\id REV  
\h APOCALIPSIS 
\toc1 Di's Co' Mblo Xo'f Jesucrist Loo Juàn Co' Mque' Juàn Ye's Loo Mèn 
\toc2 APOCALIPSIS 
\toc3 Ap. 
\mt1 Di's Co' Mblo Xo'f Jesucrist Loo Juàn Co' Mque' Juàn Ye's Loo Mèn 
\c 1  
\s1 Trè' ndlu' cón che'n con' co' mblo xo'f Jesucrist loo Juàn. 
\p  
\v 1 Libr ndxè' ndlu' cón che'n co' mblo xo'f Diox loo Jesucrist par ta' Jesucrist cuent cón che'n con'a loo mèn co' mxo'f zin' cón che'n Jesucrist cón che'n con' co' gàc loo izlyo' yiloa. Jesucrist mbli par ngro xo'f con' ndxè' loon, daa co' nac Juàn co' mxo'f zin' thìb zin' che'n Jesucrist, por angl che'n Jesucrist co' mtel' Jesucrist mbi'th loon.  
\v 2 Loo libr ndxè' ndan cuent cón che'n co', lìcpe', gunèen. Nac daa mbi' co' nda' cuent no co' ndyoodi's cón che'n Diox. Ndan cuent no ndyoodizen cón che'n con' co' mblo xo'f Jesucrist loon, ne. 
\p  
\v 3 Huen nda mèn co' ndlab di's ndxè'. No huen nda mèn co' ndyal ndxòn di's ndxè' co'se' ndlab mèn di's ndxè', di's co' mblu' Diox loon par tan cuent loo mèn. No huen nda mèn co' ndli cas no co' ndyubdi's xal mbez di's co' ndub loo libr ndxè'. Tac nde zin' gaxle' tiemp gàca xal mblo xo'f Jesucrist cón che'n con' co' gàc loo izlyo' yiloa loon. 
\s1 Juàn ngue que' ye's loo mèn co' nqueltàa loo cón che'n Diox, mèn co' nzo ban le'n gaz yèezya' che'n làaz mèn asia. 
\p  
\v 4 Daa co' nac yub Juàn ngue que'en ye's loo gu' co' nqueltàa loo cón che'n Diox, gu' co' nzo ban le'n yèezya' che'n làaz mèn asia. Ndlyazen le' Diox co' thidteneque' nzo, no Xpii Natú' che'n Diox co' nzo loo Diox co'te' ndub Diox loo bé', no Tad Jesucrist, li loo gu' anggàc huax con' ndac loo gu' par nedrè'. No ndlyazen le' por cón che'n Diox, no por cón che'n Xpii Natú' che'n Diox, no por cón che'n Tad Jesucrist, gàc loo gu' nagàl yo lezo' gu' loo Diox no cue ban gu' rye nda gu' no rye ndye'th gu' làth xtàa gu'.  
\v 5 Jesucrist mda' cuent cón che'n Diox loo mèn. No altant mdoo Jesucrist loo zin' co' mxo'f zin' Diox loo Jesucrist li Jesucrist loo mèn. Jesucrist ngòc ner mbi' co' ngro xban làth mèn nguth. No nac Jesucrist xa' co' ñibe'que' loo mèn dib athu loo izlyo' yiloa. Más de cona, Crist nque'que' lezo' ñèe Crist na'. No mton' Crist xquin na' no xtol na' co'se' nguth Crist loo cruz par ngòc na' mèn nalì no mèn nambìi loo Diox.  
\v 6 Mbli Crist par gàca le' ryethe mèn co' nzo loo cón che'n Crist, mèn co' ndxela's loo Crist le'n rye nación co' nziri' dib athu loo izlyo', thidte queltàa mèna no thidte gàc mèna loo cón che'n Crist no loo Crist par ñibe' Crist loo mèna. No mbli Crist ngòc na' mèn no nac na' mèn co' mbez con' roo no con' xèn no con' natú' loo mèn cón che'n Diox no co' mbez con' roo no con' xèn no con' natú' loo Diox, ne. Tataa mod ndli na' sirv loo Diox co' nac xud na'. Ndlyazen thidteneque' gàc con' roo no con' xèn loo Crist. No ndlyazen gàc rye loothe con' roo no con' xèn la's nii Crist no la's ya' Crist thidtene. Taandxè' gàca. 
\p  
\v 7 Hui' gu' nexa. Co'se' yi'th Crist, Crist yi'th le'n xcuau. Huiza ryete mèn hui' loo Crist axta mèn co' ngòc leque mèn co' mtehuí' Crist, mèna hui' loo Crist huiza. No ryete mèn co' nzi ban dib athu loo izlyo' gón' co'se' hui' mèna loo Crist huiza. Aa. Tataaque' gàca. 
\p  
\v 8 Gunee Diox di's ndxè' loon, ne: 
\p ―Daa nzole' ndoore' cue alux con'. No nzoquen co'se' yilo lyux alux con'. Cona nee di's, nac daa xal letr “a” co' nac letr co' ntlo loo alfabet. No nac daa xal letr “z” co' nac lult letr loo alfabet. 
\p Tataa gunee Tad Diox loon, Tad Diox co' ndxàp rye loothe con' roo no con' xèn la's nii Tad Diox no la's ya' Tad Diox, Tad Diox co' nzoque' thidtene. 
\s1 Tad Crist co' nac Tad roo no Tad xèn mxyo'f loo loo Juàn. 
\p  
\v 9 Daa co' nac Juàn co' ngue que' ye's loo gu' trè', daa nac hues gu', ne, por cón che'n Crist. Thidte ndyactìi na' loo cón che'n Crist. No thidte ngòo na' loo cón che'n Diox par ñibe'pe' Diox loo na'. No thidte ncha'la's na' no nxec yèe na' xalque' ndlyath no Crist na'. Per nalle' láth nzon trè' le'n thìb yòo biiz le'n níttó' co' lèe Patmos co'te' mque' mèn daa xal pres por mblon yalbàn cón che'n di's ndac che'n Diox no por mdoodizen loo mèn cón che'n Jesucrist, nde tan cuent loo gu'.  
\v 10 Ngòc thìb con' loon thìb huiz doming láth ngue ñibe' Xpii Natú' loon. Mden'en le' Xpii Natú' che'n Diox mbli ngòc thìb con' loon hora. Mxaquen cabii gunii thìb mbi' par ned xísen xal ruid che'n thìb trompet co'se' ncuez mèn trompet.  
\v 11 Mxaquen gunee mbi' loon: 
\p ―Juàn, daa nzole' ndoore' cue alux con'. No nzoquen co'se' yilo lyux alux con'. Cona nee di's, nac daa xal letr “a” co' nac letr co' ntlo loo alfabet. No nac daa xal letr “z” co' nac lult letr loo alfabet. Ndlyazen que'l ye's loo thìb libr cón che'n con' co' ñèel no con' co' ngue hui'l. Yiloa, ftel' libr loo mèn co' nqueltàa loo cón che'n Diox co' nzo ban le'n gaz yèez co' nac yèezya' che'n làaz mèn asia. Rye gaz yèeza lèe taandxè': Efes, Smirn, Perg, Tiatir, Sard, Filadelf, no Laodice. 
\p  
\v 12 Ngoloa, mberen par ned xísen par hui'en chó ngue nii loon. No co'se' mberen, gunèen nziri' gaz candiler or loon.  
\v 13 No xtau'the gaz candilera, gunèen ndoo thìb mbi' co' dib xoo ñaa xal ñaa Jesucrist co' mbi'th yáal loo izlyo' xalque' ndxáal chol mèn loo izlyo' ndxè'. No noc xab Jesucrist thìb xab Jesucrist co' nac dib andoo co' nol' axta nii Jesucrist. No nabix thìb cint or xal nde ro pech Jesucrist.  
\v 14 Le' yis yéc Jesucrist na, ante nagus bèelleque' ñaa xal ñaa xil' mbacxil' co' ndxech. No ante nagus bèelleque' ñaa yis yéc Jesucrist xal ye' co' ante nagus bèelleque' ñaa. Nde ngudloo Jesucrist na, gunaa xal xnìi bèel co' ndxetoo.  
\v 15 Lomisque', nquée xnìi nii Jesucrist xal thìb le' yi'f co' ntembìi mèn co' nsun' mèn le'n gorn. Lomisque', co'se' ndxèn di's co' ndyoodi's Jesucrist, ndxèn di's xal co'se' ndxà'x no nquebii nxyo'f nít thìb yó'be'.  
\v 16 Lomisque' ne, mxaquen, nden Jesucrist gaz con' co' ñaa xal mbèelhui' ya' Jesucrist co' nac ladlì. No ñèen ndryo' thìb spad co' nalen ryop loo ro Jesucrist. Nde nxon', nquée xnìi loo Jesucrist xal co'se' nde yáal rol huiz co'se' ne'xecte ngudloo mèn hui' mèn loo huiz. 
\p  
\v 17 Co'se' gunèen loo Jesucrist, ale ngulàan xàn' nii Jesucrist. Ngulàa yál' lezon no mcuau daa xal thìb mèn co' nguth. Sya, mxo'f Jesucrist ya' Jesucrist co' nac ladlì laden. No gunee Jesucrist loon: 
\p ―Ne'zyebtel, Juàn. Daa nzole' ndoore' cue alux con'. No nzoquen co'se' yilo lyux alux con'.  
\v 18 Nabanque' daa, Juàn. Lìcque', nguth daa. Per nalle' naban daa thidtene. Nac daa xa' co' ndli nquée yalguth loo mèn. No nac daa xa' co' ndli par ryo xban mèn làth mèn nguth yiloa.  
\v 19 Cona, ngue niin lool, Juàn: Fque' ye's co' gàc xal thìb thìb libr cón che'n con' co' gunèelel, no cón che'n con' co' ndxàc nalle', no cón che'n con' co' gàc yiloa.  
\v 20 Trè' lu'en lool cón che'n cón nee di's gaz con' co' ñaa xal ñaa mbèelhui' co' ñèel ndenen con yan ladlì. Lomisque' ne, lu'en lool cón che'n cón nee di's gaz candiler or. Pues cón che'n con' co' ñaa xal gaz mbèelhui' ndlu' cón che'n gaz mèn co' ndyoo ner no co' ndyoo naa loo mèn co' nqueltàa loon le'n gaz yèez co' nac yèezya' che'n làaz mèn asia. Le' cón che'n gaz candiler na, nac co' ndlu' cón che'n mèn co' nqueltàa loo cón chenen le'n gaz yèez co' nacguè' yèezya' che'n làaz mèn asia. 
\c 2  
\s1 Di's co' mnibe' Crist loo Juàn par que' Juàn ye's loo mèn co' nqueltàa loo cón che'n Crist le'n gaz yèeza: Mtel' Juàn ye's co' nac ner cart loo mèn co' nqueltàa loo cón che'n Diox le'n ciuda Efes. 
\p  
\v 1 Gunee Jesucrist loon, ne: Fque' ye's cón che'n con' ndxè' loo mbi' co' ndyoo ner no co' ndyoo naa loo mèn co' nqueltàa loon le'n ciuda Efes par lab mbi'a cart ndxè' loo mèn co' nqueltàa loon le'n ciuda Efes. Guuz no blu' loo mèna loo ye's ndxè': Taandxè' gunee Jesucrist loon, Jesucrist co' nden gaz con' co' ñaa xal mbèelhui' con ya' Jesucrist co' nac ladlì. Gunèen ngue tee Jesucrist xtau' gaz candiler or, ne. Gunee Jesucrist loon: 
\p  
\v 2 ―Naneequen xal nzi tee ban gu'. No naneen axta arid nagàn ndxàca loo gu' no nxec yèe gu' no ncha'la's gu' co'se' ndxàc chol yaltìi loo gu'. No naneen le' gu' ne'nda'de lugar ngòo mèn ye'rsin' làth gu'. No naneen huen huen mbla's gu' no mbli la's gu' ñeene' ché', lìcque', nac mèn co' mbez nde xo'f zin' mèn xal mèn co' ndxe' di's che'n Jesucrist. No mté'th gu' no mda' gu' cuent le' mèna nac mèn gutyè'.  
\v 3 Naneen le' gu' ncha'la'sque' no naneen le' gu' ndyactìique' no anze'f ngue xo'f zin' gu' cón chenen. No axta nalle' tarte tyoo xà' lezo' gu' no tarte yitac lezo' gu' loo cón chenen.  
\v 4 Per nzo thìb con' co' indyublasten no co' indxòode lezon ngue li gu' làth gu' co' nac le' gu' ya inque'de lezo' ñèe gu' hues xtàa gu' xal mque' lezo' gu' ñèe gu' hues xtàa gu' co'se' mtlo gu', mqueltàa gu' loo cón chenen.  
\v 5 Cona, ngue niin loo gu': Fte' yéc gu' no fte' lezo' gu' xá mod mque'que' lezo' gu' gunèe gu' mèn co' ndxac hues xtàa gu' loo cón che'n Jesucrist co' mtlo mbli gu' co'se' mtlo gu' ngòo gu' loo cón chenen. Per nalle' blàa yéc gu' no blàa lezo' gu' no fse' gu' mod co' ndxàp gu' loo Diox. Gure li gu' xalque' nac co' mtlo mbli gu' loo cón chenen co'se' mtlo gu', ngòo gu' loo cón chenen. Tac ne' yiloa, chàa, galen no gacloon ñèen gu' par techeen candiler, co' nee di's, nac gu' loon par, por derech, techeen gu' par más huen ne'tolode yila's mèn loon le'n ciuda Efes. Tataa li non gu' chele' gu' ne'se'de mod ye'rsin' co' ndxàp gu' loo Diox nalle' xal ngue niin loo gu' ndxè'.  
\v 6 Per mastale' tataa ngue li gu', nzo thìb con' co' ngue li gu' co' nzo favor che'n gu' no co' ndli par ndxòo lezon cón che'n gu'. Con'a nac le' gu' ndxeclooque' ñèe mèn co' nqueltàa con gu' co' ne' lèe nicolait. Na, ne, ndxecloo ñèen mèna.  
\v 7 Gu' co' nqueltàa loo cón che'n Diox co' ndub nza no co' ndxaa'd di's, bìn gu' di's co' ndlu' Xpii Natú' che'n Diox loo mèn co' nqueltàa loon chol lugar. Mblu' Xpii Natú' che'n Diox loo mèn taandxè': 
\p ―Ryete gu' co' li gan ryo xà' loo cón che'n xab izlyo', loo gu'a tan lugar par yòo ban no gu' daa thidtene co'te' nzo non Diox. 
\s1 Di's co' mnibe' Jesucrist loo Juàn par que' Juàn ye's loo mèn co' nqueltàa loo cón che'n Diox le'n yèez Smirn. 
\p  
\v 8 Tolo gunee Jesucrist loon, ne: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Smirn par lab mbi' cart ndxè' loo mèn co' nqueltàa loon le'n yèez Smirn. Guuz no blu' loo mèna loo ye's co' que'l loo mèna taandxè': Taandxè gunee Jesucrist loon par tan cuent loo gu' loo ye's ndxè'. Jesucrist gunee loon nzole' Jesucrist ndoore' cue alux con' no nzoque' Jesucrist co'se' yilo lyux alux con', Jesucrist co' nguthque' no mbere Jesucrist, ngro xban Jesucrist tedib vez.  
\v 9 No gunee Jesucrist loon: Daa naneeque' xal nzi tee ban gu'. Naneen co' huen huen le' gu' ngue xecpe' loo cón chenen no nzi tyactìi gu'. No nonen nague's ya' gu' no nague's nii gu' nzi tee gu' loo izlyo' ndxè'. Per naneen ndxàp gu' huax con' ndac loo bé'. Naneen le' mèn co' mbez nac mèna bin mèn nación Israel, ñii yèe ñii tìi mèna cón che'n gu'. Per indlu'de mèna nac mèna mèn nación Israel por con' ye'rsin' co' ndli mèna. Ndxe'leque', naneequen nacpe' mèna mèn co' ndli con' ndlya's Mebizya.  
\v 10 Ne'zyebte gu' loo con' co' tyactìi gu' le'n tiemp ndxè'. Tac Mebizya li par co mèn ndxep gu' lezi'f par ñee Mebizya ñeene' ché' tli Mebizya gan par lá' gu' cón che'n Crist no par bixyath gu' par gàc gu' mèn ye'rsin' tedib vez. Gàc con'a loo gu' nagabte huiz. Per gu' co' toloque' cue nèe loo cón che'n Diox no co' ne'yitacte lezo' loo cón che'n Diox axta gath gu', loo gu'a daa ta' lugar yòo ban no gu' Diox co' gàc loo gu' xal thìb con' ndac co' mbli gu' gan.  
\v 11 Gu' co' nqueltàa loo cón che'n Diox, gu' co' ndub nza no co' ndxaa'd di's, bìn gu' di's co' ndlu' Xpii Natú' loo mèn co' nqueltàa loon chol lugar. Mblu' Xpii Natú' che'n Diox loo mèna taandxè': 
\p ―Ryete gu' co' li gan ryo xà' loo cón che'n xab izlyo', loo gu'a yende chó yalquìi gàc par ryo xà' gu' loo Diox thidtene par tyactìi gu' co'se' gath gu'. 
\s1 Di's co' mnibe' Crist loo Juàn par que' Juàn ye's loo mèn co' nqueltàa loo cón che'n Diox le'n yèez Perg. 
\p  
\v 12 Tolo gunee Crist loon, ne: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Perg. Guuz loo mèna loo ye's co' que'l xal ngue niin lool ndxè': 
\p ―Taandxè' gunee Jesucrist co' ngue no thìb spad co' nalen loo ryop lad par que'en ye's ndxè' loo gu'.  
\v 13 Gunee Jesucrist loon: Daa naneeque' xal nzi tee ban gu'. Naneen le' gu' naban le'n thìb yèez co'te' thidteneque' ndli mèna con' co' ndlya's Mebizya no con' co' nee lezo' Mebizya. Per mastale' tataa ndli mèna, gu' ndli nèeque' gu' loo cón chenen. No thidteneque' ndxela's gu' no ndxàp gu' yalxla's loon. Ne' ne' ngyathla's gu' cón chenen no ne' ne' nglá' gu' cón chenen co'se' ngòc huiz co'se' mbeth mèn Antip co' altant ndyoo nxo'f zin' cón chenen co' mda' cuent cón chenen. Mèn mbeth Antip làth gu' par nedrè' le'n yèez Perg co'te' ndli Mebizya co' ndlya's Mebizya loo mèn.  
\v 14 Per nzoque' ndxep con' co' indxòode lezon ngue li gu' par nedrè'. Daa nanee le' gu' nqueltàa no ndxep mèn co' nac mèn xley' Balaam le'n yèez Perg. No indlya'ste mèna lá' mèna xley' Balaam. Balaam mquil' thìb mbi' co' ngro' lèe Balac póla par aseli Balac le' mèn nación Israel angcue cua'n xtol co'se' hua mèna xít mèn no lua' mèn co' mbec mèn xal thìb gòn o ofrend loo chol mdo'. No làth xtau'a, asembli Balac par li mèn nación Israel yalburrid no cua'n mèna xin' huan mèna.  
\v 15 Lomisque' ne, naneen le' gu' nqueltàa no mèn co' ne'yilode lá' xley' che'n mèn xley' nicolait. Xley' mèna anze'f ndxecloon ñèen.  
\v 16 Por cona, ngue niin loo gu': Fse' gu' mod co' ndxàp gu'. Blàa yéc gu' no blàa lezo' gu' loo con' ye'rsin' co' nzi tee li gu'. Tac ne' yiloa, chàa, gal neen máa gu' par nedrè' no yoon con mèn xley' Balaam no con mèn xley' nicolait par ten' mèna co' lin loo mèna xal co'se' nden' mèn yalnè co'se' ndxaa'd spad lad mèn.  
\v 17 Gu' co' nqueltàa loo cón chenen, gu' co' ndub nza no co' ndxaa'd di's, bìn gu' di's co' ndlu' Xpii Natú' loo mèn co' nqueltàa loon chol lugar. Mbez Xpii Natú': 
\p ―Ryete gu' co' li gan ryo xà' loo cón che'n xab izlyo', na li par que no gu' ryethe con' ndac loo bé' par yende cón gàc co' nde che loo gu' loo bé'. No lin par que no mèn co' ryo xà' loo cón che'n xab izlyo' thìb con' co' angtan co' ante daa nanee cóna par que no mèna. Tataa lin loo mèna xal co'se' nda' mèn thìb quèe nagus bèelleque' loo thìb mèn. Loo quèea ndub thìb lèe mbi' co' yende chó non. Ante mèn co' càaya' quèea non chó mbi' nac che'n lèe co' ndub loo quèea. 
\s1 Di's co' mnibe' Jesucrist loo Juàn par que' Juàn ye's loo mèn co' nqueltàa loo cón che'n Diox le'n yèez Tiatir. 
\p  
\v 18 Tolo gunee Jesucrist loon, ne: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Tiatir par lab mèn cart co' que'l loo mèn co' nqueltàa loon le'n yèez Tiatir. Guuz loo mèn loo ye's ndxè' co' que'l loo mèn xal ngue niin lool ndxè': 
\p ―Taandxè' gunee Xgan' Diox loon, Xgan' Diox co' ñaa ngudloo xal bèel co' ndxetoo no co' nquée xnìi nii xal nquée xnìi yi'f co' mtembìi mèn.  
\v 19 Daa naneeque' xal nzi tee ban gu'. Naneen xá mod nque'que' lezo' gu' ñèe gu' hues xtàa gu' par nedrè' no xá mod ndxàp gu' yalxla's no ndxela's gu' loo cón chenen. No naneen xá mod nxo'f zin' gu' zin' cón chenen loo mèn no xá mod ncha'la's gu' loo yaltìi co' ndyactìi gu' por cón chenen. No naneen más ndxòo yéc gu' nalle' par ndli gu' ryethe con' ndxè' leque co'se' mtlo ngòo gu' loo cón chenen.  
\v 20 Per nzo thìb con' co' indxòode lezon ngue li gu' por nda' gu' lugar nzo thìb xa'got làth gu', mastale' non gu' no nanee gu' ilé'de nac con' ngue li xa'gota làth gu'. Lalque' nac xa'gota xal thìb xa'got co' ngro' lèe Jezabel co' angngo ban póla. Xa'got co' ngo ban póla ngòc thìb xa'got ye'rsin'túb xalque' nac xa'got co' nzo làth gu' nalle'. Tac xa'got co' nzo làth gu' ndxè' mbez le' xa' nde'th cón che'n Diox. Per nquedìi xa' mèn co' nxo'f zin' zin' cón chenen por cón che'n xley' co' ndlu' xa'. No ndli xa' par mtlo mbix yéc mèn par li mèn yalburrid no cua'n mèn xin' huan mèn por cón che'n xa'gota. No ndlu' xa' loo mèn hua mèn xít mèn no lua' mèn co' mbec mèn xal thìb ofrend o gòn loo chol mdo'. No tataa mod ncua'n mèn xquin mèn no xtol mèn.  
\v 21 Daa mda lugar loo xa'gota par bel'que' lyàa yéc xa' no bel'que' lyàa lezo' xa' no se' xa' mod ye'rsin' co' ndxàp xa'. Per indlya'ste xa' lyàa yéc xa' no lyàa lezo' xa' par se' xa' mod co' ndxàp xa'. Ne' ne' indlya's xa' lá' xa' par ne'tolode li xa' con' zab co' ndli xa'.  
\v 22 Per nalle' lin par lyen thìb yíiz loo xa'gota par gaasua' xa' loo lún'. No lomisque', lin par tyactìi mèn co' mbli yalburrid con xa'gota chele' mèna ne'lyàade yéc no chele' mèna ne'lyàade lezo' loo con' ye'rsin' co' ndli mèna no chele' mèna ne'cuedte li xal ndli xa'gota.  
\v 23 No guthen rye mèn co' mda' lugar thìb lìte ngòo mèna loo xley' che'n xa'gota par tataa mod ryete mèn co' nqueltàa loo cón chenen, ta' mèna cuent le' daa nanee no nonen con' co' ndli mèna xtùuz le'n lezo' mèn. No lin par tetìin rye gu' co' ngue li con' ye'rsin'. No lin par tolo gàc con' ndac loo gu', gu' co' ngue li con' ndac.  
\v 24 Per loo tedib ned gu' co' nqueltàa loon co' nzo yèez Tiatir, co' indyoo nquede loo xley' xa'gota no co' tarte ta' cuent no co' tarte ñee cón che'n co' mbez mèn co' ngòo loo cón che'n xa'gota co' nac cón che'npe' Mebizya co' be' nacasloo loo chol mèn, gro' xà' gu' loo xa'gota con mèn co' ngòo loo cón che'n xley' xa'gota làth gu'. Cona'te no más ñibe'en loo gu' par li gu'.  
\v 25 No maste ndlyazen leque gu' fquenap gu' loo con' co' nzi li gu'. No leque gu' fquenap gu' loo mod co' nzi tee ban gu' loo cón chenen axta co'se' gàc huiz co'se' gal xin gu'.  
\v 26 Ryete gu' co' li gan ryo xà' loo cón che'n xab izlyo' no gu' co' ngue lique' con' co' ndxòo lezon no co' ñibe'en loo gu' axta gath gu', na ñibe' le' gu' ñibe' loo mèn chol nación huiza  
\v 27 xalque' mnibe' xuden Diox loon par ñibe'en loo mèn chol nación dib athu loo izlyo'. Tataa ñibe'en loo gu' par ñibe' gu' loo mèn chol nación dib athu loo izlyo'. No ñibe'en loo gu' ñibe' yèepe' gu' loo mèn chol nación dib athu loo izlyo' par gàca co'se' mèna ne'tyalte tyubdi's loo gu', telux gu' mèna xal co'se' ndlé' mèn thìb yàt co'se' ndlàa mèn thìb ro var yi'f lad yàt.  
\v 28 No lin par gàc con' roo con' xèn loo mèna. No lin quée xnìi mèna xal nquée xnìi mbèelhui' co' ndlyen ndxáal xtil' huiza co'se' gal xin mèna.  
\v 29 Gu' co' nqueltàa loo cón che'n Diox, co' ndub nza no co' ndxaa'd di's, bìn gu' di's co' ndlu' Xpii Natú' che'n Diox loo mèn co' nqueltàa loon chol lugar. 
\c 3  
\s1 Di's co' mnibe' Jesucrist loo Juàn par que' Juàn ye's loo mèn co' nqueltàa loo cón che'n Diox le'n yèez Sard. 
\p  
\v 1 Tolo gunee Jesucrist loon, ne: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Sard par gab mbi' loo mèna xal ngue niin lool ndxè': 
\p ―Taandxè' gunee Jesucrist co' nzo Xpii Natú' loo no co' nden gaz con' co' ñaa xal mbèelhui'. Daa naneeque' xal nzi tee ban gu'. Daa nanee le' gu' pente ndxela's loon no pente non gu' no nda' gu' cuent cón chenen mastale' mbez gu', no mbez taamas mèn, altant nzi gu' loo cón chenen.  
\v 2 Nalas gure gu' no bdi'x xnìi yéc gu' no bdi'x xnìi lezo' gu'. No bli nèe gu' gu' loo con' co' be' ndxela's gu' loon. Tac casque' mblá'le' gu' no mbyathla'sle' gu' xal mtlo mbli gu' co'se' mtlo gu', ngola's gu' loon. Ñeen le' con' co' ngue li gu' inacte con' nalì no con' nambìi loo Diox co' nac Diox daa.  
\v 3 Fte' lezo' gu' xal nac co' mté'th gu' no co' mblu'en loo gu'. Ftolo que tee li gu' con'a. No bli gu' par lyàa yéc gu' no lyàa lezo' gu' par se' gu' mod co' ndxàp gu'. Chele' gu' ne'gàcte mèn co' yà'x xnìi yéc no co' yà'x xnìi lezo' par gàc gu' mèn nalas loon no loo cón chenen, nee gu' nee gu'. Tac ne' yiloa, chàa, gal neen máa gu' par nedrè' xal co'se' ne'ta'de mèn cuent ndlyàa huan' no xal co'se' ne'ñeede mèn coyor lyàa huan' liz mèn. Sya, ñee gu' xá ñaa cón gàc loo gu'.  
\v 4 Mastale' tataa ndxàca loo gu', nzoque' ndxep mèn le'n yèez Sard co' nqueltàa no gu'. Mèna incua'nte xquin no xtol par gàc mèna xal thìb con' xin no thìb con' cap loo Diox. Mèna que tee con daa loo bé' por nac mèna mèn nalì no mèn mambìi loon no loo Diox tac tataaque' ndxàal gàca loo mèna.  
\v 5 Mèn co' li gan ryo xà' loo cón che'n xab izlyo', mèna thidtene gàcque' mèn nalì no mèn nambìi loo bé'. No ne'ton'ten lèe mèna loo libr co'te' ndub lèe mèn, mèn co' yòo ban no Diox thidtene. Ndxe'leque', daa ta' cuent loo Diox no loo angl che'n Diox le' mèna nac mèn che'npe' daa.  
\v 6 Gu' co' nqueltàa loo cón che'n Diox, gu' co' ndub nza no co' ndxaa'd di's, bìn gu' di's co' ndlu' Xpii Natú' loo mèn co' nqueltàa loo cón che'n Diox chol lugar. 
\s1 Di's co' mnibe' Jesucrist loo Juàn par que' Juàn ye's loo mèn co' nqueltàa loo cón che'n Diox le'n yèez Filadelf. 
\p  
\v 7 Tolo gunee Jesucrist loon: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Filadelf par lab mbi' cart ndxè' loo mèn co' nqueltàa loon le'n yèez Filadelf. Guuz loo mèna xal ngue niin lool ndxè': 
\p ―Taandxè' gunee Jesucrist loon, Jesucrist co' nac xa' natú' no co' nac lìcpe' Jesucrist co' ndxàp rye loothe con' roo no con' xèn la's nii Jesucrist no la's ya' Jesucrist par ñibe' Jesucrist loo ryethe con' loo bé' no loo izlyo', Jesucrist co' nac thidte xa' co' ñibe' loo mèn par thìb lìte yòo mèn loo bé' loo Diox no co' ñibe' loo taamas mèn par ne'yòo ban node mèna Diox loo bé':  
\v 8 Daa naneeque' xal nzi tee ban gu'. Daa mbli mxyal' ned mxyal' yó' loo gu' par ya lo gu' yalbàn no te'th gu' loo taamas mèn cón chenen. No mblin par yende chó mèn tau' ned tau' yó' loo gu' par ca' mèna loo gu' par ne'tolode co gu' yalbàn cón chenen. Mastale' be'te' ndxàp gu' fuerz no be'te' ndxác gu' co gu' yalbàn no te'th gu' loo mèn cón chenen, naneen le' gu' ndlique' cas di's ndac co' mtan'en di's loo gu' no ne' ne' tar cà' di's gu' lèen, co' nac daa.  
\v 9 Por cona, lin thìb con'. Lin le' mèn co' nqueltàa loo cón che'n Mebizya, co' nac mèn gutyè', co' mbez le' mèna nac mèn nación Israel per ilìcte nac mèna mèn nación Israel, loo mèna na li le' mèna tyub xib loo gu' par ñee mèna no ta' mèna cuent le' daa nque'que' lezo' ñèen gu'.  
\v 10 Gu' mcha'la's no mxec yèe gu' loo chol yalquìi xal mnibe'en loo gu'. Por cona, daa ne'lá'ya'de gu'. Quenapen gu' co'se' gàc tiemp li Diox con' ryes loo mèn no tetìi Diox mèn axta plóthe, mèn co' naban dib athu loo izlyo', mèn co' ne'ngala'ste loo Diox no loo cón che'n Diox.  
\v 11 Hui' gu' nexa. Daa ne'lyen'te par gal xin gu'. Ftolo que tee ban ndac gu' loo cón chenen xal mté'th gu' no xal non gu' cón chenen par gàca loo gu' yende chó mèn cuee cà' gu' par li mèna gan ne'yòo ban node gu' Diox thidtene co'se' gath gu'.  
\v 12 Mèn co' li gan ryo xà' loo cón che'n xab izlyo', na li le' mèna yòo loo Diox loo bé' par thidtene yo no mèna Diox. No lin le' mèna yan' loo Diox xal thìb pilar o nac mèna xal nii arc che'n thìb yòobé' co' yende chó cuin no co' yende chó cobii. No lin par tyub lèe mèna le' mèna nac mèn che'npe' Diox. No lin le' mèna gàc mènpe' ciuda Jerusalén co' cue yiloa co' li Diox ryo' loo bé' par lyàa ciudaa loo izlyo'. No lin le' mèna yo no daa thidtene par thidteneque' gàc con' roo con' xèn loon con mèna.  
\v 13 Gu' co' nqueltàa loo cón che'n Diox, gu' co' ndub nza no co' ndxaa'd di's, bìn gu' di's co' ndlu' Xpii Natú' loo mèn co' nqueltàa loon chol lugar. 
\s1 Di's co' mtel' Jesucrist loo mèn co' nqueltàa loo cón che'n Diox le'n yèez Laodice. 
\p  
\v 14 Tolo gunee Jesucrist loon, ne: Juàn, fque' ye's loo mbi' co' ndyoo ner no co' ndyoo naa loo mèn co' nqueltàa loo cón chenen le'n yèez Laodice par lab mbi' cart ndxè' loo mèn co' nqueltàa loon le'n yèez Laodice. Guuz loo mèna cón che'n di's ndxè' xal ngue niina lool ndxè': 
\p ―Taandxè' gunee Jesucrist loon, Jesucrist co' nac mbi' nalì no mbi' nambìi co' inquedìide. Jesucrist nacpe' thìb xa' co' nalì nda' cuent. No di's co' nda' Jesucrist cuenta nac di's lìcpe'. Por cón che'n Jesucrist mblec Diox no mtoxcua' Diox ryethe con' co' nzo loo bé' no ryethe con' co' nziri' loo izlyo'.  
\v 15 Daa naneeque' xal nzi tee ban gu'. Naneen le' gu' indxela's ndacte loon co' huenleque'. No naneen imbede gu' altant loo cón chenen par lu' gu' cón chenen loo mèn. Alithe nziri' gu' loo cón chenen. Indyóode gu' cón chenen. ¡Oj, ché' co' gàc gu' mèn co' altant cue loo cón chenen, huen! O más huen ndoo lìte ryo' gu' loo cón chenen thidtene. Nee teeca.  
\v 16 Per com le' gu' alithe nziri' loo cón chenen, no indlide gu' cas loo cón chenen, ne' ne' inac gu' mèn co' gab thidtene lá' gu' cón chenen, no ne' ne' inac gu' mèn co' gab altant tyoo gu' loo cón chenen, leque daa li thidtene go'en gu' làth mèn co' nzo loo cón chenen xal co'se' ndli mal con' nduhua mèn lezo' mèn no mbere lezo' mèn con' nduhua mèn. Tataa lin par go'en gu' loo cón chenen thidtene.  
\v 17 Gu' mbez anze'f ndxác gu' non gu' cón chenen. No mbez gu' huen huen mté'th gu' cón chenen. No mbez gu' anze'f huen nziri' gu' loo cón chenen. No mbez gu' yende chó loo con' ndxetoo gu' loo cón chenen. Per ne'ta'de gu' cuent le' loo cón chenen nac gu' xal mèn co' nzi tee yilo yilux, no xal mèn co' nalyat ñaa co' ndyac yaltìi, no xal mèn sieu, no xal mèn co' nquée mbii yéc co' nzi tee che.  
\v 18 Por cona, ngue co'xen loo gu' thìb lìte yòo gu' loo cón chenen par huen té'th gu'. No tyubdi's gu' co' niin loo gu' par gàc gu' mèn nalì no mèn nambìi loon xal mèn co' ndxoc xab lar' nagus bèelleque' par ne'cuede gu' loon xal mèn co' nzi tee che par tataa mod lu' gu' nthyonque' gu' ñèe gu' daa. No bna'b gu' loon par lin par tyub xnìi yéc gu' no tyub xnìi lezo' gu' loo cón chenen.  
\v 19 Daa ngyoo mèn no nco'xen mèn, mèn co' nque' lezon ñèen. Cóna, ndlyazen ndxàal gàc gu' mèn co' tyoo altant loo cón chenen no mèn co' ten' cón chenen no mèn co' ta' cuent cón chenen. No ndlyazen, por derech, blàa yéc gu' no blàa lezo' gu' par zye' mod ye'rsin' co' ndxàp gu' loo cón chenen par ned nzo gu' ndxè'.  
\v 20 Hui' gu' nexa. Daa nac xal mèn co' ngue bez mèn ro puert liz mèn. Ngue beden par gòn gu' ron par tataa mod xal' gu' lezo' gu' no xal' gu' xtùuz gu' par tyal gu' ñibe'en loo gu' xal ndxàal gàca. No chele' gu' ndxòn di's co' ngue niin loo gu' ndxè', le' sya, thidte gàc na' loo cón chenen.  
\v 21 Mèn co' li gan ryo xà' loo cón che'n xab izlyo', daa li gàc loo mèna thidte yo no mèna daa co'se' gàc huiz ñibe'en loo alux con'. Ndlyazen tataa gàca loo mèna xalque' co'se' ngolo mblin gan loo Mebizya co'se' mque tee'en loo izlyo'. Por cona, nalle' thidte nac daa con xuden Diox loo alux con' co' ñibe' xuden Diox.  
\v 22 Gu' co' nqueltàa loon co' ndxòn di's no co' ndxaa'd di's, bìn gu' di's co' ñii Xpii Natú' che'n Diox loo gu'. 
\c 4  
\s1 Juàn ngue lu' le' alux mèn co' nzo loo bé' loo Diox, mèna ndyub xib loo Diox no ncòo' mèna yéc mèna loo Diox. 
\p  
\v 1 Ngolo mblu' Jesucrist loon par mque'en ye's loo mèna, ale mxaquen mdoo xal' thìb puert loon loo bé' par mbui'en le'n bé'. No, chàa, mbìnen thìb di's co' mxaquen mbyèn xal co'se' cabii ncuez mèn thìb trompet. Mbìnen gunee thìb mbi' loon co' ngòc leque mbi' co' nerleque' gunii loon. Gunee mbi' loon: 
\p ―Fquée trè', Juàn, par lu'en ryethe con' co' gàc loo mèn loo izlyo' le'n tiemp co' yi'th nque. 
\p  
\v 2 Leque hora, mbli Xpii Natú' che'n Diox par, chàa, nguan le'n loo bé'. No mbli Xpii Natú' che'n Diox mbui'en thìb asient co'te' ndyub Diox co'te' ñibe' Diox le'n loo bé'. No gunèen ndub thìb mbi' loo asienta.  
\v 3 Mbi' co' ndub loo asienta, ante ndxaa'd xnìi mbi'a no ndxaa'd bèel mbi'a xal ndxaa'd xnìi no ndxaa'd bèel thìb loo quèe co' lèe quèe jasp no xal tedib loo quèe co' nquéeguè' xnìi co' lèe quèe cornalin. Dib vuelt loo asient co'te' ndub Diox gunèen ndoo thìb arc mbèel qui'th. Arc co' nac mbèel qui'tha ndxaa'd xnìi no ndxaa'd bèel xal ndxaa'd bèel no xal ndxaa'd xnìi loo thìb loo quèe co' lèe quèe esmerald.  
\v 4 Gunèen nziri' taagal fthap asient dib vuelt loo asient co'te' ndub Diox. Loo asienta ndub thìb thìb mèngool co' ngòc gal fthap mèngool. Mèngoola noc xab ampurte lar' nagus bèelleque'. No gunèen nzi'f anabte coron or yéc rye mèngoola.  
\v 5 No gunèen ndxà'x bèel gundi co'te' ndub mbi' loo asient co' ndoo xtau' taamas asient. Mbìnen ngulàa gundi no ndxas ndlya'b gundii. No gunèen nzi'f yol gaz manoj ye'rbèel loo asient co' ndoo xtau' taamas asient. Gaz manoj ye'rbèel co' nzi'f yola ndlu' cón che'n Xpii Natú' che'n Diox.  
\v 6 Gunèen, ne, co'te' ndoo asienta nziri' thìb con' co' ñaa xal ñaa níttó' co' xèe nziri' co' ndri'th xnìi par xís xal vidr. 
\p Xtau'the con' co' ñaa xal ñaa níttó'a no dib vuelt co'te' ndoo asient co' mbui'en nera mxaquen nziri' thap con' co' ñaa xal thap loo má' co' naban. Má'a nzib ngudloo ned loo má' no ned xís má'. Dib lad má'a nzib ngudloo má'.  
\v 7 Ner má' ñaa loo xal ñaa thìb mbee's co' ndoo yis lox yen. Le' mbryop má' na, ñaa loo xal ñaa thìb laa ngon. Le' mbyon má' na, ñaa loo xal ñaa loo thìb mbi'. Le' dyap má' na, ñaa loo xal ñaa thìb mtii co' nxobii.  
\v 8 Dyap loo con' co' ñaa xal má' co' nabana, thìb thìb má'a mque no xop xíl'. Par le'n xíl' má' no par xís xíl' má' gunèen nzib ngudloo má'. No ze no yál' thidtene mbez má': 
\pi1 Anze'f natú' nac U', Tad Diox, U' co' ndxàp rye loothe con' roo no con' xèn la's nii U' no la's ya' U', U' co' thidteneque' nzo. 
\p  
\v 9 No cadque' co'se' mbez dyap má' co' nabana, mbez má': Con' roo con' xèn nac U', Tad. No be' taaguè' mbez má': 
\pi1 Ante loo U' tolo gàc con' guryath no con' guryèn. 
\m Mbez má', ne: 
\pi1 Diox quix non U' 
\m loo Diox co' ndub loo asient co' ndoo xtau' loo rye asient, Diox co' thidteneque' naban.  
\v 10 Lomisque' tiemp, ne, ryete gal fthap mèngool co' ndub loo gal fthap asient co' ndoo dib vuelt loo asient co' ndoo xtau'a, ndyub xib loo Diox co' ndub loo asient co' ndoo xtau'a, Diox co' thidtene naban. No mbec mèngoola coron co' ndub yéc mèngoola xàn' nii Diox co' ndub loo asienta. No mbez mèngoola loo Diox: 
\pi1  
\v 11 Tad, U' co' nac Diox nu', thidte U' nac Diox co' ndxàal ñee mèn loo le' U' nac Diox roo no Diox xèn. No loo U' ndxàal ñee mèn di's co' nac di's guryath no di's guryèn. No thidte U' nac Diox co' ndxàalpe' ñibe' loo alux con' co' mblec U' xalque' ndli U'. Tac U' mbli par mblec U' no mxèn' U' izlyo' no ryethe con' co' nziri' loo izlyo' no co' ndxú' loo bé'. No mbli U' ryethe con' co' nac izlyo' no ryethe con' co' nac bé' xal gunee lezo' U'. 
\c 5  
\s1 Juàn ngue ta' cuent mxyo'f loo thìb libr no mxyo'f loo thìb mbacxil' yen' loo Juàn. 
\p  
\v 1 Lomisque' mxaquen ne, ale mxyo'f loo loon le' mbi' co' mdub loo asienta nzo thìb roll ye's co' nadùuz ya' mbi' co' nac ladlì. Loo ye'sa ndub di's par xís ye's no ndub di's par le'n ye's. No natedó' ye's co' nadùuza con gaz le' cint co' lèe flej.  
\v 2 No gunèen thìb angl co' nac thìb angl roo angl xèn. Angla mnibdi's loo rye mèn co' nzi tya. Cabii mnibdi's angl: 
\p ―¿Chó thìb gu' ndxàal xac cint co' natedó' lad ye's co' nadùuz co' nzo ya' xa' co' ndub loo asient ba', yey? 
\p  
\v 3 Per ne' loo bé', no ne' loo izlyo', no ne' le'n ye'rbìil ne'ngode mèn co' ngác nxac cint co' natedó' lad ye's co' nadùuza. No ne' ne' ngác mèn hui' mèn loo ye'sa, ne, tant mzyeb mèn cón che'n con'a.  
\v 4 Le' daa na, ne' tí' yéquen no ne' tí' lezon mbínen tac yende chó ngác nxac cint lad ye's co' nadùuza. Ne' ne' yen chó gác lab ye'sa. Ne' ne' yen chó gác hui' loo ye'sa.  
\v 5 Sya, thìb mèngool co' nzo làtha gunee loon: 
\p ―Ne'tolode gón'l, Juàn. Mbi' co' ne' tedib lèe xal lèe Mbee's, mbi' co' nac bin che'n thìb mbi' co' ngro' lèe Judá co' mbloj msi' bin co' nac thìb ned mèn co' nac che'n mèn nación Israel, mbi'a nac bin che'n thìb mbi' co' ngro' lèe David co' ngòc rey póla. No nac mbi' thìb mbi' roo no thìb mbi' xèn. Mbi'a mblile' gan par mbli Diox ndxàp mbi' con' la's nii mbi' no la's ya' mbi' par gác mbi' cho' mbi' gaz le' cint co' lèe flej co' natedó' ye's co' nadùuz ba'. No yiloa xal' mbi' loo ye's ba' par tlo li mbi' gàc yaltìi loo mèn loo izlyo'. 
\p  
\v 6 Látha, mxaquen gunèen ndoo thìb mbacxil' yen' loo asient co' ndoo xtau'the loo rye mèngoola no loo dyap má' co' nabana. Mbacxil'a nee di's nac Jesucrist. Mxaquen ale ñaa mbacxil'a xal ñaa mbacxil' co' mbeth mèn no co' ngro xban tedib vez. Mxaquen le' yéc mbacxil'a ndub gaz cach. No mxaquen nzi'f gaz ngudloo mbacxil' lad yéc mbacxil'. Per rye gaz ngudloo mbacxil'a, co' nac Jesucrist co' mbyú' loo loon, nee di's ndlu' cón che'n Xpii Natú' che'n Diox co' mtel' Diox loo izlyo'.  
\v 7 Gunèen ngo che mbacxil' co' nac yub Jesucrist. Ngua mbacxil', co' nac Jesucrist, co'te' ndub Diox co' ndub loo asient co' ndoo xtau'the loo rye mèna. Mxen Jesucrist ye's co' nadùuz co' nzo ya' Diox ladli.  
\v 8 Co'se' ngolo mxen Jesucrist ye's co' nadùuza, dyap má' co' naban co' nziri'a no ryete gal fthap mèngool co' nziri'a mdub xib loo Jesucrist. Nde nxon', thìb thìb mèngool nden arp. No ngue no thìb thìb mèngoola thìb loo cop or ya' mèngoola. Le'n cop ora mzyè du'r yal', co' nee di's, nac di's co' mbez mèn loo Diox co'se' mbez mèn Diox, mèn co' nzo loo cón che'n Diox.  
\v 9 No mbil' ro rye mèna thìb himn cub co' nac di's ndxè': 
\pi1 Thidte U' co' nac Tad Jesucrist nac xa' co' ndxàal tyen ye's co' nadùuz ndxè' no xac U' rye gaz le' cint co' natedó' ye'sa. Tac mèn mbeth U'. No con ren ladpe' U' co' mxyo co'se' mbeth mèn U', con rena mxi' U' nu' loo con' ryes no mblá' U' nu' par ngòc nu' mèn co' ngòole' loo cón che'n Diox, nu' co nac mèn chol bin, no co' nac mèn co' ndyoodi's chol di'stèe, no co' nac mèn chol nación. 
\pi1  
\v 10 Mbli U' par nac nu' mèn nacionpe' U' par ñibe' U' loo nu'. No mbli U' nac nu' mèn co' mbez con' roo no con' xèn no con' natú' nac Diox loo mèn. Nac nu' mèn co' mbez con' roo no con' xèn no con' natú' loo Diox, ne. Tataa mod nxo'f zin' nu' zin' co' mxo'f zin' U' loo nu'. Ndli nu' sirv loo U', Tad. No ñibe' no nu' U' loo izlyo' yiloa. 
\p  
\v 11 Ngoloa, chàa, gunèen huax angl. No mbìnen di's co' gunii rye angla. Angla ngureri' gax co'te' ndoo ner asient co'te' ndub Diox, co' nee di's, dib vuelt ned xís rye gal fthap mèngool co' nzi ndub no ned xís dyap má' co' nabana. Angl co' ngureri'a ngòc anglléy' co' yende chó mèn ngác ndlab.  
\v 12 Cabii mbez rye angla, ne: 
\pi1 Loo Jesucrist co' ngòc xal mbacxil' co' mbeth mèn, loo Jesucrist ndxàal ñibe' Diox par ñibe' Jesucrist loo alux con'. No ndxàal gàc che'npe' Jesucrist ryethe con' co' nziri'. No ndxàal gàc che'npe' Jesucrist ryethe con' co' ndxác Diox no ryethe con' co' ndxác Diox ndli Diox. No loo mbacxil' co' nac Jesucrist ndxàal li ryethe mèn, no ryethe angl, no ryethe taamas con' co' nzo loo bé' no co' nziri' loo izlyo' par gàc con' guryath no con' guryèn loo Jesucrist. No ndxàal gàc le' ryethe mèn, no ryethe angl, no taamas con' tolo li par gàc Jesucrist xa' roo no xa' xèn loo ryethe con'. No ndxàal gab mèn, no angl, no taamas con' con' roo no con' xèn cón che'n Jesucrist loo taamas mèn. 
\p  
\v 13 No mbìnen gunii ryethe con' co' mxèn' Diox no co' mblec Diox, que naca con' co' nzo loo bé', que naca con' co' nziri' loo izlyo', que naca con' co' nzo xàn' le'n izlyo', co' nee di's, ye'rbìil, que naca con' co' nzo loo níttó' no le'n níttó' loo Diox co' ndub loo asient no loo Jesucrist co' ndoo loo Diox. Mbez ryethe con'a: 
\pi1 Diox roo no Diox xèn nac Diox no con' roo no con' xèn mbli Diox. Diox guryath no Diox guryèn nac Diox. Gàc con' roo no con' xèn loo Diox thidtene. No ta' na' lugar gàc nado' na' loo Diox thidtene, loo Diox co' ndub loo asient. No loo Jesucrist co' ndoo loo Diox mbez na' rye con'a. Ndlya's na' gàc con'a loo Diox no loo Jesucrist thidtene. 
\p  
\v 14 Le' dyap má' co' naban co' nziri'a mbez taandxè', ne: 
\p ―Aa. Tataaque' gàca. 
\p Lomisque' ne, ryete gal fthap mèngool mdub xib loo Diox co' ndub loo asient. No mcòo' mèngoola yéc mèngoola loo Diox, Diox co' naban thidtene. 
\c 6  
\s1 Trè' ndlu' cón che'n gaz cint co' nac flej. 
\p  
\v 1 Láth be' ndyaquen be' ndoon loo bé', mxaquen gunèen le' mbacxil' co' ngòc Jesucrist mcho' ner cint co' nac gaz cint co' nac flej. Ngoloa, mbìnen gunii thìb má' co' nac dyap má' co' naban con thìb bii co' mbyèn xal co'se' ndlyàa gundii. Gunee má' loon: 
\p ―Que de par ndxè', Juàn, sya, hui'l cón gàc. 
\p  
\v 2 Sya, nguan co'te' nzi má'. Gunèen ndoo thìb huay color nagus tya. Ndub thìb mbi' huay. No nzo thìb huad ya' mbi'. No mxaquen gunèen mdub thìb xa' thìb coron yéc mbi' tac mbli mbi' gan loo huax xó' loo mèn loo izlyo'. Ngoloa, nda mbi' tedib vez par tolo li mbi' gan huax xó' loo mèn loo izlyo'. 
\p  
\v 3 Co'se' mcho' Jesucrist mbryop cint co' nac flej, mbìnen gunee mbryop má' co' naban loon: 
\p ―Que de par ndxè', Juàn, sya, hui'l cón gàc. 
\p  
\v 4 Sya, nguan co'te' nzi má'a. Mberen, mxaquen gunèen ndoo tedib huay color nane. Le' mbi' co' ndub huay na, loo mbi'a mbli Diox par gàp mbi' huax con' la's nii mbi' no la's ya' mbi' par gàc mbi' yis yaa loo mèn loo izlyo'. No li mbi' le' mèna guth thìb xtàa mèn no tedib xtàa mèn. No mda' thìb mbi' thìb spad roo mcàa mbi' par li mbi' con' co' li mbi'. 
\p  
\v 5 Co'se' mcho' Crist mbyon cint co' nac flej, mbìnen gunii mbyon má' co' naban. Gunee má' loon: 
\p ―Que de par ndxè', Juàn, sya, hui'l cón gàc. 
\p Sya, nguan co'te' nzi má'a. Mberen, mxaquen gunèen ndoo thìb huay color nagat. Le' mbi' co' ndub huay na, nzo thìb balans ya'.  
\v 6 Mbìnen, ne, mbyèn thìb di's làth dyap má' co' nabana co' mbez: 
\p ―Ante dyo' thìb kil triu por xop pes co' ndli mèn gan thìb huiz zin'. No dyo' son kil nzob triu, co' lèe sabad, por xop pes co' ndli mèn gan thìb huiz zin'. Per indlyasten teluxl aceit ya guy no vin. 
\p  
\v 7 Co'se' mcho' Jesucrist dyap cint co' nac flej, mbìnen gunii dyap má' co' naban. Gunee má'a loon: 
\p ―Que de par ndxè', Juàn, sya, hui'l cón gàc. 
\p  
\v 8 Nguan co'te' nzi má'a. Sya, mxaquen mbui'en ndoo thìb huay color guu's loo má'a. Le' mbi' co' ndub huay na, lèe yalguth. Xís mbi' tolo nde nque taamas con' co' tolo tyactìi mèn. No leque yub Diox mda' lugar par ngòp mbi' con' la's nii mbi' no con' la's ya' mbi' par li mbi' gath thìb part mèn co' nac thap part mèn co' nzo dib athu loo izlyo'. Li mbi' par gath mèn loo xó'. Li mbi' par gath huin mèn. Li mbi' par gath mèn loo yilíiz. Li mbi' par guth má' huan co' nzo yii den loo izlyo' mèn. No gunèen ngue dó' ye'rbìil par ned xís huay, co' nee di's, le'n ye'rbìil lyàa rye mèn ye'rsin' ndxè' co' li mbi' gath. 
\p  
\v 9 Co'se' mcho' Crist ga'y cint co' nac flej, gunèen alm no xpii mèn co' nguth por cón che'n di's ndac che'n Diox no por ngo mèn yalbàn no mda' mèn cuent cón che'n Diox loo xtàa mèn no maste. Alma no xpiia nzo xàn' mes, co' nee di's, nac loo còo' loo Diox.  
\v 10 Cabii mbez alma no xpiia loo Diox: 
\p ―Tad, U' co' nac Tad natú' no U' co' nac lìcpe' Tad co' ndlique' xal ncàbgòn U' li U' loo mèn, ¿axta pól tub rez U' no co xtàa U' loo mèn xalque' mbli no mèn nu' co'se' mbeth mèn nu' loo izlyo', à', Tad? 
\p  
\v 11 Leque sya, gunèen mdoc thìb thìb alma no xpiia xab alm no xpii co' nac lar' nagus. No mbìnen di's co' gunii Diox loo alma no loo xpiia: 
\p ―Bli gu' descans taandxepte tiemp axta tyaa tant mèn co' gath xal nguth gu' por mxo'f zin' mèna cón che'n Jesucrist. Mèna gàc mèn hues xtàa gu' por cón che'n Jesucrist co' guth yèe mèn loo izlyo'. 
\p  
\v 12 Co'se' mcho' Crist xop cint co' nac flej co' nde nque, láth ndoo hui'en loo con'a, chàa, mbuin thìb xòo brut. Nde nxon', ale mcuau loo huiz. Gunaa loo huiz xal ñaa thìb le' lar' nagat, co' nee di's, thidtene mcuau xin no mcuau yat loo izlyo'. Lomisque' ne, dib loo mbe' gunaa xal ñaa ren.  
\v 13 No gunèen ngòb huax mbèelhui' co' nzi'f loo bé' loo izlyo'. Ngòb mbèela loo izlyo' xal co'se' ngol' mbii yaa ngud yaa ngue's no ndxàb angslyo rye nguud yen' loo yòo.  
\v 14 Nde nxon', chàa, mdyon' loo bé'. Mxaquen mdyùuz loo bé' xal co'se' nthùuz mèn thìb le' ye's. Le' rye yii no rye den na, mbuin no mzye' yii den co'te' mdub yii den. Lomisque' ne, mbuin rye yòo biiz co' ngureri' le'n níttó'. No mzye' yòo biiz co'te' nziri' yòo biiz le'n níttó'.  
\v 15 Le' rye mèn co' mnibe' dib athu loo izlyo' na, mèn co' ngòc rey, mèn co' ngòc gobiern, mèn co' ngòc mèn nac zin', ryete mèna mcasloo le'n ye'r quèe co' ndub le'n yii no co' ndub le'n den. Thidte mcasloo mèna con rye mèn roo no rye mèn xèn, con rye mèn ric, con rye mèn co' ñibe' loo solndad, con rye mèn co' ngòp con' la's nii no la's ya', no con rye mèn co' ngòc moz yèe, no con rye mèn co' ngòc mèn co' yende chó mèn ñii loo co' yende chó mèn nguree ncà, ne.  
\v 16 Ryete mèna ngure rez loo yii no loo quèe rhue': 
\p ―Ngàc gu' cón ngàc gu'. Huen gulàa gu' loo nu'. No casloo gu' nu' loo Diox co' ndub loo asient par lyá' nu' loo yaltìi tín' co' li Mbacxil' co' nac Jesucrist loo nu' yiloa. 
\p  
\v 17 ¡Ay, Dio's!, nase mzinle' huiz co'se' tetìi U' nu', por derech, no ¿chó nu' xec loo yaltìi co' li U' loo nu'? Yende mod xec nu', yey. 
\c 7  
\s1 Trè' ndlu' cón che'n mèn co' nac si' fchop bin mèn nación Israel. 
\p  
\v 1 Co'se' ngolo gunèen ryethe con'a, mxaquen gunèen thap angl co' ndoo dyap lad ro izlyo'. Angla ngue tau' loo mbii dyap lad ro izlyo' par ne'xyo'fte mbii thidtene chol lugar loo izlyo' no ne'xyo'fte mbii loo níttó', ne. No ngure xee mbii axta nec thìb laa ne'ngüinte loo yaa loo izlyo' no axta nec thìb le' yix ne'ngüinte loo izlyo'.  
\v 2 No gunèen tedib angl co' nde par ned ndlyen huiz. Angla ngo thìb sell che'n Diox ya', Diox co' naban thidtene. Angla cabii ngrozèe loo dyap angl co' nziri' dyap lad ro izlyo' co' mbli Diox par ngòp angl con' la's nii angl no con' la's ya' angl par li angl yalquìi loo izlyo' no loo níttó'. Ndxab angla loo dyap angl: 
\p  
\v 3 ―Ne'lide gu' yalquìi loo izlyo', ne' loo níttó', ne' loo chol yaa nayèe co'se' tarte que' nu' sell lechuz mèn co' nxo'f zin' zin' cón che'n Diox na'. 
\p  
\v 4 Ngoloa, mbìnen plópe' mèn ngòc mèn co' mquée sell lechuz tiempa. Loo rye mèna ngòc thìb ayo nzo cho' fthap mil mèn, mèn co' nac ante bin mèn co' nac si' fchop ned mèn co' nac mèn nación Israel.  
\v 5 Mquée sell lechuz si' fchop mil mèn co' ngòc bin che'n thìb mbi' co' ngro' lèe Judá. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Rubén.  
\v 6 Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Gad. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Aser. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Neftalí. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Manasés.  
\v 7 Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Simeón. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Leví. Mquée sell lechuz taasi' fchop mil mèn co' ngòc bin thìb mbi' co' ngro' lèe Isacar.  
\v 8 Mquée sell lechuz taasi' fchop mil mèn co' ngòc bin che'n thìb mbi' co' ngro' lèe Zabulón. Mquée sell lechuz taasi' fchop mil mèn co' ngòc bin che'n thìb mbi' co' ngro' lèe José. No mquée sell lechuz taasi' fchop mil mèn co' ngòc bin che'n thìb mbi' co' ngro' lèe Benjamín. 
\s1 Trè' ndlu' le' Juàn gunèe mènléy' co' noc xab anabte lar' nagus. 
\p  
\v 9 Ngolo gunèen mquée sell lechuz rye mèna, chàa, mxaquen gunèen nziri' huax mèn co' nac che'n ryethe nación no co' nac che'n ryethe bin mèn co' ndyoodi's chol di'stèe, co' nee di's, nac mèn dib athu loo izlyo'. Nziri' mèna. Nzi ndoo ga' mèna dib vuelt loo Diox no loo Mbacxil' co' nac leque Jesucrist co'te' ndub Diox loo asient. No nec thìb mèn ne'ngácte ndlab mèna tant thìb mèna nziri'. No noc xab mèna anabte lar' nagus. No ryete mèna nzo thìb thìb yin ya'.  
\v 10 Ryete mèna cabii mbez yèe. Mbez mèna: 
\pi1 Diox na' co' ndub ñibe' loo asient nac xa' co' mtelá' na' loo con' ryes. Diox mbli con'a loo na' por cón che'n mbacxil' co' nac leque Jesucrist. 
\m  
\v 11 Nde nxon', ryete angl nzi ndoo ga' dib vuelt loo Diox co' ndub loo asient no dib vuelt loo rye mèngool no loo thap má' co' ñèen naban. Co'se' ngolo tataa ngurez ryete mèna, ryete angla mcotloo loo yòo loo Diox co' ndub loo asient. No mcòo' angl yéc angl loo Diox.  
\v 12 Mbez angl: 
\pi1 Tatua' gàca. Gab na' di's roo no di's xèn no di's natú' cón che'n Diox loo mèn. No lomisque', ndlya's na' ante loo Diox tolo gàc con' roo no con' xèn thidtene. Lomisque' ne, gab na' ante Diox nac xa' co' ndxác alux con'. No ante loo Diox gab na': Diox quix non U', Tad Diox, por ryethe con' ndac co' mbli U' loo nu'. Ante loo U' gàc ryethe con' guryath no con' guryèn por cón che'n ryethe con' roo no con' xèn co' ndxàp U' la's ya' U' no co' ndxàp U' la's nii U', Tad Diox. Loo U' co' nac Diox nu' gàc ryethe con' ndxè' le'n rye lín' co' ntlo, no le'n rye lín' co' ndxelo, no le'n rye lín' co' ne'lith node. Taandxè' gàca. 
\p  
\v 13 Ngoloa, asembli thìb mèngool co' nziri'a, mnibdi's mèngool loon: 
\p ―Juàn, ¿chó mèn nac mèn co' noc anabte lar' nagus no ché' yende pá ñeel pá ned nde mèna, ne, à'? 
\p  
\v 14 Daa ndxab loo mèngoola: 
\p ―Tad, U' non cón che'n mèna. Per daa yende cón naneen cón che'n mèn ba'. 
\p Sya, gunee mèngoola loon: 
\p ―Mèna nac mèn co' anze'f thìb con' mxactìi por cón che'n yaltìi tín' co' ngòc loo mèna por ngòo mèna loo cón che'n Diox. Mèna ngòc mèn nambìi no mèn nalì loo Diox por cón che'n ren Jesucrist co'se' nguth Jesucrist loo cruz.  
\v 15 Por cona, nzo mèna loo Diox thidtene co'te' ndub Diox loo asient che'n Diox par ndli mèna mandad loo Diox co' ndub ñibe' loo asient ze no yál'. Le' Diox na, Diox yo ban no mèna par quenap Diox mèna loo Diox.  
\v 16 Mèna ya ne'gath huinte no ya ne'gath nítte. Ne' ne' so' bé' mèna. Ne' ne' guin rso' che'n huiz mèna tya.  
\v 17 Tataa gàca loo mèna tac Mbacxil' co' nac leque Jesucrist co' ndoo loo Diox co'te' nzo Diox, Jesucrist thidtene nzo no mèna par li Jesucrist con' ndac loo mèna xal ndli thìb pastor con' ndac loo mbacxil' pastor. No li Jesucrist par thidtene gàc thìb yalnaban ndac tín' loo bé' loo mèna. No leque hora, li Diox ya ne'tolode gón mèna thidtene. 
\c 8  
\s1 Trè' ndlu' le' Crist mcho' lult cint co' nac flej no cón che'n thìb incensar co' nacsua' ampurte or. 
\p  
\v 1 Co'se' mcho' Crist lult cint co' nac flej co' natedó' lad ye's co' nadùuza, xèe nguled ruid loo bé' le'n med hor.  
\v 2 Chàa, mberen, mxaquen gunèen nzi ndoo gaz angl loo Diox. Loo gaz angla mda' Diox thìb thìb trompet.  
\v 3 Ngoloa, chàa, mxaquen gunèen nde tedib angl co' nzo thìb incensar co' nacsua' con ampurte or ya' angl. Mdoo angla loo mes, co' nee di's, nac loo còo' loo Diox. No mda' Crist huax du'r yal' loo angl par co angl huax du'r yal' loo incensar par yitoo huax zen yal' co'te' nzo Diox loo asienta. Leque tiempa, mxaquen mbìn Diox di's co' mbez mèn Diox, mèn co' ngòc che'npe' Diox láth naban mèna loo izlyo'.  
\v 4 Sya, mbli angla par mquée zen yal' loo Diox. No leque tiempa, mbli angl le' zen yal'a ndlu' cón che'n di's co' ngurez mèn co' ndxela's loo Crist loo Diox, mèn co' mbez Diox láth nzi ban mèna loo izlyo'.  
\v 5 Ngoloa, mbe' angla incensar. Ngua lo angl quìi loo incensar loo mes co' nac còo' co'te' nzo Diox. Ngoloa, mblobii angl quìia loo izlyo'. No co'se' ngulàa quìia loo izlyo', ngos mblya'b gundii. Mbyèn huax ruid. Mtlo ngulàa bèel gundii loo izlyo'. No mbuin thìb xòo brut loo izlyo'. 
\s1 Trè' ndlu' cón che'n trompet co' mda' Diox loo angl. 
\p  
\v 6 Ngoloa, ryete gaz angl co' mcàaya' gaz trompet, mtlo angl, mbli nab angl angl par cuez angl trompet. 
\p  
\v 7 Ner angl mcuez trompet angl. Leque hora, mbli Diox ngulàa thìb loo yuu quèe brut loo izlyo'. No ngulàa quìi co' nos con ren leque hora loo izlyo'. Mbyec thìb tant con' loo izlyo', co' nee di's, nac son tant con' loo izlyo'. No axta mbyec thìb tant yaa nayèe no thìb tant huan co' nac son tant yaa no huan loo izlyo'. 
\p  
\v 8 Mbryop angl co' nde nque mcuez trompet. Leque hora, Diox mbli ngulàa thìb con' co' gunaa xal thìb gundith loo níttó'. Con'a gunaa xal thìb yii roo co' ndub yol. Le' sya, thìb part co' nac son part níttó' ngòc nít ren.  
\v 9 No nguth thìb part rye con' co' naban le'n níttó' co' nac son part con' co' nzo naban le'n níttó'. No mtelux Diox thìb part yòoyaa co' nac son part yòoyaa co' nzo loo níttó' por cón che'n con'a, ne. 
\p  
\v 10 Tedib angl co' nac mbyon angl co' nde nque, mcuez trompet. Leque hora, mbli Diox ngulàa thìb mbèelhui' co' ndoo yol loo bé' loo izlyo'. Ñaa mbèelhui'a xal thìb quèe roo no xal thìb yii roo co' ndoo yol. Ngulàa mbèelhui'a loo thìb part yó'be' co' nac son part yó'be' co' nzo dib athu loo izlyo'. No ngulàa mbèelhui'a loo thìb part xlen nít co'te' ndub len nít co' nac son part co'te' ndub len nít dib athu loo izlyo'.  
\v 11 Mbèelhui'a ngro' lèe Ajenj co' lalque' nalà xal cuan' co' mbez mèn lèe tilà co' anze'f nalà. No ngòc nalà tín' thìb part nít co' nzib len no thìb part yó'be' co' nac son part co'te' nzib len nít no co' nac son part yó'be' dib athu loo izlyo'. No tataa mod anze'f thìb mèn nguth por ngu mèn nít co' ngòc nít nalà. 
\p  
\v 12 Be taa be taa mcuez angl co' nac thap angl co' nde nque trompet angl. Mxaquen mcuau loo izlyo' co' nac thìb part che'n son part che'n thìb thìb huiz co' nac thìb huiz. No mcuau loo mbe' no loo mbyáz. Ne'ntenìide mbe' no mbyáz thìb part che'n son part che'n thìb thìb yál' co' nac thìb part che'n thìb thìb yál' par tataa mod mbli Diox mcuau thìb part che'n thìb thìb huiz no thìb part che'n thìb thìb yál'. Tataa mbli Diox le'n rye huiza par mtetìi Diox mèn axta mtlo Diox, mtetìi Diox mèn tedib mod yiloa. 
\p  
\v 13 Ngoloa, chàa, mbyú' loo loon no mxaquen gunèen no mbìnen ngue tee xobii thìb angl xtau'the loo bé'. No be taa cabii mbez angl: 
\p ―Ay, prob mèn co' naban loo izlyo' co'se' yèn cuez taason angl trompet angl. 
\c 9  
\p  
\v 1 Ngoloa, mcuez angl co' nac ga'y angl co' nde nque trompet angl. Leque hora gunèen ngulàa thìb mbèelhui' loo bé' loo izlyo'. Ngòc mbèelhui'a thìb angl. Mda' Crist lyab che'n puert ye'rbìil loo angl par xal' angl puert ye'rbìil.  
\v 2 Mxal' angl puert ye'rbìil. No ngo too thìb zen brut más leque xal co'se' mbe zendó' co' ndxetoo no co' mbe loo izlyo' le'n mbe' marz no le'n mbe' abril. Zen che'n ye'rbìila mbli mbyau' loo huiz par mcuau loo huiz no axta yende mod hui' ndxè' hui' ba' mèn loo izlyo'.  
\v 3 Le'n zena Diox mbli ngos mdyàl mbiistó'léy'. Mbiistó'a mque tee xobii dib athu loo izlyo'. No mbli Diox par ngòc nayi' mbiistó'a xal nayi' mbacxub co' nzo loo izlyo'.  
\v 4 Mbli Diox par ne'nglide mbiistó' yalquìi loo nec thìb huan nayèe no loo nec thìb yaa nayèe. Ndxe'leque', mbli Diox mbli mbiistó' yalquìi loo mèn co' inguede señ lechuz co' nac señ che'n Diox.  
\v 5 Per ne'nda'de Diox lugar nguth mbiistó' mèna. Ndxe'leque', mbli Diox par mbli mbiistó' yalquìi loo mèna par mden' mèna yalnè le'n ga'y mbe'. Yalnè co' mden' mèna ngòc xal yalnè co' nden' mèn co'se' nquele mbacxub mèn.  
\v 6 Co'se' gàc huiz co' ngue niin loo gu' ndxè', mèn aseli par leque mèn guth mèn. Per Diox ne'ta'de lugar guth leque mèn mèn. Mastale' lya's mèn gath mèn, ne'ta'de Diox lugar gath mèn le'n rye huiz co'se' gàc con'a loo mèn. 
\p  
\v 7 Le' mbiistó'a na, gunaa xal thìb huay co' ngolole' ngo xab par tyub solndad huay par ya huay loo xó'. Mxaquen ndub thìb con' co' ñaa xal thìb coron or yéc mbiistó'. Le' loo mbiistó' na, ñaa xal ñaa loo thìb mbi'.  
\v 8 Ale, mxaquen ndoo yis yéc mbiistó' co' lalque' nol' xal nol' yis co' ndoo yéc thìb xa'got. Mxaquen ñaa quele mbiistó' xal quele thìb mbee's co' ndoo yis lox yen.  
\v 9 Le' loo lad mbiistó' na, mzo'f thìb fcho co' ñaa xal conch co' nayez xal yi'f. Le' ruid co' ndxèn co'se' nxobii mbiistó' na, ndxèn xal ruid che'n huax carret co' ngobxax huay co'se' nque' huay carre con carret loo xó'.  
\v 10 Mque no mbiistó'a xuan' mbiistó' xalque' mque no mbacxub xuan' mbacxub. Con xuan' mbiistó'a mbli mbiistó' yalquìi loo mèn le'n ga'y mbe'.  
\v 11 Mbiistó'a mque no thìb xa' co' ngòc jef co' mnibe' loo mbiistó'. Xa'a nac thìb angl co' nquenap ye'rbìil. Angla ngro' lèe di'stèe che'n mèn hebre Abadón. Le' di'stèe mèn grieg na, ngro' lèe angla Apolión, co' nee di's, nac xa' co' ntelux con'. 
\p  
\v 12 Cóna ngòc ner yalquìi no ner yaltìi co' nguri'thle' loo mèn. Per tatabe' ndxàc falt riid taachop yaltìi no yalnè loo mèn. 
\p  
\v 13 Ngoloa, angl co' nac xop angl co' nde nque, angl mcuez trompet angl. Leque hora, mxaquen mbìnen thìb di's co' ngro' le'n thap con' co' ñaa xal ñaa cach ngon co' nzi'f dyap squin che'n loo còo' co' nacsua' con or co'te' nzo Diox.  
\v 14 Di'sa gunii loo angl co' nac xop angl co' nde nque co' nzo trompet ya': 
\p ―Ftelá' thap angl co' nzi quedó' gax ro yó'be' Eufrat co' nac thìb yó'be' roo. 
\p  
\v 15 Tataa mod mblyá' dyap angla par mbli angl nguth thìb part mèn co' nac son part mèn co' naban dib athu loo izlyo'. Angla thidtene mquedó' tee tya par mbli angl nguth mèn hor co'se' mnibe' Diox loo angl li angl con'a. Hora ngòc huiz no ngòc tiemp co' ndxab Diox gàc con'a loo mèn.  
\v 16 No mbìnen napló tant nac solndad co' nac solndad che'n dyap angla. Solndad ngòc anab solndad co' ndub huay. No por loo rye solndada, ngòc solndada chop ayo millón mèn. 
\p  
\v 17 Tataa mod mdan cuent no gunèen cón che'n solndad co' ndub huay co' mxyo'f loo loon. Le' rye solndad co ndub huaya na, ryete solndada ne' thìb le' yi'f co' ntau' pech solndad. Yi'fa, mxaquen, ale nanee ren gunaa no ale azul gunaa no ale guus gunaa. Nde nxon', mxaquen gunèen le' huaya mque no yéc xal yéc thìb mbee's co' ndoo yis lox yen. No gunèen ndryo' quìi no zen no xla' asufr ro huay.  
\v 18 Tataa mod nguth thìb part mèn co' nac son part mèn co' naban loo izlyo' con yon loo con' co' ngro' ro huay co' ngòc quìi no zen no xla' asufr.  
\v 19 Tac Diox mbli le' huaya li yalquìi loo mèn con ro huay no con xuan' huay tac xuan' huay ngòc xal mbel'. No con xuan' huay co' ngòc xal mbel' mbli huay yalquìi loo mèn. 
\p  
\v 20 Per rye mèn co' be' mbyan' loo izlyo', mèn co' ne'ngàcte yalquìia loo, ne' por gunèe mèna ngòc yalquìi loo mèn co' ngòc yalquìi ne'nglàade yéc mèna no ne'nglàade lezo' mèna par bel'que' tataa mod nse' mèna mod co' ndxàp mèna loo izlyo' par nglá' mèna loo con' ye'rsin' co' ngue li mèna. Ne' ne' nglá' mèna par ne'tlode li mèna cas loo rye xpii ye'rsin', no rye gunab no rye mdo' co' nacsua' con or, no co' nacsua' con plat, no co' nacsua' con brons, no co' nacsua' con chol loo yaa. Mdo'a yende mod hui'. Ne' ne' indxòn mdo'a co'se' ndyoodi's no mèn mdo'a. No ne' ne' indyee mdo'a.  
\v 21 Ne' ne' nse' mèna mod co' ndxàp mèna par ya ne'tolode guth mèna xtàa mèna. Ne'nglá'de mèna mod co' ngòp mèna par ne'tolode li mèna yalbruj. Ne'nglá'de mèna mod co' ndxàp mèna par ya ne'tolode li mèna yalburrid no par ne'tolode ncua'n mèna xin' huan mèna. Lomisque' ne, ne'nglá'de mèna mod co' ngòp mèna par ya ne'tolode li huan' mèna che'n xtàa mèna. 
\c 10  
\s1 Thìb angl nzo thìb libr chu'th ya'. 
\p  
\v 1 Be taa be taa mxaquen mbyú' loo loon. Gunèen tedib angl. Loo angla mbli Diox ngòp angl huax con' la's nii angl no huax con' la's ya' angl. Angla nde làa loo bé' le'n xcuau. No mxaquen ne' angl thìb mbèel qui'th yéc angl. Rloo angl ante nquée xnìi xal co'se' nguin huiz. Le' nii angl na, gunaa xal bèel co' ndxetoo.  
\v 2 Gunèen nzo thìb libr chu'th ya' angl. Ndoo xal' loo libr. No gunèen ndoo sa nii angl co' nac ladlì loo níttó'. Le' taasa nii angl co' nac ladrebes na, ndoo loo yòo biiz.  
\v 3 Ngoloa, cabii ngrozèe angl xal co'se' mbez yèe yii mbez yèe den thìb mbee's. No co'se' ngrozèe angl, leque tiempa ngos mblya'b gundii gaz vez. Mbyèn bii gundiia axta plóthe.  
\v 4 Co'se' ngolo ngos mblya'b gundii gaz vez no mbyèn bii gundii axta plóthe, daa co' nac Juàn mblyazen ntlon, nque'en ye's cón che'n con' mbìnen. Per látha, mbìnen thìb di's co' mbyèn loo bé' co' gunee loon: 
\p ―Juàn, ante le'n lezo'l blosua' cón nee di's gundii co' ngos mblya'b gaz veza. No indlyasten que'l ye's cón che'na. 
\p  
\v 5 Ngoloa, chàa, gunèen angl co' mdoo nii loo níttó' no loo yòo biiz. Mde'f angl ya' angl co' nac ladlì loo bé'.  
\v 6 Mde'th angl lèe Diox, Diox co' nabanque' thidtene, Diox co' mblec no co' mxèn' bé' no izlyo' no níttó' no ryethe taamas con' co' mblec Diox no co' mxèn' Diox. Ndxab angl: 
\p ―Nase, por lèe Diox niin loo gu': Mzinle' hor co'se' li Diox con' co' mnibe' Diox loo lezo' Diox li Diox loo mèn. Ya ne'lyen'te Diox más.  
\v 7 Tac co'se' gal hor cuez angl co' nac gaz angl co' nde nque trompet angl, ya mdyaale' tiemp co' ngòcle' tiemp co'se' li Diox ryethe con' co' mnibe' Diox loo lezo' Diox li Diox loo mèn loo izlyo' ndxè' ndoore' lith no izlyo' ndxè' xalque' mblu' Diox loo mèn co' ngo ban póla, mèn co' mde'th di's co' ndxab Diox, mèn co' mxo'f zin' zin' che'n Diox. Con'a nac con' co' mbli Diox co' ngo casloo loo mèn le'n dib lal tiempa axta nalle'. 
\p  
\v 8 Di's co' mbìnen gunii loon loo bé', guniii loon tedib vez. Gunee di's loon: 
\p ―Juàn, huàa co'te' ndoo angl ba'. No fxen libr chu'th co' ndoo xal' co' nzo ya' angl, angl co' ndoo sa nii loo níttó' no co' ndoo taasa nii loo yòo biiz. 
\p  
\v 9 Sya, nguan co'te' ndoo angl. No mna'ben loo angl ta' angl libr chu'tha càan. Angl gunee loon: 
\p ―Aa libr ndxè'. Dhua libr. Co'se' ngue yuhual libr ndxè' ten'l nazi' nac libr xal mzin le'n ro'l. Per co'se' ngolo nduhual libr, ten'l nalà ngòc libr le'n lezo'l. 
\p  
\v 10 Sya, mxenen libr chu'th co' nzo ya' angla. No ale nduhuan libr. No, lìcque', mxaquen ale nazi' ngòc libr chu'tha xal mzin le'n ro'en co'se' ngue yuhuan libr. Per co'se' ngolo nduhuan libr, mden'en ngòc nalà libr le'n lezon.  
\v 11 Luega gunee angl loon: 
\p ―Lùu nquin bere tyoodi's no ta'l cuent xal ñibe' Diox lool loo mèn huax yèez, no loo mèn huax nación, no loo mèn co' ndyoodi's chol di'stèe, no loo mèn co' ñibe' loo chol nación, ndee. 
\c 11  
\s1 Trè' ndlu' cón che'n chop mbi' co' mda' cuent cón che'n Diox. 
\p  
\v 1 Ngoloa, mxaquen mda' Jesucrist thìb bro yíi loon. Yíia ñaa xal thìb bro var co' ndli mèn us par nchi'x mèn con'. Gunee Jesucrist loon: 
\p ―Juàn, huàa chi'x templ che'n Diox. No fchi'x mes co' nac loo còo' co' ndoo le'n templ. No blab mèn co' ndyub xib no co' ncòo' yéc loon le'n templ.  
\v 2 Per ne'chi'xtel loo lue' co' nac xís templ no co' nac loo templ. Tac loo lue'a ngòcle' che'n mèn tith. Mèn tith yi'th ñibe' yèe no cobé' no toxcua' mèn tith no gàc che'npe' mèn tith ciuda natú' le'n son lín' narol. Pues, mchi'xen templ no loo còo' xal mnibe' Jesucrist loon.  
\v 3 Tolo gunee Jesucrist loon, ne: 
\p ―Na tel' chop mbi' co' ta' cuent cón chenen loo mèn co' naban le'n ciuda natú'. Ryop mbi'a ta' cuent cón chenen le'n son lín' narol. Ryop mbi'a goc xab lar' nagat, co' nee di's, ndlu' nxi tín' lezo' ryop mbi'. 
\p  
\v 4 Ngolo mdoodi's no Jesucrist daa con'a, gunèen ndoo chop yaa oliv. No gunèen ndoo chop candiler co' nziri' loo Diox ba', Diox co' ñibe' loo izlyo'. Chop yaa oliv no chop candiler co' nzo loo Diox nee di's ngòc ryop mbi' co' mtel'en loo mèn ciuda natú'.  
\v 5 Chele' chol mèna mblya's li yalquìi loo ryop mbi'a, Diox mbli ngro' quìi ro ryop mbi'a. Quìia, por derech, mtec mèn co' ngòc ngolo ngola's che'n ryop mbi'. Tataa mod mbli Diox par nguth chol mèn co' mblya's ngli yalquìi loo ryop mbi'a.  
\v 6 Ryop mbi' co' mda' cuent cón che'n Crist, mbli Diox ngòp ryop mbi'a con' roo no con' xèn la's nii mbi' no la's ya' mbi' par mbli ryop mbi' par ne'nglàade yuu le'n dib lal huiz co' mdoodi's ryop mbi' cón che'n Diox. Lomisque' mbli Jesucrist ne, ngòp ryop mbi'a con' roo no con' xèn la's nii mbi' no la's ya' mbi' par mse' loo mbi' nít dib athu loo izlyo' par ngòc nít ren dib athu loo izlyo'. No mbli ryop mbi'a mden' mèn yalnè con rye loothe yíiz no rye loothe con' ryes loo mèn dib athu loo izlyo'. Mbli ryop mbi'a con'a huax vez xal gunee lezo' ryop mbi'.  
\v 7 Per co'se' ngolo mtelo ryop mbi' zin' co' mxo'f zin' ryop mbi'a, sya, ngro xo'f thìb mbi' má' thidtene. Ngro' mbi' le'n ye'rbìil. Mbi'a, Diox mda' lugar loo mbi' má'a mcua'n xó' mbi' con ryop mbi' co' mda' cuent cón chenen axta mbli mbi' gan mbeth mbi' má'a ryop mbi'a. No mbethque' mbi' má'a ryop mbi'.  
\v 8 No co'se' ngolo mbeth mbi' má'a ryop mbi'a, tyate mbyan' nax ryop thebola ned co' nac ned le'n ciuda Jerusalén co'te' mque' mèn Tad Jesucrist loo cruz. No ne' ciuda Jerusalén tedib lèe co' nac lèe ciuda Sodom, co' nee di's, por ngòc mèn ciuda Jerusalén mèn ye'rsin'túb xalque' ngòc mèn ciuda Sodom mèn ye'rsin' no xal ngòc mèn nación Egipt mèn ye'rsin', ne.  
\v 9 No le'n son huiz co' nax nde'f ryop thebola loo ned le'n ciuda Jerusalén, rye mèn rye nación mbui' loo thebola no ne'ngla'de mèna ya ca's mèn thebola.  
\v 10 Rye mèn co' naban dib athu loo izlyo', rye mèna mdyac lezo' por nguth ryop mbi'a. No axta huen mbyan' lezo' mèn co' naban dib athu loo izlyo' axta mtel' mèn con' loo xtàa mèn par ya too naa mèna xtàa mèn, tant mdyac lezo' mèna nguth ryop mbi'a. Tataa mbli mèna tac ryop mbi' co' gunii cón che'n Diox, ndyac mèna le' ryop mbi'a ngòc thìb yis thìb yaa loo mèna.  
\v 11 Per co'se' ngolo nguri'th son huiz narol, Diox mbli par ngro xban ryop mbi'a. No mbere ryop mbi'a, ngo che ryop mbi'a tedib vez. Le' rye mèn co' gunèe ryop mbi'a na, mzyeb mèna axta plóthe.  
\v 12 Ngoloa, ryop mbi' co' ngro xbana mbìn thìb di's co' mbyèn loo bé' co' ndxab loo ryop mbi': 
\p ―Quée gu' gáp trè', ey. 
\p Sya, mxaquen mquée ryop mbi'a loo bé' le'n thìb le' xcuau. Le' rye mèn co' ngòc ngolo ngola's che'n ryop mbi'a na, gunèe xal nda quée ryop mbi'a loo bé'.  
\v 13 Leque hora ne, mxaquen mbuin thìb xòo brut. No ngulàare' thìb part co' nac si' part che'n ryethe con' co' nac ciuda Jerusalén. No leque tiempa, nguth gaz mil mèn por xòo brut co' mbuina. Le' mèn co' be' mbyan'a na, anze'f mzyeb. Mbez mèna: 
\p ―¡Ay, Dio's! ¿Cón con' ndxè', Tad Diox? Con' roo con' xèn ngue li U', U' co' nzo loo bé'. 
\p  
\v 14 Con ryethe con' ryes co' ngòca, mbryop yalnaze'f no yalnaxi co' nde teele' ndri'th. 
\s1 Trè' ndlu' cón che'n lult angl co' nac gaz angl co' mcuez trompet. 
\p  
\v 15 Sya, mcuez angl co' nac gaz angl trompet angl. Látha, be' mxaquen cabii mbyèn di's loo bé' co' mbez huax mèn: 
\pi1 Nase mzinle' hor le' ryethe mèn co' ñibe' loo izlyo' ndxè', mèna gàc nado' loo Diox par ñibe'pe' Diox no Tad Crist loo ryethe nación dib athu loo izlyo'. No ñibe' Diox loo alux con' le'n lín' co' ntlo, no le'n lín' co' ndxelo, no le'n lín' co' ne'lith node. 
\m  
\v 16 Sya, ryete gal fthap mèngool co' ndub loo asient co'te' nzo Diox, rye mèna mcotloo loo izlyo'. No msal' mèna ya' mèna loo Diox.  
\v 17 No mbez mèngoola: 
\pi1 Diox quix U', Tad Diox, U' co' ndxàp ryethe con' roo no con' xèn la's nii U' no la's ya' U'. Nac U' Diox co' thidtene nzo. Nase leque U' mbli mnibe' yéc U' no mnibe' lezo' U' par tlo ñibe' U' loo alux con' por cón che'n con' roo no con' xèn co' nzo la's nii U' no co' nzo la's ya' U'. 
\pi1  
\v 18 Mèn rye nación ngòc nayi' por mtetìi U' mèna. Per ni mod tac nase mzinle' huiz co' gàc huiz co' tetìi U' mèn, por derech. No lomisque', mzinle' huiz co'se' tub rez U' cón che'n mèn nguth co' ne'ndalte ngala's loo U' no loo Crist. Le' loo mèn co' mxo'f zin' zin' cón che'n U' na, mèn co' mdoodi's cón che'n U', U' ta' con' gàc che'n mèna. No ta' U' con' gàc che'npe' mèn, mèn co' ngro xà'le' loo con' ye'rsin' co' nac cón che'n xab izlyo'. No ta' U' con' gàc che'npe' mèn, mèn co' ndli ndxàc con' guryath no con' guryèn cón che'n lèe U', que nac mèna mèn co' nde'f di's nac mèn roo no mèn xèn, que nac mèna mèn co' nde'f di's nac mèn be'the. No lomisque', mzinle' hor co'se' telux U' mèn co' nteza' no co' ntezab loo mèn no loo con' co' nzo loo izlyo'. 
\p  
\v 19 Be taa be taa mxaquen gunèen mxyal' puert che'n templ che'n Diox co' ndub loo bé'. Látha, gunèen nax caj co'te' nzo ye's co' nac conveñ le'n templa. No lomisque', leque hora mxaquen ngulàa bèel gundii. Mbyèn huax ruid. Ngos mblya'b gundii. Mbuin thìb xòo brut. No ngulàa thìb yuu quèe brut loo izlyo'. 
\c 12  
\s1 Trè' ndlu' cón che'n thìb xa'got no cón che'n thìb má' co' lèe dragón. 
\p  
\v 1 Láth rye con' ngòc ndxè', mxaquen mbyú' thìb señ roo no thìb señ xèn co' mbli Diox loon loo bé'. Gunèen thìb xa'got co' noc xab. Per lar' co' ngòc xab xa'gota anze'f nquée xnìi xal nquée xnìi huiz. No mxaquen nax mbe' co' ntenìi loo bé' xàn' nii xa'gota xal thìb banc. No mxaquen mdub thìb coron yéc xa'gota. Lad corona gunèen mquée si' fchop mbèelhui'.  
\v 2 Xa'gota mdoo nac xin'. No mbez yèe yii mbez yèe den xa'got. Mquée yalnè xa' par tyan xin' xa'.  
\v 3 Leque hora, chàa, mxaquen gunèen ngòc tedib señ loo bé'. Ale ngro' too thìb má' co' lèe dragón, co' nee di's, nac Mebizya. Má'a gunaa xal ñaa thìb cocodril co' anze'f naroo tín'. Ale mxaquen nane gunaa dragón no, nde nxon', nzi'f gaz yéc dragón. Mxaquen nzi'f si' cach dragón, ne. No gunèen ndub thìb thìb coron yéc dragón.  
\v 4 Mxaquen ne, con xuan' dragón nguree dragón thìb part mbèel co' nac son part mbèel co' nzi'f loo bé'. No mbli dragón par ngòb che rye mbèela loo izlyo'. Ngoloa, xèe mdoo dragón loo xa'got co' tyan xin'a par hua dragón mbeto' co'se' yilo gáal mbeto'.  
\v 5 Xa'gota mxan thìb mbedbi'. Mbed ngòc mbi' co' ñibe' no co' toxcua' loo rye nación dib athu loo izlyo'. No nayi' gàc mbed co'se' ñibe' yèe mbed co'se' gàc mbed mbi' loo mèn nación dib athu loo izlyo'. Texal ngolo ngóol mbeda, mbli Diox par ndyàa mbed loo bé' co'te' nzo Diox.  
\v 6 Le' xa'gota na, luega mxon'. Ndyàa xa' thìb lugar co'te' nagán co'te' mbli nab Diox thìb lugar par yòo xa'. Tya mda' mèn co' nduhua xa'gota le'n thìb mil nzo chop ayo nzo ayon huiz. 
\p  
\v 7 Co'se' ngolo mbli Diox par mcasloo xa'gota, mxaquen ngòc thìb xó' brut loo bé'. Láth xó'a, ngo thìb angl co' lèe Miguel, co' más mnibe' loo angl loo be' xal ñibe' thìb general loo huax solndad, con huax taamas angl co' ngòc solndad Miguel par ngro yoo Miguel con Mebizya. Sya, ngro yoo Mebizya no angl co' nac solndad che'n Mebizya con Miguel no angl che'n Miguel.  
\v 8 Per ne'nglide Mebizya gan con angl co' nac solndad che'n Mebizya loo Miguel con angl co' ngòc solndad che'n Miguel. Ngoloa, ya ne'ntolode ngla' Miguel ngo Mebizya loo bé' con angl che'n Mebizya. 
\p  
\v 9 Tataa mod sandante mblo' Diox Mebizya no angl che'n Mebizya loo bé', Mebizya co' ne' tedib lèe co' nac Dragón Tín', no co' ne' tedib lèe co' nac Mbel' Gox. Di's co' nac Mbel'a, por derech, nac tedib lèe che'n Mebizya. No ne' Mbel'a tedib lèe co' lèe Satanás. Mebizya nac xa' co' ndli zin' loo mèn par nquedìi Mebizya mèn dib athu loo izlyo. Per ngoloa, mbli Diox par ngulàa Mebizya no angl che'n Mebizya loo izlyo'. 
\p  
\v 10 Ngolo ngòc ryethe con'a, cabii mbyèn thìb di's loo bé' co' ndxab: 
\p ―Nase mzinle' huiz co'se' lyá' mèn loo con' ryes thidtene. No mzinle' huiz co'se' ñibe'pe' Diox loo alux con' por cón che'n con' roo no con' xèn co' nzo la's nii Diox no co' nzo la's ya' Diox. No mzinle' huiz co'se' ndxàp Crist rye loothe con' la's nii Crist no la's ya' Crist. Tataa gàca tac mbli Diox no Crist gan par ngro' Mebizya loo bé' thidtene, Mebizya co' ngòc xa' co' ntecxù' mèn co' nac hues xtàa na' por cón che'n Crist loo Diox ze no yál'.  
\v 11 Lomisque' ne, mèn co' ngòo loo cón che'n Diox, co' ngòc mèn co' nguth por cón che'n Diox no por cón che'n Jesucrist, mèna mbli gan ngro xà' loo cón che'n Mebizya por cón che'n ren che'n Jesucrist co'se' nguth Jesucrist loo cruz no por cón che'n cuent co' mda' mèna cón che'n Jesucrist. Mèna ne'ngzebte gath por cón che'n Jesucrist. Ndxe'leque', mdoo lezo' mèna gath mèna por cón che'n Jesucrist.  
\v 12 Per nalle', ryete gu' co' nzo loo bé', fxo'f nde' fxo'f ndla' lezo' gu' tac ngòcle' gan mblo' Diox Mebizya loo bé' thidtene. Per ¡ay prob gu' izlyo!, mèn co' nzi ban loo izlyo', no mèn co' nzi ban loo yòo biiz le'n níttó', no mèn co' nzi ban loo níttó' tac Mebizya ngro' loo bé' par ngulàa Mebizya loo gu'. Anze'f nayi' ngro' Mebizya loo bé' no ndxecloo tín' Mebizya tac non Mebizya taandxepte tiemp nac tiemp co' que tee Mebizya loo izlyo' ndoore' cobii Diox Mebizya le'n ye'rbìil thidtene. 
\p  
\v 13 Daa, Juàn, mxyo'f loo loon no mxaquen con' ndxè', ne: Co'se' gunee Mebizya no mden' Mebizya le' Mebizya ngro'le' loo bé', no ngulàa Mebizya loo izlyo' par yan' Mebizya ante loo izlyo' thidtene, ngocloo tín' Mebizya axta plóthe. No mdub ngu's Mebizya xa'got co' mxanle' xin'a.  
\v 14 Per Diox mbli mdub chop xíl' xa'gota lad xa'gota no ngòc xíl' xa'gota xal xíl' mtii par ngóc mxobii xa'gota co'te' nac thìb lugar nagán co'te' tith yòo ban xa' loo mbel' co' nac Mebizya. No mbli Diox par ta' mèn con' hua xa'gota tya le'n son lín' narol.  
\v 15 Per Mebizya ndoole' mbli xtùuz li Mebizya thìb con'. Ale mbli Mebizya ngro' nít ro Mebizya par ngòc níta thìb yó'be' co' riid co'te' nzo xa'gota par tataa mod lyau xa'gota le'n yó'be'a.  
\v 16 Per Diox mbli thìb con', ne. Mbli Diox le' izlyo' mblyath no xa'gota. Ale ngos mbryed loo izlyo' par mdèe nít loo izlyo' leque ngàc nít co' ngro' ro Mebizya thìb yó'be'.  
\v 17 Per co'se' gunèe Mebizya ne'ngro' loode co' mbli Mebizya loo xa'gota, sate más ngocloo Mebizya gunèe Mebizya xa'gota. Sya, mxen Mebizya ned, ngua cua'n Mebizya xó' con mèn co' be' mbyan', mèn co' ngòc bin xa'gota. Mèna ngòc mèn co' mdubdi's loo con' co' mnibe' Diox. No ngòc mèna mèn co' altantque' ngure loo cón che'n di's ndac co' ngòc che'npe' Jesucrist. 
\c 13  
\s1 Trè' ndlu' cón che'n chop má' tín' co' lèe monstru. 
\p  
\v 1 Ngoloa, chàa, mxaquen mdoon ro play ro níttó' loo izlyo' ndxè'. Látha, gunèen ngro xo'f thìb má' tín' loo níttó'. Ale mxaquen mque no má' gaz yéc má' no mque no má' si' cach yéc má'. Mxaquen mdub thìb coron loo thìb thìb cach má'. Le' loo ryete gaz yéc má' na, gunèen mdub thìb di's co' nazab mbez cón che'n Diox.  
\v 2 Má' tín' co' gunèena ñaa xal thìb mbee's yèe. No ngue no má'a nii má' xal nii os. Le' ro má'a na, ñaa xal ñaa ro mbee's co' ndoo yis lox yen. Le' Mebizya na, ndoole' mbli par ngòp má' huax con' la's nii má' no la's ya' má'.  
\v 3 No mxaquen le' thìb yéc má' co' ngòc rye gaz yéc má' gunaa xal thìb con' co' mbuí' co' li par gath má'. Per ndxe'leque', yéc má' co' tataa gunaa nahuí'a no co' li par gath má', ale mbyac yéc má'. Co'se' gunèe mèn dib athu loo izlyo' con'a, ante mbui' mèn no ante gunaa mèn mbui' mèn con'a. No mdyac lezo' mèn dib athu loo izlyo' cón che'n má' no ngòo mèna loo cón che'n má'.  
\v 4 No ryete mèn dib athu loo izlyo' mcòo' yéc loo Mebizya no mdub xib mèn loo Mebizya tac non mèn le' Mebizya mbli ngòp má'a con' roo no con' xèn la's nii má' no la's ya' má'. No ale mcòo' mèn yéc mèn no mdub xib mèn loo má'. No ale ndxab mèn: 
\p ―¿Xá ñaa thìb mbi' co' ta' par má' ndxè'? No ¿chó mèn gác cua'n xó' par li mèn xó' con má'? Yende chó mèn nzo co' li tataa, ¿lé'? 
\p  
\v 5 Per leque Diox mda' lugar loo má'a par gunii yèe gunii tìi má' ngòc nguàal di's zab cón che'n Diox. No mda' Diox lugar ñibe' má' loo mèn dib athu loo izlyo' le'n cho' fchop mbe'.  
\v 6 No tataaque' mbli má'. Gunii má' ngòc nguàal di's contra Diox. No nazab gunii yèe gunii tìi má' cón che'n lèe Diox no cón che'n templ che'n Diox co' nac lugar natú' co'te' nzo Diox. No nazab gunii yèe gunii tìi má' cón che'n mèn co' nzo loo bé'.  
\v 7 No mda' Diox lugar loo má' par li má' xó' contra mèn co' nac mèn che'npe' Diox axtaque' li má' gan guth má' huax mèn. No mda' Diox lugar loo má' ñibe' má' loo ryethe bin mèn no loo ryethe nación dib athu loo izlyo'.  
\v 8 Loo má'a mcòo' yéc ryete mèn. No mdub xib ryete mèn co' naban loo izlyo' loo má'. Mèna nac mèn co' indubte lèe loo libr co'te' ndub lèe mèn co' yòo ban no Diox thidtene. Libra ngue nole' Crist anon mblec Diox izlyo' no mxèn' Diox izlyo', Crist co' ngòc xal thìb mbacxil' co' nguth loo cruz. 
\p  
\v 9 Gu' co' ndub nza no co' ndxaa'd di's, bìn gu' di's ndxè' no ften' gu' cón nee di's co' ngue niin loo gu' ndxè':  
\v 10 Mèn co' ndxe' xtaa mèn xal thìb pres, leque mèna gàc pres yiloa. Le' mèn co' ndxuth xtàa con cuchi na, mèna gath loo cuchi, ne. Por cona, ngue niin le' mèn co' nzo loo cón che'n Diox co' nac che'npe' Diox, mèna nquin xec loo yaltìi no loo yalquìi co' ndxàc loo mèn. No nquin tolo yila's mèn loo Diox no tolo gàp mèn yalxla's loo Diox láth ndxàc con'a loo mèn. 
\p  
\v 11 Ngolo gunèen ngòc con'a, mberen, gunèen tedib má' co' ngro' le'n thìb ye'r yòo loo izlyo' co' xà'que' ñaa. Má'a mque no chop cach má' co' ñaa xal cach co' nzi'f yéc mbacxil'. No ndlu' má'a loo mèn nac má' xal thìb mbacxil' co' nac má' nado'. Per co'se' ndyoodi's má', ndyoodi's má' xal thìb dragón, co' nee di's, nac yub Mebizya.  
\v 12 No lomisque', mda' Diox lugar ñibe' má' xalque' mnibe' ner má' par lyath no mbryop má'a ner má'. No mbli mbryop má' ndxè' le' ryete mèn co' naban dib athu loo izlyo' mcòo' yéc no mdub xib mèn loo ner má' co' mbyac yéc co' nahuí'.  
\v 13 Mbli mbryop má'a huax yalguzye' axta mbli má' ngulàa quìi no bèel loo bé' loo izlyo' loo mèn par mbui' mèn yalguzye' co' mbli má'.  
\v 14 No por yalguzye' co' mda' Diox lugar mbli mbryop má'a, mbli má' yalguzye' loo ner má'. Látha, mbli mbryop má' huax yalguzye' par mquedìi mbryop má' huax mèn co' naban loo izlyo'. No mnibe' má' loo mèn toxcua' mèn thìb gunab che'n ner má' co' mbuí' par gath má', per ngoloa, ale le'le' mbyac yéc má' co' mxaquen mbuí'a. Ya ne'ngathte má'.  
\v 15 Lomisque', mda' Mebizya lugar mque no má' co' nac mbryop má' con' la's nii má' no la's ya' má' par li mbryop má' ryo too ban gunab, gunab co' nac gunab che'n ner má' co' nahuí' yéc par gác tyoodi's gunaba no par gác li gunaba par gath rye mèn co' ne'tyub xibte no co' ne'còo'de yéc loo gunab.  
\v 16 Más de cona, mbli mbryop má' le' rye myen' bix, no rye mèngool, no rye mèn ric, no rye mèn prob, no rye mèn co' yende chó mèn gác ñii loo no co' yende chó mèn mbee ncà, no rye mèn co' nac moz, par mquée thìb señ ya' rye mèna co' nac ladlì o mquée señ lechuz mèn.  
\v 17 Tataa mod mbli má' par yende chó mèn co' inguede señ lad ne'ti'de mèna loo xtàa mèn no ne'tho'de mèna loo xtàa mèn. Seña nac lèe ner má' o naca numbr che'n lèe ner má'.  
\v 18 No cón che'n di's co' ngue niin loo gu' ndxè', naquin gác mèn co' huenleque' par tataa mod gác ta' mèn cuent no cobé' mèn axta chó numbr nac numbr che'n má' tín'a. Numbra nac numbr co' ndlu' cón che'n thìb mbi'. Numbra nac numbr xop ayo nzo ayon xop. 
\c 14  
\s1 Thìb tant mènléy' mbil' ro thìb himn. 
\p  
\v 1 Ngolo nguri'th ryethe con'a, be taa be taa mberen, mxaquen mbui'en le' Mbacxil' co' nac leque Jesucrist mdoo loo yii co'te' nziri' ciuda Jerusalén. Ngure no Jesucrist thìb ayo nzo cho' fthap mil mèn. Mèna ngòc mèn co' mquéele' lèe Jesucrist no lèe che'n Diox xud Jesucrist lechuz.  
\v 2 Látha, chàa, mbìnen thìb bii co' mbyèn loo bé'. Biia mbyèn xal thìb ruid co' ndli huax yó'be'. No mbyèn biia xal co'se' aguin izlyo' ndlyàa gundii. Lomis, mbyèn biia xal co'se' ndxol' huax mèn arp.  
\v 3 No mbìnen ndxol' ro mèna thìb himn cub loo Diox co'te' nzo Diox no co'te' nzo rye dyap má' co' naban no co'te' nzo rye mèngool co' nziri' co'te' nzo Diox. Nec thìb mèn ne'ngácte nté'th himna. Ndxe'leque', ante mèn co' nac thìb ayo nzo cho' fthap mil mèn co' mblyá' loo con' ryes loo izlyo', mèna ngóc mbil' ro himna.  
\v 4 Rye mèna ngòc mèn co' ne'ngàalte mèngot thidtene, co' nee di's, ne'nglide mèna yalmbi' no yalngot. Mèna ngòc mèn nambìi no mèn nalì loo Diox. Thidteneque' ngòo mèna loo cón che'n Mbacxil' co' nac leque yub Jesucrist. No thidteneque' ngo no mèna Jesucrist pál co'te' mque tee Jesucrist. Ryete mènléy'a mblyá' loo ryethe con' ryes par mxo'f zin' mèna thìb zin' ndac cón che'n Diox no cón che'n Mbacxil' co' nac leque yub Jesucrist.  
\v 5 Thidteneque' ne'ngro'de nec thìb di's gutyè' ro mèna. Ngòc mèna mèn nalì no mèn nambìi thidtene loo Diox co'te' nzo Diox. 
\s1 Son angl mblu' cón che'n di's ndac che'n Diox loo mèn. 
\p  
\v 6 Látha, chàa, gunèen tedib angl co' ngue xobii loo bé'. Ngòc nable' angla par te'th angl no co angl yalbàn cón che'n di's ndac che'n Diox co' ndlu' xá mod lyá' mèn loo con' ryes thidtene. Angl mde'th no mblo angl yalbàn loo mèn rye nación co'te' naban mèn dib athu loo izlyo', mèn co' nac chol bin no mèn co' ndyoodi's chol di'stèe.  
\v 7 Cabii mbez angl loo mèn dib athu loo izlyo': 
\p ―Fzeb gu' gunèe gu' Diox. No fzeb gu' loo con' ngue li Diox. No guuz gu' loo xtàa gu' cón che'n con' roo no con' xèn co' ngue li Diox no co' nac Diox tac mzinle' tiemp co'se' tub rez Diox cón che'n mèn. Ftub xib gu' no fcòo' gu' yéc gu' loo Diox, Diox co' mblec bé', no co' mblec izlyo', no co' mblec níttó', no co' mblec rye co'te' ndub len nít. 
\p  
\v 8 Gunèen mdoo nque tedib angl xís angla. Mbryop angla ndxab: 
\p ―Nase ngozanle' Diox no ya mzinle' tiemp co'se' li Diox lyux mèn co' nac mèn ciuda, co' nac ciuda más naroo, co' nac ciuda co' ne' tedib lèe co' nac lèe ciuda Babiloñ. Diox mbli tataa ngro' lèe ciudaa tac mèn dib athu loo izlyo' mblique' no mté'thque' ryethe con' co' nac con' ye'rsin'túb par mbli mèn ryethe con'a, co' nac co' mblu' mèn ciudaa loo mèn loo izlyo', no axta ngòc loc mèn izlyo' xal mènguy por con' ye'rsin'túb co' mbli mèna. 
\p  
\v 9 Gunèen mdoo nque tedib angl co' ngòc mbyon angl xís angla. Mbyon angla cabii mbez loo mèn loo izlyo', ne: 
\p ―Chele' chol gu' còo' yéc gu' no tyub xib gu' loo má' co' nac má' tín' no loo gunab má'a, no la' gu' que' mèn señ che'n má' no che'n gunab má' lechuz gu' o la's ya' gu',  
\v 10 le' sya, ryete gu' tyactìi tín' co' nac ryethe con' co' li Diox par tetìi Diox gu', co' nac thìb con' co' mblobe' lezo' Diox li Diox loo gu' por ndxecloo tín' Diox ñèe Diox gu'. No tyactìi gu' axta plóthe. No ten' gu' yalnè axta plóthe con co' nac quìi, no bèel, no asufr co' li Diox yol. Gàc con'a loo gu' loo angl che'n Diox no loo Mbacxil' che'n Diox co' nac leque yub Jesucrist, co' nee di's, loo yub Jesucrist gàc con'a loo gu'.  
\v 11 Zen co' yitoo, co' nac zen che'n quìi no bèel co' nac co' li Diox par tetìi Diox mèn, yitoo zena thidtene. Le'n dib tiempa, yende mod tí' lezo' mèna ze no yál', ne' por chu'th, mèn co' nac mèn co' tyub xib no co' còo' yéc loo má' no loo gunab má', o que naca la' mèna quée señ che'n lèe má' no gunab má' lechuz mèn o la's ya' mèn.  
\v 12 Cona, ngue niin con' ndxè' loo gu': Le' mèn co' nzo loo cón che'n Diox, no nac mèna mèn che'npe' Diox, no ndyubdi's mèna di's co' mbez Diox, no altant nziri' mèna loo cón che'n Jesús, mèna naquin xec no cha'la's mèna cón che'n ryethe con' ryes co' gàc loo mèna. 
\p  
\v 13 Ngolo nguri'th ryethe con'a, mbìnen thìb di's co' mbyèn loo bé'. Gunee di'sa loon: 
\p ―Juàn, fque' ye's cón che'n di's co' nde niin lool ndxè'. Desde nalle' par delant, huen nda mèn co' gath, mèn co' ndxela's loo Tad Jesucrist. Lomisque' ndxab Xpii Natú' che'n Diox: Aa. Tataaque' gàca loo mèn tac mèn li descans loo zin' co' mxo'f zin' Diox loo mèn cón che'n Diox. No làth xtau'a, yo mèn co' ta' cuent loo mèn co' nzo loo bé' cón che'n zin' co' mxo'f zin' mèn, mèn co' gath por cón che'n Tad Jesucrist. 
\s1 Juàn ngue tetac cón che'n xá mod tetìi Diox mèn. 
\p  
\v 14 Le' sya, be taa be taa mxaquen gunèen thìb le' xcuau nagus loo bé'. Loo xcuaua mxaquen mdub thìb mbi' co' ñaa xal ñaa Crist co' mbi'th yáal loo izlyo' ndxè' xalque' ndxáal chol mèn. Mxaquen mdub thìb coron co' nacsua' con or yéc mbi'. No nzo thìb hoz co' anze'f nalen ya' mbi'.  
\v 15 No leque hora, gunèen ngro' tedib angl le'n templ che'n Diox co' nzo loo bé'. Angla cabii mbez yèe loo mbi' co' ndub loo xcuau. Ndxab angl loo mbi': 
\p ―Ftlo cho' yix co' nac cosech tac ya mzinle' hor cho' yix co' nac cosech tac mtlole' ndoo yas yix co' nac cosech co' dyop loo izlyo', co' nee di's, nac mèn co' tetìi Diox loo izlyo'. 
\p  
\v 16 Ngoloa, xaste mtlo mbi' co' ndub loo xcuaua. Xax xax mcho' mbi' yix co' nac cosech loo izlyo'. No mthop mbi' cosech co' nziri' loo izlyo' thidte lugar, co' nee di's, nac mèn co' tetìi Diox. 
\p  
\v 17 Mbere tedib angl, ngro' tedib angl le'n templ che'n Diox co' nzo loo bé'. Mxaquen ne' angla thìb hoz co' anze'f nalen ya' angl.  
\v 18 No mbere tedib angl. Ngro' tedib angl co' nden hoz co' anze'f nalen, co' nde nque xís angla, le'n templ. Angla mbli Diox par mque no angl con' roo no con' xèn la's nii angl no la's ya' angl par ñibe' angl gàc con' ryes loo mèn con quìi. Látha, cabii ngurez angla angl co' ngro' ner, co' nzo hoz ya' co' anze'f nalen. Ndxab mbryop angla loo ner angl: 
\p ―Fcho' racim uv con hoz co' nzo ya'l ba' tac mzinle' tiemp dyop cosech uv co' nac cosech co' nzo loo izlyo' tac uv nguy'le' par dyop uv. 
\p  
\v 19 Le' sya, xax xax mcho' angl racim uv co' nac cosech uv co' nzo loo izlyo' con hoz co' nzo ya' angl. Ngoloa, mthop taa angl uva thidte lugar. Mblo angl uva le'n thìb tanc par loo tub mèn loo uv con thìb maz yaa par ryo' nít uv. Con' co' mbli angl loo uva nee di's tataa mod tetìi Diox mèn axta plóthe.  
\v 20 Loo uva mblo mdub mèn con thìb maz le'n tanc thìb lad ro ciuda co' ne' tedib lèe co' nac lèe ciuda Babiloñ. Con' ndxè' nee di's le'n tanca ngro' ren che'n rye mèn, co' nee di's, uv nda' cuent cón che'n mèna. Nguáp rena loo izlyo' axta xal nde ro huay co' ndxòo fren. Cona nee di's, tataa gàca loo mèn co'se' tetìi Diox mèn no co'se' xyo ren mèn loo izlyo'. 
\c 15  
\s1 Trè ndlu' le' angl ne' gaz loo con' co' nac con' ye'rsin', co' nee di's, nac gaz mod co' tetìi Diox mèn loo izlyo'. 
\p  
\v 1 Be taa be taa gunèen ngòc tedib señ loo bé' co' ngòc thìb señ roo no thìb señ xèn co' ngòc gaz angl. Thìb thìb angla ne' thìb cop. Le'n copa ngo gaz loo con' co' nac lult con' co' li Diox làa angl loo izlyo' loo mèn. Con'a ngòc lult con' no lult yaltìi co' li Diox loo mèn por ndxecloo Diox ñèe Diox mèn. 
\p  
\v 2 Leque hora ne, mxaquen gunèen thìb con' loo bé' co' gunaa xal ñaa thìb lagun nít. Mxaquen ndxetoo bèel loo con' co' ñaa xal ñaa lagun. No ñaa laguna xal thìb vidr co' nax co' ndxetoo bèel loo. Le' mèn co' ne'nglide cas, no co' ne'ncòo'de yéc no co' ne'ndub xibte loo má' tín'a no loo gunab má', no ne'ndalte mèna par mque' mèn señ che'n má' no numbr che'n má'a lechuz mèn o la's ya' mèn, mèna nziri' loo con' co' ñaa xal ñaa thìb lagun no co' ñaa xal vidr. Nzo arp co' mda' Diox loo mèna ya' mèna.  
\v 3 No mbil' ro mèna xal mbil' ro Moisés co' mxo'f zin' cón che'n Diox. No mbil' ro mèna xal mbil' ro Mbacxil' che'n Diox co' nac leque yub Jesucrist. Mbez mèna: 
\pi1 Con' roo no con' xèn ngüi' mèn no ñaa mèn loo con' ndli U', Tad Diox, U' co' ndxàp rye loothe con' roo no con' xèn la's nii U' no la's ya' U'. Nalì no nambìi no lìcpe' nac co' ndlu' U' no co' ndli U', Tad Diox, U' co' nac rey co' ñibe'pe' loo ryethe nación. 
\pi1  
\v 4 ¿Chó mèn nac mèn co' nziri' loo izlyo' co' ne'zyebte ñèe U'? No ¿chó mèn nac mèn co' nziri' loo izlyo' co' ne'gabte loo xtàa le' U' nac Diox roo no Diox xèn, Tad? Ryete mèn nzyeb ñèe mèna U', ¿lé'? No ryete mèn gab le' U' nac Diox roo no Diox xèn, ne, ¿lé'?, Tad. Tataa gàca. Tad, angoluxte U' nac Diox natú'. Ndxe'leque', rye mèn co' nac mèn rye nación còo' yéc loo U' no tyub xib mèn loo U'. Tac mèn mbui'que' no gunaaque' mèn ryethe con' mbli U' ngòc con' nalì no con' nambìi. 
\p  
\v 5 Ngolo ngòc ryete con'a, mxaquen gunèen mxyal' loo bé'. No mxyal' ner puert che'n templ co' ndub loo bé'. No mxyal' puert co' nau' co'te' nac más natú' le'n templ co'te' nzosua' quèe tabl co' ngòc quèe co' mtan' Diox di's co' ngòc ley co' mxo'f Moisés loo mèn nación Israel.  
\v 6 Nerleque' con' gunèen. Rye gaz angl ngro' le'n templ co'te' nac lugar más natú' par hue' angl gaz loo con' co' nac gaz yaltìi par tetìi angl mèn xal mnibe' Diox loo angl. No gunèen noc xab thìb thìb angl thìb loo lar' co' lèe lin co' ante nambìi gunaa no co' ante mquée xnìi. No natedó' thìb cint or xal nde ro pech thìb thìb angl.  
\v 7 Ngoloa, xaste mda' thìb má' co' nac dyap má' co' naban thìb thìb cop co' nacsua' con or loo thìb thìb angl co' nac rye gaz angla. Le'n copa nzo gaz loo con' co' ngòc gaz yaltìi ye'rsin' co' nac mod co' tetìi Diox mèn tant ndxecloo Diox con mèn, Diox co' thidtene nzo.  
\v 8 Le' le'n templ co' nac más natú' na, ale ngo too zen co' ngòc por con' roo no con' xèn che'n Diox no co' ngòc por cón che'n con' roo no con' xèn co' nzo la's nii Diox no co' nzo la's ya' Diox. No yende chó mèn ngác ngòo le'n templa axta ngolo nguri'th no axta ngolo ngòc rye gaz loo yaltìi co' ngòc con' ye'rsin' co' mbli Diox, co' ngòc co' gunèen, co' ngro' no angl par tetìi Diox mèn. 
\c 16  
\s1 Trè' ndlu' cón che'n gaz loo con' co' ndlu' mod co' tetìi Diox mèn. 
\p  
\v 1 Be taa be taa mxaquen mbìnen mbyèn thìb di's co' mbyèn le'n templ co'te' nac más natú'. Di'sa ndxab loo rye gaz angl: 
\p ―Huaa lath gu' gaz loo con' co' nzo le'n cop gu' co' nac con' co' li Diox par tetìi Diox mèn. 
\p  
\v 2 Sya, ngua angl co' nac ner angl. Ngua lath angl con' co' ngòc ner loo yaltìi co' ngòc con' ye'rsin' loo izlyo'. Le' sya, ryete mèn co' mque no señ che'n má' tín' no mèn co' mcòo' yéc no co' mdub xib loo gunab che'n má', ale ngro' thìb loo yé's ye'rsin' no thìb loo yé's zab lad mèn co' mbli par mden' mèn yalnè tín'. 
\p  
\v 3 Ngua lath tedib angl co' nac mbryop angl co' nde nque tedib loo yaltìi co' ngòc con' ye'rsin' co' ngo le'n cop angl loo níttó'. Le' sya, níttó'a ngòc ren xal ren che'n thìb mèn nguth. No mbli nít co' ngòc rena par nguth rye loothe má' co' naban le'n níttó'. 
\p  
\v 4 Ngoloa, ngua lath angl co' nac mbyon angl co' nde nque tedib loo yaltìi co' ngòc con' ye'rsin' co' ngo le'n cop angl loo rye yó'be' no loo rye lugar co'te' ndub len nít. No ngòc nít yó'be' ren no ngòc nít co'te' ndub len nít ren.  
\v 5 Látha, chàa, mbìnen gunii angl co' ñibe' loo nít dib athu loo izlyo'. Ndxab angl loo Diox: 
\p ―Tad Diox, U' nac Diox nalì no Diox nambìi por tataa mbli U' no mdub rez U' cón che'n mèn ba', U' co' nac Diox natú' co' thidteneque' nzo.  
\v 6 Tataa mbli U' loo mèna tac mèna mbeth mèn co' ngòc mèn co' ngro xà' loo cón che'n xab izlyo' par ngòc mèna che'npe' U'. No lomisque', mbeth mèna mèn co' mde'th di's co' ndxab U' no mèn co' mblo yalbàn cón che'n U' loo mèn loo izlyo'. No nalle', U' mnibe' yèe loo mèna par gu mèna nít ren chele' mèn ndlya's gu nít. Aa. Nzyalque' mèna, tataa gàca loo mèna. 
\p  
\v 7 Mbìnen, ne, gunii thìb xa' axta loo còo' co' ndoo gaxte co'te' ndub Diox. Mbez xa': 
\p ―Lìca, Tad Diox, U' co' ndxàp rye loothe con' roo no con' xèn la's nii U' no la's ya' U', nalìque' nac U' no nambìique' nac U'. No nalìcpe' nac co' ndub rez U' cón che'n mèna. 
\p  
\v 8 Ngoloa, ngua lath tedib angl co' nac dyap angl co' nde nque tedib loo yaltìi co' ngòc con' ye'rsin' co' ngo le'n cop angl loo huiz. No mbli Diox par ngòc con' roo no con' xèn loo huiz par mtec mso' huiz mèn loo izlyo'.  
\v 9 No ryete mèna mbyec mzyo' axta plóthe. Per ne' por ngòc con'a loo mèna ne'nglàade yéc mèna no ne'nglàade lezo' mèna par nse' mèna mod co' ngòp mèna loo Diox. Ne' ne' ngab mèna loo xtàa mèna le' Diox nac Diox roo no Diox xèn. Ndxe'leque', nazab gunii yèe gunii tìi mèna cón che'n Diox, Diox co' ndxàp rye loothe con' roo no con' xèn la's nii Diox no la's ya' Diox par ñibe' Diox gàc yaltìi loo mèn axta plóthe. 
\p  
\v 10 Ngoloa, ngua lath angl co' nac ga'y angl co' nde nque tedib loo yaltìi co' ngòc con' ye'rsin' co' ngo le'n cop angl loo asient co'te' ndub má' tín'a. No ryete lugar co'te' mnibe' má' tín'a ngulàa yál'cuau loo mèn loo izlyo' loo ryete con', que naca loo má', que naca loo mèn. Nde nxon', mèna ndxuhua loz ndxuhua tin por ya ne'nxecte mèn ngòc yaltìi no yalnèa loo mèn.  
\v 11 Per ne' por ndxàc con'a loo mèna ne'nglàade yéc mèna no ne'nglàade lezo' mèna par nse' mèna mod co' ndxàp mèna loo Diox. Ndxe'leque', nazab gunii mèna cón che'n Diox, Diox co' nzo loo bé', por mbli Diox ndxàc yalnèa loo mèna no por mbli Diox ngro xo'f ye's ye'rsin'a lad mèn. 
\p  
\v 12 Ngoloa, ngua lath angl co' nac xop angl co' nde nquea tedib loo yaltìi co' ngòc con' ye'rsin' co' ngo le'n cop angl loo yó'be' co' nac más yó'be' roo, co' lèe yó' Eufrat. Sya, nít co' nzo'f yó'be'a ale mbiiz nít par tataa mod mxyal' thìb ned co'te' ndri'th yó'be'a par mbri'th mèn co' nac rey con solndad rey co' nac mèn co' ñibe' nación par ned ndlyen huiz. 
\p  
\v 13 Be taa be taa gunèen ngro' thìb xpii ye'rsin' ro dragón, no ngro' thìb xpii ye'rsin' ro má' co' ngòc má' tín', no ngro' thìb xpii ye'rsin' ro xa' co' mbez mde'th cón che'n Diox per nde'th xa' di's co' inacte con' lìcpe'. Xpii ye'rsin'a ñaa xal ñaa mbich.  
\v 14 Mbich co' ngro' ro yon xa'a, mbicha ngòc xpii meexù'. Xpiia mbli ngòc huax yalguzye' co' nac yalguzye' roo no yalguzye' xèn. Ngro xpiia loo izlyo' par mbli xpiia mqueltàa rye rey co' nzo dib athu loo izlyo' con solndad rey par thidte mqueltàa rye rey con solndad rey par li rye rey xó' con solndad rey loo Diox co'se' gàc huiz co'se' tub rez Diox cón che'n rye mèn ye'rsin' par telux Diox rye mèn ye'rsin'a co'se' li Diox xó' con mèna huiza, Diox co' ndxàp rye loothe con' roo no con' xèn la's nii Diox no la's ya' Diox.  
\v 15-16 Sya, mqueltàa xpii ye'rsin'a rye rey con mèn co' nac solndad rey thìb lugar co' lèe Armagedón co' nac lèe thìb la's co' nziri' loo xyòn mèn nación Israel. Láth ngue hui'en con'a, mbìnen di's co' gunee Jesucrist loon. Gunee Jesucrist loon: 
\p ―Juàn, hui' nexa. Na gal thìb huiz co' yende chó mèn ngue bed daa no thìb huiz co' yende chó mèn nzi quee lezo' galen. Galen loo izlyo' xal co'se' ndlyàa huan' liz mèn. Huen gàca loo mèn, mèn co' nzi quee lezo', no mèn co' altant nzi loo cón chenen, no mèn co' nalì no nambìi nzi que tee ban lì loo cón chenen. Mèna yende chó tethon no yende chó co' too mèna thìb lad loo mèn co' nzo loo cón chenen par ta' mèn gust lezo' mèn con mèna co'se' gàc huiz co' galen. 
\p  
\v 17 Ngoloa, ngua lath angl co' nac gaz angl co' nde nquea tedib loo yaltìi co' ngòc con' ye'rsin' co' ngo le'n cop angl loo mbii loo izlyo'. Sya, cabii mbyèn thìb di's axta co'te' nac le'n templ co'te' nac lugar más natú' loo bé' co'te' nzo Diox. Di'sa mbez: 
\p ―Nase guneela. Con' ndxè' nac lult con' co' lin par tataa mod tetìin mèn loo izlyo'. 
\p  
\v 18 Sya, ngulàa bèel gundii. Mbyèn huax ruid. Ngos mblya'b gundii. No mbuin thìb xòo brut más fuert co' tarte huin dib lal nziri' mèn loo izlyo'.  
\v 19 Lomisque' ne, mxaquen ale ngulàa bes son part ciuda Jerusalén co' nac ciuda roo ciuda xèn. Le' rye liz mèn co' nac chol ciuda co' nziri' loo izlyo' na, ngulàare' no ngulàateri' ciuda loo izlyo'. Làth xtau'a, Diox mte' lezo' cón che'n ciuda co' ne' tedib lèe ciuda Babiloñ par li Diox gàc más yaltìi no yalnè loo mèn ciudaa por tant ndxecloo Diox ñèe Diox mèna por mod ye'rsin' co' ngòp mèna loo Diox.  
\v 20 Lomisque' ne, rye yòo biiz co' nziri' le'n níttó' chol lugar no rye yii den mdyep le'n níttó' no mdyon' rye yii den.  
\v 21 Lomisque' ne, ngulàa yuu quèe brut co' né' axta cho' kil rloo mèn loo izlyo'. Per mastale' ngulàa yuu quèea rloo mèn co' nziri' loo izlyo', ale le'le' gunii yèeque' no gunii tìique' mèna cón che'n Diox por yuu quèe co' ngulàa rloo mèna tac yuu quèea mbli ngòc thìb yaltìi tín' loo mèn. 
\c 17  
\s1 Trè' ndlu' le' Diox mquexù' cón che'n thìb xa'got co' ngòc thìb xa'got burrid. 
\p  
\v 1 Ngolo nguri'th con'a, mbi'th thìb angl co' ngòc gaz angl co' mque no tedib loo yaltìi co' ngòc con' ye'rsin' le'n cop co' ngòc gaz cop. Gunee angla loon: 
\p ―Juàn, que de ndxè' par lu'en lool cón che'n yaltìi co' tyactìi thìb xa'got co' nac xa'got roo xa'got xèn co' ndli yalburrid. Xa'gota ñibe' loo mèn dib athu loo izlyo' par yòo mèn loo mod ye'rsin' co' nac xa'gota.  
\v 2 Ryethe mèn co' ngòc rey co' mnibe' loo mèn loo izlyo', mèna ngure ban lique' xalque' ngòc mod ye'rsin'túb co' ngòp xa'gota. Lomisque' ne, mxaquen le' rye mèn co' ngure ban dib athu loo izlyo', ale angngureri' mèn, mbli mèn ngòc nguàal con' co' ngòc con' ye'rsin'. Ngòc mèn xal mènguy por mbli mèn ryethe con' ye'rsin' co' ngòc lomisque' mod ye'rsin' co' ngòp xa'gota. 
\p  
\v 3 Leque hora, Xpii Natú' mbli par mxaquen gunèen le' angl mbe' daa thìb lugar co'te' nagán. Tya, gunèen thìb xa'got co' ndub thìb má' tín'. Má'a gunaa nane ren. No dib lad má'a ndub di's co' ngòc di's zab co' ñii yèe ñii tìi má' cón che'n Diox. No mxaquen le' má'a mque no gaz yéc. No lomisque' ne, mxaquen ndub si' cach yéc má'.  
\v 4 Xa'got co' ndub má'a noc xab lar' morad no lar' nane ren. No nabe'ste natoxcua' xa' con anab corral or no con anab yi'f or. No natoxcua' xa' con thìb loo quèe co' anze'f náp ntac no con thìb loo perl co' anze'f náp ntac. Mxaquen nzo thìb cop co' nacsua' con anab or ya' xa'gota. Le'n copa ngo ampurte con' zab co' anze'f naxin ndlya' co' nacpe' con' xin no con' cap, co' nee di's, nac mod co' ndxàp xa'gota.  
\v 5 Nde nxon', mdub di's lechuz xa'gota. Di'sa yende chó mèn ta' cuent cón nee di's di'sa. Di'sa mbez taandxè': Ciuda roo no ciuda xèn co' lèe Babiloñ nac xna' chol xa'got co' ndli yalburrid tín'. No nac ciuda Babilón xal xna' rye mèn co' nzi ban dib athu loo izlyo', mèn co' ndli con' xin no con' cap xalque' ngòc mod co' ngòp xa'gota.  
\v 6 Látha, chàa, mdub xnìi lezon. Mdan cuent no mden'en le' xa'gota mquée mbii yéc no ngòc xa'gota xal thìb xa'guy por cón che'n ren co' ngòc ren che'n mèn co' mxyo, mèn co' ngòole' loo cón che'n Diox co' ngòc che'npe' Diox no mèn co' nguthxù' por mda' mèna cuent cón che'n Tad Jesús loo mèn. No co'se' gunèen con'a, ante mbyu' mbyàl daa no ante mbui'en no ante gunaan loo con' gunèena.  
\v 7 Láth ndxàc con'a loon, gunee angl loon: 
\p ―Juàn, ¿chonon susque' ngüi' ñaal loo con' ndxàc ba', à'? Ne'hui'del no ne'ñaadel loo con' ndxàc ba'. Na lu' lool cón nee di's cón che'n xa'got ba' tac cón che'n xa'got ba' no cón che'n má' co' ndub xa'got ba' co' nac má' co' ngue no gaz yéc no co' nac leque má' co' ndub si' cach yéc, yende chó mèn gác ta' cuent cón che'n má' ba' lool.  
\v 8 Má' tín' co' gunèela, má'a nac thìb mbi' co' nzo banle' ndoore'. Per mastale' ngo ban mbi', nalle' nguthle' mbi'. No mastale' nguthle' mbi', per ale bere mbi', ryo' mbi' le'n ye'rbiil par ban mbi' tedib vez ndoore' gath mbi' thidtene yiloa. Lomisque' ne, mèn co' nzi ban loo izlyo', mèna nac mèn co' indubte lèe loo libr co'te' ndub lèe mèn co' yòo ban no Diox thidtene. Libr co' ngue no Dioxa, libra ngue nole' Diox axta co'se' anon mblec Diox izlyo'. No más de cona, ante hui' mèna no ante ñaa mèna co'se' ñèe mèn ryo xban má' tín' co' nac mbi' co' ngo ban no ngoloa nguth mbi'. Per nalle', ale mbere mbi', ngro xban mbi' tedib vez. Por cona, hui' mèn no ñaa mèn loo mbi' tedib vez. 
\p  
\v 9 Trè' ngue niin plá di's ndxè' lool, Juàn, par que'l di's ndxè' loo ye's par li mèn co' ndxác xtùuz cón che'n di's ndxè' no ta' mèn cuent cón che'n di's ndxè' cón nee di's ndxè'. Pues gaz yéc má' co' gunèel ndlu' nac no nee di's nac gaz yii co' nac yii co'te' ndub xa'gota.  
\v 10 Lomisque' ne, gaz yéc má' co' gunèela ndlu' cón che'n gaz mbi' co' ngòcle' rey. Per de loo gaz mbi' co' ngòcle' reya, ngolole' gunee cón che'n ga'y mbi'. Per be' mbyan' taachop mbi'. Thìb mbi' nac gobiern co' ñibe' nalle'. Per tedib mbi' tarte yi'th, co' nee di's, tarte tlo mbi', ñibe' mbi'. Per co'se' yi'th mbi' co' nac lult mbi' co' ñibe'a, ne'tyub ñibe'de mbi' arid nen, co' nee di's, huax lín'. Luega ñeei loo mbi'.  
\v 11 Per leque thìb má' tín' co' ngòc mbi' co' thidte ngòc rey con rye gaz rey ndoore' no ngoloa nguth mbi', leque mbi'a bere ryo xban par gàc mbi' rey co' ñibe' co' gàc xon rey co' ñibe'. Co'se' ñibe' rey co' gàc xon rey ndxep tiemp co' gàc leque mbi'a, syare', ñeei loo mbi' thidtene, co' nee di's, Diox li par lyàa mbi' thìb lìte le'n ye'rbiil thidtene. 
\p  
\v 12 Le' ryete si' cach co' gunèel mdub yéc má'a na, si' cach má'a nee di's nac si' rey co' tarte tlo ñibe'. Diox ta' lugar gàp reya con' la's nii reya no con' la's ya' reya par ñibe' reya ndxepte tiemp co' gàc leque tiemp co' ñibe' má' tín' co' nac thìb mbi' loo izlyo'.  
\v 13 Ryete si' reya thidte di's que no. No ta' ryete reya lugar par ñibe' má' tín' co' nac mbi'a loo reya.  
\v 14 Le'n ndxep tiempa, cua'n xó' ryete si' reya con má' tín' co' nac mbi'a con solndad rey no solndad mbi'a contra Mbacxil' co' nac leque yub Jesucrist. Per Mbacxil' co' nac leque yub Jesucrist li gan loo rye reya no loo má' co' nac mbi'a tac Jesucrist nac Tad co' ñibe' loo chol mèn, co' nee di's, nac Tad loo izlyo'. No nac Tad Jesucrist rey che'n mèn, co' nee di's, nac rey co' ñibe' loo mèn loo izlyo'. Le' rye mèn co' mqueltàa con Tad Jesucrist na, mèna nac mèn co' Diox mcui no co' mblec Diox loo cón che'n Diox. No thidteneque' altant nzi mèna loo cón che'n Diox. 
\p  
\v 15 Tolo gunee angl loon: 
\p ―Juàn, níttó' co' mxacl gunèel co'te' ndub xa'got co' ndli yalburrid, níttó'a nee di's nac mèn rye nación co' nziri' dib athu loo izlyo' no nac níttó'a mèn rye nación co' ndyoodi's chol di'stèe.  
\v 16 Le' si' cach co' gunèel ndub yéc má' tín'a na, con'a nee di's le' mèn co' nziri' loo izlyo' yòo xyàn lezo' mèn ñèe mèn xa'gota. No lá'ya' mèn cón che'n xa'gota. No li mèn gàc loo xa'gota xal thìb mèn co' yende xab co' ngue tee che. Ale tlate hua mèna bél' lad xa'gota. No tec mèn xa'gota loo quìi no loo bèel.  
\v 17 Yub Diox mbli par mbli mèn co' ngòc reya xal mblya's Diox par thidte ngòc mèna no par thidte mdoodi's mèna par mbli mèna ngòc má' tín'a xa' co' ñibe' dib athu loo izlyo' xal thìb rey axta zin huiz no tyaa huiz co' ndxab Diox cued, ya ne'tolode ban má' tín'a loo izlyo'.  
\v 18 Le' xa'got co' gunèela na, xa'gota nac ciuda roo no ciuda xèn co' ñibe' no co' li gàc nado' rye mèn co' ñibe' loo mèn dib athu loo izlyo' par ñibe'pe' ciudaa loo mèn dib athu loo izlyo'. 
\c 18  
\s1 Ciuda co' ne' lèe ciuda Babiloñ lyux thidtene. 
\p  
\v 1 Ngolo ngòc ryethe con'a, mxaquen gunèen tedib angl co' nde làa loo bé' loo izlyo'. Angla ndxàp con' roo no con' xèn la's nii angl no la's ya' angl. Le' loo izlyo' na, mbyà'x xnìi co' nquée lad angl.  
\v 2 Mbìnen ngrozèe angl cabii. Mbez angl loo mèn loo izlyo': 
\p ―Nase ya mblyuxle' ciuda roo no ciuda xèn co' ne' lèe ciuda Babiloñ. No ngòc ciuda roo ciuda xèna liz no làaz che'n chol xpii ye'rsin'. Lomisque' ne, ngòc ciudaa ciuda co'te' ngos ngóol chol mbin co' indxòode lezo' mèn hui' mèn no chol mbin co' ndxòo xyàn lezo' mèn ñèe mèn.  
\v 3 Tataaque' gàca loo mèn ciuda roo ciuda xèna tac mèn ryete nación co' nziri' dib athu loo izlyo' nzi li xalque' nac mod co' ndxàp mèn ciuda roo ciuda xèna. Tac mod co' ndxàp mèn ciudaa ndli inthyonte mèn loo chol con' ye'rsin' co' ndli mèn. Nac mèna xal mènguy co' nquée mbii yéc co'se' ndli mènguy chol con' ye'rsin'. No axta rye mèn co' nac rey, co' nee di's, chol mèn co' ñibe' loo xtàa mèn nzi ban li mèna chol con' ye'rsin' xalque' nac mod co' ndli mèn ciudaa. Lomisque' ne, rye mèn co' nac comerciant loo izlyo' ndxè' ndxàc ric por mod co' ndxàp mèn ciudaa por ntho' comerciant ryethe con' co' ndyoxcua' mèn ciudaa co' nac thìb mod ye'rsin'túb co' ndxàp mèn ciudaa. 
\p  
\v 4 Leque hora, mbìnen tedib di's co' mbyèn loo bé'. Di'sa mbez: 
\p ―Gro' gu' le'n ciuda ba', gu' co' nzo loo cón chenen no gu' co' nac chenen, par ne'gàcte gu' thidte con mèn co' ndxàp xtol ba' no par ne'cua'nte gu' xquin gu' xal ncua'n mèna ba' xquin mèna ba', no par ne'yidin'te yaltìi co' nac con' ye'rsin' co' ndxàc loo mèn ba' loo gu', ne.  
\v 5 Tac mèn ba' anze'f thìb xtol mcua'n loo Diox. Por cona, indxathla'ste Diox ryethe con' ye'rsin' co' mbli mèn ba'.  
\v 6 Le' sya, leque hora mnibe' angl loo taamas angl co' mtel' Diox par tetìi angl mèn che'n ciuda co' ne' lèe ciuda Babiloñ. Ndxab angla loo taamas angl: 
\p ―Bli gu' lomisque' con' loo mèn ciuda ba' xal mbli mèn ciuda ba' loo chol mèn. Lomisque' ne, blo xtàa gu' chop vez loo mèn ciuda ba' xalque' mbli mèn ba' loo chol mèn. Fcua'n gu' mod tetìi gu' mèn ba' chop vez por ryethe con' ye'rsin' co' nde teele' ndli mèn ba' loo taamas mèn.  
\v 7 Bli gu' par tyactìi mèn ciuda ba' axta plóthe no par ten' mèna yalnè axta plóthe xalque' co'se' mque tee te's mèn, no mque tee xal' mèn, no mdyoxcua' mèn con ampurte con' huen axta plóthe. Tataa bli gu' tac mèn ciuda ba' mbez loo lezo' mèn: Trè' nduben. Yende chó ñibe' loon no yende chó ñii loon. Nac daa xal thìb xa'got co' nac rein. Inacte daa xal thìb xa'got viud. No dib lal naban daa yende chó mèn gác li par texi mèna lezon. Anze'f huen nzon. No huen ndan par delant. 
\p  
\v 8 Por cona, thidte huiz gàc ryethe con' ye'rsin' ndxè' loo mèn ciudaa: Gath mèna. Xi lezo' mèn por yaltìi co' gàc loo mèn. Lyàa huin loo mèn. Lyàa quìi no bèel loo mèn par yec mèn. Tataa li Diox loo mèn tac Diox nac Diox co' ndxàp rye loothe con' roo no con' xèn la's nii Diox no la's ya' Diox. No nac Diox Tad co' mquexù' mèna par tataa gàca loo mèna. 
\p  
\v 9 Le' rye mèn co' ngòc rey no co' ngòc mèn nac zin' co' mnibe' loo xtàa dib athu loo izlyo', mèn co' mque tee li xal nac mod ye'rsin' che'n mèn ciudaa no mèn co' mbli xal ndyoxcua' mèn ciudaa, mèna gón' no cozèe yath mèna co'se' ñèe mèna yitoo zen ndxec ciuda roo ciuda xèna, ne.  
\v 10 Mèn co' ngüi' xal ndxetoo zen ndxec ciudaa, mèna nziri' tith por mzyeb mèna ndxàc yaltìi loo mèn ciudaa. Mèna mbez loo mbii loo mèn ciuda roo ciuda xèna: 
\p ―¡Ay, prob gu' izlyo', mèn ciuda Babiloñ, gu' co' ngòc mèn ciuda roo ciuda xèn. Ale setilte ngòc con' tín' ba' loo gu', yoo, par tatua' mod mtetìi Diox gu'. Mzyalque' gu'i. 
\p  
\v 11 Lomisque' ne, ale mbín' mèn co' ngòc comerciant co' mbli delgens dib athu loo izlyo' por cón che'n mèn ciudaa co' ngòc yaltìi looa tac ya yende chó mèn tolo ndi' ryethe con' co' ndyee tho' mèn loo mèn ciudaa.  
\v 12 Ryethe con' co' nac co' ndyee tho' mèn co' ndli delgens par neda nac chol con' co' nacsua' con or, no con' co' nacsua' con plat, no co' nacsua' con chol loo quèe co' anze'f ntac. Ntho' mèna chol loo perl, lar' fin co' anze'f náp ntac, no lar' sed co' nac color morad no co' nac color nane ren. No ntho' mèna rye loo yaa huen co' nix ndlya'. No ntho' mèna huax loo con' co' nacsua' con thìb loo quèe co' lèe marfil. Ntho' mèna thìb loo yaa huen co' anze'f náp ntac. Ntho' mèna yi'f co' lèe brons no chol taamas yi'f. No ntho' mèna quèe co' lèe marm.  
\v 13 Ntho' mèna canel no rye loothe taamas con' co' nix ndlya' xal du'r yal' no tedib loo con' co' lèe mirr no nít perfum co' anze'f nix ndlya'. Ntho' mèn mbacxil', huay, carret co' ngo'f huay, no axta ndxe' mèna mèn co' ntho' mèna par ndxàc mèn moz co' ndyo' par ñibe' yèe mèna loo prob mèn co' ndxàc moz.  
\v 14 Per co'se' ñèe mèn co' ntho'a tataa ndxàc loo mèn ciuda co' nac ciuda roo ciuda xèn co' ne' tedib lèe ciuda Babiloñ, mèna ndxab loo mèn ciudaa: 
\p ―Nase mblyux rye loothe con' ndac co' ngòp gu'. No axta arid mda' gu' gust lezo' gu' con con' co' ngòp gu'a. No, por derech, mblyux ryethe con' ndac, no yalgon', no ryethe mod co' nabe's mdyoxcua' gu'. 
\p  
\v 15 Ryete mèn co' ntho' co' ndli delgens loo ryethe con' ntho' mèn no ryethe mèn co' ngòc ric por con' co' mtho' mèn loo mèn ciudaa, rye mèna ngure tith loo ciuda roo ciuda xèn co' mdoo yol no co' mdoo lux por tant mzyeb mèna ngüi' mèna xal ndxàc yaltìi loo ciudaa. Ndxón' mèna no mbez yèe mèna.  
\v 16 No ndxab mèna loo mbii loo mèn ciudaa: 
\p ―¡Ay, prob mèn ciuda roo ciuda xèn ba'! Mèn ciuda ba' ngòc xal thìb xa'got co' nabe's gunaa co'se' ndxoc xa' lar' co' nac lar' fin, no co'se' ndxoc xa' lar' co' nac lar' color morad no lar' color nane ren, no co'se' ndyoxcua' xa'gota con anabte or no con anabte quèe co' anze'f náp ntac no con perl. 
\p  
\v 17 Lomisque', mbez mèna loo mèn ciudaa: 
\p ―Ale setilte mblyux gu' no mblyux yalgon' co' ngòp gu'. 
\p Lomisque' ne, ryete mèn co' ngòc capitán co' ñibe' loo mèn co' ndli zin' loo yòoyaa, no rye mèn co' nzo le'n yòoyaa, no rye mèn co' ntetee yòoyaa, no ryete mèn co' ndli zin' loo níttó', rye mèna ngure tith par ngüi' mèna xal ndxol ciudaa no par hui' mèna xal ndlyux ciudaa.  
\v 18 No co'se' ñèe mèna ndxetoo zen ndxol ciudaa, ngrozèe yii no ngrozèe den mèna. Mbez mèna loo mbii: 
\p ―¿Chó mèn ciuda lalque' gàc xal ngòc mèn ciuda roo ciuda xèn ba', yey? Yende chó mèn ciuda co' lalque' gàc xal ngòc mèn ciuda ba', ¿lé'?, cara. 
\p  
\v 19 Látha, ndyen mèna yòo. Nxob mèna yòo yéc mèna tant nxi tín' lezo' mèna. Ndxón' mèna no mdub mingo'r yen mèna. No mbez yèe yath mèna. No mbez mèna loo mbii loo mèn ciudaa: 
\p ―¡Ay, prob mèn ciuda roo mèn ciuda xèn ba'! Con yalgon' co' ngòp mèn ba' ngòc ric rye mèn co' mque no barc loo níttó'. No nalle' ale setilte mblyux yalgon' mèn ba'. No mblyux mèn ba'. 
\p  
\v 20 Mberen, mbìnen di's co' mbyèn loo bé' tedib vez co' mbez: 
\p ―Ndxe'leque', ftac lezo' gu' no fxo'f nde' fxo'f ndla' lezo' gu' cón che'n con' co' ngòc loo ciuda ba', ryete gu' co' nzo loo bé', no ryete gu' co' nac apostl co' mtel' Jesucrist par ndxe' gu' di's ndac loo mèn, no ryete gu' co' mde'th di's co' ndxab Diox, no ryete gu' co' nzo loo cón che'n Diox no co' nac che'npe' Diox. Tac texal ngolo mquexù' Diox mèn ba' par mtetìi Diox mèn ba', tatua' mod mbli Diox mblo xtàa Diox loo mèn ba' por cón che'n gu'. No mbli Diox con' nalì no con' nambìi loo gu' por cón che'n mèn ba'. 
\p  
\v 21 No co'se' ngolo mbìnen di'sa, chàa, gunèen mblít thìb angl thìb quèe roo co' né' xal thìb quèe yees. Mxen angl quèea. Mblobii angl quèea le'n níttó'. Ndxab angl loo mbii: 
\p ―Texal mblobiin quèe ndxè' le'n níttó', tatua' lyux mèn co' nac mèn ciuda roo ciuda xèn co' ne' lèe ciuda Babiloñ. No thidtene ya ne'berede mèn, hui' mèn ciuda roo ciuda xèn co' ne' lèe Babiloñ tedib vez. 
\p  
\v 22 Ndxab angl cón che'n mèna, ne: 
\p ―Thidtene ya ne'gònte mèn gol' mèn musc ned co' nac ned gu', musc co' nac arp, no co' nac flaut, no co' nac trompet. Ne' ne' yòo mèn co' ndxác ndli chol zin'. Ne' ne' yèn tyez molin co'se' ndli molin zin' le'n ciudaa.  
\v 23 Ya ne'yú'de loo mèn co' nac chol xnìi lampr co' tenìi ciudaa thidtene. No thidtene ya ne'yènte gàc ruid le'n ciuda co'se' selya' mèn le'n ciudaa. Tataa gàca loo mèn ciudaa mastale' ngòc mèn co' ntho' chol con' loo mèn ciudaa mèn co' ngòc mèn más mèn roo no mèn xèn loo taamas mèn dib athu loo izlyo'. Lomisque' ne, tataa gàca loo mèn ciudaa tac mquedìi mèn ciudaa mèn chol nación dib athu loo izlyo' con mod ye'rsin' co' ngòp mèna co' nac ngòc mèna mèn bruj. 
\p  
\v 24 Tolo ndxab angl: 
\p ―Tataa mod mtetìi Diox mèn ciuda roo ciuda xèna axta plóthe tac le'n ciudaa mbeth mèna mèn co' mde'th di's co' ndxab Diox. No mbeth mèna mèn co' ngòo loo cón che'n Diox, mèn co' ngòc che'npe' Diox. No mbeth mèn ciudaa huax mèn co' ngo ban dib athu loo izlyo'. 
\c 19  
\p  
\v 1 Ngolo mbìnen gunii angl rye co' ngòca, mbìnen mbyèn di's che'n huax mèn loo bé' co' mbez cabii: 
\pi1 ¡Ay, Dio's! Gab na' le' Diox nac Diox roo no Diox xèn, Diox na' co' mbli par ndlyá' mèn loo con' ryes. Nac Diox na' Diox roo no Diox xèn loo ryethe con'. No ndxàp Diox na' rye loothe con' roo con' xèn la's nii Diox no la's ya' Diox. 
\pi1  
\v 2 Diox roo no Diox xèn nac Diox tac nalì no nambìi ndub rez Diox con mod co' ndxàp Diox co' nac mod lìcpe'. Mquexù'le' Diox xa'got co' nac xa'got roo xa'got xèn co' nacguè' xa'got burrid co' mbli le' mèn co' ngo ban dib athu loo izlyo' mbli ngòc nguàal con' zab co' nac con' ye'rsin' co' nac mod co' ndxàp xa'gota. Por cona, mblo xtàa Diox con' ye'rsin' co' mbli xa'gota co'se' mbli xa'gota mbeth mèn prob mèn co' mxo'f zin' cón che'n Diox. 
\p  
\v 3 Mbere mèna, ndxab mèna tedib vez: 
\p ―¡Ay, Dio's! Gab na' Diox roo no Diox xèn nac Diox tac Diox mbli ndxetoo zen le'n ciuda mèn ba'. Thidteneque' yitoo zen ze no yál'. No ne'yú'de quìi co' ndli ndxetoo zen ba' thidtene. 
\p  
\v 4 Le' ryete gal fthap mèngool no dyap má' co' nabana na, mdub xib no mcòo' mèngoola no má' co' nabana yéc má' no mèngoola loo Diox co' ndub loo asient co' nzo loo bé'. Mbez mèngoola no dyap má' co' nabana: 
\p ―Tataaque' ndxàal ngòca. No nalle' gab na' Diox roo no Diox xèn nac Diox co' mbli ngòc con'a. 
\p  
\v 5 Mberen, mbìnen tedib di's co' mbyèn loo bé' co'te' ndub Diox loo asient. Di'sa mbez: 
\pi1 ―Bli gu' no fte'th gu' cón che'n con' roo no con' xèn co' mbli Diox, ryete gu' co' nxo'f zin' che'n Diox no ryete gu' co' nzyeb ñèe Diox, que nac gu' mèn co' nac mèn be'the, no que nac gu' mèn co' nde'f di's nac mèn roo no mèn xèn. 
\s1 Trè' ndlu' cón che'n Mbacxil' co' nac Crist no cón che'n mèn co' nzole' loo cón che'n Crist co' queltàa no Crist loo bé'. 
\p  
\v 6 Daa, Juàn mberen, mbìnen ruid co' mbyèn co' nac di's co' mbez huax mèn. Ruida mbyèn xal co'se' nxyo'f nít huax yó'be'. No mbyèn ruida xal co'se' ndxas ndlya'b gundii. Mxaquen mbez mèna: 
\pi1 Gab na' con' roo no con' xèn ndli Diox tac nalle', por derech, tlo Diox, ñibe' Diox loo ryethe con' thidtene, Tad Diox na' co' ndxàp rye loothe con' roo no con' xèn la's nii Diox no la's ya' Diox. 
\pi1  
\v 7 Leque na' li par tyac lezo' na' axta plóthe. No leque na' li par xyo'f nde' xyo'f ndla' lezo' na' axta plóthe. No gab na' con' roo no con' xèn cón che'n con' mbli Diox loo mèn tac nase mzinle' tiemp no mzinle' hor co'se' queltàa no na' Mbacxil' che'n Diox co' nac leque yub Jesucrist par yo no na' Jesucrist thidtene xal co'se' ndxàc nab thìb mza' par selya' mza' con thìb mbyòo co' gàc sa'l mza' par tyub no mza' mbyòo thidtene. 
\pi1  
\v 8 Lomisque' ne, gàca loo na' xal co'se' ndyoxcua' mza' co' selya' co'se' ndxoc xab mza' lar' huen co' ante nagus bèelleque' ñaa no co' nquée xnìi. 
\m Lomisque' ne, mbìnen ndxab mèna le' lar' huen, co' nee di's, xab mza' co' goc mza' par selya' mza, lar' huena nee di's nac mod nalì no mod nambìi che'n na' tac na' mblu'que' xá mod mque tee ban nalì na' no xá mod mque tee ban nambìi na' loo Diox, na' co' ngòo loo cón che'n Diox, na' co' ngòc che'npe' Diox. 
\p  
\v 9 Sya, gunee angl loon: 
\p ―Juàn, taandxè' fque' di's loo ye's xal niina lool nalle': Huen nda mèn co' ngòc convid par ya mèn loo yalhua co' gàc che'n Mbacxil' co' nac leque yub Jesucrist. 
\p Gunee angl loon, ne: 
\p ―Di's co' ngue niin lool ndxè' nac di's co' nac lìcpe' che'n Diox co' gunee Diox loon par niina lool. 
\p  
\v 10 Láth ndyoodi's angl loon, mdub xiben loo angl no mcòo'en yéquen loo angl. Per ale ndxe'leque, gunee angl loon: 
\p ―Ne'lidel tatua' loon, ey. Tac daa nxo'f zin' cón che'n Diox xalque' nxo'f zin'l cón che'n Diox no xalque' nxo'f zin' mèn co' ndxàc hues lùu por cón che'n Jesucrist, mèn co' altant ndyoo par ngo mèn yalbàn cón che'n Tad Jesús. Más huen ftub xibl no fcòo' yécl loo Diox. 
\p Rye mèn co' nde'th di's co' ndxab Diox, mèna nac mèn co' ngo xo'f no co' nda' cuent cón che'n Jesús. 
\s1 Trè' ndlu' cón che'n thìb mbi' co' mdub huay nagus. 
\p  
\v 11 Be taa be taa ndoon ale gunèen mxaquen mxyal' loo bé'. No mxaquen ale, chàa, ngro' too thìb huay nagus. No mdub thìb mbi' huay. Mbi' co' ndub huaya lèe, xal ndxòn mèn di's, Anze'f Altant. No lèe mbi', xal ndxòn mèn di's, Lìcpe'. Tataa lèe mbi' tac co'se' ñibe' mbi', nalì no nambìi ñibe' mbi' loo mèn. No li mbi' xó' xal ndxàalpe'i loo mèn loo izlyo' par co xtàa mbi' ryethe con' ye'rsin' co' mbli mèn ye'rsin' loo chol mèn.  
\v 12 Mxaquen ndxaa'd bèel ngudloo mbi' xal co'se' ndxetoo bèel. No mxaquen ndub huax coron yéc mbi'. No ndub thìb di's co' nac tedib lèe mbi' lechuz mbi'. No ante mbi' nanee no non mbi' cón nee di's di's co' nacguè' lèea.  
\v 13 Noc xab mbi' thìb ned xab mbi' co' nago' con renpe' mèn. No lèeguè' mbi', xal ndxòn mèn di's, nac Xti's che'n Diox.  
\v 14 No ndoo nque huax angl co' nac solndad co' nzo loo bé' xís mbi'. Angla gunèen noc xab anabte lar' nagus bèelleque' co' ngòc lar' co' anze'f nambìi, co' ngòcque' thìb lar' huen co' lèe lin. No ndub angla anabte huay nagus.  
\v 15 No mxaquen ndryo' thìb spad co' nalen tín' ryop loo ro mbi'. Spada làa mbi' rloo mèn co' nac mèn rye nación dib athu loo izlyo'. No ñibe' yèe mbi' loo mèn rye nación dib athu loo izlyo'. No noo noo tub rez mbi' cón che'n rye mèn dib athu loo izlyo' xalque' ndxàal gàca loo mèn. Ne'lyatte lezo' mbi' ñèe mbi' mèn huiza. Ale ndxe'leque', tetìi tín' mbi' mèn dib athu loo izlyo' axta plóthe por ndxecloo Diox ñèe Diox mèn, Diox co' ndxàp rye loothe con' roo no con' xèn la's nii Diox no la's ya' Diox.  
\v 16 No ne' mbi' di's co' mbez taandxè': Rey co' ñibe' loo rye rey loo izlyo', no loo mèn nac zin' co' ñibe' loo xtàa loo izlyo', no loo Tad co' ñibe' loo mèn co' nde'f di's nac Tad loo izlyo'. Di'sa ndub lad xab mbi' co'te' nac pech mbi' no co'te' nac bél' fcha' cor' mbi'. 
\p  
\v 17 Chàa, ngua loon gunèen thìb angl co' ndoo loo huiz xal co'se' ndyoo mèn loo thìb banc. Angla cabii ngrozèe loo rye mbin co' nxobii loo mbii. Ndxab angl loo mbin: 
\p ―Que de gu', no thidte queltàa gu' par hua rsè gu' thìb rsè co' mbli nab Diox hua gu'.  
\v 18 Gu' hua bél' co' nac bél' mèn co' ngòc rey. No hua gu' bél' che'n mèn co' ngòc mèn nac zin' co' mnibe' loo xtàa mèn dib athu loo izlyo'. No hua gu' bél' mèn co' ñibe' loo solndad. No hua gu' bél' mèn co' ndli cuent anze'f mbi'. No hua gu' bél' huay. No hua gu' bél' mèn co' ndyub huay. No hua gu' bél' ryethe mèn, que nac mèna mèn co' yende chó taamas mèn ñii loo co' nacguè' mèn co' yende chó mèn mbee nca', que nac mèna moz co' nac moz yèe loo patrón, que nac mèna mèn be'the, que nac mèna mèn co' nde'f di's nac mèn roo no mèn xèn. Hua gu' bél' mèna. 
\p  
\v 19 Sya, gunèen má' tín'a, no rye mèn co' ngòc rey co' nac mèn nac zin' co' ñibe' loo xtàa mèn dib athu loo izlyo' con rye solndad mèna. Ryete mèna mqueltàa par li mèna xó' con mbi' co' ndub huay nagus no con solndad mbi'.  
\v 20 Per solndad mbi' thidte mxen má' tín'a xal thìb pres con mbi' co' mbez nde'th di's co' ndxab Diox. Per di's co' nde'th mbi'a nac di's gutyè'túb, mbi' co' mbli huax yalguzye' loo má' tín'. No por mbli mbi'a huax yalguzye' co' nac yalguzye' gutyè' loo mèn, mbli mbi' par mquedìi mbi' huax mèn par mbla' mèn mquée señ che'n má' tín'a lechuz o la's ya' mèn. No mbli mbi'a par mdub xib rye mèna loo gunab che'n má' tín'a. Leque hora, mblo mbi' co' mdub huay nagus má' tín' no mbi' co' mde'th di's gutyè', ndoo lì ndoo ga' má', ndoo lì ndoo ga' mbi', ngulàa mbi' le'n ye'rbìil co'te' ndxetoo bèel co' ndxol con asufr.  
\v 21 Le' taamas solndad che'n má'a no mèn co' ngòc rey co' ngòc mèn co' mnibe' loo xtàa dib athu loo izlyo'a na, nguth con spad co' mdub ro mbi' co' mdub huay nagus. No leque hora nduhua mbin bé' bél' rye mèna axta plóthe. 
\c 20  
\s1 Mebizya gàc xal thìb pres le'n ye'rbìil le'n thìb mil lín'. 
\p  
\v 1 Ngolo nguri'th ryethe con'a, gunèen thìb angl co' nde làa loo bé' loo izlyo'. Ne' angl lyab che'n puert ye'rbìil. No ne' angl thìb caden fcha' ya' angl.  
\v 2 Angla mxen má' co' lèe Dragón, má' co' ne' tedib lèe Mbel' Gox, má' co' nac merpe' Mebizya, má' co' ne' tedib lèe co' nac lèe Satanás. Mquedó' angla Mebizya.  
\v 3 Ngoloa, mblobii angl Mebizya le'n ye'rbìil. Tya, mtegòo angl Mebizya no mque' angl thìb señ loo puert par tataa mod ya ne'ryo'de Mebizya par tolo quedìi Mebizya mèn rye nación co' naban dib athu loo izlyo'. Per co'se' ngolo thìb mil lín' co' nzo má' le'n ye'rbìil, Diox mnibe' par ngro' Mebizya le'n ye'rbìil le'n ndxep tiemp xal non Diox naquin gàca. 
\p  
\v 4 No gunèen nzi bel' plá asient thìb lugar loo izlyo'. Loo asienta nzi ndub mèn co' mbli Diox par ngòp mèna con' la's nii mèna no la's ya' mèna par tub rez mèna cón che'n taamas mèn. Lomisque' ne, gunèen alm no xpii mèn co' mcho' mèn yéc por mda' mèna cuent cón che'n Jesús loo mèn no por cón che'n di's ndac che'n Diox co' mblo mèna yalbàn loo mèn. Mèna ngòc mèn co' ne'ndub xibte no co' ne'ncòo'de yéc loo má' tín' no loo gunab má' tín'. No ne' ne' ngla' mèna nquée señ che'n má' tín' no che'n gunab má' tín' lechuz o la's ya' mèna. Gunèen, ne, le' mèna ngro xban. No mnibe' no mèna Crist le'n thìb mil lín'.  
\v 5 Per taamas mèn co' nguth co' ne'ndalte ngala's loo Jesucrist no loo cón che'n Jesucrist, ne'ngro xbante mèna hora. Mèna ryo xban axta co'se' tyaa thìb mil lín'. Co'se' ngro xban mèn co' mnibe' no Crist thìb mil lín'a, leque hora, ngòc tiemp co' nerleque' ngro xban mèn co' ngro xban làth mèn nguth, mèn co' ngola's loo Jesucrist.  
\v 6 Huen nda mèn, no ndyac lezo' mèn, no ngòc mèna mèn co' ngro xà'le' loo ryethe con' ye'rsin' par ngòc mèna che'npe' Diox, mèn co' ngro xban leque tiemp co'se' ngro xban mèn co' mnibe' no Crist thìb mil lín'. Mèna ne'co' xà'de Diox loo Diox co'te' nzo Diox par tetìi Diox mèna thidtene. Ndxe'leque', gàc mèna mèn co' mbez no co' gab con' roo no con' xèn no con' natú' loo mèn cón che'n Diox. No gab mèna con' roo no con' xèn no con' natú' loo Diox. Tataa mod li mèna sirv loo Diox no loo Jesucrist. No ñibe' no mèna Crist thìb mil lín'. 
\p  
\v 7 Co'se' ngolo nguri'th thìb mil lín'a, Diox mnibe' par ngro' Mebizya le'n ye'rbìil co'te' ngòc lezi'f co'te' ngòo Mebizya.  
\v 8 Mebizya ngro' le'n ye'rbìil par mquedìi Mebizya mèn rye nación co' nzi ban dib athu loo izlyo'. No mquedìi Mebizya mbi' co' lèe Gog. No mquedìi Mebizya mèn che'n nación Magog co'te' ñibe' mbi' co' lèe Gog. No mbli Mebizya par queltàa rye solndad che'n nación Magog. Solndad che'n nación Magoga axta ne' ne' ñee mèn plá solndad tac nac solndada mènléy' xal yux co' nziri' ro níttó'.  
\v 9 Ryete solndada queltàa co'te' nac ciuda Jerusalén par tau' solndad dib vuelt ro ciuda Jerusalén co' nac ciuda co' anze'f nque' lezo' Diox. No tau' solndad loo mèn co' mblá' cón che'n xab izlyo', mèn co' nzo loo cón che'n Diox, mèn co' mqueltàa thìb lad gaxte ro ciuda Jerusalén par li solndad xó' con rye mèna. Per ndoore' li solndad xó' loo mèna, Diox mbli ngulàa quìi loo bé' par thidtene mbyec solndada.  
\v 10 Le' Mebizya co' mquedìi solndada na, thìb lìte mbli Diox par ngulàa Mebizya le'n thìb lugar roo tín' co' ñaa xal thìb lagun co'te' ndxetoo bèel co' ndxol con asufr, no co'te' ngulàa má' co' ngòc má' tín' no co'te' ngulàa mbi' gutyè' co' mbez nde'th di's co' ndxab Diox. Mèna tyactìi tya thidtene ze no yál'. 
\s1 Diox tub rez cón che'n ryethe mèn co'te' ndub Diox loo thìb asient nagus. 
\p  
\v 11 Ngoloa, chàa, mberen, mxaquen gunèen ndoo thìb asient nagus co' anze'f naroo. Nde nxon', gunèen ndub Diox loo asient. Be taa ndoon, chàa, setilte mdyon' bé' no izlyo' loo Diox. Ya yende pá mbyan' be' no izlyo' thidtene.  
\v 12 No gunèen ryete mèn co' nguthle', co' mbli Diox ngro xban hora ante par cue mèna loo Diox cuante, mèn co' nde'f di's nac mèn roo no mèn xèn, no mèn co' nac mèn be'the. Thidte ngure rye mèna loo Diox. Gunèen mxyal' loo huax libr. No gunèen mxyal' loo thìb libr co' nac tedib libr xà'. No loo libr co' nac thidte libr, loo libra ndub lèe ryete mèn co' yòo ban no Diox thidtene. Le' mèn nguth co' mbli Diox ngro xbana na, Diox mdub rez cón che'n mèna xalque' nac co' mbli mèn xal ndub cón che'n thìb thìb mèn loo libr co'te' ndub lèe mèn.  
\v 13 Leque hora mxaquen ryete mèn co' nguth le'n níttó', mèna ngro xban loo níttó'. Lomisque' ne, mxaquen ryete mèn co' nguth co' ngòo le'n ye'rbìil ngro' che le'n ye'rbìil. Ryethe mèna ngro' che le'n ye'rbìil. Ngure be mèna loo Diox par mdub rez Diox cón che'n mèna xalte nac co' mbli mèna loo izlyo' no xalte ngòc mod co' ngòp mèna loo izlyo'.  
\v 14 Ngoloa, mxaquen gunèen mbli Diox thìb con' loo con' co' ndxòn mèn lèe yalguth co' ndli par ntin liz mèn. No mxaquen mbli Diox ngulàa con' co' ndxòn mèn ngro' lèe ye'rbìil le'n quìi no bèel co' nac thìb lugar co' nziri' xal thìb lagun brut co'te' ndxetoo bèel co' ndxol con thìb loo dii co' lèe asufr. Loo quìi no loo bèel co' ñaa xal thìb lagun brut nac co'te' bii ryethe mèn, mèn co' co' xà' Diox loo Diox par tyactìi mèn tya thidtene par thidtene yilo cuent che'n mèn.  
\v 15 Loo quìi co'te' ñaa xal ñaa lagun brut, tya ñibe' Diox lyàa mèn, mèn co' indubte lèe loo libr co'te' ndub lèe mèn co' yòo ban no Diox thidtene. Aa. Tataaque' mbyú' loo con'a loon, daa co' lèe Juàn. 
\c 21  
\s1 Trè' ndlu' cón che'n tedib bé' cub co' cue no cón che'n tedib izlyo' cub co' cue yiloa. No ya ne'tolode cue níttó'. 
\p  
\v 1 Ngoloa, gunèen thìb bé' cub co' cue yiloa. Gunèen thìb izlyo' cub co' cue yiloa, ne. Tac ner bé' co' nziri' no ner izlyo' co' nziri' mdyon' no mblith no. No ya ne'tolode cue níttó'.  
\v 2 Daa co' nac Juàn co' mque' ye's ndxè' loo gu', daa gunèe thìb ciuda natú' co' nac tedib ciuda cub co' ne' leque lèe ciuda Jerusalén. Ciudaa nde làa loo bé' loo Diox. Ante nabe's natoxcua' ciudaa xal co'se' ndyoxcua' thìb mza' co'se' ndxoc xab mza' par selya' mza' con mbyòo co' gàc sa'l mza'.  
\v 3 Lomisque' ne, mbìnen di's co' mbyèn loo bé' co' mbez: 
\p ―Juàn, hui' nexa. Thidteneque' yo ban no mèna Diox le'n ciuda ba'. Gàc mèna che'npe' Diox, ne. No yub Diox yo ban no mèna le'n ciuda ba' par gàc Diox Diox che'npe' mèna thidtene.  
\v 4 No li Diox ya ne'gónte mèna thidtene. No li Diox ya ne'quéede yalguth loo mèn. No li Diox ya ne'cozèe yathte mèn. No li Diox ya ne'ten'te mèn yalnè no yalnaxi. Tac ryete mod co' ngòc mod co' mque tee ban mèn loo izlyo' co' ngòc ner izlyo' co' ngurea mdyon'le' no mblith nole'. 
\p  
\v 5 Mbìnen gunee xa' co' ndub loo asienta loon, ne: 
\p ―Juàn, hui' nexa. Na li gàc cub ryethe con'. 
\p Mbìnen gunee xa' loon, ne: 
\p ―Fque' ye's cón che'n con' ngue niin lool ndxè', Juàn. Tac di's co' ngue niin lool nalle' nac lìcpe'. No nzoque' mod yila's mèn no gàp mèn yalxla's cón che'n di's co' ngue niin ndxè'. 
\p  
\v 6 Ngoloa, gunee xa' loon: 
\p ―Ya ngolole' mblin ryethe con' co' mcàbgònen lin loo mèn. Daa nzoque' thidtene. Nac daa xal letr “a” co' ntlo loo alfabet. No nac daa xal letr “z” co' nac lult letr loo alfabet. Mèn co' lya's yòo ban no daa thidtene, na ta yalnaban loo mèna par yòo ban no mèna daa thidtene xal co'se' axta ngàl lezo' mèn ndxu mèn thìb xi nít co'se' ndxec lezo' mèn co'te' ndub len nít. No yalnaban co' tan loo mèn ne'ti'de mèn yalnabana con nec thìb centav.  
\v 7 Cona, ngue niin lool, Juàn: Mèn co' thidteneque' ngro xà' loo cón che'n xab izlyo' par ne'ta'de mèn lugar li Mebizya gan loo mèn, mèna gàc che'n co' nac chenen. No gàc daa Diox che'npe' mèna. Le' mèna na, gàc xin'en loon.  
\v 8 Per por part cón che'n mèn co' nzyeb par li mèn ryes yòo mèn loo cón chenen, no mèn co' ne'tyalte yila's loon, no mèn co' ndxòo xyàn lezo' ñèe mèn daa, no mèn co' ndxuth xtàa, no mèn co' ndxòo lezo' ndli yalburrid, no mèn co' ndli yalbruj co' ndxòo lezo' tetìi xtàa, no mèn co' ndyub xib no ncòo' mèn yéc mèn loo chol mdo' no loo chol gunab, no chol mèn co' nac mèn gutyè', ryete mèna go' cheen loon par go' xà'en mèna loon par yòo mèna co'te' nac thìb lugar roo co' ñaa xal thìb lagun roo co'te' ndxetoo bèel co' ndxol con asufr. Tya, ndoo lì ndoo ga' mèna, ya rye mèna par tyactìi mèna thidtene. 
\s1 Juàn gunèe xal ñaa ciuda Jerusalén cub co' cuec Diox yiloa. 
\p  
\v 9 Ngoloa, mbi'th thìb angl co' ngòc che'n rye gaz angl co' mque no thìb thìb cop co' ngòo gaz loo yaltìi co' ngòc con' ye'rsin' co' ngòc lult con' co' mbli Diox loo mèn par mtetìi Diox mèn. Gunee angla loon: 
\p ―Juàn, que de ndxè'. Daa lu' lool cón che'n ciuda cub ba'. Ciuda ba' hue' leque lèe ciuda Jerusalén. Ciuda ba' nac loo Jesucrist xal thìb mza' co' ndyoxcua' par selya' mza' con thìb mbyòo. 
\p  
\v 10 No láth mxyo'f loo con' co' mxo'f loo Xpii Natú' loona, mxaquen mbe' angl daa loo thìb yii roo co' ndub axta arid gáp. Tya mblu' angl ciuda roo ciuda xèn loon, ciuda natú' co' ne' leque lèe ciuda Jerusalén. Ciudaa nde làa loo bé' loo Diox loo izlyo'.  
\v 11 Ciudaa mquée xnìi con xnìi co' nac xnìi che'npe' Diox. Xnìi co' mquée lad ciudaa ngòc xal xnìi co' nquée loo thìb loo quèe co' anze'f náp ntac xalque' nquée xnìi loo tedib loo quèe co' lèe jasp co' ngüi' mèn par xís xal ngüi' mèn loo vidr cristal.  
\v 12 Dib vuelt xís ciuda ngure thìb ftoo. Ftooa ngòc thìb ftoo roo. No anze'f gáp nde'f ftooa. Nzi'f si' fchop puert lad ftooa. No ndoo angl thìb thìb ro puerta. No ndub lèe thìb thìb mèn, mèn co' nac che'n rye si' fchop mèn co' ngòc mèn co' mbloj msi' bin che'n mèn nación Israel loo thìb thìb puerta.  
\v 13 No gunèen ndub son puert lad ftooa par ned lad ndlyen huiz. No ndub taason puert lad ftooa par ned lad nort. No ndub taason puert lad ftooa par ned lad sur. No ndub taason puert lad ftooa par ned lad mbix huiz.  
\v 14 No quèe co' ngòc nii ftoo, co' nee di's, nac cimient che'n ciudaa ngòc si' fchop quèe. Co'se' gunèen nde làa dib zyaa ciudaa loo bé' loo izlyo', gunèen mdub lèe ryete si' fchop myen' co' ngòc xin' mté'th Jesucrist co' mtel' Jesucrist loo mèn par mbe' myen' di's che'n Jesucrist loo mèn loo izlyo' lad quèea, Jesucrist co' ne' tedib lèe Mbacxil' che'n Diox. 
\p  
\v 15 Le' angl co' mdoodi's nona na, gunèen nzo thìb bro yaa co' ñaa xal yíi co' ñaa xal or ya' angl co' nac par chi'x angl ciuda no par chi'x angl puert che'n ciuda no par chi'x angl ftoo che'n ciuda.  
\v 16 Ciudaa thidte nac dyap lad. Thidte nol'a. Thidte naxèna. Angla mchi'x ciudaa con bro yaa co' ñaa xal yíi co' ñaa xal or co' mque no angl. Co'se' ngolo mchi'x angl ciudaa, mbix ciudaa chop mil nzo chop ayo kilometros de nol' ciuda, no de gáp, no de naxèn ciuda. Thidte bé' ó thidte medid ne' yon lad ciuda.  
\v 17 Ngoloa, sangmchi'x angl ftoo co' nziri' xís ciudaa con metr. Co'se' ngolo mchi'x angl ftooa con metr co' nac leque metr co' nchi'x mèn loo izlyo', naxèn loo ftooa ayon fthap metr. 
\p  
\v 18 Le' ftoo co' nziri' par xís ciudaa na, natoxcua' con thìb loo quèe co' anze'f náp ntac co' lèe jasp. Le' dib lad ciuda na, natoxcua' con ampurte or co' ñaa xal vidr co' anze'f nambìi ñaa loo.  
\v 19 Le' si' fchop quèe co' nac quèe nii ciuda co' nac quèe cimient natoxcua' con rye loo quèe co' anze'f náp ntac. Ner quèea natoxcua' con thìb loo quèe co' lèe jasp. Le' mbryop quèe na, natoxcua' con thìb loo quèe co' lèe zafir. Le' mbyon quèe na, natoxcua' con thìb loo quèe co' lèe agat. Le' dyap quèe na, natoxcua' con thìb loo quèe co' lèe esmerald.  
\v 20 Le' quèe co' nac ga'y quèea na, natoxcua' con thìb loo quèe co' lèe onis. Le' quèe co' nac xop quèea na, natoxcua' con thìb loo quèe co' lèe cornalin. Le' quèe co' nac gaz quèea na, natoxcua' con thìb loo quèe co' lèe crisolit. Le' quèe co' nac xon quèea na, natoxcua' con thìb loo quèe co' lèe beril. Le' quèe co' nac yè' quèea na, natoxcua' con thìb loo quèe co' lèe topas. Le' quèe co' nac si' quèea na, natoxcua' con thìb loo quèe co' lèe crisopras. Le' quèe co' nac si' fthib quèea na, natoxcua' con thìb loo quèe co' lèe jacint. Le' quèe co' nac si' fchop quèea na, natoxcua' con thìb loo quèe co' lèe amatist.  
\v 21 Ryete si' fchop puerta ngòc si' fchop quèe perl. Thìb thìb puerta natoxcua' con thìb loo quèe co' lèe quèe perl. Le' ned co' nac más ned roo che'n ciudaa na, natoxcua' con ampurte or co' ñaa xal vidr co' ngüi' mèn par xís, no par loo, co' nee di's, ndxú' mèn par le'n no par fuer. 
\p  
\v 22 Ne'nghui'den nec thìb templ le'n ciudaa. Tac yub Tad Diox co' ndxàp rye loothe con' la's nii Tad Diox no co' ndxàp rye loothe con' la's ya' Tad Diox, no yub Tad Jesucrist co' ne' tedib lèe co' lèe Mbacxil' che'npe' Diox, nac templ che'n ciudaa.  
\v 23 Ciudaa ya inquinte tenìi huiz. Ne' ne' inquin tenìi mbe' le'n ciudaa. Tac leque xnìi co' nquée xnìi Diox tenìi le'n ciudaa. No leque bèel co' ndxa'x lad Jesucrist nac xnìi co' ntenìi le'n ciudaa.  
\v 24 Le' mèn rye nación co' nziri' dib athu loo izlyo' co' mblyá'le' loo con' ryes na, mèna quée lyàa no que tee mèna loo xnìi co' ndxà'x le'n ciudaa. Le' rye mèn co' ngòc rey co' ñibe' loo xtàa loo izlyo' ndxè' tiempa, mèna li con' roo no con' xèn loo Diox le'n ciudaa. Li mèna con' guryath no con' guryèn loo Diox le'n ciudaa, ne.  
\v 25 Puert che'n ciudaa thidtene ne'yau'te ryete huiz. Co'se' gàc tiempa, ne'lyàade yál' izlyo'.  
\v 26 Co'se' gàc tiempa mèn che'n ryete nación dib athu loo izlyo', mèna li par gàc con' roo no con' xèn loo Diox no li mèna par gàc con' guryath no con' guryèn loo Diox.  
\v 27 Co'se' cue ciudaa, nec thìb con' zab no nec thìb mèn zab ne'yòode le'n ciudaa. No nec thìb mèn co' ndxòo xyàn lezo' ñèe hues xtàa no nec thìb mèn co' nquedìi xtàa ne'yòode le'n ciudaa. Mèn co' yòo le'n ciudaa, mèna gàc mèn co' ndub lèe loo libr co'te' ndub lèe mèn co' yòo ban no Diox thidtene. Libra ngue no mbi' co' lèe Mbacxil' co' nac leque yub Tad Jesucrist. 
\c 22  
\p  
\v 1 Be taa be taa ndoon, chàa, mxaquen mblu' angl thìb yó'be' co'te' nzo'f nít co' nda' yalnaban loo mèn. Níta ante nambìi ñaa. Ñaa níta xal vidr cristal. Mxaquen le' co'te' ndub Diox loo asient no co'te' ndub Mbacxil' co' nac leque yub Jesucrist ngro' yó'be'a, ndyaquen.  
\v 2 Yó'be'a nguri'th xtau'the ned co' nac más ned roo le'n ciudaa. Lomisque' ne, ryop lad ro yó'be'a mbryoo mxyèn thìb loo yaa nayèe co' nac yaa co' nda' yalnaban loo mèn. Yaaa nda' xlè si' fchop vez le'n lín'. Cad mbe' nda' yaaa xlè. Le' laa che'n yaa nayèea na, ndli sirv par nteyac mèn che'n rye nación co' ndyac len le'n rye nación.  
\v 3 No nec thìb con' co' yo le'n ciudaa gàc con' ye'rsin'túb loo Diox. Huiza no tiempa, asient co'te' tyub Diox no co'te' tyub mbi' co' lèe Mbacxil' che'n Diox co' nac leque Jesucrist tyoo le'n ciudaa. Le' ryete mèn co' mxo'f zin' zin' cón che'n Diox loo Diox na, ryete mèna còo' yéc loo Diox no tyub xib mèna loo Diox.  
\v 4 Huiza no tiempa hui' mèna loo Diox xal ñaa Diox. No hue' mèna lèe Diox lechuz mèna.  
\v 5 Le'n ciudaa ya ne'lyàade yál' izlyo' thidtene. Le' mèn co' nzo ban le'n ciudaa na, ne' ne' inquin mèna xnìi che'n nec thìb lampr. Ne' ne' inquin mèna xnìi huiz. Tac yub Tad Diox tenìi loo mèna. Huiza ryete mèna ñibe' no Diox thidtene loo con' ñibe' Diox. 
\s1 Trè' ndlu' le' tiemp co' gàc tiemp co'se' yi'th xi Jesucrist na' nde zin' gaxle'. 
\p  
\v 6 Tolo gunee angla loon: 
\p ―Di's co' ngue niin lool ndxè' nac lìcpe', Juàn. Nzoque' mod gàp mèn yalxla's xal nac di's co' ngue niin ndxe' no yila's mèn di's ndxè'. Yub Tad co' nac Tad Diox ndli par non mèn co' nde'th di's co' ndxab Diox cón che'n co' ndxab Diox. Diox mtel' angl che'n Diox loo mèna par mblu' angl loo mèn co' mde'th di's co' ndxab Diox no par mda' angl cuent loo mèn cón che'n Diox par ta' mèna cuent loo mèn cón che'n co' li Diox gàc loo mèn yiloa. 
\p  
\v 7 Gunee Tad Jesucrist loon le' ya ne'lyen'te Tad Jesucrist. Chàa, yi'th Tad Jesucrist. No gunee Tad Jesucrist loon: 
\p ―Huen nda mèn co' ndub nza no co' ndli cas cón che'n con' co' ndxab Diox li Diox loo mèn xal nac di's co' ndub loo libr ndxè'. 
\p  
\v 8 Yub daa co' nac Juàn mbìn rye di'sa. No gunèen ngòc ryethe con'a. Per co'se' ngolo mbìnen di'sa no ngolo gunèen ngòc ryethe con'a, mdub xiben xàn' nii angl co' mblu' rye con'a loon par còo'en yéquen loo angl.  
\v 9 Per le'le' gunee angl loon: 
\p ―Ne'lidel tatua' loon, Juàn. Daa, ne, nac mèn co' nxo'f zin' co' nac zin' cón che'n Diox xalque' nxo'f zin' lùu cón che'n Diox con mèn co' ndxàc huesl por cón che'n Jesucrist, gu' co' nac mèn co' nde'th con' co' ndxab Diox, no gu' co' nac ryete mèn co' ndub nza no co' ndli cas di's co' ndub loo libr ndxè'. Más huen ftub xib loo Diox no fcòo' yécl loo Diox, ndee. 
\p  
\v 10 Gunee angla loon, ne: 
\p ―Ne'ca'stel cón che'n co' ndlu' di's co' nac di's co' ndxab Diox xal nac di's co' ndub loo libr ndxè'. Ndxe'leque', fta' cuent cón che'n di's ndac ndxè' loo mèn loo xnaa. Tac nde zin'le' tiemp no nde zin'le' huiz co'se' gàc con' xal nac di's co' ndlu' loo libr ndxè'. 
\p  
\v 11 Gunee angla loon, ne: 
\p ―La'a tolo li mèn ye'rsin' con' co' nac con' ye'rsin' co' más ndxòo lezo' mèn ye'rsin' li mèn ye'rsin'. No la'a tolo li mèn zab con' co' nac con' zab co' más ndxòo lezo' mèn zab li mèn zab. Le' por part cón che'n mèn ndac na, la'a tolo li mèn ndac con' co' nac más con' ndac. Lomisque' ne, mèn co' ngro xà' loo cón che'n xab izlyo' par li mèna con' ndac loo Diox, la'a tolo li mèna con' ndac loo Diox no tyoo mèna más altant loo cón che'n Diox. 
\p  
\v 12 Látha, ndyaquen mbìnen gunee Tad Jesús loon: 
\p ―Aa. Ne'lyen'te daa, Juàn. Chàa, galen. No lin par gàc con' loo mèn xalque' nac con' co' mbli thìb thìb mèn.  
\v 13 Daa nzoque' thidtene. No nzolen ndoore' co'se' mblequen izlyo' no ngue xèn'en izlyo'. Nac daa xal letr “a” co' ntlo loo letr alfabet. No nac daa xal letr “z” co' nac lult letr loo alfabet. 
\p  
\v 14 Huen gàca loo rye mèn, mèn co' ndli par mbiiche mèn loo ryethe co' nac xab izlyo' co' nac con' xin no con' cap co' ndli ncua'n mèn xtol mèn par gàc mèna mèn nalì no mèn nambìi loo Diox por cón che'n Jesucrist. Tataa mod thìb lìte yòo mèn le'n ciuda co'te' ndoo yaa nayèe par ta' Diox xlè che'n yaaa par hua mèn par ban no mèn Diox thidtene. Le' sya, tataa mod ta' Diox lugar quée no lyàa mèna no yòo mèna no ryo' mèna ciudaa.  
\v 15 Per ryete mèn co' ne'ndalte ngala's loon, no ryete mèn co' ndli yalbruj co' ndxòo lezo' ntetìi xtàa, no ryete mèn co' ndxòo lezo' ndli yalburrid, no ryete mèn co' ndxuth xtàa, no ryete mèn co' ndyub xib loo chol mdo' no loo chol gunab, no ryete mèn co' anze'f ndxòo lezo' ncua'n mod par nquedìi mèn hues xtàa mèn, ryete mèna thidtene yan' par fuer no cue mèna par fuer co'te' nziri' ciudaa. 
\p  
\v 16 Gunee Jesús loon, ne: 
\p ―Daa co' nac Jesús, daa mtel' angl daa loo mèn co' nzo loo cón chenen, mèn co' nqueltàa rye lugar par gab angl no ta' angl cuent loo mèna cón che'n ryethe con' ndxè'. Daa co' nac yub Jesús, daa nac bin che'n David co' ngòc rey póla. Daa li par ne'lyuxte bin David. No daa li par bere bin David, cue bin David no yar' bin David loo izlyo' tedib vez. Daa co' nac Jesús, yub daa nac mbi', co' nee di's, nac xal mbèelhui' co' lèe mbèel za'f co' ndlyen coyor yál' co'se' nde yinìi izlyo' tedib vez. Tataa mod ndlu'en loo gu' nde zin' gaxle' tiemp co' cue yiloa. 
\p  
\v 17 Xpii Natú' no mèn co' nzo loo cón che'n Mbacxil' co' nac leque yub Jesucrist, mèn co' thidte ndxàc con Crist xal thìb xin' sa'l, Xpii Natú'a no mèna mbez: 
\p ―De U', Tad Jesús. 
\p No ryete gu' co' mbìn cón che'n di's co' ndub loo libr ndxè', guuz gu' loo Tad Jesús: 
\p ―De U', Tad Jesús. 
\p No leque daa, Juàn, mbez loo chol mèn co' tyal gòn ron: 
\p ―Mèn co' ndlya's no co' nguen lezo' par yòo mèn loo cón che'n Tad Jesús no ndxàc loo mèna xal co'se' ndxec lezo' mèn no capas ndlya's mèn gu mèn nít, chele' mèn, lìcque', lya's yòo mèn loo cón che'n Tad Jesucrist, yòo mèn loo cón che'n Tad Jesucrist par ban no mèn Diox thidtene xal co'se' ndxu mèn nít. Yalnabana ne'ti'de mèn con nec thìb centav. 
\p  
\v 18 Lomisque' ne, ryete mèn co' ndxòn di's co' nac di's co' ndxab Diox co' ndub loo libr ndxè', ndlyazen xyo'f ndeleque' lezo' mèn te' lezo' mèn xal nac di's co' ndub loo libr ndxè' co' nac di's ndxè': Chele' chol mèn nzi'f di's co' ndub loo libr ndxè', Diox ne zi'f co' nac con' ye'rsin' la's nii mèna no la's ya' mèna xalque' nac di's co' ndlu' loo libr' ndxè'.  
\v 19 No lomisque' ne, chele' chol mèn teche o ton' mèn ndxep di's co' nac di's co' ndxab Diox co' ndub loo libr ndxè', Diox, ne, ton' lèe mèn co' ndub loo libr co'te' ndub lèe mèn co' yòo ban no Diox thidtene. No ne'ta'de Diox lugar yòo mèna le'n ciuda co' nac ciuda natú' che'n Diox. Cón che'n mèna nac di's co' ndlu' loo libr ndxè'. 
\p  
\v 20 Daa co' nac Jesucrist co' ngue ta cuent ndxè' lool, Juàn, daa, ne, mbez: 
\p ―Aa, ne'lyen'te daa. Chàa, galen loo izlyo' ndxè'. 
\p Sya, chàa, mcàben. Ndxaben loo Tad Jesucrist: 
\p ―Aa, Tad Jesús, tataa gàca. De U' loo izlyo' ndxè'. 
\p  
\v 21 Daa, Juàn, ndlyazen le' Tad Jesucrist li anggàc con' ndac loo rye gu' par nedrè'. Taandxè' gàca.