\id 2TI  
\h 2ª de Timoteo 
\toc1 Yeets mrop kuu mkee Paba lo Tim 
\toc2 2ª de Timoteo 
\toc3 2 Ti. 
\mt1 Yeets mrop kuu mkee Paba lo 
\mt1 Tim 
\c 1  
\s1 Paba mni “diox” lo Tim 
\p  
\v 1 Na Paba, nakʼn apóstl chaan Jesucrist tak tabaa nlaaz Diox, ndan kwent chaan Diiz Chul kuu ndaa yalnaban, kuu mne Diox taa Diox lo re zha kuu nyelaaz Jesucrist.  
\v 2 Tim ngekeen yeets ree loʼa, tak lu nak taxal xgann na, ne kwathoz nke leettsoon lu. Nlazʼn lee Diox kuu nak Xutaa ne Jesucrist Zha Nabee lo reʼaa, taa yalwen chaan loʼa, ne lat leettsoo ne lu, tsa wen bana ne wen yo leettsooʼa. 
\s1 Thibka ndoblo taaʼa kwent chaan Jesucrist 
\p  
\v 3 Tse ne yaal ndan texkix lo Diox kwent chaana ne naabʼn lo zha kenap zha lu. Ne kon dib ndroo leettsoon ne kon thib xgab nambi ntsowʼn rtsin zha, leeka taxal mtsow re teyʼn zha ndala.  
\v 4 Leettsa ntelazʼn xa mbinna ne nlazʼn wiin lu, tsa naley yo leettsoon.  
\v 5 Tak ntelazʼn xa nyelaaza Jesucrist kon dib ndroo leettsooʼa, leeka taxal ngwalaaz zhota Loida ne xnaaʼa Eunice. Ne wen nen leeka tata nyelaaza Jesucrist. 
\p  
\v 6 Kona ntenin lu, thibka bloo yeka tsowa re kuu nataak kuu mndelaaz Diox loʼa, leettsa mxoobʼn yaan yeka ne mnaabʼn lo Diox kwent chaana.  
\v 7 Tak mndaat Diox thib mbi chaan tseb loʼaa, sinke lee Diox mndaa Mbi Nayon kuu nkeno yalney ne yalnkelaaz loʼaa, tsa tak nabeeʼaa lo kwerpaa.  
\v 8 Kona ndoblot thoya taaʼa kwent chaan Zha Kuu Nabee loʼaa, ne neeka thoyta neʼa na tak nzon tsib, tak ndan kwent chaan zha. Bkez leettsooʼa rida yalti kuu ndyaad kwent chaan Diiz Chul chaan Zha Nabee, ne Diox taa yalney loʼa tsa xeka rida re yalti.  
\v 9 Tak Diox mtelaa reʼaa lo yalguth, ne mrez Diox reʼaa tsa kenoʼaa thib yalnaban nali lo Diox. Ne mtsowt Diozhe por re kuu wen kuu mtsowaa, sinke mtsow Diozhe tak tata ngwalaaz Diox, ne tak mke leettsoo Diox reʼaa, ne mtsowa Diox xgab koree desde ner leettsa terka texkwaa yezlyu, kona mtaal Diox Jesucrist nguth kwent chaanaa,  
\v 10 lee nal mloo zha yalnkelaaz chaan zha lo reʼaa, tak mtaal zha Jesucrist myaad lo yezlyu ree, ne mtuyy zha re faltaa. Ne kwathoz nambi nloo Diiz Chul chaan zha, naa xomod mluux zha yalnabee chaan yalguth, ne xomod mndaa zha yalnaban kuu thitanax lo reʼaa. 
\p  
\v 11 Ne Diox mlin tsa gakʼn apóstl chaan Jesucrist, ne mtaal zha na gakʼn maestr, par tan kwent chaan Diiz Chul lo re zha kuu nagt zha Israel.  
\v 12 Kona ngeriidʼn re yalti ree nal. Per nthoytʼn, tak nen naa cho nyelazʼn, ne wen nen lee zha nap yalney par kenap zha na, tsa tsowʼn re kuu mndaa zha tsowʼn, asta wiz kuu bretab zha. 
\p  
\v 13 Thibka bteke dits kuu wli taxal mloon loʼa; thibka gwalaaz Jesucrist, ne thibka bkeno yalnkelaaz kuu napaa, tak nyelaazaa Jesucrist.  
\v 14 Ne Mbi Nayon kuu nzo leen leettsooʼaa tsow ayuda, tsa tak kenapa kuu mteeda lo Diox. 
\p  
\v 15 Ne neʼa lu lee reta zha kuu nzo yezlyu Asia mlaa zha na, ne xid re zhaʼa nzo Figelo ne Hermógenos.  
\v 16 Nlazʼn lat leettsoo Zha Nabee ne re lizta Onesíforo, tak tegal nzon tsib mthoyt zha mne zha na. Sinke kwathoz tyen welt myaad zha mtetsey zha leettsoon.  
\v 17 Ne leettsa myaad zha yez Roma, kwathoz mndiy zha mkwaan zha na, asta mzalʼn lo zha.  
\v 18 Ne wen neʼa naa xa mtsow zha ayudaa leettsa ngooʼaa yez Éfeso. Kona naabʼn lo Diox lat leettsoo Diox ne Diox Onesíforo, wiz kuu bretab Jesucrist tedib welt. 
\c 2  
\s1 Thib soldad kuu nali ndo nyelaaz Jesucrist 
\p  
\v 1 Xgann na Tim, thib ney bto lo yalwen kuu mndaa Jesucrist loʼaa.  
\v 2 Re kuu mbina mndan kwent lo kwathoz men, bnabee koree lo re zha kuu neʼa tetsowe, tsa loo zhay lo tedib net zha. 
\p  
\v 3 Noga bxek rida yalti taxal thib soldad wen chaan Jesucrist.  
\v 4 Tak neeka thib soldad gagt tsow tedib tsiin, tak ndoblo zha tsow zha re kuu nabee zha kuu nabee lo zha.  
\v 5 Leeka tata, lee re zha kuu ngith gagt tsow zha gan koron, os lee zha kitht zha taxal ndoblo kith zha.  
\v 6 Ne noga re zha kuu nzhann, ndoblo zha ner zha kayaa xle chaan yalgonn zha.  
\v 7 Blobee re kuu nin loʼa, ne lee Zha Nabee tsow ayuda tsa yena retay. 
\p  
\v 8 Btelaaz lee Jesucrist mroban lo yalguth, ne zha raz rey David nak zha. Koree nak Diiz Chul kuu ndan kwent.  
\v 9 Ne kwent chaan Diiz Chul ree kwathoz ngeriidʼn yalti, ne nzon tsib taxal thib zha kuu mbeth men; per lee xkiiz Diox nzot tsib.  
\v 10 Kona nxekʼn ndriidʼn yalti, tsa lee re zha kuu mli Diox, tak tsow zha gan yalnaban kuu ndaa Jesucrist, ne ndya zha yibaa thitanax ta kwathoz chul nla xni. 
\p  
\v 11 Kuu wlipaa nak koree: 
\q1 Os leeʼaa nguthaa kon Jesucrist, noga tabanaa kon lee zha; 
\q1  
\v 12 os leeʼaa xekaa ridaa yalti kwent chaan zha, 
\q1 noga lee nabeeʼaa kon lee zha yibaa. 
\q1 Os leeʼaa gabaa nlebeetaa zha, 
\q1 noga zha gab zha nlebeet zha lee. 
\q1  
\v 13 Os leeʼaa nagtaa zha nali lo zha, per lee zha thibka nali nak zha, 
\q1 tak gagt kedi Diox leeka lee Diox. 
\s1 Xomod ndoblo gak thib zha kuu wen nke tsiin lo Diox 
\p  
\v 14 Thibka btelaaz koree lo re zha, kon yalnabee chaan Zha Nabee, tsa yodizt zha, kon kuu ntsowt ayud neeka thib zha, beeta ntsowe nlux re zha kuu nzhone.  
\v 15 Thibka bke tsiin asta plo take loʼa, ne nali bto lo Diox; tsa wen tsowa rtsin zha, ne yent kwan ndoblo thoya. Nali taa kwent diiz wli chaan Zha Nabee.  
\v 16 Kenzata re kwent yezlyu ree re kuu wlit, kuu tsowt ayuda. Tak lee re diza, beeta ntsowe masraa ntsow zha kuu went kuu nlortsint.  
\v 17 Ne lee re kuu wlit kuu nloo zha nzhonn taxal yiz kangren. Ne koree mtsow Himeneo ne Fileto.  
\v 18 Lee rop zha ree mlaa kuu wli, ne mbez zha lee yalroban mriida, ne tabaa mod nluux zha chop tson re zha kuu nyelaaz Jesucrist ne ntsow zha nzhak chop xgab zha.  
\v 19 Per lee Diox mtob thib simyent kuu ney ndob thitanax, kuu ndob thib seny kuu nzhab: “Lee Zha Nabee nlebee zha re zha zha”. [Num. 16:5] Ne noga nzhabe: “Reta zha kuu nyelaaz Zha Nabee, ndoblo laa zha re kuu went”. 
\p  
\v 20 Leen thib yuu naro, nagt beeta kuu or ne kuu plat nzo leene, noga nzo re kuu natexkwaa kon ya ne noga re kuu natexkwaa kon ben. Lee re kuu kwathoz wen nlortsin zhay leettsa nyoo thib ani, lee tedib nete nlortsin zha gandata wiz.  
\v 21 Os leeʼaa nambi ndoʼa lo Diox, lee Zha Nabee tsow reʼaa taxal thib kuu or kuu nzo liz zha, tsa lista ndoʼaa lortsinaa par reta kuu wen. 
\p  
\v 22 Beche lo re kuu went kuu nlaaz re zha mndyeen, nali ban ne thibka gwalaaz Jesucrist, bke leettsooʼa re men ne wen brin kon reta men; thibka tata ndoblo tsowa, kon reta zha kuu nali kuu nzhool lo Zha Nabee kon dib ndroo leettsoo.  
\v 23 Per kenzata re kwent naxen chaan re men nad, re men kuu nlaaz yodiz por thib kuu nlortsint, kuu beeta ntsow ngyodiz re men.  
\v 24 Tak thib zha kuu nak mos chaan Zha Nabee ndoblot zha yo zha lo zhoo, sinke ndoblo wen gak zha lo reta men, ne ndoblo gak zha thib zha wen loo lo re men, noga ndoblo xek leettsoo zha lo re men.  
\v 25 Ne kon yalnadoo teteeda zha re zha kuu nayii ne kuu wli, tsa neeka cha tsee Diox xgab re zhaʼa, tsa lebee zha kuu wli,  
\v 26 ne roo mkaal lo zha ne laa zha lo kwa ta nkeno Maxuuy zha taxal zha nzo tsib, par tsow zha kuu nlaaz Maxuuy. 
\c 3  
\s1 Xomod gak re men re wiz bluz 
\p  
\v 1 Noga ndoblo neʼa koree: Lee re wiz bluz kwathoz nagan gak,  
\v 2 tak tabaa gak re men: 
\q1 leeka lee zha rub zha zha, 
\q1 tablaaz zha temi, 
\q1 rub zha, 
\q1 naro gak zha, 
\q1 kode zha Diox, 
\q1 gont zha diiz lo xut zha ne lo xnaa zha, 
\q1 taat zha texkix lo Diox, 
\q1 neeka tsow nataagt zha Diox. 
\m  
\v 3 Ket leettsoo zha taben zha, 
\q1 latta leettsoo zha ne zha taben zha, 
\q1 looz zha taben zha, 
\q1 ne tsowka zha re kuu nlaaz kwerp zha, 
\q1 kwathoz nakap gak zha, 
\q1 ne yii zha ne zha reta kuu wen, 
\q1  
\v 4 kedi zha re zha kuu nzaal leettsoo zha, 
\q1 tsebt zha tsow zha kuu went, 
\q1 legal ndrub zha, 
\q1 ne kwaan zha re kuu nlaaz zha kuu nak kuu yezlyu ree, 
\q1 per kwaant zha Diox. 
\q1  
\v 5 Ne tsow zha taxal zha kuu nali naban lo kuu wli, 
\q1 kuu nak ban men taxal nlaaz Diox, 
\q1 per kon re kuu ntsow zha nloo nyelaazt zha Diox. 
\m Beche lo re zhaʼa. 
\p  
\v 6 Tak xid re zhaʼa nzo re zha kuu ndiy thib yuu tedib yuu, ne nkedi zha re ngot kuu nagant kedi zha, re ngot kuu kwathoz ndaa falt, ne thibka ntsow zha xgab tsow re kuu went.  
\v 7 Re ngota ntsow taxal zha kuu ngeteed, per gagt yen zha kuu wli.  
\v 8 Ne leeka taxal ngok bi Janes rop Jambres lo Moisés, leeka tata nzhak bi re zhaʼa lo kuu wli. Ne nak zha mbyi kuu went xgab, ne ngwatsaa xgab re zha, tak mlaa zha ngwalaazt raa zha Jesucrist.  
\v 9 Per tsint zha tith, tak reta men ne lee zha nak zha bxen, leeka taxal mzhaak rop zha kuu ngok bi lo Moisés. 
\s1 Kuu mnabee Paba lo Tim 
\p  
\v 10 Tim, per lee lu wen ndekeʼa dits re kuu mloon loʼa taxal naban na, taxal tsowʼn ne neʼa lu naa kwan nlazʼn tsowʼn. Noga neʼa lu naa xomod nyelazʼn Jesucrist, xomod nxek leettsoon nen re men, ne xomod nke leettsoon re men.  
\v 11 Noga neʼa lu xa mxekʼn mriidʼn yalti, leettsa mreke re men ditsʼn yez Antioquía, yez Iconio ne yez Listra, ne lo reta yalti kuu mriidʼn tya, lee Zha Nabee mtelaan.  
\v 12 Ne reta zha kuu nlaaz nali ban lo Jesucrist, teriid zha yalti tereke re men dits zha.  
\v 13 Per lee re zha kuu went nak, ne re zha kuu nkedi, masraa thibka ntsow zha kuu went ne nkedi zha re men ne lee re men nkediga zha. 
\p  
\v 14 Per lee lu, thibka nali bto lo re kuu mteeda, kuu wen neʼa naa xomod nak. Ne wen neʼa naa cho mlooy loʼa.  
\v 15 Ne desde lutta, neʼa lu naa kwan nak xkiiz Diox. Ne leey tak loo loʼa, ne tenoy lu lo yalnaban kuu thitanax, tak nyelaaza Jesucrist.  
\v 16 Reta diiz kuu nke lo xkeets Diox, yek Diox mbrooy ne nake taxal leeka lee Diox nzhabe lo re zha kuu mkeey, ne nlortsine: 
\q1 tsa nteteede re men, 
\q1 tsa nkox re men loy, 
\q1 tsa nteliy re men, 
\q1 tsa nteniy re men, 
\q1 tsa nlooy lo re men naa xomod nali ndoblo ban re men lo Diox. 
\m  
\v 17 Tsa lee re zha kuu nak zha Diox, thitanax gak zha, zha nali lo Diox, zha ngobee ne ndoblo wen ne zha naa xomod tsow zha, reta kuu wen kuu nlaaz Diox. 
\c 4  
\p  
\v 1 Lo Diox ne lo Jesucrist Zha Nabee, zha yaad taxal rey naab kwent lo re zha naban ne lo re zha nguth, naabʼn loʼa;  
\v 2 taa kwent xkiiz Diox, ne list bto taaʼa kwente, leettsa tak taaʼa kwente ne leettsa gagt taaʼa kwente. Btsow tsa yen re zhay, ndoblo kox re zha loʼa, thibka bteni re zha, ne thibka bxek leettsooʼa ne bloo kuu wli lo re zha.  
\v 3 Tak tetsin wiz, leettsa lee re men teyeche leettsoo gon Diiz Chul kuu wli, ne kwaan zha kwathoz maestr, kuu loo beeta re kuu nlaaz zha gon zha,  
\v 4 tsa laa zha yelaazt raa zha kuu wli, ne kenza zha re kwent gox yezlyu ree kuu nataagt.  
\v 5 Per lee lu thibka blobee lo reta kuu tsowa, bxek briid yalti, ne thibka btaa kwent chaan Diiz Chul, wen tsow tsiin kuu mndaa Diox tsowa. 
\p  
\v 6 Tak lee yalnaban da nak taxal thib gon lo Diox, tak mera tsin wiz gathʼn.  
\v 7 Ne kon dib ndroo leettsoon wen mbyon taxal ndobloy, mtsowʼn gan lo re kuu went, tak nyelazʼn Jesucrist, mtezhooba na karrer da, ne thibka nyelazʼn Jesucrist.  
\v 8 Lee nal ngebetʼn kayaan koron, kuu taa Zha Nabee lo re zha kuu mban nali lo zha, wiz kuu bretab zha yaad zha, leettsa nali naab zha kwent lo re men. Ne nagt beeta lon taa zha koron, sinke noga lo re zha kuu nke leettsoo Diox ne ngebet zha lee Jesucrist yaad. 
\s1 Kuu nzhab Paba lo Tim 
\p  
\v 9 Btsow tsa tak lijer yaada yaadtwiiʼa lon.  
\v 10 Tak mlaa Demas na, tak kwathoz nke leettsoo zha re kuu yezlyu ree, ne ndya zha yez Tesalónica. Lee Crescente ndya yezlyu Galacia, ne lee Tito ndya yezlyu Dalmacia.  
\v 11 Beeta Luk ndo lon nzhee. Bkwaan Mark tsa yaadnoʼa zha nzhee, tak lee zha tak tsow ayudʼn lo rtsin na.  
\v 12 Ne lee Tíquico mtaalʼn nda yez Éfeso.  
\v 13 Leettsa yaada nzhee nlazʼn yaadnoʼa kapot kuu mtan na yez Troas liz Carpo, ne noga yaadnoʼa re yeets, per mas telaaza yaadnoʼa re xkeetsʼn kuu mas nataak. 
\p  
\v 14 Tak lee Alejandr kuu nak rrer, kwathoz kuu went mtsow zha lon; ne lee Zha Nabee kix lo zha por kuu mtsow zha lon.  
\v 15 Noga kenapa lu lo zha, tak kwathoz nayii zha ne zha kuu nda reʼaa kwent. 
\p  
\v 16 Leettsa lee re zha kuu nak tsiin mnaab kwent lon welt ner, yent cho mtsow ayudʼn, reta zha mlaa zha na. Nlazʼn lee Diox tsowt kas re kuu went kuu mtsow zha lon.  
\v 17 Per lee Zha Nabee mtsow ayudʼn ne mloo ney leettsoon, ta mod ngok mndan kwent Diiz Chul chaan zha, tsa mbin reta zha kuu nagt zha Israel Diiz Chul. Ne tabaa mod mtelaa Zha Nabeen lo re zha kuu nayii taxal mbeez.  
\v 18 Ne leeka Zha Nabee telaan lo re kuu went, ne teno zha na yibaa ta nabee zha. ¡Beeta lo zha ndoblo gol reta men nal ne thitanax! ¡Tata gake! 
\s1 “Diox” bluz kuu mni Paba lo Tim 
\p  
\v 19 Bni “diox” kwent chaan da lo Prisca ne lo Aquila, ne lo re lizta Onesíforo.  
\v 20 Lee Erast myaan yez Corinto, ne lee Trófimo ne ndak mtan na yez Mileto.  
\v 21 Btsow tsa yaada, leettsa terka gak mbee kuu la yig. Ne lee re zha ree ni “diox” loʼa, Eubulo, Pudente, Lino, Claudia ne reta zha kuu nyelaaz Jesús. 
\p  
\v 22 Nlazʼn lee Jesucrist Zha Nabee to kon lu, ne taa re yalwen chaan lo re goo. 
\p ¡Tbaa gake! 
\pmr Paba