\id 2CO  
\h 2 CORINTIOS 
\toc1 Mbryop Cart Co' Mque' Pab Ye's Loo Mèn Co' Nqueltàa Loo Cón Che'n Diox Le'n Ciuda Corint 
\toc2 2 CORINTIOS 
\toc3 2 Co. 
\mt1 Mbryop Cart Co' Mque' Pab Ye's Loo Mèn Co' Nqueltàa Loo Cón Che'n Diox Le'n Ciuda Corint 
\c 1  
\s1 Pab mque' ye's loo mèn co' nqueltàa loo cón che'n Diox le'n ciuda Corint. 
\p  
\v 1 Daa, Pab, nac thìb mbi' co' mtel' Jesucrist par ndxen di's che'n Jesucrist xal gunee lezo' Diox. Ngue que'en ye's co' nac cart ndxè' loo gu' co' ndxela's loo Diox por cón che'n Crist co' nqueltàa le'n templ le'n ciuda Corint no loo mèn co' ndxela's loo Diox por cón che'n Jesucrist dib anax par ned le'n yèezya' ned làaz mèn acay. Ryete gu' nac che'npe' Diox. Leque tiempa, ryop nu' Timote co' nzo non trè' ngue nii nu' Diox loo ryete gu'.  
\v 2 Ndlyazen le' Diox xud na' no Tad Jesucrist na' tolo li anggàc con' ndac loo gu'. No ndlyazen le' Diox xud na' no Tad Jesucrist na' tolo li yo nagàl lezo' gu' loo Diox no loo mèn no cue ban gu' rye nda gu' no rye ndye'th gu' làth hues xtàa gu'. 
\s1 Trè' ndlu' xá mod mxactìi Pab. 
\p  
\v 3 Por cona, ndlyazen le' na' gab loo mèn: Anze'f ndac no natú' nac Diox no Diox roo Diox xèn nac Diox. Diox co' nac xudpe' Tad Jesucrist na', leque Dioxa nac xud na' co' ndlyat lezo' ñèe mèn axta plóthe. No ntegán Diox lezo' mèn. No ndli Diox par ndyac lezo' mèn axta plóthe.  
\v 4 Diox ntegán lezo' na' loo ryethe con' co' ndli par nxi lezo' na', con' co' ndxàc loo na' par leque na', ne, tegán lezo' chol mèn co' nzi yàc yaltìi loo xalque' ntegán Diox lezo' na'.  
\v 5 Texal ndyactìi na' huax con' por cón che'n Crist, lomisque' mod, ntegán Crist lezo' na' axta plóthe, ne, loo ryethe yaltìi co' ndxàc loo na'.  
\v 6 Por cona, co'se' daa ndyactìi chol con', ndxàc yaltìia loon par gàca loo gu' le' Diox tegán lezo' gu' no tolo lyath no Diox gu' co'se' ndlyá' ndlyá' guth mèn gu'. No co'se' Diox ntegán lezon, ndxàca loon par tolo tegán Diox lezo' gu' co'se' ndlyá' ndlyá' guth mèn gu'. Co'se' tataa ndxàc loo gu', sya, ngue xec yèe gu' no ncha'la's gu' loo leque yaltìi co' ndxàc loona.  
\v 7 Leque daa mbli nèen loo co' ndub quee lezon cón che'n gu' tac texal ndyactìi no gu' daa, no ngue xec yèe gu' cón che'n yaltìi co' ndxàc loo gu', tataa gàca loo gu' le' Diox tegánque' lezo' gu'. 
\p  
\v 8 Mèn huesen, ndlyazen le' gu' non no ta' gu' cuent cón che'n huax yaltìi co' ngòc loon láth co'se' mque tee'en le'n rye yèezya' co' nac làaz mèn asia. Casque' mblyá' daa loo yalguth tya tant thìb con' mbli no mèn daa axta mblin cuent ¿ché' xec daa tolo que tee'en o ché' tya ñeei loon?  
\v 9 Lìcpe' ba'i, mden'en le'n lezon no ndxaben loo lezon: Nase guth mèn daa. Ngòc con'a loon par ne'ngàpten yalxla's lyá' daa por cón che'npe'en. Ndxe'leque', ngòca par gàpen yalxla's loo Diox co' ngo xban mèn làth mèn nguth le' Diox lá' daa chele' Diox nee lezo' li Diox con'a loon.  
\v 10 Diox mtelá' daa la's ya' mèn co'se' yamerle' nguthxù' mèn daa. No axta nalle' tatabe' ngue lyath no Diox daa par ne'guthte mèn daa co'te' nzon ndxè'. No loo Dioxa ndxàpen yalxla's le' Diox tolo lá' daa no tolo lyath no Diox daa par ne'guthte mèn daa no ndub queeque' lezon le' Diox telá' daa ned ga que tee'en.  
\v 11 Tataaque' gàca loon chele' gu' lyath no daa por mbez gu' Diox por daa par yende cón li no mèn daa. Por cón che'n huax mèn co' cuez no gu' Diox por daa par tolo lyá' daa loo yalguth co' ndlya's mèn li no mèn daa, huax mèn gab: Diox quix non U', Diox, por con' ndac co' ngòc loo prob Pab. 
\s1 Trè' ndlu' chonon mblyen' Pab. Ne'ngagàde Pab ciuda Corint. 
\p  
\v 12 Nzo thìb con' co' ndli par ndan gust lezon no par ndyac lezon. Loo con' ndxè', nden'en le'n lezon cón che'n con' ngue lin, ndyaquen, huenque' ngue lin. Tac leque daa ngue ta' cuent no non daa le'n lezon le' daa ngue tee ban ndac loo Diox làth mèn loo izlyo' por mblá'en ryethe con' co' nac cón che'n xab izlyo'. No inquedìiden loo hues xtàan. Más de cona, masre' ndlina làth gu'. Ingue tee bante daa làth mèn xal mèn co' nde'f di's ndxác. Ndxe'leque', Diox ndli le' daa ngue tee ban ndac loo gu' no loo taamas mèn loo izlyo'.  
\v 13 Di's co' ngue que'en ye's loo gu' co' nac cart ndxè', ante ntel'en di's loo gu' co' inagànte nac par lab gu' par gòn gu' no ta' gu' cuent cón nee di's ndxè'. No ndub quee lezon yaa'd di's ndxè' le'n quèe yéc gu', no ten' gu' cón nee di's ndxè' co' huen huen,  
\v 14 xal mden' gu' no mda' gu' cuent mase ndxep cón chenen thìb mod no tedib mod. Tac co'se' gàc huiz co' yi'th Tad Jesús na', anze'f tyac lezo' gu' huiza xal nden'en ndyac lezon por cón che'n gu' nalle. 
\p  
\v 15 No por yalxla's co' ndxàpen loo gu' xal mque'en ye's loo cart co' mtel'en loo gu', niin con' ndxè' loo gu': Mblin xtùuz no mnibe'en loo lezon ner galen loo gu' par gal neen máa gu' par nedrè' par tataa mod ndac lezo' gu' mbal neen máa gu' chop vez.  
\v 16 Lìcque', mblin xtùuz gal too naan gu' co'se' mxenen ned nguan par ned yèezya' co' nac làaz mèn macedon. No co'se' biin le'n yèezya' co' nac làaz mèn macedon, mblyazen beren, gal neen máa gu' tedib vez láth ndoon ned par làaz mèn jude. No lomisque', mblyazen ya tee ned gu' daa ndxep co'se' biin loo gu' par ga que tee'en par ned le'n yèezya' che'n làaz mèn jude. Tataa nac co' mblyazen lin mastale' ne'ngàcte gan nglina.  
\v 17 Co'se' mnibe'en lezon gal neen máa gu' par nedrè', ¿ché' mbli gu' cuent ante guniina loo gu' no angmblin xtùuz tataa lin, cà'? O ¿ché' ndli gu' xtùuz le' daa ngo xnee con' ndlin xal ngo xnee mèn co' nac mèn co' be' ndli cas loo cón che'n xab izlyo' co'se' mbez mèna li mèna thìb con' no yiloa ne'lide mèna con'a, cà'? Yende xàa.  
\v 18 Per Diox co' ndlique' co' mcàbgòn Diox li Diox loo mèn, Diox non no nda' Diox cuent, lìcque', liquen co' mbezen loo gu'. Ne'quedìiden mèn.  
\v 19 Cón che'n Jesucrist co' nac xgan' Diox mde'th nu' no mblo nu' yalbàn loo gu', co' nee di's, yon nu' co' nac Silvan no Timote no daa, Pab. Thidtene ne'ntoxcua'de Tad Jesucrist yalgutyè'. Ndxe'leque', lìcpe' ngòc di's co' gunii Tad Jesucrist thidtene.  
\v 20 Tac por cón che'n Jesucrist ndxàc ryethe con' co' mcàbgòn Diox li Diox. Por cona, co'se' mbez na' cón che'n Diox loo mèn le' Diox nac thìb Diox roo Diox xèn, mbez na' tataaque' gàca por cón che'n Tad Jesucrist.  
\v 21 Leque yub Diox nac xa' co' ndli par leque nu' ndli nèe nu' loo cón che'n Crist, no par leque gu' ndli nèe gu', ne, loo cón che'n Crist. No leque yub Diox nac xa' co' ndli le' na' ngro xà' loo cón che'n xab izlyo' par ngòc na' che'npe' Diox.  
\v 22 Por cón che'n Xpii Natú' che'n Diox, Diox mblec xà' na' loo cón che'n xab izlyo' xal ndli mèn co'se' nque' mèn thìb sell loo thìb xque's par gàc nèe xque'sa. Tataa mbli Diox loo na' co'se' mblàa Diox Xpii Natú' loo na' par yòo Xpii Natú' loo na' no ñibe' Xpii Natú' loo na'. Xpii Natú' ndlu' loo na' no por cón che'n Xpii Natú' non na', lìcque', ta' Diox con' co' mcàbgòn Diox ta' Diox loo na' yiloa co' gàc che'npe' na'. 
\p  
\v 23 Per chele' daa axta nalle' tarte gal nee máa gu' par ned ciuda Corint ndxè' xal mblin xtùuza, mèn ciuda Corint, Diox nonque' no naneeque' Diox leque daa mbli par ne'gal needen máa gu' por cón che'n gu' par ne'ngaclooden loo gu' no par ne'ngàc nayi'den loo gu'. No chele'i ilìcte nac, ña'ben loo Diox más huen guth Diox daa.  
\v 24 Inacte le' daa ngue nibe' loo gu' xal nac mod co' ndxàal yila's gu' loo Crist. Ndxe'leque', daa ngue xo'f zin' co' mxo'f zin' Diox loon par lyath non gu' par tolo tyac lezo' gu'. Tac, lìcpe' ba'i, leque gu' ngue li nèe gu' loo con' co' ndxela's gu' loo Diox, ndyaquen. 
\c 2  
\p  
\v 1 Con' ndxè' nac con' co' mnibe'en loo lezon. Mblin xtùuz más huen ya ne'bereden ga neen máa gu' par ne'tolode xi lezo' gu'.  
\v 2 Tac chele' daa tolo texi lezo' gu', ¿chó mèn gác li par tyac lezon, sya? Gu', no maste, nac mèn co' ndlin cuent ntegán lezon co'te' nzon ndxè'. No chele' daa texi lezo' gu' arid, ¿ché' nzo mod leque gu' li par tyac lezon sya, cà'? Yende moda, ¿lé'?  
\v 3 Cona, tataa mque'en ye's cón che'n con' ndxè' loo gu' loo ner cart co' mtel'en loo gu' tac indlyasten galen loo gu' par ne'xi tín'te lezon por cón che'n gu', gu' co' ndxàal li par tyac tín' lezon. No daa ngobe' no ndxàpen yalxla's loo ryete gu' chele' daa tyac lezo' co'se' gal neen máa gu' par nedrè', gu', ne, tyac lezo' co'se' ñee gu' zin daa loo gu'.  
\v 4 Anze'f nden'en co' mblin no anze'f nxi lezon axta mbínen cón che'n ner cart co' mque'en ye's loo gu'a. Per cart co' mque'en ye's loo gu'a, ne'ntel'ten carta loo gu' par mtexin lezo' gu'. Ndxe'leque', mque'en carta loo gu' par non gu' no par ta' gu' cuent le' daa, lìcque', nque'que' lezo' ñèen ryete gu' axta plóthe. 
\s1 Pab ngue ta' cuent loo mèn teri'th tecan' mèn xquin no xtol xtàa mèn co' nac con' ye'rsin' co' ndli mèn loo xtàa mèn. 
\p  
\v 5 Per chele' chó thìb gu' co' nzo làth gu' mbli mzyál' di's no mzyál' cuent par ndxàc yalnaxi loon, ingue cua'nte mbi'a di's no cuent par ante daa nxi lezo'. Ndxe'leque', ncua'n mbi'a di's no cuent par nxi lezo' gu', ne. Niin le' mbi' mbli par nxi lezo' ndxep gu' par ne'gabten le' gu' inthyonte no inxide lezo' gu' por con' co' mbli mbi'a. Tataa niin par nden' gu' arid le'n lezo' gu' por cón che'n con' co' ndxàc làth gu' no par ne'tetìiden gu' arid cón che'n con' co' ngòc por cón che'n mbi'a làth gu'.  
\v 6 Ya ngolole' no ya guneele' con' co' ngòc mod co' mtetìi gu' mbi'a co'se' mqueltàa gu': No con thidte di's mnibe' gu' gàca loo mbi' par mxactìi mbi', mbi' co' ndxàc hues xtàa gu' co' mbli con' ye'rsin'a làth gu'. Na nii loo gu': Ne'tolode tetìi gu' mbi'.  
\v 7 Per nalle', más huen fteri'th ftecan' gu' con' co' nzo lezo' gu' ñèe gu' mbi' co' nac hues xtàa gu'a. Ndxe'leque', más huen fcua'n gu' mod tegán gu' lezo' mbi'. Tac ne'stolque' ne'tolode xec mbi' loo con' ngue li no gu' mbi', tant nxi yéc mbi' no tant nxi lezo' mbi' loo con' mbli mbi'. No yiloa le'le' tyub yéc mbi' ryo xà' mbi' làth gu' thidtene.  
\v 8 Cona, ngue niin loo gu': Bli gu' favor. Ndlyazen bere gu', cua'n gu' mod lu' gu' loo mbi' le' gu', lìcque', nque'que' lezo' ñèe gu' mbi'.  
\v 9 Daa mque'le' thìb cart loo gu' ndoore' cón che'n co' ndyac gu' ba'. Mque'en ner carta loo gu' par ñeen ñeene' ché', lìcque', tyubdi's gu' loo ryethe con' co' ñibe' Diox loon par lu'en loo gu'.  
\v 10 Nalle' loo mèn co' gu' teri'th tecan' xèn xyàn co' nzo lezo' gu' co'se' ñèe gu' mèn por cón che'n chol con' mbli no mèn gu', daa, ne, teri'th tecan' xèn xyàn co' nzo lezon cón che'n con' co' mbli no mèn daa. Tac chele' daa mteri'th mtecanen xèn xyàn co' ngòo lezon co' mbli no mèn daa por ndlyat lezon ñèen gu', mteri'then mtecanen xèn xyàna loo Crist.  
\v 11 Tataa li na' par ne'lide Mebizya gan loo na' nec thìb mod no nec tedib mod tac na' naneeque' co' huen huen xá nac mañ che'n Mebizya par li Mebizya gan loo mèn. 
\s1 Imbe see teede lezo' Pab le'n ciuda Tro. 
\p  
\v 12 Tan cuent loo gu' loo cart ndxè'. Co'se' mzin daa ciuda Tro, ngua tethen no ngua lon yalbàn cón che'n di's ndac che'n Crist. Mxaquen mxal' Diox ned no mxal' Diox yó' loon par ngue lin zin' co' mxo'f zin' Tad loon cón che'n Tad.  
\v 13 Per láth co'se' ngon le'n ciuda Tro, ne'mbe see teede lezon no yende chó gust ngon le'n ciuda Tro tac ne'ngzál'ten Tit co' ndxàc hues na' por cón che'n Crist tya. Ale por cona, mbli guniin Diox loo mèn co' ngòo loo cón che'n Diox por cón che'n Crist le'n ciuda Tro. Mxenen ned. Nguan par ned le'n yèezya' che'n làaz mèn macedon. 
\s1 Pab ndyoodi's cón che'n mèn co' mbli gan ngro xà' loo cón che'n xab izlyo' par ngòc mèna che'npe' Crist. 
\p  
\v 14 Per Diox quix Diox tac Diox nzo noque' nu'. Ndli nu' gan nxo'f zin' nu' zin' co' nac zin' cón che'n Crist Jesús. No ndli Diox par nda' mèn cuent cón che'n di's ndac co'se' ngo nu' yalbàn axta nden' mèn nac cón che'n di's ndac che'n Diox xal thìb xla' co' ndrye's loo mbii co' anze'f nix ndlya'. Tataa ncàba loo cón che'n di's ndac rye lugar co'te' ngo nu' yalbàn cón che'n di's ndac.  
\v 15 Co'se' nde'th nu' no ngo nu' yalbàn cón che'n Crist pál ned nzo mèn, ndxòo lezo' Diox cón che'n con' co' ngue li nu' xal thìb zen yal' co' ngo Crist loo Diox, que naca tyal mèn gòn mèna di's par lyá' mèna loo con' ryes, que naca ne'tyalte mèna gòn mèna di's par càba loo mèna lyux mèna.  
\v 16 Loo ndxep mèn nac nu' mèn co' nda' cuent cón che'n con' co' càb ryo xà' mèn loo Diox thidtene, co' nee di's, lyux mèn, ndyac mèn. Le' loo taamas mèn na, nac nu' mèn co' nda' cuent cón che'n con' co' càb yòo ban no mèn Diox thidtene, ndyac mèn. Yende chó mèn nzo co' gác no co' xec thidte mèna li zin' ndxè'. Ante ndxác nu' tolo li nu' zin' ndxè' co'se' tolo ndlyath no Diox nu'.  
\v 17 Ingue lide nu' zin' cón che'n di's ndac co' nac che'n Diox par li nu' gan co' hua nu' xal ndli huax mèn co' nse' loo di's ndac che'n Diox par li mèna gan huax tmi. Ndxe'leque', co'se' ngo nu' yalbàn cón che'n di's ndac che'n Diox loo mèn, dib nzo yéc nu' no dib nzo lezo' nu' ngo nu' yalbàn. Ingode nu' yalbàn xal mèn co' ndoo guyith lezo'. Nden' nu', lìcque', mtel' Diox nu' no non nu' le' loo Diox ngo nu' yalbàn loo mèn. No non nu' nac nu' che'npe' Crist. Yende mod li nu' con' co' neete lezo' nu' li nu'. 
\c 3  
\s1 Trè' ndlu' Pab le' di's ndac che'n Diox nac thìb conveñ cub. 
\p  
\v 1 Co'se' ndlab gu' di's co' ngue bezen loo gu' loo cart co' mtel'en loo gu' ndxè', ¿ché' nden' gu' no ché' ndyac gu' beren, tlon, tyoodizen no tan cuent con' ndac cón chenen loo gu' tedib vez, cà'? o ¿Ché' ndyac gu' naquin que' tedib mèn ye's co' nac cart par ta' mèna cuent ndac cón chenen loo gu', cà'? o ¿Ché' ndyac gu' ndxàal ña'ben loo gu' que' gu' ye's cón che'n nu' co' hue' nu' loo taamas mèn par tataa mod ta' ndac gu' cuent cón che'n nu' loo mèn xal ndli ndxep mèn, cà'? Yende xàa.  
\v 2 Nac yub gu' xal thìb cart co' mque' Crist ye's loo mèn co' tan càa mèn. Non mèn cón chenen por cón che'n gu' xal non mèn cón che'n tedib mèn por cón che'n thìb cart co' mque' mèn loo xtàa mèn. Inquinte daa chol cart co' ta' cuent cón chenen. Ante, ndyaquen, nquin non mèn cón che'n nu' por cón che'n gu'. Con'a no maste nquin nu'. Lezon no ngudloon nac gu' loon tant ndyac non gu' axta ne' ne' yathlazen cón che'n gu'. Non mèn no nanee mèn cón chenen xal nac daa por cón che'n con' co' ndxàc loo gu' por cón che'n daa tac non mèn le' gu' mzye' mod co' nque tee ban gu' loo Diox thìb cua'a.  
\v 3 Mèn ciuda Corint co' ndxàc huesen por cón che'n Crist, tetaquen thìb di's cón che'n na' no cón che'n Crist loo gu', co' nee di's, gu' nac xal thìb cart co' mque' leque yub Crist loo taamas mèn no mda' Crist lugar huen carta loo mèna, co' nee di's, gu' ndlu' xal nac daa no xal nac Crist loo mèn. Cón che'n con' ndxè' inacte xal thìb cart co' mque' mèn ye's con tint. Ndxe'leque', gu' mzye' mod co' mque tee ban gu' thìb cua'a por cón che'n Xpii Natú' che'n Diox, co' thidtene naban, co' mbli thìb zin' loo gu'. Con' ndxè' ndlu' gu' loo mèn xal ndlu' thìb cart con' loo mèn. Ne'ngàcte con' ndxè' xal ngòc di's co' mque' Diox loo quèe co' mtoxcua' Moisés póla, co' mcàaya' mèn nación Israel. Ndxe'leque', cón che'n zin' co' mbli Xpii Natú' loo gu'a, ngüaa'd le'n lezo' mèn no ngüaa'd le'n xtùuz mèn, ne, par ta' mèn cuent xá nac cón che'n Diox no xá nac daa por cón che'n gu'. 
\p  
\v 4 Por cón che'n Crist, anze'f thìb yalxla's ndxàpen loo Diox no ndxelazen loo Diox le' Diox lyath no daa par xo'f zin' ndaquen zin' co' mxo'f zin' Diox loon par lin co' nac cón che'n di's ndac che'n Diox.  
\v 5 Inacte por cón che'n yub nu' ndli par ndxác nu' ndli nu' ndxep con' co' ndxácte nu' ndli nu' cón che'n di's ndac co' nac cón che'n Diox. Ndxe'leque', con' co' ndxácte daa ndlin co' nac cón che'n di's ndac che'n Diox, ndlina ante por cón che'npe' Diox no ndlina xalte ndlyath no Diox daa.  
\v 6 Yub Diox nac xa' co' mbli loon par xo'f zin' ndaquen thìb zin' cón che'n conveñ cub co' mbli Diox loo mèn co' nac cón che'n di's ndac che'n Diox. Ley co' mnibe' Diox loo Moisés par mxo'f Moisés leya loo mèn nación Israel, leya mnibe' le' mèn tyubdi's loo ryethe con' ñibe' leya loo mèn. No mèn co' indyubdi's ndacte loo ryethe con' mnibe' leya loo mèna, loo mèna càb quexù' Diox loo mèna par ryo xà' mèna loo Diox thidtene yiloa. Xpii Natú' nac xa' co' ñibe' loo mèn co' nzo loo conveñ cub co' mbli Diox loo mèn. Mèn co' nzo loo conveñ cub, mèna ban no Diox thidtene yiloa. 
\p  
\v 7 Cón che'n di's co' ngòc ley co' mxo'f Moisés loo mèn nación Israel póla, ner mque' leque yub Diox di's co' ngòc nerleque' di's co' ndxab Diox cón che'n leya loo quèe. Láth ngo no Moisés Diox loo yii Sinaí tiempa, mquée xnìi che'npe' Diox loo Moisés. Texal ngulàa tùub Moisés loo yii Sinaí loo Diox loo mèn nación Israel, ne'nxecte mèn nación Israel mbui' mèn loo Moisés tant mquée xnìi che'npe' Diox loo Moisés. Per mastale' tataa mquée xnìi tín' loo Moisés le'n huiza, xnìia xèegà xèegà mbyu'. No xèegà xèegà mdyon' xnìi co' mquée loo Moisés. No mastale' cón che'n co'se' mtlo mxo'f Moisés leya loo mèn nación Israel ngòc thìb con' roo no thìb con' xèn axta mquée xnìi che'npe' Diox loo Moisés, con' co' ncàb loo mèn co' ne'tyalte tyubdi's ndac loo leya, mzib quìi Diox mèna par tyoo xà' mèna loo Diox thidtene yiloa.  
\v 8 Ale'que' ne' gàc más con' roo con' xèn cón che'n conveñ cub co' nac di's ndac che'n Diox loo mèn co'se' ñibe' Diox loo mèn por cón che'n Xpii Natú' leque con' roo con' xèn cón che'n ley co' mxo'f Moisés loo mèn póla. Tataa ndxàca, ¿lé'?  
\v 9 Cona nee di's, chele' ley co' mxo'f Moisés loo mèn mcàb loo mèna le' Diox mquexù' mèn tac ne'ndalte mèn ndubdi's ndac mèn loo Diox xal ngòc yalnibe' che'n leya, pues chele' leya ngòc thìb con' roo con' xèn loo mèna, ale'que' ne' gàc con' roo con' xèn di's ndac che'n Diox. Tac por cona mbli Diox le' na' co' ndxela's loo Crist nac mèn nalì no mèn nambìi loo Diox. No mdyal Diox ngòo na' loo cón che'n Diox por cón che'n di's ndac.  
\v 10 Mastale' ngòc con' roo con' xèn loo mèn por cón che'n ley co' mxo'f Moisés loo mèn, no ngòc leya thìb con' roo con' xèn tiempa, per nalle' pà ta' cón che'n leya con conveñ cub co' nac mod cub co' ñibe' Diox loo mèn nalle', ¿lé'?  
\v 11 Cona, ngue niin loo gu', mèn ciuda Corint: Chele' ley co' mxo'f Moisés loo mèn, co' ngòc thìb ley co' mnibe' loo mèn ndxepte tiemp, ngòc thìb con' roo con' xèn, ale'que' más conveñ cub co' ñibe' loo mèn thidtene ne' gàc más con' roo con' xèn, ¿lé'? 
\p  
\v 12 No nalle' con dibaxla's ndyoodiz non mèn cón che'n conveñ cub co' nac di's ndac che'n Diox. Tac ndub quee lezon cón che'n con' roo con' xèn co' gàc loon por cón che'n conveñ cuba.  
\v 13 Indxàcta loon xal ngòca loo Moisés co'se' mtau' Moisés loo Moisés con thìb le' vel par ne'hui'de mèn nación Israel loo Moisés. Tataa mbli Moisés tiempa par ne'hui'de mèn nación Israel xá mod xèegà mdyon' xnìi no mbyu' xnìi co' mquée loo Moisés co' ne' ne' nxec mèn nghui' mèn loo Moisés tiempa.  
\v 14 Per ngòc mèn nación Israela mèn co' nau' yéc nau' loo. Ne'nda'de mèn nación Israel cuent. No ne'ngaa'dte di'sa le'n lezo' mèn nación Israel tiempa. Tac axta huiza no axta huiz nalze co'se' ndlab mèn nación Israel di's co' ndub loo libr co' nac xti's Diox co' nac testamentgool, tatabe' nau' loo mèna no nau' yéc mèna. Indxònte mèna di'sa. Per co'se' yila's mèn nación Israel loo Crist, axta syare' tyub xnìi yéc mèna no tyub xnìi lezo' mèna loo cón che'n Diox par ta' mèna cuent cón nee di's, di's co' ndub loo libr co' nac xti's Diox co' nac testamentgool.  
\v 15 Axta huiza no axta huiz nalze co'se' ndlab mèn nación Israel co' nac di's che'n ley co' mxo'f Moisés loo mèna, tatabe' nau' loo nau' yéc mèna xal thìb con' co' nau' thìb le' lar' loo par ne'yaa'dte di'sa le'n lezo' mèn co' nac mèn nación Israel.  
\v 16 Per co'se' tlo zye' xtùuz che'n chol mèn par yòo mèna loo cón che'n Diox por cón che'n Crist, que nac mèna mèn nación Israel, que nac mèna mèn co' inacte mèn nación Israel, axta syare' tyub xnìi yéc mèn no tyub xnìi lezo' mèn loo cón che'n Diox par ta' mèna cuent cón che'n xti's Diox no cón che'n Diox.  
\v 17 Yub Diox nac Xpii Natú' no loo mèn co'te' nzo Xpii Natú' che'n Diox, loo mèna yende cón cuee no yende cón nca' loo con' co' nac cón che'n Crist.  
\v 18 Per ryete na' co' ndxela's loo cón che'n Crist, nduble' xnìi yéc na' no nduble' xnìi lezo' na' loo cón che'n Diox, co' nee di's, inacte na' xal mèn co' nau' rloo con thìb le' lar'. No ndxàca loo na' co'se' hui' mèn loo na', nden' mèna ngue hui' mèn loo Crist xal ngüi' mèn loo thìb spej. Tataa ndxàca tac ndyac na' ngue hui' na' loo Crist láth ngue lab na' xti's Diox co' ndlu' cón che'n Crist loo na' xal ñaa loo na' co'se' ngüi' na' loo thìb spej. Làth xtau'a, nzye' mod co' nque tee ban na' par xèegà xèegà que tee ban na' xal nac Crist no tataa mod xèegà xèegà ndxàc na' xal nac Crist. Con' ndxè' ndxàc loo na' por cón che'n Diox co' nac thìb Xpii. 
\c 4  
\p  
\v 1 Cona, ngue niin loo gu': Thidtene indyoo xà'de lezon loo zin' co' mxo'f Diox loon ndxè'. Tac por anze'f mblyat lezo' Diox gunèe Diox daa, mxo'f zin' Diox zin' ndxè' loon par nxo'f zin'en zin' ndxè' loo Diox.  
\v 2 Part cón chenen, mblá'len ryethe con' co' xexte ndli mèn co' ncàb nthyon mèn chele' chol taamas mèn ñèe ngue tee lin con'a. Ne' ne' inquedìin chol mèn xal nac mod co' ndxác daa ndlin loo cón che'n Crist. Ne' ne' indlu'en loo mèn cón che'n di's co' ndub loo libr co' nac xti's Diox le' di'sa nac xà'le' di's no xà'guè' cuent co' ndlu' loo libr co' nac xti's Diox. Ndxe'leque', loo Diox ndlu'en ante con' co' nac con' lìcpe' co' ndub loo libr co' nac xti's Diox cón che'n Diox loo mèn. Tataa mod ta' mèn cuent no ten' mèn le'n lezo' mèn lìcque' nac con' co' ndlu'en loo mèn cón che'n Diox ned ngue tee'en.  
\v 3 Chele' di's co' nac cón che'n di's ndac co' nda' cuent no co' ndlu' cón che'n Crist, co' ndethen no co' ngon yalbàn loo mèn, indxaa'd ndacte yéc mèn no lezo' mèn, ndxàca tataa loo mèna tac nau' yéc no nau' loo mèn, mèn co' nzi tee huan loo Diox, mèn co' co' too Diox loo Diox yiloa.  
\v 4 Per com le' mèna indxela'ste loo Crist, ¿lé'?, Mebizya co' nac xal thìb diox che'n mèn loo izlyo' ndxè' le'n ndxep tiemp co' nzi ban mèn loo izlyo' ndxè', Mebizya mtau' loo no mtau' yéc no mtau' Mebizya lezo' mèn co' ne'ndalte ngala's. Tataa mod mbli Mebizya par ne'tyubte xnìi yéc mèn no par ne'tyubte xnìi lezo' mèn loo cón che'n Diox par ne'gònte mèna no ne'ta'de mèna cuent cón che'n di's ndac co' nac xal xnìi co' ntenìi yéc mèn no co' ntenìi lezo' mèn loo cón che'n Diox par non mèn no ta' mèn cuent cón che'n con' roo con' xèn che'n Crist co' nac xalque' nac Diox, Diox co' indxú'de loo mèn.  
\v 5 Co'se' ngo nu' yalbàn, ingode nu' yalbàn cón che'n nu'. Ndxe'leque', ngo nu' yalbàn cón che'npe' Crist Jesús le' Crist Jesús nac Tad co' ñibe' loo ryethe con'. Le' cón che'n nu' na, nac nu' xal thìb moz loo gu' tac nu' nac moz che'n Jesús co' anze'f nque' lezo' Jesús ñèe Jesús.  
\v 6 Co'se' mblec Diox izlyo' no co'se' mxèn' Diox izlyo', Diox mnibe': Yo xnìi co' tenìi loo yal'cuau loo izlyo'. No, chàa, ngòca. Tataa ndxàca loo na' nalle', ne. Leque yub Diox nac xa' co' mbli par mdyub xnìi yéc na'. No mbli Diox par mdyub xnìi lezo' na' loo cón che'n Diox par tataa mod gác na' ta' na' cuent cón che'n con' roo con' xèn che'n Diox xalque' mblu' Jesucrist cón che'n con' roo con' xèn che'n Diox loo na'. 
\s1 Trè' ndlu' cón che'n cón nee di's ndxàp mèn yalxla's loo Crist no loo cón che'n Crist. 
\p  
\v 7 Per nalle', tetaquen thìb di's loo gu' par ta' gu' cuent no par non gu' cón che'n di's co' nde niin loo gu' ndxè': Con' ndac co' nac cón che'n Diox co' ndxàp na' por cón che'n Crist, le'i nac xal thìb tesor co' axta arid náp ntac co' nzosua' le'n thìb yàat yòo. Loo cón che'n tesora nac na' xal yàat yòo co'te' ndxòosua' tesor par non mèn con' roo con' xèn co' ndxàc loo na' inacte por cón che'npe' na'. Ndxe'leque', le'i ndxàc loo na' por cón che'n con' roo con' xèn co' nzo la's nii Diox no co' nzo la's ya' Diox.  
\v 8 Por cona, ngue niin loo gu': Mastale' rye ned co'te' ngue que tee'en nzoque' con' co' nca' loon loo cón che'n Crist no ndxàc ngòc nguàal con' loon, per inpor cona'de ndxetac lezon. Ndoo xal'que' ned ndoo xal'que' yó' loon. Chop ndxàc lezon huax vez loo con' co' ndxàal lin. Per ndxe'leque', thidtene ne'gabten loo lezon lá'en zin'. Per ndxe'leque', ndub queeque' lezon toloque' que tee xo'f zin'en zin' loo cón che'n Diox.  
\v 9 Mastale' ndub ngu's mèn daa, Diox ne'nglá'ya'de daa. Mastale' mtetìi mèn daa axta plóthe, mbli mèna cuent nguth daa. Per ne'nguthte mèna daa.  
\v 10 Loo zin' co' nxo'f zin'en loo cón che'n Crist, atate huiz ndri'then loo yalguth. No ndyactìin xalque' ngòca loo Jesús co'se' mque' mèn Jesús loo cruz. Co'se' tataa ndxàca loon, ngue lu'en loo mèn le' Jesús ndlyath no daa par ban daa xalque' mque tee ban Jesús làth mèn, ne.  
\v 11 Per láth be' ngue tee banen loo izlyo' ndxè', nzoque' ryes loon ryete huiz par guth mèn daa por cón che'n Jesús. Por con' co' nde teele' ndxàc loon, ndxú' loo mèn no nda' mèn cuent le' Crist ngue tee noque' daa por mod co' ngue tee'en loo zin' co' nxo'f zin'en loo cón che'n Crist.  
\v 12 Cona, ndyaquen thìb mod no tedib mod ne'lyá'de daa loo yalguth por cón che'n zin' co' nxo'f zin'en cón che'n Jesús. Per part cón che'n gu', ndxe'leque', por cón che'n ryete con' ndyactìin ncàba loo gu' le' gu' ngue tee ban xalque' ñibe' Diox loo gu'. 
\p  
\v 13 Thidte mod ndxelazen loo Diox xal ngola's mèn co' mque' ye's co' nac libr che'n Salmos co' nac xti's Diox xal mbez di's co' ndub loo libr che'n Salmos: 
\pi1 Por ngolazen, cona ndyoodizen cón che'n Tad. 
\m Daa, ne, ndxelaz loo Tad Diox. Por cona, ndyoodizen cón che'n Tad Jesús.  
\v 14 Nonque' na' no naneeque' na' le' Diox co' mblo xban Tad Jesús, Diox co xban na', ne, par bii no na' Diox co' hue' na' loo Jesús co'te' nzo Jesús.  
\v 15 Ryete yaltìi co' ndxàc loon, le'i ndxàc loon par càba con' ndac loo gu', co' nee di's, li Diox anggàc con' ndac loo huax mèn co' yila's loo Jesucrist par gab mèna loo Diox: Diox quix U', Tad Diox, por ryethe con' ndac co' ndli no U' nu'. Le' sya, di's co' gab mèn loo Diox li par càba loo Diox xyo'f lèe xyo'f xti's Diox loo taamas mèn. 
\p  
\v 16 Por cona, indxetacte lezon loo cón che'n Diox. Mastale' bél'yòo ladpe'en ndoo yàc co' gox par gatha yé' huize', per ndxe'leque', thìb huiz tedib huiz sate más ncàba con' ndac loon le'n lezon no le'n xtùuzen loo con' ndub quee lezon.  
\v 17 Tac ryethe yalnaxi co' ndxàc loon nalle' loo izlyo' ndxè', le'i nac co' setilte ndri'th loon ndxepte tiemp no maste. Per pà ta' con' co' ndxàc loon ndxè' loo con' roo con' xèn tín' co' thidtene gàc loon yiloa.  
\v 18 Part cón chenen, indliden xtùuz no ingüi'den loo con' co' ndxú' loo mèn. Per ndxe'leque', ndlin xtùuz no ndyóon cón che'n con' co' indxú'de loo mèn. Tac con' co' ndxú' loo mèn, co' ngüi' mèn loo, nac con' co' nxec ndxepte tiemp no maste. Per con' co' indxú'de loo mèn, con'a nxec thidtene. No ne'tyon'te no ne'lyuxte con'a thidtene. 
\c 5  
\p  
\v 1 Na' naneeque' chele' bél'yòo lad na' ndxè' co' nac xal thìb yòocal co' ne'xecte nen co'te' nzo ban na' nalle' gath no lyux, Diox toxcua' no que no Diox thìb ladpe' na' co' gàc xal thìb yòocal cub co'te' yòo ban na' loo bé'. No ladpe' na' co' mbli nable' Dioxa, ladpe' na' ne'tyoxcua'de por mèn che'n izlyo' ndxè'. Ladpe' na' co' mbli nable' Diox co' gàc che'npe' bé'a xec thidtene.  
\v 2 Lìcque' naca, láth naban na' loo izlyo' ndxè' ndli na' sient. No nden' na' ryethe yaltìi no ryethe yalnè co' ndxàc loo bél'yòo ladpe' na' ndxè' nalle', ¿lé'? Por cona, ndlya's na' gath bél'yòo ladpe' na' ndxè' par que no na' tedib lad cub co' nac che'npe' bé'.  
\v 3 No lad cub na', co' que no na'a, gàc xal thìb ned xab cub na' co' goc na' par ne'gàc chede na', co' nee di's, par ne'yòode alm na' no xpii na' tua'te loo bé'.  
\v 4 Cona, ngue niin loo gu: Láth be' naban na' le'n co' nac bél'yòo ladpe' na' ndxè', anze'f nalyat nden' na' con'. No ya ne'xecte na' nden' na' con' co' ndxàc loo na'. Inacta ndlya's na' anggath na' par alithe ryo xpii na' no alm na' loo ladpe' na' par ne'que node na' thìb ladpe' na'. Ndxe'leque', ndlya's na' gath na' par que no na' tedib ladpe' na' co' gàc thìb lad cub co' ne'gathte thidtene no co' gàc thìb ladpe' na' co' banque' thidtene.  
\v 5 Yub Diox nac xa' co' mbli par que no na' thìb lad cubpe' na' co'se' gath bél'yòo ladpe' na' ndxè'. No mblàa Diox Xpii Natú' loo na' par li la's na' que noque' na' thìb lad cubpe' na' yiloa. 
\p  
\v 6 Por cona, ngue niin loo gu': Láth be' naban na' loo izlyo' ndxè', thidteneque' ndxàp na' yalxla's loo Diox le' Diox li con'a loo na'. Naneeque' na', ne, láth be' naban na' le'n bél'yòo ladpe' na' ndxè' loo izlyo' ndxè', be' nzi tee xà' na' loo Diox loo bé'. Tarte yòo ban no na' Diox loo bé'.  
\v 7 Láth be' nzi tee ban na' loo izlyo' ndxè', ndxàp na' yalxla's le' Diox li ryethe con' mcàbgòn Diox li Diox loo na'. Imbedte na' no indub queede lezo' na' cón che'n con' co' ndxú' loo na' loo izlyo' ndxè' par gàc con' ndac loo na' por cón che'n izlyo' ndxè'.  
\v 8 Con'a ndli sate más ndxàp na' yalxla's loo Diox. No sate más ndlya's na' no nguen lezo' na' gath bél'yòo lad na' par yòo ban no na' Diox.  
\v 9 Por cona, que naca inzo node na' Diox, que naca nzo no na' Diox, ngue li na' con' co' nzote mod gác na' li na' par tataa mod más yòo lezo' Diox ñèe Diox na'.  
\v 10 Tac ryete na', naquinque' yo na' loo Crist par tyoo na' loo Crist co'te' ndub ñibe' Crist par tub rez Crist cón che'n ryethe con' mbli na' láth mque tee ban na' loo izlyo' ndxè' par càaya' na' cón che'n co' gàc loo na' por con' co' mbli na', que naca mbli na' con' ndac, o que naca mbli na' con' ye'rsin'. 
\s1 Di's ndac che'n Diox ndlu' yo nagàl lezo' mèn loo Diox no cue ban mèn rye nda mèn no rye ndye'th mèn loo Diox. 
\p  
\v 11 Pues, com le' na' naneele' no nonque' na' xá mod ndxàal zyeb ryete na' loo Diox, ¿lé'?, tac Diox tub rez cón che'n na', por cona, ngue lin con' co' nzote mod lin par yila's taamas mèn co' ndxela's loo Diox le' di's co' ndethen loo gu' nac lìcpe'. Diox non no naneeque' Diox cón chenen le' daa, lìcque', ngue que tee ban lìque' loo Diox. No ndlyazen le' gu', ne, ten' le'n lezo' gu' no mbeden le' gu' ta' cuent le' daa, lìcque', nque tee ban lìque' loo Diox.  
\v 12 Inacta co' beren, ngue niin di's ndxè' loo gu' tedib vez par li gu' cuent le' daa ngue ta' cuent ndac loo gu' cón chenen tedib vez. Ndxe'leque', ngue toodiz non gu' loo cart ndxè' par ngue tan lugar loo gu' par tyac lezo' gu' ndxep no huen yo lezo' gu' por cón chenen. Tataa mod gàca loo gu' gác gu' càb gu' loo mèn co' ndye's con costumbr no con mod co' ndxú' loo mèn. Leque mèna indlide cas xal nac xtùuz mèn no lezo' mèn co', lìcque', ndlu' xá nac mèn loo Diox.  
\v 13 Chele' gu' nden' nquée mbii yéquen por asendli guthen zin' loo zin' co' mxo'f zin' Diox loon por anze'f ndyoodizen loo gu', pues nquée mbii yéquen por naca zin' co' mxo'f zin' Diox loon. Per chele' gu' ndli cuent le' daa ndxe'sleque' ngue tee'en loo gu' no inquéede mbii yéquen, tataa ndlina por cón che'n gu' par gàc con' ndac loo gu'.  
\v 14 Com le' Crist nque' lezo' ñèe Crist mèn, cona sate más, ndyaquen, nquin lin sirv loo Crist no loo mèn. Por cona, ngo ron co'se' nguth angoluxte Crist loo cruz por cón che'n ryete mèn, sya, por part che'n Diox, Diox mbli cuent ryete mèn, ne, nguthle', co' nee di's, part che'n Diox nguth no Crist ryete mèn loo cruz.  
\v 15 Lìcque', nguth Crist por cón che'n ryete mèn. Tataa mbli Crist par gàca nalle' le' part cón che'n Diox, mèn co' nzi ban, co' nee di's, mèn co' ndxela's loo Crist, ne'tolode que tee ban mèna más xal neepe' lezo' mèna no xal ndryo' ndlyen' lezo' mèna li mèna. Ndxe'leque', Diox ndlya's ban mèna par li mèna con' co' neepe' lezo' Crist, Crist co' nguth no co' ngro xban por cón che'n mèna.  
\v 16 Por cona, axta huiz nalze par delant indliden cas loo taamas mèn. Ne' ne' indlasen cón che'n taamas mèn xal nac mod che'n mèn xal ndli mèn co' alithe nzi tee ban loo cón che'n xab izlyo'. Mastale' ndoore' co'se' yila'spe'en loo Crist axta daa mblas cón che'n Crist xal ndla's mèna nalle'. No ne'ngliden cas loo Crist tiempa. Per nalle' xà' nac mod co' ndliben Crist no xà' nac mod co' ndlin cas loo Crist. Nalle' indliben Crist xal mbliben Crist tiempa.  
\v 17 Por cona, chele' chol mèn co' yòo loo cón che'n Crist dib nzo yéc mèn no dib nzo lezo' mèn, mèna nac mèn cub xal thìb mbeto' co' diz ngóol. Ryete mod co' mque no mèn póla nguri'thle'. Per nalle' mèna ngue tee ban con thìb mod cub co' nac thìb yalnaban cub. 
\p  
\v 18 Diox nac xa' co' ngue li con' co' ndxàc loo na'. No leque yub Diox nac xa' co' mtu' mtàl xèn xyàn co' ngòo lezo' na' gunèe na' Diox. Por cón che'n Crist, mbli Diox ryethe con'a par gàc na' che'npe' Diox. No mxo'f zin' Diox zin' ndxè' loo na' par gác na' ta' na' cuent co' nzote mod li na' par yu' yàl lezo' mèn loo Diox.  
\v 19 Cona nee di's, leque yub Diox mtu' mtàl lezo' mèn loo Diox por cón che'n Crist. No mbli Diox ya ne'tolode cui'f cón che'n xquin mèn no cón che'n xtol mèn la's nii mèn no la's ya' mèn. Le' loo nu' na, mbli Diox par xo'f zin' nu' zin' ndxè' par lu' nu' loo mèn no par ta' nu' cuent cón che'n di's ndac che'n Diox loo mèn par cue nagàl lezo' mèn loo Diox.  
\v 20 Cona, ngue tan cuent loo gu' le' nu' nde loo gu' con di's co' nac xti's Crist xal mnibe' Crist loo nu' par ta' nu' cuent cón che'n di's ndac che'n Diox loo gu'. Cona nee di's nde nu' xal yub Diox par na'b nu' loo gu' gòn gu' di's co' ta' nu' cuent loo gu'. Por cona, nalyat ña'b nu' loo gu' por cón che'n Crist: Gure nagàl lezo' gu' loo Diox.  
\v 21 Crist ne'ncua'nte xquin Crist no xtol Crist thidtene. Per ndxe'leque', Diox mbli cuent le' Crist mcua'n xquin Crist no xtol Crist par nguth Crist loo cruz por cón che'n na'. Tataa mbli Diox par, co'se' yòo na' loo Crist no loo cón che'n Crist, que no na' thìb yalnaban nalì loo Diox xalque' ndlya's Diox que tee ban lì na' loo Diox. 
\c 6  
\p  
\v 1 No por ndxàc xtàa na' loo zin' co' mxo'f zin' Diox loo na', por cona, ngue niin loo gu' no ngue na'ben di's ndxè' loo gu': Ne'la'de gu' gàc perdid con' ndac co' ngue lu' Diox loo gu' no co' ngue li Diox loo gu'.  
\v 2 Tac loo libr co' nac xti's Diox ndub di's co' ndxab Diox loo mèn nación Israel, di's co' mbez: 
\pi1 Co'se' ngòc thìb tiemp ndac, mbìnen di's co' ngurez gu' loon. No co'se' ngòc huiz par mblyá' gu' loo con' ryes, daa mblyath no gu'. 
\m Ngue niin loo gu', ne, mèn Corint: Hui' gu' nexa. Nalle' nac thìb tiemp co' nac thìb tiemp ndac par lyàa yéc gu' no lyàa lezo' gu' loo Diox par zye' mod co' ndxàp gu' loo Diox. Le'n huiz ndxè' no le'n tiemp ndxè' nac huiz no tiemp co'se' nzoque' mod lyá' gu' loo con' ryes. 
\p  
\v 3 Nec thìb mod no nec tedib mod incuanten mod loo mèn par lin ngòc nguàal con' loo mèn par tataa mod ne'ñii yèede no ne'ñii tìide mèn cón che'n zin' co' nxo'f zin'en cón che'n di's ndac.  
\v 4 Ndxe'leque', leque daa nquenap daa par lu'en daa loo mèn le' daa, lìcque', nxo'f zin' cón che'n Diox no ndlin sirv loo Diox. Tataa ndlu'en loo mèn co'se' nxec yèen par ncha'lazen, no co'se' nxec yèen co'se' ndli mèn ngòc nguàal con' loon, no co'se' nxec yèen co'se' nde che con' loon, no co'se' nxec yèen co'se' ndxàc yaltìi loon.  
\v 5 Nxec yèen co'se' tin mèn daa. Nxec yèen co'se' nque' mèn daa lezi'f. Nxec yèen co'se' ndxetoo xyàn no ndxetoo di's lezo' mèn cón chenen. Nxec yèen co'se' ndli guthen zin'. Nxec yèen co'se' ngo'en mcal' loon por cón che'n zin' co' nxo'f zin'en. Nxec yèen co'se' xlat daa ngue tee'en.  
\v 6 Nque tee ban lìquen no nque tee ban nambìiquen. Lìcpe' ba'i, nonquen no naneequen cón nac co' lìcpe'. Nxec yèen no ncha'lazen loo mèn. Ndlyatque' lezon ñèen mèn par lyath non mèn. Ñibe'que' Xpii Natú' loon. Lìcpe' ba'i, nque'que' lezon ñèen rye mèn dib nzo yéquen no dib nzo lezon.  
\v 7 Co'se' ndyoodizen, ante ndyoodizen di's co' nac di's lìcpe' loo mèn. No ndxàcque' ryethe con' roo con' xèn co' nzo la's nii Diox no con' co' nzo la's ya' Diox loon. Diox co' nac Diox nalì no Diox nambìi ndlyath no daa par que tee ban lì daa par ne'lide mèn ye'rsin' gan quexù' que' fals mèn ye'rsin' daa loo con' co' inacte con' lìcpe'.  
\v 8 Tataaque' ndlin, que naca li mèn cas loon no li mèn con' guryath con' guryèn loon, que naca ne'lide mèn cas loon no ne'lide mèn con' guryath no con' guryèn loon, que naca ndxath ndxèn con' ye'rsin' cón chenen làth mèn, que naca ndxath ndxèn con' ndac co' ndlin làth mèn, que naca mbez mèn nac daa mbi' gutyè'. Per mastale' mbez mèn tataa, ndlin con' lìcpe'.  
\v 9 Mastale' ayéc axàn' ndlibe' mèn daa, per ndxe'leque', ndli mèn cuent nac daa xal mèn tith. Huax vez mbri'then loo yalguth. Daa ndoo ndxè'. Be' naban daa. ¿Ché' nguth daa ndlya's gu', cà'? Yende xàa. Mtetìi mèn daa axta mdyac lezo' mèn. Per ne'nguthte mèn daa. Mzyalque' daai tataa mod mtetìi Diox daa tac tataaque' mquin daai. Per ne'ngathte daa.  
\v 10 Mastale' nxi yéquen no nxi lezon loo con' ndxàc loon, per ndxe'leque', ale leque daa ndli ndyac lezon thidtene. Mastale' yende chó yalgon' ndxàpen loo izlyo', ndxe'leque', ndlin par gàp taamas mèn huax con' ndac loo cón che'n Crist. Nac daa mèn co' yende chó yalgon' ndxàp. Per mastale', ingüi'den loo chol yalgon' nalle'. Che'npe'en nac ryethe con'. 
\p  
\v 11 ¡Aa mèn Corint co' ndxàc huesen por cón che'n Crist! Nase alanleque mblo'en ryethe con' co' nzo le'n lezon loo gu'. Alanleque mdoodiz non gu' ryethe con' co' nac cón che'n Crist loo cart co' ngue tel'en loo gu' ndxè'.  
\v 12 Yende cón nden'en le'n lezon cón che'n gu' co' nzosua' le'n lezon par ñeen cón che'n gu' par tataa mod ne'que'de lezon ñèen gu'. Ndxe'leque', nzo con' ñee gu' no con' co' nden' gu' le'n lezo' gu' cón chenen. Por cona, iaridte nque' lezo' gu' ñèe gu' daa, ndyaquen.  
\v 13 Hui' gu' nexa. Daa ngue toodiz noque' gu' xal loo myen' co' nac xin'pe'en. Bli gu' co' nzote mod li gu' par tolo gác gu' que' lezo' gu' ñèe gu' daa xalque' nque' lezon ñèen gu', ndee gu'. 
\s1 Pab ngue ta' cuent loo mèn le' na' co' ndxela's loo Diox por cón che'n Jesucrist, lìcque', nac na' templ co'te' nzo ban Diox, Diox co' thidtene naban. 
\p  
\v 14 Ne'ta'de gu' lugar queltàa no gu' mèn no thidte gàc gu' con mèn co' indxela'ste loo con' co' nac cón che'n Crist loo chol con'. Tac ¿xá mod tyal mèn yòo mèn co' nac mèn nalì no mèn nambìi loo con' ndli mèn co' inacte mèn nalì no mèn nambìi, à'? Yende moda, ¿lé'? Lomisque' ne, co'se' ntenìi xnìi thìb lugar co'te' nacuau, yende mod cuau lugara leque tiempa, ¿lé'?  
\v 15 No ¿ché' ndli gu' cuent nzoque' mod thidte gàc Crist con Mebizya, cà'? ¡Yende mod gàca tataa, ey! No ¿xá mod tyal mèn co' ndxela's thidte gàc mèna par yòo mèna loo cón che'n mèn co' indxela'ste, ne, à'? ¡Yende mod gàca tataa, ey!  
\v 16 No ¿xá mod gàca loo na', na' co' nac xal thìb templ co'te' nzo ban Diox par tyal na' no ta' na' lugar li na' cas loo chol mdo', à'? Yende mod gàca tataa loo na', ¿lé'? Tac, lìcpe' ba'i, Diox nzo ban loo na' xal le'n thìb templ xal nac di's co' ndxab Diox cón che'n con' ndxè'. Ndxab Diox: 
\pi1 Daa go ban làth mèna. No que tee noquen mèna. No gàc daa Dioxpe' mèna. Le' mèna na, gàc mènpe' daa. 
\m  
\v 17 Por cón che'n ryethe con'a, ndxab Diox, ne: 
\pi1 Ne'queltàa node gu' arid con mèn loo mod co' ndxàp mèna loo cón che'n xab izlyo'. Ne' ne' indlyazen yizi'f yiga's gu' loo chol con' co' nac con' zab co' ndli mèna. Le' sya, tataa mod yòo lezon cón che'n gu'. No ndoo lìte gàc gu' mènpe' daa. 
\pi1  
\v 18 Le' sya, gàc daa xal xudpe' gu'. Le' gu' na, gàc xal xgan'pe' daa no xal rsappe' daa. 
\m Tataa ndxab Diox, Diox co' ndxàp ryethe con' la's nii Diox no la's ya' Diox. Thìba con' ndxè'. 
\c 7  
\p  
\v 1 Tolo mque' Pab ye's. Ndxab Pab: Le' tediba na, chele' Diox, lìcque', mcàbgònle' ryethe con' ndxè' loo na', gu' co' nque' lezon ñèen, cona tolo ngue niin loo gu' nalle': Ndxàalque' li na' fuerz par que tee ban xà' na' loo ryethe con' co' nac con' zab co' ndxuhua nee lezo' mèn co' nac che'npe' izlyo' ndxè', no co' ndryo' ndlyen' lezo' mèn li mèn, no cón che'n xtùuz mèn co' ndlipe' mèn le'n lezo' mèn. Ndxe'leque', zyeb na' loo Diox par gàc na' mèn co', lìcque', ngro xà' loo cón che'n xab izlyo' par que tee ban lì na' loo Diox. 
\s1 Pab ngue lu' le' mèn ciuda Corint co' ndxela's loo Diox por cón che'n Jesucrist ngulàa yéc no ngulàa lezo' loo Diox no mzye' mod co' ngòp mèna loo Diox. 
\p  
\v 2 Por cona, ngue niin loo gu': Fta' gu' lugar yi'th nu' loo gu'. Ne'tolode yitac lezo' gu' ñèe gu' daa. Tac tarte lin nec thìb con' ye'rsin' loo nec thìb mèn. Tarte té'th nec thìb mèn loon par li mèna con' ye'rsin'. Tarte quedìin nec thìb mèn, ne.  
\v 3 Ingue niiden con' ndxè' loo gu' par ngue quexù'en gu'. Gu' nonque' le' daa nque'que' lezo' ñèen gu' xalque' guniilena loo gu'a, que naca ban na', que naca gath na', conse' thidte tyoo lezo' na' ban na' loo thidte con' co' nac cón che'n Crist.  
\v 4 Anze'f ndxàpen yalxla's loo cón che'n gu' xal nac mod co' nzi tee ban lì gu' loo Diox. Anze'f thìb gust ndan lezon co'se' ndyoodizen cón che'n gu' loo taamas mèn axta co'se' mdoodiz non Tit cón che'n gu' leque daa ntegán lezon, ne. No por cón che'n gu' ndyac tín' lezon axta plóthe láth ndli mèn ngòc nguàal con' loon. 
\p  
\v 5 Tac anon mzin daa le'n yèezya' che'n laaz mèn macedon, yende mod mbe see tee lezon. No yende mod ngo nagàl lezon por cón che'n zin' co' nxo'f zin'en. Ndxe'leque', thìb mod no tedib mod ngòcque' yaltìi no yalndyub ngu's loon. Thìb mod no tedib mod, ncua'n xó'que' mèn cón chenen. No mbli mèn ngòc nguàal con' loon. Ale mzyeb daa no ngo noque' lezon.  
\v 6 Per mastale' ngòca tataa loon, Diox co' ntegán lezo' mèn no co' ndli par ye'th lezo' mèn co' nzi tee xi lezo', Diox mtegán lezon por mzin Tit loon.  
\v 7 Iante mtegán Diox lezon por mzin Tit loon. Ndxe'leque', masre' mtegán Diox lezon co'se' mda' Tit cuent loon cón che'n xá mod mtegán gu' lezo Tit co'se' mda' gu' cuent loo Tit le' gu' anze'f nguen lezo' lyath no gu' daa tant mxi lezo' gu' por cón chenen no tant ndyóo gu' cón chenen. Por ryethe con' mbli gu'a, thìb mod no tedib mod sate más ndyac lezon. 
\p  
\v 8 Tac mastale' mden' lezon anze'f mxi lezo' gu' por di's co' mque'en loo cart co' mzin loo gu'a co'se' mblab gu' di'sa, no ne'needen cón ngulàa yéquen no cón ngulàa lezon ale tataa mtel'en carta loo gu'. Per nase, inxide lezon tac mtel'en carta loo gu'. Tac thìb part huenque' mblin, ndyaquen. Tac cart co' mtel'en loo gu'a mbli mxi yéc gu' no mxi lezo' gu' ndxep tiemp par ngulàa yéc gu' no ngulàa lezo' gu' par xà' mse' gu' mod co' ndlu' nque tee ban ndac gu' nalle' loo cón che'n Crist.  
\v 9 Per nalle' ndyac lezon. Per indyacte lezon por ante mxi yéc gu' no mxi lezo' gu' por di's co' mtel'en loo gu'a. Ndxe'leque', ndyac lezon tac mxi yéc gu' no mxi lezo' gu' xal nee lezo' Diox. No ndyac lezon tac, mastale' mxactìi gu' por cón chenen, nec thìb mod no nec tedib mod yende chó yalquìi ngòc loo gu' loo cón che'n Crist por part cón chenen.  
\v 10 Tac yalnaxi co' ndxàc loo mèn xal nac co' nee lezo' Diox, le'i ndli par lyàa yéc mèn no lyàa lezo' mèn par zye' mod co' ndxàp mèn par lyá' mèn loo con' ryes. Loo cona inquinte xi lezo' mèn por ngulàa yéc mèn no por ngulàa lezo' mèn par lyá' mèn loo con' ryes. Per ndxe'leque', yalnaxi co' ndxàc loo mèn co' alithe nque tee ban loo cón che'n izlyo' ndxè', yalnaxia ncàb ryo xà' mèna loo Diox thidtene yiloa.  
\v 11 Per hui' gu' nexa. Loo cón che'n leque con' ndxè', le'i ngòc loo gu' mxi lezo' gu' xal gunee lezo' Diox, ¿lé'? Napló con' ndac ngòca loo gu' cón che'n con' co' mxi lezo' gu'a le' gu' mbli nèe leque gu' par tyubdi's gu' loo Diox. Co'se' mxi lezo' gu'a, mden' gu' cón che'n con' ye'rsin' co' mbli mbi'a le'n lezo' gu'. No leque gu' mdub razon cón che'n gu' loo chol mèn. No axta ndlyàa xyàn lezo' gu' co'se' leque gu' ngüi' loo xtàa gu', ¿lé'? No axta mzyeb gu' gunèe gu' daa, ne, ¿lé'? No axta arid mblya's gu' thidte gàc gu' con daa. Anze'f mdyóo gu' xá mod tyubdi's gu' loon. No axtaque' mbli gu' gan mbli rez gu' loo mbi' co' mbli con' ye'rsin' làth gu'a. Loo ryethe con' mbli gu'a, mblu' gu' loo mèn nac gu' mèn nalì no mèn nambìi loo Diox. Con' mbli gu' ndlu' yende chó dol ndxàp gu' cón che'n mbi'a.  
\v 12 Cona, ndlyazen non gu' no ta' gu' cuent, mastale' tataa mque'en ye's loo gu', ne'nque'den ye's loo gu' loo cart por cón che'n mbi' co' mcua'n xó' loo gu'. Ne' ne' mque'en ye's loo gu' por cón che'n mèn co' ngo sál' yaltìi por cón che'n mbi' co' mcua'n xó' làth gu'a, ne. Ndxe'leque', mque'en ye'sa loo gu' par non ryete gu' no ta' ryete gu' cuent susque' altant ngure gu' loo Diox par mblyath no gu' daa por mxo'f zin' gu' thìb zin' cón chenen, tant nque' lezo' gu' ñèe gu' daa.  
\v 13 Co'se' guneen leque gu' mtegán lezo' gu', ale leque daa mtegán lezon, ne. 
\p No sate más mtegánen lezon co'se' guneen ndyac lezo' Tit loo cón che'n gu' xá mod mbli gu' par mbye'th lezo' Tit làth gu'.  
\v 14 Tac chele' daa mda' ndxep gust lezon co'se' mdoodiz non Tit cón che'n gu', ne'nthonte daa co'se' mdoodiz non Tit cón che'n gu' tataa. Ndxe'leque', lìcque' ngòc di's co' mdoodiz non gu'. Lomisque' ne, lìcpe' nac di's co' mdoodiz non Tit cón che'n gu' le' daa ndxòoque' lezo' cón che'n gu'.  
\v 15 No axta gust mbyan' lezo' Tit axta plóthe cón che'n gu' co'se' nte' lezo' Tit xá mod mdubdi's gu' loo di's co' gunii Tit loo gu'. No axta gust mbyan' lezo' Tit cón che'n gu' co'se' mbli gu' cas Tit co'se' mzin Tit loo gu' axta ale mxac Tit mzyeb gu' no mxi'th gu' loo Tit. Por cona, masre' nque' lezo' Tit ñèe Tit gu'.  
\v 16 Per nase, ndyac lezon tac sate más tolo gàpen yalxla's loo gu' thidtene, ey. Thìba con' ndxè'. 
\c 8  
\s1 Pab ngue ta' cuent loo mèn ciuda Corint le' mèn yèezya' che'n làaz mèn macedon ngòc mèn co' ndoo xal' lezo' no mèn co' non carida co' nda' gòn dib nzo yéc mèn no dib nzo lezo' mèn. 
\p  
\v 1 Le' tediba na, gu' co' nac mèn huesen por cón che'n Crist, ngue tan cuent loo gu' loo cart ndxè' par non gu' xá mod mbli Diox angngòc con' ndac loo mèn co' nqueltàa loo cón che'n Diox le'n chol yèezya' co' nac che'n làaz mèn macedon.  
\v 2 Ndxe'leque', ale ngòca loo mèna láth mxec yèe mèna loo rye yaltìi no rye yalndyub ngu's co' ngòc loo mèna, lugar de ten' mèna cón che'n yaltìi no yalndyub ngu's co' ngòc loo mèna, no mastale' ngòc mèna mèn prob tín', ale le'le' ngòo yéc mèna le' mèna ta'la's tmi loo cón che'n Diox.  
\v 3 Daa nda' cuent le' mèna angmda'la's tmia co' nzote mod ngóc mèna mda' mèna. Mastale' be'the ndoo ri'th mèna, ale mxen mèna tmi co' nquin mèna par ta'la's mèna tmi loo Diox.  
\v 4 Nalyat mna'b mèna loon par tan lugar càayan tmi co' mda' gòn mèna loo cón che'n Diox par tel'en tmia loo mèn co' ngro xà' loo cón che'n xab izlyo' co' ndyac yaltìi, mèn co' nzo ban ciuda Jerusalén.  
\v 5 Ne'nda'de mèna tmi xal mblin xtùuz ta' mèna. Ale ndxe'leque', ner con' mbli mèna, mnibe' mèna loo lezo' mèna. No mblo ro mèna loo Diox ante li mèna co' neete lezo' Diox li mèna. Le' sya, mbi'th nee mèna loon. Gunee mèna: ¿Xá nee U', Tad Pab? Le' nu' li co' neete lezo' Diox. Blu' U' loo nu' xá mod li nu' thop nu' tmi co' nquin mèn co' ndxàc hues xtàa na' ciuda Jerusalén.  
\v 6 Por cona, texal mtlo Tit, mblu' Tit loo gu' xá mod ndxàal lyath no na' xtàa na' co' ndyac yaltìi, daa mco'x loo Tit yi'th nee Tit máa gu' par nedrè' tedib vez par lyath no Tit gu' telo gu' zin' ndac ndxè' co' ngue li gu'.  
\v 7 Gu' nzi té'thque' no nzi tubdi'sque' gu' loo cón che'n Diox, co' nee di's, ndxàp gu' huax yalxla's loo Diox. No ndxác gu' ndlu' ndac gu' cón che'n di's ndac. No mté'th ndac gu' cón che'n Diox. No mbli nèe gu' leque gu' par tyubdi's gu' loo Diox thidtene. No nque'que' lezo' gu' ñèe gu' daa. No dib nzo lezo' gu' nque' lezo' gu' ñèe gu' xtàa gu'. Bli nèe gu' gu' loo con' ndac co' ngue li gu' ndxè', ne, par tolo lyath no gu' hues xtàa na' co'se' nde che con' loo hues xtàa na'. 
\p  
\v 8 Ingue niiden con' ndxè' loo gu' par li gu' co' ngue li gu'a xal thìb costumbr co' ngue no mèn. Ante ndlyazen le' mèna ta' cuent no ye'th lezo' mèna par li mèna xtùuz le'n lezo' mèna par ta' mèna cuent co' huenleque' ñeene' ché', lìcque', nque' lezo' gu' ñèe gu' xtàa gu' o ché' inque'de lezo' gu' ñèe gu' xtàa gu'.  
\v 9 Gu' nonque' no naneeque' gu' cón che'n con' ndac co' angmbli Tad Jesucrist loo gu'. Mastale' nac Tad Jesucrist xa' ric, ale ndxe'leque', ngòc Tad Jesucrist mèn prob por tant mque' lezo' Tad Jesucrist ñèe Tad Jesucrist gu'. Mbli Tad Jesucrist loo gu' par ngòc gu' mèn ric loo cón che'n Tad Jesucrist. 
\p  
\v 10 Cón che'n tmi co' thop gu'a, lyazen niin loo gu' xal ndye'th xtùuz yéquen par tolo gàc con' ndac loo gu' cón che'n con'a: Ndyaquen, ale ndxàalque' li gu' con' ndxè': Ftolo thop gu' tmia xalque' mnibe' lezo' gu' mbli gu' par mthop gu' tmi lín' nguri'tha par mèn co' nquina. No ndlyazen xyo'f nde' xyo'f ndla' lezo' gu' co'se' ndli gu' con'a.  
\v 11 Pues nalle', tá, ftolo thop gu' tmi xal nibe' gu' loo lezo' gu' li gu' par gàca xalque' mnibe' gu' lezo' gu' thop gu' tmi no tub gu' tmia. Tataa mod xas xas thop gu'i xalque' nzo gu' no xalque' ndxàp gu' che'n gu'. Tataa ta' gu' tmia.  
\v 12 Tac chele' thìb mèn, lìcque', ndlya's tub tmi no ta' mèn gòn loo cón che'n Diox, Diox ndyal nda' mèn gòn co' nac tmi co' ndub mèna xalque' nzo mèn no xalque' ndxàp mèn che'n mèn. Diox imbezte ta' yèe mèn tmi o tub yèe mèn tmi co'se' indxàpte mèn huax tmi. 
\p  
\v 13 Ingue niiden loo gu' por fuerz ta' gu' ayud loo mèn ciuda Jerusalén co' ndyac yaltìi par que no mèna tant con' axta ndyac tín' lezo' mèna no part cón che'n gu' na, co'se' li gu' con' ndxè', gàca loo gu' le' gu' ten' ndyactìi gu' loo con'a por nde che con' loo gu' tant mda' gu' gòn càa mèna. Yende xàa. Leque gu' nee xá mod li gu' xal nee lezo' gu' cón che'n tmi co' mthop na'.  
\v 14 Ndxe'leque', ndlyazen le' tiemp ndxè' lalque' gàca loo na' con mèn hues na' co' ndxela's chol lugar. Con' ndxè' nac co' ngue niin loo gu': Ndlyazen thidte gàc gu' con mèn co' ndxàc hues xtàa gu' por cón che'n Crist chol lugar. Nalle' gu' ngue ta' gòn co' naquin mèn. Le' co'se' gàc huiz co' naquin gu' con' co' nde tub loo gu' na, lomisque', mèna lyath no gu', ne. Tataa mod thidte ndxàc gu' con mèn co' ndxàc hues xtàa gu' loo cón che'n Diox no loo cón che'n Crist.  
\v 15 Le' sya, gàca loo gu' xal mbez di's co' ndub loo libr co' nac xti's Diox co' mbez: Le' mèn co' mque no huax che'n, ne'nque node men che'n mèn, co' nee di's, ne'ngyan xo'fte che'n mèn co' mque no mèn. Le' mèn co' be'the mque no che'n na, ne' ne' nga tub che'n mèn co' mque no mèn. 
\s1 Pab ngue ta' cuent cón che'n Tit con mèn co' mblyath no Tit. 
\p  
\v 16 Per Diox quix Diox le' Diox mbli mbye'th lezo' Tit par mxo'f zin' Tit thìb zin' cón che'n gu'. No altant mdoo Tit loo gu' xalque' mxo'f zin'en thìb zin' loo gu'.  
\v 17 Lìcpe' ba'i, mbìn Tit di's co' mna'ben loo Tit par yi'th too naa Tit gu'. Látha, anze'f altant mdoo Tit gunèe Tit gu'. No anze'f mblya's Tit ñee Tit máa gu'. Por cona, leque Tit mnibe' lezo' Tit yi'th nee Tit máa gu' tac tataa gunee lezo' Tit. 
\p  
\v 18 Ngue tel'en Tit con thìb mbi' co' ndxàc hues na' por cón che'n Jesucrist. Mbi'a ndxác ngo yalbàn loo mèn co' nqueltàa loo cón che'n Diox axta mxyo'f lèe mxyo'f xti's mbi' no ndxath no ndxèn cón che'n mbi' loo mèn co' nqueltàa loo cón che'n Diox rye lugar.  
\v 19 Iante con' ndxè'de ndxàc loo mbi'. Ndxe'leque', mèn hues na' co' nqueltàa loo cón che'n Diox par ned làaz mèn macedon mcui yub mbi' co' ndxàc hues na' por cón che'n Crist par nque tee no mbi' nu' no lyath no mbi' nu' co' nac thop nu' tmi co' mthop mèn co' nqueltàa loo cón che'n Diox yèezya' che'n làaz mèn macedon par lyath no gu' mèn co' ndyactìi ciuda Jerusalén. No nque tee nxo'f zin' nu' zin'a cón che'n zin' ndac ndxè' par tolo non mèn cón che'n con' roo con' xèn che'n Diox no par tataa mod lu' nu' loo taamas mèn le' na' ndye'th lezo' par lyath no na' mèn co' ndxàc hues xtàa na' por cón che'n Jesucrist co' ndyac yaltìi chol lugar, co' nde che con' loo, tac nque' lezo' na' ñèe na' mèna.  
\v 20 Tataa ngue li nu' par de que yende chó mèn la's loo nu' par quexù' que' fals mèna nu' cón che'n zin' co' ngue xo'f zin' nu' cón che'n tmi co' ngue thop nu' ndxè' par ne'ñii yèede no ne'ñii tìide mèn ngòc nguàal con' loo na' cón che'n tmi co' mthop na' par lyath no na' mèn hues na' por cón che'n Jesucrist co' ndyac yaltìia.  
\v 21 Ngue cua'n nu' mod par gàc con' ndxè' nabe'ste no par nambìi loote gàca. Iante ngue cua'n nu' mod gàc con' ndxè' nabe'ste no nambìi loote loo Tad Diox. Ndxe'leque', ngue cua'n nu' mod gàca con' nabe'ste loo chol mèn, ne. 
\p  
\v 22 Ngue tel' nu' tedib mbi' co' ndxàc hues na' por cón che'n Jesucrist con Tit no con ner mbi' co' nac ner mbi' co' ndxàc hues na' por cón che'n Jesucrist co' nque tee no Tit. Nu' mbla's loo mbi' co' huen huen. No ndyac nu' le' mbi' altantque' ndyoo, thìb mod no tedib mod, loo zin' co' mxo'f zin' mbi'. Per nalle', sate más ndye'th yéc mbi' no ndye'th lezo' mbi' altant ndoo mbi' loo cón che'n zin' co' ngue xo'f zin' mbi' tac mbi' ndxàp huax yalxla's loo gu'.  
\v 23 Chele' chó mèn ñibdi's loo gu' cón che'n Tit, fta' gu' cuent loo mèna le' Tit ndlyath no daa. No thidte nxo'f zin' ryop nu' Tit zin' co' nac cón che'n Tad Crist par li ryop nu' Tit sirv loo gu'. No chele' chó mèn ñibdi's loo gu' por cón che'n ryop mèn co' nque tee no Tita, fta' gu' cuent loo mèna le' ryop mbi' nde loo gu' por mtel' mèn co' ndxàc hues xtàa na' por cón che'n Jesucrist par xo'f zin' mèna thìb zin' loo gu'. No ndli mèna par gàc con' roo con' xèn loo Crist. No ndli mèna par xyo'f lèe xyo'f xti's Crist, ne.  
\v 24 Cona, ngue niin loo gu': Fcua'n gu' mod blu' gu' gu' loo mèn co' nqueltàa loo cón che'n Diox chol lugar par non mèn, lìcque', nque'que' lezo' gu' ñèe gu' yon mèna, co' nee di's, nac Tit con tachop mèn hues na' por cón che'n Jesucrist co' nde loo gu' nalle'. No blu' gu' gu' loo mèn co' nde loo gu' le' ianxle'de nac co' nda' nu' gust lezo' nu' ñee nu' cón che'n gu'. No ndxòo lezo' nu' cón che'n gu' por ndli gu' con' co' ngue niin loo gu' ndxè'. 
\c 9  
\s1 Mèn yèezya' che'n làaz mèn macedon mdub tmi par mda' gòn mèna tmi loo mèn co' ndxàc hues xtàa mèna por cón che'n Jesucrist. 
\p  
\v 1 Cón che'n zin' co' nxo'f zin' gu' par tub gu' tmi co' ta' gòn gu' loo mèn hues xtàa na' co' ndxela's loo Crist no loo cón che'n Crist, mèn co' mdyal ngro xà' loo cón che'n xab izlyo' par ngòc mèna che'npe' Diox, lìcpe' ba'i, inquinte que'en ye's cón che'n zin'a loo gu', ndyaquen.  
\v 2 Neequen no ndaquen cuent le' gu' ndye'thque' lezo' lyath no gu' mèn hues na' por cón che'n Jesucrist co' nde che con' loo. Por cona, axta gust nda' lezon ñeen cón che'n con' mbli gu' loo mèn co' nqueltàa par ned le'n yèezya' che'n làaz mèn macedon. No mdan cuent loo mèn yèezya' che'n làaz mèn macedon le' mèn che'n làaz mèn acay co' nac mèn gulàaz gu', mèna mtlole' mthop tmia lín' nguri'tha. Con' co' mbli gu' par mthop gu' tmia ngòc thìb muestr loo taamas mèn. Tataa mod mbye'th lezo' huax mèn par mthop mèna tmia, ne, xal mbli gu'.  
\v 3 Per mastale' nonen no ndaquen cuent ndlya's gu' lyath no gu' hues xtàa gu' loo cón che'n Crist, ngue tel'en yon hues na'a loo gu' par ne'gàcte thìb yalgutyè' co' mdan cuent loo taamas mèn cón che'n gu' cón che'n tmia, no par gàc loo gu' cón che'n tmi, co'se' ngolole' mthop gu' tmi, ngòc nable' gu' con tmi co'se' nquin mèn tmi.  
\v 4 Tac, ne'stolque', gal non ndxep mèn co' nac mèn yèezya' che'n làaz mèn macedon co' ndxàc hues na' por cón che'n Jesucrist loo gu'. No chele' nu' ñee le' gu' tarte yilo thop tmi, thyon nu' por gust co' mda' nu' lezo' nu' loo cón che'n gu'. Le' gu' na, ¿xá lyàai le'n lezo' gu' chele'i tataa gàca loo gu', à'?  
\v 5 Por cona, leque daa mbli xtùuz naquinque' co'xen loo mèn hues xtàa na' co' ngue tel'en loo gu'a par yi'th ner mèna loo gu' par chal mèna gu' cón che'n tmi co' mcàbgòn gu' ta' gu' par ngòc nable' tmia ndoore' galen loo gu'. No tmia gàc co' angta'la's gu' loo hues xtàa na' co' nde che con' loo. Ndlyazen le' gu' ta' tmia dib nzo yéc gu' no dib nzo lezo' gu' par ne'gàcta loo gu' le' gu' li sient cón che'n tmi co' ta' gu' loo mèna. 
\p  
\v 6 Per nalle', ndlyazen niin thìb di's loo gu', mèn ciuda Corint: Hui' gu' nexa. Le' mèn co' ngo ndxepte bin, ndxepte cosech thop mèna. Le' mèn co' ngo huax bin na, mèna nthopque' huax cosech ne, ¿lé'?  
\v 7 Thìb thìb gu' ta' tmi xal ñibe' lezo' gu' ta' gu' tmi. Ne'ta'de gu' tmia xal mèn co' ndli sienta co'se' mtuhuan mèn tmi. Ne' ne' ta' yèe gu' tmia. Per ndxe'leque', na' nanee le' Diox anze'f nque' lezo' ñèe mèn co'se' nda' mèn tmi con dib nzo yéc mèn no dib nzo lezo' mèn.  
\v 8 Tad Diox ndxàp huax con' la's nii Tad Diox no la's ya' Tad Diox par angli Tad Diox tolo yas yàl huax con' ndac loo gu'. Tataa ndli Diox par gàca inquinte ya too dó' gu' loo hues xtàa gu' por con' co' nde che loo gu'. Tataa mod Diox lyath no gu' par tolo lyath no gu' taamas mèn co' nde che con' loo.  
\v 9 Loo libr co' nac xti's Diox ndub di's co' mbez taandxè': 
\pi1 Le' mèn co' nac mèn nalì no mèn co' nac mèn nambìi na, mèna mda' gòn dib nzo yéc mèn no dib nzo lezo' mèn co' ndxàp mèna par càa mèn prob. No angmda'la's mèna con' ndxàp mèna loo mèn co' ndyac yaltìi. Sya, con' ndac co' mbli mèna nac thìb con' ndac co' ne'lyuxte loo mèn thidtene. No te'que' lezo' Diox cón che'n mèna. 
\m  
\v 10 Lomisque' ne, Diox co' ndli ndxas ndxàl biz bin co' ngo mèn, Diox ndli le' mèn que no con' hua mèn. No li Diox le' bin co' ngo gu' tolo yas yàl loo gu'. Lomisque' ne, Diox angli le' loo gu' co' nac mèn nalì no mèn nambìi tolo yas no tolo yàl con' loo gu' par tolo lyath no gu' mèn prob no tolo lyat lezo' gu' ñèe gu' mèn prob co' nquin con' par li gu' con' ndac loo mèna.  
\v 11 Angndli Diox con'a loo gu' par tataa mod mbyas mbyàl con' ndac loo gu' no par que no gu' che'npe' gu'. Diox tataa ndli loo gu' par tolo lyath no gu' mèn no lyat lezo' gu' ñèe gu' mèn axta plóthe. Le' sya, chele' gu' li xal ngue niin loo gu' ndxè', sya, huax mèn co' ndxàc hues xtàa na' gab: Diox quix U', Diox, loo Diox tac gu' ngue lyath no mèna con tmi co' mdub gu' par ta' gu' gòn loo mèna xal mco'x nu' loo gu' par li gu'i.  
\v 12 Tac zin' co' ngue xo'f zin' gu' co' nac ngue thop gu' tmi, iante ncàb zin' co' ngue li gu' ndxè' par ngue lyath no gu' taamas mèn co' ngro xà' loo cón che'n xab izlyo' co' ngòc che'npe' Diox loo con' nquin mèna. Ndxe'leque', zin'a ncàb le' huax mèn gab: Diox quix U', Diox, loo Diox por zin' co' ngue xo'f zin' gu' ndxè'.  
\v 13 Per co'se' ñèe mèn ciuda Jerusalén cón che'n huax tmi co' tel' gu' par lyath no gu' mèna, mèna gab Diox roo Diox xèn nac Diox co' mbli le' gu' ngue tubdi'sque' loo di's ndac che'n Crist. No gab mèn ciuda Jerusalén con' roo con' xèn nac Diox tac co'se' ngue lyath no gu' mèna no ngue lu' gu' loo mèna thidte nac gu' loo cón che'n Crist con mèna xal ndlu' gu' con' co' ngue li gu' loo taamas mèn.  
\v 14 Más de cona, mèn ngue bez Diox por cón che'n gu' tac Diox angmbli le' gu' mbye'th yéc no mbye'th lezo' gu' par mtel' gu' tmi loo mèna. Làth xtau'a, ndryo' ndlyen' lezo' mèn libe' mèn gu' no tolo cuez mèn Diox por cón che'n gu', tant mblyat lezo' gu' gunèe gu' mèna.  
\v 15 Por cona, gab na' loo Diox: Diox quix U', Diox, loo Diox por cón che'n ryethe con' ndac co' ndli Diox anggàc loo na' por cón che'n Crist. No axta ne' ne' gác na' ta' na' cuent no tyoodi's na' cón che'n con' co' angmbli Diox loo na'. Thìba con' ndxè'. 
\c 10  
\s1 Pab ñibe' loo mèn co' nqueltàa loo cón che'n Diox por nac Pab mèn co' Diox mtel' loo mèn por cón che'n di's ndac. 
\p  
\v 1 Le' tediba na, naneeque' gu' no nonque' gu' le' Crist anze'f nado' nac no anze'f ndac nac Crist no anze'f ñee rsi' ñee rso Crist mèn, ¿lé'? Por cona, yub daa co' nac Pab ngue nii con' ndxè' loo gu' xal nac mod co' ndxàp Crist. Naneequen no nonquen ndxath no ndxèn le' ndxep gu' mbez làth hues xtàa gu': Ndxàc Pab xal thìb mbi' co' anze'f nado' xal nac mod co' ndxàp Crist co'se' nzo Pab làth na'. Per ale, ndyac na', nayi' Pab loo na' co'se' inzo node Pab na, ¿lé'?  
\v 2 Por cona, ña'ben di's loo gu': Bli gu' cuent le' yub Crist nalyat ña'b di's loo gu' loo cart co' ngue que'en ye's loo gu' ndxè'. Tataa bli gu' par gàp gu' mod co'se' zin daa làth gu' par ne'gàcte loo gu' xal mèn co' nteri'th nza par ne'lide gu' cas loo di's co' niin loo gu'. Le' sya, tataa mod ten'en nquin gàc nayi' daa loo ndxep gu', gu' co' nque yèe daa, no gu' co' nden' no ndli gu' cuent le' daa ante nxo'f zin' cón che'n Crist xal ndryo' ndlyen' lezon no ñibe'en loo gu' co' neete lezon no maste tac, por derech, ndoo lezon ndlyazen gàc nayi'en loo mèna.  
\v 3 Lìcque', nac na' mèn che'n izlyo' ndxè'. Per loo cón che'n Crist ingyoo node na' con mèn loo izlyo' ndxè' xal ngyoo mèn co' be' nac che'n izlyo' con xtàa mèn loo ixlyo' ndxè'.  
\v 4 Hui' gu' nexa. Nac daa xal thìb solndad co' ndyee loo xó'. Mod co' ndlin con' par lin gan loo ngolo ngola's co' nca' loo cón che'n Crist inacte xal co'se' ngyoo mèn con pistol no chol yi'f loo izlyo' ndxè'. Ndxe'leque', por cón che'n Crist, Diox ndlyath no daa par tau'en ro mèn co' ndlu' loo xtàa mèn chol xtùuz co' nac ngolo ngola's loo cón che'n Crist. No Diox ndlyath no daa par tau'en ro no tau'en xti's chol mèn co' ndlu' chol xtùuz co' nca' loo mèn co' tyal no co' ndlya's yòo loo cón che'n Diox.  
\v 5 Per xó' co' ndlin loo mèn co' nac ngolo ngola'sa, le'i nac co' ndlin par yende cón ntac con' co' ndlu' mèn co' ante ndxác cón che'n xab izlyo' loo xtàa mèn. No ndlin le' ryete mèn no ryete con' co' nde'f di's nac con' roo con' xèn co' ndli mèn xtùuz co' nca' loo mèn par ne'yòode mèn loo cón che'n Diox, gàc loo con'a xal thìb con' co' yende chó mèn li cas. Lomisque' ne, ndlin le' xtùuz chol mèn no con' co' ndoo lezo' mèn càb loo mèn gàc nado' mèna par tyubdi's mèna ante loo Crist.  
\v 6 Ngue beden par tolo tyubdi's gu' co' huen huen loo ryethe con' co' mnibe'en loo gu' li gu'. Le' sya, làth xtau'a, nalasque' ndoon par tetìin mèn co' ne'tyalte no co' ne'càbte tyubdi's loo cón che'n Crist xal mnibe'en loo mèna. 
\p  
\v 7 Hui' gu' co' huenleque' xal nac mod che'n thìb mèn no xal nac mod che'n tedib mèn làth gu', ey. Chele' chol mèn co' nzo làth gu' ndxàp yalxla's le'n lezo' mèna no ngobe' mèna nac mèna che'n Crist, leque mèna ndxàal li xtùuz tedib vez le' xalque' ngòo mèna loo cón che'n Crist, daa, ne, tataaguè' ngòon loo cón che'n Crist.  
\v 8 Crist mnibe' loon par mnibe'en loo gu' par li gu' co' ngue niin loo gu'. Lìcque', anze'f ngue toodiz non gu' cón che'n con' co' mnibe' Crist loon par niina loo gu'. Peser ndyóo gu' no ngue ta' gu' cuent axta arid ngue toodiz non gu' cón che'n con'a. Nonen no naneequen le' daa ne'thyonte tac daa axta arid mdoodiz no gu' cón che'n con' co' mnibe' Crist loo na' par li na'. Tataa ngue toodiz non gu' par tolo té'th gu' par tyubdi's gu' loo cón che'n Crist. Inacte le' daa ngue lii par yiza' xtùuz gu' par ryo xà' gu' no yitac lezo' gu' loo cón che'n Crist.  
\v 9-11 Nzo ndxep gu' co' nzo làth hues xtàa gu' co' ngue xìis no daa, no mbez gu': Lìcpe' ba'i, axta arid nè nac di's co' mque' Pab ye's loo cart ndxè', ndee. Per co'se' ngüi' na' loo Pab, iñaade tyoodi's Pab taandxè'. No co'se' ndyoodi's Pab, ne' ne' inden' na' di's co' ñii Pab, ¿lé'? 
\p Per daa indlyaste le' gu' gab loo lezo' gu' le' daa ngue li par zyeb gu' por cón che'n cart co' mque'en ye's loo gu'. Per ndxàal li mèna xtùuz no ten' mèna le'n lezo' mèna xalque' nac daa co'se' nque'en ye's loo gu', tataaque' gàc daa co'se' galen loo gu' par tyoodiz non gu'. 
\p  
\v 12 Ne'liden ryes par lalque' gàc daa con mèna o lin par thidte gàc daa con ndxep mèn co' ndyoodi's anze'f nate's leque cón che'n mèna. Prob mèna ndli con' natont tac leque mèna ndli cuent axta arid huen mèna co'se' leque mèna ngüi' xá nac mèna. No ndli mèna ñeene' ché' ta' mèna con xtàa mèna. Aa. Tataa nac mèna.  
\v 13 Per part cón chenen, indxàalte tan gust lezon loo con' co' indxàalte lin co' inacte cón chenen. Ndxe'leque', ndan gust lezon xalte nxo'f zin' Diox zin' loon par lina. Diox mxo'f zin' loon par nxo'f zin'en cón che'n gu'. Por cona, axta gust ndxan' lezon ñèen cón che'n gu', mèn ciuda Corint.  
\v 14 Ingue zibten loo zin' co' mxo'f zin' Diox loon par lina xalque' gàca chele' Diox ne'nxo'f zin'te zin'a loon ndoore' par ndyee'en loo gu'. Per ndxe'leque', Diox mxo'fque' zin' co' mxo'f zin'en loo gu'. Pues daa ngòc mèn co' nerleque' mzin loo gu' axta trè', mèn ciuda Corint, par mblon yalbàn loo gu' cón che'n di's ndac cón che'n Crist, ¿lé'?  
\v 15 Indaden gust lezon no indye'ste daa loo zin' co' mxo'f zin' tedib mèn. Ndxe'leque', ndub quee lezon láth tolo té'th gu' no tyubdi's gu' loo cón che'n Diox no tolo gàp gu' más yalxla's loo Diox, leque tiemp tolo yila's gu' loon no tolo tyubdi's gu' loo con' mnibe' Diox loon par ñibe'en loo gu'.  
\v 16 Por cona, ndub quee lezon par ga lon yalbàn cón che'n di's ndac, co' ndlu' loo mèn xá mod lyá' mèn loo con' ryes, loo mèn yèezya' che'n làaz mèn co' nziri' más tith loo gu', mèn ciuda Corint. Tataa mod ne'gòoden loo mèn co'te' ngue xo'f zin'le' tedib mèn cón che'n di's ndac par tataa mod ne'taden gust lezon cón che'n zin' co' mxo'f zin' taamas mèn xalque' ndlin zin' ndxè'. 
\p  
\v 17 Cona, ngue niin loo gu': Mèn co' lya's ta' gust lezo' loo chol con' no mèn co' lya's tye's loo chol con', bnibe' gu' loo mèna le' mèna ta' gust lezo' mèna no tye's mèna ante loo cón che'n Tad Diox.  
\v 18 Tac thìb mbi' co' ante nda' gust lezo' cón che'npe' mbi'a, no thìb mbi' co' ante ñii con' cón che'npe' mbi'a le' mbi'a nac mbi' ndac no mbi' co' nde'f di's ndxác, ne'yòode lezo' Diox ñèe Diox mbi'a. Ndxe'leque', loo mbi' co' ñii Diox con' ndac cón che'n mbi'a, loo mbi'a ndxòo lezo' Diox ñèe Diox. 
\c 11  
\s1 Pab ndyoodi's cón che'n Pab no cón che'n mèn gutyè' co' mbez nde'th mèn gutyè'a cón che'n Crist. 
\p  
\v 1 Ña'ben loo gu', mèn huesen por cón che'n Crist, gu' co' naban ciuda Corint, oj ché' co' xec gu' ndxep con daa, mastale' nden'en naquin tan ndxep gust lezon por cón che'npe' daa. Nden'en tont daa no mbíiz daa co'se' lina. Per, lìcpe' ba'i, fxec gu' con daa taandxep, yey.  
\v 2 Loo cón che'n Crist anze'f nazín' daa gu'. Por cona, part cón chenen nac gu' loo Crist, co' nee di's, xal thìb mza'yòn co' selya' no Crist. No ndlyazen lu'en gu' loo Crist xal thìb mza'yòn, co' nee di's, nac thìb mza'yòn nambìi co' tarte gàal nec thìb mbi'. Tataa ngue lin loo gu', ne, tac loo cón che'n Crist mblin loo gu' xal thìb mza'yòn co' mcàbgòn tyub no mza' thìb mbyòo no par lu' toon gu' loo Crist xal thìb mza'yòn co' be' nac thìb mza' nambìi co' gàc xin' sa'l thidte mbyòo, co' nee di's, gàc gu' che'npe' Crist.  
\v 3 Per anze'f nde no lezon cón che'n gu' tac ne' yiloa gàca loo gu' xal ngòca loo Ev co'se' mquedìi Mebizya Ev con mod ye'rsin' co' ngòp Mebizya co'se' mbix loo Mebizya, no ngòc Mebizya loo Ev xal thìb mbel', loo Ev co' ngòc ner xa'got loo izlyo' ndxè'. Le' sya, tataa mod gàc zab xtùuz gu' no tyoo xà' lezo' gu' loo mod co' mbli gu' sirv loo Crist dib nzo yéc gu' no dib nzo lezo' gu', no loo mod co' mblu' gu' loo mèn, lìcque', más mque' lezo' gu' Crist leque que' lezo' gu' chol taamas con'.  
\v 4 Per nalle', ndyaquen, lìcque' ndxàc loo gu' nquedii mèn gu' no ndryo xà' gu' loo cón che'n Crist co'se' yi'th tedib mèn loo gu' co' ngo yalbàn cón che'n tedib Jesús co' inacte leque yub Tad Jesucrist co' ngo nu' yalbàn. No ale tyac lezo' gu' yòo mèna làth gu'. No chele' thìb xpii lyàa loo gu' co' inacte Xpii Natú' co' ngulàa loo gu' co'se' ngola's gu' loo Crist, ale ta' gu' lugar yòo xpiia loo gu'. No ale más tyac lezo' gu', ndyaquen. No chele' tedib mèn, co' nac chol mèn, yi'th lo yalbàn cón che'n tedib di's ndac co' inacte di's ndac cón che'npe' Jesucrist co' ngola's gu' ndoore', ale más li gu' tyub nza gu' di's co' ryo' ro mèna leque tyub nza gu' di's co' ndryo' ron, ndyaquen. ¿Xá nee gu'? ¿Ché' inquedìide mèn gu' tataa, ndyac gu', cà'? Yende xàa. Tataaque' mod nquedìi mèn gu' tataa, yey.  
\v 5 Per led gu' cuante. Ftolo xec gu' con daa tac ndyaquen, lìcque', masque' ntac tín' daa loo zin' co' nxo'f zin'en loo cón che'n Crist leque zin' co' ngue xo'f zin' mèn co' nzo lath gu' co' mbez gu' nac mer apostl roo apostl xèn.  
\v 6 Mastale' inacte daa mèn co' anze'f huen ndxác ndyoodi's loo gu', ndyac gu', per ndxe'leque', loo cón che'n Crist naneequen no ndaquen cuent ndxácque' daa xo'f zin'en zin' ndxè' xal ndxàala. No nonque' gu' no nda'que' gu' cuent cón chenen. No nonque' gu' xal nac mod co' ndxàpen làth gu'. Tac mblu' nu' loo gu' xá nac nu' no mblu' nu' loo gu' xá mod ndli nu' con' loo gu'. 
\p  
\v 7 O ¿ché' ndyac gu' nac daa mèn co' mcua'n xquin tac asemblin ngòc daa mèn nado' làth gu', cà'? O ¿ché' ndyac gu' ilé'de nac co' mblin tac mblon yalbàn cón che'n di's ndac che'n Diox loo gu' anxle', cà'? Cona angmblin loo gu' par tolo té'th gu' par tyubdi's ndac gu' loo cón che'n Crist, ey.  
\v 8 ¿Ché' ndyac gu' mxenxù'en tmi che'n mèn co' nqueltàa loo cón che'n Diox taamas lugar por mcàayan tmi, co' nee di's, mdix mèn mcàan por mblin gast tmia le'n huiz co' mblin mandad loo gu', cà'? Yende xàa.  
\v 9 Gu' naneeque' co'se' ngo non gu'a, mquin daa tmi par gast daa. Per mastale' mquin daa con' naquin daa, ne'ngna'b yèeden tmi loo nec thìb gu' par lyath no gu' daa. Ndxe'leque', co'se' ngòc falt tmi loon, mèn co' ndxàc hues na' co' mbi'th par ned le'n yèezya' che'n làaz mèn macedon mdub tmi co' nde che loon co'se' mtel' mèna tmi loon. Tataa mod, leque daa mbli par ne'ndoo zin'ten loo gu' par ndub gu' tmi co' nde che loon tiempa. Tataaque' mod, tolo gàpen lezon par ne'tolode li xolen gu' par delant.  
\v 10 No com le' daa nanee co' huenleque' le' cón che'n Crist nac con' lìcpe', ¿lé'? por cona, ngue niin loo gu': Yende chó mèn yèezya' che'n làaz mèn acay tethon daa no li mèna par ne'tyacte lezon cón che'n mod co' anxle' ngon yalbàn cón che'n Crist loo gu'.  
\v 11 ¿Ché' ndyac gu' no ché' ngue bez gu' loo hues xtàa gu': Chonon tatua' mbez Pab loo na', yòo? No ¿chonon ndyóo gu' no mbez gu' loo xtàa gu' le' daa inque'de lezon ñèen gu' tac indaden lugar loo gu' par lyath no gu' daa, à'? Yende xàa. Naneeque' Diox no nonque' Diox le' daa nque'que' lezo' ñèen gu' axta plóthe. 
\p  
\v 12 Per mod co' ndxàpen no con' co' ndlin loo gu', co' nee di's, ne'ndaden lugar loo gu' par lyath no gu' daa, con'a toloque' lin làth gu', mèn ciuda Corint, par tau'en loo con' ye'rsin' co' ndli ndxep mèn làth gu' co' ngue cua'n mod tau' mèn loo cón che'n di's ndac che'n Crist co' ngon yalbàn no co' ndethen loo gu'. Tataa lin par ne'tolode ta' mèna gust lezo' mèna más con mod ye'rsin' co' ndxàp mèna no par lu' mèna loo taamas mèna lalque' nac mèna xal daa.  
\v 13 Pues, ryete mèn ye'rsin' co' nzo làth gu'a nac mèn co' ndyee te'th di's co' nac di's gutyè' mastale' mbez mèna nac mèna mèn co' ndxe' di's che'n Crist. Nac mèna mèn gutyè'túb loo zin' co' nxo'f zin' mèna. Ale nse' loo mèna par ndxàc mèna mèn co' ndyee te'th di's che'n Crist no xal mèn co' ndxe' di's che'n Crist. Per yalgutyè' nac co' ndlu' mèna.  
\v 14 Per part cón che'n na' co' ndxela'spe' loo Crist, con' co' ndlipe' mèna inacte thìb con' co' ngüi' mèn no ñaa mèn loo. Tac axta yub Mebizya ndlu' Mebizya loo mèn xal thìb xa' ndac tín', no xal thìb angl co' nzo loo bé', par tataa mod quedìi Mebizya mèn.  
\v 15 Chele' Mebizya tataa ndli, ne'gàcta arid nagàn loo mèn co' nac moz che'n Mebizya par se' loo mèna loo mèn le' mèna nac mèn co' ndli con' ndac no co' ndli con' nalì. Per ne'tyóode gu'. Diox tub rezque' cón che'n zin' ye'rsin' co' ndli mèna làth gu' par tyactìi mèna cón che'n con' co' ndli mèna. 
\s1 Pab ngue ta' cuent cón che'n ryethe yaltìi co' mxactìi Pab por ndxe' Pab di's cón che'n Crist loo mèn huax lugar. 
\p  
\v 16 Ngue niin loo gu' tedib vez: Yende chó gu' li xtùuz no gab gu' loo lezo' gu' le' daa nquée mbii yéc. Nacquele' gu' ndli cuent nquée mbii yéquen, bla' gu' tolo toodizen taandxepte loo gu'. No ta' gu' lugar loon par toodizen loo gu' xal thìb mbi' co' nquée mbii yéc par tye's daa chu'th loo zin' co' ngue xo'f zin'en ndxè'.  
\v 17 Con' co' ngue niin loo gu' ndxè', indyoodiztena xal di's co' ñibe' Tad Crist loon par niina loo gu'. Ndxe'leque', ndyoodizena xal thìb mbi' co' ndyac gu' nquée mbii yéc. Tataa ndlin par tan gust lezon cón che'n zin' co' nxo'f zin'en loo Crist.  
\v 18 Texal nzo huax mèn co' ndye's xalque' nac mod co' ndye's huax mèn loo cón che'n izlyo', tataaque' tan gust lezon cón che'npe' daa, ne.  
\v 19 Tac texal ndli gu' cuent anze'f ndxác gu', ¿lé'?, tataaque' fxec gu' con mèn co' nquée mbii yéc, dib nzo yéc gu' no dib nzo lezo' gu'.  
\v 20 Tac, ale nxec gu' tataa ndli no mèna gu' par ndli yèe gu' mandad loo mèna. No nda' gu' lugar ngòc mèna jef loo gu' par ñibe' yèe mèna loo gu' loo con' co' inacte che'npe' mèna. No nda' gu' lugar nxìis no mèna gu'. No más de cona, ale nda' gu' lugar nguis mèna rloo gu' co'se' indyubdi's ndacte gu' no co'se' indxònte gu' ro mèna mastale' yende chó derech ndxàp mèna ñibe' yèe mèna loo gu'.  
\v 21 Lìcpe' ba'i, axta nthyon daa no nde no lezon niin loo gu' xal ndli no mèn co' nzo làth gu'a gu', mèn co' anze'f ndxàc nayi' loo gu'. Por derech, nzyeb daa lin tataa loo gu' xal ndli mèna loo gu', cara. 
\p Per com le' mèna mbli ryes nda' mèna gust lezo' mèna por cón che'n gu', nalle' daa, ne, li ryes tan gust lezon con gu' xal thìb mbi' co' nquée mbii yéc. Por cona, bìn gu' di's co' niin loo gu' ndxè':  
\v 22 Nac mèna mèn bin mèn hebre, ¿lé'? Daa, ne, nac mèn bin hebre. Nac mèna mèn nación Israel, ne, ¿lé'? Daa, ne, nac mèn nación Israel. Nac mèna bin mbi' co' ngro' lèe Abraham, ¿lé'? ¿Cón ndyac gu', à'? Daa, ne, nac bin Abraham.  
\v 23 ¿Ché' nac mèn co' nzo làth gu'a mèn co' nxo'f zin' cón che'n Crist, cà'? Lìcque', tataa mbez mèna, ¿lé'? Hui' gu' nexa. Niin thìb con' loo gu' nalle' xal mèn co' nquée mbii yéc: Daa más ngue tee xo'f zin' cón che'n Crist leque mèna. Tac más nde teele' nda' mèn chenen ned ngue tee'en leque mèna. Huax vez nde teele' más mque' mèn daa lezi'f por cón che'n Crist leque mèna. No axta ne' ne' tan cuent plá vez mblya's mèn guth mèn daa por cón che'n Crist. Huax vez mblyá' mblyá' daa loo yalguth.  
\v 24 Ga'y vez mda' mèn nación Israel chenen con cuart axta mblàa mèna gal psi' byè' ya' cuart laden.  
\v 25 Son vez mbuaa'd yaa mèn daa con yaa. Thìb vez mbuaa'd quèe mèn daa. Son vez mdyep yooyaa le'n níttó' co'te' ngon co'se' mdoon loo níttó' par ngua que tee xo'f zin'en cón che'n Tad Jesucrist. Thìb vez, thìb huiz no thìb yál' mque tee xo'fen loo níttó' co'te' nac más tith ro níttó' tac mdyuhuanen loo níttó'.  
\v 26 Huax vez mque tee'en làaz mèn tith. Huax vez ngòc con' ryes loon huax mod. Ngòc con' ryes loon co'se' ndri'then yó'be'. Ngòc con' ryes loon co'te' ndryo' huan' loon. Ngòc con' ryes loon làth leque mèn co' nac mèn gulàazen. Ngòc con' ryes loon, ne, co'se' mque tee'en làaz mèn tith. Ngòc con' ryes loon co'se' mque tee'en le'n chol ciuda. Ngòc con' ryes loon huax vez co'se' nguri'then ned huan ned yii den. Ned mque tee'en ngòc con' ryes loon loo yòoyaa loo níttó'. Ned mque tee'en ngòc con' ryes loon làth mèn gutyè' co' mbez ndxàc hues xtàa na' loo cón che'n Crist, mèn co' nse' loo di's co' nac di's ndac.  
\v 27 Anze'f nalyat ndxàca loon. No ndxàc ngòc nguàal con' loon. Huax vez ndxàca loon, yende mod gàten. No ndxath nít daa. Huax vez xlat daa. Yende con' huan. Huax vez mbyan' daa ned yó'. Mdin xìl daa axta plóthe. Mque tee'en yende xaben. No yende xobisen par capen. 
\p  
\v 28 Más de cona, con' co' más ñibe' loon par lin atate huiz nac: Naquin too neren no lasen loo mèn co' ndxela's co' nqueltàa chol lugar.  
\v 29 ¿Chó mèn ndoo xà' lezo' no nguu's lezo' mèna loo cón che'n Crist no ne'ten'ten cón che'n mèna, à'? ¿Chó mèn hues na' nzo co' ndli mèn ngòc nguàal con' loo, no daa, ché' ngue li gu' cuent ne'nden'ten cón che'n mèn hues na' co' ngozi'f no co' ngoga's ngòc nguàal con' loo, cà'? Nden'que' daai.  
\v 30 Chele'i naquin tan gust lezon no chele' daa ndlya's tye's ndxep, le' sya, tye's daa por con' co' ndlu' cón che'n daa xal thìb mbíiz co' yende con' ntac co' mbuu's co' yende fuerz. No tye's daa loo con' cón chenen co' ndyaquen yende con' ntac.  
\v 31 Pues Diox co' nac xud Tad Jesucrist na' co' ndxàal gab na' Diox roo Diox xèn no Diox natú' nac Diox le'n lín' co' ntlo, no le'n lín' co' ndxeloo, no le'n lín' co' ne'lith node thidtene, Diox nanee lìcque' nac di's co' ngue niin loo gu'.  
\v 32 Co'se' ngon le'n ciuda Damasc, gobernador co' mbli ryethe con' mnibe' Rey Aret, gobernadora mbli mandad mtau' solndad rye lad loon ro ciudaa par tataa mod tyenxù' solndad daa.  
\v 33 Per ndxe'leque', mèn ciuda Damasc co' nqueltàa loo cón che'n Diox ne'nglá'de daa. Mblo mèna daa le'n thìb cardor ryal. Mtelàa mèna daa loo yoo ro ftoo ro thìb ventan co' ndub lad ftoo che'n ciudaa. Tataa mod mblyá' daa ya' solndad che'n gobernador. 
\c 12  
\s1 Diox mxo'f loo cón che'n Diox loo Pab no mblu' loo Diox cón che'n Diox loo Pab. 
\p  
\v 1 Yende chó quix càan no yende cón lin gan par leque daa ndyoodi's cón chenen. Más huen tyoodiz non gu' cón che'n con' co' mxyo'f loo loon cón che'n Diox no cón che'n con' co' mbui' loo loon cón che'n Diox co' mbli Diox mbui' loon.  
\v 2 Ndxàcle' sida lín' ngòc thìb con' loo thìb mbi' co' ndliben, co' nee di's, nac leque daa. Mbi'a ngòp yalxla's loo Crist. Diox mbli nguáp mbi' loo bé' co'te' nac son cua' bé'. Per ba' se' ne'needen ché' nguáp mbi' loo bé' xal nac mbi' o ché' ante xpii mbi' ngro' loo mbi' par nguáp xpii mbi' loo bé'. Ne'needen xá mod ngòca loo mbi'a, cara. Ndan cuent ante Diox nanee con'a.  
\v 3 Ndlibe'quen mbi'a, co' nee di's, daa nac mbi' co' ngua loo bé'. Per ba' se' ne'needen ché' nguáp mbi' xal nacpe' mbi' o ché' ante xpii mbi' nguáp loo son cua' bé'. Ante Diox nanee xá ngua mbi'.  
\v 4 Ante ndan cuent nguáp mbi' loo bé' co'te' nac son cua' bé' co' lèe parais. Tya mbìn mbi' di's co' mdoodi's no Diox mbi'. Di's co' mbìn mbi'a, yende chó gác co xo'f co' mda' Diox cuent loo mbi'. No indlya'ste Diox gòn nec thìb mèn cón che'n di'sa.  
\v 5 Loo cón che'n con' co' mxyo'f loo loo mbi'a no co' mbui' loo loo mbi'a co' nac daa, cón che'n con'a ndli par tye's daa ndxep. Per cón che'npe' daa, yende mod tye's daa ne' por chu'th. Ndxe'leque', tye's daa cón che'n prob laden co' nac xal lad thìb mbíiz co' mbuu's co' ngulàa fuerz co' yende cón ntac.  
\v 6 Por cona, ngue niin: Mastale' leque daa ndlyaz tyoodizen cón chenen par tye's daa ndxep, inacte con'a ndli par gàc daa xal mèn natont co' nquée mbii yéc. Tac por part cón chenen, daa ante ndyoodi's di's co' nac lìcpe' cón chenen loo mèn. Ndxe'leque', ndxàp lezon par ne'taden cuent co' nac cón che'npe'en loo mèn. Tac indlyasten li ndxep mèn xtùuz o gab mèna loo lezo' mèna: Masre' con' ndan cuent cón chenen. Ante ndlyazen li mèna xtùuz cón chenen xal ngue hui' mèn loon no xal ndxòn mèn cón chenen co'se' ndyoodiz non mèn.  
\v 7 Con' co' mbli Diox mxyo'f loo loona, mbli ante mbui'en no ante gunaan. Per par ne'gàcte daa mèn co' anze'f tye's por cón che'n con'a, mbli Diox ale, ndxe'leque', mden'en thìb yalnè laden xal thìb yis co' nguaa'd laden. Diox mbli mden'en yalnèa laden xal thìb herramient co' ndli Mebizya us par nden'en yalnèa laden par tetìi Mebizya daa.  
\v 8 Nde teele' son vez mna'ben loo Tad Diox le' Tad Diox teche yalnè co' nden'en laden ndxè'.  
\v 9 Per ale ndxe'leque', taandxè' gunee Tad Diox loon: Fxec, Pab, tac yende cón más nquin li nonl. Tua'the nac con' co' angndlin lool. Ndxe'leque', ante nquin nonl le' daa axta arid nque' lezon ñèenl. Más ndxú' loo mèn ryethe con' roo con' xèn co' nzo la's niin no con' co' nzo' la's yan co'se' ndlyath non mèn co' yende chó fuerz ndxàp no loo mèn co' mbuu's co' yende cón ntac. 
\p Por cona, dib nzo lezon tolo tye's daa no tolo ndan gust lezon, mèn ciuda Corint, cón che'n prob laden por nac daa mèn co' nguu's co' ngulàa fuerz co' yende cón ntac, par tataa mod yú' le' Tad Crist ndli ndxàc con' roo con' xèn loo Tad Crist por cón che'n zin' co' nxo'f zin'en.  
\v 10 Por cona, por cón che'n ryethe con' co' ndxàc loon nalle', ale ndyac lezon por cón che'n laden co' nac xal thìb mbíiz. Tataa ndlin mastale' ntetìi mèn daa no ndxàc loon ndxetub con' nquin daa, no mastale' ndyub ngu's mèn daa, no mastale' ndxàc huax yaltìi loon por cón che'n Crist. Tac co'se' ndxàca loon xal thìb mbíiz co' nguu's co' ngulàa fuerz, sya, nden'en ale sate más ndxòo fuerz no valor che'n Diox loon. 
\s1 Trè' ndlu' le' Pab anze'f ndyóo cón che'n mèn co' nqueltàa loo cón che'n Diox, mèn co' nzo ban ciuda Corint. 
\p  
\v 11 Per nalle', mèn Corint, co'se' ngue que'en ye's co' nac cart ndxè' loo gu' no ndyoodiz non gu' loo cart ndxè', ale leque daa mbli par ngòc daa xal thìb mèn co' nquée mbii yéc, ndyaquen. Per bla' gu' con'a tac gu' mzi mchep daa loo con'a. Más huen ngàca chele' gu' ngli par ngdu' daa loo gu', ndyaquen. Tac thìb mod tedib mod, lalque' nac daa con taamas mèn co' nzo làth gu', mèn co' mbezpe' gu' nac mèn co' ndxe' di's che'n Crist, mèn co' ndyac gu' nac más mèn roo mèn xèn làth gu', mastale' ndyaquen, no ndyac gu', yende cón ntac daa làth gu', ¿lé'?  
\v 12 Más de cona, Diox mblu' no be' ngue lu' Diox daa loo gu' le' daa, lìcque', nac mèn co' ndxe' di's che'n Crist. Non gu' le' daa ncha'la'sque' loo gu'. No non gu' le' daa mblu' loo gu' cón che'n zin' co' mxo'f zin' Diox loon tac Diox mbli huax señ no huax yalguzye' co' nac con' roo con' xèn loo gu' por cón chenen.  
\v 13 ¿Cón ndyac gu' no cón nden' gu' le' ndyac gu' ingoden cuent gu' no indyu'de gu' loon xal ndyu' taamas mèn co' nqueltàa templ taamas lugar, yey? ¿Ché' nden' gu' le' daa ne'nglide cas loo gu' por ne'ngniiden loo gu' nglyath no gu' daa, cà'? Chele' gu' ndli cuent tataa mbli non gu', bli gu' favor, fteri'th ftecan' gu' con' mden' gu' mblin loo gu' ndxè' por ne'ngna'bten ayud loo gu' par lyath no gu' daa. 
\p  
\v 14 Hui' gu' nexa. Nalle' mbyon vez ngue li naben daa par gal neen máa gu'. Co'se' galen loo gu', ne'li xolten gu'. Tac ne'gal cuanten cón che'npe' gu' co' ndxàp gu' par gàca chenen. Ndxe'leque', ndlyazen gàc gu' mèn co' tyal par ñibe'pe' Diox loo gu'. Tac gu' nonque' le' thìb gundan co' nziri' xin', xin' gundana indxàalte co' centav par huàa gundan xin' gundan. Ndxe'leque', gundan huàa xin' gundan.  
\v 15 Part cón chenen, dib nzo yèquen no dib nzo lezon tolo lin gast cón chenen par tataa mod càba con' ndac loo gu'. Co'se' ndlu'en loo gu' le' daa nque'que' lezo' ñèen gu', no ale más nazab nac co' ndli no gu' daa, ¿xá nee gu'? ¿Ché' huen nac con' co' ngue li no gu' daa, ndyac gu', cà'? Ale inque'de lezo' gu' ñèe gu' daa, ¿lé'? 
\p  
\v 16 Per mastale' tataa ndli gu' cuent, gu' nonque' no naneeque' gu' le' daa thidteneque' ne'ngli xolten gu'. Na naneeque' le' ndxep gu' mbez: ¡Aa que nalas mbi' ba', cara! Ncua'n mbi' mod nquedìi mbi' na' par yòo na' lad che'n mbi', ¿lé'?  
\v 17 ¿Ché' mbli gu' cuent mquedìin gu' por mtel'en plá mèn co' mbi'th nee máa gu', cà'? Yende xàa.  
\v 18 Daa mna'b loo Tit yi'th nee Tit máa gu' par nedrè'. No thidte junt mtel'en Tit con tedib mbi' co' ndxàc hues na' par mblyath no mbi' Tit mbi'th Tit. Co'se' mbi'th Tit loo gu', ¿ché' mquedìi Tit gu' co'se' mbi'th nee Tit gu' pezea, cà'? ¿Ché' ndli gu' cuent ilìcte thidte ndli ryop nu' Tit xtùuz par thidte nxo'f zin' nu' zin' ndxè', cà'? Thidte ndxe' nu' zin' ndxè', ey. 
\p  
\v 19 ¿Ché' ngue li gu' cuent axta nalle' be' ngue tuben razon cón chenen loo gu', cà'? Tyè'. Loo Diox nduben razon cón chenen loo gu' tac daa nac thìb mbi' co' ndyoodiz no gu' xal ñibe' Crist loon. Tac ryete con' co' ndlin loo gu', gu' co' anze'f nque' lezon ñèen, tataa ndlina loo gu' par tataa mod ryoo xyèn gu' no par tolo ta' gu' cuent no tolo té'th gu' cón che'n Crist.  
\v 20 Tac láth ngue que'en ye's co' nac cart ndxè' loo gu', anze'f ndyóon no nden'en le'n lezon, no nda no lezon co'se' gal neen máa gu', ne'yòode lezon loo con' co' ngue li gu'. No ne' ne' yòo lezo' gu' loo mod co' lin con' co'se' gal lina loo gu'. Nden'en le'n lezon thìb descuid zyal yalgyoo làth gu' co'se' zin daa làth gu'. Nda no lezon, thìb descuid, le'pe' sya, ndxep gu' yàn lezo'. Taandxep gu' na, yecloo ñèe gu' xtàa gu'. Taandxep gu' na, anze'f ndxàc mèn co' nde yath par càb con' ndac loo gu'. Ne'gàpte gu' mod ñèe gu' xtàa gu'. Taandxep gu' na, gàc mèn co' ñii yèe ñii tìi cón che'n xtàa gu'. Taandxep gu' na, gàc mèn co' chi'x loo cuent yix no mèn co' nse' loo cuent yix. La's gu' loo thìb xtàa gu' no loo tedib xtàa gu'. Taandxep gu' na, gàc mèn co' anze'f ndye's loo xtàa gu'. Taandxep gu' na, gàc mèn co' ndoote li ngòc nguàal con' con xtàa gu'.  
\v 21 Lomisque', nde no lezon, thìb descuid, co'se' gal neen máa gu' par nedrè', ne'stre'fque' Diox daa li loon thyon daa tedib vez por cón che'n ndxep gu'. Làth xtau'a, lyàa nít ngudloon tant xi lezon cón che'n huax gu', gu' co' ndxàcle' lín' mcua'n xquin no xtol gu'. Más de cona, mcua'n mèna xin' huan mèna. No indxàpte mèna mod. Per ndli mèna chol con' ye'rsin' co' ndryo' ndlyen' lezo' mèna li mèna. No axta nalle' tarte lyàa yéc mèna no tarte lyàa lezo' mèna par zye' mod ye'rsin' co' mque no mèna loo ryethe con' zab co' mbli mèna. 
\c 13  
\s1 Trè' ndlu' le' Pab mtan' di's loo mèn ciuda Corint co' nqueltàa loo cón che'n Diox ne'yathla'ste mèn di's co' ndxab Pab. No ndlu' trè' le' Pab ngue nii Diox lult vez loo mèn. 
\p  
\v 1 Con con' ndxè', mbyon vez nde teele' ndal neen máa gu' par nedrè'. Co'se' gal neen máa gu' nalle' tub rezen cón che'n gu' loo chop mèn o son mèn co' ta' cuent nalì cón che'n con' co' ndxàc làth gu'. Le' sya, tataa mod ryo xo'f con' co' ndxàc loo gu' no yumbìi loo di's no loo cuent co' ndxetoo làth gu'.  
\v 2 Daa guniile' cón che'n con' ndxè' loo gu' co'se' mbryop vez mbal neen máa gu'. No nalle' beren ngue niina loo gu' tedib vez loo cart ndxè' xalque' thìb mbi' co' nzo làth gu', mastale' yende daa loo gu' nalle'. Per ndxàc con' ndxè' loo gu' tac inzoden làth gu'. Por cona, ngue que'en ye's loo gu' nalle' co' nac cart ndxè', loo gu' co' ndxàcle' lín' mcua'n xquin gu' no xtol gu', no loo taamas gu', chele' daa bere gal loo gu' tedib vez, syase, ya ne'teri'then no ne'tecan'ten cón che'n con' ye'rsin' co' nzi li gu'.  
\v 3 Co'se' ñee gu' tataa lin loo gu', axta syare' ta' gu' cuent co' huenleque', lìcque', nzo no Crist daa no nac Crist xa' co' ndyoodiz no gu'. Per, lìcpe' ba'i, nee gu' no ten' gu' inzode Crist loo gu' xal thìb mbíiz co' nguu's co' ngulàa fuerz. Per ndxe'leque', ten' gu' ndxàp Crist ryethe con' la's nii Crist no la's ya' Crist par lyath no Crist gu' chele' gu' tyal ta' gu' di's par lyath no Crist gu' xal naquin gu'.  
\v 4 Lìca, co'se' mque' mèn Crist loo cruz, ngòca loo Crist xal loo thìb mbíiz co' mbuu's tac tataa mod mnibe' lezo' Diox no tataa mod mnibe' lezo' Crist ngòca loo Crist. Per nalle' naban Crist por cón che'n ryethe con' roo no con' xèn co' nzo la's nii Diox no co' nzo la's ya' Diox. Lomisque' mod ne, Diox indlá'ya'de daa mastale' ñaaleque' daa xal mbíiz co' mbuu's xalque' ngòca loo Crist. Per ndxe'leque', daa lu' loo gu' por cón che'n con' co' ndxàc làth gu'a, lìcque', ndxàpen con' la's niin no la's yan xalque' ndxàp Crist con' la's nii Crist no la's ya' Crist tac ndlyath no Diox daa par tolo lin sirv loo gu'. 
\p  
\v 5 Fteche ftexyath gu' xtùuz gu' no lezo' gu' par ñee gu' ñeene' ché', lìcque', ndxela's gu' loo Tad Jesucrist na'. Làth xtau'a ne, leque gu' tub rez cón che'n gu' par ñee gu' ñeene' ché', lìcque', ndxela's gu' loo Jesucrist. ¿Ché' inda'de gu' cuent cón che'npe' gu' le' Jesucrist nzo noque' gu', cà'? Ne'stre'fque', co'se' teche texyath gu' xtùuz gu' no tub rez gu' cón che'n gu' no ryo xo'fa loo gu', lìcque', tarte yila's gu' loo Jesucrist.  
\v 6 Per daa ndub queeque' lezo' le' gu' non no ta' gu' cuent le' daa thidteneque' ndxela'sque' loo Crist.  
\v 7 Nalyat mbezen loo Diox por cón che'n gu' par ne'lide gu' nec thìb con' ye'rsin'. Imbezten Diox cón che'n gu' par tyu' daa loo gu' ne' ne' par yòo lezo' gu' cón chenen. Ndxe'leque', mbezen Diox ante par tolo li gu' con' ndac mastale' nden' gu' indxòode lezo' Diox loo cón chenen. Yende chó mport nzo lezon con'a.  
\v 8 Yende mod lin nec thìb con' co' ntau' no con' co' ncà loo di's ndac co' nac lìcpe'. Ndxe'leque', ante ndlin xalque' ñibe' di's ndac co' nac lìcpe' loon.  
\v 9 Por cona, ndyac lezon co'se' ante ndxú' daa loo gu' xal thìb mbíiz co' nguu's no co' ngulàa fuerz. No tyac lezon co'se' gàc gu' mèn co' ndxàp valor no fuerz loo cón che'n Crist. No, lìcque', ndlyazen le' gu' tolo ryoo xyèn loo cón che'n Crist par té'th gu' no tyubdi's ndac gu' loo Crist axta plóthe.  
\v 10 Por cona, ngue que'en cart ndxè' loo gu' mastale' yende daa làth gu' par gàca, co'se' gal neen máa gu', nec thìb mod no nec tedib mod ne'gàc nayi'den no ne'yáp di'sten loo gu'. Lìcque', ndxàpen con' la's niin no con' la's yan par lina tataa xal mnibe' Diox loon par lina. Mbli Diox con'a loon ante par lin le' mèn ryoo xyèn loo cón che'n Crist par té'th mèn no tyubdi's ndac mèn loo Diox. Ne'nglide Diox con'a loon par too xà'en lezo' mèn loo cón che'n Crist. 
\p  
\v 11 Per nalle', con' ndxè' nac lult di's co' ngue que'en ye's loo cart ndxè' loo gu', mèn huesen por cón che'n Jesucrist. Ndlyazen Diox huen nda gu', ndee gu'. Ndlyazen le' gu' que tee ban lì loo Diox par gàc gu' mèn nalì no mèn nambìi loo Diox. Fcua'n gu' mod tegán gu' lezo' thìb xtàa gu' no tedib xtàa gu'. Ndlyazen thidte li gu' xtùuz loo cón che'n Diox. Ndlyazen nagàl yo lezo' gu' loo Diox no thidte cue ban gu' rye nda gu' no rye ndye'th gu' làth xtàa gu'. Chele' gu' tataa li, le' sya, Diox co' ndli par ndxu' ndxàl lezo' mèn loo Diox, no Diox co' nque' lezo' ñee rye mèn, Diox nzo noque' gu' thidtene.  
\v 12 Nabe'ste gunii gu' Diox loo thìb xtàa gu' no loo tedib xtàa gu' xalque' nac mod ndac co' ndxàp gu' co'se' ñii gu' Diox loo xtàa gu'.  
\v 13 Ryete mèn co' ndxàc hues xtàa na' co' ngro xà' loo cón che'n xab izlyo' co' ngòc che'npe' Diox, mèn co' nzo non trè' co' ndxàc hues na' por cón che'n Crist, ngue nii Diox loo gu' loo cart ndxé', ne. 
\p  
\v 14 Ndlyazen le' Tad Jesucrist tolo li anggàc con' ndac loo gu'. No ndlyazen tolo té'th gu' no non gu' susque' nque' lezo' Diox ñee Diox ryete gu'. No ndlyazen le' Xpii Natú' toloque' lyath no gu' par thidte gàc xtùuz gu' no thidte gàc lezo' gu' loo cón che'n Crist. Con' ndxè' nac co' ndlyazen gàc loo gu', mèn cuida Corint. Taandxè' gàca loo gu', ndee gu'.