\id REV  
\h Apocalipsis 
\toc1 Re kuu mloo Jesucrist lo Juan 
\toc2 Apocalipsis 
\toc3 Ap. 
\mt1 Re kuu mloo Jesucrist lo Juan 
\c 1  
\s1 Re kuu mloo Jesucrist lo Juan 
\p  
\v 1 Na nak Juan, ne re koree nak kuu mloo Jesucrist lon. Lee Diox mndaa diiz lo Jesucrist, tsa loo Jesucrist reta kuu mera gak lo re zha kuu nak mos Diox. Ne leeka lee Jesucrist mtaal thib re mandad chaan mloo re koree lon,  
\v 2 kona ndan kwent xkiiz Diox ne kwent chaan Jesucrist, ne wli reta kuu mwiin. 
\p  
\v 3 Wen nda re zha kuu lab re diiz ree ne re zha kuu gon diiz re kuu mkayaan lo Diox, ne re zha kuu nzhon diiz re kuu nke lo yeets ree, tak ndetsin gaxa wiz bluz. 
\s1 Juan mni “diox” lo re zha Jesucrist, kuu nzo re gaz yez chaan Asia 
\p  
\v 4 Na Juan, ngekeen yeets ree lo re goo, zha kuu nak zha Jesús kuu nzo re gaz yez chaan Asia. Naabʼn lo Diox loo Diox yalnkelaaz chaan Diox lo goo, ne tsow Diox wen kwin goo, ne lee kuu ngekeen lo re goo lo Diox ndyaade, ne lo re gaz Mbi Nayon chaan Diox kuu ndo lo Diox, zha kuu nak, zha kuu ngok ne zha kuu bre yaad,  
\v 5 ne lo Jesucrist kuu nali nak ndyaad re diiz ree, zha kuu ner mroban xid re zha nguth ne zha kuu nap yalnabee nabee lo re rey kuu nabee lo yezlyu ree. Ne kwathoz nke leettsoo zha lee, kona kon ren zha mtelaa zha lee ne mtuyy zha re faltaa,  
\v 6 ne mtsow zha gakaa rey ne ngwleyy zha, tsa lortsinaa lo Xutaa Diox. ¡Nlazʼn tsow nataak re men beeta Diox, tak chaan Diox nak yalney thitanax! Tata gake. 
\q1  
\v 7 ¡Wii goo, lee Jesucrist yaad leen xkow! 
\q1 Ne reta men wii zha or yaad zha, 
\q1 ne asta re zha kuu mdin zha, tewii re zhaʼa zha, 
\q1 ne reta men kuu nzo dib naxta lo yezlyu, 
\q1 gonn zha leettsa wii zha zha. 
\q1 ¡Wliy, tata gake! 
\p  
\v 8 “Na nak zha ner ne zha bluz, taxal nak A ne Z”, ne Zha Nabee, zha kuu kwathoz ney, zha kuu nak, zha kuu ngok ne zha kuu yaad. 
\s1 Koree mloo Jesucrist lo Juan 
\p  
\v 9 Na nak Juan wets goo, lalka ndriidaa yalti ne lalka nxekaa, tak nyelaazaa Jesucrist ne thibka kayaa reʼaa ta nabee Diox. Leettsa mzin na thib yezlyu kuu nzi leen nitdoo ta le Patmos, tak ndan kwent xkiiz Diox ne kwent chaan Jesucrist.  
\v 10 Ne leen mndo lo yalney chaan Mbi Nayon, wiz kuu nak wiz Zha Nabee, tsa mbin na thib bos nex par ditsʼn, taxal thib bi chaan trompet,  
\v 11 kuu ne lon: 
\p ―Reta kuu loo loʼa, bkeey lo thib yeets ne btaale lo re zha da kuu nzo re gaz yez chaan Asia, kuu nak re yez ree: Éfeso, Esmirna, Pérgamo, Tiatira, Sardis, Filadelfia ne Laodicea. 
\p  
\v 12 Tsa mtseren lon par ditsʼn, tsa naa cho chaan bos kuu mni lon; ne or mtseren lon, tsa mwiin gaz kandeler kuu or,  
\v 13 ne ndrol re gaz kandelera mwiin thib zha kuu na taxal zhiinn thib men, ne nok zha thib lar nol kuu nzin asta dits nii zha, ne naliib thib sinch or pech zha.  
\v 14 Ne lee yitsek zha naguz na, taxal yits lad mbak zhiil kuu naguz ne taxal yig, ne lee ngutlo zha na taxal loz bel.  
\v 15 Lee nii zha nla xni taxal yiiben kuu kwathoz mzuu lo ki, ne lee bos zha nyoobi taxal thib ta kwathoz nla nit.  
\v 16 Ne lee yaa ban zha nden zha gaz mbel kuu nzib lobee, ne lee roo zha ndroo thib espad kuu kwathoz naluts kuu rop ladta nale. Lee lo zha na taxal lo wiz leettsa kwathoz nla bee. 
\p  
\v 17 Leettsa mwiin lo zha, tsa ngobʼn xann nii zha taxal thib zha nguth. Per lee zha mxoob zha yaa ban zha ditsʼn, tsa ne zha lon: 
\p ―Tsebta; tak na nak zha kuu ner ne zha bluz.  
\v 18 Na nak zha kuu naban, wli nguthʼn, per lee nal naban na thitanax. Ne nden na yab chaan Hades ne yab chaan yalguth.  
\v 19 Bkee reta kuu mwiiʼa lo yeets, re kuu nzo nal ne re kuu yo bluz.  
\v 20 Koree nak kuu nagaats chaan re gaz mbel kuu nzib lobee, kuu mwiiʼa nzo yaa ban da ne chaan re gaz kandeler or: Lee re gaz mbel nak; gaz mandad chaan Diox kuu nkenap re zha kuu nyelaaz Jesús, ne lee re gaz kandeler, nak re zha kuu nyelaaz Jesús kuu nzo re gaz yez chaan Asia. 
\c 2  
\s1 Yeets kuu mkee Juan lo re zha kuu nyelaaz Jesús yez Éfeso 
\p  
\v 1 ’Bkee koree lo mandad kuu nkenap re zha da kuu nzo yez Éfeso: “Tenzhee ne zha kuu nden re gaz mbel yaa ban ne ndo ndrol lo re gaz kandeler or:  
\v 2 Na ne reta kuu ntsow goo; noga nen xa nati ndak goo nke goo tsiin, ne xa nxek goo ndriid goo yalti, noga nen nkezt leettsoo goo ne goo re zha kuu ntsow kuu went. Ne noga nen mtsow goo preb re zha kuu mbez nak apóstl ne nagt zhay, ne myeen goo anta nkedi zha.  
\v 3 Ne kwathoz mkez leettsoo goo mriid goo yalti kwent da, ne neeka ngwatsayt goo.  
\v 4 Per kuu nayiin nen goo nak, napt raa goo yalnkelaaz taxal ngop gooy ner.  
\v 5 Kona btelaaz goo naa kwan kuu went mtsow goo, ne btsee goo mod went kuu nak goo, ne thibka btsow goo re kuu wen kuu mtsow goo ner. Tak os lee goo tsowt gooy, lee na yal ne yiin nen goo ne kibʼn kandeler chaan goo ta ndobe, per tsowt nay os lee goo tsee goo mod went kuu nak goo.  
\v 6 Per nap goo thib kuu wen kuu ntsow goo, nayii goo ne goo re kuu ntsow re zha nicolaítas, noga na nayiin nen kona.  
\v 7 Loka cho ndob nza, ndoblo gon kuu ni Mbi Nayon lo re goo, kuu nak zha da: Ne lo re zha kuu tsow gan lo re kuu went, tan diiz wu zha xle chaan ya kuu ndaa yalnaban kuu thitanax, kuu ndo ndrol lo laats Chul chaan Diox.” 
\s1 Yeets kuu mkee Juan lo re zha kuu nyelaaz Jesús yez Esmirna 
\p  
\v 8 ’Noga bkee koree lo mandad kuu nkenap re zha da yez Esmirna: “Koree ne zha nak, zha ner ne zha bluz, zha nguth ne mroban:  
\v 9 Na ne reta kuu ntsow goo; noga nen re yalti kuu ndriid goo ne kwathoz prob goo, tegal wlipaa rik goo. Noga nen xa nlooz zha goo, re zha kuu mbez nak zha Israel per nagt zhay, beeta zha nyelaaz Maxuuy nak zha.  
\v 10 Tsebt goo lo re yalti kuu rid goo; tak lee Maxuuy ko chop tson goo tsib; tsa reta goo gak preb lo yalti; ne ndoblo rid goo yalti tsii wiz. Per nali bto goo asta gath goo, tsa lee na ta koron kuu nak chaan yalnaban lo goo.  
\v 11 Loka cho ndob nza, ndoblo gon kuu ni Mbi Nayon lo re goo, zha kuu nyelaaz na: Ne lee re zha kuu tsow gan lo re kuu went, ridt zha yalti lo tedib yalguth kuu yaad bluz.” 
\s1 Yeets kuu mkee Juan lo re zha kuu nyelaaz Jesús yez Pérgamo 
\p  
\v 12 ’Noga bkee koree lo mandad kuu nkenap re zha da yez Pérgamo: “Tenzhee ne zha kuu nden espad kuu naluts nak kuu rop ladta nale:  
\v 13 Na ne reta kuu ntsow goo, nen lee goo nzo ta nabee Maxuuy, ne tegal tatay, bee nali ndo goo lon. Mlaat goo nyelaaz goo na, re wiz kuu mbeth zha Antipas kuu ngok mos da kuu nali lon, zha kuu mbeth zha xid goo, yez ta nzo Maxuuy.  
\v 14 Per nzo chop tson kuu nayiin nen goo: baa yez Pérgamo, nkeno goo re zha kuu nlaazt laa re kuu mloo Balaam kuu mteni Balac, par mtsow Balac mndaa re zha Israel falt, leettsa mdow zha re kuu mndaa zha gon lo re diox kuu nagt Diox, ne noga mtsow Balac ngok rop zha kon ndota zha.  
\v 15 Noga nap goo re zha kuu nlaazt laa re kuu mloo re zha nicolaítas, re zha kuu kwathoz nayiin nen.  
\v 16 Kona, btsee goo mod went kuu nak goo; tak os lee goo tsowt gooy, tsant raa na yalʼn lo goo, ne kon espad da kuu ndroo roon yon kon re zhaʼa.  
\v 17 Loka cho ndob nza, ndoblo gon kuu ni Mbi Nayon lo re zha kuu nak zha da: Loka cho tsow gan lo re kuu went, tan maná yibaa kuu nzogaats wu zha; ne tan thib ke lut kuu naguz na lo zha, ne lo keʼa nke le zha kuu kub kuu yent cho nlebee, sinke beeta zha kuu kayaay nlebeey.” 
\s1 Yeets kuu mkee Juan lo re zha kuu nyelaaz Jesús yez Tiatira 
\p  
\v 18 ’Noga bkee koree lo mandad kuu nkenap re zha da yez Tiatira: “Koree ne Xgann Diox kuu na ngutlo taxal loz bel ne lee nii zha nla xni taxal yiiben kuu kwathoz mzuu lo ki:  
\v 19 Na ne reta kuu ntsow goo; nen xa nke leettsoo goo altaa goo, noga nen xa nyelaaz goo na, xa ntsow goo rtsin na, ne xa nkez goo lo re yalti, noga nen masraa ngetsow gooy nal nake ner.  
\v 20 Thibka kuu nayiin nen goo; nkez leettsoo goo ne goo Jezabel, ngot kuu mbez nak profet da, per beeta nkedi zha re zha kuu nak mos da kon re kuu nloo zha, ntsow zha nzhak rop re zha da kon ndota zha, ne ntsow nzhow re zha kuu nak mos da, re kuu ndaa zha gon lo re diox kuu nagt Diox.  
\v 21 Kwaro mletʼn, tsa gatsee Jezabel mod nak Jezabel, per mzhyalt Jezabel gatsowe; mlaat ngot nzhak rop ngot kon tedib net zha.  
\v 22 Ne os lee re zha laat zha re kuu went kuu ntsow ngota, na tsow len liz zha; ne kwathoz yalti rid re zha kuu ngok rop kon ngota,  
\v 23 ne guthʼn re zhiinn ngot. Tbaa mod lee reta zha kuu nyelaaz na ne, lee na nlebeen ta mas naats leen xgab re men ne leen leettsoo re men; ne lo kadta thib goo tan kuu mtsow goo gan.  
\v 24 Neeka tedib kuu taaltʼn lo re goo zha yez Tiatira, kuu napt leyy chaan re zhaʼa, ne neeka nlebeet goo re leyy, kuu nak yalnzhaak kuu nzogaats chaan Maxuuy ley lo zha.  
\v 25 Per nali bto goo lo kuu ngetsow goo asta leettsa yalʼn.  
\v 26 Lee re zha kuu tsow gan lo re kuu went, ne tsow zha kuu nlazʼn asta wiz bluz, na ta yalnabee lo zha, leeka taxal mndaa Xut nay lon, tsa nabee zha lo reta yez kuu nzi lo yezlyu.  
\v 27 Ne kon thib aga yiib tsow byo zha re yeza taxal thib yet yu.  
\v 28 Ne noga tan mbel gwiiy kuu nlen til lo zha.  
\v 29 ¡Loka cho ndob nza, ndoblo gon kuu ni Mbi Nayon lo re zha kuu nak zha da!” 
\c 3  
\s1 Yeets kuu mkee Juan lo re zha kuu nyelaaz Jesús yez Sardis 
\p  
\v 1 ’Noga bkee koree lo mandad kuu nkenap re zha da yez Sardis: “Tenzhee ne zha kuu nap gaz Mbi Nayon chaan Diox ne zha kuu nap gaz mbel kuu nzib lobee: Na ne reta kuu ntsow goo, noga nen lee re goo nak taxal zha nguth, tegal nzib xkiiz goo lee goo naban.  
\v 2 Bloo goo mkaal lo goo, ne ney bto goo re kuu myaan lo goo kuu mera gath; tak nen lee re kuu ntsow goo lo Diox da nalit nak.  
\v 3 Btelaaz goo re kuu mteed goo ne re kuu mbin goo; bteke goo ditse ne btsee goo mod went kuu nak goo. Os lee goo root mkaal lo goo, taxal thib wann yalʼn lo goo, ne neeka net goo polor yalʼn.  
\v 4 Per noga nap goo chop tson zha kuu mteyut xab, ne re zhaʼa tiy kon na, ne gok zha lar naguz tak ndoblo zha gok zhay.  
\v 5 Ne loka cho zha kuu tsow gan lo re kuu went, zhaʼa gok lar naguz, ne tuyytʼn le zha lo libr kuu nak chaan yalnaban, ne gapʼn le zha lo Xutʼn ne lo re mandad Xutʼn.  
\v 6 ¡Loka cho ndob nza, ndoblo gon kuu ni Mbi Nayon lo re zha kuu nak zha da!” 
\s1 Yeets kuu mkee Juan lo re zha kuu nyelaaz Jesús yez Filadelfia 
\p  
\v 7 ’Noga bkee koree lo mandad kuu nkenap re zha da yez Filadelfia: “Tenzhee ne zha Nayon ne zha wlipaa nak, zha nkeno yab chaan rey David, zha kuu nxaal roo pwert ne yent cho gak towgwe, ne leettsa ntow zhay yent cho gak xaale:  
\v 8 Na ne reta kuu ntsow goo. Wii goo lo goo mton thib pwert kuu ndezhaal kuu yent cho gak tow. Ne tegal lutta ney goo, per mbin goo diiz xkizʼn ne nzhabt goo nlebeet goo na.  
\v 9 Wii goo lee na tsow lee re zha kuu nzhool lo Maxuuy yaad lo goo, re zha kuu nkedi mbez zha nak zha, zha Israel ne nagt zhay, ne tsowʼn tobxub zha lo goo, tsa ne zha lee na nke leettsoon goo.  
\v 10 Mbin goo diiz xkizʼn kuu mnin, ne mxek goo lo reta kwaa, kona na kenap goo lo re yalti kuu yaad dita lo yezlyu, leettsa tsowʼn preb re men kuu nzi dib naxta lo yezlyu.  
\v 11 Mera yalʼn. Bkenap goo kuu nkeno goo, tsa yent cho kib koron goo kuu tsow goo gan.  
\v 12 Ne lee re zha kuu tsow gan lo re kuu went, na tsow gak re zha taxal yato leen liz Diox da, ne thitanax root re zha tya; ne dits re zha keen le Diox da ne le yez Diox da, kuu nak Jerusalén kuu kub kuu roo yibaa lo Diox da; ne noga keen dits re zha, len kuu kub.  
\v 13 ¡Loka cho ndob nza ndoblo gon kuu ni Mbi Nayon lo re zha da!” 
\s1 Yeets kuu mkee Juan lo re zha kuu nyelaaz Jesús yez Laodicea 
\p  
\v 14 ’Noga bkee koree lo mandad kuu nkenap re zha da yez Laodicea: “Tenzhee ne zha kuu tak tsow gak reta kwaa, zha kuu nali ndaa kwent ne wli zha kuu ni zha, zha kuu nak zha ner lo reta kwaa mdexkwaa Diox:  
\v 15 Na ne reta kuu ntsow goo. Noga nen nadyopt goo ne neeka natseeyt goo. ¡Wene os nadyop goo o natseey goo!  
\v 16 Per tak natseyt goo, ne neeka nadyopt goo, kona tseren goo roon.  
\v 17 Tak mbez goo rik goo ne kwathoz wen nzo goo, ne neeka thib kwaa ndechet goo; per nyeent goo lee goo nak zha kuu thitanax went ndo nyelaaz Diox, ne thitanax nataagt goo, prob goo, syeg goo ne cheey goo.  
\v 18 Kona tenin goo: Lon bzhii goo or kuu wlipaa nak or, tsa wlipaa gak rik goo; ne lon bkaa goo lar naguz gok goo, tsa loot yalnathoy chaan goo lee goo cheey; ne bzhii goo thib remed lon yo ngutlo goo, tsa tak wii goo.  
\v 19 Tak reta zha kuu nke leettsoon nkox zha lon, ne ntelin zha, kona bloo goo gan leettsoo goo ne btsee goo mod went kuu nak goo.  
\v 20 Wii goo lee na ndo roo pwert ne mbezʼn; ne os cho zha nzhon xkizʼn ne xaal zha roo pwert, tsa lee na taabʼn leen liz zha ne wu rtsee rop nee zha.  
\v 21 Ne lee re zha kuu tsow gan lo re kuu went, tan thib ta tob zha kon na ta ndobʼn nabeen, taxal mtsowʼn gan lo re kuu went ne ndobʼn kon Xutʼn ta nabee Xutʼn.  
\v 22 ¡Loka cho ndob nza, ndoblo gon kuu ni Mbi Nayon lo re zha da!” 
\c 4  
\s1 Xomod nzhool zha lo Diox leen yibaa 
\p  
\v 1 Ngulo mriid re koree, tsa mwiin lee thib pwert ndezhaal leen yibaa; ne lee bos kuu ndez taxal trompet, kuu mni lon ner, ne lon: 
\p ―Kendab nzhee, tsa lon loʼa reta kuu gak, leettsa yelo rid re koree. 
\p  
\v 2 Ne ora myaan na lo yalnabee chaan Mbi Nayon, ne mwiin lee Diox ndob, ta ndob Diox nabee Diox leen yibaa.  
\v 3 Lee zha na taxal thib ke kuu le jaspe ne cornalina kuu kwathoz nzhuyy na; ne lee ta ndob zha ndo thib bith, kuu nzhuyy na taxal thib ke kuu le esmeralda.  
\v 4 Ne lee re ladta ta ndob zha, nzi tedib galbthap ta nyetob zha, ne lo re kona ndob thib galbthap zha gol kuu nok lar naguz ne ndob koron or yek re zha.  
\v 5 Ne lee ta ndob Diox tya ndroo bel bti, ndroo tyen bos ne bi ngundii; ne delant lo ta ndob Diox ndo gaz kandil kuu nteni, kona nak gaz Mbi Nayon chaan Diox.  
\v 6 Ne delant lo ta ndob Diox nzi thib nitdoo kuu nzhol na taxal bidr. 
\p Ne lee re ladta ta ndob Diox, nzi thap maa kuu naban kuu dita maa mzaal ngutlo maa.  
\v 7 Lee maa kuu ner na taxal thib mbeez; lee maa mrop na taxal thib la ngon; lee maa myon na lo taxal na lo men; ne lee maa thap na taxal thib mti kuu ndabi.  
\v 8 Ne kadta thib re maa nabana nkeno xoopga xiil, ne dita maa nap maa ngutlo maa; tse ne yaal thibka mbez re maa: 
\q1 ¡Nayon, nayon, nayon, nak Zha Nabee, 
\q1 Diox kuu kwathoz ney, 
\q1 zha kuu ngok, zha kuu nak ne zha kuu bre yaad! 
\p  
\v 9 Ne or kuu lee re maa nabana nzhool lo Diox, ne ntsow nataak maa Diox, ne ndaa maa texkix lo Diox ta ndob Diox nabee Diox, Diox kuu naban thitanax,  
\v 10 ora lee re galbthap zha gola ntobxub lo Diox, ne nzhool zha lo Diox kuu naban thitanax, ne ntsi re zha koron zha lo Zha Nabee. Ne mbez re zha lo Zha Nabee: 
\q1  
\v 11 Diox, lu nak Zha Nabee lo nee, lo thita lu ndoblo 
\q1 gol re men, thita lu ndoblo tsow nataak re men, 
\q1 ne thita lu ndoblo kayaa yalney; 
\q1 tak lu mdexkwaa reta kwaa, 
\q1 ne tak nlaaza kona nzo reta kwaa ne kona mdexkwaa retay. 
\c 5  
\s1 Lee Mbak zhiil chaan Diox mxaal lo yeets 
\p  
\v 1 Tsa mwiin Zha Nabee, lee zha ndob ta nabee zha, ne yaa ban zha nzo thib yeets kuu naduz, ne nke letr loy ne ditse, ne nke gaz sey ditse, tsa yent cho xaale.  
\v 2 Ne mwiin thib mandad chaan Diox kuu kwathoz ney kuu dib gan nzhab: 
\p ―¿Cho ndoblo chat re sey ne xaal lo yeets? 
\p  
\v 3 Per neeka yibaa, neeka lo yezlyu ne neeka xann yezlyu, yent neeka thib zha kuu ndoblo xaal lo yeets, neeka yent cho ndoblo wiiy.  
\v 4 Tsa lee na kwathoz mbinn na, tak mzalt neeka thib zha kuu ndoblo xaal lo yeets ne wii loy.  
\v 5 Tsa lee thib re zha gola ne lon: 
\p ―Gonnt raa lu, tak lee mbeez kuu ndyaad lo raz chaan Judá, ne ndyaad lo raz chaan rey David nak kuu mtsow gan. Lee zha nak kuu tak chat re gaz sey ne xaal lo yeets. 
\p  
\v 6 Tsa mwiin ndrol ta ndob Zha Nabee, ne ndrol lo re maa nabana ne ndrol lo re zha gola, tya ndo thib Mbak zhiil kuu na taxal thib maa kuu mbeth zha. Ne ndob gaz kach maa ne gaz ngutlo maa; ne lee re ngutlo maa nak gaz Mbi Nayon chaan Diox, kuu mtaal Diox dib naxta lo yezlyu.  
\v 7 Ne lee Mbak zhiil ngwa ta ndob Zha Nabee ne mzhen yeets kuu naduza, kuu nzo ya ban Zha Nabee.  
\v 8 Ne leettsa mzhen maa yeets, ora lee re thap maa nabana ne re galbthap zha gola mtobxub lo Mbak zhiil. Ne kadta thib re zha gola nap zha thibga arp zha kuu nzhool zha, noga nap zha thibga btsi zha kuu or kuu tseta nzo straak, re kona nak re kuu mndediz re zha kuu nali mndo lo Diox.  
\v 9 Ne nzhool zha kant kub kuu tenzhee nzhab: 
\q1 Lu nak zha kuu ndoblo ten yeets ne chat re seye; 
\q1 tak lu nguth lo kruz, ne kon rena mzhiiʼa re men, tsa gak re men zha Diox, 
\q1 re men reta raz, re men kuu ndediz zhaapaa zhaapaa diiz, re men kuu nzo reta yez bzhizh ne re yez naro. 
\q1  
\v 10 Ne mtsowa gak re zha rey ne ngwleyy lo Diox, 
\q1 tsa nabee re zha lo yezlyu. 
\p  
\v 11 Mwiin ne mbin na bos chaan naroob mandad chaan Diox kuu nzi re ladta lo Diox, ta ndob Diox nabee Diox ne lo re maa nabana ne lo re zha gola. Kwathoz miyon mandad nzi ne yent cho gak tsaal kwent re mandada,  
\v 12 ne dib gan re mandada mbez: 
\q1 Lee Mbak zhiil kuu mbeth re men lo kruz. 
\q1 Lee maa ndoblo kayaa yalnabee ne reta kuu nataak, 
\q1 yalnzhaak ne yalney, 
\q1 noga ndoblo tsow nataak reta men maa, ne ni wen reta men maa, ne gol reta men lo maa. 
\p  
\v 13 Ne noga mbin na lee reta kuu mdexkwaa Diox, re kuu nzo yibaa, reta kuu nzo lo yezlyu, reta kuu nzo xann yezlyu ne re kuu nzo leen nitdoo, retay nzhab: 
\q1 ¡Lee Zha Nabee kuu ndob nabee, ne Mbak zhiil, 
\q1 ndoblo gol reta men lo zha, ne tsow nataak reta men zha, ne wen tediz re men zha, 
\q1 lee zha ndoblo kayaa xni ne yalney, nal ne thitanax! 
\p  
\v 14 Ne lee re thap maa nabana nzhab: 
\p ―¡Tata gake! 
\p Ne lee re galbthap zha gola mtobxub ne mbil lo Mbak zhiil. 
\c 6  
\s1 Re sey 
\p  
\v 1 Tsa mwiin lee Mbak zhiil mchat thib sey. Ne mbin na lee thib re maa nabana mni taxal nzhats ngundii ne: 
\p ―¡De nzhee! 
\p  
\v 2 Tsa mwiin ne ngwani thib kabay naguz lon; ne lee zha kuu ndob dits maa nzo thib ark yaa zha. Ne mkayaa zha thib koron, ne mroo zha taxal thib soldad kuu nda lo zhoo, kuu mtsow gan ne tsow gan. 
\p  
\v 3 Leettsa lee Mbak zhiil mchat sey mrop, tsa mbin na lee maa mrop kuu nabana nzhab: 
\p ―¡De! 
\p  
\v 4 Tsa mroo thib kabay nane, ne lee zha kuu ndob dits maa mkayaa yalnabee, tsa tsow zha yo zhoo lo yezlyu, tsa kuth altaa re men taben men; ne mkayaa zha thib espad naro. 
\p  
\v 5 Ne leettsa lee Mbak zhiil mchat sey myon, tsa lee myon maa nabana nzhab: 
\p ―¡De! 
\p Tsa mwiin thib kabay yaat, ne lee zha kuu ndob dits maa, nzo thib bex yaa.  
\v 6 Ne ndrol lo thap maa nabana mbin na thib bos kuu nzhab: 
\p ―Thibka kil nzob xtil, nak kuu ntsow zha gan ke zha tsiin thib wiz, ne tson kil cebad nak kuu ntsow zha gan ke zha tsiin thib wiz; per tetsaata aseyt ne neeka xit ub. 
\p  
\v 7 Or lee Mbak zhiil mchat sey mdap, tsa mbin na lee maa naban kuu mdapa nzhab: 
\p ―¡De! 
\p  
\v 8 Tsa mwiin thib kabay kuu guts na, ne lee zha kuu ndob dits maa le yalguth, ne lee dits zha ndeke Hades. Ne lee zhaʼa mkayaa yalnabee, tsa luux zha thib part lo thap part lo yezlyu, tsa kuth zha re men kon zhoo, kon win, kon yiz ne kon re maa nayii kuu nzhow men. 
\p  
\v 9 Ne lee Mbak zhiil mchat sey gaay. Tsa mwiin lee re zha kuu nguth kwent chaan xkiiz Diox, nzi xann bkoog chaan Diox, tak mndaa zha kwent chaan Jesucrist.  
\v 10 Ne dib gan re zhaʼa mbez zha: 
\p ―Lu nak Zha Nabee, nayon ne nali naka, ¿pol naaba kwent lo re men yezlyu, ne tetiʼa re zha taxal mtsowno zha nee? 
\p  
\v 11 Tsa mndaa Diox lar naguz mdok re zha, ne nzhab Diox lo re zha: 
\p ―Bee taneyy raa goo telut, asta yelo kaltaa re wets goo ne re btan goo kuu gath taxal nguth goo, tak reta goo ntsow rtsin na. 
\p  
\v 12 Leettsa lee Mbak zhiil mchat sey xoop. Tsa mwiin mwin thib zho thoz. Ne lee lo wiz mkow taxal na lar yaat ne lee lo mbee myaan taxal ren,  
\v 13 ne lee re mbel kuu nzib lobee mrethin mla lo yu, taxal ndrethin re ig yeen lo ya ig, leettsa kwathoz nzhax mbi.  
\v 14 Ne lee lobee mnith taxal thib yeets kuu nduz, ne reta yii ne reta yezlyu kuu nzi leen nitdoo, mwine ta ndobe.  
\v 15 Ne lee re rey yezlyu ree mkaslo leen re kelyoo, ne re leen re kedoo, leen yii, kon re zha kuu nataak lo yezlyu, kon re rik, kon re zha kuu nabee lo re soldad, kon re zha kuu nap yalnabee, kon reta zha kuu nak mos ne kon re zha libr;  
\v 16 ne mbez zha lo re yii ne lo re ke: 
\p ―Bla goo dits nee, ne bkaatslo goo nee lo Diox, ne bkaatslo goo nee lo yalti kuu taal Mbak zhiil. 
\p  
\v 17 Tak mzina wiz kuu kwathoz nathoz rid re men yalti; ¿ne cho xek rid re yalti ree? 
\c 7  
\s1 Re zha Israel kuu mli Diox 
\p  
\v 1 Bluz leettsa ngwalo mriid re koree, tsa mwiin thap mandad chaan Diox kuu ndeli lo re thapta skin yezlyu, ne ntow zha lo re thap mbi kuu nzhax lo yezlyu, tsa gaxte lo yezlyu, neeka lo nitdoo ne lo neeka thib ya.  
\v 2 Ne noga mwiin lee tedib mandad chaan Diox ndyaad lad ta nlen wiz; ne nden zha sey chaan Diox kuu naban thitanax. Lee mandada dib gan nzhab lo re thap mandad, kuu mkayaa yalnabee luux re kwaa nzi lo yezlyu ne lo nitdoo: 
\p  
\v 3 ―¡Luuxt goo re kuu nzi lo yezlyu, neeka re kuu nzo leen nitdoo, neeka re ya, asta leettsa yelo keeʼaa sey chaan Diox yeklo re zha kuu nak mos Diox reʼaa! 
\p  
\v 4 Ne mbin na naa plal nak re zha kuu mke sey chaan Diox yeklo: thib gayoo chop galbthap mil nak re zhaʼa, zha kuu nak zha Israel.  
\v 5 Tsiibchop mil zha nak zha raz chaan Judá, tedib tsiibchop mil zha nak zha raz chaan Rubén, tedib tsiibchop mil zha nak zha raz chaan Gad,  
\v 6 tedib tsiibchop mil zha nak zha raz chaan Aser, tedib tsiibchop mil zha nak zha raz chaan Neftalí, tedib tsiibchop mil zha nak zha raz chaan Manasés,  
\v 7 tedib tsiibchop mil zha nak zha raz chaan Simeón, tedib tsiibchop mil zha nak zha raz chaan Leví, tedib tsiibchop mil zha nak zha raz chaan Isacar,  
\v 8 tedib tsiibchop mil zha nak zha raz chaan Zabulón, tedib tsiibchop mil zha nak zha raz chaan Che ne lee tedib tsiibchop mil zha nak zha raz chaan Benjamín. 
\s1 Kwathoz zha kuu nok lar naguz 
\p  
\v 9 Ngulo mriid koree, tsa mwiin kwathoz men, re men kuu nzo dib naxta lo yezlyu, re men reta raz, re men kuu ndediz zhaapaa zhaapaa diiz, ne re men reta yez ndeli delant lo ta ndob Diox nabee Diox ne lo Mbak zhiil; kwathoz re mena ne yent cho gak tsaal kwent re mena, ne reta zha nok lar naguz ne nzo la yin yaa zha.  
\v 10 Reta zha dib gan zha mbez zha: 
\q1 ¡Lee Diox reʼaa kuu ndob nabee ne Mbak zhiil, 
\q1 lo zha ndabaa yalnaban, tak chaan zha nake! 
\p  
\v 11 Ne lee reta mandad ndeli re ladta ta ndob Diox nabee Diox ne re ladta lo re zha gol, ne lo re thap maa nabana; ne mkiits yek re mandad lo Diox, ta ndob Diox nabee Diox, ne mbil re mandad lo Diox;  
\v 12 ne nzhab zha: 
\q1 ¡Tbaa gake! 
\q1 Reta men ndoblo gol lo Diox, ne wen tediz re men Diox, 
\q1 lee yalnzhaak ne texkix nak chaan Diox, 
\q1 ne ndoblo tsow nataak re men Diox, tak lee Diox nap yalnabee yalney ne chaan Diox nak retay thitanax. 
\q1 ¡Tbaa gake! 
\p  
\v 13 Tsa lee thib re zha gola mnaabdiz lon ne ne: 
\p ―¿Cho re zha kuu nzi tree kuu nok lar naguz? Ne ¿pa ndyaad re zha ree? 
\p  
\v 14 Tsa lee na nzhap lo zha: 
\p ―Zha Nabee, lu ney. 
\p Tsa mkab zha, ne ne zha lon: 
\p ―Re zha ree nak re zha kuu mriid yalti thoz, ne mteech re zha xab zha ne mtsow nakits zhay kon ren Mbak zhiil.  
\v 15 Kona nal nzi re zha lo Diox, ne tse ne yaal ntsow zha tsiin lo Diox leen gwodoo chaan Diox; ne leeka Diox nak cho nkenap re zha, tak tya ndo Diox.  
\v 16 Ridt raa re zha yalti lo win ne neeka lo nit, neeka bee teyyt raa zha, ne neeka teent raa zha bee;  
\v 17 tak lee Mbak zhiil kuu ndo ndrol lo ta ndob Diox nabee Diox, kenap re zhaʼa, taxal zha kuu nkenap mbak zhiil, ne teno Mbak zhiil zha roo xlen nit kuu nak chaan yalnaban, ne lee Diox mtembi nit kuu nzhonn re zha lo zha. 
\c 8  
\s1 Lee Mbak zhiil mchat sey gaz 
\p  
\v 1 Ne leettsa mchat Mbak zhiil sey gaz kuu nke lo yeets kuu naduza, ora lee leen yibaa zheta mgan teeka garol or.  
\v 2 Tsaraa mwiin lo gaz mandad chaan Diox kuu ndeli lo Diox, ne mkayaa zha gaz trompet.  
\v 3 Tsaraa myaad tedib mandad chaan Diox kuu nzo thib btsi or yaa, ne mndeli zha delant lo bkoog; ne mkayaa zha naroob straak, tsa taa zhay lo Diox lo bkoog or, thibka kon reta kuu mndediz re men kuu nali mndo lo Diox.  
\v 4 Ne leen btsi kuu nden mandad ndroo tsen straak, thibka kon re kuu mndediz re men lo Diox, ne mkendabe lo Diox.  
\v 5 Tsa lee mandad mzhen btsi kuu nyoo straak, ne mloo zha ki kuu nzib lo bkoog leene ne mlobi zhay lo yezlyu; ora ngots ngundii ne mke bi, ne mla bel bti ne mwin thib zho thoz. 
\s1 Re trompet 
\p  
\v 6 Tsa lee re gaz mandad kuu nden trompet mndo list zha teez zha trompet zha. 
\p  
\v 7 Tsa lee thib mandad mteez trompet chaan, ora mla yike lo yezlyu ne ki kuu nabexnit kon ren. Ne mteyye thib part lo tson part lo yezlyu, ne mteyye thib part re ya ne re yizhwan kuu nayee na. 
\p  
\v 8 Tsa lee mandad mrop mteez trompet chaan, ora lee thib kuu na taxal thib yii kuu ngeyeek mla leen nitdoo, ne thib part lo tson part nitdoo mreyal ren.  
\v 9 Ne reta maa kuu naban lo thib part lo tson part leen nitdoo nguth, ne thib part lo tson part re bark mlux. 
\p  
\v 10 Ne lee mandad myon mteez trompet chaan, tsa lee thib mbel kuu kwathoz naro, kuu ngeyeek taxal thib yerbel mrethin lobee. Ne ngobe lo thib part lo tson part lo re yoo ne lo re xlen nit.  
\v 11 Ne lee le mbel kuu mrethin lobee nak; nalaxin; tsa ngok nala thib part lo tson part reta nit yoo, ne kwathoz men nguth, tak kwathoz ngok nala nit. 
\p  
\v 12 Lee mandad thap mteez trompet chaan, tsa mlux thib part lo tson part lo wiz, ne thib part lo tson part lo mbee, ne thib part lo tson part re mbel kuu nzib lobee. Tsa mkow thib part lo tson part re kona, tsa taat raay xni tse ne yaal lo thib part lo tson part lo yezlyu. 
\p  
\v 13 Tsaraa mwiin, ne mbin na mrez thib mti kuu ndab lobee ne dib gan maa nzhab maa: 
\p ―¡Aka nalatt rid re men kuu nzi lo yezlyu ree, leettsa teez tedib tson mandad trompet! 
\c 9  
\p  
\v 1 Ne lee mandad gaay mteez trompet chaan, tsa mwiin thib mbel kuu mrethin lobee mla lo yu, ne mbela mkayaa yab chaan yeerdoo.  
\v 2 Ne mxaal mbel roo yeerdoo, ne tya mroo kwathoz tsen taxal leen thib orn naro. Ne lee tsen kuu mroo leen yeerdoo mtekow lo wiz ne lo mbi.  
\v 3 Ne xid tsena mroo kwathoz ngebeez kuu mraats lo yezlyu; ne mkayaa maa yalnabee gaknayii maa taxal mbezhub.  
\v 4 Ne mndaat zha diiz lo re maa luux maa re yizhwan kuu ndab lo yezlyu, neeka thib re kuu nayee ne neeka thib re ya, sinke ndoblo kee maay, beeta yek re men kuu nket sey chaan Diox yeklo.  
\v 5 Per mndaat zha diiz lo re maa kuth maa men, sinke beeta teti maa re men thib gaay mbee; ne taxal nayan nkee mbezhube tata nkee maay. 
\p  
\v 6 Ne lee re wiza lee re men malaay tak zha gath zha, per gagt gath zha; ne tak zha gath zha, tak lee yalguth tsiint lo zha. 
\p  
\v 7 Lee re ngebeeza na taxal re kabay kuu list ndo ya lo zhoo; ne lee yek re maa ndob thib kuu na taxal thib koron or, ne lee lo maa na taxal lo men.  
\v 8 Ne lee yitsek maa na taxal yitsek ngot, ne lee keley maa na taxal keley mbeez.  
\v 9 Ne dita maa now kon yiib, ne lee xiil re maa nkebi taxal kwathoz karret kuu nkende re kabay kuu nya lo zhoo.  
\v 10 Lee kol maa nak taxal kol mbezhub, ne nap maa xkoots maa. Ne lo xkoots maa nap maa yalnabee kee maay yek re men dita thib gaay mbee.  
\v 11 Ne lee zha kuu nabee lo re ngebeeza nak, mandad chaan yeerdoo; diiz hebreo le zha Abadón ne lee diiz gryeg le zha Apolión. (Diiz ree nak: “Zha kuu nluux reta kwaa”.) 
\p  
\v 12 Nguloʼa mriid yalti kuu ner, per bee nzhak falt techope. 
\p  
\v 13 Tsa lee mandad xoop mteez trompet chaan, ne ora mbin na thib bos kuu mroo leen re thap kach chaan bkoog or, kuu ndo delant lo Diox.  
\v 14 Lee bosa nzhab lo mandad xoop, kuu nden trompet: 
\p ―Btelaa re thap mandad kuu ndekedoo roo yoo Eufrates. 
\p  
\v 15 Ne mtelaa mandad re thap mandada, tak lista ndo re mandada par ora, par wiza, par mbeeʼa ne par liina, tsa kuth re mandada thib part lo tson part re men kuu nzo lo yezlyu.  
\v 16 Ne mbin naa plal nak re soldad: Chop gayoo miyon soldad kuu ndob dits kabay. 
\p  
\v 17 Tbaa ngwani re kabay lon, ne lee re zha kuu ndob dits re maa, nap zha yiib kuu ntow pech zha kuu nane na taxal yiiben kuu nzo lo ki, ne nla xni azule taxal ke kuu le safiro ne nla xni gutse taxal azufre. Lee yek re kabay na taxal yek mbeez ne lee roo re maa ndroo bel, tsen ne azufre.  
\v 18 Thib part lo tson part re men nguth lo bel, lo tsen ne lo azufre kuu ndroo roo re kabaya.  
\v 19 Tak lee yalnabee chaan re kabay nzo roo kabay ne kol kabay; tak taxal yek mbeel na kol maa, ne kon leey nkee maay yek re men. 
\p  
\v 20 Per lee re men kuu ngutht lo re yalti ree, mlaat zha re kuu went kuu ntsow zha, neeka mlaat zha nzhool zha lo re mbi went, ne lo re diox kuu nagt Diox, kuu natexkwaa kon or, plat, yiiben ke ne ya, re kuu gagt wii, ne gagt gon, neeka gagt te.  
\v 21 Ne neeka mlaat zha kuu nzhuth zha taben zha, neeka mlaat zha yalwez, neeka mlaat zha kuu nzhak rop zha kon ndota zha, ne neeka mlaat zha yalwann. 
\c 10  
\s1 Mandad kuu nden thib yeets lut kuu naduz 
\p  
\v 1 Tsa ngwani tedib mandad kuu kwathoz ney lon, kuu ndyaadla lobee xid thib xkow, ne ndob thib bith yek zha. Ne lee lo zha nla xni taxal wiz, ne lee nii zha na taxal yato kuu nde bel.  
\v 2 Ne lee yaa zha nzo thib yeets lut kuu ndezhaal lo, ne mto zha nii ban zha lo nitdoo ne lee nii beg zha mto zha lo yezlyu.  
\v 3 Tsa dib gan zha mrez zha, taxal mbez mbeez kuu nayii, ne leettsa dib gan zha mrez zha, tsa lee gaz ngundii ngots mkab leeka kuu nzhab zha.  
\v 4 Ne leettsa ngwalo ngoo bi re gaz biʼa, lee na nda kee kuu nzhab bi lo yeets; per mbin na thib bos kuu mroo yibaa kuu ne lon: 
\p ―Yent cho lo gaba kuu nzhab gaz bi, neeka keet luy lo yeets. 
\p  
\v 5 Tsaraa mwiin lo mandad kuu ndo nii lo nitdoo ne lo yezlyu, mlap zha yaa ban zha lobee,  
\v 6 ne nzhab zha: 
\p ―Wlipaa tenzhee ne zha kuu naban thitanax, zha kuu mdexkwaa yibaa, yezlyu, nitdoo ne reta kuu nzo leene. 
\p Noga nzhab zha: 
\p ―Yent raa kwan kwet re men,  
\v 7 or kuu lee mandad gaz teez trompet chaan, ora gak re diiz chaan Diox kuu ngoo gaats, taxal nzhab re profet kuu ngoo ndala. 
\p  
\v 8 Lee bos kuu mbin na, kuu mroo yibaa, mre mne lon: 
\p ―Gwa ne bzhen yeets lut kuu ndezhaal lo, kuu nzo yaa mandad kuu ndeli lo nitdoo ne lo yezlyu. 
\p  
\v 9 Tsa ngwan lo mandada, mnaabʼn yeets lutta ne lee zha ne lon: 
\p ―Bzhene ne dowe. Rooʼa gak natsiy taxal mzin, per lee leettsooʼa gak nalay. 
\p  
\v 10 Tsa mzhen na yeets lut kuu nzo yaa mandada ne ndow nay; ne lee roon ngok natsiy taxal mzin, per leettsa ngwalo ndow nay, lee leettsoon ngok nalay.  
\v 11 Tsa ne re mandad lon: 
\p ―Ndoblo taaʼa kwent tedib welt re kuu mne Diox loʼa, lo re men kuu nzo re yez bzhizh, lo re men kuu nzo re yez naro, lo re zha kuu ndediz zhaapaa zhaapaa diiz dib naxta lo yezlyu ne lo re rey. 
\c 11  
\p  
\v 1 Tsa mndaa zha thib yi lon kuu nak taxal thib metr kuu nchiix men, ne ne zha lon: 
\p ―Gwateli, ne bchiix gwodoo chaan Diox, ne bkoog ne btsow kwent naa plal re zha kuu nzhool lo Diox tya.  
\v 2 Per chiixta lee gwodoo, tak leey mkayaaʼa re zha kuu nagt zha Israel, ne chalni re zha yez nayon chop gal bchop mbee.  
\v 3 Ne lee na taalʼn chop zha da, kuu taa kwent kuu gapʼn lo zha, ne thib mil chop gayoo tson gal wiz taa zha kwent, ne gok zha lar kuu nambaat nak. 
\p  
\v 4 Rop zhaʼa nak rop ya olib ne rop kandeler kuu ndo lo Zha Nabee lo yezlyu.  
\v 5 Ne os cho nlaaz tsow kuu went lo rop zha, tsa lee rop zha koo bel roo, kuu thitanax tey re zha kuu nayii ne zha, ne tbaaka gath reta zha kuu nlaaz tsow kuu went lo rop zha.  
\v 6 Rop zhaʼa nap yalnabee tow lobee, tsa lat yi dita thib tyemp kuu taa zha kwent chaan Diox; ne noga nap zha yalnabee, tsa tsow zha lee nit reyal ren, ne tsow zha rid yezlyu ree yalti kon relota kuu went, loka plal welt nlaaz zha.  
\v 7 Ne leettsa yelo taa zha kwent, lee thib maa kuu kwathoz nathoz na roo leen yeerdoo, yo kon rop zhaʼa, ne tsow maa gan lo rop zha ne kuth maa rop zha.  
\v 8 Ne lee kwerp rop zhaʼa gax ndrol yez, leeka leen yez ta mbeth re men Zha Nabee, ne diiz nanzee lee le yeza nak Sodoma ne Egipto.  
\v 9 Ne tson wiz narol, lee re men reta yez, re men reta raz, ne re men kuu ndediz zhaapaa zhaapaa diiz lo dib naxta lo yezlyu, wii lo kwerp rop zhaʼa ne taat zha diiz gaats rop zhaʼa.  
\v 10 Ne lee re zha kuu naban lo yezlyu ree, laz zha wii zha lo rop profeta, ne asta talaaz zha re kwaa lo altaa zha; tak kwathoz yalti mriid re zha lo rop profeta. 
\p  
\v 11 Per leettsa mriid tson wiz narol, lee Diox mteroban rop zha ne ngwateli zha tedib welt, ne reta men kuu mwii lo rop zha, kwathoz mzeb zha.  
\v 12 Tsa lee rop zha mbin thib bos nex kuu mroo yibaa kuu nzhab lo rop zha: 
\p ―¡Kendab goo nzhee! 
\p Tsa mkendab rop zha ndya zha yibaa leen thib xkow, ne reta zha kuu nayii ne zha mwii lo zha.  
\v 13 Ne leeka ora mwin thib zho thoz, ne thib part lo tsii part yeza mla yiyoo ne gaz mil men nguth lo zhoʼa. Ne lee re zha kuu nabanka kwathoz mzeb zha ne mbil zha lo Diox kuu ndob yibaa. 
\p  
\v 14 Nguloʼa mriid re yalti ree; per ndyaada tedibe. 
\s1 Trompet gaz 
\p  
\v 15 Tsa lee mandad gaz mteez trompet chaan, ne mbin na tyen bos kuu kwathoz nex kuu mroo yibaa, kuu nzhab: 
\q1 Lee yalnabee chaan yezlyu ree, 
\q1 nal leey nak chaan Diox, Zha Nabee lo reʼaa, 
\q1 ne chaan Jesucrist, Kuu Mtaal Diox Nabee, 
\q1 ne lee zha nabeey thitanax. 
\p  
\v 16 Tsa lee re galbthap zha gol kuu ndob delant lo Diox, mkiits zha yek zha lo yu ne mbil zha lo Diox,  
\v 17 ne nzhab zha: 
\q1 Ndaa nee texkix loʼa Diox, Zha Nabee, 
\q1 tak lu nzhaak ntsow reta kwaa, 
\q1 lu nak, lu ngok ne lu bre yaad, 
\q1 tak mkayaaʼa lu yalney chaana, 
\q1 ne mndeloʼa lu nabeeʼa lo yezlyu ree kon yalney chaana. 
\q1  
\v 18 Kwathoz nayii re men re yez kuu nzi lo yezlyu, 
\q1 per mzina wiz kuu leeʼa teti re men, 
\q1 leettsa naaba kwent lo re zha nguth. 
\q1 Ne taaʼa lo re mosa kuu ndoblo zha kayaa zha, 
\q1 lo re profet, lo re zha kuu nyelaaz lu ne lo re zha kuu nambi ndo loʼa, 
\q1 ne noga lo re zha kuu nzhon diiz loʼa, 
\q1 tegal zha nataake o zha nataagte, 
\q1 ne luuzha re zha kuu nluux yezlyu. 
\p  
\v 19 Tsa mzhaal pwert gwodoo chaan Diox kuu ndob yibaa, ne lee leen gwodoo mloo kaj kuu nzo xkiiz Diox. Ne mla bel bti, mke bi thoz, ngots ngundii, mwin zho thoz ne mla kwathoz yike. 
\c 12  
\s1 Ngot ne mbeldoo 
\p  
\v 1 Tsa mloo thib seny thoz lobee, lee thib ngot kuu nabix wiz taxal thib bestid, ne lee mbee nax xann nii ngot, ne lee yek ngot ndob thib koron kuu nke tsiibchop mbel kuu nzib lobee choy.  
\v 2 Lee ngota ndo nak zhiinn, ne mbetsyath ngot mbez ngot nlaaz leettsoo ngot, tak mera gal zhiinn ngot.  
\v 3 Ne mloo tedib seny thoz lobee, lee thib mbeldoo kuu nane na kuu ndob gaz yek ne ndob tsii kach, ne thibga koron ndob kadta yek maa.  
\v 4 Ne kon kol maa mdobyu maa thib part lo tson part re mbel kuu nzib lobee, ne mlobi maa re mbel lo yezlyu. Lee mbeldooʼa mndo lo ngot kuu mer gal zhiinn, tsa kuth mbeldoo zhiinn ngot, or kuu gal zhiinn ngot.  
\v 5 Ne lee ngot ngop thib mbet bi, kuu gak zha kuu nabee lo re men kuu nzi dita lo yezlyu kon thib bar yiib. Ne mbyiib xgann ngot lo ngot ne ndano zha xgann ngot mndob lo Diox ta ndob Diox nabee Diox;  
\v 6 ne lee ngot mzhonn nda par net yubiz, ta mdexkwaa Diox yo ngot, ne tya taa Diox kuu wu ngot thib mil chop gayoo tson gal wiz. 
\p  
\v 7 Tsaraa ngoo thib zhoo yibaa, tsa lee mandad Miguel kon tedib net mandad mbyo kon mbeldoo ne kon re mandad mbeldoo,  
\v 8 per mtsowt mbeldoo gan lo zhoo; ne mndaat raa zha diiz gabet mbeldoo kon re mandad mbeldoo yibaa.  
\v 9 Ne mloo zha mbeldoo yibaa, mbeldoo kuu nak mbeel gol ndala kuu le Mahotsa ne Maxuuy, kuu nkedi reta men kuu nzi lo yezlyu. Ne mlobi zha Mahotsa kon re mandad Mahotsa lo yezlyu. 
\p  
\v 10 Tsa mbin na thib bos kuu kwathoz nex kuu mroo yibaa, kuu nzhab: 
\q1 Lee nal mzina yalnaban kuu thitanax, 
\q1 yalney ne tyemp kuu lee Diox nabee, 
\q1 ne yalnabee chaan Crist, 
\q1 tak mlooʼa zha mbeldoo, kuu tse ne yaal nkeki re wetsaa ne re btanaa lo Diox. 
\q1  
\v 11 Ne mtsow re zha gan lo mbeldoo kon ren Mbak zhiil, 
\q1 ne kon xkiiz Diox kuu ndaa re zha kwent; 
\q1 tak mzebt re zha gagath zha, 
\q1 sinke thib mloo zha yek zha gath zha. 
\q1  
\v 12 Yibaa ne reta goo kuu nzo leen yibaa, 
\q1 naley bloo goo leettsoo goo. 
\q1 ¡Per kwathoz nalatt rid re goo kuu nzi lo yezlyu ne nzo leen nitdoo! 
\q1 Tak lee Maxuuy mlaʼa lo goo lo yezlyu, kon dib yalnayii chaan Maxuuy, tak neʼa Maxuuy telutta tyemp nap Maxuuy. 
\p  
\v 13 Ne leettsa mne mbeldoo lee mbeldoo mla lo yu, tsa mreke mbeldoo dits ngot kuu ngop mbet biʼa.  
\v 14 Per lee ngota mkayaa chop xiil mti kuu kwathoz naro, tsa tak lazbi ngot ya ngot yubiz, tith lo mbeldoo, ne tya taa zha kuu wu ngot tson liin narol.  
\v 15 Tsa lee mbeldoo mloo nit roo, tsa gake thib yoo kuu gwe ngot;  
\v 16 per lee yezlyu mtsow ayud ngot, ne mzhaal yezlyu ne mdab yezlyu nit kuu mroo roo mbeldoo.  
\v 17 Ne kona lee mbeldoo masraa mnayii mne ngot, tsa ngwa mbeldoo mbyo mbeldoo kon reta zha kuu nak zha raz ngot, re zha kuu nzhon diiz lo xkiiz Diox, ne nali ndo ndaa kwent chaan Jesucrist.  
\v 18 Ne lee mbeldoo mndeli lo gux roo nitdoo. 
\c 13  
\s1 Chop maa kuu kwathoz nathoz na 
\p  
\v 1 Mndon lo gux roo nitdoo, tsa mwiin mkendab thib maa kuu kwathoz nathoz na lo nitdoo, ne ndob gaz yek maa ne tsii kach maa. Ne kadta kach maa ndob thib koron, ne re yek maa nke diiz kuu ngode maa Diox.  
\v 2 Lee maa kuu kwathoz nathoz na mwin, na taxal thib tigr, lee nii maa na taxal nii os ne lee roo maa na taxal roo mbeez. Tsa lee mbeldoo mndaa yalney chaan mbeldoo ne ta ndob mbeldoo lo maa, noga mndaa mbeldoo kwathoz yalnabee lo maa.  
\v 3 Ne lee thib yek maa mroo grid, ne nzhak maa kuu mer gath nzhak maa; per lee yek maa kuu mroo grida mgwe. Ne lee reta men yezlyu mzegey leettsoo ne mndeke dits maa.  
\v 4 Tsa mbil re zha lo mbeldoo, tak mndaa mbeldoo yalnabee lo maa kuu kwathoz nathoz na, ne noga mbil re men lo maa kuu kwathoz nathoz na, ne mbez re men: 
\p ―Yent raa cho taxal maa ree ne yent cho tak tsow gan lo maa. 
\p  
\v 5 Noga mkayaa maa yalnabee, tsa ni maa re diiz de lo Diox, ne noga mkayaa maa yalnabee thib chop gal bchop mbee.  
\v 6 Ne tata mtsow maa mlode maa Diox, le Diox, ta nzo Diox, ne noga mlode maa reta zha kuu nzo yibaa.  
\v 7 Ne mkayaa maa yalnabee par yo maa kon re zha kuu nyelaaz Diox, asta tsow maa gan lo re zha; noga mkayaa maa yalnabee tsa nabee maa lo re men reta raz, lo re men reta yez, lo re men kuu ndediz zhaapaa zhaapaa diiz ne lo reta men kuu nzo dita lo yezlyu.  
\v 8 Ne lo maa kuu kwathoz nathoz na, mbil reta men kuu nzi lo yezlyu, kuu nket le lo libr kuu nak chaan yalnaban, desde leettsa mdexkwaa yezlyu, ne libra nak libr chaan Mbak zhiil kuu nguth lo kruz. 
\p  
\v 9 Loka cho ndob nza ndoblo gon koree: 
\q1  
\v 10 Reta zha kuu ndano tedib net zha tsib, 
\q1 noga re zhaʼa ta tsib; 
\q1 ne lee re zha kuu nzhuth men kon espad, 
\q1 kon espadka gath zha. 
\m Kona lee re zha kuu nyelaaz Diox ndoblo xek zha. 
\p  
\v 11 Tsaraa mloo tedib maa kuu kwathoz nathoz na lon, maa ree mroo leen yezlyu. Ne ndob chop kach maa, kuu na taxal kach mbak zhiil, per taxal mbeldoo ndediz maa.  
\v 12 Ne dita yalnabee chaan maa kuu kwathoz nathoz kuu nera nap maa ree, ne ntsow maa lee yezlyu ne reta men kuu nzi lo yezlyu nzhool lo maa kuu nera, maa kuu mgwe grid ne ngutht.  
\v 13 Ne noga ntsow maa re kuu thoz kuu gagt tsow re men, ne asta mtsow maa mroo bel lobee mla lo yu, ne mwii re mene.  
\v 14 Ne por maa kuu kwathoz nathoz kuu nera, ntsow maa kuu thoz, tsa nkedi maa reta men kuu nzi lo yezlyu, ne mnabee maa lo re men texkwaa re men thib imaj chaan maa kuu kwathoz nathoz kuu mroo grid lo espad ne mgwe.  
\v 15 Ne lee maaʼa mkayaa yalnabee, tsa tsow maa ban imaj chaan maa kuu nera, tsa lee imaj tediz ne kuth reta zha kuu tobxubt ne golt lo imaj.  
\v 16 Ne noga ntsowe ke sey yaa ban re men o yeklo re men kuu nataak ne re men kuu nataagt, zha rik, zha prob, zha libr ne zha kuu nak mos.  
\v 17 Ne yent cho gak tho neeka tii, os nket sey o le maa kuu kwathoz nathoz kuu nera o numr kuu nak le maa, yaa zha o yeklo zha. 
\p  
\v 18 Koree ndeche yalnzhaak; loka cho nyene, tsow kwent numr chaan maa kuu kwathoz nathoza, kuu nak numr chaan men. Ne lee numr nak, xoop gayoo tson gal xoop. 
\c 14  
\s1 Thib gayoo chop gal thap mil zha nzhool lo Mbak zhiil 
\p  
\v 1 Tsaraa mwiin, ne ngwani thib Mbak zhiil kuu ndeli yek yii Sión lon. Ne lo maa nzi thib gayoo chop galbthap mil men, re zha kuu nke le Mbak zhiil ne le Xut Mbak zhiil yeklo.  
\v 2 Ne mbin na thib bos kuu mroo yibaa, kuu nyoo bi taxal ta kwathoz nla nit ne taxal bi ngundii; ne lee bos kuu mbin na nataak taxal tyen bos re zha kuu nzhool arp.  
\v 3 Ne nzhool re zha thib kant kub lo Diox delant lo thap maa nabana ne delant lo re zha gola. Ne yent cho ngok gateed kanta, sinke beeta re thib gayoo chop gal thap mil zha kuu nali ngok lo Jesucrist lo yezlyu.  
\v 4 Re zhaʼa nak re zha kuu nambi mndo lo Diox, ngogt rop re zhaʼa kon neeka thib ngot ne kon neeka thib mbyi, re zhaʼa ndeke dits Mbak zhiil loka pa ta nda maa. Diox ne Mbak zhiil mtelaa re zhaʼa lo re men yezlyu ree, tsa lee re zhaʼa gak taxal gon kuu ner lo Diox ne lo Mbak zhiil.  
\v 5 Nambi nak re zhaʼa, tak neeka thib lan diiz kuu wlit mroot roo zha. 
\s1 Kuu nzhab tson mandad chaan Diox 
\p  
\v 6 Tsa mwiin lee tedib mandad ndabi ndrol lobee, ne mandada nap Diiz Chul kuu nak thitanax, tsa taa zha kwente lo re men reta yez kuu nzi dib naxta lo yezlyu, lo reta raz ne lo reta zha kuu ndediz zhaapaa zhaapaa diiz lo yezlyu.  
\v 7 Ne dib gan zha mbez zha: 
\p ―Btseb goo ne goo Diox ne bil goo lo Diox, tak mzina wiz kuu lee Diox naab kwent lo reta men. Bil goo lo zha kuu mdexkwaa lobee ne yezlyu, nitdoo ne re xlen nit. 
\p  
\v 8 Tsaraa mndeke tedib mandad kuu nzhab: 
\p ―¡Mluzha Babilonia, yez naro, tak yez Babilonia mtsow lee reta men re yez mtsow thitanax kuu went, ne nake taxal mtetuz yez Babilonia re zha! 
\p  
\v 9 Tsaraa mndeke tedib mandad, kuu mbez dib gan: 
\p ―Os lee cho men gol lo maa kuu kwathoz nathoza ne lo imaj chaan maa, ne laa zha ke sey chaan maa yeklo zha o yaa zha,  
\v 10 teriid zhaʼa yalti thoz kuu yaad lo Diox, ne gu zha xit ub kuu nala, kuu nak yalnayii chaan Diox; ne lo ki ta nyol azufre rid zha yalti delant lo re mandad chaan Diox ne lo Mbak zhiil.  
\v 11 Ne lee tsen chaan yalti kuu rid re zhaʼa nkendab thitanax. Ne tse ne yaal neyt re zha kuu gol lo maa kuu kwathoz nathoz na ne lo imaj chaan maa, o re zha kuu ke sey chaan maa.  
\v 12 Kona, lee re zha kuu nak zha yez chaan Diox, nzhon zha diiz xkiiz Diox, ne nali ndo zha nyelaaz Jesús, ndoblo xek zha. 
\p  
\v 13 Tsa mbin na thib bos kuu mroo yibaa, kuu ne lon: 
\p ―Bkee koree: “Wen nda re zha kuu nak zha, Zha Nabee, re zha kuu gath naltseree par delant”. 
\p ―Wliy ―ne Mbi Nayon―, tak lee re zha roxkwan zha lo re rtsin zha, tak lee re kuu wen kuu mtsow zha ndekey dits zha tsowe ayud zha. 
\s1 Yalgonn kuu dop lo yezlyu 
\p  
\v 14 Tsa mwiin, ne ngwani thib xkow naguz lon; ne dits xkowa ndob thib zha kuu na taxal, Zha Kuu Mzin Ngok Men. Ne ndob thib koron or yek zha, ne nzo thib hoz kuu nale yaa zha.  
\v 15 Ne lee tedib mandad mroo leen gwodoo chaan Diox, ne dib gan mandad mbez mandad lo zha kuu ndob dits xkowa: 
\p ―¡Bloo hoz chaana ne bthop yalgonn kuu nzi lo yezlyu; tak ngoklo lee dope! 
\p  
\v 16 Tsa lee zha kuu ndob dits xkow mloo hoz lo yezlyu, ne mthop zha re yalgonn kuu ndab lo yezlyu. 
\p  
\v 17 Tsa lee tedib mandad mroo leen gwodoo kuu ndob yibaa, ne noga yaa mandada nzo thib hoz kuu kwathoz nale.  
\v 18 Ne lo bkoog mroo tedib mandad, kuu nap yalnabee lo bel, ne dib gan zha nzhab zha, lo mandad kuu nden hoz kuu kwathoz nale: 
\p ―Bloo hoz chaana, ne bga re zhit luts ub kuu ndab lo yezlyu, tak ngwiya re ub. 
\p  
\v 19 Tsa lee mandad mloo hoz lo yezlyu, ne mthop zha reta ub kuu ndab lo yezlyu, ne mloo zhay ta ndiiy, koree nak yalti thoz kuu taal Diox.  
\v 20 Ne thib lad roo yez mtii zha ub, ne lee leen ta ndii ub mroo ren kuu mzin asta xann fren roo kabay, ne mzhoy teeka thib tson kilometro. 
\c 15  
\s1 Re gaz mandad kuu ndyaadno gaz yalti kuu rid bluz 
\p  
\v 1 Tsa mwiin tedib seny thoz leen yibaa, kuu kwathoz mzegey leettsoon: Mwiin gaz mandad kuu ndyaadno gaz yalti kuu rid bluz, ne kon re koree yelo yalnayii chaan Diox. 
\p  
\v 2 Noga mwiin thib kuu na taxal thib nitdoo kuu nzhol na taxal bidr ne nabexnite kon bel; ne lee re zha kuu mtsow gan lo maa kwathoz nathoz na ne lo imaj chaan maa, ne lo numr kuu nak le maa, reta zhaʼa ndeli lo nitdoo kuu nzhol na taxal bidr, ne nden re zha arp kuu mndaa Diox lo re zha.  
\v 3 Ne nzhool re zha kant chaan Moisés kuu ngok mos Diox, ne kant chaan Mbak zhiil chaan Diox, kuu mbez: 
\q1 Kwathoz naro ne kwathoz wen thoz nak re kuu mtsowa, 
\q1 Zha Nabee, lu nak Diox kuu nkeno reta yalney ne yalnabee; 
\q1 ¡Nali ne wli nak xneta: 
\q1 Lu nak rey ne nabeeʼa lo re zha kuu nzo dib naxta lo yezlyu! 
\q1  
\v 4 ¿Cho tsebt loʼa, Zha Nabee? 
\q1 Ne ¿cho golt loʼa? 
\q1 Tak thita lu nayon nak, 
\q1 ne reta men kuu nzi dib naxta lo yezlyu, yaad gol loʼa, 
\q1 tak mwii zha nali nak re kuu mtsowa. 
\p  
\v 5 Ngulo mriid koree, tsaraa mwiin yibaa ne lee roo gwodoo chaan Diox ta nzo xkiiz Diox mzhaal.  
\v 6 Ne leen gwodoo mroo re gaz mandad kuu ndyaadno re gaz yalti. Ne nok re zha lar naguz kuu nambi ne nzhuyy na, ne nzo sinch or pech zha.  
\v 7 Tsa lee thib re maa nabana, mndaa thibga kop or lo kadta thib mandad, kuu tseta nzo yalnayii chaan Diox kuu naban thitanax.  
\v 8 Ne mze gwodoo ngoo tsen kuu ndyaad lo yalnaro ne lo yalney chaan Diox, ne yent cho tak tab tya, asta leettsa yelo rid re gaz yalti kuu nzhab re mandada. 
\c 16  
\s1 Re kop or kuu nzo yalnayii chaan Diox 
\p  
\v 1 Tsa mbin na thib bos nex, kuu mroo leen gwodoo chaan Diox, kuu nzhab lo re gaz mandada: 
\p ―Gwa goo ne bxo goo, kuu nzo leen re gaz kop lo yezlyu, kuu nak yalnayii chaan Diox. 
\p  
\v 2 Tsa lee mandad kuu ner ngwa ne mxo kuu nzo leen kop chaan lo yezlyu, ne lee reta zha kuu nap sey chaan maa kuu kwathoz nathoz na, ne re zha kuu nzhool lo imaj chaan maa, mlen zha yoob went kuu kwathoz ne. 
\p  
\v 3 Lee mandad mrop ngwa ne mxo kuu nzo leen kop chaan lo nitdoo, tsa lee nitdoo mreyal ren, taxal ren thib zha nguth, ne nguth reta maa naban kuu nzo leen nitdoo. 
\p  
\v 4 Lee mandad myon ngwa ne mxo kuu nzo leen kop chaan lo re yoo ne lo re xlen nit, ne retay mreyal ren.  
\v 5 Tsa mbin na lee mandad chaan nit nzhab lo Diox: 
\p ―Nali naka, lu nak Diox kuu Nayon, zha nak ne zha ngok, tak mnaaba kwent,  
\v 6 lo re zha kuu mxo ren chaan re zha kuu nali ngok loʼa, ne ren re profeta, lee nal mtsowa ngwii zha ren; tak tata nak kuu nlaaz zha. 
\p  
\v 7 Noga mbin na tedib bos kuu mroo lo bkoog chaan Diox, kuu nzhab: 
\p ―Zha Nabee, wlipaa lu nak Diox kuu nkeno reta yalney ne yalnabee; tak wli ne nali mnaaba kwent. 
\p  
\v 8 Lee mandad mdap mxo kuu nzo leen kop chaan lo wiz; tsa lee wiz mkayaa yalnabee tey wiz reta men kon bel.  
\v 9 Ne mteyy bee re zha, per mlaat zha mod went kuu nak zha ne neeka mbilt zha lo Diox, leel mlode zha Diox kuu nap yalnabee lo re yalti ree. 
\p  
\v 10 Ne lee mandad gaay mxo kuu nzo leen kop chaan ta ndob maa kuu nathoz na, ne lee dita ta nabee maa mla yalkow. Ne lee reta zha leeka lee zha mndowley zha loz zha, tak kwathoz nati kuu ngeriid zha;  
\v 11 ne tegal tatay mlaat zha re kuu went kuu mtsow zha, leel masraa mlode zha Diox kuu ndob yibaa, por re yalti kuu ngeriid zha ne por yoob kuu ndak zha. 
\p  
\v 12 Ne lee mandad xoop mxo kuu nzo leen kop chaan leen yoo naro kuu le Eufrates, ne lee nit yooʼa mbiz, tsa mzhaal net mriid re rey kuu ndyaad lad ta nlen wiz. 
\p  
\v 13 Tsa mwiin lee roo mbeldoo, roo maa kuu kwathoz nathoz na ne roo zha kuu wlit nak profet, mroo tson mbi fyer kuu na taxal mbich.  
\v 14 Ne re mbicha nak mbi chaan mbi fyer, ne ntsow maa re kuu thoz, ne mroo maa mkaltaa maa re rey kuu nzi dita lo yezlyu, tsa ya re rey lo zhoo, wiz kuu gak wiz naro chaan Diox kuu nkeno reta yalney ne yalnabee.  
\v 15 Tsa nzhab Jesús: 
\p ―Wii goo lee na yal taxal thib wann. Wen nda re zha kuu naxna ne thibka nambi na xab, tsa tiyt zha cheey zha, ne loot yalnathoy chaan zha. 
\p  
\v 16 Ne lee re mbi fyera mkaltaa re rey thib ta le Armagedón diiz hebreo. 
\p  
\v 17 Ne lee mandad gaz mxo kuu nzo leen kop chaan lo mbi; ne lee leen gwodoo chaan Diox mroo thib bos nex kuu mroo ta ndob Diox, ne nzhab: 
\p ―¡Nguloʼa ngoke! 
\p  
\v 18 Tsa ngots ngundii ne mke bi, mla bel ne lee lo yezlyu mwin thib zho thoz, kuu neeka mas ter win desde leettsa mdexkwaa yezlyu.  
\v 19 Ne lee yez naro ngok tson lee ne lee reta yez kuu nzi lo yezlyu mla yiyoo. Tsa mtelaaz Diox yez Babilonia, kuu nak thib yez naro, tsa teti Diox yeza kon yalnayii chaan Diox.  
\v 20 Reta yezlyu kuu nzi leen nitdoo ne re yii mnith.  
\v 21 Ne lee lobee mroo yike nabii kuu ne teeka chop gal kil mla dits re men, ne reta men mndelo mlode Diox por re yalti kuu ngeriid zha lo yike, tak leey ngok thib yalti thoz. 
\c 17  
\s1 Yalti kuu rid ngot kuu ntho kwerp 
\p  
\v 1 Tsa mwiin thib re mandad kuu mzhen re gaz kopa, myaad lon ne ne: 
\p ―De, tsa lon loʼa yalti kuu rid ngot kuu ntho kwerp kuu ndob lo nitdoo.  
\v 2 Reta rey ne reta men yezlyu ree, ngok rop ngota, ne mtetuz ngot re men, kon re kuu nzhak rop ngot kon re men. 
\p  
\v 3 Tsa lee Mbi Nayon mtsow lee mandad mndenon thib ta yubiz, ne tya mwiin lee ngot, ndob dits thib maa kwathoz nathoz na ne nane na, ne mzaalta cho maa nke re diiz kuu ngode maa Diox, ne ndob gaz yek maa ne ndob tsii kach maa.  
\v 4 Ne lee ngota nok thib lar kuu morad ne nane na, ne nayi ngot kon or ne kon re ke kuu kwathoz chul na, ne kon re ke kuu le perla. Ne lee yaa ngot nzo thib kop or, kuu tseta nzo re kuu yu ne re kuu went kuu mtsow ngot, re kuu ngok rop ngot kon re zha byi;  
\v 5 ne yeklo ngot nke thib le kuu yent cho tak yen, kuu nak: “Babilonia, yez kuu kwathoz naro, yez ree nak xnaa re ngot kuu ntho kwerp, ne xnaa reta kuu nayii re men yezlyu ree ne”.  
\v 6 Tsaraa myeen na lee ngota nduz kon ren chaan re zha kuu nak zha yez chaan Diox, ne kon ren re zha kuu nguth, tak mndaa zha kwent chaan Jesucrist. Ne or mwiin kona, kwathoz mzegey leettsoon.  
\v 7 Tsa lee mandad ne lon: 
\p ―¿Chebee nzegey leettsooʼa? Nal nin loʼa naa xomod nak kuu nzogaats, chaan ngot ree ne chaan maa kuu kwathoz nathoz na kuu ndob ngot dits, maa kuu nap gaz yek ne tsii kach.  
\v 8 Lee maa kuu kwathoz nathoz na kuu mwiiʼa, lee maa mban ndala, per lee nal yenta maa; per mer thoza roo maa leen yeerdoo, tsaraa ndya maa ta lux maa thitanax. Ne lee re men kuu nzi lo yezlyu kuu nket le lo libr kuu nak chaan yalnaban, desde leettsa terka texkwaa yezlyu, tetsegey leettsoo zha, leettsa wii zha lo maa kuu kwathoz nathoz na, maa kuu ngoo ndala, ne lee nal yenta maa, per lee maa cha yaad. 
\p  
\v 9 ’Nzhee ndeche yalnzhaak: Lee re gaz yek maa ree nak: Re gaz yii ta ndob ngot ree ne nake gaz rey;  
\v 10 lee gaay reya ngutha; ne lee thib rey nabee nal, ne lee tedib rey ter yaad, per leettsa yaade xegte naroob.  
\v 11 Lee maa kuu kwathoz nathoz na, kuu ngoo ndala ne lee nal yenta maa, lee maa gak rey xon ne leeka lee maa nak thib re gaz rey, ne bluz lux maa thitanax. 
\p  
\v 12 ’Lee re tsii kach maa kuu mwiiʼa, nak tsii rey kuu ter nabee; lee re reya kon maa kuu kwathoz nathoz na kayaa yalnabee par nabee, per thibka or nabee re zha maa.  
\v 13 Lee re tsii reya thibka nak xgab zha re zha, ne taa zha yalney ne yalnabee chaan zha lo maa kuu kwathoz nathoz na.  
\v 14 Tsa yo re zha kon Mbak zhiil chaan Diox, per lee Mbak zhiil tsow gan lo re zha; tak lee Mbak zhiil nak Zha Nabee lo reta zha kuu nabee, ne lee Mbak zhiil nak rey lo reta rey. Ne lee re zha kuu nzi kon Mbak zhiil, nak re zha kuu mli Diox, mrez Diox ne nali nak zha lo Diox. 
\p  
\v 15 Noga mne mandada lon: 
\p ―Lee nitdoo kuu mwiiʼa, ta ndob ngot kuu ntho kwerp, nak re yez, ne re men kuu ndediz zhaapaa zhaapaa diiz, re yez naro ne re yez bzhizh kuu nzi dib naxta lo yezlyu.  
\v 16 Ne lee re tsii kach kuu mwiiʼa, kuu ndob yek maa kuu kwathoz nathoz na, gak nayii ne ngot kuu ntho kwerp, ne cheey ngot layaa zha ngot; ne wu zha kwerp ngot ne tey zha ngot lo ki.  
\v 17 Diox mlooʼa leettsoo re zhaʼa, tsa tsow zha kuu nlaaz Diox, ne leeka Diox mtsow thibka ngok re zha, tsa taa zha yalnabee kuu nak zha rey lo maa kuu kwathoz nathoz na, asta yelo gak reta kuu nzhab Diox.  
\v 18 Lee ngot kuu mwiiʼa, nak yez kuu kwathoz naro kuu nabee lo reta rey kuu nzi lo yezlyu. 
\c 18  
\s1 Mlux yez Babilonia 
\p  
\v 1 Leettsa ngwalo mriid re koree, tsa mwiin lee tedib mandad chaan Diox kuu nla xni ndyaadla lobee, kon kwathoz yalnabee, ne dita lo yezlyu mla xni chaan mandada.  
\v 2 Ne dib gan mandad mrez mandad ne nzhab mandad: 
\p ―¡Mluzha, mluzha Babilonia, kuu nak yez naro! ¡Ne myaane liz re mbi fyer, ne kelyoo ta nkaslo re mbi kuu nambit, ne lyaat chaan re min kuu nambit, kuu nkap leettsoo men ne men!  
\v 3 Tak reta zha kuu nzo re yez kuu nzi lo yezlyu, mnduz zha kon re kuu went kuu mtsow ngot, kuu ngok rop ngot kon re zha. Noga re rey kuu nzi lo yezlyu ngok rop kon ngot, ne re zha kuu ntho re kwaa lo yezlyu ree, ngok rik zha kon re kuu mndablaaz ngot. 
\p  
\v 4 Tsaraa mbin na tedib bos kuu mroo yibaa, kuu ne: 
\p ―Broo goo yez baa, re goo kuu nak zha yez da, tsa tsowt goo re kuu went kuu ntsow ngot baa, tsa diinnt goo re yalti kuu diinn ngot;  
\v 5 tak lee re falt chaan ngot ngwateyii ne ngwazhoob asta lobee, ne lee Diox mtelaaz re kuu went kuu mtsow ngot.  
\v 6 Bdix goo lo ngot taxal mtsow ngot lo goo; ne chop lal kuu mtsow ngot lo goo bdix goo lo ngot. Bchuuxnit goo chop lal kuu mndaa ngot ngwii tedib net men, ne btaa gooy lo ngot.  
\v 7 Ne leeka taxal mtsow nataak ngot leeka lee ngot, ne mtsow ngot reta kuu nlaaz ngot, leeka tata bteti goo ngot ne btegonn goo ngot; tak ntsow ngot xgab ne nzhab ngot: “Lee na ndobʼn taxal thib zha kuu nabee, ne nagtʼn byud ne neeka gonntʼn”.  
\v 8 Kona thibka wiz tsin reta yalti ree lo ngot, yalguth, yalne, win ne yeek ngot lo bel; tak lee Diox nap yalnabee naab kwent lo ngot. 
\p  
\v 9 Ne lee re rey yezlyu ree kuu ngok rop kon ngot, mnduz re zha kon re kuu went kuu mtsow ngot, gonn re zha ne kotse re zha, leettsa wii zha laann kuu ngeyeek ngota.  
\v 10 Ne tith to zha wii zha, tak tseb zha lo yalti kuu ngeriid ngota, ne gab re zha: 
\p ―¡Aka! ¡Kwathoz nalatt ngok yez Babilonia, yez kuu kwathoz ney! Per gatilta mzin yalti loʼa. 
\p  
\v 11 Ne noga re zha kuu ntho lo yezlyu gonn zha ne kotse zha por yeza, tak yent raa cho tii re kuu ntho zha;  
\v 12 kuu nak: 
\q1 or, 
\q1 plat, 
\q1 relota ke kuu kwathoz chul na, 
\q1 re ke kuu le perla, 
\q1 re lar kuu wen, 
\q1 re lar nzhuyy kuu nayi morad, 
\q1 re lar nzhuyy kuu nayi nane, 
\q1 reta ya kuu chul ndetsi, 
\q1 reta kuu natexkwaa kon keley dant, 
\q1 reta kuu natexkwaa kon re ya chul, 
\q1 reta kuu natexkwaa kon brons, 
\q1 reta kuu natexkwaa kon yiiben, 
\q1 reta kuu natexkwaa kon ke kuu le mármol, 
\q1  
\v 13 ne kanel, 
\q1 relota yizh kuu chul ndetsi, 
\q1 straak, 
\q1 aseyt chaan ya kuu le mirra, 
\q1 ne aseyt chaan ya olib, 
\q1 xit ub, 
\q1 aseyt, 
\q1 arin, 
\q1 nzob xtil, 
\q1 way kuu nzhee yoo, 
\q1 mbak zhiil, 
\q1 kabay, 
\q1 karret ne asta re mos kuu nak men. 
\m  
\v 14 Ne gab zha lo yeza: 
\p ―Lee re xle kuu kwathoz mndablaaza napt raa luy, ne lee re kuu nix ne re kuu nataak napt raa luy, ne neeka mas tsalt raa luy. 
\p  
\v 15 Lee re zha kuu ntho re koree, kuu ngok rik por yeza, tith to zha, tak nzeb zha lo yalti kuu mriid yeza, gonn zha ne kotse zha,  
\v 16 ne gab zha: 
\p ―¡Aka! ¡Kwathoz nalatt mzhaka yez Babilonia kuu kwathoz naro! Kuu mdok xab kon re lar nzhuyy kuu morad ne nane na, kuu mkeno re or ne re ke kuu kwathoz chul na.  
\v 17 ¡Ne gatilta mlux naroob yalrik! 
\p Ne reta zha kuu ntetee bark, reta zha kuu nyoo bark, reta zha kuu nke tsiin leen bark ne reta zha kuu ntsanaa temi lo nitdoo, reta zha tith to zha;  
\v 18 leettsa mwii re zha laann kuu nguk yeza, ora mrezguth zha ne nzhab zha: 
\p ―¡Yent raa tedib yez taxal yez naro baa! 
\p  
\v 19 Ne mchoon zha di yek zha, nzhonn zha, mbetse zha ne nzhab zha: 
\p ―¡Aka! ¡Kwathoz nalatt nzhak yez naro baa! Kon yalrik chaan yez baa, ngok rik reta zha kuu mkeno bark. ¡Ne gatilta mlux yez baa! 
\p  
\v 20 Naley bloo goo leettsoo goo, reta goo kuu nzo yibaa por yez baa, ne naley bloo goo leettsoo goo, re goo kuu nak apóstl, re goo kuu nak profet ne reta goo kuu nak zha Diox; tak lee Diox mnaaba kwent lo yez baa, tak mteti yez baa goo. 
\p  
\v 21 Tsa lee thib mandad chaan Diox kuu kwathoz ney mzhen thib ke, taxal thib ke molin, ne mlobi zhay lo nitdoo, ne nzhab zha: 
\p ―Leeka tabaa lux yez Babilonia kuu naro, ne thitanax wiit raa zhay.  
\v 22 Neeka mas gont raa men gol zha arp leen yez baa, neeka flaut, ne neeka trompet; neeka tedib zha kuu nke tsiin yot raa yez baa, neeka bi chaan molin ket raa leen yez baa.  
\v 23 Ne neeka yot raa xni kuu teni yez baa, neeka yot raa yaltseya yez baa, tak lee re zha kuu mtho leen yez baa, re zhaʼa ngok zha ney ne zha ro lo yezlyu, ne kon yalwez chaan yez baa, mkedi yez reta yez kuu nzi lo yezlyu. 
\p  
\v 24 Ne leen yez baa mzal ren chaan re profet, ren chaan re zha kuu nak zha yez chaan Diox, ne ren reta zha kuu nguth dita lo yezlyu. 
\c 19  
\p  
\v 1 Leettsa ngwalo mriid re koree, tsa mbin na bos chaan naroob men leen yibaa, kuu nzhab: 
\q1 ¡Golaa lo Zha Nabee! 
\q1 Lee yalnaban kuu thitanax, xni ne yalney nak chaan Diox reʼaa, 
\q1  
\v 2 tak wlipaa nali naab Diox kwent; 
\q1 tak mnaaba Diox kwent lo ngot, kuu kwathoz nzib xkiiz ngok rop kon re men, 
\q1 ngot kuu mtetsaa re men yezlyu kon re kuu went kuu mtsow ngot; 
\q1 ne mnaaba Diox kwent lo ngot por ren re zha kuu ngok mos Diox. 
\p  
\v 3 Ne tedib welt nzhab zha: 
\p ―¡Golaa lo Zha Nabee! Ne lee laann kuu ngeyeek ngota thib nkendab. 
\p  
\v 4 Tsa lee re galbthap zha gola ne re thap maa kuu nabana, mkiits yek lo yu ne mbil lo Diox, ta ndob Diox nabee Diox, ne nzhab re zha: 
\p ―¡Tata gake! ¡Golaa lo Zha Nabee! 
\p  
\v 5 Tsa lee ta ndob Diox mroo thib bos kuu nzhab: 
\q1 ¡Bil goo lo Diox reʼaa, 
\q1 reta goo kuu ntsow rtsin Diox ne nzeb ne Diox, 
\q1 re zha nataak ne re zha nataagt! 
\s1 Yaltseya chaan Mbak zhiil Diox 
\p  
\v 6 Noga mbin na thib bos kuu taxal bos naroob men, kuu nke bi taxal thib yoo kuu kwathoz naro, ne taxal bi ngundii, kuu mbez: 
\q1 ¡Golaa lo Diox! 
\q1 Tak lee Diox reʼaa kuu kwathoz ney, mndeloʼa nabee. 
\q1  
\v 7 Naley ne wen yo leettsooʼaa ne golaa lo Diox, 
\q1 tak mzina wiz kuu lee Mbak zhiil Diox tseya, 
\q1 ne lee tsaal Mbak zhiil lista ndo. 
\q1  
\v 8 Ne mndaa zha diiz, 
\q1 gok tsaal Mbak zhiil lar kuu wen, nambi ne nzhuyy. 
\m Tak lee lar wena, nak re kuu wen kuu mtsow re zha kuu nak zha yez chaan Diox. 
\p  
\v 9 Tsa lee mandad chaan Diox ne lon: 
\p ―Bkee koree lo yeets: “Wen nda re zha kuu mrez zha ya lo fandan chaan Mbak zhiil”. 
\p Ne noga ne mandad lon: 
\p ―Wlipaa xkiiz Diox nak re diiz ree. 
\p  
\v 10 Ne mtobxubʼn xann nii mandad par golʼn lo mandad, ne lee mandad ne lon: 
\p ―Tsowta kobaa, lo Diox bil; tak lee na nakʼn mos chaan Diox taxal lu ne taxal re wetsa ne re btana, kuu nali ndo ndaa kwent xkiiz Jesucrist. Tak reta kuu wli chaan Jesús mtsow lee re profet mndaa kwente taxal ndobloy. 
\s1 Zha kuu ndob dits kabay naguz 
\p  
\v 11 Tsa mwiin lee lobee ndezhaal, ne mloo thib kabay naguz lon, ne lee zha kuu ndob dits kabay le Zha Nali ne Zha kuu ni kuu wli, tak nali naab zha kwent ne nali ngyo zha.  
\v 12 Lee ngutlo zha nla xni taxal loz bel, ne lee yek zha ndob tyen koron, ne nap zha thib le zha kuu beeta lee zha nlebee.  
\v 13 Ne nok zha thib lar kuu nayi ren, ne lee le zha nak xkiiz Diox.  
\v 14 Ne lee re soldad yibaa ndeke dits zha, ne nok xab re soldad kon lar kuu kwathoz wen, kuu naguz ne nambi na, ne ndob re soldad dits kabay naguz.  
\v 15 Ne lee roo zha ndroo thib espad kuu kwathoz nale, ne kon espada luux zha reta yez kuu nzi lo yezlyu. Ne nabee zhay kon thib bar yiib. Ne taxal ntii zha ub, naab zha kwent lo re men, kon yalnayii chaan Diox kuu kwathoz ney.  
\v 16 Ne lo xab zha ne cho kor zha nke le zha kuu nzhab: “Rey kuu nabee lo reta rey, ne Zha Nabee kuu nabee lo reta zha kuu nabee lo yezlyu”. 
\p  
\v 17 Ne mwiin thib mandad kuu ndeli dits wiz, ne dib gan zha nzhab zha lo re min kuu ndab lobee: 
\p ―¡De goo kaltaa goo lo rtsee naro chaan Diox,  
\v 18 tsa wu goo beel chaan re rey, beel chaan re zha kuu nabee lo re soldad, beel chaan re zha kuu ney leettsoo, beel chaan re kabay, beel re zha kuu mndob dits kabay, beel reta zha kuu ngogt mos ne re zha kuu ngok mos, re zha nataak ne re zha nataagt! 
\p  
\v 19 Tsa mwiin maa kuu kwathoz nathoz na ne re rey yezlyu kon re soldad re rey, reta rey mkaltaa, par tsow zhoo lo zha kuu ndob dits kabaya ne kon re soldad zhaʼa.  
\v 20 Ne lee zha kuu ndob dits kabay naguza, mniit maa kuu kwathoz nathoz na ne zha kuu wlit nak profet, kuu mtsow kwathoz re kuu thoz kon yalney chaan maa kuu kwathoz nathoz na. Ne kon re kuu thoza mkedi zha kwaro men, kuu mke sey chaan maa kuu kwathoz nathoz na, ne re zha kuu mbil lo imaj chaan maaʼa. Tsa lee maa kuu kwathoz nathoz na ne zha kuu wlit nak profet, naban zha mlobi zha zha lo bel kuu nzheek kon azufre.  
\v 21 Ne lee tedib net zha nguth kon spad, kuu ndroo roo zha kuu ndob dits kabay naguza, ne lee re min kuu nzhow beel mze leettsoo maa ndow maa beel re mena. 
\c 20  
\s1 Thib mil liin 
\p  
\v 1 Tsaraa mwiin lee thib mandad chaan Diox ndyaadla lobee, nden yab chaan yeerdoo ne nden thib kaden naro.  
\v 2 Lee mandada mniit mbeldoo, kuu nak mbeel gox, Mahotsa ne Maxuuy, ne mliib zhay kon kaden thib mil liin.  
\v 3 Ne mlobi zhay leen yeerdoo, ne mtob zha sey roo pwert yeerdoo, tsa kedit raay re yez kuu nzi dib lo yezlyu, asta yelo rid thib mil liin. Ne leettsa yelo rid thib mil liin, tsaraa laay tedib welt, per laatte naroob. 
\p  
\v 4 Ne mwiin ta nyetob re zha kuu nabee, ne tya mndob re zha kuu mkayaa yalnabee par naab zha kwent lo re men. Noga mwiin re zha kuu mga zha yek, tak mndaa zha kwent xkiiz Jesús ne xkiiz Diox. Ne lee re zhaʼa mbilt zha lo maa kuu kwathoz nathoz na ne neeka lo imaj chaan maaʼa, neeka mzhyalt zha gake sey maaʼa yeklo zha o yaa zha. Mwiin lee re zhaʼa mre mban ne mnabee zha kon Jesucrist thib mil liin.  
\v 5 Per lee tedib net re zha kuu nguth, mbant raa zha, asta leettsa mzaal thib mil liin. Koree nak yalroban kuu ner.  
\v 6 ¡Wen nda re zha kuu roban lo yalroban kuu ner! Lee tedib yalguth kenot raa yalnabee lo re zhaʼa, sinke lee re zhaʼa gak ngwleyy chaan Diox ne ngwleyy Jesucrist, ne nabee re zha kon Jesucrist thib mil liin. 
\p  
\v 7 Ne leettsa yelo rid thib mil liin, lee Maxuuy roo tsib,  
\v 8 ne roo Maxuuy, tsa kedi Maxuuy re men kuu nzo dib naxta lo yezlyu. Roo Maxuuy, tsa kedi Maxuuy Gog ne Magog, tsa kaltaa Maxuuy re soldad rop yeza par ya zha lo zhoo, ne kwathoz tyen zha, taxal gux kuu nzi roo nitdoo.  
\v 9 Ne mkendab re zha dita lo yezlyu, ne mtow zha re ladta yez nayon chaan Diox, kuu kwathoz nke leettsoo Diox. Per lee Diox mtsow mroo bel lobee kuu mteyy reta zhaʼa thitanax.  
\v 10 Ne mlobi zha Mahotsa kuu mkedi reta zhaʼa, leen yaal taa nzheek azufre, leeka ta mlobi zha maa kuu kwathoz nathoz na ne zha kuu wlit nak profet. Tya rid re zha yalti tse ne yaal thitanax. 
\s1 Diox naab kwent lo reta men 
\p  
\v 11 Tsa mwiin thib ta naguz na, ta ndob Diox nabee Diox. Ne lee lobee ne yezlyu mzhonn lo Diox, ne mnithloy.  
\v 12 Ne mwiin reta zha nguth, zha nataak ne zha nataagt ndeli lo Diox; ne lee lo re libr mzhaal. Ne noga mzhaal lo tedib libr, kuu nak libr kuu nak chaan yalnaban. Ne mnaab zha kwent lo reta men nguth, por re kuu mtsow zha kuu nke lo re libra.  
\v 13 Tsa lee nitdoo mndaa re zha kuu nguth leen nitdoo, ne lee yalguth ne Hades ta nzo re nguth, mndaa reta zha kuu nzo tya; ne lo reta men mnaab zha kwent taxal kuu mtsow zha.  
\v 14 Tsaraa mlobi zha yalguth ne Hades leen yaal bel. Kona gak yalguth kuu mrop,  
\v 15 ne leeka tya mlobi zha re zha kuu nket le lo libr kuu nak chaan yalnaban. 
\c 21  
\s1 Yibaa kub ne yezlyu kub 
\p  
\v 1 Tsaraa mwiin thib yibaa kub ne thib yezlyu kub, tak lee yibaa ne yezlyu kuu ner mnith ne noga nitdoo mnithlo.  
\v 2 Ne lee na Juan, mwiin yez nayon kuu naro, kuu nak Jerusalén kub, kuu ndyaadla lobee mroo lo Diox. Kuu chul na taxal thib nzaa yeen kuu nok xab par tseya.  
\v 3 Ne mbin na thib bos kuu nex kuu mroo ta ndob Diox ne nzhab: 
\p ―Tree nak ta nzo Diox kon re men. Yo Diox kon re men, ne re men gak yez chaan Diox, ne leeka Diox gak Diox re men.  
\v 4 Lee Diox tsow gonnt raa re zha, ne yot raa yalguth, neeka kotset raa zha, neeka yot raa nabil, neeka yalne, tak reta kuu ngoo ner mriida. 
\p  
\v 5 Tsa ndob Diox ta nabee Diox, ne nzhab Diox: 
\p ―Lee na ntsow kubʼn reta kwaa. 
\p Noga ne Diox: 
\p ―Bkee reta diiz ree, tak retay wlipaa naka ne ndoblo yelaaz re mene. 
\p  
\v 6 Tsaraa ne Diox lon: 
\p ―Retay ngwaloʼa ngok. Na nak zha ner ne zha bluz, na nak taxal letr kuu ner ne kuu bluz. Loka cho nzheek leettsoo, tbaata tan nit kuu nak chaan yalnaban gu zha.  
\v 7 Ne loka zha kuu tsow gan lo re kuu went, kayaa re koree, na gak Diox zha ne lee zha gak zhiinn na.  
\v 8 Per lee re zha kuu neyt leettsoo, re zha kuu nyelaazt Diox, re zha kuu nzo zhyan leettsoo, re zha kuu nzhuth men, re zha kuu nzhak rop kon tyen zha, re zha kuu nak wez, re zha kuu nyelaaz re diox kuu nagt Diox, ne re zha kuu nkedi. Reta zhaʼa ndya leen yaal bel kuu nzheek kon azufre, ne koree nak yalguth mrop. 
\s1 Jerusalén kub 
\p  
\v 9 Tsa myaad thib re gaz mandad, kuu nden thib re gaz kop kuu tseta nzo re gaz yalti kuu rid bluz, ne ne mandad lon: 
\p ―De nzhee, tsa lon nzaa yeen kuu tseya loʼa, kuu nak tsaal Mbak zhiil Diox. 
\p  
\v 10 Ne lee Mbi Nayon mndenon, asta yek thib yii kuu kwathoz naro, ne mlooy yez nayon kuu naro lon, kuu nak Jerusalén kuu mroo lo Diox ndyaadla lobee.  
\v 11 Ne kon xni Diox nteni Diox yez naroʼa, ne nzhuyy nay taxal thib ke kuu kwathoz chul na, taxal thib ke kuu le jaspe, kuu nke xni taxal bidr.  
\v 12 Ne re ladta yeza nke bla kuu nabii ne ya ndab, ne nape tsiibchop pwert, ne thibga mandad ndo roo kadta pwert; ne lee yek kadta pwert nke le thibga re tsiibchop raz zha Israel.  
\v 13 Tson pwert ndob lad ta ntsetab wiz, tetsone lad ta mbix wiz, tetsone lad norte ne tetsone lad sur.  
\v 14 Ne lee bla kuu nke re ladta yez, nap tsiibchop ke simyent, ne dits kadta thib ke nke, thibga le re tsiibchop apóstl chaan Mbak zhiil Diox. 
\p  
\v 15 Ne lee mandad kuu mni lon nden thib bar or, par chiix mandad yeza, re pwert ne bla chaan yeza.  
\v 16 Ne kwadrad nak yez, yewal nole ne nazhene. Tsa lee mandad mchiix yez kon bara, ne teeka chop mil kon chop gayoo kilometro nole, ne tataga ya ndabe ne nazhene.  
\v 17 Tsaraa mchiix mandad bla, ne thib gayoo chop galbthap tsidth yaa mbyi nay ne medida mlortsin mandad. 
\p  
\v 18 Lee bla natexkwaa kon ke kuu le jaspe, ne lee yez natexkwaa kon or, kuu na taxal bidr kuu nambi.  
\v 19 Lee simyent bla natexkwaa kon relota ke kuu kwathoz nataak ne kuu chuldoo na: 
\q1 lee ke ner chaan simyent nak ke jaspe, 
\q1 lee ke chop le safiro, 
\q1 lee ke tson le ágata, 
\q1 lee ke thap le esmeralda, 
\q1  
\v 20 lee ke gaay le ónice, 
\q1 lee ke xoop le kornalina, 
\q1 lee ke gaz le krisólito, 
\q1 lee ke xon le berilo, 
\q1 lee ke yee le topasio, 
\q1 lee ke tsii le krisopraso, 
\q1 lee ke tsiibthib le jacinto, 
\q1 lee ke tsiibchop le amatista. 
\m  
\v 21 Ne lee re tsiibchop pwert natexkwaa kon tsiibchop ke, kadta thib pwert natexkwaa kon thib thib ke kuu le perla. Ne lee kay yez natexkwaa kon or, taxal bidr kuu nderid xni. 
\p  
\v 22 Mwiitʼn neeka thib gwodoo leen yez, tak lee Diox kuu nak Zha Nabee kuu kwathoz ney ne Mbak zhiil nak gwodoo tya.  
\v 23 Lee yeza ndechet raay xni wiz, neeka xni mbee kuu teniy, tak lee xni chaan Diox nteniy, ne Mbak zhiil nak xni chaane.  
\v 24 Ne lee re men kuu mlaa tiy lo xni yeza, ne lee re zha kuu nak rey yaadno re chaan kuu nataak lo yeza.  
\v 25 Lee re pwert yeza yowte tse, tak tya yot yaal.  
\v 26 Ne lee yeza kayaa reta yalnaro ne yalnataak chaan re yez kuu nzi lo yezlyu.  
\v 27 Neeka thib kuu yu tabt tya, ne neeka thib re zha kuu ntsow kuu nakap, ne neeka thib zha kuu nkedi; beeta re zha kuu nke le lo libr kuu nak chaan yalnaban chaan Mbak zhiil tab tya. 
\c 22  
\s1 Yoo ne ya chaan yalnaban 
\p  
\v 1 Tsa lee mandad mloo thib yoo nambi lon kuu nzo nit kuu nak chaan yalnaban. Kuu nambi na taxal bidr, ne ta ndob Diox kon Mbak zhiil tya ndrooy.  
\v 2 Ne ndrol kay chaan yeza ndriid yoo, ne rop lad roo yoo, ndo thib ya kuu ndaa yalnaban, kuu ndaa tsiibchop klas xle ne kad mbee ndaay thibga klas xle. Ne lee la ya nlortsin par gwe reta zha kuu kwin tya.  
\v 3 Yot raa yalde tya. Ne lee ta ndob Diox nabee Diox kon Mbak zhiil tob leen yeza, ne reta zha kuu ntsow rtsin Diox gol lo Diox tya.  
\v 4 Ne tya wii re zha lo Diox ne ke le Diox yeklo re zha.  
\v 5 Yot raa yaal tya; ne reta zha kuu yo tya, ya nandechet raa zha xni kandil, neeka xni wiz; tak lee Diox kuu nak Zha Nabee teni lo re zha, ne lee re zha nabee thitanax. 
\s1 Ndetsin gaxa lee Jesucrist yaad 
\p  
\v 6 Ne lee mandad ne lon: 
\p ―Reta diiz ree wliy ne ndoblo yelaaz re mene. Ne Diox kuu nak Zha Nabee, kuu mtaal Mbi Nayon mteni re profet, lee Diox mtaal mandad loo lo re mos Diox re kuu mera gak. 
\p  
\v 7 Jesús ne: 
\p ―¡Mera yalʼn! ¡Wen nda re zha kuu nzhon diiz, re diiz kuu nke lo libr ree! 
\p  
\v 8 Na Juan, mbin na ne mwiin re koree, ne mtobxubʼn xann nii mandad kuu mloo re koree lon, par golʼn lo mandad.  
\v 9 Per lee mandad ne lon: 
\p ―Tsowta kobaa. ¡Lo Diox btobxub! Tak lee na nakʼn mos Diox taxal lu ne taxal re wetsa, re zha kuu ngok profet ne reta zha kuu nzhon diiz lo re diiz kuu nke lo libr ree. 
\p  
\v 10 Noga ne mandad lon: 
\p ―Kaatsta re diiz kuu nke lo libr ree, tak ndetsin gaxa wiz kuu lee reta koree gak.  
\v 11 Loka zha kuu ntsow kuu went, tatsowka zha kuu went, ne lee re zha kuu ntsow kuu nambit, tsowka zha kuu nambit; ne lee re zha kuu ntsow kuu wen, tatsowka zha kuu wen, ne lee re zha kuu nali nak ne nzhon diiz lo Diox, ndoblo gonka zha diiz lo Diox. 
\p  
\v 12 Lee Jesús ne: 
\p ―¡Mera yalʼn! Ne tan lo re zha taxalta kuu mtsow zha gan, taxalta kuu ndoblo zha por re kuu mtsow zha.  
\v 13 Na nak taxal letr kuu ner ne letr bluz, na nak kuu ner ne na nak kuu bluz, na nak kuu mndelo ne na nak kuu luux. 
\p  
\v 14 ’Wen nda re zha kuu nteech xab, tsa ndoblo zha tab zha wu zha xle chaan ya yalnaban, ne par tak tab zha roo pwert yeza.  
\v 15 Per lee re zha kuu nak taxal mbak yaan lee; re zha kuu nak wez, re zha kuu nzhak rop kon ndota zha, re zha kuu nzhuth men, re zha kuu nyelaaz re diox kuu nagt Diox, ne reta zha kuu nyow leettsoo kedi. 
\p  
\v 16 ’Na Jesús mtaalʼn mandad da, par mndaa kwent re koree lo re zha da. Na nak kuu mndelo raz chaan David, ne na nak mbel gwiiy kuu nziib zhaaraa na. 
\p  
\v 17 Ne lee Mbi Nayon ne tsaal Mbak zhiil Diox mbez: 
\p ―De. 
\p Ne loka cho gone ndoblo gab: 
\p ―De. 
\p Ne loka cho nzheek leettsoo ne nlaaz yaad gu nit, na gap lo zha: 
\p ―De, guʼa nit kuu nak chaan yalnaban tbaata. 
\p  
\v 18 Na ni lo reta zha kuu nzhon re diiz kuu nke lo libr ree, kuu ndaa kwent re kuu gak: Os lee thib zha ntsin leettsoo ne kyaal zha thib re diiz kuu nke lo libr ree, leeka tata lee Diox taal re yalti kuu nke lo libr ree lo zhaʼa.  
\v 19 Ne os lee thib zha kib thib re kuu nke lo libr ree, kuu ndaa kwent re kuu gak, lee Diox kib kuu ndoblo zha kayaa zha lo ya kuu nak chaan yalnaban, ne taat Diox diiz tab zha yez kuu nteth libr ree. 
\p  
\v 20 Lee zha kuu mndaa kwent re koree, ne: 
\p ―¡Mer thoza yalʼn! 
\p ¡Tbaa gake! ¡De Jesús, Zha Nabee! 
\p  
\v 21 Nlazʼn lee Jesús Zha Nabee loʼaa taa yalwen chaan lo re goo. 
\p ¡Tbaa gake! 
\pmr Juan