\id GAL  
\h GÁLATAS 
\toc1 Cart Co' Mque' Pab Ye's Loo Mèn Yèezya' Che'n Làaz Mèn Galas 
\toc2 GÁLATAS 
\toc3 Gá. 
\mt1 Cart Co' Mque' Pab Ye's Loo Mèn Yèezya' Che'n Làaz Mèn Galas 
\c 1  
\s1 Pab ngue que' ye's co' nac cart ndxè' loo mèn co' nqueltàa loo cón che'n Diox, men co' naban le'n yèezya' co' nac yèezya' che'n làaz mèn galas. 
\p  
\v 1 Daa, Pab, nac thìb mbi' co' ndxe' di's che'n Tad Jesucrist. Tad Jesucrist mtel' daa loo mèn loo izlyo'. Inacte daa thìb mbi' co' mtel' chol mèn che'n izlyo' par ndxen di's che'n Tad Jesucrist loo mèn. Ne' ne' mdoo chol mèn daa no mcui chol mèn daa par ndxen di'sa loo mèn. Ndxe'leque', yub Jesucrist mblo lèe daa nac daa thìb mbi' co' ndxe' di's no mcui Jesucrist daa par xo'f zin'en zin'a. No yub Diox xud na' co' mblo xban Jesucrist làth mèn nguth mblo lèe daa nac daa mbi' co' ndxe' di's che'n Jesucrist. No mcui Diox daa par xo'f zin'en zin' ndxè' loo mèn.  
\v 2 Daa, Pab, ngue que'en ye's co' nac cart ndxè' loo gu'. Ryete mèn co' ndxàc hues na' por cón che'n Jesucrist co' nzo non trè', ngue nii mèna Diox loo gu' loo cart co' ngue que'en ye's loo gu' ndxè', loo rye gu' co' nqueltàa loo cón che'n Diox le'n chol yèezya' che'n làaz mèn galas.  
\v 3 Ndlyazen le' Diox xud na' no Tad Jesucrist na' tolo li anggàc con' ndac loo gu' no tolo li huen gàca loo gu' loo cón che'n Jesucrist. No ndlyazen le' Diox xud na' no Tad Jesucrist tolo li par nagàl yo lezo' gu' loo Diox no cue ban gu' rye nda gu' no rye ndye'th gu' làth hues xtàa gu'.  
\v 4 Tad Jesucrist na' yub mda' lugar par mquée yalguth loo Tad Jesucrist por cón che'n xquin na' no xtol na' par tataa mod mblyá' na' loo ryethe con' co' nac con' ye'rsin' co' nac che'n xab izlyo' ye'rsin' ndxè'. Ngòc con'a loo Tad na' xal guneepe' lezo' Diox co' nac xud na'.  
\v 5 Por cona, ndlyazen tolo gab na' di's guryath no di's guryèn no di's natú' cón che'n Diox loo mèn no loo Diox le'n lín' co' ntlo, no le'n lín' co' ndxelo, no le'n lín' co' ne'lith node. Tataaque' gàca. 
\s1 Di's ndxè' ndlu' thidte di's ndac nzo co' ndlu' loo mèn xá mod lyá' mèn loo con' ryes. 
\p  
\v 6 Ante ngüi'en no ante ñaan loo gu', cara, ale setilte mdoo xà' lezo' gu' loo di's ndac co' nda' cuent no co' ndlu' cón che'n Diox loo gu'. Loo con' co' nac cón che'n Diox, Diox mbli par mbye'th lezo' gu' ngòo gu' loo cón che'n Diox. Tataa mbli Diox loo gu', no loo nu', por anze'f mque'que' lezo' Crist ñèe Crist ryete na'. No nalle', ale ndxe'leque', más ndli gu' par ndyoo nque gu' no nque' nza gu' loo tedib di's co' ndli gu' cuent nac di's ndac che'n Diox, co' ndli gu' cuent telá' gu' loo con' ryes. Per di'sa xà' nac loo cón che'n di's ndacpe' che'n Diox.  
\v 7 Ilìcte naca par gab mèn nzo tedib di's co' nac xalpe' nac di's ndac che'npe' Diox co' ndlu' xá mod lyá' mèn loo con' ryes. Ndxe'leque', con' co' ndxàc loo gu' ba' nac: Nzo ndxep mèn co' ngue li xol loo gu'. Ndlya's mèna zye' di's ndac, co' nac di's ndac che'n Crist, par yila's mèn no ten' mèn tedib mod lyá' mèn loo con' ryes.  
\v 8 Per chele' chó mèn xà'guè' ngo yalbàn cón che'n di's ndac co' ndlu' xá mod lyá' mèn loo con' ryes xal ngo nu' yalbàn, no xal mda'le' nu' cuent loo gu'a, ¿lé'?, thidteneque' mèndèe mèna loo Diox too ze too yál'. No yende chó mport nzo lezo' Diox chó nac mèna, que naca yub daa, que naca thìb angl co' yi'th co' lyàa loo bé' co' co yalbàn no co' te'th cón che'n di's ndac co' inacte leque di's ndac che'npe' Diox xalque' ngue niin loo gu' ndxè', thidteneque' mèndèe mèna loo Diox too ze too yál'.  
\v 9 Na guniile' leque di's ndxè' loo gu' ndoore' co'se' ngon làth gu' thìb cua'a. No nalle' beren, ngue niin loo gu' tedib vez: Chele' chó mèn xà'guè' co yalbàn cón che'n di's ndac loo gu' xal nac di's co' mbìnle' gu', no co' mden'le' gu', no co' ngulàale' le'n lezo' gu' co' mblole' nu' yalbàn loo gu', thidteneque' mèndèe nac mèna loo Diox too ze too yál'. 
\p  
\v 10 No nalle' con' co' ngue niin loo gu' ndxè' ndxàal niin loo gu': ¿Ché' ngue li gu' cuent ngue niin con' ndxè' loo gu' par yòo lezo' taamas mèn cón chenen, cà'? Yende xàa. O ¿ché' ngue niin con' ndxè' loo gu' par yòo lezo' Diox ñèe Diox daa loo con' co' ngue lin, cà'? Aa. Ngue niin con' ndxè' loo gu' ante par yòo lezo' Diox loo con' ngue niin loo gu', ey. O ¿ché' ngue li gu' cuent ngue tan gust lezo' chol mèn par tyac lezo' mèna con daa loo cón che'n di's ndac che'n Diox, cà'? ¡Máa yob yéc gu', na! Yende xàa. Tac chele' daa be' ngue ta gust lezo' chol mèn cón che'n di's ndac che'n Diox, ya inacte daa mbi' co' nxo'f zin' zin' che'n Crist, sya, xàa. 
\s1 Pab ngue ta' cuent loo mèn chó mcui Pab, no chó mtel' Pab, no chó mdoo Pab par ndxe' Pab di's cón che'n Crist loo mèn. 
\p  
\v 11 Gu' co' nac mèn huesen por cón che'n Crist, fta' gu' cuent co' huenleque' cón che'n di's ndac co' nac di's ndac che'npe' Diox co' ndethen no co' ngon yalbàn loo gu' co' ndlu' loo mèn xá mod lyá' mèn loo con' ryes. Inacte di's ndaca thìb di's ndac co' mblobe' no co' mtoxcua' chol mèn che'n izlyo' ndxè'.  
\v 12 Inacte chol mèn co' mblu' cón che'n di's ndac ndxè' loon. No nec thìb mèn co' nac chol mèn mblu' cón che'n di's ndac ndxè' loon. Ndxe'leque', yub Tad Jesucrist mblo xo'f cón che'n di's ndac ndxè' loon. 
\p  
\v 13 Gu' mbìnque' xá mod ngòc daa póla no xá mod mque tee banen póla co'se' ngòc daa mèn xley'pe' che'n mèn nación Israel. No nonque' gu' no naneeque' gu', ale, ngulàa xyàn lezon no ngòc nayi'en gunèen mèn co' mqueltàa loo cón che'n Diox chol lugar. Ale mque tee que'en xís mèna pál co'te' ngo mèna par guthen mèna no par che'en mèna thidtene.  
\v 14 Co'se' ngòc daa mèn xley' che'n mèn nación Israel, más altant mdoon no más mté'then cón che'n xley' daa leque loo rye mèn gulàaz daa co' ngòc mèn co' thidte mxyèn con daa, co' nee di's, mèn co' thidte lín' ndoo xèn non. Más de cona, anze'f ngòc nayi'en loo mèn par mblin le' mèn mbli yèe costumbr co' ngòc costumbr che'n xudgool nu'.  
\v 15 Per mastale' tataa ngòc daa, Diox mblo xà'le' daa ndoore' gáal daa par co Diox daa loo zin' ndxè'. No por anze'f nque' lezo' Diox gunèe Diox daa, ale tataaque' mbli Diox ngòca loon par xo'f zin'en cón che'n di's ndac ndxè'. Le' sya, co'se' ngòc tiemp ngóol daa no mbryoo daa, Diox mbli con' mblya's Diox no con' co' gunee lezo' Diox li Diox loon.  
\v 16 Mbli Diox par mbliben xgan' Diox par gàca loon yiloa ga tethen no gon yalbàn cón che'n di's ndac loo mèn, mèn co' inacte mèn nación Israel. Co'se' ngolo ngòc con'a loon, yende chó ngabten loo nec thìb mèn. Ne' ne' mdoodizen loo nec thìb mèn cón che'n con' co' mbli Diox loon no cón che'n con' co' mnibe' Diox loon.  
\v 17 Ne' ne' ngan ciuda Jerusalén par nga tan cuenta loo myen' co' ngòc xin' mté'th Jesús, myen' co' ndxe' di's ndxè' ndoore' co'se' mbli Diox con' ndxè' loon. Ndxe'leque', luega mxenen ned. Nguan le'n nación Arab co'te' mbyan' daa nen tiemp. Ngoloa, mberen, ndyalen par ned ciuda Damasc tedib vez. 
\p  
\v 18 Ne'ngaden ciuda Jerusalén luega. Axta ngolo son lín', syare' nguan. Ale axta syare' mbliben Pedr. Ngo non Pedr si'n huiz le'n ciuda Jerusalén le'n tiempa.  
\v 19 Per ne'ngnèeden taamas myen' xin' mté'th Tad Jesús co' ndxe' di's cón che'n di's ndac ndxè'. Ante Cob co' ndxàc hues Tad Jesús por xna' Tad Jesús gunèen.  
\v 20 Cón che'n di's co' ngue que'en ye's loo gu' ndxè', Diox naneeque' inquedìiden gu', cara. Lìcpe' nac di's ndxè'. 
\p  
\v 21 Ngolo nguri'th con'a, mxenen ned. Nguan par ned le'n yèezya' che'n làaz mèn sir no le'n yèezya' che'n làaz mèn cilis.  
\v 22 Le' rye mèn hues na' co' nqueltàa loo cón che'n Crist, mèn co' nzo ban par ned le'n yèezya' che'n làaz mèn jude, mèna tarte libe' daa, co' nee di's, tarte hui' mèna loon tiempa.  
\v 23 Ante ndxòn mèna no ndyoodi's mèna cón chenen. Mbez mèna: Mbi' co' mque tee mdub ngu's na' no mblya's mbi' mtelux mbi' na' thìb cua'a, mbi'a ngue tee te'th no ngo mbi' yalbàn cón che'n di's ndac par yila's mèn xal ndlu' di's ndac.  
\v 24 No gunii mèna di's roo no di's xèn no di's natú' loo xtàa mèn cón che'n Diox por cón chenen. 
\c 2  
\s1 Taamas mèn co' ndxe' di's ndac mblo cuent nac Pab mèn co' ndxe' di's ndac che'n Crist loo mèn. 
\p  
\v 1 No co'se' ngolo nguri'th sida lín' co' ndxàc nguan ciuda Jerusalén nera, mberen nguan par ned le'n ciuda Jerusalén tedib vez con thìb mbi' co' lèe Mbèl'. Mbeen Tit par ngua non Tit, ne.  
\v 2 Nguan ciuda Jerusalén tac Diox mblo xo'f loon le' daa naquinque' ga par ciuda Jerusalén. Le'n ciuda Jerusalena ngo thìb ned mèn co' mdyoo ner no co' mdyoo naa loo mèn co' nqueltàa loo cón che'n Crist chol lugar. Xexte mdan cuent loo mèna, thìb lad, cón che'n di's ndac co' nac che'npe' Diox co' ndlu' loo mèn xá mod lyá' mèn loo con' ryes, co' ndethen no co' ngon yalbàn loo mèn, mèn co' inacte mèn nación Israel. Tataa mblin con'a par de que ne'gàcte con' co' ngue tee lin thìb con' anxle' co' yende cón ntac loo mèn.  
\v 3 Per mastale' ngua no Tit daa, ne' ne' ngab mèna loo Tit no ne' ne' ngli mèna fuerz Tit par ngàc circuncidar Tit xalque' nac costumbr che'n mèna mastale' inacte Tit mèn nación Israel.  
\v 4 No, lìcpe' ba'i, xexte ngo ndxep mèn gutyè' xi'tha, mèn co' mbez ndxàc hues na' por cón che'n Crist, per ilìcta. Mèna mblya's ngàc circuncidar Tit. Per mèna ante ngo làtha par ante mbla's mèna par ngüi' mèna co' huenleque' xal nac mod cub co' ndxàp na', na' co' nqueltàa loo cón che'n Crist, tac yende chó nzi nchep na' loo costumbr gox. No ale mblya's mèna bere na', li yèe na' costumbr co' nac costumbr che'n mèn nación Israel tedib vez.  
\v 5 Per ne' por chu'th ne'ngla'de nu' ngnibe' mèna loo nu'. Tac mblya's nu' le' gu' toloque' ta' cuent cón che'n di's ndac co' nac di's ndac che'npe' Diox co' nac lìcque', di's ndac co' ndlu' xá mod lyá' mèn loo con' ryes. 
\p  
\v 6 Mèn co' ndyoo ner no co' ndyoo naa loo chol mèn co' nqueltàa loo cón che'n Crist chol lugar, mèna ne'nglu'de daa no ne'ntan'te mèna nec thìb di's cub o cuent cub loon co' ndlu' cón che'n Crist. Mastale' nde'f di's ndxác mèna, ne'nglu'de mèna loon ndxep con' co' nac cón che'n Crist. Ne' ne' yende chó mport nzo lezon, que nac mèna mèn co' nde'f di's ndxác, que nac mèna mèn be'the. Gunee mèna cón nac mèna. Diox indubte par tub rez Diox cón che'n mèn loo mèn por mod co' más ndyu' thìb mèn leque tedib mèn loo xtàa mèn.  
\v 7 Lugar de lu' mèna daa ndxep di's co' nac cón che'n Crist, ndxe'leque', más mda' mèna cuent no mden' lezo' mèna le' Diox mxo'f zin' zin' ndxè' loon par tethen no gon yalbàn cón che'n di's ndac, co' nac di's ndac che'npe' Diox, loo mèn co' inacte mèn nación Israel xalque' mxo'f zin' Diox zin' ndxè' loo Pedr par co Pedr yalbàn no te'th Pedr cón che'n leque di's ndac che'npe' Diox loo mèn nación Israel.  
\v 8 Pues leque yub Diox co' mtel' Pedr par ndxe' Pedr di's ndac che'npe' Diox loo mèn co' nac mèn nación Israel, leque yub Diox mtel' daa, ne, par ndxen di's ndac che'npe' Diox loo mèn co' inacte mèn nación Israel. 
\p  
\v 9 Por cona, Cob no Pedr no Juàn co' nac nerleque' myen' co' ndyoo más altant loo cón che'n Crist, myen' mda' cuent co' huenleque' le' Diox mbli mxo'f zin'en zin' ndxè'. No mbli Diox mxyal' ned mxyal' yó' loon par mxo'f zin'en zin' ndxè'. Látha, mxen myen' ya' ryop nu' Mbèl' par mbli myen' cuent thidte ngòc ryop nu' Mbèl' con myen' loo zin' co' ngue xo'f zin' myen' cón che'n Crist no par mbli myen' cuent ndxàc hues no ndxàc xtàa ryop nu' Mbèl' con myen' loo cón che'n Crist. Thidte mdoodi's myen' le' ryop nu' Mbèl' ya xo'f zin' cón che'n Crist làth mèn co' inacte mèn nación Israel láth nda xo'f zin' myen'a leque zin' làth mèn nación Israel.  
\v 10 Thidte con' nac co' mbli myen' par xo'f ndeleque' lezo' nu' li nu'. Con'a ngòc di's co' ngòc plá di's gunee myen' loo nu' par más te' lezo' nu' cón che'n prob mèn co' ndxela's par lyath no nu' mèna loo con' nde che loo mèna. Con'a nac thìb con' co' más ndlin purad ndli nu' leque tedib con'. Thìba con' ndxè'. 
\s1 Pab mbyoo Pedr le'n ciuda Antioqui. 
\p  
\v 11 Le' tediba na, co'se' ngua Pedr ciuda Antioqui, que nzo ne' ñee lezo' Pedr mbyoon Pedr, tac, por derech, ilé'de nac con' ngue tee li Pedr loo mèn ciuda Antioqui tiempa.  
\v 12 Co'se' nerleque' mtlo mèn che'n yèezya' che'n làaz mèn ciuda Antioqui, ngola's mèna loo cón che'n Crist, ngòc thìb con'. Pedr ndxuhua no mèna, mèn co' inacte mèn nación Israel. Tolo mbli Pedr con'a axtaque' mzin ndxep amiu Cob, mèn co' nqueltàa no Cob le'n ciuda Jerusalén, le'n ciuda Antioqui. Per co'se' gunèe Pedr thìb ned mèn co' ngue no costumbr che'n circuncisión, mèn co' ngòc amiu Cob, ale mzyeb Pedr gunèe Pedr mèna. Axta syare', xèegà xèegà mblá' Pedr. Ya ne'tolode nduhua no Pedr mèn co' nac mèn yèezya' che'n làaz mèn ciuda Antioqui, mèn co' inacte mèn nación Israel.  
\v 13 Le' sya, ndxep mèn nación Israel co' ngola's co' nzo làth mèna, mèna, ne, mbli xal mèn co' ne'ñeede láth mtembìi Pedr ro Pedr no mtembìi Pedr xti's Pedr loo taamas mèna cón che'n con'a. No ale axta no Mbèl' mbla' par tolo mbli Pedr cón ndlya's Pedr con mèna.  
\v 14 Per co'se' gunèen tataa mbli Pedr con taamas mèn co' thidte ndxàc con Pedr, mdan cuent ingue tee ban ndacte Pedr xal ñibe' di's ndac co' nac lìcpe' co' ndlu' xá mod lyá' mèn loo con' ryes. Sya, ndxaben loo Pedr loo ryete mèn co' nqueltàa no Pedr: Pedr, lùu co' nac mèn nación Israel, leque lùu ndlu' nque tee banl xal nzi tee ban mèn co' inacte mèn nación Israel. No ¿ndlil xal ndli mèn co' inacte mèn nación Israel, cà'? ¿No nalle' a la fuerz ndlya'sl le' mèn co' inacte mèn nación Israel que tee ban xal nzi que tee ban mèn co' nac mèn nación Israel, cà'? ¡Pà ñee conax! 
\s1 Xalque' ndlyá' mèn chol nación co' inacte mèn nación Israel loo con' ryes, tataaque' ndlyá' mèn nación Israel loo con' ryes. 
\p  
\v 15 Hui' nexa, Pedr. Na' nac mèn nacionpe' Israel tac ngóol na' le'n nación Israel, ¿lé'? No ndli mèn nación Israel cuent más ncua'n mèn co' inacte mèn nación Israel xtol mèn leque na', ¿lé'? Per ilìcta, ¿lé'?, Pedr.  
\v 16 Más de cona, na' nda' cuent no nanee na' nec thìb mèn ne'ta'de Diox lugar no ne'tyalte Diox yòo mèn loo cón che'n Diox par gàc mèna mèn nalì no mèn nambìi loo Diox por mbli mèn preb li mèn xal ñibe' ley co' mxo'f Moisés loo mèn. Ndxe'leque', nda' na' cuent no nanee na' ndyalque' Diox no nda'que' Diox lugar ngòo mèn loo cón che'n Diox par gàc mèn mèn nalì no mèn nambìi loo Diox ante por yila's mèn loo Jesucrist. Por cona, na', ne, ngola's loo Jesucrist por mdyal Diox no mda' Diox lugar ngòo na' loo cón che'n Diox par ngòc na' mèn nalì no mèn nambìi loo Diox. Ngòca tataa loo na' ante por ngola's na' loo Jesucrist. Na' nanee no nda' na' cuent le' Diox ne'tyalte ta' Diox lugar yòo mèn nación Israel loo cón che'n Diox par gàc mèn nación Israel mèn nalì no mèn nambìi loo Diox por mbli mèn nación Israel preb li mèn nación Israel xal ñibe' ley co' mxo'f Moisés loo mèn. 
\p  
\v 17 No nalle', nde niin thìb con' lool, Pedr: Chele' na' mda' lugar no mdyal na' ngòo na' loo cón che'n Diox par ngòc na' mèn nalì no mèn nambìi loo Diox por cón che'n Crist, no nalle' chele' na' ngue li par ngue hui' no ñaa mèn loo na', leque na' ngue cua'n xquin na' no xtol na' por ngue li na' ndxàc na' xal mèn co' inacte mèn nación Israel por cón che'n Jesucrist. Chele' na', lìcque', por cona ngue cua'n na' xquin na' no xtol na', ¿ché' nee di's co' ngue li na'a ncàb le' Crist ngue li par ncua'n na' xquin na' no ncua'n na' xtol na', cà', Pedr? Yende xàa. Nec thìb mod no nec tedib mod gàca tataa, ¿lé'?  
\v 18 Tac chele' na' mbyathla's xal mnibe' ley co' mxo'f Moisés loo mèn no mblá' na' rye mod co' ngòp na' loo leya, no nalle' bere na', te' lezo' na' xal nac di's co' ndub loo ley par li na' preb tyubdi's na' loo leya tedib vez no li na' xal mbli na' póla, leque na' nque dol na' loo Diox, ¿lé'?  
\v 19 Per part cón chenen, daa ngòcle' xal mèn co' nguthle' loo con' co' mnibe' loo ley co' mblin, co' nee di's, ne'toloden lin rye con'a, tac mté'then yende mod gàc daa mèn nalì no mèn nambìi loo Diox por mblin preb lin con' co' mnibe' ley co' mxo'f Moisés loo na' par li na'. Per nase ndan cuent ante loo cón che'n Diox ndxàal que tee ban daa tac ngro xà'len loo con' co' mnibe' leya loon par mblina ndoore' yilazen loo Diox por cón che'n Crist.  
\v 20 Por part cón che'n Diox, Diox mblole' cuent ngòc daa mèn co' nguthle', co' nee di's, Diox mblole' cuent thidte mque'en loo cruz con Crist. Cona, ngue niin lool, Pedr: Ithidte daa nac mèn co' naban co' ndoo lool trè'. Leque yub Crist nac xa' co' nzo ban no daa por cón che'n Xpii Natú'. No láth be' naban daa, daa co' nac bél'yòo, daa ngue tee ban ante por ndxàpen yalxla's no ndxelazen loo Crist co' nac xgan'pe' Diox. Xgan'pe' Diox nque' lezo' ñèe daa. No axta mda' xgan'pe' Diox lugar mquée yalguth loo xgan'pe' Diox por cón chenen.  
\v 21 Por cona, Pedr, indlyasten cà dizen no tè'ben con' co' nac ryethe con' ndac che'n Diox co' angmbli Diox loo mèn par ngaben le' Diox tyal yòo mèn loo cón che'n Diox par gàc mèn mèn nalì no gàc mèn mèn nambìi loo Diox ante por mbli mèn preb ndubdi's mèn xal mbez di's co' ñibe' ley co' mxo'f Moisés loo mèn. Tac chele' daa tataa gab, le' sya, yende cón ntac nguth Crist por cón che'n mèn, ¿lé'? 
\p Ale tataa mod mbyoo non Pedr tiempa. Thìba con' ndxè'. 
\c 3  
\s1 Pab ngue toodi's no mèna cón che'n ley co' mxo'f Moisés loo mèn nación Israel no cón che'n mod co' ndxàp taamas mèn yalxla's loo Jesús par lyá' mèn loo con' ryes. 
\p  
\v 1 Le' tediba na, gu' co' nac mèn gulàaz che'n làaz mèn galas, susque' tont gu' no susque' naad gu' no nguud gu', ndyaquen. ¿Chó con' mblu' mèn loo gu' par ndoo xà' lezo' gu' par ne'tolode ndubdi's gu' loo di's ndac co' nac di's ndac che'n Diox co' nac lìcque', à'? Co'se' mblon yalbàn loo gu', nambìi mdan cuent loo gu' no mblu'en loo gu' cón che'n xá mod yub Jesucrist mquée loo cruz por cón che'n mèn.  
\v 2 Ndlyazen niin thìb con' loo gu', mèn co' nac mèn gulàaz che'n làaz mèn galas no lyazen càb gu' loon: ¿Ché' ngulàa Xpii Natú' che'n Diox loo gu' por mbli gu' preb li gu' con' xal mnibe' ley co' mxo'f Moisés loo mèn o ché' ngulàa Xpii Natú' loo gu' por ngola's gu' di's co' mdan cuent cón che'n Crist loo gu', cà'?  
\v 3 ¿Xá mod susque' mbla' gu' ngòc tont gu', yey? Con que gu' ngòole' loo cón che'n Diox por cón che'n con' co' mnibe' Xpii Natú' loo gu', ¿lé'? no nalle', ¿ché' ngue li gu' cuent no ché' nden' gu' huen naca tolo li gu' ryethe con' co' ndlya's Diox li gu', no ché', lìcque', ta' gu' cuent no té'th gu' par ndyubdi's gu' co' huenleque' loo Diox ante por ndxòn gu' ro tedib mèn co' ñibe' loo gu' par gàc circuncidar gu' no li gu' taamas con' co' ñibe' mèn li gu', cà'? Yende xàa.  
\v 4 ¿Ché' ngue li gu' cuent anxle' ngòc rye con' ryes co' mxactìi gu' por cón che'n Crist, cà'? ¿Ché' yende cón mxac gu' mté'th gu' cón che'n Diox par ngòc con' ndac loo gu' láth mxactìi gu', cà'? Oj, ché' co' càb co' mxactìi gu'a tolo té'th gu' no tolo tyubdi's gu' loo cón che'n Crist taandxep. Huen.  
\v 5 Co'se' mblàa Diox Xpii Natú' che'n Diox loo gu' no mbli Diox huax yalguzye' làth gu', ¿chonon mbli Diox con'a, à'? Ne'nglide Diox con'a loo gu' tac mbli gu' preb mbli gu' con' xal ñibe' di's co' ndub loo ley co' mxo'f Moisés loo mèn póla, ¿lé'? Ndxe'leque', Diox mbli con'a loo gu' tac ngola's gu' loo di's ndac co' mbìnle' gu' cón che'n Crist par ngola's gu' loo Crist. 
\p  
\v 6 Abraham, co' mbloj msi' bin póla, Abraham ngola'sque' di's co' ndxab Diox li Diox loo Abraham yiloa. Por cona, Diox mteche mtexyath xtùuz Diox no lezo' Diox. No mblo Diox cuent tyalque' Diox no ta'que' Diox lugar yòo Abraham loo cón che'n Diox par gàc Abraham mèn nalì no mèn nambìi loo Diox ante por ngola's Abraham loo Diox tataa.  
\v 7 Por cona, ndxàalque' ta' gu' cuent no nonque' gu' le' mèn co', lìcque', nac binpe' Abraham, mèna nac mèn co' ndxela's loo Crist no loo cón che'n Crist.  
\v 8 Lomisque' ne, loo libr co' nac xti's Diox ndub di's co' mblu' loo mèn póla le' Diox tyalque' no ta'que' Diox lugar yòo mèn co' inacte mèn nación Israel loo cón che'n Diox. No gàc mèn co' inacte mèn nación Israel mèn nalì no mèn nambìi loo Diox ante por yila's mèna loo con' co' ndxab Diox loo mèna. Por cona, mda' Diox cuent loo Abraham cón che'n di's ndac ndxè' ndoore'. Ndxab Diox loo Abraham: Daa li huen ya mèn che'n rye nación por cón che'n lùu, Abraham.  
\v 9 Por cona, ngue niin loo gu': Le' ryete mèn co' ndxela's loo Diox por cón che'n Jesucrist le'n tiemp ndxè', loo ryete mèna Diox ndli huen nda mèna no ndxàc con' ndac loo mèna. No lalque' ndxàca loo mèna nalle' xalque' ngòca loo Abraham tac Abraham ngola'sque' di's co' mcàbgòn Diox li Diox loo Abraham. 
\p  
\v 10 Ngue niin con' ndxè' loo gu', ne: Mèn co' más ndxàp yalxla's nac mèna mèn nalì no mèn nambìi loo Diox por ante mbli mèna preb li mèna xal mnibe' ley co' mxo'f Moisés loo mèn, no ne'ngácte mèna ngli mèna no ne'ngdubdi'ste mèna xal ñibe' ley co' mxo'f Moisés loo mèn, ale ndxe'leque', thidteneque' mèndèe mèna loo Diox tac nec thìb mod no nec tedib mod yende mod li mèn con'a. Tac loo libr co' nac xti's Diox ndub di's co' mbez taandxè': Ryete mèn co' indlide no co' indubdi'ste loo ryethe con' xal nac rye di's co' ndub loo libr co' nac ley co' mxo'f Moisés loo mèn, thidteneque' mèndèe mèna loo Diox par ryo xa' mèna loo Diox thidtene yiloa.  
\v 11 Nda'que' na' cuent no nonque' na' le' Diox ne'ta'de lugar no ne'tyalte Diox yòo mèn loo cón che'n Diox par gàc mèn mèn nalì no mèn nambìi loo Diox ante por mbli mèna preb li mèna xal nac di's co' ñibe' ley co' mxo'f Moisés loo mèn. Tac loo libr co' nac xti's Diox ndub di's co' mbez: Le' mèn co' tyal Diox no co' ta' Diox lugar yòo mèna loo cón che'n Diox par gàc mèna mèn nalì no mèn nambìi loo Diox, mèna ban no Diox thidtene yiloa ante por ngola's mèna loo cón che'n Jesucrist no loo Jesucrist.  
\v 12 Per chele' mèn ndyubdi's di's co' ndlu' ley co' mxo'f Moisés loo mèn, cón che'n leya incàbte le' mèn yila's loo Diox. No ne' ne' inac leya co' ndli par ndxàp mèn yalxla's loo Diox. Ndxe'leque', di's co' ndub loo libr co' nac xti's Diox, di'sa mbez: Mèn co' ndli no mèn co' ntaa ryethe con' xal ñibe' di's co' ndub loo ley co' mxo'f Moisés loo mèn, mèna yòo ban no Diox thidtene chele' mèn, lìcque', li con'a. Per ¡pà li mèn tataa! 
\p  
\v 13 Per nalle', Crist mtelá'le' na' loo ryethe con' ye'rsin' co' ncàb loo mèn por ne'ndubdi'ste mèn loo ryethe con' co' ñibe' di's co' nac leya par li mèna, di's co' ne'gácte mèn li mèn, por derech. Hui' gu' nexa. Ngòcla tataa loo na' tac le'le' mbli Diox ngòc Crist thìb mbi'dèe no thìb mbi' ye'rsin'túb co'se' nguth Crist loo cruz por cón che'n xquin na' no xtol na'. Tac loo libr co' nac xti's Diox ndub di's co' mbez taandxè': Mbi'dèe no thìb mbi' ye'rsin'túb nac chol mbi' co' nquée loo thìb yaa co' nac thìb cruz co'te' ndxuth mèn xtàa mèn por con' ye'rsin' co' mbli mbi'.  
\v 14 Ngòcque' yaltìia loo Crist par mdubque' di's ngòc con' ndac co' mcàbgòn Diox angli Diox loo mèn dib athu loo izlyo', mèn co' inacte mèn nación Israel, por cón che'n Abraham co' mbloj msi' bin loo izlyo' póla. Mbli Diox con'a loo mèna por cón che'n Crist Jesús. Ngòc con'a loo Crist, ne, par mdubque' di's co' ndxab Diox le' Diox làa Xpii Natú' loo rye mèn co' gàp yalxla's loo Diox no co' yila's loo Diox por cón che'n Crist. 
\s1 Cón che'n ley co' mxo'f Moisés loo mèn nación Israel no cón che'n con' co' mcàbgòn Diox loo Abraham li Diox loo Abraham. 
\p  
\v 15 Mèn huesen por cón che'n Crist, nde niin thìb con' loo gu' xal ndxàca loo mèn loo izlyo' ndxè': Co'se' ndli thìb mbi' thìb conveñ o co'se' ndli thìb mbi' testar no ngo mbi' firm ye'sa, le' sya, nec thìb mod no nec tedib mod yende chó mèn gác ton' di'sa no yende chó mèn gác tolo zi'f taamas di's loo ye'sa.  
\v 16 No nalle' tolo niin con' ndxè' loo gu', ne: Ngòcle' no mdyaale' con' co' mcàbgòn Diox loo Abraham gàc loo Abraham no loo bin che'n Abraham co' ngòc thìb mbi' co' mbi'th yáal loo izlyo'. Imbezte loo libr co' nac xti's Diox cón che'n ryete mèn co' nac bin che'n Abraham, co' nee di's, co' nac huax bin Abraham. Ndxe'leque', di's mbez loo mèn no ndlu' di's loo mèn cón che'n thidte mbi' co' nac bin Abraham. Pues di's ndxè' nee di's xa' co' nac bin Abrahama nac Crist.  
\v 17 Con' co' ngue niin loo gu' nac con' ndxè': Diox mbli thìb conveñ con Abraham. No mbli nèe Diox conveña xalque' ndli nèe mèn thìb conveñ. Ngolo nguri'th thap ayo nzo gal psi' lín' ngòc con'a, mxo'f Moisés ley loo mèn. Por cona, leya ne'ngácte ngton' cón che'n conveñ co' mbli Diox con Abraham. Ne' ne' ngác ley li ley le' con' co' mcàbgòn Diox loo Abraham li Diox loo Abraham ngàc thìb con' co' yende cón ntac.  
\v 18 No chele'i ngo mod ngàc le' Diox telá' mèn loo con' ryes ante por cón che'n ley co' mxo'f Moisés loo mèn, co' nee di's, ante por mbli mèn preb li mèn con'a, le' sya, yende mod ngàc le' Diox telá' mèn anxle' loo con' ryes xalque' mcàbgòn Diox li Diox thìb con' anxle' loo Abraham. Per Diox, lìcque', ntelá' mèn anxle' loo con' ryes xal mcàbgòn Diox loo Abraham li Diox. 
\p  
\v 19 ¿Par cón mbli sirv ley co' mxo'f Moisés loo mèn, sya? Pues mxo'f Moisés leya loo mèn par lu' ley loo mèn no par ta' mèn cuent no par non mèn le' mèn ncua'n xquin mèn no ncua'n mèn xtol mèn. No maste mnibe' leya loo mèn le'n ndxep tiemp axtaque' mbi'th Crist co' nde bin che'n mbi' co' lèe Abraham co' ngue tan cuent loo gu' ndxè'. Cón che'n Crist ngòc con' co' mcàbgòn Diox loo Abraham li Diox loo Abraham no loo Crist co' ngòc bin Abraham. Pues ley co' mxo'f Moisés loo mèn tiempa, di's co' ndub loo leya ngòc di's co' gunii thìb angl loo Moisés. Le' Moisés na, ngòc thìb mbi' co' mdoodi's no Diox por cón che'n mèn nación Israel. Mdoodi's no Moisés mèn nación Israel xal gunii Diox loo Moisés, ne.  
\v 20 Mèn co' nteri'th di's, nteri'th mèn di'sa loo chop ned mèn xal mbli Moisés loo Diox no loo mèn nación Israel. Per ndxe'leque', co'se' mcàbgòn Diox li Diox thìb con' loo Abraham, ne'ncua'nte Diox mèn co' mteri'th di's loo Abraham. Leque yub Diox co' nac thidte Diox, Diox mcàbgòn loo Abraham lique' Diox gàc con'a loo Abraham. 
\s1 Di's ndxè' ndlu' chonon mtan' Diox di's co' nac ley co' mxo'f Moisés loo mèn par li mèna. 
\p  
\v 21 ¡Aa mèn co' nac mèn gulàaz che'n làaz mèn galas! ¿Ché' ngue li gu' cuent ilalte nac con' co' mblya's Diox ngàc loo mèn por cón che'n ley co' mxo'f Moisés loo mèn no con' co' gàc loo mèn ante por ngola's mèn loo con' co' mcàbgòn Diox li Diox loo mèn, cà'? Tyè'. Lalque' naca, yey. Per hui' gu' nexa. Chele Diox mxo'f thìb ley loo mèn xal ndli gu' cuent, thìb ley co' ndli par yòo ban no mèn Diox thidtene ante por ndubdi's mèn loo ryethe con' co' ñibe' leya loo mèn, sya, chele' mèn ndli con' co' mnibe' ley par ngli mèna ngàc mèna mèn nalì no mèn nambìi loo Diox ante por mbli mèna con' co' mnibe' ley loo mèna par li mèna, huen ngàca loo gu', sya, xàa.  
\v 22 Per hui' gu' xal ndub di's loo libr co' nac xti's Diox. Di'sa mbez loo na' taandxè': 
\p ―Diox mblu' por cón che'n leya le' ryete mèn co' nziri' loo izlyo', mèna natedó' loo con' ye'rsin' por mod no costumbr co' ndxàp mèna co' ncàb ncua'n mèn xquin mèn no xtol mèn. No mblu' Diox loo mèn por cón che'n leya nac mèn mèn ye'rsin' no nac mèn mèn co' ndxàp xquin no xtol loo Diox par tataa mod gàca le' mèn co' tyal yila's loo Jesucrist no gàp mèn yalxla's loo Jesucrist, gàc mèna mèn nalì no mèn nambìi loo Diox xal mcàbgòn Diox li Diox loo mèn. 
\p  
\v 23 Ndoore' co'se' yi'th Jesucrist par ta' mèn cuent no par non mèn nzoque' mod yòo mèn loo cón che'n Diox ante por yila's mèn no gàp mèn yalxla's loo Jesucrist, tiempa axta arid nèe ngòc con'dèe cón che'n ley co' mxo'f Moisés loo mèn. Tac natedó' na' loo leya tiempa xal thìb pres co' yende mod xon' lezi'f. Tiempa, ngure bed na' axta zin tiemp co'se' ryo xo'f xá mod yila's mèn no gàp mèn yalxla's loo Jesucrist par lyá' mèn loo con' ryes por cón che'n Jesucrist par tataa mod yòo mèn loo cón che'n Diox.  
\v 24 Por cona, ngue niin loo gu': Leya ngòc xal thìb criadgot co' nquenap no co' nqueno myen' bix par gàp myen' mod. Mquenap leya na' xal mquenap criadgot myen' bix par ne'ncua'nte na' xquin na' no xtol na' xal mcua'n na' xquin na' no xtol na' co' ngòc thìb mod co' ngòp na' tiempa axta co'se' ngòc tiemp co'se' mbi'th Crist. Crist mbli par mzye' mod che'n na' par ne'ncua'nte na' xquin na' no xtol na' par gàca co'se' be' ngòc na' ngolo ngola's loo Crist, sya, mdyal Diox no mda' Diox lugar yòo mèn loo cón che'n Diox par gàc mèn mèn nalì no mèn nambìi loo Diox por cón che'n Crist.  
\v 25 Per nalle', mzinle' tiempa co'se' tlo mèn yòo mèn loo cón che'n Diox par gàc mèn mèn nalì no mèn nambìi loo Diox ante por yila's mèn loo Jesucrist. Con'a ndli ya inzode na' xàn' yalnibe' che'n ley co' mxo'f Moisés loo mèn co' ngòc xal myen' bix co' ngue quenap no ngue queno criadgot. 
\p  
\v 26 Por thidte ngòc gu' con Crist Jesús nac gu' xin'pe' Diox. Ngòc con'a loo gu' tac ngola'sque' gu' loo Diox por cón che'n Crist.  
\v 27 Ryete gu' co' thidte ngòc loo Crist, ngòca loo gu' xal co'se' ndxàc bautizar mèn le'n nít. Con'a nee di's Diox mbli le' gu' nda'que' lugar le' thidte Crist ñibe'pe' loo gu'. No ndli gu' ante co' nee lezo' Crist.  
\v 28 No nalle' por cón che'n Crist, yende chó mport nzo lezo' Diox aa guneei chó mèn nación nac gu'. Loo cón che'n Diox ya inacte gu' loo Crist xal mèn nación Israel ó xal mèn chol nación co' inacte mèn nación Israel. Ne' ne' nac gu' xal moz yèe loo thìb patrón ó xal mèn co' yende chó ñii loo. Ne' ne' nac gu' xal mènbi' o xal mèngot. Tac mèn co' nqueltàa loo Crist thidte ndxàc ryete mèna loo Crist.  
\v 29 No chele' gu', lìcque', nac mèn co' nqueltàape' loo cón che'n Crist no ngòoque' gu' loo cón che'n Crist, le' sya, Diox ngo cuent le' gu' nacpe' mèn bin Abraham. Tataa mod gàc che'n gu' no gàc loo gu' ryethe con' ndac por nzo gu' loo cón che'n Crist, co' mcàbgòn Diox loo Abraham no loo bin Abraham li Diox loo Abraham no loo bin Abraham. 
\c 4  
\p  
\v 1 Con' co' mblyazen niin loo gu' con di's co' ngolo guniin loo gu'a nac con' ndxè': Thìb mbed co' nac xgan' thìb gundan co' ndxàp che'n, mbeda yan' no herens che'n xud mbed, ¿lé'? Per láth ndoo xèn mbed, lalque' nac mbed xal thìb moz liz xud mbed.  
\v 2 No láth ndoo roo mbed no ndoo xèn mbed, nzo thìb criadgot co' nquenap mbed. No ndxan' mbed cón che'n criada axta ryoo mbed axta zin huiz ta' xud mbed herens co' gac che'n mbed càa mbed.  
\v 3 Tataa ndxàc con' loo na', ne, dib lal co'se' ngòc na' xal myen' bix, co' nee di's, ndoore' yila's na' loo Crist. Con' co' ngue niin loo gu' ndxè' nac con' co' mbli na' tiempa: Mbli na' co' nac cón che'n xab izlyo'. No mbli na' xal ngòc mod ye'rsin' che'n mèn. No mbli na'i xalque' mnibe' mèn loo na' par li na'i, tac mbez mèna con' co' ndli na'a nac cón che'n Diox.  
\v 4 Per co'se' mdyaa huiz no tiempa, Diox mtel' xgan' Diox loo izlyo'. No co'se' mbi'th xgan' Diox loo izlyo', mbli Diox le' thìb mza'yòn mxan xgan' Diox. No ale ngòc xgan' Diox mèn bin che'n mèn nación Israel. Loo mèna mxo'f Moisés ley. No mastale' nac Jesucrist xgan' Diox, mdubdi'sque' Jesucrist xalque' mnibe' ley co' mxo'f Moisés loo mèn nación Israel.  
\v 5 Tataa mod mbi'th Crist loo izlyo' par telá' Crist na' loo con' ryes, na' co' ngòo xàn' yalnibe' che'n ley co' mxo'f Moisés loo mèn par tataa mod mdyal Diox no mda' Diox lugar loo na' yòo na' loo cón che'n Diox xal xin' Diox. 
\p  
\v 6 Por nac gu', lìcque', xin' Diox, Diox mbli ngulàa Xpii Natú' che'n Diox le'n lezo' gu' no le'n xtùuz gu'. Xpiia ndli mbez gu' loo Diox: Diox, U' co' nac xud nu', co'se' mbez gu' Diox.  
\v 7 Por cona, gu' nacpe' xin' Diox. No ya inacte gu' xal moz loo cón che'n xab izlyo' ndxè'. No por nac gu' xin' Diox, Diox ta' lugar no tyal Diox yan' no gu' ryethe con' ndac che'n Diox por cón che'n Crist. 
\s1 Pab ndyóo por cón che'n mèn co' ndxela's loo Jesucrist no loo cón che'n Jesucrist. 
\p  
\v 8 Póla, ndoore' co'se' tarte yila's gu' no co'se' tarte ta' gu' cuent cón che'n Diox por cón che'n Crist, ngòc gu' xal moz par mbli gu' sirv loo chol con' co' mbez mèn nac diox. Per inacte con'a merpe', lìcpe' Diox.  
\v 9 Per com le' gu' más nda'le' cuent cón che'n Diox nalle', ¿lé'?, no ndlibe' gu' Diox, o más huen niin loo gu' le' Diox ngole' cuent nac gu' mèn co' nzole' loo cón che'n Diox, ¿xá mod ndlya's gu' ale bere gu', li gu' xalque' ngòc mod co' yende cón ntac no co' yende cón li gu' gan? Ale, mbere gu', ngue li gu' con'a. No ale ndxàc gu' xal moz loo con'a.  
\v 10 Cona nee di's ale tatabe' nquenap gu' gu' loo huiz co' mbez gu' nac huiz roo co'se' ndxáal lni che'n chol mdo'. Ale nxyo'f ndeleque' lezo' gu' ndxe' gu' cuent cón che'n chol huiz, cón che'n mbe', no cón che'n lín', ne.  
\v 11 Anze'f nde no lezon tac zin' co' ngue xo'f zin'en loo gu' cón che'n di's ndac che'n Diox, ale ndyaquen anxle' mxo'f zin'en zin'a loo gu'. 
\p  
\v 12 Gu' co' nac mèn huesen por cón che'n Jesucrist, ña'ben loo gu': Gòc gu' xal nac daa, yey, co' nee di's, daa indlide cas no ne' ne' indyóon lin chol costumbr, no loo nec thìb con' co' nac cón che'n ley co' mxo'f Moisés loo mèn co' ndli ncà daa loo cón che'n Diox. Más de cona, gu' nda'que' cuent xal ngòc daa thìb cua'a; xá mod mque tee'en loo mèn gulàaz daa co' ngòc mèn nación Israel, ¿lé'? Per nase mblá'yan ryethe con'a. No ngòc daa xalque' nac gu' co' inacte mèn nación Israel co' indxòode loo chol costumbr nalle'. Lìcque', mden'en le' gu' yende cón mbli loon co'se' mbalen. Ngon làth gu' ndoore'.  
\v 13 Gu' nda'que' cuent co' huenleque', co'se' nerleque' vez mblon yalbàn cón che'n di's ndac che'n Diox co' ndlu' xá mod lyá' mèn loo con' ryes loo gu', mblina tac mquin mbyan' daa làth gu' tac nayíiz daa hora.  
\v 14 No yíiz co' mque nona ngòc thìb preb loo gu' par ñeene' ché' tli gu' cas daa no ñeene' ché' xec gu' con daa. Per ¿ché' por nayíiz daa, ne'nglide gu' cas daa, cà'? Yende xàa. Gu' mblique' cas daa. Ne'ngo' toode gu' daa thìb lad. Mblique' gu' cas daa. Más de cona, co'se' mzin daa loo gu', anze'f mdyu' daa loo gu' xalque' thìb angl che'n Diox. No ale mden' gu' no mxac gu' casque' ngòc daa xal yub Jesucrist loo gu'.  
\v 15 ¿Máa gust co' ngòp gu' con daa nalle', sya? Tac co'se' mbalen loo gu'a, daa mda' cuent cón che'n gu' le' gu' ndxab loo xtàa gu': Ngàc ngudloo na' ¿cón ngàc ngudloo na'? Ta' na' ngudloo na' càa prob mbi' ba', cara.  
\v 16 Per nalle', ¿ché' ngue li gu' cuent le' daa ngòc thìb ngolo ngola's che'n gu' loo gu' ante por ngue niin con' co' nac con' lìcpe' loo gu' xal nac mod co' nzi tee ban gu' nalle', cà'? Yende xàa. 
\p  
\v 17 Mèn co' ngue cua'n mod, co' nac mèn co' ndlya's co' xà' gu' loo cón che'n Jesucrist, mèna ndlu' loo gu' le' mèna ndlya's gàc con' ndac loo gu'. Per indlide mèna con'a con thidte yéc mèna no con thidte lezo' mèna par, lìcque', càba con' ndac loo gu'. Ndxe'leque', con' co' ngue li mèna nac: Ale ndlya's mèna co' xà' mèna gu' loo nu' par más yòo yéc gu' loo cón che'n mèna no yòo gu' lad che'n mèna.  
\v 18 Huenque' naca yòo yéc mèn loo cón che'n tedib mèn. Per, oj, ché' co' càba con' ndac loo thìb mèn no loo tedib mèn. No, oj, ché' co' li mèna dib nzo yéc mèn no dib nzo lezo' mèna con xtàa mèn, huen. No ndlyazen tolo li mèna con' ndac loo gu' thidtene, que nzo non gu', que yende daa loo gu'.  
\v 19 ¡Aa, mèn gulàaz co' nac che'n làaz mèn galas co' nac xal xin'en! Axta le'n lezon ndlyàa thìb yalnè co' nden'en por cón che'n gu' xal co'se' nquée yo'f lezo' thìb xa'got co' ndub tan xin'. No nden'en toloque' gàc yaltìi ndxè' loon por cón che'n gu' axtaque' ñeen huen huen nzi ta' gu' cuent no nzi té'th gu' no nzi ndubdi's gu' loo cón che'n Crist no axtaque' gàc gu' mèn co' nac xalque' nac Crist.  
\v 20 Oj, ché' co' nzo mod nzo non gu' par nedrè', huen, par gác daa tyoodiz non gu' tedib mod co' inacte mod xal ngue que'en ye's ndxè' loo gu'. Tac axta ne' ne' neen xá mod tolo lin xtùuz cón che'n gu'. 
\s1 Pab mbez le' chop xa'got co' lèe Agar no Sar nac xal thìb muestr co' ndlu' cón che'n mod xà' co' ndxela's chop ned mèn cón che'n Diox. 
\p  
\v 21 Gu' co' mbere ndlya's li xal ñibe' ley co' mxo'f Moisés loo mèn, ndlyazen ñee gu' loon: ¿Ché' tarte gòn gu' no ten' gu' cón mbez di's co' ndub loo ley co' mxo'f Moisés loo mèna, cà'? Di'sdèe nac co' ñibe' leya loo mèn. ¿Xá mod gác gu' li gu' con'a? ¡Pà gác gu' li gu' con'a!  
\v 22 Pues di's co' ndub loo libr co' nac xti's Diox co' nac Testament Gox mbez le' Abraham mque no chop xgan'. Thìb mbed ngòc xin' huan Abraham con leque xa'got co' ngòc criad loo Abraham. Le' tedib mbed na, ngòc xin' Abraham por xa'got co' ngòc xin' sa'lpe' Abraham. No ngòc xin' sa'l Abraham thìb xa'got co' yende chó mèn ngo co' ngnii loo xa'got Abraham par ñibe' mèn loo xa'got Abraham por ngòc xa' xin' sa'lpe' Abraham tiempa.  
\v 23 Le' mbed co' ngòc xin' xa'got co' ngòc criada ngóol xal nac bin co' ndli bél'yòo lad mèn co'se' ndxáal mèn loo izlyo'. Per ndxe'leque', mbed co' ngòc xin' xa'got co' ngòc xin' sa'lpe' Abraham co' ngòc xa'got rnith no co' ngòc xa'got co' yende chó mèn mbee ncà, mbeda ngóol par ngòcque' no mdyaaque' no mdubque' di's co' mcàbgòn Diox li Diox loo ryop xin' sa'l Abraham.  
\v 24 Con'a ngòc thìb muestr o mod co' ndlu' cón che'n mod co' ndxela's mèn loo Diox. Le' ryop xa'gota na, ndlu' cón che'n chop conveñ. Cón che'n chop conveñ ndxè' nac: Ner conveñ co' mnibe' Diox loo Moisés co' ngòc thìb ley co' mxo'f Moisés loo mèn nación Israel. Mèn co' ndlya's li xal ñibe' ley che'n ner conveñ, mèna nquin tyubdi's xal ñibe' ner conveña xal ndyubdi's thìb moz loo patrón moz. Xa'got co' ngro' lèe Agar ndlu' cón che'n ner conveñ tac ngòc xa' criad Abraham no mquin tyubdi's yèe Agar loo mèn guliz Abraham.  
\v 25 Di's co' nac di's Agar co' nac lèe xa'gota, leque di'sa nac di's co' nac di'stèe che'n mèn grieg. Di'sa nac leque di's co' nac lèe yii Sinaí co' ndub le'n nación Arab. Di's co' nac lèe che'n xa'got co' lèe Agar co' ngue niin loo gu' ndxè' nee di's nac mèn nación Israel nalle'. Tac nalle' ryethe mèn nación Israel nac xal moz co', por fuerz, naquinque' tyubdi's xal ñibe' ley co' mxo'f Moisés loo mèn.  
\v 26 Mèn nación Israel mbez le' ciuda Jerusalén nac ciudape' mèna. Per na' mbez le' loo bé' nac lizpe' na' no làazpe' na' no xnedpe' na', co' nee di's, nac xal tedib ciuda Jerusalén co' nac ciudape' che'n na'. No inquinte li na' huax con' xal ñibe' ley co' mxo'f Moisés loo mèn nación Israel par li mèna.  
\v 27 Loo libr co' nac xti's Diox ndub di's co' mbez: 
\pi1 Fta' gust lezo'l, xa'got rnith, lùu co' ne'ndante xin'. De gust fxìis yèe, lùu co' thidtene ne'ndante xin'. No ne'nden'tel yalnè par ndan xin'l. 
\pi1 Tac xa'got co' mblá'ya' sa'l, xa'gota que no más xin' co'se' bere sa'l xa', queltàa sa'l xa' con xa'gota tedib vez. Más que no xa'gota xin' xa'gota leque xa'got co' thidteneque' ndyub no sa'l. 
\m Con' ndxè' nee di's más yòo mèn nación Israel loo cón che'n Diox por cón che'n Jesucrist leque ngòo mèn co' nac mèn nación Israel loo cón che'n Diox por mbli mèna preb ndubdi's mèn loo di's co' mnibe' ley co' mxo'f Moisés loo mèn par li mèn. 
\p  
\v 28 Gu' co' nac mèn huesen por cón che'n Crist, ngue niin loo gu': Na' nac xal Isaac. Nac na' xin' Diox tac ngola's na' loo Crist xalque' ngola's Abraham loo Diox le' Diox lique' con' mcàbgòn Diox li Diox loo Abraham.  
\v 29 Xalque' ngòca póla, le' mbed xin' Abraham co' lèe Ismael, co' ngóol xalque' nac mod co' ndxáal bin mèn co' ndli mèn loo izlyo', mbed mdub ngu's tedib mbed co' lèe Isaac co' ngòc xganpe' Abraham, mbed co' ngóol ante por cón che'n Xpii Natú'. Tataa ndxàca loo na' nalle' le' mèn co' ngue li preb ndubdi's mèna xal ñibe' ley co' mxo'f Moisés loo mèn ngue tub ngu's na', ne.  
\v 30 Per mastale' tataa ngòca loo ryop hues xgan' Abraham, ¿cón mbez loo libr co' nac xti's Diox, à'? Le' loo libra mbez: 
\pi1 Blo' criadgot co' ngue nol lizl ba' con xgan' criadgot. Tac mbed co' nac xgan' criadgota, yende mod gàc che'n mbed herens con mbed co' nac xgan' meegot co' yende chó mèn ñii loo no co' yende chó mèn mbee ncà. 
\m  
\v 31 Por cona, ngue niin loo gu', mèn co' ndxàc huesen por cón che'n Crist: Ya inacte na' xal xgan' meegot co' ngòc criadgot, co' nee di's, nquin li mèn con' co' ñibe' ley co' mxo'f Moisés loo mèn. Ndxe'leque', nac na' xal xgan' meegot co' yende chó mèn ñii loo, no co' yende chó mèn mbee mcà, co' nee di's, inquinte li na' con' co' mnibe' ley co' mxo'f Moisés loo mèn par li mèna par lyá' na' loo con' ryes. 
\c 5  
\s1 Bli nèe gu' gu' loo cón che'n Crist par gàca loo gu' yende chó ñii loo gu' no yende chó cuee cà' loo gu' loo cón che'n Crist. 
\p  
\v 1 Crist mbli par ya yende chó con' cuee no cà' na' par nquin li na' ryethe con' co' ñibe' ley co' mxo'f Moisés loo mèn nación Israel. Bli nèe gu' gu', tá, loo cón che'n Crist. No ya ne'tolode bere gu', gàc gu' xal moz co' ñibe' patrón loo loo cón che'n leya par li yèe gu' ryethe con' co' ñibe' ley. 
\p  
\v 2 Daa co' lèe Pab, daa ngue nii di's ndxè' loo gu' loo cart ndxè'. Bìn gu' di's co' ngue niin loo gu' ndxè': Chele' gu' yòo loo yalndxela's che'n mèn co' ndli circuncisión, le' sya, ya yende cón ntac Crist par gu' loo cón che'n Diox.  
\v 3 Beren niin loo gu' tedib vez: Chol gu' co' nac mènbi' co' ndlya's gàc circuncidar, gu' co' ndlya's gàc circuncidara, naquinque' li yèe gu' ryethe con' xal ñibe' di's co' ndub loo ley co' mxo'f Moisés loo mèn par lyá' gu' loo con' ryes.  
\v 4 Gu' co' ndxela's le' Diox mdyal no mda' Diox lugar yòo gu' loo cón che'n Diox par gàc gu' mèn nalì no mèn nambìi loo Diox por ngue li gu' xalque' ñibe' di's co' ndub loo ley co' mxo'f Moisés loo mèn, gu'a mblá'ya'le' cón che'n Crist. No ngro xà'le' gu' loo Crist. No inda'de gu' lugar loo Diox telá' Diox gu' loo con' ryes ante por cón che'n Jesucrist.  
\v 5 Per por part cón che'n na', por cón che'n Xpii Natú' no por ngola's na' loo Crist, nzi queeque' lezo' na' le' Diox tyal yòo ban no na' Diox loo bé' yiloa.  
\v 6 No nalle' chele' na', lìcque', thidte ndxàc con Crist Jesús, yende cón ntac no yende cón lii gàc circuncidar na' o ne'gàcte circuncidar na'. Thidte con' co' más ntac loo na' nac le' na' ndxela's loo Crist. No cón che'n con' co' ndxela's na' loo Crist ndli le' na' nque' lezo' ñèe na' hues xtàa na'. 
\p  
\v 7 Con que gu' huenque' ngureri' loo cón che'n Crist, ndyaquen, ¿cóxe mbli ya ne'tolode ndyubdi's gu' cón che'n di's ndac co' nac lìcpe', à', yey?  
\v 8 ¿Ché' ngue li gu' cuent le' di's co' mbìn gu' por ro mèn co' mblu' gu' par ngro xà' gu' loo cón che'n Crist nac di's co', lìcque', ngue ñibe' Diox loo gu' par li gu', cà'? Tyè'. Ndxe'leque', di's co' mbìn gu' nac co' mbli ngro' gu' loo cón che'n Diox. Tad Diox nacpe' xa' co' mbrez gu', no co' mblec gu', no co' mblo gu' loo cón che'n Crist.  
\v 9 Ne'ta'de gu' lugar quedìi mèn gu' ne' por chu'th. ¿Ché' inda'de gu' cuent xal mbez di's co' mbez: Con ndxepte dii levadur ndli ndyoo bes huax co'f harin, cà'?  
\v 10 Daa ndxàp yalxla's loo Tad Diox por cón che'n gu', ey, le' gu' ne'tolode li xtùuz tedib mod loo xtùuz co' ngue lin xtùuz loo cón che'n Crist. Per na ngue nii loo gu': Le' Diox tetìi mèn co' ndli par ncàba imbee see teede lezo' gu'. No yende chó mport nzo lezo' Diox aa guneei chó mèn nac mèna. 
\p  
\v 11 Le' part cón chenen na, mèn co' nac mèn huesen por cón che'n Crist, chele' daa be' ngue ñibe' loo mèn par gàc circuncidar chol mèn, ne'tub ngu'ste mèna daa. Tac chele' daa tataa ñibe' loo mèn, ne'ten'te mèna di's no axta ne' ne' yòo xyàn lezo' mèna ñèe mèna daa par tolo tub ngu's mèna daa. Per ndxe'leque', daa mbez loo mèn naquinque' yila's mèn loo Crist no loo cón che'n Crist par lyá' mèn loo con' ryes.  
\v 12 Per nde niin thìb con' loo gu' cón che'n mèn co' ngue li xol loo gu' tac mèna ndlya's gàc circuncidar gu': Oj, ché' co' leque yub mèna cho' xlan' mèna thidtene, huen, par thidtene ryo xà' mèna loo cón che'n Diox thidtene. 
\p  
\v 13 Per gu', mèn gulàaz che'n làaz mèn galas co' nac mèn huesen por cón che'n Crist, Diox mcui gu' no mblec Diox gu' par yende chó mèn gác cuee cà gu' loo cón che'n Diox. Ante nzo thìb con' co' ñibe'en loo gu' par ne'lide gu'i. Indlyasten le' gu' ñibe' yéc gu' no ñibe' gu' lezo' gu' par gab gu' loo lezo' gu' nee gu' cón li gu'. Le' sya, tataa mod tlo gu' li gu' chol con' co' neete lezo' gu' co' ndryo' ndlyen' lezo' gu' par li gu' co' gàc con' ye'rsin' loo Diox. Más huen, ndlyazen gàc gu' mèn co' que' lezo' ñèe hues xtàa gu' par tataa mod li gu' sirv loo hues xtàa gu' chol mod.  
\v 14 Chele' gu' li con' co' ngue niin loo gu' ndxè', sya, ngue li gu' ryethe con' co' ñibe' ley co' mxo'f Moisés loo mèn par li mèn con' ndac. Con'a nac: Fque' lezo' gu' gunèe gu' hues xtàa gu' xalque' ngue lezo' gu' ñèe gu' gu'.  
\v 15 Per ndxe'leque', chele' gu' ndxàc yin' no ndxàc gu' ted, co' nee di's, ndxecloo gu' no ndxòo xyàn lezo' gu' ñèe gu' thìb xtàa gu' no tedib xtàa gu', anderhuen gu' con xtàa gu', ne' yiloa leque gu' teza' gu' loo cón che'n Crist. 
\s1 Pab ngue lu' loo mèn cón che'n con' co' ndryo' ndlyen' lezo' mèn par li mèn con' ye'rsin' no cón che'n mod co' nque tee ban mèn, mèn co' ñibe' Xpii Natú' loo. 
\p  
\v 16 Con' co' niin loo gu' ndxè', mèn huesen por cón che'n Crist, nac con' ndxè': Gure ban gu' xalque' ñibe' Xpii Natú' loo gu'. Le' sya, tataa mod ne'tolode li gu' xal nac rye con' ndyub yo'f lezo' gu' co' ndryo' ndlyen' lezo' gu' par li gu'i.  
\v 17 Tac rye con' co' ndli par ndyub yo'f lezo' mèn par li mèn con' ye'rsin', con'a inacte con' co' ñibe' Xpii Natú' che'n Diox loo mèn par li mèn. Lomisque' ne, con' co' ñibe' Xpii Natú' che'n Diox loo mèn par li mèna, inacte con'a con' co' ndli ndyub yo'f lezo' mèn par li mèn co' neete lezo' mèn li mèn. Chele' thìb mèn alithe ndli con' ndryo' ndlyen' lezo' mèn par li mèn con' ye'rsin' co' nac co' neete lezo' mèn, le' sya, yende mod li mèna con' co' ñibe' Xpii Natú' che'n Diox loo mèn par li mèn. Per chele' mèn ndyubdi's loo con' ñibe' Xpii Natú' loo mèn, ne'lide mèn con' co' ndryo' ndlyen' lezo' mèn li mèn par tataa mod li mèn co' neete lezo' mèn. Por cona, ngue niin loo gu': Yende mod li gu' chol con' ndlya's gu' li gu' xal co' ndryo' ndlyen' lezo' gu' chele' gu', lìcque', ndlya's tyubdi's gu' loo Diox.  
\v 18 Per chele' Xpii Natú' che'n Diox nac xa' co' nzo no gu' no, chele' Xpii Natú' tyoo ner loo gu' no tyoo naa Xpii Natú' loo gu', le' sya, ya inquinte tolo li gu' con' co' ñibe' di's co' ndub loo ley co' mxo'f Moisés loo mèn. 
\p  
\v 19 Inagànte naca par hui' mèn no par ñaa mèn no par non mèn con' co' ndli mèn, mèn co' nzi tee loo rye loothe con' co' nac che'n xab izlyo'. Mèna ndli yalburrid no ncua'n mèna xin' huan mèn. No ndli mèna xtùuz con' xin no con' cap cón che'n con'a axta ale capas mèna ndlya's mèna li mèna rye loothe con' ye'rsin' co' nac huax mod ye'rsin' co' ndli ndyub yo'f lezo' mèn par li mèn con'a.  
\v 20 Ndyub xib mèn no nsál' mèn ya' mèn no ncòo' mèn yéc mèn loo chol mdo' co' nac chol gunab. Ndli mèn yalbruj. Ndxòo xyàn lezo' mèn ñèe mèn chol xtàa mèn. Ngyoo mèn con xtàa mèn. No nqueli'th mèn cón che'n xtàa mèn. Ndxep vez thìb con' co' iñaade ndli ndxecloo mèn ñèe mèn xtàa mèn. Asendli mèn ndlyath no mèn xtàa mèn ante par ñèe loon mèn que no mèn che'npe' taamas mèn. Más de cona, ndxàc mèn chop son ned loo chol con'.  
\v 21 Ndxàn lezo' mèn ñèe mèn xtàa mèn. Nac mèn mènguth mèn. Nac mèn mènguy. Ndxuhuacho' mèn no ndxuhuaxle' mèn axta plóthe cón che'n xtàa mèn co'se' ndxàc chol lni. No ndli mèn taamas con' co' lalque' nac xal con' ndxè'. Ngue co'xen ryete con' ndxè' loo gu' nalle' xalque' mco'xena loo gu' ndoore'. Le' rye mèn co' ndli chol con'a, ne'gácte mèna yòo mèna loo cón che'n Diox par ñibe'pe' Diox loo mèna. 
\p  
\v 22 Per ndxe'leque', rye con' co' ndli Xpii Natú' che'n Diox loo mèn par li mèn nac: Que' lezo' mèn ñèe mèn chol xtàa mèn. Con gust cue mèn no xo'f nde' nxo'f ndla' lezo' mèn. No cue ban mèn rye nda mèn no rye ndye'th mèn làth hues xtàa mèn. Nxec mèn con xtàa mèn no ncha'la's mèn con xtàa mèn. Nazi' cue mèn con xtàa mèn. Li mèna con' ndac loo xtàa mèn. Li mèn cumplir con' mbez mèn li mèn loo xtàa mèn no loo Diox.  
\v 23 Gàc mèn mèn nado', mèn co' indye'ste. Gàc mèn mèn co' ndxàp lezo', no gàc mèn mèn co' ñibe'pe' loo lezo' loo ryethe con' ndli mèn. Ryete gobiern co' ñibe' loo rye nación loo dib athu izlyo' ndxòo lezo' ñèe mèn, mèn co' ndli con' ndac ndxè'.  
\v 24 Le' rye mèn co', lìcque', nzo loo cón che'n Crist, co' ngola'sque' loo Crist, con' co' mbli mèn ndoore' co' ngòc con' ye'rsin' co' mdyub yo'f lezo' mèn mbli mèn xal guneete lezo' mèn, con' ye'rsin'a ngòc xal thìb con' nguth co' ya ne'tolode ñibe' loo mèna. Tataa mod ya ne'tolode li mèna con' ye'rsin'.  
\v 25 Texal nzi tee ban na' loo cón che'n Xpii Natú' che'n Diox, lomisque' tataaguè' ndxàal ta' na' lugar le' Xpii Natú'a tyoo ner no tyoo naa loo na' loo ryethe con' ngue tee li na', par ante li na' con' co' neete lezo' Xpii Natú'. 
\p  
\v 26 Indxàalte gàc na' mèn nate's no mèn naxal'. Tac co'se' ndxàc na' xal mèna, con'a ndli ndxecloo thìb xtàa na' no tedib xtàa na' ñèe xtàa na' na'. Ne' ne' gàc na' mèn co' ndxàn lezo' par ñèe na' hues xtàa na', ndee gu'. 
\c 6  
\s1 Pab mnibe' loo mèna lyath no mèna chol hues xtàa mèna. 
\p  
\v 1 Mèn huesen por cón che'n Crist, chele' gu' ñèe chol mèn co' ndxàc hues xtàa na' ngue tee cua'n xquin no xtol, gu' co' más nda'le' cuent no gu' co' más mté'thle' par ndyubdi'sque' gu' loo cón che'n Tad Crist, blyath no gu' mèna no gunii gu' loo mèna par bere mèna, tlo mèna, que tee ban ndac mèna loo cón che'n Tad Crist tedib vez xal ndxàala. Per nado' di's nado' cuent tyoodi's no gu' mèna. No anderhuen gu' chó Diox chó nee gu' gunee gu' xal nzi tee gu'. No bla's gu' loo leque gu' hui' xal nzi tee ban gu' loo cón che'n Diox. Tac thìb descuid, chàa, li Mebizya gan loo gu' no tlo gu', li gu' chol con' ye'rsin'.  
\v 2 Blyath no gu' thìb hues xtàa gu' no tedib hues xtàa gu' par ne'lide hues xtàa gu' con' co' ndyub yo'f lezo' hues xtàa gu' par li hues xtàa gu' con' ye'rsin'. Chele' gu' tataa ndli loo chol hues xtàa gu', le' sya, tataa mod ngue lique' gu' xalque' ñibe' Crist loo gu' par li gu'. 
\p  
\v 3 Chele' ndxep gu' co' ndxàc hues por cón che'n Jesucrist ndyac no ndli gu' cuent anze'f mèn roo no mèn xèn nac gu' co'se' yende cón ntac gu', leque con'a ndlu' no tataa mod leque gu' ngue quedìi gu' loo con' nac gu'.  
\v 4 Thìb thìb gu' bla's no hui' gu' loo leque gu' xá mod nzi tee ban gu' loo cón che'n Diox par ñee gu' ñeene' ché' ngue li gu' ndxep con' ye'rsin'. Le' sya, chele' gu' nda' cuent huenque' nzi tee ban gu' no ndyac lezo' gu' loo mod co' nzi tee ban gu' loo cón che'n Diox, le' sya, ndyac lezo' gu' por cón che'npe' gu'. Per ne'tyacte lezo' gu' por más nda' gu' cuent no más nté'th gu' par tyubdi's gu' loo Diox leque taamas hues xtàa gu'.  
\v 5 Per nalle' thìb thìb gu' gunaa loo gu' no bla's gu' loo leque gu' xá nzi tee ban gu' loo cón che'n Diox. Thìba con' ndxè'. 
\p  
\v 6 Le' tediba na, niin thìb con' loo gu': Mèn co' ngue té'th cón che'n xti's Diox por cón che'n mèn co' nac maistr co' ngue lu' mèna, mèn co' ngue té'tha ndxàalque' lyath no mena maistr co' ngue lu' loo mèn loo con' co' nde che loo mèn co' nac maistr. 
\p  
\v 7 Hui' gu' nexa. Ne'ta'de gu' lugar quedìi gu' leque gu'. Yende chó mèn nzo co' gác xìis no Diox. Tac Diox tub rezque' cón che'n rye mèn. Gàcpe'i loo gu' xal mbez mèn: Le' bin co' co mèn loo yòo, leque biz bina gàc cosech co' thop mèna, co' nee di's, fsuc paráp. Leque lool lyàa rsucl.  
\v 8 Chele' chol mèn ndxàp mod co' nac mèn par ndli mèn chol con' ye'rsin' co' ndryo' ndlyen' lezo' mèn, le' sya, leque con' ye'rsin' co' ndli mèna ncàba loo mèna ryo xà' mèn thìb lad loo Diox thidtene yilo gath bél'yòo lad mèn. Nacquele' chol mèn gàp thìb mod par li mèn con' ndac co' yòo lezo' Xpii Natú', le' sya, Xpii Natú' li par gàca loo mèn ban no mèn Diox thidtene yilo gath bél'yòo lad mèn.  
\v 9 Cona, ngue niin loo gu': Indxàalte yizan na' par ne'tolode li na' con' ndac loo hues xtàa na'. Tac chele' na' ne'ta'de lugar yizan na' no yitac lezo' na' loo con' ndac co' ngue li na' loo hues xtàa na', le' sya, por derech, Diox li par gàc huax con' ndac loo na' yiloa.  
\v 10 Cona, co'se' ta'i lugar loo na' no co'se' nzoque' mod li na'i, li na' con' ndac loo chol mèn. No más ndxàal li na' con' ndac loo mèn co' ndxàc hues xtàa na' por cón che'n Crist. 
\s1 Lult di's co' mque' Pab ye's loo mèn loo cart ndxè'. 
\p  
\v 11 Ryete di's co' nac di's co' nde loo gu' loo cart ndxè' nac di's co' ndxaben loo tedib xa' co' ndxàc xtàa daa par mque' xa' ye's co' nac di's loo cart ndxè'. Per nalle' hui' gu' nexa: Napló nambìi ñaa letr co' mque' yuben di's co' nac lult di's loo cart ndxè' loo gu' par tolo toodiz non gu'.  
\v 12 Mèn co' ndlya's li fuerz par bere gu', li yèe gu' xal nac costumbr che'n circuncisión, mèna ndli tataa ante par ndxan' bien mèna loo chol mèn no par ne'tub ngu'ste chol mèn mèna por cón che'n di's ndac co' ndlu' ante gàp mèn yalxla's loo cón ngòc loo Crist loo cruz. No inquinte li mèn cas loo taamas costumbr gox cón che'n con' ngola's mèn ndoore' par lyá' mèn loo con' ryes.  
\v 13 Per fte' lezo' gu', ey, ne' mèn co' ndli costumbr che'n circuncisión, indlide prob mèna ryete con' co' ñibe' ley co' mxo'f Moisés loo mèn. Per mastale' indlide mèn xal ñibe' ley co' mxo'f Moisés loo mèna, ale ndlya's mèna le' gu' gàc circuncidar par tataa tye's mèna loo xtàa mèna le' mèna mbli fuerz gu' par mbli gu' mquée fthi'f lad xlan' gu' par ngòc fthi'fa xal thìb señ.  
\v 14 Per part cón chenen, indliden cuent no ne'yilasten le' chol con' co' nzo loo izlyo' ndxè' o chol xley' li par lyá' daa loo con' ryes. Ndxe'leque', ante ndxàpen yalxla's loo Diox por cón che'n Tad Jesucrist na' co' nguth loo cruz no maste par lyá' daa loo con' ryes. Tac por cón che'n con' co' mxac Tad Crist loo cruz, rye mod co' ngòc cón che'n xab izlyo' mdyon'le' loon no mblyuxla loon loo izlyo' ndxè'. Nalle' nac daa xal mèn co' nguth loo cón che'n xab izlyo'.  
\v 15 Tac chele' na' thidte ndxàc con Crist Jesús, le' sya, yende cón ndli gàc circuncidar na' o ne'gàcte circuncidar na'. Per thidte con' co' más ntac loo Diox nac le' mèn nacle' mèn cub loo Diox.  
\v 16 Ndlyazen le' Diox li le' gu' cue nagàl lezo' loo Diox no loo Jesucrist no cue ban gu' rye nda gu' no rye ndye'th gu' làth xtàa gu'. No ndlyazen le' Diox thidtene lyat lezo' ñèe Diox gu', ryete gu' co' nque tee ban ndac loo cón che'n Crist xal nac di's co' mblu'en loo gu' loo cart ndxè'. No ndlyazen gàca tataa loo ryete mèn co' nqueltàa loo cón che'n Diox chol lugar, mèn co', lìcque', ngòo loo cón che'n Crist. 
\p  
\v 17 Lomisque', ndlyazen nalle' par delant nec thìb mèn indlyasten cua'n xó' daa no ne' ne' li xol mèn loon por cón che'n zin' co' ndlin cón che'n Crist, zin' co' mxo'f zin' Diox cón che'n Crist loon. Tac fthi'f co' ne'en laden ndxè' ndlu' le' daa, lìcque', nac thìb mbi' co' nxo'f zin' che'n Crist. 
\p  
\v 18 Lomisque' ndlyazen, mèn huesen por cón che'n Tad Jesucrist, le' Tad Jesucrist angryo' lezo' li Tad Jesucrist anggàc con' ndac loo gu', no li Tad Jesucrist huen nda gu' ned que tee gu'. Taandxè'que' gàca loo gu', ndee gu'.