\id 2TI 
\ide UTF-8
\h 2 Timoteo
\toc1 DIZRA' GUDXUPE' DA BZUAJ SAN PABLO CHEE̱ TIMOTEO
\toc2 2 Timoteo
\toc3 2 Ti.
\mt1 DIZRA' GUDXUPE' DA BZUAJ SAN PABLO CHEE̱ TIMOTEO
\c 1
\s1 Pablo dxugape̱' diuzre Timoteo
\p
\v 1 Neda', Pablo, naca' gubáz chee̱ Jesucristo lawe' da guca lazre' Dios gaca' caní, chee̱ cu'a lban ca naca xel-la nabán da guche̱be lazre' Dios gunne̱' chee̱ benne' ca' zaj naque̱' bi chee̱ Jesucristo. 
\v 2 Dxuzúaja' da nigá chiu' lue' Timoteo, bi chia' nazrí'i lazra', na' dxenaba' Xradxu Dios, ne Xránadxu Jesucristo gune̱' da chawe' chiu', ne xexache lazre̱' lue', ne gunne̱' chiu' xel-la dxebeza zri lazre'.
\s1 Pablo dxusízrene̱' Timoteo chee̱ gunbe' zrin chee̱ Cristo
\p
\v 3 Te zra ne chizrela gate dxuchálajle̱na' Dios, ne dxeajsá lazra' lue', dxápequeza' Dios: Xcalenu', Bénnea' dxuna' zrin chee̱', ne quebe bi zua da dxagu na zria lu xichaj lázrdawa'. Dxuna' zrin na' ca belúnqueze xra xrtawa' ca'. 
\v 4 Dxeajsá lázrqueza' ca gudxezru' gate na' bezá'a naga zu', ne dxaca lázrele̱'a xelé'eda' lue' chee̱ gápale̱'a xel-la dxebé. 
\v 5 Cá'anqueze dxeajsá lazra' xel-la dxeajlí lazre' li da napu'. Xrna'u gula, Loida, ne xrna'u, Eunice gulape̱' xel-la dxeajlí lazre' caní, na' nuxrén lazra' lue' nápaquezu' na.
\p
\v 6 Chee̱ le̱ na' dxuzéajni'ida' lue' guchínenu' ca da be̱nna Dios lue' gate na' bzea' na'a xichju', ne gunaba' gun Dios da chawe' chiu'. 
\v 7 Be' Lá'azxa be̱nna Dios dxi'u quebe dxune̱' dxi'u bi zra chebe, san dxunne̱' dxi'u xel-la wal-la, ne xel-la zri'i lazre', ne dxune̱' dxi'u benne' dxenná be'e cuina. 
\v 8 Chee̱ le̱ na' quebe gapa stu' ca naca chee̱ Xránadxu, ne cá'anqueze ca naca chia' neda', xu'a lizre xia nigá lawe' da dxuna' zrin chee̱ Cristo, san bchaga lau lue' xel-la zi' da dxeledé benne' ca' dxuluchálaje̱' dizra' chawe' chee̱ Jesús, na' Dios gutípaqueze̱' lazru'. 
\v 9 Dios bselé̱' dxi'u, ne bláwizre̱' dxi'u chee̱ guzúa cuínadxu lu na' Le̱', quegá lawe' da be̱ndxu tu da xrlátaje, san lawe' da guca lázrequeze Le̱' gaca na caní, ne lawe' da bzri'ine̱' dxi'u, nazrágadxu chee̱ Cristo. Dios bzri'ine̱' dxi'u gate quebe ne gunte̱' xe̱zr la xu nigá, 
\v 10 na' blé'ene̱' xel-la zri'i lazre' nigá na'a, lawe' da gusel-le̱' Jesucristo, weselá chee̱dxu, na' bzria xi'e̱ xel-la dxenná bea chee̱ xel-la gute, ne blé'ene̱' bénneache ca gaca xelezí' lu ne̱'e̱ xel-la nabán chadía chacanna, ca dxennáqueze dizra' chawe' da dxuchálajdxu.
\p
\v 11 Dios bzue̱' neda' chee̱ guchálaja' ca naca dizra' chawe' nigá, ne be̱ne̱' neda' benne' gubáz chee̱' chee̱ gusé̱deda' benne' quebe zaj naque̱' judío. 
\v 12 Chee̱ le̱ na' dxedéa' xel-la zi' caní. Quebe dxapa stu'a ne̱ chee̱ da nigá, lawe' da núnbe'a Bénnea' nuxrén lazra', ne nezda' nape̱' xel-la waca cu'u chawe̱' da nuzúa' lu ne̱'e̱ ca zrindxa zra na'.
\p
\v 13 Be̱xru tipa ca naca dizra' da bsé̱deda' lue', ne quebe gusanu' xel-la dxeajlí lazre', ne xel-la zri'i lazre' da nápadxu lawe' da nácadxu bi chee̱ Jesucristo. 
\v 14 Ne̱ chee̱ xel-la waca chee̱ Be' Lá'azxa, Bénnea' zue̱' xichaj lázrdaudxu, be̱xru tipa da na' nuzúa Dios lu na'u.
\p
\v 15 Ba nézenu' ca belún xúgute̱ bi bíchedxu zaj zre̱'e̱ naga nababa Asia. Gulebéaj xíchaje̱' neda'. Cá'anqueze Figelo, ne Hermógenes belune̱' tu zren benne' ca'. 
\v 16 Dxenaba' Xránadxu xexache lazre̱' benne' zaj zre̱'e̱ lizre Onesíforo. Gúcale̱ le̱' neda' zane' lásaqueze, ne quebe gudapa stue̱' chia' neda', xu'a lizre xia. 
\v 17 Gate ble̱'e̱ xe̱zre Roma, bexílaje̱' neda', na' bezrélene̱' neda'. 
\v 18 Dxenaba' Xránadxu xexache lazre̱' le̱' lu zra ná' gate xelá' Le̱'. Ba nézenu' ca gúcale̱le̱'e̱ne̱' dxi'u lu xe̱zre Efeso.
\c 2
\s1 Benne' we̱n zrin du lazre' chee̱ Jesucristo
\p
\v 1 Lue', zri'ina', guzé̱ tipa ne̱ chee̱ da xrlátaje da nápadxu lawe' da nácadxu bi chee̱ Jesucristo. 
\v 2 Ca da bennu' bchálaja' láwela benne' zan, benne' belexeche̱be̱' naca na da li, bzua na lu na' benne' zaj naque̱' li lazre', benne' xelezéquene̱' xulusé̱dene̱' na benne' xula.
\p
\v 3 Lue' dxal-la' gacu' benne' we̱n zrin du lazre' chee̱ Jesucristo, guchaga lau' xel-la zi' ca tu benne' zeje̱' wedil-la. 
\v 4 Netú benne' zeje̱' wedil-la, benne' xu'e̱ lu zrin chee̱ xrane̱', quebe dxune̱' zrin xula, lawe' da dxaca lazre̱' xezaca ba lazre' xrane̱' chie̱'. 
\v 5 Cá'anqueze, benne' xu'e̱ lu witaj quebe zrue'ene̱' da xexale̱' che quebe quítaje̱' ca naca chee̱ na. 
\v 6 Cá'anqueze benne' dxaza dxa'ana, benne' dxúnle̱'e̱ zrin, dxal-la' xezí' lu ne̱'e̱ lina chee̱'. 
\v 7 Blaba lazre' ca da dxapa' lue', na' Xránadxu guzéajni'ine̱' lue' xúgute̱ na.
\p
\v 8 Bsa lazre' ca naca chee̱ Jesucristo, guque̱' xrtia David, ne bebane̱' ládujla benne' gate, ca dxenná dizra' chawe' da dxuchálaja' neda'. 
\v 9 Ne̱ chee̱ dizra' chawe' nigá dxedéa' xel-la zi', ne xu'a lizre xia nigá ca tu benne' we̱n da zrinnaj, san dizra' chee̱ Dios quebe nu seque' cu'u le̱ na lizre xia. 
\v 10 Chee̱ le̱ na' xúgute̱ da ca' dxuchaga lawa' ne̱ chee̱ benne' ca' ba gucá'a Dios le̱', chee̱ cá'anqueze benne' ca' xelelé̱' ne̱ chee̱ Jesucristo, ne xelexexú'e̱ lu xabáa chadía chacanna.
\p
\v 11 Da nigá naca na da li:
\q1 Che nuzúa cuínadxu gátedxu ca bzua cuina Le̱',
\q1 cá'anqueze waca bandxu nen Le̱'.
\q1
\v 12 Che dxededxu xel-la zi',
\q1 na' nna béaquezdxu tu zren nen Le̱'.
\q1 Che quebe xeché̱bedxu nácadxu bi chee̱ Le̱',
\q1 cá'anqueze Le̱' quebe xeche̱be̱' nácadxu bi chee̱'.
\q1
\v 13 Che dxi'u quebe nácadxu li lazre',
\q1 Le̱' nácaqueze̱' li lazre'.
\q1 Dios québequeze guché̱'e̱ ca naque̱'.
\s1 Tu benne' we̱n zrin du lazre'
\p
\v 14 Bsa lazre' bi bíchedxu ca', ne bsizre le̱' lu La Xránadxu québedxa xulutil-la dizra' ljwezre̱'. Xel-la dxutil-la dizra ljwezre quebe bi culuén napa na, san dxuxrinnaj na xichaj lázrdau benne' ca' dxelénne̱' na. 
\v 15 Be̱n ba xuzre gacu' we̱n zrin du lazre' lau Dios, na' quebe gaca xel-la stu' chiu', lawe' da dxuchínenu' xrlátaje dizra' li. 
\v 16 Quebe gulapa na'u dizra' xálaze, ne dizra' sban da dxuluchálajze bénneache, da ca' dxulucuasa na bénneache lu da naca chee̱ Dios. 
\v 17 Dizra' sban caní dxuluxrinnaj na xichaj lázrdau bénneache ca dxun tu we̱' da dxuzru na lu be̱l-la' dxen chee̱dxu. Caní guca chee̱ Himeneo, ne Fileto, 
\v 18 benne' ca' gulecuase̱' lu xel-la li, na' dxelenné̱' ba belexebán benne' gate, na' dxuluxrínnaje̱' xel-la dxeajlí lazre' chee̱ bal-la benne'. 
\v 19 Dios ba gudixruj bi'e̱ xrtizre̱' da naca na ca tu lane xu'u chee̱ xel-la dxeajlí lazre' chee̱dxu, da dxenná caní: Xránadxu núnbe'e̱ bi chie̱' ca' Cá'anqueze dxenná na: Xúgute̱ bi ca' chee̱ Cristo québedxa dxal-la' xelune̱' da cale̱la.
\p
\v 20 Tu lu xu'u zaca, quegá zra' tuze zriga xé'ena da zaj naca na oro ne plata, san cá'anqueze zaj zra' da zaj naca na xiaj ne xu. Dxuluchínene̱' da ca' zaj zácadxa lu da zaca, na' xezícadxa da ca' dxuluchínene̱' ájate̱ze. 
\v 21 Nácadxu ca zriga xé'ena ca'. Che nu benne' dxaca lazre̱' gaque̱' ca tu da zaca, chee̱ gaque̱' benne' guchine Xránadxu lu zrin xrlátaje chee̱', dxal-la' xexadxe̱' ca naca da cale̱la ca'.
\p
\v 22 Bxue xanne' cuinu' ca zaj naca da ca' dxelezá lazre' benne' cuide' ca', ne quebe gusanu' da xrlátaje da dxunu', ne ca dxeajlí lazru' Cristo, ne ca nazri'inu' Le̱', ne ca dxebeza zri lazru', da ca' dxunu' tu zren nen xúgute̱ benne' ca' du lazre̱' dxululáwizre̱' Xránadxu. 
\v 23 Quebe gulapa na'u dizra' xálaze, ne dizra' quebe zeaj xrlátaje, lawe' da nézenu' dxuluzúa na bénneache lu da ba xa'.
\q1
\v 24 Benne' we̱n zrin chee̱ Xránadxu:
\q1 Quebe dxal-la' tíl-lale̱ne̱' benne'.
\q1 Dxal-la' gaque̱' zri'i lazre' nen xúgute̱ bénneache.
\q1 Dxal-la' gaque̱' benne' dxezeque̱' gusé̱dene̱' bénneache.
\q1 Dxal-la' gaque̱' zren lazre',
\q1
\v 25 ne dute̱ xel-la dxexruj lazre' gusízrene̱' benne' dxelune̱' da cale̱la.
\m Caní dxal-la' gune̱' che ba benla Dios xelexexéaje lazre̱' benne' ca chee̱ xelúnbe'e̱ da li, 
\v 26 na' xelelé̱' lu xralaj chee̱ da xriwe̱', naga nuzrá na le̱', na' dxelune̱' ca da dxenná le̱ na.
\c 3
\s1 Ca xelaca bénneache lu zra bze̱be
\p
\v 1 Cá'anqueze dxal-la' nézele lu zra bze̱be ni' gaca na ste̱be chee̱ bénneache. 
\v 2 Bénneache ca' xelaque̱':
\q1 Benne' xelezrí'ize cuina, ne xelezrí'ine̱' dumí.
\q1 Xulucá'ana szren cuine̱',
\q1 ne xulucá'ana cuine̱' ca benne' blau ca'.
\q1 Xelenné̱' schanni' chee̱ Dios,
\q1 ne quebe xuluzúe̱' dizra' chee̱ xra xrne̱'e̱.
\q1 Xelaque̱' benne' quebe dxelezí le̱,
\q1 ne benne' quebe dxelapa ba lá'ana Dios.
\q1
\v 3 Quebe xelaque̱' zri'i lazre',
\q1 ne quebe xelexexache lazre̱' ljwezre̱'.
\q1 Xelenné̱' chee̱ ljwezre̱', ne quebe xelenná be'e cuine̱'.
\q1 Xelaque̱' benne' snia ca', ne xuluzúe̱' chalá'ala da naca xrlátaje.
\q1
\v 4 Quebe xelaque̱' li lazre' nen ljwezre̱'.
\q1 Xelaque̱' benne' dxelexube.
\q1 Xeléquene̱' zaj naque̱' benne' szrente̱.
\q1 Xelexezaca ba lázredxene̱' da ca' dxeledánene̱' quézcala da naca chee̱ Dios.
\q1
\v 5 Lácala xululé'e cuine̱' ca benne' zaj naque̱' chee̱ Dios,
\q1 quebe súale̱ le̱' xel-la waca chee̱ Dios.
\m Quebe gunu' tu zrén benne' ca'. 
\v 6 Ca zaj naca benne' caní zaj naca benne' ca' zjaque̱' tu tu xu'u, ne dxelezí xe̱'e̱ nu'ula quebe zaj zie̱' du lazre', ne zaj zua da dxagu na zria lázrdawe̱' da naca chee̱ xtul-le'. Xel-la dxelezá lazre' chee̱ nu'ula caní nazrube xu na le̱'. 
\v 7 Lácala tu dxulusé̱dezqueze̱' chee̱ xel-la li, cabata' dxeléajni'iquezne̱' na. 
\v 8 Ca belún Janes ne Jambres, benne' wazrá' ca', benne' ca' guledábague̱' Moisés, cá'anqueze dxelún benne' caní, dxeledábague̱' xel-la li. Zaj nazrinnaj xichaj lázrdawe̱', ne belexecuase̱' lu xel-la dxeajlí lazre' chee̱ Dios. 
\v 9 Quebe bi xelezrué'e benne' caní, lawe' da xeleque bé'equeze xúgute̱ bénneache zaj naque̱' benne' xálaze, ca gulaca benne' chupa ca' guledábague̱' Moisés.
\s1 Da bze̱be da dxusebaga Pablo Timoteo
\p
\v 10 Ba benu':
\q1 Ca da bzéajni'ida' bénneache, ne blé'equeznu' ca bé̱nqueza'.
\q1 Nézenu' da dxaca lazra' guna', ne ca dxeajlí lazra' Cristo.
\q1 Bchaga lawa' da guzxaca', ne nazrí'ida' xúgute̱ bénneache.
\q1 Nézenu' ca naca xel-la zren lazre' chia'.
\q1
\v 11 Blé'enu' ca guláu zi' xuzre̱' neda', ne ca gudéa' xel-la zi'.
\q1 Nézenu' xúgute̱ da guzraca' lu xe̱zre Antioquía, ne xe̱zre Iconio, ne xe̱zre Listra.
\q1 Guláu zi' xuzre benne' ca' neda', na' Xránadxu bselé̱' neda' lu xúgute̱ da ca'.
\p
\v 12 Xúgute̱ benne' ca', benne' dxelaca lazre̱' xelúnqueze̱' ca da dxenná Jesucristo, weláu zi' xúzrequeze bénneache le̱'. 
\v 13 Benne' ca' dxelune̱' da cale̱la, ne benne' dxelezí xe̱'e̱ welúndxaqueze̱' da cale̱la. Xelezí xe̱'e̱ bénneache, na' benne' xula xelezí xe̱'e̱ benne' caní.
\p
\v 14 Lue', guzé̱ chacha ca da ba naxéajni'inu', da na' nuxrén lazru'. Nézqueznu' nu bse̱de lue', 
\v 15 na' ne nácateu' bídau'te̱ ba núnbe'u da dxenná lu xiche lá'azxa, da dxezeque na guzéajni'i na lue', chee̱ lau' lawe' da dxeajlí lazru' Jesucristo. 
\v 16 Xúgute̱ da naxúaj na lu xiche lá'azxa naca na da bzéajni'i Dios benne' ca' zaj naque̱' bi chee̱ Le̱', ne naca na da dxuzéajni'i na dxi'u, ne da dxedil-la na benne' dxelune̱' da cale̱la, ne da dxusizre na dxi'u, ne da dxulé'e na dxi'u ca dxal-la' gundxu da xrlátaje, 
\v 17 chee̱ gaca du lazre' bi chee̱ Dios, na' gácabe' bi naze̱de xanne chee̱ gunbe' xúgute̱ da xrlátaje.
\c 4
\p
\v 1 Lau Dios, ne lau Xránadxu Jesucristo, Bénnea' guchi'e̱ chee̱ benne' ban ca', ne chee̱ benne' gate ca' gate ze̱'e̱ xedajnná be'e̱, dxusebaga' lue' 
\v 2 guchálaju' dizra' chee̱ Dios, ne gunu' ba xuzre guchálaju' che xuluzé̱ naga bénneache, ca xuluzé̱ nague̱'. Bzéajni'i benne' ca' dute̱ xel-la zren lazre' chiu', ne ble'e le̱' ca da zaj nabague̱'. Gudil-la, ne bsizre benne' ca'. 
\v 3 Caní dxal-la' gunu' lawe' da wazrín zra québedxa xuluzé̱ naga bénneache chee̱ xel-la li da dxusé̱dedxu. Ca dxelezá lázrqueze le̱', xulunné̱' zane' benne' xulusé̱dene̱' le̱' ca da dxelaca lázreze le̱' xelenne̱'. 
\v 4 Québedxa xuluzé̱ nague̱' da li. Wuluzé̱ nague̱' dizra' da dxuluzaze bénneache. 
\v 5 Na' lue', bzéajni'i cuinu' lu xúgute̱ da caní. Bchaga lau xel-la zi' da teu'. Bzua cuinu' chee̱ guchálaju' dizra' chawe' chee̱ Cristo, ne be̱n zrin da nabagu' chee̱ Cristo.
\p
\v 6 Ba bzrin zra guzúa' xel-la nabán chia' lu na' Dios, lawe' da ba zua bagu xelutie̱' neda'. 
\v 7 Du lazra' gudábaga' benne' ca' guledábague̱' da naca chee̱ Cristo. Tu bé̱nzqueza' ca naca da li chee̱', ne ba bexuzre be̱na' da bsebaga Cristo neda' guna'. 
\v 8 Lawe' da be̱na' da xrlátaje, na'a ba dxebeza da dxexala' neda', da na' gunna Xránadxu neda' lu zra na', ne quegá tuza' neda' gunne̱' na. Cá'anqueze gunézruje̱' na chee̱ benne' ca' dute̱ xel-la zri'i lazre' chee̱' dxelebeze̱' zra xelé̱'e̱.
\s1 Pablo dxulé'ene̱' Timoteo ca dxal-la' gunbe'
\p
\v 9 Be̱n ba xuzre xídazeu' xedajnná'u neda'. 
\v 10 Ba guleaj xichaj Demas neda' lawe' da dxedánedxabe' da naca chee̱ xe̱zr la xu nigá, ne ba zexíajbe' Tesalónica. Crescente ba gusel-la'-be' zexíajbe' naga nababa Galacia, na' Tito gusel-la'-be' naga nababa Dalmacia. 
\v 11 Tuze Lucas zúale̱be' neda'. Bexilaj Marcos, na' guché̱'-be' tu zrén le̱n lue', lawe' da wazéquebe' gácale̱be' neda' lu zrin chee̱ Cristo. 
\v 12 Tíquico gusel-la'-be' lu xe̱zre Efeso. 
\v 13 Gate xidu', gúagu' gabán chia' da nucá'ana' xe̱zre Troas lizre Carpo. Cá'anqueze gu'u xiche ca' bcá'ana' ga na', ne da dxunte̱ na ba xen gu'u xiche ca' zaj naca na xide.
\p
\v 14 Alejandro, benne' gubizre xia bsaca' zí'le̱'e̱ neda'. Xránadxu gunézruje̱' lazruj chee̱' ca da be̱ne̱'. 
\v 15 Bxue xanne cuinu' chee̱ benne' nigá lawe' da ba gudábagale̱'e̱ dizra' da dxuchálajdxu.
\p
\v 16 Da nedxu lasa gate beche̱ba' ca naca chia' lau benne' xu'u lawe' ca', netú benne' quebe gúcale̱ne̱' neda'. Xúgute̱' buluzá' xíchaje̱' neda'. 
\v 17 Gúcale̱ Xránadxu neda', ne btipe̱' lazra' chee̱ guzéqueda' bchálaja' dizra' chawe' lau xúgute̱ benne' ca' quebe zaj naque̱' judío. Ca'an guca bselá Xránadxu neda' lu na' benne' ca', ca dxun benne' dxuselé̱' béadu ca' lu dxu'a be̱zre xixre', 
\v 18 na' guseláqueze̱' neda' lu xúgute̱ da cale̱la, ne guxúequeze̱' neda' ca zrin zra xezrina' xabáa naga dxenná bea Le̱'. ¡Gaca báqueze Le̱'! ¡Ca'an gaca na!
\s1 Benne' chee̱ Cristo dxulugapa diuzre ljwezre̱'
\p
\v 19 Dxugapa' diuzre Priscila, ne Aquilo, ne benne' zaj zra' lizre Onesíforo. 
\v 20 Erasto begá'anabe' xe̱zre Corinto, na' bcá'ana' Trófimo lu xe̱zre Mileto lawe' da quebe chawe' zúabe'. 
\v 21 Be̱n ba xuzre xidu' nigá dxácate̱ quebe ne chú'udxu beu' zaga. Eubulo, ne Pudente, ne Lino, ne Claudia, ne xúgute̱ bi bíchedxu zaj zre̱'e̱ nigá dxulugape̱' lue' diuzre.
\p
\v 22 Dxenaba' Xránadxu Jesucristo súale̱ne̱' lue', ne dxenaba' Dios gune̱' da chawe' chee̱ xúgute̱le le'e. ¡Ca'an gaca na!