\id PHP  
\h Filipenses 
\toc1 Yeets kuu mkee Paba lo re zha yez Filipo 
\toc2 Filipenses 
\toc3 Fil. 
\mt1 Yeets kuu mkee Paba lo re zha yez 
\mt1 Filipo 
\c 1  
\s1 Paba mni “diox” lo re zha yez Filipo 
\p  
\v 1 Na Paba, rop nee Tim, nee nak mos Jesucrist, ne ngekeen yeets ree lo re goo zha kuu nyelaaz Jesús kuu nzo yez Filipo; ne lo re zha gol kuu nabee lo re zha Jesús; ne lo re zha kuu ntsow ayud re zha Jesucrist.  
\v 2 Nlazʼn lee Diox kuu nak Xutaa ne Xut Jesucrist, Zha Nabee loʼaa, taa re kuu wen lo goo ne tsow wen kwin goo. 
\s1 Paba mnaab lo Diox por re zha kuu nyelaaz Jesús 
\p  
\v 3 Kadta leettsa ntelaazʼn goo ndan texkix lo Diox por goo.  
\v 4 Ne leettsa naabʼn lo Diox, naley nzo leettsoon naabʼn lo Diox por goo;  
\v 5 tak thibka nke goo tsiin lo Diiz Chul chaan Jesucrist, desde wiz kuu ngwalaaz goo Jesucrist ne asta naltseree.  
\v 6 Ne wen nen lee Diox mndelo mtsow kuu wen lo goo ne tetsowka Diozhe, asta wiz kuu lee Jesucrist yaad tedib welt.  
\v 7 Ne wen tabaa ntsowʼn xgab, tak kwathoz nke leettsoon goo, tak lo retalee mloo Diox yalnkelaaz chaan Diox. Lee Diox mtaalʼn tsa tsowʼn rtsin Diox, kona tegal nzon tsib per thibka ndo re goo kon na, ne leettsa ndon lo re zha kuu nak tsiin ndan kwent Diiz Chul chaan Jesucrist lo re zha, tataka ndo re goo kon na.  
\v 8 Ne Diox ne naa xa kwathoz nke leettsoon goo taxal nke leettsoo Jesucrist goo,  
\v 9 ne naabʼn lo Diox, tsa masraa ke leettsoo altaa goo goo ne keno goo yalnzhaak tsa yen goo re kwaa.  
\v 10 Tsa ne goo naa xomod kwii goo kuu wen. Tsa nali ne nambi ban goo asta wiz kuu bretab Jesucrist.  
\v 11 Ne lee Jesucrist tsow gak goo zha nali lo Diox. Tsa reta men tsow nataak Diox ne gol lo Diox. 
\s1 Nabanaa par tsowaa rtsin Jesucrist 
\p  
\v 12 Re goo wetsʼn ne btan na, nlazʼn ne goo lee re yalti kuu mriidʼn, leey mtsow tsa masraa men mkayaa Diiz Chul chaan Jesucrist.  
\v 13 Ne asta reta soldad zha yuulow, ne reta zha kuu nzi nzhee, ne leen nzo tsib, tak ndan kwent Diiz Chul chaan Jesucrist.  
\v 14 Ne leettsa ne re wets leen nzoo tsib, tyen re wets ngoo ney leettsoo, ne mzebt mndaa zha kwent Diiz Chul chaan Jesucrist, sinke kon dib ndroo leettsoo zha mndaa zha kwente lo re men. 
\p  
\v 15 Wli nzo zha kuu ndaa kwent Diiz Chul chaan Jesucrist, tak nayii zha ne zha na, ne nzo zha ndaa kwente, tak nlaaz zha masraa gak nataak zha nake na, per nzo zha ndaa kwente kon dib ndroo leettsoo zha.  
\v 16 Ne lee re zha kuu nda kwente kon dib ndroo leettsoo, ntsow zhay, tak ne zha lee Diox mtaalʼn tan kwent Diiz Chul chaan Jesucrist lo re men,  
\v 17 per lee tedib net zha ndaa kwente, tak nlaaz zha masraa gak nataak zha nake na, ne tak nayii zha ne zha na, ne nlaaz zha masraa keki zha na nal kuu nzon tsib.  
\v 18 Per tegal kwan mbez zha na neeka lut ndat leettsoon, os lee zha ndroot leettsoo zha ndaa zha kwente o kon dib ndroo leettsoo zha ndaa zha kwente, kuu nataak nak ndaa zha kwent chaan Jesucrist ne kona ntsow naley nzo leettsoon. 
\p Ne masraa naley yo leettsoon,  
\v 19 tak nen tegoo zha na tsib, tak ngenaab gooy lo Diox ne lee Mbi Nayon chaan Jesucrist ntsow ayudʼn.  
\v 20 Tak kuu nlazʼn nak, nlaaztʼn thoyʼn lo neeka thib kwaa, sinke nlazʼn yoney leettsoon, tsa tan kwent chaan Jesucrist kon dib ndroo leettsoon, tsa tsow nataak re zha Jesucrist por kuu nin, tegal naban na o gathʼn.  
\v 21 Os leen naban na por Jesucrist naban na, ne os leen gathʼn mas wene, tak tsowʼn gan yalnaban kuu thitanax.  
\v 22 Ne os leen bee naban na lo yezlyu ree, tataka na kwent Diiz Chul chaan Jesucrist lo re men; kona netʼn pa kuu bin.  
\v 23 Par na kwathoz nagan bin thib kuu lo rop koree: Nlazʼn gathʼn, tak nlaza na ton lo Jesucrist yibaa, tak par na kona nak kuu mas wen.  
\v 24 Per ndoblo banka na lo yezlyu ree, tak ndeche goo na.  
\v 25 Ne wen nen taban raa na, tsa toka na lo re goo, tsa tsowʼn ayud goo, tsa masraa yen goo naa xomod nak re chaan Diox ne tsa masraa naley yo leettsoo goo, tak nyelaaz goo Jesucrist.  
\v 26 Ne leettsa yatwiin lo goo tedib welt, kwathoz naley yo leettsoo goo lo Jesucrist por na. 
\p  
\v 27 Thibka ndoblo ban goo, taxal nzhab Diiz Chul chaan Jesucrist. Tegal yatwiin lo goo o yatwiitʼn lo goo, per nlazʼn gon na lee re goo thibka nak goo, ne ney ndo goo nyelaaz goo Diox.  
\v 28 Ne ndoblot tseb goo ne goo re zha kuu nayii ne goo. Tak koree nak thib seny kuu nloo lee re zhaʼa lux, ne nlooy lee re goo keno goo yalnaban kuu taa Diox.  
\v 29 Tak por kuu mtsow Jesucrist mtelaa Diox reʼaa kona nagt anta yelaazaa Jesucrist, sinke noga ndoblo ridaa yalti, tak nyelaazaa Jesucrist.  
\v 30 Leeka re yalti kuu ngeriid goo nal, leeka yaltiʼa mriidʼn ndala ne leeka leey nzhon goo ngeriidʼn nal. 
\c 2  
\s1 Nadoo nak Jesucrist 
\p  
\v 1 Os lee Jesucrist ntsow naley nzo leettsoo goo ne ntetsey leettsoo goo, ne os nke leettsoo goo altaa goo, ne thibka nak goo tak nap goo Mbi Nayon, ne os wlipaa nlat leettsoo goo ne goo taben goo,  
\v 2 btsow goo tsa masraa naley yo leettsoon, thibka gok goo, nawiitxa bke leettsoo goo altaa goo, btsow goo pur kuu wen ne thibka kuu btsow goo xgab.  
\v 3 Neeka thib kuu tsowt goo kon byo o tak nlaaz goo rub goo, sinke leettsa tsow goo thib kwaa, btsow gooy kon dib ndroo leettsoo goo ne btsow goo xgab mas nataak tedib zha nake goo.  
\v 4 Neeka thib goo ndoblot ya leettsoo goo beeta por goo, sinke noga ndoblo ya leettsoo goo por taben goo.  
\v 5 Ndoblo tsowaa xgab taxal mtsow Jesucrist xgab. 
\q1  
\v 6 Ne tegal yewal nak Jesucrist kon Diox, 
\q1 per mleyt Jesucrist yewal Jesucrist kon Diox. 
\q1  
\v 7 Sinke mlaa zha reta chaan zha, 
\q1 mlaa zha yalnabee chaan zha, 
\q1 ne ngol zha taxal thib men ne ngok zha taxal thib mos. 
\q1  
\v 8 Ne leettsa ngulala zha, 
\q1 nadoo ngok zha ne mbin zha diiz lo Xut zha Diox, 
\q1 asta nguth zha, 
\q1 ne lo kruz nguth zha. 
\q1  
\v 9 Kona mtsow nataak Diox zha lo reta kwaa. 
\q1 Ne mndaa Diox thib le zha kuu kwathoz nataak nake reta le kuu nzo. 
\q1  
\v 10 Kona leettsa gon, 
\q1 re zha kuu nzo yibaa ne re zha kuu nzo lo yezlyu ree, ne re zha kuu nzi xann yezlyu le Jesús, 
\q1 reta zha tobxub lo Jesús. 
\q1  
\v 11 Ne reta zha gab lee Jesucrist nak Zha Nabee, 
\q1 ne gol zha lo Diox kuu nak Xut retalee. 
\s1 Re zha kuu nyelaaz Jesucrist nak taxal xni lo yezlyu ree 
\p  
\v 12 Kona nin lo re goo wetsʼn ne btan na, leeka taxal mbin goo diiz lon leettsa mndon lo re goo, leeka tata bin goo diiz lon nal kuu ndon tith. Neeka mas laat goo xnet Diox, sinke ndoblo zhiit goo ne tseb goo lo Zha Nabee.  
\v 13 Tak Diox ntsow ntsin re kuu wen leettsooʼaa ne leeka Diox ntsow ayudaa, tsa ntsowaa re kuu wen taxal nlaaz Diox. 
\p  
\v 14 Lo reta kuu tsowaa ndoblot yodizaa leettsa tsowaay, sinke ndoblo tsowaay kon dib ndroo leettsooʼaa,  
\v 15 tsa tsalt neeka thib kuu keki re menaa. Ndoblo nadoo ne nambi gakaa xid re men kuu nakap nak ne ndaa falt, tak zhiinn Diox nakaa ne nakaa taxal xni mbel kuu nzib lobee lo re men kuu nzi lo yalkow.  
\v 16 Kona thibka ndoblo taa goo kwent xkiiz Diox kuu ndaa yalnaban kuu thitanax, tsa leettsa yaad Jesucrist tedib welt, tak leyʼn goo ne leyʼn gapʼn, mzhonntʼn ne mkeetʼn tsiin legal.  
\v 17 Ne tegal tan na par gathʼn, tsa tak kaltaa goo gon goo lo Diox kuu nak nyelaaz goo Jesucrist, ndat leettsoon sinke naley nzo leettsoon ne lazʼn kon re goo.  
\v 18 Noga goo naley bloo goo leettsoo goo kon na. 
\s1 Paba mndaa kwent chaan Tim rop Epafrodito 
\p  
\v 19 Os lee Zha Nabee nlaaz, chatta taalʼn Tim lo re goo, tsa leettsa bretab Tim, wen yo leettsoon, or taa Tim kwent lon naa xa nzi goo.  
\v 20 Tak naptʼn neeka tedib zha kuu ntsow xgab goo taxal na, beeta Tim nak kuu ntsow xgab goo taxal na.  
\v 21 Tak reta zha ntsow zha xgab beeta par lee zha, ne ntsowt zha xgab kuu nak chaan Jesucrist.  
\v 22 Per neʼa goo naa xa nak Tim, mtsow Tim ayudʼn mndaa nee kwent chaan Diiz Chul, taxal thib mndyeen kuu ntsow ayud xut.  
\v 23 Kona taalʼn Tim lo goo, leettsa yelo nen naa xa nda kwent da.  
\v 24 Noga ntsowʼn xgab lee Zha Nabee tsow ayudʼn, tsa tsant raa na yalʼn lo goo. 
\p  
\v 25 Per ndakʼn ndoblo taalʼn wets Epafrodito lo goo, zha kuu mxek mtsow ayudʼn mke rop nee rtsin Zha Nabee, zha kuu mtaal goo lon mtsow ayudʼn lo re kuu ndechen,  
\v 26 tak kwathoz nlaaz zha wii zha goo, ne nabil ngoo leettsoo zha, tak mbin goo lee zha mlen liz.  
\v 27 Wli mzhak ne zha ne mer gagath zha; per mlat leettsoo Diox mne Diox zha, ne nagt beeta lee zha mlat leettsoo Diox mne Diox, sinke noga mlat leettsoo Diox mne Dioxʼn, tak os lee zha agath zha lo yiza, masraa nabil gagoo leettsoon tsya.  
\v 28 Kona taalʼn zha lo goo nal, tsa naley yo leettsoo goo or wii goo zha tedib welt, ne tsa noga na yot raa nabil leettsoon.  
\v 29 Ne naley bloo goo leettsoo goo or tsin zha lo goo, ne bkayaa goo zha taxal ndoblo kayaa goo wets goo kuu nyelaaz Zha Nabee, ne bin goo diiz lo re zha kuu nak taxal lee zha,  
\v 30 tak mer thoz gagath zha tak mtsow zha rtsin Jesucrist. Ne asta mer gagath zha tak mtsow zha tsiin lon, re kuu ngogt goo gatsow goo lon. 
\c 3  
\s1 Kuu nataak nak lebee men Jesucrist 
\p  
\v 1 Ne lee nal, kuu nin lo re goo wetsʼn ne btan na nak, naley bloo goo leettsoo goo tak zha Jesucrist nak goo. Ne nyechet leettsoon nkeen leeka re kuu mkeeʼa na lo goo ner, tak talortsine lo goo.  
\v 2 Bkenap goo goo lo re zha kuu nak taxal mbak kuu kwathoz nayii, re zha kuu ntsow kuu went, re zha kuu mbez ndoblo ke re men seny chaan re nee, zha Israel.  
\v 3 Ne reʼaa nak zha kuu wlipaa nke seny, tak napaa Mbi Nayon chaan Diox leen leettsooʼaa, ne nzhoolaa lo Diox ne kwathoz naley nzo leettsooʼaa, tak nakaa zha Jesucrist, ne nyelaaztaa seny chaan re zha Israel,  
\v 4 ne tegal ndoblon yelaazʼn re kona. Ne os nzo cho nyelaaz kona, ¡yent raa tedib zha ngwalaaze taxal na!  
\v 5 Xonka wiz nda ngolʼn leettsa mkee zha senyʼn; zha Israel nakʼn, zha raz chaan Benjamín, ne xgann zha Hebreo nakʼn. Ne ngokʼn fariseo, re zha kuu kwathoz ntsow kuu nzhab lo ley chaan Moisés.  
\v 6 Ne tak ngwalazʼn gatsowʼn kuu nzhab lo ley, kona mreken dits re zha kuu nyelaaz Jesucrist, ne neeka thib zha ngogt gakekin lo neeka thib kwaa, tak mtsowʼn reta kuu nzhab lo ley chaan Moisés.  
\v 7 Per reta kuu nataak lon ndala, lee nal thitanax nataagte lon, tak nyelazʼn Jesucrist.  
\v 8 Ne wlipaa reta kona nlortsint raay lon, tak kuu mas nataak nak nlebeen Jesucrist Zha Nabee lon. Ne tak nke leettsoon Jesucrist, kona mlan reta kuu nlortsint ne nataagt, tsa tsowʼn kuu nabee Jesucrist,  
\v 9 tsa gakʼn zha Jesucrist thitanax. Ne kayaat Dioxʼn taxal thib zha nali tak mbin na diiz lo ley chaan Moisés, sinke lee Diox kayaan taxal thib zha nali, tak nyelazʼn Jesucrist.  
\v 10 Kuu nlazʼn nak masraa lebeen Jesucrist, ne yen naa xa mteroban Diox Jesucrist. Ne lista ndon riidʼn yalti taxal mriid Jesucrist, ne asta lista ndon gathʼn taxal nguth Jesucrist,  
\v 11 tsa noga na roban xid re zha nguth. 
\s1 Zha yibaa nakaa 
\p  
\v 12 Ne nitʼn leen mtsowa na gan koree ne neeka nitʼn leen naka na zha nali, per thib ngon yekʼn gakʼn taxal nlaaz Jesucrist, tak lee Jesucrist mlin tsa gakʼn zha Jesucrist.  
\v 13 Re goo wetsʼn ne btan na, nitʼn leen mtsowa na gane; per kuu ntsowʼn nak nithlazʼn re kuu mtsowʼn ndala, ne thib ngon yekʼn tsowʼn gan kuu nzo par par delant.  
\v 14 Thib ngon yekʼn tsowʼn gan kuu ndoblon tsowʼn gan yibaa, kuu mrez Dioxʼn kayaan tak nyelazʼn Jesucrist.  
\v 15 Kona retalee kuu ney ndo nyelaaz Diox, lalka ndoblo tsowaa xgab; ne os lee goo ndak goo zhaa kuu ntsow goo xgab, Diox tsow ayud goo tsa yen goo kuu ntsow goo xgab.  
\v 16 Koree nak kuu ndoblo tsowaa. ¡Ndoblo banaa taxal mteedaa! 
\p  
\v 17 Reta goo wetsʼn ne btan na, thibka btsow goo taxal ntsowʼn, ne wii goo lo re zha kuu ntsow taxal mloo nee lo goo.  
\v 18 Ne kwathoz tyen welt nda nin lo goo, ne lee nal asta nzhonn na ni nay tedib welt: Kwathoz re zha kuu ntsowt kuu wen, nayii zha ne zha re zha kuu nyelaaz Jesucrist kuu nguth lo kruz.  
\v 19 Per kuu tsow re zhaʼa gan nak lux zha. Lee diox chaan re zhaʼa nak re kuu ndablaaz zha, ndoblo thoy zha re kuu ndrub zha, tak beeta re kuu yezlyu ree ntsow zha xgab.  
\v 20 Per leeʼaa zha yibaa nakaa, ne ngebetaa yaad Jesucrist lobee Zha Nabee loʼaa, zha kuu mtelaaʼaa lo yalguth.  
\v 21 Lee Jesucrist tsee kwerpaa kuu nlux ree, tsa gake taxal kwerp Jesucrist kuu nla xni. Ne koree tsow Jesucrist kon yalney kuu nabee Jesucrist lo reta kwaa. 
\c 4  
\s1 Thibka naley bloo goo leettsoo goo tak nyelaaz goo Zha Nabee 
\p  
\v 1 Reta goo wetsʼn ne btan na, kuu kwathoz nke leettsoon ne nlazʼn wiin, re goo ntsow naley nzo leettsoon, ne re goo nak kuu mtsowʼn gan, naabʼn lo goo thibka nali to goo lo Zha Nabee.  
\v 2 Naabʼn lo Evodia ne lo Síntique wen brin goo taxal nlaaz Zha Nabee.  
\v 3 Noga naabʼn loʼa, lu kuu kwathoz mtsow ayudʼn mke ropaa rtsin Diox, btsow ayud rop ngot baa, tsa wen kwin rop zha, tak rop zha ne noga Ment mtsow ayudʼn, leettsa mndan kwent Diiz Chul, ne noga tedib net re zha mke tsiin kon na. Ne lee le re zhaʼa nkeʼa lo libr kuu nak chaan yalnaban kuu thitanax.  
\v 4 Naley bloo goo leettsoo goo, thibka gwalaaz goo Zha Nabee, ne bren nin: ¡Naley bloo goo leettsoo goo!  
\v 5 Noga wen btsow goo, tsa lee reta men ne lee goo wen nak goo, tak lee Zha Nabee gaxa ndo yaad.  
\v 6 Per yat leettsoo goo por neeka thib kwaa, sinke ndoblo gab goo re kuu lo Diox, ne ndoblo naab goo re kuu ndeche goo lo Diox, ne btaa goo texkix lo Diox por reta kwaa.  
\v 7 Tsa lee Diox tsow wen kwin goo, koree nak thib kuu kwathoz nagan yen men. Ne lee yalwen chaan Diox kenap leettsoo goo ne re xgab goo, tak zha Jesucrist nak goo. 
\s1 Btsow goo xgab beeta kuu wen 
\p  
\v 8 Kuu yelo nin lo re goo wetsʼn ne btan na nak, ndoblo tsowaa xgab: 
\q1 beeta re kuu wli, 
\q1 beeta re kuu gwataak, 
\q1 beeta re kuu nali, 
\q1 beeta re kuu nambi, 
\q1 beeta re kuu legal, 
\q1 beeta re kuu wen nyath, 
\q1 beeta re kuu wen thoz, 
\q1 ne beeta re kuu ndoblo taa men texkix lo Diox. 
\p  
\v 9 Btsow goo re kuu mloon lo goo, re kuu mkayaa goo lon, re kuu mbin goo mnin ne re kuu mwii goo mtsowʼn. Btsow gooy, tsa lee Diox kuu ntsow wen nziʼaa to kon reta goo. 
\s1 Gon kuu mndaa re zha yez Filipo lo Paba 
\p  
\v 10 Kwathoz naley nzo leettsoon, ne ndan texkix lo Zha Nabee, tak mtsow goo ayudʼn tedib welt, ne nen thibka ngwalaaz goo gatsow goo ayudʼn, per ngogt gatsow gooy.  
\v 11 Ne ngenitʼn koree tak ndechen kwaa; tak mteeda na naley nzo leettsoon kon kuu napʼn.  
\v 12 Myeya na yent kwan napʼn ne myeya na leettsa naroob kwaa napʼn. Neyʼn ndriidʼn reta kwaa, nyeyʼn tse leettsoon, nyeyʼn leettsa nlann na, nyeyʼn napʼn naroob kwaa ne nyeyʼn leettsa neeka thib kwaa naptʼn.  
\v 13 Reta kwaa tak tsowʼn, tak lee Jesucrist ndaa yalney lon.  
\v 14 Per wen mtsow goo, mtsow goo ayudʼn lo re yalti kuu mriidʼn.  
\v 15 Ne goo zha yez Filipo kuu nyelaaz Jesucrist, leettsa mndelon mndan kwent chaan Diiz Chul, leettsa mroon yezlyu Macedonia, neeka thib re zha kuu nyelaaz Jesús kuu nzo tedib net re yez mtsowt ayudʼn, sinke beeta re goo mtsow ayudʼn.  
\v 16 Ne leettsa mndon yez Tesalónica, masraa thib welt mtaal goo gon lon par re kuu ndechen.  
\v 17 Ne ntsowtʼn xgab beeta kayaan kuu ndaa goo lon, sinke nlazʼn kayaa goo re kuu wen lo Diox, taxal zha kuu nkayaa zhiinn temi, tak mtsow goo ayudʼn.  
\v 18 Mkayaaʼa na reta kuu mtaal goo lon lo Epafrodito, ne asta naroob kuu ndechen mkayaan. Leey nak taxal thib gon kuu chul ndetsi, taxal thib maa gon kuu ndaa zha lo Diox, kuu nkayaa Diox kon dib ndroo leettsoo Diox.  
\v 19 Ne lee Diox taa reta kuu ndeche goo lo goo. Lee Diox taa re kuu yibaa lo goo, tak lee Diox nap reta kwaa, ne tetaa Diox re kwaa lo goo tak nyelaaz goo Jesucrist.  
\v 20 Ne thibka ndoblo golaa lo Diox kuu nak Xutaa. ¡Tata gake! 
\s1 Paba mni “diox” bluz lo re zha 
\p  
\v 21 Bni goo “diox” kwent nee lo reta zha kuu nyelaaz Jesucrist kuu nzi baa. Ne noga re wetsaa kuu nzi kon na nzhee ni “diox” lo goo.  
\v 22 Reta zha kuu nak zha yez chaan Diox kuu nzi nzhee ne re zha kuu nke tsiin liz César, ni “diox” lo goo. 
\p  
\v 23 Nlazʼn lee Jesucrist, Zha Nabee loʼaa, loo yalnkelaaz chaan lo goo. 
\p ¡Tbaa gake! 
\pmr Paba