\id 1CO  
\h 1ª de Corintios 
\toc1 Yeets ner kuu mkee Paba lo re zha yez Corinto 
\toc2 1ª de Corintios 
\toc3 1 Co. 
\mt1 Yeets ner kuu mkee Paba lo re zha yez 
\mt1 Corinto 
\c 1  
\s1 Paba mni “diox” 
\p  
\v 1 Na Paba, Diox mrezʼn tsa gakʼn apóstl chaan Jesucrist, taxal nlaaz Diox. Ne noga wets Sóstenes,  
\v 2 ngekeen yeets ree lo re goo, zha kuu nak zha Jesucrist kuu nzo yez Corinto, nak goo zha Diox tak nyelaaz goo Jesucrist. Diox mrez goo ne mtsow nambi Diox goo, thibka kon reta zha kuu nyelaaz Jesucrist kuu nzo dib naxta lo yezlyu. Kona lee Jesucrist nak Zha Nabee loʼaa ne lo re zhaʼa.  
\v 3 Nlazʼn lee Diox kuu nak Xutaa, ne Xut Jesucrist Zha Nabee loʼaa, loo yalnkelaaz chaan lo re goo, tsa wen kwin goo. 
\s1 Diox mloo yalnkelaaz chaan Diox 
\p  
\v 4 Thibka ndan texkix lo Diox por re goo, por yalwen chaan Diox kuu mndaa Diox lo goo, tak nyelaaz goo Jesucrist.  
\v 5 Ne tak thibka nak goo kon Jesucrist, kona mndaa Diox reta kuu wen thoz lo goo, re diiz kuu ndediz goo ne reta kuu nzhaak goo.  
\v 6 Tbaa mod lee kwent chaan Jesucrist kuu mndaa zha kwent lo goo ngok kuu wli lo goo; ne thib ngoo leettsoo goo ngwalaaz gooy.  
\v 7 Ne kona nzhagt falt neeka thib kuu nataak kuu ndelaaz Diox lo goo, lo ngebet goo bretab Jesucrist Zha Nabee loʼaa.  
\v 8 Diox tsow tsa nali to goo lo Diox nal ne asta bluz, leettsa bretab Jesucrist Zha Nabee loʼaa, tsa yent cho keki goo lo Diox tsya.  
\v 9 Nali nak Diox ne ntsow Diox kuu ni Diox ne lee Diox mrezaa, tsa thibka banaa kon Jesucrist Xgann Diox, Zha Nabee loʼaa. 
\s1 Thibka nak Jesucrist 
\p  
\v 10 Re goo wetsʼn ne btan na, kon yalnabee chaan Jesucrist Zha Nabee loʼaa, naabʼn lo goo yodizt goo ne neeka gak rolt goo. Sinke wen goo goo ne lalka btsow goo xgab.  
\v 11 Re goo wetsʼn ne btan na, nin koree lo goo, tak lee re zha liz Cloé ne lon, lee goo ngyo altaa.  
\v 12 Kuu nlazʼn nin lo goo nak, lee chop tson goo mbez: “Lee nee ndeke dits Paba”. Lee teplal goo mbez: “Lee re nee ndeke dits Apolos”. Lee teplal goo mbez: “Lee re nee ndeke dits Pey”. Ne lee teplal goo mbez: “Lee re nee ndeke dits Jesucrist”.  
\v 13 ¿Chu ndak goo tyen nak Jesucrist? ¿Ne chu Paba mke lo kruz por goo? ¿O chu kon le Paba ngokleyy goo?  
\v 14 ¡Ndan texkix lo Diox, tak mtsowleyytʼn neeka thib goo, beeta Crispo rop Gayo mtsowleyyʼn!  
\v 15 Kona neeka thib goo gagt ne, lee goo ngokleyy goo kon len.  
\v 16 Ne noga mtsowleyyʼn Estéfanas ne re zha liz Estéfanas, ne ndakʼn yent raa cho mtsowleyyʼn.  
\v 17 Tak mtaalt Jesucristʼn tsowleyyʼn re men, sinke lee Jesucrist mtaal, par tan kwent Diiz Chul chaan Jesucrist lo re men. Ne leettsa ndan kwent Diiz Chul chaan Jesucrist, ndatʼn kwente tak nzhaakʼn ndedizʼn tsa yelaaz zhay. Sinke ndan kwente tsa key tsiin leettsoo zha ne tsa gak nataak mke Jesucrist lo kruz. 
\s1 Jesucrist nak yalnabee ne yalnzhaak chaan Diox 
\p  
\v 18 Lo re zha kuu ndya gabil, yalbxen nak kuu nguth Jesucrist lo kruz por lee, per lee loʼaa zha kuu tsow gan yalnaban, leey nak yalney chaan Diox.  
\v 19 Taxal nzhab lo xkeets Diox: 
\q1 Luuxʼn yalnzhaak chaan re zha nzhaak, 
\q1 ne tsowʼn tsa yent raa kwan yen re zha kuu nyen re kwaa. [Is. 29:14] 
\p  
\v 20 ¿Pa nyaan re zha nzhaak, re maestr ne re zha kuu nzhaak ngyodiz re kwent yezlyu ree? ¡Thitanax mtsow bxen Diox yalnzhaak chaan re men yezlyu ree!  
\v 21 Tak kon yalnzhaak chaan Diox, mtsow Diox tsa mlebeet re zha yezlyu ree Diox kon yalnzhaak yezlyu ree. Ne mndaa Diox yalnaban kuu thitanax lo re zha kuu nyelaaz Diox, por Diiz Chul chaan Jesucrist kuu ndaa nee kwent, tegal lee diiz ree nak yalbxen lo tedib net re men. 
\p  
\v 22 Lee re tawlazʼn zha Israel nlaaz zha tsow Diox re kuu thoz, ne lee re zha gryeg nkwaan zha yalnzhaak,  
\v 23 per lee nee ndaa nee kwent chaan Jesucrist kuu nguth lo kruz. Lee kona nak taxal ke kuu ndral nii re tawlazʼn zha Israel, ne lee lo re zha kuu nagt zha Israel yalbxen nake,  
\v 24 per lee re zha kuu mli Diox, tegal zha Israel nak zha o nagt zhay ne zha lee Jesucrist nap yalnzhaak ne yalney chaan Diox.  
\v 25 Lee nee ndaa kwent, lee Diox mtaal xganne Jesucrist nguth lo kruz, tegal yalbxen nak koree lo re men yezlyu ree, per koree nloo lee Diox wlipaa nzhaak Diox; lee re men yezlyu ree ntsow xgab, lee koree nloo lee Diox neyt, per koree nloo wlipaa ney Diox. 
\p  
\v 26 Re goo wetsʼn ne btan na, ndoblo ne goo lee Diox mrez goo, tegal lutta goo nak zha kuu nzhaak taxal nzhaak re men yezlyu ree, lutta goo nak zha kuu mkeno yalnabee ne lutta goo ngok zha kuu nataak.  
\v 27 Per Diox mli re zha kuu gagt, tsa tethoy zha re zha kuu nzhaak, ne ndota zha mli Diox, tsa tethoy zha re zha kuu nataak.  
\v 28 Diox mli re zha kuu nataagt ne re zha kuu ntsowt re zha yezlyu ree kas, tsa luux Diox xgab re zha kuu nataak lo yezlyu ree.  
\v 29 Tenzhee mtsow Diox, tsa neeka thib zha rubt lo Diox.  
\v 30 Ne lee Diox mtsow thibka nakaa kon Jesucrist, kona napaa yalnzhaak chaan Diox, ne lee Jesucrist mtsow mrin wenaa kon Diox ne mtsow nambi Jesucrist reʼaa lo re faltaa. Ne mloo Jesucrist reʼaa lo yalguth.  
\v 31 Kona ndoblo tsowaa, taxal nzhab lo xkeets Diox: “Os lee thib goo nlaaz ley, ndoblo ley goo lo re chaan Zha Nabee”. [Jer. 9:24] 
\c 2  
\s1 Diiz Chul chaan Jesucrist kuu mke lo kruz 
\p  
\v 1 Re goo wetsʼn ne btan na, leettsa ngwatan kwent xkiiz Diox kuu wli lo re goo, mnit nay kon diiz kuu nagan neeka kon yalnzhaak chaan re men yezlyu ree.  
\v 2 Ne leettsa mndon lo re goo, nlaztʼn gagon na neeka thib kwent chaan goo, sinke thibka mndan kwent chaan Jesucrist kuu mke lo kruz lo goo.  
\v 3 Ne leettsa mzin na lo goo, neytʼn kwathoz nzhiitʼn ne nzebʼn,  
\v 4 ne leettsa mndan kwent xkiiz Diox lo goo, mnit nay kon yalnzhaak chaan re men yezlyu ree, neeka mtsowtʼn tsa yelaaz goo xkizʼn. Sinke lee Mbi Nayon ne yalney chaan Diox mtsow mloo re kuu thoz lo goo.  
\v 5 Ne nyelaaz goo Diox por yalney chaan Diox, nyelaazt goo Diox por yalnzhaak chaan re men yezlyu ree. 
\s1 Mbi Nayon chaan Diox nloo naa cho nak Diox 
\p  
\v 6 Kona, kon yalnzhaak ndediz nee lo re zha kuu ney ndo nyelaaz Diox, per nagte kon yalnzhaak chaan men yezlyu ree, ne neeka nagte kon yalnzhaak chaan re zha kuu nabee lo yezlyu ree, tak reta koree telux.  
\v 7 Lee nee ndediz nee kon yalnzhaak chaan Diox, kuu ngoo gaats desde leettsa terka texkwaa Diox yezlyu, tsa taa Diox yalnaban kuu thitanax loʼaa.  
\v 8 Ne neeka thib re zha kuu mnabee lo yezlyu ree myent koree, tak os gayen zhay, gakeet zha Jesús Zha Nabee loʼaa lo kruz.  
\v 9 Taxal nzhab lo xkeets Diox: 
\q1 Re kuu neeka thib men ter wii, 
\q1 ne re kuu neeka thib men ter gon, 
\q1 ne re kuu neeka ter tsin leettsoo re men, 
\q1 nak re kuu nap Diox par re zha kuu nke leettsoo Diox. [Is. 64:4] 
\m  
\v 10 Per lee Diox mloo re koree loʼaa por Mbi Nayon chaan Diox, tak lee Mbi Nayon nlebee reta kwaa, asta re xgab chaan Diox nlebee Mbi Nayon. 
\p  
\v 11 Wlipaa nin lo goo, neeka thib zha nlebeet xgab chaan tedib zha, sinke beeta xbi zha ne naa kwan nzo leettsoo zha. Ne leeka tata yent cho ne naa kwan ntsow Diox xgab, beeta Mbi Nayon chaan Diox ney.  
\v 12 Ne mkayaataa mbi yezlyu ree, leeʼaa mkayaa Mbi Nayon chaan Diox, tsa lebeeʼaa re kuu mndelaaz Diox loʼaa.  
\v 13 Kona ni nee re koree lo goo, kon yalnzhaak kuu nteed nee lo Mbi Nayon chaan Diox, ne nit neey kon yalnzhaak kuu mteed nee lo re men yezlyu ree, kona ndaa nee kwent chaan Diox lo re zha kuu nak zha Diox. 
\p  
\v 14 Lee re zha kuu nyelaazt Diox, napt zha Mbi Nayon chaan Diox leettsoo, ne nyent zha re kuu nak chaan Mbi Nayon, tak kuu naxen nake lo zha. Ne gagt yen zhay, tak napt zha Mbi Nayon chaan Diox.  
\v 15 Per lee zha kuu nap Mbi Nayon chaan Diox, nap zha yalnzhaak par yen zha reta kuu, ne yent cho tak tediz lee zha went nak.  
\v 16 Tak lo xkeets Diox nzhab: “¿Cho nlebee xgab chaan Diox? ¿Cho zha tak loo lo Diox?” [Is. 40:13] Per leeʼaa napaa xgab chaan Jesucrist. 
\c 3  
\s1 Re zha kuu nke rtsin Diox 
\p  
\v 1 Re goo wetsʼn ne btan na, ngogt ganin lo goo taxal re zha kuu ney ndo nyelaaz Jesucrist, sinke mnin lo goo taxal lo zha yezlyu ree, taxal zha kuu ndediz lo re ndyeen bzhizh, tata mndan kwent chaan Jesucrist lo goo.  
\v 2 Kuu nagant mloon lo goo, tak bee ter yen gooy tsya ne neeka nal bee ter yen gooy; taxal zha kuu ndaa nzii nzhuu mbet, tata mteteedʼn goo, tak lee mbet gagt wu mbet kuu nzhow zha gox,  
\v 3 tak bee naka goo taxal zha yezlyu ree. Bee nayiika nzhak leettsoo goo ne goo tedib goo, ngyodiz goo ne nzhak rol goo. ¿Chu nagt zha yezlyu ree nak goo, leettsa ntsow goo xgab taxal re men yezlyu ree?  
\v 4 Leettsa lee thib goo mbez: “Na ndeke dits Paba”, lee tedib goo mbez: “Na ndeke dits Apolos”, taxal zha yezlyu ree ndediz goo, leettsa tabaa mbez goo. 
\p  
\v 5 Ne, ¿cho nak Paba? Ne ¿cho nak Apolos? Beeta zha kuu nke rtsin Diox nak nee, ne mtsow nee ngwalaaz goo Zha Nabee. Ne kadta thib nee ntsow nee tsiin kuu mndaa Zha Nabee tsow nee.  
\v 6 Nal nin naa xomod nake; leettsa mndan kwent xkiiz Diox lo re goo, kona nak taxal na mloo mbiz lo yu; ne leettsa mteteed Apolos goo, kona nak taxal mlaal Apolos bin, per Diox nak kuu nxeene.  
\v 7 Kona, neeka zha kuu ngo bin ne neeka zha kuu nlaale nataagt zha, sinke Diox nataak, tak lee Diox nxeen reta kwaa.  
\v 8 Kona lee zha kuu ngo bin ne zha kuu nlaale, lalta nataak zha, ne Diox kix lo kadta thib zha por tsiin kuu mtsow zha.  
\v 9 Ne rtsin Diox nke rop altaa nee, ne lee goo nak taxal yezlyu ta nke Diox tsiin. 
\p Noga, nak goo taxal thib yuu kuu ngetaa Diox.  
\v 10 Diox mndaa yalnzhaak lon, kona nakʼn taxal thib maestr lo re zha kuu nta yuu. Na mtob simyent ne lee tedib zha nak kuu nta yuu. Per kadta thib zha ndoblo wii zha naa xomod ta zhay.  
\v 11 Ne yent raa cho ndoblo tob tedib simyent lo simyent kuu ndoba, tak lee simyent kuu ndoba nak Jesucrist.  
\v 12 Ne dits simyent ree, tak ta zha thib yuu or o yuu plat o tak ta zhay kon ke kuu chul na, kon ya, kon yizh o kon yi.  
\v 13 Per leettsa tsin wiz kuu naab Diox kwent, tsya yanabee rtsin kadta thib zha, tak wiza lee Diox taal bel, ne kon bel gak preb rtsin kadta thib zha.  
\v 14 Os lee thib zha mdexkwaa thib yuu kuu xek lo ki, tekayaa zha kuu kix Diox lo zha.  
\v 15 Ne os lee yuu kuu mdexkwaa zha yek, tsa mluux zha reta chaan zha, per taxal zha kuu nlaa lo ki telaa Diox zha. 
\p  
\v 16 Noga ndoblo ne goo, leeʼaa nak gwodoo chaan Diox, ne lee Mbi Nayon chaan Diox nzo leettsooʼaa.  
\v 17 Ne os cho luux gwodoo chaan Diox, lee Diox luux zhaʼa, tak nayon nak gwodoo chaan Diox, ne goo nak gwodooʼa. 
\p  
\v 18 Kedit goo leeka goo; os lee thib goo ndak goo nzhaak goo re kuu yezlyu ree, ndoblo tsow goo taxal thib zha kuu neeka thib kuu gagt, tsasi lee Diox wlipaa taa yalnzhaak lo goo.  
\v 19 Tak lee yalnzhaak yezlyu ree nak kuu naxen lo Diox. Taxal nzhab lo xkeets Diox: “Leeka lo yalnzhaak chaan zha nden Diox zha”. [Job 5:13]  
\v 20 Ne noga nzhabe: “Lee Zha Nabee neʼa zha lee xgab re zha kuu nzhaak thitanax nataagte”. [Sal. 94:11]  
\v 21 Kona neeka thib goo ndoblot rub goo, tak ngeteed goo lo thib zha kuu nataak, tak reta kuu nak chaan goo:  
\v 22 reta kuu mloo Paba lo goo, re kuu mloo Apolos lo goo o re kuu mloo Pey lo goo, yezlyu, yalnaban, yalguth, kuu nzo nal ne kuu yo bluz, reta koree nak chaan goo,  
\v 23 ne reta goo nak zha Jesucrist, ne lee Jesucrist nak zha Diox. 
\c 4  
\s1 Rtsin re apóstl chaan Jesucrist 
\p  
\v 1 Kona ndoblo wii goo lo nee beeta taxal thib mos kuu nke rtsin Jesucrist, tak lee Jesucrist mndaa tsiin ree tsow nee, ne nloo nee re chaan Diox kuu ngoo gaats ndala lo re men nal.  
\v 2 Ne loka zha kuu kayaa thib tsiin lo Diox, ndoblo loo zha lee zha nak thib zha kuu wen tsowe.  
\v 3 Per lee na, neeka lut ndat leettsoon naa xa ntsow goo xgab ngwii goo lon, ne neeka ndat leettsoon, os naab re zha kuu nak tsiin kwent lon, ne neeka na naabt kwent lon.  
\v 4 Ne tegal neeka lut ndat leettsoon por re kuu ntsowʼn, nagt por kona nakʼn thib zha kuu ndabt falt. Tak lee Zha Nabee nak kuu naab kwent lon.  
\v 5 Kona ndoblot naab goo kwent, leettsa ter gal or naab goo kwent, blet goo yaad Zha Nabee, tsa koo zha re kuu nzogaats lo yalkow lo xni, ne tsow zha loo re kuu nzo leettsoo kadta thib thib men. Tsa lee Diox taa lo kadta thib thib zha loka kuu ndoblo zha kayaa zha. 
\p  
\v 6 Re goo wetsʼn ne btan na, nin koree lo goo, tsa ne goo naa xomod nak rtsin rop nee Apolos. Noga nin koree lo goo, tsa noga goo tsow goo taxal ntsow nee, ne tsa tsowt goo kuu nket lo xkeets Diox, tsa neeka thib goo, tsow narot goo gab goo lee tedib zha went nak.  
\v 7 Ne, ¿cho ntsow mas nataak goo nake tedib net re men? ¿Kwan kuu nkeno goo kuu mndaat Diox lo goo? Ne os Diox mndaay lo goo, ¿chebee ndrub goo taxal gooka mkwaan gooy kwentka goo? 
\p  
\v 8 Ne ndak goo rika goo, ne ndak goo napa goo reta kuu ndablaaz goo, ne ndak goo nak goo taxal rey, ne ndak goo ndechet raa goo nee. ¡Wene os rey nak goo, tsa tak nabee goo thibka kon nee!  
\v 9 Ne ndakʼn lee re nee kuu nak apóstl chaan Jesucrist, nak nee zha kuu thitanax nataagt lo re men yezlyu ree. Nak nee taxal re zha kuu taa zha gath; ne thibka lo nee ngwii re men yezlyu ree kon re mandad chaan Diox.  
\v 10 Lo re men, zha bxen nak nee tak nyelaaz nee Jesucrist, ne lee re goo list goo ndak goo, tak nyelaaz goo Jesucrist. Nee nak zha neyt ne lee re goo nak zha ney. Nayii re men ne nee per lee goo nataak goo lo re men.  
\v 11 Asta wiz naltseree, lee nee thibka ndriid nee win, tak napt nee kuu wu nee neeka kuu gu nee, neeka napt nee lar gok nee, ne nteti re men nee, ne neeka napt nee liz nee,  
\v 12 nyekwan nee nke nee tsiin. Ne nge re men nee, per lee nee naab kuu wen lo Diox par re zhaʼa. Ndralno zha nee per nxek nee.  
\v 13 Nlooz zha nee, per lee nee nkab nee lo zha kon diiz wen. Taxal kuu lortsint raa ntsowno zha nee, ne thitanax nataagt nee lo zha asta wiz naltseree. 
\p  
\v 14 Ne ngekeetʼn koree lo goo tsa thoy goo, sinke ngekee nay tsa tenin goo, taxal zhiinn na, tak kwathoz nke leettsoon goo.  
\v 15 Ne tegal nap goo tsii mil maestr kuu ndaa kwent chaan Jesucrist lo goo, per napt goo tyen xut goo. Ne na nak taxal xut goo, tak leettsa mndan kwent chaan Diiz Chul lo goo, tsa ngokʼn taxal xut goo, tak ngwalaaz goo Jesucrist.  
\v 16 Kona naabʼn lo goo, btsow goo taxal ntsowʼn. 
\p  
\v 17 Ne kona mtaalʼn Tim lo goo. Lee zha nak taxal xgann na kuu kwathoz nke leettsoon, ne nali ndo zha nyelaaz zha Diox. Lee zha tsow tsa telaaz goo xa ndon nyelazʼn Jesucrist, leeka taxal nloon lo re zha kuu nyelaaz Jesús reta ta ndan.  
\v 18 Nzo chop tson goo kuu naro nzhak, tak ndak goo yatwiitʼn lo goo;  
\v 19 per chatta yalʼn yatwiin lo goo, os lee Zha Nabee nlaaz. Tsa nen naa kwan teye leettsoo re zha ruba tsow, o beeta ndrub zha.  
\v 20 Tak nagt men zha Diox por kuu ndediz men, sinke nak men zha Diox, os lee men nap men yalney chaan Mbi Nayon chaan Diox leettsoo men.  
\v 21 ¿Kwan nlaaz goo? ¿Chu nlaaz goo tetin goo, leettsa tsin na lo goo, o chu nlaaz goo naley yo leettsoon, kelazʼn goo ne nadoo tsowʼn lo goo, leettsa yalʼn lo goo? 
\c 5  
\s1 Ndoblo goo naab goo kwent lo zha kuu nzhak rop kon ndota zha 
\p  
\v 1 Kwathoz nyath lee thib re goo nzhak rop kon tsaal xut. ¡Ne koree nak thib kuu thitanax went, neeka re zha kuu nyelaazt Jesucrist ntsowt kona!  
\v 2 ¡Ne bee naro nzhak goo! ¡Mas wen ndoblo nabil yo leettsoo goo, ne ndoblo koo goo zha kuu mtsow kona xid goo!  
\v 3 Tegal ndotʼn lo goo per lee xgab da ndo lo goo, ne mlobeeʼa na kwan gak kon zha kuu tata mtsowa.  
\v 4 Leettsa kaltaa goo par texnet goo kwent ree, lee xgab da to kon re goo ne kon yalnabee chaan Jesucrist,  
\v 5 btaa goo zhaʼa lo yalnabee chaan Maxuuy, tsa lux re kuu nlaaz kwerp zha, tsa lee xbi zha tsow gan ndya yibaa wiz kuu bretab Jesucrist. 
\p  
\v 6 Ndoblot naro tsow goo por re kuu went kuu ntsow goo, o ¿chu net goo lut lebadur ntsow nyezhoob dita koob?  
\v 7 Kona bloo goo lebadur kuu nap goo lee, tak lee lebadura ntsow nyezhoob koob, bloo gooy tsa gak goo taxal pan kuu mdexkwaa kon koob kub kuu nyoot lebadur, kuu nzhow zha lo ani Paskw. Tak Jesucrist mke lo kruz, ne lee Jesucrist ngok mbak zhiil lo ani Paskw.  
\v 8 Kona ndoblo tsowaa ani Paskw, thib mod wen ne nali, kuu nak taxal pan kuu nyoot lebadur, ne tsowtleey kon re kuu went ne kon re kuu nambit, kuu nak taxal lebadur. 
\p  
\v 9 Lo tedib xkeetsʼn kuu mkeen lo goo, nin lo goo ndoblot kaltaa goo kon zha kuu nzhak rop kon ndota zha.  
\v 10 Ne leettsa mnin koree lo goo, nitʼn lo goo lee goo ndoblot kaltaa goo kon reta zha yezlyu ree, re zha kuu nzhak rop kon ndota zha, re zha kuu ndablaaz, zha wann, zha kuu nyelaaz re diox kuu wlit nak Diox, tak os lee goo nlaazt goo kaltaa goo kon re zhaʼa, tsasi thitanax ndoblo roo goo yezlyu ree.  
\v 11 Kuu nlazʼn nin lo goo nak: Ndoblot kaltaa goo kon thib zha kuu mbez nyelaaz Jesús ne nzhak rop zha kon ndota zha, zha ndablaaz, zha nyelaaz re diox kuu nagt Diox, zha nlooz, zha gwiy, zha wann, neeka ndoblot tob goo wu goo kon re zha kuu tabaa nak.  
\v 12-13 Tak ndoblotʼn naabʼn kwent lo re zha kuu nagt zha Jesús, Diox naab kwent lo re zhaʼa. Per lee re goo ndoblo naab goo kwent lo re zha kuu nyelaaz Jesús, kona ndoblo koo goo zha kuu tata ntsowa xid goo. 
\c 6  
\s1 Ndoblot keki zha kuu nyelaaz Jesús altaay lo zha nak tsiin 
\p  
\v 1 Leettsa lee thib goo ngyo kon tedib goo, ¿chebee nye leettsoo goo nya goo lo re zha kuu nak tsiin lo yezlyu ree, re zha kuu nyelaazt Diox, tsa texnet zha kwent goo? ¿Chebee ndaat goo kwente lo re zha kuu nyelaaz Jesús, ne naab goo lo re zha texnet zha kwent goo?  
\v 2 ¿O chu net goo lee re zha kuu nyelaaz Jesús, gak zha kuu naab kwent lo re men kuu nzo lo dib naxta lo yezlyu? Ne os re goo naab kwent lo re men kuu nzo lo dib naxta yezlyu, ¿chebee gagt texnet goo re kwent bzhizh?  
\v 3 ¿Chu net goo, asta lo re mandad chaan Diox naabaa kwent? ¡Kona tak texnet goo kuu ntsow re altaa lo goo!  
\v 4 Os ngyo goo por ndota kwaa yezlyu ree, ¿chebee nya goo lo re zha kuu nak tsiin lo yezlyu ree, re zha kuu thitanax nataagt lo re zha kuu nyelaaz Diox?  
\v 5 ¡Nin koree tsa thoy goo! Tak ¿chu yent neeka thib zha nzhaak xid goo, thib zha kuu tak texnet re kwent goo?  
\v 6 ¡Leel, leettsa nkeki goo altaa goo, chebee leel lo re zha nak tsiin kuu nyelaazt Diox nda goo! 
\p  
\v 7 Ndaa goo falt leettsa ngyo altaa goo. ¿Chebee nxegt goo? ¡Mas wen laa goo lowann zha kuu nap goo!  
\v 8 Leel zhaaʼa kuu ntsow goo, went kuu ntsow goo, nlowann goo lo altaa goo kuu nyelaaz Diox. 
\p  
\v 9 Laat goo kedi zha goo, ¿chu net goo lee re zha kuu ntsow kuu went, tabt zha ta nabee Diox? 
\q1 Re zha kuu nzhak rop kon ndota zha, 
\q1 re zha kuu nyelaaz re diox kuu ndexkwaa re men, 
\q1 re zha kuu nzhak rop kon zha kuu nagt tsaal zha, 
\q1 ne re zha kuu nzhak rop kon leeka tabyi, 
\q1  
\v 10 zha nlowann, 
\q1 zha ndablaaz, 
\q1 zha gwiy, 
\q1 zha nlooz men, 
\q1 zha nkedi, 
\m reta zha kuu ntsow re koree tabt zha ta nabee Diox.  
\v 11 Ne noga nzo cho goo tabaa ngok ndala, per nal ngok nambiʼa goo lo re falt goo, ne mtsowa Diox nak goo zha Diox, noga mtsow Diox tsa mrin wen goo kon Diox por Mbi Nayon chaan Diox, tak nyelaaz goo Jesús Zha Nabee loʼaa. 
\s1 Ndoblo nambi kenoʼaa kwerpaa lo Diox 
\p  
\v 12 Tak gab men: “Librʼn, tak tsowʼn loka kuu nlazʼn”. Wli libr men, per ret kwaa ndoblo men tsow men. Libr men, per taat men diiz nabee kwerp men lo men, par tsowe kuu nlaaze.  
\v 13 Noga tak gab men: “Lee re kuu nzhow men nak par leettsoo men, ne lee leettsoo men nak par re kuu nzhow men”. Wliy, per roptay teluux Diox. Ne mndaat Zha Nabee kwerpaa tsa tsowe kuu went, sinke mndaa zhay loʼaa, tsa gake chaan zha ne lee zha nabeey.  
\v 14 Ne leeka taxal mteroban Diox Jesucrist Zha Nabee loʼaa, tataka teroban Diox reʼaa kon yalney chaan Diox. 
\p  
\v 15 ¿Chu net goo lee kwerpaa, nak kwerp chaan Jesucrist? Kona ndoblot tsowʼn, tsa gak rop kwerp da kon thib ngot kuu ntho kwerp. ¡Wlipaa tsowt nay!  
\v 16 ¿Chu net goo leettsa lee thib zha nzhak rop kon thib ngot kuu ntho kwerp, thibka nzhak kwerp zha kon ngota? Tak lee lo xkeets Diox nzhab: “Lee rop zha nzhak taxal thibka zha”. [Gn. 2:24]  
\v 17 Per leettsa lee thib zha nyelaaz Diox, thibka nak lee zha ne Diox. 
\p  
\v 18 Kona, ndoblot gak rop goo kon ndota zha. Os lee thib zha ntsow thib kuu went kuu nagt koree, yent kwan tak kwerp zha; per lee zha kuu nzhak rop kon ndota zha, ntsow zha kuu went leeka lo kwerp zha.  
\v 19 ¿Chu net goo, lee kwerpaa nak gwodoo chaan Mbi Nayon kuu mndaa Diox loʼaa, ne lee Mbi Nayon nzo leettsooʼaa? Kona lee kwerpaa, nagte chaanaa, leey nak chaan Diox,  
\v 20 tak kwathoz naap mzhii Diox reʼaa. Kona kon mbi nabanaa ne kon kwerpaa, ndoblo tsowaa kuu nyow leettsoo Diox, tak roptay nak chaan Diox. 
\c 7  
\s1 Paba mndaa kwent xomod nak yalntseya 
\p  
\v 1 Nal kabʼn re kuu mnaabdiz goo lon, lo yeets kuu mkee goo lon. Kuu nin nak: Mas wen tseyat mbyi;  
\v 2 per tak kwathoz nzhak rop zha kon ndota zha, kona kadta mbyi ne kadta ngot ndoblo tseya.  
\v 3 Lee mbyi ne ngot kuu nap tsaal, ndoblo taa zha kwerp zha lo altaa zha.  
\v 4 Tak lee kwerp ngot nagte chaan ngot, leey nak chaan tsaal ngot. Ne leeka tata lee kwerp mbyi nagte chaan mbyi, leey nak chaan tsaal mbyi.  
\v 5 Ndoblot tyalt goo lo tsaal goo. Per tak tsow gooy, os rop goo yaan diize, leettsa naab goo thib kuu lo Diox. Ne tsaraa tsaal goo tedib welt, tsa tsowt Maxuuy gan lo goo ne tsow goo kuu went. 
\p  
\v 6 Ne xgab da nin koree lo goo, tsa ne goo naa kwan ndoblo tsow goo, per nagte kuu mnabee Zha Nabee.  
\v 7 Nlazʼn reta goo gak taxal na, naptʼn tsaalʼn. Per nen zhaa zhaa kuu ndelaaz Diox lo kadta thibaa, nzo lo zha mndelaaz Diox keno zha tsaal zha, ne nzo lo zha mndelaaz Diox yaan zha thita zha ne wen yo zha.  
\v 8 Per kuu nin lo re zha kuu ter tseya ne lo re zha byud, mas wen tseyat zha, tsa gak zha taxal na.  
\v 9 Per os lee goo xegt goo, mas wen btseya goo, nake tsow goo kuu went kuu nlaaz kwerp goo. 
\p  
\v 10 Ne lo re goo kuu mtseyaʼa nabeen, ndoblot laa ngot tsaal ngot, nabeet nay Zha Nabee nabeey.  
\v 11 Ne os lee thib ngot laa tsaal, ndoblot raa tseya ngot kon tedib mbyi, per tak bre ngot lo tsaal ngot. Ne leeka tata, ne lee mbyi ndoblot mbyi laa mbyi tsaal mbyi. 
\p  
\v 12 Lee lo tedib net zha nin, kuu nak xgab da, nagte kuu ne Zha Nabee: Os lee tsaal thib wets nyelaazt Jesús ne wen nzo rop zha, ndoblot laa zha tsaal zha.  
\v 13 Ne os lee tsaal thib btanaa nyelaazt Jesús, ne wen nzo rop zha, ndoblot laa ngot tsaal ngot.  
\v 14 Tak lee mbyi kuu nyelaazt Jesús, nambi nak zha, tak lee tsaal zha nyelaaz Jesús, ne lee ngot kuu nyelaazt Jesús, nambi nak ngot, tak lee tsaal ngot nyelaaz Jesús. Ne os leey nagte tabaa lee re zhiinn rop zha gak taxal zhiinn zha kuu nyelaazt Diox, per kuu wli nak, nambi zhiinn zha.  
\v 15 Per os lee mbyi o ngot kuu nyelaazt Jesús, nlaaz laa tsaal, tak tsow zhay. Ne tabaa mod lee mbyi o ngot kuu nyelaaz Jesús mlaa lo tsaal, tak Diox mrezaa tsa wen yoʼaa.  
\v 16 Kona btan na, netʼn naa chu tetelaa Diox tsaala lo yalguth. Ne noga lu wetsʼn, netʼn naa chu tetelaa Diox tsaala lo yalguth. 
\p  
\v 17 Per kadta thib goo ndoblo ban taxal mndaa Zha Nabee diiz ban goo, taxal nak goo leettsa mrez Diox goo. Ne koree nabeen lo reta zha kuu nyelaaz Jesús.  
\v 18 Os lee Diox mrez thib goo kuu nke seny chaan re nee zha Israel, ndoblo tataka yaan goo; os lee Diox mrez thib goo kuu nket seny chaan re nee zha Israel, ndoblot ke goo seny.  
\v 19 Nataagt seny, kuu nataak nak gonaa diiz xkiiz Diox, tegal nke senyaa o nkete lee.  
\v 20 Kadta thibaa ndoblo yaanaa, taxal nakaa leettsa mrez Diox reʼaa.  
\v 21 Kona os lee thib goo nak mos, leettsa mrez Diox goo, yat leettsoo goo, ne os tak laa goo par gagt raa goo mos, tak tsow gooy.  
\v 22 Tak loka zha kuu nak mos leettsa mrez Diox zha, lee nal nak zha thib zha kuu mtelaa Diox, ne lee nal lee zha nke rtsin Zha Nabee; ne lee zha kuu nagt mos leettsa mrez Diox zha, lee nal lee zha nak mos chaan Jesucrist.  
\v 23 Kwathoz naap mzhii Diox reʼaa, kona ndoblot laaʼaa lee tedib zha tsow gakaa mos tedib welt.  
\v 24 Kona nin lo re goo wetsʼn ne btan na, kadta thibaa ndoblo gakaa taxalka nakaa leettsa mrez Diox reʼaa. 
\p  
\v 25 Ne lo re zha kuu ter tseya, naptʼn kuu nabee Diox par re zha, per nin kuu nak xgab da lo re zha, ne ndoblo gon re zha diize, tak mlat leettsoo Diox mne Dioxʼn.  
\v 26 Ndakʼn ndoblot tseya re zhaʼa, ndoblo yaan zha tabaata, por re kuu nagan kuu nzo nal.  
\v 27 Loka cho nap ngot, ndoblot laa zha ngot zha; ne loka cho napt ngot, ndoblot kwaan zha ngot.  
\v 28 Per os lee zha tseya zha ndaat zha falt, ne os cho thib nzaa yeen ntseya ndaat nzaa falt. Per lee re zha kuu ntseya rop tsaalta zha ndriid yalti, per kuu nlazʼn nak riidt zha yalti kona tabaa nin. 
\p  
\v 29 Re goo wetsʼn ne btan na, koree nak kuu nlazʼn nin lo goo: Lee wiz mzin gaxa. Kona lee re zha kuu nap tsaal, ndoblo ke zha tsiin lo Diox taxal zha kuu napt tsaal;  
\v 30 ne lee re zha kuu nzhonn ndoblo tsow zha taxal zha kuu nzhonnt, ne lee re zha kuu naley nzo leettsoo, ndoblo tsow zha taxal zha kuu naleyt nzo leettsoo, ne lee re zha kuu ndii ndoblo tsow zha taxal zha kuu nagt chaan zha re kuu mzhii.  
\v 31 Ne lee re zha kuu wen nzo yezlyu ree, ndoblo ke zha tsiin lo Diox taxal zha kuu nataagt re kuu yezlyu ree lo, tak neʼa reʼaa lee re kuu yezlyu ree telux.  
\v 32 Nlazʼn yat leettsoo goo por re kwent ree. Leettsa lee thib mbyi ntseyat, mas ntsow mbyi xgab re chaan Diox, naa xomod wen la mbyi leettsoo Diox;  
\v 33 per lee mbyi kuu nap tsaal, mas nzo re kuu yezlyu ree yek mbyi, naa xomod wen yo rop tsaal zha.  
\v 34 Ne zhaa nak xgab ngot kuu nap tsaal nake ngot kuu napt tsaal. Lee ngot kuu napt tsaal mas ntsow ngot xgab re chaan Diox, ne ndaa ngot dita kwerp ngot ne mbi naban ngot, par gak nayon ngot lo Diox. Per lee ngot kuu nap tsaal nkwaan ngot re kuu yezlyu ree, tsa wen yo ngot rop tsaal ngot. 
\p  
\v 35 Ne par wen nda goo nin koree lo goo, nlaaztʼn tsibʼn thib kuu ne dits goo, sinke tsa wen ban goo ne ke goo tsiin lo Zha Nabee kon dib ndroo leettsoo goo. 
\p  
\v 36 Per os lee thib zha ndak zha mas wen tseya rtsaap zha, tak nderiida ngulal rtsaap zha, os ndak zha mas wen kona, ndoblo tsow zha kuu ndak zha wen; wen taa zha rtsaap zha tseya, ne nagt koree falt.  
\v 37 Per os lee tedib zha ndak zha mas wen tseyat rtsaap zha, neeka thib zha ndoblot tsow fwers zha, par tetseya zha rtsaap zha. Ne os mtsowa zha xgab ndoblot tseya rtsaap zha, wen ntsow zha.  
\v 38 Kona lee zha kuu ndaa rtsaap tseya, wen ntsow zha; ne lee zha kuu ndaat rtsaap tseya, mas wen ntsow zhaʼa. 
\p  
\v 39 Lee ngot kuu nap tsaal, ndoblo gon ngot diiz lo tsaal ngot, dita lo naban tsaal ngot; per os lee tsaal ngot gath, tak tseya ngot kon loka zha kuu nlaaz ngot, tak mlaaʼa ngot, per ndoblo gake kon thib zha kuu nyelaaz Diox.  
\v 40 Per mas wen os tseyat raa ngot. Koree nak kuu ntsowʼn xgab ne nin, tabaa ntsowʼn xgab, tak napʼn Mbi Nayon chaan Diox. 
\c 8  
\s1 Re kuu ntsib zha lo re diox re men yezlyu ree 
\p  
\v 1 Lee nal tan kwent chaan re kuu ntsib zha lo re diox re men yezlyu ree, wli retalee ne naa xomod nak koree. Per nlazʼn telaaz goo. Lee yalnzhaak ntsow ndrub men, per lee yalnkelaaz ntsow mas ney ndo men lo Diox.  
\v 2 Ne os lee thib zha ndak zha nzhaak zha lut, neeka lut ter yen zha re kuu taxal ndoblo yen zhay.  
\v 3 Ne os lee thib zha nke leettsoo Diox, Diox nlebee zhaʼa. 
\p  
\v 4 Lee nal tan kwent, naa chu wen wu zha beel kuu ntsib zha lo re diox re men yezlyu ree. Wen neʼaa nataagt re diox re men yezlyu ree, ne wen neʼaa thibka Diox nzo.  
\v 5 Tegal ndak re men kwathoz diox nzo yibaa ne lo yezlyu ree, ne wlipaa ndak re men nzo kwathoz re diox ne kwathoz re zha kuu nabee,  
\v 6 per lee loʼaa thibka Diox nzo kuu nak Xutaa, ne lee Diox mdexkwaa reta kwaa, ne zha Diox nakaa. Ne noga nzo thibka Zha Nabee loʼaa, zhaʼa nak Jesucrist, ne por lee Jesucrist mdexkwaa reta kwaa, ne por lee Jesucrist nabanaa. 
\p  
\v 7 Per ret zha ne koree. Nzo cho goo ndala ngwalaaz goo re diox kuu nagt Diox, ne tak myey gooy, kona bee nzhow goo re beel kuu mbib lo re diozha, ne tak nyent goo xomod nake, kona nzhak chop xgab goo.  
\v 8 Kayaat Diox reʼaa por kuu nzhowaa, nagt tak nzhowaa thib kwaa tsa mas wenaa, neeka nagt tak nzhowtaay tsa mas wentaa.  
\v 9 Per ndoblo wiiʼaa, tak cha ntsowaa koree, tsa lee re zha kuu neyt ndo nyelaaz Diox tsow thib kuu went.  
\v 10 Os lee goo ne goo re koree, ne ndob goo nzhow goo ta ndaa zha re maa gon lo re diox re men yezlyu ree, ne os lee thib wets goo wii ngeyow goo kona, ne tak neyt ndo zha nyelaaz zha Diox no zha wu zha kuu ngeyow goo, kuu nak gon kuu ndaa zha lo re diozha.  
\v 11 Ne por re kuu nyen goo, tsow goo tsa lee zha kuu neyt ndo lo Diox taa falt lo Diox, ne btelaaz goo noga por zhaʼa nguth Jesucrist.  
\v 12 Ne leettsa ntsow goo lee wets goo kuu neyt ndo lo Diox, ndaa falt lo Diox, noga goo ndaa goo falt lo Jesucrist.  
\v 13 Kona, os lee kuu nzhowʼn ntsow lee wetsʼn o btan na tsow kuu went, mas wen wutʼn beel, tsa tsowʼn par taat zha falt. 
\c 9  
\s1 Paba mndaa kwent chaan kuu ndoblo Paba kayaa Paba 
\p  
\v 1 Na nak thib zha kuu mlaaʼa. Nakʼn apóstl chaan Jesucrist ne mwiin Jesucrist, Zha Nabee loʼaa. Ne goo nak taxal xle chaan tsiin kuu mkeen lo Zha Nabee.  
\v 2 Os cho zha ndak nagtʼn apóstl chaan Jesucrist, per lee goo nyelaaz goo leen nake, tak nyelaaz goo Diox, ne koree nabee lee na wlipaa nakʼn apóstl chaan Jesucrist. 
\p  
\v 3 Ne koree nak kuu nkabʼn lo re zha kuu nloozʼn:  
\v 4 Ndoblo nee naab nee kuu wu nee ne kuu gu nee lo re goo.  
\v 5 Ne noga ndoblo nee keno nee thib tsaal nee kuu nyelaaz Diox, leeka taxal nap tedib net re apóstl chaan Jesús tsaal, taxal Pey ne re wets Jesús Zha Nabee.  
\v 6 ¿Chu ndak goo beeta rop nee Bernabé ndoblo ke nee tsiin, par tsanaa nee kuu wu nee ne ke nee rtsin Diox?  
\v 7 ¿Chu nzo thib soldad kuu nke tsiin ne leeka temi zha ntob zha par ndi zha kuu ndeche zha? ¿O chu nzo thib zha kuu nzhann luts ub ne nzhowt zha ub? ¿O chu nzo zha kuu nap mbak zhiil, ne nzhuut zha nzii maa?  
\v 8 Tsowt goo xgab lee koree nak beeta xgab da, tak noga lo ley kuu mndaa Diox lo Moisés nkey.  
\v 9 Ne lo ley nzhab: “Kota yex roo ngon leettsa yo ngon ye toni ngon nzob xtil”. [Dt. 25:4] Per nzhabt Diox koree, tak ntsow Diox xgab re ngon,  
\v 10 Diox nzhab koree, tak ntsow Diox xgab reʼaa. Tak lee ley mke tsa tsowe ayudaa, kona lee zha kuu nke gonn yu gon ne zha kuu ntembi nzob xtil, nke zha tsiin tak ne zha tekayaa zha yalgonn kuu ndoblo zha kayaa zha.  
\v 11 Kona, os lee nee nzhann nee mbiz chaan Mbi Nayon leettsoo goo, ndakʼn naroobt nak kayaa nee lut kuu ndeche nee lo goo.  
\v 12 Ne os lee tedib net zha nkayaa koree lo goo, nee nak kuu mas ndoblo kayaay lo re goo. 
\p Per ter kayaa nee kuu ndoblo nee kayaa nee, sinke ngexek nee reta kuu tsa towt nee lo Diiz Chul chaan Jesucrist kuu mndaa nee kwent lo goo.  
\v 13 Wen ne goo, lee re zha kuu nke tsiin leen gwodoo chaan Diox, nzhow zha re kuu nla leen gwodoo. Ne lee re ngwleyy kuu ndaa maa gon lo Diox, nzhow zha lut re beel chaan re maa kuu ntsib zha lo bkoog leen gwodoo Diox.  
\v 14 Leeka tata, lee Zha Nabee mnabee zha, lee re zha kuu ndaa kwent Diiz Chul chaan zha, tya tsow zha gan kuu ndeche zha.  
\v 15 Per lee na neeka thib welt ter tsowʼn koree, ne neeka ngekeetʼn koree lo goo, tsa taa goo lut kwaa lon. ¡Mas wen gathʼn nake tedib zha taa kuu wun! (Tak koree nleyʼn.) 
\p  
\v 16 Ndan kwent Diiz Chul ne nagte kuu ndrubʼn, sinke leey nak tsiin kuu mndaa Diox tsowʼn. ¡Aka nati riidʼn, os leen tatʼn kwent Diiz Chul ree!  
\v 17 Kona, os leen kon dib ndroo leettsoon ndan kwent Diiz Chul, wlipaa tekayaan kuu ndoblo kayaan lo Diox. Per os leey nake kuu nabee Diox lon tsowʼn, ndoblo tsow nay tak Diox nabee tsowʼn.  
\v 18 Mbay. ¿Kwan nak kuu ntsowʼn gan tsa? Lee kuu ntsowʼn gan nak, ndan kwent chaan Diiz Chul ne nkayaatʼn neeka thib kwaa por ntsow nay. 
\p  
\v 19 Tegal nagtʼn mos lo neeka thib zha, per nakʼn zha kuu nke tsiin par reta zha, tsa masraa men yelaaz xkiiz Diox.  
\v 20 Leettsa ndon lo re tawlazʼn, ntsowʼn leeka taxal ntsow re zha, tsa gon zha xkiiz Diox. Kuu nlazʼn nin nak, ntsowʼn taxal thib zha kuu nzhon diiz lo ley chaan Moisés, tsa gon re zha kuu nzhon diiz lo ley Moisés xkizʼn, tegal nabeet ley lon.  
\v 21 Ne lee lo re zha kuu nzhont diiz lo ley chaan Moisés, ntsowʼn taxal zha kuu nzhont diiz lo ley, tsa gon re zha kuu nzhont diiz lo ley chaan Moisés xkizʼn; tegal wlipaa lee ley chaan Jesucrist nabee lon.  
\v 22 Leettsa ndon lo re zha kuu neyt ndo nyelaaz Diox, ntsowʼn taxal zha kuu neyt ndo lo Diox, tsa gon zha xkiiz Diox. Kuu nlazʼn nin nak, taxal nak zha tataka ntsowʼn, tsa laa tyen zha ne gon zha diiz xkiiz Diox.  
\v 23 Reta koree ntsowʼn, tsa gon re zha Diiz Chul, tsa no na tsow gan. 
\p  
\v 24 Noga neʼa goo, leettsa nyoo thib karrer, reta zha nkee karrer, per thibka zha ntsow gan. Kona leeka tata bke goo tsiin, tsa tsow goo gan kuu taa Diox.  
\v 25 Reta zha kuu nkee karrer, nkenap zha kwerp zha lo re kuu went, par tak tsow zha gan thib koron kuu natexkwaa kon laurel kuu nlux. Per leeʼaa nkeʼaa tsiin, tsa tsowaa gan kuu talaaz Diox loʼaa, kuu xek thitanax.  
\v 26 Ne kwent chaan da nkeetʼn karrer legal; ne neeka ngyotʼn taxal zha kuu nkee maket lo mbi.  
\v 27 Sinke ntetin kwerp da, ne ntsowʼn tsa gone diiz lon, tak na ndaa kwent chaan Diiz Chul lo re men, ne ndoblot gakʼn thib zha kuu laa xnet Diox. 
\c 10  
\s1 Ndoblot yelaazaa re diox kuu nagt Diox 
\p  
\v 1 Re goo wetsʼn ne btan na, nithlaazt goo lee re teyaa zha ndala mroo Egipto, ne lee xkow chaan Diox mloo net lo re zha, ne noga mriid zha nitdoo nane.  
\v 2 Ne tata reta zha mriid leen xkow ne leen nitdoo, leettsa mndeke zha dits Moisés, ne ngoke taxal ngokleyy zha, tsa thibka ngok zha kon Moisés.  
\v 3 Ne thibka kwaa mndaa Diox ndow reta zha, kuu nak kuu yibaa,  
\v 4 ne reta zha ngwii nit yibaa. Tak cho ke chaan Diox mroo nit ngwii zha. Ne lee keʼa nak Jesucrist ne mndekey dits re zha, leettsa mndo zha net.  
\v 5 Per kwaro zha mbint diiz lo Diox, kona kwaro zha nguth yubiz. 
\p  
\v 6 Reta koree ngok, tsa yen leey ne tsa tablaaztaa re kuu went, taxal mtablaaz re zhaʼay.  
\v 7 Kona, ndoblot gol goo lo re diox re men yezlyu ree, taxal mtsow tyen re zhaʼa, taxal nzhab lo xkeets Diox: “Lee re men mndob ndow ne ngwii, tsaraa ngwateli re zha ne mkani zha lo diox kuu nagt Diox”. [Ex. 32:6]  
\v 8 Kona ndoblot gak ropaa kon ndota zha taxal mtsow re zhaʼa. Kona mtsow kona thibka wiz nguth galbtson mil zha.  
\v 9 Neeka tsowtaa kezhyan Zha Nabee, taxal mtsow re zhaʼa, kona mkee mbeele yek zha ne nguth zha.  
\v 10 Ne neeka ndoblot loozaa Diox, tak kona mtsow re zhaʼa, kona mtaal Diox mandad chaan yalguth mbeth re zhaʼa.  
\v 11 Reta koree mzhaak re teyaa zha ndala, ne mkey lo xkeets Diox, tsa leeʼaa kuu naban tyemp ree ne leey ne tsowtleey.  
\v 12 Kona, os lee thibaa ntsowaa xgab nali ndoʼaa nyelaazaa Diox, ndoblo wiiʼaa tsa tsowtaa kuu went.  
\v 13 Ne ter tsin thib yalti kuu xegt goo rid goo, per lee Diox nali nak Diox ne taat Diox diiz rid goo masraa yalti kuu xegt goo rid goo. Leettsa tsin yalti lo goo, leeka Diox tsow tsa roo goo lo yaltiʼa, tsa texek goo rid gooy. 
\p  
\v 14 Kona nin lo re goo wetsʼn ne btan na kuu nke leettsoon, laa goo yelaazt raa goo re diox re men yezlyu ree.  
\v 15 Nin koree lo goo, tak ndakʼn teyen goo koree, ne blobee goo naa chu wli kuu nin lo goo.  
\v 16 Leettsa nzhuuʼaa xit ub leen bas chaan Zha Nabee, ne ndaaʼaa texkix lo Diox, ne kona nloo leeʼaa thibka nakaa kon Jesucrist kon ren Jesucrist; ne leettsa nzhowaa pan, kona nloo leeʼaa nakaa thibka kwerp kon Jesucrist.  
\v 17 Ne tegal naroobaa, thibka pan nzhowaa, tak thibka kwerp nakaa. 
\p  
\v 18 Ndoblo yen goo naa kwaan mtsow re tawlaz nee zha Israel; leettsa nzhow zha re maa kuu ndaa zha lo Diox, nloo zha thibka nak zha kon Diox.  
\v 19 Kuu nlazʼn nin nak, lee re diox re men yezlyu ree yent pa nataak re kona, ne neeka re beel kuu ntsib zha lo re diozha yent pa nataaka.  
\v 20 Kuu nlazʼn nin nak, leettsa lee re zha kuu nyelaazt Diox ndaa thib maa lo re diox zha, nagt lo Diox ndaa zhay, sinke lo re mbi fyer ndaa zhay, ne nlaztʼn thibka gak goo kon re mbi fyer.  
\v 21 Ndoblot gu goo kuu nzo leen bas chaan Zha Nabee, ne gu goo kuu nzo leen bas chaan re mbi fyer, neeka gagt tob goo wu goo roo mes chaan Zha Nabee ne tob goo wu goo roo mes chaan re mbi fyer.  
\v 22 ¿Kwan nlaaz goo tsow goo? ¿Chu nlaaz goo tsow goo kezhyan Zha Nabee? ¿Chu mas neyaa nake lee zha? 
\s1 ¿Chu ndoblo wu men beel kuu ndaa zha lo re diox zha? 
\p  
\v 23 Tak gab men: “Librʼn tak tsowʼn reta kuu nlazʼn”. Wliy, per ret kwaa ndoblo men tsow men. “Libr men par tsow men reta kwaa”, per ret kwaa tsow nali to men lo Zha Nabee.  
\v 24 Ndoblot kwaanaa wen yo beeta leeʼaa, sinke ndoblo kwaanaa tsa wen yo tedib net zha. 
\p  
\v 25 Ndoblo dowaa relota beel kuu ntho zha, ne ndoblot naabdizaa naa cho beele, tsa yat leettsooʼaa.  
\v 26 Taxal nke lo xkeets Diox: Lee yezlyu ne reta kuu nzo yezlyu nak chaan Zha Nabee. 
\p  
\v 27 Os lee thib zha kuu nyelaazt Diox, kwez goo par wu goo liz zha, ne nlaaz goo ya goo, dow goo reta kuu tsib zha lo goo, ne yent kwan naabdiz goo lo zha, tsa yat leettsoo goo.  
\v 28 Per os lee thib zha ne lo goo: “Lee beel ree mtsib nee lo re diox nee”, wut gooy, tsa tsowt goo par tsow zha xgab kuu went.  
\v 29 Xgab zhaʼa ngetethʼn lo goo, nagte xgab goo. 
\p Per tak gab men: “¿Chebee tedib zha loozʼn, si librʼn par tsowʼn reta kwaa?  
\v 30 Ne os leen ndan texkix lo Diox leettsa nzhow nay, ¿chebee nlooz zha na, tak nzhow nay?”  
\v 31 Kona nin: Os lee goo nzhow goo, o nzhuu goo, o kwan raa ntsow goo, ndoblo tsow gooy tsa wen ni re zha Diox.  
\v 32 Tsowt goo par tsow tedib net zha kuu went, neeka re tawlazʼn zha Israel, neeka re zha kuu nagt zha Israel, ne neeka re zha kuu nak zha gwodoo chaan Diozhe.  
\v 33 Sinke taxal ntsowʼn, ntsowʼn tsa wen nyoo leettsoo re men nen lo reta kuu ntsowʼn; ntsowt beeta kuu nyow leettsoon, sinke lee na ntsow kuu nyow leettsoo tedib net zha, tsa tsow zha gan yalnaban. 
\c 11  
\p  
\v 1 Btsow goo taxal ntsowʼn, tak lee na ntsowʼn taxal mtsow Jesucrist. 
\s1 Xomod ndoblo tsow re ngot leettsa nzhoolaa lo Diox 
\p  
\v 2 Re goo wetsʼn ne btan na texkix goo tak thibka ntelaaz goo na, ne nzhon goo diiz re kuu mnabeen lo goo.  
\v 3 Per nlazʼn yen goo lee Jesucrist nabee lo reta zha byi, ne lee zha byi nabee lo tsaal, taxal nabee Diox lo Jesucrist.  
\v 4 Os lee thib mbyi tow yek leettsa tediz mbyi lo Diox, o leettsa taa mbyi kwent kuu nzhab Diox lo mbyi lo re men, ngoo mbyi yalnathoy mbyi ne nloo mbyi nzhont mbyi diiz lo Diox.  
\v 5 Ne os lee thib ngot towt ngot yek leettsa tediz ngot lo Diox, o leettsa taa ngot kwent kuu nzhab Diox lo ngot lo re men, ngoo ngot yalnathoy ngot ne nloo ngot nzhont ngot diiz lo tsaal ngot. Ne nak ngot taxal zha kuu mga yitsek.  
\v 6 Os lee thib ngot towt yek, mas wen ga ngot yitsek ngot. Per os lee ngot nthoy ngot ga yitsek ngot, mas wen tow ngot yek ngot.  
\v 7 Lee mbyi ndoblot tow mbyi yek mbyi, tak taxal lee Diox mdexkwaa Diox mbyi. Per lee ngot ndoblo tow ngot yek ngot, tak tata nloo ngot nzhon ngot diiz lo tsaal ngot.  
\v 8 Tbaa nin, tak nagt cho kosti ngot mroo mbyi, sinke lee ngot kuu ner, cho kosti mbyi mroo ngot.  
\v 9 Tak mdexkwaat Diox mbyi por ngot, sinke por mbyi mdexkwaa Diox ngot.  
\v 10 Kona lee ngot ndoblo tow yek, par loo ngot lo re mandad chaan Diox lee ngot nzhon diiz lo tsaal.  
\v 11 Per lee reʼaa kuu nzhon diiz lo Diox, lee mbyi ndeche mbyi ngot, ne tataga lee ngot ndeche ngot mbyi.  
\v 12 Wli lee ngot kuu ner mdexkwaa Diox kon thib kosti mbyi kuu ner, per lee ngot nzhap mbyi, per ropta zha ndyaad lo Diox.  
\v 13 Per leeka goo blobee goo, naa chu wen tediz ngot lo Diox ne towt ngot yek ngot.  
\v 14 Ne leeka re men yezlyu ree, ne kwathoz nathoy nak laa mbyi zhen yitsek mbyi,  
\v 15 per lee ngot, kwathoz chul nak laa ngot zhen yitsek ngot, tak leey nak kuu ntow yek ngot.  
\v 16 Kona, os cho nlaaz yodiz por re kwent ree: ndoblo ne zha, neeka re nee ne neeka re zha kuu nyelaaz Jesús neyt nee kuu tata. 
\s1 Ntsowt zha rtsee chaan Zha Nabee taxal ndobloy 
\p  
\v 17 Per kuu nin lo goo nal nak, nyowt leettsoon kuu ntsow goo leettsa nkaltaa goo, tak ntsowt goo kuu wen, sinke zhaaʼa kuu ntsow goo.  
\v 18 Ne kuu ner ne zha lon nak, leettsa nkaltaa goo par nzhool goo lo Diox ndroo zhaa goo, ne ndakʼn wliy.  
\v 19 Ne tabaa ndoblo gake xid goo, tsa yanabee naa cho wlipaa nak kuu nzhon diiz lo Jesucrist.  
\v 20 Leettsa nkaltaa goo par nzhow goo rtsee chaan Zha Nabee, ntsowt gooy taxal ndoblo tsow gooy.  
\v 21 Tak leettsa nzhow goo, nzo goo ndelo nzhow ner, ne nzhow goo reta kwaa, ne lee tedib net goo nlann, ne lee tedib net goo asta mnduza.  
\v 22 ¿Chu napt goo liz goo pa wu goo ne gu goo? ¿Chebee ntsow nataagt goo re wetsaa kuu nyelaaz Jesús? ¿Chebee ngoo goo yalnathoy re wetsaa kuu prob kuu yent kwan nap? ¿Kwan nlaaz goo nin lo goo? ¿Chu nlaaz goo nin lo goo kwathoz wen kuu ntsow goo? Per lee na ni lo goo. ¡Thitanax went kuu ntsow goo! 
\s1 Rtsee chaan Zha Nabee 
\r (Mt. 26:26‑29; Mr. 14:22‑25; Lc. 22:14‑23) 
\p  
\v 23 Kuu mteedʼn lo Zha Nabee noga mloo nay lo goo: Btsi kuu mndaa zha Zha Nabee gath, mzhen Zha Nabee pan,  
\v 24 ne or ngwalo mndaa zha texkix lo Diox, mtsow rol zhay ne nzhab zha: “Bzhen gooy ne dow gooy. Leey nak kwerp da kuu tan por goo. Btsow goo koree par telaaz goo na.”  
\v 25 Ne leeka tata, leettsa ngwalo ndow re zha pan, tsa mzhen zha bas kuu nzo xit ub, ne nzhab zha: “Lee xit ub kuu nzo leen bas ree nak ren da, ne leey nloo wli nak trat kub kuu taan Diox lo re goo. Ne kadta leettsa gu gooy, btsow gooy par telaaz goo na.”  
\v 26 Ne kadta leettsa nzhowaa pan ne nzhuuʼaa xit ub, ngetelaazaa naa xomod nguth Zha Nabee. Ne tabaaka tsowaay asta leettsa yaad Zha Nabee. 
\p  
\v 27 Kona nin, loka zha kuu nzhow pan ne nzhuu xit ub ree legal, ntsow zha thib kuu thitanax went lo kwerp Zha Nabee, leettsa ntelaazaa kwerp zha ne ren zha.  
\v 28 Kona kadta thibaa ndoblo wen wen tsowaa xgab, leettsa dowaa pan ne guʼaa xit ub.  
\v 29 Tak os lee zha legal nzhow zha pan ne nzhuu zha xit ub, ne neeka net zha na kwan nake, ntsow zha teti Diox zha.  
\v 30 Tak tabaa ntsow goo, kona tyen goo ne ndak, ne tyen goo neyt ndo nyelaaz Diox, ne noga tyen re goo ngutha.  
\v 31 Per os leeʼaa wen wen tsowaa xgab leettsa dowaa rtsee chaan Zha Nabee, tetit Diox reʼaa.  
\v 32 Per os lee Zha Nabee nteti zha lee, ntsow zhay tsa teedaa ne tsa ridtaa yalti kuu thitanax kuu rid re zha kuu nyelaazt Jesús. 
\p  
\v 33 Kona nin lo re goo wetsʼn ne btan na, leettsa kaltaa goo wu goo rtsee chaan Zha Nabee, blet goo thib goo ne tedib goo, tsa thibka wu goo reta goo.  
\v 34 Ne os lee thib goo nlann, dow goo liz goo, tsa tetit Diox goo, tak ntsow goo kuu went leettsa nkaltaa goo nzhow goo rtsee chaan Zha Nabee. 
\p Lee tedib net re kwent texnet nay leettsa yalʼn lo re goo. 
\c 12  
\s1 Re kuu nataak kuu mndelaaz Diox lo re zha kuu nyelaaz Jesús 
\p  
\v 1 Lee nal nin lo re goo wetsʼn ne btan na, nlazʼn ne goo xomod nak, re kuu nataak kuu ndelaaz Mbi Nayon chaan Diox lo kadta thibaa kuu nyelaaz Jesús. 
\p  
\v 2 Noga ne goo leettsa ter yelaaz goo Diox, mbil goo lo re diox re men yezlyu ree, re diox kuu gagt ni kuu yent pa nataak.  
\v 3 Kona nlazʼn ne goo, neeka thib zha kuu nzo Mbi Nayon chaan Diox leettsoo, gagt kode zha Jesucrist. Ne neeka thib zha gagt gab: “Jesucrist nak Zha Nabee”, os lee zha napt zha Mbi Nayon chaan Diox leettsoo zha. 
\p  
\v 4 Zhaapaa zhaapaa kuu nataak ndaa Mbi Nayon chaan Diox lo kadta thibaa, ne thita Mbi Nayon nak kuu ndaay.  
\v 5 Kwaro mod ntsowaa rtsin Diox, per lo thibka Zha Nabee nkeʼaa tsiin.  
\v 6 Zhaa zhaa kuu ndelaaz Diox lo kadta thibaa, tsa tsowaa rtsin Diox, per kon yalney chaan Diox ntsow Diozhe.  
\v 7 Ne lo kadta thibaa mndaa Diox Mbi Nayon chaan Diox, tsa tak tsowaa ayud altaaʼaa.  
\v 8 Lo thib netaa mndelaaz Mbi Nayon chaan Diox: 
\q1 niʼaa kon yalnzhaak, 
\q1 lo tedib netaa mndaa Mbi Nayon yenaa ne neʼaa re kuu nlaaz Diox. 
\q1  
\v 9 Lo tedib netaa mndaa Mbi Nayon, tsa wen lebeeʼaa naa cho nak Diox, 
\q1 tedib netaa mkayaa yalnabee, tsa tegweʼaa re mbyiz. 
\q1  
\v 10 Lee tedib netaa mkayaa yalnabee, tsa tsowaa re kuu thoz, 
\q1 lee tedib netaa mkayaa, taaʼaa kwent xkiiz Diox kuu ne Diox loʼaa, 
\q1 lee tedib netaa mkayaa yalnzhaak, tsa lebeeʼaa re mbi fyer ne Mbi Nayon chaan Diox, 
\q1 lee tedib netaa mkayaa tedizaa tedib net diiz kuu gagtaa, 
\q1 ne lee tedib netaa mkayaa taaʼaa kwent re diza. 
\m  
\v 11 Per beeta Mbi Nayon chaan Diox ntsow reta koree, ne ndaa Mbiy lo kadta thibaa taxal nlaaz Mbi taa Mbiy. 
\s1 Retalee nak kwerp chaan Jesucrist 
\p  
\v 12 Ne taxalka nap kwerp men tyen ta; (taxal ni men, yaa men, nza men), per thibka kwerp nak retay. Leeka tata nak kwerp chaan Jesucrist.  
\v 13 Tak retalee kuu nak zha Israel o zha kuu nagt zha Israel, zha kuu nak mos o zha kuu nagt mos, ngokleyyaa kon thibka Mbi Nayon, tsa gakaa thibka kwerp, ne retalee mkayaa Mbi Nayon leen leettsooʼaa. 
\p  
\v 14 Lee kwerp men nagte thibka kuu, sinke tyen kuu nake.  
\v 15 Os lee nii men gab: “Tak nagtʼn yaa, nagtʼn chaan kwerp”. Ne tegal tata gabe, per nake chaan kwerp.  
\v 16 Ne os lee nza men gab: “Tak nagtʼn ngutlo, nagtʼn chaan kwerp”. Tegal tata gabe, per nake chaan kwerp.  
\v 17 Os dita kwerp men gagak ngutlo men, ¿pa nyaan nza men tsa? Ne os dita kwerp men gagak nza men, ¿pa nyaan zhii men par tak xaptsi men tsa?  
\v 18 Lee Diox mtob Diox kadta thib kuu ta ndobloy; ta nlaaz Diox mtob Diozhe.  
\v 19 Os thibka ta gagak dib kwerp men, ¿pa nyaan kwerp men tsa?  
\v 20 Wli tyen kuu nap kwerp, per thibka kwerp nake. 
\p  
\v 21 Ne gagt gab ngutlo men lo yaa men: “Ndechetʼn lu”; neeka yek men gagt gab lo nii men: “Ndechetʼn goo”.  
\v 22 Tak lee ta ndakaa nataagt, tya nak ta mas ndeche loʼaa.  
\v 23 Ne lee ta ndakaa mas nataagt ntowgwaay. Ne lee ta ndakaa went nloo, mas wen ntowgwaay,  
\v 24 lee re ta chul na neeka ntowtaay, tak ndechet yowgwe. Tbaa mdexkwaa Diox kwerpaa, tsa lee ta ndakaa went nloo, mas wen nkenapaay ne mas wen towgwaay,  
\v 25 tsa yiit thib ta ne tedib ta, ne tsa retay ya leettsoo ne thibe por tedibe.  
\v 26 Kona os lee thib ta ne ndak, dita kwerp ne; ne leettsa nagwe thib ta, dita kwerp nagwe. 
\p  
\v 27 Ne leeka tabaa nakaa, leeʼaa nak kwerp chaan Jesucrist, tak kadta thibaa nakaa lut kwerp chaan Jesucrist.  
\v 28 Kona mli Diox re zha ree, leen gwodoo chaan Diox ne mndelaaz Diox re kuu nataak tsow zha: 
\q1 cho zha nak apóstl chaan Jesucrist, 
\q1 cho zha nak profet, 
\q1 cho zha nloo xkiiz Diox lo tedib net zha, 
\q1 cho zha ntsow re kuu thoz kuu gagt tsow ndota men, 
\q1 cho zha ntegwe re mbyiz, 
\q1 cho zha ntsow ayud re zha kuu ndeche re kwaa, 
\q1 cho zha nabee lo re zha kuu nyelaaz Jesús, 
\q1 ne zha kuu ndediz tedib diiz kuu mteedt zha. 
\p  
\v 29 Ne, ¿chu reta zha nak apóstl chaan Jesucrist? O ¿chu reta zha nak profet? O ¿chu reta zha nak kuu nloo xkiiz Diox? O ¿chu reta zha ntsow re kuu thoz?  
\v 30 O ¿chu reta zha nap yalnabee ntegwe re mbyiz? O ¿chu reta zha nzhaak ndediz tedib diiz kuu mteedt zha? O ¿chu reta zha tak taa kwent naa xomod nak re diza? Wlipaa nagte tata.  
\v 31 Lo reta koree, wii goo re kuu mas nataak kuu ndelaaz Diox. 
\p Per lee na loo thib net kuu mas wen lo re goo. 
\c 13  
\s1 Yalnkelaaz 
\p  
\v 1 Os leen ndedizʼn xkiiz re men o xkiiz re mandad chaan Diox, per nket leettsoon taben da, nataagt re kuu nin, ne nakʼn taxal thib yiib kuu nke bi ne anta ndez.  
\v 2 Ne os lee Mbi Nayon chaan Diox mndelaaz lon, gakʼn profet, ne os leen nlebeen re kuu nagaats kuu nak chaan Diox, ne os leen nzhaakʼn reta kwaa, ne os leen nyelazʼn Diox, ne asta tak nabeen yiib thib yii ta ndobe, per nket leettsoon taben da, neeka lut nataagtʼn.  
\v 3 Ne os leen kiidʼn re chaan da lo re zha kuu ndechey, ne tan na par tey zha na lo ki, tak ndan kwent xkiiz Diox, per nket leettsoon taben da, nlortsint kona. 
\p  
\v 4 Lee zha kuu nke leettsoo: 
\q1 nxek leettsoo zha reta kuu ntsow tedib net zha lo zha, 
\q1 wen nak zha lo tedib net zha, 
\q1 nagt zha, zha kuu went nzo leettsoo ne tedib zha, tak ndablaazt zha chaan zhaʼa, 
\q1 ndrubt zha ne neeka narot nak zha; 
\q1  
\v 5 zha kuu nke leettsoo, nit zha diiz went, 
\q1 nkwaant zha kuu beeta par lee zha, 
\q1 nkezhyant zha por ndota kwaa, 
\q1 nyoot zhyan leettsoo zha, 
\q1  
\v 6 zha kuu nke leettsoo, nyowt leettsoo zha kuu went kuu ntsow tedib zha, 
\q1 sinke kwathoz naley nzo leettsoo zha ne zha re kuu wli. 
\m  
\v 7 Nla leettsoo zha ne zha taben zha, reta kuu nyelaaz zha, reta kuu mbet zha ne reta kuu nkez leettsoo zha. 
\p  
\v 8 Lee yalnkelaaz thitanax nxeke. Per lee tedib net re kuu ndelaaz Diox, nagte kuu xek thitanax, taxal re koree: re zha kuu nak profet, tetsin wiz gagt raa zhay, re zha kuu ndediz tedib net diiz, tetsin wiz tedizt raa zhay ne lee re yalnzhaak, tetsin wiz kayaat raa zhay.  
\v 9 Nal lutta nyenaa re kuu ne lutta nzhaakaa ndaaʼaa kwente, re kuu nlaaz Diox ne Diox loʼaa,  
\v 10 per leettsa tsin wiz kuu lee Zha Nali yaad, tsasi ndechet raa lee re kuu xegt. 
\p  
\v 11 Leettsa lutʼn mndedizʼn ne mtsowʼn xgab taxal ndyeen bzhizh, ne mlobeen taxal ndyeen, per leettsa ngokʼn zha byeʼa, mlan re mod kuu nap ndyeen.  
\v 12 Leeka tata nake nal, nloot re kwaa loʼaa taxal ndoblo looy loʼaa, beeta nlooy loʼaa taxal nloo re kuu loʼaa lo thib spej kuu yu na; per too thib wiz lee reta kwaa nambita looy loʼaa taxal nake. Nal lutta kuu nlebeen, per wiza lebee nay taxal nake, leeka taxal nlebee Dioxʼn nal.  
\v 13 Nal napaa tson kuu nxek thitanax: nyelaazaa Diox, ngebetaa kuu ne Diox taa Diox loʼaa ne yalnkelaaz; per kuu mas nataak lo rey nak yalnkelaaz. 
\c 14  
\s1 Zha kuu ndediz tedib net diiz 
\p  
\v 1 Thibka ndoblo ke leettsoo goo, tak koree nak kuu mas nataak. Ne ndoblo tablaaz goo re kuu nataak kuu ndelaaz Mbi Nayon, ne lo re koree masraa ndoblo tablaaz goo, taa goo kwent re kuu ne Diox lo goo.  
\v 2 Tak lee zha kuu ndediz kon tedib net diiz, lo Diox ni zhay, nit zhay lo re men, nyent re mene. Por Mbi Nayon ndediz zha re kuu nagaats re kuu nyentaa.  
\v 3 Per lee zha kuu ndaa kwent re kuu nzhab Diox lo zha, lo re men ni zhay ne ntsow zha mas ney to re men lo Diox, nteni zha re men ne ntetsey zha leettsoo re men.  
\v 4 Lee zha kuu ndediz tedib net diiz, ntsow zha to ney beeta lee zha lo Diox, per lee zha kuu ndaa kwent kuu nzhab Diox lo zha, ntsow zha mas ney to re zha kuu nyelaaz Jesús lo Diox.  
\v 5 Nlazʼn reta goo tediz tedib net diiz, per mas nlazʼn taa goo kwent kuu ne Diox lo goo, mas wen tsow goo kona, nake tediz goo tedib net diiz. Per noga tak tediz goo tedib net diiz, os nzo thib zha kuu taa kwent naa kwan nak re diza lo re zha kuu nyelaaz Jesús, tsa mas ney to kadta thib zha lo Diox. 
\p  
\v 6 Kona nin lo re goo wetsʼn ne btan na, os leen yalʼn lo re goo ne nin lo goo kon tedib net diiz, lortsinte lo goo, mas wen yan lo goo ne tedizʼn kuu nlaaz Diox ne Diox lo re goo, o ndoblo kon yalnzhaak nin kuu wli lo goo, o tan kwent kuu ne Diox lon, o lon lo goo tedib net re kuu nak kwent chaan Diox.  
\v 7 Os lee flaut o guitarr kuu nzhool men, os leey napte biy gagt lebee men pa kuu nak thibe ne pa kuu nak tedibe.  
\v 8 Os tezt trompet taxal ndobloy teze leettsa telo zhoo, neeka thib zha to lista par ya zha lo zhoo.  
\v 9 Leeka tata nake xid re goo, os lee goo ndediz goo tedib net diiz kuu nyent men, nyent re men kuu ndediz goo. Ne nake taxal lo mbi ngeni goo, os lee goo tata ntsow goo.  
\v 10 Wli kwathoz tyen re diiz nzo dib lo yezlyu, per reta men nyen men naa kwan ni men.  
\v 11 Os leen nyentʼn kwan ngeni zha lon, taxal zha tith nakʼn lo zhaʼa, ne leeka tata taxal zha tith nak zhaʼa lon.  
\v 12 Ne tak ndablaaz goo keno goo re kuu nataak kuu ndelaaz Mbi Nayon, ndoblo tablaaz goo, keno goo re kuu tsow par mas ney to kadta thib re zha kuu nyelaaz Jesús lo Diox. 
\p  
\v 13 Kona lee zha kuu ndediz tedib net re diiz, ndoblo naab zha lo Diox, tsa tak taa zha kwent naa kwan nak kuu ni zha.  
\v 14 Os leen nin lo Diox kon tedib net diiz, lee Mbi Nayon ngenaab lo Diox por na, per lee xgab da net naa kwan ngenin.  
\v 15 ¿Kwan ndoblo tsowʼn tsa? Ndoblo nin lo Diox taxal nlaaz Mbi Nayon, per noga ndoblo nin kon diiz kuu nyen na. Ndoblo golʼn lo Diox taxal nlaaz Mbi Nayon, per noga ndoblo golʼn kon diiz kuu nyen na.  
\v 16 Tak os lee goo ni goo lo Diox ne ndaa goo texkix lo Diox taxal nlaaz Mbi Nayon ne lee thib zha nzhone, gagt tediz zha lo Diox thibka kon re goo, tak nyent zha naa kwan ngeni goo.  
\v 17 Wli wen ndaa goo texkix lo Diox, per ntsowt goo ayud tedib zha kuu nzhon kuu ngeni goo, par to ney zha lo Diox.  
\v 18 Ndan texkix lo Diox, tak mas nzhaakʼn nin tedib net ree diiz nake goo;  
\v 19 per leettsa nkaltaa re zha kuu nyelaaz Jesús, mas wen nin lo zha gaayka lan diiz kuu nyen zha nake nin tsii mil diiz kuu nyent zha. 
\p  
\v 20 Kona nin lo re goo wetsʼn ne btan na, ndoblot tsow goo xgab taxal ndyeen, lo re kuu went ndoblo tsow goo taxal ndyeen, per lee taxal tsow goo xgab ndoblo tsow gooy taxal zha gox.  
\v 21 Tak lo xkeets Diox nzhab: “Kon tedib net diiz nin lo re zha yez ree, ne nin lo zha kon roo re zha tith, ne tegal tatay gont re zha diiz lon ne Zha Nabee”. [Is. 28:11-12]  
\v 22 Kona leettsa ni goo kon tedib net diiz, leey nak thib seny lo re zha kuu nyelaazt Jesús, per nagte seny lo re zha kuu nyelaaz Jesús. Ne leettsa ndaa goo kwent kuu ne Diox lo goo, kona nak seny lo re zha kuu nyelaaz Jesús, ne nagte seny lo re zha kuu nyelaazt Jesús.  
\v 23 Leettsa nkaltaa goo, zha kuu nak zha Jesús, ne reta goo ni tedib net diiz, ne ora tab thib zha kuu nyelaazt Jesús, tetsow zha xgab nzhak naxen yek goo.  
\v 24 Per os reta goo ngetaa goo kwent kuu ne Diox lo goo, ne ora tab thib zha kuu nyelaazt Jesús ne gon zha kuu ngeni goo, teyen zha lee zha nak thib zha kuu ndab falt, ne leeka lee zha yen zha went re kuu ntsow zha.  
\v 25 Ne lee re kuu nagaats kuu nzo leettsoo zha loo, ne tetobxub zha ne gol zha lo Diox, ne teyen zha lee Diox wlipaa ndo kon re goo. 
\s1 Xomod ndoblo gol men lo Diox 
\p  
\v 26 Kona nin lo re goo wetsʼn ne btan na, leettsa kaltaa goo gol goo lo Diox, cho goo gol salm, cho goo tak loo xkiiz Diox, cho goo tak taa kwent kuu ne Diox lo goo, cho goo tak ni tedib net diiz ne cho goo tak taa kwent naa kwan nak re diza, per reta koree ndoblo tsowe ayud, tsa masraa ney to reta goo lo Diox.  
\v 27 Leettsa lee thib zha tediz tedib net diiz, ndoblo tediz chopka zhay o tsonka zhay, per kadta zha ndoblo tediz zha or diinn zha; ne lee tedib zha ndoblo taa kwent naa kwan nak re diza.  
\v 28 Ne os yent thib zha kuu tak taa kwent naa kwan nak re diza, mas wen nit zhay lo re zha kuu nyelaaz Jesús, ndoblo ni zhay lo Diox leettsa thita zha ndo kon Diox.  
\v 29 Leeka tata, lee re zha kuu nlaaz taa kwent kuu nzhab Diox lo zha, ndoblo ni chopka zha o tsonka zha, ne lee tedib net zha kenza kuu ni re zhaʼa, ne ndoblo kobee zha naa chu chaan Diox nake.  
\v 30 Per os lee Diox, tsow lee thib zha kuu ndob tya yen thib kwaa, tsa lee zha kuu ngeniʼa ndoblo tow roo.  
\v 31 Ne ndoblo thibga thibga zha ni tsa reta zha teed, ne tsa reta zha to ney lo Diox.  
\v 32 Reta zha kuu nak profet, nabee zha lo xgab zha, tsa ni zha beeta kuu nlaaz Diox,  
\v 33 tak lee Diox nak kuu ntsow wen nziʼaa, nagt Diox kuu ntsow ngyodizaa. 
\p Btsow goo taxal ndoblo tsow re zha Jesús kuu nali nak,  
\v 34 lee re ngot ndoblot kab ngot leen gwodoo, tak ndoblot ni ngot. Sinke ndoblo ngot gon ngot diiz lo tsaal ngot, taxal nzhab lo ley chaan Diox.  
\v 35 Ne os nzo kwan kuu nlaaz ngot yen ngot, lo tsaal ngot ndoblo naabdiz ngot, leettsa tsin zha liz zha; tak went nloo lee thib ngot kab leen gwodoo.  
\v 36 Btelaaz goo lee xkiiz Diox mndelote xid goo, ne neeka nagt beeta goo mkayaay. 
\p  
\v 37 Os lee thib zha ndak zha nak zha profet, o ndak zha nak zha thib zha kuu mkayaa thib kuu lo Mbi Nayon chaan Diox, ndoblo yen zha, lee re kuu ngekeen lo re goo, nak kuu nabee Zha Nabee.  
\v 38 Ne loka cho taat yek gon diiz ree, noga goo taat goo yek goo gon goo kuu ni zha. 
\p  
\v 39 Kona nin lo re goo wetsʼn ne btan na, btablaaz goo taa goo kwent kuu ne Diox lo goo, ne noga laa goo ni tedib zha tedib net diiz,  
\v 40 per wen btsow goo reta kuu taxal ndoblo tsow gooy. 
\c 15  
\s1 Yalmroban chaan Jesucrist 
\p  
\v 1 Lee nal nin lo re goo wetsʼn ne btan na, btelaazka goo Diiz Chul kuu ndaa yalnaban kuu mndan kwent lo goo. Diiz Chul kuu mkayaa goo, kuu nali ndo goo nyelaaz goo asta nal.  
\v 2 Ne por Diiz Chul keno goo yalnaban, os nzhon goo diiz re kuu mndan kwent lo goo; per os lee goo nzhont goo diize, nlortsint ngwalaaz goo Jesucrist. 
\p  
\v 3 Leeka diiz kuu mteedʼn lo Jesucrist, leeka diza mloon lo goo. Mloon lo goo lee Jesucrist nguth por re faltaa, taxal nkey lo xkeets Diox,  
\v 4 ne mkaats zha Jesucrist, ne leettsa mzaal tson wiz mroban Jesucrist, taxal nkey lo xkeets Diox;  
\v 5 ne ner lo Pey ngwani Jesucrist, tsaraa lo re apóstl.  
\v 6 Bluz tsaraa ngwani Jesucrist lo teeka thib gaay gayoo wetsaa ne btanaa, ne kwaro re zhaʼa bee naban nal, tegal nzo zha ngutha.  
\v 7 Bluz tsaraa ngwani Jesús lo Santiag ne lo reta apóstl. 
\p  
\v 8 Ne bluz tsaraa ngwani Jesús lon, kuu nakʼn taxal thib zha kuu mriid wiz gal.  
\v 9 Tak thitanax nataagtʼn xid re apóstl, neeka ndoblot tob le zha na apóstl, tak mreken dits re zha Jesús.  
\v 10 Per mlat leettsoo Diox ne Diox na, kona nakʼn kuu nakʼn, per lee yalwen kuu mtsow Diox lon nagte kuu nlortsint, tak masraa nkeen tsiin nake re apóstl, per nat ntsowe Diox ntsowe, tak por yalwen chaan Diox thibka ntsow Diox ayudʼn.  
\v 11 Kona nataagt os na o tedib apóstl chaan Jesucrist mndaa kwent lo goo, tak thibka kuu ndaa nee kwent ne kuu nataak nak mbin gooy ne ngwalaaz gooy. 
\s1 Yalroban chaan re zha nguth 
\p  
\v 12 Os mndaa nee kwent lo goo lee Jesucrist mroban. ¿Chebee nzo chop tson goo mbez lee re zha nguth robant?  
\v 13 Os lee re zha nguth robant, noga Jesucrist mrobant tsa.  
\v 14 Ne os mrobant Jesucrist, nataagt kuu ndaa nee kwent lo goo, ne neeka nataagt nyelaaz goo Jesús.  
\v 15 Ne os mrobant Jesús zha nkedi nak nee, tak ne nee lo goo lee Diox mteroban Jesucrist; nkedi nee os wli robant re zha nguth, ne wlit lee Diox mteroban Jesucrist tsa.  
\v 16 Ne os robant re zha nguth, neeka Jesucrist mrobant tsa;  
\v 17 ne os mrobant Jesucrist, nataagt nyelaazaa Jesucrist ne lee re faltaa bee nzibka ditsaa tsa.  
\v 18 Ne os tatay, tsa lee re zha kuu nguth ne ngwalaaz Jesús, thitanax mlux zha.  
\v 19 Os nyelaazaa Jesucrist beeta par kayaaʼaa re kuu yezlyu ree, thitanax nalatt nak kuu ndakaa tsa. 
\p  
\v 20 Per kuu wli nak mroban Jesucrist; ne lee Jesucrist nak zha kuu ner ner mroban xid re zha nguth, taxal xle kuu ner ner ndaa ya.  
\v 21 Tak taxal por falt chaan thibka mbyi kuu le Adán, ngoo yalguth lo yezlyu ree; leeka tata beeta por kuu wen kuu mtsow thibka mbyi kuu le Jesús, roban re zha nguth.  
\v 22 Ne taxal retalee nzhathaa tak nakaa taxal Adán, leeka tata retalee robanaa tak nakaa taxal Jesucrist.  
\v 23 Per kadta lee robanaa leettsa ndoblo robanaa; ner Jesucrist mroban, ne leettsa bretab Jesucrist lo yezlyu ree, tsa roban re zha kuu nak zha Jesucrist.  
\v 24 Tsa lee yezlyu ree lux, ne lee Jesucrist kib yalnabee lo reta men yezlyu ree, lo re mbi fyer ne lo Maxuuy, ne taa Jesús yalnabee lo Diox kuu nak Xutaa.  
\v 25 Tak ndoblo nabee Jesucrist, asta leettsa yelo tsig Diox re zha kuu nayii ne Jesucrist xann nii Jesucrist;  
\v 26 ne bluz kib Jesucrist yalnabee lo yalguth.  
\v 27 Tak lo xkeets Diox nzhab: “Lee Diox mndaa reta yalnabee lo zha tsa nabee zha lo reta kwaa”. [Sal. 8:6] Ne leettsa nzhabe lo zha mndaa Diox reta yalnabee, nzhabte lee Jesucrist nabee lo Diox, tak lee Diox mndaa reta yalnabee lo Jesucrist.  
\v 28 Ne leettsa nabeeʼa Jesucrist reta kwaa, tsa nabee Diox lo Jesucrist. Tak lee Diox mndaa yalnabee lo Jesucrist, ne Diox gak Zha Nabee lo reta zha ne reta kwaa. 
\p  
\v 29 Ne nzo zha nzhakleyy por re zha nguth. ¿Chebee ntsow zhay? Os robant re zha nguth.  
\v 30 Os leey tata nake, ¿chebee nye leettsoo nee gath nee gandata wiz?  
\v 31 Nin lo re goo wetsʼn ne btan na, wlipaa gandata wiz tak gathʼn. Per tegal tatay, kwathoz wen nzo leettsoon, tak ney ndo goo nyelaaz goo Jesucrist, Zha Nabee loʼaa.  
\v 32 Ne tak men nakʼn, kona mbyon kon re zha blaaz taxal maa yez Éfeso, ¿kwan mtsowʼn gan? Os wli lee re zha nguth robant, mas wen tsowaa taxal ni re men: “Dowaa ne guʼaa tak yee gathaa”. 
\p  
\v 33 Laat goo kedi zha goo. Tak re zha kuu went nak, re zhaʼa ntetsaa re zha kuu wen nak.  
\v 34 Nali bloo goo yek goo ne blobee goo, ne tsowt raa goo re kuu went, tak nzo chop tson goo kuu nlebeet Diox. Nin koree lo goo tsa thoy goo. 
\s1 Xomod gak kwerp chaan re zha kuu roban 
\p  
\v 35 Per nzo cho goo nda leettsoo gab: “¿Xomod roban re zha nguth? ¿Cho klas kwerp keno zha?”  
\v 36 Aka naxen zha kuu tata nda leettsoo, tak wen neʼaa leettsa ngoʼaa thib mbiz lo yu, ner nzhaabe ne lee kuu nlen nzhene ne nzhake thib ya.  
\v 37 Ne ntotaa ya lo yu, sinke mbiz nak kuu ngoʼaa lo yu, tegal mbiz nzob xtile o ndota tedib mbize.  
\v 38 Per Diox ntsow nzhake thib ya taxal nlaaz Diox, ne kadta mbiz ntsow Diox nzhake thib ya kuu ndobloy gake.  
\v 39 Leeka tata, nagt thibka klas beel re beel, thibe nak beel chaan men, tedibe nak beel chaan re maa, tedibe nak beel chaan re min ne tedibe nak beel chaan re mbel.  
\v 40 Ne leeka tata, nzo re kuu nak kuu lobee, ne noga nzo re kuu nak kuu yezlyu ree. Kwathoz nzhol na re kuu nzib lobee ne zhaa na kuu nzi yezlyu ree lalt nake rey.  
\v 41 Zhaa na xni wiz ne zhaa na xni mbee; ne zhaa na xni chaan re mbel kuu nzib lobee, zhaa na xni thib mbel ne zhaa na xni tedib mbel. 
\p  
\v 42 Ne leeka tata gak leettsa roban re zha nguth. Lee kuu nkaats zha lux, per lee kuu roban thitanax luxt raay.  
\v 43 Lee kwerp kuu nkaats zha nak kuu rax, per lee kwerp kuu roban gak thib kuu kwathoz wen. Lee kwerp kuu nkaats zha nak thib kuu neyt, per lee kuu roban gak thib kuu kwathoz ney.  
\v 44 Lee kwerp kuu nkaats zha nak kuu yezlyu ree, lee kwerp kuu roban nak kuu yibaa. Leeka taxal nzo kwerp yezlyu ree, tataka nzo kwerp yibaa. 
\p  
\v 45 Kona nzhab lo xkeets Diox: “Lee mbyi kuu ner ngok Adán, ngok thib zha kuu mban”; [Gn. 2:7] per lee Jesucrist nak taxal tedib Adán kuu nak mbi kuu ndaa yalnaban.  
\v 46 Per leet kwerp yibaa nak kuu ner, sinke kwerp yezlyu ree nak kuu ner; tsaraa kuu yibaa.  
\v 47 Lee mbyi kuu ner mdexkwaa Diox mbyi kon yu yezlyu ree, kona kuu yezlyu ree nak mbyi, per lee tedib mbyi kuu nak Jesucrist kuu yibaa nak Jesucrist.  
\v 48 Taxal kwerp mbyi kuu mdexkwaa Diox kon yu, tata nak kwerp re zha yezlyu ree; ne taxal nak kwerp zha kuu mroo yibaa, tata gak kwerp re zha kuu nak zha yibaa.  
\v 49 Leeka taxal na reʼaa taxal mbyi kuu mdexkwaa kon yu, leeka tata gakaa taxal mbyi kuu mroo yibaa. 
\p  
\v 50 Kuu nlazʼn nin lo goo wetsʼn ne btan na nak, lee kwerp kuu nak beel ne tsidth, gagt tabe yibaa ta nabee Diox, ne lee kwerp kuu nlux gagt tsaale kon kuu nluxt.  
\v 51 Per nlazʼn nin thib kuu nagaats lo goo: Gatht retalee per retalee tsee mod na reʼaa,  
\v 52 gatilta gak koree, taxalta tow men lo men ne xaal mene, tata gak leettsa tez trompet kuu lultm bluz, tsa lee re zha nguth roban zha, tsa ban zha thitanax, ne gak zha thib kwerp kuu luxt raa, ne lee reʼaa xaasta tseeʼaa.  
\v 53 Tak ndoblo lee kwerp kuu nlux gak thib kwerp kuu luxt; ne lee kwerp kuu nzhath ndoblo gak thib kwerp kuu thitanax gatht raa.  
\v 54 Ne leettsa lee kwerp kuu nlux ree gak thib kwerp kuu luxt raa, ne lee kwerp kuu nzhath ree gak thib kuu thitanax gatht raa, tsya gak kuu nzhab lo xkeets Diox: “Lee yalguth mlux ne lee yalnaban yo thitanax”. [Is. 25:8]  
\v 55 Yalguth, “¿ma yalney kuu napa? Yalguth neeka tedib kuu gagt raa tsowa lo nee.” [Os. 13:14]  
\v 56 Nabee yalguth lo men tak ndaa men falt, ne ndaa men falt tak gagt gon men diiz, reta kuu nabee ley kuu mndaa Diox lo Moisés.  
\v 57 ¡Per texkix Diox, tak mtelaa Diox reʼaa lo yalguth por Jesucrist! 
\p  
\v 58 Kona nin lo re goo wetsʼn ne btan na kuu kwathoz nke leettsoon, thibka nali ne ney bto goo lo Diox, thibka bke goo rtsin Zha Nabee; tak neʼa goo lee tsiin kuu ngetsow goo nagte kuu tabaata. 
\c 16  
\s1 Xomod ndoblo taa men gon 
\p  
\v 1 Nal nin lo goo kwent chaan gon kuu mndaa goo lo re zha kuu nali ndo nyelaaz Diox, btaa gooy taxal nzhapʼn lo re zha kuu nyelaaz Jesús yez Galacia.  
\v 2 Gandata domin, kadta thib goo ndoblo kozhaa goo lut temi lo kuu ntsanaa goo, ne blotsow gooy, tsa ndoblot thop gooy leettsa tsin na.  
\v 3 Ne leettsa tsin na, tsa kwii goo chop tson zha kuu taalʼn yataan gon ree yez Jerusalén, ne tsa taalʼn thib yeets lo re wetsaa kuu nzo Jerusalén.  
\v 4 Ne os ndeche yan, tsa ya re nee zha. 
\s1 Re kuu ngoo yek Paba tsow Paba 
\p  
\v 5 Leettsa yan yezlyu Macedonia, tsa tsin na yez Corinto yatwiin lo goo, tak tan yezlyu Macedonia.  
\v 6 Ne ntsowʼn xgab betʼn lo goo lut, ne os leey take tsa betʼn lo goo re mbee kuu nla yig, tsa tsow goo ayudʼn lo re kuu ndechen, leettsa yan ta ndoblo yan.  
\v 7 Tak nlaztʼn beeta riidʼn lo goo, sinke nlazʼn betʼn chop tson mbee, os lee Zha Nabee taa diize.  
\v 8 Per betʼn yez Éfeso, asta yelo rid ani Pentecostés,  
\v 9 tak ndakʼn tak tsowʼn rtsin Zha Nabee, ne ndakʼn tak tsowʼn thib kuu thoz tya, tegal kwaro zha nayii nen. 
\p  
\v 10 Ne os tsin Tim lo goo, btsow goo tsa wen yo leettsoo zha lo goo, tak lee zha nke rtsin Zha Nabee, leeka taxal na.  
\v 11 Bin goo diiz lo zha; ne btsow goo ayud zha, tsa wen tsin zha yaadtwii zha lon, tak ngebetʼn kon tedib net re wetsaa tsin zha. 
\p  
\v 12 Ne lee wetsaa Apolos, tegal kwathoz mnaabʼn lo zha yatwii zha lo goo kon tedib net re wets, per nlaazt zha ya zha lo goo nal, per leettsa take lo zha, tsa ya zha lo goo. 
\s1 Re diiz bluz kuu nzhab Paba 
\p  
\v 13 Thibka list brin goo ne ney bto goo gwalaaz goo Zha Nabee. Thib bloo goo leettsoo goo ne nali bto goo lo Diox.  
\v 14 Ne reta kuu tsow goo, btsow gooy kon yalnkelaaz. 
\p  
\v 15 Re goo wetsʼn ne btan na, wen ne goo re lizta Estéfanas nak re zha kuu ner ngwalaaz Jesucrist yezlyu Acaya, ne re zha nak kuu thibka ntsow ayud re zha Jesús kuu nzo yezlyu baa.  
\v 16 Nlazʼn gon goo diiz lo re zha kuu nak taxal re zha ree, noga bin goo diiz lo reta zha kuu ntsow ayud re zha Jesús ne lo reta zha kuu nke rtsin Jesús. 
\p  
\v 17 Ne kwathoz lazʼn tak myaad Estéfanas, Fortunato ne Acaico nzhee, par mtsow re zha ayudʼn lo re kuu ngogt gatsow goo ayudʼn.  
\v 18 Kwathoz mtetsey re zha leettsoon, leeka taxal ntetsey zha leettsoo goo. Ndoblo gol tsow goo lo re zha kuu nak taxal re zha ree. 
\p  
\v 19 Lee re zha Jesús kuu nzo re yez chaan Asia ni “diox” lo re goo. Noga Aquila ne tsaal Aquila Priscila, ne re zha kuu nkaltaa liz zha, ni “diox” lo goo, tak reta goo nak zha Zha Nabee.  
\v 20 Bkayaa goo “diox” kuu ni reta wetsaa ne reta btanaa kuu nzo nzhee, ne bni goo “diox” lo re wetsaa ne lo re btanaa kuu nzo baa, ne dow goo thib chut kwat kadta thib thib zha thib mod nali. 
\p  
\v 21 Na Paba nin “diox” lo reta goo, beeta koree nak letr da kuu mkeen kon yaan. 
\p  
\v 22 Os nzo cho nket leettsoo Jesús Zha Nabee, tagode Diox zhaʼa. 
\p ¡De lo nee, Zha Nabee! 
\p  
\v 23 Nlazʼn lee Jesús Zha Nabee loʼaa, kenap reta goo kon yalnkelaaz chaan zha.  
\v 24 Kwathoz nke leettsoon reta goo, tak nke leettsoo Jesucrist retalee. 
\p ¡Tbaa gake! 
\pmr Paba