\id 1PE  
\h 1 PEDRO 
\toc1 Ner Cart Co' Mque' Pedr Ye's Loo Mèn 
\toc2 1 PEDRO 
\toc3 1 P. 
\mt1 Ner Cart Co' Mque' Pedr Ye's Loo Mèn 
\c 1  
\s1 Pedr mque' ye's loo mèn co' ngola'sle' loo cón che'n Diox por cón che'n Jesucrist, mèn co' mque tee re's pál. 
\p  
\v 1 Daa, Pedr, nac thìb mbi' co' ndxe' di's cón che'n Jesucrist loo mèn, co' nee di's, leque yub Jesucrist mtel' daa loo mèn. Ngue que'en ye's ndxè' loo rye gu', gu' co' ngola'sle' loo Jesús no loo cón che'n Jesús, gu' co' ngro' nacionpe' gu', gu' co' nzo ban yèezya' che'n làaz mèn ponto, gu' co' nzo ban yèezya' che'n làaz mèn galacia, gu' co' nzo ban yèezya' che'n làaz mèn capadocia, gu' co' nzo ban yèezya' che'n làaz mèn asia, no gu' co' nzo ban yèezya' che'n làaz mèn bitiñ.  
\v 2 Diox xud na' mcui gu' xalque' mnibe' Diox loo lezo' Diox li Diox xal nac co' gunee lezo' Diox li Diox axta más pólle'a. Por cón che'n Xpii Natú' che'n Diox, Diox mblo' xà' gu' loo ryethe con' ye'rsin' co' nac cón che'n xab izlyo' par ante tyubdi's gu' loo Diox no par gàc gu' mèn nalì no mèn nambìi loo Diox por cón che'n renpe' Jesucrist. Ndlyazen le' Diox li anggàc huax con' ndac loo gu'. No ndlyazen yo nagàl lezo' gu' loo Diox no cue ban gu' rye nda gu' no rye ndye'th gu' làth xtàa gu'. 
\s1 Yalnaban cub ndxè' nac thìb yalnaban co' ngure quee lezo' mèn gàc loo mèn póla. 
\p  
\v 3 Ndlyazen gab na' le' Diox co' nac xud Tad Jesucrist na' nac Diox roo no Diox xèn. Por anze'f mblyat lezo' Diox gunèe Diox na', mbli Diox ngòc na' mèn co' ngue no tedib yalnaban cub xal co'se' ndxàca loo thìb mbeto' co' ndxáal loo izlyo'. Tataa ngòc loo na' por mbli Diox le' Jesucrist ngro xban làth mèn nguth. No por ngro xban Jesucrist làth mèn nguth, ndxàca loo na' le' na' nzi quee lezo' gàc loo na' tedib yalnaban co' gàc thìb yalnaban más ndac yiloa.  
\v 4 No li Diox le' gu' gàc che'n no yan' no gu' con' co' nac xal thìb herens co' ngue quenap Diox loo bé' co' gàc che'npe' gu' yiloa. No con' co' gàc che'n gu'a no con' co' yan' no gu'a ne'lyuxte thidtene. No ne' ne' yen mod gàc con'a con' zab. No ne' ne' yen mod gàc con'a xal con' ngol' xal ndxol' chol laa nayèe co' ngol'.  
\v 5 No com le' gu' ndxela'sque' loo Diox, ¿lé'?, Diox nquenap gu' por cón che'n con' roo no con' xèn co' ndxàp Diox la's nii Diox no la's ya' Diox axta co'se' gàc huiz yòo gu' loo bé' par ban no gu' Diox thidtene tya. No lu' Diox con' co' yan' no gu' no co' gàc che'npe' gu' le'n huiz co' gàc lult tiemp loo izlyo' ndxè'. 
\p  
\v 6 No por cón che'n ryethe con'a, nden'en no naneen ndyac lezo' gu' mastale' nquin gàc huax yaltìi loo gu' no ten' gu' huax yaltìi ndxep tiemp.  
\v 7 Axta arid ntaca loo Diox le' gu' ndxela's loo Diox no ndxàp gu' yalxla's loo Diox. Diox non nquin gàc loo gu' tyactìi gu' par ñee Diox ñeene' ché' xec gu' que tee ban gu' loo cón che'n Diox. Co'se' ndxàc con'a loo gu', naca xal co'se' nsun' mèn or con quìi par ta' mèn cuent ñeene' ché' nac ora orpe'. Co'se' nxec mèn ndxàc chol yaltìi co' ndxàc loo mèn, le' sya, cón che'n mèna axta arid ntac loo Diox más leque or co' ndxeza' no co' ndlyux. Por cona, ngue niin loo gu': Chele' gu', lìcque', tolo gàp yalxla's loo Diox no tolo yila's gu' loo Diox láth ndxàc chol yaltìi loo gu', syase co Diox cuent nac gu' mèn ndac. No li Diox gàc con' roo no con' xèn loo gu'. No li Diox gàc gu' mèn guryath no mèn guryèn loo taamas mèn co'se' yi'th Jesucrist loo izlyo' ndxè' tedib vez. 
\p  
\v 8 Nonquen le' gu' anze'f nque' lezo' Jesucrist mastale' tarte ñèe gu' xá ñaa Jesucrist. No por ndxàp gu' yalxla's loo Jesucrist, mastale' tarte ñèe gu' xá ñaa Jesucrist, ndyac tín' lezo' gu' no thidtene nxo'f nde' nxo'f ndla' lezo' gu'. No por anze'f ndyac lezo' gu'a, nonquen naca thìb con' roo no thìb con' xèn loo gu' no axta ne' ne' gác gu' ta' gu' cuent co' ndxàc loo gu' loo cón che'n Jesucrist loo mèn.  
\v 9 No por mbli gu' no mxec yèe gu' ngola's gu' loo cón che'n Jesucrist, mblyá' alm gu' no xpii gu' loo ryethe con' ryes tac ngola's gu' loo Jesucrist par mblyá' gu' loo ryethe con' ryes. 
\p  
\v 10 No axta más póla mèn co' mde'th di's co' ndxab Diox huen huen mbral no mdub rez mèna loo libr co' nac xti's Diox co' nac testament gox no mdoodi's mèna cón che'n xá mod lyá' mèn loo ryethe con' ryes. No con'a nac con' ndac co' mbli nèe Diox angli Diox loo gu' le'n tiemp ndxè'.  
\v 11 Leque yub Xpii che'n Crist co' nac Xpii Natú' mbli par ngro xo'f loo mèn co' mde'th di's. No mda' mèna cuent con' co' tyactìi Crist no xá mod gàc ryethe con' roo no ryethe con' xèn loo Crist co' gàc loo Crist yiloa. Mèna mblya's ngo xo'f chó nac mbi' co' gàc Crist no pól gàc tiemp co'se' yi'th Crist loo izlyo' ndxè' xal mblo xo'f Xpii Natú'i loo mèna, Xpii Natú' co' ngo no mèna.  
\v 12 Per leque yub Diox mbli ngro xo'f cón che'n con' co' mbli mèna xtùuz no con' co' mdoodi's mèna inacte con'a con' co' gàc loo leque yub mèna. Ndxe'leque', Diox mblu' loo mèna le' cón che'n con'a nac co' ndxàc loo na' nalle'. No nalle' leque cón che'n con' co' mbli mèn xtùuz pólle'a nac leque con' co' ndxath no co' ndxèn loo gu'. No ndxath no ndxèn con' ndxè' loo gu' por cón che'n mèn co' ngo yalbàn cón che'n xá mod lyá' mèn loo con' ryes. Ngo mèna yalbàn por cón che'n con' roo no con' xèn co' ndli Xpii Natú' loo na'. Xpii Natú' co' mtel' Diox co' ngro' loo bé' loo na'. No leque cón che'n con' ndxè' nac con' co' mbli angl xtùuz par ñee angl no ta' angl cuent cón con'a no xá mod gàc con'a. 
\s1 Diox mblec na' no mcui Diox na' par ryo xà' na' loo ryethe con' ye'rsin' co' nac cón che'n xab izlyo' par que tee ban ndac na' loo Diox. 
\p  
\v 13 Cona, ndlyazen huen huen li gu' xtùuz cón che'n con' co' ndli gu'. No ndlyazen nabe'ste que tee ban gu' no ne'zi'fte gu' arid con' ye'rsin' la's nii gu' no la's ya' gu' ned nzi tee gu'. Ante bli gu' xtùuz loo ryethe con' ndac co' li Diox loo gu' no co' ta' Diox loo gu' co' nzi quee lezo' gu' gàc loo gu' co'se' yú' loo Jesucrist loo mèn loo izlyo' ndxè' tedib vez.  
\v 14 Fque tee ban gu' làth xtàa gu' xal myen' bix co' ndyubdi'sque' loo xud myen'. Ne'que tee bante gu' xal ngòc yalnaban co' mque tee ban gu' póla ndoore' co'se' tarte ta' gu' cuent cón che'n Diox no co'se' tarte libe' gu' Diox por cón che'n Jesucrist.  
\v 15 Ndxe'leque', fque tee banque' gu' loo cón che'n Diox xal mèn co' thidteneque' ngro xà' loo ryethe con' ye'rsin' co' nac cón che'n xab izlyo'. Tataa mod bli gu' tac Diox co' mblec gu' no Diox co' mcui gu' par ngòo gu' loo cón che'n Diox, Diox nac thìb Diox nalì no thìb Diox nambìi no thìb Diox natú'.  
\v 16 Loo libr co' nac xti's Diox ndub di's co' mbez taandxè': 
\pi1 Gòc gu' mèn co' ngro xà'que' loo ryethe con' ye'rsin' co' nac cón che'n xab izlyo' tac daa nac thìb Diox nalì no thìb Diox nambìi no thìb Diox natú'. 
\p  
\v 17 Yende chó mèn nzo co' más ndyu' loo Diox leque taamas mèn. Chele' gu' mbez: ―Pay― loo Diox, Diox co' ndla's loo thìb thìb mèn xá mod nzi tee ban mèn par tub rez Diox cón che'n mèn yiloa, ndxàal zyeb gu' ñèe gu' Diox le'n ryethe huiz co' naban gu'.  
\v 18 Diox mbli par mblyá' gu' loo thìb yalnaban co' yende cón ntac co' ngòc thìb yalnaban co' mque tee ban gu' póla, co' ngòc co' mté'th gu' loo xudgool gu'. No gu' nda'que' cuent co' huenleque' le' co'se' mtelá' Diox gu' loo con' ryes por mdyon' xtol gu' co' angngòc loo gu' nalle', cón che'n con' co' angmbli Diox loo gu' ne'ndi'de gu' con'a por cón che'n con' co' ndlyux no con' co' ndxeza' xal ndxeza' or no plat.  
\v 19 Ndxe'leque', mtelá' Diox gu' loo con' ryes por cón che'n ren che'n ladpe' Crist, ren co' anze'f ntac loo Diox. Leque yub Crist mda' yalnaban Crist loo yalguth por cón che'n xtol mèn xal co'se' ndxuth mèn thìb mbacxil' yen' co' be' nac thìb mbacxil' nambìi no co' tarte gàc nec thìb con' zab no nec thìb yalquìi loo par guth mèn mbacxil'a par xo mèn rena loo Diox loo izlyo'.  
\v 20 Diox mdoo Crist no mnibe' Diox loo Crist par gàc con' co' ngòcle' loo Crist. Tataa mbli Diox loo Crist ndoore' cuec Diox no mxèn' Diox izlyo'. Per ne'ngàcte con'a loo Crist póla. Ndxe'leque', ngòca loo Crist le'n lult tiemp co' nac tiemp ndxè' ale mbyú' Crist loo mèn no mbi'th Crist loo mèn loo izlyo' ndxè' par ngòc con' ndac loo gu' nalle'.  
\v 21 No por cón che'n Crist gu' ngola'sque' loo Diox, Diox co' mblo xban Crist làth mèn nguth. No mbli Diox ngòc con' guryath no con' guryèn loo Crist. No por cón che'n con' co' mbli Diox loo Crist, thidtene mbli nèe gu' gu' le' gu' ndxela'sque' no nzi queeque' lezo' gu' loo cón che'n Diox.  
\v 22 No nalle' por mdubdi'sque' gu' loo di's ndac co' mbìn gu' co' nac lìcpe' cón che'n Diox xalque' mblyath no Xpii Natú' gu' par mbìn gu' di's cón che'n di's ndaca, mbli gu' par ngòc gu' mèn nalì no mèn nambìi loo Diox par tataa mod, lìcque', nque' lezo' gu' ñèe gu' hues xtàa gu' co' ngòo loo cón che'n Diox. No ndxàal tataaque' tolo que' lezo' gu' ñèe gu' thìb xtàa gu' no tedib xtàa gu' dib nzo yéc gu' no dib nzo lezo' gu'.  
\v 23 Xalque' niin loo gu', gu' ngòcle' mèn cub xal thìb mbeto' co' ndxáal loo izlyo'. Per ne'ngàcte con' ndxè' loo gu' xal co'se' ndxáal mèn por ren che'n xud mèn no ren che'n xna' mèn co' ndxath no co' ndlyux. Ndxe'leque', ngòca loo gu' ante por cón che'n xti's Diox. Nè nac di's che'n xti's Diox tac ndli xti's Diox nden' mèn di's xá nac mod co' nque tee ban mèn co'se' ndlab mèn xti's Diox o co'se' ndxòn mèn xti's Diox.  
\v 24 Tac loo libr co' nac xti's Diox ndub di's co' mbez taandxè': 
\pi1 Rye bin mèn co' naban loo izlyo' ndxè' nac xal huan nayèe. No ryethe con' roo no con' xèn co' mbez mèn nac mèn no co' ndli mèn nac xal nac ye' huan co' nxec thìb huiz no thìb ze no maste. Huana mbiiz. Le' ye' co' nxyo'f loo huana ndxàb loo izlyo'.  
\v 25 Per ndxe'leque', di's co' nac xti's Tad Diox thidteneque' nzo. Ne'lyuxte xti's Diox. Tyubque' di'sa xal mbez di's loo libr co' nac xti's Diox. 
\m Pues di's co' nac xti's Diox ndxè' nac di's co' ngo mèn yalbàn loo gu' co' ndlu' xá mod lyá' mèn loo con' ryes. 
\c 2  
\p  
\v 1 Por cona, ngue niin loo gu': Blá' gu' ryethe con' co' nac con' ye'rsin' thìb lad, co' nac ryethe mod co' nquedìi mèn xtàa mèn, no co' nac mod co' ntembìi mèn ro mèn no ntembìi mèn xti's mèn loo xtàa mèn, no co' nac mod co' ndxàn lezo' mèn ñèe mèn xtàa mèn, no co' nac ryethe mod co' nda' mèn cuentyix loo xtàa mèn, no co' nac mod co' nteri'th mèn cuentyix loo xtàa mèn.  
\v 2 Neeque' gu' xal ndxàca loo myen' bix co' diz ngóol co' ndxàaz niiz co' nac xiiz xna' myen', ¿lé'? Lomisque', cua'n gu' mod loo cón che'n xti's Diox par tolo té'th gu' no ta' gu' cuent cón che'n Diox no tyubdi's gu' loo Diox por cón che'n xti's Diox xalque' ndryoo no nxyèn myen' bix co' ndàaz xiiz xna'. Chele' gu' tataa li, le' sya, tataa mod tolo té'th gu' no ta' gu' cuent loo cón che'n Diox par tyubdi'sque' gu' loo Diox no, lìcque', lyá' gu' loo con' ryes thidtene.  
\v 3 Tataa gàcpe'i loo gu' chele' gu', lìcque', mbli la's le' Tad Crist nac thìb Tad ndac. 
\s1 Trè' ndlu' le' Crist co' naban thidtene nac xal thìb quèe co' yub ngóol co' yende chó cuin. 
\p  
\v 4 Cona, niin loo gu': Ftolo gòc gu' mèn nado'. Ftolo té'th gu' no fta' gu' cuent no ftubdi's gu' cón che'n Tad Crist co' thidtene naban. Tad Crist nac loo Diox xal thìb quèe co' ndli mèn us par gàc quèea quèe scuadr che'n liz mèn. Mèn mtè'b Tad Crist no mchobla' mèn Tad Crist. Per loo Diox axta arid ntac Crist. Por cona, mcui Diox Tad Crist par gàc Tad Crist xal thìb quèe scuadr co' tyub squin yòo, co' nee di's, nac thìb con' co' naban co' ngue toxcua' Diox.  
\v 5 Gu', ne, nac xal quèe co' nxo'f o co' ndub albañil loo quèe scuadr co' nac quèe cimient. Fta' gu' lugar loo Diox par li zin' Diox gu' par thidte gàc gu' loo Diox, co' nee di's, nac xal thìb templ co'te' nzo ban Diox. No fta' gu' lugar loo Diox li zin' Diox gu' par gàc ryete gu' co' ndxela's loo Jesucrist xal nguley' co' ngro xà' loo ryethe con' ye'rsin' co' nac xab izlyo' par ante li gu' sirv loo Diox. No ante por cón che'n Jesucrist ngue li gu' con' co' nac con' ndac no co' nac con' co' yòo lezo' Diox.  
\v 6 Por cona, ndub di's loo libr co' nac xti's Diox co' mbez taandxè', ne: 
\pi1 Daa mdoo thìb mbi' loo mèn ciuda Jerusalén. Mbi'a nac xal ner quèe co' mxen albañil co' mdub albañil squin yòo liz mèn. Mcuin mbi'a xal thìb quèea. No anze'f ntac mbi'a par daa. Le' mèn co' yila's loo mbi'a na, mèna ne'tyoo xà'de lezo' no ne'yitacte lezo' mèna loo cón chenen por còn che'n mbi'a.  
\v 7 Por part cón che'n gu' co' ndxela'sle' loo Diox por cón che'n mbi' co' nac Crist co' nac xal quèe squadr, arid ntac Crist co' nac xal quèea loo gu', ne. Per part cón che'n mèn co' ne'tyalte yila's loo Crist, loo mèna tyaaque' di's no tyubque' di's co' ndub loo libr co' nac xti's Diox co' mbez taandxè': 
\pi1 Le' quèe co' mtè'b mèn co' nac xal maistr albañil, quèea ngòc ner quèe scuadr co' ndyub squin yòo. 
\m  
\v 8 Lomisque', tyaaque' di's no tyubque' di'sa no gàcque' di's xal mbez di's ndxè', ne: 
\pi1 Crist ngòc xal thìb quèe co' ndxezi'f no co' ndxega's nii mèn, co' nee di's, co'se' nque quèe nii mèn no axta ndxexud mèn loo quèea. 
\m Pues part cón che'n mèna, mèna ngozi'fque' no ngoga'sque' mèna loo cón che'n Crist co' nac xal quèea por ne'nglide mèna cas no ne'ndub nzade mèna di's co' ndlu' cón che'n Crist. Tac Diox mnibe' lezo' no mdoo lezo' Diox le' ryete mèn co' ne'lide cas no co' ne'ndub nzade loo di's co' ndlu' cón che'n Jesucrist, mèna ryo xà' loo mod co' mnibe' Diox loo mèn par li mèn par yòo ban no mèn Diox loo bé'. No tataa mod tyactìi mèna yiloa por con' mbli mèna. 
\s1 Trè' ndlu' cón che'n mèn co' nzo loo cón che'n Diox no co' nac che'npe' Diox. 
\p  
\v 9 Per part cón che'n gu' co' ngola'sle' loo Crist, gu' nac thìb bin mèn co' mcui Diox par gàc gu' che'npe' Diox. No nac gu' thìb ned mèn co' nac xal nguley' co' ante li sirv loo Diox co' ñibe'pe' loo ryethe con'. No nac gu' loo Diox xal thìb nación mèn co' ngro xà' loo ryethe con' ye'rsin' co' nac xab izlyo' par ante li gu' sirv loo Diox. No nac gu' mèn co' nac che'npe' Diox. Tataa mbli Diox ngòca loo gu' par ya te'th gu' no lu' gu' loo mèn cón che'n zin' roo no zin' xèn co' mbli Diox loo mèn. Yub Diox mblec gu' no mcui Diox gu' par ryo' gu' loo ryethe con' co' ndli ntecuau yéc mèn no co' ndli ntecuau lezo' mèn loo cón che'n Diox. Tataa mbli Diox par mdyub xnìi yéc gu' no par mdyub xnìi lezo' gu' loo cón che'n Diox co' nac thìb con' roo no thìb con' xèn cón che'n Diox par non gu' no ta' gu' cuent cón che'n Diox.  
\v 10 Gu' thidteneque' ne'ngàcte mèn co' ngòc mèn nacionpe' Diox ndoore' yila's gu' loo Crist. Per nalle', nac gu' mèn che'npe' Diox. Thìb cua'a yende chó nglat lezo' gunèe gu'. Per nalle' Diox ndlyatque' lezo' ñèe Diox gu'. 
\s1 Guree ban gu' ante par li gu' sirv loo Diox. 
\p  
\v 11 Gu' co' nac mèn huesen por cón che'n Crist, gu' co' anze'f nque' lezon ñèen, ña'ben loo gu' xal loo mèn tith co' ngro' liz no co' ngro' làaz, co' nzi tee tith co'te' nac liz no co'te' nac làaz, ne'ta'de gu' lugar tyub chol yo'f ye'rsin' co' ndryo' ndlyen' lezo' gu' par li gu'i. Tac ryethe con'a nac con' co' ndli thìb part ndoo lezo' mèn li mèn con' ndac. No tedib part ndoo lezo' mèn par li mèn con' ye'rsin'. Con'a nac xal thìb xó' co' ndli con' ye'rsin' loo xpii mèn no loo alm mèn.  
\v 12 Nabe'ste fque tee ban ndac gu' làth mèn co' tarte libe' Diox no co' tarte ta' cuent cón che'n Diox. Tataa mod, mastale' nalle' ñii yèe ñii tìi mèna cón che'n gu' axta mbez mèn nac gu' mèn ye'rsin'túb, per yiloa mèna hui' xal nac con' ndac co' ndli gu'. No tataa mod mèna gab quetal naroo xèn nac Diox co' mbli nzi tee ban ndac gu' nalle'. Tataa gab mèna co'se' gàc huiz co'se' ta' mèn cuent loo Diox cón che'npe' mèn. 
\p  
\v 13 No por cón che'n Tad Crist, ftub nza gu' no ftubdi's gu' con' co' ñibe' ley co' mxo'f gobiern loo mèn, que naca con' co' ñibe' thìb president por nac president thìb xa' co' más ñibe',  
\v 14 que naca con' co' ñibe' mèn co' nac gobernador co' nac mèn co' mtel' thìb president par tetìi mèn co' nac gobernador mèn co' ndli con' ye'rsin' no par li mèn co' nac gobernador con' co' nac con' guryath no con' guryèn loo mèn co' ndli con' ndac.  
\v 15 Tac Diox, ne, ndlya's le' gu' thidteneque' li con' ndac par tataa mod li gu' par yau' ro mèn naxèn no ro mèn tont par ne'tolode tyoodi's mèna cón che'n gu'. 
\p  
\v 16 Fque tee ban ndac gu' làth chol mèn xal mèn co' yende chó mbee nca' par li gu' chol con' ye'rsin' co' nac cón che'n xab izlyo'. Per mastale' ndli gu' cuent yende chò mbee nca' gu' par li gu' con' ye'rsin' por nzo gu' loo cón che'n Diox, ne'lide gu' xtùuz por nzo gu' loo cón che'n Diox nzoque' mod li gu' chol con' ye'rsin'. Yende xàa, ey. Más huen fque tee ban gu' xalque' mèn co', lìcque', nac mèn co' nxo'f zin' zin' che'n Diox.  
\v 17 Gòp gu' mod co' nac thìb mod ndac loo rye mèn xal ndxàalpe' li gu'i. Fque' lezo' gu' gunèe gu' mèn co' nac hues xtàa gu' por cón che'n Jesucrist. Bzeb gu' loo Diox no bli gu' con' guryath no con' guryèn loo Diox. Gòp gu' mod loo mèn co' nac gobiern co' ñibe' loo gu'. 
\s1 Trè' ndlu' xá mod mxactìi Crist par tataa mod té'th mèn xá mod ndxàal que tee ban mèn. 
\p  
\v 18 Nalle' gu' co' nac moz, ftubdi's gu' no gòp gu' mod gunèe gu' mèn co' nac patrón gu'. Iante tyubdi's gu' no gàp gu' mod loo mèn co' nac patrón ndac no co' nac patrón nado'. Ndxe'leque', ftubdi's gu' no gòp gu' mod loo mèn co' nac patrón nayi', ne.  
\v 19 Co'se' nxec yèe gu' no co'se' ncha'la's gu' co'se' ndxecloo patrón gu' loo gu' por thìb con' co' indxàalte li patrón gu' loo gu' no nxec gu' tac gu' nda'que' cuent no non gu' tataa ndlya's Diox li gu' loo patrón gu', ndxòo lezo' Diox con' ndli gu'a no nac con' co' ndli gu'a thìb con' ndac loo Diox chele' gu' tataa ndli.  
\v 20 Per chele' gu' li ndxep con' ye'rsin' co' ilé'de nac, no cona'te ndli tetìi patrón gu, ¿ché' ndyac gu' naca thìb con' roo loo Diox chele' gu' nquin xec yèe chele' patrón tetìi gu' por con' mbli gu' co' ilé'de nac, cà'? Yende xàa. Per ndxe'leque', chele' patrón gu' ndxecloo loo gu' por ndxep con' ndac co' mbli gu' no ncha'la's gu' no nxec yèe gu' par nabe'ste ngue li gu' zin' loo patrón gu', con'a nac con' ndac loo Diox no con' co' ndxòo lezo' Diox.  
\v 21 Por mxec yèe gu' no por ngòp gu' mod, Diox mcui gu' no mdoo Diox gu' no mblec Diox gu' loo cón che'n Diox. Más de cona, gu' nonque' no nda'que' gu' cuent por cona mxactìi Crist por cón che'n gu' par tataa mod mblu' Crist loo gu' xá mod ndxàal que tee ban gu' xal mque tee ban Crist loo izlyo' ndxè'.  
\v 22 Co'se' mque tee Crist loo izlyo' ndxè' nec thìb mod no nec tedib mod ne'ncua'nte Crist xquin Crist no xtol Crist no ne' ne' nquedìi Crist nec thìb mèn.  
\v 23 Co'se' gunii yèe gunii tìi mèn cón che'n Crist, ne'ncàbte Crist nec thìb di's, co' nee di's, ngàc nayi' Crist. Co'se' asembli mèn mtetìi mèn Crist, ne'ngabte Crist sere Crist ya' Crist par ntin Crist mèn yiloa. Ndxe'leque', mtan' Crist ryethe con' mbli no mèn Crist part che'n Diox par li Diox co' nee lezo' Diox loo mèna, Diox co' nalì no nambìi ndub rez no ngo xtàa cón che'n con' co' ndli mèn loo xtàa mèn.  
\v 24 Yub Crist mxactìi no mden' Crist yalnè lad Crist por cón che'n xtol mèn co'se' mque' mèn Crist loo cruz. Tataa mod ngòca loo Crist par gàc na' mèn co' thidtene yathla's no ryo' yéc na' no ryo' lezo' na' loo ryethe con' co' nac xtol na' no leque tiempa que tee ban ndac na' co' nac thìb yalnaban nalì no thìb yalnaban nambìi loo Diox. Crist mxactìi ryethe con'a par gaca loo gu' ne'tyactìide gu' por cón che'n xquin gu' no por cón che'n xtol gu'.  
\v 25 Gu' nda'que' cuent no nonque' gu' le' gu' mque tee huan loo Diox póla loo ryethe con' co' nac xtol gu' xal thìb partid mbacxil' co' mdyuhuan. Per nalle', gu' ngòo loo cón che'n Crist, Crist co' nquenap gu' xal nquenap thìb pastor mbacxil'. No nquenap Crist alm gu' no xpii gu'. 
\c 3  
\s1 Trè' ndlu' xá mod ndxàal cue ban mèn, mèn co' mselya'. 
\p  
\v 1 Gu' ne, mèngot co' ngue no xin' sa'l, ftubdi's gu' di's co' ñee xin' sa'l gu' loo gu' no co' ñibe' xin' sa'lpe' gu' loo gu' no con' ndlya's xin' sa'l gu' li gu'. Tataa mod chele' ndxep xin' sa'lpe' gu' tarte yila's xal ndlu' di's ndac, nzoque' mod yila's xin' sa'l gu' no li la's xin' sal' gu' lìcque' nac cón che'n Tad Jesucrist por ngüi' xin' sa'l gu' mod co' nque tee ban no gu' xin' sa'l gu'. Tataa mod inquinte tyoodi's no gu' xin' sa'l gu' cón che'n di's ndac no cón che'n Jesucrist.  
\v 2 Le' sya, tataa mod li la's no yila's xin' sa'lpe' gu' loo cón che'n Jesucrist co'se' hui' xin' sa'lpe' gu' loo mod co' nac thìb mod ndacpe' co' ndxàp gu' loo xin' sa'lpe' gu'.  
\v 3 Lomisque' ne, gu' co' nac mèngot, indlyasten le' gu' arid tyoxcua' gu' par nabe'ste ñaa gu' no par nít nayèe ñaa gu' co'se' ndxoc xab gu'. Angab na'i, co'se' ante nít nayèe ñaa yéc gu' ndee gu' bèu yéc gu' no co'se' ndxòo corral or yen gu' no nque yi'f or nza gu' co' arid ntac no co'se' ndxoc xab gu' lar' co' anze'f nabe's ñaa no co' arid náp ntaca.  
\v 4 Ndxe'leque', ndlyazen lu' gu' mod ndac co', lìcpe', ndxàp gu' le'n lezo' gu' no le'n xtùuz gu'. Moda ne'lyuxte loo mèn. Thidtene ndxòo lezo' mèn moda. Thidteneque' nazi' nziri' mèn con xtàa mèn. No nagàl nziri' mèn no rye nda rye ndye'th nziri' mèn làth xtàa mèn. Con' co' ndli gu'a no mod co' cue ban gu'a anze'f ntac loo Diox, ey.  
\v 5 Póla, tataa mdyoxcua' mèngot, mèngot co', lìcque', ngro xà' loo ryethe con' ye'rsin' co' nac cón che'n xab izlyo' no co' ngòc che'npe' Diox. Ngòp mèngota yalxla's loo Diox no mdubdi's mèngota di's co' mnibe' xin' sa'l mèngota loo mèngota no mdub nza mèngota loo con' gunee xin' sa'l mèngota loo mèngota.  
\v 6 Tataa mbli Sar, ne. Mdubdi's Sar loo Abraham. Gu', ne, gàc xal ngòc Sar chele' gu' toloque li con' ndac no chele' gu' ne'tolode zyeb loo nec thìb con'. 
\p  
\v 7 Gu', ne, mènbi' co' nac xin' sa'l mèngot gu', gòc gu' mèn co' huen huen mté'th xá mod ban no gu' xa'got gu' no xá mod quenap gu' xa'got gu'. Bli gu' con' guryath no con' guryèn co' ndxàal li gu' loo xa'got gu'. Iante por nac mèngot mèn delicad li gu' con'a. Ndxe'leque', bli gu' con' guryath no con' guryèn loo mèngot co' nac xin' sa'l gu' tac mèngota, ne, ngue no leque yalnaban co' mda' Diox loo mèngota xalque' nac yalnaban co' mda' Diox ngue no gu' nalle'. Tataaque' bli gu' loo mèngotpe' gu' par de que yende cón nca' no yende cón ncà loo gu' par thidte cuez no gu' xa'got gu' Diox. 
\s1 Trè' ndlu' cón che'n mèn co' ndyactìi ante por mbli mèn con' ndac. 
\p  
\v 8 Por lult, ndlyazen thidte cue ban gu'. Thidte gàc xtùuz gu' no thidte gàc lezo' gu'. No thidte lyat lezo' gu' ñèe gu' thìb xtàa gu' no tedib xtàa gu'. Ndlyazen que' lezo' gu' ñèe gu' hues xtàa gu' por cón che'n Jesucrist xalque' mèn co' ndxàc hues. Gòc gu' mèn co' ndyac no xtàa. Gòc gu' mèn co' indlu'de ndye's.  
\v 9 Ne'co xtàade gu' loo nec thìb mèn leque con' ye'rsin' co' ndli mèn loo gu'. Ne' ne' li gu' par ta' gu' xyàn lezo' mèn xal nda' mèn xyàn lezo' gu'. Ndxe'leque', más huen bli gu' con' ndac loo mèn co' mbli con' ye'rsin' loo gu. Tac Diox ngurez gu' no mblec Diox gu' par angli Diox con' ndac loo gu'.  
\v 10 Tac loo libr co' nac xti's Diox ndub di's co' mbez: 
\pi1 Le' mèn co' lya's ban nen tiemp no co' lya's gàc con' ndac loo loo izlyo', ndxàal gàp lezo' mèna par ne'tyoodi'ste mèna chol di's ye'rsin'. Ne' ne' gàc mèna mèn gutyè'.  
\v 11 Ne'ta'de gu' lugar tyoo nii gu' no tyoo ya' gu' xal ndli mèn co' ndli con' ye'rsin'. Ndxe'leque', bli gu' con' ndac loo hues xtàa gu'. Ftu' ftàl gu' co' nac xèn xyàn co' ndxàc loo gu'. Bli gu' co' nzote mod li gu' par yo nagàl lezo' gu' no gure ban gu' rye nda gu' no rye ndye'th gu' làth xtàa gu'.  
\v 12 Tac Tad Diox nquenap no indlá'ya'de Tad Diox mèn co' nac mèn nalì no mèn nambìi. No ndxòn Tad Diox ro mèna co'se' mbez mèna Diox par li Diox con' co' ña'b mèna. Per ndxe'leque', Diox thidtene ingüi'de loo mèn co' ndli con' ye'rsin'. No ndxezan Diox ndxegaa mèna loo con' ye'rsin' co' ndli mèna. 
\p  
\v 13 ¿Chó mèn li con' ye'rsin' loo gu' chele' gu' thidteneque' mbli nèe gu' par li gu' con' ndac, à'? Yende chò mèn gác li con' ye'rsin' loo gu' tataa, ¿lé'?  
\v 14 Per mastale' ndxàc yaltìi loo gu' por nzi tee ban lì gu' no por nzi tee ban ndac gu', huen ndxàca loo gu' no huen nda gu' loo cón che'n Diox. Ne'zyebte gu' loo nec thìb con'. No ne' ne' ya ye'th lezo' gu' nec thìb mod no nec tedib mod par tyoo xà' lezo' gu' loo cón che'n Crist.  
\v 15 Ndxe'leque', bli gu' par gàc con' guryath no con' guryèn loo Crist xalque' Tad gu' le'n xtùuz gu' no le'n lezo' gu'. No bli gu' cas loo Crist. Nalas gure gu' par gác gu' càb gu' loo chol mèn, mèn co' ña'b thìb razon o thìb consej loo gu' co' nac cón che'n co' ndxela's gu' loo Diox no co' nzi quee lezo' gu' loo Diox. Bli gu'i xal mèn co' indye'ste. Nado' di's no nado' cuent bli gu' cas loo mèn no gòp gu' mod loo mèn co'se' ña'b mèn loo gu' par tyoodi's no gu' mèn.  
\v 16 Nabe'ste fque tee ban ndac gu' no nabe'ste fque tee ban lì gu' par ne'ten'te gu' le'n lezo' gu' le' gu' ngue li con' ye'rsin'. Le' sya, mèn co' nazab ndyoodi's cón che'n xá mod nque tee ban gu' mastale' nabe'ste nque tee ban ndac gu' xal mèn co' ndxela's loo Crist, ndxe'leque', mèna ten' le'n lezo' mèna no thyon mèna cón che'n xti'spe' mèn co'se' ndyoodi's mèna cón che'n gu'.  
\v 17 Más huen gàc yaltìi loo mèn por ndli mèn con' ndac, chele' Diox ndlya's tataa gàca loo mèn, leque gàc yaltìi loo mèn por ndli mèn con' ye'rsin'.  
\v 18 Tac yub Crist mden' yalnè no mxactìi Crist axta nguth Crist por cón che'n xquin na' no xtol na'. Thidte vez ngòca loo Crist por cón che'n xquin no xtol che'n ryete mèn. Crist ngòc thìb mbi' ndac. Per ndxe'leque', le'le' Crist mxactìi por na', na' co' nac mèn ye'rsin', par tataa mod yòo na' loo cón che'n Diox por cón che'n Crist. Bél'yòo lad Crist nguth per xpii Crist no alm Crist ne'ngathte. Ndxe'leque', nzo ban Crist por cón che'n con' roo con' xèn co' nzo la's nii no co' nzo la's ya' Xpii Natú' che'n Diox.  
\v 19 Láth nzo ga's bél'yòo lad Crist co' ngòc thebol le'n ye'r quèe co' ngòc bá' co'te' mca's mèn Crist le'n izlyo', ngua lu' xpii Crist no alm Crist loo taamas alm no taamas xpii co' nzo gòo le'n thìb lugar co' ngòc xal thìb lezi'f le' Crist na, mbli gan loo con' ye'rsin' co' nac cón che'n Mebizya.  
\v 20 Almaa no xpiia ne'ndubdi'ste loo Diox co'se' ngòc tiemp pólle'a pólle'a le'n huiz no le'n tiemp co'se' mque tee ban thìb mbi' co' ngro' lèe Noé. Le'n tiempa Diox mdub bed no mcha'la's Diox con mèna láth mdyoxcua' yòoyaa co' mtoxcua' Noé. Le'n yòoyaaa nagabte mèn ngòc co' ngòo le'n yòoyaaa, co' nee di's, xon mèn. Mèna ngòc mèn co' mblyá' loo nít no loo yuuloo co' ngulàa tiempa.  
\v 21 Nít che'n yuuloo co' ngure loo izlyo' tiempa ndlu' loo na' no nda' cuent loo na' cón che'n bautism co' ngòc loo na'. No por cón che'n bautisma nanee na' le' na' mblyá'le' loo con' ryes nalle'. Per bautism co' ngòc loo na' inacte bautisma par gab na' mtembìi bautism lad na' no maste. Ndxe'leque', naca le' por cón che'n bautism co' ngòc loo na' mna'b na' loo Diox li Diox par ne'tolode ten' na' le'n lezo' na' cón che'n xquin na' no xtol na' co' mton' Diox loo na'. Más de cona, bautism co' ngòc loo na' ndlu' loo na' mblyá' na' loo con' ryes por cón che'n co'se' ngro xban Jesucrist làth mèn nguth.  
\v 22 Ngoloa, nguáp Jesucrist loo bé'. Ndub Jesucrist cuat Diox loo bé'. No ryete angl, no ryete xa' co' ñibe', no ryete xa' co' ndxàp con' la's nii no la's ya', ryete xa'a mde's nii no mde's ya' loo Jesucrist par ñibe' Jesucrist loo ryethe con'. 
\c 4  
\s1 Trè' ndlu' xá mod ndxàal li mèn sirv thìb mod no tedib mod co' gác mèn loo Diox. 
\p  
\v 1 Cona, ngue niin loo gu': Texal mxactìi Crist no mden' Crist yalnè lad Crist, gu', ne, ndxàal cuec lezo' par tyactìi gu' chele'i nquin gàc loo gu'. Gu' nda'que' cuent le' chol mèn co' mxactìile' lad por cón che'n Crist, mèna ndlu', lìcque', ya intolode cua'n mèna xquin mèna no xtol mèna loo Diox.  
\v 2 Tataa mbli mèna par ban mèna taandxep tiemp loo izlyo' ndxè' ante xal nee lezo' Diox. No làtha, ya ne'tyubte yo'f lezo' mèn loo ryethe con' co' ndxuhua nèe lezo' mèn co' nac cón che'n xab izlyo' ndxè'.  
\v 3 Ya mbyaale' mda' gu' gust lezo' gu' loo huax con' co'se' tarte yila's gu' loo Diox tiemp co' ngòc póla xal ndli mèn co' indlibe'de Diox. Tiempa, gu' mque tee ban loo chol con' ye'rsin' co' mdub yo'f lezo' gu' par li gu'. Angab na'i, ngòc gu' mènguy. Mque tee yuhua xle' gu' co'se' ndli gu' chol lni. Mque tee yu xle' gu' che'n mèn hor co' ndlya's gu' axta plóthe. Ayen yii ayen den ndxèn mbez yèe gu'. Mque tee tuuz gu' axta plóthe, ne. Mbli gu' chol lni loo chol mdo' no loo chol gunab co' ndxab Diox indxàalte còo' mèn yéc mèn loo no indxàalte tyub xib mèn loo.  
\v 4 Nalle' mèna mbez loo xtàa mèn no loo lezo' mèn chonon inqueltàade gu' con mèna loo ryethe con' ye'rsin' co' ndub yo'f lezo' mèna loo mod co' nque tee ban mèna. No por cona, nazab ñii yèe ñii tìi mèna no mbez mèna ngòc nguàal con' cón che'n gu'.  
\v 5 Per prob mèna naquinque' ta' cuent loo xa' co' ngòc nable' par tub rez xa' cón che'n mèn loo mèn co' be' naban no loo mèn co' nguthle'.  
\v 6 Por cona, ngue niin loo gu': Loo mèn co' nguthle' nalle', mblo mèn yalbàn no mde'th mèn cón che'n xá mod lyá' mèn loo con' ryes láth be' ngure ban mèna par gàc loo mèna co'se' gath bél'yòo lad mèna, yòo ban no xpii mèna no alm mèna Diox xalque' naban Diox. Tataa ngòca loo mèna mastale' yub Diox gunee lezo' cón che'n mèna nquin gath bél'yòo lad mèna xalque' ndxath rye mèn. 
\p  
\v 7 Nase ya nde zin' gaxle' tiemp co'se' tlo lyux tiemp ye'rsin' co' naban na' loo izlyo' ndxè'. Cona, ngue niin loo gu': Ndxe'sleque' fque tee ban gu' no nalas fque tee ban gu' loo izlyo' ndxè'. No ne'yathla'ste gu' par tolo cuez gu' Diox ze no yál'.  
\v 8 Más de cona, loo ryethe con' co' ngue niin loo gu' ndxè', ndlyazen que' lezo' gu' gunèe gu' hues xtàa gu' axta plóthe. Tac mèn co', lìcque', nque' lezo' ñèe hues xtàa mèn axta plóthe, mèna ingòode xyàn lezo' ñèe mèna hues xtàa mèna arid. Luega nteri'th ntecan' mèna xyen xyàn co' ndxòo lezo' mèn ñèe mèn hues xtàa mèn.  
\v 9 Fta' gu' liz gu' cued mèn co' ña'b loo gu' par cued mèn liz gu'. Per ne'cuez nguixte gu'i loo mèn por mda' gu' liz gu' nguled mèn.  
\v 10 Lomisque' ne, li thìb thìb gu' sirv loo chol xtàa gu' par lyath no gu' xtàa gu' xal nzote mod co' nac co' mda' Diox lugar gác gu' li gu' sirv loo mèn. Tataa bli gu' xal mèn co' nxo'f zin' ndac co' nac thìb zin' co' angmbli Diox loo gu' par li gu' sirv loo mèn.  
\v 11 Mèn co' mda' Diox lugar gác mèna par tyoodi's no mèna mèn cón che'n Diox, tyoodi's no mèna mèn xalque' ndyoodi's no Diox mèn. No chele' chol gu' lya's ta' thìb huiz zin' anxle' loo xtàa gu', ne'cua'nte gu' mod guth gu' má' xi'tha. Bli gu' zin'a xal ndxàal li gu' zin' xal mda' Diox fuerz loo gu' par li gu'i. Bli gu' le' ryete con' co' li gu'a càba gab mèn con' roo no con' xèn cón che'n Diox no gab mèn natú' nac Diox, ne, por cón che'n Jesucrist. Ndlyazen gàc con' roo no con' xèn loo Jesucrist no ndlyazen yan' ryethe con' roo no ryethe con' xèn la's nii Jesucrist no la's ya' Jesucrist le'n lín' co' ntlo, no le'n lín' co' ndxelo, no le'n lín' co' ne'lith node. Taandxè' gàca. 
\s1 Trè' ndlu' xal ndxàal que tee ban mèn co'se' ndxàc yaltìi loo mèn, mèn co' ndxela's loo cón che'n Diox. 
\p  
\v 12 Mèn huesen por cón che'n Crist, gu' co' anze'f nque' lezon ñèen, ne'gàcte gu' mèn co' arid ne'ñeede cón, chàa, gàc loo gu' co'se' ndxàc chol yaltìi tín' loo gu'. Ne'ten'te gu' le'n lezo' gu' con' co' ndxàc loo gu' nac thìb con' co' tarte ñèe mèn gàc loo izlyo' ndxè'.  
\v 13 Ndxe'leque', ftac lezo' gu' co'se' gàca loo gu' le' gu' tyactìi no Crist ndxep par gàca loo gu' tyac tín' lezo' gu' co'se' ñèe gu' gàc con' roo no con' xèn loo Crist co'se' yi'th Crist loo izlyo' ndxè' tedib vez.  
\v 14 Chele' mèn ñii ngòc nguàal con' loo gu' por cón che'n Crist, huen gàca loo gu' no huen nda gu' loo cón che'n Crist. Co'se' gàca tataa loo gu', ñee gu' no ta' gu' cuent le' Xpii che'n Diox, Xpii co' nac Xpii roo no Xpii xèn, nzo loo gu'. Mèna ñii yèe ñii tìi cón che'n Crist. Per ndxe'leque', gu' ndli ndxàc con' guryath no con' guryèn loo Crist.  
\v 15 Thìb descuid nquin tyactìi gu' ndxep. Chele' gu' nquin tyactìi ndxep, bla's gu' no huen huen quenap gu' gu' par ne'tyactìide gu' por mbeth gu' mèn; por mbli huan' gu'; o por mbli gu' con' ye'rsin'; o por mbla's ro' gu' di's cón che'n tedib mèn co' inacte cón che'n gu'.  
\v 16 Ndxe'leque', chele' chol gu' ndyactìi ndxep ante por nzo gu' loo cón che'n Crist no maste, inquinte thyon gu'. Ndxe'leque', ndxàal gab gu' le' Diox nac Diox roo no Diox xèn por mda' Diox lugar loo gu' ne' gu' lèe mèn co' nac che'n Crist por nac gu' mèn co' nzo loo cón che'n Crist. 
\p  
\v 17 Nase mzinle' huiz no mzinle' tiemp co'se' tlo tub rez Diox cón che'n con' co' ndli mèn co' nac mèn guliz Diox, co' nee di's, na' co' ndxela's loo Diox por cón che'n Jesucrist. Chele' Diox ya tataale' mtlo ngue tub rez cón che'n na' par tetìi Diox na', ¿xá nee gu'? ale'que' ne' gàc más con' ye'rsin' tín' loo mèn co', por derech, ne'ndubdi'ste loo di's ndac che'n Diox co' ndlu' xá mod ndlyá' mèn loo con' ryes, ¿lé'?  
\v 18 Lomisque' ne, chele' mèn co' nac mèn ndac no mèn nalì loo Diox añenti mdyal par ngulàa yéc mèn no ngulàa lezo' mèn par mblyá' mèna loo con' ryes, ale'que' loo mèn ye'rsin' co' ndxàp xtol, pà yila's mèn lyá' mèna loo con' ryes, ¿lé'? Yende xàa.  
\v 19 Por cona, ngue niin loo gu': Mèn co' ndxela's loo Diox no co' ndyactìi xal nac co' gunee lezo' Diox, mèna ndxàalque' tolo li con' ndac loo hues xtàa mèna. No ndxàalque' toloque' na'b mèna quenap Diox alm mèna no xpii mèna la's ya' Diox no leque tiempa gàp mèna yalxla's loo Diox le' Diox lii loo mèna. Yub Diox nac Diox co' mbli par nzo na'. No yub Diox ndlique' co' mcàbgòn Diox li Diox loo mèn. 
\c 5  
\s1 Pedr ngue co'x loo mèn co' ndxela's loo Diox. 
\p  
\v 1 Daa, Pedr nac thìb xa' gox nalle' co' lalque' ngox xal ngox ndxep mèngool co' nzo làth gu' co' nqueltàa no gu'. Gunèen co'se' mxactìi Crist. No ndan cuent cón che'na loo mèn no ndlu'en loo mèn xá mod mxactìi Crist. Thidte gàc con' roo no con' xèn loo ryete na', yiloa. Por cona, ngue co'xen loo mèngoola nalle'.  
\v 2 Ndlyazen le' mèngoola quenap mèn co' ngòo loo cón che'n Diox co'te' nqueltàa gu' par nedrè', mèn, co' nee di's, nac xal mbacxil'pe' Diox. Ndlyazen li mèngoola con' co' ngue co'xen loo mèngoola loo di's ndxè' dib nzo yéc mèngoola no dib nzo lezo' mèngoola xal mèn co' huen nzo lezo' xal neete lezo' Diox. Indlyasten a la fuerz li mèngool con' co' ngue co'xen loo mèngool ndxè'. Ne' ne' indlyazen li mèngoola xal mèn co' ante nde yath ñèe tmi.  
\v 3 Ne' ne indlyazen xo'f zin' gu' zin' ndxè', mèngool, xal mèn co' ndxàc che'n thìb con' no xal mèn co' ñibe' loo xtàa mèn, loo mèn co' ndyoo ner gu' loo no mèn co' ndyoo naa gu' loo. Ndxe'leque', cua'n gu' mod blu' gu' gu' loo mèn co' nac xal mbacxil' le' gu', lìcque', nque tee ban ndac no nque tee ban lì gu' loo cón che'n Diox.  
\v 4 Tataa lyazen li gu'. Le' sya, co'se' yú'loo Tad Jesucrist co' nac merpe' pastor co' ndyoo ner no co' ndyoo naa loo mèn co' nzo loo cón che'n Diox, xal nquenap thìb pastor mbacxil', huiza gu' gàc che'n no yan' no gu' thìb con' roo no thìb con' xèn co' inacte xal thìb coron co' natoxcua' con laa nayèe co' lueg ngol'. 
\p  
\v 5 Lomisque' lyazen ne, gu' co' nac myen'bi' no gu' co' nac myen'got, ftubdi's gu' loo con' ñibe' mèngool loo gu'. Lomisque', ndlyazen le' ryete gu' gàc nado' loo thìb gu' no loo tedib gu' no gòc gu' mèn co' ncua'n mod gàc con' ndac loo hues xtàa gu' por cón che'n gu'. No ne'gàcte gu' mèn nayi'. 
\pi1 Tac Diox ndxecloo no ndxàc Diox ngolo ngola's loo mèn co' ndye's no loo mèn co' nxyal'. Per ndxe'leque', Diox ndlyath no mèn nado' co' indye'ste no mèn co' inxyal'te loo ryethe con' ndac cón che'n Diox. 
\p  
\v 6 Cona, ngue niin loo gu': Gòc gu' mèn nado' loo ryethe mod co' ndxàp gu' tac Diox ndxàp rye loothe con' la's nii Diox no la's ya' Diox. Chele' gu' tataa li, le' sya, Diox li par gàc gu' mèn roo mèn xèn co'se' gàcpe' huiz co' nanee Diox ndxàal gàc gu' mèn roo mèn xèn.  
\v 7 Yende chó mport nzo lezo' Diox por ndxath ndlyux gu' loo cón che'n gu'. Más huen gurez gu' Diox por cón che'n ryethe con' co' nde che loo gu' no con' co' nden' gu' no con' co' ndli nxi lezo' gu'. Tac ndxe'leque', le'le' loo Diox ndxàca thìb zin' cón che'n gu'.  
\v 8 Lomisque', ndlyazen gòc gu' mèn nalas no mèn lijer xal mèn co' nquenap liz thìb mèn co' ndxàp che'n. Tac Mebizya co' nac ngolo ngola's che'n gu' ngue tee cua'n mod par telux Mebizya gu' xal thìb mbee's co' mbez yèe co'se' ngue tee lan' mbee's, ncua'n mbee's co' hua mbee's.  
\v 9 Gòp lezo' gu' par nec thìb mod no nec tedib mod ne'lide gu' nec thìb con' co' nee lezo' Mebizya li gu'. Más huen bli nèe gu' gu' loo cón che'n Crist co' ndxela's gu'. Tac gu' naneeque' no nda'que' gu' cuent le' ryete mèn co' ndxàc hues gu' por cón che'n Crist co' nzo dib athu loo izlyo' nzi tac leque yaltìi co' ndyac gu' par nedrè'.  
\v 10 Per co'se' riid yaltìia loo gu' co' ndxàc ndxep tiemp loo gu', Diox li par gàc gu' mèn co', lìcque', mtéth no mèn co' nda'que' cuent no mèn co' ndyubdi'sque' loo cón che'n Diox. No Diox li par leque gu' li nèe gu' loo cón che'n Crist. No li Diox par ne'tolode gàc gu' mèn co' nac chop loo chop la's loo cón che'n Diox. Leque yub Diox angndli ndxàc rye loothe con' ndac loo na'. No leque yub Diox nac Diox co' ngurez na' no mblec Diox na' par gàc che'n na' no par yan' no na' rye loothe co' nac con' roo con' xèn che'npe' Diox tac thidte ndxàc na' con Crist no ngòo na' loo cón che'n Crist thidtene.  
\v 11 Ndlyazen tolo gàc con' roo no con' xèn loo Crist no ndlyazen yan' ryethe con' roo no ryethe con' xèn la's nii Jesucrist no la's ya' Jesucrist le'n lín' co' ntlo, no le'n lín' co' ndxelo, no le'n lín' co' ne'lith node. Taandxè' gàca. 
\s1 Con' ndxè' nac lult di's co' mque' Pedr ye's loo mèn. 
\p  
\v 12 Mtel'en cart ndxè' loo gu' con Silvan co' ndlin cuent nac thìb hues na' co' altant ndoo loo cón che'n Crist. Loo cart ndxè' mco'xen loo gu' no mblin le' gu' nda' cuent co' huenleque' le' ryethe yalndac co' angndli Diox loo gu' ndlu' loo gu' le' Diox, lìcque', nque' lezo' ñèe Diox gu'. Por cona, ftolo gure nèe gu' loo cón che'n Diox.  
\v 13 Mèn co' nqueltàa loo cón che'n Diox yèez Babiloñ, mèn co' Diox mcui xalque' mcui Diox gu', mèna ngue nii Diox loo gu' loo cart ndxè'. Ngue nii Marc, co' nac xal xgan' daa, Diox loo gu', ne.  
\v 14 Co'se' ngue nii gu' Diox loo hues xtàa gu' loo cón che'n Crist, fxen gu' ya' xtàa gu' xalque' nac mod co' ndxàp gu', gu' co' nqueltàa loo cón che'n Diox. 
\p No ndlyazen yo nagàl lezo' ryete gu' loo Diox no cue ban gu' rye nda gu' no rye ndye'th gu' con xtàa gu', gu' co' nac che'npe' Jesucrist. Taandxè' gàca loo gu', ndee gu'.