\id 2TH 
\ide UTF-8
\h 2 Tesalonicenses
\toc1 DIZRA' GUDXUPE' BZUAJ SAN PABLO CHEE̱ BI CHEE̱ CRISTO ZAJ ZRE̱'E̱ XE̱ZRE TESALÓNICA
\toc2 2 Tesalonicenses
\toc3 2 Ts.
\mt1 DIZRA' GUDXUPE' BZUAJ SAN PABLO CHEE̱ BI CHEE̱ CRISTO ZAJ ZRE̱'E̱ XE̱ZRE TESALÓNICA
\c 1
\s1 Pablo dxugape̱' diuzre bi bíchedxu ca'
\p
\v 1 Neda', Pablo, nen Silvano, ne Timoteo, dxugápantu' le'e diuzre. Dxuzúaja' da nigá chee̱le le'e, bi bícha'dau', nazrágale chee̱ Cristo lu xe̱zre Tesalónica, ne nácale bi chee̱ Xradxu Dios, ne chee̱ Xránadxu Jesucristo. 
\v 2 Dxenaba' lau Xradxu Dios, ne lau Xránadxu Jesucristo gune̱' chee̱le da chawe', ne gunne̱' le'e xel-la dxebeza zri lazre'.
\s1 Dios guchi'e̱ da belún benne' dul-la ca' gate xelá' Cristo
\p
\v 3 Le'e, bi bícha'dau', dxal-la' xé̱quezentu' Dios: Xcalenu' ca naca chee̱le, da dxal-la' guntu' lawe' da ba dxegula xel-la dxeajlí lazre' chee̱le, ne ba zúadxa xel-la nazrí'i lazre' le̱n ljwézrele tule xetule. 
\v 4 Chee̱ le̱ na' dxuchálajntu' ca naca chee̱le le'e láwela bi ca' chee̱ Cristo. Dxuchálajntu' ca dxuchaga laule da dxelún benne' ca' zaj nau zi' xuzre̱' le'e, ne ca naca xel-la zi' da dxedele, san nácale zren lazre', ne dxeajlí lázrele Dios. 
\v 5 Da nigá dxulé'e na xlátaje̱ naca Dios ca dxuchi'e̱ da dxelún bénneache, dxenné̱' naca chee̱le chu'ule naga dxenná bea Le̱' lawe' da dxedele xel-la zi' chee̱ la' xel-la dxenná bea chee̱'.
\p
\v 6 Xlátaje̱ naca gudé Dios benne' ca' xel-la zi', benne' ca' dxuludée̱' le'e xel-la zi' na'a, 
\v 7 na' guzúe̱' le'e naga xezí' lázrele chee̱ xel-la zi' da dxedele na'a. Xezí lázrele tu zren nen netu' gate xelá' Xránadxu Jesús, ze̱'e̱ xabáa nen gubáz blau ca' chee̱ xabáa chee̱'. 
\v 8 Ze̱'e̱ nu'e̱ xi' chee̱ gudée̱' lu da ba xa' benne' ca' quebe dxelexúnbe'e̱ Dios, ne quebe dxuluzúe̱' dizra' ca dxenná dizra' chawe' chee̱ Xránadxu Jesucristo. 
\v 9 Benne' caní xelecuase̱' naga zua Xránadxu lu xel-la szren chee̱', ne xel-la dxenná bea chee̱', na' xeledée̱' xel-la zi' chee̱ da ba xa' chadía chacanna. 
\v 10 Caní gaca gate xelá' Xránadxu lu zra na' chee̱ xulucá'ana szren benne' chee̱' ca' Le̱', na' benne' ca' dxeajlí lazre̱' Le̱' xelape̱' Le̱' ba lá'ana. Le'e gunle benne' ca' tu zren lawe' da guxéajle̱le chee̱ da beché̱bentu'.
\p
\v 11 Chee̱ le̱ na' tu dxuchálajle̱quezentu' Dios ca naca chee̱le, ne dxenábantu' Le̱' gaca chee̱le sile da na' bláwizre̱' le'e sile. Cá'anqueze dxenábantu' lau Dios guchínene̱' xel-la waca chee̱' chee̱ gaca gunle ca naca xúgute̱ da xrlátaje da dxezá lázrele, ne xúgute̱ zrin dxunle ne̱ chee̱ xel-la dxeajlí lazre' chee̱le. 
\v 12 Caní gunle, gucá'ana szrenle La Xránadxu Jesucristo, na' Le̱' gape̱' le'e ba lá'ana ne̱ chee̱ xel-la xrlátaje chee̱ Dios chee̱dxu, ne chee̱ Xránadxu Jesucristo.
\c 2
\s1 Benne' xriwe̱'
\p
\v 1 Le'e, bi bicha', ca naca chee̱ zra xelá' Xránadxu Jesucristo chee̱ xutupe̱' dxi'u chee̱ Le̱', dxata' xúentu' le'e 
\v 2 chee̱ quebe guchale ca dxéquele, ne quebe súale ste̱be chee̱ bi dizra' xuluchalaj bénneache lácala xelenné̱' naca na da dxunezruj Be' Lá'azxa le̱', u chee̱ xetú bila dizra' xénele, u chee̱ bi xiche xelenné̱' naca na da gusél-lantu' netu', che dxenná na ba belá' Xránadxu. 
\v 3 Quebe güele lataj nu si xe̱ le'e, lawe' da xelelá' bénneache xelebéaj xíchaje̱' Dios, ne la' bénnea' dxedábague̱' Dios nédxula gate zrin zra xelá' Xránadxu. Bénnea' dxedábague̱' Dios, na' ba naca chee̱' cuía xíqueze̱', 
\v 4 na' tábague̱' xúgute̱ da naca chee̱ Dios, ne xúgute̱ da dxulucá'ana szren bénneache. Gucá'ana szren cuine̱' ca zrinte̱ cheajché'e̱ lu xudau' chee̱ Dios, ne gun cuine̱' ca Diósqueze.
\p
\v 5 ¿Quebe dxeajsá lázrele gúchequeza' le'e da nigá gate na' zúale̱na' le'e? 
\v 6 Le'e ba nézele Nu Benne' nuzague̱' bénnea' dxedábague̱' Dios chee̱ quebe le̱'e̱ gate quebe ne zrin zra le̱'e̱. 
\v 7 Ba dxun zrin xel-la waca da nagache chee̱ da cale̱la, san zua Nu Benne' nuzague̱' le̱ na na'a, ca zrin zra xecuasa Bénnea' nuzague̱' le̱ na. 
\v 8 Nadxa la' bénnea' dxedábague̱' Dios, na' Xránadxu Jesús gutie̱' le̱', guchínene̱' be' da dxuaj na dxu'e̱, ne guzría xi'e̱ le̱', guchínene̱' xel-la naxaní' chee̱ zra ze̱'e̱. 
\v 9 Benne' xriwe̱' na' ze̱'e̱ ne̱ chee̱ xel-la dxenná bea chee̱ Satanás, na' lu dute̱ xel-la waca chee̱ na gune̱' da ca' xelunna bea na, ne xel-la waca ca' da zaj naca na we̱n lazre', 
\v 10 ne guchínene̱' xúgute̱ da cale̱la ca' chee̱ si xe̱'e̱ benne' ca' xelebía xi'e̱, benne' ca' quebe gulaca lazre̱' xelezí'e̱ da li chee̱ xelelé̱'. 
\v 11 Chee̱ le̱ na' Dios dxu'e̱ lataj si xe̱ da cale̱la benne' ca' chee̱ xeléajle̱'e̱ chee̱ da we̱n lazre', 
\v 12 chee̱ xelebía xi' xúgute̱ benne' ca' quebe gulaca lazre̱' xeléajle̱'e̱ chee̱ da li, san dxeledánedxene̱' da naca da cale̱la.
\s1 Dios guqué̱'e̱ dxi'u chee̱ ladxu
\p
\v 13 Netu' tu dxál-la'queze xe̱ntu' Dios: Xcalenu' ca naca chee̱le le'e, bi bícha'dau', nazrí'i Xránadxu le'e, lawe' da gucá'a Dios le'e nédxute̱ chee̱ lale. Be' Lá'azxa ba nune̱' le'e chee̱ Dios lawe' da dxéajle̱le chee̱ da li. 
\v 14 Chee̱ gaca chee̱le da nigá Dios ba bláwizre̱' le'e ne̱ chee̱ dizra' chawe' da dxuchálajntu', chee̱ zrué'ele xel-la szren chee̱ Xránadxu Jesucristo.
\p
\v 15 Chee̱ le̱ na', bi bícha'dau', le se̱ chacha, ne quebe gal-la lázrele da ca' bzéajni'intu' le'e caníqueze, ne cá'anqueze lu xiche. 
\v 16 Dxenaba' lau Xránadxu Jesucristo, ne lau Xradxu Dios, Bénnea' lu dute̱ xel-la xrlátaje chee̱' bzri'ine̱' dxi'u, ne ba be̱nne̱' dxi'u xel-la dxexúe zren chee̱' tu chi'i gaze, ne tu xel-la dxebeza lazre' li. 
\v 17 Dxenaba' Le̱' gutipe̱' lázrele, ne guzé̱ chúchue̱' le'e chee̱ nnale, ne gunle xúgute̱ da xrlátaje.
\c 3
\s1 Pablo dxenné̱ xúene̱' bíchedxu ca' xelenabe̱' Dios gácale̱ne̱' le̱'
\p
\v 1 Na'a, bi bícha'dau', le naba Dios gácale̱ne̱' netu', chee̱ zrínzega dizra' chee̱ Xránadxu xúgute̱ xe̱zre ca', ne chee̱ xelezí'e̱ na dute̱ lu xel-la ba lá'ana, ca guca ládujla le'e. 
\v 2 Le nábaquezle chee̱ ladxu lu na' benne' ca' dxelune̱' da cale̱la, ne lu na' benne' sban ca', lawe' da quegá xúgute̱ benne' dxeleajlí lazre̱' Cristo. 
\v 3 Xránadxu naque̱' li lazre', na' Le̱' guzé̱ chache̱' le'e, ne guxúe̱' le'e chee̱ quebe bi da cale̱la gaca na chee̱le. 
\v 4 Dxuxrén lázrentu' Xránadxu gácale̱ne̱' le'e chee̱ gunle ca da dxé̱nentu' le'e, ca ba dxúnquezle. 
\v 5 Dxenábantu' lau Xránadxu gácale̱ne̱' le'e chee̱ gápale xel-la zri'i lazre' da gunna Dios le'e, ne gápale xel-la zren lazre' da gunna Cristo le'e.
\s1 Dxal-la' gundxu zrin
\p
\v 6 Le'e, bi bícha'dau', lu La Xránadxu Jesucristo dxé̱nentu' le'e quebe gunle tuze nútete̱ze bi bíchedxu quebe dxaca lazre̱' gune̱' zrin, ne quebe dxune̱' ca da bsé̱dentu' le'e. 
\v 7 Ba nézele dxal-la' gunle zrin ca be̱ntu' netu' gate na' zúale̱ntu' le'e. 
\v 8 Quebe nu chee̱ gudáguntu' cá'aze che nadxu quebe gudízrujntu' na. Bé̱nle̱'e̱quezentu' zrin te zra, ne chizrela chee̱ quebe bsaca zi'ntu' le'e da gáguntu'. 
\v 9 Nácaqueze chee̱ntu' nábantu' le'e da gáguntu', san be̱ntu' zrin chee̱ blé'entu' le'e dxal-la' gunle ca bé̱nquezentu' netu'. 
\v 10 Gate na' zúale̱ntu' le'e, bdentu' lu na'le da nadxixruj bea nigá: Benne' quebe dxaca lazre̱' gune̱' zrin ca'an gune̱' quebe gawe̱'. 
\v 11 Ba bénentu' bál-lale le'e quebe dxunle zrin, na' dxedázele dxuchixre chee̱le da dxaca chee̱ benne' xula. 
\v 12 Benne' caní dxixruj be'entu', ne dxusebágantu' le̱' lau Xránadxu Jesucristo chee̱ xelune̱' zrin du lazre̱' chee̱ gata' da xele'aj xelawe̱'.
\p
\v 13 Le'e, bi bicha', le gun da xrlátaje, ne quebe cheajtá lázrele. 
\v 14 Che nu benne' quebe dxuzúe̱' dizra' ca da dxennantu' lu xiche nigá, le nna' nu bénnea', ne quebe gunle le̱' tuze, chee̱ gapa stue̱'. 
\v 15 Quebe zrá'ale le̱', san le guzéajni'i le̱' ca bi bíchele.
\s1 Pablo dxuzé̱' dizra' bi bíche̱dxu ca'
\p
\v 16 Xránadxu naque̱' Bénnea' dxunne̱' dxi'u xel-la dxebeza zri lazre'. Dxenaba' lau Le̱' gúnnaqueze̱' le'e xel-la dxebeza zri lazre' lu xúgute̱ da dxunle, ne súale̱ne̱' xúgute̱le le'e.
\p
\v 17 Neda', Pablo nen ná'aqueza' dxuzúaja' chee̱le da nigá. Da nigá dxunna bea na xúgute̱ xiche da dxuzúajqueza' neda'. Caní dxuzúaja'. 
\v 18 Dxenaba' lau Xránadxu Jesucristo gune̱' da chawe' chee̱ xúgute̱le le'e. Ca'an gaca na.