin zra cha'a.
\p
\v 9 Ca gudé guzre Jesús benne' ca' da nigá, na' begá'ane̱' naga nababa Galilea na'.
\s1 Jesús dxezrine̱' laní gate judío ca' dxelezúe̱' xu'u laga' ca'
\p
\v 10 Ca gudé besiá'aca benne' biche Jesús, na' cá'anqueze Le̱' guxíaje̱' laní na'. Bagácheze guxíaje̱' chee̱ quebe nu le'e Le̱'. 
\v 11 Benne' xíchaje̱ chee̱ judío ca' belexílaje̱' Jesús lu laní na'. Dxelenné̱':
\p ―¿Gazra zua bénnea'?
\p
\v 12 Ládujla benne' zan ca', benne' zan buluchálaje̱' ca naca chee̱ Jesús. Bal-le̱' gulenné̱': “Naque̱' benne' xrlátaje.” Xebal-le̱' gulenné̱': “Quebe naque̱' xrlátaje lawe' da dxezí xe̱'e̱ bénneache.”
\p
\v 13 Quebe nu benne' bchálaje̱' caníqueze ca naca chee̱' lawe' da dxelezrebe̱' da xelún benne' xíchaje̱ ca' chee̱ judío ca'.
\p
\v 14 Ba zeaj gachaj laní na' gate guxú'u Jesús lu chale'aj xudau', na' guzú lawe̱' dxusé̱dene̱' benne' zaj zre̱'e̱ na'. 
\v 15 Belexebane benne' judío ca', dxelenné̱':
\p ―¿Ájazra na' benne' nigá da zante̱ nézene̱', ne quebe bsé̱die̱' chee̱ xudau'?
\p
\v 16 Beche̱be Jesús:
\p ―Da dxusé̱deda' neda' le'e quebe naca na cheé̱zqueza'. Naca na chee̱ Xra' nasel-le̱' neda'. 
\v 17 Che nu benne' dxaca lazre̱' gune̱' ca da dxaca lazre' Dios, na' wanézene̱' che da dxusé̱deda' naca na chee̱ Dios, u che dxennéa' ca da naca cheé̱zqueza'. 
\v 18 Benne' dxuchálaje̱' da naca cheé̱zqueze̱' dxune̱' na chee̱ xelapa bénneache le̱' ba lá'ana. Bénnea' dxue lazre̱' xelapa bénneache ba lá'ana bénnea' gusel-le̱' le̱', benne' nigá dxenné̱' da li, ne quebe bi dxenné̱' da naca na da we̱n lazre'.
\p
\v 19 ’Moisésqueze be̱nne̱' le'e da nadxixruj bea na, na' netule le'e quebe dxuzúale dizra' chee̱ da nadxixruj bea na na'. ¿Bizr chee̱ na' dxaca lázrele gútele neda'?
\p
\v 20 Belexeche̱be benne' zan ca':
\p ―Xu'u lue' be' xriwe̱'. ¿Núzraqueze dxaca lazre' gutie̱' lue'?
\p
\v 21 Jesús guzre̱' benne' ca':
\p ―Tu xel-la' waca be̱na' lu zra dxupá'anale, na' xúgute̱le le'e dxebánele. 
\v 22 Moisés be̱nne̱' da zéajle̱le, dxechúgule late' weaj be̱la' chee̱ be̱l-la' dxen chee̱ zrí'inele bi biudu ca' chee̱ xelexegá'anabe' xrlátaje lau Dios. Da nigá da dxunle quebe guzú lau na gate na' zua Moisés. Guzú lau na gate zaj zra' xra xrtau Moisés cá'ante̱. Chee̱ le̱ na' le'e dxechúgule late' be̱la' chee̱ be̱l-la' dxen chee̱ tu bi biúdau' chee̱ xegá'anabe' xrlátaje lau Dios lácala naca zra dxupá'anale. 
\v 23 Che caní dxunle lu zra dxupá'anale chee̱ quebe gusanle ca naca da bdxixruj be'e Moisés, ¿bizr chee̱ na' dxezrá'ale neda' lawe' da bexuna' dute̱ be̱l-la' dxen chee̱ tu benne' gate naca zra dxupá'anale? 
\v 24 Quebe guchí'ale le'e chee̱ tu da dxun benne' ca naca da dxelé'ezele. Gate bi da guchí'ale, le gun na lu da naca xrlátaje.
\s1 Jesús dxuchálaje̱' chee̱ naga ze̱'e̱
\p
\v 25 Nadxa bal-la benne' ca' zaj zre̱'e̱ Jerusalén gulezú lawe̱' dxuluche̱be ljwezre̱':
\p ―¿Quegá benne' nigá bénnea' dxelexílaje̱' chee̱ xelútie̱' le̱'? 
\v 26 Nigá zue̱' dxuchálaje̱' láwela bénneache, na' quebe nu bi dxe̱ Le̱'. ¿Zaj neze benne' xíchaje̱ ca' da li naca benne' nigá Cristo, Bénnea' nasel-la Dios? 
\v 27 Netu' nézentu' ga za' benne' nigá. Gate xida Cristo, quegá nu neze ga ze̱'e̱.
\p
\v 28 Jesús zue̱' dxusé̱dene̱' benne' ca' chale'aj xudau', na' gate benne̱' da nigá, na' gunné̱' zizraj:
\p ―Dxennale núnbeale neda', ne dxennale nézele ga za'a. Bla'a nigá, quegá cheé̱zqueza'. Bénnea' nasel-le̱' neda' naque̱' li lazre', na' Bénnea' quebe núnbeale le'e. 
\v 29 Neda' núnbe'a Le̱' lawe' da za'a naga zua Le̱', na' Le̱' gusél-le̱' neda'.
\p
\v 30 Nadxa gulaca lazre̱' xele̱l-le̱' Jesús. Quebe nu gude̱la Le̱' lawe' da quebe ne zrin zra chee̱ xelútie̱' Le̱'. 
\v 31 Benne' zan guléajle̱'e̱ chee̱ Jesús, na' gulenné̱':
\p ―Gate xida Cristo, ¿gúnljadxe̱' xel-la' waca zrente̱ ca da dxun benne' nigá?
\s1 Benne' fariseo ca' dxelesel-le̱' xra'aga we̱n zrin chee̱' chee̱ xele̱l-le̱' Jesús
\p
\v 32 Benne' fariseo ca' belenne̱' ca da dxelenná bénneache ca naca chee̱ Jesús, na' le̱', ne benne' xíchaje̱ ca' chee̱ bxruze ca' gulesel-le̱' xra'aga we̱n zrin chee̱ xudau' chee̱ xele̱l-le̱' Jesús. 
\v 33 Nadxa gunná Jesús:
\p ―Wazúale̱na' le'e xetú chí'idau', na' xezrínqueza' naga zua Bénnea' gusél-le̱' neda'. 
\v 34 Le'e wexílajle neda', na' quebe xezrélele neda', lawe' da quebe gaca sa'le naga sua' neda'.
\p
\v 35 Nadxa benne' judío ca' gulezú lawe̱' dxuluche̱be ljwezre̱':
\p ―¿Gazra cheaj benne' nigá, naga quebe gaca xezreldxu Le̱'? ¿Waxíaje̱' naga zaj zra' benne' judío ca' zaj nase dínnaje̱' ládujla benne' xe̱zr la xu ca' chee̱ gusé̱dene̱' benne' quebe zaj naque̱' judío? 
\v 36 ¿Bizra zéaje̱ da nigá guzre̱' dxi'u: Wexílajle neda', na' quebe xezrélele neda' lawe' da quebe gaca sa'le naga sua' neda'?
\s1 Jesús dxuchálaje̱' chee̱ xe̱gu nisa da dxunna xel-la' nabán li lazre'
\p
\v 37 Zra bze̱be chee̱ laní na' naca na zra blaudxa. Lu zra na' guzé̱ Jesús, na' gunné̱' zizraj:
\p ―Che nu benne' dxebílene̱', dxal-la' xide̱' naga zua' neda', na' xí'aje̱'. 
\v 38 Naca na ca naxúaj na lu xiche chee̱ Dios, dxenné̱': “Benne' dxéajle̱'e̱ chia', lu lázrdawe̱' galaj xe̱gu nisa da gunna na xel-la' nabán.”
\p
\v 39 Da nigá gunná Jesús ca naca chee̱ Be' Lá'azxa, Bénnea' xelezí' benne' ca' xeléajle̱'e̱ chee̱ Jesús, lawe' da quebe ne la' Be' Lá'azxa lawe' da quebe ne xegá'ana szren Jesús naga zua Xre̱'.
\s1 Bénneache dxelaque̱' chupa la'a
\p
\v 40 Bal-la bénneache, gate belenne̱' da nigá, gulenné̱':
\p ―Da li benne' nigá naque̱' Bénnea' guchalaje̱' waláz chee̱ Dios, Bénnea' dxal-la' xide̱'.
\p
\v 41 Xebal-le̱' gulenné̱':
\p ―Benne' nigá naque̱' Cristo, Benne' guche̱be lazre' Dios sel-le̱'.
\p Xebal-le̱' gulenné̱':
\p ―¿Waca Cristo benne' Galilea? 
\v 42 Lu da naxúaj na lu xiche chee̱ Dios dxenná na gaca Cristo zri'ine zre sua David, ne gaque̱' benne' xe̱zre Belén, xe̱zre na' naga gulaj David.
\p
\v 43 Ca'an guca, gulaca benne' ca' chupa la'a ne̱ chee̱ Jesús. 
\v 44 Bal-le̱' gulaca lazre̱' xele̱l-le̱' Jesús, na' quebe nu bexazre gune̱' na.
\s1 Benne' xíchaje̱ ca' chee̱ judío ca' quebe dxeléajle̱'e̱ chee̱ Jesús
\p
\v 45 Xra'aga we̱n zrin ca' chee̱ xudau' belexezrine̱' naga zaj zra' fariseo ca', ne benne' xíchaje̱ ca' chee̱ bxruze ca', na' benne' caní buluche̱be̱' xra'aga we̱n zrin ca':
\p ―¿Bizr chee̱ na' quebe guche̱le bénnea'?
\p
\v 46 Belexeche̱be xra'aga we̱n zrin ca':
\p ―Quebe ne guchalaj nu bénneache ca dxuchalaj benne' nigá.
\p
\v 47 Nadxa fariseo ca' gulé̱'e̱ xra'aga we̱n zrin ca':
\p ―¿Cá'anqueze le'e be̱le lataj guzí xe̱'e̱ le'e? 
\v 48 Quebe nu ne chéajle̱ chee̱ bénnea', benne' xíchaje̱ caní, ne cá'anqueze benne' fariseo ca'. 
\v 49 Benne' ca' dxeléajle̱'e̱ chee̱ bénnea' quebe zaj núnbe'e̱ da nadxixruj bea na, ne zaj nabía xi'e̱.
\p
\v 50 Nicodemo, bénnea' guxíaje̱' xeajnné̱'e̱ Jesús chizrela naque̱' tu benne' fariseo ca', na' guzre̱' benne' ca':
\p
\v 51 ―Cate̱ze dxenná da nadxixruj bea chee̱dxu quebe gaca guzría xidxu tu benne' che quebe ne xénedxu xeche̱be̱' chee̱ nézedxu che bi da nabague̱'e̱.
\p
\v 52 Nadxa belexeche̱be benne' ca':
\p ―¿Nácaquezu' lue' benne' Galilea? Gunná' xanne' da naxúaj na lu xiche chee̱ Dios, na' le'enu' netú benne' dxuchalaje̱' waláz chee̱ Dios quebe ne gálaje̱' naga nababa Galilea, naga zaj zra' bénneache quebe zaj naca xánnie̱' judío.
\p
\v 53 Nadxa tu tu benne' ca' xeajxaque̱' lizre̱'.
\c 8
\p
\v 1 Na' Jesús guzé̱'e̱ zéaje̱' lu Xi'a Xaga Olivo.
\s1 Jesús dxuchálajle̱ne̱' tu nu'ula dxune̱' dul-la dxíchaje̱' xrba chee̱ xel-la' nuchaga na'
\p
\v 2 Zra xula, gate guxaní', na' bezrín Jesús chale'aj xudau' na'. Xúgute̱ benne' ca' gulebigue̱' naga zua Jesús, na' Le̱' gudxé'e̱, ne guzú lawe̱' dxusé̱dene̱' benne' ca'. 
\v 3 Nadxa benne' ca' dxuluxuzájle̱'e̱ da nadxixruj bea Dios, ne benne' fariseo ca' guleché̱'e̱ tu nu'ula naga zua Jesús, belelé'ene̱' le̱' dxune̱' dul-la dxíchaje̱' xrba chee̱ xel-la' nuchaga na'. Buluzé̱' nu'ula na' laduj benne' zaj zre̱'e̱ na', 
\v 4 na' gulé̱'e̱ Jesús:
\p ―Benne' Wese̱de, nu'ula nigá blé'entu' le̱' dxune̱' dul-la dxíchaje̱' xrba chee̱ xel-la' nuchaga na'. 
\v 5 Da bdxixruj be'e Moisés dxenná be'e netu' gútentu' nu'ula caní, güentu' le̱' xiaj. ¿Bizra dxennáu' Lue'?
\p
\v 6 Caní gulenná benne' ca' chee̱ xuludxixre̱' Jesús chee̱ xelezéquene̱' xelagu zria Le̱'. Nadxa gudxé' luche Jesús, ne guzú lawe̱' dxuzúaje̱' lu xu nen zrube ne̱'e̱. 
\v 7 Benne' ca' buluché̱bequeze̱' Jesús, na' Le̱' bezé̱' dxe̱'e̱ benne' ca':
\p ―Nútete̱zlale le'e quebe nabágale dul-la, waca su laule güele nu'ula nigá xiaj.
\p
\v 8 Na' bebé' luche Jesús, ne bzúajqueze̱' lu xu. 
\v 9 Benne' ca', gate belenne̱' da nigá, quebe bzua xichaj lázrdawe̱' le̱' zrize, na' belexedxúaje̱' tu weaje̱'. Belexedxúaj za'a benne' gúladxa, na' ca belexedxúaj xúgute̱ benne' ca' dxelagu zrie̱' nu'ula', na' begá'ana Jesús tuze̱' nen nu'ula na', ze̱' laduj benne' ca' dxuluzé̱ nague̱' chee̱'. 
\v 10 Nadxa bezé̱' Jesús, ne gate québedxa nu benne' ca' ble'e Jesús, benne' dxulagu zrie̱' nu'ula na', nadxa guzre̱' le̱':
\p ―Nu'ula, ¿gazra na' benne' ca' gulagu zrie̱' lue'? ¿Quebe nu chilá' benne' guzría xi'e̱ lue'?
\p
\v 11 Nu'ula na' gunné̱':
\p ―Quebe nu chilá', Xran.
\p Nadxa Jesús guzre̱' nu'ula na':
\p ―Cá'anqueze neda', quebe guzría xi'a lue'. Bexíaj, ne québedxa gunu' dul-la.
\s1 Jesús dxusení'e̱ lu xichaj lázxdau bénneache
\p
\v 12 Bchálajle̱ Jesús benne' ca' xecha lasa, gunné̱':
\p ―Neda' naca' xel-la' naxaní' chee̱ lu xichaj lázxdau bénneache. Benne' dxedále̱ne̱' neda' gape̱' xel-la' naxaní' nigá da gunezruj na le̱' xel-la' nabán li lazre', na' cabata' tadxe̱' lu da chul-la chee̱ dul-la da zaj nabague̱'.
\p
\v 13 Nadxa benne' fariseo ca' gulé̱'e̱ Le̱':
\p ―Lue' dxexeche̱bu' cheé̱zquezu', na' da dxexeche̱bu' quebe bi zaca na.
\p
\v 14 Beche̱be Jesús:
\p ―Da dxexeche̱ba' zaca na lácala néda'queza' dxexeche̱ba' cheé̱zqueza'. Neda' nezda' gala za'a, ne gala cha'a. Le'e quebe nézele gala za'a, ne gala cha'a. 
\v 15 Le'e dxuchí'ale cáte̱ze dxenná xichaj lázrdaule. Bla'a neda', quegá chee̱ guchi'a ca da dxun nu benne'. 
\v 16 Che dxuchi'a, dxuchi'a cáte̱ze naca na, lawe' da quebe dxuchi'a néda'za'. Xra' nasel-le̱' neda' dxuchi'e̱ tu zren nen neda' ca naca da dxelún bénneache. 
\v 17 Lu da nadxixruj bea chee̱le le'e naxúaj gate zaj zra' chupa benne' dxelexeche̱be̱' tuz ca dxelenné̱', naca da li xrtizra' benne' ca'. 
\v 18 Néda'queza' dxexeche̱ba' da naca cheé̱zqueza', na' Xra' nasel-le̱' neda', cá'anqueze dxexeche̱be̱' chia'.
\p
\v 19 Nadxa benne' ca' buluche̱be̱' Jesús:
\p ―¿Ga na' Xrau'?
\p Jesús beche̱be̱':
\p ―Le'e quebe núnbeale da nácaqueza' neda', ne quebe núnbeaquezle Xra'. Chela da li núnbeale neda', cá'anqueze núnbeale Xra'.
\p
\v 20 Da caní bchalaj Jesús dxácate̱ na' dxusé̱dene̱' bénneache chale'aj xudau' naga zaj nnita xi'ina dumí chee̱ xudau'. Quebe nu gude̱la Le̱' lawe' da quebe ne zrin zra chee̱'.
\s1 Dxenná Jesús: “Naga cha'a neda' quebe gaca sa'le le'e”
\p
\v 21 Nadxa Jesús guzre̱' benne' ca':
\p ―Wexá'a neda', na' le'e xexílajle neda', na' wátele lu dul-la nabágale, lawe' da naga cha'a neda', le'e quebe gaca sa'le.
\p
\v 22 Nadxa benne' judío ca' gulé̱ ljwezre̱':
\p ―¿Gute cuine̱', ne chee̱ le̱ na' dxenné̱' quebe gaca chéajdxu naga cheaj Le̱'?
\p
\v 23 Nadxa Jesús guzre̱' benne' ca':
\p ―Le'e nácale chee̱ zran xabáa nigá. Neda' naca' chee̱ xabáa na'la. Le'e nácale chee̱ xe̱zr la xu nigá. Neda' quebe naca' chee̱ xe̱zr la xu nigá. 
\v 24 Chee̱ le̱ na' gucha' le'e wátele lu dul-la nabágale, lawe' da che quebe dxéajle̱le zúaqueza' neda', wátele lu dul-la nabágale.
\p
\v 25 Nadxa benne' ca' buluche̱be̱' Jesús:
\p ―¿Nuzra nacu' Lue'?
\p Beche̱be Jesús:
\p ―Nácaqueza' ca ba gucha' le'e nédxudaute̱. 
\v 26 Dé̱le̱'e̱ da dxal-la' nnia' chee̱le, ne da dxal-la' guchi'a ca naca da dxunle. Bénnea' gusél-le̱' neda' dxenné̱' da li, na' da dxapa' bénneache naca na da ba benda' gunné̱ Le̱', lácala quebe dxezaca ba lázrele̱nle na.
\p
\v 27 Benne' ca' quebe guléajni'ine̱' dxuchálajle̱ Jesús le̱' ca naca chee̱ Dios, Xre̱'. 
\v 28 Nadxa Jesús guzre̱' benne' ca':
\p ―Gate le'e chísale sibe neda', Benne' Gulje̱' Bénneache, nadxa xúnbeale zúaqueza' neda', ne quebe bi dxuna' da naca cheé̱zqueza'. Tuze dxennéa' ca da ba ble'e Xra' neda'. 
\v 29 Bénnea' gusél-le̱' neda' zúale̱queze̱' neda'. Xra' quebe nucá'ane̱' neda' tuza' lawe' da tu dxúnzqueza' ca da dxezaca ba lazre' Le̱'.
\p
\v 30 Ca gunná Jesús da caní, guléajle̱ benne' zan chee̱'.
\s1 Benne' zaj naque̱' chee̱ Dios, ne benne' ca' nuxru dul-la le̱'
\p
\v 31 Nadxa Jesús guzre̱' benne' judío ca', benne' dxeléajle̱'e̱ chee̱':
\p ―Che le'e se̱ típale lu da dxapa' le'e, da li nácale neda' tuze. 
\v 32 Gúnbeale da li, na' da li na' guselá na le'e.
\p
\v 33 Belexeche̱be benne' zan ca':
\p ―Netu' nácantu' xrtia Abraham, ne quebe ne chú'untu' lu na' nu benne' ca benne' zaj nada'u. ¿Bizr chee̱ na' dxennáu' Lue' lantu'?
\p
\v 34 Jesús guzre̱' benne' ca':
\p ―Da li dxapa' le'e, xúgute̱ benne' dxelúnqueze̱' dul-la, dúl-laqueze na' nuxru na benne' ca'. 
\v 35 Nu benne' xu'e̱ lu na' tu benne' ca benne' nada'u quebe tu súazqueze̱' xu'u na'. Zrí'inequeze bénnea' wazúatequezebe'. 
\v 36 Chee̱ le̱ na', che neda', Zri'ine Xra', guselá' le'e, da li láquezle le'e. 
\v 37 Nezda' nácale le'e xrtia Abraham. Na'a dxaca lázrele gútele neda' lawe' da quebe dxezí' lu na'le da dxapa' le'e. 
\v 38 Neda' dxuchálaja' ca naca da ble'e Xra' neda', na' le'e dxunle ca da guzre xráquezle le'e.
\p
\v 39 Belexeche̱be benne' ca':
\p ―Xra xrtauntu' naca Abraham.
\p Na' Jesús guzre̱' benne' ca':
\p ―Chela nácale da li xrtia Abraham, na' gunle ca da be̱n Abraham. 
\v 40 Lácala gucha' le'e da li da ble'e Xra' neda', le'e dxaca lázrele gútele neda'. Abraham cabata' be̱ne̱' da caní. 
\v 41 Le'e dxúnquezle ca da dxun xráquezle.
\p Nadxa benne' ca' gulé̱'e̱ Jesús:
\p ―Netu' quebe nácantu' bi lan. Zua tuze Xrantu', Dios.
\p
\v 42 Nadxa Jesús guzre̱' benne' ca':
\p ―Chela naca Dios da li Xrale, le'e wazrí'ile neda' lawe' da za'a neda' naga zua Dios, ne zúaqueza' nigá. Quebe za'a da naca cheé̱zqueza'. Dios nasel-le̱' neda'. 
\v 43 ¿Bizr chee̱ na' quebe dxezéquele chéajni'ile da dxennéa'? Naca na lawe' da quebe dxaca lázrele xénele dizra' chia'. 
\v 44 Xráquezle le'e naca da xriwe̱'. Le'e nácale chee̱ da na', ne dxaca lázrele gunle ca da dxaca lazre' le̱ na. Da xriwe̱' na' naca na we̱te benne' nédxudaute̱. Cabata' dxenné̱ na da li lawe' da quebe bi zua da li nen le̱ na. Gate dxun lazre' na, dxenné̱ na cáte̱ze naca na, lawe' da tu dxun lázrezqueze na, ne naca na da guzú lau na be̱n lazre' na. 
\v 45 Lácala dxapa' le'e da li, le'e quebe dxéajle̱le chia'. 
\v 46 ¿Núlale le'e séquele gulé'ele nabaga neda' tu dul-la? Che dxennéa' da li, ¿bizr chee̱ na' quebe dxéajle̱le chia'? 
\v 47 Benne' naque̱' chee̱ Dios dxenne̱' dizra' chee̱ Dios. Le'e quebe nácale chee̱ Dios. Chee̱ le̱ na' quebe dxaca lázrele xénele chee̱ Dios.
\s1 Cristo ba zúaqueze̱' nédxudxa ca Abraham
\p
\v 48 Nadxa benne' judío ca' gulé̱'e̱ Jesús:
\p ―Da li dxennantu' gate dxennantu' nacu' benne' Samaria, ne xu'u be' xriwe̱'.
\p
\v 49 Jesús beche̱be̱':
\p ―Quebe xu'a be' xriwe̱'. Neda' dxapa' ba lá'ana Xra' Dios, na' le'e dxuzúale neda' chalá'ala. 
\v 50 Quebe dxe'a gunne xue chee̱ gápale neda' ba lá'ana, ne si' lu na'le neda'. Zua Benne' xabáa dxezá lazre̱' gápale neda' ba lá'ana, ne Le̱' dxuchi'e̱ ca da dxunle. 
\v 51 Da li dxapa' le'e: Benne' dxune̱' ca naca dizra' chia', cabata' gátequeze bénnea'.
\p
\v 52 Nadxa benne' judío ca' belexeche̱be̱':
\p ―Na'a nézquezentu' xu'u be' xriwe̱'. Ba gulátequeze Abraham, ne xúgute̱ benne' ca' buluchálaje̱' waláz chee̱ Dios, na' lue' dxennáu' benne' gune̱' ca naca dizra' chiu' cabata' gátequeze̱'. 
\v 53 ¿Nácadxu' szrendxa ca xra xrtáudxu Abraham? Gútequeze Le̱', ne cá'anqueze gulate benne' ca' buluchálaje̱' waláz chee̱ Dios. ¿Bízraqueze dxugune cuinu'?
\p
\v 54 Beche̱be Jesús:
\p ―Che neda' dxucá'ana cuina' ba lá'ana, quebe bi zaca na. Benne' dxape̱' neda' ba lá'ana naque̱' Xra', Bénnea' dxennale le'e naque̱' Xrale. 
\v 55 Le'e quebe núnbeale Le̱'. Neda' núnbeaqueza' Le̱'. Chela dxennéa' quebe núnbe'a Le̱', naca' we̱n lazre' ca nácale le'e. Neda' da li núnbe'a Le̱', ne dxuna' ca da dxenné̱'. 
\v 56 Xra xrtáule Abraham, bénnea' gutie̱' nédxudaute̱, gubéle̱'e̱ne̱' lawe' da dxal-la' lé'ene̱' zra zua neda'. Blé'ene̱' na, na' gubéle̱'e̱ne̱'.
\p
\v 57 Nadxa benne' judío ca' gulé̱'e̱ Jesús:
\p ―Québequeze ne su' chi xun iza, na' ¿dxennáu' blé'enu' Abraham?
\p
\v 58 Jesús beche̱be̱':
\p ―Da li dxapa' le'e, nédxudaute̱ gate quebe ne sua Abraham, báchequeze zua' neda'.
\p
\v 59 Nadxa gulequé̱'e̱ xiaj chee̱ xelu'e̱ Jesús, na' Le̱' bcache cuine̱'. Bdee̱' ládujla benne' ca', na' bedxúaje̱' chale'aj xudau', ne bezé̱'e̱.
\c 9
\s1 Jesús dxexune̱' tu benne' gúlaje̱' la chul-la
\p
\v 1 Gate gudé Jesús tu lataj, na' blé'ene̱' tu benne' gúlaje̱' la chul-la. 
\v 2 Benne' ca' dxuse̱de Jesús buluche̱be̱' Le̱':
\p ―Benne' Wese̱de, ¿bizr chee̱ na' gulaj benne' nigá la chul-la? ¿Naca na lawe' da belún xra xrne̱'e̱ dul-la, che lawe' da be̱n lé̱queze̱' dul-la?
\p
\v 3 Jesús guzre̱' benne' ca':
\p ―Quebe naca na lawe' da be̱n le̱' dul-la, ne quebe naca na lawe' da belún xra xrne̱'e̱ dul-la. Naca na chee̱ gulé'e lau xel-la' szren chee̱ Dios ne̱ chee̱ benne' nigá. 
\v 4 Dxácate̱ naca te zra dxal-la' guna' zrin chee̱ Bénnea' nasel-le̱' neda' lawe' da ba za da chul-la gate netú benne' quebe seque' gune̱' zrin. 
\v 5 Dxácate̱ ne zua' neda' xe̱zr la xu nigá, naca' xel-la' naxaní' chee̱ bénneache.
\p
\v 6 Ca gudé gunná Jesús da nigá, na' bzre̱'e̱ zrene̱' lu xu, ne be̱ne̱' guna' nen zrene̱' na', na' btupe̱' na xiaj lau benne' la chul-la na'. 
\v 7 Nadxa guzre̱' le̱':
\p ―Guxíaj xeajtibe lau' lu beaj nisa nazí le na Siloé. (Dizra' nigá zéaje̱ na: Da Nasel-la Na.)
\p Benne' la chul-la na' guxíaje̱' xeajtibe lawe̱', na' gate bezrine̱' ba dxelé'ene̱'. 
\v 8 Nadxa benne' walízr chee̱' ca', ne benne' ca' belelé'ene̱' le̱' nédxula, naque̱' la chul-la, gulenné̱':
\p ―¿Quegá benne' nigá bénnea' dxebé'e̱ dxenabe̱' guna'?
\p
\v 9 Bal-le̱' gulenné̱':
\p ―Le̱' na'.
\p Xebal-le̱' gulenné̱':
\p ―Quegá le̱' na', na' ca'an ca dxenné̱'e̱.
\p Benne' ná'queze gunné̱':
\p ―Neda' na'.
\p
\v 10 Nadxa buluche̱be̱' le̱':
\p ―¿Ájazra na' ba dxelé'enu'?
\p
\v 11 Beche̱be bénnea':
\p ―Bénnea' le̱' Jesús be̱ne̱' guna', ne btupe̱' na xiaj lawa', na' gunné̱': “Guxíaj beaj nisa nazí le na Siloé, xeajtibe lau'.” Guxá'a na', na' gate gudiba' lawa', guca ble'eda'.
\p
\v 12 Nadxa buluche̱be̱' le̱':
\p ―¿Ga na' zua bénnea'?
\p Le̱' guzre̱' benne' ca':
\p ―Quebe nezda'.
\s1 Benne' fariseo ca' dxuluche̱be̱' bénnea' guque̱' la chul-la
\p
\v 13 Nadxa benne' ca' guleché̱'e̱ bénnea' guque̱' la chul-la lau benne' fariseo ca'. 
\v 14 Naca na zra dxulupá'ana judío ca' gate be̱n Jesús guna', ne btupe̱' na xiaj lau benne' la chul-la na'. 
\v 15 Chee̱ le̱ na' benne' fariseo ca' buluche̱be̱' bénnea' guque̱' la chul-la ájazra guca dxelé'ene̱'. Le̱' guzre̱' benne' ca':
\p ―Bzrie̱' guna' xiaj lawa', na' bexiba' na, ne dxelé'eda'.
\p
\v 16 Nadxa bal-la benne' judío ca' gulenné̱':
\p ―Bénnea' be̱ne̱' da nigá quebe naque̱' chee̱ Dios lawe' da quebe dxape̱' ba lá'ana zra dxupá'anadxu.
\p Na' xebal-le̱' gulenné̱':
\p ―¿Ájazra na' dxune̱' xel-la' waca zrente̱ caní che naque̱' benne' dul-la?
\p Ca'an guca, gulaca chupa la'a benne' fariseo ca'. 
\v 17 Xecha lasa buluche̱be̱' bénnea' guque̱' la chul-la:
\p ―¿Bi dxennáu' lue' chee̱ bénnea' bexune̱' lue'?
\p Le̱' gunné̱':
\p ―Neda' dxennéa' naque̱' benne' dxuchalaje̱' waláz chee̱ Dios.
\p
\v 18 Benne' judío ca' quebe guléajle̱'e̱ guque̱' la chul-la, ne na'a dxelé'ene̱', na' gulenné̱' xra xrna bénnea' bexaque̱'. 
\v 19 Na' buluche̱be̱' xra xrna bénnea':
\p ―¿Nácaqueze benne' nigá zrí'inele, dxennale le'e gúlaje̱' la chul-la? ¿Ájazra na' dxaca dxelé'ene̱'?
\p
\v 20 Belexeche̱be xra xrne̱'e̱:
\p ―Nézentu' benne' nigá naque̱' zrí'inentu', ne gúlaje̱' la chul-la. 
\v 21 Quebe nézentu' aja guca dxelé'ene̱' na'a, ne quebe nézentu' nu bexún xiaj lawe̱'. Le guche̱be le̱'. Ba nápaqueze̱' iza, ne waca xeché̱bequeze̱'.
\p
\v 22 Caní gulenná xra xrne̱'e̱ lu xel-la' dxelezrebe lawe' da ba zaj nun benne' xíchaje̱ chee̱ judío ca' tuze dizra' xelexebéaje̱' xu'u na' nútete̱ze benne' xeche̱be̱' Jesús naque̱' Cristo. 
\v 23 Chee̱ le̱ na' gulenná xra xrne̱'e̱: “Le guche̱be le̱'. Ba nápaqueze̱' iza.”
\p
\v 24 Nadxa benne' judío ca' belenné̱' bénnea' guque̱' la chul-la, na' gulé̱'e̱ le̱':
\p ―¡Gunné̱ da li lau Dios! Nézentu' naca benne' nigá benne' dul-la.
\p
\v 25 Le̱' beche̱be̱':
\p ―Quebe nezda' che naque̱' benne' dul-la, che cabí. Tuze da nezda'. Neda' guca' la chul-la, na' na'a dxelé'eda'.
\p
\v 26 Na' buluché̱bequeze̱' le̱':
\p ―¿Bizra be̱ne̱' chiu'? ¿Ájazra be̱ne̱' chee̱ bexune̱' xiaj lau'?
\p
\v 27 Na' beche̱be bénnea':
\p ―Ba gucha' le'e, ne quebe dxénele chia'. ¿Bizr chee̱ na' dxaca lázrele nnia' xetú? ¿Cá'anqueze le'e dxaca lázrele gácale Le̱' tuze?
\p
\v 28 Nadxa benne' judío ca' gulenné̱' schanni' chee̱ bénnea' guque̱' la chul-la, dxelenné̱':
\p ―Lue' da'u bénnea', na' netu' da'ntu' Moisés. 
\v 29 Netu' nézentu' Dios bchálajle̱ne̱' Moisés. Quebe nézentu' ga benne' benne' nigá.
\p
\v 30 Nadxa bénnea' beche̱be̱':
\p ―Da nigá naca na da dxebáneda'. Le'e quebe nézele ga bénnea', na' bexune̱' xiaj lawa'. 
\v 31 Nézquezdxu Dios quebe dxenne̱' chee̱ benne' dul-la. Tuze dxenne̱' chee̱ benne' ca' dxulucá'ana szrene̱' Le̱', ne dxelune̱' ca da dxaca lazre' Le̱'. 
\v 32 Quebe ne xendxu che nu benne' xexune̱' tu benne' gúlaje̱' la chul-la. 
\v 33 Chela benne' nigá quebe naque̱' chee̱ Dios, quebe gaca bi gune̱'.
\p
\v 34 Nadxa gulé̱'e̱ le̱':
\p ―Ca gúlajquezu' dxulé'e na nabagu' dul-la. Na'a, ¿dxaca lazru' guzéajni'inu' netu'?
\p Nadxa belexebéaje̱' le̱' lu xu'u na'.
\s1 Benne' zaj naque̱' la chul-la lu xichaj lázrdawe̱'
\p
\v 35 Jesús benne̱' belexebéaje̱' bénnea' guque̱' la chul-la, na' gate bezrague̱' le̱', guzre̱' le̱':
\p ―¿Dxéajle̱'u lue' chee̱ Zri'ine Dios?
\p
\v 36 Benne' na' guzre̱' Jesús:
\p ―Xran, guzre neda' Nu na', chee̱ chéajle̱'a chee̱'.
\p
\v 37 Beche̱be Jesús:
\p ―Ba blé'equeznu' Le̱'. Neda', dxuchálajle̱na' lue' naca' Bénnea'.
\p
\v 38 Nadxa benne' na' bzu zribe̱' lau Jesús, na' gunné̱':
\p ―Dxéajle̱'a chiu', Xran.
\p
\v 39 Nadxa gunná Jesús:
\p ―Neda' bla'a lu xe̱zr la xu nigá chee̱ guchi'a ca da dxelún bénneache, chee̱ xelelé'e la chul-la ca', ne chee̱ xelexaca ca la chul-la benne' ca' dxelenné̱' dxelelé'ene̱'.
\p
\v 40 Nadxa bal-la benne' fariseo ca', benne' zaj zre̱'e̱ nen Jesús, gate belenne̱' da nigá gunná Jesús, buluche̱be̱' Le̱':
\p ―¿Cá'anqueze netu' nácantu' la chul-la?
\p
\v 41 Jesús beche̱be̱':
\p ―Chela nácale le'e la chul-la quebe nabágale ca naca dul-la da be̱nle. Dxennale dxelé'ele, na' chee̱ le̱ na' nabágale dul-la.
\c 10
\s1 Dxuchalaj Jesús da dxulé'e na ca naca chee̱ le'aj chee̱ zrila' ca'
\p
\v 1 Na' gunná Jesús:
\p ―Da li dxapa' le'e, bénnea' quebe dxu'e̱ dxu'a dxa xu'u chee̱ le'aj chee̱ zrila' ca', na' dxu'e̱ naga xula, naque̱' gubán, ne tu dxebánzqueze̱'. 
\v 2 Bénnea' dxu'e̱ dxu'a dxa xu'u na' naque̱' benne' dxuxúequeze̱' zrila' ca'. 
\v 3 Bénnea' zue̱' dxu'a dxa xu'u dxesálaje̱' chee̱ chu'u bénnea' dxuxúequeze̱'-ba', na' zrila' ca' dxelexúnbeaba' chi'e̱. Benne' nigá dxu'e̱ la tu tu zrila' ca', ne dxebéaje̱'-ba' lu le'aj chee̱ba'. 
\v 4 Ca dxedé dxebéaje̱' xúgute̱ba', na' dxebía lawe̱' lauba', na' zrila' ca' zjácale̱ba' Le̱', lawe' da dxelexúnbeaba' chi'e̱. 
\v 5 Quebe zjácale̱ba' tu benne' quebe zaj núnbeaba'. Dxuluzrúnnujba' lau benne' na' lawe' da quebe dxelexúnbeaba' chi'i benne' quebe zaj núnbeaba'.
\p
\v 6 Bchálajle̱ Jesús benne' ca' da dxulé'e nigá, na' benne' ca' quebe guléajni'ine̱' bi zéaje̱ da guzre Jesús le̱'.
\s1 Jesús naque̱' benne' chawe' dxuxúe̱' zrila' ca'
\p
\v 7 Nadxa Jesús guzre̱' benne' ca' da xula:
\p ―Da li dxapa' le'e, neda' naca' dxa xu'u naga dxelú'u bénneache zaj naque̱' ca zrila' chia' ca'. 
\v 8 Xúgute̱ benne' dxuluxúe̱' zrila', benne' belelé̱'e̱ nédxudxa ca neda', gulaque̱' gubán, ne tu gulebánzqueze̱'. Zrila' ca' quebe beléneba' chee̱ benne' ca'. 
\v 9 Neda' naca' dxa xu'u. Bénnea' chu'e̱ ne̱ chia' neda', láqueze bénnea'. Gaque̱' ca tu zrila' dxu'uba', ne dxuajba' le'aj chee̱ba', na' dxezréleba' zríe̱du dxáguba'.
\p
\v 10 ’Benne' gubán ze̱'e̱ tuze chee̱ cuane̱'-ba', ne chee̱ gútete̱'-ba, ne chee̱ guzría xi'te̱'-ba'. Neda' bla'a chee̱ gápale xel-la' nabán, ne chee̱ gapa xánnele na. 
\v 11 Neda' naca' benne' chawe' dxuxúa' zrila' ca'. Benne' chawe' dxuxúe̱' zrila' ca' dxuzúe̱' xel-la' nabán chee̱' chee̱ guselé̱' zrila' ca'. 
\v 12 Benne' dxuxúe̱'-ba' lawe' da dxezi'e̱ lazruj, gate dxelé'ene̱' za becu' xi'a, na' dxusane̱' zrila' ca', ne dxuzrúnnuje̱', lawe' da quebe nácaqueze̱' benne' dxuxúe̱' le̱ba', na' zrila' ca' quebe zaj nácaba' be̱ cheé̱zqueze̱'. 
\v 13 Benne' nigá dxuzrúnnuje̱' lawe' da dxunze̱' zrin chee̱ si'e̱ lázruje̱', na' quebe dxe'e̱ gunne xue chee̱ba'.
\p
\v 14-15 ’Neda' naca' benne' chawe' dxuxúa' zrila' ca'. Cáte̱ze núnbea Xra' neda', na' neda' núnbe'a Xra', cá'anqueze neda' núnbe'a zrila' chia' ca', na' le̱ba' zaj núnbeaba' neda'. Neda' dxuzúa' xel-la' nabán chia' chee̱ guselá' zrila' ca'. 
\v 16 Cá'anqueze zaj zra' zrila' chia' quebe zaj zraba' lu le'aj nigá. Dxal-la' cheajxexri'a-ba'. Zrila' ca' xelunba' ca dxenná xrtizra', ne xelácaba' tu cueze, na' tuze benne' guxúe̱' le̱ba'.
\p
\v 17 ’Xra' nazrí'ine̱' neda' lawe' da dxuzúa' xel-la' nabán chia', na' xecá'a na. 
\v 18 Quebe nu seque' cua xel-la' nabán chia'. Neda' xuzúa' na cáte̱ze dxaca lázrequeza' neda'. Napa' xel-la' dxenná bea guzúa' na, ne chee̱ xecá'a na. Da nigá naca na da gunná be'e Xra' neda' guna'.
\p
\v 19 Gate benne' judío ca' belenne̱' dizra' caní, na' gulaque̱' chupa la'a xetú. 
\v 20 Benne' zan benne' ca' gulenné̱':
\p ―¿Bizr chee̱ na' dxuzé̱ nágale chee̱ benne' nigá? Xu'e̱ be' xriwe̱', ne nadá xichaj lázrdawe̱'.
\p
\v 21 Xebal-le̱' gulenné̱':
\p ―Tu benne' xu'e̱ be' xriwe̱' quebe séquene̱' guchálaje̱' caní. ¿Waca tu be' xriwe̱' xexún na xiaj lau tu benne' la chul-la?
\s1 Dxuluzúa benne' judío ca' Jesús chalá'ala
\p
\v 22 Naca na beu' zaga, na' lu xe̱zre Jerusalén zaj zue̱' laní gate dxulusá lazre̱' ca guca gate gulegú'e̱ xudau' na' lu na' Dios. 
\v 23 Jesús dxedé̱' chale'aj xudau' na' naga naca lachila chee̱ Salomón. 
\v 24 Nadxa benne' judío ca' guléchaje̱' Le̱', ne gulé̱'e̱ Le̱':
\p ―¿Bátalaqueze québedxa gunu' lue' chupa lázrentu'? Che lue' nacu' Cristo, Bénnea' sel-la Dios, gunnáte̱gala.
\p
\v 25 Beche̱be Jesús:
\p ―Ba gucha' le'e, na' quebe guxéajle̱le chia'. Ca naca da dxuna' neda', ne dxuchíneda' xel-la' dxenná bea chee̱ Xra', dxululé'e na nu naca' neda'. 
\v 26 Le'e quebe dxéajle̱le chia' lawe' da quebe nácale zrila' chia', ca ba gucha' le'e nédxula. 
\v 27 Zrila' chia' dxelexúnbeaba' chi'a, na' neda' núnbe'a-ba', na' le̱ba' dxelauba' neda'. 
\v 28 Benne' zaj naque̱' zrila' chia', dxunézruja' chee̱ benne' ca' xel-la' nabán da zeajlí canna, ne cabáta'quezdxa xelebía xi'e̱, na' quebe nu seque' xecá'a le̱' lu na'a neda'. 
\v 29 Xra' be̱nne̱' neda' benne' caní, na' Le̱' nácadxe̱' szren ca xúgute̱ bénneache, na' quebe nu seque' xecá'a benne' ca' lu na' Xra'. 
\v 30 Neda', ne Xra' tuze nácantu'.
\p
\v 31 Nadxa benne' judío ca' gulequé̱'e̱ xiaj xetú chee̱ xelútie̱' Jesús. 
\v 32 Nadxa Jesús guzre̱' benne' ca':
\p ―Ba bé̱nqueza' da zan da chawe' laule le'e, dxuchíneda' xel-la' waca chee̱ Xra'. ¿Nula chee̱ da chawe' caní güele neda' xiaj?
\p
\v 33 Belexeche̱be benne' judío ca':
\p ―Quebe güentu' lue' xiaj lawe' da nunu' da chawe'. Dxuntu' na lawe' da gunnéu' schanni' chee̱ Dios. Lue' nacu' bénneache, na' dxun cuinu' Dios.
\p
\v 34 Nadxa Jesús guzre̱' benne' ca':
\p ―Lu da nadxixruj bea chee̱le le'e naxúaj xrtizra' Dios, dxenná na: Le'e nácale dios ca'. 
\v 35 Quebe gaca tábagadxu ca da naxúaj na lu xiche chee̱ Dios, na' Diósqueze̱' gunné̱' chee̱ benne' ca' gulezí'e̱ xrtizre̱' zaj naque̱' dios ca'. 
\v 36 Che Dios bzue̱' neda', ne gusél-le̱' neda' lu xe̱zr la xu nigá, ¿bizr chee̱ na' dxennale le'e gunnéa' schanni' chee̱ Dios lawe' da gunnéa' naca' Zri'ine Dios? 
\v 37 Che quebe dxuna' ca naca da dxun Xra', quebe chéajle̱le chia'. 
\v 38 Che dxuna' na, lácala quebe dxéajle̱le chia' ne̱ chee̱ da dxennéa', le chéajle̱ chia' ne̱ chee̱ da ca' dxuna', chee̱ nézele Xra' zúale̱ne̱' neda', na' neda' zúale̱na' Xra'.
\p
\v 39 Xetú lasa gulaca lazre̱' xele̱l-le̱' Jesús, na' Le̱' gulé̱' lu na' benne' ca'.
\p
\v 40 Nadxa bezrín Jesús dxu'a xe̱gu Jordán chalá'a naga dxalaj gubizra, na' begá'ane̱' na', naga guzúa Juan nédxute̱ dxuchúe̱' bénneache nisa. 
\v 41 Benne' zan xjaque̱' xeajlenné̱'e̱ Jesús, na' gulenné̱':
\p ―Juan, da li quebe bi xel-la' waca zren be̱ne̱', na' xúgute̱ da gunné̱' ca naca chee̱ benne' nigá naca na da li.
\p
\v 42 Benne' zan guléajle̱'e̱ chee̱ Jesús lataj na'.
\c 11
\s1 Ca guca gate gute Lázaro
\p
\v 1 Zua tu benne' dxé'ene̱' le̱' Lázaro, benne' xe̱zre Betania, da naca na lazre María, ne bi bile̱' le̱' Marta. 
\v 2 María nigá, bi zan Lázaro, benne' dxé'ene̱' na', naque̱' nu'ula na' gulu'e̱ ni'a Jesús da na' dxelále̱'e̱ zixre, ne bsebizre̱' na nen xicha xíchaje̱'. 
\v 3 Dxúpate̱ nu'ula caní gulesel-le̱' benne' xeaje̱zre̱' Jesús:
\p ―Xran, bénnea' nazrí'inu' quebe chawe' zue̱'.
\p
\v 4 Ca ben Jesús da nigá, na' gunné̱':
\p ―Da dxé'ene̱' quebe naca na da gútete̱ na le̱'. Naca na chee̱ gulé'e lau na xel-la' szren chee̱ Dios, ne cá'anqueze chee̱ gulé'e lau na xel-la' szren chia' neda', Zri'ine Dios, ne̱ chee̱ xel-la' we̱' na'.
\p
\v 5 Lácala nazrí'i Jesús Marta, ne bi bile̱', ne Lázaro, 
\v 6 gate benne̱' quebe chawe' zua Lázaro na', begá'ane̱' naga zue̱' xechupa zra. 
\v 7 Ca gudé na' guzre̱' benne' ca' dxusé̱dene̱':
\p ―Le chu'u naga nababa Judea xetú.
\p
\v 8 Nadxa benne' ca' gulé̱'e̱ Le̱':
\p ―Benne' Wese̱de, ná'asca benne' judío ca' zaj zre̱'e̱ na' gulaca lazre̱' xelútie̱' Lue' nen xiaj. ¿Dxaca lazru' chéaju' na' xetú?
\p
\v 9 Jesús guzre̱' benne' ca':
\p ―¿Quebe nun Dios dute̱ te zra gate dxelún bénneache zrin? Che nu benne' dxedé̱' te zra, quebe cheajchazie̱' lu da ste̱be lawe' da dxelé'ene̱' xel-la' naxaní' da nuzúa Dios lu xe̱zr la xu nigá. 
\v 10 Che nu benne' dxedé̱' chizrela, dxechégüe̱' lawe' da quebe zúale̱ xel-la' naxaní' le̱'.
\p
\v 11 Ca gudé na' guzre Jesús benne' ca':
\p ―Benne' ljwézredxu Lázaro ba dxásie̱'. Cha'a neda' cheajsebana' le̱'.
\p
\v 12 Nadxa benne' ca' gulé̱'e̱ Jesús:
\p ―Xran, che dxásie̱', wexaque̱'.
\p
\v 13 Da nigá da gunná Jesús zéaje̱ na ba gute Lázaro. Benne' ca' dxusé̱dene̱' guléquene̱' gunná Jesús dxáseze̱'. 
\v 14 Nadxa Jesús bzéajni'ine̱' benne' ca', gunné̱':
\p ―Ba gútequeze Lázaro. 
\v 15 Dxebeda' lawe' da quebe zua' na'. Caní gácadxa chawe' chee̱le le'e, chee̱ chéajle̱le chia'. Le chu'u cheajnnadxu Lázaro.
\p
\v 16 Nadxa Tomás, bénnea' lé̱queze̱' bilide', guzre̱' xezícala benne' ca':
\p ―Le chú'uqueze dxi'u chee̱ gátedxu tu zren nen Jesús.
\s1 Jesús naque̱' benne' dxusebane̱' benne' gate ca', ne benne' dxunne̱' dxi'u xel-la' nabán li lazre'
\p
\v 17 Gate belezrine̱' xe̱zre Betania, na' bene Jesús gudapa zra bulucache̱' Lázaro. 
\v 18 Betania dxe' na gáguze naga dxe' Jerusalén, ca cadite sadxu tu chí'idau'ze zrindxu na', 
\v 19 na' benne' zan benne' judío ca' xjaque̱' xeajlenné̱'e̱ Marta ne María, na' xulunézruje̱' le̱' xel-la' zren lazre' lawe' da gute bi zane̱'. 
\v 20 Gate ben Marta ba za' Jesús, na' guzé̱'e̱ zeajxrígale̱' Le̱', na' María begá'ane̱' xu'u. 
\v 21 Marta guzre̱' Jesús:
\p ―Xran, chela zu' nigá, quebe gute bi zana'. 
\v 22 Neda' nezda' Dios gunne̱' Lue' bítete̱ze da nabu'.
\p
\v 23 Jesús gunné̱':
\p ―Webán bi zanu'.
\p
\v 24 Nadxa Marta guzre̱' Le̱':
\p ―Nezda' webane̱' lu zra xelexebán benne' gate ca', zra bze̱be na'.
\p
\v 25 Nadxa gunná Jesús:
\p ―Neda' naca' benne' dxusebáne̱' benne' gate ca', ne benne' dxunne̱' xel-la' nabán li lazre'. Nu benne' dxéajle̱'e̱ chia', lácala gatie̱', webane̱', 
\v 26 na' xúgute̱ benne' zaj naca bane̱', ne dxeléajle̱'e̱ chia', québequeze xelatie̱' tu chi'ize. ¿Dxéajle̱'u da nigá?
\p
\v 27 Marta guzre̱' Jesús:
\p ―Awe', Xran. Neda' dxéajle̱'a nacu' Cristo, Zri'ine Dios, Bénnea' guche̱be lazre' Dios sel-le̱'.
\s1 Jesús dxebezre̱' lawe' da zaj zua baxache' nu'ula ca'
\p
\v 28 Ca gudé gunná Marta da nigá, na' guxíaje̱' xeajzenne̱' bi bile̱' María, na' guzre̱' le̱' zrize:
\p ―Ba bla' Benne' dxuse̱de, ne dxenné̱' lue'.
\p
\v 29 Ca ben María da nigá, na' guxase̱' guzé̱'e̱, xeajnné̱'e̱ Jesús. 
\v 30 Jesús quebe ne chu'e̱ xe̱zre na', na' zue̱' naga bezraga Marta Le̱'. 
\v 31 Benne' judío ca' zaj zra' xu'u na' dxulunézruje̱' María xel-la' zren lazre', gate belelé'ene̱' guxasa María, ne chadí bdxúaje̱', na' xjácale̱ benne' caní le̱', dxeléquene̱' zéaje̱' dxu'a ba zeajchezre̱' na'.
\p
\v 32 Gate bzrin María naga zua Jesús, na' bzu zribe̱' zran ni'a Jesús, gunné̱':
\p ―Xran, chela zu' nigá, quebe gute bi zana'.
\p
\v 33 Gate ble'e Jesús dxebezre María, ne cá'anqueze dxelebezre judío ca', benne' zjácale̱ne̱' María, na' bexíajele̱'e̱ne̱', ne guzúe̱' ste̱be lu lázrdawe̱'. 
\v 34 Na' bche̱be̱' benne' ca':
\p ―¿Ga bcáchele bénnea'?
\p Na' gulé̱'e̱ Le̱':
\p ―Xran, gudá le'enu'.
\p
\v 35 Na' gudxezre Jesús. 
\v 36 Nadxa gulenná benne' judío ca':
\p ―Le nna'xque cátite̱ nazrí'ine̱' le̱'.
\p
\v 37 Bal-la benne' ca' gulenné̱':
\p ―Benne' nigá bexune̱' benne' la chul-la. La zue̱' nigá, ¿quebe guzéquene̱' ájala gune̱' chee̱ quebe gute Lázaro?
\s1 Jesús dxusebane̱' Lázaro
\p
\v 38 Jesús guzúe̱' ste̱be xetú, na' bzrine̱' dxu'a ba. Ba na' naca na tu bluaj, na' da' tu xiaj ta'a dxu'e na. 
\v 39 Gunná Jesús:
\p ―Le xecá'a xiaj nigá.
\p Marta, bi zan benne' gate na' guzre̱' Jesús:
\p ―Xran, ba dxelá bénnea' tula, lawe' da ba guca tapa zra na'a gutie̱'.
\p
\v 40 Na' Jesús gunné̱':
\p ―¿Quebe gucha' lue' che chéajle̱'u chia', walé'enu' xel-la' szren chee̱ Dios?
\p
\v 41 Nadxa belexequé̱'e̱ xiaj ta'a na'. Jesús guné̱'e̱ xabáa, gunné̱':
\p ―Xrae, dxapa' Lue': “Xcalenu'” lawe' da ba bennu' chia'. 
\v 42 Neda' nezda' tu dxénzquezenu' chia'. Dxennéa' da nigá chee̱ gaca tu da ba neza chee̱ benne' caní, chee̱ xeléajle̱'e̱ chiu' nasel-lu' neda'.
\p
\v 43 Ca gudé gunné̱' da nigá, na' gunné̱' zizraj:
\p ―¡Lázaro, bedxúaj nigá!
\p
\v 44 Bedxúaj benne' gate na', nadxéaj ni'a ne̱'e̱ nen ládxe'dau' da buluchele̱' ni'a ne̱'e̱, na' lawe̱' dxela na ladxe'. Jesús guzre̱' benne' ca':
\p ―Le xese̱zre̱', ne le gusane̱' xexíaje̱'.
\s1 Benne' dxeledábague̱' Jesús dxelune̱' tuze dizra' xele̱l-le̱' Le̱'
\r (Mt. 26.1-5; Mr. 14.1-2; Lc. 22.1-2)
\p
\v 45 Nadxa guléajle̱ benne' zan chee̱ Jesús, benne' judío ca' xjácale̱ María, ne belelé'ene̱' ca da be̱n Jesús. 
\v 46 Bal-la benne' ca' xjaque̱' xeajlechálajle̱ne̱' benne' fariseo ca', na' buluzenne̱' le̱' ca da be̱n Jesús. 
\v 47 Nadxa fariseo ca', ne benne' xíchaje̱ ca' chee̱ bxruze ca' belezrague̱' nen benne' xu'u lawe' blau chee̱ judío ca', na' gulenné̱':
\p ―¿Ájazra gundxu? Benne' nigá dxúnle̱'e̱ xel-la' waca da za xabáa. 
\v 48 Che ca' güedxu Le̱' lataj, xúgute̱ bénneache xeleajlé̱'e̱ chee̱' chee̱ xuluzúe̱' Le̱' ca wenná bea, na' xelelá' benne' Roma ca', benne' zjaque̱' wedil-la, na' xuluzría xi'e̱ xudau' chee̱dxu, ne xe̱zr la xu chee̱dxu.
\p
\v 49 Nadxa tu benne' le̱' Caifás, bxruze blau iza na', guzre̱' benne' ca':
\p ―Le'e québequeze bi nézele, 
\v 50 ne quebe dxeque be'ele gácadxa chawe' chee̱dxu gate' tuze benne' ne̱ chee̱ xe̱zre nigá, ne quegala ca naca xe̱zr la xu nigá cuía xi na.
\p
\v 51 (Quegá gunná Caifás da nigá cheé̱zqueze̱'. Lawe' da naque̱' bxruze blau iza na', bchálaje̱' waláz chee̱ Dios, gunné̱' gate' Jesús ne̱ chee̱ xe̱zr la xu judío. 
\v 52 Quegá gatie̱' tuze ne̱ chee̱ xe̱zr la xu naze. Cá'anqueze chee̱ xutupe̱' lu na' Dios xúgute̱ benne' zaj naque̱' chee̱ Dios, benne' zaj nase dínnaje̱', benne' ca' zaj nababe̱' xúgute̱ cue' xe̱zr la xu.) 
\v 53 Ca'an guca, ca lu zra na'te̱ benne' judío wenná bea ca' belune̱' tuze dizra' xelútie̱' Jesús.
\p
\v 54 Chee̱ le̱ na' Jesús québedxa gudé̱' naga zaj zra' benne' wenná bea ca' chee̱ judío ca', na' guzé̱'e̱ naga nababa Judea, na' guxíaje̱' xe̱zre Efraín naga zua gáguze tu le̱'e̱ xixre' lawe' lataj. Begá'ane̱' xe̱zre na' nen benne' ca' dxusé̱dene̱'.
\p
\v 55 Ba zua gáguze zrin Laní Pascua chee̱ judío ca', na' benne' zan chee̱ xe̱zre ca' xjaque̱' Jerusalén chee̱ xulucá'ana chawe' cuine̱' nédxudxa ca zrin Laní Pascua. 
\v 56 Guledé̱' dxelexílaje̱' Jesús, na' gate zaj zre̱'e̱ chale'aj xudau' na', buluche̱be ljwezre̱':
\p ―¿'Ajazra dxéquele? ¿Wide̱' laní, che quebe xide̱'?
\p
\v 57 Benne' fariseo ca', ne benne' xíchaje̱ ca' chee̱ bxruze ca' ba gulebéaje̱' dizra' che nu benne' ca' nézene̱' ga zua Jesús, na' xelé̱'e̱ benne' ca' chee̱ gaca xele̱l-le̱' Le̱'.
\c 12
\s1 María dxugu'e̱ da dxelá zixre ni'a Jesús
\r (Mt. 26.6-13; Mr. 14.3-9)
\p
\v 1 Xrupa zra nédxudxa gate za chu'u Laní Pascua chee̱ judío ca', guxíaj Jesús xe̱zre Betania naga zua Lázaro, bénnea' bsebán Jesús ládujla benne' gate'. 
\v 2 Lu xe̱zre na' belune̱' tu xrche', chee̱ gulape̱' ba lá'ana Jesús. Marta bdee̱' xel-la' wagu, na' Lázaro dxé'le̱ne̱' benne' ca' dxelágule̱ne̱' Jesús. 
\v 3 Nadxa María guqué̱'e̱ tu xia da za da dxelále̱'e̱ zixre, da naca na chee̱ dusén lase, da zácale̱'e̱ na, na' gulu'e̱ da za na' ni'a Jesús, ne bsebizre̱' na nen xicha xíchaje̱'. Ca naca benne' zaj zra' xu'u na' gulelé'ene̱' ca dxelá da zixre na'. 
\v 4 Nadxa Judas Iscariote, zri'ine Simón, tu benne' ca' dxuse̱de Jesús, ne naque̱' bénnea' gudée̱' Jesús lu na' benne' guledábague̱' Le̱', gunné̱':
\p
\v 5 ―¿Bizr chee̱ na' quebe gudá'u da zixre na', na' sidxu na dumí lazruj chee̱ chunna gaxúa zra chee̱ gácale̱dxu benne' xache' ca'?
\p
\v 6 Quebe gunná Judas da nigá lawe' da dxe'e̱ gunne xue chee̱ benne' xache' ca'. Naque̱' gubán, ne nu'e̱ bzude dumí chee̱ benne' ca' dxuse̱de Jesús, ne dxebane̱' late' weaj dumí na' da dxuluzré̱'e̱ lu bzude na'. 
\v 7 Nadxa Jesús guzre̱' Judas na':
\p ―Be̱ lataj nu'ula nigá lawe' da be̱ne̱' da nigá chee̱ dxucá'ana chawe̱' neda' chee̱ gate xulucache̱' neda' lu xe̱dxu ba. 
\v 8 Benne' xache' ca' tu zrázqueze̱' ládujla le'e. Neda' quebe tu súazqueza' nen le'e.
\s1 Dxelune̱' tuze dizra' xelútie̱' Lázaro
\p
\v 9 Zane' benne' judío ca' belenne̱' zua Jesús xe̱zre Betania, na' xjaque̱' na', quegá tuze zeajlenné̱'e̱ Jesús. Cá'anqueze zeajlenné̱'e̱ Lázaro, bénnea' bsebán Jesús ládujla benne' gate ca'. 
\v 10 Nadxa benne' xíchaje̱ ca' chee̱ bxruze ca' belune̱' tuze dizra' cá'anqueze xelútie̱' Lázaro, 
\v 11 lawe' da ne̱ chee̱ Lázaro benne' zan benne' judío ca' dxelebéaj xíchaje̱' bxruze ca' chee̱ xeleajlé̱'e̱ chee̱ Jesús.
\s1 Dxexú'u Jesús Jerusalén
\r (Mt. 21.1-11; Mr. 11.1-11; Lc. 19.28-40)
\p
\v 12 Benne' zan ba zjaca Jerusalén, zjaque̱' Laní Pascua na', na' zra xula belenne̱' ba za' Jesús lu xe̱zre na'. 
\v 13 Nadxa gulechugue̱' zina', na' xjaque̱' xeajlexrígale̱' Jesús, ne dxelenné̱' zizraj:
\p ―¡Gaca ba lá'azxa Dios! ¡Ba neza zrente̱ naca na chee̱ Benne' ze̱'e̱ waláz chee̱ Xránadxu Dios! ¡Ba neza zrente̱ naca na chee̱ Wenná Bea chee̱ xe̱zre Israel!
\p
\v 14 Jesús xeajxraque̱' tu burro, na' guzríe̱'-ba', ca naxúaj na lu xiche chee̱ Dios, dxenná na:
\q1
\v 15 Quebe zrébele le'e, benne' zre̱'e̱ xe̱zre Sión.
\q1 Le nna'xque, ba za' Wenná Bea chee̱le.
\q1 Zrie̱' tu burro.
\p
\v 16 Nédxute̱ benne' ca' dxuse̱de Jesús quebe guléajni'ine̱' da na' dxaca na. Ca gudé na', gate begá'ana szren Jesús lau Dios, na' xeajlesá lazre̱' xúgute̱ da caní zaj naxúaj na lu xiche chee̱ Dios ca naca chee̱ Jesús, na' ca'an guca chee̱'.
\p
\v 17 Benne' ca' zaj zre̱'e̱ nen Jesús gate gunné̱' Lázaro lu xe̱dxu ba, ne bsebane̱' le̱' ládujla benne' gate, buluzenne̱' bénneache Jerusalén ca da guca na'. 
\v 18 Chee̱ le̱ na' benne' caní xeajlexrígale̱' Jesús lawe' da belenne̱' ca naca xel-la' waca zrente̱ da be̱ne̱'. 
\v 19 Nadxa benne' fariseo ca' gulé̱ ljwezre̱':
\p ―Ba dxelé'ele quebe séquedxu bi gundxu. Ca naca bénneache dxelune̱' Le̱' tuze.
\s1 Dxelexilaj benne' griego ca' Jesús
\p
\v 20 Zaj zra' bal-la benne' griego ca' ládujla benne' ca' belezrine̱' Jerusalén chee̱ xulucá'ana szrene̱' Dios lu laní na'. 
\v 21 Benne' caní belezrine̱' lau Felipe, benne' Betsaida chee̱ ga nababa Galilea, ne naque̱' Jesús tuze, na' gulata' xuene̱' le̱', dxelenné̱':
\p ―Benne', dxaca lázrentu' le'entu' Jesús.
\p
\v 22 Felipe guxíaje̱' xeaje̱zre̱' Andrés caní, na' xjaca dxupe̱' xeajlegue̱zre̱' Jesús ca'. 
\v 23 Nadxa Jesús guzre̱' benne' dxupa ca':
\p ―Ba bzrin zra xegá'ana szrena' neda', Benne' Gulje̱' Bénneache. 
\v 24 Da li dxapa' le'e, tu binne zrua' xtila wegá'ana na tuze na che quebe xexruj na lu xu, ne gacu na xu. Che gacu na xu, na' gunna na lina. Caní dxal-la' gaca chia' neda'. 
\v 25 Benne' dxe'e̱ gunne xue gapa chi'e̱ xel-la' nabán chee̱' gunitie̱' na. Bénnea' dxuzúe̱' chalá'ala xel-la' nabán chee̱' lu xe̱zr la xu nigá, gapa chi'e̱ na, ne zrué'ene̱' xel-la' nabán da zeajlí canna. 
\v 26 Che nu benne' dxaca lazre̱' gune̱' zrin chia', dxal-la' gaque̱' neda' tuze, na' gátete̱ze sua' neda', na' súaqueze benne' dxune̱' zrin chia'. Che nu benne' dxune̱' zrin chia', Xra' gape̱' le̱' ba lá'ana.
\s1 Jesús dxuchálaje̱' ca gaca gate gatie̱'
\p
\v 27 Gunná Jesús:
\p ―Na'a sté̱bele̱'e̱ zua'. ¿Bizra nnia'? ¿Nnia': Xrae, bselá neda' lu da dxal-la' gaca chia' na'a? Belájqueza' chee̱ gaca chia' da caní. 
\v 28 Xrae, bca'ana szren lau'.
\p Nadxa ben tu chi'i benne' dxenné̱' xabáa:
\p ―Ba bca'ana szrena' na, ne gucá'ana szrena' na xetú.
\p
\v 29 Benne' ca' zre̱'e̱ na' dxelenne̱' gulenné̱' guziu' gunné̱. Xebal-le̱' gulenné̱':
\p ―Tu gubáz chee̱ xabáa bchálajle̱ne̱' Le̱'.
\p
\v 30 Nadxa Jesús guzre̱' benne' ca':
\p ―Quegá gunné̱ chi'e̱ na' ne̱ chia' neda'. Gunné̱ na ne̱ chee̱le le'e. 
\v 31 Na'a ba bzrin zra guchi'a Dios chee̱ bénneache zre̱'e̱ xe̱zr la xu nigá, na' na'a cueaj Dios chalá'ala da xriwe̱', da na' dxenná bea na lu xe̱zr la xu nigá, chee̱ québedxa nna bea na. 
\v 32 Gate xelechise̱' neda' lu xe̱zr la xu nigá le̱'e̱ xaga béguaj, na' neda' nnia' xúgute̱ bénneache chee̱ xelaque̱' neda' tuze.
\p
\v 33 Gate gunné̱' caní, ble'e Jesús ca gatie̱'. 
\v 34 Nadxa benne' zan ca' gulé̱'e̱ Jesús:
\p ―Netu' bénentu' ca da naxúaj na lu xiche chee̱ da nadxixruj bea na da dxenná na waca bánqueze Cristo chadía chacanna. ¿Bizr chee̱ na' dxennáu' Benne' Gulje̱' Bénneache xelechise̱' Le̱'? ¿Nuzra na' Benne' Gulje̱' Bénneache?
\p
\v 35 Nadxa Jesús guzre̱' benne' ca':
\p ―Xetú chí'idauze xel-la' naxaní' sua na ládujla le'e. Le ta na'a dxácate̱ ne zua xel-la' naxaní' nen le'e, chee̱ quebe xrínnele, lawe' da benne' dxedé̱' lu da chul-la quebe nézene̱' ga zéaje̱'. 
\v 36 Le cheajlé̱ chee̱ xel-la' naxaní' da naca' neda' dxácate̱ zua xel-la' naxaní' nen le'e, chee̱ gácale tuze xel-la' naxaní' na'.
\p Ca gudé gunná Jesús da nigá, na' bezé̱'e̱ bcache cuine̱' lau benne' ca'.
\s1 Benne' judío ca' quebe dxeleajlé̱'e̱ chee̱ Jesús
\p
\v 37 Lácala ble'e Jesús zane' xel-la' waca zrente̱ lau benne' judío ca', quegá xúgute̱' guleajlé̱'e̱ chee̱', 
\v 38 lawe' da be̱n na ba xen guca ca da gunná Isaías, benne' bchálaje̱' waláz chee̱ Dios, gunné̱':
\q1 Xran, ¿nuzra guxeajlé̱ chee̱ dizra' chee̱dxu?
\q1 ¿Nuzra na' ble'e Xránadxu xel-la' waca chee̱'?
\m
\v 39 Ca'an guca, quebe guca xeleajlé̱'e̱ chee̱' lawe' da caní gunnáqueze Isaías na':
\q1
\v 40 Dios be̱ne̱' benne' ca' la chul-la, ne be̱ne̱' zide' lázrdawe̱',
\q1 chee̱ quebe xelelé'ene̱' nen xiaj lawe̱',
\q1 ne quebe xeléajni'ine̱' lu xichaj lázrdawe̱',
\q1 ne quebe xelelé̱'e̱ lawa' neda' chee̱ xexuna' le̱'.
\m
\v 41 Isaías na' gunné̱' da nigá lawe' da blé'ene̱' xel-la' szren chee̱ Jesús, ne bchálaje̱' ca naca chee̱'.
\p
\v 42 Zane' benne' judío ca' guléajle̱'e̱ chee̱ Jesús, ne cá'anqueze bal-la benne' xíchaje̱ ca'. Quebe belexeche̱be̱' láwela bénneache lawe' da belezrebe̱' da xelún benne' fariseo ca', chee̱ quebe xelexebéaje̱' le̱' xu'u naga dxelezrague̱'. 
\v 43 Caní belune̱' lawe' da beledánedxene̱' xel-la' ba lá'ana da dxelúe bénneache le̱' ca xel-la' ba lá'ana da dxue Dios le̱'.
\s1 Dizra' chee̱ Jesús guchi'a na chee̱ da dxelún bénneache
\p
\v 44 Jesús gunné̱' zizraj:
\p ―Benne' dxéajle̱'e̱ chia', quegá chee̱za' dxéajle̱'e̱, cá'anqueze dxéajle̱'e̱ chee̱ Xra' nasel-le̱' neda'. 
\v 45 Bénnea' dxelé'ene̱' neda', dxelé'equezne̱' Xra' nasel-le̱' neda'. 
\v 46 Neda', xel-la' naxaní', bla'a lu xe̱zr la xu nigá chee̱ québedxa xelexegá'ana benne' dxeléajle̱'e̱ chia' lu da chul-la. 
\v 47 Che nu benne' dxenne̱' dizra' chia', ne quebe dxune̱' ca naca na, quegá neda' guzría xi'a le̱', lawe' da quebe bla'a neda' chee̱ guzría xi'a bénneache. Bla'a chee̱ guselá' benne' ca'. 
\v 48 Benne' dxuzúe̱' neda' chalá'ala, ne quebe dxune̱' ca naca dizra' chia', ba zua da guzría xi na le̱'. Dizra' da ba gunnéa' naca na da guzría xi na bénnea' lu zra bze̱be na'. 
\v 49 Caní gaca na lawe' da quebe dxuchálaja' cheé̱zqueza', lawe' da Xra' nasel-le̱' neda' ba gunná bé'ene̱' neda' bi dxal-la' nnia', ne bi dxal-la' gusé̱deda'. 
\v 50 Neda' nezda' gunná be'e Xra' neda' caní chee̱ xelezeque bénneache xelape̱' xel-la' nabán da zeajlí canna. Ca'an naca, da dxennéa' neda', dxennéa' na ca gunná be'e Xra' neda'.
\c 13
\s1 Jesús dxibe̱' ni'a benne' ca' dxusé̱dene̱'
\p
\v 1 Naca na zra nedxu gate za chu'u Laní Pascua chee̱ judío ca'. Jesús ba nézene̱' ba bzrin zra xezé̱'e̱ lu xe̱zr la xu nigá chee̱ xexíaje̱' naga zua Xre̱'. Nazrí'iquezne̱' benne' zaj naca chee̱', benne' zaj zre̱'e̱ xe̱zr la xu, na' na'a ba zua gulé'ene̱' benne' ca' tu da zrendxa da gulé'e na nazrí'ine̱' le̱'.
\p
\v 2-4 Da xriwe̱' ba nagú'u na xichaj lázxdau Judas Iscariote, zri'ine Simón, ca dxal-la' gune̱' chee̱ gudée̱' Jesús lu na' benne' guledábague̱' Le̱'. Nézqueze Jesús ze̱'e̱ naga zua Dios, ne dxal-la' xezrine̱' naga zua Dios, na' Xre̱' ba bnézruje̱' Le̱' dute̱ xel-la' dxenná bea. Chee̱ le̱ na', gate dxelawe̱' xrche', guxasa Jesús, na' gudúe̱' ladxe' naxrúa cuzre̱', ne bnase̱' tu ladxe' dxu'a le̱'e̱. 
\v 5 Nadxa gudé̱'e̱ nisa tu zriga xia zren, ne guzú lawe̱' dxibe̱' ni'a benne' ca' dxusé̱dene̱', na' bsebizre̱' ni'e̱ nen ladxe' na' da nunase̱' dxu'a le̱'e̱.
\p
\v 6 Ca bzrine̱' chee̱ quibe̱' ni'a Simón Pedro, le̱' guzre̱' Jesús:
\p ―Xran, ¿Lue' quíbequezu' ni'a?
\p
\v 7 Jesús beche̱be̱':
\p ―Na'a quebe dxéajni'inu' da dxuna'. Te na'a chéajni'inu' na.
\p
\v 8 Pedro guzre̱' Le̱':
\p ―Cabata' quibu' ni'a.
\p Jesús guzre̱' le̱':
\p ―Che quebe quiba' ni'u, quebe gaca gacu' neda' tuze.
\p
\v 9 Na' Simón Pedro guzre̱' Jesús:
\p ―Xran, quegá tuze ni'a quibu'. Cá'anqueze na'a, ne xíchaja'.
\p
\v 10 Jesús guzre̱' le̱':
\p ―Benne' ba bexuzrte̱ guzje̱', tuze ni'e̱ dxal-la' chadxe lawe' da ba naxádxequeze̱'. Le'e ba naxádxele, san quegá xúgute̱le.
\p
\v 11 Gunná Jesús: “Quegá xúgute̱le”, lawe' da nézene̱' nu na' gudée̱' Le̱' lu na' benne' dxeledábague̱' Le̱'.
\p
\v 12 Ca gudé gudibe Jesús ni'a benne' ca', na' bexrúe̱' ladxe' chee̱' cuzre', ne bebe'e̱ ga dxelawe̱', na' guzre̱' benne' ca':
\p ―¿Dxéajni'ile le'e da ba be̱na'? 
\v 13 Le'e dxe̱le neda': Benne' Wese̱de, ne: Xran, na' caní dxal-la' nnale lawe' da caní naca'. 
\v 14 Che neda', Benne' Weséde chee̱le, ne Xránale, ba gudiba' ní'ale, cá'anqueze le'e dxal-la' quíbele ni'a ljwézrele tule xetule. 
\v 15 Neda' ba ble'eda' le'e tu da dxulé'e na, chee̱ gunle le'e ca da be̱na' neda'. 
\v 16 Da li dxapa' le'e, tu benne' we̱n zrin quebe nácadxe̱' szren ca xrane̱', na' tu benne' gubáz quebe nácadxe̱' szren ca benne' nasel-le̱' le̱'. 
\v 17 Che dxéajni'ile da caní, ne dxunle ca zaj naca na, gaca chee̱le tu da ba neza.
\p
\v 18 ’Quebe dxuchálaja' chee̱ xúgute̱le le'e. Neda' núnbe'a benne' ca' gucá'a, san dxal-la' gaca ca naxúaj na lu xiche chee̱ Dios, dxenná na: Benne' dxágule̱ neda' ba gudábague̱' neda' chee̱ gudée̱' neda'. 
\v 19 Dxapa' le'e da nigá na'a, nédxula gate quebe ne gaca na, chee̱ gate gaca na, na' chéajle̱le le'e zúaqueza' neda'. 
\v 20 Da li dxapa' le'e: Benne' dxezí' lu ne̱'e̱ Bénnea' dxusel-le̱' neda', neda' na' dxezí' lu ne̱'e̱, na' benne' dxezí' lu ne̱'e̱ neda', dxezí' lu ne̱'e̱ Xra' nasel-le̱' neda'.
\s1 Dxenná Jesús gudé Judas Le̱' lu na' benne' dxeledábague̱' Le̱'
\r (Mt. 26.20-25; Mr. 14.17-21; Lc. 22.21-23)
\p
\v 21 Ca gudé gunná Jesús da nigá, na' guzúe̱' ste̱be lu xichaj lázrdawe̱', na' bzéajni'ine̱' benne' ca', gunné̱':
\p ―Da li dxapa' le'e, tu benne' ládujla le'e gudée̱' neda' lu na' benne' ca' dxeledábague̱' neda'.
\p
\v 22 Nadxa benne' ca' dxuse̱de Jesús gulezú lawe̱' dxelenná' ljwezre̱', ne quebe zaj nézene̱' nu chee̱ na' dxuchalaj Jesús. 
\v 23 Tu benne' ca' dxuse̱de Jesús, bénnea' nazrí'ile̱'e̱ Jesús le̱', zue̱' cuita Jesús naga dxelawe̱' xrche', 
\v 24 na' Simón Pedro be̱ne̱' tu da dxunna bea lau bénnea' chee̱ guche̱be̱' Jesús nu chee̱ na' dxenné̱' caní. 
\v 25 Nadxa bénnea' de̱'e̱ cuita Jesús bche̱be̱' Le̱':
\p ―Xran, ¿nuzra na'?
\p
\v 26 Beche̱be Jesús:
\p ―Gusebisa' late' xeta xtila, na' bénnea' gunézruja' na, benne' ná'queze̱'.
\p Nadxa Jesús bsebise̱' late' xeta xtila, na' bnézruje̱' na chee̱ Judas Iscariote, zri'ine Simón. 
\v 27 Ca gucá'a Judas xeta xtila na', na' da xriwe̱' guxú'ute̱ na lu xichaj lázrdawe̱'. Nadxa Jesús guzre̱' le̱':
\p ―Da dxal-la' gunu', bé̱ntega na.
\p
\v 28 Benne' ca' zaj zre̱'e̱ dxelawe̱' na' quebe guléajni'ine̱' bizr chee̱ na' guzre̱' Judas na' caní. 
\v 29 Lawe' da nua Judas bzude' dumí, bal-le̱' guléquene̱' Jesús guzre̱' le̱' bi si'e̱ chee̱ laní na', u bi gunézruje̱' benne' xache' ca'. 
\v 30 Ca gudé gudagu Judas xeta xtila na', na' bdxúaje̱'. Ba guxrinne.
\s1 Da nadxixruj bea cube
\p
\v 31 Ca gudé bdxuaj Judas, gunná Jesús:
\p ―Na'a gulé'e lau xel-la' szren chia' neda', Benne' Gulje̱' Bénneache, na' xegá'ana szren Dios ne̱ chia' neda'. 
\v 32 Che neda', Benne' Gulje̱' Bénneache, dxulé'eda' ca naca xel-la' szren chee̱ Dios, na' Dios gulé'ene̱' ca naca xel-la' szren chia' neda', ne la gúnte̱queze̱' na. 
\v 33 Le'e, bidu chia' ca', québedxa sua' scha' nen le'e. Le'e wexílajle neda', san ca gucha' benne' judío ca', dxapa' le'e na'a, quebe gaca sa'le le'e naga cha'a neda'. 
\v 34 Tu da cube dxixruj be'eda' le'e. Le zri'i le sa' ljwézrele tule xetule ca neda' nazrí'ida' le'e. Caní dxal-la' zri'i ljwézrele tule xetule. 
\v 35 Che nazrí'i ljwézrele tule xetule, na' xúgute̱ bénneache xeleque bé'ene̱' nácale neda' tuze.
\s1 Jesús dxenné̱' nna Pedro quebe núnbe'e̱ Le̱'
\r (Mt. 26.31-35; Mr. 14.27-31; Lc. 22.31-34)
\p
\v 36 Simón Pedro bche̱be̱' Jesús:
\p ―Xran, ¿gazra chéaju'?
\p Beche̱be Jesús:
\p ―Naga cha'a neda', quebe gaca sá'le̱nu' neda' na'a. Te na'a wadéquezu' naga tea' neda'.
\p
\v 37 Nadxa gunná Pedro:
\p ―Xran, ¿bizr chee̱ na' quebe gaca sá'le̱na' Lue' na'a? Zúaqueza' guzúa' xel-la' nabán chia' chee̱ guna' Lue' tuze.
\p
\v 38 Jesús beche̱be̱':
\p ―¿Zúaquezu' guzú' xel-la' nabán chiu' chee̱ gacu' neda' tuze? Da li dxapa' lue', nédxudxa ca cuezre xjeaj, lue' wannáquezu' chunna lasa quebe núnbe'u neda'.
\c 14
\s1 Jesús naque̱' neza da dxezrín na naga zua Xradxu Dios
\p
\v 1 Gunná Jesús:
\p ―Quebe cuele le'e gunne xue. Le guxrén lazre' Dios, ne le guxrén lazre' neda'. 
\v 2 Lizre Xra' dé̱le̱'e̱ lataj naga súale. Chela quebe naca na caní, neda' ba gucha' le'e. Wexá'a cheajxecueza' lataj chee̱le. 
\v 3 Ca te xexá'a cheajxecueza' lataj chee̱le, na' wexelájqueza' xetú chee̱ xedajxezri'a le'e súale̱le neda', chee̱ súale le'e naga súaqueza' neda'. 
\v 4 Le'e nézele naga cha'a, ne núnbeale neza na'.
\p
\v 5 Tomás guzre̱' Jesús:
\p ―Xran, quebe nézentu' ga chéaju'. ¿Ájazra guntu' gúnbeantu' neza na'?
\p
\v 6 Jesús beche̱be̱':
\p ―Neda' naca' neza na', ne naca' da li, ne naca' xel-la' nabán. Tuze ne̱ chia' neda' waca zrinle naga zua Xra'. 
\v 7 Chela núnbeale neda', cá'anqueze núnbeale Xra'. Ná'ate̱la núnbeale Le̱' lawe' da ba dxelé'ele Le̱'.
\p
\v 8 Nadxa Felipe guzre̱' Jesús:
\p ―Xran, ble'e netu' Xrau', xetú da ná'te̱ze.
\p
\v 9 Beche̱be Jesús:
\p ―Felipe, scha' ba guzúale̱na' le'e, na' ¿quebe ne gúnbe'u neda'? Benne' dxelé'ene̱' neda', dxelé'equezene̱' Xra'. Chee̱ le̱ na', ¿bizr chee̱ na' dxenabu' neda' gulé'eda' le'e Xra'? 
\v 10 ¿Quebe dxéajle̱'u zúale̱na' Xra', na' Xra' zúale̱ne̱' neda'? Da dxapa' le'e, quegá dxennéa' na cheé̱zqueza'. Xra', Bénnea' zúale̱ne̱' neda', Lé̱queze̱' na' dxune̱' zrin chee̱' lu na'a neda'. 
\v 11 Le chéajle̱le zúale̱na' Xra', na' Xra' zúale̱ne̱' neda', u che cabí dxéajle̱le ca da dxennéa', le chéajle̱ chia' ne̱ chee̱ da ca' dxuna'. 
\v 12 Da li dxapa' le'e, benne' dxéajle̱'e̱ chia', gúnqueze̱' ca da dxuna' neda', na' gune̱' da zaj nácadxa zren ca da caní dxuna' lawe' da xexá'a neda' naga zua Xra'. 
\v 13 Xúgute̱ da nábale le'e lu La' neda', neda' guna' na, chee̱ gulé'eda' neda' xel-la' szren chee̱ Xra'. 
\v 14 Néda'queza' guna' bítete̱ze da nábale lu La' neda'.
\s1 Jesús dxeche̱be lazre̱' sel-le̱' Be' Lá'azxa
\p
\v 15 Gunná Jesús:
\p ―Che le'e nazrí'ile neda', le guzúa dizra' ca naca da dxixruj be'eda' le'e. 
\v 16 Neda' gata' xueda' Xra' sel-le̱' chee̱le xetú Benne' gácale̱queze̱' le'e, ne súale̱tecaze̱' le'e. 
\v 17 Benne' nigá naque̱' Be' Lá'azxa gulé'ene̱' le'e ca naca da li. Benne' zaj naca chee̱ xe̱zr la xu nigá quebe xelezéquene̱' xelezí' lu ne̱'e̱ Le̱' lawe' da quebe gaca xelelé'ene̱' Le̱', ne quebe zaj núnbe'e̱ Le̱'. Le'e núnbeale Le̱' lawe' da zúale̱ne̱' le'e, ne súaqueze̱' lu xichaj lázrdaule. 
\v 18 Quebe gucá'ana' le'e ca bi we̱ze̱be ca'. Welá'queza' súale̱na' le'e. 
\v 19 Xetú chí'idau' bénneache ca' québedxa xelelé'ene̱' neda', san le'e welé'ele neda'. Le'e tu gaca bánzquezle lawe' da tu naca bánzqueza' neda'. 
\v 20 Lu zra na' guéquebe'ele neda' zúale̱na' Xra', na' le'e zúale̱le neda', na' neda' zúale̱na' le'e. 
\v 21 Benne' nézene̱' ca naca da nadxixruj bea na nuna' neda', ne dxune̱' na, dxulé'ene̱' nazrí'iqueze̱' neda'. Xra' zrí'ine̱' benne' nazrí'ine̱' neda', na' cá'anqueze neda' zri'ida' bénnea', ne gulé'e lawa' le̱'.
\p
\v 22 Judas, quegá bénnea' le̱' Iscariote, guzre̱' Jesús:
\p ―Xran, ¿bizr chee̱ na' gulé'e lau' netu', ne quegá gulé'e lau' lau bénneache zaj zre̱'e̱ xe̱zr la xu nigá?
\p
\v 23 Jesús beche̱be̱':
\p ―Benne' nazrí'ine̱' neda' dxune̱' ca naca da dxennéa', na' Xra' zrí'ine̱' bénnea', na' neda' ne Xra' xedajsúale̱ntu' le̱'. 
\v 24 Benne' quebe nazrí'ine̱' neda' quebe dxune̱' ca da dxennéa'. Ca naca dizra' da dxénele quebe zaj naca na cheé̱zqueza'. Zaj naca na chee̱ Xra' nasel-le̱' neda'.
\p
\v 25 ’Dxapa' le'e xúgute̱ da caní dxácate̱ ne zúale̱na' le'e, 
\v 26 na' Be' Lá'azxa, Bénnea' sel-la Xra' lu La' neda' chee̱ gácale̱ne̱' le'e, Le̱' gulé'ene̱' le'e xúgute̱, ne gusá'queze̱' lázrele ca naca xúgute̱ da ba gucha' le'e.
\p
\v 27 ’Xel-la' dxebeza zri lazre' dxuca'ana' chee̱le. Dxunna' le'e xel-la' dxebeza zri lazre' chia'. Quebe dxunna' na ca dxelunna bénneache xel-la' dxebeza zri lazre'. Quebe cuele gunne xue, ne quebe zrébele. 
\v 28 Ba bénele gunnéa' wexá'a, ne welá'a súale̱na' le'e xetú. Chela da li nazrí'ile neda', suale xel-la' dxebé, lawe' da xexá'a naga zua Xra', na' nácadxa Le̱' szren ca neda'. 
\v 29 Da nigá dxapa' le'e na'a nédxula gate quebe ne gaca na, chee̱ gate gaca na, na' chéajle̱le chee̱ da dxennéa'.
\p
\v 30 ’Québedxa guchálajle̱teca' le'e da zren lawe' da ba za' da xriwe̱', da na' dxenná bea na lu xe̱zr la xu nigá. Da na' quebe seque na bi gune na neda'. 
\v 31 Caní dxal-la' gaca chee̱ xeleneze bénneache neda' nazrí'ida' Xra', ne dxuna' ca da gunná bé'ene̱' neda'. ¡Le chasa! ¡Le xebú'u nigá!
\c 15
\s1 Jesús dxuchálaje̱' chee̱ lba uva ne chee̱ zruze na ca'
\p
\v 1 Gunná Jesús:
\p ―Neda' naca' ca tu lba uva da naca na li lazre', na' Xra' naque̱' ca tu benne' dxá'ane̱' na. 
\v 2 Le̱' dxechugue̱' zruze na ca' da quebe dxelebía na da zixre, ne dxun chi'e̱ zruze na ca' da dxelebía na da zixre chee̱ xelebíadxa na. 
\v 3 Le'e nácale ca zruze na ca' da ba nun chi'e̱, ne̱ chee̱ dizra' da ba gucha' le'e. 
\v 4 Le súaqueze gácale neda' tuze ca neda' tu zúale̱zqueza' le'e. Tu zruze xaga quebe gaca cuía na da zixre cheé̱zqueze na che quebe súale̱queze na xaga na'. Cá'anqueze le'e quebe bi gaca gunle che quebe tu gácazquezle neda' tuze.
\p
\v 5 ’Neda' naca' bzrigu lba uva, na' le'e nácale zruze na ca'. Bénnea' naque̱' neda' tuze, na' neda' naca' le̱' tuze, naque̱' ca tu zruze na da dxebíale̱'e̱ na da zixre, lawe' da quebe bi seque' gunle che quebe gácale neda' tuze. 
\v 6 Benne' quebe súate̱queze̱' nen neda' gaque̱' ca tu zruze na da dxugu na, na' bizre na. Xuluxutupe̱' zruze na bizre ca', ne xuluzré̱'e̱ na lu xi'.
\p
\v 7 ’Che le'e súate̱quezle neda' tuze, ne quebe gusanle dizra' chia', waca nábale ca da dxaca lázrele, na' sile na. 
\v 8 Xra' dxegá'ana szrene̱' gate nácale ca zruze na ca' da dxelebíale̱'e̱ na da zixre, ne caní gaca bea na nácale neda' tuze. 
\v 9 Neda' nazrí'ida' le'e ca nazrí'i Xra' neda'. Chee̱ le̱ na' le súaquezle lu xel-la' zri'i lazre' chia'. 
\v 10 Che gunle ca da dxixruj be'eda' le'e, na' súate̱quezle lu xel-la' zri'i lazre' chia', ca dxuna' neda', dxuna' ca bdxixruj be'e Xra' neda', ne zúate̱queza' lu xel-la' zri'i lazre' chee̱'.
\p
\v 11 ’Neda' dxuchálajle̱na' le'e caní chee̱ súale lu xel-la' dxebé chia', ne chee̱ gaca du lazre' xel-la' dxebé chee̱le. 
\v 12 Cani naca da dxixruj be'eda' le'e: Le zri'i le sa' ljwézrele tule xetule ca neda' nazrí'ida' le'e. 
\v 13 Xel-la' zri'i lazre' da naca szrendxa naca bea na che tu benne' guzúe̱' xel-la' nabán chee̱' chee̱ gácale̱ne̱' bi ljwezre̱' ca'. 
\v 14 Le'e nácale bi ljwezra' che dxunle ca da dxixruj be'eda' le'e. 
\v 15 Québedxa xapa' le'e nácale bi we̱n zrin chia' lawe' da quebe neze bi we̱n zrin bi da gun xránabe'. Dxapa' le'e nácale bi ljwezra' lawe' da ba bzenda' le'e xúgute̱ da guzre Xra' neda'. 
\v 16 Le'e quebe gunné̱le neda'. Neda' gunnéa' le'e, ne ba nuzúa' le'e chee̱ gácale ca zruze lba na' da dxelebíale̱'e̱ na da zixre, na' tu súazqueze da zixre na'. Che gunle caní, na' Xra' gunne̱' le'e xúgute̱ da nábale lu La' neda'. 
\v 17 Da nigá naca na da dxixruj be'eda' le'e: Le zri'i le sa' ljwézrele tule xetule.
\s1 Bénneache chee̱ xe̱zr la xu nigá dxelecuídene̱' Jesús, ne cá'anqueze benne' chee̱' ca'
\p
\v 18 Nadxa gunná Jesús:
\p ―Che bénneache dxelecuídene̱' le'e, dxal-la' cheajsá lázrele belecuídequeze̱' neda' nédxute̱. 
\v 19 Chela nácale le'e chee̱ xe̱zr la xu nigá, na' xelezrí'i bénneache le'e ca zaj nazrí'ine̱' le sa' ljwezre̱' ca'. Neda' ba gucá'a le'e ládujla bénneache chee̱ xe̱zr la xu nigá, na' chee̱ le̱ na' dxelecuide bénneache le'e lawe' da québedxa nácale xe̱zr la xu nigá tuze. 
\v 20 Le gusá lázrele da gucha' le'e, gunnéa': Netú benne' we̱n zrin quebe nácadxe̱' szren ca xrane̱'. Che guláu zi' xuzre̱' neda', cá'anqueze xelau zi' xuzre̱' le'e, na' che belune̱' ca dxenná dizra' chia', cá'anqueze xelune̱' ca dxenná dizra' chee̱le le'e. 
\v 21 Xúgute̱ da caní xelune̱' chee̱le lawe' da nácale chia', ne lawe' da quebe zaj núnbe'e̱ Xra' nasel-le̱' neda'.
\p
\v 22 ’Chela quebe bla'a neda', ne bchálajle̱na' benne' ca', quebe bi dul-la zaj nabague̱'. Na'a zaj nabágaqueze̱' dul-la 
\v 23 lawe' da nu benne' dxecuídene̱' neda', cá'anqueze dxecuídene̱' Xra'. 
\v 24 Chela quebe be̱na' neda' xel-la' waca zren ca' láwela benne' ca' ca da netú benne' quebe ne gune̱', na' quebe bi dul-la xelebágue̱'. Lácala ba belelé'ene̱' da ca', dxelecuídene̱' neda', ne dxelecuídene̱' Xra'. 
\v 25 Da nigá dxaca na chee̱ gaca li ca naxúaj na lu da nadxixruj bea na da zjácale̱ benne' ca'. Dxenná na: Belecuídene̱' neda' ne quebe bi da cale̱la be̱na' chee̱ benne' ca'.
\p
\v 26 ’Gate xida Bénnea' gácale̱ne̱' le'e, Bénnea' naque̱' Be' Lá'azxa, ne dxulé'ene̱' da li, Bénnea' sel-la' neda' waláz chee̱ Xra', Lé̱queze̱' xeche̱be̱' ca naca chia' neda'. 
\v 27 Cá'anqueze le'e weché̱bequezle ca naca chia' neda' lawe' da zúale̱le neda' nédxudaute̱.
\c 16
\p
\v 1 Gunná Jesús:
\p ―Dxapa' le'e da caní chee̱ quebe gusán lázrele da naca chia'. 
\v 2 Welexebéaje̱' le'e lu xu'u naga dxelezrague̱', na' zrin zra gate nútete̱ze benne' gutie̱' le'e guéquene̱' gune̱' zrin chee̱ Dios. 
\v 3 Caní xelune̱' lawe' da quebe ne xelúnbe'e̱ Xra', ne neda'. 
\v 4 Dxapa' le'e da nigá chee̱ gate zrin zra na', na' cheajsá lázrele ba gucha' le'e da nigá.
\s1 Da dxun Be' Lá'azxa
\p Nadxa gunná Jesús:
\p ―Quebe gucha' le'e da nigá nédxute̱ lawe' da zúale̱queza' le'e. 
\v 5 Na'a wexá'a cheajxezúale̱na' Xra' nasel-le̱' neda', na' netule le'e quebe dxuché̱bele neda' ga cha'a. 
\v 6 Dxewí'ine lázrele lawe' da gucha' le'e da caní. 
\v 7 Na'a dxapa' le'e da li: Cháwe'dxa gaca chee̱le le'e che xexá'a neda' lawe' da che quebe xexá'a, quebe xida Be' Lá'azxa xedajsúale̱ne̱' le'e, Bénnea' gácale̱ne̱' le'e. Che xexá'a neda', sel-la' Le̱' chee̱le. 
\v 8 Gate xida Le̱', na' gulé'ene̱' bénneache zaj naque̱' benne' dul-la, ne quebe dxelune̱' da xrlátaje, na' Dios guzría xi'e̱ benne' caní. 
\v 9 Zaj naque̱' benne' dul-la lawe' da quebe dxeléajle̱'e̱ chia' neda'. 
\v 10 Xeleque bé'ene̱' quebe dxelune̱' da xrlátaje lawe' da xexá'a neda' naga zua Xra', na' le'e québedxa lé'ele neda'. 
\v 11 Xeleque bé'ene̱' Dios guzría xi'e̱ le̱' lawe' da ba guchugue̱' chee̱ da xriwe̱', da na' dxenná bea na lu xe̱zr la xu nigá.
\p
\v 12 ’Ne dé̱le̱'e̱ da dxal-la' xapa' le'e, san le'e quebe gaca chéajni'ile na na'a. 
\v 13 Gate xida Be' Lá'azxa, Bénnea' dxulé'ene̱' da li, Le̱' gulé'ene̱' le'e ca naca xúgute̱ da li lawe' da quebe guchálaje̱' cheé̱zqueze̱'. Wanné̱' xúgute̱ da xénene̱', na' guzéajni'ine̱' le'e ca da dxal-la' gaca na. 
\v 14 Le̱' gucá'ana szrene̱' neda' lawe' da wazi'e̱ chee̱ da naca chia' neda', na' guzéajni'ine̱' na le'e. 
\v 15 Xúgute̱ da napa Xra', cheé̱queza' naca na, na' chee̱ le̱ na' gunnéa', wazí' Be' Lá'azxa da naca chia', na' guzéajni'ine̱' na le'e.
\s1 Xel-la' dxelewí'ine lazre' chee̱ benne' ca' xexaca na xel-la' dxelebé
\p
\v 16 Gunná Jesús:
\p ―Xetú chí'idau', na' le'e québedxa lé'ele neda', na' xetú chi'i, na' xelé'ele neda' lawe' da xexá'a neda' naga zua Xra'.
\p
\v 17 Nadxa bal-la benne' ca' dxuse̱de Jesús buluche̱be ljwezre̱':
\p ―¿Bizra zéaje̱ da nigá? Dxe̱'e̱ dxi'u, xetú chí'idau' québedxa lé'edxu Le̱', na' xetú chi'i, na' xelé'edxu Le̱' lawe' da xexíaje̱' naga zua Xre̱'. 
\v 18 ¿Bi zéaje̱ da na', xetú chí'idau'? Quebe dxéajni'idxu bi chee̱ dxuchálaje̱'.
\p
\v 19 Guque be'e Jesús dxelaca lazre̱' xuluche̱be̱' Le̱', na' guzre̱' benne' ca':
\p ―Neda' gucha' le'e, xetú chí'idau' québedxa lé'ele neda', na' xetú chi'i, na' xelé'ele neda'. ¿Da nigá na' dxuche̱be ljwézrele? 
\v 20 Da li dxapa' le'e, wabézrele le'e, ne xewi'ine lázrele, san bénneache chee̱ xe̱zr la xu nigá xelebene̱'. Lácala le'e xewi'ine lázrele, xel-la' dxewí'ine lazre' chee̱le xexaca na xel-la' dxebé. 
\v 21 Gate tu nu'ula zua sane̱' bidau' zue̱' ste̱be lawe' da ba bzrin zra sua xel-la' dxudía chee̱'. Gate te galaj bidu na', na' québedxa dxeajsá lazre̱' da guzaque̱' lawe' da dxebéle̱'e̱ne̱' chee̱ bidu na' ba gúlajbe'. 
\v 22 Cá'anqueze le'e zúale ste̱be na'a, san neda' welá'queza' xedajxenná'a le'e, na' lu xichaj lázrdaule súate̱queze xel-la' dxebé, da naca na tu xel-la' dxebé da quebe nu seque' cua.
\p
\v 23 ’Lu zra na' québedxa bi guché̱bele neda'. Da li dxapa' le'e, Xra' gunne̱' le'e xúgute̱ da nábale lu La' neda'. 
\v 24 Nédxula quebe bi gunábale lu La' neda'. Na'a le naba, na' si'le, chee̱ súale̱'e̱le xel-la' dxebé.
\s1 Jesús guchuchuj guléaje̱' da dxaca lu xe̱zr la xu nigá
\p
\v 25 Gunná Jesús:
\p ―Ba gucha' le'e da caní nen dizra' ca' da dxululé'e na. Wazrín zra gate québedxa guchálajle̱na' le'e da naca da dxulé'e na. Guchálajle̱na' le'e caníqueze da naca chee̱ Xra'. 
\v 26 Lu zra na' nábale Xra' lu La' neda', na' quebe dxennéa' neda' gata' xueda' Xra' waláz chee̱le, 
\v 27 lawe' da Xrá'queze nazrí'ine̱' le'e. Nazrí'ine̱' le'e lawe' da nazrí'ile le'e neda', ne dxéajle̱le chia' za'a naga zua Dios. 
\v 28 Guzá'a lau Xra' chee̱ bla'a lu xe̱zr la xu nigá chee̱ xexá'a naga zua Xra'.
\p
\v 29 Nadxa benne' ca' dxuse̱de Jesús gulé̱'e̱ Le̱':
\p ―Na'a dxuchálajle̱nu' netu' caníqueze. Quebe dxuchínenu' dizra' ca' da dxululé'e na. 
\v 30 Na'a dxeque bé'entu' nézenu' xúgute̱ da ca', na' quebe dxal-la' nu guche̱be Lue'. Chee̱ le̱ na' dxéajle̱ntu' chiu' za'u naga zua Dios.
\p
\v 31 Jesús guzre̱' benne' ca':
\p ―¿Dxéajle̱le chia' na'a? 
\v 32 Za' zra, ne ba naca zra ná'queze gate le'e gase dínnajle ca'ale xrneza cha chee̱le, na' gucá'anale neda' tuza'. Quebe zúaqueza' tuza' lawe' da zúale̱ Xra' neda'. 
\v 33 Dxapa' le'e da nigá chee̱ gápale xel-la' dxebeza zri lazre' lawe' da nácale neda' tuze. Lu xe̱zr la xu nigá dxun na ba xen si sácale. Le gun chuchu lázrdaule, lawe' da ba bchuchuj bléaja' da dxaca lu xe̱zr la xu nigá.
\c 17
\s1 Jesús dxenabe̱' Dios xucá'ana chawe̱'e̱ benne' ca' dxeléajle̱'e̱ chee̱'
\p
\v 1 Ca gudé gunné̱' da nigá, na' Jesús gunné̱'e̱ xabáa, dxenné̱':
\p ―Xrae, ba bzrin zra. Bca'ana szren neda', Zri'inu', chee̱ cá'anqueze neda', Zri'inu', gucá'ana szrena' Lue'. 
\v 2 Lue' ba be̱nnu' neda', Zri'inu', xel-la' dxenná bea chee̱ nna be'eda' xúgute̱ bénneache, chee̱ gunézruja' xel-la' nabán da zeajlí canna chee̱ xúgute̱ benne' ca' be̱nnu' neda'. 
\v 3 Xel-la' nabán da zeajlí canna naca na chee̱ xelúnbe'e̱ Lue', nacu' Dios tu licha', ne li lazre', na' chee̱ xelúnbe'e̱ neda', Jesucristo, Bénnea' gusel-lu' Lue'.
\p
\v 4 ’Neda' ba bca'ana szrena' Lue' lu xe̱zr la xu nigá, ne ba bexuzre be̱na' da bdxixruj be'enu' neda'. 
\v 5 Na'a, Xrae, be̱nna neda' xel-la' szren lau Lue', da naca na xel-la' szren na' da guca na chia' naga zu' Lue' nédxudaute̱ gate za gata' xe̱zr la xu nigá.
\p
\v 6 ’Benne' ca' guca'u Lue' ládujla bénneache, benne' ca' be̱nnu' neda', neda' ba bzéajni'ida' le̱' Nu nacu' Lue'. Gulaque̱' chiu', na' Lue' be̱nnu' neda' benne' ca', na' ba belune̱' ca dxenná xrtizru'. 
\v 7 Na'a zaj nézene̱' xúgute̱ da be̱nnu' neda' za na naga zu' Lue'. 
\v 8 Ba bnézruja' chee̱ benne' caní dizra' chiu' da be̱nnu' neda', na' benne' caní ba gulezí' lu ne̱'e̱ na. Ba guleque bé'ene̱' da li neda' za'a naga zu' Lue', ne ba guléajle̱'e̱ chiu', gusel-lu' neda'.
\p
\v 9 ’Neda' dxata' xueda' Lue' gaca chawe' chee̱ benne' caní. Quebe dxata' xueda' Lue' ne̱ chee̱ benne' ca' zaj naque̱' chee̱ xe̱zr la xu nigá. Dxenaba' Lue' ne̱ chee̱ benne' ca' be̱nnu' neda', lawe' da zaj naque̱' chiu'. 
\v 10 Xúgute̱ da naca chia' naca na chiu', na' da naca chiu' naca na chia' neda', na' xel-la' szren chia' dxulé'e lawe' na ne̱ chee̱ benne' caní.
\p
\v 11 ’Neda' québedxa sua' lu xe̱zr la xu nigá, san benne' caní xelexegá'ane̱' lu xe̱zr la xu nigá, na' neda' wezá'a nigá, ne xedajxezúale̱queza' Lue'. Xrae Lá'azxa, lu xel-la' dxenná bea chiu' bxue benne' caní, benne' ca' be̱nnu' neda', chee̱ xelácaqueze̱' tuze ca nácadxu dxi'u tuze, Lue' ne neda'. 
\v 12 Gate ne zua' neda' lu xe̱zr la xu nigá, bxua' benne' caní nen xel-la' dxenná bea chiu', benne' caní be̱nnu' neda', ne bcache chawa' le̱'. Netú benne' caní quebe gunite, san tuze bénnea' ba nanítequeze̱', na' caní guca na chee̱ guca li ca naxúaj na lu xiche chiu'.
\p
\v 13 ’Na'a ba zezá'a naga zu' Lue'. Dxácate̱ ne zua' lu xe̱zr la xu nigá dxennéa' da caní chee̱ xelápale̱'e̱ benne' caní xel-la' dxebé ca da nápaqueza' neda'. 
\v 14 Neda' bnézruja' benne' caní dizra' chiu'. Bénneache chee̱ xe̱zr la xu nigá dxelecuídene̱' benne' caní lawe' da québedxa zaj naque̱' tuze nen benne' ca' chee̱ xe̱zr la xu nigá, ca na' neda' quebe naca' tuze nen da naca chee̱ xe̱zr la xu nigá. 
\v 15 Quebe dxenaba' Lue' xeca'u benne' caní lu xe̱zr la xu nigá. Dxenaba' guzrá chawu' benne' caní chee̱ quebe seque' da xriwe̱' bi gun na chee̱' le̱'. 
\v 16 Ca neda' quebe naca' chee̱ xe̱zr la xu nigá, cá'anqueze benne' caní quebe zaj naque̱' chee̱ xe̱zr la xu nigá. 
\v 17 Bzua benne' caní chee̱ xelaque̱' cheé̱quezu' Lue' ne̱ chee̱ da li. Dizra' chiu' naca na da li. 
\v 18 Ca gusel-lu' Lue' neda' ládujla bénneache zaj naque̱' chee̱ xe̱zr la xu nigá, cá'anqueze neda' dxusel-le̱' benne' caní ládujla bénneache zaj naque̱' chee̱ xe̱zr la xu nigá. 
\v 19 Ne̱ chee̱ benne' caní nuzúa cuina' cheé̱quezu' Lue', chee̱ cá'anqueze benne' caní xelaque̱' cheé̱quezu' Lue' ne̱ chee̱ da li.
\p
\v 20 ’Dxata' xueda' Lue', quegaze chee̱ benne' caní, san cá'anqueze chee̱ benne' ca' xeléajle̱'e̱ chia' gate xelenne̱' da xuluchalaj benne' caní. 
\v 21 Dxenaba' Lue' chee̱ xelaca xúgute̱ benne' caní túzqueze, ca Lue', Xrae, nácaquezu' neda' tuze, ne neda' nácaqueza' Lue' tuze, ne chee̱ xelaca benne' caní tuze nen dxi'u, chee̱ xeléajle̱ bénneache zaj naca chee̱ xe̱zr la xu nigá Lue' gusel-lu' neda'. 
\v 22 Neda' ba bnézruja' chee̱ benne' caní xel-la' szren na' da be̱nnu' neda' chee̱ xelaque̱' tuze ca nácaquezdxu tuze dxi'u. 
\v 23 Neda' súale̱na' benne' caní, na' Lue' súale̱nu' neda', chee̱ xelácaqueze benne' caní tuze, na' caní xeleque be'e bénneache Lue' gusel-lu' neda', ne nazrí'inu' benne' caní cáte̱ze nazrí'inu' neda'.
\p
\v 24 ’Xrae, Lue' be̱nnu' neda' benne' caní, na' dxaca lazra' xelezúale̱ne̱' neda' naga sua' neda', chee̱ xelelé'ene̱' xel-la' szren da ba be̱nnu' neda', lawe' da nazrí'inu' neda' nédxudaute̱ gate quebe ne gunu' xe̱zr la xu nigá. 
\v 25 Xrae chawe', benne' zaj naque̱' chee̱ xe̱zr la xu nigá quebe zaj núnbe'e̱ Lue', san neda' núnbe'a Lue', na' benne' caní ba zaj nézene̱' Lue' gusel-lu' neda'. 
\v 26 Neda' bzéajni'ida' benne' caní Nu nacu' Lue', ne zúaqueza' dxuzéajni'ida' le̱' chee̱ sua xel-la' zri'i lazre' dxéquenu' Lue' neda' lu xichaj lázrdau benne' caní, ne chee̱ súale̱ néda'queza' le̱'.
\c 18
\s1 Dxele̱l-le̱' Jesús
\r (Mt. 26.47-56; Mr. 14.43-50; Lc. 22.47-53)
\p
\v 1 Ca gudé gunná Jesús da caní, na' bdxúaje̱' nen benne' ca' dxusé̱dene̱' chee̱ chjaque̱' xecha la'a xe̱gu Cedrón. Lataj na' zé̱le̱'e̱ xaga olivo naga guxú'u Jesús nen benne' ca'. 
\v 2 Cá'anqueze Judas, bénnea' dxudée̱' Jesús lu na' benne' ca' dxeledábague̱' Le̱', núnbe'e̱ lataj na' lawe' da zane' lasa guxíaj Jesús na' nen benne' ca' dxusé̱dene̱'. 
\v 3 Ca' guca, bzrin Judas na' nen tu cue' benne' ca' dxjaque̱' wedil-la, ne nen bal-la benne' xra'aga we̱n zrin chee̱ xudau', benne' ca' gulesel-la benne' xíchaje̱ ca' chee̱ bxruze ca', ne benne' fariseo ca'. Zaj nu'e̱ xaga, ne xia ca', ne xi' ca', ne xi' xedxe. 
\v 4 Jesús ba nézene̱' ca da gaca chee̱', na' chee̱ le̱ na' bdxúaje̱' lau benne' ca', na' bche̱be̱' le̱':
\p ―¿Nuzra dxexílajle?
\p
\v 5 Belexeche̱be benne' ca':
\p ―Jesús, benne' Nazaret.
\p Jesús beche̱be̱':
\p ―Neda' na'.
\p Judas, bénnea' dxudée̱' Jesús lu na' benne' ca' zúaqueze̱' ládujla benne' ca'. 
\v 6 Gate gunná Jesús: Neda' na', na' benne' ca' belexebigue̱' lau Jesús, ne xeajlechazte̱' lu xu. 
\v 7 Nadxa Jesús bche̱be̱' benne' ca' da xula:
\p ―¿Nuzra dxexílajle?
\p Gulenná benne' ca':
\p ―Jesús, benne' Nazaret.
\p
\v 8 Nadxa guzre Jesús benne' ca':
\p ―Ba gucha' le'e neda' na'. Che dxexílajle neda', le güe benne' caní lataj cheajxaque̱'.
\p
\v 9 Ca guca da nigá guca li ca gunná Jesús, gunné̱': “Benne' ca' be̱nna Xra' neda', netue̱' quebe bnitia'.” 
\v 10 Nadxa Simón Pedro, ne nu'e̱ xia, guléaje̱' na, na' guchugue̱' naga da zua xabe̱la chee̱ Malco, we̱n zrin chee̱ bxruze blau. 
\v 11 Jesús guzre̱' Pedro:
\p ―Begú'u xia chiu' lu zre na. Ca da ba nun Xra' si' saca' neda', ¿quebe dxal-la' saca' na?
\s1 Jesús dxezrine̱' lau bxruze blau
\r (Mt. 26.57-58; Mr. 14.53-54; Lc. 22.54)
\p
\v 12 Nadxa benne' dxjaca wedil-la, ne benne' dxenná be'ene̱' le̱', ne benne' xra'aga we̱n zrin chee̱ judío ca' gule̱l-le̱' Jesús, ne buluchéaje̱' Le̱'. 
\v 13 Nadxa guleché̱'e̱ Jesús lizre Anás. Anás nigá naque̱' xrtau zri'ine Caifás, bénnea' naque̱' bxruze blau iza na'. 
\v 14 Caifás nigá naque̱' bénnea' guzre̱' judío blau ca' gácadxa chawe' gate tuze benne' waláz chee̱ xe̱zr la xu chee̱'.
\s1 Pedro dxenné̱' quebe núnbe'e̱ Jesús
\r (Mt. 26.69-70; Mr. 14.66-68; Lc. 22.55-57)
\p
\v 15 Simón Pedro, ne xetú benne' ca' dxuse̱de Jesús zjaque̱' zeajnawe̱' Jesús. Benne' ljwezre Pedro nigá núnbea bxruze blau le̱'. Ca'an guca, benne' nigá guxú'ule̱ne̱' Jesús chale'aj lizre bxruze blau na'. 
\v 16 Pedro begá'ane̱' dxu'a dxa xu'u da zua chale'aj na'. Chee̱ le̱ na' bdxuaj bénnea' núnbea bxruze blau le̱', na' bchálajle̱ne̱' nu'ula zua dxu'a dxa xu'u na', na' gulu'e̱ Pedro chale'aj na'. 
\v 17 Nadxa nu'ula na' zua dxu'a dxa xu'u bche̱be̱' Pedro:
\p ―¿Quebe nacu' lue' tuze nen benne' Nazaret na'?
\p Pedro beche̱be̱':
\p ―Quebe naca'.
\p
\v 18 Lawe' da dxun na zaga, benne' we̱n zrin ca', ne benne' xra'aga we̱n zrin chee̱ bxruze ca' ba zaj nabeque̱' xi', ne zaj ze̱' dxu'a xi' na' dxelexezré'ene̱'. Pedro ze̱' nen benne' ca', dxexezré'ene̱' dxu'a xi' na'.
\s1 Bxruze blau dxuche̱be̱' Jesús
\r (Mt. 26.59-66; Mr. 14.55-64; Lc. 22.66-71)
\p
\v 19 Bxruze blau guzú lawe̱' dxuche̱be̱' Jesús nuca benne' ca' zaj naque̱' benne' dxusé̱dene̱', ne bi da dxusé̱dene̱' le̱'. 
\v 20 Jesús guzre̱' le̱':
\p ―Neda' ba bchálajqueza' láwela xúgute̱ bénneache. Bsé̱dequeza' lu xu'u ca', ne lu xu'u naga dxelezraga xúgute̱ benne' judío ca'. Quebe bi bchálaja' bagácheze. 
\v 21 ¿Bizr chee̱ na' dxuche̱bu' neda'? Bche̱be benne' ca' ba belenne̱' chia', na' le̱' xelenné̱' bi da bchálajle̱na' le̱'. Benne' ca' zaj nézene̱' da ba gunnéa'.
\p
\v 22 Gate gunná Jesús da nigá, na' tu benne' xra'aga we̱n zrin chee̱ xudau', benne' ze̱' na', gudape̱' xraga Jesús, na' gunné̱':
\p ―¿Caní dxexeche̱bu' lau bxruze blau nigá?
\p
\v 23 Jesús beche̱be̱':
\p ―Che gunnéa' tu da cale̱la, gunná ájala naca na. Che da gunnéa' naca na xrlátaje, ¿bizr chee̱ na' dxu'u neda'?
\p
\v 24 Nadxa Anás gusél-le̱' Jesús, zaj nadxéaj ne̱'e̱, lau Caifás, bxruze blau.
\s1 Pedro dxenné̱' xecha lasa quebe núnbe'e̱ Jesús
\r (Mt. 26.71-75; Mr. 14.69-72; Lc. 22.58-62)
\p
\v 25 Dxácate̱ na' ze̱ Pedro dxu'a xi' na' dxexezré'ene̱', na' gulé̱'e̱ le̱':
\p ―¿Quebe nacu' lue' tu benne' ca' zaj naque̱' tuze nen bénnea'?
\p Na' Pedro gunné̱':
\p ―Quebe naca'.
\p
\v 26 Nadxa tu benne' we̱n zrin chee̱ bxruze blau, benne' naque̱' xrtia bénnea' guchugu Pedro nague̱', bche̱be̱' le̱':
\p ―¿Quegá ble'eda' lue' nen bénnea' naga zaj ze̱ xaga olivo ca'?
\p
\v 27 Pedro gunné̱' xecha lasa:
\p ―Quebe núnbe'a bénnea'.
\p La' ná'queze gudxezre xjeaj.
\s1 Jesús dxezrine̱' lau Pilato
\r (Mt. 27.1-2, 11-14; Mr. 15.1-5; Lc. 23.1-5)
\p
\v 28 Nadxa belexebéaje̱' Jesús lizre Caifás, na' guleché̱'e̱ Le̱' xu'u lizre benne' xu'u lu ne̱'e̱ xe̱zr la xu na' waláz chee̱ Roma. Ba dxezú lau dxaní'sise̱', na' benne' judío ca' quebe gulu'e̱ xu'u na' chee̱ quebe xelexegá'ane̱' sban, lawe' da che xelu'e̱ na', quebe gaca xelawe̱' xrche' chee̱ Laní Pascua. 
\v 29 Chee̱ le̱ na' bdxuaj Pilato bchálajle̱ne̱' benne' ca', na' guzre̱' le̱':
\p ―¿Bizra da zria dxágule benne' nigá?
\p
\v 30 Belexeche̱be benne' ca':
\p ―Chela ca naque̱' tu benne' we̱n da zrinnaj, quebe gudentu' le̱' lau'.
\p
\v 31 Nadxa Pilato guzre̱' benne' ca':
\p ―Le xeché̱'e̱, ne le guchi'a chee̱' cáte̱ze naca da nadxixruj bea chee̱le.
\p Belexeche̱be benne' judío ca':
\p ―Netu', benne' judío, quebe naca chee̱ntu' nu gútentu'.
\p
\v 32 Ca'an guca, guca li ca naca da ba gunná Jesús ca gatie̱'. 
\v 33 Pilato bexu'e̱ xu'u na', na' gunné̱' Jesús, ne bche̱be̱' Le̱':
\p ―¿Nacu' Lue' Wenná Bea chee̱ judío ca'?
\p
\v 34 Jesús gunné̱':
\p ―¿Dxenabu' da nigá lue'zqueze, u lawe' da nu guzre lue' ca naca chia'?
\p
\v 35 Pilato beche̱be̱':
\p ―¿Naca' neda' judío? Benne' xe̱zr la xu chiu', ne benne' xíchaje̱ ca' chee̱ bxruze ca' buludée̱' lue' lawa' neda'. ¿Bizra be̱nu'?
\p
\v 36 Nadxa beche̱be Jesús:
\p ―Naga dxenná be'a quebe naca na chee̱ xe̱zr la xu nigá. Chela naca na chee̱ xe̱zr la xu nigá, na' benne' ca' zaj naque̱' neda' tuze welásaqueze̱' chee̱ quebe tea' neda' lu na' benne' judío caní. Naga dxenná be'a quebe naca na nigá.
\p
\v 37 Nadxa guzre Pilato Jesús:
\p ―¿Nacu' Lue' wenná bea?
\p Beche̱be Jesús:
\p ―Naca' wenná bea, cáte̱ze dxennáu' lue'. Neda' gúlaja', ne bla'a lu xe̱zr la xu nigá chee̱ nnia' da li. Xúgute̱ benne' ca' dxelune̱' ca dxenná dizra' chee̱ da li dxelenne̱' da dxennéa' neda'.
\p
\v 38 Pilato gunné̱':
\p ―¿Bizra na' da li?
\s1 Dxelechugue̱' chee̱ Jesús gatie̱'
\r (Mt. 27.15-31; Mr. 15.6-20; Lc. 23.13-25)
\p Ca gudé bche̱be Pilato Jesús caní, na' bdxúaje̱' xetú. Bchálajle̱ne̱' benne' judío ca', na' guzre̱' le̱':
\p ―Neda' quebe bi da cale̱la dxezrelda' nun benne' nigá. 
\v 39 Le'e zua tu da zéajle̱le. Gusana' neda' tu benne' xu'u lizre xia lu Laní Pascua nigá. ¿Dxaca lázrele gusana' wenná bea chee̱ judío ca'?
\p
\v 40 Nadxa xúgute̱' gulenné̱' zizraj:
\p ―¡Quegá benne' nigá! ¡Bsan Barrabás!
\p Barrabás na' naque̱' gubán.
\c 19
\p
\v 1 Nadxa Pilato guqué̱'e̱ Jesús, na' bdxixruj bé'ene̱' xelu'e̱ Le̱' xide'. 
\v 2 Benne' dxjaque̱' wedil-la buluzríe̱' xichaj Jesús tu da' belune̱' zruze xaga xeche', ne bulugácue̱' Le̱' tu ladxe' bzawe. 
\v 3 Nadxa guléchaje̱' Le̱', dxelenné̱':
\p ―¡Gaca ba lue', wenná bea chee̱ judío ca'!
\p Nadxa belú'e̱ dxu'a lau Jesús.
\p
\v 4 Nadxa bdxuaj Pilato da xula, ne guzre̱' benne' ca':
\p ―¡Le nna'xque! Dxebéaja' benne' nigá chee̱ nézele quebe dxezrelda' bi da zrinnaj nabague̱'.
\p
\v 5 Bdxuaj Jesús zria xíchaje̱' da naca zruze xaga xeche', ne nacue̱' ladxe' bzawe na'. Nadxa Pilato guzre̱' benne' ca':
\p ―Nigá zua bénnea'.
\p
\v 6 Gate benne' xíchaje̱ ca' chee̱ bxruze ca', ne xra'aga we̱n zrin chee̱' ca' belelé'ene̱' Jesús, na' gulezú lawe̱' dxelenné̱' zizraj:
\p ―¡Bde̱'e̱ xaga béguaj! ¡Bde̱'e̱ xaga béguaj!
\p Pilato guzre̱' benne' ca':
\p ―Le che̱'e̱, ne le gudé̱'e̱ xaga béguaj lé'equeze, lawe' da quebe dxezrelda' bi da zrinnaj nabague̱'.
\p
\v 7 Na' benne' judío ca' belexeche̱be̱':
\p ―Netu' nápantu' tu da nadxixruj bea na, ne ca dxenná na dxal-la' gatie̱' lawe' da dxun cuine̱' Zri'ine Dios.
\p
\v 8 Gate ben Pilato da nigá, na' bezrébedxe̱'. 
\v 9 Bexu'e̱ xu'u na', na' bche̱be̱' Jesús:
\p ―¿Gazra benne' Lue'?
\p Quebe bi beche̱be Jesús.
\p
\v 10 Nadxa guzre Pilato Le̱':
\p ―¿Quebe dxexeche̱bu' chia'? ¿Quebe nézenu' Lue' napa' neda' xel-la' dxenná bea gudá'a Lue' xaga béguaj, ne napa' xel-la' dxenná bea gusana' Lue'?
\p
\v 11 Beche̱be Jesús:
\p ―Quebe bi xel-la' dxenná bea napu' bi gunu' chia' chela ca be̱nna Dios lue' xel-la' dxenná bea nigá. Chee̱ le̱ na', bénnea' bdee̱' neda' lu na'u dul-la zrendxa nabague̱' ca lue'.
\p
\v 12 Lu zra na'te̱ gudilaj lazre' Pilato ájala gune̱' gusane̱' Jesús, san benne' judío ca' gulenné̱' zizraj:
\p ―Che gusanu' benne' nigá, quebe nacu' César tuze, bénnea' dxenná bea Roma. Nu benne' dxun cuine̱' wenná bea dxedábague̱' César.
\p
\v 13 Nadxa Pilato, gate benne̱' da nigá, bdxixruj bé'ene̱' xelexebéaje̱' Jesús, na' gudxé'e̱ lataj blau chee̱', da zua lataj na' nazí le na Gabata nen dizra' hebreo, da zéaje̱ na chale'aj xiaj ta'a. 
\v 14 Naca na zra za zrin Laní Pascua, ca du wagubizra. Nadxa Pilato guzre̱' benne' judío ca':
\p ―Nigá zua wenná bea chee̱le.
\p
\v 15 Na' benne' ca' gulenné̱' zizraj:
\p ―¡Gatie̱'! ¡Gatie̱'! ¡Bde̱'e̱ xaga béguaj!
\p Pilato guzre̱' benne' ca':
\p ―¿Gudá'a wenná bea chee̱le xaga béguaj?
\p Belexeche̱be benne' xíchaje̱ ca' chee̱ bxruze ca':
\p ―Netu' zua tuze wenná bea chee̱ntu'. ¡César! 
\v 16 Nadxa Pilato bdee̱' Jesús lu na' benne' ca' chee̱ te̱'e̱ xaga béguaj, na' guleché̱'e̱ Jesús.
\s1 Jesús dxedé̱'e̱ xaga béguaj
\r (Mt. 27.32-44; Mr. 15.21-32; Lc. 23.26-43)
\p
\v 17 Na' bdxuaj Jesús nu'e̱ xaga béguaj chee̱ chéaje̱' lataj na' nazí le na Zrita Xichaj Benne' Gate, na' nen dizra' hebreo nazí le na Gólgota. 
\v 18 Buludé̱'e̱ Jesús xaga béguaj lataj na', na' tu zren nen Jesús buludé̱'e̱ xechupa benne' xaga béguaj ca' chalá'a weaj naga da' Jesús. 
\v 19 Pilato bdxixruj bé'ene̱' buluzúe̱' le̱'e xaga béguaj xichaj Jesús da dxenná na: Jesús, Benne' Nazaret, Wenná Bea Chee̱ Judío Ca'. 
\v 20 Zane' benne' judío ca' bululabe̱' da na' lawe' da zua lataj na' naga buludé̱'e̱ Jesús xaga béguaj gáguze naga dxe' xe̱zre na', na' da na' naxúaj na nen dizra' hebreo, ne nen dizra' griego, ne nen dizra' latín. 
\v 21 Chee̱ le̱ na' benne' xíchaje̱ ca' chee̱ bxruze chee̱ judío ca' gulé̱'e̱ Pilato:
\p ―Quebe guzúaju' na: Wenná Bea Chee̱ Judío Ca'. Bzuaj na: Le̱' Gunné̱' Naque̱' Wenná Bea Chee̱ Judío Ca'.
\p
\v 22 Beche̱be Pilato:
\p ―Da bzuaja', ba naxúajqueze na.
\p
\v 23 Ca gudé buludá' benne' dxjaque̱' wedil-la Jesús xaga béguaj, na' belexequé̱'e̱ zra lane̱', ne belebeque̱' na tapa cue', tu cue' weaj chee̱ tu tu benne' dxjaque̱' wedil-la. Belecá'aqueze̱' ladxe' dxexrúa cuzre̱' da quebe nadía na. Tu ca nácheze na. 
\v 24 Chee̱ le̱ na' benne' dxjaque̱' wedil-la gulé̱ ljwezre̱':
\p ―Quebe chézadxu na. Cwéajdxu da gunna bea na chee̱ la' nu xala le̱ na.
\p Ca'an guca, guca li da naxúaj na lu xiche chee̱ Dios, da dxenná na: Belexelé̱'e̱ zra lana', ne guléaje̱' da gunna bea na chee̱ le̱ na. Caní belún benne' dxjaque̱' wedil-la.
\p
\v 25 Gáguze naga zua xaga béguaj chee̱ Jesús ze̱ xrna Jesús nen bi bila xrne̱'e̱, ne María, zru'ula Cleofas, ne María Magdalena. 
\v 26 Gate ble'e Jesús xrne̱'e̱, ne cuita xrne̱'e̱ na' ze̱ Juan, benne' bse̱de Jesús, bénnea' nazri'idxe̱', na' guzre̱' xrne̱'e̱:
\p ―Nú'uladau', na' ze̱ zri'inu'.
\p
\v 27 Nadxa guzre Jesús bénnea':
\p ―Na' ze̱ xrna'u.
\p Zra na'te̱ benne' nigá beche̱'e̱ nu'ula na' lizre̱'.
\s1 Dxate Jesús
\r (Mt. 27.45-56; Mr. 15.33-41; Lc. 23.44-49)
\p
\v 28 Ca gudé gunná Jesús da nigá, lawe' da nézene̱' xúgute̱ na ba guca li, ne chee̱ guca li ca naxúaj na lu xiche chee̱ Dios, gunné̱':
\p ―Dxebíleda'.
\p
\v 29 Zua na' tu dxe'e nupe zichaj, na' bulusubise̱' tu da dxezrupe na nupe zichaj na', ne buluzúe̱' na lawe' tu xia tunna, na' buluzúe̱' na dxu'a Jesús. 
\v 30 Na' Jesús guzrupe̱' nupe zichaj na', na' gunné̱':
\p ―Ba guca li ca naca na.
\p Nadxa bse dxu'a xíchaje̱', gutie̱'.
\s1 Tu benne' dxeje̱' wedil-la dxechizie̱' xia lachú'u Jesús
\p
\v 31 Naca na zra za zrin Laní Pascua, na' judío ca' quebe gulaca lazre̱' xelexegá'ana benne' ca' le̱'e̱ xaga béguaj ca' lu zra dxulupá'ane̱' lawe' da naca zra na' tu zra blau. Chee̱ le̱ na' gulenabe̱' lau Pilato dxixruj bé'ene̱' xelíchaje̱' ni'a benne' ca' zaj de̱'e̱ xaga béguaj ca', ne xelexequé̱'e̱ le̱' le̱'e̱ xaga béguaj ca'. 
\v 32 Nadxa tu benne' ca' dxjaque̱' wedil-la gudíchaje̱' ni'a benne' nedxu na', ne cá'anqueze chee̱ benne' xetú de̱'e̱ cuita Jesús. 
\v 33 Gate bzrine̱' naga da' Jesús, blé'ene̱' ba gutie̱', na' chee̱ le̱ na' quebe gudíchaje̱' ni'e̱.
\p
\v 34 Tu benne' ca' dxjaque̱' wedil-la guchízie̱' xia chee̱' lachú'u Jesús, na' bdxuaj dxen, ne nisa na'. 
\v 35 Benne' dxuchalaj da nigá naque̱' benne' blé'ene̱' na, ne dxuchálaje̱' da li, ne nézene̱' dxenné̱' da li, chee̱ cá'anqueze le'e chéajle̱le chee̱ Jesús. 
\v 36 Da caní guca na chee̱ guca li ca da naxúaj na lu xiche chee̱ Dios, da dxenná na: Quebe gulíchaje̱' netú zrita chee̱'. 
\v 37 Xetú da naxúaj na lu xiche chee̱ Dios dxenná na: Welelé'ene̱' bénnea' belune̱' we̱'.
\s1 Dxulucache̱' Jesús
\r (Mt. 27.57-61; Mr. 15.42-47; Lc. 23.50-56)
\p
\v 38 Ca gudé na' José, benne' xe̱zre Arimatea, xeajnabe̱' Pilato gu'e̱ le̱' lataj xexu'e̱ Jesús. José naque̱' tu benne' guque̱' Jesús tuze, san bagácheze lawe' da bzrebe̱' judío blau ca'. Pilato be̱'e̱ le̱' lataj, na' bexu'e̱ Jesús. 
\v 39 Cá'anqueze Nicodemo, bénnea' xeajchálajle̱ne̱' Jesús chizrela, bzrine̱' na', nu'e̱ tu gaxúa xiaj nedxe, ne tu da dxelále̱'e̱ zixre. 
\v 40 Nadxa José, ne Nicodemo belexequé̱'e̱ Jesús, na' buluchele̱' Le̱' ladxe' nen nedxe na' ca naca da zjácale̱ benne' judío ca' da dxelune̱' chee̱ benne' gate', gate na' dxulucache̱' le̱'. 
\v 41 Lataj na' naga buludé̱'e̱ Jesús xaga béguaj zua tu lataj naga zaj ze̱ xaga ca', na' láwela lataj na' zua tu ba cube le̱'e̱ xiaj na', naga quebe nu ne chú'uqueze benne' gate'. 
\v 42 Lu ba na' belegu'e̱ Jesús lawe' da zua ba na' gáguze, ne lawe' da ba dxebía gubizra, ne ba zua su lau zra dxulupá'ana judío ca'.
\c 20
\s1 Jesús dxexebane̱' ládujla benne' gate
\r (Mt. 28.1-10; Mr. 16.1-8; Lc. 24.1-12)
\p
\v 1 Zra nedxu, guxíaj María Magdalena dxu'a ba na' dxaní'sise̱', gate ne nachúl-late̱, na' blé'ene̱' québedxa naduse xiaj dxu'a ba na'. 
\v 2 Nadxa bexíaj chégüe̱' naga zua Simón Pedro nen xetú benne' bse̱de Jesús, bénnea' bzri'idxe̱' Jesús, na' guzre̱' benne' ca':
\p ―Ba belequé̱'e̱ Xránadxu lu ba na', ne quebe nézentu' ga xeajlelú'e̱ Le̱'.
\p
\v 3 Nadxa Pedro, ne bénnea' xetú beledxúaje̱' zjaque̱' dxu'a ba na'. 
\v 4 Dxúpate̱' zjaca chégüe̱' tu zren, san bénnea' xetú guzá chégudxe̱' ca Pedro, ne bzrine̱' nédxudxa dxu'a ba na'. 
\v 5 Na' xeajsé̱' su dxú'ala xeajnné̱'e̱ lu ba na', na' blé'ene̱' ladxe' da buluchele̱' Jesús xu'u na na', san quebe guxú'e̱ lu ba na'. 
\v 6 Ca gudé na', bzrin Simón Pedro, na' guxú'e̱ lu ba na'. Cá'anqueze le̱' blé'ene̱' ladxe' na' xu'u na na', 
\v 7 ne blé'ene̱' ladxe' da buluchele̱' xichaj Jesús, quebe xu'u na tu zren nen ladxe' da bedxela na le̱'. Nadube na, dxe' na chalá'ala. 
\v 8 Nadxa cá'anqueze guxú'u bénnea' xetú, bénnea' bzrin nedxu dxu'a ba na', na' blé'ene̱' ladxe' ca', ne guxéajle̱'e̱. 
\v 9 Quebe ne xeléajni'ine̱' da naxúaj na lu xiche chee̱ Dios da dxenná na xebán Jesús ládujla benne' gate'. 
\v 10 Nadxa benne' ca' bse̱de Jesús belexezrine̱' xu'u naga zaj zre̱'e̱.
\s1 Jesús dxulé'e lawe̱' María Magdalena
\r (Mr. 16.9-11)
\p
\v 11 María begá'ane̱' dxu'a ba na', dxebezre̱'. Ca dxebezre̱' na', na' gulégüe̱' dxenné̱'e̱ lu ba na', 
\v 12 na' blé'ene̱' chupa gubáz chee̱ xabáa zaj nácue̱' zra lane̱' chiche, zaj dxe'e̱ naga guxú'u Jesús. Tue̱' dxe'e̱ naga guzrúa xichaj Jesús, na' xetúe̱' dxe'e̱ zeaj zranle ga guzrúa ni'a Le̱'. 
\v 13 Na' buluche̱be gubáz chee̱ xabáa ca' María na':
\p ―Nu'ula, ¿bizr chee̱ na' dxebezru'?
\p Le̱' guzre̱' gubáz chee̱ xabáa ca':
\p ―Lawe' da belú'e̱ Xrana', ne quebe nezda' ga xeajlelú'e̱ Le̱'.
\p
\v 14 Caní dxenné̱', na' bzéchaj xíchaje̱', ne blé'ene̱' Jesús ze̱' ca'ala, san quebe nézene̱' che Jesús na'. 
\v 15 Nadxa Jesús bche̱be̱' María na':
\p ―Nú'uladau', ¿bizr chee̱ na' dxebezru'? ¿Nu dxexílaju'?
\p María gúquene̱' naque̱' benne' dxá'ane̱' xaga ca' zaj ze̱ na', na' guzre̱' Le̱':
\p ―Benne', che lue' bi'u Le̱', gunná ga xeajlú'u Le̱', chee̱ cheajxezri'a Le̱'.
\p
\v 16 Nadxa Jesús guzre̱' nu'ula na':
\p ―María.
\p María na' bexéchaje̱', ne guzre̱' Le̱' nen dizra' hebreo:
\p ―¡Raboni!
\p Dizra' nigá zéaje̱ na: Benne' Dxuse̱de.
\p
\v 17 Jesús guzre̱' María na':
\p ―Bsan neda' lawe' da quebe ne xegüéna' naga zua Xra'. Bexíaj, xeajxe̱zre bi bícha'dau' ca', benne' ca' bsé̱deda', xegüéna' naga zua Xra', ne nácaqueze̱' Xrale. Naque̱' Dios chia', ne Dios chee̱le.
\p
\v 18 Nadxa bexíaj María Magdalena, xeajzenne̱' benne' ca' bse̱de Jesús ba blé'ene̱' Jesús, na' Le̱' guzre̱' le̱' da caní.
\s1 Jesús dxulé'e lawe̱' benne' ca' bsé̱dene̱'
\r (Mt. 28.16-20; Mr. 16.14-18; Lc. 24.36-49)
\p
\v 19 Lu zra ná'queze, da naca na zra nedxu chee̱ da gazre zra, na' chizrela zaj nazraga benne' ca' bse̱de Jesús, ne zaj nusézxuje̱' dxa xu'u ca' lawe' da dxelezrebe̱' judío blau ca'. Na' guxú'u Jesús, guzé̱' laduj benne' ca', na' bgape̱' benne' ca' diuzre, dxenné̱':
\p ―Le gapa xel-la' dxebeza zri lazre'.
\p
\v 20 Ca gudé gunná Jesús da nigá, na' blé'ene̱' benne' ca' ne̱'e̱, ne le̱'e̱ naga gudé xia na'. Benne' ca' bse̱de Jesús gulebéle̱'e̱ne̱' gate belelé'ene̱' Xránadxu. 
\v 21 Nadxa Jesús guzre̱' benne' ca' xecha lasa:
\p ―Le gapa xel-la' dxebeza zri lazre'. Cáte̱ze gusel-la Xra' neda', cá'anqueze dxusel-la' neda' le'e.
\p
\v 22 Nadxa blube̱' lau benne' ca' ne guzre̱' le̱':
\p ―Le si' Be' Lá'azxa chee̱ Dios. 
\v 23 Benne' ca' dxunite laule le'e chee̱ dul-la zaj nabague̱' ba bnite lau Dios chee̱', na' benne' ca' quebe dxunite laule le'e chee̱ dul-la zaj nabague̱', quebe bunite lau Dios chee̱'.
\s1 Tomás dxelé'ene̱' Xránadxu ba bebane̱'
\p
\v 24 Tomás, tu benne' chazrinnu ca' bse̱de Jesús, bénnea' le̱' Bi Lide', quebe zue̱' nen benne' ca' xezícadxa gate ble'e lau Jesús. 
\v 25 Ca gudé na' gulé̱'e̱ Tomás na':
\p ―Ba blé'entu' Xránadxu.
\p Gunná Tomás:
\p ―Che quebe le'eda' ne̱'e̱ naga guledé bdiduj ca', ne gudéa' zrube na'a lu xe̱dxu chee̱ bdiduj ca', ne gudéa' na'a le̱'e̱ naga gudé xia na', québequeze chéajle̱'a.
\p
\v 26 Ca guca xrunu' zra, benne' ca' bse̱de Jesús zaj nazrágaqueze̱' lu xu'u na' xetú lasa, na' zua Tomás nen benne' ca'. Nadxa, lácala zaj naxezxuj dxa xu'u ca', ble'e lau Jesús lau benne' ca', ne guzé̱' laduj le̱', na' bgape̱' le̱' diuzre, gunné̱':
\p ―Le gapa xel-la' dxebeza zri lazre'.
\p
\v 27 Nadxa Jesús guzre̱' Tomás:
\p ―Bde zrube na'u nigá, ne gunná' na'a nigá. Be̱nna na'u, bde na le̱'a nigá. Québedxa gun chupa lazru', san guxéajle̱.
\p
\v 28 Nadxa beche̱be Tomás:
\p ―Xrana', ne Dios chia'.
\p
\v 29 Jesús guzre̱' le̱':
\p ―Tomás, na'a dxéajle̱'u lawe' da ba blé'enu' neda'. Ba neza zrente̱ naca na chee̱ benne' ca' dxeléajle̱'e̱ chia' lácala quebe ne xelelé'ene̱' neda'.
\s1 Da dxaca lazre' Juan gun xiche nigá
\p
\v 30 Jesús be̱ne̱' da zandxa xel-la' waca zrente̱ lau benne' ca' bsé̱dene̱' da quebe zaj naxúaj na lu xiche nigá. 
\v 31 Da caní zaj naxúaj na chee̱ chéajle̱le le'e chee̱ Jesús, naque̱' Cristo nasel-la Dios, ne Zri'ine Dios, ne chee̱ gápale xel-la' nabán lawe' da dxéajle̱le chee̱'.
\c 21
\s1 Jesús dxulé'e lawe̱' gazre benne' ca' bsé̱dene̱'
\p
\v 1 Ca gudé na' Jesús ble'e lawe̱' lau benne' ca' bsé̱dene̱' dxu'a nísadau' chee̱ Tiberias. Caní guca na. 
\v 2 Zaj nazraga Simón Pedro, ne Tomás, bénnea' lé̱queze̱' Bi Lide', ne Natanael, benne' xe̱zre Caná da nababa Galilea, ne chupa zri'ine Zebedeo, ne xechupa benne' ca' bse̱de Jesús. 
\v 3 Simón Pedro guzre̱' benne' ca':
\p ―Cheajsendxa' bela.
\p Benne' ca' gulenné̱':
\p ―Cá'anqueze netu' wazá'le̱ntu' lue'.
\p Nadxa xjaque̱', na' gulu'e̱ tu lu da dxedá lawe' nísadau'. Xe̱la na' quebe nu bela gulezénqueze̱'. 
\v 4 Ca guzú lau dxaní'sise̱', ble'e lau Jesús dxu'a nísadau' na'. Benne' ca' bsé̱dene̱' quebe zaj nézene̱' che Jesús na'. 
\v 5 Nadxa Jesús guzre̱' benne' ca':
\p ―Bénne'dau', ¿quebe nu bela ne senle?
\p Belexeche̱be benne' ca':
\p ―Quebe bi ne sentu'-ba'.
\p
\v 6 Nadxa guzre Jesús benne' ca':
\p ―Le guzala xixruj na' chalá'a xabe̱la chee̱ da dxedá lawe' nísadau' na', na' senle bela.
\p Ca' belune̱', na' ca dxelexequé̱'e̱ xixruj na' quebe dxelexegué'ene̱' na lawe' da nazrate̱ na bela zan. 
\v 7 Nadxa bénnea' nazrí'idxa Jesús guzre̱' Pedro:
\p ―Xránadxu na'.
\p Ca ben Simón Pedro naca Xránadxu, na' bexázie̱' ladxe' dxexrúa cuzre̱' lawe' da nagüe̱' na, na' bexétaje̱' lu nisa. 
\v 8 Xezícadxa benne' ca' belexezrine̱' dxu'a nísadau' na', zaj zre̱'e̱ lu da dxedá lawe' nísadau', dxelexezrube xue̱' xixruj na' nazrate̱ na bela ca' lawe' da dxe' da dxedá lawe' nísadau' na' lu nísadau' ca tu le gu'una xiaj. 
\v 9 Gate belexétaje̱' lu xu bizre, na' belelé'ene̱' ba dxe' xi', ne ba zrua tu bela lawe' xi' na', na' de̱ na' xeta xtila. 
\v 10 Nadxa Jesús guzre̱' benne' ca':
\p ―Le cheajxrí' tu chupa bela ca', be̱ za guzénte̱le.
\p
\v 11 Begüén Simón Pedro lu da dxedá lawe' nísadau' na', ne bezrube xue̱' xixruj na' dxu'a nísadau' na'te̱, nazrate̱ na bela zri'a, tu gaxúa chi'inu xunba', na' lácala naca tu cá'ante̱ba' quebe gudxeza xixruj na'. 
\v 12 Nadxa guzre Jesús benne' ca':
\p ―Le da gágule xrsila.
\p Netú benne' ca' quebe dxelexázrene̱' xuluche̱be̱' Le̱' nu Le̱', lawe' da zaj nézene̱' naque̱' Xránadxu. 
\v 13 Nadxa Jesús guqué̱'e̱ xeta xtila na', na' bnézruje̱' na benne' ca', ne cá'anqueze be̱ne̱' chee̱ bela ca'.
\p
\v 14 Da nigá naca na da guxunne' lasa ble'e lau Jesús lau benne' ca' bsé̱dene̱' ca gudé bebane̱' ládujla benne' gate.
\s1 Jesús dxuchálajle̱ne̱' Simón Pedro
\p
\v 15 Ca gudé gulawe̱' xrsila, na' Jesús bche̱be̱' Simón Pedro:
\p ―Simón, zri'ine Jonás, ¿nazrí'idxenu' neda' ca benne' caní?
\p Beche̱be Pedro:
\p ―Awe', Xran, nézenu' dxelé'eda' Lue' chawe'.
\p Na' Jesús guzre̱' le̱':
\p ―Bxue zríla'du chia' ca'.
\p
\v 16 Nadxa Jesús bche̱be̱' le̱' da xula:
\p ―Simón, zri'ine Jonás, ¿nazrí'inu' neda'?
\p Pedro beche̱be̱':
\p ―Awe', Xran, Lue' nézenu' dxelé'eda' Lue' chawe'.
\p Jesús guzre̱' le̱':
\p ―Bxue zrila' chia' ca'.
\p
\v 17 Da guxunne' lasa Jesús bche̱be̱' le̱':
\p ―Simón, zri'ine Jonás, ¿dxelé'enu' neda' chawe'?
\p Pedro bewi'ine lazre̱' lawe' da bche̱be Jesús le̱' da guxunne' lasa che dxelé'ene̱' Le̱' chawe', na' guzre̱' Jesús:
\p ―Xran, Lue' nézquezenu' xúgute̱. Lue' nézenu' dxelé'eda' Lue' chawe'.
\p Na' Jesús guzre̱' le̱':
\p ―Bxue zrila' chia' ca'. 
\v 18 Da li dxapa' lue', gate ne nacu' benne' cuide' gucu' zra lanu', ne guxíaju' naga dxaca lazru'. Gate bache nacu' benne' gula, chilju' na'u, na' benne' xula gugácue̱' lue', ne che̱'e̱ lue' naga quebe gaca lazru' chéaju'.
\p
\v 19 Gate gunná Jesús da nigá, dxuzéajni'ine̱' benne' ca' ca dxal-la' gate' Pedro chee̱ gucá'ana szrene̱' Dios. Ca gudé na' Jesús guzre̱' le̱':
\p ―Be̱n neda' tuze.
\s1 Da gaca chee̱ bénnea' nazrí'idxa Jesús
\p
\v 20 Gate bexechaj Pedro, blé'ene̱' bénnea' nazrí'idxa Jesús zéaje̱ nawe̱' le̱', naque̱' bénnea' dxe'e̱ cuita Jesús gate na' gulawe̱' xrche' na', ne bche̱be̱' Jesús: “Xran, ¿nuzra na' gudé Lue' lu na' benne' ca' dxeledábague̱' lue'?” 
\v 21 Gate Pedro blé'ene̱' bénnea', na' bche̱be̱' Jesús:
\p ―Xran, ¿gazra benne' nigá? ¿Aja gaca chee̱'?
\p
\v 22 Jesús beche̱be̱':
\p ―Che neda' dxaca lazra' xegá'ane̱' nigá ca zrindxa zra xelá'a neda', ¿naca na chiu' lue' nézenu'? Lue', be̱n neda' tuze.
\p
\v 23 Belén benne' ca' zaj de̱'e̱ Jesús quebe gate benne' na'. Jesús quebe guzre̱' le̱' quebe gatie̱'. Guzre̱' le̱': “Che neda' dxaca lazra' xegá'ane̱' ca zrindxa zra xelá'a neda', ¿naca na chiu' lue' nézenu'?”
\p
\v 24 Benne' nigá naque̱' benne' dxexeche̱be̱' chee̱ da nigá, ne ba nuzúaje̱' na. Nézentu' dxenné̱' da li.
\p
\v 25 Cá'anqueze ne zaj de̱dxa da zante̱ da be̱n Jesús, na' chela xuaj tu tu na, dxéqueda' quebe gueque lu xe̱zr la xu nigá cha' xiche ca' dxal-la' guzúajdxu. Ca' naca na.