\id 2PE  
\h 2 PEDRO 
\toc1 Mbryop Cart Co' Mque' Pedr Ye's Loo Mèn 
\toc2 2 PEDRO 
\toc3 2 P. 
\mt1 Mbryop Cart Co' Mque' Pedr Ye's Loo Mèn 
\c 1  
\s1 Pedr ngue que' ye's co' nac cart ndxè' loo mèn co' ndxela's loo cón che'n Crist. 
\p  
\v 1 Yub daa co' nac Mon Pedr, daa nac thìb mbi' co' nxo'f zin' zin' cón che'n Jesucrist. No nac daa thìb mbi' co' ndxe' di's cón che'n Jesucrist, co' nee di's, nac daa mbi' co' mtel' yub Jesucrist loo mèn. Ngue que'en ye's co' nac cart ndxè' loo gu', gu' co' nac mèn co' mté'th no co' ngola'sle' loo cón che'n Diox xalque' ndxela's nu'. No mod co' ndxela's na' ndxè' anze'f ntac loo gu' xalque' ntaca loo nu'. Naca thìb con' roo no thìb con' xèn le' Diox mda' lugar yila's na' loo Diox, ne. Mbli Diox ngola's na' loo cón che'n Jesucrist tac Diox na' no Tad Jesucrist na' co' mtelá' na' loo con' ryes nac Diox nalì no Diox nambìi.  
\v 2 Ndlyazen tolo li Diox anggàc huax con' ndac loo gu' axta plóthe. No ndlyazen yo nagàl lezo' gu' loo Diox no cue ban gu' rye nda gu' no rye ndye'th gu' làth xtàa gu' por mda' gu' cuent no por mdyub xnìi yéc gu' no por mdyub xnìi lezo' gu' loo cón che'n Diox no loo cón che'n Jesús co' nac Tad na'. 
\s1 Trè' ndlu' cón che'n mèn co' ngòole' loo cón che'n Crist le' mèna ndxàal tolo té'th no ta' mèn cuent no tyubdi's mèn loo cón che'n Crist. 
\p  
\v 3 Diox mbli ngue no na' ryethe con' co' nquin na' par que tee ban ndac na' loo cón che'n Jesucrist no par li na' cas loo Diox dib nzo yéc na' no dib nzo lezo' na'. Tataa mbli Diox por cón che'n ryethe con' roo no con' xèn co' nzo la's nii Diox no co' nzo la's ya' Diox. Tataa mbli Diox co'se' mbli Diox mblibe' na' Tad Jesucrist. Tad Jesucrist mcui na' no mblec Tad Jesucrist na' loo cón che'n Tad Jesucrist por cón che'n con' roo no con' xèn co' ndxàp Tad Jesucrist la's nii Tad Jesucrist no la's ya' Tad Jesucrist no por cón che'n ryethe con' roo con' xèn co' ngòc thìb zin' co' mxo'f zin' Tad Jesucrist loo mèn.  
\v 4 No por ryethe con' roo no con' xèn co' ngòc thìb zin' co' mxo'f zin' Tad Jesucrist loo mèna, mcàbgòn Tad Jesucrist gàc huax con' roo con' xèn loo na'. Con' co' mcàbgòn Tad Jesucrist loo na'a, anze'f ntac loo na'. Por cón che'n con' co' mcàbgòn Tad Jesucrist loo na'a, ndxàca loo gu' nac gu' mase ndxep xal nac Diox. Le' sya, tataa mod lyá' gu' loo ryethe con' zab co' ndli ndyub yo'f lezo' mèn co' alithe naban loo cón che'n xab izlyo' loo izlyo' ndxè'.  
\v 5 Por cona, ngue niin loo gu': Ndxàal li gu' co' nzote mod li gu' par que tee ban ndac gu' loo con' co' ndxela's gu' loo cón che'n Diox. Más de cona, ndxàal tolo té'th gu' cón che'n Diox láth nque tee ban ndac gu' loo con' ndxela's gu' loo cón che'n Diox.  
\v 6 Lomisque' ne, ndxàal tolo té'th gu' par ñibe' gu' loo lezo' gu' no par gàp gu' lezo' gu' láth ngue té'th gu' cón che'n Diox. Lomisque' ne, lyazen gàc gu' mèn co' ncha'la's loo ryethe con' co' ndxàc loo gu' láth ngue té'th gu' par ñibe' gu' loo lezo' gu' no par gàp gu' lezo' gu'. No ndlyazen le' gu' thìb lì yéc gu' no thìb lì lezo' gu' li gu' cas loo Diox láth ncha'la's gu' loo ryethe con' co' ndxàc loo gu'.  
\v 7 Más de cona, ndlyazen le' gu' gàc mèn co' anze'f nazin' ñèe hues xtàa gu' láth thìb lì yéc gu' no thìb lì lezo' gu' ngue li gu' cas loo Diox. Por lult, loo ryethe con' ndxè', ndlyazen gàc gu' mèn co', por derech, mté'th par que' lezo' gu' ñèe gu' chol mèn láth nac gu' mèn co' anze'f nazin' ñèe hues xtàa gu'. 
\p  
\v 8 Chele' gu', lìcque', li ryethe con' co' ngue niin loo gu' ndxè' no ndxàcpe'i loo gu', le' sya, axta arid ntac mod co' nque tee ban gu' loo Diox. No ndxàc loo gu' inacte thìb con' anxle' ndlibe' gu' Tad Jesucrist na' por nda' gu' cuent co' huenleque' cón che'n Tad Jesucrist na'.  
\v 9 Per mèn co' indlide cas loo cón che'n Diox no cón che'n Jesucrist xal nac ryethe con' co' ngue niin loo gu' ndxè', mèna nac xal thìb mbi' sieu o nac mèna xal thìb mbi' co' nathath ngüi'. Tataa ndxàca loo mèna por ndxathla's mèna le' Diox mton' ryethe xtol mèna co' mcua'n mèna, póla.  
\v 10 Por cona, gu' co' nac mèn huesen por cón che'n Crist, ryete gu' bli co' nzote mod li gu' no blu' ryete gu' co' nzote mod gác té'th gu' no non gu' no bli nèe gu' le', lìcque, Diox mblec gu' no mcui Diox gu' loo cón che'n Crist. Le' sya, chele' gu' ngue li xal ngue niina loo gu' ndxè', ne'ryo xà'de gu' no ne'yitacte lezo' gu' loo cón che'n Crist axta gath gu'.  
\v 11 Le' sya, tataa li Diox par thìb lìte yòo gu' loo bé' co'te' nzo Tad Jesucrist na' co' mtelá' na' loo con' ryes. Ñibe' Tad Jesucrist na' loo ryethe con' thidtene. 
\p  
\v 12 Cona, nxyo'f ndeleque' lezon par ndlin le' gu' te'que' lezo' con' ndxè' mastale' huen huen non gu' no nda' gu' cuent cón che'na, no mastale' ndli gu' par nzi li nèe gu' gu' loo con' ndxè' co' nac lìcpe' nalle'.  
\v 13 Ndyaquen huen nac co' ngue lin ndxè' no nalì naca par tolo lu'en loo gu' cón che'n con' ndxè', no co'xen loo gu' par te' lezo' gu' no par tolo ye'th lezo' gu' cón che'n con' ndxè' láth be' naban daa.  
\v 14 Tac Tad Jesucrist na' mblu'le' loon nde zin' gaxle' huiz co' gath daa.  
\v 15 Per nalle' láth be' naban daa, tolo lin co' nzote mod lin no tolo co'xen loo gu' par gàca loo gu' co'se' ngolo nguth daa, tolo te' lezo' gu' ryethe cón che'n con' co' mco'xen loo gu' ndxè'. 
\s1 Trè' ndlu' cón che'n mèn co' gunèe con' roo con' xèn che'npe' Crist láth mque tee no mèn Crist loo izlyo' ndxè'. 
\p  
\v 16 Mblu' nu' ryethe con' loo gu' cón che'n Tad Jesucrist na' le' Tad Jesucrist na' nac xa' roo no xa' xèn no le' Jesucrist bere yi'th loo izlyo' tedib vez. Co'se' mdoodizen cón che'n con'a loo gu', ne'ndoodistena loo gu' xal mèn co' ne'ñeede cuent cón ngue toodi's mèna. Ne' ne' mzi'fen loo di's par mquedìin gu'. Yende xàa. Nu' gunèepe' Tad Jesucrist con ngudloope' nu' co'se' ngòc con' roo no con' xèn loo Jesucrist no co'se' mzye' loo loo Tad Jesucrist.  
\v 17 Gunèe nu' co'se' Diox xud na' mbli ngòc con' guryath no con' guryèn no con' roo con' xèn loo Jesús no co'se' mquée xnìi lad Jesús no mbyà'x bèel lad Jesús. No mbìn nu' di's co'se' gunii Diox di's co' ngòc di's roo no di's xèn co' ndxab Diox: Mbi' ndxè' nac xgan'pe' daa. Anze'f nque' lezon mbi' no anze'f ngudloon no lezon mbi'. No anze'f ndyac lezon loo con' co' ngue li mbi' ndxè'.  
\v 18 Yub nu' mbìn di's co' mbyèn loo bé'a. No thidte ngure no nu' Tad Jesús loo yii co' ngòc yii natú' loo Diox co'se' ngòca. 
\p  
\v 19 Per nalle' ngue no na' tedib con' co' más ngo xo'f di's loo na' cón che'n Jesucrist, co' nee di's, nac ye's co' mque' mèn co' mde'th di's co' ndxab Diox. Huenque' ndli gu' chele' gu' ngue lique' cas cón che'n di's co' mque' mèna ye's. No tataa mod ndxàca loo gu' xal thìb con' co' nquée xnìi yéc gu' no co' nquée xnìi lezo' gu' cón che'n Crist xal co'se' ntenìi thìb lampr loo mèn ned nque tee mèn. Tataa ngue ta' gu' cuent no huen huen ngue té'th gu' nde zin' gaxle' tiemp co'se' bere yi'th Jesucrist loo izlyo' ndxè' tedib vez. Le' sya, huen huen quée xnìi yéc gu' no quée xnìi lezo' gu' xal co'se' nde quée mbèelhui' ndxáal coyor xtil' par nda' mèn cuent nde yinìi izlyo' tedib huiz.  
\v 20 Per ner fte' lezo' gu' no ta' gu' cuent co' huenleque' cón che'n con' ndxè': Nec thìb di's co' ngòc di's co' mque' mèn co' mde'th di's co' ndxab Diox ye's ngòc di's co' alithe mbye'th xtùuz mèna par mque' mèna ye's.  
\v 21 Na' nda'que' cuent no nonque' na' le' mèn co' mde'th di's co' ndxab Diox póla, ne'ndoodi'ste mèna di's no ne'nde'thte mèna di's co' ngòc di's co' angndye'th yéc mèn par ndyoodi's mèn di's co' ngòc di's co' angmbye'th yéc mèna. Ne' ne' ngàc di'sa di's co' angmdub yo'f lezo' mèn par ngde'th mèna di'sa. Ndxe'leque', mèn co' mde'th di's co' ndxab Dioxa, mèna ngòc mèn co', lìcque', ngro xà' loo cón che'n xab izlyo' par ngòc mèna mèn co' mde'th di'sa xal mblyath no Xpii Natú' mèna. Di's co' mde'th mèna ngòc di's co', lìcque', mnibe' Diox loo mèna par te'th mèna di's. 
\c 2  
\s1 Pedr ndlu' cón che'n mèn co' ndyè'. 
\r (Judas 4–13) 
\p  
\v 1 Fte' lezo' gu' póla ngo mèn co' mbez mde'th mèna di's co' ndxab Diox làth mèn nación Israel. Per mèna ngòc mèn gutyè'. No lomisque' ne, tataa mod yòo mèn co' ñee nac maistr co' ndlu' cón che'n Diox làth gu'. Per mèna gàc maistr gutyè' loo gu'. Mèna xexte lu' mod co' nac mod fals co' ncàb yalquìi. No lu' mèna loo gu' cón che'n thìb ley' co' nac ley' gutyè'. Co'se' lu' mèna loo gu' tataa mod, ale negadi's cà di's mèna cón che'n yub Tad Jesucrist co' mtelá' mèna loo con' ryes. Per con' co' li mèna li par setilte càb loo leque mèna lyux mèna.  
\v 2 No anze'f thìb mèn yòo loo cón che'n mèna no queltàa huax mèn con mèna par li mèn con' ye'rsin' xal ndli mèna. No por cón che'n mèna anze'f thìb mèn ñii yèe ñii tìi cón che'n di's ndac che'n Diox co' ndlu' xá mod thìb lìte ndxòo mèn loo Diox.  
\v 3 Por mod co' ndxath nquìi mèna ñèe mèna tmi, asendli mèna ndli mèna provech gu' axta plóthe con mod gutyè' co' ndlu' mèna gu' con xley' fals mèn co' ndlu' mèna loo gu'. Per nzyalque' prob mèna tyactìi mèna co'se' zin huiz ryo xà' mèna loo Diox thidtene. Thidtene ya yende mod lyá' mèna hora. Thidtene guneei loo mèna. Tac ndxàcle' tiemp mzi'f quìi Diox loo mèna le' chol mèn gutyè' co' nac xal mèna thidtene ndyub quìi ndyub bèel lezo' mèna par càb yaltìia loo mèna. 
\p  
\v 4 Diox ne'nton'te xtol angl no xquin angl co' mcua'n angl loo Diox póla. Ndxe'leque', mbli Diox le' angla thìb lìte ngulàa le'n ye'rbìil. No sangmbli Diox mbyan' angla tya xal thìb mèn co' natedó' con caden co'te' nac thìb lugar nacuau thidtene axta gàc huiz co' tub rez Diox cón che'n angla par tetìi Diox angla yiloa.  
\v 5 Ne' ne' nton' Diox xtol mèn no xquin mèn co' mcua'n mèn loo Diox, mèn co' ngure ban más pólle'a. Ndxe'leque', mbli Diox ngulàa thìb yuuloo tín' rloo mèn ye'rsin'a. No ante mbli Diox mblyá' thìb mbi' co' ngro' lèe Noé con gaz mèn co' ngòc famil Noé por mblo Noé yalbàn cón che'n xá mod ndxàal que tee ban lì mèn loo Diox tiempa.  
\v 6 Mbli Diox, ne, par mblyux mèn ciuda Sodom no mèn ciuda Gomor. Ante dii mbyan' co'te' ngure ciuda Sodom no ciuda Gomor. Tataa mbli Diox con'a loo mèna par hui' no ñaa taamas mèn ye'rsin' co' ngo ban chol lugar loo mblyux ryop ciudaa.  
\v 7 Per mbli Diox mblyá' thìb mbi' co' ngro' lèe Lot ndoore' telux Diox ryop ciudaa. Lot ngòc thìb mbi' ndac. No anze'f nxi lezo' Lot por ñèe Lot mod ye'rsin' co' mque tee ban mèn ye'rsin' che'n ciuda Sodom no ciuda Gomor.  
\v 8 Lot ngo ban le'n ryop ciudaa. No mxec yèe Lot no mxi tín' lezo' Lot, co' ngòc mbi' nalì no mbi' nambìi, axta plóthe co'se' ñèe Lot xal ndli mèna con' ye'rsin'túb no co'se' ndxòn Lot cón che'n con' ye'rsin' co' ndli mèna.  
\v 9 Por cona, non na' no nda'que' na' cuent le' Tad Diox ndxác par telá' Tad Diox mèn, mèn co' ante nque tee ban loo cón che'n Diox. Lomisque' ne, ndxác Diox li Diox par tolo ndyub quìi ndyub bèel lezo' mèn ye'rsin' axta zin huiz tub rez Diox cón che'n mèna par tetìi Diox mèna thidtene. 
\p  
\v 10 Más tetìi Diox ryethe mèn co' más ndli ryete yo'f co' ndyub lezo' mèn co' nac con' zab no con' ye'rsin'. No ndxe'leque', ale le'le' nxìis no mèna con' co' ñibe' Diox li mèna loo Diox. Mèna indyóode cón ngue li mèna. No anze'f naxin nac mèna. No axta ne' ne' inzyeb mèna ñii yèe ñii tìi mèna cón che'n chol angl roo angl xèn co' ñibe' loo bé'.  
\v 11 Per ne' angl co' nac angl roo no angl xèn ne'lide ryes par ñii yèe ñii tìi angl cón che'n angl co' nzo ye'rbìil loo Diox xal ñii yèe ñii tìi mèn ye'rsin' cón che'n angl roo angl xèn co' ñibe' loo bé'.  
\v 12 Per ryete mèn ye'rsin'a thidtene indxònte di's no indxaa'dte mèn di's. Axta arid má' mèna loo Diox. Gu' naneeque' le' má' nac má' por nac thìb thìb má' xal nac má', ¿lé'? Ne'ñeede má' cón ndli má'. Tataa nac mèn ye'rsin'a, ne. Tac alithe ndyoodi's mèna thìb con' ye'rsin' no tedib con' ye'rsin' co' ne'ta'de mèn cuent cón ndyoodi's mèn. No leque mod ye'rsin' co' nac mèna càb loo mèna par lyux mèna.  
\v 13 Masre' tyactìi mèna xal nac con' ye'rsin' co' mbli mèna láth naban mèna. Alithe nque tee ban mèn ye'rsin'a par ndli mèna ante con' co' ndyub yo'f lezo' mèn li mèn. No con' ye'rsin' co' ndli mèna le'le' ncàb ndyac lezo' mèna thìb huiz no tedib huiz. Mèna nac mèn xin no mèn cap co' ntezab gu' co'se' ndxòo mèna làth gu' par hua no mèna gu'. Láth ndxòo no mèna gu' ndlu' mèna nac mèna xal mèn huen no mèn ndac. Per ne'nda'de gu' cuent, por derech, ngue quedìi mèna gu'. Ale le'le', ndxan' bien mèna con gu'. No leque tiempa, ndyac lezo' mèna por cón che'n chol con' ye'rsin' co' ngue li mèna xal ndyub yo'f lezo' mèna par li mèna.  
\v 14 Co'se' ngüi' mèna loo chol xa'got, luega ndyub yo'f lezo' mèna no ndlyàa nít yen mèna capas ndyac mèna ngue li mèna yalmbi' con xa'gota. Thidtene incua'nte mèna mod par ne'tolode cua'n mèna xtol mèna. No nac mèna mèn ye'rsin'a co' ncua'n chol myen'got co' indxàpte lezo' no co' luega nda' di's co' ndlya's mèn ye'rsin'a. Nac mèna mèn co' anze'f nde yath ñèe tmi. Thidtene mèn ye'rsin' mèna too ze too yál'.  
\v 15 Por derech, nzi tee huan mèna loo cón che'n Diox tac mblá' mèna con' co' ndxab Diox li mèna par thìb lìte yòo mèna loo bé'. Ale más ndli mèna xalque' mbli thìb mbi' co' ngro' lèe Balaam co' ngòc thìb mbi' co' mde'th di's co' ndxab Diox, póla. Balaam ngòc xgan' thìb mbi' co' ngro' lèe Beor. Balaama mblya's li gan huax tmi por mbli Balaam con' ye'rsin'.  
\v 16 No mzin thìb huiz no mzin thìb ze ale mbli Diox gunii thìb burrgol loo Balaam par mbyoo burr Balaam. Tataa mod más quee lezo' Balaam mblá' Balaam con' ye'rsin' co' mblya's Balaam li Balaam hora. 
\p  
\v 17 Ryete mèn ye'rsin'a nac xal thìb tó' biiz co' yende nít. No nac mèna xal thìb xcuau biiz co' alithe ndxe' mbii, co' nee di's, yende cón ntac mèna. Mbli Diox tolo ndyub quìi ndyub bèel lezo' mèna par ryo xà' mèna loo Diox yilo gath mèna par lyàa mèna ye'rbìil no sangyan' mèna tya co'te' nac thìb lugar co' más nacuau thidtene.  
\v 18 Tataa gàca loo mèna tac co'se' ndyoodi's mèna, ndyoodi's mèna antub di's nate's no antub di's naxal', di's co' yende cón ntac. Asendli mèna nquedìi mèna mèn co' ngro xà'le' loo cón che'n xab izlyo' con mod ye'rsin' co' ndyub yo'f lezo' mèna par bere mèn co' ngro xà'le' loo cón che'n xab izlyo', tlo mèna, li mèna con' ye'rsin' tedib vez.  
\v 19 Asendli mèna. Mbez mèn ye'rsin'a loo mèn co' ngro xà'le' loo cón che'n xab izlyo' chele' mèna que tee no mèn ye'rsin'a, le' sya, càba que no mèna thìb yalnaban co' yende chó mèn cuee cà. Per yalgutyè'túb nac co' mbez mèna. Tac leque mèn ye'rsin'a nac xal thìb moz co' ndli yèe con' ye'rsin' co' ndli mbee ncà mèna. No ndli mèna anab con' zab. Tac thìb thìb mèn ye'rsin'a ndxàc moz loo con' zab co' ndyub yo'f lezo' mèna par li mèna con' zab.  
\v 20 Per, lìcpe' ba'i, nde niin thìb con' loo gu' cón che'n ryete mèn co' ngòole' loo cón che'n Tad Jesucrist co' mtelá' na' loo con' ryes, mèn co' mté'thle' cón che'n Tad Jesucrist: Nonque' gu' le' por mda' mèna cuent cón che'n Tad Jesucrist ngro xà'le' mèna loo con' zab co' nac cón che'n xab izlyo'. Chele' mèna bere bix yéc par yòo mèna loo ryethe con' ye'rsin'a tedib vez, no chele' mèna mda' lugar ñibe' con' ye'rsin' loo mèna tedib vez, ale más nazab tín' gàca no càba loo mèna yiloa.  
\v 21 Per nalle', por cón che'n con' ye'rsin' co' gàc loo mèna co'se' tyactìi mèna, más huen ngàca loo mèna thidteneque' ne'ngòode mèna loo cón che'n Tad Jesucrist par non mèn no ta' mèn cuent xá mod thìb lìte yòo mèn loo bé' leque gàca loo mèn co'se' ya nonle' mèn no nda'le' mèn cuent xá nac cón che'n Jesucrist no ale bere mèna, lá' mèna par ne'lide mèna con' co' mnibe' Diox loo mèna li mèna co' nac con' natú' co' mnibe' Diox par li mèn.  
\v 22 Per nase ndxàcle' no mdyaale' loo mèna xal nac di's co' nac thìb di's lìcpe' co' mbez mèn: Ale mbere mbac, nduhua mbac con' co' mberepe' lezo' mbac. Le' nguch co' diiz ngood co' lilleque' mbembìi, ale mbere ngood le'n ben ya's tedib vez, ne. Lìcque' nac di'sa, ¿lé'? 
\c 3  
\s1 Pedr ndlu' trè' xá mod gàc co'se' yi'th Tad Jesucrist. 
\p  
\v 1 Mèn huesen por cón che'n Tad Jesucrist, gu' co' anze'f nque' lezon ñèen, con cart ndxè' nac mbryop cart co' mque'en ye's loo gu'. Loo ryop cart co' mtel'en loo gu' ndlyazen li gu' xtùuz dib nzo yéc gu' no dib nzo lezo' gu' par ta' gu' cuent cón che'n di's co' ngòc di's co' mco'xen loo gu'.  
\v 2 Fte' lezo' gu' cón che'n di's co' mde'th mèn, mèn co' ngro xà' loo con' ye'rsin' co' nac cón che'n xab izlyo', mèn co' mde'th di's co' ndxab Diox póla. No fte' lezo' gu' cón che'n di's co' mtan' Tad Jesucrist di's par tyubdi's na' di'sa, Tad Jesucrist co' mtelá' na' loo con' ryes. Di'sa ngòc di's co' mblu' mèn co' ndxe' di's che'n Tad Jesucrist loo gu'. 
\p  
\v 3 Con' ndxè' nac co' ndlyazen xo'f ndeleque' lezo' gu' par tolo ta' gu' cuent cón che'n di'sa. Ndlyazen le' gu' nonque' le' le'n lult huiz no lult tiemp ndoore' lith no izlyo' ndxè' ryo xo'f mèn no tlo yo mèn co' tè'b no mèn co' xìis no cón che'n con' co' nac che'n Diox. No alithe que tee ban mèna xal nac mod co' ndryo' ndlyen' lezo' mèn no con' co' ndyub yo'f lezo' mèn co' nac con' ye'rsin' co' ndli mèna.  
\v 4 Ale, angnzi tee mèna nibdi's mèna. Gab mèna: ¿Máa cón che'n Jesucrist co' mcàbgòn Jesucrist le' Jesucrist yi'th, yoo? Tolo ñii mèna, ne: Anon nguth xudgool na' co' mban pólle'a, lomisque' ndxàca xal mtlo ngòca desde co'se' mblec Diox izlyo'.  
\v 5 Mèna tataa mbez tac indlya'ste mèna ta' mèna cuent co' huenleque' no indlya'ste mèna li mèna xtùuz le' desde tiemp más póla mdyoxcua'le' bé' no nziri'le' izlyo' co' mnibe' Diox ngòc yòo biiz co'se' mnibe' Diox dyoppe' nít co' ngure dib athu loo izlyo'. Diox ngue tèn izlyo' no ngue xèn' Diox izlyo' por cón che'n yuu co' ndli Diox ndlyàa loo izlyo' no por nít co' nzo loo izlyo'.  
\v 6 No ne' ne' indlya's mèna li mèna xtùuz no ta' mèna cuent le' izlyo' co' ngòc izlyo' gox tiempa, no ryethe con' co' ngure loo izlyo' mblyuxle' co'se' ngulàa yuuloo loo izlyo' tiempa co' ngòc tiemp che'n diluv.  
\v 7 Per bé' no izlyo' co' nziri' nalle', le'i nziri' par yeca no yola con quìi no con bèel co'se' ñibe' Diox yeca. Quìia no bèela tec izlyo' no bé' leque huiz no leque tiemp co'se' Diox tub rez cón che'n rye mèn ye'rsin' co' lyux leque tiempa. 
\p  
\v 8 Diox indlabte huiz no mbe' no lín' xal ndli na' co'se' noo noo ndli na' xtùuz cón che'n huiz no tiemp co' ndri'th loo na'. Por part che'n Diox, thìb huiz nac xal thìb mil lín'. No thìb mil lín' nac xal thìb huiz loo Diox.  
\v 9 Inacte le' Tad Jesucrist anze'f ndlyen' par yi'th Tad Jesucrist loo izlyo' tedib vez par gàc co' mcàbgòn Jesucrist li Jesucrist loo na' xal ndli ndxep mèn xtùuz. Ndxe'leque', ncha'la's Tad Jesucrist ñèe Tad Jesucrist mèn par ñee Tad Jesucrist ñeene' ché' nzore' ndxep mèn co' tyal yòo loo cón che'n Tad Jesucrist ndoore' yi'th Tad Jesucrist loo izlyo' tedib vez. Tad Jesucrist indlya'ste nec thìb mèn ryo xà' loo Diox co'se' ngolo nguth bél'yòo lad mèn. Ndxe'leque', lya's Tad Jesucrist lyàa yéc rye mèn loo Diox no lyàa lezo' rye mèn par tataa mod zye' mod ye'rsin' co' ndxàp mèn loo Diox no lyá' mèn loo con' ryes. 
\p  
\v 10 Per co'se' gàc huiz co'se' yi'th Tad Jesucrist, huiza gàc huiz co'se' indyóode mèna cón che'n huiza no co'se' inzi bedte mèna yi'th Tad Jesucrist no co'se' inzi queede lezo' mèna yi'th Tad Jesucrist loo izlyo' ndxè' tedib vez. Tad Jesucrist yi'th no ryo xo'f Tad Jesucrist loo mèn xal co'se' ndlyàa huan' liz mèn ndxáal yál' co'se' ne'ten'te mèn ndlyàa huan'. Tiempa, ryethe con' co' nzi'f loo bé' lyux no lith no. No leque tiempa yèn thìb ruid tín'. No ryethe con' co' nziri' loo izlyo' yol con quìi no con bèel par lyuxa. No tataa mod lyux no lith no rye loothe con' co' nzi'f loo bé' no co' nziri' loo izlyo'. 
\p  
\v 11 Chele' ryethe con'a, lìcque', tataa lyux no lith no, xalte mod ne' que tee ban ndac na' loo Diox xal mèn co', lìcque', ngro xà'le' loo cón che'n xab izlyo' no xal mèn co', lìcque', ndlique' cas loo cón che'n Diox. Naquinque' tataa que tee ban na', ¿lé'?  
\v 12 Gure bed gu' huiz co' gàc huiz co'se' li Diox ryethe con'a. Gurez gu' Diox par gàc ryethe con' co' nquin gàc ndoore' yi'th Jesucrist par yi'thgà Jesucrist loo izlyo' tedib vez. Huiza bé' lyux con quìi no con bèel. No ryethe con' co' nziri' loo izlyo' lyux no lith no no zyun' con quìi no con bèel.  
\v 13 Per part cón che'n na', na' nzi quee lezo' cue tedib bé' cub no tedib izlyo' cub co' mcàbgòn Diox loo na' li Diox par ban na' loo bé' cub no loo izlyo' cub. Loo bé' cuba no loo izlyo' cuba ryethe con' gàc nalì no nambìi no gàc ryethe con' con' ndac huiza.  
\v 14 Cona, ngue niin loo gu', mèn huesen por cón che'n Tad Jesucrist, gu' co' anze'f nque' lezon ñèen: Láth nzi bed gu' gàc ryethe con'a, gure li gu' co' nzote mod li gu' par hui' Diox loo gu' le' gu' nziri' nagàl lezo' loo Diox no nac gu' mèn co' nzi ban rye nda gu' no rye ndye'th gu' làth xtàa gu'. No gàc gu' mèn nambìi no mèn nalì co' indxàpte nec thìb xtol loo Diox.  
\v 15 Gòp gu' cuent no fte' lezo' gu' le' por ncha'la's Tad Crist na' loo mèn, con'a ndli par tolo lyá' taamas mèn loo con' ryes. Xalque' ngue niin loo gu' ndxè', taandxè' mque' Pab co' ndxàc hues na' co' anze'f nque' lezo' na' ñèe na' ye's loo gu' cón che'n con' ndxè'. Mque' Pab ye's loo gu' xal nac mod co' mbli Diox ngóc Pab no co' mblu' Diox loo Pab.  
\v 16 Loo ryethe cart co' nde teele' mtel' Pab loo gu', leque cón che'n con' ndxè' mque' Pab ye's loo gu' mastale' ndyac gu' no nden' gu' nagàn nac cart co' mque' Pab loo gu' par ta' gu' cuent cón ngue toodi's Pab loo gu'. Per mèn naxèn no mèn co' nau' loo no co' nau' yéc co' pente ndxela's, mèna xà'le' mod no tedib mod nden' no nda' mèna cuent cón che'n cart co' mque' Pab ye's loo mèn. Por cona, mbez mèna le' cart co' mque' Pab loo mèna, tedib mod mque' Pab ye's loo mèna. Tataaguè' ngue li mèna con taamas ye's co' nac xti's Diox. Ale, tataa ndli mèna par leque mèna telux mèna loo Diox thidtene. 
\p  
\v 17 Por cona, ngue niin loo gu', mèn huesen por cón che'n Tad Jesucrist, gu' co' nque' lezon ñèen: Com le' gu' nonle' con' ndxè' nalle'que', ¿lé'?, leque gu' fquenap gu' par ne'cuee càde mèn gu' par quedìi mèn gu', mèn co' nac mèn ye'rsin', no tataa mod tyoo xà' lezo' gu' loo cón che'n Diox co' mbli nèe gu' gu'.  
\v 18 Más huen ndlyazen le' gu' tolo té'th no tolo ta' gu' cuent cón che'n Tad Jesucrist co' mtelá' na' loo con' ryes. No tolo thidte gàc gu' par tolo que' lezo' gu' Tad Jesucrist. Ndlyazen tolo gàc con' roo no con' xèn loo Tad Jesucrist nalle' no thidteneque'. Taandxè' gàca, ndee gu'.