\id 1JN  
\h 1ª de Juan 
\toc1 Yeets ner kuu mkee Juan 
\toc2 1ª de Juan 
\toc3 1 Jn. 
\mt1 Yeets ner kuu mkee 
\mt1 Juan 
\c 1  
\s1 Diiz kuu ndaa yalnaban 
\p  
\v 1 Jesús nak diiz kuu ndaa yalnaban; ne desde leettsa mdexkwaa Diox yezlyu nzoʼa Jesús, ne re nee kuu nak apóstl Jesús mbin nee re diiz kuu mni Jesús, mwii nee Jesús kon prop lo nee ne mdiinn nee Jesús.  
\v 2 Jesús nak diiz kuu ndaa yalnaban, re nee mwii Jesús, ne ndaa nee kwent chaan Jesús; ne ndaa nee kwent chaan yalnaban kuu thitanax kuu ndaa Jesús. Ndala mndo Jesús lo Xut Jesús, per lee nal mwii nee Jesús.  
\v 3 Ne kuu mwii nee ne kuu mbin nee ndaa nee kwent, tsa thibka gak goo kon nee, ne tsa thibka gakaa kon Diox kuu nak Xutaa ne kon Jesucrist Xgann Diox.  
\v 4 Kona mkee nee re koree lo goo tsa thitanax naley yo leettsoo goo. 
\s1 Lee Diox nak xni 
\p  
\v 5 Ne koree nak Diiz Chul kuu mloo Jesucrist lo nee, ne leeka leey nloo nee lo goo; lee Diox nak xni, ne neeka lut yalkow yent lo Diox.  
\v 6 Os leeʼaa mbezaa thibka nakaa kon Diox, ne ntsowaa kuu went kuu ntsow re zha kuu ndiy lo yalkow, nkediʼaa ne ntsowtaa kuu nzhab xkiiz Diox, kuu nak kuu wli.  
\v 7 Per os leeʼaa ntsowaa kuu wen kuu ndoblo tsow re zha kuu nyelaaz Diox, tsasi ndiyaa lo xni, leeka taxal ndo Diox lo xni, ne wlipaa thibka nakaa thibaa ne tedibaa, ne lee ren chaan Jesucrist Xgann Diox, ntembiʼaa lo reta faltaa. 
\p  
\v 8 Os leeʼaa mbezaa naptaa falt, nkediʼaa leeka leeʼaa ne nzot kuu wli leettsooʼaa.  
\v 9 Per os leeʼaa xoobdola re faltaa lo Jesús, wlipaa tetuyy Jesús re faltaa ne tetembi Jesús reʼaa lo reta kuu went kuu mtsowaa, tak nali nak Jesús ne thibka ntsow Jesús kuu ni Jesús.  
\v 10 Per os leeʼaa mbezaa naptaa neeka thib falt, tsa ntoʼaa Diox taxal thib zha kuu nkedi, ne wlit mkayaaʼaa xkiiz Jesús leen leettsooʼaa. 
\c 2  
\s1 Jesucrist nak kuu nteriid xkiizaa lo Diox 
\p  
\v 1 Reta goo kuu nak taxal zhiinn na, ngekeen re koree lo goo tsa taat goo neeka thib falt. Per os lee thib goo taa falt, napaa thib zha kuu teriid xkiizaa lo Xutaa Diox, ne zhaʼa nak Jesucrist kuu nali nak.  
\v 2 Lee zha mdix reta faltaa kon yalnaban chaan zha, tsa tuyy Diox faltaa; ne nagt beeta por faltaa nguth zha, sinke noga por re falt chaan reta men kuu nzi dib naxta lo yezlyu nguth zha. 
\p  
\v 3 Os leeʼaa wlipaa nzhonaa diiz lo reta diiz kuu nabee Diox, wlipaa nlebeeʼaa Diox.  
\v 4 Per os lee thib goo mbez: “Nlebeen Diox”, ne nzhont goo diiz xkiiz Diox, nkedi goo; ne wlit goo kuu mbez goo.  
\v 5 Per os lee goo nzhon goo diiz xkiiz Diox, wlipaa nzo yalnkelaaz chaan Diox leettsoo goo; ne tata neʼaa thibka nakaa kon Diox.  
\v 6 Loka cho kuu mbez: “Thibka nzhon diiz lo Diox”, ndoblo ban zha taxal mloo Jesucrist. 
\s1 Diiz kub kuu mas nataak kuu nak ke leettsoo men altaa men 
\p  
\v 7 Re goo wetsʼn ne btan na, ngekeetʼn tedib diiz kub kuu nataak lo goo; leey nak leeka diiz nataak kuu mndaa Diox lo re men desde ndala. Leeka diza nak kuu mbin goo lo nal.  
\v 8 Ne tegal tatay, lee kuu ngekeen lo goo nak thib diiz kub, leey nak kuu wli kuu mtsow Jesucrist ne kuu ntsowaa, kuu nak ke leettsooʼaa Diox ne tabenaa, tak lee yalkow na nderiida, ne lee xni kuu wlipaa nak xni ngeteniʼa. 
\p  
\v 9 Ne lee zha kuu mbez: “Lo xni ndon”, ne nayii zha ne zha wets zha, bee ndo zhaʼa lo yalkow.  
\v 10 Per lee zha kuu nke leettsoo wets, lo xni ndo zhaʼa; ne lat zha lo kuu went, ne neeka tsowt zha la tedib zha lo kuu went.  
\v 11 Per lee zha kuu nayii ne wets lo yalkow ndo zha ne ndiy zha lo yalkow, ne net zha naa pa nda zha, tak lee yalkow ntow lo zha. 
\q1  
\v 12 Re goo kuu nak taxal zhiinn na, ngekeen koree lo goo, 
\q1 tak mtuyya Diox re falt goo por kuu mtsow Jesucrist. 
\q1  
\v 13 Ngekeen re koree lo goo zha kuu nak zha gol kuu nabee lo re zha Jesucrist, 
\q1 tak mlebeeʼa goo zha kuu nzo desde ndala. 
\q1 Ngekeen re koree lo goo zha mndyeen, 
\q1 tak mtsow goo gan lo Maxuuy. 
\q1  
\v 14 Ngekeen re koree lo goo ndyeen bzhizh, 
\q1 tak mlebeeʼa goo zha kuu nak Xutaa. 
\q1 Ngekeen re koree lo goo zha kuu nak zha gol kuu nabee lo re zha Jesucrist, 
\q1 tak mlebeeʼa goo zha kuu nzo desde ndala. 
\q1 Ngekeen re koree lo goo zha mndyeen, 
\q1 tak ney ndo goo ne mkayaa goo xkiiz Diox leen leettsoo goo, ne mtsow goo gan lo Maxuuy. 
\p  
\v 15 Tablaazt goo yezlyu ree, neeka re kuu nzo lo yezlyu ree. Tak loka cho kuu ndablaaz re kuu yezlyu ree, nket leettsoo zhaʼa Xutaa Diox;  
\v 16 tak reta kuu went kuu nzo lo yezlyu ree, ndyaadte lo Xutaa Diox, sinke leeka lo yezlyu ree ndrooy. Ne re koree nak: Re xgab went kuu ndablaaz zha tsow zha re kuu nlaaz kwerp zha, ndablaaz zha keno zha re kuu ngwii zha, ne ndrub zha re kuu nap zha lo yezlyu ree.  
\v 17 Lee yezlyu ree lux, kon reta kuu went kuu nzo lo yezlyu ree; per lee zha kuu ntsow kuu nlaaz Diox taban zha thitanax. 
\s1 Yalkedi ne kuu wli 
\p  
\v 18 Nin lo re goo kuu nak taxal zhiinn na, re wiz ree nak re wiz bluz. Mbina goo yaad thib zha kuu yii ne Jesucrist; ne lee nal kwathoza re zhaʼa mzin, kona neʼaa mera tsin wiz bluz.  
\v 19 Leeka xidaa mroo re zhaʼa, per nagt zha, zhaʼaa, tak os gagak zha, zhaʼaa, gayaanka zha loʼaa. Per mroo zha xidaa, tsa loo ret men nak zhaʼaa. 
\p  
\v 20 Per lee lo goo mndaa Crist Mbi Nayon chaan Crist ne nlebee goo kuu wli.  
\v 21 Ngekeen re koree lo goo, per ngekeet nay tak nlebeet goo kuu wli, sinke ngekee nay tak nlebeeʼa goo kuu wli, ne wen ne goo lee yalkedi ndroote lo kuu wli. 
\p  
\v 22 ¿Cho nak zha kuu nkedi? Lee zha kuu nkedi nak zha kuu mbez, lee Jesús nagt Crist, ne mbezga zha nagt Diox Xut Jesús, ne neeka nagt Jesús Xgann Diox, zhaʼa nak zha kuu nayii ne Crist.  
\v 23 Reta zha kuu mbez lee Jesús nagt Xgann Diox, nagt zhaʼa zhiinn Diox; per lee zha kuu mbez lee Jesús nak Xgann Diox, zhaʼa nak zhiinn Diox. 
\p  
\v 24 Kona, blotsow goo re diiz kuu mbin goo desde ner leen leettsoo goo, ne os lee re diiz kuu mbin goo ner myaane leen leettsoo goo, no goo thibka nak goo kon Xgann Diox ne kon Diox.  
\v 25 Ne neʼa Jesucrist taa Jesucrist yalnaban kuu thitanax loʼaa. 
\p  
\v 26 Ngekeen re koree lo goo, tak nzo zha kuu nlaaz kedi goo.  
\v 27 Per leeʼaa napaa Mbi Nayon kuu mndaa Jesucrist loʼaa, ne ndechet raa goo naa cho loo lo goo, tak Mbi Nayon nak kuu nloo reta kwaa lo goo, ne lee kuu nloo Mbi Nayon nak kuu wli, nagte kuu wlit. Thibka gok goo kon Jesucrist, taxal nloo Mbi Nayon lo goo. 
\p  
\v 28 Nin lo re goo kuu nak taxal zhiinn na, thibka gok goo kon Jesucrist, tsa leettsa yaad Jesucrist, kon dib ndroo leettsooʼaa bigaa lo zha ne neeka thoytaa lo zha.  
\v 29 Ne neʼa goo lee Jesucrist nali nak, kona noga ndoblo ne goo lee re zha kuu nali nak zha lo re kuu ntsow zha, zhiinn Diox nak re zhaʼa. 
\c 3  
\s1 Zhiinn Diox nakaa 
\p  
\v 1 ¡Wii goo, naa xa nke leettsoo Xutaa Diox leeʼaa, tsa mroleʼaa zhiinn Diox! ¡Ne wlipaa nakaay! Kona lee re men yezlyu ree nlebeet zha lee, tak nlebeet zha Diox.  
\v 2 Re goo wetsʼn ne btan na kuu kwathoz nke leettsoon, naka lee zhiinn Diox; ne terka loo naa xomod gakaa tsya. Per neʼaa leettsa yaad Jesucrist, tsa gakaa taxal Jesucrist, tak tsya wiiʼaa Jesucrist taxal na Jesucrist.  
\v 3 Ne reta zha kuu ngebet yaad Jesucrist, thibka nambi ndo zha lo Diox, leeka taxal nambi nak Jesucrist. 
\p  
\v 4 Reta zha kuu ndaa falt ntsow zha kuu went, tak reta falt nak kuu went.  
\v 5 Ne wen neʼaa, lee Jesucrist myaad lo yezlyu ree par mtuyy reta faltaa, ne neeka thib falt mndaat Jesucrist.  
\v 6 Reta zha kuu thibka nak kon Jesucrist, ndaat raa zha falt. Per lee re zha kuu ndaa falt, ter wii zha Jesucrist ne neeka nlebeet zha Jesucrist.  
\v 7 Nin lo re goo zha kuu nak taxal zhiinn na, taat goo diiz kedi neeka thib zha goo; tak lee zha kuu ntsow kuu wen, nali nak zha taxal nali nak Jesucrist,  
\v 8 per lee zha kuu ndaa falt, zhiinn Maxuuy nak zhaʼa, tak lee Maxuuy nak kuu mndaa falt desde ndala. Kona lee Xgann Diox myaad par luux reta kuu ntsow Maxuuy. 
\p  
\v 9 Reta zha kuu nak zhiinn Diox, ntsowt raa zha kuu went, tak napa zha Mbi Nayon chaan Diox leen leettsoo zha; kona ndoblot raa taa zha falt, tak zhiinn Diox nak zha.  
\v 10 Ne tenzhee mod neʼaa naa cho nak zhiinn Diox ne cho nak zhiinn Maxuuy: Reta zha kuu ntsow kuu went, ne re zha kuu nket leettsoo wets, nagt zhaʼa zhiinn Diox. 
\s1 Ndoblo ke leettsooʼaa thibaa ne tedibaa 
\p  
\v 11 Ne diiz ree nak kuu mbin goo desde ndala: Ndoblo ke leettsooʼaa thibaa ne tedibaa.  
\v 12 Ndoblot gakaa taxal Caín kuu ngok zhiinn Maxuuy ne mbeth wetse. ¿Ne chebee mbeth Caín wets Caín? Mbeth zha wets zha, tak went kuu mtsow zha, ne lee wets zha mtsow kuu wen. 
\p  
\v 13 Re goo wetsʼn ne btan na, yat leettsoo goo os lee re zha yezlyu ree yii ne goo.  
\v 14 Mbriida lee lo yalguth ne napa lee yalnaban kuu ndaa Diox, ne wen neʼaa koree, tak nke leettsooʼaa re wetsaa. Per lee zha kuu nket leettsoo wets, zha nguth nak zhaʼa.  
\v 15 Reta zha kuu nayii ne wets, re zhaʼa nak taxal zha kuu nzhuth men, ne neʼa goo lee re zha kuu nzhuth men napt zha yalnaban kuu thitanax.  
\v 16 Ne Jesús mloo loʼaa naa xomod nak yalnkelaaz, leettsa mndaa Jesús yalnaban chaan Jesús por lee. Ne leeka tata ndoblo taaʼaa yalnaban chaanaa, par tsowaa ayud thibaa ne tedibaa.  
\v 17 Os lee thib goo nap chaan, ne ne goo lee wets goo ndeche thib kwaa, ne nlatta leettsoo goo ne goo wets goo, ¿xomod loo goo lee yalnkelaaz chaan Diox nzo leettsoo goo tsa?  
\v 18 Re goo kuu nak taxal zhiinn na, lee yalnkelaaz, ndoblot gake beeta kon diiz kuu ndroo rooʼaa; sinke wlipaa ndoblo looy lo re kuu ntsowaa. 
\p  
\v 19 Ne tenzhee mod neʼaa leeʼaa nabanaa, taxal nzhab lo xkiiz Diox kuu nak kuu wli, ne wen neʼaa lee Diox nkenap leettsooʼaa;  
\v 20 ne os lee leettsooʼaa nkekiʼaa, ndoblo telaazaa masraa naro Diox nake leettsooʼaa, ne lee Diox ne reta kwaa.  
\v 21 Kona nin lo re goo wetsʼn ne btan kuu kwathoz nke leettsoon, os lee leettsooʼaa nkekitaa, kon dib ndroo leettsooʼaa neʼaa tekayaa Diox reʼaa;  
\v 22 ne tetaa Diox reta kuu naabaa lo Diox, tak nzhonaa diiz kuu nabee Diox ne ntsowaa re kuu wen kuu nlaaz Diox.  
\v 23 Ne koree nak diiz kuu nabee Diox loʼaa: Ndoblo yelaazaa Jesucrist Xgann Diox ne ndoblo ke leettsooʼaa thibaa ne tedibaa, taxal mnabee Jesucrist loʼaa.  
\v 24 Ne lee zha kuu nzhon diiz kuu nabee Diox, thibka nak zhaʼa kon Diox ne lee Diox naban leettsoo zhaʼa. Ne tenzhee mod neʼaa lee Diox naban leettsooʼaa, tak mndaa Diox Mbi Nayon chaan Diox loʼaa. 
\c 4  
\s1 Mbi Nayon chaan Diox ne mbi kuu nagt chaan Diox 
\p  
\v 1 Re goo wetsʼn ne btan na kuu kwathoz nke leettsoon, yelaazt goo reta kuu ne re zha kuu ne: “Na nap Mbi Nayon chaan Diox”, tak ret mbi nak chaan Diox. Leettsa tabaa ne thib zha lo goo, ner btsow goo preb zha naa chu wli Mbi Nayon chaan Diox nzo leen leettsoo zha o nagte Mbi Nayon chaan Diox. Tak mze lo yezlyu ree nzo re profet kuu wlit nak profet, re zha kuu mbez ndaa kwent chaan Diox.  
\v 2 Ne tenzhee tak lebee goo naa cho nap Mbi Nayon chaan Diox: Reta zha kuu mbez lee Jesucrist myaad ngok men lo yezlyu ree, re zhaʼa nap Mbi Nayon chaan Diox.  
\v 3 Per lee re zha kuu mbez lee Jesús myaadt taxal men lo yezlyu ree, napt zhaʼa Mbi Nayon chaan Diox, sinke lee zhaʼa nap mbi kuu nayii ne Crist. Ne mbina goo lee mbi wenta yaad; ne lee nal nzole lo yezlyu ree. 
\p  
\v 4 Re goo kuu ndakʼn taxal zhiinn na, goo nak zha Diox, ne mtsowa goo gan lo re zha kuu nkediʼa; tak mas ney zha kuu naban leen leettsoo goo, nake zha kuu ndo lo re zha kuu nyelaazt Diox.  
\v 5 Reta zhaʼa nak zha yezlyu ree, kona kuu yezlyu ree ndediz zha ne nzhon re zha yezlyu ree kuu ni zha.  
\v 6 Per leeʼaa nakaa zhiinn Diox. Ne reta zha kuu nlebee Diox nzhon zha kuu niʼaa; per lee zha kuu nagt zha Diox, nzhont zha kuu niʼaa. Ne tabaa mod tak neʼaa naa cho nap Mbi Nayon kuu nak kuu wli, ne cho nap mbi chaan yalkedi. 
\s1 Diox nak yalnkelaaz 
\p  
\v 7 Re goo wetsʼn ne btan na kuu kwathoz nke leettsoon, ndoblo ke leettsooʼaa thibaa ne tedibaa, tak lo Diox ndyaad yalnkelaaz. Ne reta zha kuu nke leettsoo taben, zhiinn Diox nak zhaʼa ne nlebee zhaʼa Diox.  
\v 8 Per lee zha kuu nket leettsoo taben, nlebeet zhaʼa Diox, tak Diox nak yalnkelaaz.  
\v 9 Ne tenzhee mloo Diox yalnkelaaz chaan Diox loʼaa, tak mtaal Diox thibka Xgann Diox lo yezlyu ree, tsa por Xgann Diox kenoʼaa yalnaban kuu thitanax.  
\v 10 Ne koree nak yalnkelaaz: Nagte tak mke leettsooʼaa Diox, sinke lee Diox mke leettsoo reʼaa, kona mtaal Diox Xgann Diox nguth mdix faltaa. 
\p  
\v 11 Re goo wetsʼn ne btan na kuu kwathoz nke leettsoon, kwathoz mke leettsoo Diox reʼaa, kona noga lee ndoblo ke leettsooʼaa thibaa ne tedibaa.  
\v 12 Neeka thib men ter wii Diox; per os leeʼaa nke leettsooʼaa thibaa ne tedibaa, wlipaa lee Diox nabee leettsooʼaa ne lee yalnkelaaz chaan Diox ntsow nzhak naliʼaa.  
\v 13 Ne mndaa Diox Mbi Nayon chaan Diox loʼaa, ne lee Mbi Nayon nloo loʼaa thibka ndoʼaa kon Diox ne lee Diox thibka ndo kon lee.  
\v 14 Ne mwii nee Jesucrist ne ndaa nee kwent lee Xutaa Diox mtaal xgann Jesucrist, par telaa re men lo yalguth kuu thitanax.  
\v 15 Loka zha kuu gab lee Jesús nak Xgann Diox, zhaʼa ndo kon Diox ne lee Diox ndo kon lee zha. 
\p  
\v 16 Neʼaa ne nyelaazaa nke leettsoo Diox reʼaa. Lee Diox nak yalnkelaaz; ne lee zha kuu nke leettsoo taben ndo zhaʼa kon Diox ne lee Diox ndo kon lee zha.  
\v 17 Ne tenzhee mod masraa nke leettsoo altaaʼaa par nzhak naliʼaa, tsa leettsa naab Diox kwent lo reta men neʼaa tekayaa Diox reʼaa; tak lo yezlyu ree nakaa taxal nak Jesucrist.  
\v 18 Ne ta nzo yalnkelaaz yent tseb. Tak lee zha kuu wlipaa nke leettsoo nzebt zhaʼa, tak leettsa nzeb men teriid men yalti. Kona os cho zha nzeb, nzeb zha tak ter ke leettsoo zha Diox ne taben zha kon dib ndroo leettsoo zha. 
\p  
\v 19 Ne nke leettsooʼaa Diox, tak lee Diox mke leettsoo Diox reʼaa ner.  
\v 20 Os lee thib zha mbez: “Nke leettsoon Diox”, ne nayii zha ne zha wets zha, zha nkedi nak zhaʼa. Os lee zha nket leettsoo zha wets zha, kuu ngwii zha, ¿xomod tak ke leettsoo zha Diox kuu ngwiit zha?  
\v 21 Jesucrist mndaa diiz ree loʼaa; loka zha kuu nke leettsoo Diox, noga ndoblo ke leettsoo zha wets zha. 
\c 5  
\s1 Xomod tsowaa gan lo yezlyu ree 
\p  
\v 1 Reta zha kuu nyelaaz lee Jesús nak Crist, zhiinn Diox nak zhaʼa. Ne reta zha kuu nke leettsoo Xutaa Diox, noga nke leettsoo zha xgann Xutaa Diox.  
\v 2 Ne leettsa nke leettsooʼaa Diox ne nzhonaa diiz lo Diox, noga neʼaa nke leettsooʼaa re zhiinn Diox,  
\v 3 tak lee zha kuu nke leettsoo Diox, nzhon zha diiz xkiiz Diox; ne lee kuu nabee Diox nagte thib kuu nagan gon zha diiz,  
\v 4 ne reta zha kuu nak zhiinn Diox, ntsow zha gan lo re kuu went kuu nzo lo yezlyu ree; ne ntsow zha gan lo re kuu went, tak nyelaaz zha Jesucrist.  
\v 5 Loka zha kuu nyelaaz lee Jesús nak Xgann Diox, zhaʼa ntsow gan lo re kuu went kuu nzo lo yezlyu ree. 
\s1 Mbi Nayon ndaa kwent chaan Xgann Diox 
\p  
\v 6 Lee Jesucrist myaad lo yezlyu ree kon nit ne kon ren; ne nagte beeta kon nit, sinke myaad Jesucrist kon nit ne kon ren. Ne Mbi Nayon nak kuu ndaa kwente, tak lee Mbi Nayon nak kuu wli.  
\v 7 Ne tson kuu nak kuu ndaa kwente:  
\v 8 Mbi Nayon, nit ne ren; ne thibka kuu ni re yon koree.  
\v 9 Ne os leeʼaa nyelaazaa kuu mbez re men; masraa ndoblo yelaazaa kuu ni Diox, tak mas nataak kuu ni Diox, ne lee Diox mndaa kwent chaan Xgann Diox.  
\v 10 Ne loka zha kuu nyelaaz Xgann Diox, ndaa Diox kwent chaan Xgann Diox lo zha. Per lee zha kuu nyelaazt Xgann Diox, nto zha Diox taxal zha kuu nkedi, tak nyelaazt zha kuu ndaa Diox kwent chaan Xgann Diox.  
\v 11 Ne kuu ndaa Diox kwent nak: Ndaa Diox yalnaban kuu thitanax loʼaa, ne Xgann Diox ndaa yalnabana.  
\v 12 Ne lee zha kuu nyelaaz Xgann Diox, nkeno zha yalnaban kuu thitanax; per lee zha kuu nyelaazt Xgann Diox, nkenot zha yalnaban kuu thitanax. 
\s1 Kon koree ngwalo mteni Juan re men 
\p  
\v 13 Ngekeen re koree lo goo, zha kuu nyelaaz Xgann Diox, tsa ne goo nap goo yalnaban kuu thitanax. 
\p  
\v 14 Ne kon dib ndroo leettsooʼaa neʼaa ton Diox xkiizaa, os leeʼaa naabaa thib kuu lo Diox taxal nlaaz Diox, tataa Diozhe.  
\v 15 Ne os neʼaa lee Diox nzhon kuu naabaa lo Diox, noga neʼaa tekayaaʼaa re kuu naabaa lo Diox. 
\p  
\v 16 Os lee thib goo ne goo lee thib zha kuu nyelaaz Jesús ndaa thib falt, kuu ndanote zha lo yalguth, ndoblo naab goo lo Diox por zhaʼa, tsa taa Diox yalnaban lo zha, os leey nake thib falt kuu ndanot zha lo yalguth. Tak nzo falt kuu ndano zha lo yalguth, ne nitʼn ndoblo naab goo lo Diox por falta.  
\v 17 Reta kuu went nak falt; per nzo falt kuu ndanot zha lo yalguth. 
\p  
\v 18 Noga neʼaa reta zha kuu nak zhiinn Diox, ntsowt raa zha kuu went; tak zhiinn Diox nak zha, ne lee Xgann Diox nkenap zha, ne yent kwan tak tsow Maxuuy lo zha.  
\v 19 Ne wen neʼaa nakaa zhiinn Diox, ne reta men kuu nzi dib naxta lo yezlyu kuu nyelaazt Diox, nzo lo yalnabee chaan Maxuuy.  
\v 20 Noga wen neʼaa lee Xgann Diox myaad mndaa yalnzhaak loʼaa, tsa yenaa ne lebeeʼaa, Zha kuu wlipaa nak. Ne thibka nakaa kon Diox por Xgann Diox, kuu nak Jesucrist. Ne lee Jesucrist nak Diox kuu wlipaa, ne ndaa Jesucrist yalnaban kuu thitanax loʼaa.  
\v 21 Re goo zha kuu ndakʼn taxal zhiinn na, kenap goo goo ne yelaazt goo re kuu wlit nak Diox. 
\p ¡Tbaa gake! 
\pmr Juan