\id 1TI  
\h 1 TIMOTEO 
\toc1 Nerleque' Cart Co' Mque' Pab Ye's Loo Thìb Mybòo Co' Ngro' Lèe Timote 
\toc2 1 TIMOTEO 
\toc3 1 Ti. 
\mt1 Nerleque' Cart Co' Mque' Pab Ye's Loo Thìb Mybòo Co' Ngro' Lèe Timote 
\c 1  
\s1 Pab ngue que' ye's loo Timote. 
\p  
\v 1 Daa, Pab, nac thìb mbi' co' ndxe' di's cón che'n Jesucrist ned ndyeen loo mèn rye ned xalque' mnibe' Diox loon, Diox co' ntelá' mèn loo con' ryes, no xalque' ñibe' Tad Jesucrist loon. Por cón che'n Jesucrist nzi quee lezo' na' cón che'n con' co' gàc loo na' yiloa.  
\v 2 Ngue que'en ye's ndxè' lool, Timote, lùu co' nac xal xgan'pe' daa loo cón che'n co' ndxela's na' cón che'n Jesucrist. Anze'f ndlyazen le' Diox xud na' no Tad Jesucrist na' li anggàc con' ndac lool. Ndlyazen lyat lezo' xud na' Diox no Tad Jesucrist na' ñèe xud na' Diox no Tad Jesucrist na' lùu. No ndlyazen le' Diox xud na' no Tad Jesucrist na' li nagàl yo lezo'l loo ryethe con' no que tee banl rye ndal no rye ndye'thl làth xtàal. 
\s1 Trè' ngue lu' Pab cón che'n xley' co' nac xley' gutyè' co' ndlu' ndxep mèn loo xtàa mèn. 
\p  
\v 3 Fte' lezo'l xalque' guniin lool ndoore' co'se' tenen ned gan par ned le'n yèezya' che'n làaz mèn macedon par tolo yan'l le'n ciuda Efes par la'sl no ñibe'l loo ndxep mèn co' ndxela's loo cón che'n Diox por cón che'n Jesucrist, mèn co' nqueltàa tya, par ne'lu'de mèna chol di's co' nac tedib xley' loo taamas mèn tya. Tataa bli xal guniina lool.  
\v 4 Ne'ta'del lugar loo mèna tyub nza mèna loo chol cuent co' nac cuentgool no di's co' ndlu' cón che'n mèn nación Israel co' nda' mèn cuent loo xtàa mèn co' nac cón che'n bin mèn co' mban póla póla. Thidtene ne'lá'de mèna no ne'cuedte mèna chele' lùu ne'tau'te loo di's co' ndyoodi's mèna. Cuenta nac thìb cuent co' angndyoodi's mèn no angndxòn mèn. Nec thìb mod ndlyath no di'sa no cuenta mèn loo cón che'n co' ndlu' Diox loo na' cón che'n co' ndxela's na' cón che'n Crist par altantleque' cue mèn loo cón che'n Diox no xal ndxàal tyubdi's na' loo Diox. Cona, beren, ngue ñibe'en lool, Timote: Tolo blu' cón che'n Crist loo mèna. 
\p  
\v 5 Tac con' ndxè' nac co' ñibe'pe'en lool le' lùu lu' loo mèn gàp mèn thidte xtùuz no gàp mèn thidte lezo' mèn loo cón che'n Diox co' ndxela's mèn par tolo que' lezo' mèn Diox no Crist, no que' lezo' mèn ñèe mèn xtàa mèn thìb lì yéc mèn no thìb lì lezo' mèn. No ñibe'l le' ryethe xtùuz co' ndyro' lezo' mèn gàc thìb xtùuz ndac. No ñibe' loo mèn le' mèn, lìcque', yila's loo cón che'n Crist co' nac lìcpe'.  
\v 6 Ngue niin lool, ne, Timote: Nzo ndxep mèn co' ne'ndalte li co' ñibe' Diox. Mèna mdoo xà' lezo' loo cón che'n Tad Crist no ngro xà' mèna loo cón che'n Diox. Mèna mdyuhuan loo cón che'n Diox por nzi tee yòn mèna no nzi tee toodi's mèna ante di's co' yende cón ntac.  
\v 7 Mèna ndlya's gàc maistr par lu' mèna cón che'n chol xley' loo mèn. Per prob mèna, axta ne' ne' inda' mèna cuent cón ndlu' mèna no cón ndyoodi's mèna. No axta ne' ne' ñee mèna cón nac co' ngue li nèe mèna loo xtàa mèna con dibaxla's par ñee mèna ñeene' ché', lìcque', nac con'a no di'sa xal ñibe' Diox loo ley che'n Moisés par lu' mèna loo xtàa mèna. 
\p  
\v 8 Per ndxe'leque', na' naneeque' huenque' nac yalnibe' che'n ley co' mxo'f Moisés loo mèn póla chele' mèn tyubdi's loo rye con' no ndlu' mèn loo xtàa mèn, con' co', lìcque', ñibe'pe' ley co' mxo'f Moisés loo mèn xal ndxàal li mèn xal ñibe' Diox.  
\v 9 Per naneeque' na' no nonque' na' le' Moisés ne'ntan'te leya par ñibe' leya loo mèn nalì no loo mèn nambìi. Ndxe'leque', leya mxyo'f par ñibe' leya loo mèn brut; par ñibe' leya loo mèn naad no loo mèn nguud; par ñibe' leya loo mèn co' indlide cas loo Diox; par ñibe' leya loo mèn co' ndxàp xtol; par ñibe' leya loo mèn ye'rsin'; par ñibe' leya loo mèn co' indlide cas loo cón che'n Diox; par ñibe' leya loo mèn co' ndxuth xud no loo mèn co' ndxuth xna'; par ñibe' leya loo mèn co' ndxuth xtàa;  
\v 10 par ñibe' leya loo mèn co' ncua'n xin' huan; par ñibe' leya loo mènbi' co' ndli yalmbi' con xtàabi' mènbi'; par ñibe' leya loo mèn co' ndli huan' myen' bix co' nac xin' chol mèn; par ñibe' leya loo mèn co' ngosua' yalgutyè'; par ñibe' leya loo mèn co' nde'thxù' lèe Diox; par ñibe' leya loo taamas mèn xal nac mèn ndxè' co' nac ngolo ngola's loo xley' ndac ndxè'.  
\v 11 Cón che'n di's ndac co' ngue lu'en lool ndxè', Timote, thidtene ndyeei xalque' ndlu' di's ndac che'n Diox co' ndlu' xá mod lyá' mèn loo con' ryes, Diox co' ndyac lezo' thidtene. Cón che'n di's ndac ndxè' ngòc zin' co' mxo'f zin' Diox loon. 
\s1 Pab ngurez: Diox quix U', Diox, tac U' anze'f mblyat lezo' ñèe U' daa. 
\p  
\v 12 Mbezen Diox quix U', Tad, loo Tad Jesucrist na' tac Tad Jesucrist mbli par ngòpen fuerz xal nquin daai. Tad Jesucrist naneeque' le' daa ndyooque' altant no ndyubdisquen loo ryethe con' co' ñibe' Tad Jesucrist loon. Por cona, mdoo Tad Jesucrist daa par xo'f zin'en zin' ndxè'.  
\v 13 Per co'se' ndoore' gàc con' ndxè' loon, ngòc daa mèn co' gunii yèe gunii tìi cón che'n Diox. Ngòc daa mèn co' mque tee mdub ngu's mèn co' ngòo loo cón che'n Diox por cón che'n Crist. Ngòc daa mèn nayi' axta plóthe. Per ale mastale' mblin ryethe con'a, ale ndxe'leque', mblyat lezo' Diox gunèe Diox daa tac mblin ryete con'a xal mèn co' nau' loo no xal mèn co' nau' yéc loo cón che'n Diox. Ne'needen cón ngulàa yéquen no cón ngulàa lezon mblin con'a. Mblina tac tarte yilazen loo Tad Crist.  
\v 14 Per mastale' ale tataa ngòc daa, ale le'le' sate más mbli Tad Diox angngòc huax con' ndac loon. Crist mbli le' daa ndxàp yalxla's loo Diox. Le' sya, Crist angmbli loon par nque' lezon Diox. No nque' lezon ñèen mèn co' ndxàc hues xtàa daa, ne, tac ndxàpen yalxla's loo Diox tataa mbli Diox loon por thidte mqueltàa non Jesucrist nalle'. 
\p  
\v 15 Di's co' ngue que'en ye's lool ndxè' nac thìb con' lìcpe', Timote. Ndxàal ta' ryete mèn lugar no yila's ryete mèn cón che'n di's ndac ndxè' co' ndlu' le' Crist Jesús mbi'th loo izlyo' par tí' no làa Crist Jesús mèn co' ndxàp xtol loo con' ryes. No ale ndyaquen, daa nac nerleque' thìb mèn làth rye mèn co' ndxàp xtol.  
\v 16 Por cón che'n con' mblin láth ngòc daa mèn co' nau' loo no mèn co' nau' yéc co'se' ngòc daa nerleque' mèn ye'rsin'a, ale mblyat lezo' Diox gunèe Diox daa. Tataa mbli Jesucrist par mblu' Jesucrist daa loo mèn por cón che'n con' co' ngòc loon le' Diox anze'f ncha'la's tín' loo mèn. Ryete mèn nanee looque' xal mque tee lin. Por cona, Diox mbli ngòc daa thìb mbi' co' mblu' cón che'n xá mod susque' ncha'la's Diox ñèe Diox mèn, mèn co' yila's loo Crist par yòo ban no mèna Diox thidtene yìloa.  
\v 17 Por cona, li na' par gàc con' guryath no con' guryèn ante loo Diox co' nac thìb rey co' ñibe' thidtene, Diox co' ne'gathte thidtene, Diox co' indxú'de loo mèn, Diox co' angolux co' thidte ndxác. Loo Dioxa ndlyazen gab mèn con' roo no con' xèn le'n lín' co' ntlo, no le'n lín' co' ndxelo, no le'n lín' co' ne'lith node thidtene. Thidtene taandxè' gàca. 
\p  
\v 18 Timote, lùu co' nac xal xgan'pe' daa loo cón che'n Diox, ngue ñibe'en lool par lil con' ndxè' xalque' ndyubdi's ndac thìb solndad co' ndyee loo xó'. Bli con' ndxè' xal nac con' ndac co' nac xtùuz co' nzo le'n lezo'l co' nac cón che'n co' gunii no co' mde'th mèn co' ngòc hues na' loo cón che'n Diox cón che'n lùu. Mèna gunii cón che'n lùu por lèe Diox.  
\v 19 Fquenap xtùuzl par que nol xtùuz ndac no par ne'tyoo xà'de lezo'l loo co' ndxela'sl. Tac nzo ndxep mèn co' inquenapte xtùuz co' ndli mèn. Leque mèna mblá'ya' mèna loo xtùuz ndac mèna. Mèna ngro xà' loo co' ndxela's na'. Leque mèna ngue teza' xtùuz mèna par ne'yila'ste mèna más loo co' ndxela's na'. Mèna mdyuhuan loo con' ngola's mèna loo cón che'n Diox.  
\v 20 Làth mèna ngo thìb mbi' co' ngro' lèe Himene no tedib mbi' co' ngro' lèe Alejandr. Ryop mbi'a mblàan cón che'n mebizya par li Mebizya loo ryop mbi'a xal nee lezo' Mebizya no par té'th mèna ya ne'tolode ñii yèe ñii tìi mèna cón che'n Diox par texi mèna lezo' Diox. 
\c 2  
\s1 Pab ngue lu' xá mod ndxàal cuez mèn Diox. 
\p  
\v 1 Nerleque' con' co' más ndlyazen lil, Timote, bnibe' loo mèn co' ndxela's co' nqueltàa loo cón che'n Diox por cón che'n Crist trè', ña'b mèna loo Diox, no cuez mèna Diox, no teri'th mèna di's loo Diox, no gab mèna: Diox quix U', Diox, loo Diox por cón che'n ryete mèn.  
\v 2 Ndxàal cuez mèna Diox por cón che'n ryethe mèn co' ndxàc gobiern chol nación no chol estad par ta' mèna lugar nagàl que tee ban na' no cue na' rye nda na' no rye ndye'th na' no par li mèn cas loo Diox xal ñibe' Diox loo mèn, no thidte que tee ban ndac mèna loo xtàa mèna.  
\v 3 Tac con' co' ngue niin loo gu' par li gu' nac thìb con' ndac. No naca thìb con' co' ndxòo lezo' Diox, Diox co' nac xa' co' ntelá' na' loo con' ryes.  
\v 4 Diox ndlya's ryete mèn lyá' loo con' ryes. No ndlya's Diox ta' mèn cuent no té'th mèn cón che'n di's ndac co' nac lìcpe'.  
\v 5 Tac thidte Diox nzo. No thidte mbi' co' nteri'th di's cón che'n mèn loo Diox nzo. Mbi'a nac Jesucrist co' mbi'th yáal xalque' ndxáal chol mèn loo izlyo'.  
\v 6 Leque yub Jesucrist mda' lugar mquée yalguth loo Jesucrist par tataa mod mdix Jesucrist cón che'n xtol mèn loo Diox. Cón che'n xá mod le'le' Jesucrist mdix cón che'n xtol mèn mde'th mèn co' ngòc xin' mté'th Jesucrist co' mtel' Jesucrist co'se' ngolo ngòc yaltìi loo Tad Jesucrist.  
\v 7 Par gon yalbàn cón che'n ryete con' co' ngòc loo Jesucrist, Diox mdoo daa no mblec Diox daa par gon yalbàn no par huen di's cón che'n di's ndac che'n Jesucrist loo mèn. Lìcque' nac di's co' niin lool ndxè', Timote. Inquedìiden lùu. Diox mcui daa par nac daa maistr co' ndlu' loo mèn co' nac mèn chol nación cón che'n xá mod ndxela's na' loo cón che'n Diox por cón che'n di's ndac co' nac lìcpe'. Ante ndyoodizen con' lìcpe' ned ngue tee'en tac ndxelasquen loo Crist no loo cón che'n Crist. Indyè'den. 
\p  
\v 8 Cona, ndlyazen le' mèn co' ndxela's loo cón che'n Diox, mèn co' nqueltàa ryete lugar, cuez mèna Diox. Ndlyazen le' mèna, lìcque', gàc mèn nambìi no mèn nalì loo Diox par gòn Diox di's co' cuez mèna loo Diox. Ndlyazen le' mèna ne'gàcte mèn nayi'. Ne' ne' gàc mèna mèn co' ngyoo no xtàa.  
\v 9 Lomisque', ndlyazen ñiil loo mèngot ne'gocte mèngot vestid arid bunch co' nac xab mèngot. Goc mèngot xab mèngot co' be'the. Ne' ne' arid bunch no ne' ne' arid nol'. Nabe'ste goc xab mèngot par gàp mèngot mod loo mèn, co' nee di's, ne'tye'ste mèngot arid. Ne'toxcua'de mèngot arid yéc mèngot. Ne' ne' que' mèngot yi'f or nza mèngot. Ne' ne' co mèngot coral co' anze'f nabe's ñaa yen mèngot. Ne' ne' goc mèngot vestid co' anze'f náp ntac tac ihuente nac con'a par mèngot co' nzo loo cón che'n Tad Jesucrist.  
\v 10 Ndxe'leque', lugar de tataa goc mèngot, más huen li mèngota con' co' nac con' ndac, co' nee di's, gàc mèngot mèn co' non carida ñèe xtàa xalque' mèn co' ndlu', lìcpe', ndxela's mèngota loo Diox no ngro xà' mèna loo cón che'n xab izlyo'.  
\v 11 Lomisque' ne, ñibe'l co'se' nqueltàa mèn le'n templ, xèe cue mèngota par gòn mèngota co'se' nzi té'th mèngota cón che'n Diox. Nado' gàc mèngota co'se' xèe cue mèngota.  
\v 12 Tedib con' ñibe'en lool, ne, Timote: Ne'ta'del lugar gàc thìb mèngot maistr par lu' mèngot loo mènbi' co'se' queltàa mèn le'n templ loo xnaa. Ne' ne' ta'l lugar ñibe' mèngot loo mènbi'. Ndxe'leque', xèe cue mèngota co'se' queltàa mèn le'n templ. Ne'càb rode mèngota loo mènbi'.  
\v 13 Tac co'se' mbli Diox ngo ner mbi' loo izlyo', ner Adán ngòcsua'. Ngoloa, mdyoxcua' Ev.  
\v 14 Mebizya ne'nquedìide Adán. Ndxe'leque', mquedìi Mebizya Ev. Por cona, ale ner Ev mcua'n xquin Ev no xtol Ev loo Diox.  
\v 15 Per mastale' tataa ngòca loo Ev, myen'got lyá' chele' mèngot, lìcque', ngola'sle' loo Diox. Tataa gàca chele' mèngot tyan xin', no chele' mèngota toloque' que' lezo' ñèe xtàa mèngot, no chele' mèngot tolo ryo xà'que' loo cón che'n xab izlyo' par gàc mèngota che'npe' Diox. Tataa gàca chele' mèngota huenque' ñibe' loo xtùuz no lezo' mèngota. 
\c 3  
\s1 Pab ngue lu' xá mod li mèn co' tyoo ner loo mèn co' ndxela's, mèn co' nqueltàa loo cón che'n Diox. 
\p  
\v 1 Di's co' ngue niin lool ndxè' nac lìcpe', Timote. Chele' chol mèn ndryo' ndlyen' lezo' xo'f zin' mèna zin' par tyoo ner no tyoo naa mèna loo mèn co' ndxela's co'se' queltàa mèn le'n templ, lìcque', con' ndac nac zin' co' ndryo' ndlyen' lezo' mèna li mèna.  
\v 2 Por cona, ngue niin lool, Timote: Mèn co' ndyoo ner no co' ndyoo naa loo mèn co' nqueltàa loo cón che'n Diox, mèn co' nxo'f zin' zin' cón che'n Crist loo mèn co' nqueltàa loo cón che'n Diox, ndxàalque' que tee ban mèna thìb mod ndac co' yende chó mèn yoo mèna. Gàc mèna mèn co' ndyub no thidte xa'got co' nac xin' sa'l. Gàc mèna mèn co' nagàl yòo lezo' ñèe xtàa. Gàc mèna mèn co' altant ndyoo loo zin' co' ndli mèna liz mèna. No ndxe'sleque' li mèna xtùuz co' nac xtùuz co' ndli mèna. Gàc mèna mèn co' gàp mod par gab taamas mèn le' mèna nac mèn guryath no mèn guryèn. No naquinque' tyoo lezo' mèna ta' mèn posad loo chol mèn tith co' nde too naa chop son huiz. Gàc mèna mèn ndac co' nalas nac par lu' mèna loo taamas mèn cón che'n Crist.  
\v 3 Ne'gàcte mèna mènguy co' ndxu chol nítguy. Ne' ne' gàc mèna mèn co' yáp di's no mèn co' ncua'n di's. Ndxe'leque', gàc mèna mèn nado' no mèn co' ne'yòode lezo' yoo di's. Ne' ne' gàc mèna mèn co' nde yath ñèe tmi co' ndlixù' mèn gan. Ndxe'leque', naquin gàc mèna mèn ndacpe', mèn co' cue no xtàa rye nda mèn no rye ndye'th mèn. Gàc mèna mèn co' ne'gath lyuxte par ñèe mèna tmi.  
\v 4 Naquinque' gàc mèna thìb gundan ndac co' ñibe' ndac loo mèn guliz mèna. No li mèna le' xin' mèna gàc myen' nado' no gàp myen' mod loo rye mèn.  
\v 5 Tac chele' mèn co' gàc mèn co' tyoo ner no co' tyoo naa loo mèn co' nqueltàa loo cón che'n Diox ne'gácte ñibe' loo mèn gulizpe' mèn, ¿xá mod gác mèna quenap mèna no ñibe' mèna no tyoo ner no tyoo naa mèna loo mèn co' nqueltàa loo cón che'n Diox, sya? Yende mod ñibe' mèna chele' mèna tataa nac, ¿lé'?  
\v 6 Mèn co' gàc mèn co' tyoo ner no co' tyoo naa loo mèn co' nqueltàa loo cón che'n Diox, indxàalte gàc mèna mèn co' diz ngola's loo cón che'n Diox no co' diz ngòo loo cón che'n Diox. Tac ne'stolque', làth xtau'a aseli mèna tye's mèna xalque' mdye's Mebizya. No yiloa, quexù' Diox mèna xal mquexù' Diox Mebizya' par tyactìi mèna yiloa xalque' tyactìi Mebizya yiloa.  
\v 7 Lomisque' ne, nquinque' gàc le' mèn co' tyoo ner no co' tyoo naa loo mèn co' nqueltàa loo cón che'n Diox gàp mod loo mèn co' tarte yòo loo cón che'n Diox par gàp mèn yalxla's loo Diox par nec thìb mod no nec tedib mod yende mod quexù' mèn co' tarte yila's mèn co' tyoo ner no co' tyoo naa loo mèn co' nqueltàa loo cón che'n Diox. Chele' mèn co' tyoo ner no co' tyoo naa li tataa mod, le' sya, càba loo mèna ne'thyonte mèna no ne'yigàade mèna loo Mebizya xal co'se' ndlyàa má' guli quìi loo thìb tramp. 
\s1 Pabl ngue lu' trè' xá mod li mèn co' nquenap templ no mèn co' ndlyath no taamas mèn le'n templ. 
\p  
\v 8 Lomisque' ne, cón che'n mèn co' li sirv loo mèn co' nqueltàa loo cón che'n Diox, mèna ndxàal gàc mèn co' ndxàp mod par gab taamas mèn le' mèna nac mèn guryath no mèn guryèn. No ne'gàcte mèna mèn ye'rsin' xal nac mod co' ndyoodi's mèn. Ne'gàcte mèna mèn co' ndyuuz. Ne'gàcte mèna mèn co' ndli huan' loo xnaa co'se' ndi' mèn no ntho' mèn, co' nee di's, ngo mèn má' xi'tha par xexte li mèn gan tmi loo xtàa mèn.  
\v 9 Ndxàalque' gàc mèna mèn co' nda' cuent co' huenleque' cón che'n con' co' indxòn ndacte mèn loo cón che'n Crist co' ndxela's na'. No ndxàal que tee ban ndac mèna thìb mod co' yende con' ten' mèna le'n lezo' mèna cón che'n xtùuz co' ngue no mèna cón che'n Crist.  
\v 10 Nerleque' naquin gàc preb mèna ñeene' xal nac mèn co' li sirv loo mèn co' nqueltàa loo cón che'n Diox, ñeene' ché' nzo chó falt ndxàp mèna. Chele' mèna yende chó falt no mod ndxàp, nzoque' mod xo'f zin' mèna zin' co' nac cón che'n Crist.  
\v 11 Lomisque' ne, le' xa'got co' nac sa'l mèn co' li sirv loo mèn co' nqueltàa loo cón che'n Diox, gàc xa'gota mèn nado' co' ne'yòode loo cuent yix. Ndxe'leque', gàp mèngota mod no li nèe mèngota mèngota loo cón che'n Crist co' ndxela's na'. No gàc mèngota mèn ndacpe' co' ndyoo altant loo ryethe con'.  
\v 12 Bnibe' loo mèn co' li sirv loo mèn co' nqueltàa loo cón che'n Diox gàc mèna mèn co' ndyub no thidte xa'got co' nac xin' sa'l mèna. No gàc mèna gundan co' ñibe' ndac loo mèn gulizpe' mèna.  
\v 13 Tac mèn co' ndlyath no mèn co' nqueltàa loo cón che'n Diox co' nabe'ste ndyoo naa loo zin' co' ndli mèna, mèna ndli gan ndxàc con' guryath no con' guryèn loo mèna. No sate más con dibaxla's tyoodi's mèna cón che'n xá mod ndxela's mèna loo Crist no loo cón che'n Crist. 
\s1 Trè' ngue lu' Pab cón che'n co' ndxela's na', con' co' inonte huax mèn no con' co' inda'de huax mèn cuent. 
\p  
\v 14 Ngue que'en ye's ndxè' lool, Timote, mastale' ndub quee lezon xaste gal neen máal par nedrè'.  
\v 15 Tac antale'i, chele' daa lyen' no ne'yilode gal neen máal, cona ngue tel'en cart ndxè' lool par ñeel xá mod ndxàal tyoo naal no tyoo nerl loo mèn co' nac mèn gulizpe' Diox. Fte' lezo'l mèna nac mèn che'n Diox co' lìcpe' naban. Mèn co' nqueltàa loo cón che'n Diox chol lugar, mèna ngue ta' fuerz par nda' mèna cuent cón che'n Crist co' nac con' lìcpe' loo taamas mèn co' tarte yila's, co' nee di's, nac mèna xal thìb cimient no thìb pílar co' nda' fuerz loo thìb yòobé'. 
\p  
\v 16 Lìcpe' ba'i, con' roo no con' xèn nac alux con' co' nac cón che'n con' co' be' nacasloo loo huax mèn co' nac xley' co' ndxela's na' loo Diox no loo cón che'n Diox, co' nee di's: 
\pi1 Leque Diox mblu' Diox loo mèn co'se' mbi'th yáal Crist loo izlyo' ndxè' xal ndxáal chol mèn loo izlyo' ndxè'. Diox mblo ro no mblu' Diox loo mèn nalì no nambìi nac Crist tac yub Diox mblo xban Crist. Mbyú' loo Crist loo angl. Mbyath no mbyèn cón che'n Crist loo mèn le'n chol nación dib athu loo izlyo'. Ngola's mèn co' nziri loo izlyo' loo Crist. Ngoloa, nguáp Crist loo bé' co'te' nac yòoba'. 
\c 4  
\s1 Di's ndxè' ndlu' loo na' cón che'n mèn co' ndryo xà' loo cón che'n Crist xal nac mod co' ndxela's na' loo Diox por cón che'n Crist. 
\p  
\v 1 Per nambìite di's no nambìite cuent ndlu' Xpii Natú' loo na' le' le'n lult tiemp co' yi'th nque nzo ndxep mèn co' ryo xà' loo co' ndxela's mèn xal ndxela's na' cón che'n Tad Crist. Mèna más ndxòo lezo' nda' mèna lugar ndxòn mèna ro chol xpii co' nquedìi mèn par quedìi xpiia mèna. No yila's mèna loo xley' co' nac xley' meexù'.  
\v 2 Más tyub nza mèn gòn mèn ro mèn co' ntembìi ro no co' ntembìi xti's co' nac mèn gutyè'. Inden'te mèna le'n lezo' mèna cón ngue li mèna xtùuz che'n cón ngue li mèna ché' naca con' huen o ché' naca con' mal.  
\v 3 Mèn ye'rsin' co' tataa nac, inda'de mèna lugar loo xtàa mèn co' ndlya's selya'. No lomisque', inda'de mèna lugar hua mèn chol con' co' nac xít mèn no lua' mèn. Tataa ndli mèna par ne'huade chol mèn bél' mastale' yub Diox mtan' xít mèn no lua' mèn co' ndxuhua mèn, mèn co' ndxela's loo Diox no loo cón che'n Diox, no mèn co' nda' cuent co' nac lìcpe' cón che'n Diox tac co'se' ndxuhua mèna xít mèna no lua' mèna mèna mbez: Diox quix U', Diox, loo Diox.  
\v 4 Tac rye loothe con' co' mxèn' Diox no co' mtoxcua' Diox, huenque' naca. Nec thìb con'a indxàalte tè'b mèn loo xtàa mèn chele' mèn lya's huai. No chele' mèn gab: Diox quix U', Diox, loo Diox, yende cón lii.  
\v 5 Tac xti's Diox co' ndlab mèna no di's co' mbez mèna Diox co'se' mbez mèna Diox, di'sa ndli loo mèn ryete con' ndxuhua mèn con' ndac naca loo mèn par hua mèn. 
\s1 Pab ngue lu' loo Timote xá mod ndxàal que tee ban Timote par tolo gàc Timote thìb moz ndac che'n Tad Jesucrist. 
\p  
\v 6 Chele' lu' lùu ryete con' ndxè' loo mèn co' nac hues xtàa na' por cón che'n Crist, Timote, gàc lùu thìb moz ndac co' nxo'f zin' zin' cón che'n Jesucrist loo mèn. Sya, tataa mod leque lùu que tee ban loo di's che'n di's ndac co' ndxela's na' co' gàc lool xal xítl no lua'l co' li par gàl lezo'l, di's co' ndxela'sl loo no co' nac thìb xley' ndac xalque' nac co' nda nquel xís co' nac cón che'n Crist co' mté'thl.  
\v 7 Lomisque' ne, niin lool, Timote: Ne'tyub nzadel arid loo chol cuent gox co' nac cuent natont che'n izlyo' ndxè'. Más huen, ñibe' loo lezo'l no ftoo lezo'l par tolo que tee lil cas loo cón che'n Diox xal ndxàala no maste.  
\v 8 Per niin thìb con' lool, Timote: Ejercis co' ndli na' par ryo xcuen lad na', ndxepte con' ndac ndlii loo lad na'. Per chele' na' ngue que tee lique' cas loo cón che'n Diox xal thìb myen' co' nguith par tolo xec myen'a loo yalguyith, thìb mod tedib mod ncàba con' ndac loo na', que naca cón che'n yalnaban ndxè', que naca cón che'n yalnaban co' yi'th nquea.  
\v 9 Lìcque' nac di's co' ngue niin lool ndxè', Timote: Indyè'de di's co' nac cón che'n di's ndac ndxè'. Ndxàalque' gòn ryete mèn di's ndxè' no yila's ryete mèn cón che'n di's ndac ndxè'.  
\v 10 Tac por cona ndli na' zin' no nxec yèe na' loo ngòc nguàal con' co' ndli mèn loo na' axta plóthe. Le'i càb yila's huax mèn loo Crist no loo cón che'n Crist tac na' nzi quee lezo' loo Diox cón che'n con' co' gàc loo na' yiloa, Diox co' naban thidtene. Diox ngue xèn' izlyo' no ngue quenap Diox ryete mèn loo izlyo'. Per ale ndxe'leque', loo na' co' ndxela's loo Diox, Diox mtelá' na' loo con' ryes. 
\p  
\v 11 Ryete di's co' ngue que'en ye's lool ndxè', Timote, ndlyazen ñibe'l loo mèn li mèna no lu'l cón che'n di's ndac loo mèn par nedrè'.  
\v 12 Lomisque' ne, leque lùu hui' xá nque teel. Gòp lezo'l par ne'ta'del lugar xìis no mèn lùu por nacl myen'bi'. Ndxe'leque', tolo bli con' ndac par hui' mèn co' ndxela's lool xá nac mod ndyoodi'sl, no xá nac mod nque tee banl co' nac mod nque' lezo'l ñèel mèn, no xá nac mod co' ndyubdi'sl loo Xpii Natú' co' ñibe' lool, no xá mod nquenap lùu lùu par tolo gàcl thìb mbyòo co' nque tee ban lì no co' nque tee ban nambìi loo mèn.  
\v 13 Láth be' tarte zin daa par nedrè' loo gu', loo xnaa blab libr co' nac xti's Diox loo mèn co' nqueltàa loo cón che'n Diox. Ftolo co'x loo mèn no blu' loo mèn par ye'th lezo' mèn loo cón che'n Diox. No ftolo lu' loo mèn cón che'n Diox axtaque' galen lool.  
\v 14 Ne'lá'ya'del lùu loo con' ndac co' mbli Diox angngòc lool co'se' mxo'f mèngool ya' mèngool co' ndyoo ner no co' ndyoo naa loo mèn co' nqueltàa loo cón che'n Diox ladl. Tac con'a nac con' co' mnibe' lezo' Diox no con' co' angngro' lezo' Diox gàc lool. 
\p  
\v 15 Por derech, bli xtùuz cón che'n co' ngue niin lool ndxè'. Fxo'f zin' cón che'n con' ndxè' par lu'la loo ryete mèn le' zin' co' nxo'f zin'l loo cón che'n Crist ndli leque lùu ngue té'th no ngue tyubdi's ndacl loo cón che'n Crist, ne.  
\v 16 Anderhuenl. Leque lùu fquenapl loo cón che'n Crist. Bli nèe leque lùu loo xley' co' ndlu'l co' nac xley' che'n Diox. Altant ftoo loo xley' co' ndlu'l. Tac chele' lùu tataaque' ngue li, sya, ryete mèn non, lìcque', ndxela'sl loo cón che'n Crist no loo Crist. Lomisque' mod, chele' lùu tatua'que' lyath no taamas mèn li mèna xal ndlil, le' sya, ryete mèn gòn rol no yila's mèn xal ndxela'sl, ne. 
\c 5  
\s1 Trè' ngue lu' xá mod ndxàal que tee ban no na' taamas mèn co' ndxela's. 
\p  
\v 1 Timote, ne'yoodel nec thìb mèngool. Ndxe'leque', fco'x loo mèngool xal loo xudpe'l. Fco'x loo myen'bi' xal loo huespe'l, ne.  
\v 2 Fco'x loo xa'gotgool xal loo xna'pe'l. Fco'x loo myen'got xal loo fta'npe'l. Thìb lì yécl thìb lì lezo'l bli ryete con' ndxè'. 
\p  
\v 3 Blyath no xa'got viud co', lìcpe', nac xa'got viud par que no xa' con' naquin xa' co' nac con' co' nde che loo xa', xa' co', lìcque', naquin con'.  
\v 4 No chele' chó xa'got viud ngue no xin' o ngue no xa' xot xa', naquin ner lu'l myen' par gàp myen' mod loo mèn co' nac gundan loo myen' li myen' leque mod xal mque' lezo' xud myen' gunèe xud myen' myen'. Tataaguè' que' lezo' myen' ñèe myen' xud myen'. Tac con' co' ndli myen' loo mèn guliz myen'a, naca thìb con' ndac no ndxòo lezo' Diox mod co' tataa nque' lezo' mèn ñèe mèn xud mèn no xna' mèn no mèn guliz mèn.  
\v 5 Xa'got co', lìcque', nac xa'got viud no mbyan' thìb xa'got, bnibe' loo xa' ante tyub quee lezo' xa'got viuda loo Diox no thidtene cuez xa'got viuda Diox ze no yál'.  
\v 6 Per xa'got viud co' nzo làth gu' co' ante ndoo lezo' más nda' xa' gust lezo' xa', xa'got viuda nac xal thìb xa' co' nguth loo cón che'n Diox.  
\v 7 Bnibe' loo mèngot viuda li mèngot viuda ryete con' xal ngue niin lool ndxè', Timote, par yende chó mèn yoo mèna por ne'nglide mèngot viuda con' ndac, ne.  
\v 8 Tac chele' chol mèn co' mbez ndxela's mèna loo Diox no iñibe' ndacte mèna loo mèn guliz mèna xal gundanpe', mèna ncà di's cón che'n co' ndxela's na'. Más nazab ndxàc mèna loo mèn co' indxela'ste cón che'n Diox. 
\p  
\v 9 Lomisque' ne, loo list co'te' nzib lèe mèngot viud, ndxàal tyub ante lèe mèngot viud co' nzo masre' ayon lín'. No ante tyub lèe mèngot viud, mèngot co' mque no thidte xa'bi' co' ngòc sa'l mèngota, loo list, ne.  
\v 10 Bla's loo xa'got viuda ñeene' ¿ché' ngue ta' mèn cuent le' xa'gota nxo'f zin'que' zin' ndac? Ñeene' ¿ché' mxàn xin' xa'? Ñeene' ¿ché' mda' xa' posad loo mèn tith co' mna'b posad? Ñeene' ¿ché' mbli xa' sirv no ché' mbli xa' cas loo mèn co' ngro xà' loo cón che'n xab izlyo' co' ngòc che'npe' Diox? Ñeene' ¿ché' mda'la's xa' ndxep con' loo mèn co' mxac yaltìi? Ñeene' ¿ché' nzore' chó más zin' ndac mbli xa'got viuda loo rye loote zin' ndxè'? Tataa ndxàal gàca ndoore' yòo lèe xa'gota loo list, ndee. 
\p  
\v 11 Tedib con' ndlyazen niin lool ne, Timote: Ne'tubtel lèe chol xa'got viud co' be' nzo ndxepte lín'. Tac co'se' tlo tyub yo'f lezo' mèngot viuda loo co' nac cón che'n xab izlyo', sya, tyoo xà' lezo' mèngot viuda loo cón che'n Crist. No yiloa bere mèngot viud, selya' mèngot viuda tedib vez.  
\v 12 Le' sya, leque mèngot viud yen'a ngue zib quìi mèngot viud loo cón che'n Crist por con' co' mcàbgòn mèngota li mèngota loo cón che'n Crist no ne'tolode xa' li xa'i.  
\v 13 Más de cona, chele' mèngot viuda que tee liz por liz mèn, gàc mèngota mèn za'f. No iante gàc mèngota mèn za'f. Ndxe'leque', gàc mèngota mèn co' ta' cuent yix, ne. No li mèngota ngòc nguàal con'. No tyoodi's mèngota con' co' indxàalte tyoodi's nec thìb mèn.  
\v 14 Por cona, ndlyazen más huen selya' myen'got viud yèn'a par tyan xin' myen' no gàc myen' gundanpe' liz myen' par tataa mod ne'ta'de myen'got viuda arid lugar par yecloo mèn co' nayi' ñèe gu' par ñii yèe ñii tìi chol mèn co' nac ngolo ngola's cón che'n mèn co' ndxela's loo cón che'n Diox por cón che'n Crist.  
\v 15 Tac nzoque' ndxep xa'got viud co' ngro xà'le' loo cón che'n Crist no nalle' ngue li mèngot viud xal nac co' ndlya's Mebizya. 
\p  
\v 16 Lomisque' ne, chele' chó mènbi' o mèngot co' ndxela's ndxàc mèn guliz mèngot viud, ndxàal lyath no mèn guliza mèngot viuda par ne'ña'bte mèn guliza gast loo mèn co' ndxela's co' nqueltàa par lyath no mèn guliza mèngot viuda. Tataa gàca tolo que no mèn co' ndxela's co' nqueltàa gast par lyath no mèn co' nqueltàa mèngot co' nac lìcpe' viud co' nde che con' loo co' naquin con'. 
\p  
\v 17 Le' loo mèngool co' nabe'ste ñibe' no co' nabe'ste ndyoo ner no co' nabe'ste ndyoo naa loo mèn co' nqueltàa loo cón che'n Diox na, sate más li mèn co' nqueltàa loo cón che'n Diox con' guryath no con' guryèn loo mèngoola. Masre' naquin li mèn co' nqueltàa loo cón che'n Diox con' guryath no con' guryèn loo mèn co' ngo yalban no loo mèn co' ndlu' cón che'n Diox loo mèn.  
\v 18 Tac loo libr co' nac xti's Diox ndub di's co' mbez: Ne'codel yex ro burr co' ndloo ndub loo bacdo' nzob triu par ga's nzob triu. Con'a nee di's, mèn co' nxo'f zin' zin' co' nac cón che'n Diox naquinque' yo ray mèna por zin' co' nxo'f zin' mèna par hua mèna. 
\p  
\v 19 Lomisque' niin lool, ne, Timote: Ne'gòntel chol cuent co' ñii yèe ñii tìi mèn cón che'n mèngool. Ndxe'leque', gònl cuenta ante co'se' nzo nol chop o son mèn co' ta' cuent cón che'n mèngoola ñee mèna ñeene' ché' lìca o ché' ilìcta par ne'queyèexù'de mèn mèngoola.  
\v 20 Per loo mèngool co' toloque' ngue tee cua'n xquin no ncua'n xtol na, naquinque' yool mèngoola loo rye mèn co' nqueltàa par tataa mod zyeb taamas mèn co' nqueltàa loo cón che'n Diox, ne.  
\v 21 Daa ñibe' lool, Timote, no ngue tan'en di's ndxè' lool loo Diox no loo Tad Jesucrist no loo rye angl co' Diox mcui par li angl thìb zin' che'n Diox: Ftolo lique'l xal ngue ñibe'en lool ndxè'. Ne'lidel par más hui'l loo thìb mèn làth xtàa mèn. Ne'lidel par más tyu' thìb mèn loo xtàa mèn.  
\v 22 Ne'xo'f zin'gàdel zin' loo mèn co' nac mèngool co' nqueltàa loo cón che'n Diox par ñibe'l loo mèna par tyoo ner mèna loo mèn co' nqueltàa loo cón che'n Diox ndoore' co'se' ñeel xá mod nque tee ban mèna. Tac ne'stolque' tataa mod le'le' lùu cua'n xquinl no xtoll xal ndli taamas mèn. Ne'ta'del lugar li leque lùu chol con' ye'rsin'. Más huen nambìi no nalì fque teel loo cón che'n Diox. 
\p  
\v 23 Más de cona, com le' lùu ndyac yíiz lezo', ¿lé'?, ne'gudel ante nít dòp co' nac nít yèe. Yende cón lii gul chu'th vin làtha par yac yíiz co' nden' lezo'l. 
\p  
\v 24 Lomisque' ne, loo xnaa ndxú' xtol che'n ndxep mèn ndoore' co'se' tub rez Diox cón che'n xtol mèn loo mèn. Le' taamas mèn co' ncua'n xquin no xtol na, xtol mèna indxú'de loo xtàa mèn nalle'. Per yú' xtol mèna axta co'se' zin huiz tub rez Diox cón che'n mèn loo mèn.  
\v 25 Lomisque' ne, ryete zin' co' nac zin' ndac co' ndli mèn loo xtàa men, le'i ndxú'que' loo xnaa loo mèn. Per mastale' nzoque' ndxep con' ndac co' ndli mèn loo xtàa co' indxú'de loo mèn, con' ndaca ryo xo'fque' loo xnaa tac Diox li le' con' ndaca ryo xo'fque' loo xnaa co'se' tub rez Diox cón che'n mèn loo mèn. 
\c 6  
\p  
\v 1 Niin tedib con' lool ne, Timote, por part cón che'n mèn co' ndxela's, mèn co' nac moz co' nque zin' huiz loo patrón: Naquin gàp mèn co' nac moz mod loo patrón mèn par tataa mod ne'ñii yèede no ne'ñii tìide mèn lèe Diox no ne'ñii yèede no ne'ñii tìide mèn cón che'n xley' na'.  
\v 2 Lomisque' ne, chele moz nque zin' con patrón co' ndxela's loo cón che'n Crist, ihuente naca tè'b moz patrona thìb lad o gàc moz moz za'f loo patrón por ndxàc hues moz patrón por cón che'n Crist. Ndxe'leque', naquin más altant tyoo moz loo zin' che'n patrón xal ndxàala. Tataa ndxàal li thìb moz tac patrón moz ndxela's loo cón che'n Crist no nac xa' mèn co' ndxàc hues co' nque' lezo' ñèe xtàa xa' por cón che'n Crist. Con' ndxè' ndlyazen lu'l loo mèn no col yalbàn cón che'na loo mèn, Timote. 
\s1 Pab ngue lu' trè' xá mod yo nagàl lezo' mèn co' ndxela's loo Diox por cón che'n Crist. 
\p  
\v 3 Chele' chol mèn ndlu' tedib con' no ne'yòode lezo' mèna loo di's ndac che'n Tad Jesucrist na', no ne'yòode lezo' mèna cón che'n di's co' nac xley' na' co' ndlu' cón che'n xal ndxàal li mèn cas loo Diox,  
\v 4 mèna nac mèn nate's no mèn naxal' co' yende cón ndxác. Nac mèna xal thìb mèn yíiz con ryethe co' nac co' ndyub yo'f lezo' mèna. No con' co' ndyub yo'f lezo' mèna ndli par noo noo ndyoodi's mèna cón che'n chol di's no chol xley' che'n mèn loo izlyo'. Mod co' ndxap mèna no xal ndli mèna, con'a ndli ndxàn lezo' mèna ñèe mèna xtàa mèna. Nzyál' di's nzyál' cuent làth xtàa mèn ngyoo mèn con xtàa mèn. Asendli mèna nda' mèna xyàn lezo' taamas mèn. Thidtene indxapte mèna yalxla's loo xtàa mèna.  
\v 5 Mod co' ndxàp mèna ndli thidtene ngyoo mèna làth xtàa mèna, mèn co' ngue no xtùuz zab co' nac leque mèn co' ndli nzye' xtùuz mèn no lezo' mèn par gàc mèna mèn ye'rsin'. Mèna indlibe'de cón che'n Diox co' nac con' lìcpe'. No ndli mèna xtùuz le' loo xley' che'n Crist no loo cón che'n Diox nzo mod aseli mèna cua'n mèna mod par alithe gàc ric mèna por mod ye'rsin' che'n mèna. Ña'ben lool, Timote, blá' mèn co' tataa nac. Ne'queltàa nodel mèna.  
\v 6 Per, lìcpe' ba'i, anze'f thìb con' ndac nac con' co' ndlu' xley' na' loo na', na' co' ndlec lezo' no na' co' ndyac lezo' loo con' co' ngue note na'.  
\v 7 Tac co'se' ngóol na' yende cón ngòp na' loo izlyo' ndxè'. Lìcpe' ba'i, ne' ne' yen cón ye' na' co'se' gath na'.  
\v 8 Per chele' na' ngue no con' co' hua na' atate huiz, no chele' na' bete ndoo ri'th no bete nda centav par ndi' na' xab na' co' ndxoc na' xal ndxàala, con conate ndxàal tyac lezo' na' no cuec lezo' na' loo yalnaban na'.  
\v 9 Per ndxe'leque', por part cón che'n mèn co' ndlya's gàc ric, mèna ne'xecte par gàc preb mèna loo ryethe con' ndyub yo'f lezo' mèn. Ale ndxe'leque', yizi'f yiga's mèna loo chol con' ye'rsin' no loo chol mod ye'rsin' co' nac xab izlyo' co' ndyub yo'f lezo' mèn par li mèn huax con' tont co' li gàc con' ryes loo mèna no por lult yiza' yalnaban mèna loo mèna no lyux mèna par ryo xà' mèna loo Diox thidtene yiloa.  
\v 10 Tac con' co' nac anze'f nde yath mèn ñèe mèn nac tmi no mod co' ndli mèn par que no mèn tmi, con'a nac co' ncàb loo mèna rye loothe con' ye'rsin'. Lìca, nzoque' ndxep mèn co' ndxath ndlyux ñèe tmi. Mèna ngro xà'le' loo co' ngola's mèna loo Crist. Por cona, ndxàc loo mèna ndyactìi mèna no ngulàa yaltìi loo mèna axta plóthe dib naban mèn por mod ye'rsin' co' ndxàp mèn. 
\s1 Trè' ngue lu' loo na' co' ndxela's xá mod li na' gan par ryoo xyèn na' loo cón che'n con' co' ndxela's na'. 
\p  
\v 11 Per lùu, Timote, co' nac thìb mbi' che'n Diox, ne'lidel ryethe con' ndxè'. Blá' ryethe con' ye'rsin'a. Nalì no nambìi fque tee banl loo Diox. Thìb lì yécl no thìb lì lezo'l bli cas Diox no ftoloque' gòp yalxla's loo Diox. Fque'que' lezo' Diox no fque' lezo' ñèel hues xtàal. Gòp yalncha'la's loo mèn no fxec yèe con mèn. Gòc mèn nado' loo mèn, ne, co' nee di's, gòc mèn co' que's ya' loo xtàa. No ne'tye'stel loo mèn.  
\v 12 Dib nzo yécl dib nzo lezo'l fxo'f zin' zin' co' mxo'f zin' Diox lool cón che'n con' co' ndxela's na' par lila. Bli nèe xtùuzl loo yalnaban co' nac yalnaban thidtene co' ndxàpl xal thìb con' co' quej ndyenl par ne'lá'dela. Loo cona mcui Diox lùu co'se' mblo rol no mda'l cuent ndac cón che'n xal ndxela'sl loo Crist loo huax mèn co' nda' cuent cón che'nl.  
\v 13 Loo Diox co' nda' yalnaban loo ryethe con' no loo Jesucrist co' nalì mdub razon loo Pons Pilat, ñibe'en lool, Timote:  
\v 14 Lyazen le' lùu tyubdi's loo ryete con' xal ngue ñibe'en lool loo cart ndxè'. Ne'se'del loo mod co' ngue ñibe'en lool ndxè' par nec thìb mod no nec tedib mod yende cón lii par yoonl le'n dib tiemp axta co'se' gàc huiz co'se' yi'th Tad Jesucrist na' loo izlyo' tedib vez.  
\v 15 Co'se' gàc huizpe' no tiemppe' co' yi'th xi Tad Jesucrist na', Diox lique' par gàc ryo xo'f Jesucrist xal ndxàala. Tataa li Diox tac thidte Diox nac Diox. Thidte Diox nac Diox co' ndxàp rye loothe con' la's nii no la's ya'. No nac Diox thidte Diox co' ñibe' loo ryethe con' no loo ryethe mèn co' nde'f di's ñibe', no mèn co' nac chol jef, no loo rye jef bix co' nde'f di's ñibe'.  
\v 16 Dioxa nac angoluxte xa' co' ne'gathte thidtene. No nzo ban Diox loo xnìi co' ndxà'x bèel tant axta yende chó mèn li gan bii gax loo xnìi co'te' nzo Diox. Nec thìb mèn tarte hui' xá ñaa Diox loo izlyo' ndxè'. Ne' ne' gác mèn hui' mèn loo Diox loo izlyo' ndxè'. Ndlyazen gab mèn di's guryath no di's guryèn cón che'n Diox loo xtàa mèn. Dioxa ñibe' loo rye loothe con' le'n lín' co' ntlo no le'n lín' co' ndxelo no le'n lín' co' ne'lith node. Taandxè' gàca. 
\p  
\v 17 Bnibe' loo chol mèn ric co' naban le'n tiemp ndxè', Timote, par ne'gàcte mèna arid mèn nate's no mèn naxal'. Ne' ne' cue quee lezo' mèna loo yalgon' co' lyux loo mèna. Ndxe'leque', bnibe' loo mèn ric cue quee lezo' mèna loo Diox co' naban thidtene. Tac Diox nac xa' co' nda' rye loothe con' ndac axta plóthe càa mèn. Diox nda'i loo mèn par tyac lezo' mèn loo con'a no par càba con' ndac loo mèn, ne.  
\v 18 Bnibe' loo mèn rica le' mèn ric li con' ndac. Más huen gàc mèn rica mèn ric loo con' ndac co' angli mèn rica no angta'la's mèn ric con' càa mèn prob. No qui'th mèn rica che'n mèn rica càa mèn prob.  
\v 19 Tataa mod cue nèe mèn rica loo yalnaban ndac co' ndxàal ban mèn par càba con' ndac le'n huiz co' nde nque. Tataa mod gàp mèn rica yalnaban thidtene, chele' mèn rica, lìcque', tolo li xal ngue niina lool nalle'. 
\s1 Trè' ngue ta' cuent cón che'n lult con' co' ngue ñibe' Pab li Timote. 
\p  
\v 20 Anderhuenl, Timote, loo ryete con' co' ngue ñibe'en lool cón che'n zin' co' mxo'f zin' Diox lool ndxè'. Ne'ta'del lugar par arid tub nzal di's co' yende cón ntac co' nac di's co' nac cón che'n xab izlyo'. Ne' ne' gàcl mèn co' li cas loo di's co' mbez mèn co' nde'f di's ndxác, per ndxe'leque', pà gác mèna.  
\v 21 Pues, lùu nda'que' cuent nzo ndxep mèn co' ndoo nque xís mèn gutyè'a co' nde'f di's ndxác. No por cona, ngro xà' mèna loo cón che'n Crist co' ndxela's na'. 
\p Ndlyazen le' Diox tolo li anggàc con' ndac lool, Timote. Taandxè' gàca, ndee.