\id 1TI  
\h 1ª de Timoteo 
\toc1 Yeets ner kuu mkee Paba lo Tim 
\toc2 1ª de Timoteo 
\toc3 1 Ti. 
\mt1 Yeets ner kuu mkee Paba lo 
\mt1 Tim 
\c 1  
\s1 Paba mni “diox” lo Tim 
\p  
\v 1 Na Paba, nakʼn apóstl chaan Jesucrist, Diox kuu mtelaaʼaa mtaalʼn ne Jesucrist Zha Nabee loʼaa kuu ngebetaa.  
\v 2 Ngekeen yeets ree loʼa Tim. Tak wlipaa lu nak thib xgann na lo kwent chaan Zha Nabee. Nlazʼn lee Diox kuu nak Xutaa ne Jesucrist Zha Nabee loʼaa taa yalwen ne yalnkelaaz chaan loʼa, tsa wen yo leettsooʼa. 
\s1 Kenapa lu lo re zha kuu nloo tedib net leyy 
\p  
\v 3 Taxal mnaabʼn loʼa yaana yez Éfeso, leettsa ndoʼa na net par yan yezlyu Macedonia, par nabeeʼa lo chop tson zha kuu nloo tedib net leyy, tsa loot raa zhay,  
\v 4 neeka taat zha yek zha gon zha re kwent gox kuu mtsin yek re zha ndala. Tak re koree beeta ntsow ngyodiz zha ne ntsowte ayud zha yelaaz zha Jesucrist taxal mtaan Diox diiz tsow zha, koree nak kuu naabʼn loʼa nal. 
\p  
\v 5 Kuu nin nak: Ndoblo kelaaz men altaa men kon dib ndroo leettsoo men, kon thib xgab nali, tak nyelaaz men Jesucrist.  
\v 6 Nzo cho zha mlaa zha nyelaazt raa zha Jesucrist, ne ndeke zha dits tedib net re diiz kuu nlortsint.  
\v 7 Nlaaz zha gak zha maestr kuu loo ley chaan Diox, ne neeka nyent zha naa kwan nloo zha ne mbez zhay kon dib ndroo leettsoo zha. 
\p  
\v 8 Neʼaa lee ley wen nak, os lee zha nloo zhay taxal nake.  
\v 9 Ndoblo neʼaa koree, neeka thib ley nkekit re zha kuu ntsow kuu wen, sinke lee ley naab kwent: 
\q1 lo re zha kuu ne kuu nzhab lo ley, ne ntsowte, 
\q1 lo re zha kuu nzhont diize, 
\q1 lo re zha kuu nyelaazt Diox, 
\q1 lo re zha kuu ndaa falt, 
\q1 lo re zha kuu nataagt Diox lo, 
\q1 lo re zha kuu nzebt ne Diox, 
\q1 lo re zha kuu nzhuth xut ne xnaa, 
\q1 lo re zha kuu nzhuth men, 
\q1  
\v 10 lo re zha kuu nzhak rop kon ndota zha, 
\q1 lo re zha kuu nzhak rop kon tabyi, 
\q1 lo re zha kuu nlowann men par tho zha men, 
\q1 lo re zha kuu nkedi, 
\q1 lo re zha kuu ntselo kruz par nkedi, 
\q1 ne lo reta zha kuu ndaat yek gon kuu wli kuu nloo nee. 
\m  
\v 11 Re koree nloo Diiz Chul. Ne Diiz Chul ree nak kuu kwathoz nataak, ne texkix Diox mtaal Dioxʼn tan kwente. 
\s1 Paba thibka ndaa texkix lo Jesucrist 
\p  
\v 12 Thibka ndan texkix lo Jesucrist Zha Nabeeʼaa, tak lee zha mndaa yalney lon, tak ne zha nali nakʼn ne tetsow nay, kona mto zha na tsowʼn rtsin zha.  
\v 13 Mtsow Diox koree lon, tegal went re kuu mtsowʼn lo Diox ner, mreken dits re zha Diox ne mtsalzhoon zha. Per mlat leettsoo Diox mne Diox na, tak ter yelazʼn Diox tsya ne neeka netʼn naa kwan mtsowʼn.  
\v 14 Per lee Zha Nabee lo reʼaa kwathoz mndaa yalwen chaan lon, ne ngwalazʼn zha, tsa mlebeen yalnkelaaz chaan zha.  
\v 15 Kwathoz wli koree ne reta men ndoblo yelaaze: Lee Jesucrist myaad lo yezlyu ree, tsa telaa zha re zha ndaa falt. Ne na nak thib zha kuu masraa mndaa falt nake re men.  
\v 16 Per mlat leettsoo Diox mne Dioxʼn ne mloo Diox naa xa mkez leettsoo Diox mne Dioxʼn, kona tataga lon lo re zha kuu yelaaz Jesucrist, re zha kuu tsow gan yalnaban kuu thitanax.  
\v 17 Kona retalee ndoblo golaa lo Diox ne gabaa kwathoz wen nak Diox, tak anta lee zha nak rey kuu thitanax gatht ne nloot, tak beeta lee zha nak Diox. Tata ndoblo gake nal ne thitanax. ¡Tata gake! 
\p  
\v 18 Tim, lu nak taxal xgann na ne kwathoz nke leettsoon lu. Koree nak kuu nin loʼa, wen btsow rtsin Zha Nabee taxal thib soldad kuu wen ngyo. Koree nak taxal nzhab re zha kuu ndaa kwent xkiiz Diox, leettsa mndaa zha kwent chaana kuu nzhab Diox lo zha.  
\v 19 Kona thib bloney leettsooʼa gwalaaz Jesucrist ne thibka btsow kuu neʼa wen nak. Tak nzo chop tson zha kuu mtsowt kuu wen kuu nda leettsoo zha, ngwatsaa zha tak mlaa zha Diox.  
\v 20 Tbaa mzhaak Himeneo ne Alejandr, kona mndan rop zha lo Maxuuy, tsa teed zha loozt zha Diox kon re kuu ndediz zha. 
\c 2  
\s1 Paba mteni re zha tsa ne zha naa xomod ndoblo tediz zha lo Diox 
\p  
\v 1 Tim, ndoblo gaba lo re zha kuu nyelaaz Jesús thibka ndoblo tediz zha lo Diox, ne naab zha lo Diox kwent chaan reta men, ne taa zha texkix lo Diox.  
\v 2 Ndoblo naab zha lo Diox kwent chaan re rey ne reta zha kuu nak tsiin, tsa wen kwinaa ne tak golaa lo Diox, ne nali bana taxal nlaaz Diox, ne ndoblo gakaa zha wen lo re men.  
\v 3 Tak koree nak kuu wen, kuu nyow leettsoo Diox kuu mtelaa reʼaa.  
\v 4 Tak lee Diox nlaaz lee reta men keno yalnaban kuu thitanax, ne lebee zha kuu wli.  
\v 5 Yent raa tedib Diox thibka Diox nzo, ne thibka zha ni kwent chaanaa lo Diox nzo, zha ree nak Jesucrist.  
\v 6 Tak lee Jesucrist mndaa yalnaban chaan, tsa mtuyy zha falt chaan reta men, ne Diox mtsow koree wiz kuu mli Diox tsow Diozhe.  
\v 7 Diox mlin ne mtaalʼn, tsa gakʼn apóstl chaan Jesucrist, tsa tan kwent kuu wli lo re zha kuu nagt zha Israel, tsa yelaaz zha Jesucrist. Wlin kuu nin nkeditʼn. 
\p  
\v 8 Kona nlazʼn lee re mbyi, loka ta ndo zha ndoblo tediz zha lo Diox, ne xap zha yaa zha. Ndoblo tsow zhay thib mod nali, ndoblot yii zha neeka ndoblot yodiz zha tsow zhay. 
\p  
\v 9 Ne lee re ngot ndoblo zha gok zha lar taxal ndobloy; ndoblot gok zha lar kuu kwathoz naap neeka ndoblot tee zha bow yek zha kwathoz narub. Neeka ndoblot lortsin zha re kuu or ne neeka re ke perla kuu kwathoz nataak.  
\v 10 Lee kuu nlazʼn nak: Lee re ngot kuu nyelaaz Diox, ndoblo tsow zha kuu wen, taxal ndoblo ban re ngot kuu nali ne ntsow kuu nlaaz Diox.  
\v 11 Lee re ngot ndoblo zheta tsow zha leen gwodoo, ne gon zha diiz kuu nzhon zha.  
\v 12 Ne kuu nin nak, ndoblot loo ngot lo re mbyi ne neeka ndoblot nabee ngot lo mbyi, sinke zheta ndoblo tsow ngot.  
\v 13 Tak ner Adán mdexkwaa Diox, tsaraa Ev;  
\v 14 ne nagt Adán ngwalaaz kuu nzhab Maxuuy, sinke ngot ngwalaaz kuu nzhab Maxuuy, kona mndaa ngot falt.  
\v 15 Per lee ngot telaa ngot, leettsa gap ngot mbet, os lee zha thibka yelaaz zha Jesucrist, ne nkeno zha yalnkelaaz, ne gak zha, zha nambi lo Diox taxal ndobloy. 
\c 3  
\s1 Xomod ndoblo gak re zha gol lo re zha kuu yelaaz Jesús 
\p  
\v 1 Wlipaa na koree, os lee thib zha nlaaz gak zha gol kuu nabee lo re zha kuu nyelaaz Jesús, kwathoz wen kuu ntsow zha xgab tsow zha.  
\v 2 Kona lee re zha kuu nak zha gol kuu nabee lo re zha kuu nyelaaz Jesús, ndoblo gak zha: 
\q1 zha nali, tsa neeka thib men gabt lee zha ntsow kuu went, 
\q1 ndoblo gak zha, zha mkaa thibka ngot, 
\q1 ndoblo gak zha, zha nali lo reta kuu ntsow zha, 
\q1 ndoblo gak zha, thib zha kuu ngobee, kuu nali ntsow xgab taxal ndobloy, 
\q1 ndoblo gak zha, zha nzhon men diiz lo, 
\q1 ndoblo gak zha, zha taa liz kwet re men, 
\q1 ndoblo gak zha, thib zha kuu tak taa kwent xkiiz Diox lo re men. 
\q1  
\v 3 Ndoblot gak zha, zha gwiy, 
\q1 ndoblot gak zha, zha nkwaan zhoo, 
\q1 ndoblot gak zha, zha ndablaaz temi, 
\q1 sinke ndoblo gak zha, zha wen, 
\q1 ndoblo gak zha, zha kwaan kwin wen re men. 
\q1  
\v 4 Ndoblo gak zha thib zha kuu nzhaak nabee lize, 
\q1 ne tsow zha gon re zhiinn zha diiz lo zha, 
\q1 noga zhiinn zha ndoblo wen gak lo re men. 
\m  
\v 5 Tak os lee zha gagt zha nabee zha liz zha, ¿xomod nabee zha lo re zha kuu nyelaaz Jesús?  
\v 6 Kona lee zha kuu nabee lo re zha kuu nyelaaz Jesús, ndoblot gak zha thib zha kuu penta ngwalaaz Jesús, tak cha tsow yalrub gan lo zha, ne la zha lo kuu went ta mla Maxuuy, ne naab Diox kwent lo zha, taxal mtsow Diox lo Maxuuy.  
\v 7 Noga ndoblo gak zha thib zha kuu ndediz wen re zha kuu nyelaazt Jesús, tsa thoyt zha lo re men, ne lat zha lo kwa chaan Maxuuy. 
\s1 Xomod ndoblo gak re zha kuu ntsow ayud re zha kuu nyelaaz Jesús 
\p  
\v 8 Leeka tata, ndoblo gak re zha kuu ntsow ayud re zha kuu nyelaaz Jesús: 
\q1 ndoblo gak zha, zha wen lo re men, 
\q1 ndoblo tsow zha kuu ni zha, 
\q1 ndoblot gak zha, zha gwiy, 
\q1 neeka gagt zha, zha ndablaaz temi. 
\q1  
\v 9 Ndoblo yelaaz zha Jesucrist taxal mloo Diox lo reʼaa, 
\q1 ne thibka nambi keno zha xgab zha lo re kuu tsow zha. 
\m  
\v 10 Ner ner ndoblo tsow zha thib tsiin, os lee zha wen tsow zhay, os neeka thib men gabt lee zha went mtsowe, tsaraa ndoblo gak zha thib zha kuu tsow ayud re zha kuu nyelaaz Jesús. 
\p  
\v 11 Ne leeka tata ndoblo gak re ngot: 
\q1 ndoblo gak zha, zha wen, 
\q1 gagt zha, zha ndediz diiz yizh, 
\q1 ndoblo gol gak zha, 
\q1 ndoblo nali gak zha lo re kuu tsow zha. 
\m  
\v 12 Ne reta zha kuu ntsow ayud re zha kuu nyelaaz Jesús ndoblo tenzhee gak zha: 
\q1 ndoblo gak zha, zha mkaa thibka ngot, 
\q1 ne ndoblo wen nabee zha lo re zhiinn zha ne lo re zha kuu nzo liz zha. 
\m  
\v 13 Tak lee re zha kuu ntsow ayud re zha kuu nyelaaz Jesús kuu wen ntsow rtsin, ntsow zha gan wen ndediz re men zha, ne tabaa tak taa zha kwent chaan Jesucrist kon dib ndroo leettsoo zha lo re men, tsa yelaaz re men Jesucrist. 
\s1 Kuu wli kuu nyelaazaa 
\p  
\v 14 Ngekeen re koree loʼa; tegal ndakʼn mera yatwiin loʼa,  
\v 15 tsa os leen tsan na, ndoblo neʼa naa xomod tsowa lo re zha kuu nyelaaz Jesús, re zha kuu nak zhiinn Diox kuu naban. Lee re zha Jesús nak taxal thib yato kuu nden yuu tsa ney nay, ne ntsow re zha tsa tseet re men kuu wli chaan Jesús.  
\v 16 ¡Kona kwathoz naro nak kuu ngogaats, kuu mloo Diox lo reʼaa zha kuu nyelaaz Jesucrist! Kona tenzhee niʼaa: 
\q1 Jesucrist myaad ngok men lo yezlyu ree, 
\q1 ne lee Mbi Nayon chaan Diox mloo nali nak zha, 
\q1 ne lee re mandad Diox mwii zha, 
\q1 ne lee reta men kuu nzi dib naxta lo yezlyu mbin kwent chaan zha, 
\q1 ne naroob men kuu nzi dib naxta lo yezlyu ngwalaaz zha, 
\q1 ne mkayaa Diox zha yibaa ta kwathoz nke xni. 
\c 4  
\s1 Re zha kuu nlaa nyelaazt raa Diox 
\p  
\v 1 Per lee Mbi Nayon chaan Diox kwathoz nambi ne: Lee re wiz bluz, nzo zha laa yelaazt raa zha Diox. Ne gon zha re kuu nloo re mbi kuu nkedi, ne teke zha dits re yalkedi kuu nloo Maxuuy.  
\v 2 Ne yo re zha kuu kedi kuu ntsowt kuu ni. Re zha kuu ngok nad xgab ne nloot raa kuu wli lo xgab zha.  
\v 3 Re zha ree tyalt zha tseya re men, ne neeka tyalt zha wu re men re kuu mtaan Diox par wu re men. Per lee re zha kuu nyelaaz Jesús, re zha kuu nlebee kuu wli, ndoblo zha wu zhay ne taa zha texkix lo Diox leettsa wu zhay.  
\v 4 Tak reta kuu mdexkwaa Diox wen nak, ne reta kuu mndaa Diox ndoblot gab men went nake, os ndaa reʼaa texkix lo Diox or nkayaa re leey,  
\v 5 tak lee xkiiz Diox ne kuu ndedizaa lo Diox ntsow nzhak nambiy. 
\s1 Thib mos chaan Jesucrist ndoblo gak zha, zha nali 
\p  
\v 6 Os leeʼa teteeda re zha kuu nyelaaz Jesús re koree, tsasi gaka thib mos wen chaan Jesucrist. Tsa gak neya lo Diox tak nyelaaza xkiiz Jesucrist, ne tekeʼa dits re diiz wen kuu wli kuu mloo zha loʼa.  
\v 7 Ne yelaazta re kwent gox kuu nyelaaz re men yezlyu ree, kuu ntegan yek re men. Ne thib bloo yeka bteke dits kuu wli, kuu nak ban men taxal nlaaz Diox.  
\v 8 Tak lutta ntsow rtsin jersis chaan kwerp yezlyu ree, per lee thib ko men yek men ban men taxal nlaaz Diox, konasi nataak lo yalnaban ree ne lo tedib yalnabana.  
\v 9 Diiz ree si wli, ne reta men ndoblo yelaaze.  
\v 10 Kona nkeʼaa tsiin ne ndriidaa yalti, tak nyelaazaa Diox kuu naban ne ngebetaa zha, tak lee zha telaa retalee kuu nyelaaz zha. 
\p  
\v 11 Re koree ndoblo nabeeʼa ne looʼa.  
\v 12 Taata diiz gab neeka thib men leeʼa nataagta, tak ndyeena; sinke ndoblo looʼa lo re zha kuu nyelaaz Jesús, leeʼa nali naka lo re kuu ndediza, ne lo re kuu ntsowa, ne xa nke leettsooʼa tabena, ne xa nyelaaza Jesucrist ne xa nambi ndoʼa lo Diox.  
\v 13 Thibka bloo yeka laba xkiiz Diox, bteni re zha, ne bteteed re zha kwent chaan Jesucrist asta leettsa tsin na.  
\v 14 Thibka bloo yeka blortsin re kuu nataak kuu mndelaaz Diox loʼa, leettsa mxoob re zha gol yaa zha yeka, ne mndaa zha kwent kuu nzhab Diox lo zha kwent chaana. 
\p  
\v 15 Thib bloo yeka ne btsow re koree, tsa reta zha ne naa xa ndezhena lo kwent chaan Diox.  
\v 16 Bkenapa leeka lu, ne ndoblo neʼa naa kwan looʼa, ne thib bloo yeka bana taxal nake. Os leeʼa tsowa koree, tsowa gan yalnaban kuu thitanax ne noga reta zha kuu gon diiz re kuu niʼa. 
\c 5  
\s1 Xomod ndoblo gak re zha kuu nyelaaz Jesús lo re men 
\p  
\v 1 Ndoblo kox re zha gol loʼa, sinke bteni zha taxal xuta; lo re mndyeen bni lo zha taxal lo re wetsa,  
\v 2 lo re ngot gol tsow taxal lo xnaaʼa, lee lo re mndyeen got tsow taxal lo btana, ndoblo nambi toʼa lo re zha. 
\p  
\v 3 Btsow ayud re ngot byud, kuu napt cho tsow ayud.  
\v 4 Per os lee thib ngot byud nap zhiinn o zhot, re zhaʼa ndoblo tsow ayud zha, tak lee zha nak zha liz ngota ne tak lee ngot byuda mkenap zha ner. Tak koree nak kuu wen kuu nyow leettsoo Diox.  
\v 5 Per lee ngot kuu wlipaa myaan byud, ne myaan zha thita zha, thibka ngebet zha lee Diox tsow ayud zha, ne thibka ndediz zha lo Diox ne nzhool zha lo Diox tse ne yaal.  
\v 6 Per os lee thib ngot byud ntsow loka kuu nlaaz, tegal naban per taxal zha nguth nak zha.  
\v 7 Bnabee re koree lo re zha kuu nyelaaz Jesús, tsa yent kwan keki re men zha.  
\v 8 Os nzo cho zha ndat leettsoo zha por re zha liz zha, ne re zha kuu nzo liz zha, tabaa mod nloo zha nyelaazt zha Diox, ne mas went nak zha nake thib zha kuu nyelaazt Diox. 
\p  
\v 9 Lo yeets ta ke lee re ngot byud, 
\q1 beeta ndoblo ke le re ngot kuu nap masraa tson gal liin, 
\q1 ne ndoblo gake ngot kuu mkeno thibka tsaale. 
\q1  
\v 10 Ndoblo nlebee re men zha por re kuu wen kuu mtsow zha: 
\q1 os wen mxeen zha re zhiinn zha, 
\q1 os mndaa zha liz zha mlet re zha kuu mzin liz zha, 
\q1 os mteech zha nii re zha kuu nyelaaz Jesús, 
\q1 os mtsow zha ayud re zha kuu mzhakti 
\q1 ne os thibka ngoo yek zha mtsow zha kuu wen. 
\p  
\v 11 Per keeta le re ngot byud kuu yeen lo yeets, tak lee kwerp zha cha tsow gan lo zha, ne laa zha Jesucrist, ne nlaaz zha tseya zha tedib welt,  
\v 12 ne taa zha falt tak mtsowt zha kuu nzhab zha lo Diox, leettsa ngwalaaz zha Jesucrist.  
\v 13 Noga nyey zha nzhak tsaab zha, ne nda zha liz thib men ne tedib men; ne nagt beeta nyaan tsaab zha, noga nzhak zha, zha ndediz diiz yizh, ne ndaab zha ndediz zha re kuu ndoblot tediz zha.  
\v 14 Kona nlazʼn lee re ngot byud kuu yeen, mas wen tseya zha, tsa gap zha zhiinn zha, ne nabee zha liz zha; ne taat zha diiz lo Maxuuy par tsow zha kuu went.  
\v 15 Tak nzo chop tson ngot byud, mlaa zha Jesucrist ne mndeke zha dits Maxuuy. 
\p  
\v 16 Ne os cho thib zha kuu nyelaaz Jesús, nap zha thib ngot byud liz zha, ndoblo tsow zha ayud zha, tsa nagt tedib net re zha kuu nyelaaz Jesús tsow ayud zha, tak lee re zha kuu nyelaaz Jesús, ndoblo tsow ayud re ngot byud kuu wlipaa ndechey. 
\p  
\v 17 Lee re zha gol kuu wlipaa wen nabee lo re zha kuu nyelaaz Jesús, re zha kuu nloo ne ndaa kwent xkiiz Diox, ndoblo gon re men diiz lo zha.  
\v 18 Tak lo xkeets Diox nzhab: “Kota yex roo ngon leettsa nyoo ngon leen ye tsa toni maa nzob xtil”. [Dt. 25:4] Noga nzhab lo xkeets Diox: “Lee zha kuu nke tsiin ndoblo gax kaa zha”. [Lc. 10:7] 
\p  
\v 19 Yelaazta kuu nkeki zha thib zha gol kuu nabee lo re zha kuu nyelaaz Jesús, os thibka zha nkeki zha.  
\v 20 Per lee re zha kuu ngetsowka kuu went, ndoblo kox zha loʼa lo re men, tsa noga tedib net zha tseb zha ne tsowt zha kuu tata.  
\v 21 Nabeen loʼa Tim ne ngenin diiz ree loʼa delant lo Diox, lo Jesucrist ne lo re mandad kuu mli Diox, thibka btsow re koree; ne yota fabor thib zha ne tedib zha, sinke lalka btsow lo reta men. 
\p  
\v 22 Wen wen btsow xgab, leettsa xooba yaaʼa yek thib zha kuu gak zha gol, kuu nabee lo re zha kuu nyelaaz Jesús, ne nayoblaazt leettsooʼa xooba yaaʼa yek zha, tsa gagta zha kuu nap falt lo falt chaan tedib zha, ne nambi bto lo Diox. 
\p  
\v 23 Ne tak nlaaz leettsooʼa kona guta beeta nit, noga gwii lut xit ub kuu myal. 
\p  
\v 24 Nzo cho zha kwathoz nambi nloo falt chaan zha, leettsa terka naab Diox kwent lo zha, per nzo zha nloot falte nal, asta bluz tsaraa loy.  
\v 25 Leeka tata kwathoz nambi nloo re kuu wen kuu ntsow re men; ne tegal nzo kuu went kuu nloot nal, tetsin wiz leey loo. 
\c 6  
\p  
\v 1 Re zha kuu nyelaaz Jesús kuu nak mos, ndoblo gon zha diiz lo zha kuu nabee lo zha, tsa loozt re men Diox, ne neeka loozt re men leyy kuu nlooʼaa.  
\v 2 Ne os lee zha kuu nabee lo mos nyelaaz Diox, ndoblot tsow nataagt mos zha, tak zha nyelaaz Jesús nak zha ne tak thibka Diox nyelaaz rop zha. Sinke lee mos ndoblo mas wen ndoblo tsow mos tsiin lo zha, tak wets zha rop zha ne lee Diox nkelaaz ropta zha. Koree bloo ne guz lo re men. 
\s1 Paba mndaa kwent chaan re maestr kuu ndablaaz temi 
\p  
\v 3 Os lee thib zha nloo tedib leyy kuu nagt taxal kuu mloo Jesucrist Zha Nabee lo reʼaa, kuu nagt taxal leyy kuu nloo naa xomod ban men taxal nlaaz Diox. 
\p  
\v 4 Zhaʼa nak thib zha rub, ne yent kwan nyen zha, nkwaan zha ngyodiz re men. Ne lo re koree ndroo ndablaaz zha kuu nkeno tedib zha, noga nkezhyan zha, nge zha taben zha, ne nzhak chop xgab zha lo re altaa zha,  
\v 5 re zha kuu nyow leettsoo yodiz, tak went nak xgab zha, mkow yek zha ne gagt lebee zha kuu wli. Ne ntsow zha xgab lo kwent chaan Diox, kuu nak ban men nali taxal nlaaz Diox, tsow zha gan temi.  
\v 6 Per wlipaa koree, lee re zha kuu thib ngoo yek nali ban taxal nlaaz Diox, tetsow re zhaʼa gan kwaro kuu taa Diox lo zha, os wen nzo leettsoo zha kon kuu nap zha.  
\v 7 Tak neeka thib kuu ndyaadnotaa lo yezlyu ree, ne leeka tata neeka thib kuu gwetaa leettsa gathaa.  
\v 8 Per os leeʼaa napaa kuu dowaa ne kuu gokaa; kon kona ndoblo wen yo leettsooʼaa.  
\v 9 Per lee re zha kuu nlaaz gak rik, nla zha lo re kuu went; lo re yalndablaaz kuu rax, kuu ndano zha lo re yalti asta pa lux zha thitanax.  
\v 10 Tak yalndablaaz temi nak ta ndelo reta kuu went. Ne ngoo chop tson zha kuu mndablaaz temi, ne mlaa zha Jesucrist kona kwathoz mriid zha yalti. 
\s1 Paba mteni Tim 
\p  
\v 11 Per lee lu Tim, kuu nak zhiinn Diox. Bzhonn lo re koree, thibka bloo yeka tekeʼa dits re kuu nali, nali ban lo Diox, taxal ndoblo ban re zha kuu nyelaaz Diox, bkelaaz re tabena, bkez leettsooʼa neʼa re men, ne nadoo gok lo re men.  
\v 12 Kon dib ndroo leettsooʼa ney bto gwalaaz Diox, ne bloo gan leettsooʼa, tsa tsowa gan yalnaban kuu thitanax, tak par kona mrez Diox lu, tak asta ner mlooʼa naa xomod nyelaaza Jesucrist lo kwathoz men.  
\v 13 Ne lee nal delant lo Diox kuu ntsow mban reta kuu nzo lo yezlyu, ne delant lo Jesucrist kuu wen mkab lo Poncio Pilat nabeen loʼa,  
\v 14 gona diiz ne wen kenapa kuu mteeda lo Diox, tsa yent cho tseey, ne neeka lu tseete, tsa yent cho gab lee lu ngetsow kuu went. Ne btsowe asta leettsa bretab Jesucrist Zha Nabee lo reʼaa.  
\v 15 Ne lee zha bretab mer wiz kuu mli Diox. Tak beeta lee zha nak Diox kuu nzhool re men lo, ne thita zha nak rey, ne nak Zha Nabee lo reta rey,  
\v 16 ne beeta lee zha naban thitanax, ne nzo zha lo xni ta neeka thib men gagt big. Neeka thib men ter wii naa xa na zha, ne neeka gagt wii zha zha. ¡Beeta lee zha nak zha ndoblo kayaa re diiz wen kuu ni re men lo zha, ne chaan zha nak yalnabee thitanax! ¡Tata gake! 
\p  
\v 17 Bnabee lo re rik, kuu nap naroob kwaa lo yezlyu ree, tsa tsow narot zha, ne kwetta zha kayaa zha kuu wen lo re kuu yezlyu ree kuu lux. Mas wen ko zha yek zha re kuu nak chaan Diox kuu naban, tak lee Diox ndaa naroob kuu ndecheʼaa, tsa naley nzo leettsooʼaa.  
\v 18 Bnabee lo zha tsow zha re kuu wen, tsa gak zha thib zha rik lo re kuu wen kuu ntsow zha, ne thibka ko yek zha talaaz zha ne taa zha kuu nap zha lo tedib net zha kuu ndechey.  
\v 19 Ne tabaa mod ngegotsow zha naroob kwaa yibaa, kuu gak taxal simyent kuu ney ndob lo re kuu ngebet zha kayaa zha yibaa, ne keno zha yalnaban kuu thitanax. 
\s1 Re kuu bluz kuu mnabee Paba tsow Tim 
\p  
\v 20 Wets Tim, wen btsow re kuu mkayaaʼa tsowa. Kenzata re diiz kuu nak kwent yezlyu ree, ne neeka kenzata xkiiz re zha kuu ntsow taxal zha kuu kwathoz nzhaak, tak neeka lut nyent zha re kuu ndediz zha.  
\v 21 Nin koree, tak nzo chop tson zha kuu mndeke dits yalnzhaak ree, kona mlaa zha nyelaazt raa zha Jesucrist. 
\p Nlazʼn lee Zha Nabee taa yalnkelaaz chaan loʼa. 
\p ¡Tbaa gake! 
\pmr Paba