\id JAS 
\ide UTF-8
\h Santiago
\toc1 DIZRA' CHEE̱ DIOS DA BZUAJ SANTIAGO
\toc2 Santiago
\toc3 Stg.
\mt1 DIZRA' CHEE̱ DIOS DA BZUAJ SANTIAGO
\c 1
\s1 Santiago dxuzuaje̱' chee̱ benne' ca' zaj nadxúaje̱' lazrie̱'
\p
\v 1 Neda', Jacobo, naca' we̱n zrin chee̱ Dios, ne chee̱ Xránadxu Jesucristo. Dxugapa' le'e diuzre. Nácale chazrinnu cue' zri'ine zre sua Israel, ne nase dínnajle du gabí'i xe̱zr la xu nigá.
\s1 Xel-la' sina da za lu na' Dios
\p
\v 2 Benne' bícha'dau', dxal-la' béle̱'e̱le gate dxedele zane cue' da ste̱be ca', 
\v 3 lawe' da nézele gate dxedé xel-la' dxeajlí lazre' chee̱le lu da ste̱be, da nigá dxundxa na le'e zren lazre'. 
\v 4 Le gun ba xuzre gaca li lazre' xel-la' zren lazre' chee̱le chee̱ gácale benne' xrlátaje̱ ne li lazre', ne quebe bi xázrjele.
\p
\v 5 Che núlale le'e dxexázrjele xel-la' sina, le naba na lau Dios, na' Le̱' gunne̱' na le'e, lawe' da dxunézrujle̱'e̱ Dios chee̱ xúgute̱ bénneache, ne quebe dxexezúene̱' zi'. 
\v 6 Dxal-la' nábale nen dute̱ xel-la' dxeajlí lazre' chee̱le, ne quebe gun chupa lázrele. Benne' dxun chupa lazre̱' naque̱' ca xeajxruza chee̱ nísadau' da dxua be' nila na'la. 
\v 7-8 Benne' dxune̱' caní, ne quebe zrize dxezúa lázrdawe̱', ne quebe tuz ca dxun xichaj lázrdawe̱' quebe dxal-la' guéquene̱' bi da xunezruj Xránadxu chee̱'.
\p
\v 9 Tu benne' bíchedxu naque̱' baxache' dxal-la' bene̱' lawe' da guzúa Dios le̱' ca tu benne' zaca. 
\v 10 Benne' nape̱' xel-la' gunní'a dxal-la' bene̱' gate gun Dios le̱' dxexruj lazre' lawe' da naca benne' gunní'a ca tu xiaj xixre' da quebe dxezí béateca na. 
\v 11 Gate dxalaj gubizra, ne dxennále̱'e̱ na, na' dxebizre xixre' na', na' dxexruj xiaj chee̱ na, na' dxedé xel-la' xrtan chee̱ na. Cá'anqueze gaca chee̱ benne' gunní'a, xenitie̱' dxácate̱ na' dxezí' lu ne̱'e̱ xel-la' gunní'a.
\s1 Ca naca chee̱ da ste̱be ca' da dxededxu
\p
\v 12 Ba neza naca na chee̱ benne' dxuchaga lawe̱' da ste̱be ca' dute̱ xel-la' zren lazre' chee̱', lawe' da che ba bedxúaje̱' chawe' lu da ste̱be da dxedée̱', na' si' lu ne̱'e̱ da nache̱be lazre' Dios gunézruje̱' chee̱ benne' ca' zaj nazri'ine̱' Le̱'. 
\v 13 Gate nu benne' zua da dxegú'u xel-la' na le̱' chee̱ gune̱' da cale̱la, quebe dxal-la' guéquene̱' dxuzúa Dios da na' dxegú'u xel-la' na le̱', lawe' da quebe bi de̱ da seque' xegú'u xel-la' na Dios chee̱ gune̱' da cale̱la, ne quebe bi guzúa Dios da xegú'u xel-la' na dxi'u chee̱ gundxu da cale̱la. 
\v 14 Tu benne' zua da dxegú'u xel-la' na le̱' chee̱ gune̱' da cale̱la gate xel-la' dxezá lazre' da cale̱la chee̱' dxecá'a na le̱', ne dxenná be'e na le̱'. 
\v 15 Nadxa ca naca xel-la' dxezá lazre' da cale̱la caní dxuluzán na dul-la, na' gate ba guzeque' zua dul-la na', na' dxute na bénnea'.
\p
\v 16 Benne' bícha'dau' nazri'ite̱ lazra', quebe güele lataj nu si xe̱ le'e. 
\v 17 Xúgute̱ da zaj naca xrlátaje ne da zaj naca li lazre' da dxezidxu zá'aca na xabáa lu na' Dios, Bénnea' be̱ne̱' da ca' dxulusení na zran xabáa. Dios quegá dxuchá cuine̱', ne quebe dxuché̱'e̱ ca dxune̱'. 
\v 18 Ca naca da guca lazre' Dios, ba be̱nne̱' dxi'u xel-la' nabán. Bchínene̱' dizra' li chee̱', chee̱ gácadxu ca tu lina nedxu chee̱', chee̱ da ba be̱n Le̱'.
\s1 Xel-la' dxucá'ana szren Dios da naca na li lazre'
\p
\v 19 Chee̱ le̱ na', benne' bícha'dau' nazri'ite̱ lazra', tu tule le'e dxal-la' gácale ban lazre' chee̱ xénele, san dxal-la' cueza lázrele ca da nne̱le ne quebe la' zrá'ate̱le. 
\v 20 Tu benne' xichaj zra'a quebe dxune̱' da dxezaca ba lazre' Dios. 
\v 21 Chee̱ le̱ na', le gusán xúgute̱ da sban ne ca naca da cale̱la da dxanle̱'e̱ na, na' dute̱ xel-la' dxexruj lazre' chee̱le le si' ca naca dizra' chee̱ Dios da ba naxaza na lu xichaj lázrdaule, lawe' da wazeque' dizra' na' guselá na bénne'du xu'ule.
\p
\v 22 Le gun ca da dxulé'e dizra' na' le'e, ne quegá xénezele na. Benne' dxénzene̱' na dxezí xe̱ze cuine̱'. 
\v 23 Bénnea' dxénzene̱' dizra' na', ne quebe dxune̱' ca dxenná na, naque̱' ca tu benne' dxenné̱'e̱ lawe̱' tu lu wana'. 
\v 24 Dxenné̱'e̱ ca naque̱', na' gate ze xeajze̱' na', na' dxal-la lazre̱' ca naque̱'. 
\v 25 Benne' dxenná' xánnie̱' ca da bdxixruj be'e Dios da naca na li lazre', ne da dxuselá na dxi'u, ne dxusé̱die̱' ca naca na, ne quegá dxénzene̱' na, quebe dxal-la lazrte̱' na. Che dxune̱' ca naca na, benne' nigá gaca tu da ba neza chee̱' lu xúgute̱ da dxune̱'.
\p
\v 26 Che nu benne' dxéquene̱' naque̱' benne' dxucá'ana szren Dios, ne quebe dxezéquene̱' nna be'ene̱' luzre̱', benne' nigá dxezí xe̱ze cuine̱', na' ca naca xel-la' dxucá'ana szren Dios chee̱' dácheze naca na. 
\v 27 Xel-la' dxucá'ana szren Dios da naca na du lazre', ne da naca na da dxezaca ba lazre' Xradxu Dios naca na caní: Gácale̱dxu bidu ca' zaj naze̱be, ne nu'ula ca' ba zaj nate benne' biu chee̱' gate zaj zue̱' lu da zi' da xa', ne quebe gundxu ca naca da sban chee̱ xe̱zr la xu nigá.
\c 2
\s1 Quebe guchale ca gunle chee̱ tu tu benne'
\p
\v 1 Benne' bícha'dau', le'e dxéajle̱le chee̱ Xránadxu, Benne' xabáa Jesucristo, quebe dxal-la' guchale ca gunle chee̱ tu tu benne'. 
\v 2 Che chu'u tu benne' naga nazrágale, ne nácue̱' zra lane̱' da zaca, ne xu'u da naca na oro lu xrube ne̱'e̱, na' cá'anqueze che chu'u tu benne' xache', ne nácue̱' zra lane̱' tuzruj, 
\v 3 na' che dxelé'ele cháwedau' bénnea' nácue̱' zra lane̱' da zaca, ne dxe̱le le̱': “Gudxe'e nigala naga nácadxa na chawe'”, na' dxe̱le benne' xache' na': “Xeajsé̱ na'la, u gudxe'e lu xu ná'te̱ze.” 
\v 4 Che dxunle caní, dxuchale ca dxunle chee̱ tu tu benne', ne dxuchí'ale ca zaj naca bénneache, quebe naca xrlátaje xichaj lázrdaule.
\p
\v 5 Benne' bícha'dau' nazri'ite̱ lazra', le xen da nigá: Dios ba guqué̱'e̱ benne' ca' zaj naque̱' benne' xache' lu xe̱zr la xu nigá chee̱ xelaque̱' benne' gunní'a lu xel-la' dxeajlí lazre', ne chee̱ xelezí' lu ne̱'e̱ da nucueza Dios naga dxenná bea Le̱', da na' guche̱be lazre' Le̱' gunézruje̱' chee̱ benne' ca' zaj nazri'ine̱' Le̱'. 
\v 6 Le'e dxuzúale chalá'ala benne' xache' ca'. ¿Quegá benne' gunní'a ca' benne' dxuluchínene̱' le'e, ne dxeleché̱'e̱ le'e lau benne' xulawe' ca'? 
\v 7 ¿Quegá benne' gunní'a ca' benne' dxelenné̱' schanni' chee̱ da xrlátaje ca nazí' lale, dxennale nácale bi chee̱ Cristo?
\p
\v 8 Che da li dxunle ca dxenná da nadxixruj be'e Dios, da nácadxa blau ca da naxúaj na lu xiche lá'azxa, dxenná na: Bzri'i biche ljwezru' ca nazrí'i cuinu', xrlátaje dxunle. 
\v 9 Na'a che dxuchale ca dxunle chee̱ tu tu benne', dul-la dxunle, ne nabágale zria lawe' da quebe dxunle du ca bdxixruj be'e Dios. 
\v 10 Che tu benne' dxune̱' ca zaj naca da nadxixruj be'e Dios, san che dxenéguene̱' ca naca tuze da nadxixruj be'ene̱', naca na cáte̱ze nabague̱' zria ca zaj naca xúgute̱ da nadxixruj be'e Dios. 
\v 11 Lé̱queze Dios gunné̱': “Quebe gunle dul-la da dxichaj na xrba chee̱ xel-la' wechaga na'”, cá'anqueze gunné̱': “Quebe gútele benne'.” Caní naca, che tu benne' quebe dxune̱' dul-la da dxichaj na xrba chee̱ xel-la' wechaga na', san che dxutie̱' benne', ba gunéguene̱' ca da nadxixruj be'e Dios. 
\v 12 Le'e dxal-la' guchálajle, ne gunle ca dxal-la' xelún benne' ca' guchi'a Dios ca da dxelune̱', benne' ca' zaj nalá lu na' da gunná bea Le̱'. 
\v 13 Benne' ca' quebe dxelexexache lazre̱' chee̱ benne' xula, Dios guchi'e̱ ca da dxelún benne' ca', ne quebe xexache lazre̱' chee̱ benne' ca', san benne' ca' dxelexexache lazre̱' chee̱ benne' xula quebe bi zria xelebague̱' gate Dios guchi'e̱ ca da zaj nun benne' caní.
\s1 Ca naca chee̱ xel-la' dxeajlí lazre', ne chee̱ zrin dxundxu
\p
\v 14 Le'e, benne' bícha'dau', ¿bizra culuén gapa na che tu benne' dxenné̱' dxeajlí lazre̱' Cristo, na' quebe bi dxune̱' da dxácale̱n nu benne' dxexázrjene̱'? ¿Wazeque' xel-la' dxeajlí lazre' na' guselá na le̱'? 
\v 15 Che zra' benne' bíchedxu u nu'ula zandxu, benne' quebe bi zaj de̱ zra lane̱' u da xelawe̱', 
\v 16 na' che núlale le'e xe̱le benne' ca': “Bexiajzé̱ cháwedau'. Nazré'enu', ne gágugu' szri'”, san che quebe bi gunézrujle ca da dxexázrjene̱', ¿bizra culuén gapa da na' gunnále? 
\v 17 Caní naca na chee̱ xel-la' dxeajlí lazre'. Che quebe bi zaj de̱ da chawe' da xululé'e na che dxeajlí lazre' bénnea' Cristo, xel-la' dxeajlí lazre' chee̱' naca na ca tu da gate.
\p
\v 18 Wannalja nu benne': Lue' dxennáu' dxéajle̱'u chee̱ Cristo, na' neda' dxuna' da chawe' ca'. Ble'e neda' dxéajle̱'u chee̱ Cristo ne quebe dxunu' da chawe' ca', na' neda' gulé'eda' lue' dxeajlí lazra' Cristo ne̱ chee̱ da chawe' ca' da dxuna'. 
\v 19 Dxéajle̱'u lue' zua tuze Dios. Nácaqueze na ca'. Cá'anqueze da xriwe̱' ca' dxeléajle̱ na, ne dxelezrize na lu xel-la' dxelezrebe. 
\v 20 Lue', benne' xala, ¿dxaca lazru' gulé'eda' lue' naca xel-la' dxeajlí lazre' ca tu da gate che nu benne' dxeajlí lazre̱' Cristo na' quebe bi zaj de̱ da chawe' da xelunna bea na? 
\v 21 ¿Ájazra guca chee̱ xra xrtáudxu Abraham guque̱' benne' xrlátaje̱ lau Dios? Guca na ne̱ chee̱ da be̱ne̱' gate guxúe̱' zrí'ine̱' Isaac lu bdupa xiaj chee̱ guzezxe̱'-be'. 
\v 22 ¿Quebe dxele'enu'? Ca da be̱n Abraham dxulé'e na guxeajlí lazre̱' Dios, na' xel-la' dxeajlí lazre' chee̱' guca na du lazre' ne̱ chee̱ da be̱ne̱'. 
\v 23 Caní guca li ca da dxenná na lu xiche lá'azxa: Abraham guxéajle̱'e̱ chee̱ Dios, na' Dios blé'ene̱' le̱' benne' xrlátaje̱. Na' bchálaje̱' ca naca chee̱ Abraham, gunné̱': “Bi zrágaqueza', Abraham.”
\p
\v 24 Na'a dxelé'ele Dios dxezí' lu ne̱'e̱ tu benne' ne̱ chee̱ da chawe' da dxune̱', ne quegá tuze lawe' da dxeajlí lazre̱' Le̱'. 
\v 25 Cá'anqueze guca chee̱ Rahab, nu'ula we̱n da sban. Nu'ula nigá gulu'e̱ lizre̱' benne' ca' gusel-la Josué, na' bsi'e̱ benne' ca' neza xula chee̱ belelé̱' lu na' benne' ca' dxjaque̱' wedil-la, na' ne̱ chee̱ da be̱ne̱', Dios guzí' lu ne̱'e̱ nu'ula na'. 
\v 26 Ca naca chee̱ be̱la' dxen chee̱dxu, che ba bedxúaj be' chee̱ na, ba nate na, cá'anqueze naca chee̱ xel-la' dxeajlí lazre' chee̱dxu. Che quebe bi zaj de̱ da chawe' da xululé'e na dxeajlí lazrdxu Cristo, naca na ca tu da gate.
\c 3
\s1 Ca naca chee̱ lúzredxu
\p
\v 1 Benne' bícha'dau', quebe dxal-la' gun cuínale benne' dxuluse̱de dizra' chee̱ Dios, lawe' da nézele ca gun Dios, guchi'a xánnedxe̱' chee̱ da dxundxu dxi'u, dxuchálajdxu xrtizre̱'. 
\v 2 Xúgute̱dxu dxúnle̱'e̱dxu da cale̱la. Che nu benne' quebe bi da cale̱la dxune̱' ca naca da dxuchálaje̱', naque̱' benne' li lazre', na' wazéquene̱' nna be'ene̱' ca nácaqueze be̱la' dxen chee̱'. 
\v 3 Gate dxugú'udxu xia dxu'a bzrina' chee̱ gunba' da dxaca lazrdxu, wazéquedxu nna be'edxu dute̱ba'. 
\v 4 Le na' xque ca naca chee̱ da ca' dxeledán lawe' nísadau'. Lácala zaj naca na da zri'a, na' be' da dxuzriga na le̱ na dxácale̱'e̱ na, benne' dxusé̱'e̱ na dxuchínene̱' tu xágadauze, na' dxenná be'ene̱' na chee̱ cheaj na naga dxaca lazre' le̱'. 
\v 5 Cá'anqueze naca chee̱ lúzredxu. Naca na tu da dauze da naca chee̱ be̱la' dxen chee̱dxu, na' da zrente̱ da dxenná na. Tu xí'dauze waca guzezxe na tu xi'a zren. 
\v 6 Lúzredxu naca na ca tu xi'. Lúzredxu naca na ca tu xe̱zr la xu sban da zua lu be̱la' dxen chee̱dxu, ne dxuxrinnaj na du ca nácadxu. Zúale̱ ca tu xi' lúzredxu da za' lataj ba xa', ne naca na ca tu da dxegú'u na xi' ca naca xúgute̱ da dxundxu. 
\v 7 Wazeque' nu benne' nna bé'ene̱' xúgute̱ be̱ xixre' ca', ne be̱ zaj zua xrila, ne be̱ snia ca', ne be̱ zaj zra' lu nísadau', ne ba gunná bé'ene̱'-ba'. 
\v 8 Quebe nu benne' dxezéquene̱' nna bé'ene̱' dute̱ da dxenná luzre̱'. Naca na tu da cale̱la da quebe dxue na lataj nu nna be'e le̱ na, ne naca na ca tu be̱ snia, be̱ dxúteba' bénneache ca'. 
\v 9 Nen lúzredxu níqueze dxue lá'anadxu Xradxu Dios, ne nen le̱ na dxenné̱quezdxu da cale̱la chee̱ bénneache, benne' ca' nun Dios na' lu'a le saca Lé̱queze̱'. 
\v 10 Lu dxú'adxu ná'queze dxeledxúaj da xrlátaje ne da cale̱la. Benne' bícha'dau', da nigá quebe dxal-la' gaca na ca'. 
\v 11 ¿Waca galaj nisa chawe' ne nisa sla' lu tuze beaj? 
\v 12 Benne' bícha'dau', ¿waca tu xaga higo cuía na da zixre chee̱ xaga olivo? ¿Waca tu lba uva cuía na da zixre chee̱ xaga higo? Cá'anqueze, tu beaj quebe gaca gunna na nisa xene', ne nisa zri lazre'.
\s1 Xel-la' sina da naca li lazre'
\p
\v 13 Che zua tu benne' ládujla le'e naque̱' benne' sina, ne dxéajni'ine̱', dxal-la' gulé'ene̱' na ne̱ chee̱ da chawe' da dxune̱' dute̱ xel-la' dxexruj lazre' chee̱' da dxunezruj xel-la' sina le̱'. 
\v 14 Che zua lu lázrdaule xel-la' zre'e lazre' ne xel-la' xa lazre', quebe dxal-la' gucá'ana szren cuínale ca naca xel-la' sina chee̱le lawe' da caní nne̱le da we̱n lazre' chee̱ da naca da li. 
\v 15 Xel-la' sina caní quebe naca na chee̱ Dios. Naca na chee̱ xe̱zr la xu nigá, ne chee̱ bénneache, ne za na lu na' da xriwe̱'. 
\v 16 Naga zua xel-la' zre'e lazre' ne xel-la' xa lazre', na' zaj zra' benne' wechacha ca', ne dxelune̱' xúgute̱ da cale̱la. 
\v 17 Benne' zaj nape̱' xel-la' sina da dxunna Dios zaj naque̱' du lazre', ne zren lazre', ne dxe'ene lazre', ne dxexruj lazre'. Dxelexache lazre' ljwezre̱', ne dxelune̱' da chawe'. Zaj naque̱' li lazre' ne quebe dxelune̱' cúzreze da chawe'. 
\v 18 Benne' dxelebeche zrie̱' da ba xa' dxelune̱' tu zrin da naca ca tu binne da dxunna na da chawe'.
\c 4
\s1 Ca naca chee̱ benne' zaj nazri'ine̱' da zaj naca chee̱ xe̱zr la xu nigá
\p
\v 1 ¿Bizr chee̱ na' dxedíl-lale ne dxe' da ba xa' ládujla le'e? Dxaca caní lawe' da dxezá lázrele da zaj naca chee̱ da cale̱la, da dxuluzúa na le'e lu da ba xa'. 
\v 2 Le'e dxaca lázrele bi gápale, na' lawe' da quebe dxezrué'ele na, na' dxútele benne'. Dxezá lázrele tu da sile, na' lawe' da quebe dxezéquele sile na, na' dxedíl-lale̱ ljwézrele, ne dxebéquele da ba xa'. Quebe dxezile ca da dxezá lázrele lawe' da quebe dxenábale na lau Dios. 
\v 3 Che dxenábale na, quebe dxezile na lawe' da dxenábale na cale̱la, lawe' da dxedánele na chee̱ guchínele na ca da dxaca lázrele. 
\v 4 Le'e, benne' quebe nácale li lazre', ¿quebe nézele che nu benne' dxedánnene̱' da cale̱la da de̱ lu xe̱zr la xu nigá, benne' nigá dxecuídene̱' Dios? Nútete̱ze benne' dxaca lazre̱' si'e̱ ba neza ca da dxaca lu xe̱zr la xu nigá naque̱' benne' dxecuídene̱' Dios. 
\v 5 Chee̱ le̱ na' dxenná xiche lá'azxa: Be' da nuzúa Dios lázrdaudxu cadite dxe'e̱ gunne xue chee̱dxu. 
\v 6 Dios dxácale̱dxene̱' dxi'u lu xel-la' xrlátaje chee̱', ca dxenná xiche lá'azxa: Dios dxezré̱'e̱ benne' ca' dxulucá'ana szren cuina, na' dute̱ xel-la' xrlátaje chee̱' dxácale̱ne̱' benne' dxexruj lazre' ca'.
\q1
\v 7 Le guzúa dizra' chee̱ Dios.
\q1 Le til-la da xriwe̱', na' le̱ na xuzrunnuj na naga zrale.
\q1
\v 8 Le biga lau Dios, na' Le̱' bigue̱' naga zúale le'e.
\q1 Le'e, benne' dul-la, le gupá'a cuínale chee̱ dul-la da nabágale.
\q1 Le'e, benne' quebe nazri'ile Dios du lázrele, le gaca benne' du lazre'.
\q1
\v 9 Le guzua ba xa' lázre'le.
\q1 Le cuezre, ne le gaca xache' lazre'.
\q1 Québedxa guzrízrele, na' le cuezre.
\q1 Québedxa bele, ne le xewine lazre'.
\q1
\v 10 Le gaca dxexruj lazre' lau Xránadxu, na' Le̱' gucá'ana szrene̱' le'e.
\s1 Quebe dxal-la' guchí'adxu ca da dxun tu benne' bíchedxu
\p
\v 11 Le'e, benne' bícha'dau', quebe nne̱le chee̱ ljwézrele tule xetule. Benne' dxenné̱' chee̱ tu benne' bíchedxu, u dxuchi'e̱ ca da dxun bénnea', naque̱' benne' dxenné̱' cale̱la chee̱ da bdxixruj be'e Dios, ne dxebée̱' ca zaj naca da bdxixruj be'e Dios. Che dxebéu' ca zaj naca da bdxixruj be'e Dios, dxun cuinu' ca benne' dxuchi'e̱ da dxaca, ne quebe dxuzú' dizra' da bdxixruj be'e̱. 
\v 12 Zua tuze Dios, Bénnea' bdxixruj be'e̱ da ca', ne dxuchi'e̱ da dxaca, na' Lé̱queze̱' wazéquene̱' guselé̱' dxi'u, ne guzría xi'e̱ dxi'u. Lue', ¿núzraqueze nacu', dxuchi'u da dxun benne' xula?
\s1 Quebe nezdxu bi gaca wxre
\p
\v 13 Na'a, le xene da nigá, le'e dxennale: Na'a u wxre chéajdxu tu xe̱zre ne cheajsúadxu na' tu iza. Gá'udxu, ne gútedxu chee̱ gucúdedxu dumí. 
\v 14 Quebe nézele ca da gaca wxre. ¿Ájazra naca chee̱ xel-la' nabán chee̱dxu? Naca na ca tu beuj da dxebé' tu chi'i, na' chadí dxenite na. 
\v 15 Da dxal-la' guchálajle naca caní: Che Xránadxu dxaca lazre̱', gaca bandxu ne gundxu da nigá u da na'. 
\v 16 Le'e dxucá'ana szren cuínale ca da dxuchálajle. Xel-la' dxucá'ana szren cuina caní naca na da cale̱la. 
\v 17 Che nu benne' ba nézene̱' ca da chawe' da dxal-la' gune̱', na' quebe dxune̱' na, na' bágale̱'e̱ dul-la.
\c 5
\s1 Santiago dxusízrene̱' benne' gunní'a ca'
\p
\v 1 Le xene da nigá, le'e, benne' gunní'a. Le cuezre ne le xewine lazre' ca naca da zi' da xa' da lé'ele. 
\v 2 Ca naca xel-la' gunní'a chee̱le ba zaj nuzru na, na' zra lánale zaca ba zaj nagu béadu ca' le̱ na. 
\v 3 Ca naca oro chee̱le ne plata chee̱le, ba gulezén xrche̱'e̱ na, na' lawe' da quebe bchínele da gunní'a chee̱le lu da xrlátaje, da caní dxululé'e na nabágale zria lau Dios, na' Le̱' gudée̱' le'e lu da ba xa'. Caní gaca chee̱le lawe' da btúbele xel-la' gunní'a chee̱ gápale na gate ba dxéxrule. 
\v 4 Quebe gudízrujle ca naca chee̱ na benne' ca' belexelape̱' lina chee̱le, na' dxelawe̱' zria chee̱ da quebe gudízrujle, na' Xránadxu, Bénnea' nape̱' dute̱ xel-la' dxenná bea, ba benne̱' ca naca zria da dxelagu benne' ca' chee̱le le'e. 
\v 5 Lu xe̱zr la xu nigá ba guzile ba neza xel-la' gunní'a chee̱le ne xúgute̱ da zaca ca', ne guzrenle ca tu be̱zre dxánnele̱'e̱, na' ba dxezrín zra xelútie̱'-ba'. 
\v 6 Le'e ba bzria xile, ne ba bé̱tele benne' quebe bi da cale̱la zaj nune̱', na' benne' ca' quebe guledábague̱' le'e.
\s1 Dxal-la' gácadxu benne' zren lazre' ne guchálajle̱dxu Dios
\p
\v 7 Chee̱ le̱ na', benne' bícha'dau', le gaca zren lazre' ca zrindxa zra xelá' Xránadxu. Benne' dxaza dxa'ana dxal-la' cueze̱' dute̱ xel-la' zren lazre' chee̱' ca zrindxa zra xelá' xiuj ba ne xiuj lina, chee̱ xezí' lu ne̱'e̱ lina chawe' chee̱'. 
\v 8 Cá'anqueze le gaca zren lazre', ne quebe gute lázrele, lawe' da ba zua gagu zra xelá' Xránadxu. 
\v 9 Le'e, benne' bícha'dau', quebe gágule zria chee̱ ljwézrele, chee̱ quebe guchi'a Dios chee̱ da dxunle, lawe' da zua gágute̱ zra xelá' Dios, Bénnea' dxuchi'e̱ da dxaca. 
\v 10 Le'e, benne' bícha'dau', le gusá lázrele ca guca chee̱ benne' ca' gulenné̱' waláz chee̱ Dios, gulaque̱' zren lazre' lácala guledée' xel-la' zi'. 
\v 11 Dxennadxu guca da ba neza zren chee̱ benne' ca' buluchaga lawe̱' xel-la' zi' ca'. Le'e ba benle ca benne' zren lazre' guca Job, ne ba nézele ca da chawe' be̱n Dios chee̱' ca gudé na'. Xránadxu naque̱' zri'i lazre', ne dxexache lazre̱' dxi'u.
\p
\v 12 Da dxundxa na ba xen, benne' bícha'dau', quebe guzétajle xabáa, ne quebe guzétajle da zua xe̱zr la xu nigá, ne quebe bi da xula guzétajle. Gate nnale: Awe', le nnaze: Awe', ne gate nnale: Cabí, le nnaze: Cabí, chee̱ quebe guzría xi' Dios le'e.
\p
\v 13 Che núlale dxedele lu da zi' da xa', dxal-la' guchálajle̱nle Dios. Che nu benne' zue̱' xel-la' dxebé, dxal-la' gul-le̱' da güe lá'ane̱' Dios. 
\v 14 Che nu benne' quebe chawe' zue̱', dxal-la' nne̱' benne' gula ca' dxuluxúe̱' bi chee̱ Cristo, chee̱ xelenabe̱' lau Dios xexune̱' benne' we̱' na', ne xelegú'e̱ le̱' da za lu La Xránadxu. 
\v 15 Gate dxuluchálajle̱ne̱' Dios dute̱ xel-la' dxeleajlí lazre' chee̱', na' xexaca benne' we̱' na', na' Xránadxu xechise̱' le̱', ne che bi dul-la nune̱', na' gunite lau Dios chee̱ bénnea'. 
\v 16 Chee̱ le̱ na', le xrúale̱pe lau ljwézrele tule xetule dul-la da nunle, ne le guchálajle̱ Dios chee̱ tule xetule, chee̱ xexune̱' le'e. Da dxenaba benne' xrlátaje̱ du lazre̱' lau Dios wazrué'ene̱' na. 
\v 17 Elías, bénnea' gunné̱' waláz chee̱ Dios, guque̱' tu bénneache ca dxi'u, na' gate gunabe̱' lau Dios chee̱ quebe gaca xiuj, na' quebe guca xiuj lu xe̱zr la xu dute̱ chun iza xugachaj. 
\v 18 Gudé na', gate gunabe̱' lau Dios da xula, na' belá' xiuj, na' xe̱zr la xu na' be̱nna na lina.
\p
\v 19 Le'e, benne' bícha'dau', che nu benne' ládujla le'e dxecuase̱' lu da li, na' che núlale le'e xegu'ule le̱' lu xel-la' li, 
\v 20 dxal-la' nézele, nútete̱ze benne' xucuase̱' tu benne' dul-la lu neza cale̱la da zeajle̱ne̱', guselé̱' bénne'du xu'u benne' dul-la na' lu xel-la' gute, na' xunite lau Dios dul-la zan da nabaga bénnea'.